མཁའ་སྤྱོད་མ་དཀར་མོའི་སྒྲུབ་སྐོར་ཚང་མ། དཱི་པཾ་ཀ་ར་ཤྲཱི་ཛྙཱ།
མཁའ་སྤྱོད་མ་དཀར་མོའི་སྒྲུབ་སྐོར་ཚང་མ་བཞུགས། །
ན་མོ་གུ་རུ། མཁའ་སྤྱོད་མའི་དབང་ནི། །དཀྱིལ་འཁོར་ཆོས་འབྱུང་དཀར་པོ་རྐྱང་པའི་སྟེང་དུ་གཏོར་མ་གཅིག་མཁའ་སྤྱོད་མར་བསྐྱེད་ལ། སྐྱབས་སུ་འགྲོ་བ་དང་། །སེམས་བསྐྱེད་པ་སོགས་སྔོན་དུ་འགྲོ་བའི་ཆོས་རྣམས་བྱས་ལ། ལུས་དང་ལོངས་སྤྱོད་ཕུལ་ལ། དབང་བཞི་རྫོགས་སུ་བསྐུར་བར་གསོལ་བ་གདབ། མཁའ་སྤྱོད་མའི་སྐུ་གསུང་ཐུགས་ལས། འོད་ཟེར་
དཀར་དམར་མཐིང་གསུམ་འཕྲོས། སངས་རྒྱས་བྱང་ཆུབ་སེམས་དཔའ་ཐམས་ཅད་མཆོད་པས། སྐུ་གསུང་ཐུགས་ཀྱི་ཡོན་ཏན་ཐམས་ཅད་འོད་ཟེར་དཀར་དམར་མཐིང་གསུམ་དུ་བྱོན་ནས། གནས་གསུམ་དུ་ཐིམ་ནས། མཁའ་སྤྱོད་མའི་སྨིན་མཚམས་ནས་འོད་ཟེར་དཀར་པོ་བྱུང་། རང་གི་སྨིན་མཚམས་སུ་ཐིམ། ལུས་ཀྱི་དྲི་མ་དག །བུམ་པའི་དབང་ཐོབ། དེ་བཞིན་དམར་བས་
ངག་གི་སྡིག་པ་དག །གསང་བའི་དབང་ཐོབ། མཐིང་ཀས་ཡིད་ཀྱིས་སྡིག་པ་དག །ཤེས་རབ་ཡེ་ཤེས་ཀྱི་དབང་ཐོབ། དེ་ནས་སེམས་མ་བཅོས་པའི་ངང་ལ་དར་ཅིག་བཞག་པ་ནི་དབང་བཞི་པའོ། །དེ་ནས་གཏོར་མ་སློབ་མའི་སྤྱི་བོར་བཞག་པས་མཁའ་སྤྱོད་མ་ཐིམ་པར་བསམ། དེ་ནས་ཚོགས་ལ་རོལ་ལོ། རྗེས་ཀྱི་ཆོས་རྣམས་བྱའོ། །རྒྱ་གར་སྐད་དུ། བཛྲ་ཧྲཱི་ཡོ་གི་ནཱི། བོད་སྐད་དུ། རྡོ་རྗེ་རྣལ་འབྱོར་མའི་སྒྲུབ་ཐབས། རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། དོན་མེད་བདག་ལ་གནོད་པའི་བྱ་བ་ཀུན་སྤངས་ནས། །མཁའ་དབྱིངས་དག་ནས་ཧྲཱི་ཡིག་འཕྲོ་འདུ་ལས། །གར་གྱི་ཉམས་ངལ་བ་པའི་སྒོ་གསུམ་གྱི་སྤྱོད་པས། འཇིག་རྟེན་གྱི་ལྡན་ཕྱག་གཡས་རྡོ་རྗེ་གྲི་གུག །སེམས་བསྐྱེད་སྔོན་དུ་སོང་ནས་གཡོན་ཐོད་པ་ལས་འོད་བསྣམས། །མཁའ་སྤྱོད་མ། དགུ་དང་ཟླ་བའི་མདོག་འདྲ་འོད་ཟེར་
སྣ་ཚོགས་འཕྲོས། །སྐུ་གསུང་ཐུགས་ཀྱི་སྙིང་པོ་མཆོད་བྱས་ནས། །སྒྲིབ་ཚོགས་དག་ནས་མཁའ་དབྱིངས་དག་ཏུ་འགྲོ། །མཁའ་སྤྱོད་དཀར་མོའི་སྒྲུབ་ཐབས། པཎྜི་ཏ་དཱི་པཾ་ཀ་ར་ཤྲཱི་ཛྙཱ་ནས་མཛད་པ་རྫོགས་སོ། །བླ་མ་དམ་པ་རྣམས་ལ་ཕྱག་འཚལ་ལོ། །རྟེན་གྱི་གང་ཟག་མཁའ་སྤྱོད་དཀར་མོ་བསྒོམ་པར་མར་མེ་མཛད་ཡེ་ཤེས་དཔལ། འདོད་པས། སེམས་ཅན་ཐམས་ཅད་ལ་དམིགས་པའི་བྱམས་པ་དང་། སྙིང་རྗེ་བྱང་ཆུབ་ཀྱི་སེམས་སྔོན་དུ་བཏང་ནས། རང་ཡི་དམ་གྱི་ལྷར་སྐད་ཅིག་མར་བསམ་པའི་མདུན་གྱི་ནམ་མཁའ་ལ་ཧྲཱིཿདཀར་པོ་གཅིག་བསམ། ཧྲཱིཿདེ་འོད་དུ་ཞུ་བ་ལས། ཇོ་མོ་མཁའ་སྤྱོད་མ་དཀར་མོ། སྤྱན་གསུམ་ནམ་མཁའ་ལ་ཧྲིག་ཧྲིག་པ། ཞལ་གཅིག་ཕྱག་གཉིས་པ། ཞལ་མཆེ་བ་གཙིགས་ཤིང་བཞད་པ་སྐུ་མདོག་དཀར་
མོ། རུས་པའི་རྒྱན་ཐམས་ཅད་ཀྱིས་བརྒྱན་པ། ཕྱག་གཡས་གྲི་གུག་འཕྱར་བ། གཡོན་ཐོད་པ་ཁྲག་གིས་བཀང་བ་ཕྱིར་བསྟན་ནས་འཛིན་པ། ཞབས་གཉིས་རྒྱབ་ངོས་ནས་ཕྲག་པ་ལ་བཀལ་བ། གཅེར་བུ་སྐྲ་གྲོལ་བ། ཐོད་སྐམ་ལྔའི་དབུ་རྒྱན་དང་། ཐོད་སྐམ་ལྔ་བཅུའི་དོ་ཤལ་བྱས་པ། སྐུ་ཤ་རྒྱས་ཤིང་ནུ་མ་འབུར་བ། གཞོན་ནུ་ལང་ཚོ་དར་ལ་བབ་པ། མེ་རི་དཀར་པོའི་དབུས་ན་བཞུགས་པ་ཅིག་ཏུ་བསམ་ནས། དེ་ལ་དམིགས་ནས་རང་གི་སྔགས་གསུམ་སྦྲེལ་བཟླས་པ་དང་། དེའི་སྤྱི་བོ་སྙིང་ག་མགྲིན་པ་གསུམ་ནས། འོད་ཁ་དོག་གསུམ་གཅིག་ལ་གཅིག་འཁྲིལ་བའི་ཚུལ་དུ་ཐུགས་ཀ་ནས་བྱུང་སྟེ། རང་གི་སྤྱི་གཙུག་ནས་བྱུང་བས། ལུས་གང་སྟེ་སྡིག་སྒྲིབ་ལ་སོགས་པ་དག་ནས། འོད་ཡར་འཁྱིལ་བ་དང་། བདེ་སིང་བ་ཅིག་
བསྒོམ། འཇུག་མི་དམིགས་པར་བསྒོམ། དགེ་བ་བསྔོ་བར་བྱའོ། །དཔལ་ལྡན་ཨ་ཏི་ཤའི་ལུགས་སོ། །མངྒ་ལཾ།། །།ན་མོ་གུ་རུ། ཡང་ལུགས་གཅིག་ལ། གཞན་གོང་དང་འདྲ་བ་ལ། མདུན་དུ་ཧྲཱིཿཚེག་དྲག་དང་བཅས་པ་ཅིག་བསམ། དེ་འོད་དུ་ཞུ་བ་ལས། ཇོ་མོ་མཁའ་སྤྱོད་མ་སྔར་དང་འདྲ་བ་ཅིག་བསྐྱེད་པའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུྃ་སྔོན་པོ་རྣམས་རིམ་པ་བཞིན་དུ་བསམ་ལ། དེ་ལས་འོད་ཁ་དོག་གསུམ་འཕྲོས་པས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕོག་པས། དེ་དག་གི་སྐུའི་ཡོན་ཏན་ཐམས་ཅད་དཀར་དམར་སྔོ། བསྡུས་པ། རྗེ་བཙུན་མའི་སྤྱི་བོའི་ཨོཾ་ལ་ཐིམ། གསུང་གི་ཨཱཿལ་ཐིམ།
