༼ཧཱུྃ༽ ཆོས་ཚན་གསུམ་པ་འབར་འཛག་དྲོད་ཀྱི་རྣལ་འབྱོར།
བདེ་སྟོང་རླུང་གི་རྫོགས་རིམ་ལས༔ དེའི་ནང་གསེས་འབར་འཛག་དྲོད་ཀྱི་རྣལ་འབྱོར་ནི༔ ཞེས་ཉམས་ལེན་སྲང་དུ་འཛུད་དུས་ཐོ་རེངས་ཀྱི་ཐ་མ་ལ་བདེ་སྟོང་དང་གཏུམ་མོ་སྒོམས་གསུངས་པ། འདིའི་གནད་ཁྲིད་ཡིག་གཞུང་ནས་འབྱུང་བ་ལྟར་དུ་ཡིན། ད་རེས་རྫོགས་ཆེན་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གྱི་ཁྲིད་ཆེན་གྱི་ཡན་ལག་ཙམ་དུ་སོང་བས་ན་འདི་ནས་རྒྱས་བཤད་དགོས་པའི་སྐབས་མ་རེད། སྤྱིར་རླུང་གནད་དུ་འཆུན་ནས་ཐིག་ལེ་དག་དགོས་པ་རེད། དེ་གཉིས་ཀ་ཡང་རྩ་ལ་བརྟེན་དགོས་པ་ཡིན་པས་ན་རྡོ་རྗེ་ལུས་ཀྱི་རྩ་ཐིག་རླུང་གསུམ་པོ་འབྱོང་རྒྱུ་གལ་ཆེན་ཡིན་གསུངས། རྩ་རླུང་གི་འཕྲུལ་འཁོར་གནད་ཆེ་མོད། དང་པོ་རླུང་འབྱོང་རྒྱུ་གནད་ཆེ། ཡིན་ན་ཡང་ལག་ཁྲིད་བརྒྱུད་པའི་ཕྱག་སྲོལ་མི་ཉམས་པའི་ཆེད་དུ་འདིའི་འཕྲུལ་འཁོར་རང་ལུགས་ཀྱི་བརྒྱུད་པའི་ལག་ལེན་ལྟར་དུ་བསྐྱར་གསོ་བྱས་པ་ཡིན། འདིའི་རྐང་པ་ཚུགས་ཕན་ཆད་ནས་རླུང་དམིགས་ལ་བསླབ་རྒྱུ་གནད་ཆེན་རེད། རྩ་རླུང་ཞག་བརྒྱ་ལ་བཞུགས་མཁན་ཡིན་ན་ཕྱེད་ཀ་རླུང་གི་རྣལ་འབྱོར་དང་གཏུམ་མོའི་རྣལ་འབྱོར་ལ་བསླབ་རྒྱུ་གལ་ཆེན་ཡིན་པ་སྔར་ཡང་བཤད་མྱོང་བ་ཡིན་ནོ། །རྩ་གསུམ་སྔ་མ་ཇི་བཞིན་ལ༔ དབུ་མའི་ཡར་སྣར་ཧེ་རུ་ཀ༔ དཀར་ཆ་ཧཾ་ཡིག་རང་བཞིན་ལ༔ ནར་སྣར་དམར་ཆ་གནམ་ཞལ་མ༔ ཨ་ཤད་འོད་ཀྱི་རྣམ་པར་གསལ༔ རོ་རྐྱང་གཉིས་ནས་རླུང་རྔུབས་ཏེ༔ ལྟེ་བའི་གནམ་ཞལ་སྦར་བ་ལས༔ ཤེས་རབ་ཡེ་ཤེས་ལྷབ་ཀྱིས་འབར༔ ཞེས་གསུངས་ཏེ། རྩ་གསུམ་སྔ་མ་ཇི་བཞིན་རྣལ་འབྱོར་པའི་རྡོ་རྗེ་ལུས་ཀྱི་དབུས་དྲང་པོ་ན་རྟེན་སྲོག་རྩོལ་ལ་བརྟེན་པའི། བརྟེན་པ་ཡེ་ཤེས་ཀྱི་འོད་རྩ་ཞིག་ཡིན་པས། དབུ་མ་མཐིང་སྐྱ་དབུས་སུ་མདའ་སྨྱུག་དྲང་པོར་བསྲིང་པ་ལྟ་བུའི་དྲང་སེ་ཡོད་པའི། ལྟེ་འོག་ནས་སྤྱི་གཙུག་གི་བར་ལ་ཟུག གཡས་གཡོན་ན་རོ་རྐྱང་གཉིས་ཀ་ཡོད། རོ་རྐྱང་གཉིས་ཀ་ཕོ་མོའི་རྟེན་གྱི་ཁྱད་པར་གྱིས་གོ་ལྡོག་ནས་ཡོད། སྐྱེས་པར་གཡས་རོ་མ་དཀར། གཡོན་རྐྱང་མ་དམར་བའི་རང་བཞིན་གསལ་བཏབ་པ་གོང་ནས་གསུངས་པ་ལྟར་དང་། བུད་མེད་ལ་དེ་ལས་གོ་ལྡོག་པ་བཞིན་དུ་གསལ་བ། དེ་ལ་དབུ་མའི་ཡར་སྣར་ཧེ་རུ་ཀ་ཞེས་གསུངས་ན། དབུ་མའི་ཡར་སྣར་ཐབས་མཆོག་ཧེ་རུ་ཀའི་ངོ་བོ་དཀར་ཆ་ཧཾ་ཡིག་གི་རང་བཞིན་ཅན་ལ། དབུ་མའི་མར་སྣ་དམར་ཆ་ཤེས་རབ་ཀྱི་རང་བཞིན་ཡུམ་གནམ་ཞལ་དབྱིངས་ཀྱི་དབང་ཕྱུག་མ་མཚོན་པའི་ཨ་ཤད་འོད་ཀྱི་རྣམ་པར་གསལ་གསུངས། ཨ་ཤད་འདི་སྤྱིར་བཏང་གི་ཨ་ཕྱིས་ཤུལ་གྱི་མཐའ་ལ་ཤད་ཀྱི་རྣམ་པ་ལྟ་བུ་ཞིག་གནས་པ་དེ་ཉིད་ཀྱི་རྩེ་མོ་གྱེན་དུ་བསྟན་ནས་འོད་ཀྱི་རྣམ་པར་གསལ་བ་ལ། འདིའི་སྐབས་ལ་སྣ་བུག་གཉིས་ནས་རླུང་འབྱིན་འཇུག་བྱེད་དགོས། རོ་རྐྱང་གཉིས་ནས་རླུང་རྔུབས་ཏེ་ཞེས་གསུངས་དོན་དེ་ཡིས་རེད། ལྟེ་བའི་གནམ་ཞལ་སྦར་བ་ལས་ཞེས་གསུངས་བ་དེ་ལྟེ་བའི་ཨ་ཤད་ཡུམ་གནམ་ཞལ་དབྱིངས་ཕྱུག་མར་ཞུགས་པ་ལས། ཤེས་རབ་ཀྱི་མེ་སྦར་བ་ལས་ཤེས་རབ་ཡེ་ཤེས་ཀྱི་མེ་ལྕེ་དེ་ཉིད་ལྷབ་ཀྱིས་འབར་ཡོང་དུས། དེ་ཡང་ངོ་བོ་བདེ་བ་ལ༔ རང་བཞིན་གསལ་ཞིང་རྣམ་པ་ཚ༔ རྩེ་མོ་རྣོ་ལ་འཁྱུག་པ་ཡིས༔ ལྟེ་བའི་རྩ་འཁོར་ཡོངས་གང་ཞིང༔ བདེ་དྲོད་གློ་བུར་སྐྱེས་པར་བསམ༔ ཞེས་པ་ནི། ཡེ་ཤེས་ཀྱི་མེ་དེ་ཡང་ངོ་བོ་བདེ་བ་ཡིན་པ་ལ་བདེ་བའི་རང་བཞིན་རྨུན་པ་མ་ཡིན་པར། གསལ་ཞིང་ཚ་བའི་རྣམ་པ་ཅན། མེའི་རྩེ་མོ་དེ་ཉིད་རྣོ་ལ་འཁྱུག་པ་ཡིས་ལྟེ་བ་སྤྲུལ་བའི་འཁོར་ལོའི་རྩ་འཁོར་ཡོངས་སུ་རྫོགས་པ་གང་ཞིང་། བདེ་དྲོད་སྔར་བས་ཇེ་ཆེར་འབར་བས་གློ་བུར་དུ་སྐྱེས་པར་བསམ་དགོས། དེ་བཞིན་ཆོས་ཀྱི་འཁོར་ལོ་དང༔ ལོངས་སྤྱོད་བདེ་ཆེན་འཁོར་ལོ་སོགས༔ སོ་སོའི་གནས་སུ་རླུང་ཁུག་ནི༔ ཉེར་གཅིག་བདུན་སོགས་གོང་དང་མཚུངས༔ ཞེས་པ་ནི། ལྟེ་བའི་མི་ཚད་པར་དེ་བཞིན་དུ་སྙིང་ཀ་ཆོས་ཀྱི་འཁོར་ལོ་དང་མགྲིན་པ་ལོངས་སྤྱོད་ཀྱི་འཁོར་ལོ། ད་རུང་གསང་གནས་བདེ་ཆེན་འཁོར་ལོ་སོགས་རྩ་འཁོར་བཞི་འམ་ལྔ་སོ་སོའི་གནས་སུ་འབྱིན་འཇུག་གནས་གསུམ་གྱི་རླུང་ཁུག་ནི་ཉེར་གཅིག་དང་བདུན་སོགས་ཇེ་དལ་ཇེ་གནས་ཡིན་པ་གོང་དང་མཚུངས་པ་རེད། དེ་ནས་སྤྱི་བོའི་ཧཾ་ཡིག་ལ༔ མེ་ལྕེས་རེག་པ་ཙམ་གྱིས་ནི༔ བདེ་བ་གཡོས་ཤིང་ཐིག་ལེ་ཞུ༔ ཞུན་གྱིས་མར་མེ་འཐིགས་པ་ལྟར༔ སྤྱི་བོའི་རྩ་འདབ་ཐམས་ཅད་ཁེངས༔ ཞེས་གསུངས་པ་ནི། དེ་ནས་མཐར་སྤྱི་བོའི་ཧཾ་ཡིག་ལ་མེ་ལྕེས་རེག་པ་ཙམ་གྱིས་བདེ་བ་སྔར་ལས་ཆེ་བར་གཡོས་ཤིང་ཐིག་ལེ་ཞུ་ནས། ཞུན་གྱི་མར་མེ་ཞུ་ནས་ཐིགས་པ་ལྟར་དུ་ཐིག་ལེའི་སྤྱི་བོའི་རྩ་འདབས་ཐམས་ཅད་ཁེངས་པར་སྒོམ་དགོས། རྩ་ཁམས་དཔའ་བོ་ཌཱཀྐི་ནཱི༔ ཏིལ་གང་ཕྱུར་བ་ལྟ་བུ་ལ༔ བདེ་སྟོང་བདུད་རྩིའི་མཆོད་པ་ཕུལ༔ སྤྱི་བོའི་རྩ་ཁམས་དཔའ་བོ་དང་ཌཱཀྐི་སྟེ། མཁའ་འགྲོ་མའི་ཚོགས་ཏིལ་གང་ཕྱུར་བ་ལྟ་བུ་དཔག་ཏུ་མེད་པར་ཡོད་པ་ལ་བདེ་སྟོང་གཉིས་སུ་མེད་པའི་ཡེ་ཤེས་ཀྱི་བདུད་རྩིས་མཆོད་པ་ཕུལ་ནས་དེ་དག་མཉེས་པར་བྱས་ཏེ། ཚོགས་གཉིས་རྫོགས་ཤིང་སྒྲིབ་གཉིས་བྱང༔ བུམ་དབང་མངོན་དུ་ཐོབ་བྱས་ཏེ༔ དགའ་བའི་ཡེ་ཤེས་སྐྱེས་པར་བསམ༔ ཞེས་གསུངས་ན།དེ་ལྟར་མཆོད་པ་ཕུལ་བའི་མཐུས་བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་ཤིང་། ཉོན་ཤེས་བགས་ཆགས་དང་བཅས་པའི་སྒྲིབ་གཉིས་བྱང་བའི་འགོ་ཚུགས་ཏེ། དབང་བཞིའི་ནང་ནས་བུམ་དབང་མངོན་དུ་ཐོབ་པར་བྱས་ཏེ། དགའ་བ་བཞིའི་ནང་ནས་དགའ་བའི་ཡེ་ཤེས་སྐྱེས་པར་བསམ། དེ་བཞིན་མགྲིན་པ་སྙིང་ག་དང༔ ལྟེ་བ་ལ་ཡང་གོང་བཞིན་དུ༔ རིག་པ་སྒྲེ་ཞིང་གསང་དབང་དང༔ ཤེས་རབ་ཡེ་ཤེས་བཞི་པའི་དབང༔ རིམ་བཞིན་མངོན་དུ་ཐོབ་བྱས་ཤིང༔ མཆོག་དགའ་ཁྱད་པར་ལྷན་སྐྱེས་ཀྱི༔ ཡེ་ཤེས་ཉམས་སུ་མྱོང་བར་བསམ༔ དེ་བཞིན་ཞེས་གསུངས་པ་སྤྱི་བོ་དེ་བཞིན་མགྲིན་པ་དང་། སྙིང་ཀ་དང་ལྟེ་བའི་རྩ་འཁོར་ལ་ཡང་། གོང་ནས་གསུངས་པ་བཞིན་རིག་པ་སྒྲེ་ཤེས་དགོས་པ་རེད་ཅེས་གསུངས་པས། རིག་པ་སྒྲེ་ཞིང་གསང་དབང་དང་། ཤེས་རབ་ཡེ་ཤེས་དང་བཞི་པའི་དབང་སྟེ། དང་པོ་རྩ་འདབ་ཐམས་ཅད་ཁེངས། རྩ་ཁམས་དེའི་དཔའ་བོ་མཁའ་འགྲོ་ཐམས་ཅད་མཆོད། ཚོགས་གཉིས་གང་འཚམས་རྫོགས། སྒྲིབ་གཉིས་གང་འཚམས་དག་ནས་མགྲིན་པར་གསང་དབང་། སྙིང་ཀར་ཤེར་དབང་། ལྟེ་བར་ཚིག་དབང་དེ་དག་རིམ་བཞིན་མངོན་དུ་ཐོབ་པར་བྱས་ཤིང་། མཆོག་དགའ་ཁྱད་པར་ལྷན་སྐྱེས་ཀྱི། །ཞེས་གསུངས་ན་མགྲིན་པར་མཆོག་དགའ། སྙིང་ཀར་ཁྱད་པར་གྱི་དགའ་བ། ལྟེ་བར་ལྷན་སྐྱེས་ཀྱི་དགའ་བ་དང་བཅས་པའི་དགའ་བཞིའི་ཡེ་ཤེས་ཉམས་སུ་མྱོང་བར་བསམ་ཞེས་གསུངས། དེ་ནས་རྩ་གསུམ་འདུས་མདོ་རུ༔ དྭངས་མ་ཨ་ཤད་ལ་ཕོག་ཚེ༔ སྣུམ་ཁོལ་བདུད་རྩི་བླུགས་པ་བཞིན༔ མེ་དང་བདུད་རྩི་གཉིས་མེད་འབར༔ རིག་པ་རྩལ་གྱི་དབང་ཆེན་ཐོབ༔ ཅེས་པས། དེ་ནས་ལྟེ་འོག་གི་རྩ་གསུམ་གྱི་འདུས་མདོ་རུ་བོད་ཡིག་དབུ་ཅན་གྱི་ཆ་ཁོག་སྨད་ལྟ་བུ་ཟེར་བ་དེར་བདུད་རྩིའི་དྭངས་མ་ཨ་ཤད་ལ་ཕོག་པའི་ཚེ། དཔེར་ན་སྣུམ་ཁོལ་མའི་ནང་དུ་བདུད་རྩིའམ་ཆང་བླུག་པ་བཞིན་དུ། མེ་དང་བདུད་རྩི་གཉིས་མེད་དུ་ཤིན་ཏུ་ཆེར་འབར་ཏེ་དབང་བཞི་པ་ལས་ཀྱང་ཁྱད་པར་དུ་གྱུར་བའི་རིག་པ་རྩལ་གྱི་དབང་ཆེན་ཐོབ་པ་ལ་གོ་དགོས། སྣང་སྲིད་ཐམས་ཅད་མེ་ཡིས་ཁེངས༔ སྣོད་དང་བཅུད་དུ་འཛིན་པ་ཡི༔ རྣམ་རྟོག་བག་ཆགས་ཐམས་ཅད་བསྲེག༔ དེ་ནས་སྣང་སྲིད་བརྟན་གཡོ་ཐམས་ཅད་ཡེ་ཤེས་ཀྱི་མེ་ལྕེ་དེ་ཡིས་ཁེངས་ནས། སྣོད་དང་བཅུད་དུ་འཛིན་པ་ཡི་ཐ་མལ་གྱི་རྣམ་རྟོག་ཞེན་འཛིན་བག་ཆགས་དང་བཅས་པ་ཐམས་ཅད་ཤུལ་མེད་དུ་བསྲེགས་ནས། མཐར་ནི་རང་ལུས་མེ་དང་བཅས༔ ཇེ་ཆུང་ཇེ་ཆུང་སྤྲོས་བྲལ་ངང༔ བསྡུས་ལ་གསལ་སྟོང་ངང་དུ་བཞག༔ ཞེས་པས། དེའི་མཐར་རང་ལུས་མེ་དང་བཅས་པ་ཡང་ཇེ་ཆུང་ཇེ་ཆུང་། སྤྲོལ་བྲལ་དམིགས་བསམ་བརྗོད་མེད་ཀྱི་ངང་ལ་རྫོགས་རིམ་ཆེན་པོའི་དབྱིངས་སུ་བསྡུས་ལ་གསལ་སྟོང་འཛིན་མེད་ཀྱི་ངང་དུ་ཞོག་ཅེས་གསུངས། གེགས་སེལ་ཧ་སྤྲུགས་བརྡབ་ཆུང་དང༔ ངལ་གསོ་ཤེས་རིག་རྣལ་དུ་དབབ༔ ཞེས་གསུངས་ཏེ། གེགས་འདྲ་བྱུང་ན་ཧ་སྤྲུགས་དང་བརྡབ་ཆུང་བྱ་བ་དང་ཤེས་པ་རང་བབས་མ་བཅོས་པའི་ངང་དུ་ངལ་གསོས་ནས། ཤེས་རིག་རང་མལ་ལ་རྣལ་དུ་དབབ་དགོས། འདི་ལྟར་རྣལ་དུ་ཕེབས་གྱུར་ན༔ བདེ་དྲོད་མེ་འབར་གོས་མི་དགོས༔ འབྱུང་བ་ལྔ་ལ་རང་དབང་སྒྱུར༔ ཞེས་གསུངས་ཏེ། འདི་ལྟར་དུ་ལག་ལེན་ལ་ཐེབས་ནས་སྦྱངས་པའི་རིམ་པ་ཇི་བཞིན་དུ་མ་ནོར་པར་རྣལ་དུ་ཕེབས་སོང་བ་ཡིན་ན། བདེ་དྲོད་མེ་འབར་ཞེས་ལུས་ལ་བདེ་དྲོད་མེ་ལྟར་དུ་འབར་ནས་གྲང་བའི་དུས་སུའང་གོས་མི་དགོས། འབྱུང་བ་ལྔ་ལ་རང་དབང་བསྒྱུར་ཏེ་ས་ལ་འཛུལ་ཞིང་རི་བྲག་ལ་ཐོགས་པ་མེད་པ། ཆུ་ལ་ཉ་ལྟར་དུ་འཕྱོ་ཞིང་མེས་མི་འཚིག རླུང་ལྟར་མགྱོགས་ཤིང་མི་སྣང་ནམ་མཁའི་རང་བཞིན་དུ་སྤྲུལ་བསྒྱུར་ནུས་པ་དེ་འདྲ་ཡོང་བ་ཡིན་ནོ། །མ་དག་ལས་ཀྱི་རླུང་དག་པས༔ སྤྱན་དང་མངོན་ཤེས་ལ་སོགས་ཐོབ༔ ཐུན་མོང་ཡོན་ཏན་བསམ་མི་ཁྱབ༔ མངོན་ཞེན་སྐྱེས་ན་རུ་ཏྲར་གོལ༔ ཞེས་མ་དག་པའི་ལས་ཀྱི་རླུང་ཐམས་ཅད་དག་སོང་དུས། དག་པ་ཡེ་ཤེས་ཀྱི་རླུང་གི་སྟོབས་དེ་ཆེས་ཆེར་ཡར་འཕེལ་ནས། དེའི་ཡོན་ཏན་དེ་ནི་སྤྱན་དང་མངོན་ཤེས་ལ་སོགས་ཀྱི་གྲུབ་པ་ཐོབ་པ་ཡིན། ཐུན་མོང་གི་ཡོན་ཏན་བསམ་གྱིས་མི་ཁྱབ། དེའི་ཚེ་གྲུབ་རྟགས་དེ་ཚོར་མཚན་མར་བཟུང་ནས་མཆོག་འཛིན་གྱི་མངོན་ཞེན་སྐྱེས་ན་རུ་ཏྲར་གོལ་འགྲོའོ། །ཅི་ཕྱིར་འབྲས་བུའི་ཡོན་ཏན་ནི༔ སྤངས་རྟོགས་མཐའ་རུ་ཕྱིན་པའི་དབྱིངས༔ ཆོས་ཟད་བློ་འདས་ཆེན་པོ་སྟེ༔ དེ་ཕྱིར་དེ་དག་ལམ་རྟགས་ཀྱི༔ ཡོན་ཏན་ཙམ་ལས་ས་ཟིན་མེད༔ ཅེས་པས་ཅིའི་ཕྱིར་ཞེ་ན། མངོན་ཞེན་སྐྱེས་བཏང་ན་རུ་ཏྲར་གོལ་འགྲོ་བའི་རྒྱུ་མཚན་ཅི་རེད་ཅེ་ན། འབྲས་བུའི་ཡོན་ཏན་མཐར་ཐུག་པ་གང་ཡིན་ཞེ་ན། སྤངས་རྟོགས་མཐའ་རུ་ཕྱིན་པའི་དབྱིངས་ཞེས་གསུངས་པས། སྤངས་དང་རྟོགས་པའི་ཡོན་ཏན་མཐའ་རུ་ཕྱིན་པའི་ཆོས་ཀྱི་དབྱིངས་ལ་གོ་བ་རེད། དེ་ནམ་ཐོབ་ན་བློ་ཟད་ཆོས་འདས་ཆེན་པོའི་སར་ཕྱིར་པའི་སྐབས་ཡིན། དེ་ཕྱིར་དེ་དག་ལམ་རྟགས་ཀྱི་ཞེས་པས། གོང་ནས་སྨོས་མ་ཐག་པའི་ཐུན་མོང་གི་གྲུབ་རྟགས་དེ་དག་ལམ་རྟགས་ཀྱི་ཡོན་ཏན་ཙམ་ལས་མཐར་ཐུག་གི་འབྲས་བུའི་གཞི་བཅོལ་སའི་ས་ཟིན་མེད་པས་བློ་གཏད་མེད་ཅེས་གསུངས་པ་རེད། སྤངས་ཐོབ་བྲལ་བའི་རྫོགས་ཆེན་ནི༔ ཆོས་རྣམས་ཀུན་གྱི་གྲོལ་སའོ༔ ཞེས་སྤངས་ཐོབ་དང་བྲལ་བའི་རྫོགས་པ་ཆེན་པོའི་ཆོས་ནི་རྫོགས་རིམ་ཀུན་གྱི་མཐར་ཐུག་པ་དབྱིངས་དང་ཡེ་ཤེས་གཉིས་མེད། ཆོས་རྣམས་ཀུན་གྱི་གྲོལ་ས་གཞི་འབྲས་དབྱེར་མེད་པའི་སར་ཕྱིན་པའོ། །ས་མ་ཡ༔ ཞེས་གསང་བ་དམ་ཚིག་གི་རྒྱས་སླར་ཡང་མནན་ཏེ། ཇི་ལྟར་མཁའ་འགྲོའི་གསང་མཛོད་ལས་བརྡ་བསྒྱུར་མཛད་ཚུལ་ནི། འདི་ལྟར་སྲོག་རྩོལ་རླུང་གི་གནད༔ བརྒྱ་ཕྲག་འདུས་པའི་ཡང་ཟབ་བཅུད༔ སྙིང་མཛོད་སྨུག་པོ་ཀློང་གི་སྒྲོམ༔ སྐུ་གདུང་འབར་བའི་བརྡའ་རིས་ཅན༔ ཞེས་འདི་ལྟར་གདམ་པའི་མན་ངག་འདི་ནི་སྲོག་དང་རྩོལ་བའི་རླུང་གི་གནད་གྱི་ལམ་བརྒྱ་ཕྲག་གི་སྙིང་པོ་ཐམས་ཅད་འདུས་པའི་ཡང་ཟབ་ཀྱི་བཅུད་ཡིན། གཏེར་ཁ་གསར་རྙིང་མང་པོ་ནས་སྲོག་རྩོལ་གྱི་རླུང་གི་གནད་འདི་བཤད་པ་མང་པོ་ཡོད་དེ། ཐམས་ཅད་ཀྱི་བཅུད་འདི་ལ་འདུས། འདི་བརྡ་ཕྲན་ཕལ་བ་དང་མི་འདྲ་བ་ཡིན་པས་ན་སྙིང་མཛོད་སྨུག་པོ་ཀློང་གི་སྒྲོམ། སྐུ་གདུང་འབར་བའི་བརྡའ་རིས་ཅན་ཞེས་སྙིང་པོའི་ཡང་ཞེན་ཀྱི་བརྡ་རིས་ཅན་ཡིན་གསུངས་པ་རེད། མཁའ་འགྲོའི་ཐུགས་གསང་ནམ་མཁའ་མཛོད༔ གཏེར་བཅུད་འདུས་པའི་ཕོ་བྲང་ནས༔ བརྡ་ཚིག་རྡོ་རྗེའི་དབྱིངས་སུ་བསྒྱུར༔ ཞེས་གཏེར་བདག་ཡེ་ཤེས་ཀྱི་མཁའ་འགྲོའི་ཐུགས་གསང་། ཟད་མེད་ནམ་མཁའ་མཛོད་ཀྱི་གཏེར་བཅུད་འདུས་པའི་ཕོ་བྲང་གང་ཡིན་པ་དེ་ནས་སྤྱན་དྲངས་ཏེ། ཁོང་གིས་བརྡ་ཚིག་རྡོ་རྗེའི་དབྱངས་སུ་བསྒྱུར་ནས་གོ་བར་བྱས་པ་ཡིན་གསུངས་པ་རེད། སྐལ་ལྡན་འགའ་ཡི་སྤྱོད་ཡུལ་ལས༔ གཞན་དུ་མ་ཡིན་དམ་ཚིག་རྒྱ༔ སྙིང་འདྲ་གཅིག་ལས་ཤོར་ར་རེ༔ ཞེས་སྐལ་ལྡན་འགའ་ཡི་སྤྱོད་ཡུལ་མ་གཏོགས་ཐམས་ཅད་ཀྱི་སྤྱོད་ཡུལ་མིན། གཞན་སྣོད་ཡིན་མིན་གཉིས་ཀྱི་སྤྱོད་ཡུལ་མ་ཡིན་པས་དམ་ཚིག་གི་རྒྱ་གཅིག་གིས་མི་ཚད་རིམ་པ་མང་པོས་མནན་ཏེ་སྙིང་འདྲ་གཅིག་ལས་ཤོར་ར་རེ་ཞེས། སྙིང་དང་འདྲ་བའི་སྐལ་ལྡན་གྱི་བུ་མཆོག་གཅིག་ལས་གཉིས་པར་ཤོར་ར་རེ། ཤོར་འགྲོ་ཉེན་ཆེའོ་ཞེས་འགག་མཛད་པ་རེད། ཡང་བསྐྱར་ནན་གྱིས་མནའ་ཐོ་ཡིས་བགག་སྟེ། འདི་དང་རྫོགས་ཆེན་མ་བུ་གསུམ༔ ཉམས་སུ་བླངས་ནས་མ་གྲོལ་ན༔ པདྨས་བསླུས་སོ་ཕྱི་རབས་རྣམས༔ ཞེས་འདི་དང་རྫོགས་ཆེན་མ་བུ་གཉིས་ཏེ་གསུམ་པོ་གསུངས་པ། འདི་བུ་ལྟ་བུ་ཡིན་པར་ཆག་བཞག་ན་རྫོགས་ཆེན་ཁྲེགས་ཆོད་ཐོད་རྒལ་གཉིས་མ་ལྟ་བུ་ཡིན་ལ། འདི་དག་སྔོན་རྗེས་ཀྱི་རིམ་པ་ལྟར་དུ་རྫོགས་ཆེན་མ་བུ་གསུམ་ཞེས་པར་འགྲེལ་ཆོག ཉམས་སུ་བླངས་ནས་མ་གྲོལ་ན་བདག་ཉིད་པདྨ་འབྱུང་གནས་ཁོང་གིས་བསླུས་པ་ཡིན་ཕྱི་རབས་ཀྱི་རྗེས་འཇུག་རྣམས་དེ་བས་ཡིད་ཆེས་པར་གྱིས་གསུངས་པ་རེད། འདིས་ཀྱང་རྫོགས་རིམ་ཀུན་གྱི་མཐར་ཐུག་གི་སྐྱེལ་སོ་དེ་རྫོགས་པ་ཆེན་པོ་ལ་ཐུག་པ་གོ་ཐུབ་པ་ཡིན་ནོ། །ལས་འཕྲོ་ཅན་གྱི་དཔལ་དུ་ཤོག༔ ཅེས་རྫོགས་ཆེན་བརྒྱུད་པ་དགུ་ལྡན་གྱི་ནང་གི་ཤོག་སེར་ཚིག་གི་རྒྱ། ལས་འཕྲོ་གཏེར་གྱི་རྒྱ་ཡི་རྣམ་པ་དང་བཅས་ཏེ། སྐུའི་རྒྱ༔ གསུང་གི་རྒྱ༔ ཐུགས་ཀྱི་རྒྱ༔ དཔལ་སྔགས་ཀྱི་སྲུང་མས་དམ་ཉམས་བཀའ་རྐུན་ལོག་སྲེད་ཅན་གྱི་ལག་ཏུ་མ་བཏང་ཞིག༔ གལ་ཏེ་བཏང་ན་རཀྐན༔སྟེ། དམྱལ་མེ་བཟོད་དཀའ་ཞེས། དམྱལ་བར་སྐྱེ་བ་རེད་ཅེས་དམྱལ་མེས་བཟོད་དཀའི་ཐ་ཚིག་གིས་རྫོགས་པར་བྱས་པ་ཡིན་ནོ། །དེ་ནི་ཆོས་ཚན་གསུམ་པ་ཡིན།