སྦྱིན་སྲེག་དང་བུམ་པ་བཅའ་ཐབས།
སྦྱིན་སྲེག་དང་བུམ་པ་བཅའ་ཐབས་བཞུགས་སོ།། ༼ཛི༽ མགོན་པོ་འདིའི་སྦྱིན་སྲེག་ལ་གཉིས་ལས། རྒྱས་པའི་སྦྱིན་སྲེག་བྱེད་ན། ཐབ་ལ་སོགས་པ་ཐམས་ཅད་སྤྱི་དང་མཐུན་པར་བྱས་ནས། མེ་ཏོག་སེར་པོ་ལ་སོགས་པའི་སྲེག་རྫས་དང་། མགོན་པོ་ཡིད་བཞིན་ནོར་བུའི་ཐུགས་ཀའི་མཁའ་འགྲོ་མ་དང་བཅས་པ་ཐབ་ནང་དུ་འཇིག་རྟེན་མེ་ལྷའི་ཐུགས་ཀའི་མེ་གྲུ་གསུམ་གྱི་དབུས་སུ་བསྐྱེད་ནས་ཡེ་ཤེས་པ་བཞུགས་པ་སོགས་བྱ་སྟེ། འདས་པའི་མེ་ལྷ་ལ་སྲེག་རྫས་བརྒྱ་རྩ་བརྒྱད་རེ་འབུལ་བ་དང་། སྔགས་ནི་གུ་རུ་མ་ཧཱ་ཀཱ་ལ་ཡ་ཧཱ་རི་ནི་སིདྡྷི་ཛཿ བདག་མིང་འདི་ཞེས་བྱ་
བའི་འཁོར་དང་ལོངས་སྤྱོད་དང་། ནོར་དང་། འབྲུ་དང་། རིན་པོ་ཆེ་ལ་སོགས་པའི་འབྱོར་པ་ཕུན་སུམ་ཚོགས་པ་ཐམས་ཅད་པུཥྚིཾ་ཀུ་རུ་ཨོཾ། ཞེས་སྔགས་རེ་དང་སྲེག་རྫས་རེ་སྤེལ་བ་དབུལ། དེ་ནས་འདས་པའི་མེ་ལྷ་ཡེ་ཤེས་པ་གཤེགས། དམ་ཚིག་པ་རང་ལ་བསྡུ། འཇིག་རྟེན་པ་ལ་ལྷག་མ་ཕུལ་ནས་འཇིག་རྟེན་པའི་མེ་ལྷ་ཡེ་ཤེས་པ་གཤེགས། དམ་ཚིག་པ་མེ་འབར་བའི་རྣམ་པར་གྱུར་པ་སོགས་ཆོ་ག་སྤྱི་དང་འདྲའོ། །དབང་བསྡུས་ལ་ཐབ་ཟླ་གམ་དམར་པོ་བྲིས་པའམ་རྩིག་པ་ལ་བསྲེག་རྫས་སོགས་ཆོ་ག་གཞན་ཐམས་ཅད་དབང་གི་སྦྱིན་སྲེག་གི་ཆོ་ག་སྤྱི་དང་མཐུན་པ་ལ།
མགོན་པོའི་ཐུགས་ཀའི་མཁའ་འགྲོ་མ་དང་བཅས་པ་ལ་བསྲེག་རྫས་འབུལ་བའི་ཚེ། གུ་རུ་མ་ཧཱ་ཀཱ་ལ་ཡ་ཧ་རི་ནི་སིདྡྷི་ཛཿཆྒཻ་མོ་ཝ་ཤམ་ཀུ་རུ་ཧོཿཞེས་སྔགས་དེ་དང་རྫས་དེ་སྤེལ་ནས་འབུལ་བའི་དུས་སུ། ཐུགས་ཀའི་མཁའ་འགྲོ་མ་ལས་དེ་འདྲ་བ་དཔག་ཏུ་མེད་པ་འཕྲོས་པས། བསྒྲུབ་བྱའི་སྙིང་གའི་མ་བྷ་ག་ནས་ལྕགས་ཀྱུས་བཀུགས་ཌཱ་མ་རུའི་སྒྲས་སེམས་མྱོང་པར་བྱས་ཏེ། རང་དབང་མེད་པར་བཀུག་ནས་བདག་གི་རྐང་པའི་དྲུང་དུ་བཞག་པར་མོས་པ་ཡང་ཡང་བྱའོ། །ཐུག་པ་སྐོལ་བའི་མེ་ལ་ཡང་བསྐྱེད་ཆོག་མདོར་བསྡུས་བྱས་ནས། ཚ་དང་ཕྱེ་མར་ལ་སྔགས་དང་བཅས་ནས་ཅུང་
