ནཻ་གུའི་བརྒྱུད་པའི་གསོལ་འདེབས།
ནཻ་གུའི་བརྒྱུད་པའི་གསོལ་འདེབས་བཞུགས་སོ།། །།
ཨེ་ཡིག་ཆོས་ཀྱི་འབྱུང་གནས་ཕོ་བྲང་དུ། །ཨ་དཀར་ཟག་མེད་བདུད་རྩིའི་ཆུ་རྒྱུན་གྱིས། །ཨ་བྷི་ཥིཉྩ་སེམས་ཀྱི་དྲི་མ་འཁྲུད། །ཨ་ཧཾ་མི་ཕྱེད་བདེ་སྟོང་རྡོ་རྗེ་འཆང་། །གསོལ་བ་འདེབས་སོ་བདག་ལ་བྱིན་གྱིས་རློབས། །དག་བྱེད་སྟོང་རའི་རྣལ་འབྱོར་སྒོམས་པའི་མཐུས། །འགལ་རྐྱེན་ནད་གདོན་སྡིག་སྒྲིབ་སྦྱང་བ་དང་། །མཐུན་རྐྱེན་རྟགས་གསུམ་
ཅི་རིགས་ཤར་ན་ཀྱང་། །ཏིང་འཛིན་མྱུར་དུ་སྐྱེ་བར་བྱིན་གྱིས་རློབས། །མི་རྟོག་གཏུམ་མོས་རྣམ་རྟོག་བུད་ཤིང་བསྲེག།བདེ་བའི་གཏུམ་མོས་སྡུག་བསྔལ་ཚང་ཚིང་འཇོམས། །ཟུང་འཇུག་གཏུམ་མོ་ཡེ་ཤེས་མེ་ལྕེ་འབར། །གཏུམ་མོ་མཐར་ཕྱིན་མཁའ་འགྲོ་ནཻ་གུ་མ། །གསོལ་བ་འདེབས་སོ་བདག༴ །ཟས་དང་
གོས་དང་སྟན་གྱིས་རྣལ་འབྱོར་གྱིས། །སྤྱོད་ལམ་ཀུན་ཏུ་གཏུམ་མོ་འབྲལ་མེད་ཅིང་། །སྲིད་པའི་དབང་ཐོབ་གེགས་ཀུན་རང་སར་གྲོལ། །རླུང་འབྱོངས་བདེ་དྲོད་འབར་བར་བྱིན་གྱིས་རློབས། །སྣང་བ་སྒྱུ་མར་རྟོགས་པས་ཆགས་སྡང་གྲོལ། །རང་སེམས་སྒྱུ་མར་ཤར་བས་འཁྲུལ་པ་དག།རྨི་འཛིན་སྒྱུ་མར་གསལ་བས་འོད་གསལ་ཤར། །སྒྱུ་མའི་དོན་རྟོགས་ཁྱུང་པོ་རྣལ་འབྱོར་ལ། །གསོལ་བ་འདེབས་སོ༴ །ཡང་རབ་བླ་མའི་མོས་གུས་འབྲལ་མེད་ཅིང་། །འབྲིང་གི་བརྗོད་བྲལ་བར་མ་ཆད་དུ་བསྒོམ། །ཐ་མས་ཀུན་ཀྱང་སྒྱུ་མར་སྦྱངས་ནས་ནི། །ཞེན་མེད་རང་སར་གྲོལ་བར༴ །རྨི་ལམ་ལྟ་བུར་ཆོས་ཀུན་ཐུགས་སུ་ཆུད། །རྨི་ལམ་
