༼ཨཱཿ༽ ཆོས་ཚན་གཉིས་པ་སྙན་རྒྱུད་ཤོག་དྲིལ་ཡིད་བཞིན་ནོར་བུ།

༂ ཀློང་ཆེན་སྙིང་གི་ཐིག་ལེ་ལས་བདེ་སྟོང་རླུང་གི་རྫོགས་རིམ་སྙན་རྒྱུད་ཤོག་དྲིལ་ཡིད་བཞིན་ནོར་བུ་བཞུགས༔

རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་མཛོད་ལས་བདེ་སྟོང་གི་ཡེ་ཤེས་བསྐྱེད་པའི་རླུང་གི་རྫོགས་རིམ། སྙན་རྒྱུད་ཅེས་གསུངས་པ་དཔེ་རྒྱུད་མ་ཡིན་པའི་སྙན་རྒྱུད་ཤོག་དྲིལ་དུ་བཀོད་པ། འདིའི་བྱེད་ལས་དང་མཐུན་པའི་མཚན་ལ་ཡིད་བཞིན་ནོར་བུ་བཞུགས་ཞེས་སོ། །ཀུན་བཟང་གདོད་མའི་ཀློང་ལ་ཕྱག་འཚལ་ལོ༔ ཞེས་གསུངས་ཏེ། དེ་ཡིས་གཞི་འབྲས་དབྱེར་མེད་པའི་བདག་ཉིད་རང་རིག་དོན་གྱི་གནས་ལུགས། ཆོས་ཉིད་གདོད་མའི་ཀློང་། དེ་གང་ཡིན་ན་ཕྱོགས་བཅུ་དུས་གསུམ་རྒྱལ་བ་ཐམས་ཅད་ཀྱི་ཡབ་བམ་སངས་རྒྱས་ཐམས་ཅད་ལ་ལམ་སྟོན་པ་པོ། ཐོག་མའི་ཀུན་བཟང་འོད་མི་འགྱུར་བ་དང་པོའི་སངས་རྒྱས་གང་ཡིན་པ་དེ་ཉིད་ཀྱི་དགོངས་པ་མི་འགྱུར་བའི་ཀློང་ལ་ཕྱག་འཚལ་ནས། མ་འོངས་དུས་ཀྱི་སེམས་ཅན་རྣམས༔ ཚེ་དང་བསོད་ནམས་ལོངས་སྤྱོད་དབུལ༔ སྒྲུབ་པའི་ལོང་མེད་སྙིང་རུས་ཆུང༔ དེ་ཚེ་སྐུ་གསུམ་བཞུགས་སྟངས་ལ༔ བརྟེན་ནས་འོད་གསལ་རྫོགས་ཆེན་དོན༔ རྩོལ་མེད་ལྟ་བུའི་ལོང་མེད་ན༔ ཞེས་མ་འོངས་ཕྱི་མའི་དུས་སྙིགས་མའི་སྐབས་ཀྱི་སེམས་ཅན་གདུལ་བྱ་བསོད་ནམས་དང་སྐལ་བ་དམན་པའི་རིགས་ཅན་དམ་ཆོས་སྒྲུབ་པའི་ཁོམ་ལོང་མེད། ཡོད་ཀྱང་བདུད་ཀྱིས་བར་ཆད་མང་། དེས་མི་ཚད་བློ་ཆུང་བས་སྒྲུབ་ཚུགས་འཛིན་པའི་སྙིང་རུས་ཆུང་བའི་རིགས་ཅན་དེ་དག་གིས། སྐུ་གསུམ་ཞེས་པ་གང་ཡིན་ན་ཆོས་ལོངས་སྤྲུལ་གསུམ་གྱི་བཞུགས་སྟངས་དང་གཟིགས་སྟངས་ལ་བརྟེན་ནས་ཟབ་ལས་ཆེས་ཟབ་ཀྱི་ཆོས་གསང་ཆེན་མན་ངག་སྡེའི། འོད་གསལ་རྫོགས་ཆེན་གྱི་རྩོལ་མེད་འབྲས་བུ་ཐེག་པའི་བསྟན་དོན་མཐར་ཐུག་སྐུ་གསུམ་འབྲས་བུའི་ཐོབ་བྱར་མི་རེ་བར། སྐུ་གསུམ་ལམ་སྣང་དུ་བྱས་ནས་སྣང་བཞི་མཐར་ཕྱིན་ཆོས་ཟད་གདོད་མའི་སར་སྐྱེ་བའི་རྩོལ་མེད་ཐོད་རྒལ་གྱི་ལམ་ཀ་དག་དང་ལྷུན་གྲུབ་ཟུང་དུ་འཇུག་པ། ཀ་དག་སྟོང་བའི་འོད་གསལ་དང་ལྷུན་གྲུབ་སྣང་བའི་འོད་གསལ་ཟུང་འབྲེལ་གྱི་དགོངས་པ་ཉམས་སུ་ལེན་རྒྱུའི་སྐལ་བ་མཆོག་དང་མ་ལྡན་ན་ཞེས་གསུངས་པ་རེད། གནད་ལ་བརྟེན་པའི་ཐབས་ཀྱི་ལམ༔ རླུང་སེམས་དབྱེར་མེད་ངེས་པའི་གནད༔ བདུན་ཕྲག་གསུམ་གྱིས་འཁོར་བ་ལ༔ མི་ལྡོག་ལམ་རྟགས་ཡོན་ཏན་ཀུན༔ མངོན་གྱུར་སྙན་བརྒྱུད་ཟབ་མོའི་ཆོས༔ རྡོ་རྗེ་སེམས་དཔའི་གསང་ལམ་ཆེ༔ འདི་ལས་གཞན་དུ་ངས་མ་བཤདཿ བདེན་རྫུན་ལག་ཏུ་ལོང་ལ་ལྟོས༔ ཞེས་གནད་ལ་བརྟེན་པའི་ཐབས་ཀྱི་ལམ་ཞེས་གསུངས་ན། གནད་གང་ཡིན་ན་གནད་རྩ་རླུང་ཐིག་ལེ་ལ་བརྟེན་པའི་གསུངས་པ་རེད། ཐབས་ཀྱི་ལམ་ཟེར་བ་དེ། ཐབས་ལམ་དང་གྲོལ་ལམ་ཀྱི་ཟླ་ཕྱེ་བའི་ཐབས་ལམ་དམིགས་སུ་བཀར་བ་མ་ཡིན་པར། ཐབས་དང་ཐབས་བྱུང་གིས་ཟླས་ཕྱེ་བའི་ཐབས་ཀྱི་ལམ་འདི་བསྟན་པ་ཡིན་ཞེས་གསུངས་པ་རེད། འདི་མྱུར་ལམ་ཡིན་པར་བསྟན་པའི་བརྡ་ཆད་ལ་རླུང་སེམས་ལས་སུ་རུང་ནས་འཁོར་བ་ལ་ལྡོག་མི་དགོས་པའི་ལམ་རྟགས་ཀྱི་ཡོན་ཏན་བརྙེས་པར་བྱེད་པའི་སྙན་བརྒྱུད་ཀྱི་གདམ་པ་ཟབ་མོ་ཡིན་ལ། དེ་ཡིན་པའི་རྟགས་ལ་བདུན་ཕྲག་གསུམ་གྱི་འཁོར་བ་ལ་ཕྱིར་ལྡོག་མི་དགོས། གང་ཟག་དབང་རྣོན་གྱི་ཆོས་རྡོ་རྗེ་སེམས་དཔའི་གསང་ལམ་འདི་ལས་ཟབ་པ་ཁོང་གིས་མ་བཤད། ཨེ་བདེན་མི་བདེན་བདེན་རྫུན་ལག་ལ་ལོངས་དང་ཤེས་ནི་རེད་ཅེས་གསུངས། འདི་དབང་རྣོན་ལ་སྒྲ་ཇི་བཞིན་པ་དང་རིམ་གྱིས་པ་ལ་ཡང་དམིགས་པ་མཆོག་ལ་བརྟེན་པའི་རྣམ་པས་བག་ཆགས་ཁྱད་པར་ཅན་འདི་རྒྱུད་ལ་བཞག་པ་ལ་དགོངས་ཏེ་དེ་ལྟར་གསུངས་པ་རེད། དེ་ལྟར་འཆད་པར་དམ་བཅས་ནས། གཅིག་ལས་གཉིས་སུ་སྤེལ་བས་ན༔ དམ་ཚིག་ཉམས་པས་དམྱལ་བར་ལྟུང༔ ཁྱད་པར་ཁ་མཁས་ཁོང་གནག་ཅིང༔ གཡོ་སྒྱུས་བླ་མའི་ངོ་སྲུང་བའི༔ དྲེད་པོ་ཆོས་ཀྱི་རྒྱུས་ཅན་ལ༔ གདམས་པ་འདི་ནི་རླུང་ཕྱོགས་ཙམ༔ བསྟན་ཀྱང་སྲོག་གི་གཤེད་མར་བྱེད༔ དེ་ཕྱིར་སྙིང་ལས་གཅེས་པར་ཟུང༔ ས་མ་ཡ༔ འདི་སྙན་བརྒྱུད་ཀྱི་གདམས་པ་ཡིན། སྤྱིར་ན་གཅིག་ལས་གཉིས་སུ་མི་སྤེལ་བ་ཆིག་བརྒྱུད་ཀྱི་གདམས་པ་ཟབ་མོ་ཡིན། ཁྱད་པར་དུ་ཁ་མཁས་ཁོག་ནག་གཡོ་རྒྱུས་ཟོལ་སྦྱོར་ལ་མཁས་པའི་དྲེད་པོ་ཆོས་རྒྱུས་ཅན་ལ་ཡང་དགོས་འདི་བསྟན་མི་ཉན། གསང་བ་མི་སྲུང་བར་དམ་ཚིག་ཉམས་པའི་རིགས་ཅན་གང་ཟག་ཐ་ཤལ་བ་དེ་འདྲ་ལ་སྙན་རྒྱུད་ཟབ་མོའི་གདམས་པ་འདི་བསྟན་བཞག་ན། སྟོན་པ་པོ་རང་ཉིད་ཀྱི་སྲོག་གི་གཤེད་མར་འགྱུར་བ། རྒྱུ་མཚན་དེའི་ཕྱིར་ན་ཕྱི་རབས་པ་རྒྱུད་འཛིན་ལས་ཅན་ཐམས་ཅད་ཀྱིས་གདམས་པ་འདི་ཉིད་སྙིང་ནས་གཅེས་པར་ཟུངས་ཞེས་གསུངས་ནས། ས་མ་ཡ་དམ་ཚིག་གི་རྒྱས་ཚིག་མཇུག་མནན་པ་ཡིན། སྐལ་ལྡན་སྙིང་འདྲའི་བུ་ལ་གཏད་དགོས་པའི་གོ་དོན་འདི་ཤུགས་ལ་འབྱུང་བ་རེད། ཤིན་ཏུ་སྣོད་དང་ལྡན་པའི་དབང་རབ་སྐལ་ལྡན་ལས་ཅན་ནམ་རྫོགས་ཆེན་ཨ་ཏིའི་ཟབ་ཁྲིད་བྱེད་ཆོག་སའི་སློབ་མ་ལ། གདམས་ངག་རྒྱུན་མི་ཆད་པའི་དགོས་པ་ལ་མང་པོར་སྤེལ་ཞིང་ཆིག་བརྒྱུད་ཀྱི་བྱིན་རླབས་མི་ཉམས་པས་བརྒྱུད་པའི་བབས་སྲོལ་དེད་དགོས་པ་རེད། འདི་ལ་སྔོན་འགྲོ་དངོས་གཞི་རྗེས་དགོས་པ་བསྟན་པ་དང་གསུམ་གྱི་ཆིངས་ཀྱིས་བསྟན་པ་ལས།

དང་པོ་ཉམས་ལེན་གྱི་སྔོན་འགྲོ།

དང་པོ་ཉམས་ལེན་གྱི་སྔོན་འགྲོ་ནི། དང་པོ་མར་ལས་ཧར་ལངས་ཏེ༔ ལྟོ་སྟོང་རླུང་རིག་དྭངས་པའི་ཚེ༔ སྔོན་འགྲོ་སྤྱི་དང་ཁྱད་པར་དུ༔ བླ་མའི་རྣལ་འབྱོར་གནད་དུ་བསྣུན༔ མོས་གུས་གདུང་ཞིང་དབང་བཞི་བླང༔ རྫོགས་ཆེན་སྒོམ་པའི་རྣལ་འབྱོར་པ་ཞིག་གིས་དུས་བཞིའི་མཉམ་སྦྱོར་གྱི་གདམ་པ་ཉམས་སུ་ལེན་དགོས། དེ་ལ་ཉིན་མོ་སྣང་བ་རྒྱ་ཡིས་འདེབས་པ། སྲོད་ལ་དབང་པོ་གནད་དུ་བསྡུ་བ། ནམ་གུང་ཤེས་བྱ་བུམ་པར་འཇུག་པ། ཐོ་རེངས་ཡེ་ཤེས་གསལ་བར་བྱེད་པ་དང་བཞིའི་ནང་ནས། ཐོ་རེངས་ཀྱི་སྐབས་ལ་བབས་དུས་རིག་པ་རང་གསལ་ལ་བཞག་པའི་སྐབས་དང་བསྟུན་ནས། ལྟོ་སྟོང་རླུང་རིག་དྭངས་སུ་བཅུག་ནས་སྙིང་དབུས་ཀྱི་ཨ་དཀར་དེ་སྤྱི་བོའི་ནམ་མཁར་རྒྱང་ཀྱིས་ཐོན་པའམ། སྙིང་དབུས་པདྨ་འདབ་བརྒྱད་ཀྱི་དཀྱིལ་ན་རང་སེམས་ཆོས་ཉིད་ཀྱི་ངོ་བོ་དྲིན་ཅན་རྩ་བའི་བླ་མ་དང་གཉིས་སུ་མེད་པར། མདང་ནུབ་འོད་གསལ་སྦུབས་འཇུག་གི་སྙིང་དབུས་སུ་མར་བསྡུས་པ་དེ་སྤྱི་བོར་ཡར་བྱོན་ནས་དུས་གསུམ་སངས་རྒྱས་ཐམས་ཅད་ཀྱི་ངོ་བོ་སྐྱབས་གནས་གཅིག་ཆོག་གི་ངོ་བོར་བཞུགས་པ་ལ། མོས་གུས་བླ་མའི་རྣལ་འབྱོར་གནད་དུ་བསྣུན་ནས་ལམ་དབང་བླངས་ཐུགས་ཡིད་བསྲེས། དངོས་གཞི་རླུང་གི་རྫོགས་རིམ་སྒོམ་པ་རེད།

གཉིས་པ་དངོས་གཞི།

