ཉིན་གཉིས་པར་ཁྱིམ་པ་ཕོ་མོ་རྣམས་ལ་སྒོམ་རྒྱག་ཚུལ་སྨིན་ཁྲིད་གནང་བ།
དེ་རིང་མཚམས་འདིར་ཆུ་ཚོད་སྐར་མ་བཅུ་ལ་ཐམས་ཅད་ཀྱིས་མཉམ་དུ་བསྒོམ་རྒྱག དང་པོ་སྐར་མ་ལྔ་ཙམ་ལ་སངས་རྒྱས་འོད་དཔག་མེད་ཀྱི་སྐུའི་གསལ་སྣང་བསྒོམ། དེའང་འཕོ་བའི་དམིགས་རིམ་དང་མཚུངས་པར་རང་གི་སྤྱི་གཙུག་ཏུ་མགོན་པོ་འོད་དཔག་མེད་སྐུ་མདོག་དམར་པོ་པདྨ་ར་གཱའི་ལྷུན་པོ་ལ་ཉི་མ་བྱེ་བས་འཁྱུད་པ། ཞལ་གཅིག་ཕྱག་གཉིས་མཉམ་བཞག་གི་སྟེང་དུ་ལྷུང་བཟེད་བདུད་རྩིས་གང་བ་བསྣམས་པ། སྐུ་ལ་ཆོས་གོས་རྣམ་གསུམ་གསོལ་ཞིང་མཚན་བཟང་པོ་སོ་གཉིས་དང་དཔེ་བྱད་བརྒྱད་ཅུས་སྤྲས་པ། འོད་དང་འོད་ཟེར་ཕྱོགས་བཅུ་མུ་མེད་དུ་འཕྲོ་བ་ཞིག་བསྒོམ། དེའང་དང་པོ་རང་གི་ལུས་ཀྱི་འདུག་སྟངས་ནི་ཁ་སང་བསླབ་པ་ཇི་བཞིན་རྣམ་སྣང་ཆོས་བདུན་བྱ། མགོན་པོ་འོད་དཔག་མེད་ལ་མོས་གུས་དུང་ངེ་བ། ཁ་ཙམ་ཚིག་ཙམ་མ་ཡིན་པའི་ཟོལ་མེད་ཀྱི་དད་པ་སྐྱེད་བཞིན་བསྒོམ། དེ་ལ་གསལ་སྣང་ཅུང་ཟད་ཐོབ་ཚེ་འོད་ཟེར་སྤྲོ་བསྡུའི་དམིགས་རིམ་དང་བཅས་ཏེ་བསྒོམ་པར་བྱ། ཆུ་ཚོད་སྐར་མ་ལྔའི་ཡུན་ལ་མགོན་པོ་འོད་དཔག་མེད་ཀྱི་སྐུའི་གསལ་སྣང་དང་འོད་ཟེར་སྤྲོ་བསྡུ་བསྒོམ་མི་ནུས་པ་དག་གིས་ནི། སངས་རྒྱས་འོད་དཔག་མེད་ཀྱི་སྐུ་གསུང་ཐུགས་ཀྱི་གསང་བ་གསུམ་མཚོན་པའི་འོད་ཀྱི་ཐིག་ལེའམ་འོད་ཀྱི་གོང་བུ་དམར་སེར་འོད་འཕྲོ་བ་ཞིག་སྤྱི་བོའི་གཙུག་ཏུ་ཡོད་པར་བསྒོམ་ཞིང་། དེ་ལས་འོད་འཕྲོས་པས་སངས་རྒྱས་མཆོད། ཚུར་བསྡུ། སླར་ཡང་འོད་ཟེར་འཕྲོས་པས་སེམས་ཅན་གྱི་སྡིག་སྒྲིབ་སྦྱངས་པར་བསམ་པའི་དམིགས་པ་ལ་རྩེ་གཅིག་ཏུ་འཇོག