ཉིད་ཀྱང་བདེན་མེད་སྒྱུ་མར་གཟིགས། །རྨི་ལམ་སྒྱུ་མའང་འོད་གསལ་གནས་འགྱུར་ཏེ། །རྨི་ལམ་མཐར་ཕྱིན་མཉམ་མེད་རྨོག་ལྕོག་པ། །གསོལ་བ་འདེབས་སོ༴ །འདུན་པའི་གནད་ཀྱིས་རྨི་ལམ་བཟུང་ནས་ནི། །སྦྱང་དང་སྤེལ་དང་སྤྲུལ་བསྒྱུར་སྣ་ཚོགས་ཀྱིས། །ཡུལ་སྣང་རྣམ་བཞི་གཏན་ལ་ཕབ་ནས་ཀྱང་། །གསལ་སྟོང་འཛིན་མེད་འཆར་བར༴ །གསལ་སྟོང་ཞེན་མེད་འོད་གསལ་རང་ཤར་གྱིས། །ཟབ་ཞི་སྤྲོས་བྲལ་འོད་གསལ་མཐར་སྦྱངས་ནས། །བདེ་ཆེན་མཐར་ཐུག་འོད་གསལ་མངོན་འགྱུར་ཏེ། །འོད་གསལ་དག་པ་གཉིས་ལྡན་སྐྱེར་སྒང་པ། །གསོལ་བ་འདེབས་སོ༴ །འོད་གསལ་བཟུང་ཞིང་ལམ་དུ་འཁྱེར་
བ་དང་། །བསྲེ་འཕོའི་གནད་ཀྱིས་གེགས་སེལ་བོགས་འདོན་ཞིང་། །དམ་ཚིག་མ་ཉམས་འཆར་སྒོ་ངོས་ཟིན་ནས། །འོད་གསལ་ཉམས་མྱོང་འབྱོངས་པར༴ །ཆོས་སྐུར་འཕོ་བས་སྒྱུ་མ་ལམ་དུ་འཁྱེར། །ཟུང་འཇུག་འཕོ་བས་ཡི་དམ་ལམ་དུ་འཁྱེར། །བྱིན་རླབས་འཕོ་བས་བླ་མ་ལམ་དུ་འཁྱེར། །འཕོ་བའི་ལམ་ལ་མངའ་བརྙེས་གཉན་སྟོན་པ། །གསོལ་བ་འདེབས་སོ༴ །ལམ་འཁྱེར་གསུམ་གྱིས་འཕོ་བ་མཐར་ཕྱིན་ནས། །འཆུག་མེད་མཁའ་སྤྱོད་གནས་སུ་འཁྲིད་པ་དང་། །མཐར་ཐུག་རྒྱལ་བ་ལོངས་སྤྱོད་རྫོགས་པའི་སྐུ། །འབད་མེད་ལྷུན་གྱིས་གྲུབ་པར་བྱིན་གྱིས་རློབས། །རྨི་ལམ་བར་དོར་སྤྲུལ་སྐུ་མཐར་སྦྱངས་པས། །སྐྱེ་ཤི་བར་དོར་
འོད་གསལ་རྒྱུན་ཆད་མེད། །སྲིད་པ་བར་དོར་རང་ཤར་ལྷུན་གྱིས་གྲུབ། །བར་དོ་རང་དག་ཆེན་པོ་སྟོན་པ་ལ། །གསོལ་བ་འདེབས་སོ༴ །འཇིགས་པའི་སྒྲ་བཞི་ཡ་ངའི་གཡང་ས་སོགས། །བར་དོའི་འཕྲང་དུ་འཆུག་མེད་ཐབས་ཀྱི་གནད། །སྤྱི་གནར་གསུམ་གྱིས་འཇིགས་པ་རང་སར་དག།སྐུ་གསུམ་མངོན་དུ་འགྱུར་བར༴ ། ཕྱི་རོལ་ཡུལ་རྣམས་སྣང་སྟོང་རྒྱས་བཏབ་ཅིང་། །ནང་གི་སེམས་ཉིད་གསལ་སྟོང་རྒྱ་ཡིས་བཏབ། །རང་ལུས་ཆོས་ཀུན་བདེ་སྟོང་རྒྱས་བཏབ་ནས། །ཕྱག་རྒྱ་ཆེན་པོའི་དོན་རྟོགས་ཤངས་སྟོན་ལ། །གསོལ་བ་འདེབས་སོ༴ །སྔོན་འགྲོ་རང་བབས་རྣམ་གསུམ་གནད་ལ་དབབ། །དངོས་གཞི་སྐྱོན་
