དཔལ་ལྡན་ལྷ་མོ་ནག་མོའི་རྟེན་བཅས་ཐབས། གཉན་སྟོན་རི་གོང་པ།
༈ ཕྱི་དར་ནག་ནང་ནལ་བུའི་རྒྱལ་མཚན་གསང་བ་ནལ་བུའི་སྙིང་ལ་རྟེན་པའི་དཔལ་ལྡན་ལྷ་མོ་ནག་མོའི་རྟེན་བཅས་ཐབས་གཉན་སྟོན་རི་གོང་པས་སངས་རྒྱས་
སྟོན་པ་ལ་གནང་བའི་ཞལ་གདམས་ཆིག་བརྒྱུད་མ་བཞུགས་སོ།། ཨི༽ དཔལ་ལྡན་ལྷ་མོ་ནག་མོ་ལ་ཕྱག་འཚལ་ལོ། །འདིའི་རྟེན་བཅའ་བའི་མན་ངག་ལ། ཕྱི་རྟེན་ནི། དར་ནག་ལ་ལྷ་མོའི་སྐུ་གྲི་ཁྲག་གིས་བྲིས། དར་ནག་དེའི་རྒྱབ་ལ་ནལ་བུའི་ཁྲུ་མ་ས་དེ་བསང་སྦྱངས་ལྷ་མོར་བསྐྱེད་དེ་ཡེ་ཤེས་པ་གཞུག་མཆོད་ནས་གྲིལ་ཏེ་བྱ་རོག་གི་རྒྱལ་མཚན་གྱི་ཚུང་ན་སྙིང་ག །མ་ཚུང་ན་བྲེ་ཕུགས་སུ་གཞུག །མདའ་མྱུག་ཚིག་གསུམ་པ་ལ་བྱ་རོག་གི་སྒྲོ་གསུམ་མེ་ལ་མ་ཤོར་བ་སྐྱོན། གྲི་ལྕགས་ཀྱིས་མདེའུ་ཟུར་གསུམ་བཅུག །སྒྲོ་གསུམ་གྱི་བར་ལ་སྲེག་སྔགས་བྲི་དར་ནག །དེ་ཉིད་བྱ་རོག་གི་རྒྱལ་མཚན་དེའི་དཔུང་གནས་ལ་གཟུགས་ནས་ལྷ་
མོའི་བྲིས་སྐུ་སོགས་གཏོར་མ་ལ་ཁ་བསྟན་ཏེ་ཐོག་ལས་འཚང་བར་གདགས། འདི་དཔལ་ལྡན་ལྷ་མོ་ཁྱོད་ལ་རྟེན་ཏུ་འཛུགས་པ་ཡིན་པས་བརྟེན་ལས་མ་འདའ། འབེན་ལས་མ་གཡོ། བར་ཆད་བསྲུངས། མཐུན་རྐྱེན་སྒྲུབས་ཤིག་ཅེས་བརྗོད་ལ་མངའ་གསོལ་དང་བཀྲ་ཤིས་བྱའོ། །འདི་ནི་འདི་ཉིད་ཀྱི་ཡིག་ཆུང་ལས། ཕྱིའི་རྟེན་བཅའ་བ་ནི། བྱ་ནག་གི་རྒྱལ་མཚན་གྱི་ནང་དུ་ལྷ་མོའི་སྐུ་དར་ནག་ལ་བྲིས་པ་གཞུག་གོ། ཞིབ་པར་ཞལ་ལས་ཤེས་སོ། །ཅེས་པ་འདི་ཉིད་ཀྱི་ཞལ་ཤེས་དང་བཅས་པ་རྫོགས་པར་བྲིས་པ་ཡིན་ནོ། །ཡང་འདིའི་རྟེན་གྱི་ཡིག་ཆུང་ལས་ནང་རྟེན་ནལ་བུའི་རྒྱལ་མཚན་ལ་ལྷ་མོའི་སྐུ་བྲིས་ལ།
