བཀའ་བརྒྱུད་སྤྱིའི་ཆོས་ཀྱི་བྱུང་བ་བརྗོད་པ།
ཆོས་བྱུང་མཁས་པའི་དགའ་སྟོན་གྱི་ཡན་ལག་གསུམ་པ་བོད་ཀྱི་སྐབས་ལས་བདུན་པ་བཀའ་རྒྱུད་སྤྱིའི་ཆོས་བྱུང་བཞུགས།(ན༡བ)
རྒྱལ་བས་བསྟན་པའི་ཆོས་ཀྱི་རྣམ་གྲངས་ཀུན། །མིང་ཚིག་དོན་སྤྱི་ཙམ་དུ་མ་ལུས་པར། །མངོན་སུམ་ཉིད་དུ་རྟོགས་པ་རྒྱུད་ལ་སྐྱེད། །ཚེ་འདིའི་ཆེད་དུ་སྦྱོར་དགྲོལ་དབང་དགུག་སོགས། །ཆོས་ལྟར་བཅོས་པ་ཐམས་ཅད་ཡོངས་སྤངས་སྟེ། །འཆི་ཆོས་སྙིང་ནས་བཟོད་མེད་དྲན་པ་དང༌། །སྲིད་དང་ཞི་བས་མི་འཕྲོགས་ངེས་འབྱུང་དང༌། །བདག་པས་གཞན་གཅེས་ཀུན་རྫོབ་བྱང་སེམས་དང༌། །སངས་རྒྱས་བླ་མར་ཤེས་པའི་མོས་གུས་དང༌། །ཆོས་ཀུན་མཉམ་ཉིད་མཐོང་བའི་དག་སྣང་དང༌། །ཅིས་ཀྱང་དགོས་པ་མེད་པའི་ཞེན་ལོག་དང༌། །ཡིན་ལུགས་ནང་ནས་ཤར་བའི་རྟོགས་པ་དང༌། །སངས་རྒྱས་སེམས་ལས་རྙེད་པའི་འབྲས་བུ་དང༌། །གཅིག་ཤེས་ཐམས་ཅད་གྲོལ་བའི་ཀུན་མཁྱེན་རྣམས། །མངོན་སུམ་ཉིད་དུ་རྒྱུད་ལ་སྐྱེད་བྱེད་པ། །བསྟན་པའི་ཡང་(ན༢ན)
སྙིང་བཀའ་རྒྱུད་རིན་པོ་ཆེ། །འདི་ནི་གྲུབ་ཆེན་ཀུན་གྱི་གཤེགས་བཤུལ་སྟེ། །ཁྱད་པར་འཁོར་ལོ་བདེ་མཆོག་མིར་བསྟན་པ། །རྣལ་འབྱོར་དབང་ཕྱུག་དཔལ་ལྡན་ཏེ་ལོ་པས། །བཀའ་བབས་བཞི་ཡི་ཆུ་བོ་གཅིག་དུ་བསྡུས། །རྡོ་རྗེ་འཆང་ལས་མངོན་སུམ་ཆོས་ཀུན་གསན། །རྡོ་རྗེ་ཕག་མོས་གསང་བའི་སྒོ་ཀུན་ཕྱེ། །རྒྱུད་རྣམས་ཀུན་གྱི་བདག་པོར་གྱུར་པ་དེས། །རྡོ་རྗེ་སེམས་དཔའ་དཔལ་ལྡན་ན་རོ་པར། །སྙིང་པོའི་བསྟན་པ་ཡོངས་སུ་ཚང་བར་གཏད། །དགྱེས་པའི་རྡོ་རྗེ་མར་པ་ལོ་ཙཱ་དང༌། །གསང་བ་འདུས་པའི་ངོ་བོ་མི་ལ་རྗེ། །གསུང་གི་རྡོ་རྗེ་སྒམ་པོ་པ་ལ་སོགས། །བསྟན་པའི་བདག་པོར་རིམ་པར་དབང་བསྐུར་ཞིང༌། །རྫོགས་པའི་སངས་རྒྱས་སྤྲུལ་སྐུ་དཔག་མེད་དང༌། །བསྐལ་བཟང་སངས་རྒྱས་གྲུབ་ཐོབ་བརྒྱད་བཅུ་སོགས། །གང་འདུལ་སྐུ་དང་མཚན་དུ་སྣང་བ་ཡིས། །སྐལ་ལྡན་ན་མཁའི་མཐའ་ཀླས་གྲོལ་མཛད་པ། །སྙིང་པོའི་བསྟན་པ་བཀའ་རྒྱུད་རིན་ཆེན་གྱིས། །འཛམ་གླིང་ཁྱབ་པར་རྒྱུན་མི་ཆད་པར་བྱུང༌། །བྱང་ཆུབ་སེམས་ཀྱི་རྩ་བརྟན་ཞི་ལྷག་དང༌། །བསླབ་གསུམ་རང་བཞིན་བྱང་ཕྱོགས་ཡལ་ག་(ན༢བ)
ཅན། །ལུང་དང་མངོན་རྟོགས་བྱེ་བའི་ལོ་མདབ་རྒྱས། །སྐྱེད་དང་རྫོགས་པའི་མེ་ཏོག་རབ་བཀྲ་ཞིང༌། །བརྩོན་འགྲུས་དབང་གིས་འདི་དང་འཆི་སྲིད་དང༌། །བར་དོར་གྲོལ་བའི་འབྲས་བུ་བཟང་པོ་ཅན། །རྒྱལ་བསྟན་ཡོངས་རྫོགས་ཆོས་ཀྱི་ཡོངས་འདུ་ཆེ། །ཁམས་གསུམ་ཀུན་དུ་གཉིས་པ་མ་མཆིས་པ༌། །འདི་ལ་བསྟེན་ནས་བསྟན་པའི་ཡན་ལག་གི །འཁྲི་ཤིང་སྣ་ཚོགས་བརྟེན་ནས་གནས་པ་ཡིན། །དེ་ཕྱིར་རྨད་བྱུང་སྙིང་པོའི་བསྟན་པ་དངོས། །རྡོ་རྗེ་འཆང་གི་གྲལ་རིམ་མ་ཉམས་པ། །མར་མི་དྭགས་པོའི་བཀའ་རྒྱུད་རིན་ཆེན་ལ། །རྣམ་པ་ཀུན་དུ་གུས་པས་ཕྱག་འཚལ་ལོ། །བོད་ཡུལ་ཕྱི་རབས་འདིར་རྒྱལ་བསྟན་ཡོངས་སུ་རྫོགས་པ་ནི་བཀའ་རྒྱུད་རིན་པོ་ཆེ་ཉིད་ཡིན་སྟེ། དེ་ཡང་ཐེག་པ་ཆེན་པོའི་འདོ་ལས་གསུངས་པའི་ལོངས་སྤྱོད་རྫོགས་པའི་སྐུ་ཆེན་པོ་དེ་ཉིད་ལ་སྔགས་བླ་མེད་དུ་ཐུན་མོང་མ་ཡིན་པའི་ཡོན་ཏན་གྱི་སྒོ་ནས་ཁ་སྦྱོར་ཡན་ལག་བདུན་ལྡན་གྱི་རྡོ་རྗེ་འཆང་ཆེན་པོ་ཅེས་བྱ་ཞིང༌། ཐུན་མོང་མ་ཡིན་པའི་གདུལ་བྱ་དག་པ་ལ་ཕུན་ཚོགས་ལྔ་ལྡན་དུ་རྒྱུན་མི་ཆད་པར་བཞུགས་པ་དེ་ལ་སྤྲུལ་པའི་སྐུ་ཏེ་ལོ་པས་དངོས་སུ་ཐུན་མོང་མ་ཡིན་པའི་ཆོས་མཐའ་དག་གསན་པས་བྷཾ་ག་ལ་རུ་སངས་རྒྱས་མཇལ། ཞེས་བཤད་པ་ཡིན་ལ། མིའི་བླ་མ་མེད་ཏོ་སྙམ་པ་དག་སེལ་ཕྱིར་བཀའ་བཞི་རྒྱུད་པའི་བླ་མ་བསྟན་པ་ཡིན་ལ། དེ་ཡང༌། ས་ར་ཧ། ཀླུ་སྒྲུབ། ཨཱརྻ་དེ་ཝ། ཟླ་བ་གྲགས་པ། མ་ཏཾ་གི་སྟེ་ཤར་གྱི་བཀའ་བབས་སོ། །ལཱུ་ཨི་པ། ཌྀངཱ་གི་པ། དྷ་རི་ཀ་པ། སུ་ཁ་དྷ་རི་རྣམས་ལྷོའི་འོ། །ཌོམྦི་པ། བི་ན་ས། ལ་བ་པ། ཨིནྡྲ་བྷཱུ་ཏི་རྣམས་ནུབ་ཀྱིའོ། །སུ་མ་ཏི། ཐང་ལོ་པ། ཤིང་ལོ་བ། ཀརྵ་རི་པ། ཛཱ་ལནྡྷ་ར་པ། ཙཱརྻཱ་པ་རྣམས་བྱང་གིའོ། །(ན༣ན)
དེ་ཡང་རྡོ་རྗེ་འཆང་དང་རྡོ་རྗེ་རྣལ་འབྱོར་མ་ཐ་མི་དད་པ་ཧེ་རུ་ཀས་རྒྱུད་མཐའ་དག་གསུངས། སྡུད་པ་པོས་བསྡུས་སྟེ་ཨོ་ཌྱན་གྱི་ཡུལ་དྷརྨ་ཛག་ཏྲ་ཆོས་ཀྱི་ཕོ་བྲང་ན་གླེགས་བམ་གྱི་རྣམ་པར་བཞུགས་སོ། །དེ་ཡང་སྔགས་སར་མའི་གྲུབ་ཐོབ་ཐམས་ཅད་ཀྱི་མཆོག་དཔལ་ས་ར་ཧ་ནི་སྟོན་པ་མྱ་ངན་ལས་འདས་ནས་ལོ་སུམ་བརྒྱ་དང་སོ་དྲུག་ན་བྱོན་པར་རྗེ་རང་བྱུང་ཞབས་ཀྱིས་གསུངས་ལ། སྤྱན་སྔ་ལྷ་གཟིགས་རས་པས་བླ་མེད་དོན་རྫོགས་འདུས་པའི་རྒྱུད་ལས། ང་ནི་མྱ་ངན་འདས་འོག་དུ། །ལོ་ནི་བཞི་གཉིས་ལོན་པ་ན། །ཨོ་ཌྱན་ཡུལ་དུ་ང་ཉིད་འབྱུང༌། །འཇིག་རྟེན་ཀུན་གྱི་དཔལ་དང་ལྡན། །པདྨ་འབྱུང་གནས་ཅེས་བྱ་བ། །སྔགས་ཀྱི་སྟོན་པར་ལུང་དུ་བསྟན། །ཞེས་དང༌། ལོ་ནི་བརྒྱ་དང་བཅུ་གཉིས་ན། །ཅིག་ཅར་མཆོག་གི་སྐལ་བ་ཅན། །ས་ར་ཧ་ཞེས་བྱ་བ་འབྱུང༌། །རྐྱེན་བྲལ་གསུམ་གྱི་དོན་རྟོགས་ནས། །སངས་རྒྱས་ས་ལ་དེ་ཉིད་འགྲོ། །ཞེས་འདྲེན་ལ། བདག་གིས་ནི་རྒྱུད་དེ་ཆ་མ་འཚལ་ཏོ། །མདོར་ན་དེ་ཙམ་ན་ལྷོ་ཕྱོགས་བཻ་དྷརྦྷ་སྟེ་བོད་ལ་བེ་ཏའི་ཡུལ་དུ་གྲགས་པ་དེར་བྲམ་ཟེ་ཆེན་པོ་ཅིག་ལ་སྲས་མཆེད་ལྔ་ཡོད་པའི་ཐ་ཆུང་ངོ༌། །དེ་ཐམས་ཅད་བྲམ་ཟེའི་རིག་པ་ལ་ཤིན་དུ་མཁས་ཤིང་རྒྱལ་པོ་མ་ཧཱ་པཱ་ལས་བཀུར་བ་ལས་ཉིན་གཅིག་སྐྱེད་མོས་ཚལ་དུ་སྐྱོ་གསེང་ལ་བྱོན་པས་བྲམ་ཟེའི་བུ་མོ་ཕུལ་དུ་བྱུང་བ་བཞི་རིགས་ངན་མ་དང་ལྔ་འདུག་པ་ལ་གང་ནས་ཀྱང་མ་འོངས་ཅེས་སོགས་དྲི་ལན་གྱིས་ཆོས་བསྟན་པ་ཁོང་དུ་ཆུད་ཅིང་ཕུ་བོ་བཞི་བྲམ་ཟེ་རེ་དང་བཅས་མཁའ་སྤྱོད་དུ་ཡལ་ལོ། །དེར་ཐ་ཆུང་སྐྱོ་བར་གྱུར་སྟེ་སྲས་དགྲ་གཅན་ཟིན་གྱི་མཁན་བུ་ཐེག་ཆེན་དཔལ་གྱི་གྲགས་པ་ལས་རབ་ཏུ་བྱུང་བར་རང་བྱུང་ཞབས་བཞེད་ཅིང་ཕལ་ཆེར་སྲས་དགྲ་གཅན་ཟིན་ལས་རབ་ཏུ་བྱུང་བར་འཆད། དེར་ཚུལ་ཁྲིམས་རྫོགས་ཅིང་མཁས་པ་ཟླ་མེད་པར་གྱུར། ལན་ཅིག་སྐྱེད་ཚལ་དུ་བྱོན་པས་སྔར་གྱི་མནའ་མ་བཞི་དཀྱིལ་འཁོར་བཤམས་ཚོགས་ཀྱི་འཁོར་ལོ་བྱེད་པ་གཟིགས་སྟེ་ཐོད་(ན༣བ)
པར་ཆང་སྣ་མི་འདྲ་བ་བཞི་བྱིན་པ་ཅུང་ཟད་འཐུངས་པས་དགའ་བཞིའི་ཡེ་ཤེས་སྐྱེས། བྲམ་ཟེ་མོ་བཞི་རིགས་བཞི་མཁའ་འགྲོ་དངོས་སུ་གྱུར་སྟེ་དབང་བཞི་བསྐུར་ལ། རྡོ་རྗེ་མཁའ་འགྲོས་ཁྱོད་ཀྱི་བླ་མ་འདི་ན་གསུངས་པས་ན་མཁའ་ལ་ལྷ་སྲས་བདེ་བའི་མགོན་པོ་ཅེས་སམ་བློ་གྲོས་རིན་ཆེན་ཞེས་བྱ་བ་དེ་དང་དཔལ་རྟ་མགྲིན་བྱོན། ཕྱག་རྒྱ་ཆེན་པོ་ཅིག་ཅར་པའི་གདམས་པ་མཐའ་དག་གནང༌། དེར་ལུས་ཆང་གིས་ར་རོ། ངག་རྡོ་རྗེའི་གླུས་ར་རོ། སེམས་ལྷན་སྐྱེས་ཡེ་ཤེས་ཀྱིས་ར་རོ་སྟེ། །དུ་མ་རོ་གཅིག་རྒྱ་མཚོ་འདྲ། །བདེ་ཆེན་བདལ་བའི་ངང་ལ་ལུས། །ཅིར་སྣང་ཕྱག་རྒྱ་ཆེན་པོར་ཤར། །ཉམ་ང་མེད་པའི་ངང་ལ་ལུས། །གཞི་མེད་སྤྱོད་པ་སྨྱོན་པ་འདྲ། །བདག་འཛིན་བྲལ་བའི་ངང་ལ་ལུས། །ཞེན་པ་རང་ལོག་བུ་ཆུང་འདྲ། །སྣང་ལ་མ་ཞེན་ངང་ལ་ལུས། །ཁར་སང་ཕན་ཆོད་བྲམ་ཟེ་མིན། །གཙང་སྦྲ་བྱེད་པའི་བྲམ་ཟེ་ཡིན། །དེ་རིང་ཕྱིན་ཆད་བྲམ་ཟེ་ཡིན། །དོན་གྱི་བྲམ་ཟེ་གཙང་སྦྲ་ཆེ། །ཁར་སང་ཕན་ཆད་དགེ་སློང་མིན། །དཀའ་ཐུབ་བྱེད་པའི་དགེ་སློང་ཡིན། །དེ་རིང་ཕྱིན་ཆད་དགེ་སློང་ཡིན། །དོན་གྱི་དགེ་སློང་དཀའ་ཐུབ་ཆེ། །ཞེས་སོགས་གསུངས་སྟེ་ཚོང་འདུས་སུ་བྱོན་པས་མདའ་མཁན་མ་མདའ་བྱེད་པ་ལ་གཟིགས་པས་སྣང་བ་ཐམས་ཅད་བརྡར་ཤར་སྟེ་མདའ་མཁན་མ་ཕྱག་རྒྱར་ཁྲིད་ནས་སྤྱོད་པ་མཛད། དམངས་རྣམས་ཀྱིས་མི་མཛད་པར་ཞུས་པས་སྤྲུལ་སྐུ་གཙོ་བོར་སྟོན་པ་དམངས་དོ་ཧ་གསུངས། རྒྱལ་པོའི་བཙུན་མོ་རྣམས་ཀྱིས་ཞུས་པས་ལོངས་སྐུ་གཙོ་བོར་སྟོན་པ་བཙུན་མོ་དོ་ཧ་གསུངས། རྒྱལ་པོ་ཉིད་ཀྱིས་ཞུས་པས་ཆོས་སྐུ་གཙོ་བོར་སྟོན་པ་རྒྱལ་པོ་དོ་ཧ་གསུངས་པས་ཐམས་ཅད་གྲོལ་སྟེ་ཡུལ་དེ་སྟོངས་བར་གྱུར། ཕྱིས་གཞུང་གསུམ་ཏཱ་ལའི་ལོ་མ་ལ་བྲིས་པ་སྒྲ་མཁན་དཔུན་གཉིས་ཀྱི་ལག་དུ་བབས་པ་ནས་དར་སྐད། འཕགས་པ་ཀླུ་སྒྲུབ་དགེ་འདུན་གྱི་ཞལ་ཏ་བར་སྐོས་སྟེ་དཔལ་གྱི་རི་ལ་བཞུད། ཀླུ་སྒྲུབ་དགེ་འདུན་གྱི་ནང་ན་བཞུགས་ཚེ་ནང་ཅིག་བུ་མོ་གཞོན་ནུ་ཞིག་གིས་ནང་ཐམས་ཅད་བྱི་དོར་བྱས་སྟེ་གནངས་(ན༤ན)
ནང་པར་འབོད་པ་ཅིག་འོང་གིས་དེར་མ་འགྲོ་ཞིག་ཟེར། གནངས་འབོད་པ་ལ་མ་ཕྱིན་པས་ཡང་བུ་མོ་དེ་བྱུང་ནས་ཁང་པ་ཤག་ཤིག་ན་ཤ་ཁྲག་ཟ་བའི་མི་མང་པོ་ཡོད་སར་ཁྲིད་སྟེ་ཕྱིན་ནས་ཤ་ཟོ་ཞིག་ཟེར་མ་ཟོས་པས་དེ་རྣམས་མི་སྣང་བར་གྱུར། བུ་མོ་ན་རེ་ད་གནངས་ནང་པར་ཁྱོད་ཀྱི་མདུན་བྱ་ངང་པ་ཚན་གཅིག་འོང་གིས་དེའི་ནང་ན་ཡི་དམ་འཕགས་པ་འཇམ་དཔལ་བཞུགས་ཡོད་ཀྱིས་གཅིག་ཟུང་ཞིག་ཟེར། དེར་གང་ཡིན་ནམ་བསམ་པ་ལ་ཤོར། ཡང་བྱུང་སྟེ་གནངས་བུད་མེད་ཁ་ཅིག་འོང་གིས་གཅིག་ཅིས་ཀྱང་ཟུང་ཞིག་ཟེར། གནངས་ཉིན་དེ་ལྟར་བཟུང་བས་མེར་འབར། ད་དུང་བཟུང་བས་ཆུར་གྱུར། ཆུ་བཟུང་བས་འཕགས་པ་འཇམ་དཔལ་དུ་གྱུར་ནས་སྟེང་གི་ན་མཁའ་ལ་འཕགས་སྟེ་དངོས་གྲུབ་ཅི་འདོད་གསུང་བ་ན། མཆོག་གི་དངོས་གྲུབ་ཚེ་འདིར་འཚང་རྒྱ་བ་ཞིག་ཞུ། ཐུན་མོང་གི་དངོས་གྲུབ་རྒྱ་མཚོའི་ནང་ན་རིན་པོ་ཆེའི་མཁར་རྩ་བ་ཀླུའི་ཡུལ་དུ་ཡོད་པ་རྩེ་མོ་ལྷ་ཡུལ་དུ་སླེབས་པ་ལྷ་ཀླུ་མི་གསུམ་གྱི་ལོངས་སྤྱོད་ལ་དབང་བྱེད་པ་ཅིག་ཞུ་བྱས་པས་གཉི་ག་བྱིན་གྱིས་སུ་ལའང་མ་སྨྲ་ཞིག་གསུངས། ལྷ་ཀླུ་མཐའ་ཡས་པས་བརྩིགས་སྟེ་མཁར་ཚར་ལ་ཁད་པ་ན་དགའ་ཆེས་སྟེ་མ་ལ་ཟུར་ཙམ་སྨྲས་པས་མཁར་རྩ་བ་ནས་འགྱེལ། ཁྱོད་ཀྱིས་དངོས་གྲུབ་ལེན་མི་ཤེས་པར་འདུག་གསུངས། དེར་ཐོས་པ་ཆུང་བས་ལན་སྙམ་སྟེ། ཧ་ཅང་ཐོས་པ་མ་ཆུང་ཞིག །ཐོས་པ་ཆུང་ནའང་ང་བཞིན་ནོ། །ཞེས་གསུངས་སྟེ་ཐོས་པ་མཛད་པས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཐམས་ཅད་མཁྱེན་ཡང་ཐུགས་མ་གང་སྟེ། ཧ་ཅང་ཐོས་པ་མ་ཆེ་ཞིག །ཐོས་པ་ཆེས་ནའང་ང་བཞིན་ནོ། །གསུངས་སྐད། རྡོ་རྗེ་རྣལ་འབྱོར་མ་བུད་མེད་དུ་སྤྲུལ་པ་ཞིག་གི་རྐྱ་བ་གསེར་དུ་འདུག་ནས་གསེར་འགྱུར་གྱི་གདམས་པ་ཞུས་པས་གནང་སྟེ་དགེ་འདུན་བསྐྱངས། དཔལ་གྱི་རི་ལ་བྲམ་ཟེ་ཆེན་པོའི་དྲུང་དུ་བྱོན་སྟེ་བདུད་རྩི་བུམ་པ་གང་ལ་ཕྱག་རྟེན་བྱས་པས་རྒྱ་མཚོ་ཆེན་(ན༤བ)
པོ་བདུད་རྩིར་བསྒྱུར་བས་ཐུགས་རྒྱལ་ཆག་མཆོག་གི་དངོས་གྲུབ་ཐོབ་པ་དེས་ཨཱརྻ་དེ་ཝ་རྗེས་སུ་བཟུང༌། ཀླུ་སྒྲུབ་དབུ་སྦྱིན་པར་བཏང་ཚེ་འཇིག་རྟེན་དུ་ཉི་མ་ནུབ་བོ་ཅེས་ངུས་པས་ན་མཁའ་ནས་མཁའ་འགྲོས། ང་ནི་འདི་ནས་ལོ་ནི་ལྔ་བརྒྱ་ན། །སོ་ན་ཞེས་པའི་གྲོང་ཁྱེར་ཆེན་པོ་རུ། །ཉི་མ་ནུབ་ཀྱང་ཟླ་བས་མུན་སེལ་བ། །རྣམ་དག་རིགས་ལས་འཁྲུངས་པའི་པཎྜི་ཏ། །ཟླ་བ་གྲགས་པ་ཅེས་བྱའི་མཁས་པ་འབྱུང༌། །ཞེས་ལུང་བསྟན། ཨཱརྻ་དེ་ཝ་ལ་བསྟེན་སྟེ་གྲོལ། དེས་མ་ཏཾ་གི་ལ་གདམས། དེས་སློབ་དཔོན་ཏེ་ལོ་པ་ལ་གདམས་སྟེ་མ་ཏཾ་གི་ཚོལ་དུ་བྱོན་པས་བ་ལང་རྫི་མ་ཏཾ་གི་ཞེས་པ་མི་གཞན་པས་ཉིས་འགྱུར་གྱིས་ཆེ་བ་ཞིག་ཡོད་ཟེར་སྟེ་རྙེད་ནས་གཉི་གའི་འཚོ་བ་སྦྱོར་ཞིག་གསུངས་སྟེ་ཏིང་འཛིན་ལ་བཞུགས། དེས་སྒྱུ་ལུས་འོད་གསལ་ལ་སོགས་ཕ་རྒྱུད་ཀྱི་གདམས་པ་མཐའ་དག་གནང༌། འདི་འཕགས་པ་ཀླུའི་དངོས་སློབ་ཀྱང་ཡིན། ཕ་རྒྱུད་རླུང་གཙོ་བོར་སྟོན་པ་ཤར་གྱི་བཀའ་བབས་སོ། །རྒྱལ་པོ་ཅིག་གི་སྲས་འབྲིང་པོ་ཅིག་ཡབ་དང་གཅེན་ལ་གནོད་ཟེར་ནས་སྤྱུགས་པ་རྒྱལ་ཁམས་གཞན་དུ་ཡི་གེའི་གྲ་ཞིག་དུ་ཕྱིན། ཡིག་དཔོན་གྱི་གཡོག་བྱས་པས་ཡི་གེ་མཁས་པར་ཤེས་སྟེ་རྒྱལ་པོའི་ཡིག་མཁན་དུ་གྱུར། ཡང་བཙུན་མོ་དང་དུམ་མོ་ཞེས་ཕྲ་མ་བྱུང་སྟེ་སྤྱུགས། ཡུལ་གཞན་ཞིག་དུ་སླེབས་སྟེ་ཤིང་དྲུང་ཞིག་ན་འཁོར་བ་ལ་སྐྱོ་ཞིང་ཡིད་འབྱུང་བའི་ཚེ་ལྷོ་ཕྱོགས་ནས་འབྲུག་སྒྲ་ལྟ་བུ་དང་བཅས་སྟེ་རྣལ་འབྱོར་པ་གཟི་འོད་དང་ལྡན་པ་ཅིག་ལམ་བྱོན་ནས་སྤྱི་བོར་ཕྱག་བཞག་པའི་མོད་ལ་དེ་ཁོ་ན་ཉིད་མངོན་དུ་གྱུར་སྟེ་ལོ་བཅུ་གཉིས་སུ་རྟོགས་པ་འདི་སྐྱོངས་ཅིག་གསུངས་སྟེ་ས་ར་ཧ་ཡིན་སྐད། དེར་ཆུ་བོ་གཾ་གཱ་ལ་ཉ་པ་ལྔ་བརྒྱ་ཙམ་གིས་ཉ་རྟག་པར་གསོད་ཅིང་དེའི་རྒྱུ་ལྟོ་བོར་བའི་ཕུང་པོ་ཆེན་པོ་འདུག་ནས་འདི་བདག་གིར་མ་བྱས་པ་དང་རྙེད་སླ་བ་དང་འབད་རྩོལ་མི་དགོས་པ་དང་རྒྱུན་དུ་འོང་བས་འཚོ་བ་དག་པར་འདུག་སྙམ་སྟེ་དེས་འཚོ་བ་མཛད་ཅིང་རི་སྣའི་གད་ཕུག་ཞིག་དུ་སྒྲུབ་པ་མཛད། གྲུབ་པ་ཐོབ་ཀའི་ཚེ་གནོད་སྦྱིན་རྣམས་ཀྱིས་ཞག་བདུན་དུ་སེར་བ་ཕབ་པས་གངས་རི་ལྟར་གྱུར་ནས་(ན༥ན)
རི་སྣ་དེ་ཆད་ནས་ཆུར་ལྷུང་ཡང་སློབ་དཔོན་ཏིང་ངེ་འཛིན་མ་སད་པ་ཉ་ཆེན་པོ་ཅིག་གིས་མིད། ཅི་ཞིག་ན་ཉ་དེ་ཉ་པ་རྣམས་ཀྱིས་ཟིན་ནས་བཤས་པས་སློབ་དཔོན་བྱུང་སྟེ་ཏིང་ངེ་འཛིན་ལས་སད། ཉའི་རྒྱུ་ལྟོ་གསོལ་བ་དང༌། ཉའི་ལྟོ་ནས་བྱུང་བ་གཉི་གའི་རྒྱུ་མཚན་གྱིས་ལཱུ་ཡི་པ་སྟེ་ཉ་རྒྱུ་པའམ་ཉ་ལྟོ་པ་ཅེས་གྲགས་སོ། །དེས་ལྷོ་ཕྱོགས་ཨོ་ཊེ་པི་ཤའི་ཡུལ་དུ་མར་སཱེ་ཏྲའི་རྒྱལ་པོ་བི་མ་ལ་ཙནྡྲ་གདུལ་བྱར་གཟིགས་སྟེ་རྒྱལ་པོ་སྐྱེད་མོས་ཚལ་དུ་འབྱོན་པའི་ལམ་དུ་གཅེར་བུར་གཟིམས་པ་ན་བྲམ་ཟེ་མདུན་ན་འདོན་འཁོར་བཅས་ཀྱིས་བཀྲ་མི་ཤིས་པའི་རྟགས་སེལ་དུ་འོངས་པས་མཐོང་སྟེ། རིགས་ངན་དག་ཕྱིར་ཁྱེད་ཅིག་ཟེར་བ་ན། མ་ལུས་པ་འདི་ཇི་ཙམ་ཡིན་སྟེ་འཇིག་རྟེན་གསུམ་པོ་ཇི་ཙམ་ཡིན། དེ་ཉིད་ཀྱི་ནི་ཆ་གཅིག་མི་བདག་གཞན་ཡིན་དེ་ཉིད་དེའི་གཡོག་ཡིན་ན། །བློ་བཟང་དེ་ཡང་གཞན་གྱི་དམ་པའི་སྤྱོད་ལ་བཞད་གད་བྱེད་པ་ནི། །ཨེ་མ་འཁོར་བ་ངོ་མཚར་རེ་ཆེ་འདི་ལ་སྨྲ་མང་ཅི་ཞིག་དགོས། །ཅེས་གསུངས་པས་ཐམས་ཅད་ཀྱིས་འཐེན་ཡང་སྒུལ་མ་ནུས། རྒྱལ་པོ་ལ་ཞུས་པས་གླང་ཆེན་སྨྱོན་པས་རྫིར་ཆུག་གསུངས་སྟེ་བཏང་བས་བསྐོར་བ་བྱས་ཤིང་ཞབས་ལ་ལྕེས་བལྡགས། རྒྱལ་པོ་ཉིད་འོངས་ནས་ཁྱོད་སུ་ཡིན་བྱས་པས། ར་ཙ་ཧོ་ཡི་ང་རྒྱལ་པོ་ཡིན་ཟེར། རྒྱལ་པོའི་ཡོ་བྱད་རྣམས་ག་རེ་གསུངས་པས། ས་ཡི་མལ་སྟན་ཆེན་པོ་ལ། །ལག་པའི་སྔས་ནི་འབོལ་ལ་མཉེན། །ཉི་མ་ཟླ་བའི་སྒྲོན་མེ་དང༌། །དུས་ཀྱི་རླུང་གིས་གསིལ་གཡབ་བྱས། །རྒྱལ་ལྟར་སྲིད་ན་འཇིགས་མེད་པའི། །རྣལ་འབྱོར་ང་ནི་བདེ་བར་ཉལ། །ཞེས་སྨྲས་པས་རྣལ་འབྱོར་པ་གོ་སྟེ་ཕོ་བྲང་དུ་སྤྱན་དྲངས། གདམས་པ་ཞུས་པས་རྒྱལ་སྲིད་སྤོངས་ཅིག་གསུངས་སྟེ་བདེ་མཆོག་གི་སྤྲུལ་པའི་དཀྱིལ་འཁོར་དུ་དབང་བསྐུར་ནས་རྟོག་པ་གང་ལ་འཕྲོ་དྲིས་པས་རྒྱལ་པོ་སྨད་ཚོང་མ་ལ་འཕྲོ་ཟེར་མདུན་ན་འདོན་དེས་ཌེངཱ་གི་ཡི་སྒྲ་ལ་འཕྲོ་ཟེར། དེར་བྱིན་གྱིས་བརླབས་སྟེ་རྒྱལ་པོ་ལ་རྒྱལ་སྲིད་སྤོངས་ལ་ཨོ་ཊ་པུ་རི་ཁུར་བའི་གྲོང་ན་རྡོ་རྗེ་རྣལ་འབྱོར་མ་སྨད་ཚོང་དུ་བསྟན་པ་དེའི་ཁོལ་པོ་གྱིས་ལ་རྟོགས་པ་སྐྱོངས་དང་ལོ་བཅུ་གཉིས་(ན༥བ)
ན་འཁོར་ཚོམ་བུ་དང་བཅས་པ་མཆོག་གི་དངོས་གྲུབ་འཐོབ་པར་གྱུར་རོ། །བློན་པོ་ལ་གྲོང་ཁྱེར་འདི་ཉིད་ཀྱི་ཆང་ཚོང་མ་འདི་ཞེས་བྱ་བའི་ཁོལ་པོ་གྱིས་ལ་རྟོགས་པ་འདི་སྐྱོངས་ཅིག་ལོ་བཅུ་གཉིས་ན་ཐམས་ཅད་གྲོལ་བར་འགྱུར་རོ་ཞེས་གསུངས། སློབ་དཔོན་འདིས་བདེ་མཆོག་གི་སྒྲུབ་ཐབས་མཛད་ཏོ། །རྒྱལ་པོས་ཀྱང་ཡོ་བྱད་རྣམས་མཆོད་ཡུལ་ལ་ཕུལ། ཕོངས་པ་ལ་བྱིན། ཆ་གཅིག་རྒྱལ་སྲིད་ཀྱི་རྒྱུར་བཞག་སྟེ་བཙུན་མོ་སྟོང་ཕྲག་བཅུ་གཉིས་དང་རྒྱལ་ས་སྤངས་ནས་སྨད་ཚོང་མའི་གཡོག་བྱས། ཉིན་ཞིང་ལས་དང་ནང་ནུབ་ཆང་ཉོ་དང་ཉལ་པོ་ལ་ཡོང་བ་ཀུན་གྱི་ལུས་བཀྲུ་པ་དང་སྐུ་མཉེ་བྱས། ནུབ་མོ་བསྒོམས། ཌེཾ་གི་པས་ཀྱང་ཆང་ཉོ་མི་ཀུན་གྱི་སྐྱེལ་བསུ་དང་བཟི་བ་ཀུན་གྱི་ངན་སྐྱུགས་འཕྱག་པ་དང༌། གོ་ལའི་རྩིགས་མ་འདོར་བ་སོགས་གཡོག་གུས་པར་བྱས་པས་ཆུ་ལེན་པ་ན་བུམ་པ་མགོ་ཐོག་དུ་ཁུར་ཡང་མགོ་ལ་མི་རེག་པར་བྱུང༌། རྒྱལ་པོ་ལ་བལྟས་པས་རེག་ཞིང་འདུག་པས། བླ་མའི་བཀའ་ཡིན་བསམ་ནས་གུས་པོར་མཛོད་བྱས་པས་རྒྱལ་པོས་ཀྱང་གུས་པར་བྱས་པ་ན་བུམ་པ་ན་མཁའ་ལ་ལྡིང་བར་གྱུར། ལོ་བཅུ་གཉིས་ན་ཌེཾ་གི་པས་ཡུལ་ཁམས་ཀྱི་སྐྱེ་བོ་ཐམས་ཅད་དང་བཅས་སྟེ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ། དེས་རྒྱལ་པོ་གྲོལ་བར་བྱས། དེས་སྨད་ཚོང་མ་སུ་ཁ་དྷ་རི་སོགས་བུད་མེད་སྟོང་ཕྲག་བཅུ་བཞི་གྲོལ་བར་བྱས། ཉལ་པོ་ལ་འོངས་པའི་སྐྱེས་པ་གཅིག་ཁོ་ན་ལུས་པའི་ཚེ་ན་མཁའ་ལས་སྒྲ་བྱུང་བ། གྲོང་ཁྱེར་འདིའི་དབུས་ན་རྡོ་རིང་གི་སྟེང་ན་རྡོའི་གླང་པོ་ཆེ་ཞིག་ཡོད་པ་ད་ལྟ་ཁ་ཤར་དུ་བལྟས་ཡོད། ལོ་རེ་ལ་ཏིལ་ཙམ་རེ་ནུར་ནས་དེ་ནུབ་ཕྱོགས་སུ་ཁ་བལྟས་པའི་ཚེ་ད་ལྟའི་ཡུལ་མི་ཐམས་ཅད་གྲོང་འདིར་སྐྱེས་ནས་ཁོད་དང་བཅས་པ་གྲུབ་པ་འཐོབ་པར་འགྱུར་རོ་ཞེས་པ་བྱུང༌། རྒྱལ་པོ་དཱ་རི་དྲ་བས་བདེ་མཆོག་གི་བསྟོད་པ་དང་ཀེང་རུས་ཀྱི་རྡོ་རྗེ་རྣལ་འབྱོར་མའི་སྒྲུབ་ཐབས་སོགས་མཛད། གཞན་ལུས་ཤེས་རབ་ལ་སོགས་པའི་(ན༦ན)
བཀའ་དྲིན་རྙེད་པ་ལྷོའི་བཀའ་བབས་སོ། །ཌོམྦི་ཧེ་རུ་ཀ་ནི་ནུབ་ཕྱོགས་ཨོ་ཌྱན་གྱི་གྲོང་ཁྱེར་ཆེན་པོ་ཅིག་ན་བྲམ་ཟེའི་ཁྱེའུ་དད་པ་ཅན་རྩེད་མོའང་དཀོན་མཆོག་གི་ལས་ལས་མི་བྱེད་གཏམ་དུ་དཀོན་མཆོག་ལས་མི་སྨྲ་བ་གཉིས་ཡོད་པ། ཡུལ་ཆོས་ཀྱིས་དུས་བཟང་ལ་དུར་ཁྲོད་དང་ལྷ་ཁང་དུ་མཆོད་པ་བྱེད་དུ་འགྲོ་བས་ཚེས་བཅུའི་དུས་སྔགས་ཀྱི་ལྷ་ཁང་དུ་མཆོད་པ་ལ་ཕྱིན། ཚུར་ལམ་དུར་ཁྲོད་ལ་ལམ་ཡོད་པ་ལ་འོངས་པས་དུར་ཁྲོད་ཀྱི་དབུས་སུ་ས་སྲོས། ཅེ་སྤྱང་གིས་གནོད་ཀྱིས་དྭོགས། དེ་ན་རི་ཆུང་ཞིག་འདུག་པའི་བྲག་སྐྱིབས་སུ་བསྡད་པས་རི་དེ་ལ་ཡང་མི་རོའི་རྒྱལ་མཚན་ཞིག་ཕྱར་སྟེ་འདུག །དར་ཞིག་ན་ཌ་མ་རུའི་སྒྲ་གྲག་ཙམ་ན་དཔའ་བོ་དང་མཁའ་འགྲོ་མཐའ་ཡས་པ་ནང་དུ་ཡིབ་སོང༌། ཅི་ཞིག་ན་མཁའ་འགྲོ་མ་སྔོན་མོ་གྲི་ཐོད་ཐོགས་པ་དུ་མ་བྱུང་སྟེ་དུར་ཁྲོད་ཐམས་ཅད་བཙལ་ནས་ཚོགས་ཀྱི་རྒྱུ་གཉི་ག་འདི་ན་འདུག་ཟེར་ནས་བྱུང༌། ཅི་བྱེད་དྲིས་པས་ལུས་ཀྱིས་དཔའ་བོ་མཁའ་འགྲོ་མཆོད་ཏོ་ཟེར། དེར་ལུས་དོན་ཅན་དུ་སོང་བ་གོ་བཅད་འོན་ཡང་སྨོན་ལམ་གདབ་ཀྱི་བྱས་པས་འདི་སྐལ་པ་དང་ལྡན་པར་འདུག་གཙོ་མོ་ལ་ཞུའོ་ཟེར་ནས་སོང་བས་ཁྲིད་ཤོག་གསུངས་སྟེ་ནང་དུ་ཁྲིད་སྟེ་དཔའ་བོ་མཁའ་འགྲོའི་དབུས་སུ་ཧེ་རུ་ཀ་ཡབ་ཡུམ་གྱི་སྤྲུལ་པའི་དཀྱིལ་འཁོར་དུ་དབང་བསྐུར་ཞིང་བྱིན་གྱིས་བརླབས་པས་བྲམ་ཟེའི་ཁྱེའུ་ཆེ་བ་དེ་དེ་ཉིད་དུ་ཡལ་སྟེ་འདི་ལ་ཌོམྦི་ཧེ་རུ་ཀ་ཆེན་པོར་གྲགས་སོ། །ཅིག་ཤོས་ཀྱང་ཡལ་བར་བྱུང་བ་ལ་མཁའ་འགྲོ་མ་ཐམས་ཅད་ཀྱིས་སྐུ་མི་སྡུད་པར་གསོལ་བ་བཏབ་ཅིང་རྡོ་རྗེ་རྣལ་འབྱོར་མས་རྣམ་སྨིན་གྱི་ལུས་མ་སྡུད་པར་སྐལ་ལྡན་རྗེས་སུ་ཟུང་ཞིག་གསུངས་མཁའ་འགྲོ་མ་ལྷའི་ལུས་ལས་འདས་པ་ཅིག་ཕྱག་རྒྱར་ཕུལ་བས་དེ་སྤྲང་མོ་ཧྲུལ་མོ་ཞིག་དུ་སྤྲུལ་སྟེ་དུར་ཁྲོད་དུ་འཇག་ལྕིལ་མཛད་སྟེ་དེས་འཚོ་བ་སློངས་ནས་སྦྱོར་རོ། །ནམ་ཞིག་ཉན་ཐོས་ཀྱི་དགེ་འདུན་མཆོད་རྟེན་བརྒྱ་རྩ་བཞེང་པ་ལ་སློངས་པས་མ་བྱིན་པར་སྤྲང་མོ་ངན་མ་འདི་(ན༦བ)
ཟེར་ནས་བརྡེགས་པས་དེས་སློབ་དཔོན་ལ་རྫུ་འཕྲུལ་སྟོན་པར་ཞུས་སྟེ་ལྟ་སྟངས་ཀྱིས་མཆོད་རྟེན་རྣམས་མགོ་མཇུག་བསྒྱུར་ནས་བཞག །ནང་པར་ཁོང་རྣམས་མཆོད་རྟེན་ཞལ་སྲོར་འོངས་པ་ན་དེ་ལྟར་མཐོང་བས་ཁ་སང་གི་སྤྲང་མོ་དེ་བརྡུངས་པས་ལན། དེ་རྣལ་འབྱོར་པ་ཅིག་གི་ཆུང་མ་ཡིན། དུར་ཁྲོད་ན་འདུག་ཟེར་སྟེ་འོངས་པས་འཇག་ལྕིལ་གྱི་སྒོ་ན་མཎྜལ་བྱེད་ཅིང་འདུག །ནང་དུ་རྣལ་འབྱོར་པ་ལ་བཟོད་པར་གསོལ་བས་རྣལ་འབྱོར་མ་ལ་བཟོད་པར་གསོལ་ཞིག་གསུངས། བཟོད་པར་གསོལ་བས་ལན་གཉིས་སུ་ཅི་ཡང་མི་ཟེར། གསུམ་པ་ལ་བཟོད་ཏོ་ཟེར། འོ་ན་མཆོད་རྟེན་རྣམས་བསྒྱུར་དུ་གསོལ་བྱས་པས་བླ་མ་ལ་ཞུའོ་ཟེར་སྟེ་ཞུས་ནས་རྣལ་འབྱོར་པ་དེ་བྱུང༌། དེས་ལྟ་སྟངས་གྱེན་དུ་ལྡོག་པས་མཆོད་རྟེན་གཞན་རྣམས་དྲང་པོར་གྱུར། ཐོག་མཐའ་གཉིས་མགོ་ཞབས་ལོག་རུང་འདུག་པས་འདིའང་བསྒྱུར་བར་ཞུ་བྱས་པས་འདི་ཙམ་ཞིག་ཕྱི་རབས་ཀྱི་རྣལ་འབྱོར་པ་ལ་སྟོན་པའི་ཕྱིར་འཇོག་གསུངས་པ་དེང་སང་ཡང་ཡོད་སྐད། སྐྱེ་བ་བདུན་པའི་ཤ་བཙལ་སྟེ་དོན་བྱའོ་དགོངས་ནས་འབྲས་ལྡན་གྱི་གྲོང་ནས་བྲམ་ཟེ་དུང་གི་རྣ་ཆ་ཅན་བྱ་བ་སྐྱེ་བ་བདུན་པ་ཅིག་གི་རོ་བླངས་སྟེ་སྟག་ལ་ཆིབས། དུག་སྦྲུལ་ལ་གོང་རྨེད་དང་ལྕག་བྱས། གཡུང་པོའི་བུ་མོ་ཞིག་ཆིབས་ལོངས་སུ་བསྐྱོན། སྐྱེ་བདུན་གྱི་རོ་པང་པར་བླངས་སྟེ་དངོས་གྲུབ་སུ་འདོད་གསུངས་ནས་གྲོང་ཁྱེར་བསྐོར་བས་ནང་པའི་རྣལ་འབྱོར་པ་སྟག་ལ་སྦྲང་རྒོད་བླུད། སྦྲུལ་ལ་བླ་རྩི་བླུད་ནས་ནུས་པ་ཡོད་ཚུལ་སྟོན་པ་ཟེར་ནས་ཀུན་མ་མོས་སྐད། གཡུང་མོ་ལ་ལོངས་སྤྱད་པས་ཌོམྦིའི་ཧེ་རུ་ཀ་ཅེས་གཡུང་པོ་ཁྲག་འཐུང་དུ་གྲགས་བིརྺ་པའི་སློབ་མ་ཌོམྦི་པ་ཀོ་མཁན་ཉིད་ཡིན་ལ། འདི་ལ་རྗེ་རང་བྱུང་བས་ཀྱང༌། བྲམ་ཟེའི་རིགས་འཁྲུངས་རྣལ་འབྱོར་པ། །ཅེས་གསུངས་པ་ཡིན་ནོ། །བསོད་སྙོམས་པ་ཅིག་གིས་བདག་རྗེས་སུ་བཟུང་བར་ཞུ་ཟེར་བ་ལ། སྐྱེ་བདུན་གྱི་སྲིན་ལག་ཞིག་བཅད་སྟེ་བྱིན་པས་དེ་ཉིད་དུ་གྲོལ། དེར་ཆང་ཚོང་མ་པི་ན་སའི་ཁྱིམ་དུ་བྱོན་སྟེ་ཆང་ཉོའོ་གསུངས་པས་(ན༧ན)
