ཉིན་གཉིས་པའི་བདེ་ཆེན་ཞིང་གི་སྨིན་ཁྲིད།
སྐྱབས་འགྲོའི་སྡོམ་པ་གནང་བ།
དེ་ལ་སྤྱིར་བོད་གངས་ཅན་ལྗོངས་འཕགས་པ་སྤྱན་རས་གཟིགས་ཀྱི་གདུལ་ཞིང་དུ་སྐྱེས་པའི་མི། ཨ་མ་དང་མ་ཎི་མཉམ་བསླབ་མ་དགོས་པར་ཤེས་ཤིང་དཀོན་མཆོག་གསུམ་ལ་སྐྱབས་སུ་འགྲོ་བ། དེའང་སྔོན་ཆད་བོད་མི་ཐམས་ཅད་དེ་ལྟ་ཡིན་པར་བཞེད་མོད། དེང་སྐབས་ཀྱང་དོན་དངོས་ཤེས་པ་དང་མི་ཤེས་པར་མ་ལྟོས་པའི་ཕལ་མོ་ཆེ་ཞིག་ནང་བ་སངས་རྒྱས་པའི་ཆོས་སྒོར་ཞུགས་པའི་ཆོས་པ་དངོས་ཡིན་པར་སྨྲ་མི་ནུས་མོད་ནང་ཆོས་ལ་དད་པ་ཅན་ཤ་སྟག་ཡིན། འོན་ཀྱང་སྐྱབས་འགྲོའི་སྡོམ་པའམ་དམ་བཅའ་འདི་ཉིད་རང་རྒྱུད་ལ་མ་བླངས་ན། དཀོན་མཆོག་གསུམ་གྱི་སྐྱབས་འོག་ཏུ་ཚུད་པའི་ནང་བ་སངས་རྒྱས་པའི་མཚན་ཉིད་མི་ཚང་བས་དེ་ཉིད་ཕྱི་རོལ་པ་མིན་ལ་ནང་བའང་མ་ཡིན་པ་ཞིག་གོ །ཚུལ་འདི་ནི་ཕྱི་བ་ནང་བ་སྐྱབས་འགྲོ་ཡིས་ཁྱད་པར་འབྱེད་པ་ཡིན་པས་སོ། །སྐྱབས་སུ་སོང་བའི་ཕན་ཡོན་ལ་བསམ་ན། ཇི་སྐད་དུ། སྐྱབས་སུ་སོང་བར་གཟུགས་མཆིས་ན། །ནམ་མཁའ་འདི་ཡང་སྣོད་དུ་ཆུང་། །ཞེས་གསུངས་པ་བཞིན་སྐྱབས་སུ་སོང་བའི་ཕན་ཡོན་ནི་གལ་ཏེ་དངོས་པོ་གཟུགས་ཅན་ཞིག་ཡིན་ན་ནམ་མཁའི་ཁམས་ལ་མི་ཤོང་ཞེས་དེ་ཉིད་ཚད་གཞལ་དུ་མེད་པར་གསུངས། དེ་འདྲའི་ཕན་ཡོན་ཆེ་བ་ཞིག་ད་བར་དུ་རྒྱུད་ལ་མ་བླངས་བ་ནི་ནོར་བའོ་སྙམ་པའི་བློ་འབྱུང་ངེས་པ་ཞིག་གོ །ད་ལྟའི་དལ་འབྱོར་གྱི་ལུས་རྟེན་ཐོབ་པ་དོན་ཡོད་ཅིག་བྱེད་དགོས་བསམ་ནས་སངས་རྒྱས་ཀྱི་བསྟན་པའི་སྒོར་ཞུགས་ན། ཡོན་ཏན་ཐམས་ཅད་ཀྱི་གཞི་རྟེན་ནི་ཚུལ་ཁྲིམས་ཡིན་ལ། དེའི་རྩ་བ་ལ་སྐྱབས་འགྲོའི་རྨང་གཞི་ཡོད་དགོས་ཏེ། ཇི་སྐད་དུ། སྡོམ་པ་ཀུན་ལ་ཡོད་མོད་ཀྱང་། །སྐྱབས་སུ་མ་སོང་བ་ལ་མེད། །ཅེས་གསུངས་པ་ལྟར་སྐྱབས་སུ་ཡང་དག་པར་སོང་བ་མེད་ན་སོར་བྱང་སྔགས་གསུམ་གྱི་སྡོམ་པ་གང་ཞུས་ཀྱང་གཟུགས་བརྙན་ཙམ་ལས་དོན་ལ་ཐོབ་པ་མེད། དེའི་ཕྱིར་སོར་བྱང་སྔགས་གསུམ་ཐམས་ཅད་སྐྱབས་འགྲོའི་རྨང་གཞིའི་སྟེང་ནས་ཐོབ་དགོས་པས། དེ་ལྟ་བུའི་སྐྱབས་སྡོམ་ནི་ཆོ་ག་ལ་བརྟེན་ནས་ལེན་པ་ཡིན་པས་ན། དང་པོ་བདག་ཅག་གི་སྟོན་པ་བཅོམ་ལྡན་འདས་ཀྱི་སྐུ་གཟུགས་མགོན་པོ་འོད་དཔག་མེད་དང་དབྱེར་མེད་དུ་བཞུགས་པ་འདི་ལ་ཕྱག་གསུམ་རེ་འཚལ་དགོས། མི་ནུས་པ་རྣམས་ཀྱིས་ཕྱག་འཚལ་བའི་མོས་པ་སྟེ་ཐལ་མོ་སྦྱར་བ་གནས་གསུམ་ལ་རེག་ཅིང་མལ་ལྔ་ས་ལ་ཕབ་པའི་མོས་པ་གྱིས། དེའང་ཐམས་ཅད་ཀྱིས་མཉམ་དུ་དང་པོ་ཐལ་མོ་སྙིང་ཁར་སྦྱོར། དེ་ནས་སྤྱི་བོའི་གཙུག་ཏུ་སྦྱོར། དེ་ནས་མགྲིན་པར་སྦྱོར། དེ་ནས་སྙིང་ཁར་སྦྱོར། དེ་ནས་མལ་ལྔ་ས་ལ་ཕབ། དེ་ནི་ཕྱག་དང་པོ་ཡིན། སླར་ཡང་ཡར་ལ་ལང་སྔར་བཞིན་ཕྱག་ལན་གཉིས་འཚལ་བར་བྱ། དེ་ལྟར་བདག་ཅག་གི་སྟོན་པ་དང་མགོན་པོ་འོད་དཔག་མེད་དབྱེར་མེད་པ་ལ་སྟོན་པ་དངོས་ཀྱི་འདུ་ཤེས་བཞག་ནས་ཕྱག་གསུམ་བཙལ་བ་ཡིན། དེ་བཞིན་སྡོམ་པ་སྦྱིན་པའི་སློབ་དཔོན་ལའང་ཕྱག་གསུམ་འཚལ་དགོས་པས་གོང་ལྟར་དུས་མཉམ་དུ་འཚལ། དེ་རྗེས་སློབ་མ་རྣམས་པུས་བཙུགས་སྙིང་ཁར་ཐལ་སྦྱར་གྱིས་སྡོད། དེ་ལྟར་སྡོད་མི་ཐུབ་པ་རྣམས་ཅི་བདེར་བཞུགས། དེ་ནས་སློབ་དཔོན་གྱིས་འདི་ལྟར་གསུངས། རྙེད་པར་དཀའ་བ་དལ་འབྱོར་གྱི་རྟེན་ཁྱད་པར་ཅན་རྙེད། མཇལ་བར་དཀའ་བ་སངས་རྒྱས་ཀྱི་བསྟན་པ་དང་མཇལ། བདག་ལེགས་སུ་འདོད་པའི་སྐྱེ་བོ་དག་གི་དོན་དུ་གཉེར་བྱ་ནི། སངས་རྒྱས་ཀྱི་བསྟན་པ་ལ་ནན་ཏན་སྙིང་པོར་བྱ་བ་ཉིད་ཡིན་ལ། དེ་ལ་ཡོན་ཏན་གྱི་གཞི་ཚུལ་ཁྲིམས་ཀྱི་བསླབ་པ་ལ་ཐོག་མར་བསླབ་དགོས་ཤིང་། དེའི་རྩ་བའང་སྐྱབས་སུ་འགྲོ་བའི་སྡོམ་པ་ཉིད་ལ་རག་ལས་པ་ཡིན་པས། ཇི་སྐད་དུ། དཀོན་མཆོག་གསུམ་ལ་སྐྱབས་འགྲོ་བ། །འཇིགས་པ་མེད་པ་ཐོབ་པར་འགྱུར། །ཞེས་གསུངས་པ་ལྟར་ཕན་ཡོན་ཤིན་ཏུ་ཆེ། དེའང་བླ་མའི་དྲུང་ནས་བླང་ན་ངོ་ཚ་ཁྲེལ་ཡོད་ཀྱི་རྟེན་སོགས་དགོས་པ་ཁྱད་པར་ཅན་ཡོད་པས་འདིའི་རྗེས་ཟློས་མཛོད། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ། དུས་འདི་ནས་བཟུང་སྟེ། ཇི་སྲིད་འཚོའི་བར་དུ། རྐང་གཉིས་རྣམས་ཀྱི་མཆོག སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག དགེ་འདུན་ལ་སྐྱབས་སུ་མཆིའོ། །བདག་དུས་འདི་ནས་བཟུང་སྟེ། ཇི་སྲིད་འཚོའི་བར་དུ། སྐྱབས་གསུམ་འཛིན་པའི་དགེ་བསྙེན་དུ། སློབ་དཔོན་གྱིས་གཟུང་དུ་གསོལ། ཞེས་ལན་གསུམ་རྗེས་ཟློས་བྱ་ཞིང་། ཐ་མའི་ཚེ་བདག་དགེ་བསྙེན་དུ་ཞེས་པའི་ཚིག་གི་མཇུག་ཐོག་ཏུ་བདག་གིས་སེ་གོལ་གྱི་སྒྲ་བྱས་པ་དང་མཉམ་དུ་ཐབས་ཡིན་ནོ་ཞེས་བརྗོད་ཚེ་སྐྱབས་སྡོམ་ཐོབ་བློ་སྐྱེ་ཞིང་ལན་དུ་ལགས་སོ་བྱིན། དེའང་རབ་བྱུང་རྣམས་ཀྱིས་ལེན་མི་དགོས་མོད་འདི་ཉིད་ཁྱིམ་པའི་སྡོམ་པ་ཡིན་པས་སྔགས་ཕོ་མོ་ཚོས་བླང་ཆོག་གོ །
སྐྱབས་འགྲོའི་བསླབ་བྱ་དགུ་བསྟན་པ།
དེ་ལྟའི་སྐྱབས་འགྲོའི་སྡོམ་པ་ཐོབ་ཙམ་གྱིས་མི་ཆོག་པར་བསླབ་བྱ་ལ་སློབ་དགོས། དེའང་གང་ཡིན་སྙམ་ན་སྒྲུབ་པའི་བསླབ་བྱ་གསུམ་དང་། དགག་པའི་བསླབ་བྱ་གསུམ། ཆ་མཐུན་གྱི་བསླབ་བྱ་གསུམ་སྟེ་དགུའོ། །དང་པོ་ནི། སངས་རྒྱས་ལ་སྐྱབས་སུ་སོང་ནས་འཇིག་རྟེན་པའི་ལྷ་ལ་སྐྱབས་སུ་མི་འགྲོ། ཆོས་ལ་སྐྱབས་སུ་སོང་ནས་སེམས་ཅན་ལ་གནོད་འཚེ་མི་བྱ། དགེ་འདུན་ལ་སྐྱབས་སུ་སོང་ནས་གྲོགས་མུ་སྟེགས་ཅན་མི་བསྟེན་པ་བཅས་སོ། །དེའང་བོད་འདིར་མུ་སྟེགས་པ་དངོས་སུ་མི་འབྱུང་ཡང་སྡིག་ཅན་གྱི་གྲོགས་དང་འགྲོགས་པར་མི་བྱའོ། །གཉིས་པ་ནི། སངས་རྒྱས་ལ་སྐྱབས་སུ་སོང་ནས་བདེ་བར་གཤེགས་པའི་སྐུ་གཟུགས་ཐ་ན་སཱ་ཙྪའི་ཆག་དུམ་ཡན་ཆད་ལ་སངས་རྒྱས་དངོས་ཀྱི་འདུ་ཤེས་བཞག་ནས་ཕྱག་མཆོད་གུས་འདུད་བཀུར་བསྟི་བྱ། ཆོས་ལ་སྐྱབས་སུ་སོང་ནས་ཆོས་དཀོན་མཆོག་གི་རྟེན་གསུང་རབ་ཚིག་འབྲུ་གཅིག་ཡན་ཆད་ལ་ཆོས་ཀྱི་འདུ་ཤེས་བཞག་ནས་ཕྱག་མཆོད་གུས་འདུད་བཀུར་བསྟི་བྱ། དགེ་འདུན་ལ་སྐྱབས་སུ་སོང་ནས་རབ་ཏུ་བྱུང་བའི་སྡེ་དང་ཐ་ན་ལྷན་པ་སེར་བོ་ཡན་ཆད་ལ་དགེ་འདུན་དཀོན་མཆོག་དངོས་ཀྱི་འདུ་ཤེས་བཞག་ནས་ཕྱག་མཆོད་གུས་འདུད་བཀུར་བསྟི་སོགས་སྔར་ལྟར་བྱའོ། །གསུམ་པ་ནི། དུས་རྟག་ཏུ་དཀོན་མཆོག་མཆོད་པ་ལ་བརྩོན་པར་བྱ་སྟེ། ཐ་ན་ཅི་ཟ་ཅི་འཐུང་གི་ཕུད་གྱིས་མཆོད་པ་དང་། ནང་ནུབ་སོགས་སུ་སྐྱབས་འགྲོ་བཟླ་བ་ལ་བརྩོན་པ་དང་། སྐྱེས་བུ་དམ་པ་བསྟེན་ནས་ཆོས་ཀྱི་རྗེས་སུ་འཇུག་ཅིང་ཆོས་དང་མཐུན་པའི་བསླབ་བྱ་ལ་སློབ་ཅིང་། དེ་དང་དེའི་བསླབ་བྱ་རྣམས་ཡིད་ལ་བཟུང་སྟེ་དྲན་ཤེས་དང་ལྡན་པས་དུས་རྟག་ཏུ་སློབ་པར་གྱིས། དེ་ནས་བཀའ་དྲིན་གཏང་རག་གི་ཚུལ་དུ་སླར་ཡང་ཕྱག་གསུམ་འཚལ་བར་བྱ། ཐམས་ཅད་མཉམ་དུ་ཡར་ལང་བ་དང་སྙིང་ཁར་ཐལ་མོ་སྦྱོར་བ་སོགས་སྔར་ལྟར་ཕྱག་ལན་གསུམ་འཚལ། དེ་ནས་རང་སར་བདེ་བར་སྡོད་དང་འདིའི་སྨོན་ལམ་བཏོན་རྗེས་ཞིང་ཁྲིད་ལ་འཇུག་པར་བྱའོ། །ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །ཚུལ་ཁྲིམས་རྣམ་པར་དག་དང་ལྡན། །རློམ་སེམས་མེད་པའི་ཚུལ་ཁྲིམས་ཀྱིས། །ཚུལ་ཁྲིམས་ཕ་རོལ་ཕྱིན་རྫོགས་ཤོག །རྒྱལ་བ་ཀུན་གྱི་རྗེས་སུ་སློབ་གྱུར་ཏེ། །བཟང་པོ་སྤྱོད་པ་ཡོངས་སུ་རྫོགས་བྱེད་ཅིང་། །ཚུལ་ཁྲིམས་སྤྱོད་པ་དྲི་མེད་ཡོངས་དག་པ། །རྟག་ཏུ་མ་ཉམས་སྐྱོན་མེད་སྤྱོད་པར་ཤོག །གཞན་གནོད་གཞི་བཅས་སྤོང་ལ་གོམས་པའི་མཐུས། །རྨི་ལམ་ན་ཡང་སྡིག་སེམས་མི་འབྱུང་ཞིང་། །བྱང་ཆུབ་སེམས་དང་ནམ་ཡང་མི་འབྲལ་བར། །ཚུལ་ཁྲིམས་ཕུན་སུམ་ཚོགས་པའི་བཀྲ་ཤིས་ཤོག །
མཚམས་སྦྱོར་ཞལ་གདམས།
མཚམས་འདི་ནས་བཟུང་ཐམས་ཅད་ངག་བཅད་ཀྱིས་ཆོས་ཁྲིད་མ་གྲོལ་བར་དུ་སྨྲ་བ་ཡོངས་སུ་བསྡམ་པར་བྱ། དེའང་བདག་ཅག་གི་སྟོན་པ་བཅོམ་ལྡན་འདས་མཚུངས་མེད་ཐུབ་པའི་དབང་པོའི་ཞལ་ནས། ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་བཤད་པར་བྱའོ། །ཞེས་ཆོས་བསྟན་པར་མཛད། རང་རེ་རྣམས་ཀྱང་སྤྱིར་དུས་ངན་བསྟན་པ་རྙོག་མ་ཅན་གྱི་སྐབས་སུ་སྐྱེས་མོད། བྱེ་བྲག་ཏུ་བསམ་ན་སྔར་བསགས་བསོད་ནམས་ཀྱི་དབང་གིས་བསྟན་ལ་དད་ཅིང་ལས་འབྲེལ་ཅན་ཡིན་པས་ན། ཐུབ་པའི་བསྟན་པ་ཡོངས་སུ་ཉམས་པ་མིན་པས་དེའི་ལྷག་ཞབས་སུ་སྐྱེས་པའི་དལ་འབྱོར་གྱི་ལུས་རྟེན་ཆུད་ཟོས་སུ་གཏོང་མི་རུང་སྙམ་པའི་བསམ་པ་སྔོན་དུ་སོང་ནས། ཆོས་འཆད་ཉན་བྱེད་ན་ཚད་དང་ལྡན་ཞིང་ཚུལ་དང་མཐུན་ལ་དོན་འབྲས་ཡོད་དགོས་སྙམ་སྟེ། གོང་དུ་ལུང་དྲངས་པ་བཞིན་བཅོམ་ལྡན་འདས་ཀྱི་བཀའ་ལྟར་དུ། ཆོས་ཞུ་དུས་ལེགས་པར་རབ་ཏུ་ཉན་ནས་ཡིད་ལ་འཛིན་དགོས་ཏེ། ཡིད་ལ་མ་བཟུང་ན་ཞེ་ནས་མི་འདུག་པ་སྣོད་ཞབས་རྡོལ་དུ་ཆུ་བླུག་པའི་དཔེ་བཀོད་ནས་ཆོས་ཉན་ཚུལ་གསུང་སྲོལ་ཡོད་པ་ལྟར་རོ། །ཆོས་ཉན་པ་ལས་ཀྱང་ཐོག་མར་ཇི་ལྟར་ཉན་ཚུལ་ཤེས་པ་དེ་གལ་ཆེ། དེའང་ཆོས་ཉན་མཁན་རང་ཡིན་ལ་རང་ཉིད་དེ་རིང་ཞིང་ཁྲིད་ཀྱི་ཆོས་ཉན་དུ་འགྲོ་དགོས་བསམས་ནས་དང་པོ་ཡོང་བ་བཞིན་ཆོས་གྲལ་དུ་བསྡད་ཚེ། ང་ཞེས་པའི་གདགས་གཞི་ཕུང་ལྔའི་ཚོགས་པ་ལས་ཀྱང་མཛུབ་མོ་འཛུགས་ས་ནི་ལུས་སེམས་གཉིས་ཡིན་ན། སེམས་ཀྱིས་ཀུན་སློང་བཟང་པོ་རང་དང་གཞན་མི་ཕྱེ་པར། མཐའ་ཡས་པའི་སེམས་ཅན་ཁམས་གསུམ་འཁོར་བ་རིགས་དྲུག་གི་གནས་སུ་སྡུག་བསྔལ་མི་མྱོང་བ་མེད་ཅིང་། དེ་དག་ཐམས་ཅད་ཀྱིས་རང་ཉིད་ཇི་བཞིན་སྡུག་བསྔལ་མི་འདོད་ལ་བདེ་བ་འདོད་པ་འདྲ་ཡང་། སྡུག་བསྔལ་གྱི་རྩ་བ་བཅད་ནས་བདེ་བ་དམ་པ་མཆོག་ལ་སྦྱོར་བྱེད་ཀྱི་རྒྱུ་མི་ཤེས་བར་སྔར་འཁྲུལ་འཁྲུལ་བའི་ཡ་མཐའ་ཐུག་མེད་དང་། ཕྱིས་འཁྲུལ་འཁྲུལ་བའི་མ་མཐའ་མཐོང་རྒྱུ་མེད་པར་འཁྲུལ་བ་ལས་མི་ཐར་བར་འདུག་པས་ན། འདི་ལས་ཐར་ཐབས་སུ་དམ་པའི་ལྷ་ཆོས་ཉན་བསམ་སྒོམ་པས་བསྒྲུབ་པར་བྱ་སྙམ་དུ། བསམ་པ་བྱང་ཆུབ་སེམས་ཀྱི་ཀུན་སློང་དང་ལྡན་པ་གཞིར་བྱས་ཆོས་ཀྱི་ཚིག་དོན་ཐམས་ཅད་ཡིད་ལ་འཛིན་དགོས། ལུས་ཀྱི་ཀུན་སྤྱོད་ནི་དད་ཅིང་གུས་པའི་སྒོ་ནས་ཆོས་བཤད་པའི་སྒྲ་ཚིག་ལ་རྣ་བ་གཏད་ཅིང་དུས་རྒྱུན་གྱི་སྒྲིག་སྲོལ་ལྟར་ངག་གི་སྨྲ་བ་བཅད་དེ་ཉན་དགོས། དེའང་ལེགས་པར་རབ་ཏུ་ཉན་ནས་ཡིད་ལ་གཟུང་ཞེས་པར་སྤང་བྱ་དང་བླང་བྱའི་ཀུན་སློང་དང་ཀུན་སྤྱོད་མང་དུ་འདུའོ། །ཇི་སྐད་དུ། བསམ་པ་དགེ་དང་མི་དགེའི་བྲག་ལས། །དགེ་སྡིག་གཟུགས་བརྙན་ཆེ་ཆུང་རྗེས་འགྲོ། །ཞེས་གསུངས་པ་ལྟར་ཆོས་ཉན་བསམ་སྒོམ་སྒྲུབ་གང་གི་སྐབས་སུའང་བསམ་པ་རྣམ་པར་དག་ན་ཆོས་དགེ་བ་ཡིན་ལ། བསམ་པ་རྣམ་པར་མ་དག་ན་ལྟར་སྣང་དུ་བཟང་ངན་གྱི་རྣམ་པ་ཇི་འདྲ་ཡིན་ཡང་། དགེ་སྡིག་ནི་བསྒྲུབ་བྱའི་གཟུགས་བརྙན་གྱི་ཆེ་ཆུང་ལ་མི་ལྟོས་པས་དོན་དུ་བསམ་པ་མི་དགེ་བ་ཡིན་ན་ལས་བྱ་བ་གང་བྱས་མི་དགེ་བར་འགྱུར་རོ། །དེའི་ཕྱིར་ཐེག་ཆེན་ཐར་ལམ་སྒྲུབ་པའི་གཅེས་པ་རྣམ་གསུམ་སྟེ། སྦྱོར་དངོས་རྗེས་ཀྱི་དམ་པ་གསུམ་དང་ཐབས་རྒྱ་ཆེན་གསང་བ་སྔགས་ཀྱི་ཀུན་སློང་དང་བཅས་ཏེ། མདོ་སྔགས་ཟུང་འབྲེལ་གྱི་ཆོས་འདི་འཆད་ཉན་ལ་འཇུག་པར་བྱའོ། །དེ་ལ་གང་འཆད་པར་བྱ་བའི་སྐབས་དོན་གྱིི་ཆོས་ནི། ངག་འདོན་བསྡུས་པ་བྱིན་རླབས་གློག་ཞགས་དང་འབྲེལ་ནས་ཀུན་མཁྱེན་འཇིགས་གླིང་གི་གསུང་བྱིན་རླབས་ཅན་གསོལ་འདེབས་སྨོན་ལམ་སྦྲེལ་མ་འདིའི་སྟེང་ནས་ཞིང་ཁྲིད་བྱེད་པ་ལ། བདེ་བ་ཅན་དུ་སྐྱེ་བའི་རྒྱུ་བཞི་ནི་རྒྱུའི་སྡོམ་དང་ཆིངས་སུ་བཞག་ནས། རྒྱུ་དང་པོ་རྟེན་ཞིང་ཁམས་གསལ་བར་ཡང་ནང་གསེས་གསུམ་དུ་དབྱེ་བ་ལས། དང་པོ་ཁ་སང་གོང་དུ་བཤད་ཟིན་ཏོ།།
བར་དུ་མངོན་པར་རྫོགས་པར་སངས་རྒྱས་ནས་ཞིང་ཁམས་ཁྱད་པར་དུ་འཕགས་པ་བཟུང་ཚུལ།
དང་པོ་བདེ་བ་ཅན་དུ་སྐྱེ་བའི་རྒྱུ་སྒྲུབ་པར་སྐུལ་བ།
སྤྱིར་གང་ཟག་ལས་དང་སྐལ་བ་མཆོག་ལྡན་ཚེ་འདི་ཕྱིའི་རང་གཞན་གཉིས་དོན་ལ་རྣམ་དཔྱོད་ཀྱི་བློ་རིག་ལྡན་པ་ཞིག་གིས་འདི་འདྲའི་མི་ལུས་རིན་པོ་ཆེ་རྙེད་པར་དཀའ་བ་ཞིག་རྙེད། དལ་འབྱོར་གྱི་ཆོས་བཅོ་བརྒྱད་ཚང་། ལས་དགེ་སྡིག་ཅི་བསགས་རང་ལག་ཏུ་ཡོད་པའི་སྐབས་འདིར་རང་གཞན་གཏན་གྱི་ཕུགས་འདུན། དོན་དུ་གཉེར་བྱའི་མཆོག་ཏུ་གྱུར་པ། འགྲུབ་དགོས་པའི་བྱ་བ་གནད་ཆེན། མ་འགྲུབ་ཐབས་མེད་དུ་གྱུར་པ་ནི་གང་ཞེ་ན། སྲིད་དང་ཞི་བ་གཉིས་ཀའི་མཐའ་ལ་མི་གནས་པའི་མྱ་ངན་ལས་འདས་པ་སངས་རྒྱས་ཀྱི་གོ་འཕང་ཐོབ་པ་དེ་ཡིན། དེ་སྒྲུབ་པའི་ཐབས་ལ་སྙིགས་དུས་ཚེ་ཐུང་ནད་མང་གི་སྐབས་འདི་འདྲ་ཞིག་ལ། མི་ཚེར་རྟག་བརྟན་མེད་པ་འཆི་རྐྱེན་ངེས་མེད་དང་ནམ་འཆི་ཆ་མེད་རླུང་ནང་གི་མར་མེ་ལྟ་བུ། ལྟ་བ་དང་ཉོན་མོངས་པའི་སྙིགས་མར་གྱུར་ཅིང་། ཁྱད་པར་དུ་སྔར་མི་ཚེ་དོན་མེད་དུ་སོང་ཚུལ་དང་ད་ནི་ཚེའི་ལྷག་མ་ཅི་ཡོད་ལ་བསམ་བློ་བཏང་ནས། སྔར་མེད་ཀྱི་སྙིང་སྟོབས་དང་བརྩོན་འགྲུས་བསྐྱེད་དེ་བཅོ་བརྒྱད་ཀྱི་མཇུག་ཏུ་བཅུ་དགུ་མཐུད་ཅེས་པ་ལྟར། ཚེ་ལུས་འདིའི་སྟེང་ནས་སངས་རྒྱས་ཀྱི་གོ་འཕང་ཐོབ་སྟེ། གཞན་འཁོར་བའི་གནས་ལས་འདྲེན་ནུས་པ་ཞིག་ཏུ་འགྱུར་ཟེར་ན། རང་རྒྱུས་རང་ལས་ཆེ་བ་གར་ཡང་མེད་དེ་ད་སྔོན་ཡང་ཆོས་མ་གོ་བ་དང་མ་ཐོས་པ་མིན་ལ། དགེ་སྒྲུབ་སྡིག་སྤོང་གི་གནད་མ་ཁྲོལ་བར་ལུས་པའང་མིན་མོད། ཆོས་ཐོས་པའི་དོན་ལ་བསམ་བློ་ཞིབ་ཏུ་མ་བཏང་ཞིང་དོན་ཅུང་ཟད་རེ་གོ་བའང་རང་རྒྱུད་ལ་སྦྱོར་མ་ནུས་པར་ཆོས་རའི་ནང་གི་ཆོས་པ་དེ་སྒོ་ཕྱིར་བུད་དུས་སྡིག་སྤྱོད་མཁན་དུ་གྱུར་ནས། ཆོས་བརྒྱ་གོ་སྟོང་གོ་ཐམས་ཅད་ནི་དོན་མ་མཐོང་རྒྱང་གི་གཏམ་རྒྱུད་ཅེས་པ་ལྟར་གྱུར་ཏེ། ཤེས་བཞིན་དུག་འཐུང་གི་ལས་ངན་བསགས་པ་བགྲང་གིས་མི་ལང་བ་ཞིག་ཏུ་གྱུར་ཡོད། དེ་ལྟར་མི་ཚེ་གཅིག་གི་སྡིག་ལས་སྟོབས་ཆེ་བའི་དོ་ཡ་ལ་ད་ལྟའི་ཆོས་རའི་ནང་གི་དགེ་སེམས་སྐད་ཅིག་མས་ག་ལ་ཡོང་། ཆུ་རྒྱུན་ཐུར་དུ་རྒྱུག་པ་ལྟ་བུའི་ངན་གོམས་གྱིས་ཉོན་མོངས་པའི་ལས་བསགས་ཤིང་འབྲས་བུ་སྡུག་བསྔལ་མྱང་ནས་ཀུན་ཉོན་རྒྱུ་འབྲས་གཉིས་སུ་ཁོར་མོ་ཡུག་ཏུ་འཁོར་གྱིན་ཡོད། དཔེར་ན། ཉིན་རེར་སེམས་ལ་ཤར་བའི་རྣམ་རྟོག་མང་པོ་དང་། ངག་ནས་བཤད་པའི་སྐད་ཆ། དེ་བཞིན་ལག་གིས་བྱས་པའི་བྱ་གཞག་ཆེ་ཕྲ་ཆུང་གསུམ་ལ་ཞིབ་དཔྱད་བྱས་ཏེ། སྔོན་དགེ་བའི་བཤེས་གཉེན་རྣམས་ཀྱི་མཛད་པ་བཞིན་ཕྱོགས་སྡོམ་བྱས་ནས། དགེ་སྡིག་གཉིས་རྡེའུ་དཀར་ནག་གི་གྲངས་ཀྱིས་བརྩིས་ན་ཆགས་སྡང་རྨོངས་གསུམ་གྱིས་ཀུན་ནས་བསླངས་པའི་ནག་པོ་ཤ་སྟག་ལས་དཀར་ནག་འདྲེས་མའི་ཁྲ་བོ་ཙམ་ཡང་མ་ཡིན་པའི་ཚད་དུ་སླེབས་ཡོད་པ་དེའི་ཕྱིར་རང་གཞན་སོ་སོའི་སྐྱེ་བོ་རང་རྒྱུས་རང་ལ་ཆེའོ། །དེ་ལྟ་ན་ད་རེས་དམ་པའི་ལྷ་ཆོས་དང་འཕྲད། རང་རང་གང་ལ་གང་འདོད་ཀྱི་ཆོས། སྐྱེས་བུ་ཆེ་འབྲིང་ཆུང་གསུམ་གྱི་ལམ་རིམ་པ་ལྟར་ཡོད་པས་གང་ལ་ཞུགས་ཀྱང་ཆོག དེ་ལས་ཐེག་པ་ཆེན་པོའི་རིགས་ཅན་ཡིན་པའི་དབང་དུ་བྱས་ན། སྔགས་ཀྱི་མྱུར་ལམ་ནི་ཐབས་མང་བ་དང་དཀའ་བ་མེད་ཅིང་བདེ་ཞིང་མྱུར་བ་ཡིན་པ་ཤེས་བཞིན་དུ་དེ་ལ་མི་འཇུག་པར་ཁ་ཧང་ནས་གང་ལ་བལྟས་འདུག ཕྱིས་སུ་ཡང་དང་ཡང་དུ་མི་ལུས་ཐོབ་མིན་སུ་ཡིས་ཤེས། གལ་ཏེ་ཐོབ་ཀྱང་ཆོས་དང་འཕྲད་མིན་ཅི་ཤེས། འཕྲད་ཀྱང་ད་ལྟའི་འདི་འདྲ་བ་ཡིན་ན་སྟོང་ལོག་ཏུ་འགྱུར་ཉེན་ཡང་ཆེའོ། །ད་ལྟ་ནི་མཐོ་རིས་རྣམ་གསུམ་ལས་མིའི་ལུས་རྟེན་ཡིན་ཡང་རྒ་བ་ན་བ་འཆི་བ་ལ་སོགས་པའི་སྡུག་བསྔལ་ལས་མ་འདས་ཤིང་། སྡུག་བསྔལ་གསུམ་གྱི་ཕུགས་དེད་ན་དོན་དུ་སྐྱེ་བ་ལས་བྱུང་ཞིང་། དེའང་སྲིད་རྩ་མ་རིག་པ་འགོག་མ་ནུས་པར་སྲེད་ལེན་གཉིས་མེད་པར་མ་གྱུར་ན། ཤི་བའི་རྗེས་སུ་ཡང་སྐྱེ་བ་མི་ལེན་པར་ཐབས་མེད་དོ། །དེ་ལ་ཚེ་འདིའི་སྟེང་སངས་རྒྱས་ཀྱི་གོ་འཕང་ཐོབ་ནས་ཕྱིན་ཆད་འཁོར་བའི་གནས་སུ་སྐྱེ་བ་ལེན་མི་དགོས་པ་ཞིག་མ་འགྲུབ་ཀྱང་། ད་ལྟ་སྡོད་སའི་འཁོར་བའི་གནས་འདི་མ་ཡིན་པའི་ཞིང་ཁམས་དག་པ་ཞིག་ལ་འདུན་པ་གཏད་ས་ཡོད་ན་དེར་གཏད་དགོས་སྙམ་པ་བྱུང་ན། འདེམས་ཀ་ཐམས་ཅད་ལས་མཆོག་ཏུ་གྱུར་པ་ནི་དེ་ཉིད་ཡིན། འུ་བུ་ཅག་གིས་དེའི་ཆ་ནས་བཤད་ན། དག་པའི་ཞིང་ཁམས་རྣམས་ལས་བདེ་བ་ཅན་མ་ཡིན་པ་ཞིག་ལ་འདུན་པ་གཏད་ཚེ། ཞིང་ཁྱད་པར་ཅན་ཞིག་ཏུ་སྐྱེ་བ་ལ་སྒྲིབ་གཉིས་ཀྱི་དྲི་མ་ཅི་རིགས་དག་ནས་ས་བརྒྱད་པ་ཐོབ་པ་མན་ཆད་ཞིག་དགོས། ཞིང་ཁམས་འབྲིང་ཞིག་ཏུ་སྐྱེ་བ་ལ་བསྒོམ་ལམ་ས་གཉིས་པ་མན་ཆད་ཅིག་དགོས། ཞིང་ཁམས་ཆུང་ངུ་ཞིག་ཏུ་སྐྱེ་བར་ཡང་ས་དང་པོ་མཐོང་ལམ་ངེས་པར་ཐོབ་དགོས་སོ། །དེའི་ཕྱིར་རང་རེ་ལྟ་བུའི་སོ་སོའི་སྐྱེ་བོ་ལ་མཚོན་ན་ཐར་ལམ་གང་ཡིན་ངོས་མ་ཟིན་ཞིང་ཚོགས་སྦྱོར་གྱི་ལམ་ཙམ་ཡང་མ་ཐོབ་པ་ཞིག་ཞིང་ཁམས་དེ་དག་ཏུ་སྐྱེ་བར་མི་ནུས་པ་སྨྲོས་ཅི་དགོས། དེས་ན་སོ་སྐྱེས་ཡིན་ཡང་དེར་སྐྱེ་ནུས་པ་དང་ཞིང་ཁམས་དག་པའང་ཡིན་པ། ཞིང་དེར་སྐྱེས་པ་སྐྱེ་བ་གཅིག་གིས་ཐོགས་པའི་རྫོགས་པའི་སངས་རྒྱས་ཀྱི་གོ་འཕང་ཐོབ་པ་ལས་སྐྱེ་བ་གཞན་ལེན་མི་དགོས་པ། དེའི་ཚེ་ནའང་བདེ་སྐྱིད་ལོངས་སྤྱོད་ཕུན་སུམ་ཚོགས་པས་དུས་འདའ་ཞིང་། གྲོགས་འཕགས་པ་ས་ཐོབ་ཀྱི་སེམས་དཔའ་རྣམས་དང་ལྷན་དུ་སྐལ་བ་འདྲ་མཉམ་གྱིས་རྫོགས་པའི་སངས་རྒྱས་ཀྱི་དྲུང་ནས་ཆོས་ཉན་པ། ཚོགས་གཉིས་རྒྱ་ཆེན་པོ་དུས་ཡུན་ཐུང་ངུ་ཙམ་ལ་འདུམ་པར་བྱེད་པའི་ཞིང་ཁམས་གཅིག་པུ་ནི་གང་ཞེ་ན་བདེ་བ་ཅན་ཡིན་ནོ། །དེ་ལྟ་བུའི་ཞིང་ཁམས་ཞིག་མིག་གི་ཐད་ན་ཡོད་པ་དང་། དེར་ཐོན་པའི་འབྱོར་རྟེན་ལག་ཏུ་ཐོན་བཞིན་དེ་མི་སྒྲུབ་པ་ནི་སྨྱོན་པ་མིན་ན་གླེན་པ་ཡིན། དེར་མི་འཇུག་པ་ནི་མི་མ་ཡིན་པས་དུད་འགྲོ་དང་ཁྱད་པར་ཅི་ཞིག་མཆིས། སྤྱིར་མིའི་འགྲོ་བ་དང་ཁྱད་པར་དུ་དུས་ངན་སྙིགས་མའི་མི་རྣམས་ལ་བདེ་བ་ཅན་གྱི་ཡོན་ཏན་ཅི་འདྲ་ཞིག་བརྗོད་ཀྱང་དང་བའི་བློ་འདི་སྐྱེས་བྱུང་སྙམ་པ་ཞིག་དང་། ངན་སོང་དམྱལ་བའི་སྡུག་བསྔལ་གང་བརྗོད་ཀྱང་ལུས་ཀྱི་བ་སྤུ་ཙམ་འགུལ་བྱུང་སྙམ་པ་མེད་པ་ནི། རང་གིས་རང་ལ་མི་གཅེས་པ་དང་མི་སེམས་པ་མིན་ཡང་། རྨོངས་པའི་སེམས་ཅན་ཞེས་པ་ཧ་ཅང་བླུན་ཆེ་བས་མ་རྟོགས་ལོག་རྟོགས་ཐེ་ཚོམ་གསུམ་གང་རུང་གི་གཞན་དབང་དུ་གྱུར་པ་ཡིན། བདེ་བ་ཅན་གྱི་ཞིང་དང་སྟོན་པའི་ཡོན་ཏན་ཁྱད་པར་ཅན་མ་ཤེས་པར་དེར་སྐྱེ་བར་མི་སྨོན་པ་ནི། དཔེར་ན། གང་ཟག་བླུན་པོ་ཤིན་ཏུ་ཐ་ཆད་པའི་རིགས་ཅན་ཞིག་གིས་ནོར་བུ་རིན་པོ་ཆེ་བསམ་འཕེལ་དབང་གི་རྒྱལ་བོ་གསོལ་བ་ཅི་བཏབ་ལྟར་དགོས་འདོད་འབྱུང་བ་ཞིག་ལག་ཏུ་སོན་པ་ན། དེའི་ཡོན་ཏན་དང་རིན་ཐང་མ་ཤེས་པར་ས་རྡོ་ལོག་ལོག་ཅིག་ཡིན་པར་བསམ་ནས་དོར་བར་བྱས་པའམ། ཡང་ན་དེ་ཉིད་ལས་ཆང་ཁམ་གང་དང་དུ་བ་རྐང་ཐུར་གཅིག་བཟང་སྙམ་ནས་བརྗེ་བ་ལྟར་དུ། དོན་ཆེན་རང་གཞན་གཉིས་ཕན་གྱི་བྱ་བ་དེ་སྒྲུབ་རྒྱུ་བསྐྱུར་ནས་དོན་ཆུང་བཤད་རིན་མེད་པ་ཞིག་ལ་འབད་པ་ནི་དཔེ་དེ་དང་འདྲའོ།།
བདེ་བ་ཅན་གྱི་ཞིང་ལ་དད་པའི་ཕན་ཡོན་བསྟན་པ།