ཐུགས་ཀྱི་ཧཱུྃ་ལ་ཐིམ་པར་བསམས་ལ། དེ་ལ་ཡིད་ཀྱིས་མཆོད་ནས་གསོལ་བ་བཏབ་པས། འོད་ཁ་དོག་གསུམ་རྗེ་བཙུན་མའི་གནས་ཨོཾ་གསུམ་མའི་སྔགས་བཟློས་པ་ལ་ཟེར་གསུང་། གསུམ་ནས། གཅིག་ལ་གཅིག་འཁྲིལ་ནས་ཨོཾ་ཨཱཿཧཱུྃ་གསུམ་གྱི་དཀར་དམར་མཐིང་ཀའི་བྱུང་། རྗེ་བཙུན་མའི་སྐུའི་དབྱིབས་བརྒྱུད། པདྨ་ནས་བྱུང་སྟེ་འོད་ཁ་དོག་གསུམ་རང་གི་གནས་གསུམ་དུ་སོ་སོར་ཐིམ་པས་སྡིག་སྒྲིབ་དང་། ནད་གདོན་དང་། བར་དུ་གཅོད་པ་ལ་སོགས་པ་དག་ནས། མི་རྟོག་པ་ཕྱག་རྒྱ་ཆེན་པོའི་ངང་དུ་བཞག་པར་བྱའོ། །འཕྲོ་གཅོད་ཙ་ན། མདུན་གྱི་ཇོ་མོ་རང་གི་སྤྱི་བོར་བྱོན་པར་བསམ་ལ། མ་རྡོ་རྗེ་རྣལ་འབྱོར་མས། བདག་ཡང་དག་པ་མཁའ་སྤྱོད་ཀྱི་གནས་སུ་འཁྲིད་དུ་གསོལ། ཞེས་གསོལ་བ་བཏབ་པས། ཇོ་མོ་འོད་དུ་ཞུ་ནས་རང་གི་སྤྱི་
བོར་ཐིམ་པས། ལུས་ཀྱི་ནང་བདུད་རྩིས་ཁེངས་པ་དང་། སྐུ་གསུང་ཐུགས་རྡོ་རྗེས་བྱིན་གྱིས་རླབས་པ་ཡིན་སྙམ་དུ་མོས་པ་བྱའོ། །སྐབས་འགའ་ཞིག་ཏུ་རང་གི་སྤྱི་བོར་རྗེ་བཙུན་མ་སྔ་མ་བཞིན་བསམས་ནས། རང་གི་རིག་པ་ལྟེ་བ་ནས་དྲངས་ཏེ་ཚངས་བུག་ནས་བཏོན། ཇོ་མོའི་པདྨ་ན་ཡར་ཞུགས་ནས། རིག་པ་ཐུགས་ཀར་ཞུགས་ནས་མཁའ་སྤྱོད་དུ་འགྲོ་བར་བྱའོ། །སྦྱོར་རྗེས་གཉིས་སྔ་མ་ལྟར་རོ། །ཁྱུང་པོ་རྣལ་འབྱོར་པའི་ལུགས་སོ། །ཤུབྷཾ། །ན་མོ་གུ་རུ། འདི་ལ་གསུམ་དུ་གསུངས་པ་ལས། སྐུ་བསྒོམ་པ་སྔོན་དུ་སོང་ནས། གཉིས་པ་ལུས་བྱིན་གྱིས་རླབས་པ་ནི། རྗེ་བཙུན་མ་སྔར་བཞིན་དུ་བསྒོམས་ལ། རང་གི་སྤྱི་བོར་བྱོན་པར་བསམ་སྟེ། དེའི་པདྨ་ནས་བྱང་སེམས་འོད་དམར་པོའི་ཚུལ་དུ་འཕྲོས་
ཏེ་བྱུང་བ་དང་། རང་གི་སྤྱི་བོའི་ཚངས་བུག་ན་མར་སོང་སྟེ། ལུས་ཐམས་ཅད་འོད་ཀྱི་རང་བཞིན་དུ་དམར་ལྡེམ་ལྡེམ་དུ་འདུག་པ་དང་། རང་གི་རྒྱུད་ལ་བདེ་བ་ཁྱད་པར་ཅན་སིང་སིང་པ་སྐྱེས་པར་བསམ། དེ་ནས་ལུས་འོད་ཀྱི་རང་བཞིན་དེ་མེ་ལོང་གི་རླངས་བཞིན་མཐའ་ནས་བསྡུས་ནས་དབུས་སུ་ཡལ་བ་དང་། སྟོང་པ་ཉིད་དེའི་ངང་ལ་ལྷོད་ཀྱིས་གློད་ལ། རིག་པ་དྭངས་སིང་ངེ་བཞག་གོ །གསུམ་པ་གསང་བ་བྱིན་གྱི་རླབས་པ་ནི། རང་ལ་ཉོན་མོངས་པ་འདོད་ཆགས་དྲག་པོ་སྐྱེས་ནས། རྡོ་རྗེ་ནོར་བུའི་རྩེ་མོར་རྗེ་བཙུན་མ་སྔར་དང་འདྲ་བ་བསམས་ལ། དེ་འོད་དུ་ལྟེམ་གྱི་ཞུ་བ་དང་། འོད་དེ་གསང་བའི་རྡོ་རྗེ་ནས་ཡར་ཞུགས་ཏེ་སོང་། ལུས་ཐམས་ཅད་འོད་ཀྱིས་མེར་ཁེངས་པ་དང་། ཉོན་མོངས་པ་འདོད་ཆགས་སངས་ཀྱིས་དག་པས་ལུས་འོད་
