མགོན་པོ་གསང་སྒྲུབ་ཀྱི་དབང་ཆོག
མགོན་པོ་གསང་སྒྲུབ་ཀྱི་དབང་ཆོག་བཞུགས་སོ།། ༼ལ༽ མྱུར་མཛད་སྤྱན་རས་གཟིགས་ལ་འདུད། །ཡེ་ཤེས་མགོན་པོ་ཡབ་ཡུམ་གྱི། །དབང་བསྐུར་རྗེས་གནང་བྱ་བ་ནི། །དུར་ཁྲོད་ལ་སོགས་དབེན་གནས་སུ། །མཎྜལ་ཆོས་འབྱུང་གྲུ་གསུམ་བྲི། །དེ་སྟེང་བུམ་པ་ཆུས་བཀང་ལ། །སྨན་དང་དྲི་ཆབ་ཁ་བརྒྱན་གཟུགས། །དེ་སྟེང་ཐོད་པར་ཆང་བླུགས་ལ། །མེ་ལོང་ཆང་གི་བརླན་པ་ལ། །སིནྡྷུ་ར་དང་ཙག་ཆོས་འབྱུང་། །རྩ་བའི་སྔགས་དང་བཅས་པ་བྲིས། །ཐོད་པ་ཁ་བཅད་སྟེང་དུ་བཞག །ཐོད་པའི་ཆང་ལ་བདུད་རྩི་བཏབ། །
མཆོད་པ་ཕྱི་ནང་གཏོར་མ་དང་། །ཚོགས་ཀྱི་ལོང་སྤྱད་རྒྱས་པར་བཤམས། །དེ་ནས་བདག་ཉིད་མགོན་པོར་བསྒོམ། །བུམ་པ་བྷྲུྃ་ལས་གཞལ་ཡས་ཁང་། །རྣམ་པ་ཡེ་ཤེས་མགོན་པོ་ལ། །ངོ་བོ་ཆུ་རུ་གཞུ་བརྟུལ་བྱ། །གཏོར་མ་ཡེ་ཤེས་མགོན་པོར་བསྐྱེད། །ཐོད་པ་བདུད་རྩི་དམ་རྫས་ལྔ། །མེ་ལོང་མགོན་པོར་བསྐྱེད་པར་བྱ། །རྣམ་པ་ཡི་གེའི་རང་བཞིན་ལ། །ཡེ་ཤེས་མགོན་པོ་དགུགས་གཞུགས་བསྟིམ། །མཆོད་གཏོར་བཤམས་ལ་གསོལ་བ་བཏབ། །སྣོད་ལྡན་སློབ་མ་དུ་ཡོད་ལ། །ཁྲུས་བྱས་ནང་དུ་ལེགས་འདུག་ལ། །གསེར་གྱི་མཎྜལ་ཕུལ་ནས་ནི། །གདོང་པ་དར་གྱི་དྲིལ་བྱས་ཏེ། །ཕྱག་དང་བསྐོར་བ་བྱས་ནས་ནི། །མོས་གུས་དད་
པའི་སེམས་ཀྱི་འདུག །དེ་ནས་དབང་བསྐུར་གསོལ་བ་གདབ། །དཔལ་ལྡན་འཇིགས་བྱེད་ཆེན་པོ་བསྐྱེད། །འཇིགས་བྱེད་དཀྱིལ་འཁོར་ཆེན་པོ་འདིར། །བདག་ཉིད་ཡང་དག་འཇུག་པར་སྤྲོ། །དཔའ་བོ་བླ་མས་བཟུང་དུ་གསོལ། །ཅེས་ལན་གསུམ་ཞུའོ། །དེ་ནས་བླ་མས་འདི་སྐད་བརྗོད། །དཔལ་ལྡན་མགོན་པོ་ཡབ་ཡུམ་གྱི། །ཡེ་ཤེས་གསང་བའི་དཀྱིལ་འཁོར་དུ། །བུ་ཁྱོད་འདིར་ནི་གཞུག་པ་བྱ། །ཁྱོད་ཀྱི་བསྟན་པ་བསྲུང་དོན་དུ། །ཁྱོད་ལ་བདག་གི་དབང་བསྐུར་བྱ། །ཞེས་ལན་གསུམ་བརྗོད། དེ་ནས་གསོལ་བ་གདབ་པར་བྱ། །གུ་གུལ་དུད་པས་སློབ་མ་བདུག །དྲིལ་བུ་མཁར་རྔ་ཅང་ཏིའུ་དང་། །
