ནཻ་གུ་སྨྲ་བསམ་བརྗོད་མེད་ཀྱི་སྐབས་རྗེ་བཙུན་གྲོལ་མཆོག་ཞབས་ཀྱིས་མཛད་པ། རྗེ་བཙུན་གྲོལ་མཆོག
ནཻ་གུ་སྨྲ་བསམ་བརྗོད་མེད་ཀྱི་སྐབས་རྗེ་བཙུན་གྲོལ་མཆོག་ཞབས་ཀྱིས་མཛད་པ་བཞུགས་སོ། །ན་མོ་གུ་རུ་ཝེ། མི་འགྱུར་བདེ་ཆེན་ཆོས་ཀྱི་སྐུ། ཁ་སྦྱོར་བདུན་ལྡན་ལོངས་སྤྱོད་རྫོགས། །ཁྱབ་བདག་རྡོ་རྗེ་འཆང་ཆེན་ལ། །གསོལ་བ་འདེབས་སོ་བྱིན་གྱིས་རློབས། །གྲུབ་པའི་གོ་འཕང་མཆོག་བརྙེས་ཀྱང་། །སྣ་ཚོགས་སྤྲུལ་པས་གཞན་དོན་མཛད། །མཁའ་འགྲོ་དཔལ་གྱི་ནཻ་གུ་མ། །གསོལ་བ༴ སྔོན་སྦྱངས་ལས་འཕྲོ་ཉེར་སད་ནས། །ཡེ་ཤེས་མཁའ་འགྲོས་རྗེས་བཟུང་བའི། །གྲུབ་ཆེན་ཐང་སྟོང་རྒྱལ་པོ་ལ། །གསོལ་བ༴ ཟབ་མོའི་ལམ་ལ་བརྩོན་མཛད་ཅིང་། །ཉམས་དང་རྟོགས་པ་མཐར་ཕྱིན་པའི། །རས་ཆུང་བསོད་ནམས་རྒྱ་མཚོ་ལ། གསོལ་བ༴ ཆོས་བརྒྱད་
རྣམས་སྤངས་ལྡུམ་བུ་པ། །བརྟུལ་ཞུགས་མཆོག་འཛིན་ཀུ་ས་ལི། །རྣལ་འབྱོར་བསོད་ནམས་རྒྱལ་མཚན་ལ། །གསོལ་བ། །ཟབ་ལམ་ཀུན་ལ་མངའ་བརྙེས་ཤིང་། །གདུལ་བྱའི་དགའ་ཚལ་རྒྱས་མཛད་པའི། །འཇམ་མགོན་བླ་མ་གྲོལ་མཆོག་ལ། །གསོལ་བ་འདེབས་སོ་བྱིན་གྱིས་རློབས། །རྗེ་བཙུན་བླ་མའི་ཚོགས་རྣམས་ཀྱིས། །ཐུགས་རྗེ་ཆེན་པོས་ལེགས་བསྐྱངས་པའི། །བསྐལ་བཟང་འགྱུར་མེད་བདེ་ཆེན་ལ། །གསོལ་བ་འདེབས་སོ་བྱིན་གྱིས་རློབས། །ཙཎྜ་ལི་ཡི་རྣལ་འབྱོར་གྱིས། །བདེ་སྟོང་ཡེ་ཤེས་སྐྱེ་བ་དང་། །སྒྱུ་ལུས་རྨི་ལམ་ལེགས་འབྱོངས་ནས། །འོད་གསལ་འཆར་བར་བྱིན་གྱིས་རློབས། །འཕོ་བའི་གདམས་པ་ལ་བརྟེན་ནས། །མཁའ་སྤྱོད་གནས་སུ་བསྒྲོད་པ་དང་། །བར་དོ་རྒྱལ་བ་ལོངས་སྐུ་རུ། །མངོན་འཚང་རྒྱ་བར་བྱིན་གྱིས་རློབས། །ནཻ་གུ་སྨྲ་བསམ་བརྗོད་མེད་ཀྱི་སྐབས་
རྗེ་བཙུན་གྲོལ་མཆོག་ཞབས་ཀྱིས་མཛད་པའོ། །