ཀྱི་རང་བཞིན་དུ་ལྡེམ་ལྡེམ་འདུག་པར་བསམ། དེ་ནས་འོད་མེ་ལོང་གི་རླངས་བཞིན་དུ་མཐའ་ནས་འདུས་ནས་དབུས་སུ་ཡལ་བ་དང་། སྟོང་པ་ཉིད་དེའི་ངང་དུ་རིག་པ་མ་བཅོས་པར་ལྷོད་ཀྱིས་གློད་ལ་རིག་པ་དྭངས་སིང་དེ་བཞག་གོ །སྦྱོར་རྗེས་གཉིས་སྔར་དང་འདྲའོ། །ན་མོ་གུ་རུ། མཁའ་སྤྱོད་མ་དཀར་མོ་ལ་བརྟེན་ནས་དམ་ཚིག་གསོ་བའི་ཐབས་ནི། བྱང་ཆུབ་ཀྱི་སེམས་སྔོན་དུ་སོང་བས། རང་གི་མདུན་དུ་པདྨ་དང་ཟླ་བའི་གདན་ལ། རང་གི་རྩ་བའི་བླ་མ་གང་ཡིན་པ་དེ། འཛུམ་མུལ་ལེ། མདངས་ཡལ་ལེ། འོད་ལམ་མེ་བཞུགས་པར་བསམ་ལ། དེ་ལ་བློས་སྤྲུལ་པའི་པཱུ་ཛ་དཔག་ཏུ་མེད་པ་དབུལ། རྫས་རིམ་པར་བཤམས་པའི་པཱུ་ཛ་འབུལ། བླ་མ་ལ་དད་གུས་གདུང་གདུང་པ་བསྒོམས་ལ།
གསོལ་བ་དྲག་པོ་བཏབ། རང་གི་རྩ་བའི་བླ་མ་ལ་མ་གུས་པ་ལ་སོགས་པའི་དམ་ཚིག་དང་མི་མཐུན་པ་ཐམས་ཅད་མིང་རུས་ནས་བཏོན་ལ་བཤགས་པ་བྱའོ། །དེ་ནས་བླ་མའི་སྨིན་མཚམས་སུ་མཁའ་སྤྱོད་མ་དཀར་མོ་ཅིག་བསམ། དེའི་གསང་གནས་ནས་འོད་དཀར་པོ་འཕྲོས་པས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་འཕོག །དེའི་སྨིན་མཚམས་ནས་ཡེ་ཤེས་ཀྱི་བདུད་རྩི་བྱུང་སྟེ། བླ་མའི་སྤྱོ་བོ་ནས་མར་བབས་པས། སྐུ་གསུང་ཐུགས་མཉེས་པའི་པཱུ་ཛ་ཕུལ་བས་བཟང་ལན་དུ་སངས་རྒྱས་བྱང་ཆུབ་སེམས་དཔའི། བླ་མ་ལ་ཟག་མེད་ཀྱི་བདེ་བ་སྐྱེས་པར་བསམ། དེ་ནས་མཁའ་སྤྱོད་མའི་གསང་གནས་ནས། འོད་ཟེར་དཀར་ནར་གྱིས་བྱུང་སྟེ། བདག་གི་སྨིན་ཕྲག་ན་ཕར་སོང་པས། བདག་གིས་བླ་མའི་སྐུ་ལ་མ་གུས་པ་བྱས་པའི་སྡིག་སྒྲིབ་ཐམས་ཅད་
སངས་ཀྱིས་དག་པར་བསམས་ལ། །སྐུ་གསུང་ཐུགས་ཀྱི་སྔགས་བརྒྱ་རྩ་བརྒྱད་བཟླས་ལ། ལྷ་སྨིན་ཕྲག་ཏུ་ཐིམ་པར་བསམ་མོ། །དེ་བཞིན་དུ་གསུང་དང་ཐུགས་གཉིས་ལ་ཡང་སྔར་བཞིན་བྱ་སྟེ། མཁའ་སྤྱོད་མ་དམར་མོ་དང་སྔོན་མོ་བསྒོམ། འོད་ཟེར་ཡང་དེ་དང་འདྲ། སྔགས་བཟླས། གསུང་དང་ཐུགས་མ་དད་པའི་སྒྲིབ་པ་དག་པར་བསམ། ཐ་མ་ལྷ་ཐུགས་ཀར་ཐིམ་པ་དང་། ལྷ་སྐུ་ཕྱག་རྒྱ་ཆེན་པོའི་ངང་དུ་སིང་གིས་བཞག །རྗེས་ལ་དགེ་བ་བྱང་ཆུབ་ཏུ་བསྔོའོ། །ན་མོ་གུ་རུ། གཏོར་མ་བྱེད་པར་འདོད་ན། བྱང་ཆུབ་ཏུ་སེམས་བསྐྱེད་ལ། རང་གི་ལག་པ་གཡོན་པ་བཀན་ཏེ། གཡས་པའི་མཐེབ་སྲིན་གྱིས་བཟུང་ལ། དེ་ནས་ལག་པའི་མཐིལ་དུ་ཨ་དཀར་པོ་བསམ། དེ་གྱུར་
