བདེ་མཆོག་དབུ་མ་ཡིག་བདུན།
བདེ་མཆོག་དབུ་མ་ཡིག་བདུན་བཞུགས་སོ། །དཔལ་འཁོར་ལོ་སྡོམ་པ་ལ་ཕྱག་འཚལ་ལོ། །སྤྱི་བོ་རུ་ནི་བརྟན་པར་བྱ། །དབུ་མ་ཡི་གེ་བདུན་པས་དགང་། །ཞེས་བདེ་མཆོག་གི་རྒྱུད་ལས་གསུངས་པའི་དོན་ནི། རང་བདེ་མཆོག་ཏུ་བསྒོམས་པའི་རྩ་དབུ་མ་རག་དུང་ལྟ་བུ། ཁ་ཆེ་ཤེས་འཕོངས་ན་མར་ལ་ཧར་སོང་ཡོད་པ། ཁ་ཆུང་ཤེས་སྤྱི་བོར་ཟུག་པ་གཅིག་བསམ། དེ་ནས་རང་གི་སྤྱི་བོར་པདྨ་སྔོན་པོ་འདབ་མ་དྲུག་པ་གཅིག་བསམ། ལྟེ་བ་ལ་ཨོཾ། འདབ་མ་མདུན་མ་ནས་བརྩམས་ཏེ་གཡས་བསྐོར་དུ། ཧྲཱིཿཧ་ཧ་ཧཱུྃ་ཧཱུྃ་ཕཊ་ཅེས་རང་འཐག་འཁོར་དུ་བསམ་མོ། །དེ་ནས་སྤྱི་བོའི་པདྨ་དང་ཡིག་འབྲུ་ལ་དམིགས་པ་ཡི་གེ་བདུན་པ་ཁ་ཡར་ཅིག་བཟླས་སོ། །དེ་ནིས་སྤྱི་བོ་རུ་ནི་བརྟན་
པར་བྱ་ཞེས་པའི་དོན་ཏོ། །དེ་ནས་རང་གི་རྩ་དབུ་མ་ཡི་གེ་བདུན་པས་སྔོ་མེར་གྱིས་གང་བར་བསམ་མོ། །སྤྱི་བོ་ནས་སྤྲོ་མི་དགོས་གསུངས། དེས་ནས་ཡིག་འབྲུ་ཚོ་ཡར་མར་ལ་སྔོ་ཕུང་ཕུང་། འོད་ཟེར་ཁ་དོག་སྔོན་པོ་སྔོ་དཀྲུག་དཀྲུག་འདུག་པར་བསམ། འོད་ཟེར་ནང་དུ་འཕྲོས་པས་རང་གི་སྡིག་སྒྲིབ་དག །ཕྱི་རུ་འཕྲོས་པས་སེམས་ཅན་ཐམས་ཅད་ཀྱི་སྡིག་སྒྲིབ་དག་པར་བསམ་ཞིང་བཟླས་པ་བྱ་གསུང་། ལམ་ཁྱེར་གྱི་ཆོས་གསུམ་དང་ལྡན་པར་བྱས་ཀྱང་འགལ་བ་མེད་གསུང་ངོ་། །ཇོ་བོ་ནཱ་རོ་པས་དེ་ལྟ་བུའི་བཟླས་པ་འབུམ་ཕྲག་གཅིག་བཟླས་པས་ས་གཡོ་བ་དང་། ལུང་བསྟན་ཐོབ་པ་ཡིན་གསུང་ངོ་། །དེ་ལྟ་བུའི་གདམ་ངག་འདི། ཇོ་བོ་ཆེན་པོ་ནཱ་རོ་པས་ཡེ་ཤེས་ཀྱི་མཁའ་འགྲོ་མ་ནི་གུ་མ་ལ་གསུངས། དེས་ཁྱུང་པོ་རྣལ་
འབྱོར་ལ་གནང་། དེས་རཏྣ་བིརྱ་ལ་གནང་། དེས་སངས་རྒྱས་དབོན་སྟོན་ལ། དེ་ཡན་ཆད་དུ་ལས་ཅན་རེ་རེ་ལ་ཆིག་བརྒྱུད་ལས་མེད། སྟེར་བའི་དུས་སུ་ཚོགས་འཁོར་བརྒྱ་རྩ་བརྒྱད་དམ། ཉི་ཤུ་རྩ་གཅིག་བཟླས་ནས་སྟེར་གསུང་། དེས་སངས་རྒྱས་གཉན་སྟོན་ལ། དེས་བགྲོས་ཁར་སློབ་མ་རེ་རེ་གཉིས་གཉིས་ལ་བྱིན་གསུང་