རིན་ཅི་ཡོད་ཟེར། ཉི་གྲིབ་མཚམས་སུ་ཕུར་པ་བཏབ་ནས་འདི་མ་འདས་པར་འཇལ་ལོ་ཟེར་བས་ཆང་དྲངས་པས་ཆང་ཐམས་ཅད་ཟད། ད་དུང་ཉི་མ་མ་སོང་ཆང་འདོད་ཟེར་བས་ཆང་ཚོང་མ་ལྔ་བརྒྱའི་ཆང་བསྐྱིས་ནས་དྲངས། རྒྱལ་པོའི་ཆུ་ཚོད་སོགས་རྩིས་ཐམས་ཅད་འཕྱུགས། མི་ཐམས་ཅད་གཉིད་ཀྱིས་མྱོས་སྟེ་རྒྱལ་པོ་ཨིནྡྲ་བྷཱུ་ཏིས་རྣལ་འབྱོར་པས་ཉི་མ་བཟུང་བ་ཞིག་འདུག་ཟེར་ནས་རྩོད་བཅད་པས་བི་ན་སས་རྣལ་འབྱོར་པ་འདི་འདྲ་ཞིག་འདུག་ཟེར་སྟེ་ཉི་མ་གཏོང་བར་ཞུས་པས་འདི་བཏང་ན་ང་ལ་ཆང་རིན་མེད་གསུངས། ཆང་རིན་རྒྱལ་པོས་གཞལ་བས་བྲེ་བོ་ཆེའི་འབྲས་ཁལ་ལྔ་བརྒྱ་སོང༌། ཆང་ཚོང་མ་དེ་དད་ནས་དབང་གདམས་ངག་གནང་སྟེ་སྤྱོད་པ་འདི་ཉིད་ཀྱིས་ལམ་སྒྲུབས་ཅིག་གསུངས་སྟེ་སྦས་པའི་རྣལ་འབྱོར་དུ་བཞུགས་སྟེ་ཆང་འཐུངས་པས་ནད་འཚོ་བ་དང་ཡེ་ཤེས་རང་བྱུང་དུ་ཤར་བ་དུ་མ་བྱུང་ངོ༌། །ནམ་ཞིག་རྒྱལ་པོ་ཨིནྡྲ་བྷཱུ་ཏི་སྦྲུལ་གྱི་རིགས་ཅིག་གིས་ཟིན་པ་ན་རྒྱ་མཚོའི་གཏིང་གི་ཆུ་ལ་སྨན་ནམ་སྔགས་བཏབ་ན་མ་གཏོགས་མི་འཚོ་ཟེར་བ་ལ། བི་ན་ས་གྲུབ་ཐོབ་མར་གྲགས་པས་ལོན་ནམ་ཟེར་ནས་བཀའ་བསྒོས་པས། ཆང་བུམ་པ་གང་ཁྱེར་སྟེ་རིགས་ཀྱི་རྟོག་པ་སྤོངས་ལ་འདི་གསོལ་ཆུ་ཡང་བླང་གིས་ཟེར་སྟེ་ཆང་གསོལ་བས་ནད་ཕལ་ཆེར་ཞི། ཆུ་ལེན་དུ་སོང་བ་ལ་རྐང་མགྱོགས་པ་བལྟར་བཏང་བས་དེ་མ་ཐག་ཧལ་ཞིང་བྱུང་སྟེ་སྐད་ཅིག་གིས་རྒྱ་མཚོའི་སྟེང་ལ་ས་ལ་འགྲོ་བ་བཞིན་དུ་སོང་ནས་མཚོའི་གཏིང་དུ་སོང་ཟེར་དེ་མ་ཐག་ཆུ་ཁྱེར་སྟེ་བྱུང༌། རྒྱལ་པོས་གདམས་པ་ཞུས་པས་རིགས་ཀྱི་སྙེམས་པས་སྣོད་དུ་མི་རུང༌། བུ་ཞིག་བསྐྱེད་ལ་འདུལ་དུ་གཞུག་དགོས་སྙམ་ནས་བུ་བསྐྱེད་སྟེ་རབ་ཏུ་བྱུང་ནས་མཁས་པ་ཆེན་པོར་གྱུར་སྟེ་ཆོས་འཆད་པ་ན་ཡུམ་གྱིས་ཟས་ཆང་མང་དུ་བསྣམས་སྟེ་ཁྱོད་ཀྱི་བུ་སྨད་ལ་ཕྲད་དུ་འོངས་སོ་གསུངས་པས་པཎྜིཏ་ཚུལ་ཁྲིམས་ཀྱིས་ཡུས་སྟེ་བརྒྱལ། སངས་པ་དང་བུ་སྨད་ཀྱི་འཛིན་པ་དང་མ་བྲལ་པ་དེ་ག་བུ་སྨད་ཡིན་སྨོད་གསུངས་པས་ངེས་ཤེས་སྐྱེས་སྟེ་དབང་གདམས་ངག་བསྟན་ནས་ཤིན་དུ་སྤྲོས་མེད་ཀྱི་སྤྱོད་པས་སྐྱོངས་ཅིག་པར་(ན༧བ)
བསྒོ་བས་གྲོང་ཁྱེར་དུ་འཚོ་བ་སྒོ་རེས་སུ་བྱས་ནས་བསྒོམས། ནམ་ཞིག་འབྲས་ཆན་སྔ་མ་ཟད་ནས་ཕྱི་མ་འཚེད་ཀྱི་བར་དུ་སྒོ་དྲུང་དུ་འོད་གསལ་ལ་བཞུགས་པས་སད། དེས་འབྲས་ཆན་དྲངས་པའང་སོ་མར་འདུག་སྟེ་ལོ་བཅུ་གཉིས་ལོན། རྒྱལ་པོས་ངས་བུར་བཟུང་པཎྜིཏ་བཅོལ་བས་འདི་ལྟ་བུར་སྲང་དུ་ཉལ་བ་ཞེས་དམད་ཚེ་སྟེང་གི་ན་མཁའ་ལ་བྱོན་པས་དད་སྟེ་དབང་དང་གདམས་པ་གནང་བས་རྒྱལ་པོ་གྲོལ་ལོ། །དུས་དེར་ཨོ་ཌྱན་གྱི་བུད་མེད་ཐམས་ཅད་འཇིག་རྟེན་པ་ཕྱི་པའི་མཁའ་འགྲོ་མར་ཡོད་ཅིང་རྒྱལ་པོའི་བཙུན་མོ་ལྔ་བཅུ་རྩ་གཅིག་གི་ཐ་ཆུང་ཁོ་ན་ནང་པའི་མཁའ་འགྲོའི་རིགས་ཅན་ཡིན་ལ་གཞན་ཐམས་ཅད་ཕྱི་པའི་རིགས་ཅན་ཡིན་པས་ཤ་ཟའི་མཁའ་འགྲོ་ཐམས་ཅད་འདུས་སྟེ་སློབ་དཔོན་ལ་རྡོ་ཆར་ཕབ་པ་སྡིགས་མཛུབ་བསྟན་པས་རྡོ་ཁང་པ་ཙམ་ན་མཁར་ལུས་པ་ལ་བ་པའི་རྡོ་བརྡུགས་སུ་གྲགས་པ་ད་དུང་ཡོད་སྐད། སློབ་དཔོན་གྱིས་མཁའ་འགྲོ་མ་དེ་རྣམས་ལུག་དུ་བྱིན་གྱིས་བརླབས་ནས་བལ་བྲེགས་སྟེ་ལ་བ་སྐུ་ལ་གསོ་བས་ལ་བ་བར་གྲགས། སྐྱེས་པ་རྣམས་ཀྱིས་བུད་མེད་མ་རྙེད་ནས་རྒྱལ་པོ་ལ་ཞུས་པས་སློབ་དཔོན་ལ་ཞུས་གསུངས་སྟེ་ཞུས་པས་ཆད་པ་ཁས་ལེན་ན་གཏོང་གསུངས་སྟེ་བུད་མེད་རྣམས་མགོ་ལ་ལྷམ་གྱོན། སྣ་ལ་སྣ་བཅུ་ཆུག་སྦྲུལ་གྱི་ག་ཤ་གིས་གསུངས་སྟེ་ད་ལྟའང་ཨོ་ཌྱན་གྱི་བུད་མེད་རྣམས་དེ་བཞིན་ཡོད། རྒྱལ་པོས་ཆུ་བོ་ཀོ་ཏམ་པ་རིའི་ཕར་འགྲམ་དུ་སློབ་དཔོན་བཞུགས་སུ་གསོལ། བཙུན་མོ་རྣམས་རེ་མོས་ཀྱིས་སྦའི་དཔྱང་ཐག་ལས་འཚོ་བ་སྐྱེལ་འཇུག་པ་ལས། བཙུན་མོ་ཐ་ཆུང་གི་རེས་ལ་རྒྱལ་པོས་སྒོ་བ་བརྗེད་སྟེ་ནམ་ཕྱེད་ན་དྲན། གྲུབ་ཐོབ་ཀྱི་འཚོ་བ་ནང་རེ་ཆག་ན་མུ་གེ་ལོ་བཅུ་གཉིས་ཡོང་བས་དེ་འཕྲལ་བཙུན་མོ་ལ་བསྒོས་སྟེ་རྒྱལ་པོ་ཨིནྡྲ་བོ་དྷིས་མི་ཚངས་པར་སྤྱོད་པ་སྤངས་པའི་བདེན་པས་ཆུ་ཁྱོད་གྱེན་ལ་ལྡོག་པར་གྱུར་ཅིག་གྱིས་ལ་སོང་ཞིག །བདེན་པས་ཆུ་ཆད་པའི་བར་ལ་ཕྱིན་སྟེ་འཚོ་བ་དྲངས་པས་བཞེས་སྟེ་དྲོ་མཛད། ང་སློབ་དཔོན་ལ་བ་པས་གཉིད་དང་ཁམ་གྱི་ཟས་སྤངས་པའི་བདེན་པས་(ན༨ན)
ཆུ་ཁྱོད་གྱེན་ལ་ལྡོག་པར་གྱུར་ཅིག་གྱིས་ལ་སོང་ཞིག་གསུངས་སྟེ་དེ་བཞིན་བྱུང་བས་བཙུན་མོ་དད་སྟེ་རྒྱལ་པོ་དང་སློབ་དཔོན་གྱིས་བྱིན་གྱིས་བརླབས་ནས་ཡེ་ཤེས་ཀྱི་མཁའ་འགྲོར་གྱུར། དེར་བཙུན་མོ་ལྔ་བཅུ་པོས་སྤྲང་པོ་ལ་བ་པ་འདིས་རྒྱལ་པོ་ནང་པར་བཅུག་གིས་བསད་པར་བྱའོ་ཞེས་བགྲོས་སྟེ་གཉིས་ཀྱིས་ཉིན་མྱུལ་སྟེ་མཚན་མོ་ཐམས་ཅད་སོང་བ་ན་སློབ་དཔོན་འོད་གསལ་ལ་ཞུགས་པས་སྐུ་མ་མཐོང་སྟེ་ལ་བ་སྤུང་ངེ་འདུག་ནས་ད་ཀོ་འདི་ན་འདུག་པ་ཡིན་སྟེ་ཅེས་མཛུབ་མོ་བཙུགས་པ་ཤངས་ལ་རེག་བྱུང་སྐད། རྣལ་འབྱོར་པ་འདི་གཡོ་ཆེ་བས་ལ་བར་བརྫུས་པ་ཡིན་སྟེ་འོང་ཟེར་ནས་ལ་བ་དུམ་བུར་བྱས་ནས་ཟོས། སང་ཉིན་སློབ་དཔོན་གཅེར་བུར་བྱོན་པས་ཅི་ལགས་ཞུས་པས་ཁྱེད་ཀྱི་བཙུན་མོ་རྣམས་སྨྱོ་ནས་ལ་བ་ཟོས་སོང་གསུངས། སྤྱི་བོར་ཐལ་ལྕགས་རེ་བརྒྱབ་པས་ལ་བ་དུམ་བུ་རེ་བསྐྱུགས་བྱུང་བ་གཅིག་དུ་གྱུར་སྟེ་གསོལ། དེ་ལྟར་སློབ་དཔོན་དང་རྒྱལ་པོས་ཨོ་ཌྱན་གྱི་སྐྱེ་བོ་རྣམས་བཏུལ་ཏོ། །རྨི་ལམ་དང་བར་དོའི་གདམས་པ་རྙེད་པ་ནུབ་ཀྱི་བཀའ་བབས་སོ། །མཁའ་འགྲོ་སྐལ་པ་བཟང་མོ་ནི་སུ་མི་ཏ་ཀུན་དུ་བཟང་མོ་ཞེས་ཀྱང་བྱ་སྟེ་རྡོ་རྗེ་རྣལ་འབྱོར་མ་ཉིད་ཀྱི་སྐུའི་བཀོད་པའོ། །དེས་མྱ་ངམ་གྱི་ཐང་དུ་བཞུགས་པ་ཐང་ལོ་བ་དང༌། དེའི་ལྗོན་ཤིང་གི་རྩེ་ལ་བཞུགས་པ་ཤིང་ལོ་པ་རྗེས་སུ་བཟུང༌། དེས་བ་རེནྡྲའི་རྒྱལ་ས་སྤངས་སྟེ་ནཱ་ལནྡར་སློབ་དཔོན་རྒྱལ་བའི་ལྷ་ལས་རབ་ཏུ་བྱུང་བ་མཚན་བློ་གྲོས་སྙིང་པོའི་དཔལ་རྩོད་པ་ལས་རྒྱལ་བས་སློབ་དཔོན་དགྲ་ལས་རྒྱལ་བ་ཞེས་གྲགས་པ་དེ་དབང་བསྐུར་ཞིང་བྱིན་གྱིས་བརླབས་སྟེ་ཨོ་ཌེ་བི་ཤའི་ནགས་ལ་རྩེ་གཅིག་དུ་སྒྲུབ་པའི་ཚེ་ཡུལ་དེའི་རྒྱལ་པོ་རི་དྭགས་གཤོར་དུ་འོངས་བས་མཐོང་སྟེ་དད་ནས་རས་ཀྱི་ཐོད་ཕུལ་བས་སློབ་དཔོན་གྱིས་མ་བཞེས་སྟེ། དངོས་རྣམས་སེམས་སུ་ཤེས་པའི་མཁས་པ་རྣམས་ལ་བརྙས་པར་མི་བྱ་སྟེ། །དེ་ནི་རྩཱ་རྩེ་ཆུང་ངུ་བས་ཀྱང་ཆུང་བའི་དངོས་ལ་ཆགས་པ་མིན། །རྔུལ་འཛག་པས་ནི་འགྲམ་ཡང་ནག་པོར་འགྱུར་བ་ཡི། །གླང་ཆེན་རྣམས་ནི་པདྨའི་སྐུད་པ་ཕྲ་མོ་དག་གིས་འཁྱིག་པར་མི་(ན༨བ)
ནུས་བཞིན། །ཞེས་གསུངས་པས་རྒྱལ་པོ་སྐྱེངས་སྟེ་ནགས་གསེབ་ཀྱི་དགེ་སློང་འདི་འབེབས་ནུས་ན་བྱ་དགའ་ཆེན་པོ་སྟེར་རོ་ཞེས་དྲིལ་བསྒྲགས་པས་ཆང་ཚོང་མ་མ་སྨད་ཀྱིས་ཁས་བླངས་སྟེ་བཀུར་སྟི་བྱས། བུ་མོ་བཅུ་དྲུག་མ་ཞིག་ཡོད་པ་སློབ་དཔོན་གྱི་ཞམ་རིང་དུ་ཕུལ་བས་པདྨ་ཅན་དུ་གཟིགས་ཤིང་རིམ་པ་གསུམ་པ་ནོར་བུ་འགེངས་པའི་སྐབས་སུ་སོན་ནས་ཕྱག་རྒྱ་བསྒྲུབས་སྟེ་རིམ་པ་ལྔ་པ་བསམ་གྱིས་མི་ཁྱབ་པ་གྲུབ་པ་ན་སྤྲུལ་པའི་བུ་དང་བུ་མོའང་བཞག་གོ །དེར་རྒྱལ་པོས་འབངས་ན་བཟའ་མི་ཡོད་ཏོ་ཅོག་གི་བུད་མེད་ཀྱིས་ཆང་བུམ་པ་བཏེག་ཞིང་སྐྱེས་པས་རྒྱལ་པོ་ལ་འདྲེན་དགོས་པའི་ཁྲིམས་བཅས་ཆང་ཚོང་མ་ལ་བབ་ཚེ་བུ་མོས་ཆང་བན་བཏེག་ཞིང་སློབ་དཔོན་གྱིས་འདྲེན་པ་ན་རྒྱལ་པོ་འཁོར་དང་བཅས་པས་སྔར་གྱི་ཚིག་གོ་ལྡོག་སྟེ། བརྙས་པར་བྱ་བ་སྟེ། ཞེས་དང༌། འཁྱིག་པར་ནུས་པ་བཞིན། ཞེས་བརྗོད་ཅིང་ཐལ་མོ་བརྡབས་པ་ན་སློབ་དཔོན་གྱིས་ཆང་བུམ་བརྡབས་པས་ཆང་གི་རྒྱུན་མ་ཆད་པས་ཡུལ་དེ་ཆང་གི་མཚོར་སོང་ཞིང་གྲོང་ཀུན་ཡང་ཆང་གི་སྟེང་ལ་ཡོམ་བྱུང༌། སློབ་དཔོན་གྱིས་བཙུན་མོ་ཀྲིཥྞ་སཱ་རའི་པགས་པར་བྱས་ནས་རྐེད་ལ་དཀྲིས། སྲས་ཕོ་མོ་རྡོ་རྗེར་དྲིལ་བུར་བྱས་སྟེ་མཁའ་སྤྱོད་དུ་འབྱོན་པར་དགོངས་སྟེ་སྟེང་གི་ན་མཁར་བྱོན་པ་དང༌། ཆང་གི་སྦུ་བའི་གསེབ་ནས་ཐུགས་རྗེ་ཆེན་པོའི་སྐུ་ཞིག་བྱོན་ནས་རིགས་ཀྱི་བུ་སེམས་ཅན་འདི་སྙེད་ཡལ་བར་འདོར་རམ་གསུང་བས་ས་ལ་བབ་སྟེ་རྡོ་རྗེ་ས་ལ་བསྣུན་པས་བུག་པ་ཅིག་བྱུང་བར་ཆང་ཐམས་ཅད་སོང་སྟེ་སྐུ་དེའང་བྱིན་རླབས་ཅན་དུ་གྲགས། བུག་པའི་སྒོ་དེ་ཡང་ཆང་གི་དྲི་ཆེན་པོས་མྱོས་ཐུབ་པ་ཅིག་དེང་སང་འདུག་སྐད། སློབ་དཔོན་གྱིས་ཡུལ་ཁམས་དེ་ཐམས་ཅད་རྡོ་རྗེ་ཐེག་པ་ལ་བཀོད་ཅིང་ཁྱད་པར་རྒྱལ་པོ་དེ་མཆོག་གི་དངོས་གྲུབ་བརྙེས་པ་ནི་སློབ་དཔོན་ཛཱ་ལནྡྷ་ར་པའོ། །ཙརྻ་པ་ནི་བྷཾ་ག་ལར་རྗེ་རིགས་སུ་འཁྲུངས། སློབ་དཔོན་ཛཱ་ལནྡྷ་རས་རྗེས་སུ་བཟུང་སྟེ་བདེ་མཆོག་གི་སྒོ་ནས་སྤྱོད་པ་སྒྲུབ་ཏུ་ཉེ་བ་ན་སློབ་དཔོན་གྱིས་གའུ་ཞིག་བསྐུར་སྟེ་འདི་ཁ་མ་དབྱེ་བར་ཨོ་ཌྱན་གྱི་ཡུལ་དུར་ཁྲོད་ཅིག་ན་བུད་མེད་(ན༩ན)
མང་པོ་གྲལ་བྱས་པའི་གཤམ་ན་བུད་མེད་ངམས་ནག་ལ་བོངས་ཐུང་བ་མཁུར་ཚོས་གཡོན་ན་རྨེ་བ་ནག་པོ་སུམ་བརྩེགས་ཅན་ཡོད་ཀྱིས་དེ་ལ་འདི་ཕུལ་ལ་བྱིན་རླབས་ཞུས་ཅིག་གསུངས། དེ་ལྟར་བྱས་པས་དེས་གའུའི་སྟེང་དུ་མེ་ཏོག་ཅིག་བཞག་ནས་ཁ་མ་དབྱེ་བར་བླ་མ་ལ་ཕུལ་ཞིག་སྟག་སོགས་བྱུང་ན་ལྟ་སྟངས་གྱིས་དང་ཟློག་པར་འགྱུར་རོ་གསུངས། སྟག་ལ་ལྟ་སྟངས་བྱས་པས་རེངས་པ་དང་གའུ་ཁ་ཕྱེ་བས་རྒྱན་དྲུག་འདུག་པ་བཏགས་སྟེ་སྤྱོད་པ་ལ་རྒྱུ་བར་ཞུས་པས་ད་དུང་མ་རན་གསུངས། མ་གསན་པར་འཁོར་མང་པོ་དང་བཅས་བྱོན་པས་རི་བོར་ཞིག་དུ་སྐོམ་པས་ཉེན་པ་དང་མི་ཞིག་ཐོང་པ་ཁུར་གླང་གཉིས་དེད་པ་དང་ཕྲད་སྟེ་ཆུ་ལོང་སྟེ་ངའི་གླང་སྟག་གིས་བཟར་འོང་ཟེར་བས་སྲུང་བར་བྱས་སྟེ་ཆུ་འཚོལ་དུ་སོང་བ་ན་སྟག་བྱུང་བ་ཅིས་ཀྱང་མ་ཐུབ་སྟེ་གླང་ཟོས། མི་དེ་བྱུང་བས་སློབ་དཔོན་ཛཱ་ལནྡྷ་རང་གྱུར་སྟེ་སྤྱོད་པ་མ་རན་པའི་རྟགས་འདི་ཡིན་གྱིས་མ་བྱེད་ཟེར་སྟེ་མི་སྣང་ཡང་བྱོན་པས་བཀྲེས་སྟེ་ཆུ་འགྲམ་ན་མི་རོ་ཟ་བར་འདོད་ནས་མི་ཞིག་ལ་གྲི་གཡར་བས། སྤྱོད་པ་བྱེད་ན་འདི་ལྟར་གྱིས་ཟེར་ནས་བྱ་རོག་དུ་བྱས་སྟེ་ཟོས་ནས་སློབ་དཔོན་དུ་གྱུར་ནས་སྔར་བཞིན་གསུངས། ཡང་ཆུ་བོ་ཆེན་པོ་ཅིག་ལ་འཛེ་མོ་ཉམ་ཉེས་པ་ཅིག་གིས་སྤྱོད་པ་འཁོར་བཅས་ང་ཁུར་ཟེར་བས་སུས་ཀྱང་འཁུར་མ་ནུས། འཁོར་གྱི་ཐ་མ་བསོད་སྙོམས་པ་ཅིག་གིས་སྙིང་རྗེས་ཁུར་བས་ཆུའི་དབུས་སུ་སླེབས་ཚེ་རྡོ་རྗེ་རྣལ་འབྱོར་མར་གྱུར་སྟེ་བསོད་སྙོམས་པ་གྲོལ་སྟེ་གྲུབ་ཐོབ་ཙ་ཕུ་པར་གྱུར། བྷཾ་ག་ལར་རྒྱལ་པོ་རོལ་བའི་ཟླ་བ་མུ་སྟེགས་པ་རང་བློན་པོ་དགེ་བའི་མགོན་པོ་སངས་རྒྱས་པ་ཡིན་པས་བློན་པོས་སྤྱན་རས་གཟིགས་ལྷ་དབང་ཕྱུག་ཆེན་པོའི་དབྱིབས་སུ་བྱས་པ་ཅིག་གི་རབ་གནས་ཞུས་པས་སུ་པྲ་ཏིཥྠ་ཞེས་མེ་ཏོག་དབུར་བཞག །བློན་པོ་ཡིད་མ་འཆེས་པ་ནས་མེ་ཏོག་ཕོག་ནས་གོ་ལ་གསོལ་འཕྲོ་ཞིག་ལྷའི་རྣ་བར་བཅུག་པས་སྐུ་དེ་ཕྱགས་ཕྱིར་བྱུང༌། གོ་ལ་བཏོན་ནས་མེ་ཏོག་བཞག་སྟེ་བསྟན་པ་གནས་རིང་འདིར་བཞུགས་གསུངས་པས་སྤྱན་མ་འདྲོངས་དེ་གར་ལྷ་ཁང་བརྩིགས་ནས་བཞུགས། བློན་པོས་བདེ་མཆོག་(ན༩བ)