དངོས་གཞི་ལུས་གནད་དྲང་པོར་བསྲང༔ རང་ཉིད་རིག་འཛིན་རྡོ་རྗེ་ཆོས༔ སྔོ་སྐྱ་ཞལ་གཅིག་ཕྱག་གཉིས་པ༔ བརྐྱངས་བསྐུམས་འདོར་སྟབས་ཞི་མ་ཁྲོ༔ རྣལ་འབྱོར་དམར་མོ་གྲི་ཐོད་ཅན༔ དང་འཁྲིལ་རྡོར་དྲིལ་བསྣོལ་ཐབས་སྦྱོར༔ ཡབ་ཡུམ་གཉིས་སུ་མེད་པ་ཡི༔ ཞེས་པ་ལ་སོགས་པ་ནི། སྔར་བླ་མའི་རྣལ་འབྱོར་གྱི་སྐབས་ལ་རྡོ་རྗེ་རྣལ་འབྱོར་མར་གསལ་བ་དེ་ཉིད་གནས་འགྱུར་ཏེ་རང་ཉིད་རིག་འཛིན་རྡོ་རྗེས་ཆོས་ལ་སྒོམ། ཅི་འདྲ་ཞིག་སྒོམ་དགོས་ཞེ་ན་སྐུ་མདོག་སྔོ་སྐྱ་ཞལ་གཅིག་ཕྱག་གཉིས་པ་ཞབས་བརྐྱངས་བསྐུམས་དཔའ་བོའི་འདོར་སྟབས་ཅན། ཞལ་དང་སྐུའི་ཉམས་ཞི་མ་ཁྲོ། དེ་འདྲའི་རྣམ་པ་ཅན་ཞིག་བསྒོམས་ནས། ཡབ་རང་ཉིད་དང་རྣམ་པ་འདྲ་བའི་རྣལ་འབྱོར་དམར་མོ་ཕྱག་ན་གྲི་གུག་དང་ཐོད་པ་འཛིན་པ། དེ་དང་འཁྲིལ་སྦྱོར་གྱིས་ཡབ་ཀྱི་ཕྱག་གཉིས་ཀའི་རྡོར་དྲིལ་འཛིན་པ་བསྣོལ་སྟབས་ཀྱིས་སྦྱོར་ཞིང་འཁྱུད་པ། དེ་ལྟ་བུའི་ཡབ་ཡུམ་གཉིས་སུ་མེད་པ་ཡི་ཞེས་གསུངས་རྒྱུ་འདི་ཡན་ཆོད་ཀྱིས་ལུས་ཀྱི་དམིགས་གནད་བསྟན་པ་རེད། སྐུ་དབུས་དྲང་པོར་རྩ་དབུ་མ༔ མཚན་ཉིད་བཞི་ལྡན་ཆོས་ཀྱི་སྐུ༔ གཡས་གཡོན་རོ་རྐྱང་ལོངས་སྤྲུལ་གཉིས༔ ལྟེ་འོག་དབུ་མའི་མར་སྣ་ལ༔ རོལ་རྐྱང་རྣམ་གཉིས་ཆུད་པ་ཡི༔ ཡར་སྣ་ལྟག་པ་ནས་གུག་སྟེ༔ སྣ་བུག་གཉིས་སུ་ཧ་རེ་ཟུག༔ དབུ་མའི་ཡར་སྣ་ཁ་འཁྱིལ༔ ཞེས་དེ་མན་ཆོད་བརྡ་ཡིག་གིས་བསྟན། སྐུ་དབུས་དྲང་པོར་རྩ་དབུ་མ་ཞེས་གསུངས་ན་སྐུ་དབུས་དྲང་པོ་ལ་རྩ་གསུམ་ཀ་བའི་ཚུལ་དུ་ཆགས་པར་སྒོམ་དགོས། རྩ་དབུ་མ་དེ་མཚན་ཉིད་བཞི་ལྡན་ཞིག་དུ་གསུངས། མཚན་ཉིད་བཞི་བོ་གང་རེད་ཟེར་ན། དྲང་བ་ཆུ་ཤིང་གི་སྡོང་པོ་ལྟ་བུ། སྟོང་བ་ཤོག་གུ་ཁོག་སྟོང་ལྟ་བུ། གསལ་བ་ཏིལ་གྱི་མར་མེ་ལྟ་བུ། སྲབ་པ་པདྨའི་འདབ་མ་འདྲ་བ། དེ་ལྟ་བུའི་བཞི་ལྡན་ནམ་ལྔ་ལྡན་གྱི་ཆོས་ཀྱི་སྐུ་ཡི་རྩ། གཡས་གཡོན་རོ་རྐྱང་ལོངས་སྤྲུལ་གཉིས་ཞེས་པ་ནི། གཡས་གཡོན་རོ་མ་དང་རྐྱང་མ་གཉིས་ཀ་ལོངས་སྐུ་དང་སྤྲུལ་སྐུའི་རྩ་གཉིས། ལྟེ་འོག་དབུ་མའི་མར་སྣ་ལ་ཞེས་པ་རྩ་གསུམ་གྱི་འདུས་མདོ་ལ་རོ་རྐྱང་རྣམ་གཉིས་དབུ་མར་ཆུད་པ་དེ་ཡི་གེ་ཆ་ཡི་རྣམ་པ་ལྟ་བུ་ཡིན། དབུ་ཅན་གྱི་ཆ་ཡིག་གི་རྣམ་པ་ལྟ་བུ། ཡར་སྣ་ལྟག་པ་ནས་གུག་སྟེ་ཞེས་གསུངས་པ་རོ་རྐྱང་གི་ཡར་སྣ་དེ་ལྟག་པ་ནས་ཐུར་ལ་གུག་སྟེ་སྣ་བུག་གཉིས་སུ་ཧ་རེ་ཟུག་ཡོད་པ། དབུ་མའི་ཡར་སྣ་ཞེས་བརྡ་ཡིག་གིས་བསྟན་དོན་ལྟར་འོག་ཏུ་ཟླུམ་ཞིང་འཁྱིལ་ཡོད་པ་དེ་ཞལ་ཤེས་ཡིན། རོ་རྐྱང་གཉིས་ནས་ལས་ཀྱི་རླུང༔ གཡས་གཡོན་རེས་མོས་བདུན་བདུན་འབུད༔ ཉོན་མོངས་ལྔ་དང་འབྱུང་བ་ལྔར༔ བརྟེན་པའི་རླུང་དུག་སངས་ཀྱིས་ཐོན༔ རྩ་སྦུབས་སྐྱོན་དང་བྲལ་བར་སེམས༔ དེ་ནས་ཧ་ཞེས་དབུགས་བཏང་ལ༔ ངལ་གསོ་ཤེས་པ་རྣལ་དུ་ཕབ༔ རྩ་རོ་མ་དང་རྐྱང་མ་གཉིས་ནས་ལས་ཀྱི་རླུང་གཡས་གཡོན་རེས་མོས་བདུན་བདུན་དུ་རླུང་རོ་འབུད་ནས་ཉོན་མོང་ལྔ་དང་འབྱུང་བ་ལྔར་བརྟེན་པའི་དུག་རླུང་སངས་ཀྱིས་ཐོན་པར་བསམ་ནས། རྩ་སྦུབས་སྐྱོན་དང་བྲལ་བར་བསམ། དེ་སྣོད་བཀྲུ་བཤལ་བྱས་པ་དང་མཚུངས་པ་རེད། དེ་ནས་ཧ་ཞེས་དབུགས་བཏང་ལཿ ངལ་གསོ་ཤེས་པ་རྣལ་དུ་ཕབཿ འདི་ཅི་ལྟར་གསུངས་པ་དེ་བཞིན་དུ་གོ་བ་ལེན་ཆོག་པ་ཡིན། དེ་ཡན་ཆོད་ཀྱིས་རླུང་གི་དམིགས་གནད་བསྟན་པ་རེད། འདི་ན་ཟེར་རྒྱུ་ཞིག་ཡོད་རྒྱུ་འདི་མན་ཆོད་ཀྱི་མན་ངག་པྲ་ཁྲིད་ཀྱི་ཟབ་མོའི་དངོས་གཞིའི་གནད་བསྟན་པ་རེད། དེ་ནས་སྙིང་གུར་སྨུག་པོའི་དབུས༔ ཀུན་བཟང་མཐིང་ཀ་མཉམ་བཞག་ཅན༔ ཆེ་ཆུང་སྲན་མ་ཙམ་པ་ལ༔ སྐྱེ་མཆེད་ཤིན་ཏུ་དྭངས་པར་གསལ༔ དེ་ཡི་ཐུགས་ཀར་འོད་ལྔའི་ཐིག༔ ཟླུམ་པོར་འཁྱིལ་བའི་ནང་ཁོངས་སུ༔ དྭངས་གསལ་སྐྱེ་མེད་ གསལ་འཚེར་སྤུ་ཡིས་བྲིས་ལྟར་གསལ༔ ཞེས་གསུངས་ན་ད་པྲ་ཁྲིད་ཟབ་མོའི་དངོས་གཞི་ངོ་མ་འདི་ནས་མར་ཅི་ལྟར་གསུངས་པ་རེད་ཅེ་ན། དེ་ནས་སྙིང་གུར་ཞེས་པ་སྙིང་འཕྱོང་གུར་སྨུག་པོ་རིན་ཆེན་ཟུར་བརྒྱད་པ་ལྟ་བུའི་དབུས་སུ། ཀུན་བཟང་མཐིང་ཀ་མཉམ་བཞག་ཅན་ཆེ་ཆུང་སྲན་མ་ཙམ་པ་ལ་སྐྱེ་མཆེན་ཤིན་ཏུ་དྭངས་པར་ཞེས་པ་ཟབ་ཅིང་ཕྲ་བའི་དོན་རེད། དེ་ཡི་ཐུགས་ཀར་ཡེ་ཤེས་ལྔ་ཡི་རང་བཞིན་གྱི་འོད་ལྔའི་ཐིག་ལེ་ཟླུམ་པོར་འཁྱིལ་བའི་ནང་ཁོངས་ན། དྭངས་གསལ་སྐྱེ་མེད་སྲོག་གི་སྙིང་པོ་ཡི་གེ་ཨ་ཡིག་ལ་གོ་དགོས། གསལ་འཚེར་སྤུ་ཡིས་བྲིས་པ་ལྟར་དུ་གསལ། འདི་ནས་ཉམས་ལེན་ལག་ལེན་གྱི་གནད་ངོ་མ་བསྟན་པ་ཡིན་ནོ། །དེ་ནས་སྦྱོར་བ་བཞི་ལྡན་གྱིས༔ གནད་དང་ལྡན་པས་རླུང་རྔུབས་ལ༔ རོ་རྐྱང་ལམ་བརྒྱུད་སྙིང་དབུས་བསྐྱལ༔ ངླ་ཁ་རཱུ་ཌྷྱ་ཅུང་ཟད་བྱས་ཏེ༔ རླུང་ཡིག་རིག་པ་གཅིག་ཏུ་དྲིལ༔ ཞལ་ཤེས་གནད་དང་ལྡན་པ་ཡིས༔ རླུང་ཁུག་བརྒྱའམ་བདུན་ཅུ་འམ༔ སུམ་ཅུ་ལ་སོགས་ཐུན་རེར་འབད༔ དེ་ནས་སྦྱོར་བ་བཞི་ལྡན་ཞེས་པ་གང་ཡིན་ན། དགུག