དེ་ལྟར་འདིར་འདུས་ཐམས་ཅད་ཀྱིས་བློ་སེམས་རྩེ་གཅིག་དང་སྒོ་གསུམ་ཆིག་དྲིལ་གྱིས་ཆུ་ཚོད་སྐར་མ་ལྔ་ལ་བསྒོམ་པར་བྱ། དེ་ཙམ་གྱིས་སྐར་མ་ལྔ་ལོན་བྱུང་། དེའང་སངས་རྒྱས་ཀྱི་སྐུ་གཟུགས་བསྒོམ་དུས་ལི་དང་ཟངས་སོགས་ཀྱི་བླུགས་པའི་སྐུ་འདྲ་ལྟ་བུའི་སྲ་བ་དང་ཐང་གའི་ངོར་བྲིས་པ་ལྟ་བུའི་ལེབ་མོ་མ་ཡིན་པ། ཤ་ཁྲག་གིས་གྲུབ་པའི་མི་ལུས་ཇི་བཞིན་མི་གཙང་བའང་མ་ཡིན་ནོ། །དེའང་འོད་ཀྱི་ལུས་ལ་ཡེ་ཤེས་ཀྱི་སྙིང་པོ་ཅན་ཡིན་གྱི་འཇའ་ཚོན་ཇི་བཞིན་སྲོག་དང་བྲལ་བའང་མ་ཡིན། འོད་ཀྱི་གོང་བུར་བསྒོམ་པ་གལ་ཆེ་སྟེ། དེ་ཐོགས་རེག་དང་འཛིན་པར་མི་ནུས་པས་སྣང་ལ་རང་བཞིན་མེད་པའི་དོན་དང་མཐུན། དེ་ལྟར་སྣང་ལ་རང་བཞིན་མེད་པར་བློ་གོམས་པས་ནམ་ཞིག་སྣང་ལ་རང་བཞིན་མེད་པའི་དོན་མངོན་དུ་འགྱུར་ཞིང་། རང་སེམས་མགོན་པོ་འོད་དཔག་མེད་ཀྱི་ཐུགས་དང་འདྲེས་ཚེ་རང་གི་ལུས་ངག་ཡིད་གསུམ་ཡང་མགོན་པོ་འོད་དཔག་མེད་ཀྱི་སྐུ་གསུང་ཐུགས་གསུམ་དང་དབྱེར་མེད་དུ་འདྲེས་པ་ཡིན། དེ་ལྟར་རང་དང་མགོན་པོ་འོད་དཔག་མེད་དབྱེར་མེད་དུ་བསྲེ་བའི་ཆེད་དུ། རང་གིས་མགོན་པོ་འོད་དཔག་མེད་བསྒོམ་ཞིང་གོམས་ཏེ་ནམ་ཞིག་རང་ཉིད་མགོན་པོ་འོད་དཔག་མེད་དུ་འགྱུར་བ་ལ་བསམ་བློ་གཏོང་དགོས་སོ། །དེ་ལྟར་དམིགས་བཅས་མཚན་མ་ཅན་ལྷའི་ཞལ་ཕྱག་དང་བཅས་པ་བསྒོམས། དེ་རྗེས་སྤྱི་བོའི་གཙུག་གི་མགོན་པོ་འོད་དཔག་མེད་སྐྱབས་ཡུལ་ཀུན་འདུས་ཀྱི་ངོ་བོ་དྲིན་ཆེན་རྩ་བ་དང་བརྒྱུད་པར་བཅས་པའི་བླ་མ་དང་དབྱེར་མེད་དེ་ཉིད་འོད་དུ་ཞུ་བའམ་འོད་ཟེར་དམར་པོ་ཞིག་ཏུ་གྱུར་ཏེ་རང་ལ་ཐིམ་པར་བསྒོམ། དེ་དང་མཉམ་དུ་རང་གི་སེམས་ཉིད་རིགས་ཁམས་བདེ་བར་གཤེགས་པའི་སྙིང་པོ་སྟེ། དེའང་སྤྱིར་སེམས་ཞེས་བྱ་བ་མི་དྲན་དགུ་དྲན་ཆུ་ཡི་གཉེར་མ་ཇི་བཞིན་གཅིག་རྗེས་གཅིག་མཐུད་དུ་འཕྲོ་བ་ཟད་དུས་མེད་པ་འདི་ནི་འཁྲུལ་བ་ཡིན་ལ། དེ་ལྟའི་འཁྲུལ་བ་ནི་གང་ལས་བྱུང་ཟེར་ན་མ་འཁྲུལ་བ་ལས་བྱུང་། དཔེར་ན། ཆུ་ཡི་གཉེར་མ་དང་རྦ་རླབས་ནི་རྒྱ་མཚོ་ལས་བྱུང་། རླབས་དང་རྙོག་མ་བྲལ་ཞིང་དྭངས་ཤིང་གསལ་བའི་རྒྱ་མཚོ་གཡོ་མེད་དུ་གནས་པ་ལྟ་བུའི་