གཉིས་པ་ཐུན་མོང་མ་ཡིན་པ་ཤོག་དྲིལ་བསྐོར་ལ་ཤོག་དྲིལ་དང་བསྲུང་འབྲི་ཐབས་རྡོ་རྗེའི་གོ་ཆ་བླ་མ་ཤངས་པ་ལོ་ཙ་བ་ལ་ནག་པོ་ཆེན་པོ།
གཉིས་པ་ཐུན་མོང་མ་ཡིན་པ་ཤོག་དྲིལ་བསྐོར་ལ་ཤོག་དྲིལ་དང་བསྲུང་འབྲི་ཐབས་རྡོ་རྗེའི་གོ་ཆ་བླ་མ་ཤངས་པ་ལོ་ཙ་བ་ལ་ནག་པོ་ཆེན་པོ་པ་བཞུགས་སོ། །
༼ཛུ༽ ན་མོ་མ་ཧཱ་ཀཱ་ལ་ཡེ། །འདི་ཡི་སྒོ་ནས་བསྲུང་བ་བྱ་བ་ནི། །གྷི་ཝཾ་གུར་གུམ་ལ་སོགས་པས། །འཁོར་ལོ་རྩིབས་བརྒྱད་མུ་ཁྱུད་བཅས། །ལེགས་བྲིས་དེ་ཡི་ལྟེ་བ་ལ། །ཨོཾ་བཛྲ་མ་ཧཱ་ཀཱ་ལ་ཀྵེཾ་ཀྵེ་ཏྲ་བིག་ནན་བི་ན་ཡ་ཀ་ཧཱུྃ་ཧཱུྃ་ཆེ་གེ་མོ་ལ་རཀྵ་རཀྵ་སྭཱ་ཧཱ། །ཞེས་བཀོད་སླད་ཡང་རྩིབས་བརྒྱད་ལ། །ཡི་གེ་མགོ་བོ་ཕྱིར་བསྟན་ནས། །གསང་སྔགས་དེ་ཉིད་རྩིབས་རེ་ལ། །ཚར་རེ་ལེགས་པར་བྲི་བར་བྱ། །ལྟེ་བའི་དབུས་སུ་ཧཱུཾ་ཡིག་ལ། །མདུན་ནས་བརྩམ་སྟེ་གཡས་བསྐོར་དུ། །གོང་གི་གསང་སྔགས་བྲི་བར་ཤེས། །ཨོཾ་ནས་སྨ་ར་སི་ཏ་དང་། །ཞེས་པའི་བར་དུ་རྫོགས་པའི་མཐར། །མ་མའམ་ཆེ་གེ་འདི་ཉིད་ལ། །རཀྵ་རཀྵ་
སྭཱ་ཧཱ་ཞེས། །མདུན་ནས་བརྩམས་ཏེ་གཡས་བསྐོར་དུ། །མུ་ཁྱུད་དག་ལ་བྲི་བར་བྱ། །དེ་ཡི་ཕྱི་རོལ་བྲི་བྱ་བ། །གྲི་གུག་རྩེ་མོ་ཕྱིར་བལྟས་པའི། །མཚོན་ཆའི་འཁོར་ལོ་སྔོན་པོ་བྱ། །དེ་ཡི་ཕྱི་རོལ་མེ་རི་བྲི། །དེ་ནས་རབ་གནས་བྱ་བ་ནི། །མདུན་དུ་མཆོད་རྫས་གཏོར་མ་བཤམས། །རང་ལྷའི་ང་རྒྱལ་ལྡན་པ་ཡི། །འཁོར་ལོ་བསངས་སྦྱངས་སྟོང་པར་གྱུར། །དེ་ལས་བྷྲཱུཾ་ཡིག་ཡོངས་གྱུར་པའི། །འཁོར་ལོ་འོད་ཟེར་འབར་བ་བསམ། །དེ་སྟེང་པཾ་ལས་པདྨ་དང་། །རཾ་ལས་ཉི་མའི་དཀྱིལ་འཁོར་དང་། །དེའི་སྟེང་དུ་ཡི་གེ་རྣམས། །འོད་ལྡན་འབར་ཞིང་བགྲོད་པར་བསམ། །དེ་དག་རྣམས་དང་རང་ཉིད་ཀྱིས། །
ཐུགས་ཀའི་ཧཱུྃ་གི་འོད་ཟེར་གྱི། །ཤར་ལྷོ་མཚམས་ཀྱི་དུར་ཁྲོད་ནས། །ཡེ་ཤེས་མགོན་པོ་སྤྱན་དྲངས་ལ། །སྔགས་ལ་ཐིམ་པའི་ཡི་གེ་རྣམས། །ཡོངས་སུ་གྱུར་པ་མགོན་པོར་བསྐྱེད། །སྐུ་མདོག་ཕྱག་མཚན་གསལ་བར་བསྒོམ། །དེའི་ཐུགས་ཀར་སྔགས་བཀོད་ལ། །ཞལ་ནས་ཞལ་དུ་འཁོར་བར་བསམ། །སྔགས་གཉིས་སྤེལ་ཚིག་བཅས་པ་རྣམས། །བརྒྱ་རྩ་བརྒྱད་དུ་བཟླས་པ་བྱ། །མཆོད་དང་གཏོར་མ་ནང་མཆོད་འབུལ། །བསྟོད་ནས་སྐབས་ཀྱི་ཕྲིན་ལས་བཅོལ། །མགོན་པོ་འོད་དུ་ཞུ་བ་ལས། །བྲིས་པའི་ཡིག་འབྲུའི་རྣམ་པར་གྱུར། །སླར་ཡང་སྔགས་ལས་འོད་འཕྲོས་ཏེ། །ཕྱོགས་བཅུའི་སངས་རྒྱས་ཐམས་
ཅད་ཀྱིས། །ཡེ་ཤེས་སྔགས་ཀྱི་རྣམ་པར་བཀུག །བྲིས་པ་དེ་ལ་བསྟིམས་པར་བྱ། །རྟེན་འབྲེལ་སྙིང་པོ་ཉི་ཤུ་གཅིག །བརྗོད་ཅིང་སུ་པྲ་ཏིཥྛ་ཡིས། །མེ་ཏོག་འཐོར་ལ་ཤིས་པ་བརྗོད། །གང་གི་ལུས་ཀྱི་མགྲིན་པ་དང་། །དཔུང་པར་བཅིངས་པའི་སྐྱེས་བུ་དེ། །ཉེར་འཚེའི་གནོད་པ་མ་ལུས་ལས། །བསྲུང་བྱེད་རྡོ་རྗེའི་གོ་ཆ་ཡིན། །བླ་མ་ཤངས་པ་ལོ་ཙཱ་ལ། །ནག་པོ་ཆེན་པོ་རང་གིས་སྨྲས། །གཅེས་པའི་བུ་ལ་སྦྱིན་པར་བྱ། །ཅེས་གསུངས། མང་ཐོས་དགེ་ལེགས་དཔལ་བཟང་གིས། །མཁས་གྲུབ་གོང་མའི་མན་ངག་ལ། །ལྷད་ཞུགས་གསལ་ནས་དག་པར་བྱས། །གུ་ཧྱ་ས་མ་ཡ།། །།