དགང་། གཞིལ། གཏོང་རྣམས་རེད། གནད་དང་ལྡན་པས་རླུང་རྔུབས་ལ་ཞེས་པ་དེ་ལྟ་བུའི་གནད་དང་ལྡན་པས་རླུང་འདི་སྣ་ཡིས་རྔུབས་རྒྱུ་ཡིན། འདི་རྫོགས་རིམ་སྤྱི་ཡི་འགྲོ་ལུགས་ལྟར་དུ་རླུང་རོ་སྦྱང་ནས་འབྱིན་འཇུག་བྱེད་དགོས། རོ་རྐྱང་གི་ལམ་བརྒྱུད། དབུ་མར་ཞུགས་ནས་སྙིང་དབུས་ལ་བསྐྱེད་དགོས། ཅུང་ཟད་ནང་དུ་ཞེས་གསུངས་པ་གཙོ་བོ་ཞལ་ཤེས་ཡིན། རླུང་ཡིག་རིག་པ་གཅིག་ཏུ་དྲིལ་ཞེས་གསུངས་ནས་རླུང་དང་ཨ་ཡིག་རིག་པ་དང་གསུམ་པོ་དེ་གཅིག་ཏུ་དྲིལ་དགོས་པ་ཡིན། ཞལ་ཤེས་གནད་དང་ལྡན་པ་ཡིས་ཞེས་གསུངས་ན་གེགས་སེལ་ལ་སོགས་པ་བླ་མའི་ཞལ་རྒྱུན་གྱི་ཞལ་ཤེས་མན་ངག་གི་གནད་དང་ལྡན་པ་ཡིས། འདིའི་དངོས་གཞིའི་ཉམས་ལེན་ལ་དགོས་གལ་ཆེ་བའི་རླུང་གི་རྣལ་འབྱོར་ལ་བསླབ་དུས། བསླབ་ཚུལ་ལྔ་ཡོད་པ་ཡིན། གྲངས་ལ་བསླབ་པ་དང་གཅིག འགྲོ་འོང་ལ་བསླབ་པ་དང་གཉིས། དབྱིབས་ལ་བསླབ་པ་དང་གསུམ། ཁ་དོག་ལ་བསླབ་པ་དང་བཞི། དེའི་འཕྲོར་རླུང་བུམ་པར་ཞུགས་པའི་མན་ངག་དང་ལྔ་གསུངས་ཡོད། སྤྱིར་བཤད་ན་སྐྱེས་བུ་དར་ལ་བབས་པ་ནད་མེད་ཞིག་གིས་ཉིན་ཞག་ཕྲུག་གཅིག་ལ་ཉི་ཁྲི་ཆིག་སྟོང་དྲུག་བརྒྱའི་རླུང་གི་དབུགས་རྒྱུ་བ་ཡིན། སྐབས་ཐོབ་ཀྱི་བཞུགས་སྟངས་དང་བསྟུན་ཏེ་སེམས་མ་ཡེངས་པར་བཞག་ན། རྣམ་རྟོག་འཕྲོ་བ་ཇེ་ཉུང་ལ་སོང་དུས་རླུང་ཇེ་དལ་དུ་སོང་ནས་གྲངས་ཇེ་ཉུང་ལ་འགྲོ་གིན་ཡོད། དམིགས་པ་གནད་དུ་བསྣུན་ནས་བྱང་སོང་ན་ཐ་མར་རླུང་གི་འགྲོ་འོང་ཆད་ནས་ཤེས་པ་གར་གཏད་ལ་སྡོད། ལས་རླུང་ཟད་པས་རྣམ་རྟོག་ཟད། རྣམ་རྟོག་ཟད་པས་སྣང་བ་ཟད། དེ་དུས་རྣམ་པར་མི་རྟོག་པའི་ཡེ་ཤེས་ཀྱི་ངང་ལ་ཡུན་རིང་ནས་བར་སྐབས་རྒྱུན་དུ་གནས་ཐུབ་པར་མ་ཟད་ཇི་བཞིན་འབྱུང་སོང་དུས་ཆུ་ལ་མི་བྱིངས་པར་ནམ་མཁའ་ལ་བྱ་བཞིན་དུ་འཕུར་ནུས་པ་སོགས་པའི་གྲུབ་པའི་རྟགས་ཀྱང་འབྱུང་། དེ་བཞིན་དུ་རླུང་གི་འགྲོ་འོང་སོགས་ལ་བསླབ་ནས་ཐ་མར་རླུང་བུམ་ཅན་ལ་བསླབ་ན་ལུས་ཁ་ཟས་ལས་གྲོལ། སེམས་བདེ་སྟོང་ཏུ་གྲོལ། རིག་པ་རྣམ་རྟོག་ལས་གྲོལ། དེ་འདྲའི་གྲོལ་བ་གསུམ་གྱི་རྟགས་འབྱུང་། མཐར་ཟག་པ་ཐམས་ཅད་ལས་གྲོལ་བ་འབྱུང་བ་དེ་འདྲ་ཡིན། རླུང་ཁུག་བརྒྱའམ་བདུན་ཅུ་ཐམ༔ སུམ་ཅུ་ལ་སོགས་ཐུན་རེར་འབད༔ ཞེས་འདི་ནས་གེགས་སེལ་བསྟན་པ་ཡིན་ནོ། །མན་ངག་གནད་དང་མི་ལྡན་ན༔ སྲོག་རྩར་ལས་ཀྱི་རླུང་ཞུགས་ནས༔ སྨྱོ་བའི་ཉེན་ཡོད་ཁེ་ཉེན་ཆེ༔ གནད་དུ་སོང་ན་སྲོག་ཐུར་གྱི༔ རླུང་གཉིས་གཅིག་ཏུ་འདྲེས་གྱུར་ནས༔ དབུ་མར་ཞུགས་ནས་ཐིམ་གསུམ་གྱི༔ རང་རྩལ་རྫོགས་པའི་རྟེན་འབྲེལ་ལས༔ བུམ་ཅན་རིལ་བ་ཞབས་ཚགས་ཅན༔ མངོན་དུ་སྣང་ཞིང་འོག་རླུང་ལ༔ བཤང་བའི་དྲི་མ་མི་འབྱུང་ཞིང༔ ཞེས་པ་ལ་སོགས་པས་བསྟན། མན་ངག་གི་གནད་དང་མི་ལྡན་པར་འོལ་ཚོད་སྤྱི་བརྟོལ་གྱིས་གསང་བ་ལ་ཅི་མི་སྙམ་པའི་སྤྱོད་ཀྱིན་བསྡད་པ་ཡིན་ན། སྲོག་རྩ་ལ་ལས་ཀྱི་རླུང་ཞུགས། དམ་ཚིག་ཉམས་ནས་བཀའ་ཡིས་ཆད་པ་ཕོག་ཏེ་སྨྱོ་བའི་ཉེན་ཁ་ཡང་ཡོད་ལ་ཁེ་ཉེན་ཆེ་བས་གཟོབས་གསུངས་པ་རེད། གནད་དུ་སོང་ནས་མཐུན་རྐྱེན་ཡོངས་སུ་ཚོགས་སོང་ན། སྲོག་དང་ཐུར་སེལ་གྱི་རླུང་གཉིས་ཀ་གཅིག་ཏུ་འདྲེས་པར་གྱུར་ནས། ཐུན་རེ་རེའི་དང་པོའི་སྐབས་སུ་རླུང་ཁུག་པ་བརྒྱ་རེ་ཙམ་རེ་དང་། དེ་ནས་བར་སྐབས་དེ་ལས་ཉུང་བདུན་ཅུ་ཙམ་རེ་དང་མཐར་སུམ་ཅུ། ཡང་མཐར་དེ་ལས་ཀྱང་ཉུང་བར་འགྱུར་ཞིང་ནང་དུ་འཛིན་པའི་འབད་པ་གྱིས་གསུངས་པ་རེད། རླུང་དབུ་མར་ཞུགས་གནས་ཐིམ་གསུམ་བརྒྱུད་དགོས་པ་ཡིན། དེ་ལྟར་དང་པོ་རླུང་དབུ་མར་ཞུགས། དེ་ནས་གནས། དེ་ནས་ཐིམ། དབུ་མར་ཞུགས་གནས་ཐིམ་གསུམ་གྱི་རིམ་པ་དེ་ལྟར་བརྒྱུད། རང་རྩལ་རྫོགས་པའི་རྟེན་འབྲེལ་ལས༔ བུམ་ཅན་རིལ་པ་ཞབས་ཚགས་ཅན༔ ཞེས་པ། འདི་ཡང་རྩ་མདུད་མས་རིམ་ལས་གྲོལ་བ་རེད། བུམ་ཅན་རིལ་པ་ཞབས་ཚགས་ཅན་མངོན་དུ་སྣང་ཞིང་འོག་རླུང་ལ་བཤང་བའི་དྲི་མ་མི་འབྱུང་བ་དང་དྲི་ཆུ་ཆུ་གཙང་ལྟར་འབབ་པ་ལ་སོགས༔པ་ལམ་རྟགས་འབྱུང་། ལས་རླུང་དག་ནས་ཡེ་རླུང་ལ་འཁྱིལ་དགོས་པ་རེད། རྩ་འདབ་གོང་ནས་བཤད་པ་ལྟར་མས་རིམ་ནས་གྲོལ་བ་ཡིན་པས། ཁྱར་པར་དུ་ལྟེ་བའི་རྩ་མདུད་གྲོལ༔ དང་པོའི་ས་ཡི་རྟོག་པ་འཆར༔ ཞེས་གསུངས་ན། རྩ་མདུད་གཉིས་གཉིས་གྲོལ་བ་དང་མཉམ་དུ་ས་ཡི་ཁྱད་པར་རེ་མཐོང་གི་ཡོད་པ་རེད། མངོན་སུམ་སྣང་བ་ལྷུག་པར་མཐོང༔ ཞེས་གསུངས། ས་དང་པོར་ཆོས་ཉིད་མངོན་སུམ་མཐོང་ལམ་གྱི་བདེན་པ་རྟོགས་པ་རེད། འདི་ལ་ཐེ་ཚོམ་འགའ་ཡང་མེད༔ ས་མ་ཡ༔ ཞེས་གསུངས་ནས་རྒྱ་ཡིས་བཏབ། དེ་ཡིས་དངོས་གཞི་བསྟན། རྗེས་དགོས་པ་དང་ཕན་ཡོན་གསུང་པ་ནི།

གསུམ་པ་དགོས་པ་དང་ཕན་ཡོན།