ཟད་རེ་འབུལ་བའི་སྦྱིན་སྲེག་སྦྱར་རུང་གསུང་མོད། རྒྱུད་སྡེ་ལྟར་བྱས་ན་ལེགས་སམ་སྙམ་མོ།། །། ཨྛྀིཿ ༈ གསན་ཡིག་ཏུ་གོང་གི་སྦྱིན་སྲེག་ཤོག་གཅིག་མ་དང་འདི་གཉིས་ཚན་པ་གཅིག་ཏུ་མཛད་པ་ལྟར་འདིར་ཡང་སྦྱར། །ཛི། ན་མོ་གུ་རུ། ཆོས་སྐྱོང་གི་བུམ་པ་བཅའ་བའི་ཐབས་ནི། དང་པོ་བུམ་པ་སོ་མ་བཏང་བ། མ་སྤྱད། ཚད་བྲེ་གང་ཤོང་བ་ཡན་ཆད་མཆུ་ཅན། མགྲིན་པར་བཀྲ་ཤིས་རྫས་བརྒྱད་བྲིས་པའི་ནང་དུ། ཆོས་སྐྱོང་གི་གཟུགས་དང་། རྩ་བའི་སྔགས་སིདྡྷི་མའི་འཇུག་ཏུ། འདོད་པའི་དོན་ཞུ་བའི་ཚིག །རྟེན་འདི་ལ་གནས་པར་མཛད་དུ་གསོལ། གནས་འདིར་སྐྱེ་བོ་ཐམས་ཅད་
གུས་པར་འདུ་ཞིང་། འབྱོར་པ་ཐམས་ཅད་ཆུ་བོའི་ཚོགས་བཞིན་འདུ་བར་མཛད་དུ་གསོལ། ཅེས་པ་དང་། སྲུང་ཤིག་ལ་སོགས་པ་བཏགས་ལ། དེ་འདྲ་བ་མཐིང་ཤོག་ལ་གསེར་གྱིས་བྲིས་པ་དང་། ག་བུར། གུར་གུམ། ཙན་དན་དམར་པོ། གྷིཾ། རང་བྱུང་གྷིཾ་ལ་སོགས་པས་བྲིས་པ་ཕྱོགས་བཞི་མཚམས་བཞི་ནས་དབུས་ཀྱི་སྐུ་གཟུགས་ལ་ཁ་བསྟན་ཏེ་བཞག །སྐུ་རབ་གནས་ལེགས་པར་བྱས་པའི་ཞལ་བུམ་པའི་མཆུ་ལ་བསྟན། བུམ་རྫས་རིན་པོ་ཆེ་སྣ་ཚོགས་པ་དང་། སྨན་སྣ་ཚོགས་པ་དང་། འབྲུ་སྣ་ཚོགས་པ་དང་། དར་ཟབ་སྣ་ཚོགས་པ་དང་། མངར་གསུམ་ལ་སོགས་པའི་ཟས་སྣ་ཚོགས་པ་དང་། མགོན་པོ་འདིའི་
དམ་རྫས་སྣ་ཚོགས་བཅུག་ལ། ཁེངས་པར་བཀང་། ལུག་དར་མའི་སོག་པ་གཡས་པའི་བལ་ཚི་ཆད་པས་ཁ་བཅད། དེའི་སྟེང་དུ་མཐིང་ཤོག་ལ་གསེར་གྱི་རྡོ་རྗེ་རྒྱ་གྲམ་བྲིས་པས་ཁ་བཅད། །དེ་ནས་མཚོན་སྣ་ལྔའི་སྐུད་པས་མགུལ་པ་བཅིངས་ལ། དེ་རྗེས་ཁ་ཡི་སྟེང་ནས་རྒྱ་གྲམ་དུ་བཅིང་ངོ། །དེ་ནས་རང་གི་གནས་ཁང་གོ་མཛད་དམ། །དགེ་འདུན་གྱི་གཙུག་ལག་ཁང་གི་འཁྱམས་ཀྱི་ནང་ལ་སོགས་པར་གང་ལོགས་ལ་ཐོག་མཚམས་ལས་ཅུང་ཟད་དམའ་བར་ཁུང་བུ་གྲུ་བཞི་པ་དཔངས་སུ་ཁྲུ་གང་བྱས་པའི་ནང་དུ་ཞལ་ཞལ་ལེགས་པར་བྱས། མཚལ་གྱི་བྱུག །སིནྡྷུ་རའི་གཡུ་དྲུང་རིས་ཕྱོགས་བཞིར་བྲི། དེའི་ནང་
