ནི་གུའི་ཉམས་ལེན་གནད་དུ་དྲིལ་བ་ངག་དབང་ཉི་ཟླ་བཟང་པོས་མཛད་པ།
ནི་གུའི་ཉམས་ལེན་གནད་དུ་དྲིལ་བ་ངག་དབང་ཉི་ཟླ་བཟང་པོས་མཛད་པ་བཞུགས་སོ། །
ན་མོ་གུ་རུ་བྷྱཿཡེ་ཤེས་ཀྱི་མཁའ་འགྲོ་མ་ནི་གུ་མའི་ཆོས་དྲུག་ཉམས་སུ་ལེན་པའི་ཚུལ་ནི། ཉིན་ཞག་ཕྲུགས་གཅིག་ལ་ཐུན་དྲུག་ཏུ་བགོས་པའི་ཉིན་མཚན་གྱི་ཐུན་གཉིས་དོར་བའི། སྔ་དྲོ་ཕྱི་དྲོ་གཉིས་དང་། སྲོད་ཐོ་རངས་ཏེ་ཐུན་བཞིར་ཉམས་སུ་ལེན། དེ་ཡང་ཐུན་ཐམས་ཅད་ཀྱི་སྔོན་དུ་བླ་མའི་རྣལ་འབྱོར་དང་། དག་བྱེད་སྟོང་ར་ཡུན་མི་ཐུང་བ་
རེ་སྒོམ། དེ་རྗེས་སྔ་དྲོ་གཏུམ་མོའི་དམིགས་པ་བྱེད། །དགོངས་མོ་སྒྱུ་ལུས་གཙོ་བོར་སྒོམ། །སྲོད་ལ་རྨི་ལམ་དང་འོད་གསལ་གྱི་དམིགས་པའི་ནང་རྨི་ལམ་རང་ཟིན་ཐིག་ལེ་དབང་བཞིའི་གནད་དང་། འོད་གསལ་ལ་ཐོད་པའི་ནང་གི་བདག་མེད་མ་གཉིས་གཙོ་བོར་སྒོམ། ཐོ་རངས་རྨི་ལམ་འཆུག་མེད་ཀྱི་དམིགས་པ་དང་། འོད་གསལ་
ལ་འོག་གི་ལྟེ་འོག་ལ་དམིགས་པ་བཟུང་། སྙིང་གའི་བླ་མ་ལ་དུས་རྒྱུན་གྱི་མོས་གུས་དང་དྲན་པ་ཏུ་རེ་བ་བྱས་པས་འོད་གསལ་རང་ཤུགས་ཀྱིས་ཟིན་པར་འགྱུར་ཞིང་། འཕོ་བ་དང་པོ་འབྱོངས་ངེས་ཞིག་སྦྱངས་ནས། ཕྱིས་ཐུན་བཞུག་གང་རིགས་ལ་མ་བརྗེད་ཙམ་གྱི་དམིགས་སྐོར་རེ་དྲན་ཙམ་བྱེད་ཅིང་། བར་དུ་ཐུན་མཚམས་ཐམས་ཅད་དུ་འདུན་པ་ཡོད་ཙམ་བྱ་ཞིང་། རྗེས་ཀྱི་འགྲོ་འཆག་ཉལ་འདུག་སོགས་དུས་རྒྱུན་དུ་དྲན་པར་བྱས་ནས། རང་ཡི་དམ་ལྷར་གསལ་བའི་སྤྱི་གཙུག་ཏུ་བླ་མ་དང་། སྣང་བ་བདེན་མེད་རྨི་ལམ་སྒྱུ་མའི་དྲན་འདུན་གྱི་ངང་མ་ཤོར་བར་བྱེད་པ་ནི་གནད་དངོས་ཡིན་ཅིང་། མཐར་སྒྱུ་མ་ཙམ་དུ་འཛིན་པ་ལས་ལོག་ནས་གང་དུ་ཡང་འཛིན་པ་མེད་པའི་འོད་གསལ་
