མགོན་པོ་ཡབ་ཡུམ་གྱིས་སྲོག་གི་འཁོར་ལོ་མན་ངག་གཞན་ལ་མེད་པའི་ཁྱད་ཆོས།
༈ ཤོག་དྲིལ་བཅུ་པ་ལ་མགོན་པོ་ཡབ་ཡུམ་གྱིས་སྲོག་གི་འཁོར་ལོ་མན་ངག་གཞན་ལ་མེད་པའི་ཁྱད་ཆོས་བཞུགས་སོ།། ཀོ༽ ༈ ན་མོ་མ་ཧཱ་ཀཱ་ལ་ཡ། །བཀའ་སྡོད་ལས་ལ་སྦྱར་བ་ལ། །སྲོག་གི་འཁོར་ལོ་འདི་མེད་ན། །ལས་ལ་མི་འགྲོ་འཁུ་ལྡོག་ཆེ། །དེ་ནས་སྲོག་གི་འཁོར་ལོ་གཅེས། །དེ་ཕྱིར་རྣལ་འབྱོར་འདི་ལ་བརྩོན། །སྲོག་འཁོར་བཞི་ཡི་མན་ངག་ནི། །རྒྱ་ཤོག་གམ་ནི་དར་དཀར་ལ། །རིན་ཆེན་མཚལ་ལམ་སྣག་མཚས་བྲིས། །ཙཀྲ་མུ་ཁྱུད་ལྔ་པ་ལ། །ལྟེ་བར་ཨོཾ་ལ་མིང་སྤེལ་བཅས། །རྩིབས་དྲུག་རང་སྔགས་ཡིག་མགོ་ཕྱི། །མུ་ཁྱུད་གཉིས་པར་ལས་སྔགས་བྲིས། །སྤེལ་ཚིག་དག་ལ་རཀྵ་བཅས། །གསུམ་པ་ལ་ནི་གཙོ་བོའི་སྔགས། །སྤེལ་ཚིག་བསྙེན་པ་བཅས་པ་བྲི། །བཞི་པ་ལ་ནི་ཤཱ་ས་ན། །ལྔ་པ་ལ་ནི་ཐོད་རས་བསྐོར། །དེ་ནི་ཡབ་ཀྱི་འཁོར་ལོའོ། །གཉིས་པ་ཡུམ་གྱི་འཁོར་ལོ་ནི། །དར་དཀར་རམ་ནི་རྒྱ་ཤོག་ལ། །རིན་ཆེན་མཚལ་ལམ་སྣག་ཚལ་ཡི། །འཁོར་ལོ་མུ་ཁྱུད་གསུམ་པ་ལ། །ལྟེ་བར་བྷྱོ་ལ་མིག་སྤེལ་བཅས། །མུ་
ཁྱུད་དང་པོར་རྩིབས་བཞི་ལ། །རང་སྔགས་ཡིག་མགོ་ཕྱིར་བསྟན་བྲི། །མུ་ཁྱུད་གཉིས་པ་ལྷ་མོ་ཡིས། །རྦོད་རྦད་བསད་གསུམ་སྔགས་རྣམས་བྲི། །མུ་ཁྱུད་གསུམ་པར་ཐོད་རས་བསྐོར། །འཁོར་ལོ་གཉིས་ལ་རབ་གནས་ནི། །མན་ངག་བཞིན་དུ་ལེགས་པར་བྱ། །མན་ངག་བཞིན་དུ་ལེགས་པར་སྡེབས། །དོམ་གྱི་སྙིང་ཤུན་ནང་དུ་འདྲིལ། །དར་ནག་བཏགས་ལ་དཔུང་གཡོན་གདགས། །འདི་མེད་བཀའ་བསྡོད་ལས་མི་བགྱེད། །ཕ་རོལ་བཟློག་པ་རང་ལ་ཕུང་། །དེ་བས་གནད་འདི་གཅེས་པར་མཛོད། །གཞན་ལ་མེད་པའི་ཁྱད་ཆོས་ཡིན། །ཨིྀྛཿ