ནི་གུ་ཆོས་དྲུག་བརྒྱུད་པའི་གསོལ་འདེབས་ལམ་རིམ་བསྡུས་དོན་དང་བཅས་པ། ཀུན་དགའ་ལྷུན་གྲུབ།
ནི་གུ་ཆོས་དྲུག་བརྒྱུད་པའི་གསོལ་འདེབས་ལམ་རིམ་བསྡུས་དོན་དང་བཅས་པ་བཞུགས་སོ། །ཨོཾ་སྭ་སྟི། །ཁྱབ་བདག་དང་པོའི་སངས་རྒྱས་རྡོ་རྗེ་འཆང་། །ཡེ་ཤེས་སྒྱུ་མའི་གར་སྒྱུར་ནི་གུ་མ། །མཁས་གྲུབ་ཆེན་པོ་ཁྱུང་པོ་རྣལ་འབྱོར་པ། །གསོལ་བ་འདེབས་སོ་བདག་རྒྱུད་བྱིན་གྱིས་བརླབས། །ཟབ་ལམ་རྣལ་འབྱོར་མཐར་ཕྱིན་རྨོག་ལྕོག་པ། །ཐུགས་རྗེ་ཆེན་པོ་དབོན་སྟོན་སྐྱེར་སྒང་པ། །ཆོས་སྲུང་བྲན་འཁོལ་གཉན་སྟོན་ཆེན་པོའི་ཞབས། །གསོལ་བ༴ །འགྲོ་བའི་མགོན་པོ་སངས་རྒྱས་སྟོན་པའི་ཞབས། །མཁས་གྲུབ་ཆེན་པོ་གཙང་པ་ཤངས་སྟོན་པ། །མཁས་བཙུན་དབང་པོ་རྒྱལ་མཚན་འབུམ་པ་ལ། །གསོལ་བ༴ །ཁྱུང་པོའི་རིགས་འཁྲུངས་ཚུལ་ཁྲིམས་མགོན་པོ་དང་། །བྱ་བཏང་རྣལ་
འབྱོར་རི་ཁྲོད་རས་ཆེན་ཞབས། །སྤྲུལ་པའི་སྐུ་མཆོག་བུདྡྷ་བཛྲ་ལ། །གསོལ་བ༴ །ཕ་རྒོད་དབང་པོ་ཐར་པ་དཔལ་བཟང་པོ། །དྲིན་ཅན་བླ་མ་སངས་རྒྱས་རྣམ་རྒྱལ་དང་། །བསྟན་པའི་སྲོག་ཤིང་བློ་གསལ་རྒྱ་མཚོ་ལ། །གསོལ་བ༴ །འཇམ་དཔལ་དབྱངས་དངོས་མཁྱེན་བརྩེའི་དབང་ཕྱུག་དང་། །ཁྱབ་བདག་བླ་མ་དབང་ཕྱུག་རབ་བརྟན་པ། །འཁོར་ལོའི་མགོན་པོ་རྗེ་བཙུན་བཀའ་འགྱུར་བ། །ཉམས་རྟོགས་མངའ་བདག་ངག་དབང་རྣམ་རྒྱལ་ལ། །གསོལ་བ༴ །བྱམས་པ་ངག་དབང་བསོད་ནམས་རྒྱལ་མཚན་དང་། །ངག་དབང་བློ་གསལ་བསྟན་པ་རབ་རྒྱས་རྗེ། །ཆོས་འདིའི་དྲིན་སྩོལ་རྩ་བའི་བླ་མ་ལ། །གསོལ་བ༴ ། ངག་གི་དབང་ཕྱུག་འགྲོ་བ་ཀུན་གྱི་གཉེན། །དགའ་བཞིའི་ལམ་སྟོན་གསུམ་ལྡན་རྡོ་རྗེ་འཛིན།
། ལྷུན་གྲུབ་ཕྲིན་ལས་བཟང་པོ་དྲིན་ཅན་རྗེ། །གསོལ་བ༴ ། ཐབས་ལམ་ཟབ་མོ་བདེ་དྲོད་མཐར་ཕྱིན་ནས། །སྒྱུ་ལུས་རྨི་ལམ་སྤྲུལ་བསྒྱུར་རྩལ་འབྱོངས་ཏེ། །འོད་གསལ་ཆེན་པོ་གཏི་མུག་མུན་སངས་བའི། །ཉམས་ལེན་མཆོག་གིས་མཁའ་སྤྱོད་བགྲོད་པར་ཤོག།ཚེ་འདིར་གྲུབ་མཐའ་སྙོགས་པར་མ་གྱུར་ན། །མ་བསྒོམ་སངས་རྒྱས་འཕོ་བའི་རྣལ་འབྱོར་གྱིས། །དག་པའི་ཞིང་དུ་ཐོགས་མེད་མྱུར་བགྲོད་དེ། །བར་དོ་ལོངས་སྐུ་མངོན་དུ་འགྱུར་བར་ཤོག།བརྩེ་ཆེན་བླ་མ་རྣམས་ཀྱི་ཐུགས་རྗེ་དང་། །སྐྱབས་ཆེན་བསླུ་བ་མེད་པའི་བདེན་པའི་མཐུས། །ཇི་ལྟར་སྨོན་པའི་འབྲས་བུ་མ་ལུས་པ། །ཐོགས་མེད་མྱུར་དུ་འགྲུབ་པའི་བཀྲ་ཤིས་ཤོག།ཅེས་ནི་གུ་ཆོས་
དྲུག་བརྒྱུད་པའི་གསོལ་འདེབས་ལམ་རིམ་མདོར་བསྡུས་དང་བཅས་པ་འདི་ཡང་ཆོས་སྡེ་ཆེན་པོ་སྐྱོར་མོ་ལུང་གི་མཁན་རིན་པོ་ཆེ་ཨ་ཆི་ཐུ་ཆེན་ནོ་མོན་ཁང་གི་གསུང་གིས་བསྐུལ་མ་གནང་ངོར་ཕྱོགས་མེད་བྱ་བྲལ་ཀུན་དགའ་ལྷུན་གྲུབ་པས་དབེན་གནས་རྨོར་དགོན་པར་སུག་བྲིས་སུ་བཏབ་པའོ། །།