བཞི་ལས་གྲོལ་ཉམས་ལེན་གྱིས། །མཐར་ཐུག་སྐུ་བཞི་རང་ཤར་ལྷུན་གྱིས་གྲུབ། །ཕྱག་ཆེན་གནས་ལུགས་རྟོགས་པར༴ །སྣང་བའི་རོལ་པ་བླ་མའི་ཡི་དམ་སྐུ། །གྲགས་སྟོང་བརྗོད་བྲལ་ཡན་ལག་དྲུག་བཅུའི་གསུང་། །གསལ་སྟོང་འཛིན་མེད་བདེ་གསལ་མི་རྟོག་ཐུགས། །ལམ་འཁྱེར་མཐར་ཕྱིན་ཁྱུང་པོ་ཚུལ་ཁྲིམས་མགོན། །གསོལ་བ་འདེབས་སོ༴ །སྤྱོད་ལམ་ཀུན་ཏུ་སྣང་བ་སྣ་ཚོགས་ཀུན། །བླ་མ་ཡི་དམ་སྒྱུ་མ་ལམ་ཁྱེར་ནས། །སེམས་ཉིད་འོད་གསལ་འཛིན་མེད་གནད་ཀྱིས་ནི། །མཚན་རྟོག་རང་སར་གྲོལ་བར༴ །མཁའ་འགྲོའི་དབང་མོ་བྱེ་བའི་ཞལ་གྱིས་ལུང་། །མཁའ་འགྲོའི་དབང་ཕྱུག་མཆེད་ལ་ལེགས་བརྒྱུད་པའི། །མཁའ་འགྲོའི་
གསང་ཚིག་ནཻ་གུ་སུ་ཀའི་ཆོས། །མཁའ་འགྲོའི་རྗེས་བཟུང་མཚན་ལྡན་རི་ཁྲོད་པ། །གསོལ་བ་འདེབས་སོ༴ །མཁའ་སྤྱོད་དཀར་དམར་བསྐྱེད་རྫོགས་ཟུང་འཇུག་ལམ། །མཁའ་སྤྱོད་རིལ་བུའི་སྒྲུབ་པ་མཐར་ཕྱུང་ནས། །མཁའ་སྤྱོད་འཕོ་བའི་ཏིང་འཛིན་ཉེ་ལམ་གྱིས། །མཁའ་སྤྱོད་ཞིང་དུ་བགྲོད་པར༴ །རང་ལུས་ལྷ་སྐུ་སྣང་སྟོང་མཐའ་དང་བྲལ། །སེམས་ཉིད་འཛིན་མེད་འོད་གསལ་ལྷུན་གྱིས་གྲུབ། །འཆིང་བར་བྱེད་པའི་རང་སར་དག་གྱུར་ཏེ། །འཆི་མེད་དོན་རྟོགས་མཁྱེན་ལྡན་ཤངས་དཀར་བ། །གསོལ་བ་འདེབས་སོ༴ ། བློས་བྱས་རྩོལ་བའི་དྲི་མས་མ་གོས་ཤིང་། །ཐ་མལ་ཞེན་པའི་འཛིན་པ་རང་དག་ནས། །སྣང་ལ་རང་བཞིན་