། དེས་སངས་རྒྱས་སྟོན་པ། དེས་ཆོས་རྗེ་ཤངས་སྟོན་ལ། ཆོས་རྗེ་སྟོན་པའི་གསུང་ལ་ཟིན་བྲིས་ལན་བཞི་བྱས་ནས་བསྡུས་པ་ཡིན་གསུང་ངོ། ན་མོ་གུ་རུ། བདེ་མཆོག་ལས། སྐྱེ་བ་འདིའམ་ཕ་རོལ་ཏུ། །ལོངས་སྐུ་བདེ་ཆེན་ཐོབ་འདོད་པས། དབུ་མ་ཡི་གེ་བདུན་པས་དགང་། སྐུ་གསུམ་ལམ་དུ་
འཁྱེར་བར་བྱ། །ཞེས་པའི་དོན། རང་ལྷ་ལྔར་བསྐྱེད་པའི་ཡབ་ཀྱི་རྩ་དབུ་མ་ཡར་རྩེ་ཕྲ་བ་སྤྱི་བོར་སླེབ་པ། མར་རྩེ་སྦོམ་པ་བཤང་ལམ་ལ་ཟུག་པ། ཁ་དོག་སྔོན་པོར་བསམ། དེའི་ནང་ཐམས་ཅད་ཡི་གེ་བདུན་པས་ཁེངས་པར་བསྒོམས་ནས། ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ། ཅེས་བཟླས་པས། ཡི་གེ་བདུན་པ་འོད་ཟེར་གྱི་རྣམ་པར་ཡར་འགྲོ་མར་འགྲོ་བྱས་པ་དང་། རང་གི་ལུས་པོ་དེ་འོད་ཟེར་སྔོན་པོས་ཁེངས་པས་ལུས་ངག་ཡིད་གསུམ་གྱི་ནད་གདོན་སྡིག་སྒྲིབ་ཐམས་ཅད་སངས་དག་པར་བསམ། བ་སྤུའི་བུ་ག་ཐམས་ཅད་ནས་འོད་ཟེར་ཕྱིར་འཕྲོས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། བདེ་མཆོག་ཏུ་གྱུར། གཟུགས་སུ་སྣང་ཚད་ཀྱང་བདེ་མཆོག་ཏུ་གྱུར་པར་བསམ་མོ། །
དེ་ལྟར་གཟུགས་སྣང་ཐམས་ཅད་བདེ་མཆོག་གི་སྐུ། སྒྲ་གྲགས་ཚད་སྔགས་ཀྱི་རང་སྒྲ་དྲན་རྟོག་ཐམས་ཅད་ཆོས་སྐུ་ལམ་དུ་འཁྱེར་བར་བྱའོ། །དེའང་ལུས་དང་སྣང་བ་ལྷར་བསྒོམ་པ་དེ་ལ། སྣང་བའི་ཆ་དེ་བསྐྱེད་རིམ། སྟོང་པའི་ཆ་དེ་རྫོགས་རིམ། སྣང་སྟོང་ཟུང་འཇུག་ཆུ་ཟླ་ལྟ་བུ་དེ་བསྐྱེད་རྫོགས་ཟུང་འཇུག་སྟེ། དགོངས་པ་དང་པོའི་རྒྱུད་ལས། སྣང་བའི་ཆ་ལ་བསྐྱེད་རིམ་དང་། །སྟོང་པའི་ཆ་ལ་རྫོགས་རིམ་སྟེ། །བསྐྱེད་རྫོགས་མ་ཡིན་ཆོས་འགལ་མེད། །དབྱེར་མེད་ཚུལ་འདི་བསྟན་པའོ། །ཞེས་པའི་དོན། ཡེ་ཤེས་མཁའ་འགྲོ་མ་ནི་གུ་མ་ལ། བླ་མ་ཤངས་པས་ཚོགས་བརྒྱ་རྩ་དང་། གསེར་སྲང་ལྔ་བརྒྱ་ཕུལ་ནས་ཞུས་ཤིང་ཉམས་སུ་མྱོང་བར་བྱས་པའོ། །འདི་ནི་མི་
རབས་བདུན་དུ་ཆིག་བརྒྱུད་ལས་མ་སྤེལ་ཅིག་རྫོགས་སོ།། །།