སྒོག་སྐྱ་ལ་སོགས་པ་རྫས་བཞིའི་དུད་པས་དུས་བཟང་ལ་བདུག །དགྲ་བོའི་ཕྱོགས་སུ་ཁ་བལྟས་ལ་བཞག་གོ། འདི་ལ་ནང་རྟེན་དང་། མནན་བསད་ཆིག་དྲིལ་གྱི་མན་ངག་ཅེས་བྱ་བ་ནི་ཞིབ་པར་ཞལ་ལས་ཤེས་པར་བྱ་སྟེ། གཞན་ལ་བསྟན་པར་བྱ་བ་མ་ཡིན་ནོ། །ཞེས་པའི་མན་ངག་ཞལ་ཤེས་དང་བཅས་པ་ལག་ཏུ་བླང་བའི་གནད་གསང་ཞིང་ཆེས་གསང་བ་ནི་འདི་ཡིན་ཏེ། ནལ་བུའི་རོ་བུ་བཤུས་བྱས་པའི་སོབ་ཀྱི་སྙིང་གའི་ཐད་ཀྱི་བྲང་ལྤགས་ལ་ལྷ་མོ་སྐུ་དར་ནག་ལ་བྲིས་པ་བརླན། གསོབ་དེའི་གསང་གནས་ནས་སྤྱི་གཙུག་ཏུ་སླེབ་པའི་སྲོག་ཤིང་དབྱུག་པ་དུག་ཁྲག་གི་བྱུགས་པ་གཅིག་གཙུགས། གསོབ་དེའི་སྙིང་གའི་ཐད་དུ་
ནལ་བུའི་ཁྲུ་མ་ལ་གྲི་ཁྲག་གིས་སྔགས་གཉིས་བྲིས་པ་སྲོགས་ཤིང་ལ་སྔགས་ཕྱིར་བསྟན་ནས་དཀྲི། དེ་ཐོག་ནས་དར་ནག་གི་དཀྲི། དེ་རོ་སྐྲའི་སྐུད་པས་བཅིངས། སྔགས་བྲི་གཞི་དེ་འདྲ་མ་རྙེད་ན་རོ་རོས་སམ། ལཾ་བསད་པའི་སར་དར་གཅིག་བཞག་པའི་ཤོག་བུ་ལ་བྲིས་ཀྱང་རུང་ངོ། །ནལ་བུའི་སྲོབ་དེའི་བཤང་ལམ་དུ་སྲོག་ཤིང་ལ། རོ་རས་སམ་ཤོག་བུ་ལ་དགྲ་བོའི་ལིངྒ་དུག་ཁྲག་གི་བྲིས་ཤིང་དེའི་དཔྲལ་བར་རུས། སྙིང་གར་མིང་། བརླ་ལ་བླ་དེགས་བྲིས་པ་ལ། དགྲ་བོ་དགུག་གཞུག་བྱ་སྟེ་བསྟིམ་པ་ཡང་ཡང་བྱས་ལ། ཡིད་ཆེས་པ་ན་ལིངྒ་མགོ་མཇུག་བཟློག་ནས། ལིངྒ་བྲིས་པའི་ཕྱོགས་ནང་
དུ་བསྟན་ཏེ་སྲོག་ཤིང་ལ་དཀྲི། དེའི་སྟེང་ནས་ཡུགས་ས་མོའི་སྐྲ་ལ་བཤན་པས་ཕྱིན་ཅི་ལོག་ཏུ་སྒྲིལ་བའི་སྐུད་པས་བཅིངས། ལིངྒ་དེའི་སྟེང་རྐང་པའི་སྟེང་དུ་སྲོག་ཤིང་ལ་གྲི་ཁྲག་གི་རྡོ་རྗེ་རྒྱ་གྲམ་དུ་བྲིས། དེའི་སྟེང་དུ་དར་ནག་ལ་ལྷ་མོའི་སྐུ་བྲིས་པ་ཁ་ཕྱིར་བསྟན་ནས་སྲོག་ཤིང་ལ་དཀྲི། དེའི་སྟེང་ནས་དར་ནག་གི་དཀྲི། དེ་སྐུད་པ་གཙང་མས་དཀྲི། དེ་ནས་གསོབ་དེ་ཉིད་སྒོག་སྐྱ། བཙན་དུག །གྲི་ཁྲག །ཚིལ་ཆེན་བཞི་བསྲེས་ནས་མེ་ལ་བསྲེགས་པའི་དུད་པས་བདུག །ཕྱི་ནང་གི་ལྷ་མོའི་བྲིས་སྐུ་དེ་དག་ལྷ་མོར་བསྐྱེད་པ་དང་། ཡེ་ཤེས་པ་སྤྱན་དྲངས་ནས་བསྟིམ་པ་དང་། མཆོད་གཏོར་བསྟོད་པ་རྣམས་