ཇི་སྐད་བདེ་བ་ཅན་གྱི་ཞིང་མདོ་རུ། སངས་རྒྱས་བཅོམ་ལྡན་འདས་ཀྱིས་ཆོས་བསྟན་ཚེ། འཁོར་གྱི་གཙོ་བོ་མི་ཕམ་པའི་མཚན་ནས་བོས་ཏེ། མི་ཕམ་པ་གང་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་སངས་རྒྱས་མགོན་པོ་འོད་དཔག་མེད་ཀྱི་མཚན་ཐོས་པ་དེས་ནི་རྙེད་པ་ཇི་སྙེད་ཅིག་ལེགས་པར་རྙེད་པ་ལ་ལྟོས། ཞེས་དང་། སེམས་ཅན་གང་ཞིག་གིས་སངས་རྒྱས་འོད་དཔག་ཏུ་མེད་པ་ལ་སེམས་ཀྱིས་དད་པ་ལན་གཅིག་བྱས་པ་དང་། བདེ་བ་ཅན་གྱི་ཞིང་གི་ཡོན་ཏན་བསྟན་པའི་ཆོས་ཀྱི་རྣམ་གྲངས་འདི་ལ་དད་པ་མི་ཕྱེད་པ་ལྡན་པ་དེ་དག་ནི་དམན་པའི་ལམ་ལས་ལྡོག་པར་འགྱུར་བ་ཡིན་གསུངས། ཡང་མི་ཕམ་པ་ཞེས་མཚན་ནས་བོས་ཏེ། ཆོས་འདི་ལ་མོས་པར་གྱིས། ཁོང་དུ་ཆུད་པར་གྱིས། གཞན་ལ་དེ་བཞིན་རྒྱ་ཆེར་ཤོད། གླེགས་བམ་ལ་སྟོན་པའི་འདུ་ཤེས་བཞག་སྟེ་མཆོད་པ་གྱིས། གལ་ཏེ་སྟོང་གསུམ་འཇིག་རྟེན་གྱི་ཁམས་མེ་ཡི་འོབས་ཆེན་པོ་བརྒལ་དཀའ་བར་གྱུར་ཀྱང་འདིའི་དོན་དུ་དེ་ཉིད་བརྒལ་ནས་འགྲོ་བར་འོས་ཏེ། ཅིའི་ཕྱིར་ན་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་མང་པོས་ཆོས་ཀྱི་རྣམ་གྲངས་འདི་ལ་ཉན་ནས་འཁོར་བའི་རྒྱ་མཚོ་ཆེན་པོ་བརྒལ་ཞིང་སྲིད་པའི་མྱ་ངན་ཐམས་ཅད་དང་བྲལ་ཏེ། རང་གཞན་གཉིས་དོན་གྲུབ་པ་བླ་མེད་རྫོགས་པའི་བྱང་ཆུབ་བརྙེས་ཏེ་ཕྱིར་མི་ལྡོག་པར་གྱུར་ཏོ། །ཞེས་གསུངས་པ་བཞིན་དུ་མཁས་གྲུབ་ཀརྨ་ཆགས་མེད་ཀྱི་བདེ་སྨོན་ཡིག་ཆུང་དུ། འདི་ཉིད་ཆགས་མེད་ཐུགས་དམ་མཛོད། །ལག་པ་ན་ཡང་འབད་ནས་བྲིས། །ཞེས་གསུངས་དོན་ཡང་དེས་རེད། སྔར་ནས་ཆོས་ལ་གོམས་པ་མེད་ཅིང་ཆོས་ཐོས་པའི་རྒྱུ་བསོད་ནམས་མ་བསགས། དེ་ལྟར་རྒྱུ་སྔོན་སོང་གོམས་པ་སྟོབས་སུ་མ་གྱུར་བས་སྡིག་པའི་ཕྱོགས་མ་བསླབས་ཀྱང་ཤེས་ལ་དེར་ལྷག་པར་རྣམ་རིག་བཀྲ་བ་ནི་སྔར་གྱི་རྒྱུ་མཐུན་ལས་བྱུང་། དེ་དག་ཐམས་ཅད་མ་རྟོགས་པའི་དབང་གིས་བྱུང་བ་ཡིན། ལོག་རྟོག་ཅན་ནི་ཕྱི་རོལ་མུ་སྟེགས་པ་དང་དེའི་ཕྱོགས་གཏོགས་མིན་ཡང་། ཁ་ནས་ཚེ་ཕྱི་མ་དང་ལས་རྒྱུ་འབྲས་མེད་པར་མི་སྨྲ་མོད་དོན་ལ་ལྟ་བ་ལོག་པའི་ཕྱོགས་སུ་དུང་ཞེན་དང་མོས་པ་ཆེ་བའི་གང་ཟག་དང་། དེའི་ཤུགས་རྐྱེན་ངན་པ་ཐེབས་པའི་དབང་གིས་གཞལ་བྱ་ཤིན་ཏུ་ལྐོག་གྱུར་འཇལ་བྱེད་ཀྱི་རྒྱལ་བའི་བཀའ་ལུང་བདེན་པའི་ཚིག་ལའང་ཡིད་མི་ཆེས་པའི་ལོག་རྟོག་ཅན་ནོ། །ཐེ་ཚོམ་ཅན་ནི་སྤྱིར་ནང་བ་སངས་རྒྱས་པའི་ཆོས་སྒོར་ཞུགས་ཤིང་མཆོག་གསུམ་སྐྱབས་སུ་འཛིན་པར་དམ་བཅའ་ཙམ་བྱས་མོད། དམན་པའི་རིགས་ཅན་དུ་གྱུར་བས་དག་པའི་ཞིང་གི་ཡོན་ཏན་འདི་འདྲ་ཐོས་པ་ན། དེ་ནི་འཕགས་པའི་སྐྱེ་བོ་རྣམས་ལས་སོ་སྐྱེ་འཆིང་བ་ཀུན་ལྡན་ལས་ཉོན་གཉིས་ཀྱི་གཞན་དབང་དུ་གྱུར་པ་དག་གིས་སངས་རྒྱས་ཀྱི་མཚན་བཟུང་བ་ཙམ་གྱིས་དག་པའི་ཞིང་དེར་སྐྱེ་ཞིང་། སྐྱེ་བ་གཅིག་གིས་ཕྱིར་མི་ལྡོག་པར་སངས་རྒྱས་ཐོབ་ནུས་སམ་མི་ནུས་བསམ་ཞིང་། གཞན་ལའང་བསྒྲགས་ནས་རང་གཞན་སེམས་ཅན་མང་པོ་ཞིག་དོན་ཆེན་པོ་ལས་ཉམས་པར་བྱེད་པ་དེ་ནི་ཐེ་ཚོམ་ཡིན། དེ་ལྟའི་མ་རྟོགས་ལོག་རྟོག་ཐེ་ཚོམ་ཅན་གྱི་རིགས་རང་ངོས་ནས་ཡིན་ན། རང་གི་ལམ་སྣ་འགགས་པ་དེ་རང་ཉིད་ཀྱིས་སེལ་ཐབས་བྱ་ཞིང་། གཞན་དེ་དང་དེ་འདྲའི་རིགས་ཅན་སྙིང་རྗེ་བརྩེ་བ་ཆེན་པོས་བཟུང་ནས། སྟོན་པ་ཚད་མའི་སྐྱེས་བུ་དང་བསྟན་པ་རྣམ་གྲོལ་གྱི་འཇུག་ངོགས་ཡིན་པ། སངས་རྒྱས་ཀྱི་སྨོན་ལམ་དག་པའི་མཐུ་བསམ་གྱིས་མི་ཁྱབ་པ་དང་། དེ་ཡང་གཙོ་བོ་རང་ཉིད་ཀྱི་དད་པ་དང་འདུན་པ་ལ་རགས་ལས་ཚུལ་བཅས་དཔྱད་གསུམ་དག་པའི་སྒྲུབ་བྱེད་དང་བཅས་ཏེ་རང་གིས་ངེས་པར་མ་ཟད་གཞན་ལའང་གོ་བར་བྱེད་དགོས། སྔར་ཡང་བཤད་མྱོང་། ཞིང་ཁམས་འདིར་སངས་རྒྱས་འོད་དཔག་མེད་ཀྱི་མཚན་ཙམ་ཐོས་པས་སྐྱེ་བར་འགྱུར་དོན་ནི། བཅོམ་ལྡན་འདས་མགོན་པོ་འོད་དཔག་མེད་མངོན་པར་སངས་མ་རྒྱས་པའི་སྔ་རོལ་ཏུ་ཞིང་ཁམས་གཟུང་བར་སྨོན་པའི་དམ་བཅའ་བྱེད་པའི་ཚེ། སངས་རྒྱས་ཀྱི་ཞིང་གྲངས་མ་མཆིས་པ་དཔག་ཏུ་མེད་པ་དག་ནས་སེམས་ཅན་གང་དག་གིས་བདག་གི་མིང་ཐོས་ནས་དད་ཅིང་ཞིང་ཁམས་འདིར་སྐྱེ་བར་མོས་ཤིང་དགེ་རྩ་དེར་བསྔོས་ཚད། མཚམས་མེད་ཀྱིས་ལས་བྱས་པ་དང་དམ་པའི་ཆོས་སྤངས་བ་མ་གཏོགས་པ་ཐམས་ཅད་ཇི་སྲིད་ཞིང་ཁམས་དེར་སྐྱེ་བར་མི་འགྱུར་བ་དེ་སྲིད་དུ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་མི་བགྱིའོ། །ཞེས་གསུངས་ནས་དམ་བཅའ་མཛད་པ་ནི་མདོ་ལུང་དུ་གསལ་བར་བསྟན་ཡོད། དེ་བཞིན་དུ་ཞིང་དག་པ་བདེ་བ་ཅན་དུ་སྐྱེས་ཚད་ནི་གཟུངས་དང་ཏིང་ངེ་འཛིན་དང་མངོན་ཤེས་ལ་སོགས་པའི་ཡོན་ཏན་དང་ལྡན་པ་འབའ་ཞིག་ཡིན་པར་ཡང་མདོ་ལས་གསུངས། ཞིང་ཁམས་གཞན་ལས་ཁྱད་དུ་འཕགས་པ་དེར་སྐྱེ་བ་ནི་རང་སྟོབས་ཁོ་ནས་མ་ཡིན་ཏེ། ཚེགས་ཆུང་ངུས་དོན་ཆེན་པོ་འགྲུབ་པ་ནི་སངས་རྒྱས་འོད་དཔག་མེད་ཀྱི་སྨོན་ལམ་དང་ཡེ་ཤེས་ཀྱི་སྟོབས་ཁྱད་པར་ཅན་གྱི་མཐུ་ལས་འབྱུང་བར་གྲུབ། བསྐལ་བ་གྲངས་མེད་བྱེ་བ་གཅིག་གི་ཡར་སྔོན་དུ། སངས་རྒྱས་རིན་ཆེན་སྙིང་པོའི་མདུན་ནས་རྒྱལ་བོ་རྩིབས་ཀྱི་མུ་ཁྱུད་ཀྱིས་ཞིང་ཁམས་གཟུང་བར་སྨོན་ལམ་བཏབ་པ་ན་སངས་རྒྱས་ཀྱིས་དབུགས་དབྱུང་ལུང་བསྟན་གཟེངས་བསྟོད་བཅས་གནང་བ་ནི་འདི་ལྟར། བྱང་ཆུབ་སེམས་དཔའ་ལྟོས་དང་ནུབ་ཕྱོགས་སངས་རྒྱས་ཀྱི་ཞིང་བྱེ་བ་འབུམ་ཕྲག་འདས་པའི་ཕ་རོལ་ན། འཇིག་རྟེན་གྱི་ཁམས་དབང་པོ་རྡུལ་ཤིན་ཏུ་མཛེས་པ་ཞེས་བྱ་བ་རུ་མ་འོངས་པའི་བསྐལ་བ་གང་གཱའི་ཀླུང་གི་བྱེ་མ་སྙེད་འདས་པ་ན། རྫོགས་སྨིན་སྦྱང་གསུམ་མཐར་ཕྱིན་ནས་ཁྱོད་སངས་རྒྱས་ཚེ་དཔག་མེད་དུ་འགྱུར། དེ་ཚེ་སྔོན་སྨོན་ལམ་བཏབ་པ་ཇི་བཞིན་བདེ་བ་ཅན་གྱི་ཞིང་ཁམས་བདེ་སྐྱིད་ལོངས་སྤྱོད་ཕུན་སུམ་ཚོགས་པ་དང་ལྡན་པར་འགྱུར་རོ། །ཞེས་གསུངས། དེ་འདྲའི་དུས་ཡུན་རིང་པོ་ཞིག་ལ་བྱང་ཆུབ་སེམས་དཔའ་ས་བརྒྱད་པར་གནས་པ་དེས་སྐྱོ་སེམས་སྐད་ཅིག་ཀྱང་མ་སྐྱེས་པར་ཟག་མེད་འདུས་མ་བྱས་པའི་དགེ་རྩ་རྒྱ་ཆེར་བསགས་པ་མཐར་ཕྱིན་ཅིང་། སྨོན་ལམ་ཐམས་ཅད་མངོན་དུ་གྱུར་ནས་རང་རེའི་འཇིག་རྟེན་འདིའི་བསྐལ་བ་ཆེན་པོ་བཅུའི་སྔ་རོལ་ཏུ་མགོན་པོ་འོད་དཔག་མེད་མངོན་པར་རྫོགས་པར་སངས་རྒྱས་ནས་ཞིང་ཁམས་བཟུང་། དེའང་བདེ་བ་ཅན་གྱི་ཞག་བཅུ་ཡིན། བདེ་བར་གཤེགས་པའི་མདོ་དང་རྒྱུད་སྡེ་མང་པོ་རུ། ཕྱོགས་བཅུའི་རྒྱལ་བ་སྲས་དང་བཅས་པས་མགོན་པོ་འོད་དཔག་མེད་དང་བདེ་བ་ཅན་གྱི་ཞིང་ལ་བསྔགས་བརྗོད་ཀྱི་རོལ་མོ་ཅི་ལྟར་འཁྲོལ་བའི་ཚུལ་ནི་དེ་དག་ལས་རྟོགས་པར་ནུས་སོ། །ཇི་སྐད་དུ། གང་ན་འཚོ་ཞིང་གཞེས་པའི་རྒྱལ་བ་དེའི། །བསྔགས་པ་བརྗོད་ལ་གང་གཱའི་རྡུལ་སྙེད་ཀྱི། །སངས་རྒྱས་རྣམས་ཀྱང་བརྩོན་པ་མི་འདོར་རོ། །ཞེས་གསུངས་པ་ལྟར་ཡིན། བདེ་བ་ཅན་གྱི་ཞིང་ཁམས་བདེ་སྐྱིད་ལོངས་སྤྱོད་ཁྱད་འཕགས་ཅན་དེའི་ཡོན་ཏན་བརྗོད་དགོས་ན། དོན་ལ་ཡེ་ཤེས་རང་སྣང་གི་དཀྱིལ་འཁོར་སྤྲུལ་བའི་གཟུགས་བརྙན་དུ་བཀོད་པ་ནི་སོ་སོའི་སྐྱེ་བོའི་བློས་གཞལ་བར་མི་ནུས་ཤིང་སྒྲ་ཚིག་གིས་དེ་བས་ཀྱང་མཚོན་པར་བྱར་མེད་མོད། རྟེན་ཞིང་ཁམས་ཡིད་ལ་བྱེད་པ་ནི་བདེ་བ་ཅན་གྱི་རྒྱུ་བཞིའི་དང་པོ་ཡིན་ཞིང་། ཡིད་ལ་བྱེད་མཁན་ནི་སོ་སྐྱེའི་གང་ཟག་ཡིན་པས་དད་མོས་དང་འདུན་པའི་རྟེན་ཙམ་དུ་སོ་སྐྱེ་རང་ཉིད་ཀྱི་དབང་ཡུལ་དང་སྒོ་བསྟུན་ནས་འཆད་ཉན་དང་སྒོམ་སྒྲུབ་མི་བྱེད་ཐབས་མེད་དོ། །དེས་ན་མདོ་རྒྱུད་ཐམས་ཅད་དུ་ཞིང་བཀོད་གསུངས་པ་ནི་མིའི་འཇིག་རྟེན་དུ་མིའི་རྟེན་ལ་བྱོན་པའི་སངས་རྒྱས་ཀྱིས་མིའི་གདུལ་བྱ་ལ་ཆོས་སྟོན་དུས། མི་རྣམས་ཀྱིས་གོ་ནུས་པ་ཁོ་རང་ཚོའི་ཁོར་ཡུག་ཏུ་ཡོད་པའི་དཔེ་བཀོད་ནས་མ་བསྟན་ན་ཤེས་ཐབས་མེད་པས་གོ་སླ་བའི་ཕྱིར་མི་ཡུལ་གྱི་སྣོད་བཅུད་དང་ཕྱོགས་འདྲ་བ་ཞིག་གདུལ་བྱའི་དགོས་དབང་དང་བསྟུན་ནས་གསུངས་པའོ། །ངས་ཟེར་མྱོང་། དུད་འགྲོ་རྟ་ཟོག་གི་རྣ་བར་བདེ་བ་ཅན་གྱི་ཡོན་ཏན་རིན་པོ་ཆེའི་རི་བོ་དང་རིན་པོ་ཆེའི་ལྗོན་ཤིང་སོགས་བརྗོད་ན་གོ་བར་མི་ནུས་ལ། གལ་ཏེ་དུད་འགྲོ་དེས་མི་སྐད་གོ་ན་དེར་རྩྭ་ཁ་བཟང་ཚུལ་དང་རྩྭ་ཆུ་འཛོམ་ཚུལ་བཤད་ན་དགའ་བར་ངེས་སོ། །དཔེ་དེ་བཞིན་གདུལ་བྱའི་དགོས་དབང་དང་བསྟུན་ནས་གོ་སླ་བའི་ཆེད་དུ་གསུངས་པའོ།།
བདེ་བ་ཅན་གྱི་སྣོད་བཅུད་དག་པ་བསྟན་པ།
དེའང་རྟེན་དང་བརྟེན་པའི་རྣམ་གཞག་ལས་དང་པོ་རྟེན་ཞིང་ཁམས་དང་དེ་ནས་བརྟེན་པ་སངས་རྒྱས་གཙོ་འཁོར་བཅས་འཆད་མོད། དོན་ལ་རྟེན་ཞིང་ཁམས་ཀྱང་རྒྱལ་བ་གཅིག་གི་ཡེ་ཤེས་ཀྱི་རྣམ་པར་འཕྲུལ་བ་ཡིན་པས་ན། ཐོག་མར་བདེ་བར་གཤེགས་པ་སངས་རྒྱས་ཚུལ་ནས་བརྩམས་ཏེ་ཞིང་གི་བཀོད་པ་འཆད་དགོས་ཏེ། འོད་མདོ་ལས། སངས་རྒྱས་བཅོམ་ལྡན་འདས་ཀྱི་ཞལ་ནས། ཀུན་དགའ་བོ། དེ་ལྟར་དགེ་སློང་ཆོས་ཀྱི་འབྱུང་གནས་དེས་སྔོན་བྱང་ཆུབ་སེམས་དཔའི་སྤྱོད་པ་སྤྱད་པ་ན་ཡོ་བྱད་ཐམས་ཅད་ལ་དབང་བའི་ཕ་རོལ་ཏུ་ཕྱིན་པར་གྱུར་ཏོ། །ཞེས་གསུངས་པ་ལྟར་སྔོན་ལམ་ལ་སློབ་དུས་སུ་དགེ་ཚོགས་རྒྱ་ཆེ་ཞིང་ཉེས་སྤྱོད་དང་མ་འདྲེས་པར་སྤུས་དག་པས་སངས་རྒྱས་པའི་དུས་སུའང་ཞིང་གི་ཡོན་ཏན་བཟང་བ་དང་མང་ཞིང་ཕོན་ཆེ་བ་ཡིན། དེ་བཞིན་དུ་སངས་རྒྱས་ཀྱི་སྐུའི་མཚན་དཔེ་དང་འོད་དང་གཟི་བྱིན་དང་མཛད་པ་ཕྲིན་ལས་དང་། ཐ་ན་མཚན་སྔགས་ཀྱི་ཡི་གེ་ཙམ་ཡང་གདུལ་བྱའི་རེ་འདོད་སྐོང་བར་ཡིད་བཞིན་གྱི་ནོར་བུ་ལྟ་བུའོ། །དེའི་ཕྱིར་ན་དུས་གང་གི་ཚེ་གང་ཟག་གང་ཞིག་གིས་རྡུལ་ཕྲ་རབ་ཀྱི་གྲངས་དང་མཉམ་པའི་འཇིག་རྟེན་གྱི་ཁམས་བཤིག་ནས་རྡུལ་ཕྲ་རབ་ཏུ་བྱས་པའི་གྲངས་ཇི་སྙེད་དང་མཉམ་པ་དེ་སྙེད་ཀྱི་འཇིག་རྟེན་ཁམས་ཐམས་ཅད་ལྷ་དང་མི་ཡི་རིན་པོ་ཆེ་སྣ་ཚོགས་ཀྱིས་བཀང་སྟེ་སྦྱིན་པ་བཏང་བ་ལས། གང་སུ་ཞིག་གིས་སངས་རྒྱས་འོད་དཔག་མེད་ཀྱི་མཚན་དང་བདེ་བ་ཅན་གྱི་ཞིང་གི་ཡོན་ཏན་ཁྱད་དུ་འཕགས་པ་རྣམས་ཐོས་ནས་དེ་ལ་དད་ཅིང་དགའ་བའི་ཐལ་མོ་ལན་གཅིག་དེའི་ཕྱོགས་སུ་སྦྱོར་ན་བསོད་ནམས་ཆེའོ། །འདིར་བདེ་བ་ཅན་གྱི་ཞིང་ལ་དགའ་ཞིང་མོས་པ་སྐྱེ་བའི་ཕྱིར་དུ་ཕྱོགས་ཙམ་སྨྲོས་ན། སྤྱིར་བདེ་བ་ཅན་གྱི་ཡོན་ཏན་ནི་ས་བཅད་མི་འདྲ་བ་དུ་མས་བརྗོད་ཀྱང་གཙོ་བོ་སྣོད་དག་པ་ས་གཞི་དང་ལྗོན་ཤིང་དང་པདྨོ་སོགས་ཀྱིས་བསྟན་ཏེ། དང་པོ་ས་གཞི་ནི་ཀུན་མཁྱེན་འཇིགས་གླིང་གིས། གཞོན་ཤ་ཤིན་ཏུ་ཆགས་པའི་ལག་མཐིལ་དང་། །མཉམ་པའི་དཔེ་བྱར་འོས་པའི་འགལ་ཟླ་ནི། །ཆུ་ཞེང་སྲིད་དུ་མི་མངོན་ཐ་གྲུའི་ཁྱོན། །རིན་ཆེན་སྣ་ཚོགས་གཅལ་དུ་བཀྲམ་པ་ལྟར། །ཞེས་གསུངས་པ་དང་། མཁས་གྲུབ་ཀརྨ་ཆགས་མེད་ཚང་གིས། རིན་ཆེན་ས་གཞི་ཁོད་སྙོམས་ལག་མཐིལ་ལྟར། །ཡངས་ཤིང་རྒྱ་ཆེ་གསལ་ཞིང་འོད་ཟེར་འབར། །མནན་ན་ནེམ་ཞིང་བཏེགས་ན་སྤར་བྱེད་པ། །བདེ་འཇམ་ཡངས་པའི་ཞིང་དེར་སྐྱེ་བར་ཤོག །ཅེས་གསུངས་པ་ལྟར་དུ་ས་གཞི་ནི་ཐང་གཤོང་དང་འབའ་འབུར་མེད་ཅིང་ངོས་མཉམ་པའམ་ཁོད་སྙོམས་པའི་ཆ་ནས་གཞོན་ནུའི་ལག་མཐིལ་ལྟ་བུ། རྒྱ་ཆེ་ཞིང་ཡངས་བའི་ཆ་ནས་ཆུ་ཞེང་སྲིད་དུ་མི་མངོན་པ་སྟེ་ས་གཞིའི་ཁ་རྒྱ་ཆེ་ཆུང་མཐའ་མི་མངོན་ཞིང་ཚད་གཟུང་དུ་མེད་ལ་བསམ་ཡུལ་ལས་འདས་པ། ཁོར་ཡུག་གི་ཕྱོགས་མཐའ་ཐམས་ཅད་ཁྱོན་ཡངས་ཤིང་རྒྱ་ཆེ་ལ། དག་ཅིང་དྲི་མ་མེད་པས་གསལ་བ། ས་གཞི་ཐམས་ཅད་ལ་རྡོ་དང་གསེག་མ། ས་ནག་དང་གད་པ་ལ་སོགས་མེད་པར་རིན་པོ་ཆེའི་རྒྱན་ཆས་སྣ་ཚོགས་ཀྱིས་སྤྲས་པ། རིན་པོ་ཆེའི་རང་འོད་དང་སངས་རྒྱས་ཀྱི་སྐུའི་འོད་ཟེར་ཕོག་པས་ས་གཞི་ཐམས་ཅད་གསལ་བར་བྱས་པ། ཕྱོགས་གང་ལ་བལྟས་ཀྱང་ཉམས་དགའ་ཞིང་ཡིད་དུ་འོང་བ། རང་རེའི་ཡུལ་ལྟར་སྲ་མཁྲེགས་རྩུབ་རེག་གི་རྣམ་པ་ཅན་མ་ཡིན་པར་དར་གྱི་འབོལ་སྟན་བཞིན་མནན་ན་ནེམ་པའི་རེག་བྱ་འཇམ་པ། མཚམས་མཚམས་སུ་རིན་པོ་ཆེ་སྣ་ཚོགས་ལས་གྲུབ་པའི་རི་བོ་མཛེས་པ་མ་གཏོགས། མི་ཡུལ་བཞིན་སྡུག་བདེན་གྱིས་བསྡུས་པ་མ་ཡིན་པས་གྲོག་རོང་དང་གཡང་ས་སོགས་མེད་པ། རི་བོ་འགའ་རེ་ནི་གསེར་ལས་གྲུབ་ཅིང་གཡུ་ཡི་ལྗོན་ཚལ་དང་རིན་པོ་ཆེ་དཀར་དམར་སྣ་ཚོགས་ཀྱི་མེ་ཏོག་བཀྲ་བ། འགའ་རེ་ནི་དངུལ་ལ་སོགས་པ་བཞུས་ཁམས་ཀྱི་རིན་པོ་ཆེ་ལས་གྲུབ་པ། འགའ་རེ་ནི་རང་བྱུང་གི་རིན་པོ་ཆེ་གཟི་དང་མུ་མེན་དང་སྤུག་དང་ཕ་ལམ་སོགས་ལས་གྲུབ་པ། གཞན་ཡང་སྨན་གྱི་རིགས་དྲི་བསུང་དང་ལྡན་པ་སྐྱེས་ཤིང་། རིན་པོ་ཆེ་སྣ་ཚོགས་ལས་གྲུབ་པའི་བྲག་རི་དང་། ལྷུན་པོ་དང་། བ་གམ་ལྟར་ཆགས་པ། དཔེ་ལྷ་བཟོ་མཁས་པས་ཐང་གར་བྲིས་བས་ཀྱང་མཚོན་དུ་མེད་པ། རིན་པོ་ཆེ་རང་གྲུབ་ཀྱི་ཕུག་པ། རི་འགའ་རེར་རྩེ་མོ་སྣ་ཚོགས་པ། རི་ཐམས་ཅད་མཐོང་ཡངས་ཤིང་ངོས་འཇམ་ལ་བང་རིམ་གྱི་བཀོད་པས་མཛེས་པ། འགའ་རེ་ལྷུན་སྟུག་ཅིང་རིན་པོ་ཆེ་ཚོམ་བུར་སྤུངས་པ། རི་འགའ་རེའི་རྩེ་མོ་ཆུ་ཤེལ་དཀར་པོ་ལས་གྲུབ་པ། འགའ་རེ་ཆུ་ཤེལ་དང་རི་སྐེད་ཡན་ཆད་མཆོང་དང་མུ་མེན་སོགས་ལས་གྲུབ་པ། འགའ་རེ་རིན་པོ་ཆེ་སྣ་ཚོགས་འདྲེས་པ་ཁྲ་མེན་གྱིས་གྲུབ་པ། གཞན་ཡང་རིན་པོ་ཆེའི་གཏེར་ཁ་སྣ་ཚོགས་པ་རང་རྡོལ་དུ་བྱུང་བ། རི་དང་ཐང་གི་ཐ་གྲུའི་ཁྱོན་ཐམས་ཅད་ལ་རིན་པོ་ཆེ་སྣ་ཚོགས་གཅལ་དུ་བཀྲམ་པ། དེ་བཞིན་ལྗོན་ཤིང་ཡང་རིན་པོ་ཆེ་སྣ་རེ་རེ་ལས་གྲུབ་པ་དང་། དཔག་བསམ་གྱི་ལྗོན་ཤིང་རིན་པོ་ཆེ་སྣ་མི་འདྲ་བ་དྲུག་བདུན་ལས་གྲུབ་པ་དང་བརྒྱ་སྟོང་གིས་གྲུབ་པ། དཔེར་ན་རྩ་བ་གསེར་དང་། སྡོང་པོ་དངུལ། ཡལ་ག་བཻ་ཌཱུརྱ། ལོ་མ་གཡུ། འདབ་མ་མན་ཤེལ། མེ་ཏོག་སྤུག ཟེའུ་འབྲུ་མུ་ཏིག་དཀར་དམར། འབྲས་བུ་རྡོ་རྗེ་ཕ་ལམ་ལྟ་བུ་སོགས་ལྷ་མིའི་རིན་པོ་ཆེ་དང་འགའ་རེ་མིང་གིས་བརྗོད་ཀྱང་ཕལ་བའི་མཐོང་ཐོས་སུ་མ་གྱུར་པ། འདིར་རིན་པོ་ཆེ་སྣ་བདུན་གསུངས་པ་ནི། གསེར། དངུལ། བཻ་ཌཱུརྱ། ཤེལ། སྤུག མུ་ཏིག་དམར་པོ། རྡོ་རྗེ་ཕ་ལམ་བཅས་བདུན་དུ་གསུངས། ལྗོན་ཤིང་འགའ་རེ་ཁ་དོག་སྣ་ཚོགས་པ། འགའ་རེ་ཁ་དོག་གཅིག་ཅན། རིན་པོ་ཆེ་འདྲེས་མ་དང་རེ་རེའི་ནགས་ཚལ་གྱིས་རི་ཐང་ཕྱོགས་ཀུན་མཛེས་པར་བརྒྱན་པ། ལྗོན་ཤིང་ཐམས་ཅད་ཀྱི་ཡལ་འདབ་མེ་ཏོག་དང་འབྲས་བུས་ཐུར་དུ་དུད་པ་སྟེ། ཇི་སྐད་དུ། རིན་ཆེན་སྣ་བདུན་ལས་གྲུབ་ལྗོན་པ་ནི། །དཔག་ཚད་སྟོང་དང་དྲུག་བརྒྱའི་འཕངས་སུ་བསྙེགས། །ཞེས་གསུངས་པ་ལྟར་ཡིན་ལ། དེ་བཞིན་གསེར་སོགས་རིན་པོ་ཆེའི་དྲྭ་བ་དང་དྲྭ་ཕྱེད་དྲིལ་བུ་དང་གཡེར་ཁས་བརྒྱན་པ། སྒྲ་སྙན་པ་རྒྱུན་དུ་འབྱུང་ཞིང་དྲི་ཞིམ་རྟག་ཏུ་འཐུལ་བ། ཤིང་ཐམས་ཅད་རེག་ན་འཇམ་ཞིང་བདུད་རྩིའི་རྒྱུན་འཇོ་བ། གང་འདོད་ཅི་བསམ་ལེན་ཆོག་པའི་དཔག་བསམ་གྱི་ལྗོན་པ་འབའ་ཞིག་གོ །དེ་འདྲ་བ་ཨེ་ཡིན་ནམ་སྙམ་པའི་ཐེ་ཚོམ་མི་བྱ་སྟེ། ཡེ་ཤེས་རང་སྣང་ལས་གྲུབ་པའི་བཀོད་པ་དེ་ཉིད་ནི། རང་རེས་གསེར་སོགས་ལ་རིན་པོ་ཆེར་འདུ་ཤེས་པ་ལྟར་དུ་བརྗོད་པ་ཙམ་ལས། དོན་ལ་བྱང་ཆུབ་ཤིང་གིས་རབ་ཏུ་བརྒྱན་ཞིང་རྩི་ཤིང་ནགས་ཚལ་གྱི་མིང་ཙམ་ཡང་མེད་པར་གསུངས། དེས་ཕྱིར་ཞིང་དེར་ཕལ་བའི་རྩི་ཤིང་ནགས་ཚལ་མེད་ལ་ཕལ་བའི་གསེར་དངུལ་སོགས་ཀྱང་མེད་མོད། རང་རེ་དེ་དག་ལ་རྩིས་ཆེ་བས་ན་རིན་ཐང་གཞལ་མེད་མཚོན་བྱེད་ཙམ་དུ་དེ་ལྟར་གསུངས་པའོ། །དེ་བཞིན་ལྷའི་བྱ་ཚོགས་རྣམས་ནི་སྤུ་མཛེས་ཤིང་འཇའ་ཚོན་གྱི་རི་མོ་བཀྲ་བ། མགྲིན་པའི་གླུ་དབྱངས་སྙན་མོས་ཡིད་ལ་དགའ་བ་སྐྱེད་པ། ཇི་སྐད་དུ་ཀུན་མཁྱེན་འཇིགས་གླིང་གིས། དེ་སྟེང་སྤྲུལ་བའི་བྱ་ཚོགས་སྐད་སྙན་སྒྲས། །ཟབ་དང་རྒྱ་ཆེའི་ཆོས་ཀྱི་སྒྲ་སྒྲོགས་པ། །ངོ་མཚར་ཆེན་པོའི་ཞིང་དེར་སྐྱེ་བར་ཤོག །ཅེས་གསུངས། དེ་བཞིན་ཡང་ཀུན་མཁྱེན་དོལ་བོ་པས། ལྗོན་ཤིང་དག་ལས་སྤྲུལ་བའི་བྱ་ཚོགས་ཁྱུང་དང་རྨ་བྱ་ཤང་ཤང་ངང་པ་ཀ་ལན་ཏ་ཀ་འཕུར་ཞིང་མངོན། །ཞེས་གསུངས། དེ་བཞིན་ནེ་ཙོ་རི་སྐག་ཁུ་བྱུག་སོགས་བྱ་རིགས་མང་དུ་གསུངས་ཞིང་། སྤྲུལ་བའི་བྱ་ཚོགས་ཀྱིས་སྐད་སྙན་མགྲིན་པའི་རྫ་རྔ་རྡུང་བའང་དབྱངས་སྙན་པ་ཙམ་དུ་མ་ཟད་དོན་ཟབ་མོ་ཆོས་ཀྱི་རང་སྒྲ་ཅན་ཡིན་ལ། དེ་དག་གིས་མིག་ལ་མཛེས་པ་སྟེར་བར་མ་ཟད་ཡིད་ལ་ཏིང་འཛིན་དང་དགའ་བདེའི་སིམ་པ་སྟེར་ནུས་པ། ལྷ་དང་མི་ཡི་སྐྱེད་ཚལ་ལས་འདས་པའི་བྱ་རིགས་ཀྱི་སྤུ་མདོག་མཛེས་པའི་ཆ་ནི་ལྷ་བཟོ་མཁས་པས་གང་འདོད་དུ་མཛེས་པར་བྲིས་པ་ལྟ་བུ། ཚོན་མདངས་སྣ་ཚོགས་མཛེས་ཤིང་སྒྲོ་གཤོག་རྒྱས་པ། འགའ་རེ་གཡུ་ལྟར་ལྗང་ཞིང་སྔོ་བ། འགའ་རེ་བྱུ་རུ་ལྟར་དམར་ཞིང་སྣུམ་པ། འགའ་རེ་དུང་ལྟར་དཀར་བ། འགའ་རེ་ཁ་དོག་སྣ་ཚོགས་པ་འཇའ་ཚོན་གྱི་རི་མོ་བཀྲ་བ། མགྲིན་པའི་སྒྲ་སྙན་སྒྲོག་བཞིན་དུ་ནམ་མཁའ་དང་ཤིང་རྩེའི་བར་ན་རྩེད་འཇོའི་ཟློས་གར་སྒྱུར་བ། བྱ་རིགས་དེ་དག་ཀྱང་རྣམ་པ་ལྷ་མིའི་སྐྱེད་ཚལ་དཔག་བསམ་ཤིང་གི་རྩེ་མོ་ཙན་དན་གྱི་ནགས་ཚལ་ལ་གནས་ཀྱང་། དོན་ལ་སངས་རྒྱས་འོད་དཔག་མེད་ཀྱི་སྤྲུལ་བ་འབའ་ཞིག་གོ །བདེ་བ་ཅན་གྱི་མེ་ཏོག་པདྨའི་འདབ་ལོ་གཅིག་ཁོ་ནའི་ཡོན་ཏན་ཀྱང་བདེ་བར་གཤེགས་པས་བསྐལ་བར་བརྗོད་ཀྱང་བརྗོད་མི་ནུས་གསུངས་པ་ནི། བདེ་བར་གཤེགས་པ་ལྗགས་མི་བདེ་བས་མིན་ལ་བདེ་བ་ཅན་གྱི་སྤྲུལ་བའི་བཀོད་པ་ནི་ཡེ་ཤེས་ཀྱི་རང་མདངས་ཡིན་པས་མིའི་སྐད་ཀྱིས་ཇི་བཞིན་བརྗོད་ཐབས་མེད་པའོ། །དེ་བཞིན་བྱ་རིགས་སྣ་ཚོགས་ཀྱི་སྐད་ནི་དབང་པོ་ལྔ་དང་སྟོབས་ལྔ་སོགས་བྱང་ཆུབ་ཡན་ལག་གི་ཆོས་སྒྲར་འབྱུང་བའང་དེའི་ཕྱིར་རོ། །དེ་བཞིན་ཆུ་དང་པདྨོའི་ཡོན་ཏན་ཡང་ཇི་སྐད་དུ། སྤོས་ཀྱི་ཆུ་ཀླུང་ཡན་ལག་བརྒྱད་ལྡན་མང་། །དེ་བཞིན་བདུད་རྩིའི་ཁྲུས་ཀྱི་རྫིང་བུ་ནི། །རིན་ཆེན་སྣ་བདུན་ཐེམ་སྐས་ཕ་གུས་བསྐོར། །མེ་ཏོག་པདྨ་དྲི་ཞིམ་འབྲས་བུ་ལྡན། །པདྨའི་འོད་ཟེར་དཔག་ཏུ་མེད་པ་འཕྲོ། །འོད་ཟེར་རྩེ་ལ་སྤྲུལ་བའི་སངས་རྒྱས་བརྒྱན། །ཡ་མཚན་ཆེ་པོའི་ཞིང་དེར་སྐྱེ་བར་ཤོག །ཅེས་གསུངས། ཆུ་ལ་འབབ་ཆུ་དང་རྫིང་བུ་རིགས་གཉིས། སྤོས་ཆུ་ཞེས་པ་ནི་དྲི་ཞིམ་ངད་པའི་བསུང་དང་ལྡན་པའི་ཆ་ནས་བཏགས་ཤིང་། འབབ་ཆུ་ལ་ལའི་ཞེང་དུ་དཔག་ཚད་བརྒྱ་སྟོང་དང་ཟབ་ཚད་ལ་དཔག་ཚད་བཅུ་གཉིས་སོགས་ཀྱང་གསུངས་མོད་དེ་དག་ནི་མཐའ་གཅིག་ཏུ་ངེས་པ་ཅན་མ་ཡིན་ཏེ། གང་འདོད་ཡིད་འོང་གི་རྣམ་པ་སྐྱེ་བོའི་སེམས་ལ་དགའ་བ་སྟེར་བྱེད་འབའ་ཞིག་ཡིན། དེ་བཞིན་གྱ་གྱུར་རྒྱུ་ཞིང་ལྷུང་ལྷུང་དུ་འབབ་པའང་ཡོད་ཆོག མཐའ་གཅིག་ཏུ་རང་རེ་སྐལ་བ་ཐ་མའི་སྤྱོད་ཡུལ་དང་མཐུན་དགོས་པ་མ་ཡིན་ཏེ། བདེ་བ་ཅན་དུ་སྐྱེས་པའི་བྱང་ཆུབ་སེམས་དཔའ་རེ་རེའི་སྐུ་ལུས་ཀྱི་བོངས་ཚད་ལ་དཔག་ཚད་མང་པོ་ཡོད་པར་ཡང་གསུངས་པས་སོ། །ཆུ་ཀླུང་དེ་དག་གི་འགྲམ་དུ་ལྷའི་ཤིང་ཏ་མ་ལ་དང་ཨ་ག་རུ་དང་ཙན་དན་སྦྲུལ་སྙིང་སོགས་སྐྱེས་ཤིང་དེའི་རྩ་བ་ཆུར་ཟུག་པས་དྲི་ཞིམ་ཆུ་ཀླུང་ལ་ཁྱབ་ཅིང་། གསེར་གྱི་བྱེ་མ་འགྲེམ་པའི་ཆུ་ཀླུང་དེ་དག་བསིལ་ཞིང་འཇམ་པའི་ཡན་ལག་བརྒྱད་ལྡན་དུ་གྱུར། དེའང་ལྷའི་ཆུ་ཡན་ལག་བརྒྱད་དང་མིའི་ཆུ་ཡན་ལག་བརྒྱད་ལྡན་གྱི་ཡོན་ཏན་ཐམས་ཅད་ཚང་བ། དེ་བཞིན་ལྷ་དང་མི་ཡི་མེ་ཏོག་གི་རིགས་སྣ་ཚོགས་ཀྱིས་ཁྱབ་ཅིང་དལ་འབབ་སྙན་པའི་སྒྲ་ནི་ལྷའི་སིལ་སྙན་དང་དྲི་ཟའི་རྒྱུད་མངས་ལས་ཀྱང་སྙན་ཞིང་ཆོས་ཀྱི་དོན་སྒྲོགས་པ། སྒྲ་དང་རེག་བྱ་ཐམས་ཅད་གང་ལ་གང་འདོད་ཀྱི་རྗེས་སུ་འགྲོ་བ། རྫིང་བུ་དང་། ཆུ་ཀླུང་། མཚེའུ། མཚོ་ཆེན་པོ། འབབ་ཆུ། ལྟེང་ཀ་སོགས་དང་། ཁྱད་པར་ཁྲུས་ཀྱི་རྫིང་བུ་ནི་རིན་པོ་ཆེ་སྣ་བདུན་ལས་གྲུབ་ཅིང་གསེར་གཡུ་མུ་ཏིག་གི་བྱེ་མ་བརྡལ་བ། དེ་བཞིན། དེ་བཞིན་བདུད་རྩིའི་ཁྲུས་ཀྱི་རྫིང་བུ་ནི། །རིན་ཆེན་སྣ་བདུན་ཐེམ་སྐས་ཕ་གུས་བསྐོར། །མེ་ཏོག་པདྨ་དྲི་ཞིམ་འབྲས་བུར་ལྡན། །སོགས་བདེ་སྨོན་དུ་ཇི་ལྟར་གསུང་པ་བཞིན་འབབ་སྟེགས་སུ་རིན་པོ་ཆེའི་ཐེམ་སྐས་ཕྱོགས་བཞིར་དྲངས་པ། ཕྱི་རོལ་རིན་པོ་ཆེའི་ཕ་གུ་དང་ལྗོན་ཤིང་གི་ཕྲེང་བ་སྤེལ་ལེགས་སྣ་ཚོགས་པས་བརྒྱན་པ། དེ་དག་ཐམས་ཅད་ཀྱང་རིན་པོ་ཆེའི་རྒྱན་གྱིས་མཛེས་པར་སྤྲས་པ། དེའང་ཆགས་མེད་སྐྱོན་བྲལ་མཚོན་ཕྱིར་མེ་ཏོག་གི་རིགས་ལས་པདྨ་གཙོ་བོ་སྨྲོས་པ་ཙམ་ལས་འདིའི་ཁོངས་སུ་ཆུ་དང་ཤིང་གི་པདྨའི་རིགས་ཐམས་ཅད་དང་པདྨ་དཀར་པོ་དང་དམར་པོ་ཐམས་ཅད་བསྡུས་པས་མི་ཚད་ཀུ་མུ་ཏ་དང་ཨུཏྤལ་སོགས་ལྷ་མིའི་ཐུན་མོང་གི་མེ་ཏོག་དང་ལྷའི་མེ་ཏོག་མནྡ་ར་ལ་སོགས་པའོ།།
བདེ་བ་ཅན་གྱི་ལོངས་སྤྱོད་བསྟན་པ།