སེམས་ཀྱི་འཁྲུལ་བ་ཡོངས་སུ་བྲལ་བའི་སེམས་ཉིད་ཀྱི་ངོ་བོ་ནི་རིགས་ཁམས་བདེ་གཤེགས་སྙིང་པོའོ། །དེ་ནི་སེམས་ཅན་ཐམས་ཅད་ཀྱི་རྒྱུད་ན་ཡོད་པས་འུ་ཅག་གིས་སངས་རྒྱས་བསྒོམ་ན་འགྲུབ་པ་ཡིན་གྱི། དེ་ཉིད་མེད་ན་རྡོ་ས་འོག་ཏུ་སྦས་པས་ནས་ཀྱི་མྱུ་གུ་མི་སྐྱེ་བ་བཞིན་ཡིན་མོད། ནས་ཀྱི་ས་བོན་ཡོད་ན་དེ་ལ་ཆུ་ལུད་དྲོད་གཤེར་འཛོམ་པས་དེའི་མྱུ་གུ་སྐྱེ་བ་ལྟར། རང་རེ་ལ་སངས་རྒྱས་ཀྱི་རིགས་ཁམས་བདེ་གཤེགས་སྙིང་པོས་ཁྱབ་པས་ན་འཕྲལ་གྱི་སྒྲིབ་པ་དག་ཙམ་གྱིས་ནོར་བུའི་རང་མདངས་མངོན་པ་ལྟར་སངས་རྒྱས་འགྲུབ་པའོ། །དཔེར་ན། ནོར་བུ་རིན་པོ་ཆེ་གད་སྙིགས་སུ་དོར་བ་ལ་རྡུལ་གྱི་དྲི་མས་གོས་པ་སེལ་བ་ན་ནོར་བུའི་རང་མདངས་མངོན་པ་བཞིན། རིགས་ཁམས་བདེ་གཤེགས་སྙིང་པོ་ཡེ་ནས་དག་པ་མངོན་དུ་གྱུར་ཚེ་རང་སེམས་དང་མགོན་པོ་འོད་དཔག་མེད་ཀྱི་ཐུགས་དབྱེར་མེད་དུ་འདྲེས་པ་ཡིན་པས་དེའི་ཕྱིར་རང་རེས་ཆོས་སྒྲུབ་པ་ཡིན། དེ་ལྟར་འོད་ཟེར་དམར་པོ་རང་ལ་ཐིམ་རྗེས་སྟོང་ཞིང་གསལ་ལ་གསལ་ཞིང་སྟོང་པ། སྟོང་གསལ་སྒྲིབ་གཡོག་དང་བྲལ་བ། སྣང་སྟོང་དབྱེར་མེད་པ། གདོས་བཅས་དངོས་པོ་རགས་པ་ལྟར་བདེན་པར་མ་གྲུབ་པ་དང་རྣམ་རྟོག་གིས་མ་བསླད་པར་གནས། དེ་ལྟར་དམིགས་མེད་མཚན་མ་བྲལ་བའི་ངང་དུ་ཆུ་ཚོད་སྐར་མ་ལྔ་ཙམ་ལ་མཉམ་པར་འཇོག དེ་ཙམ་གྱིས་ཆུ་ཚོད་སྐར་མ་ལྔ་ལོན་བྱུང་། སྒོམ་མཉམ་བཞག་ལ་གོམས་ནས་ཅུང་ཟད་བརྟན་ཆ་ཐོབ་ནས་ཆུ་ཚོད་སྐར་མ་ལྔ་དང་བཅུ་ཙམ་ཇི་ལྟར་འདས་པའང་མི་ཚོར། ཅི་ཡང་མི་ཚོར་བར་ཆུ་ཚོད་གཉིས་གསུམ་རེའི་རྗེས་སུ་མཉམ་བཞག་ལས་ལྡང་བའང་འབྱུང་ལ། དེ་དུས་ཉམས་ལེན་གྱི་བོགས་འདོན་མན་ངག་སྣ་ཚོགས་པ་ཡོད། འགའ་ཞིག་རང་ཉིད་འཆི་བའི་དུས་སུ་ལམ་སྣ་འདྲེན་བྱེད་ཀྱི་གདམ་ངག་དངོས་ནི་འདི་ཡིན་འདུག་མོད་ད་ལྟ་གལ་ཆེའམ་སྙམ་ན། སྐྱིད་སྡུག་གི་རྣམ་གྲངས་ཅི་བྱུང་ཡང་འདིའི་