གི་སྒྲུབ་ཐབས་ཞུས། བྲིས་སྐུ་བྲིས་པ་རྒྱལ་པོས་ཐོས་ནས་འཇིགས་བྱེད་དུས་མཚན་མནན་པས་ཆད་པ་འོང་བར་ཞུས་སྟེ་སློབ་དཔོན་གྱིས་སངས་རྒྱས་པའི་རྒྱུད་ལས་བཤད་གསུངས་པས། དེ་མཆོག་གི་བྲིས་སྐུ་དང༌། དེ་གོ་ལྡོག་པ་ཅིག་བྲིས་སྟེ་ཕྱི་རོལ་པའི་ལྷ་ཁང་དུ་ཞལ་གཡོགས་ནས་ཞག་བདུན་མཆོད་པ་བྱས་པས་བདེ་མཆོག་འོད་དུ་འབར་ཞིང་ཅིག་ཤོས་ཀྱང་འཇིགས་བྱེད་དུས་མཚན་མནན་པ་འོད་འབར་བར་གྱུར་པས་རྒྱལ་པོ་སངས་རྒྱས་པར་གྱུར། དེའི་དུས་དུར་ཁྲོད་དུ་ཚོགས་འཁོར་བྱེད་པ་ན་མི་ནག་པོ་ཞིག་ཚོགས་དཔོན་བྱེད་ཟེར་བ་ལ་མ་བཅོལ་བས་ཚོགས་གྲོལ་ཁར་དེ་བདེ་མཆོག་དུ་གྱུར་ནས་བླ་མ་དང་ཡི་དམ་དང་མཁའ་འགྲོས་མ་གནང་བས་སྤྱོད་པ་མི་འགྲུབ་ཀྱིས་བཤགས་པར་བསྟན་བཅོས་དུ་མ་རྩོམས། བར་དོར་དངོས་གྲུབ་འཐོབ་བོ་ཅེས་གསུངས་སྟེ་མི་སྣང་བར་གྱུར། སློབ་དཔོན་འདི་ལས་བསྒོམས་པས་འཚང་རྒྱ་བ་གཏུམ་མོའི་གདམས་པ་མནོས་ཤིང་སྤྱིར་འཕོ་བ་དང་གྲོང་འཇུག་གཙོ་བོར་གྱུར་པ་བྱང་གི་བཀའ་བབས་སོ། །གྲུབ་ཆེན་འདི་རྣམས་ཀྱི་བྱོན་ཚུལ་ལ་བདེ་མཆོག་ཆོས་བྱུང་གི་རིགས་ན་འདྲ་མིན་མང་དུ་སྣང་ཡང༌། རྒྱུད་པ་འདི་ཉིད་ཀྱི་བཀའ་བཞིའི་རྣམ་ཐར་སྔ་མ་རྣམས་ཉིད་བཀོད་པའོ། །དེ་ལྟར་བརྒྱུད་པའི་བཀའ་བབས་ཐམས་ཅད་གཅིག་དུ་འདྲེས་ཤིང་རྡོ་རྗེ་འཆང་ཆེན་པོ་ཉིད་ཀྱིས་དངོས་སུ་བྱིན་གྱིས་བརླབས་པ་ནི་རྣལ་འབྱོར་གྱི་དབང་ཕྱུག་ཏེ་ལོ་པ་སྟེ་ཤར་ལྷོ་ཟ་ཧོར་གྱི་ཡུལ་གྱི་བྱེ་བྲག་ཛ་གོ་ར་ཞེས་བྱ་བའི་ཡུལ་དུ་ཡབ་བྲམ་ཟེ་ཆེན་པོ་རབ་གསལ་ཡུམ་བྲམ་ཟེ་མོ་གསལ་བ་སྲས་མོ་གསལ་ལྡན་མ་རྣམས་ཡོད་པ་བུ་འདོད་ནས་དཀོན་མཆོག་ལ་མཆོད་པ་ཆེར་བྱས་ནས་ཁྱེའུ་ཞིག་བཙས་མ་ཐག་ཡུལ་ཐམས་ཅད་འོད་ཀྱིས་གང་བར་གྱུར་ཞིང་བྲམ་ཟེ་མཚན་མཁན་གྱིས་ཀྱང་ལྷ་ཀླུ་གནོད་སྦྱིན་འཁོར་ལོས་བསྒྱུར་བ་སངས་རྒྱས་རྣམས་ཀྱི་མཚན་སྣ་ཚོགས་པར་འགྱུར་ཞིང་བྱུང་བས་ལུང་བསྟན་པར་མ་ནུས་སྟེ་འཁྲུངས་པའི་ལྟས་ལས་གསལ་བའི་འོད་ཅེས་བཏགས་ནས་གཅེས་པར་སྐྱོངས་ཅིག་རང་བཞིན་གསལ་བར་འགྱུར་རོ་ཞེས་ཟེར་རོ། །དེར་དབེན་པར་ཉི་གྲིབ་ཀྱི་མཚམས་སུ་(ན༡༠ན)
རིག་བྱེད་ཀྱིས་བྲིད། བཅུད་ཀྱིས་གསོ་ཞིང་སྐྱེད་པའི་ཚེ་བུའི་ལུས་ལ་གྲིབ་མ་ཞིག་བྱུང་བ་ཕྱིར་བལྟས་པས་བུད་མེད་མི་སྡུག་པའི་མཚན་སོ་བདུན་ཡོད་པ་ཅིག་ན་རེ། གཅེས་པར་བསྐྱངས་ཀྱང་མི་འཆི་བའི། །ས་ཕྱོགས་གང་ནའང་ཡོད་མ་ཡིན། །ཇི་ལྟར་བྱས་ན་མི་འཆི་བྱས་པས། མ་ཧེ་སྐྱོང་ཞིང་ཡི་གེ་ལྟོས། །མཁའ་འགྲོ་མ་ཡིས་ལུང་སྟོན་འགྱུར། །ཟེར་སྟེ་མི་སྣང་བར་སོང༌། དེར་བུས་ལོ་གཅིག་ཙམ་ལོན་པ་ན་གཞན་གྱི་ལོ་བཅུ་གསུམ་པ་ཙམ་གྱི་ཚད་དུ་གྱུར་སྟེ་མ་ཧེའི་ཁྱུ་མདུན་བཀོད་སྟེ་ཁོལ་པོ་དང་བཅས་ནགས་སུ་བཏང་སྟེ་ཤིང་ཤ་པའི་སྡོང་པོ་ལ་རྒྱབ་བསྟན། མ་ཧེ་སྐྱོང་བཞིན་པས་ཡི་གེ་སྦྱོང་ཞིང་གནས་ཚེ་མི་སྡུག་པའི་བུད་མེད་དེ་འོངས་ནས་ཁྱོད་སུ་ཡུལ་དང་ཕ་མ་གང་ཞེས་འདྲི་བ་ལ། ཡུལ་ནི་ཤར་ཕྱོགས་ཛ་གོ་ར། །ཕ་ནི་བྲམ་ཟེ་རབ་གསལ་སྟེ། །མ་ནི་བྲམ་ཟེ་གསལ་བ་མོ། །སྲིང་མོ་རབ་མཛེས་གསལ་སྒྲོན་མ། །ང་རང་ཁྱེའུ་གསལ་བའི་འོད། །ཤིང་ནི་ཤ་པའི་ལྗོན་པ་སྟེ། །མ་ཧེ་ཁྱིམ་གྱི་ཉེར་འཁོའི་ནོར། །ཡི་གེ་ཐ་སྙད་དོན་འཚོལ་ཡིན། །ཞེས་སྨྲས་པས་ཁྲོས་སྟེ་དེ་ཐམས་ཅད་ལོག་པར་སྨྲའམ། འོ་ན་ཁྱོད་ཀྱིས་སྨྲོས་ཅིག །དེས་སྨྲས་པ། ཡུལ་ནི་ཤར་ཕྱོགས་ཛ་གོར་མ་ཡིན་ནུབ་ཕྱོགས་ཨོ་ཌྱན་གནས་ཀྱི་གཙོ། །ཕ་ནི་བྲམ་ཟེ་རབ་གསལ་མ་ཡིན་འཁོར་ལོ་བདེ་མཆོག་བདེ་བའི་མཆོག །མ་ནི་བྲམ་ཟེ་གསལ་མ་མ་ཡིན་རྡོ་རྗེ་ཕག་མོ་བདེ་གཤེགས་ཡུམ། །སྲིང་མོ་རབ་མཛེས་གསལ་སྒྲོན་མ་ཡིན་བདེ་སྟེར་ང་ནི་ཁྱོད་ཀྱི་སྲིང༌། །ཁྱོད་ནི་ཁྱེའུ་གསལ་འོད་མ་ཡིན་རིགས་ཀུན་ཁྱབ་བདག་རྡོ་རྗེ་འཆང༌། །ཤིང་ནི་ཤ་བའི་སྡོང་པོ་མ་ཡིན་ཡིད་བཞིན་འགྲུབ་པའི་དཔག་བསམ་མཆོག །མ་ཧེ་ཁྱིམ་གྱི་ཉེར་འཁོ་མ་ཡིན་ཉམས་མྱོང་སྣ་ཚོགས་རེ་འདོད་སྦྱིན། །ཡི་གེ་ཐ་སྙད་དོན་འཚོལ་མ་ཡིན་སྙན་རྒྱུད་ཡི་གེ་མེད་པ་མཚོན་ཞེས་ཟེར། །སྙན་རྒྱུད་ཇི་ལྟར་འཚོལ་བྱས་པས། །ཨོ་ཌྱན་མཁའ་འགྲོའི་གནས་ན་ཡོད། །ལུང་བསྟན་དམ་ཚིག་ལྡན་པ་ཡི། །གྲུབ་ཐོབ་ཁྱོད་ཀྱིས་བླངས་ན་ལོན། །ཞེས་གྲུབ་པའི་ན་ཆུང་དུ་གྱུར་ཞིང་དེ་ཉིད་དུ་དེ་ཁོ་ན་ཉིད་རྟོགས་ནས་ན་མཁའ་ལ་ལྡིང་ཞིང་ཆེད་དུ་བརྗོད་པ་དུ་མ་མཛད། ལེགས་སོ་ལེགས་སོ་དེ་ཁོ་ན་ཉིད་ནི་འདིའོ་ཞེས་ངེས་པ་བསྐྱེད་སྟེ་མི་སྣང་བར་གྱུར། དེ་མ་ཐག་སྐུའི་བཀོད་(ན༡༠བ)
པ་མཐའ་ཡས་པས་རྡོ་རྗེ་འཆང་ལ་ཆོས་གསན་པ་དང༌། བཀའ་བཞི་བརྒྱུད་པའི་བླ་མ་སོ་སོ་བསྟེན་པ་དང༌། དགེ་སློང་མ་ཏིལ་ཚོང་མའི་སྲས་སུ་མཛད་སྟེ་རབ་ཏུ་བྱུང༌། མཚན་ཤེས་རབ་བཟང་པོར་བཏགས་ནས་ཆ་ག་པའི་ཕུང་པོ་རྣམ་ཤེས་སྤར་བ་ལ་སོགས་མཛད་ཅིང༌། སྐུའི་བཀོད་པ་གཅིག་ཨོ་ཌྱན་ཏུ་བྱོན་དཔལ་འཁོར་ལོ་སྡོམ་པ་དངོས་སུ་བཞེངས་སྟེ་རྡོ་རྗེ་ཐེག་པའི་གསང་བ་ཐམས་ཅད་ཀྱི་ཁྱབ་བདག་དུ་གྱུར་ནས་ཨོ་ཌྱན་གྱི་དཔའ་བོ་རྣལ་འབྱོར་མ་རྣམས་ཀྱིས་བཞུགས་པར་གསོལ་བ་བཏབ་པས། ན་རོ་རི་རི་ཀ་སོ་རི། །བུ་རྣམ་གསུམ་གྱི་དོན་དུ་ནི། །གཙུག་གི་ནོར་བུའི་དགོན་པ་རུ། །ན་མཁའ་ལ་ནི་བྱ་བཞིན་དུ། །ཐོགས་མེད་ཤེས་རབ་བཟང་པོ་འགྲོ། །གསུངས་སྟེ་བྱོན། དེའི་ཚེ་གཟུགས་མེད་པའི་བུད་མེད་ཀྱི་སྐད་གྲག་པ། སྨིན་གྲོལ་སེམས་ཀྱི་རྒྱ་མདུད་ཤིག །སྤྱོད་པ་ཆུ་ལ་རལ་གྲི་རྒྱོབ། །དམ་ཚིག་རང་སེམས་མེ་ལོང་ལྟོས། །དམ་རྫས་རྟོགས་པའི་ཉི་མ་འདེས། །རོ་སྙོམས་སྤྱི་ཡི་མེ་ལོང་ཟུང༌། །བདེ་ཆེན་གསུང་གི་རིན་ཆེན་ཆོངས། །རྩ་རླུང་དྲ་མིག་འཁོར་ལོ་སྐོར། །རང་གྲོལ་ཕྱག་རྒྱ་ཆེན་པོ་སྒོམས། །རིག་པ་ཡེ་ཤེས་སྒྲོན་མེ་ལྟོས། །ཅེས་གྲག་སྟེ་ལུས་མེད་མཁའ་འགྲོའི་ཆོས་སྐོར་དགུར་གྲགས། ཁྱད་པར་དུ་སློབ་དཔོན་མ་ཏཾ་གིས་ལུང་བསྟན་པ། ཤར་ཕྱོགས་ཟ་ཧོར་གྱི་ཡུལ་སྔོན་སྤྲུལ་པའི་རཱ་ཛཱ་ཨུཏྨ་ཀེ་ས་རས་བྱིན་གྱིས་བརླབས་པས་རང་བཞིན་གྱིས་སྒྲུབ་ཐག་ཉེ་བ་ན་རྡོ་རྗེ་རྣལ་འབྱོར་མ་སྨད་ཚོང་དུ་བསྟན་པའི་དྷ་རི་མ་འཁོར་ལྔ་བརྒྱ་དང་བཅས་པ་ཡོད་ཀྱིས་དེའི་གཡོག་གྱིས་ལ་རྟོགས་པ་འདི་སྐྱོངས་ཅིག་གསུངས་སྟེ། དེར་བྱོན་ནས་ཉིན་པར་ཏིལ་བརྡུང་པ་དང་ནང་ནུབ་སྐྱེས་པ་བསུ་སྐྱེལ་སོགས་བྱས་ཤིང་རྟོགས་པ་བསྐྱངས་པས་ལོ་བཅུ་གཉིས་ན་སྐུ་ལ་མེ་འབར་བ་དང༌། བུ་མོ་མང་པོས་བསྐོར་བ་སོགས་མཐོང་སྣང་སྣ་ཚོགས་པ་བྱུང་སྟེ་རྒྱལ་པོ་དང་སྐྱེ་བོ་ཐམས་ཅད་འདུས་པ་ན་དྷ་རི་མས་དྲིས་པས། གང་དག་སྙིང་པོར་གྱུར་པ་ཏིལ་གྱི་མར། །ཞེས་སོགས་གསུངས་སྟེ་བདེ་མཆོག་དུ་དངོས་སུ་སྣང་ཞིང་དྷ་རི་མ་གཙོ་མོ་དང་ཐ་མི་དད་པར་གྱུར། ཡུལ་ཁམས་དེའི་བྱ་དང་རི་དྭགས་ཡན་ཆད་སྐད་ཅིག་གིས་གྲོལ་ལོ། །ཡང་རྒྱལ་པོ་མ་ལ་(ན༡༡ན)
གུས་པ་ཅིག་གིས་མའི་ངག་ལྟར་རྣལ་འབྱོར་པ་ཐམས་ཅད་བསྡུས་སྟེ་ནུས་པ་ཆེ་བ་ཞིག་གིས་ཚོགས་དཔོན་བྱེད་པར་རྩོམ་པ་ན་བུད་མེད་མི་སྡུག་པ་ཅིག་ན་རེ་ཚོགས་དཔོན་ཁྱོད་ཀྱིས་མི་འོང་ངའི་མིང་པོས་བྱ་དགོས་ཟེར་སྟེ་ཏེ་ལོ་པ་བྱོན། སྔ་མས་ཀྱང་དཀྱིལ་འཁོར་སྤྲུལ་པ་དང་ཚོགས་རྗེས་འགུགས་པ་དང་ཆང་འོ་མར་བསྒྱུར་པ་སོགས་ནུས་ཀྱང་ཏེ་ལོ་པས་ཉི་ཟླ་ལ་ཆིབས་པ་དང༌། བ་སྤུའི་ཁུང་བུ་རེར་དཀྱིལ་འཁོར་ལྷ་དང་བཅས་པ་དཔག་མེད་བསྟན་པས་དད་པ་ལ། བདེ་བ་ལ་ཞེན་རྩ་རླུང་སྦྱངས་གྱུར་པས། །སྣང་བ་ཐོགས་མེད་མངོན་ཤེས་རྫུ་འཕྲུལ་སོགས། །ཁམས་འདུས་ལྷ་ཡི་བདེ་ལ་ཞེན་པ་ཡིས། །དོན་དམ་གཉུག་མའི་གནས་ལུགས་རྟོགས་མི་འགྱུར། །སོགས་གསུངས་པས་གྲུབ་པ་ཐོབ་སྟེ་རྣལ་འབྱོར་པ་ནུས་ལྡན་རྡོ་རྗེ་ཞེས་ཨོ་ཌྱན་ན་བཞུགས་སོ། །ཡང་མུ་སྟེགས་ཀྱི་སྟོན་པ་རྫུ་འཕྲུལ་ཅན་ཞིག་གིས་ཐམས་ཅད་ནག་འབྱམ་དུ་བཏང་ཚེ་ཏེ་ལོ་པས་རྩོད་པས་ཕམ་པར་བྱས་ཤིང་ཁོས་ཉི་མ་གཏོད་ལ་མནན་པའང་ཕུལ་ནས་ནུབ་པར་བྱས་པས་ཁོ་ཁྲོས་ཁ་ནས་མེ་ཕྱུང་སྟེ། ཁམས་གསུམ་ཐམས་ཅད་འཇིག་བྱེད་པ། །མེ་ཡིས་མི་འཇིགས་རྣལ་འབྱོར་སུ། །ཟེར་བ་ལ་དེ་བས་མེ་ཆེ་བ་བཏང་སྟེ། ང་ནི་འཇིགས་པ་ཐམས་ཅད་ལས། །ཡོངས་སུ་གྲོལ་བའི་ཏེ་ལོ་ཡིན། །གསུངས་པས་དད་པ་ལ། མི་རྟག་འཁོར་བའི་ཉེས་དམིགས་དྲན། །ཡང་དག་ལམ་ལ་འཇུག་པ་ལ། །གཟེར་དྲུག་གནད་ཀྱི་མན་ངག་དགོས། །སོགས་གསུངས་པས་གྲུབ་ཐོབ་ཆེན་པོར་གྱུར་སྟེ་ནག་པོ་དགེ་བ་ཞེས་གསིལ་བ་ཚལ་ན་བཞུགས་སོ། །ཡང་རྒྱལ་པོ་ཞིག་ལ་སྒྱུ་མ་མཁན་སྒྱུ་མ་བྱང་པ་ཅིག་གིས་སྒྱུ་མའི་དམག་བཤམས་པ་ན་དམག་དཔོན་མཛད་སྤྲུལ་པའི་དམག་གིས་བཏུལ་སྟེ་སྒྱུ་མ་མཁན་རང་བཙོན་དུ་བཟུང་བས། ཆོས་ལ་བསྟེན་པའི་དམ་པ་ཁྱོད། །འདི་ལྟར་བྱེད་པ་ག་ལ་རིགས། །ཟེར་བས། སྒྱུ་མའི་སྐྱེས་བུ་གསད་སོགས་ལ། །སེམས་མེད་ཕྱིར་ན་སྡིག་པ་མེད། །གསུངས་པས་དད་པ་ལ། བྲམ་ཟེ་སླུ་བྱེད་སྒྱུ་མ་མཁན། །སྣང་སྲིད་སྒྱུ་མའི་རང་བཞིན་ལ། །དུག་གསུམ་སྒྱུ་མའི་ཞེན་པ་(ན༡༡བ)
ཐོང༌། །སོགས་བསྟན་པས་གྲོལ་སྟེ་རྣལ་འབྱོར་པ་བདེན་པར་སྨྲ་བ་ཞེས་དུར་ཁྲོད་ཧ་ཧ་སྒྲོག་པ་ན་བཞུགས་སོ། །ཡང་ཆང་ཚོང་མ་གྲགས་པ་ཅན་ཞིག་གི་ཆང་མེད་པར་བྱས་པས་བཅད་ཅིང་བཏུབས་པ་ལས་བཞེངས་སྟེ་ཆང་སྔར་བས་མང་བར་བསྟན་པར་རས་ཆུང་པ་བཞེད་ཅིང་དམ་རྫོང་པས་ཉི་མ་གཏའ་མར་བཟུང་སྟེ་གཅིག་དང་དུ་མར་སྤྲུལ་ནས་གསོལ་ཆང་ཚོང་མ་མདུན་གྱི་ཆང་ཟད་སྣོད་སྟོང་པ་རྣམས་ལ་ལྟོས་ཅིག་གསུངས་པས་འབྲུས་གང་བས་དད་པར་འཆད་ལ། སྒྲུབ་ལ་བརྩོན་པའི་རྣལ་འབྱོར་གྱིས། །སོགས་གསུངས་པས་གྲུབ་པ་ཐོབ་སྟེ་རྣལ་འབྱོར་མ་ཉི་མ་འཛིན་ཞེས་དུར་ཁྲོད་སོ་ས་གླིང་ན་བཞུགས་སོ། །ཡང་བཤན་པའི་རྒྱལ་པོ་ཛི་ན་བྱ་བ་ཉིན་རེ་ཞིང་སྲོག་ཆགས་དཔག་མེད་གསོད་པ་ལས་བུ་གཅེས་པ་ཅིག་མི་སྣང་བར་བྱས་སྟེ་བུའི་མགོ་སུག་བཙོས་པར་མཐོང་བའི་རྫུ་འཕྲུལ་གྱིས་བཏུལ་སྟེ་གྲུབ་པ་ཐོབ་པ་ནི་རྣལ་འབྱོར་པ་བདེ་བྱེད་བྱ་བ་སྲིན་པོའི་གླིང་ན་བཞུགས་སོ། །ཡང་རྒྱང་འཕེན་པ་ཚེ་སྔ་ཕྱི་མེད་པར་འདོད་པ་དང་སངས་རྒྱས་པའི་པཎྜིཏ་ཅིག་རྟག་དུ་རྩོད་པའི་དཔང་པོ་མཛད་སྟེ་སུ་རྒྱལ་ཟེར་བ་ན་ཀུན་རྫོབ་ཏུ་ཡོད་པ་རྒྱལ། དོན་དམ་པར་གཉི་ག་མ་ཡིན་གསུངས་པས། འོ་ན་ཁྱོད་རང་དང་རྩོད་ཏོ་ཟེར་ནས་བརྩད་པས་ལན་གསུམ་དུ་ཏེ་ལོ་པ་རྒྱལ་ཡང་ལས་འབྲས་དཀར་ནག་གཉི་ག་དངོས་སུ་མ་མཐོང་ན་མི་འཇུག་ཟེར་བས་དམྱལ་བ་དང་ལྷ་གནས་མངོན་སུམ་དུ་བསྟན་པས་དམྱལ་བ་ན་རྒྱང་འཕེན་པ་དེ་ཤི་ནས་འཚེད་ཟེར་བའི་ཟངས་ཞུན་འཁོལ་བ་དང་སུམ་བཅུ་རྩ་གསུམ་ན་སངས་རྒྱས་པའི་པཎྜིཏ་དེ་ལྷའི་བུར་སྐྱེ་བ་ལྷ་མོ་སྡོད་པར་མཐོང་ནས་རྗེས་སུ་བཟུང་སྟེ། ཕྱི་དང་ནང་དང་གསང་བ་དང༌། །དེ་ཁོ་ན་ཉིད་རྣམ་པ་བཞི། །ཞེས་སོགས་བསྟན་པས་གྲོལ་སྟེ་རྣལ་འབྱོར་པ་དགའ་བ་དང་ལྡན་པ་ཅེས་ལྷོ་ཕྱོགས་དཔལ་གྱི་རི་ལ་བཞུགས་སོ། །ཡང་གླུ་མཁན་དུ་སྤྲུལ་སྟེ་གླུ་མཁན་དྲེགས་པ་ཅན་ཞིག་དང་འགྲན་ཚེ་ཚངས་པའི་གླུ་སོགས་བླངས་པས་དད་སྟེ། སྟོང་ཉིད་འགག་མེད་གཉིས་སུ་མེད། །ཅེས་སོགས་བསྟན་པས་གྲོལ་སྟེ་དབྱངས་ལྡན་ལྐུགས་པ་ཞེས་ཤྲཱི་ནཱ་ག་རར་བཞུགས་སོ། །ཡང་མུ་སྟེགས་མཐུ་བོ་ཆེ་ཞིག་གིས་རྒྱལ་(ན༡༢ན)