མེད་པ་ལྷའི་སྐུ། །རང་སེམས་འཆི་མེད་རྟོགས་པར༴ །བར་དོའི་སྲིད་པ་ལག་མཐིལ་སྤུ་ཇི་བཞིན། །མ་འདྲེས་ཡེ་ཤེས་སྤྱན་གྱིས་ལེགས་གཟིགས་ནས། །སྙིང་རྗེས་འགྲོ་དྲུག་སེམས་ཅན་ཐམས་ཅད་ཀྱང་། །ཐར་པའི་ལཾ་དུ་འཁྲིད་མཛད་སངས་རྒྱས་དཔལ། །གསོལ་བ་འདེབས་སོ༴ །རྣམ་མང་འགྲོ་བའི་སྐྱེ་སྒོ་མཐའ་ཡས་པ། །རྣམ་དག་ལྷའི་འཁོར་ལོས་ལེགས་སྦྱངས་ནས། །རྣམ་པར་མྱོང་བའི་ལས་སྒྲིབ་ཀུན་བསལ་ཏེ། །འཆུག་མེད་ལོངས་སྐུ་ཐོབ་པར༴ །རོ་རྐྱང་ཉི་ཟླའི་བགྲོད་པ་དྷུ་ཏི་རུ། །ཡོངས་སུ་འཇུག་པའི་བཙན་ཐབས་སྦྱོར་བ་ཡིས། །ལས་རླུང་རྒྱུ་བའི་གྲོང་ཁྱེར་ཀུན་བཅོམ་པའི། །གྲུབ་པའི་དབང་ཕྱུག་ནམ་མཁའ་རྒྱལ་མཚན་ལ། །གསོལ་བ༴ །ཕྱག་རྒྱ་
བཅིང་གྲོལ་བུམ་ཅན་ཤིང་རྟ་ཅན། །ལུས་སེམས་འཆི་མེད་གྲུབ་པའི་འཁྲུལ་འཁོར་གྱིས། །ཆགས་ཅན་རྣལ་འབྱོར་ཕོ་ཉའི་མྱུར་ལམ་ལས། །འཇའ་ལུས་མངོན་སུམ་འགྲུབ་པར༴ །ཞི་བའི་དབྱིངས་ལས་ཐུགས་རྗེ་ཁྲོས་པའི་གར། །མྱུར་མཛད་ཡེ་ཤེས་མགོན་པོའི་སྐུར་བཞེངས་ནས། །བར་ཆད་བདུད་དཔུང་གཡུལ་ལས་ལེགས་རྒྱལ་བའི། །རྒྱ་སྒོམ་བླ་མ་མགོན་པོ་དབྱེར་མེད་ལ། །གསོལ་བ་འདེབས་སོ༴ །ལས་བཞིའི་ཕྲིན་ལས་སྒྲུབ་པའི་བསྲུངས་མའི་ཚོགས། །དུས་ལས་མི་འདའ་བྲན་དུ་འཁོལ་ནུས་ཤིང་། །སྲིད་འཕེལ་ཕན་བདེའི་དཔལ་གྱིས་བསྐལ་བཟང་རྣམས། །རེ་བ་ཡིད་བཞིན་འགྲུབ་པར་བྱིན་གྱིས་རློབས། །དུས་གསུམ་རྒྱལ་བའི་ཐུགས་
བསྐྱེད་རྨད་བྱུང་དང་། །རྒྱལ་སྲས་སེམས་དཔའི་རླབས་ཆེན་མཛད་པ་དང་། །བསྟན་འཛིན་སྐྱེས་བུ་ཀུན་གྱི་ལྟ་སྤྱོད་ལ། །རྗེས་སུ་ཡི་རང་མཐར་ཕྱིན་གྲོལ་མཆོག་ལ། །གསོལ་བ་འདེབས་སོ་བདག་ལ་བྱིན་གྱིས་རློབས། །ཐར་པའི་ལམ་སྟོན་དགེ་བའི་བཤེས་གཉེན་དང་། །ཐར་པའི་ལམ་མཆོག་ཡང་དག་དམ་པའི་ཆོས། །ཐར་པའི་ལམ་དུ་ཆས་པའི་མཆེད་གྲོགས་ལ། །དག་སྣང་ཕྱོགས་མེད་འབྱོངས་པར་བྱིན་གྱིས་རློབས། །རྩ་བ་ནེ་གུ་ཆོས་དྲུག །སྡོང་པོ་ཕྱག་རྒྱ་ཆེན་པོ། ཡལ་ག་ལམ་ཁྱེར་རྣམ་གསུམ། མེ་ཏོག་མཁའ་སྤྱོད་དཀར་དམར། འབྲས་བུ་འཆི་མེད་འཆུག་མེད་ཀྱི་གོ་རིམས་བཞིན་སྦྱར། །