པ་ལས་ཐོད་པ་ཕྱི་དཀར་ལ་ནང་དམར་བ། ཡངས་ཤིང་རྒྱ་ཆེ་བ་ཅིག་གི་ནང་དུ། ས་བོན་ཤ་ལྔ་བདུད་རྩི་ལྔར་བསམས་ལ། ཨོཾ་ཨཱཿཧཱུྃ་ལན་གསུམ་བརྗོད་པས། དམ་ཚིག་གི་བདུད་རྩིར་གྱུར། ཡང་བརྗོད་པས་ཡེ་ཤེས་ཀྱི་བདུད་རྩིར་གྱུར་པར་བསམས་ལ། དེ་ནས་མདུན་གྱི་ནམ་མཁའ་ལ་ཇོ་མོ་མཁའ་སྤྱོད་མ་ལ། འཁོར་ཡེ་ཤེས་ཀྱི་ཌཱ་ཀི་མ་དཔག་ཏུ་མེད་པས་བསྐོར་བར་བསམས་ལ། དེ་ལ་སྐུ་གསུང་ཐུགས་ཀྱི་སྔགས་ལ། ཨོཾ་ཨཱཿཧཱུྃ་ལ་ཧཱུྃ་རིང་བཏགས་ལ་ཕུལ་བས། ཇོ་མོ་འཁོར་དང་བཅས་པས་ལྗགས་རྡོ་རྗེའི་སྦུ་གུ་ཅན་བཙུགས་ནས་གསོལ་བས། ཟག་པ་མེད་པའི་བདེ་བ་སྐྱེས་ནས་དགྱེས་པར་བསམ། དེ་བཞིན་དུ་ཆོས་སྐྱོང་དང་། ཡི་དྭགས་ལ་ཡང་དབུལ། ལྷ་མི་དམིགས་པར་བསམ། རྗེས་ལ་དགེ་བ་བྱང་ཆུབ་ཏུ་བསྔོའོ། གདམས་ངག་
འདི་དུས་གཅིག་ལ་སློབ་མ་གཅིག་ལས་མང་བ་ལ་སྦྱིན་དུ་མི་རུང་ངོ་། །མང་ག་ལཾ། །ན་མོ་གུ་རུ། རྗེ་བཙུན་མ་འདི་ཉམས་སུ་ལེན་པར་འདོད་པའི་རྣལ་འབྱོར་པས། མཁའ་སྤྱོད་ཀྱི་རིལ་བུ་སྒྲུབ་པར་བྱ་སྟེ། དེ་ལ་གཉིས། རྫས་བསགས་པ་དང་། རིལ་བུ་སྒྲུབ་པའོ། །དང་པོ་ནི། ལྷ་བསྙེན་ཐོན་མ་ཐོག་གི་དུས་སུ་བྲེགས་པའི་ཞབས་གཡས་པའི་སེན་མོ་དང་གཅིག །ཕྱག་གཡོན་མའི་སེན་མོ་གཉིས། བུད་མེད་སྟག་ལོ་མ་ཅིག་གི་ཡོད་ན་རང་བྱུང་གི་ཁྲག །མེད་ན་རུས་པའམ། སེན་མོ་དང་གསུམ། མཚལ་དང་བཞི། སིནྡྷུ་ར་དང་ལྔ། དེ་ཚོ་བླ་མ་དེ་དང་ཆོས་འབྲེལ་མེད་པའི་བུ་མོ་གྲོང་པའི་ཆོས་ཀྱིས་གང་རུང་ཅིག་མ་གོས་པ་རྣམ་ཤེས་དྭངས་ཤིང་སྐྱེ་མེད་གཙང་
མ་གཅིག་གིས་ཞིབ་དུ་བཏགས། དེ་རྣམས་ཡོད་ན་རང་བྱུང་གི་ཁྲག་གིས་མགོ་བསྡུ་བའམ། མེད་ན་ཆང་དང་བསྲེས་ལ་རིལ་བུ་བྱ། དེ་ཐོད་པ་མཚན་ལྡན་ནམ། པདྨའི་སྣོད་དུ་བཅུག་ལ། མེ་ལོང་གཙང་མ་གས་ཆག་མེད་པས་ཁ་བཅད་དོ། །དེ་ནས་རང་གི་གནས་དབེན་ཞིང་ཉམས་དགའ་བ་གཅིག་ཏུ། བའི་རྣམ་ལྔ་དང་། དྲི་བཟང་གི་ཆུས་གཞན་གྱི་མ་མཐོང་བ་གལ་ཆེ་གསུང་། བྱུགས་ཏེ། པཱུ་ཛ་ལྔ་དབུལ། མཎྜལ་པདྨ་འདབ་བརྒྱད་དཀར་པོ་བྱས་ལ། ལྟེ་བར་དར་དམར་པོའི་གདན་ལ་གོང་གི་པདྨའི་སྣོད་བཞག་གོ །གཉིས་པ་སྒྲུབ་པ་བྱ་བ་ནི། རང་བདེ་བའི་སྟན་ལ་འདུག་སྟེ། བྱང་ཆུབ་ཀྱི་སེམས་སྔོན་དུ་སོང་བས་རང་རྗེ་བཙུན་མར་བསྒོམ། མདུན་གྱི་མེ་ལོང་གི་སྟེང་དུ། ཡི་གེ་
