མཁས་གྲུབ་རིན་པོ་ཆེས་མཛད་པའི་མགོན་པོའི་བསྟོད་པ།
མཁས་གྲུབ་རིན་པོ་ཆེས་མཛད་པའི་མགོན་པོའི་བསྟོད་པ་བཞུགས་སོ།། ༼མུ༽ ན་མོ་མ་ཧཱ་ཀ་ལ་ཡ། །གང་ཐུགས་དབྱིངས་ལས་མ་གཡོས་ཀྱང་། །སྙིང་རྗེ་ཆེན་པོས་རབ་ཏུ་འཁྲོས། །གདུལ་དཀའ་མ་ལུས་འདུལ་བའི་གཤེད། །གཏུམ་པོ་ཁྱོད་ལ་བདག་བསྟོད་དོ། །མི་ཟད་དྲག་ཤུལ་ཆེན་པོའི་སྐུ། །མུན་པའི་མདོག་ཅན་དུས་མཐའི་མེ། །འོད་ཟེར་རྣོན་པོ་རབ་འབར་བས། །བདུད་ཀྱི་དཀྱིལ་འཁོར་མཐའ་དག་སྲེག །ཉི་མ་འབུམ་གྱི་མདངས་ལྡན་ཞིང་། །ལྷུན་
པོར་ལྟར་བརྗིད་ཡན་ལག་རགས། །སྲིན་པོའི་གཟུགས་ཅན་ལྟོ་བ་འཕྱང་། །མགོ་ཕྲེང་ཅན་ཁྱོད་བསྟོད་པར་བྱ། །འབྱུང་པོའི་ཁྲག་གིས་གོས་གྱོན་ཞིང་། །མཆེ་བ་གཙིགས་ཤིང་རྔམས་པའི་ཞལ། །སྤྱན་གསུམ་རབ་འབར་ཁྲོ་གཉེར་བསྡུས། །གློག་སྟོང་འཁྱུག་ལྟའི་སྨིན་མ་གཡོ། །ལས་དྲུག་མཛད་པའི་ཕྱག་དྲུག་གིས། །གྲི་གུག་འབར་བས་མུས་ཕྱེ་ནས། །ཐོད་ཕྲེང་ཅན་གྱི་དོན་སྙིང་འབྱིན། །ཅང་ཏིའུ་སྒྲ་ཡིས་མྱོས་པར་བྱེད། །ཐོད་རློན་དམ་ཉམས་དགྲ་བགེགས་ཀྱིས། །ཁྲག་འདྲེན་བཏུང་བས་བཀང་ཞིང་རོལ། །རྩེ་གསུམ་འབར་བས་གནས་གསུམ་བསྣུན། །རྡོ་རྗེ་ཞགས་པས་འཆིང་ཞིང་འདྲེན། །བགེགས་
ཆེན་སྟེང་ན་ཞབས་གཉིས་ཀྱིས། །ཁྲོས་པའི་གར་མཛད་ས་གསུམ་གཡོ། །ཁྲག་འཛག་སྟག་ལྤགས་རློན་པ་ཡིས། །ཤམ་ཐབས་འཆང་བ་ཁྱོད་ལ་བསྟོད། །ཁྱོད་ནི་དུས་གསུམ་རྒྱལ་བ་ཡིས། །བསྟན་པ་བསྲུང་བར་བཀའ་སྒོས་ཤིང་། །སྙིགས་མའི་དུས་ཀྱི་འདུལ་དཀའ་བ། །མ་ལུས་འདུལ་བའི་ཐུགས་དམ་ཅན། །དེ་ཕྱིར་འདི་ན་དུས་ཀུན་ཏུ། །ཁྱོད་ལ་གསོལ་བ་འདེབས་པ་ལ། །བཏང་སྙོམས་གཡེལ་བ་མ་མཛད་པར། །བཅོལ་བའི་ལས་རྣམས་འགྲུབ་པར་མཛོད། །ཏིང་འཛིན་སྔགས་དང་ཕྱག་རྒྱ་ཡིས། །བྱིན་གྱིས་བརླབས་པའི་གཏོར་མ་དང་། །མཐུན་པའི་དམ་རྫས་འདི་བཞེས་ལ། །བླ་མས་བསྒོས་པའི་ལས་མཛོད་ཅིག །
བདག་ཅག་འཁོར་བཅས་དགེ་འདུན་དང་། །གནས་དང་ལོངས་སྤྱོད་བཅས་པ་ལ། །ཉེ་བར་འཚེ་བའི་སེམས་འཆང་ཞིང་། །ལོག་པར་སྒྲུབ་པའི་སྦྱོར་བ་ཅན། །ཕྱི་དང་ནང་ན་གནས་པ་ཡིས། །མི་དང་མི་མིན་འབྱུང་པོའི་ཚོགས། །འཇིགས་ཤིང་བཟོད་དཀའི་ཆོ་འཕྲུལ་གྱིས། །རྐྱེན་དང་མཚམས་པར་ཚར་ཆོད་ཞིག །བདག་ཅག་མདོ་དང་རྒྱུད་སྡེ་ཡི། །བཤད་དང་བསྒྲུབ་པའི་བྱ་བ་ལ། །རིག་འཛིན་སྲུང་མ་འཁོར་བཅས་ཀྱིས། །གཡེལ་བ་མེད་པའི་བྱ་ར་མཛོད། །དཔལ་རྡོ་རྗེ་ནག་པོ་ཆེན་པོ་མྱུར་མཛད་ཡེ་ཤེས་ཀྱི་མགོན་པོ་ལ་བསྟོད་ཅིང་ཕྲིན་ལས་བསྐུལ་བའི་ཚིགས་སུ་བཅད་པ་རྡོ་རྗེ་འཛིན་པ་དགེ་ལེགས་དཔལ་བཟང་པོས་སངས་རྒྱས་ཀྱི་བསྟན་པ་དང་བསྟན་པའི་སྙིང་པོ་ཡུན་རིང་དུ་
གནས་གྱུར་ཅིག་སྙམ་དུ་དམིགས་ཏེ་སྨྲས་པའོ།། །།