གོང་དུ་བསྟན་པ་མེ་ཏོག་ལ་སོགས་པ་དེ་དག་གི་ཡོན་ཏན་ཡང་མིག་གི་ཡུལ་དུ་དབྱིབས་དང་ཁ་དོག་གི་རྣམ་པ་མཛེས་ཤིང་། རྣ་བའི་ཡུལ་དུ་ཆོས་ཀྱི་སྒྲ་སྙན་པར་འབྱིན་པ། སྣའི་ཡུལ་དུ་དྲི་ཞིམ་ཞིང་། ལྕེའི་ཡུལ་དུ་རོ་བཅུད་ཕུན་སུམ་ཚོགས་པ། ལུས་ཀྱི་ཡུལ་དུ་རེག་བྱ་འཇམ་པ། མེ་ཏོག་རེ་རེའི་ཁྱོན་ལ་དཔག་ཚད་གཅིག་ནས་བཅུ་གྲངས་ཀྱི་བར་ཡོད་པ། དེ་དག་རེ་རེ་ལས་འོད་ཟེར་བྱེ་བ་སྟོང་ཕྲག་དྲུག་ཅུ་རྩ་དྲུག་དྲུག་འཕྲོ་བ། འོད་ཟེར་རེ་རེའི་རྩེ་མོར་དེ་བཞིན་གཤེགས་པའི་སྐུ་མཐོང་ན་མི་མཐུན་པ་མེད་པ་མཚན་བཟང་དཔལ་གྱིས་སྤྲས་པ་བྱེ་བ་སྟོང་ཕྲག་སུམ་ཅུ་རྩ་དྲུག་དྲུག་འབྱུང་། དེ་ལྟའི་སངས་རྒྱས་བྱེ་བ་ཕྲག་ས་ཡ་དེ་དག་ཕྱོགས་བཅུའི་འཇིག་རྟེན་གྱི་ཁམས་དེ་བས་མང་བར་བྱོན་ཏེ་སེམས་ཅན་གྱི་འགྲོ་དོན་མཛད། དཔལ་མགོན་འཕགས་པ་ཀླུ་སྒྲུབ་ཀྱི་ཞལ་ནས། ཐམས་ཅད་ལས་ཀྱང་སྣ་ཚོགས་འོད་རབ་འཕྲོ། །དེ་ལས་མཚན་དཔེས་རབ་བརྒྱན་སྤྲུལ་བའི་སྐུ། །མཁའ་དབྱིངས་གང་འཁྲིགས་ཟབ་ཡངས་ཆོས་སྟོན་པ། །ཆོས་དབྱིངས་རྣམ་དག་ཞིང་དེར་སྐྱེ་བར་ཤོག །ཅེས་གསུངས་པའི་ཚིག་ཐ་མ་ཆོས་དབྱིངས་རྣམ་དག་ཞིང་ཞེས་པས་རྒྱལ་བའི་ཡེ་ཤེས་རང་སྣང་གི་བཀོད་པ་ཡིན་པར་བསྟན། ཞིང་དེའི་བདེ་སྐྱིད་ལོངས་སྤྱོད་ཀྱང་འཇིག་རྟེན་ལས་འདས་པའི་ཟག་མེད་ཏིང་འཛིན་གྱི་བདེ་བ་ཡིན་པ་དང་། ཡུལ་ཅན་དབང་པོའི་ཤེས་པ་ཐ་མལ་བ་ལས་འཕགས་པས་ན། ཡུལ་གཟུགས་སྒྲ་སོགས་ཀྱང་སྡུག་བདེན་ཀྱིས་མ་བསྡུས་པ་ཡིན་པར་རྟོགས་ནུས། དེ་ལྟར་ཤིང་དང་པདྨོ་ཆུ་ཀླུང་ལ་སོགས་པ་ས་གཞིའི་རྒྱན་བཤད་དེ། གནས་ཁང་གི་རྒྱན་བཤད་པ་ནི། མཁས་གྲུབ་ཀརྨ་ཆགས་མེད་ཀྱིས། འདུག་པར་འདོད་ཚེ་རིན་ཆེན་གཞལ་ཡས་ཁང་། །ཉལ་བར་འདོད་ཚེ་རིན་ཆེན་ཁྲི་བཟང་སྟེང་། །དར་ཟབ་དུ་མའི་མལ་སྟན་སྔས་དང་བཅས། །ཞེས་དང་། ཀུན་མཁྱེན་འཇིགས་གླིང་གིས། བར་སྣང་ལ་འཁོད་གཞལ་མེད་ཁང་ལ་སོགས། །ཞེས་པ་ཙམ་གྱིས་ཇི་ལྟར་བསྟན་པ་བཞིན། གཞལ་ཡས་ཁང་ངམ་གཞལ་མེད་ཁང་ནི་དོན་ལ་རིན་ཆེན་སྣ་ཚོགས་ཀྱིས་མཛེས་ཤིང་། གནས་ལམ་ཡོ་སྤྱད་ཕུན་སུམ་ཚོགས་པའི་ཚད་དེ་བློས་འདིའོ་ཞེས་གཞལ་མི་ནུས་མོད། ཚིག་གིས་མཚོན་ཙམ་བྱས་ན་རིན་ཆེན་སྣ་ཚོགས་ལས་གྲུབ་པའི་གནས་མལ་ཡོ་བྱད་ཚད་མེད་པ། དེའང་རིན་པོ་ཆེ་ལས་གྲུབ་པའི་ཐེམ་སྐས་དང་བ་གམ་དང་ནོར་བུའི་རིགས་ལས་གྲུབ་པའི་སྒོ་དང་སྐར་ཁུང་དྲྭ་མིག་ཅན་དང་། རིན་པོ་ཆེའི་རང་འོད་ཀྱིས་མཛེས་པའི་ཀ་བ་དང་གདུང་མ་དང་དྲལ་ལྕམ་སོགས་དང་། འདོད་རྣམ་དང་རྟ་བབ་ལ་སོགས་པ་འཇའ་འོད་ཀྱི་རིས་སུ་འཁྱིལ་བ། ཞིང་དེར་སྐྱེས་པ་རེ་རེའི་སྤྱོད་ཡུལ་ལ་ཁང་མིག་བརྒྱ་སྟོང་མང་པོ་ཡོད་པ། དེ་དག་རེ་རེར་ཡང་འགྲོ་འཆག་ཉལ་འདུག་གི་སྤྱོད་ལམ་དང་མཐུན་པའི་ཡོ་བྱད་སྣ་ཚོགས་པ་གང་འདོད་བཞིན་རང་འགྲུབ་ཏུ་ཡོད་པ། རིན་པོ་ཆེའི་ཁྲི་དང་ཁྲིའུ་དང་མལ་ཁྲི་དང་སྔས་སྟེགས་ལ་སོགས་སྲབ་འཇམ་ཡང་བ་ལྷ་རྫས་ལས་གྲུབ་པ་འཇིག་རྟེན་མིའི་ཉེར་སྤྱོད་དང་མཐུན་པ། དེ་ལྟའི་གཞལ་མེད་ཁང་རེ་རེར་ལྷའི་བུ་དང་བུ་མོ་བདུན་སྟོང་གིས་མཆོད་སྤྲིན་སྟོབས་པའོ། །ཟས་ཀྱི་ཆ་ནས་བཤད་ན། བདེ་བ་ཅན་གྱི་ཞིང་དེར་སྐྱེས་ཚད་ཐམས་ཅད་ཀྱིས་ཁམ་ཟས་རགས་པ་མི་བསྟེན་པར་དྭངས་མས་ཚིམ་པ་ཡིན་ཡང་། འཇིག་རྟེན་གྱི་རྣམ་པ་དང་མཐུན་པར་གསུངས་ཚེ་རོ་མཆོག་ལྡན་པའི་ཁ་ཟས་གང་འདོད་དེ་མ་ཐག་ཏུ་འབྱུང་བ། དེ་བཞིན་སྣ་བར་དྲི་ཞིམ་པའི་སྤོས་དང་། མིག་ལ་མཛེས་པའི་རྒྱན་ཆ་དང་གདུགས་དང་བ་དན་དང་། རྣ་བར་པི་ཝང་དང་སིལ་སྙན་ལ་སོགས་པ་ཡིད་ལ་དྲན་པ་ཙམ་གྱིས་ཅི་འདོད་འབྱུང་བ། དེའང་ཟད་མི་ཤེས་པའི་ཡོན་ཏན་སྣ་ཚོགས་དང་ལྡན་པ། གཟུགས་ལ་སོགས་པ་རེ་རེས་ཀྱང་དབང་པོ་ཀུན་ཚིམ་པར་བྱེད་པ། རང་རེ་རྣམས་ལ་གཟུགས་ནི་མིག་ཁོ་ནའི་སྤྱོད་ཡུལ་ཡིན་མོད་འདིར་དེ་ལྟ་མ་ཡིན་པར་དབང་པོ་ཀུན་ཚིམ་པར་བྱེད། མི་འདོད་པའི་ཚེ་ན་ཡོ་བྱད་རྣམས་དེ་མ་ཐག་མི་སྣང་བར་འགྱུར་ཏེ། མགོན་པོ་ཀླུ་སྒྲུབ་ཀྱིས། གནས་དང་རྫས་དང་ལུས་ལ་བདག་འཛིན་བྲལ། །ཡིད་ལ་དྲན་པས་གང་འདོད་འདོད་རྒུ་འབྱུང་། །ཞེས་གསུངས་པ་རྣམས་ནི་ས་གཞིའི་རྒྱན་དུ་གཏོགས་སོ། །བར་སྣང་གི་རྒྱན་ནི། སྤྱིར་བདེ་ལྡན་ཞིང་གི་ཕྱིའི་སྣོད་ཀྱི་བཀོད་པ་མཐོ་རིས་ལྷ་མི་གཉིས་ཀྱི་སྤྱོད་ཡུལ་དང་མཐུན་པར་གསུངས་མོད། འོན་ཀྱང་རིའི་རྒྱལ་བོ་རི་རབ་དང་གླིང་བཞིའི་དབྱེ་བ་དང་འདོད་གཟུགས་ཀྱི་ལྷ་གནས་སོགས་ཇི་མ་ཇི་བཞིན་པའི་འདྲ་འབག་བཀོད་པ་མ་ཡིན། ཇི་སྐད་དུ། རིན་ཆེན་ས་གཞི་མཉམ་ཡང་མཐའ་བྲལ་བ། །རྒྱ་མཚོ་རོལ་གླིང་གླིང་གཞན་ཐ་དད་མེད། །གསལ་ཞིང་འོད་འབར་བདེ་ཞིང་ཉམས་དགའ་བ། །རྣམ་དག་རྒྱལ་བའི་ཞིང་དེར་སྐྱེ་བར་ཤོག །ཅེས་གསུངས། བར་སྣང་ཁམས་ཐམས་ཅད་དུ་སྤྲུལ་བའི་ལྷ་དང་ལྷ་མོ་རྣམས་ཀྱིས་རྔ་དང་སིལ་སྙན་གླིང་བུ་སོགས་རོལ་མོའི་སྒྲ་སྙན་སྒྲོགས་བཞིན་མེ་ཏོག་སྣ་ཚོགས་སིལ་མར་བཀྲམ་ཞིང་། གདུགས་དང་རྒྱལ་མཚན་བ་དན་རྔ་ཡབ་ལ་སོགས་པ་ཐོགས་ནས་མཆོད་པའི་སྤྲིན་སྤྲོ་བ། འཇའ་སྤྲིན་འོད་ཟེར་སྣ་ཚོགས་ཅན་གྱིས་ཕྱོགས་ཐམས་ཅད་མཛེས་པར་སྤྲས་ཤིང་བདུད་རྩིའི་གྲུ་ཆར་འཇོ་བ། ཆུ་འཛིན་དང་སྨུག་སྤྲིན་ལང་ལོང་དུ་རྒྱུ་བ། སྔ་དྲོའི་དུས་ན་ཕྱོགས་བཞི་ནས་དྲི་ཞིམ་མངའ་བའི་རླུང་འཇམ་པོར་ལྡིང་བས་རིན་པོ་ཆེའི་ལྗོན་ཤིང་གི་ཡལ་འདབ་དང་ལོ་མ་བསྐྱོད་དུས་མེ་ཏོག་གི་ཆར་བ་པུས་ནུབ་ནས་མི་འགྲེང་ཙམ་འབབ་པ། དེའང་མི་འགྲེང་བདུན་གྲངས་ཙམ་ཁེབས་པ་ཞེས་གསུངས་ཚུལ་ཡང་སྣང་མོད། དེའི་དོན་ལ་གལ་ཏེ་མིའི་ལུས་ཚད་བདུན་ཙམ་བབ་ན་དེར་ནུབ་པར་འགྱུར་རོ་སྙམ་པའི་ལོག་རྟོག་སྐྱེ་བར་མི་བྱ་སྟེ། འདིའི་མིའི་འགྲེང་ཚད་དང་ཉིན་མཚན་སོགས་ནི་རང་རེའི་སྤྱོད་ཡུལ་དང་བསྟུན་ཏེ་གོ་བྱེད་ཙམ་དུ་གསུངས་སོ། །སྤྱིར་འུ་ཅག་གི་ལུས་ཚད་ནི་རང་རང་གི་ཁྲི་བཞི་ཙམ་གྱི་གཟུགས་པོ་ཐུང་ངུ་འདི་ཡིན་ལ། ལྷ་ལུས་ལྟ་བུའི་ལུས་བཟང་པོ་དཔག་ཚད་དང་རྒྱང་གྲགས་ལས་བརྒལ་བ་ནི་མི་འགྲེང་བདུན་དུ་ནུབ་པར་མི་འགྱུར་རོ། །དེ་བཞིན་རང་རེའི་བསྐལ་བ་གཅིག་བདེ་བ་ཅན་གྱི་ཞག་གཅིག་ཏུ་བྱས་ན་དེའི་ཉིན་མཚན་གྱི་ཆ་ནི་ཤིན་ཏུ་རིང་བར་ཡང་བསམ་པར་མི་བྱ་སྟེ། ཇི་སྐད་དུ། སྣང་བ་མཐའ་ཡས་ཞིང་ཁམས་ན། །འཕགས་པའི་ཤེས་རབ་འོད་འཕྲོ་བས། །ཉིན་དང་མཚན་གྱི་མིང་ཡང་མེད། །ཅེས་གསུངས་པ་སོགས་ཀྱི་གོ་དོན་སྦྱར་ཤེས་པར་བྱའོ། །སྔ་དྲོའི་དུས་འདས་པ་ན་མེ་ཏོག་རྙིང་བ་ཐམས་ཅད་མེད་པར་གྱུར་ཏེ་དབེན་ཞིང་ཉམས་དགའ་ལ་དག་ཅིང་སྟོང་བར་འགྱུར་བ་དང་། མཚམས་རེར་བདུད་རྩིའི་སྦྲང་ཆར་དང་མེ་ཏོག་གི་ཆར་བ་དང་སྤོས་ཀྱི་དྲི་བསུང་འཐུལ། སྟེང་གི་བར་སྣང་ཁམས་སུའང་དཔག་ཚད་བརྒྱ་སྟོང་གི་ལྷའི་ཡུལ་གྱི་ཀུན་དགའ་ར་བ་དང་སྐྱེད་མོས་ཚལ་དང་གཞལ་མེད་ཁང་སོགས་ཁོར་ཡུག་དང་བཅས་པ། དེའང་མི་ཡུལ་བཞིན་ས་གཞི་རུ་གཞལ་མེད་ཁང་སོགས་ཆགས་པར་མ་ཟད་ལྷ་ཡུལ་ལྟར་བར་སྣང་ཁམས་སུའང་ཆགས་པ་ནི། ཇི་སྐད་དུ། བར་སྣང་ལ་སྤྲུལ་གཞལ་མེད་ཁང་ལ་སོགས། །གཞན་འཕྲུལ་དབང་བྱེད་ཀྱིས་ཀྱང་དོ་ཟླར་མིན། །ཞེས་གསུངས་ཏེ་ཞིང་ཁམས་དེར་སྐྱེས་པའི་གནས་དང་ལུས་དང་ལོངས་སྤྱོད་སོགས་ལ་ནི་ལྷའི་ཡུལ་གཞན་འཕྲུལ་དབང་བྱེད་ཀྱིས་ཀྱང་འགྲན་དུ་མེད་པ། འདིའི་དཔེ་ལ་མདོ་ལས། འཇིག་རྟེན་མི་ཡུལ་གྱི་སྤྲང་པོ་འབྱོར་འཁོས་དམན་ཞིང་གཟུགས་མི་སྡུག་པའི་མཚན་མ་དགུས་བརྒྱན་པ་ཁ་ཆེ་སྣ་ཉག་གཟི་བརྗིད་མེད་པ་ཞིག་འཁོར་ལོས་བསྒྱུར་བའི་རྒྱལ་པོའི་དྲུང་དུ་འབྱོར་བ་ན་དེ་དང་འགྲན་དུ་མེད་ལ། དེ་བཞིན་མི་ཡུལ་གྱི་འཁོར་སྒྱུར་ཞིག་ལྷའི་དབང་པོ་བརྒྱ་བྱིན་གྱི་དྲུང་དུ་འབྱོར་ནའང་དེ་བཞིན་འགྲན་དུ་མེད་པ་ལྟར། གཞན་འཕྲུལ་དབང་བྱེད་ནི་བདེ་བ་ཅན་གྱི་ཞིང་གི་དོ་ཟླ་མིན་པས་ཞིང་དེའི་ཁྱད་འཕགས་ཀྱི་ཡོན་ཏན་བསྟན། གོང་སྨྲོས་བཞིན་མདོ་དང་བསྟན་བཅོས་སྨོན་ལམ་དང་ཆོ་ག་སོགས་སུ་མིའི་ཚིག་གིས་ཞིང་ཁམས་ཀྱི་བཀོད་པ་གསུངས་པ་ནི། ཕྱོགས་མཚོན་གོ་བྱེད་ཙམ་ཞིག་བསྟན་པ་ཙམ་ལས་དོན་ལ་ཞིང་ཁམས་ཀྱི་ཡོན་ཏན་སྒོ་ཀུན་ནས་གཞལ་བ་ལ་ལྷའི་མིག་གིས་ཀྱང་མཐོང་བའི་མཐའ་མི་རྙེད་པར་གསུངས་ཤིང་། དེ་བཞིན་གལ་ཏེ་སེམས་ཅན་གྱི་གྲངས་དང་མཉམ་པའི་སངས་རྒྱས་ཀྱིས་བསྐལ་བ་བྱེ་བར་བདེ་བ་ཅན་གྱི་ཞིང་གི་ཡོན་ཏན་གསུངས་ཀྱང་མཐའ་མི་མངོན་པར་བསྟན། དེའི་ཕྱིར་བདེ་བ་ཅན་གྱི་ཡོན་ཏན་ནི་ཞིང་དེར་སྐྱེས་པས་མྱོང་བ་ལས་འགྲོ་བ་མིའི་སྒྲ་ཚིག་གི་ཡུལ་དངོས་ནི་མ་ཡིན་ནོ། །དེ་ཡན་ཆད་ཀྱིས་བདེ་བ་ཅན་གྱི་ཞིང་གི་སྣོད་ཀྱི་ཡོན་ཏན་ཕྱོགས་ཙམ་སྨྲོས་ཟིན་ཏོ།།
བདེ་བ་ཅན་གྱི་བཅུད་ཀྱི་ཡོན་ཏན་བཤད་པ།
ངག་འདོན་བསྡུས་པ་བྱིན་རླབས་གློག་ཞགས་སུ་དངོས་བསྟན་ལ། ཆོས་ཉིད་མི་འགྱུར་སྣང་བ་མཐའ་ཡས་ནི། །ཞེས་པ་སོགས་ཀྱིས་བསྟན་ཞིང་འདི་ལ་གཙོ་བོ་དང་འཁོར་དང་། འཁོར་ལའང་ནང་གསེས་གཙོ་འཁོར་གྱི་དབྱེ་བ་ཡོད། གོང་དུ་བཤད་པའི་བདེ་ལྡན་ཞིང་གི་ས་གཞིའི་དབུས་ན་བཅོམ་ལྡན་འདས་རྒྱལ་བ་འོད་དཔག་མེད་ཀྱི་བྱང་ཆུབ་ཀྱི་ཤིང་ཡོད་ལ། ཇི་སྐད་དུ། བྱང་ཆུབ་ཤིང་ལ་སྐུ་རྒྱབ་བརྟེན་མཛད་དེ། །ཐུགས་རྗེ་སྤྱན་གྱིས་རྒྱང་ནས་བདག་ལ་གཟིགས། །ཞེས་པ་ལྟར་སྒོམ་དུས་ཀྱང་དེ་བཞིན་བསྒོམ་པར་བྱ། དེ་ལ་བྱང་ཆུབ་ལྗོན་པ་དེའི་མིང་ཤེས་དགོས་ཀྱི་དེ་མ་ཤེས་པས་ཤིང་ཞིག་རྩར་སངས་རྒྱས་ཤིག་བཞུགས་ཞེས་པ་ལྟ་བུས་མི་འོང་། བྱང་ཆུབ་ལྗོན་པའི་ཤིང་དེའི་མཚན་ལ་རིན་པོ་ཆེ་པདྨོ་རྣམ་པར་སྣང་བ་ཟེར། དེ་ལྟར་དཔལ་མགོན་འཕགས་པ་ཀླུ་སྒྲུབ་ཀྱིས་གསུངས་ཏེ། རིན་ཆེན་པདྨོ་རྣམ་པར་སྣང་ཞེས་བྱ། །བྱང་ཆུབ་ཤིང་མཆོག་སྟོང་དང་དྲུག་བརྒྱ་བ། །མེ་ཏོག་འབྲས་བུ་རྒྱན་ཕྲེང་དུ་མས་བརྒྱན། །དེ་མཐོང་ཡོན་ཏན་སྣ་ཚོགས་ཐོབ་པར་ཤོག །ཅེས་གསུངས། སྟོང་དང་དྲུག་བརྒྱ་ནི་དཔག་ཚད་ཀྱི་གྲངས་དང་དེའི་མཚན་ཙམ་ཐོས་པར་ཡང་ཕན་ཡོན་ཆེན་པོ་ཡོད་པ་རྣམ་དཔྱོད་ཆེས་ཆེར་མི་ལྡན་ཡང་ཤུགས་ལ་རྟོགས་ཏེ། དེ་ཉིད་མཐོང་བས་དད་དང་འདུན་པ་སྐྱེས་པའི་ཕན་ཡོན་བཞིན་མཚན་ཙམ་ཐོས་པར་ཡང་ཡོད་པ་རིགས་པས་ཤེས། བྱང་ཆུབ་ཤིང་དེའི་མཐོ་ཚད་འཕངས་དང་ཁ་ཞེང་རྒྱ་ཁྱོན་ལ་དཔག་ཚད་སྟོང་དང་དྲུག་བརྒྱ་ཡོད་པ། རྩ་བའི་སྦོམ་ཚད་ཀྱི་མཐའ་སྐོར་དུ་དཔག་ཚད་ལྔ་བརྒྱ་ཡོད་པར་གསུངས། མདོ་སྡེ་དཀོན་མཆོག་བརྩེགས་པ་དང་སྙིང་རྗེ་པདྨ་དཀར་པོ་དང་དུས་འཁོར་འགྲེལ་ཆེན་སོགས་སུའང་འདི་དག་རྒྱ་ཆེར་བསྟན། གསུངས་ཚུལ་ཅུང་ཟད་འདྲ་མིན་ནི་སྐབས་དོན་དང་སྦྱར་ནས་རྟོགས་དགོས། དེ་འདྲའི་ལྗོན་པའི་ཤིང་གི་རྒྱལ་པོ་དེ་ནི་འཇིག་རྟེན་ལྷ་མིས་མཆོག་ཏུ་བྱ་བ་ནོར་བུ་རིན་པོ་ཆེ་ཁ་དོག་སྣ་ཚོགས་པ་ལས་གྲུབ་ཅིང་མཛེས་པར་སྤྲས་པ། ལྗོན་པ་དེའི་སྡོང་བོ་དང་ཡལ་ག་དང་ལོ་མ་དང་མེ་ཏོག་དང་འབྲས་བུ་བཅས་ནི་མདངས་དང་འོད་ཟེར་ཁ་དོག་འབུམ་ཕྲག་དུ་མས་བཀྲ་བ། ལོ་འབྲས་མེ་ཏོག་ལ་སོགས་པའི་རིགས་མཐའ་ཡས་པ། རིན་པོ་ཆེའི་རྒྱན་གྱིས་ཀུན་ནས་མཛེས་པར་བརྒྱན་པ། བརྒྱན་ཚུལ་ཡང་གཅིག་ཏུ་མ་ངེས་པར་སེམས་ཅན་གྱི་མོས་པ་དང་བསམ་པ་ཇི་བཞིན་མཛེས་ཤིང་ལེགས་པར་བརྒྱན་པ། ནོར་བུའི་རྒྱན་གྱི་རིགས་ལ་ཟླ་བ་ལྟར་སྣང་བའི་ནོར་བུ་དང་བརྒྱ་བྱིན་གྱིས་ཐོགས་པའི་ནོར་བུ་སོགས་འཇིག་རྟེན་མི་ཡུལ་ན་མེད་པ་དང་། དེ་བཞིན་བཀྲ་ཤིས་པའི་རི་མོ་དང་གཡང་དྲུང་དང་ཟླ་གམ་ཟླ་ཕྱེད་དྲིལ་བུ་གཡེར་ཁའི་འཕྱང་འཕྲུལ་ཅན། དེ་དག་རླུང་གིས་བསྐྱོད་པའི་སྒྲ་སྙན་མོ་འཇིག་རྟེན་གྱི་ཁམས་མང་པོར་ཁྱབ་ཅིང་། དེའི་སྒྲ་ཐོས་ཚད་ཙམ་མ་ཡིན་པར་ཤིང་དེ་མཐོང་དང་སྣོམ་དང་འབྲས་བུའི་རོ་མྱོང་བ་དང་འོད་ལུས་ལ་ཕོག་ཚད་དང་ཡིད་ལ་བྱས་ཚད་ལ་མིག་དང་སྣ་དང་རྣ་དང་ལྕེ་དང་ལུས་ལ་ནད་ཀྱིས་མི་ཐེབས་ཤིང་སེམས་རྣམ་པར་གཡེང་བར་མི་འགྱུར་ཞེས་གསུངས་སོ། །རྒྱལ་བ་འོད་དཔག་མེད་ཀྱིས་ཆོས་སྟོན་པའི་གནས་ཏེ། ཆོས་ཡང་དག་པར་སྡུད་པའི་ཁང་བཟང་ཞེས་པའི་རིན་ཆེན་གཞལ་ཡས་ཁང་དུ། རིན་པོ་ཆེ་དང་ནོར་བུའི་རིགས་སྣ་ཚོགས་ལས་གྲུབ་པའི་ཆོས་ཀྱི་ཁྲི་ཆེན་པོའི་སྟེང་། དག་གསལ་བཟང་ཞིང་བཀྲ་བའི་འོད་ཟེར་ཅན་ཞེས་པའི་པདྨའི་གདན་ཏེ། མགོན་པོ་ཀླུ་སྒྲུབ་ཀྱིས། པདྨོའི་གདན་མཆོག་དེ་འདྲ་མཐོང་བར་ཤོག །ཅེས་པའི་གདན་སྟེང་དུ་ཞིང་ཁམས་དེའི་གཙོ་བོ་རྒྱལ་བ་འོད་དཔག་མེད་བཞུགས་སོ། །དེའང། ཆོས་ཉིད་མི་འགྱུར་སྣང་བ་མཐའ་ཡས་ནི། །ཞེས་པའི་ཆོས་ཉིད་མི་འགྱུར་ཞེས་པས་ནང་གསལ་སྐུ་གསུམ་གྱི་བདག་ཉིད་ཡེ་ནས་འགྱུར་བ་མེད་པ་མངོན་པར་བྱང་ཆུབ་པའི་ཆོས་སྐུ་དང་། སྣང་བ་མཐའ་ཡས་ཞེས་པ་ནི་དེ་ལས་གཟུགས་སྐུར་ཤར་བ་བཅོམ་ལྡན་རྒྱལ་བ་འོད་དཔག་མེད་བསྟན། ཆགས་མེད་རིན་པོ་ཆེས། པདྨ་རཱ་གའི་མདོག་ཅན་གཟི་བརྗེད་འབར། །དབུ་ལ་གཙུག་ཏོར་ཞབས་ལ་འཁོར་ལོ་སོགས། །མཚན་བཟང་སོ་གཉིས་དཔེ་བྱད་བརྒྱད་ཅུས་སྤྲས། །ཞལ་གཅིག་ཕྱག་གཉིས་མཉམ་བཞག་ལྷུང་བཟེད་འཛིན། །ཆོས་གོས་རྣམ་གསུམ་གསོལ་ཞིང་སྐྱིལ་ཀྲུང་གིས། །པདྨོ་སྟོང་ལྡན་ཟླ་བའི་གདན་སྟེང་དུ། །བྱང་ཆུབ་ཤིང་ལ་སྐུ་རྒྱབ་བརྟེན་མཛད་དེ། །ཐུགས་རྗེའི་སྤྱན་གྱིས་རྒྱང་ནས་བདག་ལ་གཟིགས། །ཞེས་གསུངས་པ་ལྟར། ཕྱོགས་བཅུའི་ཞིང་ཁམས་རབ་འབྱམས་ལ་སངས་རྒྱས་འོད་དཔག་མེད་ཀྱི་སྐུའི་འོད་ཀྱིས་ཁྱབ་པས་ན་སྣང་བ་མཐའ་ཡས། འོད་ཟེར་མཐའ་ཡས་མུ་མེད་པ་འཕྲོ་བས་འོད་དཔག་མེད། སྐུ་ཚེ་ཚད་མེད་དཔག་ཡས་པར་བཞུགས་པས་ཚེ་དཔག་མེད་སོགས་མཚན་གྱི་རྣམ་གྲངས་དང་སྐུ་ཡི་བཀོད་པའང་བྱེ་བྲག་བསམ་ཡས་འབྱུང་བ་དེ་རྒྱལ་བ་རང་གི་སྤྱོད་ཡུལ་དུ་མངའ་བ་མ་གཏོགས་གཞན་སུ་ཡིས་རྟོགས་པར་ནུས། འགྲོ་བ་ཀུན་ལ་རྗེས་སུ་ཆགས་པའི་བརྡར་སྐུ་མདོག་དམར་པོ་སོར་རྟོགས་ཡེ་ཤེས། དེའང་པདྨ་རཱ་གའི་མདོག་ཅན་ནམ་བྱུ་རུའི་ཕུང་པོར་སྣུམ་གྱིས་བྱུག་པ་ལྟ་བུ་ཞེས་ཀྱང་གསུངས། དབུའི་གཙུག་ཏོར་བལྟར་མི་མངོན་པ་སོགས་མཚན་བཟང་པོ་སུམ་ཅུ་རྩ་གཉིས་དང་། ཕྱག་ཞབས་སེན་མོ་ཟངས་མདོག་ལ་སོགས་དཔེ་བྱད་བརྒྱད་ཅུས་སྤྲས་པ། སངས་རྒྱས་སྤྲུལ་བའི་སྐུ་ཚངས་བར་སྤྱོད་པའི་ཆ་ལུགས་ཅན། ཞལ་གཅིག་པ་ནི་ཆོས་དབྱིངས་སྤྲོས་བྲལ་དང་ཆོས་སྐུ་ཐིག་ལེ་ཉག་གཅིག་མཚོན་པའི་བརྡ་དང་། ཕྱག་གཉིས་ནི་དབྱིངས་དང་ཡེ་ཤེས་ཟུང་དུ་འཇུག་པ་ལས་ཐབས་དང་ཤེས་རབ་གཉིས་སུ་མེད་པའི་བརྡ། ཕྱག་གཉིས་མཉམ་བཞག་གིས་ལྷུང་བཟེད་བསྣམས་པ་ནི། ཟབ་དང་རྒྱ་ཆེའི་ཆོས་མཛོད་ཀྱིས་འགྲོ་ཀུན་ཚིམ་པར་མཛད་པ་སོགས་ཀྱི་དག་དྲན་སྦྱར། དེའང་རིའི་རྒྱལ་བོ་རི་རབ་ནི་གླིང་བཞི་གསེར་རི་རོལ་མཚོ་དང་བཅས་པའི་དབུས་ན་མངོན་པར་འཕགས་པ་བཞིན་དུ། སངས་རྒྱས་འོད་དཔག་མེད་ནི་སངས་རྒྱས་ཀྱི་ཞིང་ཁམས་དང་སྟོན་པ་རྒྱལ་བ་ཐམས་ཅད་ཀྱི་དབུས་ན་མངོན་པར་འཕགས། ཚུལ་དེའང་ལྷམ་མེ་ལྷན་ནེ་ལྷང་ངེ་སྟེ། ཐུགས་བྱམས་དང་སྙིང་རྗེ་ཡེ་ཤེས་རྟག་ཏུ་འོད་གསལ་མཉམ་ཉིད་ཆེན་པོའི་ངང་ལས་འདའ་བ་མེད་པས་ལྷམ་མེ། དེ་ལས་གདུལ་བྱའི་མོས་ངོར་རང་སྣང་བ་གསུང་ཡན་ལག་དྲུག་ཅུའི་བདག་ཉིད་ནི་ཐག་ཉེ་རིང་མེད་པ་ལྷན་ནེ། སྐུ་གཟི་བྱིན་ཉི་མ་འབུམ་གྱི་འོད་ཟེར་འཕྲོ་བཞིན་ཞལ་མདུན་རྒྱབ་དང་རྒྱང་ཉེ་རིང་མེད་པར་ལྷམ་མེར་བཞུགས་པ། དེ་བཞིན་ཐུགས་རྗེ་སྤྱན་གྱིས་རྒྱང་ནས་བདག་ཅག་ལ་གཟིགས་ཚུལ་ནི། སྤྱིར་ཐུགས་རྗེ་ལ་རྟག་པ་རྒྱུན་གྱི་ཐུགས་རྗེ། བསྐུལ་ཞིང་གསོལ་བ་བཏབ་པའི་ཐུགས་རྗེ། གདུལ་བྱ་རྐྱེན་དང་འཕྲད་པའི་ཐུགས་རྗེའོ། །དང་པོ་རྟག་པ་རྒྱུན་གྱི་ཐུགས་རྗེ་ནི། དཔེ་ནམ་མཁའི་ཉི་མའི་འོད་ཀྱིས་གླིང་བཞིར་ཁྱབ་པ་བཞིན་དུ། རྫོགས་པའི་སངས་རྒྱས་ཀྱིས་དང་པོར་ཐུགས་བསྐྱེད་པ་ནས་མཐར་མྱ་ངན་ལས་འདས་པའི་བར་གྱི་མཛད་པ་ནི་སེམས་ཅན་ཐམས་ཅད་ཀྱི་དོན་ཡིན་ལ། དེའང་སེམས་ཅན་ཀུན་ལ་ཉེ་རིང་མེད་པར་ཐུགས་རྗེ་ཀུན་ལ་སྙོམས་པ་ཡིན། དེ་ལྟ་མོད་ཁ་བྱང་བསྟན་གྱི་བྲག་ཕུག་ཏུ་ཉི་འོད་འཕྲོ་ཐབས་མེད་པ་ལྟར་དད་པའི་ཨ་ལུང་མེད་པ་དག་རེ་ཞིག་ཐུགས་རྗེའི་ལྕགས་ཀྱུས་འཛིན་ཐབས་མ་མཆིས་སོ། །དད་པ་དང་ཡིད་ཆེས་ཡོད་ན་བསྐུལ་ཞིང་གསོལ་བ་བཏབ་པའི་ཐུགས་རྗེ་ནི། དཔེ་ཕྱུག་པོ་གཏོང་ཕོད་ཅན་གྱིས་སྦྱིན་ཡུལ་མ་རྙེད་པར་སྡོད་པའི་ཚེ་ན་དབུལ་བོ་སློང་མོ་བ་སྒོ་ཁར་ཐོན་པ་བཞིན་ནོ། །གདུལ་བྱ་རྐྱེན་དང་འཕྲད་པའི་ཐུགས་རྗེ་ནི། སྤྱིར་ཚོགས་བསགས་སྒྲིབ་སྦྱོང་རང་གིས་མ་བྱས་ན་རྒྱུ་མེད་ཀྱི་བདེ་འབྲས་མངོན་དུ་འགྱུར་བ་དཀའ་མོད། དེ་བྱས་པའི་ལག་རྗེས་སུ་སངས་རྒྱས་སྣང་བ་མཐའ་ཡས་སྐུ་དངོས་སུ་མཇལ་ཞིང་། གསུང་གི་དབུགས་དབྱུང་དང་། ཐུགས་ཀྱི་བྱིན་རླབས་དང་རྗེས་གནང་ཐམས་ཅད་ཐོབ་པ་སྟེ། དཔེར་ན་མེ་ལོང་གཡའ་དག་ལ་བྱི་དོར་བྱས་ན་གཟུགས་བརྙན་གསལ་བར་འཆར་བ་བཞིན་ནོ། །དེ་ལྟར་མདོར་ན་སངས་རྒྱས་འོད་དཔག་མེད་ཀྱི་སྐུའི་འོད་སྣང་མཐའ་ཡས་པ་ལྟར། གསུང་མཐའ་ཡས་པ། ཐུགས་ཀྱི་མཁྱེན་པ་རྒྱ་ཆེ་ཞིང་མཐའ་ཡས་པ། དེ་བཞིན་ཚུལ་ཁྲིམས་དང་ཏིང་ངེ་འཛིན་དང་ཤེས་རབ་དང་བརྩོན་འགྲུས་ལ་སོགས་པའི་ཡོན་ཏན་ཟབ་ཅིང་ཤིན་ཏུ་རྒྱ་ཆེ་བའི་ཆོས་ལ་མངའ་བརྙེས་པ་ནི། ཇི་སྐད་དུ། ཁྱོད་འདྲ་འཇིག་རྟེན་འདི་ན་གཞན་མ་མཆིས། །ཞེས་གསུངས་པ་བཞིན་ནོ། །དེ་ལྟར་བདེ་ལྡན་ཞིང་གི་མགོན་པོ་རྒྱལ་བ་འོད་དཔག་མེད་ཅི་ལྟར་ཡིད་ལ་བྱེད་ཚུལ་གསལ་འདེབས་ཕྱོགས་ཙམ་བསྟན་པའོ། །དེ་བཞིན་འུ་བུ་ཅག་གིས་ཆོས་འདི་ལ་ཐོས་བསམ་བྱས་པ་ཙམ་མ་ཡིན་པར་བསྒོམ་པས་རྒྱུད་ལ་སྦྱོར་འདོད་པས་ན་ཕྱིས་སུ་རང་བློ་ལ་ཅི་ནུས་སུ་གསལ་ཐུབ་པ་ཞིག་དགོས་ལ། འཁོར་བྱང་ཆུབ་སེམས་དཔའ་རྣམ་གཉིས་དང་བཅས་པ་ནི། མཁས་གྲུབ་ཀརྨ་ཆགས་མེད་ཀྱིས། གཙོ་བོ་གསུམ་པོ་རི་རྒྱལ་ལྷུན་པོ་བཞིན། །ཞེས་དང་། འདིར་ཀུན་མཁྱེན་འཇིགས་གླིང་གིས། འགག་མེད་སྙིང་རྗེ་ལོངས་སྤྱོད་སྤྱན་རས་གཟིགས། །ཞེས་པས་རྒྱལ་ཀུན་སྙིང་རྗེའི་རང་གཟུགས་བརྩེ་ཆེན་སྤྱན་རས་གཟིགས་དབང་དངོས་སུ་བསྟན་ཞིང་། ཤུགས་ལ་རྒྱལ་ཀུན་ནུས་པའི་མངའ་བདག་རྒྱལ་སྲས་མཐུ་ཆེན་ཐོབ་དེ་བསྟན་པས་བདེ་ཆེན་ཞིང་གི་གཙོ་བོར་གཞན་གཉིས་དང་། དེ་བཞིན་མཁྱེན་དང་བརྩེ་དང་ནུས་པ་དབྱེར་མི་ཕྱེད་པའི་ལྡོག་ཆ་ནས་འཇམ་དཔལ་གཞོན་ནུར་གྱུར་པའང་དེ་དག་ལས་གཞན་དུ་མི་སེམས་ཞིང་། འགག་མེད་སྙིང་རྗེ་ལོངས་སྤྱོད་སྤྱན་རས་གཟིགས། །ཞེས་པའི་འགག་མེད་ཀྱིས་ཆོས་ཀྱི་སྐུ་ལས་ལོངས་སྤྱོད་རྫོགས་པའི་སྐུ་རུ་སྣང་བ་དང་། ལོངས་སྤྱོད་ཅེས་པའི་ཚིག་གིས་ཀྱང་སྙིང་རྗེར་ལོངས་སྤྱོད་པ་པོའམ་ཁ་སྦྱོར་བདུན་ལྡན་གྱི་བདག་ཉིད་འཕགས་པ་སྤྱན་རས་གཟིགས་སྐུ་མདོག་དཀར་གསལ་ཞལ་གཅིག་ཕྱག་གཉིས་ལོངས་སྐུའི་ཆོས་ཅན་རྒྱན་ཆས་བཅུ་གསུམ་གྱིས་མཛེས་པར་སྤྲས་ཏེ་བཞུགས་པ་གསལ་བར་བསྟན་པའི་ཤུགས་ལ། བྱང་སེམས་མཐུ་ཆེན་ཐོབ་པ་སྐུ་མདོག་སྔོན་པོ་ཅན་དང་བཅས་གཙོ་བོའི་གཡས་གཡོན་དུ་བཞེངས་སྟབས་སུ་ཡོད་པའང་ཡིད་ངོར་གསལ་བར་བྱ། དེ་ལ་འགའ་ཞིག་གིས་སྤྱན་རས་གཟིགས་དབང་ནི་སངས་རྒྱས་ཡིན་ནམ་འཕགས་པ་ཡིན། གང་རྒྱལ་བ་ཡིན་ན་རྒྱལ་སྲས་ཡིན་པར་མི་རིགས་སྙམ་དུ་གུ་དོགས་པར་མི་བྱ་སྟེ། དེ་འདྲའི་གུ་དོགས་ཅན་གྱི་མི་ཁོང་དོགས་ལ་རིགས་ཤིང་འཐད་པ་གཅིག་ཀྱང་མེད་པར་ནམ་ཞིག་གི་ཚེ་ན། ཏིང་འཛིན་མི་འགྲུབ་སྲོག་རླུང་འགྲུབ། ཤེས་རབ་མི་འགྲུབ་ལོག་ལྟ་འགྲུབ། དེ་ལྟར་ལོག་པའི་ལམ་དུ་ཞུགས་ཤིང་ལོག་པའི་གཡང་སར་འཁྱམས་ཏེ་ཡ་ང་བར་འགྱུར་རོ། །དེས་ན་གོང་དུ་རྒྱལ་བ་ཀུན་གྱི་སྙིང་རྗེའི་རང་གཟུགས་ཞེས་པས་དེ་ཉིད་རྣམ་པ་རྟགས་ཀྱི་ཕྱག་རྒྱ་ཞལ་ཕྱག་མཚན་མ་ཅན་དུ་བསྒོམ་དུས་སྐུ་མདོག་དཀར་གསལ་སོགས་སུ་སྣང་བ་དང་། མཚན་མེད་དུ་བསྒོམ་དུས་གནས་ལུགས་སྟོང་དང་སྙིང་རྗེ་དམིགས་མེད་མཁའ་ལྟར་ཁྱབ་པའི་ཡེ་ཤེས་དང་། དེའང་གདུལ་བྱ་འདུལ་ཐབས་སུ་བྱང་ཆུབ་སེམས་དཔའི་རྣམ་པ་འཇིག་རྟེན་དང་འཇིག་རྟེན་ལས་འདས་པ་སྣ་ཚོགས་པར་སྣང་ནས་སེམས་ཅན་གྱི་དོན་མཛད་པ་ཡིན་པས་ན། སྤྱན་རས་གཟིགས་དབང་ཞལ་གཅིག་ཕྱག་གཉིས་དང་། ཕྱག་སྟོང་སྤྱན་སྟོང་། འཕགས་མཆོག་སེམས་ཉིད་ངལ་གསོ། འཕགས་པ་སེང་གེའི་སྒྲ། འཕགས་མཆོག་ནམ་མཁའི་རྒྱལ་བོ་ལ་སོགས་པ་མཚན་དང་སྐུ་ཡི་བཀོད་པ་མཐའ་ཡས་པར་སྣང་རུང་ངོ་། །ལྷ་གཅིག་ཆོག་འཕགས་པ་སྤྱན་རས་གཟིགས་དང་། ཆོས་གཅིག་ཆོག་གཟུངས་སྔགས་ཡི་གེ་དྲུག་མ། མ་ཎི་ཡིག་དྲུག་ཏུ་ཆོས་ཕུང་བརྒྱད་ཁྲི་བཞི་སྟོང་འདུས་པའང་དེའི་ཕྱིར་ཡིན་ནོ། །དེ་ནས། ཨོ་རྒྱན་པཎ་ཆེན་བརྫུས་སྐྱེས་སྤྲུལ་བའི་སྐུ། །ཞེས་པ་འདིས་དུས་གསུམ་སངས་རྒྱས་ཐམས་ཅད་ཀྱི་མཁྱེན་བརྩེ་ནུས་པའི་རང་གཟུགས། དུས་སྙིགས་མའི་འགྲོ་བ་སྐྱོབ་པ་ལ་ཐུགས་རྗེ་རྒྱལ་བ་ཀུན་ལས་ལྷག་པར་མྱུར་བ་སྤྲུལ་སྐུ་མཚོ་སྐྱེས་རྡོ་རྗེ། ཇི་སྐད་དུ། རྒྱ་གར་པཎ་ཆེན་བོད་ལ་བཀའ་དྲིན་ཆེ། །པདྨ་ལས་འཁྲུངས་སྐུ་ལ་འདས་གྲོངས་མེད། །ཅེས་པ་ལྟར་ཤེས་བྱ་ཐམས་ཅད་ལ་མཁྱེན་པའི་ཡེ་ཤེས་ཐོགས་པ་མི་མངའ་བ་གུ་རུ་བློ་ལྡན་མཆོག་སྲེད་དང་། སྐུ་ཆེ་བའི་ཡོན་ཏན་མངལ་སྐྱེས་མ་ཡིན་རིག་པ་ཐོལ་སྐྱེས་སུ་མེ་ཏོག་པདྨའི་སྡོང་བོར་བརྫུས་ཏེ་འཁྲུངས་པས་ནི་མཛད་པ་ཕྲིན་ལས་འགྲན་ཟླ་མེད་པའང་བསྟན། དེ་ལྟའི་སྐྱེ་མེད་སྐྱེ་བའི་ཆོ་འཕྲུལ་ངོ་མཚར་གྱི་སྣང་བ་དེས་འཕོ་བྲལ་འཆི་བ་མེད་པ་རྡོ་རྗེའི་ས་མཆོག་བརྙེས་ཏེ། རིག་འཛིན་རྣམ་བཞིའི་གོ་འཕང་མཐར་ཕྱིན་པའང་ཤུགས་ལ་རྟོགས། སྣང་མཐའི་ཐུགས་ཀའི་ཧྲཱི་ཡིག་ལྷོ་ནུབ་འོ་མ་ཅན་གྱི་རྒྱ་མཚོར་འཕོས་ཏེ་ཕ་ཡི་རྒྱུ་ཡིས་མ་བསྐྱེད་མ་ཡི་རྐྱེན་ལས་མ་ཤར་བར་གཞོན་ལུས་ཟིལ་བ་ཁྲོམ་མེར་སྐྱེ་འཆིི་འཇིག་བྲལ་གྱི་སྐུ་རུ་བྱོན། དེའི་ཡང་སྤྲུལ་བ་ཨོ་རྒྱན་བྱེ་བ་ཕྲག་བརྒྱ་དང་གཞན་ཡང་རིགས་དྲུག་གི་གནས་སུ་འགྲོ་དོན་མཛད་པའི་གུ་རུ་རེ་རེ། ཁྱད་པར་དུ་སངས་རྒྱས་སྐུ་དངོས་ཀྱི་ཞབས་ཀྱིས་མ་བཅགས་པའི་གནས་བོད་ཡུལ་འདིར། དུས་ཕྱིས་སངས་རྒྱས་མིའི་གཟུགས་སུ་བྱོན་ཏེ་དམ་པའི་ཆོས་ཀྱིས་འགྲོ་བ་འདུལ་བ་ཆོས་བརྒྱུད་སོ་སོའི་བསྟན་འཛིན་གྱི་སྐྱེས་བུ་ཡོད་ཚད་གུ་རུའི་སྤྲུལ་བ་ཡིན་པར་སོམ་ཉི་མི་དགོས་སོ། །མཁས་གྲུབ་ཀརྨ་ཆགས་མེད་ཀྱིས། ཆོས་སྐུ་སྣང་བ་མཐའ་ཡས་རིགས་ཀྱི་བདག །ཕྱག་གཡས་འོད་ཟེར་ལས་སྤྲུལ་སྤྱན་རས་གཟིགས། །ཡང་སྤྲུལ་སྤྱན་རས་གཟིགས་དབང་བྱེ་བ་བརྒྱ། །ཕྱག་གཡོན་འོད་ཟེར་ལས་སྤྲུལ་སྒྲོལ་མ་སྟེ། །ཡང་སྤྲུལ་སྒྲོལ་མ་བྱེ་བ་ཕྲག་བརྒྱ་འགྱེད། །ཐུགས་ཀྱི་འོད་ཟེར་ལས་སྤྲུལ་པདྨ་འབྱུང་། །ཡང་སྤྲུལ་ཨོ་རྒྱན་བྱེ་བ་ཕྲག་བརྒྱ་འགྱེད། །ཅེས་པས་ནི་སྤྱིར་མདོ་དང་སྔགས་སུ་སྐྱབས་ཡུལ་གྱི་ལྷ་ཚོགས་མཐའ་ཡས་པ་ཞིག་བསྟན་ནའང་། དུས་སྙིགས་མའི་སྐབས་འདིར་སྔོན་གྱི་ཐུགས་བསྐྱེད་དང་སྨོན་ལམ་གྱི་མཐུ་ལས་བྱིན་རླབས་དང་ཐུགས་རྗེ་ལྷག་པར་མྱུར་བ་ནི། སྤྱན་རས་གཟིགས་དང་། སྒྲོལ་མ་དང་། ཨོ་རྒྱན་པད་འབྱུང་གསུམ་ཡིན་པར་བསྟན། འདི་གསུམ་ལ་གསོལ་བ་བཏབ་ན་ལྷ་གཞན་ཐམས་ཅད་ལ་གསོལ་བ་བཏབ་པའི་གོ་ཆོད་པ་དང་། འདི་གསུམ་འགྲུབ་ན་ལྷ་གཞན་ཐམས་ཅད་འགྲུབ་པ་ཡིན་པ། དེའང་ཆོས་སྐུ་འོད་དཔག་མེད་ཀྱི་གསང་བ་གསུམ་གྱི་རྣམ་པར་སྤྲུལ་བ་ཡིན་པས་ཚུར་བསྡུས་ན་ཆོས་སྐུ་འོད་དཔག་མེད་གཅིག་པུ་ཡིད་ལ་བྱས་ཏེ་མོས་གུས་དྲག་པོས་གསོལ་བ་བཏབ་ན། དེ་ཉིད་ཁོ་ན་ཐར་བའི་ལམ་སྣ་ཟིན་བྱེད་དང་། ངན་སོང་གི་སྒོ་འགག་བྱེད། སངས་རྒྱས་ཀྱི་གོ་འཕང་ཐོབ་བྱེད་བཅས་འདུ་སྟེ། རྒྱུ་མཚན་ནི་བདེ་བ་ཅན་དུ་སྐྱེ་བའི་རྒྱུའི་གཙོ་བོ་ཡིན་པའི་ཕྱིར། དེའང་རྟེན་ཞིང་ཁམས་ཡིད་ལ་བྱས་པས་བདེ་བ་ཅན་དུ་སྐྱེ་ཞིང་དེ་ནས་སྐྱེ་བ་གཅིག་བརྗེས་པ་ནི་སངས་རྒྱས་ཀྱི་ས་ཡིན་པ་མདོ་རྒྱུད་ཀྱི་ལུང་དང་མཁས་པའི་གཏན་ཚིག་སོགས་དཔྱད་གསུམ་དག་པའི་ཚད་མས་གྲུབ་བོ། །འཁོར་བྱང་སེམས་དང་ཉན་ཐོས་ལ་སོགས་པ་ལྷ་མིའི་རྣམ་པ་ཅན་གྲངས་མཐའ་གཞལ་གྱིས་མི་ལང་བའི་ཚུལ་ནི་བཤད་མི་ལོང་བས་གཞན་ལས་རྟོགས་པར་བྱ། དེ་དག་ནི་འདིར་ཉིན་རེ་གཉིས་ཙམ་གྱིས་བརྗོད་པར་ག་ལ་ལང་། དེ་ལྟར་རྒྱལ་བས་ཐོག་མར་ཐུགས་བསྐྱེད་ཚུལ་དང་བར་དུ་ཚོགས་གཉིས་བསགས་ཚུལ་ཐ་མར་སྨོན་ལམ་གྲུབ་ནས་བདེ་བ་ཅན་གྱི་ཞིང་ཁམས་བཟུང་སྟེ་རང་རེའི་བསྐལ་ཆེན་བཅུ་བདེ་བ་ཅན་གྱི་ཞག་བཅུ་སོང་། དེ་ལྟར་བདེ་བ་ཅན་དུ་སྐྱེ་བའི་རྒྱུ་བཞི་ལས་དང་པོ་རྟེན་ཞིང་ཁམས་གསལ་བ་རྟེན་དང་བརྟེན་པའི་རྣམ་གཞག་ཡིད་ལ་བྱེད་ཚུལ་གྱི་མངོན་རྟོགས་དང་བཅས་བསྟན་ཏོ།།
རྒྱུ་གཉིས་པ་ཚོགས་བསགས་སྒྲིབ་སྦྱོང་བཤད་པ།
དང་པོ་ཚོགས་བསགས་ཡན་ལག་བདུན་སྤྱིར་བསྟན་པ།
སྤྱིར་ཚོགས་བསགས་པའི་སྒོ་དང་གསོག་ཐབས་མཐའ་ཡས་པ་ཞིག་ཡོད་ཀྱང་དེ་དག་ཐམས་ཅད་རིགས་བསྡུ་ན་ཡན་ལག་བདུན་ནམ་བརྒྱད་དུ་འདུ་བར་གསུངས། དེའང་ཡན་ལག་བདུན་པ་ནི་ཡོངས་ལ་གྲགས་པའི་ཞལ་འདོན་བཟང་པོ་སྤྱོད་པའི་སྨོན་ལམ་ལས། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །ཞེས་པ་སོགས་ཀྱི་བསྟན་དོན་བཞིན་ཡིན་མོད། མདོ་རྒྱུད་སོ་སོའི་བསྟན་བྱའི་དགོས་དབང་གིས་ཚིག་དོན་ཅུང་ཟད་མི་འདྲ་བ་ཙམ་རེ་དང་རྒྱས་བསྡུས་ཀྱི་ཁྱད་པར་མ་གཏོགས་སྤྱིར་འདྲའོ། །བོད་ཁམས་ཡོངས་ལ་ཁྱབ་རྒྱ་ཆེ་ཞིང་སྐབས་འདིར་ཡང་འབྲེལ་བ་ཆགས་མེད་རིན་པོ་ཆེའི་བདེ་སྨོན་དུ་གསུངས་པའི་ཡན་ལག་བདུན་པོའང་སྔར་ལན་འགར་བཤད་མྱོང་ཞིང་། དེ་མིན་བདེ་སྨོན་བསྡུས་པའི་ཡན་ལག་བདུན་པ་ཚིག་ཟིན་ལ་ཡོད་པའང་སྔར་བཤད་མོད། ལན་རེར་འཆད་ཉན་བྱས་པའི་དགེ་རྩའང་བསམ་གྱིས་མི་ཁྱབ་པས་ན། ཡང་བསྐྱར་ཡན་ལག་བདུན་འཆད་པར་བྱའོ།།
ཕྱག་འཚལ་བའི་ཡན་ལག་བཤད་པ།
ཆགས་མེད་བདེ་སྨོན་དུ། ཆོས་སྐུ་འོད་དཔག་མེད་ལ་ཕྱག་འཚལ་ལོ། །ཀུན་མཁྱེན་འོད་དཔག་མེད་ལ་ཕྱག་འཚལ་ལོ། །འདྲེན་པ་འོད་དཔག་མེད་ལ་ཕྱག་འཚལ་ལོ། །མགོན་པོ་ཚེ་དཔག་མེད་ལ་ཕྱག་འཚལ་ལོ། །བདེ་གཤེགས་འོད་དཔག་མེད་ལ་ཕྱག་འཚལ་ལོ། །ཞེས་པ་སོགས་མཚན་གྱི་རྣམ་གྲངས་སོ་སོའི་སྒོ་ནས་དེ་དང་དེའི་ཡོན་ཏན་རྗེས་སུ་དྲན་ཏེ་ཕྱག་འཚལ་བ། དེའང་ལུས་ངག་ཡིད་གསུམ་གུས་པ་ཆེན་པོས་འཚལ་དགོས་ཀྱི་གཞན་དུ་ལུས་ཁོ་ནས་ཡོ་རོ་རོར་གྲངས་གསོག་པ་རྐྱང་བར་དམིགས་ཏེ་ཅི་འདྲའི་མང་དུ་འཚལ་ཡང་ཅིར་འགྱུར་ཤེས་དཀའ། དེ་བཞིན་ལྷ་ཁང་སོགས་རྟེན་གསུམ་ལ་སྐོར་བ་བྱེད་པའང་ཕྱག་འཚལ་བ་ཇི་བཞིན་གུས་ཤིང་དད་པའི་སྒྲིབ་སྦྱོང་བྱེད་ཚུལ་ཞིག་ཡིན་པས་སྒོ་གསུམ་གུས་པས་བསྐོར་བ་བྱ་སྟེ། མདོར་ན་དགེ་སྒྲུབ་གང་བྱེད་ཀྱང་ལུས་ངག་ཡིད་གསུམ་ཆུན་གཅིག་ཏུ་འདྲིལ་བ་ནི་རྣམ་པ་ཀུན་ཏུ་གལ་ཆེ། ཡན་ལག་བདུན་པོའང་བསྡུ་ན་བསགས་སྦྱང་སྤེལ་གསུམ་དུ་འདུ་སྟེ། ཚོགས་བསགས་པ། སྡིག་སྒྲིབ་སྦྱང་བ། ཐབས་ལ་བརྟེན་ནས་དགེ་ཚོགས་མང་པོར་སྤེལ་བར་འདུའོ། །ལུས་ཀྱི་ཕྱག་འཚལ་བ་ནི། ཐལ་མོ་སྤྱི་མགྲིན་སྙིང་གའི་གནས་གསུམ་དུ་སྦྱར་ནས་མལ་ལྔ་ས་ལ་ཕབ་པ། དེ་དང་དུས་མཉམ་དུ་ངག་གིས་ཕྱག་འཚལ་བ་ནི། ཕྱོགས་བཅུའི་རྒྱལ་བ་སྲས་བཅས་ལ་སྐྱབས་སུ་འགྲོ་བའི་ངག་འདོན་དང་འབྲེལ་ཞིང་ཕྱག་འཚལ་བའི་དགོས་ཆོས་སྐྱབས་ཡུལ་གྱི་བསྟོད་པའི་ཚིག་དོན་ཤེས་ནས་སྒྲ་ཚིག་བརྗོད་པ། ཡིད་ཀྱིས་ཕྱག་འཚལ་བ་ནི། ཕྱག་འཚལ་ཡུལ་མགོན་པོ་འོད་དཔག་མེད་ལ་སོགས་པ་ནམ་མཁའ་གང་བའི་རྒྱལ་བ་སྲས་བཅས་ཀྱི་ཡོན་ཏན་དྲན་པར་བྱས་ལ། ཕྱག་འཚལ་མཁན་རང་ཉིད་གཅིག་པུར་མི་བསམ་པར་རང་ལུས་རྡུལ་སྙེད་ཀྱི་གྲངས་སུ་སྤྲུལ་བ་དང་། དེ་བཞིན་མཐའ་ཡས་སེམས་ཅན་ནམ་མཁས་གར་ཁྱབ་ལུས་པ་མེད་པའི་འགྲོ་ཁམས་རྒྱ་མཚོའི་སེམས་ཅན་རེ་རེ་ནས་སྒོ་གསུམ་གུས་པ་ཆེན་པོས་ཕྱག་འཚལ་བར་བསམ། དེ་ལྟར་ཡང་སྦྱོར་བ་སེམས་བསྐྱེད་དམ་པས་དགེ་རྩ་ཐབས་ཀྱིས་ཟིན་པར་བྱ་ཞིང་། དངོས་གཞི་དམིགས་མེད་དམ་པས་དགེ་རྩ་རྐྱེན་གྱིས་མི་བཤིག་པར་དམིགས་གཏད་འཛིན་ཞེན་མེད་ཅིང་ཁྱད་པར་ལས་དང་པོ་པས་རང་འདོད་ཀྱི་འཁྲུ་བ་མེད་པ། རྗེས་བསྔོ་བ་དམ་པས་དགེ་བ་གོང་ནས་གོང་དུ་སྤེལ་ཞིང་འཁོར་གསུམ་དམིགས་མཐའ་བྲལ་བའི་གོ་དོན་རེ་སློང་བ། དགེ་རྩ་ཆེ་ཆུང་གང་སྒྲུབ་ཀྱང་དེ་གསུམ་དང་འབྲལ་བར་མི་བྱ་ཞིང་། ཁྱད་པར་དུ་སྐབས་དོན་བཤད་བྱ་ཡན་ལག་བདུན་གྱིས་བསྡུས་པའི་དགེ་རྩ་ཐམས་ཅད་ནི། མཐའ་ཡས་པའི་སེམས་ཅན་ཐམས་ཅད་ཀྱི་དོན་དུ་བླ་མེད་བྱང་ཆུབ་འགྲུབ་པའི་རྒྱུར་འགྱུར་བར་དམིགས་པ་ནི་ཤིན་ཏུ་གལ་ཆེ་བས་འདིར་ཡང་ཟློས་ཏེ་བརྗོད་པ་ཡིན། སྤྱིར་ཆོས་བརྒྱུད་སོ་སོ་དང་བླ་མ་སོ་སོའི་ལུགས་ལ་ཕྱག་འཚལ་ལུགས་ཅུང་ཟད་མི་འདྲ་བ་དུ་མ་ཡོད་མོད། དེ་དག་རེ་རེ་ལ་རང་རང་གི་ཁྱད་ཆོས་དང་ཡོན་ཏན་ཡོད་པ་ལས་གཅིག་ཁོ་ན་ཡང་དག་ཡིན་གྱི་གཞན་རྣམས་དེ་ཙམ་མིན་སྙམ་པར་མི་བསམ་ཞིང་། རང་རང་གི་ཆོས་བརྒྱུད་ལྟར་འཚལ་ན་དེར་དགོས་པ་ཡོད་པར་ངེས། རང་ལུགས་ལ་བརྐྱངས་ཕྱག་དང་སྒུར་ཕྱག་གང་འཚལ་ཡང་། དང་པོ་རྟེན་གསུམ་གྱི་མདུན་དུ་རང་ཉིད་དམའ་བའི་སར་བསྡད་ཅིང་ལུས་ལ་སྒེག་ཆོས་མ་སྤྲས་ཀྱང་དྲི་མས་སྦག་པ་མ་ཡིན་པར་གཙང་སྦྲ་དང་བཅས་ཏེ། རྐང་བའི་ལོང་བུ་གཉིས་མཉམ་གཤིབས་ཀྱིས་རྟེན་ལ་ཁ་ཕྱོགས་ཏེ་དྲང་པོར་ཡར་ལང་ཞིང་། ལག་གཉིས་ཀྱི་ཐལ་མོ་ཁོག་སྟོང་མེ་ཏོག་གསར་བ་ཁ་ཕྱེ་མ་རག་པ་ཙམ་སྙིང་ཁར་སྦྱོར་དུས་གང་ལ་ཕྱག་འཚལ་བའི་ཡུལ་དཀོན་མཆོག་གསུམ་གྱི་ཡོན་ཏན་དྲན་དགོས། དེའང་རྒྱལ་སྲས་ཆེན་པོ་ཞི་བ་ལྷས། དུས་གསུམ་བཞུགས་པའི་སངས་རྒྱས་ཀུན། །ཆོས་དང་ཚོགས་ཀྱི་མཆོག་བཅས་ལ། །ཞིང་རྡུལ་ཀུན་གྱི་གྲངས་སྙེད་ཀྱིས། །ལུས་བཏུད་པས་ནི་བདག་ཕྱག་འཚལ། །ཞེས་གསུངས་པ་ལྟར་ཕྱོགས་བཅུའི་རྒྱ་བའི་ཞིང་ཁམས་མཐའ་ཡས་གྲངས་མེད་པ་རུ་འདས་པའི་དུས་སུ་བྱོན་ཟིན་པ་དང་། མ་འོངས་པའི་དུས་ན་འབྱོན་པར་འགྱུར་བ། ད་ལྟ་ཞིང་ཁམས་སོ་སོར་བཞུགས་བཞིན་པའི་སངས་རྒྱས་བཅོམ་ལྡན་འདས་རྣམས་དང་། གཞན་ཡང་ལུང་རྟོགས་དམ་པའི་ཆོས་དང་ཚོགས་མཆོག་དགེ་འདུན་དང་བཅས་པ་ལ། ཕྱག་འཚལ་མཁན་རང་གི་ལུས་ཕྱོགས་བཅུའི་འཇིག་རྟེན་ཁམས་སུ་རྡུལ་ཕྲ་རབ་ཇི་སྙེད་ཡོད་པ་དེ་སྙེད་ཀྱི་གྲངས་དང་མཉམ་པའི་མཐའ་ཡས་པར་བློས་སྤྲུལ་ཏེ། ལུས་བཏུད་པས་ནི་བདག་ཕྱག་འཚལ། །ཞེས་པ་ལྟར་ལུས་གུས་པས་ཐལ་མོ་གནས་གསུམ་དུ་གཏུག་ཅིང་མལ་ལྔ་ས་ལ་ཕབ། ངག་གུས་པའི་ཕྱག་འཚལ་བའི་ཚིག་འདོན། ཡིད་གུས་པས་དཀོན་མཆོག་གསུམ་གྱི་ཡོན་ཏན་དྲན་བཞིན་དུ་ཁྱེད་ཤེས་དང་བློ་གཏད་ཀྱི་ངང་ནས་ཕྱག་འཚལ་བར་བྱ། གཞན་དུ་ཁ་ཡེངས་མིག་ཡེངས་དང་ཅི་བསམ་འདི་དྲན་མེད་པར་ཕྱག་འཚལ་བ་དང་། ཡང་ན་རྣམ་རྟོག་ངན་པ་འདྲ་མིན་སྣ་ཚོགས་སེམས་ལ་ཤར་ཞིང་བློ་ལ་བཀོད་ནས་ཕྱག་ཁ་གྲངས་མང་པོ་འཚལ་བ་ལས་སེམས་གུས་པའི་སྒོ་ནས་ཕྱག་གཅིག་འཚལ་བ་ལ་ཕན་ཡོན་ཆེ་བར་གསུངས