ཁམས་དབང་དུ་བྱེད་པ་ན་དེའི་འཁོར་ཐམས་ཅད་བསད་པ་དང་སོས་པར་བསྟན་པས་དད་སྟེ། ཐམས་ཅད་ལྷན་སྐྱེས་རང་བཞིན་ཡིན་པ་ལ། །སོགས་བསྟན་པས་གྲོལ་སྟེ་རྣལ་འབྱོར་པ་ཟླ་བ་ཞེས་ཨི་ཙི་མི་ལིའི་གླིང་ན་བཞུགས་ཤིང་དེ་ཐམས་ཅད་ལ་ཡུལ་ཁམས་ཀྱི་སྐྱེ་བོ་བྱ་དང་རི་དྭགས་ཀྱི་བར་གྲོལ་བར་གྱུར་ཏོ། །ཡང་དགེ་སྡིག་ལུང་མ་བསྟན་བྱེད་པ་ཐམས་ཅད་ལ་སྐུ་མང་པོ་སྣང་ཞིང་དེ་ལས་ཀྱང་རླབས་ཆེ་བའི་དགེ་སྡིག་ལུང་མ་བསྟན་མཛད་སྟེ། དོན་རྟོགས་རྣལ་འབྱོར་ཏེ་ལོ་པས། དགེ་སྡིག་ཅི་ཡང་བྱས་པ་མེད། །གསུངས། ཡང་རྒྱལ་པོ་སེང་གེ་ཟླ་བའི་གྲོང་དུ་ཤིན་དུ་དུལ་བའི་དགེ་སློང་དུ་བྱས་ནས་བྱོན་སྟེ་སྔོན་མ་ཐོས་པའི་མདོ་མང་དུ་གསུངས་པས་དད་སྟེ་དྲིས་བྱས་པས། ང་ནི་རང་བྱུང་བཅོམ་ལྡན་འདས། །ང་ཡིས་ཤེས་བྱ་མ་བསླབས་སྟེ༌། །སྒྲ་ཚད་རིག་པ་རང་རྡོལ་ཡིན། །བདེ་མཆོག་སྐུ་གསུང་ཐུགས་དང་ནི། །ང་ནི་དབྱེར་མེད་བརྗོད་དུ་མེད། །གསུངས་པས་དད་ཅིང་རྡོ་རྗེའི་ཐེག་པར་སྨིན་ནས་གྲུབ་ཐོབ་དང་དཔའ་བོ་རྣལ་འབྱོར་པ་མཐའ་ཡས་པ་འདུས་པའི་ཚོགས་ཀྱི་སློབ་དཔོན་ཞུས་པས་ཐམས་ཅད་ཀྱིས་དཀྱིལ་འཁོར་གྱི་འཁོར་ལོ་ཐ་དད་པར་མཐོང་སྟེ། རྒྱལ་པོས་ཞུས་པས། རྒྱལ་པོ། བདག་ལུས་དགྱེས་པའི་རྡོ་རྗེ་སྟེ། །ངག་ནི་མ་ཧཱ་མཱ་ཡ་ཡིན། །སེམས་ནི་བདེ་མཆོག་འཁོར་ལོ་སྟེ། །དབང་པོ་གསང་བ་འདུས་པ་ཡིན། །ཡན་ལག་དགྲ་རྒྱུད་དམར་ནག་སྟེ། །ཉིང་ལག་རྡོ་རྗེ་འཇིགས་བྱེད་ཡིན། །རྩ་གནས་རྡོ་རྗེ་གདན་བཞི་ལ། །རླུང་གནས་རྡོ་རྗེ་ཕྲེང་བ་ཡིན། །ཐིག་ལེ་གསང་བ་མཛོད་ཡིན་སྟེ། །གཙུག་ཏོར་སངས་རྒྱས་ཐོད་པ་ཡིན། །བདེ་ཆེན་སངས་རྒྱས་མཉམ་པར་སྦྱོར། །ཐམས་ཅད་བདག་ཉིད་དུས་འཁོར་ལ། །བ་སྤུ་དུས་གསུམ་སངས་རྒྱས་ཀྱི། །སྐུ་གསུང་ཐུགས་དང་དབྱེར་མེད་ཡིན། །ཞེས་གསུངས་སྟེ་རྡོ་རྗེ་འཆང་དངོས་ཡིན་ལ་ད་ལྟའང་མྱ་ངན་ལས་འདའ་བ་མི་མངའ་བར་བཞུགས་སོ། །སྨིན་གྲོལ་དུ་མཛད་པའི་སློབ་མ་ནི་ཡུལ་ཁམས་ཆེན་པོ་བཅུ་གཉིས་ཀྱི་བྱ་དང་རི་དྭགས་ཀྱི་བར་གྲོལ་བར་མཛད་སྟེ་བགྲང་གིས་མི་ལང་ངོ༌། །དེས་ཆོས་དྲུག་གི་ས་བོན་ཙམ་ཞིག་མཛད་པ་ད་ལྟ་བཞུགས་སོ། །དེས་རྗེས་སུ་བཟུང་བ་ནི་དཔལ་ན་རོ་པ་སྟེ་རས་ཆུང་(ན༡༢བ)
སྙན་རྒྱུད་པ་ཤར་ཕྱོགས་བྷཾ་ག་ལ་པར་བྱེད་ཀྱང་མར་པའི་གསུང་ཇི་ལྟ་བ་རྔོག་གིས་བྲིས་བའི་སྲེ་འཕོའི་ཞལ་གདམས་ལས། རྗེ་ན་རོ་པ་ནི་མི་ཆོས་ཡུལ་ཁ་ཆེ་བ་ཡིན། དཔལ་མེ་མུར་པ་ཞེས་ཀྱང་གྲགས་སྟེ་འཆི་བ་མེད་པ་རྡོ་རྗེའི་སྐུ་བརྙེས་པ་ཡིན། ཞེས་དང༌། ན་རོ་འགྲེལ་ཆེན་གྱི་ལེ་མཚམས་རེ་རེ་ཞིང་དཔལ་ཁ་ཆེ་བ་ཆེན་པོས་སྦྱར་བ་ཞེས་བཤད་པས་ནུབ་ཕྱོགས་ཁ་ཆེ་བ་ཡིན། བྲམ་ཟེ་དཀར་ནག་གཉིས་ལ་བརྒྱད་བརྒྱད་ཡོད་པའི་དཀར་པོའི་བཟང་ཤོས་ནཱ་རོ་ཏ་པ་ཡིན་ཞེས་ཁ་ཅིག་ཟེར་ཡང་ཤངས་པ་དང་བཀའ་རྒྱུད་རིན་པོ་ཆེ་མཐུན་པར་རིགས་རྒྱལ་རིགས། ཡབ་རྒྱལ་པོ་དགེ་བའི་གོ་ཆ། ཡུམ་དཔལ་གྱི་བློ་གྲོས་ལ་སྲས་ཀྱིས་དབེན་ནས་ཚོགས་གསོག་རྒྱ་ཆེར་མཛད་པས་འཁྲུངས། མཚན་མཁན་གྱིས་ཁྱིམ་དུ་བཞུགས་ན་ས་ཐམས་ཅད་ལ་དབང་བ་དང་རབ་ཏུ་བྱུང་ན་སངས་རྒྱས་དང་མཚུངས་པར་ལུང་བསྟན། མཚན་ཀུན་དུ་བཟང་པོ། རིག་གནས་མཐའ་དག་རང་བྱུང་དུ་ཤེས། ཡབ་ཡུམ་གྱིས་བཀག་ཡང་མ་ཐུབ་པར་སློབ་དཔོན་བྷྲིམ་ཀ་ལ་ཝརྟ་སོགས་བསྟེན་སྟེ་དགེ་བསྙེན་པཎྜི་ཏར་གྱུར། པཎྜིཏ་མང་པོས་བསྐོར་ནས་ཡུལ་དུ་ཆོས་གསུང་བའི་ཚེ་ཡབ་ཀྱིས་ཁབ་བཞེས་པར་ནན་གྱིས་ཞུས་པ་ན། རྟོག་མེད་གཙང་ལྡན་མིང་དྲི་མེད། །ཐེག་ཆེན་རིགས་ཅན་མུ་སྟེགས་ཀྱི། །བུ་མོ་རྙེད་ན་བཀའ་སྩོལ་ཞིག །གསུངས་པས་བློན་པོ་བརྟག་དུ་བཏང་བ་ན་བྲམ་ཟེ་དཀར་རྒྱལ་གྱི་བུ་མོ་དྲི་མེད་མ་ཆུ་སྣོད་ཐོགས་པས་མགྲོན་པོ་ངལ་བ་དག་མཐོང་སྟེ་ཆུ་བྱིན་པས་སྙིང་རྗེ་ཆེ་བར་རིག །སྣོད་མེད་པ་ན་ཟངས་སྐྱོགས་ཉིད་དུ་འཐུང་བཅུག་པས་རྟོག་པ་ཆུང་བར་ཤེས། ལེགས་པར་བཀྲུས་པས་གཙང་སྦྲ་ཆེ་བར་ཤེས། རིགས་དང་མིང་དྲིས་པས་བྲམ་ཟེ་དཀར་རྒྱལ་གྱི་བུ་མོ་དྲི་མེད་མ་བྱ་བ་ཡིན་ཟེར་བས་ཚང་བར་གོ་ནས་བཙུན་མོར་བླངས། འཁོར་དུ་བསྟེན་ནས་ཆོས་གསུང་བའི་ཚེ་རབ་ཏུ་འབྱུང་བར་དགོངས་ནས་བཙུན་མོ་ལ་དྲིས་པས་དེ་ལྟ་ན་བདག་གིས་མི་རིགས་པའི་སྤྱོད་པ་ཅུང་ཟད་བྱའི་སྐྱེ་བོ་དག་སྨོད་པ་ན་བདག་གིས་འགྲོ་ཡིས་སླར་ཅི་དགར་གཤེགས་(ན༡༣ན)
ཅིག་ཞེས་ཟེར་བ་ལྟར་བྱས་སྟེ་གཙུག་ལག་ཁང་མྱ་ངན་མེད་པའི་ཚལ་དུ་སངས་རྒྱས་བསྐྱངས་ཀྱིས་མཁན་པོ་དང་སློབ་དཔོན་ཡེ་ཤེས་འོད་ལས་རབ་ཏུ་བྱུང་སྟེ་མཚན་སངས་རྒྱས་ཡེ་ཤེས་སུ་བཏགས། སླར་ཁ་ཆེའི་ཡུལ་དུ་པུརྞའི་གཙུག་ལག་ཁང་དུ་མཁན་པོ་ཆོས་ཀྱི་ཡེ་ཤེས་ཞབས་སོགས་ལས་བསྙེན་པར་རྫོགས། སྡེ་སྣོད་རྒྱུད་སྡེ་མཐའ་དག་ལ་ཟླ་མེད་པའི་ཚེ་གཙུག་ལག་ཁང་མྱ་ངན་མེད་ཚལ་གྱི་གནས་བརྟན་མཛད་པས་གནས་བརྟན་བསྟན་པ་འཛིན་པར་གྲགས། དུས་དེར་ནཱ་ལནྡའི་བྱང་སྒོ་བ་མེད་ནས་ཐོག་མར་ནང་པའི་པཎྜིཏ་རྣམས་དང་བརྩད་པས་ཟླ་མེད་པར་གྱུར། སླར་ཕྱི་རོལ་པ་རྣམས་དང་བརྩད་པས་ཐམས་ཅད་ཚར་བཅད་སྟེ་ནང་པར་བཅུག་པས་དཔལ་འཇིགས་མེད་གྲགས་པ་ཅེས་ཐོགས། བྱང་གི་སྒོ་སྲུང་བ་མཛད་སྟེ་འདིའི་ཚེ་ཤར་སྒོ་བ་མི་ཐུབ་ཟླ་བ། ལྷོ་སྒོ་བ་ཛེ་ཏ་རི་དགྲ་ལས་རྣམ་རྒྱལ། ནུབ་སྒོ་བ་ནག་པོ་ཞབས་ཅེས་སྔ་མ་ཁ་ཅིག་ན་འདུག་པ་འདི་དག་པར་སྣང༌། དེར་གནས་བརྟན་ཆེན་པོའི་བྱ་བས་དུས་འདའ་བ་ན་ཉིན་ཅིག་ཕྱོགས་བཞི་ཀར་དུ་ཕྱག་དཔེ་བཀོད་ནས་གཟིགས་པའི་ཚེ་གྲིབ་མ་ཞིག་བྱུང་བ་ན་བུད་མེད་མི་སྡུག་པའི་མཚན་སོ་བདུན་ཚང་བ་ཞིག་འདུག་ནས་ཁྱོད་ལྟ་བ་དེ་ཅི་ཡིན། ཤེས་སམ་ཟེར། སྡེ་སྣོད་རྒྱུད་སྡེ་ཡིན། ཤེས་བྱས་པས། ཚིག་ཤེས་སམ་དོན་ཤེས་ཟེར། ཚིག་ཤེས་བྱས་པས་དགའ་ཚོར་ཅི་ཡང་བྱས། དོན་ཡང་ཤེས་སམ་ཟེར། ཤེས་བྱས་པས་ཁྲོས། ཅི་ཡིན་དྲིས་པས་ཚིག་ཤེས་པ་བདེན། ད་ལྟ་ཁྱོད་ལས་ཚིག་ལ་མཁས་པ་མེད། དོན་ཤེས་པ་ངའི་མིང་པོ་ལས་མེད་ཟེར། འོ་ན་སྤྲོད་དང་བྱས་པས་གསོལ་བ་ཐོབ་དང་སྐལ་པ་དང་ལྡན་ན་མཇལ་བར་འགྱུར་ཟེར་ནས་མི་སྣང་བར་སོང༌། དེར་མི་སྡུག་པའི་མཚན་སོ་བདུན་པོ་དེ་ཕྱི་ལྟར་འཁོར་བའི་ཉེས་དམིགས་སོ་བདུན། ནང་ལྟར་རྩ་སོ་བདུན་དང་བྱང་ཕྱོགས་སོ་བདུན། གསང་བར་ལྷ་སོ་བདུན་ཡིན་པ་ལས་ཕྱིའི་དོན་རྟོགས་སྟེ་ཁོ་བོ་བླ་མ་ཞིག་འཚོལ་དུ་འགྲོ་ཞེས་སྤོང་དག་(ན༡༣བ)
མཛད་པས་ཀུན་གྱིས་བཤོལ་བཏབ་ཅིང་བཞུགས་པར་ཞུས་པ་ལ་མ་གསན་པར་བྱོན། དགྱེས་རྡོར་གྱི་སྒོ་ནས་འཚོལ་བཞེད་པས་རྒྱལ་པོ་ཅིག་གིས་སྦྱིན་བདག་བྱས་སྟེ་དགྱེས་རྡོར་གྱི་སྒྲུབ་པ་མཛད་པས་ན་མཁའ་ནས་སྒྲ་བྱུང་སྟེ། ཀུན་རྫོབ་རྟེན་འབྲེལ་ཐ་དད་པས། །འཁོར་ལོ་བདེ་མཆོག་ལ་བརྟེན་ནས། །བླ་མ་སངས་རྒྱས་ཚོལ་དང་རྙེད། །ཅེས་གྲག །བདེ་མཆོག་གི་སྒྲུབ་པ་མཛད་པ་ན་བུ་མོ་གཉིས་བྱུང་ནས་བདེ་མཆོག་ཇི་ལྟར་སྒྲུབ་འདྲི་བ་ལ། སྐལ་ལྡན་གྲགས་པའི་ལུགས་ཡིན། འདི་ལྟར་སྒྲུབ་བྱས་པས། དེ་པཎྜིཏས་བསླད་འདུག་ངེད་ཀྱིས་རྡོ་རྗེ་འཆང་དངོས་ལ་ཞུས་པ་ཡིན་ཟེར་བ་ལ་མིག་བཙུམ་ནས་བསམས་པས་བདེན་པར་འདུག་བསམས་ནས་མིག་ཕྱེ་བས་གང་ནའང་མི་སྣང༌། ཐོ་རེངས་མནལ་ལམ་དུ་བྱུང་ནས་ངེད་གཉིས་ཞིང་སྐྱོང་གི་མཁའ་འགྲོ་མ་ཡིན། ད་ངེད་ཀྱིས་བསྟན་པ་ལྟར་སྒྲུབས་ཟེར་ནས་སྒྲུབས་པས་ཡིག་བདུན་འབུམ་ཕྲག་གཅིག་སོང་ཚེ་ས་གཞི་གཡོས་སྟེ་ཁྱོད་ནི་ཤར་ཕྱོགས་ཏེ་ལོ་པའི་རིགས་ཡིན་ནོ་ཞེས་ཐོས་ནས་ཤར་ཕྱོགས་སུ་བྱོན་པས་སྒྱིད་ལུག་པ་ན་ན་མཁའ་ལས། ལེ་ལོའི་བདུད་ལ་མ་སྒུར་བར། །ཤར་ཕྱོགས་སངས་རྒྱས་ཏེ་ལོ་ཚོལ། །ཞེས་གྲག་ནས་ཐམས་ཅད་དུ་བཙལ་བ་ན་བྲག་འཕྲང་དོག་པོ་གཟུར་ས་མེད་པ་ཅིག་ན་འཛེ་མོ་ཉམས་ཐག་པ་རྐང་ཆད་ལག་རྡུམ་ཞིག་འདུག་པ་ལ་ལམ་ཕྱེ་གསུངས་པས། རིངས་ན་འགོངས་ལ་སོང༌། མི་རིངས་ན་སྐོར་ལ་སོང་ཟེར་བས་ཤངས་བཀབ་སྟེ་འགོངས་སོང་བ་ན། རྣམ་རྟོག་འཆིང་བས་དམ་བཅིངས་པ། །ཁྱོད་ཀྱིས་བླ་མ་ཇི་ལྟར་རྙེད། །གཙང་དང་མི་གཙང་མཐའ་གཅིག་དུ། །བྱིས་པ་རྣམས་ཀྱིས་བཏགས་པ་ཙམ། །ཞེས་ཅོང་རོང་སོགས་ཀྱང་མི་སྣང་བར་བྱེ་སྟོང་ཞིག་ན་འདུག །བླ་མའི་སྤྲུལ་པ་སྟེ་མ་ཤེས་ན་ད་ནི་སུ་མཐོང་ཡང་དྲིའོ་སྙམ་པས་སོང་བ་ན་ལམ་འཕྲང་དོག་མོ་ཞིག་དུ་ཁྱི་མོ་རོ་སྨད་འབུས་གཞིགས་པ་རོ་སྟོད་གཞན་ལ་ཟུག་པ་ཅིག་འདུག་སྟེ་(ན༡༤ན)
འགོངས་སོང་བ་ན། འགྲོ་དྲུག་བླ་མར་མ་ཤེས་ན། །བཙལ་བས་རྙེད་པར་ག་ལ་འགྱུར། །ཟེར་ནས་མི་སྣང༌། དེ་བཞིན་དུ་མི་གཅིག་གིས་གཅིག་གི་མགོ་བོ་གཅོད་གྲོགས་གྱིས་ཟེར་སྟེ། ངར་འཛིན་འགོང་པོ་མ་བཅོམ་ན། །ཞེས་དང༌། རྒྱུ་མ་གཅོད་པས། འཁོར་བའི་རྒྱུན་ཐག་མ་བཅད་ན། །ཞེས་དང༌། མིའི་ལྗན་ལྗིན་འཁྲུ་པས། བག་ཆགས་དྲི་མ་མ་བཀྲུས་ན། །ཞེས་དང༌། ཕ་བསད་ཤིང་ལ་བཙུགས་མ་ཁྲི་མུན་དུ་བཅུག་སྟེ་གསོད་པས། ཆགས་སྡང་ཕ་མ་མ་བསད་ན། །ཞེས་དང༌། རྔོན་པས་རི་དྭགས་དེད་སྟེ་བྱུང་བས། གཟུང་འཛིན་རི་དྭགས་མ་བསད་ན། །ཞེས་དང༌། བཙུན་རྒན་བཟའ་མི་ཉ་གསོད་པ་ཅིག་གིས་དགོང་མོ་ཞིག་ཉ་གསོན་པོ་བཙོས་ནས་བྱིན་སྟེ། ཐ་མལ་རྟོག་པས་བཅིངས་པ་ཡིས། །ཅེས་དང༌། མི་སྔོ་སྐྱ་ཐོ་བ་ཐོགས་པ་ཅིག་གིས་སྲོག་ཆགས་ཐམས་ཅད་གསོད་ཅིང༌། ཉོན་མོངས་དུག་ལྔ་མ་བསད་ན། །ཞེས་དང༌། པོ་ཏི་མང་པོ་མེ་ལ་སྲེག་ཅིང༌། ཐ་སྙད་ཞེན་པ་མ་བཅད་ན། །བླ་མ་རྙེད་པར་ག་ལ་འགྱུར། །ཞེས་པ་རེ་གྲག་སྟེ་མི་སྣང་ངོ༌། །ཡང་རྒྱལ་པོའི་ཕོ་བྲང་མཛེས་པ་ཅིག་མཐོང་སྟེ་དྲིས་པ་ན། རྒྱལ་པོ་དེ་ན་རེ་ཏེ་ལོ་པ་དང་སྤྲད་ཀྱིས་འདིར་སྡོད་ཟེར་སྟེ་ལྷ་གཅིག་བྱིན་ནས་སྔར་ཡང་གྱིས་ཟེར་བ་རྣམས་མ་བྱས་པས་ནོངས་སྙམ་སྟེ་ཁྱིམ་ཐབ་བྱས་ནས་སྲས་ཕོ་མོའང་བྱུང་ཚེ་གཞན་དག་གིས་སྲས་ཕོ་མོ་བསད། ལྷ་གཅིག་ཀྱང་སྐྱེས་པ་གཞན་ལ་སོང༌། རྒྱལ་པོ་ལ་ཞུས་པས་ཁྱོད་ལྟ་བུ་ལ་ལྷ་གཅིག་ག་ན་སྡོད་ཅེས་རྒྱ་གད་མང་པོ་བྱས། ཏེ་ལོ་པ་སྟོན་བྱས་པས་བླ་མ་འཚོལ་པ་ལ་མོས་གུས་དང་བརྩོན་འགྲུས་དགོས་པ་ཡིན། ཁྱོད་ཚུལ་འཚལ་འདོད་ཡོན་ལ་ཞེན་པས་ག་ན་རྙེད་ཟེར། དེར་རྒྱལ་པོ་འདིས་ང་བླ་མ་ཚོལ་བ་ན་གནས་མིན་གྱི་གནོད་པ་འདི་ལྟ་བུ་བྱས་པས་རིག་སྔགས་ཀྱིས་དགྲལ་ལོ་སྙམ་ནས་དུར་ཁྲོད་དུ་སོང་སྟེ་བདེ་མཆོག་རྩ་རྒྱུད་ནས་གསུངས་པའི་མཐུ་བྱེད་པར་བརྩམས་པས། འདོད་ཡོན་ལ་ཞེན་ཞེ་སྡང་ཅན། །བླ་མ་རྙེད་པར་ག་ལ་འགྱུར། །སྒྱུ་མའི་རྒྱལ་པོས་(ན༡༤བ)