ཐོད་རྔ་ལ་སོགས་སྒྲ་རྣམས་སྒྲག །རང་གི་ལྷ་ཡི་སྙིང་ག་ནས། །སློབ་མའི་ལུས་ལ་མགོན་པོ་སྤྲོ། །ཁོ་ཡི་ཤེས་པ་བསྐུལ་བར་བསམ། །ཨོཾ་བཛྲ་མ་ཧཱ་ཀཱ་ལ་ཀྵེཾ་ཀྵེ་ཏྲ་བིག་ནན་བི་ནཱ་ཡ་ཀ་ཨ་བེ་ཤ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་པ་བཟླས་བྱའོ། །སློབ་མ་དེ་ལ་ཡེ་ཤེས་དབབ། །འདར་དང་ཁྲབ་དང་གར་བྱེད་དང་། །སྨྲ་དང་རྒོད་དང་སྒྲ་འབྱིན་དང་། །བདེ་གསལ་མི་རྟོག་སྐྱེ་བར་འགྱུར། །ཡེ་ཤེས་ཕེབས་ནས་གདོང་གཡོགས་དཀྲོལ། །དེ་ནས་བུམ་པས་དབང་བསྐུར་བྱ། །བུམ་པ་སློབ་མའི་སྤྱི་བོར་བཞག །ཧཱུྃ། བུམ་པའི་དབང་བསྐུར་རིགས་ལྔ་ཡེ་ཤེས་ལྔ། །སྤྱི་བོར་བཞག་པས་དབང་བསྐུར་མཆོག་འགྱུར་ཏེ། །ལུས་ངག་ཡིད་གསུམ་
སྒྲིབ་པ་ཀུན་བྱང་ནས། །བཀྲ་ཤིས་རྣམ་པར་རྒྱལ་བའི་དབང་ཐོབ་ཤོག །ཨོཾ་བཛྲ་རཏྣ་པདྨ་ཀརྨ་བུདྡྷ་ཨ་བྷི་ཥིཉྩ་མཾ། ཅེས་པས་བུམ་པའི་དབང་བསྐུར་ཞིང་བཀྲུས་པས། ལུས་ངག་ཡིད་གསུམ་གྱི་སྒྲིབ་པ་བྱང་སྟེ། རིགས་ལྔ་ཡེ་ཤེས་ལྔས་དབང་བསྐུར་བས་བུམ་རྟགས་སུ་རྡོ་རྗེ་མི་བསྐྱོད་པས་དབུ་རྒྱན་པར་བསམ་མོ། །གཏོར་མའི་དབང་བསྐུར་བ་ནི། དམ་རྫས་གཏོར་མས་དབང་བསྐུར་བས། །སྐུའི་བྱིན་རླབས་ལུས་ལ་ཞུགས། །ལུས་ཀྱི་སྒྲིབ་པ་དག་གྱུར་ནས། །མི་འགྱུར་རྡོ་རྗེའི་དབང་ཐོབ་ཤོག །མགོན་པོའི་སྐུ་མདོག་དཀར་པོ་བསམ་གྱི་མི་ཁྱབ་པ། དེ་བཞིན་དུ་དམར་མོ། སྔོན་མོ། སེར་པོ། ལྗང་གུ།
སྐུ་ཆུང་ལ་ཡན་ལག་རགས་པ་མང་པོ་བྱོན་ནས་སློབ་མའི་སྤྱི་བོར་ཐིམ་པས། ལུས་ངག་ཡིད་གསུམ་གྱི་ནད་གདོན་སྡིག་སྒྲིབ་ཐམས་ཅད་དག་ནས། མགོན་པོའི་སྐུ་གསུང་ཐུགས་ཡོན་ཏན་འཕྲིན་ལས་ལྔ་དང་དབྱེར་མེད་བསམ་མོ། །ཨོཾ་བཛྲ་མ་ཧཱ་ཀཱ་ལ་ཨ་བྷི་ཥིཉྩ་ཨོཾ། དེ་ནས་ཐོད་པས་དབང་བསྐུར་བ་ནི། ཐོད་པ་མཚན་ལྡན་ཡེ་ཤེས་ཀ་པ་ལ། །བདུད་རྩི་ལྔ་ལྡན་མགོན་པོ་རིགས་ལྔའི་རྫས། །སྐལ་ལྡན་རིགས་ཀྱི་བུ་ལ་དབང་བསྐུར་བས། །སྐུ་ལྔ་ཡེ་ཤེས་ལྔ་ཡི་དབང་ཐོབ་ཤོག །པཉྩ་ཛྙཱ་ན་ཨ་བྷི་ཥིཉྩ་ཨཱཿདེ་ནས་སིནྡྷུ་ར་ལ་བསྟན་ཏེ། དྲི་མེད་ཤེལ་ལྟར་དག་པ་རང་གི་སེམས། །སྣང་གྲགས་མེ་ལོང་གཟུགས་བརྙན་ལྟ་བུ་ལ། །