ཕྱག་རྒྱ་ཆེན་པོ་ལ་མཉམ་པར་བཞག་པར་བྱའོ། །དེ་ལྟར་རགས་པའི་ཐུན་ཚད་ངེས་པར་བྱས་ནས་དམིགས་པ་ཉུང་ངུར་དྲིལ་བ་ནི། མི་རྟག་པ་དྲན་ཤེས་ཀྱི་སྣང་བས་རྒྱུ་འཁྲུལ་ངེས་སུ་བྱས། ཕ་བླ་མ་ཕ་བླ་མ་རང་མཁྱེན་ཞེས་བརྗོད་པ་དང་ལྷན་དུ་རང་གི་སྤྱི་བོར་དྲིན་ཅན་རྩ་བའི་བླ་མ་ཇི་ལྟ་བ་སྒོམ། བདག་སོགས་མ་ནམ་མཁའ་དང་མཉམ་པའི་སེམས་ཅན་ཐམས་ཅད་སྐྱབས་གནས་ཀུན་འདུས་བླ་མ་ལ་སྐྱབས་སུ་མཆིའོ། །ཅེས་ཅི་མང་དང་། མཐར་བླ་མ་རིན་པོ་ཆེ་བདག་གི་ནད་གདོན་ཞི་བར་མཛད་དུ་གསོལ། །སྡིག་སྒྲིབ་དག་པར་མཛད་དུ་གསོལ། །ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེ་བར་མཛད་དུ་གསོལ། །ཞེས་གསོལ་བ་བཏབ་པས་བླ་མ་
འོད་ཞུ་རང་ལ་ཐིམ་པས་ཐོད་པའི་ནང་དུ་ཆོས་འབྱུང་དཀར་པོ་གདེངས་ཁ་ཆེ་བ་གྱེན་བསྟན་གྱི་ཁ་ཐད་ཀྱི་བར་དུ་སེམས་ཉིད་ཨ་དཀར་པོ་ལ་རྩེ་གཅིག་ཏུ་སེམས་གཏད་ནས། དང་པོ་སྒྲིམ། བར་དུ་གློད། མཐར་སྙོམས་པར་བྱ། ཨ་ལས་བདུད་རྩི་བྱུང་བས་ལུས་ཀྱི་ཕྱི་ནང་བཀྲུས་སྡིག་སྒྲིབ་ནད་གདོན་ཐམས་ཅད་དག་པར་བསམ། རང་ཕྱི་རྡོ་རྗེ་རྣལ་འབྱོར་མ་ལ་ནང་དར་དམར་གྱི་རྐྱལ་པ་ཕུས་བཏབ་པ་ལྟ་བུའི་ནང་དུ་མེ་སྒོང་བཞི་སྒོམ། སྤྱི་བོར་བླ་མ་དང་བཅས་པ་སྒོམ་ལ། བླ་མ་རིན་པོ་ཆེ་བདག་ལ་བདེ་དྲོད་ཀྱི་ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་རླབས། བདེ་སྟོང་གི་ཏིང་ངེ་འཛིན་ཁྱད་པར་ཅན༴ །ཞེས་དང་། བདག་ལ་སྲིད་པའི་དབང་བསྐུར་དུ་གསོལ། །ཞེས་བརྗོད་རླུང་ཁ་
