དཔལ་ཡེ་ཤེས་མགོན་པོའི་རྗེས་གནང་གི་ཟུར་འདེབས།
དཔལ་ཡེ་ཤེས་མགོན་པོའི་རྗེས་གནང་གི་ཟུར་འདེབས་བཞུགས་སོ།། ༼མ༽ གཏོར་མ་མགོན་པོ་ལ་ཕུལ་ཟིན་པའི་རྗེས་ལ། སླར་ཡང་གཏོར་མ་ནང་མཆོད་ཀྱིས་སྦྱངས། མགོན་པོའི་དམ་ཚིག་བསྐྱེད། ཡེ་ཤེས་པ་དགུག་གཞུག་བྱས་
གཏོར་མ་ལ་བསྟིམ། སློབ་མ་ལ་གཏོར་དབང་རན་པ་ན། གཏོར་མ་ལ་དཔལ་འབར་གཙུག་ནས་སློབ་མའི་མགོ་ཐོག་ཏུ་བཞག །སློབ་མ་རྣམས་གཏོར་མ་མགོན་པོར་གསལ་འདེབས་སུ་བཅུག །གུ་གུལ་གྱི་དུ་པས་བདུག་ཅིང་རོལ་མོའི་སྒྲ་དྲག་ཏུ་བྱེད་པ་དང་དུས་མཉམ་དུ། བླ་མས་ན་མོ་བུདྡྷ་ཡ་སོགས་ལན་གསུམ་བརྗོད་པའི་མཐར། བརྒྱུད་པའི་བླ་མ་རྣམས་ཀྱི་མཚན་རེ་རེ་ནས་བརྗོད་ནས། དེ་རྣམས་ཀྱི་བཀའ་དང་དམ་ལས་མ་འདའ་བར། མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ་དམ་ཅན་རྒྱ་མཚོའི་འཁོར་དང་བཅས་པ་ཁྱེད་རྣམས་ཀྱིས། རྡོ་རྗེ་སློབ་མ་ཆྒཻ་མོ་བྱང་ཆུབ་སྙིང་པོ་ལ་མཆིས་ཀྱི་བར་དུ་ལུས་དང་གྲིབ་མ་བཞིན་དུ་
བཞུགས་ནས། མགོན་དང་། སྐྱབས་དང་། དཔུང་གཉེན་མཛོད་ཅིག །དགྲ་བགེགས་ཐམས་ཅད་ཐུལ་ཅིག །བར་ཆད་ཐམས་ཅད་སེལ་ཅིག །མཐུན་རྐྱེན་ཐམས་ཅད་སྒྲུབས་ཤིག །ཚེ་དང་བསོད་ནམས་དང་། འཁོར་དང་ལོངས་སྤྱོད་རྒྱས་པར་མཛོད་ཅིག །འགྲོ་བ་ཐམས་ཅད་དབང་དུ་བསྡུས་ཤིག །ཇི་ལྟར་བསྒོ་བའི་ལས་རྣམས་མཛོད་ཅིག །ཚོགས་གཉིས་རྫོགས་པར་མཛོད་ཅིག །སྒྲིབ་གཉིས་དག་པར་མཛོད་ཅིག །མྱུར་དུ་སངས་རྒྱས་ཐོབ་པར་མཛོད་ཅིག །ཅེས་བརྗོད་དེ་ནས་སློབ་མའི་སྤྱི་བོའི་མགོན་པོ་སློབ་མའི་ལུས་ལ་ཐིམ་པར་དཔོན་སློབ་གཉིས་ཀས་བསྒོམ་པར་བྱའོ། །རྗེས་གནང་གི་ཟུར་འདེབས་ལགས་སོ།། །།