ལེགས་པར་བྱས་ནས་མགོན་ཁང་། སྒྲུབ་ཁང་ལ་སོགས་པའི་བྲིས་སྐུའམ། ལྟེ་བར་སྐུའི་སྤྱན་གྱི་ཐད་ཙམ་དུ་གདགས། འདི་དཔལ་ལྡན་ལྷ་མོའི་ཁྱོད་ལ་རྟེན་དུ་འཛུགས་པ་ཡིན་པས། གཞི་འདི་ལ་བཞུགས་པར་མཛོད། རྒྱན་འདི་ཆགས་པའི་རྟེན་མཛོད། བདག་ཅག་མི་ནོར་འཁོར་དང་བཅས་པ་ཐམས་ཅད་ལ། ཉིན་གསུམ་བྱ་ར་མ་གཡེལ། མཚན་གསུམ་མེལ་ཚེ་མ་གཡེལ། བཅོལ་བའི་ཕྲིན་ལས་མ་གཡེལ། བཀའ་སྒོ་བྱ་ཞིང་། ཤིས་པ་བརྗོད། དེ་ནས་ནལ་བུའི་རྒྱལ་མཚན་དེ་ཉིད་དར་ནག་ལ་སོགས་པས་གཡོགས། ཉི་འོད་ཀྱི་སྣང་བ་སོགས་མི་འབྱུང་བའི་མུན་པ་ནག་པོ་འབྱུང་བའི་ཐབས་
བྱས་ནས། སུས་ཀྱང་མི་མཐོང་བར་བྱ་ཞིང་། སུ་ལ་ཡང་མི་བསྟན། དེ་འདྲ་བའི་བརྟེན་བཅས་ཡོད་པའི་གཏམ་མི་སྨྲ་ཞིང་ཤིན་ཏུ་གསང་བར་བྱའོ། །གསང་བའི་བརྟེན་ནི། ནལ་བུའི་སྙིང་གི་རྩ་གསུམ་ལེགས་པར་སྦྱངས་ནས་སྦུབ་དང་ང་ཡོང་བར་བྱས་པའི་རྩ་དབུས་དམར་དར་ནག་ལ་ལྷ་མོའི་སྐུ་མཚོན་གང་པ་ལྷ་བཟོ་བ་དམ་ཚིག་དང་སྡོམ་པར་ལྡན་པས། སྐར་མ་རྒྱལ་ལ་དེ་ཉིད་ཚང་བར་བྲིས་པའི་རྒྱབ་ཏུ་ནལ་བུའི་ཕྲུ་མ་བརླན་པ་ལ། དམ་ཚིག་པ་བསྐྱེད་ཅིང་ཡེ་ཤེས་པ་གཞུག་པ་སོགས་ལེགས་པར་བྱས་ཏེ། མཆོད་བསྟོད་གཏོར་མ་ཕུལ་ནས། གཡས་གཡོན་ན་དྲིལ་ཏེ་གཞུག །རྩ་གཡས་གཡོན་གཉིས་སུ་རིན་ཆེན་བརྡར་བའི་ཕྱེ་མ་དང་། སྲོག་