སྦྱར་ནས་འཕོ་བ་གཡས་གཡོན་དུ་བསྐོར་བས་མེ་སྒོང་འཐབས་པའི་མེ་སྟག་གི་གང་བ་ལ་དམིགས་པ་གཏད། ལུས་གནད་མེ་ཐབ་དྲུག་ཆིངས་ལ་ལུས་ཀྱི་ནང་དུ་རྩ་གསུམ་དང་། དབུ་མའི་ནང་དུ་ཆུད་པའི་རོ་རྐྱང་གི་འཛོམས་སུ་རཾ་ལས་མེ་རིལ་མ་ཙམ། འོག་ཏུ་རླུང་ལྗང་ཁྱིལ་བ་རྣམས་བསྒོམས་རླུང་བཟུང་བས་རླུང་གཡོས། མེ་ལྕེ་ཕྲ་བ་སྐེད་པ་ལྟེ་བ་དབུ་མའི་ནང་དུ་འབར་ཞིང་མཐར་ལུས་ནང་དུ་དབུ་མ་དང་། དེའི་ནང་མེ་ལྕེས་གང་བ་ལ་ཡིད་གཏད་པ་བླ་མའི་སྐུ་ལས་བདུད་རྩི་བབས་དབང་ཐོབ་མེ་དྲག་ཏུ་འབར་བར་བསམ་པ་གཏུམ་མོའི་ཉམས་ལེན་ཡིན། །སྒྱུ་ལུས་འཁོར་བ་ལ་སྐྱོ་ཤས་བསྐྱེད། རང་ཡི་དམ་དང་སྤྱི་བོར་བླ་མ་སྒོམ། བདག་འཛིན་བློས་
ཐོངས་པར༴ །དགོས་མེད་རྒྱུད་ལ་སྐྱེ་བར༴ །སྒྱུ་ལུས་རྨི་ལམ་འབྱོངས་པར༴ །འོད་གསལ་ཕྱག་རྒྱ་ཆེན་པོ་མངོན་དུ་འགྱུར་བར་མཛད་དུ་གསོལ། །ཞེས་ཅི་མང་གི་མཐར། བླ་མ་དང་རང་སེམས་བསྲེས་པ་དབང་པོ་རབ་ཡིན། འབྲིང་རང་ལུས་ལྷར་གསལ་བ་ལ་དམིགས་པ་གཏད་དེ། འདི་རང་གི་སེམས་སྣང་ཡིན། སྣང་ཡང་བདེན་པར་མ་གྲུབ་སྙམ་དུ་བསམ། ཐ་མས་ལྟེ་འོག་ཏུ་ཆོས་འབྱུང་ནང་དུ་རིགས་དྲུག་ཏུ་སྣང་བ་སྒྱུ་མ་རྨི་ལམ་དུ་ཐག་བཅད། རྗེས་ཐོབ་གང་ཤར་སྒྱུ་མ་ལམ་དུ་འཁྱེར། རྨི་ལམ་ལ་གསོལ་འདེབས་ནི། བླ་མ་རིན་པོ་ཆེ་བདག་གིས་རྨི་ལམ་ལ་རྨི་ལམ་དུ་ངོ་ཤེས་པར་མཛད་དུ་གསོལ། །རྨི་ལམ་འབྱོངས་པར་མཛད་དུ་གསོལ། ཡུལ་སྣང་གཏན་ལ་ཕེབས་
པར་མཛད་དུ་གསོལ། །ཞེས་གསོལ་བ་བཏབ་སྤྱི་བོའི་ཧཾ་དང་གསང་གནས་ཀྱི་ཧཱུྃ་ལས་ཐིག་ལེ་དཀར་དམར་ཆད་པ་སྙིང་གར་སླེབས། དུག་གསུམ་དག །འབྲོས་འདེད་དུ་འཁོར་བ་ལ་རྨི་ལམ་སྒྱུ་མའི་དྲན་འདུན། དབང་ཐོབ་པའི་དམིགས་པ་བྱས། མཐར་ཡལ་ནས་མི་དམིགས་པ་ལ་བློ་གཏད། ཡང་དཀར་དམར་སྣ་ནས་ཐོན་སྨིན་ཕྲག་ཏུ་འཁོར་ཡི་དམ་ཡབ་ཡུམ་དུ་གྱུར་པ་འཁོར་ཞིང་མཐར་ཡབ་ལ་ཡུམ་ཐིམ་ཡབ་འཇའ་ལྟར་ཡལ་བ་ལ་མི་དམིགས་པར་བཞག །ཡང་རང་གི་སྙིང་གར་ཐིག་ལེ་སྔོ་སྐྱའི་ནང་དུ་བླ་མ་སྒོམ་པ་དང་། རྟོག་བཅས་ལ་འཛིན་པ་ནི། མགྲིན་པར་ཨཾ་སྔོན་པོ་ལ་བློ་གཏད་དྲན་འདུན་བྱ། གཉིད་དུ་མ་སོང་བར་རྣམ་རྟོག་རགས་པ་འགགས། ཕྲ་བ་མ་འགགས་
པའི་བར་དེར་རྣམ་རྟོག་གང་བྱུང་ལ་རྨི་ལམ་གྱི་དྲན་འདུན་དང་། སྦྱོང་སྤེལ་གྱི་འདུན་པ་བཅུག་ནས་ཉལ་བས་རྨི་ལམ་ཟིན་པར་འགྱུར། རྨི་ལམ་འདུན་པའི་གནད་ཡིན་པས། ཅི་ཡིན་ལ་ཨ་མ་འཐས་པར་སྦྱངས། གང་དགོས་སུ་སྤེལ། ཅི་མཁོ་རུ་སྤྲུལ། མ་ངེས་པ་སྣ་ཚོགས་སུ་བསྒྱུར། ཞིང་ཁམས་སྣ་ཚོགས་སུ་བལྟ་བ་ལ་འདུན་པ་ཁ་བསྒྱུར། འོད་གསལ་ལ། བདག་འཛིན་བློས༴ །དགོས་མེད་རྒྱུད༴ །འོད་གསལ་ཕྱག་རྒྱ་ཆེན་པོ་མངོན་དུ་འགྱུར་བར་མཛད་དུ་གསོལ། །གསོལ་བ་བཏབ་རང་གི་ལུས་ནང་རྩ་དབུ་མ་ཚངས་བུག་དང་གསང་གནས་སུ་སླེབ་པའི་ལྟེ་འོག་སོར་བཞིའི་ནང་གི་བར་སྣང་དུ་ཨ་དཀར་པོ་ལས་འོད་འཕྲོས་པས་ཕྱི་ནང་ཐམས་ཅད་གསལ་སིང་ངེ་བ་ལ་མ་ཡེངས་ཙམ་དང་།
སྙིང་གར་བླ་མ་བསྒོམས་པས་ཐུགས་ཀར་ཧཱུྃ་དཀར་པོ་ལས་འོད་འཕྲོ་བ་ལ་འོད་གསལ་བཟུང་། ཐོད་པའི་འོག་ཀླད་རྒྱས་སྟེང་དུ་བདག་མེད་མ་མཚོན་གང་པའི་ཐུགས་ཀར་ཨ་དཀར་པོ་ལས་འོད་བྱུང་བས་ཀྱང་ཀླད་པ་སྦྱངས། ཐོད་པ་དཀར་ཁྲོལ་ལེ་བ་ལ་འདུན་པ་གཏང་། འཕོ་བ་སྦྱོང་དུས་རང་ཡིད་དམ་གྱི་སྤྱི་བོར་བླ་མ་བསྒོམས་ཏེ། ལྟེ་བར་ཆོས་འབྱུང་གྲུ་གསུམ་གྱི་གདེངས་ཁ་གྱེན་བསྟན་གྱིས་བདེ་འགྲོ་གསུམ། རྩ་བ་ཟུར་གསུམ་ཐུར་བསྟན་གྱིས་ངན་སོང་གི་སྐྱེ་སྒོ་བཅད་པའི་ནང་དུ། རྩ་དབུ་མ་ཡར་སྣ་ཚངས་བུག་ལ་ཟུག་ཅིང་བུ་ག་ཆེ་བར་བསམ། མར་སྣ་ཆོས་འབྱུང་གི་ནང་གི་དོག་མཚམས་ལ་ཟུག་པའི་ནང་གི་ལྟེ་འོག་སོར་བཞི་རང་སེམས་ཨ་དཀར་པོ་འོད་འཕྲོ་བ་འཕིར་ལ་ཁད་