ཧྲཱིཿདཀར་པོ་ཚེགས་དྲག་དང་བཅས་པ་ཅིག་བསམ། དེ་ལ་ཨོཾ་གསུམ་མའི་སྔགས་ཀྱིས་དཀར་རཾ་མེ་བསྐོར་བར་བསམས་ལ། བསྙེན་པ་འབུམ་བྱ། དེ་ལ་རྟགས་མ་བྱུང་ན་འབུམ་དུ་བསྐྱར། མཚམས་དང་སྨྲ་བཅད་དམ་དུ་བྱ། དེ་ལ་མ་བྱུང་ན་ཡང་འབུམ་དུ་བསྐྱར་ཏེ། དེ་ལ་རྟགས་པ་མི་ཡོང་མི་སྲིད་དོ། རྟགས་ནི་རིལ་བུ་ཁོལ་བ་དང་། བླ་མའི་ཞབས་རང་གི་མགོ་ཐོག་ཏུ་འཇོག་པ་འོང་ངོ་། །དེ་ལྟ་བུ་བྱུང་བ་དང་རིལ་བུ་དར་ཟབ་ཀྱིས་དྲིལ་ལ་པདྨའི་སྣོད་དུ་བཞུགས། པདྨའི་སྣོད་དེ་ཡང་དར་ཟབ་ལ་སོགས་ཀྱིས་དྲིལ་ལ། རྟེན་གྱི་གྲལ་ལ་གཞུག་སྟེ། པཱུ་ཙ་དང་བསྙེན་པ་ཡང་མ་ཆད་པར་བྱའོ། །དེ་ནི་རིལ་བུ་བསྒྲུབ་པའོ། །
ན་མོ་གུ་རུ། རྗེ་བཙུན་མ་འདི་ལ་འཕོ་བ་བྱེད་པར་འདོད་པས། ཉམས་ལེན་རྒྱུན་མ་ཆད་པར་བྱས་པའི་རྣལ་འབྱོར་པས། འཆི་ལྟས་རྣམས་བྱུང་བ་དང་། འཆི་བ་བསླུ་བའི་ཆོ་ག་རྣམས་བྱས་ཏེ། དེས་མ་ལྷུས་པར་འཆི་བར་ངོ་ཤེས་པའི་དུས་སུ། རང་གི་ལུས་ལོངས་སྤྱོད་དང་། དུས་གསུམ་དུ་བསགས་པའི་དགེ་བ་ཐམས་ཅད་ལ་མ་ཆགས་པ་དང་། ཞེན་པ་མེད་པར་བླ་མ་དང་དཀོན་མཆོག་ལ་དབུལ། ངན་སོང་སྡུག་བསྔལ་བ་རྣམས་ལ་སྙིང་རྗེའི་བསམ་པས་སྦྱིན་པ་བཏང་། བྱམས་པ་དང་སྙིང་རྗེ་བྱང་ཆུབ་ཀྱི་སེམས་བསྒོམ་ཞིང་། སངས་རྒྱས་ནས་སེམས་ཅན་དོན་དཔག་ཏུ་མེད་པ་འབྱུང་བར་གསོལ་བ་གདབ། དེ་ཐམས་ཅད་རང་གི་སེམས་སུ་ཤེས་པར་བྱ། སེམས་སྐྱེ་མེད་ཆོས་ཀྱི་སྐུ་རུ་ཤེས་པར་བྱ། དངོས་པོ་སྣང་གྲགས་ཀྱི་
ཆོས་ཐམས་ཅད་སྒྱུ་མ་ལྟ་བུར་ཤེས་པར་བྱ་སྟེ། ཞེན་པའི་བློ་ཐམས་ཅད་དང་བྲལ་བར་བྱས་ལ། འདུ་འཛི་དང་གཡེང་བ་ཕྱིར་བསྐྱེད་ལ། རང་གི་བླ་མ་ལ་གསོལ་བ་གདབ། གྲོགས་གོ་ཆོད་པ་ཅིག་ཚགས་བྱས་ལ། རང་ཤེས་ཐད་ཀར་འདུག་ན་རྒྱབ་འབོལ་ལ་བརྟེན་ནས། ཙོག་པུར་བསྡད། ཤེས་ཆུང་ན་སྔས་བག་མཐོ་བ་བྱས་ལ་སེང་གེའི་ཉལ་ཐབས་བྱ། གོང་དུ་སྒྲུབས་པའི་རིལ་བུ་ལྕེ་ཐོག་ཏུ་བཞག །ལག་མཐིལ་གཡོན་དུ་བྱིན་གྱི་རླབས་པའི་སིནྡྷུ་ར་བླུག་ལ་དེང་དེང་བྱ། མདུན་གྱི་ནམ་མཁའ་ལ་མཁའ་སྤྱོད་མ་སྔར་བཞིན་བསྒོམ། དེ་ལ་གསོལ་བ་གདབ། མོས་གུས་བྱ། དེ་ནས་རང་གི་རྡོ་རྗེ་ནོར་བུའི་རྩེ་མོ་ལ་ཧཱུྃ་སྔོན་པོ་མགོ་གྱེན་དུ་བསྟན་པ་ཅིག་བསམ། ལྟེ་བར་རྣམ་ཤེས་ཀྱི་ངོ་བོ་ཨ་དཀར་