མ་བསླུས་སམ། །ཟེར་སྟེ་ཕོ་བྲང་སོགས་ཅི་ཡང་མི་སྣང་བར་བྱེ་སྟོང་ཞིག་ན་འདུག །ཡང་བཙལ་བས་གཙུག་ལག་ཁང་ཞིག་དུ་དགེ་འདུན་གྱིས་ངོ་ཤེས་སྟེ་བསུ་བ་ཞུས་པས་མ་གནང༌། རྗེ་བཙུན་ཏེ་ལོ་པ་མཐོང་ངམ་དྲིས་པས་སྤྲང་པོ་ཏེ་ལོ་པ་བྱ་བ་ཞིག་ལས་མ་མཐོང་ཟེར། དེ་སྟོན་དང་བྱས་པས་མི་སྔོན་པོ་སྤྲང་པོའི་ཡོ་བྱད་ཅན་འདུག་པ་ལ་ཐེ་ཚོམ་མེད་པར་ཕྱག་བྱས་པས་ཤིག་པར་པ་གང་གཏད་སྟེ་སྲོགས་ཅིག་ཟེར། མ་ནུས་པ་ན། སེམས་དང་བསམ་བྱུང་རྣམ་རྟོག་རྣམས། །མ་བསྲེགས་བླ་མ་ག་ལ་རྙེད། །ཅེས་མི་སྣང་ངོ༌། །དེར་ད་ཤར་ཕྱོགས་ན་མ་བཞུགས་པ་ཡིན་ནམ་ནུབ་ཕྱོགས་སུ་འཚོལ་སྙམ་པ་ན། ད་དུང་ཤར་ཕྱོགས་སུ་སོང་ཞིག་ཞེས་གྲག་ནས་སོང་བ་ལས་ཉིན་ཅིག་མིག་གཅིག་པའི་རྒྱལ་ཁམས་སུ་སླེབས། མི་ཐམས་ཅད་ལ་ལྟག་པ་ན་མིག་རེ་རེ་ལས་མེད་པའི་ཁྲོམ་ཆེན་པོ་འདུག །དམུས་ལོང་གིས་ལྟ། འོན་པས་ཉན། ཞ་བོ་རྒྱུག །ལྐུགས་པ་སྨྲ། རོ་གར་བྱེད་པ་སོགས་འདུག་པ་ལ་དྲིས་པས་ཐམས་ཅད་མགྲིན་གཅིག་དུ་བསྡེབས་ནས། མིག་གཅིག་དུ་མ་རོ་གཅིག་ཡིན། །དམུས་ལོང་ལྟ་རུ་མེད་པར་ལྟོས། །འོན་པ་ཉན་དུ་མེད་པར་ཉོན། །ལྐུགས་པ་སྨྲ་རུ་མེད་པར་སྨྲོས། །ཞ་བོ་འགྲོ་འོང་མེད་པར་རྒྱུགས། །དབུགས་བྲལ་སྐྱེ་མེད་གཡབ་མོ་བྱེད། །ཅེས་ཟེར་སྟེ་ཅི་ཡང་མི་སྣང་བར་བྱེ་སྟོང་ཞིག་ན་འདུག་གོ །དེར་རྣམ་སྨིན་གྱི་ལུས་དང་བཅས་མཇལ་བའི་སྐལ་བ་མེད་པ་ཅིག་ད་ནི་བར་དོར་མཇལ་བར་ཤོག་ཅིག་ཞེས་སྤུ་གྲིས་རྐེ་གཉེག་པ་ན། བླ་མ་མ་རྙེད་སངས་རྒྱས་རང༌། །བསད་པས་བླ་མ་ག་ལ་རྙེད། །ཁྱོད་འདོད་སྡིག་ཅན་ང་མིན་ནམ། །ཞེས་གྲག་སྟེ་རྣལ་འབྱོར་པ་མཐིང་ནག་འཇའ་འོད་ཀྱི་དཀྱིལ་ན་སྐྱབས་སྦྱིན་མཛད་པ་ཅིག་ལམ་བྱུང་བ་ལ། ན་མཁའི་སྤྲིན་བཞིན་ངེས་མེད་པའི། །དམ་པ་བཙལ་པས་ག་ལ་རྙེད། །ཀྱེ་མ་ཐུགས་རྗེས་མི་གཟིགས་སམ། །ཞེས་ཡུས་ཆེས་པའི་གདུང་ཤུགས་གསོལ་བས། ང་དང་པོ་འཛེ་མོར་(ན༡༥ན)
མཐོང་བ་ནས་སྐད་ཅིག་ཡང་མ་བྲལ་བར་ཡོད་སྟེ་ཁྱོད་རང་གི་སྒྲིབ་པས་མ་མཐོང་བ་ཡིན། ད་ལྟ་སྲོག་ལ་མི་ལྟ་བའི་གུས་པས་སྒྲིབ་པ་དག་པ་ཡིན་གསུངས། སྣོད་ལྡན་དྲི་མེད་གཟི་བརྗིད་ཁྱོད། །མཁའ་འགྲོ་གསང་སྔགས་གསང་བའི་གནས། །གསང་སྔགས་ཡིད་བཞིན་ནོར་བུ་ཡི། །གདམས་ངག་སྣོད་ཏུ་ད་གྱུར་ཏོ། །གསུང་ནས་ས་གཞི་ལ་བྱོན་ནོ། །འདི་ཡན་ནི་ལས་དང་རྣམ་སྨིན་གྱི་སྒྲིབ་པ་སྦྱོང་བ་དབང་བསྐུར་བ་ན་ལས་བུམ་གྱི་ཆུས་བཀྲུ་བའི་དོན་མངོན་ཏུ་གྱུར་པའོ། །དེ་ནས་ཅི་ཞིག་ན་མཎྜལ་ཕུལ་སྟེ་གསོལ་བ་བཏབ་པས་ཐོག་མར་དབང་སྐུར་བར་བྱའོ། །གསུངས་ནས་རས་ཡུག་ལ་མེ་སྟག་ཞིག་བཞག་པས་བསྲེགས་སྟེ་ཇི་ལྟ་བུ་གསུངས་པ་ན། དབང་དོན་མེ་སྟག་ལྟ་བུས་ཉོན་མོངས་རས་ཡུག་ལྟ་བུ་སྲེག་དགོས་པར་གོ་ཞུས་པས་ཅི་ཡང་མི་གསུང༌། དེ་བཞིན་དུ་ཤེལ་གོང་བསྟན། རྒྱ་མདུད་ཅིག་མཛད་ནས་བཀྲོལ། ཡིད་བཞིན་ནོར་བུ་ཞིག་བསྟན། ནོར་བུ་ཕྱག་མཐིལ་དུ་བཞག་པ་ལ་སྤྱན་མི་འགྱུར་བར་གཟིགས། ཆུ་སྐྱོགས་གང་ལྷག་མེད་དུ་གསོལ། སྣོད་མང་པོ་ཆུས་བཀང༌། ཆོས་འབྱུང་གི་ཕྱག་རྒྱ་མཛད། ཐུགས་ཀར་ཐིག་ལེ་ཞིག་བསྟན། ལྗགས་ལ་རྒྱ་མདུད་ཅིག་མཛད། ལྐུགས་པ་ལྟར་ཅུང་ཟད་བཞུགས། ཤིང་ཐོག་ངོ་མཚར་བ་ཞིག་བསྟན་ནས་ཅིར་གོ་གསུངས། ཤིང་ཐོག་བདག་གཞན་གཉིས་ཀྱི་དོན་འགྲུབ་པར་གོ་ཞེས་པའི་བར་དུ་དྲི་ལན་མཛད་སྟེ་མཐར་དོན་ངོ་སྤྲད་པ། ཉོན་མོངས་རས་ཡུག་ལྟར་སྲོགས་ཅིག །རང་རྒྱུད་ཤེལ་གོང་ལྟར་དག་གྱིས། ཆོས་བརྒྱད་ཚེ་འདིའི་རྒྱ་མདུད་ཁྲོལ། །ནོར་བུ་རིན་ཆེན་བླ་མ་ཡིན། །དད་གུས་དབང་པོ་འགྱུར་མེད་ཀྱིས། །དྲི་མེད་གདམས་ངག་ཆུ་རྒྱུན་འཐུང༌། །ཆུ་སྣོད་དུ་མ་རོ་གཅིག་ཡིན། །ཆོས་འབྱུང་སྐྱེ་བ་མེད་པ་སྟེ། །ཆོས་སྐུ་ཐིག་ལེ་རང་ལ་གནས། །རྒྱ་མདུད་སྨྲ་བསམ་བརྗོད་དུ་མེད། །ལྐུགས་པ་མི་སྨྲ་རྒྱ་ཆེར་གསུངས། །ཤིང་ཐོག་དོན་གཉིས་ཕུན་(ན༡༥བ)
སུམ་ཚོགས། །བཅུ་གཉིས་བརྡ་ཡི་མདུད་པ་ཁྲོལ། །ཁྱོད་ནི་བརྡ་ཤེས་སྐྱེས་བུ་ཡིན། །མ་སྨིན་སྨིན་བྱེད་དབང་གི་ནི། །གདམས་ངག་སྣོད་དུ་ད་གྱུར་ཏོ། །ཅེས་གསུངས་སོ། །སློབ་མས་ཀྱང་ངེས་པ་ཅུང་ཟད་རྙེད་སྟེ་གསོལ་བ། ཆུ་དང་ཅོད་པན་ལ་སོགས་ལ། །དབང་དུ་ཞེན་པའི་མུན་པ་བཅོམ། །བཅུ་གཉིས་བརྡ་ཡིས་བདག་སྨིན་གྱུར། །ཇི་ལྟར་ལྟ་བ་བཀའ་སྩོལ་ཞིག །བཀའ་བསྩལ་པ། ལྟ་བ་མེད་པའི་ཚུལ་དུ་ལྟོས། །མཐོང་བ་མེད་པའི་དད་ཉིད་ལས། །གྲོལ་བ་མེད་པའི་ཚུལ་གྱིས་གྲོལ། །དོན་མཐོང་རྣལ་འབྱོར་རང་གྲོལ་འགྱུར། །ཞེས་གསུངས་པས་ངེས་པ་ཅུང་ཟད་རྙེད་སྟེ། དབང་གི་དོན་མཐོང་རྣལ་འབྱོར་པ། །དབང་དོན་མེ་སྟག་ལྟ་བུ་ཡིས། །ཉོན་མོངས་རས་ཡུག་ལྟར་བསྲེགས་བདེ། །ཞེས་ཆེད་དུ་བརྗོད་པ་བྱས་སོ། །འདི་ནི་སྨིན་པར་བྱེད་པ་རྒྱུའི་དབང་སྟེ་ན་རོ་པ་རྒྱུད་སྡེ་ལ་ཆེས་མཁས་པས་ཚོགས་བཤད་ཀྱི་རིམ་པ་རྡུལ་ཚོན་གྱི་དཀྱིལ་འཁོར་ལ་ཞེན་པ་སོགས་གཅོད་ཕྱིར་བརྡའི་དབང་བཅུ་གཉིས་སྟེ་དབང་རེ་རེ་ལ་བརྡ་གསུམ་གསུམ་དུ་འགྱུར་རོ། །དེ་ནས་དཀའ་ཆེན་བཅུ་གཉིས་ཀྱིས་ལམ་བགྲོད་སྟེ་དེ་ཡང་མཐོ་ཁྱད་རྒྱ་ཕུབས་རིམ་པ་བཅུ་གསུམ་ཡོད་པའི་རྩེར་སྐད་ཅིག་གིས་བྱོན་སྟེ་འདི་ལ་མཆོང་ནུས་པ་སུ་ཡོད་གསུངས་པས་ཚམ་ཚོམ་མེད་པར་མཆོངས་པས་ཡན་ལག་ཧྲག་ཧྲུག་དུ་ཆག་སྟེ་འཆི་ཀའི་ཚེ་ཕྱག་གིས་རེག་པ་ཙམ་གྱིས་ལུས་སྔོན་པས་ལྷག་པར་གྱུར་ཏོ། །ཡང་སྨྱུག་མའི་ཐུར་མ་རྣོ་ཞིང་ངར་བ་མང་དུ་བཟོས་སྟེ་མཁལ་ཁུང་ནས་ཕར་ཚུར་ཐལ་མར་ཕུག་ནས་ཟིང་ཟིང་པོར་བཏང་ནས་ཕྱག་གིས་རེག་པས་སྔར་ལས་ལྷག་པར་སོས་སོ། །ཡང་སྲིན་བུ་པད་པས་གང་བའི་འདམ་ལ་ལུས་སྨྱང་ནས་ཟམ་པ་བྱས་སྟེ་ཡུན་རིང་དུ་ཞབས་ཀྱིས་བརྫིས་སྟེ་བོར་བས་ལུས་གོ་མཚམས་མེད་པར་པད་པས་ཁྱབ་སྟེ་ཁྲག་ཟད་པ་ན་ཕྱག་རེག་པས་པད་པ་གཅིག་ཀྱང་མི་སྣང་སྟེ་ལུས་སྔར་ལས་ལྷག་པར་གྱུར་ཏོ། །དེ་གསུམ་གྱིས་དཀའ་བ་སྤྱོད་པའི་རྣམ་པ་བུམ་པའི་དབང་གིས་སྦྱང་གཞི་ལུས་ཀྱི་དྲི་མ་(ན༡༦ན)
དངོས་སུ་སྦྱངས་སྟེ་སྦྱོང་བྱེད་ལུས་སྣང་སྟོང་དབྱེར་མེད་སྐྱེད་རིམ་བརྟན་ཞིང་སྐུ་རྡོ་རྗེ་སྤྲུལ་སྐུ་ལ་གེགས་བྱེད་ཀྱི་དྲི་མ་བསལ་བའོ། །དེ་བཞིན་དུ་མེ་ཕུང་གིས་ལུས་བསྲེགས་པ་ལས་སོས་པ་དང༌། སྟོན་མོ་བྱེད་པ་ཅིག་ན་ཟས་སྔོན་མ་མྱོང་བའི་རོ་ཅན་ཞིག་བྱུང་བ་བཟར་འཕངས་ནས་བླ་མ་ལ་དྲངས་པས་ན་རོ་པའི་ཞལ་ཟས་ཞིམ་ད་དུང་ལོང་ཞིག་གསུངས་པས་ལན་གཉིས་སྟེར་བའི་ཁྲིམས་མེད་པས་བཅུས་སྟེ་བྲོས་པ་ཟིན་ནས་ཤི་ལ་ཐུག་པར་བརྡེགས། ཕྱག་རེག་པས་སོས་སྟེ་བུམ་པ་སོགས་བསྐུར་ནས་རིམ་པར་སྐྱུར་ལ་ཤོག་གསུངས་ནས་སྣོད་ཅིག་ལ་ཟས་དེ་ཅུང་ཟད་འབྱགས་འདུག་པ་ཁྱེར་ནས་བྲོས། དེད་པ་ན་དང་པོར་བུམ་པའི་ཆུ་ཕོ་བས་འོབས་ཆེན་པོར་གྱུར། དེ་ནས་ཐག་པ་བསྐྱུར་བར་ཆུ་བོར་གྱུར། དེ་ནས་མེ་ལོང་བསྐྱུར་བ་མཚོར་གྱུར། དེ་ཐམས་ཅད་ལས་འདས་སྟེ་ཟིན་ལ་ཁད་པ་ན་རལ་གྲི་གཡུགས་པས་ལྕགས་ཀྱི་ལྕིལ་པོར་གྱུར་པའི་ནང་དུ་བྲོས་པ་ཕྱོགས་ཀུན་ནས་མེ་བཏང་བས་ཕྱིར་དོན་པ་ན་བརྡེགས་སྟེ་འཆི་བ་ལ་ཐུག་པའི་ཚེ་ཕྱག་རེག་པས་སོས་སོ། །འདིའི་དང་པོ་ནི་གཏུམ་མོའི་མེ་དབང་སྟེ་རྣམ་སྨིན་གྱི་ལུས་ངག་དངོས་སུ་བསྲེགས་པ་ཡིན་ལ། ཕྱི་མ་གཉིས་ཀྱིས་བཟའ་བའི་དམ་ཚིག་སྟེ་སྤྱིར་དཀའ་བ་ལྟར་སྣང་བ་གསང་བའི་དབང་གིས་སྦྱང་གཞི་ངག་དག་ནས་སྦྱོང་བྱེད་རླུང་གི་རྣལ་འབྱོར་བརྟན་པ་གསུང་རྡོ་རྗེ་ལོངས་སྐུ་ལ་གེགས་བྱེད་ཀྱི་དྲི་མ་བསལ་བའོ། །ཡང་རྒྱལ་པོའི་བཙུན་མོ་ཁུག་གསུངས་སྟེ་རེག་པས་ཉུང་རུམ་གྱིས་ཡན་ལག་ཐམས་ཅད་བཅད་ནས་དོར་བ་ཕྱག་གིས་མཐུད་ནས་རེག་པ་ཙམ་གྱིས་སོས། ཡང་བློན་པོའི་ཆུང་མ་ཁུག་གསུངས་སྟེ་བཀུག་པས་བློན་པོའི་འཁོར་གྱིས་ཤི་བར་བརྡེགས་སྟེ་རྒྱོགས་ལ་འཕངས་པ་ཕྱག་རེག་པས་སོས། ཡང་རིག་མ་འཚོལ་ལ་སྟེན་ཞིག་གསུངས། རིག་མ་དེ་བླ་མ་ལ་ཕུལ་བས་འདིས་འདིའི་ཡིད་བཟུང་ངོ་གསུངས་ནས་ན་རོ་པའི་གསང་རྡོར་རྡོའི་བར་དུ་བརྡུངས་སྟེ་རྩའི་རྣལ་མ་ཆུ་འདོར་ཤེས་ཙམ་ལས་མ་ལུས་པས་ན་རོ་པ་ཅེས་རྩ་ཤད་པ་ཟེར་སྟེ་སྡོམ་པ་རྒྱ་མཚོའི་རྒྱུད་ལས། (ན༡༦བ)
བཅོམ་ལྡན་རྩ་ཤད་ཕྱིར་མི་ལྡོག །ཞེས་ལུང་བསྟན་ཏོ་ཅེས་རྒྱུད་པ་འདི་བཞེད་ལ། རོ་ག་རྩོད་པ་ལ་དགག་པའི་ན་སྔོན་དུ་བྱིན་ནས་ག་ཕྱིས་པས་ན་རོ་སྟེ་རྩོད་མེད་ཡིན་ཞེས་ལོ་ཙཱ་བ་དུ་མ་བཞེད་ཏོ། །སླར་ཕྱག་གིས་རེག་པ་ཙམ་གྱིས་སྔར་བཞིན་སོས་སྟེ་འདི་གསུམ་ནི་ཡིད་དང་ཐིག་ལེ་དག་པ་དབང་གསུམ་པ་བསྐུར་བ་སྟེ་བདེ་སྟོང་དབྱེར་མེད་ཀྱི་རྟོགས་པ་བརྟན་ཞིང་ཆོས་སྐུ་ཐུགས་རྡོ་རྗེ་ལ་གེགས་བྱེད་ཀྱི་དྲི་མ་བསལ་བའོ། །ཡང་ཐང་ཞིག་ལ་མི་ཞིག་སོང་བ་འདི་ཟུང་ཞིག་གསུངས། ཕྱིན་པ་ན་ཇེ་རིང་དུ་སོང་སྟེ་མཐར་འགྱེལ་ཞིང་བརྒྱལ། དྲན་པ་རྙེད་དབུགས་མ་ཆད་ཙམ་ན་བྱོན་སྟེ་རེག་པ་ཙམ་གྱིས་སོས། ཡང་མྱ་ངམ་གྱི་ཐང་ཞིག་དུ་མཎྜལ་གྱིས་གསུངས། ཆུ་དང་མེ་ཏོག་མ་རྙེད་པས་ཁྲག་གིས་ཆག་ཆག་བཏབ། དབང་པོ་རྣམས་དང་ཡན་ལག་ལྔ་ཚོམ་བུར་བྱས། ལག་པ་གཡས་པའང་རང་བྲུལ་སྟེ་ཚོམ་བུར་གྱུར་ནས། ན་མཁའ་ལས་མཎྜལ་འབུལ་བའི་ཚིགས་བཅད་མང་པོ་གྲག་པས་ཚོམ་བུ་དབུས་མ་མགོ་བོའི་སྤྱི་བོར་ཕྱག་བཞག་སྟེ། ལུས་ནི་དུམ་བུ་བརྒྱར་འཐོར་ཡང༌། །སེམས་ནི་མྱ་ངན་མེད་པ་ཁྱོད། །ཙཎྜིའི་གནད་ཀྱིས་ད་ཚིམ་བྱའོ། །གསུངས་པས་སྔ་མ་ལས་ཆེས་ལྷག་པའི་ལུས་སུ་གྱུར་ཏོ། །ཡང་ཅི་ཞིག་ན་གདམས་པ་ཞུས་པས་འདི་ཇི་ཙམ་བསྟན་ཡང་གོ་བས་དབེན་པ་གསུངས་སྟེ་མཆིལ་ལྷམ་ཐུགས་ཀར་བརྒྱབ་ཀྱང་ཟེར། ཞབས་ཀྱིས་བསྣུན་ཡང་ཟེར་སྟེ་དྲན་མེད་དུ་ལིང་བོག །བརྒྱལ་སངས་པ་ན་ཏེ་ལོ་པའི་ཐུགས་རྒྱུད་ཀྱི་སྤངས་རྟོགས་ཡོན་ཏན་པར་བཏབ་པ་ལྟར་གྱུར་སྟེ། ཀྱེ་ཧོ་འདི་ནི་རང་རིག་ཡེ་ཤེས་སྟེ། །ངག་གི་ལམ་འདས་ཡིད་ཀྱི་སྤྱོད་ཡུལ་མིན། །ཏེ་ལོ་པས་ནི་ཅི་ཡང་བསྟན་དུ་མེད། །རང་གིས་རང་ཉིད་མཚོན་སྟེ་ཤེས་པར་བྱོས། །ཅེས་ངོ་སྤྲད་ཏོ། །འདི་གསུམ་གྱིས་སྦྱང་གཞི་གཉུག་མའི་ཡེ་ཤེས་ལ་སྦྱང་བྱ་མ་རིག་པའི་དྲི་མ་སྦྱངས་སྟེ་སྦྱོང་བྱེད་སོ་སོ་རང་རིག་པའི་ཡེ་ཤེས་མངོན་དུ་བྱས་པ་སྦྱངས་འབྲས་བདེ་བ་(ན༡༧ན)