ངང་དུ་སྡོད་དང་སྐུ་རིམ་བཅའ་བ་གང་འདྲ་བསྒྲུབ་ཀྱང་འདི་ལས་ལྷག་པ་མེད། སྐུ་རིམ་བཅའ་བ་ཆེན་པོ་སྒྲུབ་པ་རྒྱུ་ཡོད་ནུས་ཡོད་ཀྱིས་འགྲུབ་པ་ལས་གཞན་གྱིས་དེ་འདྲ་དཀའ་ནའང་། འདི་ནི་རིགས་ཁམས་བདེ་གཤེགས་སྙིང་པོ་ཀུན་ལ་ཁྱབ་མཉམ་དུ་ཡོད་པས་སུས་ཀྱང་སྒྲུབ་ཆོག སངས་རྒྱས་རང་ལག་ཏུ་ཡོད་པས་འགྲུབ་མིན་རང་རང་ལ་ཐུག་ཡོད། གཞན་ཡང་དེ་ལྟར་སྒོམ་ལ་གནས་པ་ན་རྣམ་རྟོག་མང་དུ་འཕྲོ་བས་སྒོམ་པར་མི་ནུས་སྙམ་དུ་མི་བསམ་སྟེ། རྣམ་རྟོག་འཆར་བ་སྨྲོས་ཅི་དགོས་མི་གསོན་པོ་ལ་རྣམ་རྟོག་འཆར་ངེས་མོད། ཤར་བ་ལ་བྲེལ་འཚུབ་མི་དགོས་ཏེ་ཁོ་རང་ཤར་དུ་ཆུག ཡལ་དུ་ཆུག མེད་དུ་ཆུག ཤར་བ་རང་སར་ཡལ་བར་འགྱུར་ཏེ། རྣམ་རྟོག་ལ་བདག་ཏུ་མ་བཟུང་ན་རང་སར་ཡར་བར་ངེས་མོད། དེ་ལ་བདག་པོ་བྱས་ནས་རྗེས་སུ་འབྲང་ན་རྣམ་རྟོག་གཅིག་རྗེས་གཉིས་མཐུད་ཀྱིས་འཕྲོས་ཏེ། ཆགས་སྡང་རྨོངས་གསུམ་སོགས་སྣ་ཚོགས་པ་དྲན་ཡོང་། དེ་ལྟར་རྣམ་རྟོག་ལ་བདག་པོ་མི་བྱ་བར་སྔར་གྱི་བསྒོམ་བྱ་རིགས་ཁམས་བདེ་གཤེགས་སྙིང་པོ་སྟོང་གསལ་འདུས་མ་བྱས་པའི་ངང་དུ་ཧ་ལམ་བཞག་ཡོད་སྙམ་ནས་སྡོད་དང་དེས་ཀྱང་ཆོག དེའང་ཧ་ཅང་སྒྲིམ་ཆེས་པ་གཟབ་ནན་ཅི་ཡང་མི་བྱ་ཞིང་། ཧ་ཅང་ལྷོད་ཆེས་པ་དུས་རྒྱུན་ལྟར་འཁྲུལ་བའི་དབང་དུའང་མི་བཏང་ངོ་། །ལུས་སེམས་གཉིས་ཀ་ལྷོད་དེ་སྡོད་པ་ནི་སྒོམ་སྐྱོན་མེད་ཀྱི་མན་ངག་ཡིན། སྒོམ་སྐྱོན་སེལ་བར་མགོན་པོ་འོད་དཔག་མེད་དང་རྩ་བའི་བླ་མ་དབྱེར་མེད་ལ་གསོལ་བ་འདེབས་དགོས། གཞན་ཡང་བསྐྱེད་ཆོག་མི་ཤེས་པ་རྣམས་ཀྱིས་སེམས་ཅན་ཐམས་ཅད་ཀྱི་དོན་དུ་སེམས་བསྐྱེད་པ་སྔོན་དུ་འགྲོ་བའི་སྒོ་ནས་མགོན་པོ་འོད་དཔག་མེད་ལ་མོས་གུས་གདུང་ཤུགས་དྲག་པོ་དང་བཅས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ། མཆོད་དོ། སྐྱབས་སུ་མཆིའོ། །ཞེས་པ་འདོན། དེ་མིན་རྫི་བོར་འགྲོ་བ་དང་ལས་ཀ་བྱེད་པའི་ཚེ་ནའང་ཆུ་ཚོད་སྐར་མ་བཅུ་ཙམ་རེར་གང་དུའང་ངལ་གསོས་ཆོག་པས་དེ་ལྟར་བསྒོམ་ན་ལུས་ཀྱིས་ངལ་གསོས་པར་མ་ཟད་སེམས་ཀྱང་ངལ་གསོས་པ་ཡིན། དེ་ལྟར་མཉམ་བཞག་ཅི་ཡང་མི་དམིགས་པ་ལས་ལྡང་བའི་རྗེས་ཐོབ་ཐུན་མཚམས་སུ། སྔར་གྱི་མི་དེ་མིན་པ་ལྟར་སྨྱོ་བར་མི་བྱ་བར་གང་སྣང་བའི་ཆོས་ཐམས་ཅད་སྒྱུ་མ་བཞིན་སྣང་ལ་རང་བཞིན་མེད་པའི་ངེས་ཤེས་དང་བཅས་ཏེ། དེ་ཉིད་མངོན་དུ་མ་གྱུར་པར་ཀུན་རྫོབ་སྒྱུ་མ་ལྟ་བུའི་ཚོགས་བསག་དང་། ལས་འབྲས་བསླུ་བ་མེད་པ་ཕྲ་ཞིང་ཞིབ་པར་སྲུང་ཞིང་རྟག་པར་བྱམས་སྙིང་རྗེ་བྱང་ཆུབ་ཀྱི་སེམས་དང་མ་བྲལ་བ་བྱ་དགོས་སོ། །དེ་ལྟར་ཆོས་འཆད་ཉན་སྒོམ་སྒྲུབ་བྱས་པའི་དགེ་བའི་རྩ་བ་འདིས་མཚོན་ནས་རང་གཞན་གྱིས་དུས་གསུམ་བསགས་པའི་དགེ་རྩ་གཅིག་ཏུ་བསྡུས་ཤིང་བསྡོམས་ནས་ཀུན་མཁྱེན་རྒྱལ་བའི་བསྟན་པ་རིན་པོ་ཆེ་ཕྱོགས་དུས་ཀུན་ཏུ་དར་ཞིང་རྒྱས་ལ། བསྟན་འཛིན་གྱི་སྐྱེས་བུ་གང་ན་སུ་བཞུགས་ཐམས་ཅད་སྐུའི་ཚེ་ཞབས་པད་བརྟན་ཞིང་། དགེ་འདུན་གྱི་སྡེ་ཐམས་ཅད་ཐུགས་མཐུན་ཁྲིམས་གཙང་བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཐམས་ཅད་བདེ་སྐྱིད་རྫོགས་ལྡན་ཀྱི་དཔལ་ལ་ལོངས་སྤྱོད་དེ། མཐར་ཐུག་སེམས་ཅན་ཐམས་ཅད་བླ་མེད་རྫོགས་པའི་བྱང་ཆུབ་ཀྱི་གོ་འཕང་ལ་འགོད་པའི་ཕྱིར་རྗེ་བཙུན་འཇམ་པའི་དབྱངས་དང་འཕགས་པ་ཀུན་ཏུ་བཟང་པོ་སོགས་ཀྱིས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་ཟབ་མོ་གནང་བར་ཞུ། བསོད་ནམ་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆིའི་རྦ་ཀློང་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །འཇམ་དཔལ་དཔའ་བོས་ཅི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་དུ། །དེ་དག་ཀུན་གྱི་རྗེས་སུ་བདག་སློབ་ཕྱིར། །དགེ་བ་འདི་དག་ཐམས་ཅད་རབ་ཏུ་བསྔོ།།