མགོན་པོ་ཡབ་ཡུམ་གཉིས་མེད་སྦྱོར་ཞིང་རོལ། །གསུམ་པ་ཤེས་རབ་ཡེ་ཤེས་དབང་བསྐུར་རོ། །མ་ཧཱ་ཀཱ་ལ་པྲ་ཛྙཱ་ཛྙཱ་ན་ཨ་བྷི་ཥཉྩ་ཧཱུྃ། དེ་ནས་རང་མགོན་པོ་བསྒོམས་རྩ་དབུ་མ་གསལ་བཏབ་པའི་ནང་ནས་ཀྵེ་ཏྲ་པ་ལ། ཛི་ན་མི་ཏྲ་ཌཀྐི་རཱ་ཛ། ཏྲག་ཤད་ནག་པོ་རྣམས་སྐུ་མདོག་མཐིང་ག་གྲི་གུག་ཡས་དང་། གཡོན་པ་ཐུགས་ཀར་ཐོད་ཁྲག་འཛིན་པ། །སྤྱན་གསུམ་དང་ལྡན་ཞིང་མཆེ་བ་གཙིགས་པ། སྟག་གི་ཤམས་ཐམས་སྦྲུལ་གྱིས་རྒྱན་པ། ཐོད་སྐམ་ལྔ་ཡི་དབུ་རྒྱན་ཅན། །ཐོད་རློན་ལྔ་བཅུའི་དོ་ཤལ་མཛེས། །སྐུ་ནི་ནས་རེ་མཚོན་རེ་ཙམ། །སྐད་ནི་སྣ་ཚོགས་སྒྲོགས་པར་བྱེད། །སྤྱི་བོའི་གཙུག་ནས་གསང་གནས་བར། །
གར་གྱི་སྣ་ཚོགས་བྱེད་པར་བསམ། །སྟེང་འོག་རླུང་གི་ཁ་སྦྱར་རོ། །དེ་ནས་ལུས་གསལ་སྟོང་མགོན་པོ་ཡབ་ཡུམ། ངག་གྲགས་སྟོང་མགོན་པོའི་སྔགས། སེམས་རིག་སྟོང་སྐྱེ་མེད་འོད་གསལ། འགག་མེད་རང་ཤར་ཕྱག་རྒྱ་ཆེན་པོ། དེ་ལྟར་རྟོགས་པ་མགོན་པོའི་ལྟ་བ། དེ་ལ་གནས་པ་མགོན་པོའི་བསྒོམ་པ། དེའི་ངང་ལས་འཕྲིན་ལས་སྐྱོང་བ་མགོན་པོའི་སྤྱོད་པ། བསྒྲལ་ཚད་ཧེ་རུ་ཀའི་ངང་དུ་སངས་རྒྱས་པ་དེ་མགོན་པོའི་འབྲས་བུའོ། །དེ་ནས་ཚོགས་དང་གཏོར་མ་དབུལ། །རྦད་དང་བསྐུལ་བ་ལ་སོགས་བྱ། །རྗེས་ལ་བཟོད་པར་གསོལ་དགེ་བ་བསྔོ། །ཡི་གེ་བརྒྱ་པས་ལྷག་ཆད་བཀང་། །སྣང་སེམས་སྒྱུ་མར་ཤེས་པར་བྱ། །ཡེ་ཤེས་མགོན་པོའི་དབང་
བསྐུར་བ། །རྒྱ་གར་མཁས་གྲུབ་གཞུང་བཞིན་དུ། །ཁྱུང་པོ་བདག་གིས་ཡི་གེར་བཀོད། །བླ་མ་རཱ་ཧུ་ལ་ལ་གསེར་སྲང་བརྒྱ་ཕུལ་ནས་ཞུས་པ་འདི། རིན་ཆེན་རྨོག་ལྕོག་པ་ཁྱོད་ལ་བཀའ་རྒྱས་བཏབ་བོ། །གཅིག་བརྒྱུད་ལས་མི་མཛད་པའི་དམ་ཚིག་གོ། །།ས་མ་ཡ། །