པོ་འོད་ཀྱི་རང་བཞིན་ཅན་ཡར་ལ་ཁད་པ་ཅིག་བསམ། དེ་ནས་ཨོཾ་གསུམ་མའི་སྔགས་བརྗོད་ཅིང་། རྒྱུ་ཞབས་འུབས་ཀྱི་ཐེན་ལ། ལུས་ཤེད་དང་སྦྱར་ལ་རན་ཙམ་བཟུང་ལ། ཧཱུྃ་དེས་ནོར་བུ་ནང་དུ་བཟློག་སྟེ་ཐེན་པས་ལྟེ་བར་སླེབས་པ་དང་༴ ཧཱུྃ་དེས་ལྟེ་བའི་རྣམ་ཤེས་ཀྱི་ངོ་བོ་ཨ་དཀར་པོ་དེ་དེང་གིས་འཕུལ་ནས་རྩ་དབུ་མའི་ནང་ཡར་སྐར་མདའ་ཆད་པ་ལྟར་རྒྱང་གི་སོང་ནས། སྤྱི་བོའི་ཚངས་བུག་ནས་དོན་ནས། རྗེ་བཙུན་མའི་པདྨར་ཚངས་ཀྱིས་སོང་བ་དང་། པདྨ་བཙུམ་བྱས་པས་ཨ་དེ་ཐུགས་ཀར་ཡེར་གྱི་བྱུང་བ་དེ་ལ། སེམས་མ་ཡེངས་པར་ལྷན་ནེ་གནས་པར་བྱའོ། །མཁའ་སྤྱོད་ཀྱི་གནས་དེ་ཉིད་ཡིན་པས། གཞན་དུ་འགྲོ་ས་མེད་དོ་གསུངས། དེ་ལྟར་གནས་པས་ལུས་རྙིང་པ་བོར་ནས་སེམས་མཁའ་སྤྱོད་དུ་འགྲོ་
བ་ཞེས་བྱའོ། །དེ་ནི་འཕོ་བའི་གདམས་ངག་ཞེས་བྱའོ། །རྗེ་བཙུན་མ་འདི་ལ་ཡི་དམ་མ་ཆག་པར་བྱས་ཤིང་། དུས་ཡར་གྱི་ཚེས་བཅུ། མར་གྱི་ཚེ་བཅུ་ལ་པཱུ་ཛ་སྤྱི་དང་མཐུན་པར་བྱས་ཤིང་། གསོལ་བ་བཏབ་ན་མཁའ་སྤྱོད་དུ་ངེས་པར་འགྲོ་བ་ཡིན་ནོ་གསུང་ངོ་། །མཁའ་སྤྱོད་དཀར་མོའི་སྒྲུབ་ཐབས་ལས་ཚོགས་དང་བཅས་པ་རྫོགས་སོ། །ཤུ་བྷཾ། །རྒྱ་གར་སྐད་དུ། བཛྲ་ཡོ་གི་ནི་ལྟ་བ། བོད་སྐད་དུ། རྡོ་རྗེ་མཁའ་འགྲོ་མ་ལ་བསྟོད་པ། རྡོ་རྗེ་མཁའ་སྤྱོད་མ་ལ་ཕྱག་འཚལ་ལོ། །ཧྲཱིཿལས་གྲུབ་པའི་མཁའ་སྤྱོད་ནི། །ཉོན་མོངས་གདུང་བ་སེལ་བའི་ཕྱིར། །མཁའ་ལ་དྲི་མེད་ཟླ་བའི་སྟེང་། །ལང་ཚོ་ཤིན་ཏུ་མཛེས་པ་ལ། །བཅུ་དྲུག་ལོ་ལོན་ལྟ་བུའི་ཚུལ། །
མཁའ་སྤྱོད་མ་ལ་ཕྱག་འཚལ་ལོ། །མཁའ་ལ་སྤྱོད་ཕྱིར་ཞབས་གཉིས་ནི། །རྒྱབ་ནས་ཕྲག་པ་གཉིས་ལ་བཀལ། །མཁའ་སྤྱོད་མ་ལ༴ །འགྲོ་རྣམས་མཁའ་སྤྱོད་འདྲེན་པའི་ཕྱིར། །བྷ་ག་རྒྱས་ཤིང་ཤིན་ཏུ་ཡངས། །མཁའ་སྤྱོད༴ །མ་རིག་རྩད་ནས་གཅོད་པའི་ཕྱིར། །ཕྱག་གཡས་གྲི་གུག་མཁའ་ལ་འཕྱར། །མཁའ་སྤྱོད༴ །གཉིས་མེད་བདུད་རྩི་འཛག་པའི་ཕྱིར། །ཕྱག་གཡོན་ཐོད་པ་མཁའ་ལ་འཛིན། །མཁའ་སྤྱོད༴ །འགྲོ་བའི་དོན་ལ་དགྱེས་པའི་ཕྱིར། །ཞལ་ནི་འཛུམ་ཁྲོ་དག་དང་ལྡན། །མཁའ་སྤྱོད༴ །ཕྱོགས་བཅུའི་སངས་རྒྱས་གཟིགས་པའི་ཕྱིར། །སྤྱན་གསུམ་མཁའ་ལ་དྲག་ཏུ་གཟིགས། །མཁའ་སྤྱོད༴ །སྐུ་ལྔ་ཡོངས་སུ་རྫོགས་པའི་ཕྱིར། །དབུ་ལ་ཐོད་པ་
ལྔ་ཡིས་བརྒྱན། །མཁའ་སྤྱོད༴ །ཆོས་ཉིད་འགྱུར་བ་མེད་པའི་ཕྱིར། །དབུ་སྐྲ་མཐོན་མཐིང་ཤིན་ཏུ་གནག །མཁའ་སྤྱོད༴ །ཉོན་མོངས་བག་ཆགས་བསྙིལ་བའི་ཕྱིར། །རུས་བཅས་ལྕང་ལོ་སྐེད་སོར་སླེབ། །མཁའ་སྤྱོད༴ །ཡོན་ཏན་མ་ལུས་རྒྱས་པའི་ཕྱིར། །དབུ་སྐྲ་སྙན་རྒྱན་དཔུང་རྒྱན་དང་། །མགུལ་རྒྱན་དོ་ཤལ་དོ་ཤལ་ཕྱེད། །ཕྱག་གདུབ་ཞབས་གདུབ་རྒྱན་རྣམས་ནི། །རིན་པོ་ཆེ་ཡིས་རབ་ཏུ་སྤྲས། །མཁའ་སྤྱོད༴ །རྣམ་རྟོག་སྤངས་ཕྱིར་མི་མགོའི་ཕྲེང་། །བརྒྱ་ཕྱེད་དག་གི་ག་ཤ་བྱས། །མཁའ་སྤྱོད༴ །ཆགས་ཤིང་བདེ་བ་རྒྱས་པའི་ཕྱིར། །སྐུ་ཤ་རྒྱས་ཤིང་ནུ་མ་འབུར། །མཁའ་སྤྱོད༴ །སྒེག་པའི་ཉམས་དང་ལྡན་པའི་ཕྱིར། །འགྱིང་ཚུལ་དར་གྱི་ཅོད་པན་
མཛེས། །མཁའ་སྤྱོད༴ །ཐབས་ཤེས་གཉིས་སུ་མེད་པའི་ཕྱིར། །སྐུ་སྨད་རུས་པའི་རྒྱན་དང་བཅས། །མཁའ་སྤྱོད༴ །འཁོར་བའི་སྐྱོན་གྱིས་མ་གོས་ཕྱིར། །སྟོན་ཟླའི་མདོག་ཅན་འོད་ཟེར་འཕྲོས། །མཁའ་སྤྱོད༴ །མ་རིག་གཉིད་ལས་སད་པའི་ཕྱིར། །གྲགས་སྟོང་ཧཱུྃ་དང་ཕཊ་སྒྲ་སྒྲོག །མཁའ་སྤྱོད་གསུང་ལ་ཕྱག་འཚལ་ལོ། །བདེ་དང་སྟོང་པ་ལྷན་ཅིག་སྐྱེས། །གཉིས་སུ་མེད་པ་ཟུང་འཇུག་ཕྱིར། །མཁའ་སྤྱོད་ཐུགས་ལ་ཕྱག་འཚལ་ལོ། །ཉོན་མོངས་བུད་ཤིང་བསྲེག་པའི་ཕྱིར། །མེ་རི་དཀར་པོའི་གསེབ་ན་བཞུགས། །མཁའ་སྤྱོད་མ་ལ་ཕྱག་འཚལ་ལོ། །སྣང་ཡང་བདེན་པས་སྟོང་པའི་ཕྱིར། །འཇའ་འོད་ཚོགས་ཀྱི་ཀུན་ནས་བསྐོར། །མཁའ་སྤྱོད༴ །དད་བརྩོན་དམ་ཚིག་ལྡན་པ་ཡིས༴
མཆོད་བསྟོད་གསོལ་བ་བཏབ་གྱུར་ན། །ཡང་དག་མཁའ་སྤྱོད་གནས་སུ་ནི། །འདྲེན་མཛད་ཁྱོད་ལ་ཕྱག་འཚལ་ལོ། །མཁའ་སྤྱོད་མ་དཀར་མོའི་བསྟོད་པ། དཱི་པཾ་ཀ་ར་ཤྲཱི་ཛྙཱ་ནས་མཛད་པའོ། །པཎྜི་ཏ་དེ་ཉིད་དང་། ལོ་ཙཱ་བ་རིན་ཆེན་བཟང་པོས་མཐོན་མཐིང་དུ་སྦྱར་བའོ། །མངྒ་ལཾ། །ཤུ་བྷཾ། །