ལྷ་སྐུ་དང་སྔགས་ཀྱི་སྤྲོ་བསྡུ།
ལྷ་སྐུ་དང་སྔགས་ཀྱི་སྤྲོ་བསྡུ་བྱ་བ་བཞུགས་སོ། །ན་མོ་གུ་རུ། དང་པོ་ལུས་ལྷར་གསལ་བའི་ངང་ནས་རླུངས་བཟུང་ནས། ལྷ་སྐུ་དང་སྔགས་ཀྱི་སྤྲོ་བསྡུ་བྱ་བ་ནི་བསྐྱེད་རིམ་རླུང་དང་བསྲེས་ཏེ། རྟོག་པ་ཐམས་ཅད་འགག་པར་འགྱུར་རོ། །གཉིས་པ་ནི། ལུས་སེམས་རང་བབས་སུ་བཞག་ལ། སེམས་མ་བཅོས་ཐ་མལ་གྱིས་ཤེས་པའི་འོད་གསལ་དང་རླུང་བསྲེས་ལ། སྣང་སེམས་དབྱེར་མེད་གསལ་ལ་རྟོག་མེད་དུ་འཆར་བ་ནི། ཕྱག་རྒྱ་ཆེན་པོ་རླུང་དང་བསྲེ་བ་སྟེ། རྟོགས་པ་ཡར་ངོ་བཞིན་དུ་འགྱུར་རོ། །གསུམ་པ་ནི། ལྷ་སྐུ་ཕྱག་རྒྱ་ཆེན་པོའི་ངང་ནས་རླུང་བཟུང་ནས། ཡུལ་སྣང་སྟོང་ཟུང་འཇུག །ལུས་བདེ་སྟོང་ཟུང་འཇུག །སེམས་གསལ་སྟོང་ཟུང་འཇུག་ཏུ་འཆར་ཏེ། དེ་ལས་མ་ཡེངས་པར་ཉམས་སུ་ལེན་པ་ནི།
རབ་ཟུང་འཇུག་རླུང་དང་བསྲེ་བའོ། །དེས་ཟླ་བ་གཅིག་གཾ། གསུམ་མཾ། དྲུག་གཾ། བདུན་གྱིས་སངས་མི་རྒྱ་མི་སྲིད་དོ། །གསང་སྔགས་མངོན་སུམ་ལམ་པ་ནི། །ཨེ་མ་ཌཱ་ཀི་མའི་སྲོག་སྙིང་ངོ། །འདི་མེད་ངལ་བ་དོན་མེད་དོ། །དཔེར་ན་མ་བསྲུབས་མར་བཞིན་ནོ། །ཨྀིྠཿ ༈ སྔོན་འགྲོའི་ཚད་མ་བཅོས་ཐ་མལ་གྱིས་ཤེས་པ་རང་ཤར་དེ་བརྟེན་པའི་ཚད་ལུས་ངག་གི་བྱ་བས་མི་འཕྲོག་པའོ། །དངོས་གཞིའི་སྣང་སེམས་དབྱེར་མེད་ཡིད་ལ་མི་བྱེད་པ་རང་ཤར། དེ་བརྟེན་པའི་ཚད་མཉམ་རྗེས་དང་བྲལ་བའི་འཁོར་མའོ། །འབྲས་བུའི་ཚད་བློ་འདས་ཟུང་འཇུག་རང་ཤར་དེ་མཐར་ཕྱིན་པའི་ཚད་འཕྲིན་ལས་ཕྱོགས་མེད་ལྷུན་གྲུབ་རང་ཤར་བའོ། །རྗེས་ཀྱི་ཚད་སྐྱེ་མེད་ལ་སྙིང་རྗེ་རང་ཤར། དེ་བརྟེན་
པའི་ཚད་སྟོང་ཉིད་སྙིང་རྗེ་དབྱེར་མེད་ལས་མི་གཡོ་བའོ། །དེ་ལྟར་ཟུང་འཇུག་སྨོན་ལམ་གྱིས་བརྒྱན་ནས། དམིགས་མེད་ཡོངས་སུ་བསྔོ་བ་ནི། རྗེས་ཀྱི་མན་ངག་དམ་པའོ། །ཨྀིྠཿ མངྒ་ལཾ་བྷ་ཝནྟུ། ༈ སྐྱེ་འགྲོའི་ངག་འགྲོལ་ལ། སྟོང་པའི་ངང་ལས། རང་གི་ལྕེ་དེ་རལ་གྲི་སོར་བཞི་པ་གཅིག་ཏུ་བསམ། དེའི་ཆང་ཟུང་གི་ནང་དུ་ཡི་གེ་ཏྲྃ་ལྗང་ཁུ་གཅིག་བསམ། དེ་ལས་འོད་ལྗང་ཁུ་འཕྲོས་པས། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་བསྡུས་ནས་ཏྲཾ་ལ་ཐིམ་པར་བསམ་ལ། ངག་ཏུ། ཨོཾ་ཏྲཾ་ཧྲཱིཿཀ་པཱ་ལ་རཀྲ་རཀྲ་སྭཱ་ཧཱ། ཞེས་ཉིན་རེ་ལ་ལན་བདུན་རེ་བཟླས་པས། ངག་གི་ནུས་པ་ཆེན་པོར་འགྱུར་རོ། །སངས་རྒྱས་གཉན་སྟོན་གྱི་ཕྱག་ལེན་ནོ། །ཤུ་བྷཾ། །