སྔགས་གྲི་ཁྲག་གིས་བྲིས་པ་གཞུག །ཕྱིང་པ་ནག་པོ་གཙང་མས་དྲིལ་ཏེ་དར་ནག་གི་ཕྱི་དྲིལ་བྱས་ནས་རང་གི་མཆན་ཁུང་གཡོན་དུ་གདགས། གཞན་སུས་ཀྱང་མ་རིག་པ་བྱས། འདིས་ལུས་དང་གྲིབ་མ་བཞིན་མི་འབྲལ་བར་འགྱུར་ཞིང་། ལྷ་མོའི་སྐུ་འབགས་སོགས་བཞེངས་ན་དེའི་ཐུགས་ཀར་བཅུག་པས་སྐུ་དངོས་དང་ཁྱད་པར་མེད་པ་གཅིག་འོང་བ་ཡིན། འདི་ལ་ཞལ་ཤེས་གཞན་མེད་དེ་ཡིག་ཆུང་རྙིང་པ་རེ་རེ་ཙམ་ན། རྩ་གཞན་གཉིས་སུ་བརྟན་མ་བཅུ་གཉིས་ཀྱི་གཟུངས་བྲིས་ལ་གཞུག་བྱ་བ་ཡོད་ནའང་། ཤོང་ས་མེད་ཅིང་རྙིང་མ་བྱེད་པ་འགའ་ཞིག་གིས་བཅུག་པར་སྣང་ངོ་། །ནལ་བུའི་ཕྲུ་མ་རྒྱབ་ལ་བརློན་དགོས་པ་
རྣམས་ལ་མ་རྙེད་ན། དེའི་ཁྲག་རྒྱབ་ལ་བྱུགས་པས་ཀྱང་དོང་ཐུབ་ཙམ་དུ་རུང་ཞེས་གསུངས། ནལ་བུ་ནི། ཕ་བུའམ་མིང་སྲིང་སོགས་ཉལ་པོ་བྱས་ཕྲུ་གུ་ལ་ཟེར་ཞིང་། དེའི་ཐོད་པའི་གདོང་ལ་བསྲུབ་ས་ཡོང་བ་ཡིན། འདིར་དེའི་ཤ་ཁྲག་རྒྱལ་མཚན་རྣམས་དོགས་པ་རྣམས་ལ། དེ་ཉིད་ཆེད་དུ་བསད་པ་མི་དགོས་ཀྱི་རང་ཤི་བས་ཆོག་གོ། དཔལ་ལྡན་ལྷ་མོ་བསྙེན་སྒྲུབ་ལས་གསུམ་བཅའ་བའི་མན་ངག་དང་བཅས་པ་ཆོས་ཟབ་པ་འདི་ནི། དེ་གོང་ཡིག་རིགས་སུ་མེད་པ་ལ། སངས་རྒྱས་གཉན་སྟོན་གྱི་ཡིག་ཆུང་ཅུང་ཟད་ཙམ་མཛད། འོན་ཀྱང་ཞལ་ཤེས་དགོས་པ་སོགས་མང་བར་འདུག་པ་ལ། ཁོ་བོས་ཡིག་ཆུང་འདི་ཉིད་གཞིར་བཞག་པ་ལ།
ཞལ་ཤེས་དང་གསུང་འཕྲོས་རྣམས་རང་རང་གི་ཐད་དུ་དཀྱུས་སུ་བཅུག་སྟེ། ལྷག་མ་མེད་པར་ཡི་གེར་བཀོད་པ་ཡིན་ནོ། །གཉན་སྟོན་རི་གོངས་པས་མཛད་ནས། སངས་རྒྱས་སྟོན་པ་ལ་གནང་བའི་ཡིག་ཆུང་དེའི་འཇུག་ན། སྒྲུབ་ཐབས་ཀུན་གྱིས་གནད་བསྡུས་པ། །ལྷ་མོའི་གནད་བསྐུལ་མན་ངག་འདི། །གལ་ཏེ་མང་པོར་སྤེལ་གྱུར་ན། །དཔལ་བོའི་ལག་ཏུ་མཚོན་གཏད་ཡིན། །དེ་ཕྱིར་ཤིན་ཏུ་སྡིག་ཆེ་བས། །བྱིན་ན་དམ་ཚིག་མེད་དོ་ཨང་། །ང་ཡི་བུ་ཁྱོད་མ་ཡིན་པ། །གཞན་ལ་བྱིན་པ་ཡོད་རེ་ཀན། །འདི་ལས་ཟབ་པའི་ལྷ་མོ་མེད། །ཞལ་གདམས་ཆིག་བརྒྱུད་ཁྱད་པར་འཕགས། །ཨིྀྛཿ