དུ་མཐིང་ཤོག་ལ་གསེར་གྱི་པདྨ་འདབ་བརྒྱད་བྲིས་པའི་སྟེང་། དེའི་སྟེང་དུ་བུམ་པ་དར་ཚོན་སྣ་ལྔའམ། ཚོན་སྐུད་སྣ་ལྔས་རྒྱ་གྲམ་དུ་བཅིངས་ནས་གཞལ་ཡས་ཁང་གི་ཕུགས་སམ། གཙང་ཁང་ལ་སོགས་ལ་ཁ་བསྟན་ལ་བཞག །དེའི་སྟེང་ནས་དར་ནག་གི་གུར་ཕུབ་མདུན་དུ་མར་གྱི་གཏོར་མ་ནོར་བུས་བརྒྱན་པ་བཞག །རང་ཡི་དམ་དུ་གསལ་བའི་ཐུགས་ཀ་ནས་འོད་འཕྲོས་པས། ལྷོ་ཕྱོགས་བསིལ་བའི་ཚལ་ནས་མགོན་པོ་སྤྱན་དྲངས་ནས་བུམ་པའི་ནང་དུ་བསྟིམ་པ་དང་། གསོལ་བ་བཏབ་ནས། བརྟན་པར་བཞུགས་པ་ལན་བརྒྱ་རྩ་བརྒྱད་དམ། ལྔ་བཅུའམ་ཉེར་གཅིག་བྱ། མཆོད་གཏོར་དང་གཏོར་མ་འབུལ། རང་
དང་བུམ་ནང་གི་མགོན་པོའི་ཐུགས་ཀའི་མཁའ་འགྲོ་མ་ལ་དེ་འདྲ་བ་དཔག་ཏུ་མེད་པ་འཕྲོས་པས། ལྷ་དང་མིའི་རིན་པོ་ཆེ་དང་འབྱོར་པའི་ཁྱད་པར་ཅི་ཡོད་པ་བཀུག་སྟེ། བུམ་པའི་ནང་གི་རིན་པོ་ཆེ་ལ་སོགས་པ་རྣམས་ལ་ཐིམ་པ་ཡང་ཡང་བསྒོམ་ནས་བུམ་པའི་འགུལ་པ་ལ་བཟུང་ཐག་བཏགས་པ་ནས་བཟུང་སྟེ། སྔགས་སིདྡྷི་མ་སྟོང་བཟླས་བུམ་པའི་ནང་གི་ནོར་རྫས་རྣམས་ལུད། མགོན་པོའི་ཕྱག་གི་བུམ་པ་དང་ཐོད་པའི་ནང་ནས་ཀྱང་ལུད། ནེའུ་ལེ་དང་། ཚོགས་བདག་གི་ཁ་བཤད་རྣམས་ནས་ཀྱང་རིན་པོ་ཆེ་ལྷུག་ལྷུག་ལུད་ནས་གནས་ཁང་དང་གཙུག་ལག་ཁང་ལ་སོགས་པའི་ནང་ཐམས་ཅད།
སྤྱད་པས་ཟས་མི་ཤེས་པ་ཙམ་དུ་ཁེངས་པར་བསམ་ལ། བཀྲ་ཤིས་བྱ། བུམ་པ་གཏོར་མ་དང་བཅས་པ་མི་སྒུལ་བར་གཡམ་པ་གྲུ་བཞི་ནང་ལ་གཡུ་དྲུང་རི་བྲིས་ནས་ཁ་བཅད་ཕྱི་ནས་ཞལ་ཞལ་བྱས་ཏེ། མི་ནོར་བྱས། དེ་ལྟར་བྱས་ནས་གནས་དེར་འབྱོར་པ་ཟད་མི་ཤེས་པར་འབྱུང་སྟེ། མཐུན་མོང་མིན་པའི་མན་ངག་ཆེས་ཟབ་པ་ཡིན་ཞིང་། ཞལ་ཤེས་རྣམས་ཀྱང་ཡི་གེར་བཀོད་པ་ཡིན་པས་གཞན་ལ་མི་བསྟན་པར་ཆེས་དམ་པར་བྱའོ། །གུ་ཧྱ་ས་མ་ཡ་རྒྱ་རྒྱ་རྒྱ།། །།