བླ་མའི་གསོལ་འདེབས་བྱིན་རླབས་ཆར་འབེབས། བླ་མ་ཀ་ལུས།
བླ་མའི་གསོལ་འདེབས་བྱིན་རླབས་ཆར་འབེབས་བཞུགས་སོ། །ན་མོ་གུ་རུ་བྷྱ། རྟེན་འབྲེལ་མ་འགག་གཟུགས་སྣང་སྣ་ཚོགས་ཀྱི། །སྣང་བ་བརྡ་ཡི་བླ་མ་ཕྱི་ནང་ཤར། །སྒྱུ་འཕྲུལ་བཀོད་པའི་རོལ་པ་བརྗོད་ལས་འདས། །སྣང་སྟོང་རང་གྲོལ་ངང་ནས་གསོལ་བ་འདེབས། །རྩལ་སྣང་སྤྲུལ་སྐུར་རྟོགས་པར་བྱིན་གྱིས་རློབས། །རྒྱུ་རྐྱེན་མ་འགག་སྒྲ་སྐད་སྣ་ཚོགས་ཀྱི། །གྲགས་པ་སྔགས་ཀྱི་བླ་མ་བར་ནས་ཤར། །སྙན་འཇེབས་གླུ་ཡི་ཟློས་གར་བསམ་མི་ཁྱབ། །
གྲགས་སྟོང་རང་གྲོལ་ངང་ནས༴ །མ་འགགས་ལོངས་སྐུར་རྟོགས་པར་བྱིན༴ །རིག་སྟོང་བརྗོད་བྲལ་དྲན་རྟོག་སྣ་ཚོགས་ཀྱི། །རང་རིག་དོན་གྱི་བླ་མ་ནང་ནས་འཆར། །དྲན་རྟོག་ཡིད་ཀྱི་བཀོད་པ་འབྱམས་སུ་ཀླས། །གསལ་སྟོང་བདེ་ཆེན་ངང་ནས་གསོལ་བ༴ །སྐྱེ་མེད་ཆོས་སྐུར་རྟོགས་པར་བྱིན༴ །འདི་ལྟར་སྣང་གྲགས་རྟོག་ཚོགས་ཆོས་རྣམས་ཀུན། །བདག་སོགས་གནས་ལུགས་རྟོགས་པའི་བརྡ་ཐབས་སུ། །དཔལ་ལྡན་བླ་མའི་རོལ་པ་གཅིག་པུ་ཉིད། །བཀའ་དྲིན་རྗེས་དྲན་ངང་ནས་གསོལ་བ་འདེབས། །ཆོས་ཀུན་གནས་ལུགས་རྟོགས་པར་བྱིན་གྱིས༴ །རབ་འབྱམས་རྩ་གསུམ་རྒྱ་མཚོའི་ཚོགས་རྣམས་ཀུན། །གང་འདུལ་མོས་ངོར་ཆུ་ཟླའི་
རོལ་གར་སུ། །རྗེ་བཙུན་བླ་མ་ཉིད་ལས་མ་འདས་པས། །ཡོན་ཏན་ཀུན་རྫོགས་ངང་ནས་གསོལ་བ༴ །ཐུགས་ཡིད་དབྱེར་མེད་འདྲེས་པར་བྱིན་གྱིས༴ །བདག་འཛིན་བློ་ཡིས་ཐོང་བར༴ །དགོས་མེད་རྒྱུད་ལ་སྐྱེ་བར་བྱིན་གྱིས༴ །བྱམས་དང་སྙིང་རྗེ་འབྱོངས་པར༴ །བཅོས་མིན་མོས་གུས་སྐྱེ་བར༴ །ཆོས་མིན་རྣམ་རྟོག་འགག་པར༴ །འཁྲུལ་པ་རང་སར་ཞི་བར༴ །ཕྱག་ཆེན་གནས་ལུགས་རྟོགས་པར༴ །ཚེ་གཅིག་སངས་རྒྱས་ཐོབ་པར་བྱིན་གྱིས་རློབས། །འདི་ནས་བཟུང་སྟེ་བྱང་ཆུབ་མ་ཐོབ་བར། །ཚུལ་ཁྲིམས་རྣམ་པར་དག་པའི་རྒྱན་སྤྲས་ཤིང་། །མཉམ་ཉིད་བྱང་ཆུབ་སེམས་ལ་དབང་འབྱོར་ནས། །བསྐྱེད་
དང་རྫོགས་པའི་རིམ་པ་མཐར་ཕྱིན་ཏེ། །སྟོན་འཁོར་དགོངས་པ་དབྱེར་མེད་འཚང་རྒྱ་ཤོག །ཅེས་པའང་སྒྲུབ་བརྩོན་བླ་མ་ཀརྨ་ཤེས་རབ་ནས་བསྐུལ་བའི་ངོར། སྣང་སྲིད་བླ་མར་འཆར་བའི་གདུང་དབྱངས་ཐལ་བྱུང་དུ་ཀརྨ་རང་བྱུང་ཀུན་ཁྱབ་ནས་སྨྲས་པ་དཔལ་ལྡན་བླ་མའི་བྱིན་རླབས་སྙིང་ལ་འཇུག་པའི་རྒྱུར་གྱུར་ཅིག། ༈ །།དུས་གསུམ་རྒྱལ་བ་སྲས་བཅས་འདུས་པའི་སྐུ། །བདག་སོགས་འགྲོ་བ་མ་ལུས་འདྲེན་པའི་དཔལ། །བཀའ་དྲིན་མཚུངས་མེད་རྩ་བའི་བླ་མ་ལ། །སྙིང་ཁོང་རུས་པའི་སྟེང་ནས་གསོལ་བ་འདེབས། །བྱམས་དང་སྙིང་རྗེ་བྱང་ཆུབ་སེམས་འབྱོངས་ཤིང་། །གནས་ལུགས་རང་ཞལ་མཐོང་བར་བྱིན་གྱིས་རློབས། །ཅེས་སློབ་བུ་བརྩོན་འགྲུས་ངོར། བླ་མ་ཀ་ལུས་སྨྲས་སོ།། །།