དཔལ་ལྡན་ལྷ་མོའི་བསྟོད་པ་བསྐལ་པ་མེ་འབར་མར་གྲགས་པ།
དཔལ་ལྡན་ལྷ་མོའི་བསྟོད་པ་བསྐལ་པ་མེ་འབར་མར་གྲགས་པ་བཞུགས་སོ།། ༼པུ༽ བྷྱོ། བསྐལ་པ་མེ་ལྟར་འབར་བའི་ཀློང་དཀྱིལ་ན། །
རླུང་ནག་འཚུབ་མར་འཚུབས་པའི་ཕོ་བྲང་ན། །རྟ་ཁྲག་མི་ཁྲག་རྒྱ་མཚོའི་རྦ་ཀློངས་འཁྲུགས། །དམ་ཉམས་དགྲ་བགེགས་བསྣོལ་བའི་གདན་སྟེང་ན། །མ་གཅིག་འདོད་ཁམས་དབང་ཕྱུག་རེ་མ་ཏི། །སྐུ་མདོག་མཐིང་ནག་ཆར་སྤྲིན་ལྟ་བུ་ལ། །དབུ་སྐྲ་ཁམ་སེར་རྨ་བྱའི་མདོངས་ཀྱི་བརྒྱན། །བྱང་ཆུབ་སེམས་ལྡན་སྤྱི་གཙུག་ཟླ་རྒྱས་གསལ། །འབྱུང་པོ་སྐྲག་མཛད་ཐོད་པས་དབུ་རྒྱན་ཞིང་། །ལོག་འདྲེན་ཟིལ་གནོན་སྙན་གཡས་སེངྒེ་འཕྱོ། །གདུག་པ་འདུལ་ཕྱིར་སྙན་གཡོན་སྦྲུལ་གྱི་བརྒྱན། །སྙན་ནས་འཇིགས་པའི་འབྲུག་སྒྲ་ཆེམ་ཆེམ་སྒྲོགས། །དཔྲལ་བའི་དཀྱིལ་ནས་གནམ་ལྕགས་སེར་ཆེན་འབེབས། །སྤྱན་
གསུམ་དམར་འཁྲུགས་གློག་ལྟར་འཁྱུག་བྱེད་ཅིང་། །ཤངས་ནས་ནད་ཀྱི་རླུང་ནག་འཚུབ་མར་འཚུབས། །འཇིགས་པའི་ཁ་གདངས་མཆེ་གཙིགས་ལྗགས་འདྲིལ་ཞིང་། །ཨ་ལ་ལ་ཡི་གད་མོ་འབྲུག་ལྟར་སྒྲོགས། །སྟོང་གསུམ་འབྱུང་པོའི་ཚོགས་རྣམས་སྐྲག་བྱེད་པའི། །འཇིགས་བྱེད་ལྷ་མོ་ཁྱོད་ལ་བདག་བསྟོད་དོ། །ཕྱག་གཡས་རལ་གྲི་གྲི་གུག་དགྲ་སྲོག་གཅོད། །གཡོན་པས་རྒྱལ་མཚན་ཐོད་རློན་སྙིང་ཁྲག་གསོལ། །སྦྲུལ་གྱི་སྐ་རགས་ལྟེ་བར་ཉི་མས་བརྒྱན། །སྐུ་སྨད་གླང་ཆེན་ཀོ་རློན་རེ་ལྡེས་དཀྲིས། །སྟོང་གསུམ་བསྒྲོད་ཕྱིར་དྲེའུ་ག་པ་ཆིབས། །སྲིན་པོའི་ཡ་ཐོད་སྔ་རུ་ནད་རྐྱལ་བཏགས། །སྦྲུལ་ནག་ཆུན་པོ་སྟོང་གི་གོང་
སྨད་བྱས། །བསྟན་པ་བསྲུང་མཛད་བདུད་མོ་འབུམ་གྱི་བསྐོར། །སྲོག་བདུད་ཆེན་མོས་དགྲ་བགེགས་སྒྲོལ་ལ་ཤོག །