ཆེན་པོའི་སྐུ་ལ་གེགས་བྱེད་ཀྱི་དྲི་མ་བསལ་བ་ཡིན་ནོ། །མདོར་ན་ཚོགས་བཤད་ཀྱི་དབང་ལ་ཞེན་པ་སྤང་པའི་ཕྱིར་དཀའ་བ་བཅུ་གཉིས་པོ་འདི་དག་གིས་ལམ་གྱི་དབང་ཡོངས་སུ་རྫོགས་པ་སྟེ། དེས་ན་ལམ་དབང་ཞེས་པ་ཡང་ས་ལམ་བགྲོད་དགོས་པ་ཡིན་གྱི་དགྱེས་རྡོར་གྱི་ལས་དང་པོ་པའི་བདག་འཇུག་ཁ་ཐོན་དུ་བྱེད་པ་ལ་ལམ་དབང་དུ་གྲགས་པ་ནི་མན་ངག་དང་བྲལ་བའོ། །འདི་དག་དུ་ཆོས་ཀྱི་རྣམ་གྲངས་རྫོགས་ཚུལ་ལ་རས་ཆུང་སྙན་རྒྱུད་པ་ནི་དཀའ་བ་དང་པོ་ལ་རྒྱུད་པ་ཡིད་བཞིན་ནོར་བུ། གཉིས་པ་ལ་ཐུན་མོང་ཡིད་བཞིན་ནོར་བུ། གསུམ་པ་ལ་དམ་ཚིག་ཡིད་བཞིན་ནོར་བུ། བཞི་པ་ནས་བཅུ་གཉིས་པའི་བར་ཆོས་དྲུག་གི་སྟེང་དུ་གྲོང་འཇུག་དང་ལས་རྒྱ་བསྣན་པས་བརྒྱད། བཅུ་གཉིས་པ་ལ་ཕྱག་རྒྱ་ཆེན་པོ་སྟེ་སྙན་རྒྱུད་རྫོགས་པར་འཆད། དབང་རྣོན་གྱི་དབང་དུ་བྱས་ན་དཀའ་བ་བཅུ་གཉིས་ཀྱི་མཐར། དངོས་པོའི་གནས་ལུགས་ལམ་དང་ནི། །འབྲས་བུ་སྐྱེ་བའི་རིམ་པའོ། །ཞེས་པ་ཙམ་གྱིས་ཆོས་དྲུག་གཞི་ལམ་འབྲས་གསུམ་དུ་བསྡུས་ནས་གསུངས་པར་འཆད། ཤིན་དུ་དབང་པོ་ཡང་རབ་ཀྱི་ངོར། ཏེ་ལོས་ཚིག་གཅིག་མ་གསུངས་ལ། །ན་རོས་ཚིག་གཅིག་མ་ཉན་སྟེ། །བྱིན་རླབས་རྟོགས་པ་འཕོས་པས་གྲོལ། །ཞེས་འཆད་པ་ཡིན་སྟེ། མདོ་ལས་ཆོས་གང་ཡང་མ་བསྟན་པ་དང་སྟོང་ཉིད་གཅིག་པོ་བསྟན་པ་དང་ཆོས་ཕུང་བརྒྱད་ཁྲི་བཞི་སྟོང་གསུངས་པར་བཤད་པ་བཞིན་ནོ། །དེར་བླ་མ་ལ་ཞུས་པ། སྣང་བ་གཟུགས་ཀྱི་ཕུང་པོ་འདི། །སྐྱེ་བ་མེད་པའི་རང་བཞིན་ལ། །སྤྱད་དུ་ཡོད་ན་སྤྱོད་རིགས་སྟེ། །མེད་པར་སྤྱད་དུ་འདོད་པ་ཅི། །ཞེས་སོགས་ཕུལ་བས་ཤིང་ཨ་ཤྭ་ཏཱའི་སྟེང་དུ་བཞུགས་ནས་ལན་གསུངས་པ། སྣང་བ་རྟེན་ཅིང་འབྲེལ་འབྱུང་འདི། །སྐྱེ་བ་མེད་པར་མ་རྟོགས་པར། །ཚོགས་གཉིས་ཤིང་རྟའི་འཁོར་ལོ་དང༌། །འབྲལ་བར་མ་བྱེད་ན་རོ་པ། །སྐྱེ་མེད་སྟོན་པའི་སློབ་དཔོན་དུ། །སྣང་བ་དཀར་དམར་(ན༡༧བ)
ཤར་བ་ན། །ཤེས་པ་གཟིངས་ཀྱི་བྱ་ལྟར་ཐོང༌། །འདོད་ཡོན་སྤྱོད་ཅིག་ན་རོ་པ། །སེམས་ཉིད་རང་དག་རང་གསལ་བ། །སྐྱེ་མེད་སྤྲོས་དང་བྲལ་བ་ལ། །ཉམས་མྱོང་དྲན་རིག་བློ་བུར་འདི། །རྫུན་པར་རྟོགས་ན་ཅི་དགར་ཐོང༌། །ཅིར་སྣང་ཆོག་ཅིག་ན་རོ་པ། །འཁོར་བའི་མུན་མཐར་སྐྱེལ་བ་ཡི། །གཟུང་འཛིན་རྣམ་རྟོག་སྣ་ཚོགས་འདི། །རྟོགས་པའི་སྟ་རེ་རྣོན་པོ་ཡིས། །ཐད་ཀར་ཆོད་ཅིག་ན་རོ་པ། །སེམས་ཉིད་རང་བཞིན་འོད་གསལ་བའི། །སྣང་ཆ་རྟེན་འབྲེལ་མ་རྟོགས་ན། །ཞེན་པ་དང་བཅས་ཉམས་མྱོང་གིས། །བདག་ཉིད་འཆིང་འགྱུར་ན་རོ་པ། །འདོད་ཡོན་གཟུགས་སྒྲ་སྣ་ཚོགས་ལ། །སེམས་ཀྱི་ཞེན་པ་སྐྱེས་པ་ན། །སྦྲང་མ་རྩི་ལ་འབྱར་བ་འདྲ། །ཞེན་པ་ཐོང་ཞིག་ན་རོ་པ། །ལྟ་བ་སྒོམ་པ་སྤྱོད་པ་གསུམ། །གཅིག་དུ་རྟོགས་ན་དགེ་སྡིག་མེད། །གལ་སྟེ་རྟོགས་པ་ཞན་གྱུར་ན། །བརྟུལ་ཞུགས་སྤྱོད་ཅིག་ན་རོ་པ། །ཅེས་གསུངས་སྟེ་དབང་མ་བསྐུར་ཆོས་མ་བཤད་རྩོད་པ་མ་བྱས་པར་ཕྱག་རྒྱ་མ་བསྟེན་ལ་རྟོགས་པ་སྐྱོངས་ཤིག་གསུངས། དེ་ནས་སྤྱོད་པ་ལ་ཞུགས་སྟེ་སླང་སླང་ཁོ་ན་གསུངས་པས། ཅི་བྱེད་ཟེར་ཟ་བ་ཡིན་གསུངས་པས་འདི་ཟོ་ཞིག་ཞེས་ཅིག་གིས་ཆུ་གྲི་རྣོན་པོ་ཞིག་བྱིན་པ་ལྗགས་སྟེང་དུ་བཞག་པས་མར་བཞིན་དུ་ཞུ་ནས་གསོལ་བས་དད་སྟེ་བྱིན་གྱིས་བརླབས་པས་དེ་ཉིད་ཏུ་གྲོལ་སྟེ་ན་མཁའ་ལ་ལྡིངས་སོ། །ཉམས་སད་པའི་ཕྱིར་རྒྱལ་པོ་ཅིག་གིས་གླང་པོ་ཆེ་སྨྱོན་པ་རྦད་པ་ལ་བསད་གསོ་མཛད་པས་དད་སྟེ་མཆོད་གནས་སུ་བཞུགས་པར་གསོལ། ལྷ་གཅིག་ཡེ་ཤེས་སྒྲོན་ཕྱག་རྒྱར་ཕུལ། དེར་རྔོན་པའི་སྤྱོད་པ་མཛད་པས་མཆོད་གནས་ཉན་ཐོས་པ་རྣམས་དང་བཅས་པ་མ་མོས་སྟེ་མི་མཛད་པར་ཞུས་པས་སླར་ཡང་ལྟུང་བའི་ལྟ་སྟངས་ཀྱིས་བྱ་ཐམས་ཅད་བསད། ཟློག་པའི་ལྟ་སྟངས་ཀྱིས་ས་འོག་ན་གནས་པ་ཐམས་ཅད་བྱུང་ནས་བསད། ཐབས་སྣ་ཚོགས་ཀྱིས་སྐམ་དང་ཆུ་ནང་ན་རྒྱུ་བ་ཐམས་ཅད་བསད་པས་ཐམས་ཅད་མ་མོས་སྟེ་(ན༡༨ན)
ལྷ་གཅིག་དང་བཅིངས་ནས་ཙནྡན་གྱི་མེས་བསྲེགས་པས་མེའི་དབུས་ན་ཡབ་ཡུམ་གཉིས་རྒྱན་གྱིས་བརྒྱན་ནས་གར་བྱེད་ཅིང་སྐུ་ཟིལ་པ་ཕྲོམ་མོ་བྱོན་སྟེ། ཁྱེད་ཅག་ཚིག་རྩུབ་མཚོན་ཆ་དེ་ནི་བཟོད་པའི་གོ་ཆ་འཆང་བའི་གྲོགས། །ངན་སེམས་དུག་གི་ཕྲེང་བ་དེ་ནི་གྲུབ་པའི་རྨ་བྱ་མཛེས་པའི་རྒྱུ། །བཟོད་དཀའ་ཙནྡན་མེ་ཆེན་དེ་ནི་བདེ་ཆེན་པདྨའི་རྫིང་ཡངས་སྟེ། །ཁྱེད་ཅག་ལྷན་ཅིག་ཁྲིམས་སུ་བཅས་པ་ངེས་པར་བདག་ལ་དགའ་བ་འཕེལ། །ཞེས་གསུངས་ཤིང་རྒྱལ་པོ་འཁོར་དང་བཅས་པས་ཀྱང་རྨི་ལམ་དུ་བསྐལ་པ་དུ་མར་དམྱལ་བར་སྡུག་བསྔལ་མྱོང་བ་མཐོང་བས་འགྱོད་ཅིང་བཤགས་སྟེ་གསོལ་བ་བཏབ་པ་ན། སུ་དག་མ་རྟོགས་པ་ལ་སྡིག་དང་དགེ། །ལས་དང་ལས་ཀྱི་འབྲས་བུ་ཞེས་གྲགས་སྟེ། །དེ་ཉིད་རྟོགས་པ་སུ་ཞིག་དེ་ལྟར་རྟོག །དེ་བས་རང་ངོ་ཡེ་ཤེས་ཆེན་པོ་ལྟོས། །ཅེས་བྱིན་གྱིས་བརླབས་པའི་མོད་ལ་རྒྱལ་པོ་འཁོར་དང་བཅས་པ་གྲོལ་བར་གྱུར་ཏོ། །ཡང་ཆུ་བོ་གངྒཱའི་འགྲམ་གྱི་བྱེ་མ་ལ་བྱིས་པ་རྣམས་དང་རྩེད་མོ་མཛད་པ་ན་ཏེ་ལོ་པ་ན་མཁར་བྱོན་སྟེ། ཕྱག་རྒྱ་ཆེ་ལ་བསྟན་དུ་མེད་ཀྱིས་ཀྱང༌། །དཀའ་བ་སྤྱོད་ཅིང་བླ་མ་ལ་གུས་པ། །སྡུག་བསྔལ་བཟོད་བྱེད་བློ་ལྡན་ན་རོ་པ། །སྐལ་ལྡན་ཁྱོད་ཀྱི་སྙིང་ལ་འདི་ལྟར་བྱོས། །ཅེས་སོགས་ཕྱག་རྒྱ་ཆེན་པོ་གཾ་གཱ་མ་གསུངས་པས་མཐར་ཐུག་གི་དོན་མངོན་དུ་གྱུར་སྟེ་ཆེད་དུ་བརྗོད་པ། ཡིད་ལ་མི་བྱེད་ཕྱག་རྒྱ་ཆེན་པོའི་ལམ། །དམིགས་མེད་སྤྲོས་བྲལ་སྒྲིབ་མེད་སེམས་ཀྱི་ནི། །ངོ་བོ་མཐོང་སྟེ་སུ་ལའང་དྲི་མི་བྱ། །དྲི་མེད་ཤུགས་འབྱུང་རྣལ་འབྱོར་རང་གྲོལ་ཡིན། །ཞེས་གར་བྱས་སོ། །དེའི་ཚེ་རི་རི་པ་དང་ཀ་སོ་རི་པས་ཀྱང་གཞན་དོན་ལ་བསྐུལ་ཞིང༌། བླ་མས་ཕྱག་སྤྱི་བོར་བཞག་སྟེ། པུཥྤ་ཧ་རིའི་དགོན་པར་ནི། །རང་གྲོལ་ཡེ་ཤེས་ཉི་མ་ཡིས། །མ་ཏིའི་མ་རིག་མུན་པ་སོལ། །ཡེ་ཤེས་སྣང་བས་ཁྱབ་པར་གྱིས། །གསུངས་པས་ཕྱག་བྱས་སྟེ། བླ་མ་དམ་པའི་བཀལ་ལུང་དང༌། །རྡོ་རྗེ་དཔུན་གྱི་(ན༡༨བ)
གསུང་བཞིན་དུ། །མདོ་རྒྱུད་སྙིང་པོ་དོན་གྱི་བཅུད། །ངེས་མེད་ཡུལ་དུ་བསྒྲག་པར་བྱའོ། །ཞེས་ཞུས་ནས་སླར་ཡང་བྱང་སྒོ་སྲུང་བ་མཛད་ལ་འདིའི་ཚེ་ཤར་ན་ཤཱནྟི་པ། ལྷོ་ན་ངག་གི་དབང་ཕྱུག་ནུབ་ན་ཤེས་འབྱུང་བློ་གྲོས་རྣམས་བཞུགས་སོ། །སློབ་མ་སྨིན་གྲོལ་དུ་མཛད་པ་མཐའ་ཡས་ཤིང་མཻ་ཏྲྀ་པ་དང་ཤཱནྟི་པ་སོགས་མཁས་གྲུབ་མཐའ་དག་ཡང་ན་རོ་པའི་སློབ་མ་ཡིན་ནོ། །དངོས་གྲུབ་བརྙེས་ནས་བཀའ་དཔེ་ཕྱི་མ་དང་རིམ་ལྔ་བསྡུས་པ་གསལ་བ་སོགས་མཛད་ཏོ། །འདིའི་དུས་རྗེ་མར་པས་གདམས་ངག་ཐམས་ཅད་རྫོགས་པར་གསན་པ་སྟེ་གསང་སྔགས་མཐའ་དག་དང་ཁྱད་པར་ཆོས་དྲུག་གི་རྒྱུད་པའོ། །ཁྱད་པར་དུ་ཕྱག་རྒྱ་ཆེན་པོ་སྙིང་པོའི་དོན་གྱི་བཀའ་བབས་ནི། རྡོ་རྗེ་འཆང༌། ས་ར་ཧ། ཀླུ་སྒྲུབ། ཤ་ཝ་ར། མཻ་ཏྲྀ་པ། རྗེ་མར་པ་སྟེ་དེ་ལ་ཤ་ཝ་ར་ནི་གླུ་གར་གྱིས་འཚོ་བའི་གར་མཁན་མིང་སྲིང་གསུམ་ཡོད་པ་རེ་ཞིག་ནཱ་ལནྡར་སློང་བ་ན་ཀླུ་སྒྲུབ་ཞབས་ཀྱིས་རིགས་ངན་ལ་རྟོག་པ་མ་མཛད་པར་ནང་དུ་བོས་ཟས་བཟང་པོ་གནང་བས་དད་སྟེ་ས་ར་ཧའི་དོ་ཧ་གླུར་བླངས་པས་དེའི་དོན་ཤེས་སམ་གསུངས། མ་འཚལ་སྟེ་མོས་ནས་ལེན་པ་ལགས་ཞུས་པས་ཤེས་པར་འདོད་དམ་གསུངས། ཤིན་དུ་དགའ་ནས་འཚལ་ལགས་ཞུས་པས་སྐལ་ལྡན་དུ་གཟིགས་ནས་དབང་བསྐུར་ཞིང་བྱིན་གྱིས་བརླབས་པས་ཅིག་ཅར་བའི་རྟོགས་པ་སྐྱེས། བྱང་ཆུབ་སེམས་དཔའ་བློ་གྲོས་རིན་ཆེན་གྱི་ཞལ་མཐོང༌། རྔོན་པའི་ཆ་བྱད་ཀྱིས་དཔལ་གྱི་རི་ལ་རྣམ་སྨིན་གྱི་ལུས་འདིས་འགྲོ་བའི་དོན་གྱིས་ཅིག་གསུངས་སྟེ་ད་ལྟའང་བཞུགས། མཻ་ཏྲྀ་པ་ནི། ཡུལ་དབུས་སུ་བྲམ་ཟེའི་རིགས་སུ་འཁྲུངས། དོ་ཧའི་ལོ་རྒྱུས་སོགས་ཡོངས་གྲགས་ལྟར་བྱས་པ་སྟེ། རྗེ་མར་པས། ཁྱེད་འགྲོ་བའི་དོན་དུ་འཛམ་གླིང་འདིར། །རྒྱལ་པོའི་རིགས་སུ་སྐྱེ་བ་བཞེས། །ཅེས་གསུངས་པས་རྒྱལ་རིགས་སུ་འཐད་ཏོ། །སྒྲ་ལ་མཐར་ཕྱིན་པར་མཁྱེན་ནས་ན་རོ་པ་དང་རྩོད་པས་ན་རོ་པ་རྒྱལ་སྟེ་སློབ་དཔོན་ཏུ་བཀུར། བྲམ་ཟེའི་བརྟུལ་ཞུགས་དང་བསླབ་པར་བྱ་བ་མཐར་ཕྱིན་ནས་ཤཱནྟི་པ་ལས་རབ་ཏུ་བྱུང༌། མཚན་མཻ་ཏྲྀ་སྟེ་བྱམས་པར་གྲགས། རིག་པའི་གནས་(ན༡༩ན)
ལྔ་ལ་མཁས་པ་ཟླ་མེད་པར་གྱུར། བི་ཀྲ་མ་ལ་ཤཱི་ལར་བཞུགས་ཚེ་ཡི་དམ་རྣལ་འབྱོར་མའི་ནང་གི་དམ་རྫས་བསྟེན་པ་ཇོ་བོ་རྗེ་ལྷ་གཅིག་སོགས་ཞལ་ཏ་པས་མཐོང་སྟེ་དགེ་འདུན་གྱིས་གནས་ནས་ཕྱུང་བས་ཉམས་པ་སྒོ་ལ་འགྲོར་མི་རུང་ཞེས་རྩིག་པ་ལ་ཐལ་བཞུད། མདུན་ན་ཆུ་བོ་གཾ་གཱ་ཡོད་པ་ལ་གདིང་བ་བཏིང་སྟེ་གཡོག་གུ་ས་ཀ་རའི་ལག་པ་ནས་བཟུང་སྟེ་སོང་བས་ཉི་མ་ནུབ་བོ་ཞེས་དགེ་འདུན་ཀུན་གྱིས་ངུས། ཇོ་བོས་གཟིངས་བསྐོར་སྟེ་རྗེས་སུ་འཛིན་པར་ཞུས་པས་ད་ལྟ་ལྕགས་རི་གཅིག་གི་པཎྜིཏ་ཕན་ཚུན་རྗེས་སུ་འཛིན་པར་མི་ནུས་ཀྱི་ངས་བླ་མ་དམ་པ་ཅིག་དང་མཇལ་བ་རྨིས་པས་མཇལ་ན་རྗེས་སུ་བཟུང་ངོ་ངའི་བྲང་ཁང་ན་སྒྲོལ་མའི་བྲིས་སྐུ་ཞིག་ཡོད་པ་དེ་ལ་ཡི་དམ་གྱིས་ཅིག་གསུངས། ཁཱརྶ་པཱ་ཎར་བསྙུང་བ་བྱས་སྟེ་རྨི་ལམ་བརྟགས་པས་རི་བོ་མ་ཎི་བྷ་ག་ལར་གུ་རུ་ས་ར་ཧ་པས་རྗེས་སུ་འཛིན་པར་འགྱུར་རོ་ཞེས་དང༌། ཡང་གནས་གཞན་དུ་བརྟགས་པས་རི་བོ་མ་ཎི་བྷ་ག་ལ་རྩེ་གསུམ་པ་དང༌། ཤ་ཝ་ར་དབང་ཕྱུག་སྨུག་ནག་འོད་མའི་གཞུ་ལ་ཕག་པའི་སྟེང་ཁོག་སྨད་ཁོག་བཀལ་བ་དང་རྣལ་འབྱོར་མ་གཉིས་ཀྱིས་བསྟེན་པ་གཟིགས་སྟེ། རྒྱ་མཚོར་འདོང་བའི་ཚོང་པའི་གསེབ་ཏུ་མཆོད་གནས་མཛད་སྟེ་ལྷོ་ཕྱོགས་སུ་རིང་དུ་བྱོན་པས་རྨི་ལམ་བཞིན་རི་དེ་ཝལ་བྱུང་བ་ན་དེར་བྱོན་ནས་ཤིང་ཐོག་ཟ་ཞིང་བཙལ། ཡང་བསྙུང་བ་བྱས་ནས་བཙལ་བས་ཀྱང་མ་རྙེད། བར་དོར་ཞལ་ལྟ་སྙམ་པས་ལྕེབ་པར་རྩོམ་ཚེ་ཤ་ཝ་ར་རྨི་ལམ་གྱི་ལྟ་བུ་ས་ཀ་རས་མཐོང་སྟེ་སྦྲན་ནས་བརྐྱང་ཕྱག་བྱས་པས་ང་ཡེ་ནས་འདི་ན་འདུག་པ་ཡིན་སྟེ་ཁྱོད་རང་གི་སྒྲིབ་པས་བསྒྲིབས་པར་ཟད། ང་མཐོང་བས་ཀྱང་འཆིང་བ་སྟེ། །ང་མ་མཐོང་ཡང་འཆིང་པར་འགྱུར། །ང་མཐོང་བས་ཀྱང་གྲོལ་འགྱུར་སྟེ། །ང་མ་མཐོང་ཡང་གྲོལ་བར་འགྱུར། །ཞེས་སོགས་གསུངས་པས་ཏིང་ངེ་འཛིན་ཁྱད་པར་ཅན་སྐྱེས། ཕྱག་རྒྱ་བཞི་ཁྲི་དང་དོ་ཧ་དང་ཐེག་ཆེན་ཉི་ཤུ་པ་སོགས་མང་དུ་གསུངས། ས་ཀ་ར་ནི་གྲོལ་སྟེ་མི་སྣང་བར་(ན༡༩བ)