ན་མོ་གུ་རུ། །ཟུང་འཇུག་གི་རྒྱལ་སྲིད་སྐྱོང་བའི་ས། །གནས་འོག་མིན་ཆོས་ཀྱི་ཕོ་བྲང་དུ། །སངས་རྒྱས་རྡོ་རྗེ་འཆང་ཆེན་ལ་གསོལ་བ་འདེབས། །ཡུམ་ལྟེ་བའི་ཨ་ཤད་མེ་འོད་ཀྱིས། །ཡབ་སྤྱི་བོའི་ཧྃ་ཡིག་ལེགས་བཞུས་ཏེ། །བདེ་སྟོང་ཡེ་ཤེས་སུ་འཆར་བར་བྱིན་གྱིས་རློབས། །གསང་ཆེན་གར་གྱི་རོལ་པའི་ས། །གནས་སེང་ལྡེང་འཁྲིགས་པའི་ནགས་ཚལ་དུ། །ཡེ་ཤེས་མཁའ་འགྲོ་ནི་གུ་ལ་གསོལ་བ་འདེབས། །ལམ་བདེན་མེད་ཀྱི་དྲན་འདུན་དྲག་པོའི་མཐུས། །ཆོས་སྣང་གྲགས་ཀྱི་རོལ་པ་ཇི་སྙེད་པ། །སྒྱུ་མའི་རང་སྣང་དུ་འཆར་བར༴ །གཞན་ཕན་གྱི་འཁོར་ལོ་བསྐོར་བའི་ས། །དཔལ་རི་བོ་ཆེ་ཡི་རྩེ་མོ་རུ། །གྲུབ་ཐོབ་ཐང་སྟོང་རྒྱལ་པོ་ལ༴ །སྔགས་
དབང་བཞིའི་དགོས་འདོད་ཀུན་ཚང་བའི། །གནད་ཐིག་ལེ་དཀར་དམར་གྱི་འབྲོས་འདེད་ཀྱིས། །རྨི་ལམ་ཟིན་ཅིང་འབྱོང་བར་བྱིན༴ །རྣམ་གཡེངས་དང་འདུ་འཛི་དབེན་པའི་ས། །གནས་རང་བྱུང་བྲག་གི་ཕུག་པ་རུ། །རས་ཆུང་བསོད་ནམས་རྒྱལ་མཚན་ལ་གསོལ༴ །ལམ་འབྲལ་མེད་ཀྱི་མོས་གུས་ཆེན་པོའི་མཐུས། །གཞི་སྐྱེ་མེད་ཀྱི་འོད་གསལ་མངོན་གྱུར་ནས། །གཏི་མུག་མུན་པ་སངས་བར་བྱིན༴ །དཔའ་བོ་མཁའ་འགྲོ་འདུ་བའི་ས། །གངས་དཀར་གྱི་རྒྱལ་པོ་ཏི་སེ་རུ། །རྣལ་འབྱོར་བསོད་ནམས་རྒྱ་མཚོ་ལ༴ །རྟེན་དྭངས་གསལ་ཨ་དཀར་དྲི་མ་མེད། །སྒོ་ཚངས་པའི་ལམ་ནས་རྒྱང་ཐོན་ཏེ། །མཁའ་སྤྱོད་གོ་འཕང་ཐོབ་པར༴ ། ཟབ་རྒྱས་ཆོས་སྒྲ་སྒྲོགས་པའི་ས། །གནས་ཆོས་
ལུང་བྱང་རྩེའི་ཕོ་བྲང་དུ། །འཇམ་མགོན་གྲུབ་པའི་དཔའ་བོ་ལ༴ །སེམས་སྐྱོ་ཤས་ངེས་འབྱུང་གི་ལེགས་བསྐུལ་ནས། །གནས་འཁོར་བའི་མངལ་སྒོ་ཀུན་བཀག་སྟེ། །བར་དོ་ལོངས་སྤྱོད་རྫོགས་སྐུ་རུ་བྱིན༴ །ལྷན་སྐྱེས་ཀྱི་ཡེ་ཤེས་བསྐྱངས་བའི་ས། །གནས་གྲུབ་རི་བསམ་གཏན་ཁང་བུ་རུ། །སྐལ་བཟང་འགྱུར་མེད་བདེ་ཆེན་ལ༴ །ཆོས་གསུང་རབ་ཀྱི་རྒྱ་མཚོ་ཆེན་པོ་ལས། །དོན་ཟབ་ལམ་གྱི་ནོར་བུ་ལེགས་བླངས་ནས། །མཆོག་གི་དངོས་གྲུབ་ཐོབ་པར་བྱིན༴ །བཤད་སྒྲུབ་ཀྱི་བསྟན་པ་བསྐྱངས་པའི་ས། །གནས་མང་མཁར་དགོན་གསར་གྱི་དགོན་པ་རུ། །དྲིན་ཆེན་ངག་དབང་ཆོས་གྲགས་ལ༴ །བཀའ་མདོ་རྒྱུད་ཀྱི་ལྷ་ལམ་ཡངས་པ་ལས། །ཆོས་ལེགས་བཤད་ཀྱི་སྦྲང་ཆར་རྒྱུན་མི་
ཆད། །ཕན་བདེའི་མེ་ཏོག་སྐྱེ་བར་བྱིན༴ །མཆོག་གསུམ་གྱི་ཐུགས་རྗེའི་སྐྱབ་ཆུབ་པའི། །གནས་གར་བཞུགས་ཆོས་ཀྱི་ཕོ་བྲང་དུ། །ངག་དབང་བསོད་ནམས་རྒྱལ་མཚལ་ལ༴ །གཞི་ཚུལ་གནས་ཐོས་བསམ་བསྒོམ་པའི་མཐུས། །ལམ་ཡངས་ཟབ་ཀྱི་གདམས་པ་ལ་བརྟེན་ནས། །དོན་གཉིས་ལྷུན་གྱིས་གྲུབ་པར་བྱིན༴ །སྙན་བརྒྱུད་ཀྱི་བསྟན་པ་སྤེལ་བའི་ས། །གནས་གསང་སྔགས་བདེ་ལྡན་གྱི་བྲག་ཕུག་ཏུ། །ངག་དབང་བསྟན་པ་རབ་རྒྱས་ལ༴ །གཞི་སྔོན་གྱི་སྦྱོངས་ཤུག་མཐུ་བལྟས་པས། །ལམ་རང་བབས་གསུམ་གྱི་ཕ་རོལ་སོན། །འབྲས་བུ་སྐུ་གསུམ་རྟོགས་པར་བྱིན༴ །ཐེག་ཆེན་གྱི་ངེས་གསང་སྒྲོགས་པའི་ས། །གནས་སྤྲོ་མོ་ལུང་གི་དབེན་གནས་སུ། །རྗེ་བཙུན་བསོད་ནམས་ཆོས་
འཕེལ་ལ་གསོལ་བ་འདེབས། །སྦྱོང་བྱ་སྦྱོང་བྱེད་འབྲེལ་པ་ལས། །འཁྲུལ་མཚན་གྱི་སྤྲོས་པ་དབྱིངས་སུ་དག།ངོ་བོ་ཉིད་སྐུ་འགྲུབ་པར་བྱིན་གྱིས་རློབས། །སརྦ་མངྒ་ལཾ་བྷ་བ་ཏུ། །