རྣལ་འབྱོར་མའི་སྒྲུབ་ཐབས་ཨ་ཐ་ན་བཛྲ་གྱིས་མཛད་པ།
རྣལ་འབྱོར་མའི་སྒྲུབ་ཐབས་ཨ་ཐ་ན་བཛྲ་གྱིས་མཛད་པ་བཞུགས་སོ།། ༼ཉི༽ རྒྱ་གར་སྐད་དུ། བཛྲ་ན་ར་ཤཱ་ར་ཧས་ཏ་ནཱ་མ། བོད་སྐད་དུ། རྡོ་རྗེ་ཕག་མོའི་བྱིན་གྱིས་བརླབས་པ་ཞེས་བྱ་བ། བླ་མ་རྣམས་ལ་ཕྱག་འཚལ་ལོ། །མཆེ་བ་གཙིགས་ཤིང་འཇིགས་པ་པོ། །སྔགས་ཀྱི་མེ་ཏོག་ཕྲེང་བས་བརྒྱན། །ཤ་ཆེན་རྟག་ཏུ་གསོལ་མཛད་མ། །མཁའ་འགྲོ་མ་ལ་ཕྱག་འཚལ་ལོ། །དེ་ལ་དང་པོ་རྣལ་འབྱོར་པས། །གནས་ནི་དུར་ཁྲོད་ལ་སོགས་པར། །བདུད་རྩི་ལྔ་ལ་སོགས་པའི་ཁྲུས་བྱས་ལ། སྟན་བདེ་བ་ལ་གནས་ནས། དཔལ་དགྱེས་མཛད་རྡོ་རྗེའི་རྣལ་འབྱོར་རྫོགས་པའམ། ཡང་ན་སྐད་ཅིག་གིས་དགྱེས་མཛད་དུ་བསྒོམས་ལ། བཛྲ་ཡཀྵ་ཧཱུྃ་གིས་
བསྲུང་བ་བྱས་ལ། སེམས་ཅན་ཐམས་ཅད་ཀྱི་དོན་དུ་བློ་བསྐྱེད་ལ། རང་གི་མདུན་དུ་ཆོས་འབྱུང་། དེའི་ནང་དུ་པཾ་ལས་པདྨའི་སྡོང་པོ་རྩ་བ་གཅིག་ལ་ཡལ་ག་ལྔ་པ། དབུས་ཀྱི་པདྨའི་སྟེང་དུ་ཟླ་བའི་དབུས་སུ་ཧྲཱིཿདང་གྲི་གུག །དེ་ལས་རྣལ་འབྱོར་མར་བསྐྱེད་དེ་སྐུ་མདོག་དམར་སིང་ངེ་བ་ལང་ཚོ་དང་ལྡན་པ་ཞལ་གཅིག་ཕྱག་གཉིས་མ། གཡས་གྲི་གུག་སྤྱི་མགོ་གཡས་པའི་སྟེང་ནས་འཕྱར་བ། གཡོན་བདུད་རྩིས་གང་བའི་པདྨ་ནམ་མཁའ་ལ་མཛེས་པ། ཞལ་ཤིན་ཏུ་གདངས་པ། མཆེ་བ་ཅུང་ཟད་གཙིགས་པ། མཛུམ་བག་ཅན། ཕྱག་རྒྱ་ལྔ་དང་ལྡན་པ། དབུ་སྐྲ་མཐོན་
མཐིང་དཔུང་པ་གཡས་པའི་ཁ་ན་མར་ཤད་ཡོད་པ། ཞབས་གཡས་བརྐྱང་གཡོན་བསྐུམ་གྱི་འཇིགས་བྱེད་དང་དུས་མཚན་མནན་པར་བསྐྱེད། དེ་ཉིད་དང་དུས་མཚུངས་པར་མདུན་དུ་བླ་མ། གཡས་སུ་སྤྱན་རས་གཟིགས། གཡོན་དུ་ཏཱ་རེ། རྒྱབ་ཏུ་མགོན་པོ་ཆེན་པོ་བསྐྱེད་ལ། ཇོ་མོའི་སྙིང་གའི་ས་བོན་དང་། བདག་གི་ས་བོན་གྱི་འོད་ཟེར་གྱི་རང་བཞིན་གྱི་གནས་ནས་ཡེ་ཤེས་པ་སྤྱན་དྲངས་པ་ལ་དགུག་གཞུག་དང་དབང་བསྐུར་བྱ། ཕྱི་ནང་གསང་བའི་མཆོད་པས་མཆོད། དེ་ནས་བཟླས་པ་བྱ་སྟེ། རང་བཅོམ་ལྡན་འདས་སུ་གསལ་བ་དང་མདུན་གྱི་ཇོ་མོའི་ཐུགས་ཁ་ནས་པད་ཟླའི་སྟེང་ནས་ས་བོན་ཧྲཱིཿལས་སྔགས་ཀྱི་བསྐོར་
བར་བསམ་ལ། དེ་ལ་དམིགས་ཏེ་བཟླས་པར་བསམས་ནས། ཨོཾ་བཛྲ་ན་ར་ཀྲིཾ་ཀྲིཾ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་པ་མ་ཡེངས་པར་བཟླའོ། །དེ་ནས་ཐུན་མཚམས་སུ་མཆོད་པ་དང་། གཏོར་མ་ཅི་བཟང་ཕུལ། དེ་ལྟར་ཟླ་བ་གསུམ་དུ་བསྒྲུབས་ན། ཞལ་མངོན་སུམ་དུ་བསྟན་ཏེ། གཟུགས་སྟོན་པ་དང་། སྒྲ་སྒྲོག་པ་དང་། རྨི་ལམ་དུ་མཁའ་འགྲོ་མ་དཔག་ཏུ་མེད་པས་གང་ནས་འོང་། །དེ་རྣམས་ཀྱི་བྱིན་གྱིས་བརླབས་པར་འགྱུར་རོ། །བྱིན་གྱིས་བརླབས་པའི་རྣལ་འབྱོར་མའི་སྒྲུབ་ཐབས་ཨ་ཐ་ཡ་བཛྲ་གྱིས་གནང་བ་རྫོགས་སོ།། །།