ཆགས་མེད་རི་ཆོས་ནས་ཁོལ་དུ་ཕྱུང་བ། དགེ་སློང་རཱ་ག་ཨ་སྱེ།
ཆགས་མེད་རི་ཆོས་ནས་ཁོལ་དུ་ཕྱུང་བ་ནི། རང་ཉིད་ལྷ་གསལ་ཐུགས་ཀ་ནས། །འོད་ཟེར་ལྕགས་ཀྱུ་ལྟ་བུ་འཕྲོས། །ཤར་ལྷོའི་དུར་ཁྲོད་བསིལ་བའི་ཚལ། །ཙནྡན་ཤིང་གི་སྡོང་པོའི་རྩེར། །ཕྱག་དྲུག་མགོན་པོ་བཞུགས་པ་སྟེ། །སྤྱན་དྲངས་མདུན་དུ་བཞུགས་པར་བསྒོམས། །མགོན་པོའི་སྤྱི་བོར་མི་བསྐྱོད་པ། །དབང་རྟགས་རང་ཆས་བཞུགས་པ་དེའི། །སྐུ་ལས་འོད་ཟེར་སྔོན་པོ་འཕྲོས། །ཚེ་འདས་སྡིག་སྒྲིབ་སྦྱོང་བར་བསྒོམ། །བླ་མ་མགོན་པོ་དབྱེར་མེད་ལ། །ཚེ་འདས་གུས་པས་སྐྱབས་སུ་མཆི། །འབྲེལ་ཐོག་ཚེ་འདས་ཐམས་ཅད་ཀྱི། །རིགས་དྲུག་སྐྱེ་སྒོ་བཅད་དུ་གསོལ། །བདེ་བ་ཅན་དུ་ལམ་སྣ་དྲངས། །དེ་ལྟར་ངག་གམ་ཡིད་ཀྱིས་ཀྱང་། གསོལ་བ་བཏབ་པས་
མགོན་པོ་ཡི། །ཕྱག་དྲུག་རིགས་དྲུག་སྐྱེ་སྒོ་བཅད། །རང་འདྲའི་སྤྲུལ་པ་དཔག་མེད་ཀྱི། །ཧཱུྃ་ཕཊ་ཌཱ་རུའི་སྒྲ་བསྒྲགས་པས། །ཐར་པ་ཐོབ་ཏུ་མི་འཇུག་པའི། །གཤེད་དང་ལན་ཆགས་ཟ་འདྲེ་རྣམས། །གླིང་བར་མུན་པའི་ནང་དུ་བྲོས། །འབྲེལ་ཐོག་ཚེ་འདས་ཐམས་ཅད་ནི། །ཕྱག་གཡོན་ཞགས་པས་རྐེ་ནས་བཏགས། །རང་དབང་མེད་པར་ཁྲིད་ནས་ཀྱང་། །མགོན་པོའི་ཚོགས་རྣམས་ཐམས་ཅད་ཀྱིས། །འབྲེལ་ཐོག་ཚེ་འདས་ཐམས་ཅད་ཁྱེར། །བྱ་ཁྱུ་འབྲོག་ནས་འཕུར་བ་ལྟར། །བདེ་བ་ཅན་དུ་གཤེགས་པར་བསྒོམ། །ཨོཾ་བཛྲ་མ་ཧཱ་ཀཱ་ལ་ཀྵིཾ་ཀྵེ་ཏྲ་བིགྷྣན་བི་ན་ཡ་ཀ་ཧཱུྃ་ཧཱུྃ་ཕཊ། འབྲེལ་ཐོག་ཚེ་འདས་ཐམས་ཅད་ཨོཾ་པདྨེ་པདྨེ་པདྨ་སཾ་བྷ་ཝེ་མ་ཧཱ་སུ་ཥ་ཝ་ཏི་གཙྪནྟུ་སྭཱ་ཧཱ། མགོན་པོའི་ལས་ཚོགས་ལས་བྱུང་བའི། ཅུང་ཞིག་གསལ་བ་བྱས་འདི། དགེ་སློང་རཱ་ག་ཨ་སྱེ་བྲིས།། །།