འབྲུབ་ཁུང་ལིངྒ་འཁོར་ལོ་སོགས་བསྟན་པ་ལས་ཀྱི་འཁོར་ལོ་ཞེས་བྱ་བ་རཱ་ཧུ་ལས་འཁྱུང་པོ་རྣལ་འབྱོར་ལ་གནང་བས་གསང་བའི་ནོར།
༈ འབྲུབ་ཁུང་ལིངྒ་འཁོར་ལོ་སོགས་བསྟན་པ་ལས་ཀྱི་འཁོར་ལོ་ཞེས་བྱ་བ་རཱ་ཧུ་ལས་འཁྱུང་པོ་རྣལ་འབྱོར་ལ་གནང་བས་གསང་བའི་ནོར་བཞུགས་སོ།། སུ༽ ༈ ལས་ཀྱི་འཁོར་ལོ་ཞེས་བྱ་བ། གྲོག་མཁར་བདུན་དང་གཡུལ་ས་དང་། །ཕུང་ས་དུར་ཁྲོད་ས་དག་ཏུ། །དྲག་ས་ལྷ་ཁང་ཞིག་པོའི་ས། །བཅུ་གཉིས་པ་ལ་སེར་ཆེན་ཆུས། །སྦྲུས་པས་འབྲུབ་ཁུང་གསུམ་རིམ་ས། ཁ་ཁྱེར་གསུམ་དང་ལྡན་པར་བྱ། ཕྱི་རོལ་ལྕགས་རི་ཟླུམ་པོ་དང་། །ཐོད་མཁར་རྭ་བ་རིམ་པ་གཉིས། །ལྕགས་རི་གྲུ་གསུམ་སོར་དྲུག་གཉིས། །སོར་དྲུག་སོར་དགུ་བཅོ་བརྒྱད་པ། །ནང་དུ་དུག་དང་གྲི་ཁྲག་དང་། །ཐལ་ཆེན་རྣམས་ཀྱི་ནག་པོར་བྱ། །རྫས་དེ་རྣམས་ལ་གྲི་ཐོད་དང་། །རབས་ཆད་ཐོད་པ་མཛ་ཐོད་དང་། །ཁྱི་ཐོད་ཝ་ཐོད་སྤྲེའུ་ཐོད། །བྱ་རོག་མགོ་རུས་བསྲེས་པའི་ས། །ཐོད་པ་ཁ་སྦྱོར་གཉིས་བྱས་པའི། །
ནང་དུ་བག་ཟན་རྐང་རྗེས་ལ། །དྲི་ཆུ་བཤང་བར་བཅས་པ་ཡི། །གཟུགས་སྙན་སོར་དགུའི་ཚད་དུ་བྱ། །དེ་སྙིང་རོ་རས་ལིངྒ་གཞུག །སྙིང་ནང་འཁོར་ལོ་རྩིབས་བཞི་པ། །ལས་བྱེད་བཞི་པ་གཤེད་དུ་དབབ། །དཔྲལ་བར་རུས་དང་སྙིང་ཁར་མིང་། །བརླ་ལ་བླ་དག་བགོང་བྱ་བ། །ཡན་ལག་བཞི་ལ་མཱ་ར་ཡ། །ཛ་དང་ཛ་ཞེས་བྱ་བ་དགོད། །རང་ཉིད་ལྷར་གསལ་དགྲ་བོ་དགུག །དེ་ཡི་ལྷ་དང་བསྲུང་མ་རྣམས། །རྡོ་རྗེ་སེམས་དཔའི་ཞིང་དུ་འཕངས། །རྣམ་ཤེས་སྡིག་པའི་ཕུང་པོ་རྣམས། །བདུད་རྩིར་སྒྲུབ་ནས་ལྷ་ལ་འབུལ། །དྲག་པོའི་རྫས་ཀྱི་རབ་གདུག་ཅིང་། །ཐོད་པ་ཁ་སྦྱོར་ནང་དུ་གཞུག །དེ་སྟེང་དུར་ཁྲོད་གཡམ་པ་ཡི། །དེ་ཡིས་བགབ་ཅིང་ཁུང་བུ་བྱ། །ཐུན་ཐག་དུར་ཁྲོད་སྲད་བུ་སྟེ། །ཡུངས་ཀར་ཐལ་ཆེན་སོལ་བ་དང་། །ཀེ་ཚེ་ལ་སོགས་རྫས་རྣམས་འཕངས། །གཉིས་པའི་ཁ་ལ་རྩངས་རྣམས་དགོད། །གསུམ་པ་དྲག་པོའི་གཏོར་ཆེན་བཞག །ཟུར་གཞན་གསུམ་དུ་ཐུན་གཏོར་གསུམ། །ལིངྒ་གཏོར་མའི་ནང་དུ་གཞུག །དགྲ་བོའི་ཤ་དང་ཁྲག་ཏུ་
དམིགས། །ཐལ་མོ་འཁོར་ལོ་རྩིབས་སྟོང་པའི། །བར་དུ་ཕྱེ་མར་བཏང་དམིགས་ནས། །ཆོས་སྐྱོང་འཁོར་དང་བཅས་ལ་འབུལ། །སྟེང་དུ་ནག་པོ་ཆེན་པོ་ལ། །ལས་བྱེད་བཞི་དང་བདུན་བཅུ་ལྔ། །བྱ་དང་ལྕེ་སྤྱང་ཤ་ཟ་རྣམས། །དུག་སྦྲུལ་ཁྱི་དང་ཝ་སོགས་ཀྱིས། །དམྱལ་བ་བཞིན་དུ་ཟ་ཞིང་འདྲེད། །མཚོན་ཆའི་ཆར་དབབས་ནད་དང་གདུངས། །མུན་པའི་གླིང་འཁོར་ཐར་མེད་བསམ། །གཙོ་འཁོར་ལས་བྱེད་ཤ་སའི་ནའི། །བཤམ་དུ་དགྲ་བོ་མཱ་ར་ཡ། །བཏགས་ནས་རྒྱུན་དུ་བྲབས་པར་བྱ། །རྟགས་རྣམས་བྱུང་ནས་གཏོར་མ་འཕངས། །ལིངྒ་དྲག་པོའི་སྦྱིན་བསྲེག་བྱ། །རྫས་དང་ཐལ་བ་ཆུ་བོར་དོར། །སྔོན་དང་ཕྱིར་རམ་དགེ་ཚོགས་དང་། །སྡིག་བཤགས་སཱཙྪ་ལ་སོགས་བྱ། །མི་བཟད་དྲག་པོའི་ལས་མཐའ་འདི། །རཱ་ཧུ་ལ་ཡིས་གནང་བ་ཡིན། །ཤིན་ཏུ་གསང་བྱ་དམྱལ་བའི་རྒྱུ། །ནག་པོའི་རང་སྲོག་གཅོད་པར་བྱེད། །ཁྱུང་པོ་རྣལ་འབྱོར་གསང་བའི་ནོར། །དམ་མེད་རྣམས་ཤོ་ར་རེ། །ཨིྀྛཿ ཅེས་བྱ། མང་ཐོས་དགེ་ལེགས་
དཔལ་བཟང་གིས། །མཁས་གྲུབ་གོང་མའི་མན་ངག་ལས། །ལྷད་ཞུགས་གསལ་ནས་དག་པར་བྱས། མུ༽