པ་ཞིག་བསམས་ལ། བདག་འཛིན་བློས༴ །དགོས་མེད་རྒྱུད་ལ༴ །ལམ་མཆོག་འཕོ་བ་འབྱོངས་པར་བྱིན་གྱིས་བརླབ་ཏུ་གསོལ། །གསོལ་བ་བཏབ་ལྟེ་བ་གྱེན་དུ་བསྐྱོད་པས་ཨ་དབུ་མ་ནས་རྒྱངས་ཀྱིས་ཐོན། ནམ་མཁའ་ལ་ཡེ་རེ་རེ་སོང་ནས་འོད་དུ་གསལ་བར་བསམ། ཡང་རེ་ཞིག་ནས་ཨ་ནམ་མཁར་བྱུང་བ། དལ་པོས་བབས་ལྟེ་འོག་ཏུ་སྔར་མལ་དུ་སླེབས་པར་བསམ་ལ་ཡང་ཡང་སྦྱངས། མཐར་ཚངས་བུ་རྡོ་རྗེ་རྒྱ་གྲམ་གྱིས་བཀག་ནས་སེམས་མི་འཆུག་པར་བསམ། ལས་སྦྱོར་འཕོ་བ་ཐེབས་པར་གསོལ་བ་བཏབ། དམིགས་པ་ཨ་ནམ་མཁར་ཡལ་བ་ལ་ཡིད་གཏད་ལ་མར་མི་འབེབས་པ་གནད་ཡིན། བར་དོའི་ཉམས་ལེན་ལ། བདག་འཛིན་བློས་ཐོངས་པར༴ །དགོས་
མེད་རྒྱུད་ལ་སྐྱེ་བར༴ །བར་དོ་ལོངས་སྐུར་འཚང་རྒྱ་བར་གསོལ་བ་བཏབ། སྣང་བ་ལྷ། གྲགས་པ་སྔགས། རྨི་ལམ་སྒྱུ་མར་ཐག་བཅད། དབང་པོ་ཐ་མ་རང་གི་མདུན་དུ་ཆོས་འབྱུང་མཐིང་གའི་ནང་དུ་རང་སེམས་ཧཱུྃ། ཕྱི་གཡས་གཡོན་དུ་ཕོ་མོར་སྣང་བ་ཡི་དམ་ཡབ་ཡུམ་རྐྱང་རྐྱང་རེ་གསལ་བཏབ། ཧཱུྃ་ལས་འོད་འཕྲོས་སྐྱེ་གནས་ལྔའི་བག་ཆགས་སྦྱངས། མངལ་སྒོ་བཀག་པར་བསམ། བླ་མ་ཡི་དམ་སྒྱུ་ལུས་གསུམ་འབྲལ་མེད་ཉམས་སུ་བླངས་པས། མཆོག་གི་དངོས་གྲུབ་ཐོབ་པར་འགྱུར་རོ། །ཆོས་དྲུག་དམིགས་རིམ་མ་ལུས་པ། །ཐུན་བཞིར་ཉམས་སུ་ལེན་པའི་ཚུལ། །བླ་མའི་གསུང་བཞིན་ཡི་གེར་བཀོད། །དགེ་བས་འགྲོ་ཀུན་སྒྲིབ་བྱང་ནས། །ཟབ་མོའི་ལམ་མཆོག་འདིར་ཞུགས་ཏེ། །
བདེ་ཆེན་བཅུ་བཞིའི་ས་ཐོབ་ཤོག།ཅེས་པ་འདི་ངག་གི་དབང་པོས་སྡེབས། །