ལྷ་བཞི་བླ་མ་དང་ལྔའི་བསྟོད་པ།
ལྷ་བཞི་བླ་མ་དང་ལྔའི་བསྟོད་པ་བཞུགས་སོ།། ༼ནི༽ ན་མོ་གུ་རུ། ཆོས་ཀྱི་དབྱིངས་ལས་མ་གཡོས་ཀྱང་། །ཡེ་ཤེས་ལྔ་ལྔས་བཞེངས་པའི་སྐུ། །སྤྱན་གྱིས་ཕྱོགས་བཅུའི་སངས་རྒྱས་གཟིགས། །མཁའ་སྤྱོད་མ་ལ་ཕྱག་འཚལ་ལོ། །ཐོད་པ་སྐམ་པོ་ལྔ་ཡིས་ཐོད། །བརྒྱན་རྣམས་རུས་བྱས་དཔའ་
བརྟུལ་ཅན། །རིགས་ལྔའི་སངས་རྒྱས་དབུ་ལ་རྫོགས། །མཁའ་སྤྱོད་མ་ལ༴། སྐུ་མདོག་མཚལ་གྱི་ཁུ་བ་འདྲ། །ཤིན་ཏུ་དམར་བའི་མདངས་ཉིད་དེ། །ཆགས་ཤིང་བདེ་བ་རྒྱས་པའི་རྟགས། །མཁའ་སྤྱོད་མ་ལ༴། རྗེ་བཙུན་མ་ཡི་མདུན་ངོས་ནས། །བླ་མ་བྲམ་ཟེ་ཆེན་པོ་དང་། །གུ་ཏི་པ་དང་དྷརྨཱ་དང་། །ཨའུ་ཇུ་ཏི་པ་དང་ནི། །ཨ་ཐ་ཡ་ཡི་བཛྲ་དང་། །རྗེ་ནི་རིན་པོ་ཆེ་ལ་སོགས། །བླ་མ་དཔག་ཏུ་མེད་པ་བཞུགས། །བླ་མའི་སྐུ་ལ༴ རྗེ་བཙུན་མ་ཡི་གཡས་ཕྱོགས་ན། །ཐུགས་རྗེ་ཆེན་པོ་སྤྱན་རས་གཟིགས། །སྐུ་མདོག་དཀར་པོ་གངས་རི་འདྲ། །འཁོར་བའི་སྐྱོན་གྱིས་མ་གོས་ཕྱིར། །སྤྱན་རས་གཟིགས་ལ་ཕྱག་
འཚལ་ལོ། །གཡས་པའི་ཕྱག་ནི་མི་འཇིགས་ཕྱག །དཔྱི་ནས་ཐུར་དུ་བརྐྱང་བར་མཛད། །སྙིང་རྗེས་སེམས་ཅན་སྐྱབས་པའི་རྟགས། །སྤྱན་རས་གཟིགས་ལ༴ །གཡོན་པའི་ཕྱག་ནི་བསྐུམ་པ་ཡིས། །པདྨ་དཀར་པོ་ལེགས་བསྣམས་པ། །འཇིག་རྟེན་དྲི་མས་མ་གོས་རྟགས། །སྤྱན་རས་གཟིགས་ལ༴ །རྗེ་བཙུན་མ་ཡི་གཡོན་ཕྱོགས་ན། །རྗེ་བཙུན་སྒྲོལ་མ་བཞུགས་པ་ནི། །སྐུ་མདོག་ལྗང་གུ་འགྱིང་བག་ཅན། །སྒྲོལ་མའི་སྐུ་ལ་ཕྱག་འཚལ་ལོ། །གཡས་པའི་ཕྱག་ནི་མི་འཇིགས་ཕྱག །གཡོན་པའི་ཕྱག་ན་ཨུཏྤལ་འཛིན། །ཞབས་ནི་ཕྱེད་ཀྲུང་དག་ཏུ་བཞུགས། །སྒྲོལ་མའི་སྐུ་
ལ༴ །དབུ་སྐྲ་དག་ནི་མཐོན་མཐིང་ལ། །སྤྱི་བོར་དོན་ཡོད་གྲུབ་པས་མཚན། །མཚན་དང་དཔེ་བྱད་འབར་བ་ཡི། །སྒྲོལ་མའི་སྐུ་ལ༴། རྗེ་བཙུན་མ་ཡི་རྒྱབ་ཕྱོགས་ན། །མགོན་པོ་མ་ཧཱ་ཀཱ་ལ་ནི། །སྐུ་མདོག་ནག་པོ་མུན་རུམ་འདྲ། །སྐུ་ནི་རི་རབ་ལས་ཀྱང་ཆེ། །ཞབས་གདུབ་དང་བཅས་བི་ནཱ་ཡཱ་ཀཱ་མནན། །ནག་པོ་ཆེན་པོ་སྟག་གི་ཤམ་ཐབས་ཅན། །ཕྱག་དྲུག་མ་ཧཱ་ཀཱ་ལ་ཁྱོད་ལ་བསྟོད། །ལྷ་བཞི་བླ་མ་དང་ལྔ་ཡི་བསྟོད་པ་ལགས་སོ། །རྗེ་བཙུན་མས་གཙོ་བྱས་པའི་མདུན་བསྐྱེད་དུ་སྒྲུབ་པའི་བསྟོད་པ་ཡིན་པ་ཤེས་པར་བྱའོ།། །།