། མགོན་པོ་འོད་དཔག་མེད་གཅིག་ཉིད་མཆོག་གསུམ་ཀུན་འདུས་ཀྱི་ངོ་བོར་བསྒོམ་ཆོག་ལ། བླ་མའི་རྣལ་འབྱོར་དང་འབྲེལ་ནས་བླ་མ་དང་མགོན་པོ་འོད་དཔག་མེད་ཕྱོགས་བཅུའི་རྒྱལ་བ་ཀུན་གྱི་ངོ་བོར་གཅིག་ཏུ་བསྒོམ་ནའང་བྱིན་རླབས་ལ་མྱུར་ཁྱད་ཆེ། དེའང་ཐལ་མོ་སྤྱི་བོར་སྦྱར་དུས་ཐོག་མེད་ནས་བསགས་པའི་རང་གཞན་སེམས་ཅན་ཐམས་ཅད་ཀྱི་ལུས་སྒྲིབ་དག་ཅིང་ཕྱོགས་བཅུའི་སངས་རྒྱས་ཀྱི་སྐུའི་བྱིན་རླབས་ཐོབ་པར་བསམ། ཐལ་མོ་མགྲིན་པར་སྦྱར་དུས་ངག་གི་སྒྲིབ་པ་དག་ཅིང་གསུང་གི་བྱིན་རླབས་ཐོབ་པར་བསམ། ཐལ་མོ་སྙིང་ཁར་སྦྱར་དུས་ཡིད་ཀྱི་སྒྲིབ་པ་དག་ཅིང་ཐུགས་ཀྱི་བྱིན་རླབས་ཐོབ་པར་བསམ། མལ་ལྔའམ་ཡན་ལག་ལྔ་ས་ལ་ཕབ་དུས་རང་གཞན་སེམས་ཅན་ཐམས་ཅད་ཀྱི་ཉོན་མོངས་དུག་ལྔའི་སྒྲིབ་པ་དག་ཅིང་སྐུ་ལྔ་དང་ཡེ་ཤེས་ལྔའི་བྱིན་རླབས་ཐོབ་པར་བསམ་མོ། །ཕྱག་འཚལ་ཡུལ་ནི། ཇི་སྐད་དུ། བྱང་ཆུབ་སེམས་ཀྱི་གཞི་རྣམས་དང་། །མཆོད་རྟེན་ལའང་བདག་ཕྱག་འཚལ། །མཁན་པོ་དེ་བཞིན་སློབ་དཔོན་དང་། །བརྟུལ་ཞུགས་མཆོག་ལའང་ཕྱག་འཚལ་ལོ། །ཞེས་པའི་བྱང་ཆུབ་སེམས་ཀྱི་གཞི་ནི་སངས་རྒྱས་ཀྱི་སྐུ་གཟུགས་དང་ཐེག་པ་ཆེན་པོའི་སྡེ་སྣོད་ཀྱི་གླེགས་བམ་དང་། ཆོས་འཆད་ཉན་བྱེད་སའི་དགོན་སྡེའམ་ཆོས་འཁོར་ཆེན་པོའི་རྟེན་གཞི་དང་། མཆོད་རྟེན་ནི་བདེ་བར་གཤེགས་པའི་ཐུགས་ཀྱི་རྟེན་ནམ་གསང་བ་གསུམ་གཅིག་ཏུ་འདུས་པའི་རྟེན་ཁྱད་པར་ཅན་ཡིན་པས་དེ་དང་། གཞན་ཡང་སོ་ཐར་གྱི་སྡོམ་པ་ཞུ་ཡུལ་མཁན་པོ་དང་། མདོ་སྔགས་ཀྱི་ཆོས་སྟོན་པའི་སློབ་དཔོན་དང་། བརྟུལ་ཞུགས་མཆོག་སྟེ་སྟོན་པ་སངས་རྒྱས་ཀྱི་རྗེས་སུ་འཇུག་པའི་རྟགས་འཆང་ཞིང་ལས་བསླབ་འོས་ལ་སློབ་པའི་གང་ཟག་དང་། ཐ་ན་རྟགས་ཙམ་འཛིན་པར་ཕྱག་འཚལ་ཡང་འཚལ་མཁན་རང་ངོས་ནས་དད་ཅིང་དང་བས་སྟོན་པའི་རྗེས་འཇུག་དགེ་འདུན་ལ་འཚལ་བས་ན་ཕན་ཡོན་དཔག་ཏུ་མེད། དེང་སྐབས་དུས་ཀྱི་དབང་གིས་སེར་གོས་གྱོན་མི་མང་བས་ན། རྒྱ་གྲོང་གི་གྲོང་གསེབ་དང་ཐ་ན་ཆང་ཁང་དང་རྒྱན་པོ་འགྱེད་སར་ཡང་མཐོང་སྲིད་པའི་དུས་ཡིན་མོད། དད་པ་བྱེད་མཁན་རང་ངོས་ནས་ནང་བ་སངས་རྒྱས་པའི་ཆོས་སྒོར་ཞུགས་པ་ཞིག་ཡིན་ཕྱིན་སྟོན་པའི་མནབ་བཟའ་འཆང་བ་ཐམས་ཅད་ལ་ཞེ་ས་དང་གུས་པ་ཁྱད་མེད་བྱེད་དགོས། ཁྱིམ་གཅིག་གི་སྤུན་སྲིང་ཡིན་ཡང་གྲྭ་ཇོ་སེར་ལ་མི་སྐྱ་ཕོ་མོས་གུས་པ་བྱེད་དགོས་པར་མ་ཟད་གཏམ་ལ་ཞེ་ས་སྦྱར་དགོས། གཞན་ཕོ་མཆོག་མོ་དམན་གྱི་ཁྱད་པར་དེ་བས་ཀྱང་དབྱེ་ག་ལ་རུང་། དེ་ལྟར་མ་བྱས་ན་ཕ་རོལ་པོར་མི་གནོད་ཀྱང་རང་ཉིད་ཀྱི་བསོད་ནམས་ཉམས་པར་འགྱུར་རོ། །ཕྱག་འཚལ་བའི་ཡུལ་སྐུ་གསུང་ཐུགས་རྟེན་དངོས་སུ་མེད་ཀྱང་སངས་རྒྱས་ཀྱི་སྤྱན་གྱིས་སེམས་ཅན་ལ་ཉིན་མཚན་དུས་དྲུག་ཏུ་བརྩེ་བས་གཟིགས་པའི་ཕྱིར་རང་ལ་དད་པ་ཡོད་ན་ཐུགས་རྗེ་ལ་ཉེ་རིང་མ་མཆིས་ཏེ། དཔེར་ན། མེ་ལོང་དྭངས་བ་ལ་ཉི་མའི་གཟུགས་བརྙན་འཆར་ཞིང་། མེ་ལོང་མ་དྭངས་ན་གཟུགས་བརྙན་མི་འཆར་བ་དང། ཐག་རིང་ཐུང་ལ་མི་ལྟོས་པ་ས་གཞིའི་ངོས་ཀྱི་མེ་ལོང་དུ་ནམ་མཁའི་ཉི་མ་འཆར་བ་ལྟ་བུ། དད་པ་མེད་ན་སངས་རྒྱས་ཀྱིས་ཚུར་གཟིགས་ཀྱང་བྱིན་རླབས་ཐོབ་པར་དཀའོ། །ཕྱོགས་བཅུའི་སངས་རྒྱས་དང་མཐའ་ཡས་སེམས་ཅན་ཞེས་ངག་ནས་བརྗོད་པ་ཙམ་ལས་ཡིད་ལ་གསལ་བར་འཆར་མི་ནུས་སྙམ་ན། རྒྱ་གར་མི་གཅིག་ལྷ་གཅིག །བསམ་པ་ལྷ་གཅིག་མཐུ་གཅིག །ཅེས་པ་ལྟར་ལྷ་གཅིག་ལ་གསོལ་བ་བཏབ་ཅིང་། ལམ་གཅིག་ལ་རྡོག་པ་གཏད་དེ་མགོན་པོ་འོད་དཔག་མེད་ལ་རྩེ་གཅིག་གུས་པས་གསོལ་བ་བཏབ་ཀྱང་། གོང་སྨྲོས་བཞིན་གཅིག་པ་ཡིན། ཇི་སྐད་དུ། རྒྱལ་བ་གཅིག་གྲུབ་ཐམས་ཅད་མ་བསྒྲུབས་འགྲུབ། །ཅེས་གསུངས་པ་དང་། ཆགས་མེད་བདེ་སྨོན་དུ། ཆོས་སྐུ་འོད་དཔག་མེད། ཅེས་པ་ལྟར་འཕགས་པ་སྤྱན་རས་གཟིགས་དང་གུ་རུ་པདྨ་འབྱུང་གནས་དང་རྗེ་བཙུན་འཕགས་མ་སྒྲོལ་མ་སོགས་ཐམས་ཅད་ཀྱི་སྤྲུལ་གཞི་ནི་ཆོས་སྐུ་རྒྱལ་བ་མགོན་པོ་འོད་དཔག་མེད་ཡིན། དེ་བཞིན་ཆོས་ཀྱི་དབྱིངས་སུ་རྒྱལ་བ་ཐམས་ཅད་དབྱེར་མེད་གཅིག་པ་ཡིན། སྙིགས་མའི་དུས་ཀྱི་སྐྱབས་མགོན་མིའི་གཟུགས་སུ་བྱོན་པ་ཐམས་ཅད་རིགས་གསུམ་སེམས་དཔའ་དང་རྗེ་བཙུན་སྒྲོལ་མ་དང་གུ་རུ་པད་འབྱུང་སོགས་ཀྱི་སྤྲུལ་བ་མིན་པ་མེད་པ་ལྟ་བུར་གྱུར་ཡོད། ཀུན་མཁྱེན་འོད་དཔག་མེད་ཅེས་པ་དུས་དང་རྣམ་པ་ཐམས་ཅད་དུ་སེམས་ཅན་ཀུན་གྱི་ཅི་བསམ་གང་དྲན་དང་། ཅི་སྨྲས་གང་བཤད་། ཅི་བྱས་གང་སྒྲུབ་ཐམས་ཅད་མཁྱེན་པར་འགྱུར་བའི་ཕྱིར་དང་། གཞན་ཡང་འུ་བུ་ཅག་གིས་འཇིག་རྟེན་མི་ཡུལ་དུ་སྡིག་ཆེན་བསགས་པ་གསང་སྐོང་བྱེད་མོད་དུས་གསུམ་མཁྱེན་པའི་སངས་རྒྱས་དང་ལྷ་དང་དྲང་སྲོང་གྲུབ་པའི་མངོན་ཤེས་ཅན་རྣམས་ཀྱིས་གཟིགས་པར་འདུག མགོན་པོ་འོད་དཔག་མེད་ཁོང་གི་ཐུགས་རྗེ་སྤྱན་གྱིས་ཉིན་མཚན་དུས་དྲུག་ཏུ་སེམས་ཅན་ཀུན་ལ་རྟག་ཏུ་གཟིགས་ཤིང་། ཁྱད་པར་དུ་ན་བའི་བུ་ལ་མ་ཡིས་ལྷག་པར་བརྩེ་བ་བཞིན་དུ། སྙིགས་མའི་སེམས་ཅན་རྣམས་ལས་ངན་སྡིག་ཅན་ཡིན་པས་བརྩེ་བས་ལྷག་པར་དགོངས་ཤིང་དེ་དག་གི་སྐྱེ་བ་ཚེ་རབས་ཐམས་ཅད་ཀྱི་བདེ་སྡུག་མཁྱེན། འདྲེན་པ་འོད་དཔག་མེད་ཅེས་པ་ཆོས་སྤང་མཚམས་མེད་བྱས་པ་དང་གསང་སྔགས་ཀྱི་དམ་ཚིག་ཉམས་པའི་སེམས་ཅན་ཡིན་ན། ཉེས་ཅན་དཔོན་གྱིས་མི་ཁེབ། །སྡིག་ཅན་བླ་མས་མི་དྲང་། ཞེས་པ་ལྟར་སེམས་ཅན་གྱི་ལས་རྒྱལ་བའི་ཕྱག་གིས་ཀྱང་མ་ཁོག་མོད། དད་ཅིང་གུས་པས་ཐེ་ཚོམ་དང་བྲལ་བར་མགོན་པོ་འོད་དཔག་མེད་ལ་གསོལ་འདེབས་སྨོན་ལམ་བཏབ་ན། འཆི་ཁ་བར་དོ་སོགས་གང་རུང་ལ་འདྲེན་པ་འོད་དཔག་མེད་འཁོར་རྒྱལ་སྲས་བརྒྱད་དང་བཅས་པ་བྱོན་ནས་ལམ་སྣ་དྲངས་ཏེ་ཞིང་ཁམས་བདེ་བ་ཅན་དུ་འདྲེན་པར་འགྱུར། དེའི་རྒྱུ་མཚན་ནི་དང་པོ་ཐུགས་བསྐྱེད་པ་ནས་དམ་བཅའ་དང་སྨོན་ལམ་བཏབ་པའི་ཐུགས་དམ་ཞལ་བཞེས་དུས་ལ་བབ་པས་སོ། །སྔོན་གྱི་སྨོན་ལམ་ཐམས་ཅད་ཡོངས་སུ་གྲུབ་ཅིང་འཁོར་བྱང་ཆུབ་སེམས་དཔའ་དང་ཉན་ཐོས་ཀྱི་ཚུལ་བཟུང་བའི་ལྷ་མིའི་རྣམ་པ་ཅན་གྱི་གྲངས་ནི། འཕགས་པ་རྫུ་འཕྲུལ་ཆེན་པོ་དང་ལྡན་པ་བྱེ་བ་ཕྲག་ཁྲིག་གིས་ལོ་དུ་མར་གྲངས་སུ་བགྲང་ཡང་བགྲང་བར་མི་ནུས་ཞེས་གསུངས་པ་ལྟར། རང་རེའི་འཇིག་རྟེན་འདིའི་དུས་ངན་གྱི་སེམས་ཅན་དམྱལ་བར་ལྟུང་བ་མང་ཡང་འཇིག་རྟེན་གཞན་གྱི་སེམས་ཅན་དང་འཛམ་གླིང་ལས་ཀྱི་ས་བ་ནས་བདེ་བ་ཅན་དུ་སྐྱེ་བའི་གྲངས་མི་ཉུང་ངོ་། །མགོན་པོ་ཚེ་དཔག་མེད་ཅེས་པ་སེམས་ཅན་རྣམས་ཕྱི་མ་བདེ་བ་ཅན་དུ་སྐྱེ་བའི་སྔ་རོལ་གྱི་ཚེ་འདིར་ཡང་མི་འདོད་ཉེར་འཚེ་ཞི་ཞིང་ཚེ་བསོད་དབང་ཐང་རྒྱས་དགོས་ལ། དེ་ཉིད་ཚེ་རིང་བ་འདི་ལ་རག་ལས་པས་ཕུན་ཚོགས་ཐམས་ཅད་ཀྱི་གཞི་མ་ནི་ཚེ་སྲོག་བརྟན་ཞིང་ནད་མེད་ལང་ཚོ་རྒྱས་དགོས། ནད་དང་ན་ཚ་མི་འབྱུང་ཞིང་གློ་བུར་འཕྲལ་རྐྱེན་གྱིས་ཚེ་ལ་བར་ཆད་མི་ཡོང་བར་མགོན་པོ་ཚེ་དཔག་མེད་དམ་འོད་དཔག་མེད་ལ་གསོལ་བ་བཏབ་པ་ལས་ལྷག་པ་གང་ཡང་མེད། ནད་དང་ན་ཚ་འབྱུང་དང་མི་འབྱུང་། རྐྱེན་ངན་བར་ཆད་འབྱུང་དང་མི་འབྱུང་བརྟགས་པ་ལ་མོ་པ་བཟང་པོ་ཧ་ཅང་ཐིག་པོ་རེ་མ་རྙེད་ན། སྐུ་རིམ་བཅའ་བ་རང་གིས་བྲིས་ལ་བདེ་སྨོན་འདོན་ཞིང་འདོད་དོན་གསོལ་བ་རྩེ་གཅིག་ཏུ་ཐོབ་དང་མི་བསླུ་ངེས་པ་ཡིན། དེའི་ཕྱིར་བསླུ་མེད་བདེ་ལྡན་ཞིང་གི་མགོན་པོ་ཞེས་འདོན་པར་བྱེད་པའོ། །སངས་རྒྱས་འོད་དཔག་མེད་ཀྱི་ཐུགས་རྗེ་དང་རང་ཉིད་ཀྱི་དད་གུས་འདུན་པ་མི་ལྷོད་པའི་སྨོན་ལམ་གཉིས་ནང་འཛོམ་པའི་སྟོབས་ཀྱིས་བདེ་བ་ཅན་དུ་སྐྱེ་བར་ནུས་ཏེ། འཆི་རན་དུས་འབྱུང་བ་ཐིམ་རིམ་ཤར་ནས་སྔར་བྱས་སྡིག་པའི་སྟོབས་ཀྱིས་གཤིན་རྗེའི་འཇིགས་སྐྲག་སྐྱེ་བར་ཉེ་བ་ན། ངག་ནས་གསོལ་འདེབས་འདོན་པའི་ནུས་པ་མེད་ཀྱང་མགོན་པོ་འོད་དཔག་མེད་ཡིད་ལ་དྲན་ཙམ་གྱིས་དང་ཁོང་གི་ཐུགས་རྗེ་དུས་ལས་ཡོལ་བ་མི་སྲིད་པར་གསུངས་པས་ན། དེ་ཚེ་ཞལ་མཇལ་ཞིང་རང་ཉིད་ངན་སོང་དུ་སྐྱེ་བའི་སྡིག་སྒྲིབ་ཐམས་ཅད་དེ་མ་ཐག་དག་ནས་འཇའ་ལམ་དཀར་པོའི་དར་ཐག་བརྒྱུད་དེ་དར་དཀར་པོ་རླུང་གིས་བསྐྱོད་པ་བཞིན་བདེ་བ་ཅན་དུ་འགྲོ་བར་འགྱུར་བ་ལ་ཐེ་ཚོམ་མི་དགོས། དེ་ལྟ་བུའི་སྐྱབས་ཡུལ་ཀུན་འདུས་མགོན་པོ་འོད་དཔག་མེད་ལ་ཕྱག་འཚལ་བ་ནི་དུས་རྒྱུན་གྱི་ཉམས་ལེན་ལ་ཆག་མེད་དུ་འཛིན་དགོས། དེའང་བདེ་སྨོན་རྒྱས་པ་དག་བློར་མི་ཟིན་ཞིང་ཡིག་ངོ་མི་ཤེས་པ་རྣམས་ཀྱིས་ནི། མགོན་པོ་འོད་དཔག་མེད་ལ་ཕྱག་འཚལ་ལོ། །བདེ་བ་ཅན་དུ་སྐྱེ་བར་བྱིན་གྱིས་རློབས། །ཞེས་པ་སུས་ཀྱང་འདོན་ཤེས་པས་དེའི་གྲངས་གསོག་པའམ་ཡང་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ་མཆོད་དོ་སྐྱབས་སུ་མཆིའོ། །ཞེས་པའི་ངག་འདོན་དང་བསྡེབས་ནས་ཡིད་ལ་མགོན་པོ་འོད་དཔག་མེད་ཁྱེད་མཁྱེན། ཁྱེད་ལ་ཕྱག་འཚལ་ཞིང་གསོལ་བ་བཏབ་པས་སྐྱིད་སྡུག་ལེགས་ཉེས་ཅི་བྱུང་ཁྱེད་ལ་གཏད་པ་ཡིན། བདག་གཞན་འགྲོ་བ་སེམས་ཅན་ཐམས་ཅད་ཀྱི་སྡིག་སྒྲིབ་དག་ནས་བདེ་བ་ཅན་དུ་སྐྱེ་བར་ཤོག་ཅེས་བསམ་པར་བྱ། ཕྱག་འཚལ་བའི་ཕན་ཡོན་ལ་བསམ་ན། གལ་ཏེ་ཕྱག་ཚད་ལྡན་རེ་འཚལ་ནུས་ན་རང་གི་ལུས་ཀྱིས་ཁྱབ་པའི་ས་ཁྱོན་དབང་ཆེན་གསེར་གྱི་ས་གཞིར་མ་ཐུག་གི་བར་གྱི་རྡུལ་ཕྲ་རབ་ཇི་སྙེད་ཡོད་པའི་གྲངས་སྙེད་ཀྱི་འཁོར་ལོས་སྒྱུར་བའི་རྒྱལ་པོར་སྐྱེ་ནུས་པའི་བསོད་ནམས་ཐོབ་པར་གསུངས། དེ་བཞིན་ཐེག་ཆེན་སྦྱོར་དངོས་རྗེས་གསུམ་མམ་དམ་པ་གསུམ་གྱིས་རྩིས་ཟིན་པ་དང་། ཁྱད་པར་གསང་ཆེན་སྔགས་ཀྱི་རྣལ་འབྱོར་བསྐྱེད་རྫོགས་རྫོགས་ཆེན་ཉམས་སུ་ལེན་པའི་གནད་ཟིན་ཏེ། ངེས་དོན་འོད་དཔག་མེད་པ་སེམས་ཉིད་ཆོས་སྐུའི་རང་ཞལ་ནང་ནས་མཇལ་བའི་གདེང་དང་བཅས་ཕྱག་ལན་རེ་དང་གསོལ་འདེབས་ཚིག་རེ་འདོན་ཞིང་སྐད་ཅིག་རེར་ཐུགས་ཡིད་དབྱེར་མེད་དུ་བསྲེས་པའི་ཕན་ཡོན་བསམ་གྱིས་ག་ལ་ཁྱབ། དེ་ལྟར་ཕྱག་འཚལ་བའི་ཡན་ལག་བཤད་པ་ཡོངས་སུ་རྫོགས་སོ། །སང་ཉིན་མཆོད་པའི་ཡན་ལག་བཤད་པར་བྱའོ།།