འདི་ནི་རྫོགས་རིམ་ཀུན་གྱི་བཅུད༔ དབུ་མར་ཡེ་ཤེས་རླུང་ཟིན་པས༔ གཏུམ་མོའི་ནང་ནས་ཡང་རྩེ་ཡིན༔ ཞེས་གསུངས། འདི་ནི་བླ་མེད་ཐུན་མོང་གི་རྫོགས་རིམ་ཀུན་གྱི་བཅུད་དམ་སྙིང་པོའི་ཡང་བཅུད་ལྟ་བུ་ཞིག་ཡིན། རྩ་དབུ་མར་ལས་རླུང་དག་ནས་ཡེ་ཤེས་ཀྱི་རླུང་ཟིན་པའི་རྒྱུ་མཚན་གྱིས་གཏུམ་མོའི་ནང་ནས་ཡང་རྩེ་འདི་ཡིན། ཞེས་སོ། །སེམས་ཉིད་ཆོས་སྐུར་གནས་དག་པས༔ འོད་གསལ་ཀུན་གྱི་རྒྱལ་པོར་འགྱུར༔ ཞེས་པས་གཏུམ་མོའི་ཡང་རྩེ་ཡིན། འོད་གསལ་གྱི་རྒྱལ་པོ་ཡིན་ཞེས་གསུངས། དེའི་སྐབས་སུ་རྩ་སྤྲུལ་སྐུར་དག རླུང་ལོངས་སྐུར་རྫོགས། ཐིག་ལེ་ཆོས་སྐུར་སྨིན་ནས་སེམས་ཉིད་ཆོས་སྐུར་གནས་དག་པ་ཡིན་པས་ན། འོད་གསལ་སྒོམ་པའི་ལམ་ཀུན་གྱི་རྒྱལ་པོར་འགྱུར་ཞེས་གསུངས། སྣང་བའི་རྫུན་ཕུགས་རྡིབ་པ་ཡིས༔ སྒྱུ་མ་མ་བཅོས་རང་ལ་ཤར༔ ཞེས་དེ་ཡིས་སྒྱུ་ལུས་བསྟན་པ་རེད། དེའི་ཚེ་འཁྲུལ་སྣང་རང་སར་གྲོལ་ནས་སྣང་བའི་རྫུན་ཕུགས་རྡིབ་སོང་དུས་དངོས་སྣང་སྒྱུ་མའི་སྣང་ཚུལ་མ་བཅོས་རང་ལ་ཤར་བ་ཡིན་པས་སྒྱུ་ལུས་འབྱུང་བ་རེད། གར་ཤར་རྣམ་རྟོག་མ་ཡན་པ༔ རྨི་ལམ་ཀླུངས་ཚུད་སྤྲུལ་བསྒྱུར་ནུས༔ ཞེས་གསུངས་བ་འདིས་རྨི་ལམ་བསྟན། རྨི་ལམ་ཡན་པར་མ་ཤོར་བར་རྨི་ལམ་ལམ་དུ་ལྷོང་ནས་ཀློང་དུ་ཚུད་དེ་སྤྲུལ་བསྒྱུར་ནུས་པ་དེ་འདྲའི་རང་དབང་ཐོབ་པ་འབྱུང་གསུངས། ཐ་མལ་རྣམ་རྟོག་ཡེ་ཤེས་སུ༔ འཕོས་པའི་འཕོ་བའི་ཡང་རྩེ་ཡང་ཡིན༔ ཞེས་ཐ་མལ་བའི་འཁྲུལ་བའི་རྣམ་རྟོག་དག་པ་ཡེ་ཤེས་སུ་གོ་འཕོས་སོང་བས་ན་འདི་འཕོ་བའི་ཡང་རྩེ་ཡང་ཡིན་ལ། སྒོ་གསུམ་རྡོ་རྗེ་གསུམ་ལྡན་གྱི༔ གྲོང་དུ་འཇུག་པས་གྲོང་འཇུག་མཆོག༔ གསང་སྔགས་ཀུན་གྱི་འབྲས་བུ་ཡིན༔ ཞེས་སྒོ་གསུམ་སྐུ་གསུང་ཐུགས་གསུམ་རྡོ་རྗེ་གསུམ་ལྡན་གྱི་རྡོ་རྗེ་ཕུང་པོའི་གྲོང་ཁྱེར་དུ་འཇུག་པས་ན་གྲོང་འཇུག་གི་མཆོག་ཀྱང་འདི་ཡིན། མདོར་ན་འདི་ནི་གསང་སྔགས་བསྐྱེད་རྫོགས་ཀུན་གྱི་འབྲས་བུ་ཡིན་ཞེས་གསུངས་སོ། །ས་མ་ཡ༔ འདི་ལམ་གྱི་སྙིང་པོ་འོད་གསལ། ལམ་གྱི་གཞི་མ་སྒྱུ་ལུས། ལམ་གྱི་དྲོད་ཚད་རྨི་ལམ། ལམ་གྱི་བློ་ཆོད་འཕོ་བ་སོགས་ཡིན་གསུངས་ཏེ། ལམ་གྱི་བསུ་མ་བར་དོ་རང་ཤུགས་ཀྱིས་ཆོད་པ་ཤུགས་ལ་བསྟན། དེ་ཡིས་རྫོགས་རིམ་ཆོས་དྲུག་ནང་ནས་ལམ་གྱི་རྩ་བ་གཏུམ་མོའི་ཟུར་དུ་ས་བཅད་གཉིས་པ་བཞག་ནས་གསུངས་པ་དེ་ཡིན་ནོ། །