གྱུར། ཡང་ནགས་གསེབ་ལ་ཕག་རྒོད་ཅིག་འགྲོ་བ་ལ་མདའ་བརྒྱབ་ནས་བསད། ཅུང་མ་མོས་པ་ན། འཁོར་བའི་ནགས་ཚལ་སྐྱེ་མེད་ན། །མ་རིག་ཕག་རྒོད་རྒྱུ་བ་ལ། །ཤེས་རབ་གསལ་བའི་མདའ་ཞིག་བརྒྱབ། །མ་རིག་ཕག་རྒོད་བདག་གིས་བསད། །ཤ་ནི་གཉིས་སུ་མེད་པར་ཟོས། །རོ་ནི་བདེ་བ་ཆེན་པོར་མྱོང༌། །གསུངས་སྟེ་མི་སྣང་བར་གྱུར། ཡང་གསོལ་བ་བཏབ་པས་ངའི་རྣམ་སྨིན་གྱི་ལུས་རོ་ལས་བསྟན་པའི་སྐལ་བ་མེད་ཀྱི་སྤྲུལ་པའི་ལུས་རིགས་ངན་གྱི་གྲོང་ཁྱེར་དྷཱུ་ཏི་བྱ་བར་དགེ་ཚུལ་རྒན་པོ་ཅིག་ལ་དགེ་ཚུལ་མ་རྒན་མོ་གཉིས་ཀྱིས་བསྐོར་བ་ཡོད་ཀྱིས་དེར་སོང་ཞིག་ཞེས་གྲག་སྟེ་དེར་གདམས་ངག་གི་སྒྲོ་འདོགས་ཐམས་ཅད་བཅད། གཉིད་ཀྱིས་ལོག་པ་ལས་སད་པ་ན་ཆོས་ཐམས་ཅད་བརྗེད་འདུག་ནས་ལྕེབ་དགོས་སྙམ་ཚེ་ན་མཁའ་ལ་དངོས་སུ་བྱོན་སྟེ། མ་སྐྱེས་པ་ཡི་ཆོས་རྣམས་ལ། །ཤེས་ཞེས་བྱ་བ་ག་ལ་ཡོད། །མ་འགགས་པ་ཡི་ཆོས་རྣམས་ལ། །བརྗེད་ཅེས་བྱ་བ་ག་ལ་ཡོད། །སོགས་གསུངས་སྟེ་ཁྱོད་ཡུལ་དབུས་སུ་སོང༌། ངའི་འདྲ་འབག་གྱིས་ལ་སློབ་དཔོན་དུ་ཟུང༌། སྣོད་ལྡན་རྗེས་སུ་ཟུང་ཞིག་གསུངས། དེ་ལྟར་མཛད་སྟེ་སེང་གེའི་སྒྲ་བསྒྲགས་པས་མུ་སྟེགས་ན་ཏི་ཀ་ར་བཏུལ། ཤཱནྟི་པས་ཀྱང་རྩོད་ཡིག་བཞག་སྟེ་བྲོས། གཞན་སུས་ཀྱང་རྩོད་མ་ནུས་སྟེ་རྡོ་རྗེ་གདན་གྱི་མཆོད་དཔོན་མཛད། མ་གྷ་དྷའི་རྒྱལ་པོས་གཙུག་དུ་བཀུར་བས་མངའ་བདག་ཆེན་པོ་མཻ་ཏྲྀ་པ་ཅེས་མཚན་འདོན་སྟེ་རི་བོ་མེ་འབར་གྱི་དགོན་པར་བཞུགས་ཨ་མ་ཎ་སིའི་ཆོས་སྐོར་ཉེར་བཞི་མཛད། སློབ་མའང་མུ་སྟེགས་ན་ཏི་ཀ་ར་བཏུལ་པ་ལྷན་ཅིག་སྐྱེས་པའི་རྡོ་རྗེ་དང༌། དེ་ཝ་ཀཱ་ར་ཙནྡྲ་སྟོང་ཉིད་ཏིང་འཛིན་དང༌། རྒྱལ་པོ་ར་མ་པཱ་ལ་དགའ་བ་སྐྱོང༌། བཛྲ་པཱ་ཎི་རྒྱ་གར་ཕྱག་ན་སྟེ་ཁྱད་པར་གྱི་སློབ་མ་བཞི། ཨ་བྷི་ཡུཀྟ་སོགས་འབྲིང་བདུན། ཏེ་པུ་བ་དང་པ་ལམ་ཏ་ཨ་ཙརྻ་སོགས་ཆུང་བ་བཅུ་ལ་སོགས་པ་བྱོན། རྒྱ་བོད་ཐམས་ཅད་ན་ཉི་ཟླ་ལྟར་གྲགས་པ་ལས་རྗེ་མར་པས་གསན་ནོ། །རྗེ་ལོ་ཙཱ་བ་ནི་ལྷོ་བྲག་ནུབ་ཀྱི་ནང་མ་སྦེ་སར་གྱི་(ན༢༠ན)
དཀོན་མཆོག་སྟོད་བཀྲ་ཤིས་ལིང་བ་བྱ་བར་འཁྲུངས། གདུང་མར་པ། ཡབ་དབང་ཕྱུག་འོད་ཟེར། ཡུམ་རྒྱལ་མོ་མཚོ། སྲས་ལྔའི་གསུམ་པ་ཡིན། ལོ་བཅུ་གཉིས་ནས་མྱུ་གུ་ལུང་དུ་འབྲོག་མི་ལ་ལོ་ཙཱ་བསླབས། བཅོ་ལྔ་ལ་བལ་པོར་བྱོན། སྤྱི་ཐེར་པ་བསྟེན་ལོ་གསུམ་ནས་རྒྱ་གར་དུ་བྱོན། ནུབ་ཏུ་ལ་ཀྵེ་ཏྲར་ཡེ་ཤེས་སྙིང་པོ་དང་མཇལ་ཀྲྀ་ཡ་མང་དུ་གསན། ཚོགས་འཁོར་གྱི་སར་ན་རོ་པའི་སློབ་མ་རྫུ་འཕྲུལ་ཅན་བཞིའི་རྣམ་འཕྲུལ་མཐོང་བས་དད་ཅིང་དེའི་པེཎྜ་པས་ན་རོ་པ་དང་སྤྲད། དགྱེས་རྡོར་གདམས་ངག་དང་བཅས་པ་གསན། ན་རོ་པས་ལུང་བསྟན་སྟེ་ཡེ་ཤེས་སྙིང་པོ་ལ་གསང་འདུས། ཀུ་ཀུ་རི་པ་ལ་མ་ཧཱ་མཱ་ཡ། མཻ་ཏྲྀ་པ་ལ་ཕྱག་ཆེན། རུས་པའི་རྒྱན་ཅན་མ་ལ་གདན་བཞི་སོགས་གསན། སྤྱིར་སྣང་བ་འགྱུར་ངེས་བཅུ་གསུམ་སོགས་བཞུགས། སླར་བོད་དུ་བྱོན། མེས་རྔོག་མཚུར། མགོ་ལེགས་སོགས་ཀྱིས་མཇལ། གསེར་མང་དུ་བསྣམས་སྟེ་འབུལ་བ་དང་མཆོད་པ་མཛད། སླར་ལན་གཅིག་ཡོང་དགོས་པར་ལུང་བསྟན། སླར་བོད་དུ་བྱོན་འགྲོ་དོན་མཛད་ཚེ་ན་རོ་པ་སྤྱོད་པ་ལ་གཤེགས་པར་མཁྱེན་ནས་མཁའ་འགྲོས་བསྐུལ་སྟེ་རྒྱ་གར་ལ་བྱོན། བླ་མ་ཐམས་ཅད་ལ་ཟླ་བ་རེ་ཚོགས་དང་མཎྜལ་ཕུལ་སྟེ་གསོལ་བ་བཏབ་པས་ཐམས་ཅད་ཀྱིས་མཇལ་བར་ལུང་བསྟན། མཐར་ཀ་སོ་རི་པས་ཟླ་བ་བརྒྱད་ན་མཇལ་བར་ལུང་བསྟན། ཟླ་བ་རེ་རེ་ལ་ཉམས་སུ་མཇལ་ཐེངས་རེ་བྱུང༌། མཐར་མངོན་སུམ་དུ་མཇལ་ཏེ་ལོའི་ལུང་བསྟན་ལྟར་པུཥྤ་ཧ་རིར་ཁྲིད་སྟེ་གདམས་ངག་ཐམས་ཅད་རྫོགས་པར་གནང༌། སློབ་མ་བས་ཀྱང་ཡང་སློབ་བཟང་བར་ལུང་བསྟན་ཁ་བ་ཅན་འདུལ་བར་བསྐོས། མཁའ་སྤྱོད་དུ་བྱོན་པར་གཟིགས་སྟེ་གསོལ་བ་བཏབ་པས་སེང་ལྡེང་སྟུག་པོའི་ནགས་སུ་དངོས་སུ་བྱོན་སྟེ་ཆོས་དྲུག་དྲིལ་པ་རྡོ་རྗེའི་མགུར་གསུངས་པས་འདུ་འབྲལ་མེད་པའི་གདེང་ཐོབ་བོ། །བླ་མ་གཞན་རྣམས་ལའང་གཏང་རག་གི་ཕྱག་(ན༢༠བ)
མཛད་ངོ་མཚར་དུ་མ་གཟིགས་སྟེ་བོད་དུ་བྱོན། བུ་སློབ་མཐའ་ཡས་པ་སྨིན་པར་མཛད། ཕྱག་གི་རྟེན་འབྲེལ་འཕྱུགས་པས་བླ་མས་ལུང་བསྟན་པ་ལྟར་སྲས་ཀྱི་མཆོག་སྐུ་ཡལ། རྔོག་པ་ལ་དགྱེས་རྡོར་སོགས་རྒྱུད་བཤད་དང་སྲེ་འཕོ། མཚུར་སྟོན་ལ་གསང་འདུས་དང་རིམ་ལྔ། མེས་ཚོན་པོ་ལ་མ་ཧཱ་མཱ་ཡ་དང་འོད་གསལ། མི་ལ་ལ་གཏུམ་མོ་གཙོ་བོར་བཏོན་ནས་གདམས་ངག་ཐམས་ཅད་དང༌། མགོ་ལེགས་ལ་ཐུགས་རྒྱུད་གདམས་སྐོར་བཅོ་ལྔ་སོགས་གནང་སྟེ་ཆོས་ཀྱི་བཀའ་བབས་སོ་སོར་གཏད་ཅིང་སྐལ་ལྡན་མཐའ་ཡས་པ་སྨིན་གྲོལ་ཏུ་མཛད་སྟེ་དགུང་ལོ་གྱ་དྲུག་པ་ཟླ་བ་བཅུ་གཉིས་པའི་བཅོ་ལྔ་ལ་ཇོ་མོ་བདག་མེད་མ་འོད་དུ་ཞུ་ནས་བླ་མའི་ཐུགས་ཀར་ཐིམ། དབུ་གཙུག་ནས་འོད་ཟླ་བ་ལྟ་བུ་དང་བཅས་སྟེ་དག་པར་གཤེགས་སོ། །ཡུམ་གྱི་དབུ་ཐོད་དུ་གྲགས་པ་ནི་ཇོ་མོ་གཞན་གྱིའོ། །བུ་ཆེན་ཡང་མཉེས་པའི་བུ་ལྔ། བཀའ་བབས་ཀྱི་བུ་དྲུག་མོས་གུས་ཅན་གྱི་སློབ་མ་བཞི། ཞར་ལ་བསྐྱངས་པ་དཔག་དུ་མེད་པ་བྱོན་ལ། རྔོག་སྟོན་ཆེན་པོ། ལ་སྟོད་རྣལ་འབྱོར་མ། ཆིབས་ཁ་བ་ལྷོ་པ་རྟ་སྒོམ་སྟེ་གསུམ་ལུས་འདིས་མཁའ་སྤྱོད་དུ་བྱོན་ནོ། །རྒྱུད་པའི་བཀའ་ཟིན་པ་ཀ་ཆེན་བཞི་ལས་ལྷོའི་ཀ་བ་རྔོག་ཆོས་སྐུ་རྡོ་རྗེ་ནི་འཁྲུངས་ཡུལ་གཞུང་རི་བོར་འཁྲུངས། རྔོག་ཟིངས་པོ་རྗེ་བྱ་བ་ལྷ་ཐོ་ཐོ་རི་གཉན་བཙན་གྱི་དུས་སུ་འཕྲུལ་དགའི་ལྷ་ཞིག་མི་ཡུལ་དུ་བབས་ཀྱང་ཟེར་ལ་མི་བུ་རིགས་བཞི་ལས་སྟོང་དུ་གཏོགས་ཀྱང་ཟེར། རྔོག་གཙན་གཉན་གྱིས་ཆོས་རྒྱལ་ཁྲི་སྲོང་གི་སྐུ་སྲོག་བཏོན་ཞིང་རྔོག་གཙན་གཟིགས་སྣང་ཞེས་སློབ་དཔོན་པདྨའི་དངོས་སློབ་ཏུ་གྱུར་པས་རྒྱལ་པོའི་སྐུ་རིམ་པ་སྔགས་མཁན་ཆེན་པོ་མཛད། དེ་ཕྱིན་རྙིང་མའི་གྲུབ་ཐོབ་རྒྱུད་པའི་རྔོག་གཡུ་ཁྲི་ལ་དཔལ་ལེ་རཏྣ། ཡུལ་བྱིན་གསུམ་བྱུང་བའི་ཡུལ་བྱིན་གྱི་སྲས་མི་རབས་གཉིས་ནས་རྔོག་ལོ་ཁུ་དབོན་བྱོན་ཞིང༌། དཔལ་ལེའི་ཡང་ཚ་ནི་རྔོག་བན་ཆེན་ཁ་པའོ། །(ན༢༡ན)
ཡབ་དེ་དང་ཡུམ་འོད་ལྡན་མའི་སྲས་སུ་འཁྲུངས། ཡབ་ཆོས་སོགས་ལ་མཁས་པར་གྱུར་ཚེ་པ་བཟའ་ཆོས་འཚོ་ཁབ་ཏུ་བཞེས། གཞུང་སེ་ལུང་དུ་དགེ་བཤེས་དགྱེར་ཆུང་པ་ལ་རྙིང་མ་གསན་པ་ན་ཁོང་གིས་སྙིང་ནས་རང་ཆོས་བྱེད་ན་སྐྱེས་མཆོག་མར་པ་ལོ་ཙཱའི་སྤྱན་སྔར་འདོང་ངམ་ཞེས་གསུང་པས་མཚན་ཐོས་པ་ཙམ་གྱིས་དད་པ་རང་དབང་མེད་པ་སྐྱེས་ནས་དེ་ནུབ་རང་ཆོས་འཕྲོ་དྲིལ་སྟེ་ནང་པར་བྱོན། མཇལ་མ་ཐག་རྟ་ཕུལ་པས་ཕྱག་རྟེན་ཡིན་ན་ཆེ་ཞུ་རྟེན་ཡིན་ན་ཆུང་གསུངས། རི་བོར་གདན་དྲངས་ནས་སྤོང་དག་དང་པོ་ལ་གནག་བརྒྱ་སྦྲ་དང་བཅས་པ་དང༌། བར་པ་ལ་ཆོས་པོ་ཏི་སུམ་བཅུ་སོགས་གང་ཡོད། མཐའ་མ་ལ་ལུག་ཚེར་མོ་བརྒྱ་ལ་སོགས་པ་གང་ཡོད་ཕུལ། རིམ་པར་དགྱེས་རྡོར་གདན་བཞི། མ་ཧཱ་མཱ་ཡ་རྣམས་ཀྱི་རྒྱུད་མན་ངག་དང་གདམས་ངག་དཔག་མེད་གསན། ཆོས་སྐྱོང་དུ་དུད་སོལ་མ་གནང༌། གཞན་ཡང་གནམ་བྱེ་མ་ལུང་པ་དང༌། ཁམས་པ་ཤེས་རབ་རྡོ་རྗེ་ལ་མཚན་བརྗོད་གསན་ཞིང་དགྱེས་རྡོར་ལྷ་དགུ་བདག་མེད་མ་ལྷ་མོ་བཅོ་ལྔ། གདན་བཞི་ལྷ་མང༌། ཡེ་ཤེས་དབང་ཕྱུག་མ། མ་ཧཱ་མཱ་ཡ་ལྷ་ལྔ། གུར་རིགས་བསྡུས་སྟེ་རྗེ་མར་པ་ལས་བྱུང་བ་དྲུག་དང༌། སྨྲྀ་ཏི་ལུགས་ཀྱི་འཇམ་དཔལ་གསང་ལྡན་སྟེ་བདུན་ལ་རྔོག་དཀྱིལ་བདུན་དུ་གྲགས། རི་བོ་ཁྱུང་ལྡིང་གི་ལྷ་ཁང་བཏབ། འདིའི་དཀྱིལ་འཁོར་སྟེགས་བུ་མཛད་སར་རྔོག་ཡབ་སྲས་ཀྱིས་ལྷ་མོ་བཅོ་ལྔ་ལན་གསུམ་གཟིགས། ཞིང་གི་བར་ན་ནེ་སིང་ཁྱུང་འདྲ་བ་ཡོད་པས་ཁྱུང་ལྡིང་ཟེར་དགུང་ལོ་དྲུག་བཅུ་རྩ་བརྒྱད་ལ་སྐུ་ལུས་འདིས་མཁའ་སྤྱོད་དུ་བྱོན། སློབ་མ་རམ་རྩ་ཅན། པ་ཝ་བ་ཅན། རྔོག་མུན་པ་ཅན། སུམ་པ་ཕོད་ཀ་ཅན་སྟེ་ཅན་བཞི་སོགས་བྱོན། ཁྱད་པར་རིགས་ཆོས་གཉིས་ཀའི་སྲས་རྔོག་ཞེ་སྡང་རྡོ་རྗེ་ནི་པུག་ཡེ་རྒྱལ་གྱི་སྐྱེ་བ་ཡིན། མཚན་མདོ་སྡེ། ལོ་བཞི་པའི་དུས་མི་ལས་གཡོག་བྱས་སྟེ་སྤོང་དག་བར་པ་མཛད། རྒྱུད་འགྲེལ་གྱི་ཆོས་གྲར་ཤིན་དུ་འཚུབ་ཅིང་བླ་མ་(ན༢༡བ)
དང་ཡབ་ཀྱི་དབུ་སྐྲ་དང་རྨང་ར་ནས་རེ་མོས་ཀྱིས་འཐེན་པས་རྔོག་གིས་འདི་སང་ནས་ཁྲིད་མི་ཡོང་དགོས་པ་འདུག་གསུངས་པས་རྗེ་མར་པའི་ཞལ་ནས་འདི་བླ་མ་ལྷོ་པ་ཆེན་པོ་ལ་རྒྱུད་དངོས་སུ་ཐོས་པ་ཡིན་ཟེར་ནས་ང་ལ་རྒྱུད་པ་འདེད་པ། བོད་ཀྱི་སྔགས་པའི་མཆོག་ཞིག་འོང་པས་ཁྲིད་ཤོག་གསུངས། ལོ་བཅུ་གཉིས་པ་རྟ་ལོ་ལ་ཡབ་གཤེགས། དེ་སྲིད་ཡབ་ལ་བཀའ་ལུང་ཐམས་ཅད་ནོད་ནས་སླར་རྔོག་དང་པ་ཝ་བ་ཅན་ལ་ཞིབ་ཚགས་མཛད། བྱ་ལོ་ཆག་ལོ་ར་ལོ་གཉན་ཆུང་ལོ་ཙཱ་ཤུད་བུ་ལོ་ཙཱ་ཟངས་དཀར་བ་རི་སོགས་མང་དུ་བསྟེན། ལོ་བཅོ་བརྒྱད་པ་ལ་ཡབ་ཀྱི་ཇོ་མོ་ཞིག་གིས་ཀ་ཝ་ལི་དྲ་བ་སྔོན་པོ་ཅན་དང་ཕྱིང་ཁུག་དྲ་བ་སྔོན་པོ་ཅན་བྱ་བ་ཡབ་ཀྱིས་བཞག་པ་གཏད་བྱུང་བ་ཀ་ཝ་ལི་ནས་རྒྱུད་བཤད་ཁྱད་པར་བ་དང་ཕྱིང་ཁུག་ནས་མན་ངག་ཁྱད་པར་ཅན་དུ་མ་བྱུང༌། གཙང་དུ་བྱོན་ནས་ཆུ་མིག་རིང་མོ་ན་བཞུགས་ཚེ་ཇོ་མོ་སྒྲེ་མོ་བྱ་བ་རས་ཆུང་པའི་སློབ་མ་དེ་ན་རེ་ངའི་མཁན་པོ་ཆུ་མིག་རིང་མོ་ན་འོ་བརྒྱལ་ཆང་ལ་ཆུ་རྒྱོབ་གསུངས་ནས་སྤྱན་དྲངས་སྟེ་སང་དགོང་རིག་མ་འདིའི་སར་བྱོན་ན་གདུང་རྒྱུད་འོང་ཞེས་དང༌། རྗེ་མར་མིའི་གདུང་སོགས་བཞུགས་པའི་གདུང་རྟེན་ཞིག་ཕུལ་སྟེ་ཚགས་མཛད་པར་ཞུས། སྲས་གཙང་ཚ་ཇོ་སྲས་ཚུལ་ཁྲིམས་ཤེས་རབ་འཁྲུངས་སྟེ་ལོ་བཞི་ལོན་པ་ཅིག་དབུས་སུ་ཕུལ་ཕྱིས་ཀྱང་བྱོན་པ་མཁྱེན་ཞིང་གདུང་རྟེན་དེ་ཁམས་སུ་ཐོགས་པ་མཁྱེན་ནས་ཕྱིས་མར་མིའི་གདུང་བཞུགས་པའི་གདུང་རྟེན་ཁྱད་པར་ཅན་ཕུལ་སྟེ་ད་ལྟ་མར་པ་གདུང་ཁང་ན་བཞུགས། མཁས་པ་ཕྱ་གཡོར་གཉིས་དང་ཞང་རིན་པོ་ཆེ་སོགས་དགེ་བཤེས་གདུགས་ཐོགས་བཞི་བརྒྱ་ཙམ་ལ་ཉ་མོ་སྐྱུར་དུ་ཆོས་འཁོར་ཆེན་པོ་མཛད། རྗེ་མར་པའི་སྲས་མོ་ཞིག་བྱོན་པ་ལ་གྲལ་དབུ་ཞུས། དེས་རྗེ་མར་པའི་གདུང་རྣམས་ཕྱག་དུ་ཕུལ། ཆོས་འཁོར་བ་ཀུན་གྱིས་དབོན་མོ་ལ་འབུལ་བ་བྱས་པས་ཁོང་ཕྱག་རྟེན་གྱིས་ནུབ་པ་བྱུང་སྐད། གདུང་རྣམས་ལ་དངུལ་གྱི་གདུང་ཁང་ཞིག་བཞེངས། དགུང་ལོ་དོན་བདུན་པ་ཁྱི་ལོ་ལ་ཉ་མོ་སྐྱུར་དུ་མྱ་ངན་ལས་འདས། སློབ་མ་རྩགས་དར་མ་རྒྱལ་པོ། མགར་སྟོན་བཀྲ་ཤིས་དབང་(ན༢༢ན)
ཕྱུག །འདི་གཉིས་ནས་མགར་འབུམ་དང་རྩགས་འབུམ་བྱུང༌། རྔོག་ཚ་ཆོས་སྐུ། ངོ་རྗེ་ཆེན་པོ་འདི་ནས་གཉལ་དྭགས་ཀྱི་ངོ་རྗེ་རྣམས་བྱུང༌། བྱ་ནག་ཆེན་པོ་འདི་ནས་བྱ་བ་རྣམས་བྱུང་ཞིང་ལྷ་མོ་གསེར་གྱི་སྤུ་གྲི་དང་དུད་སོལ་མ་ཉིད་ཡིན། མཚུར་དུམ་བུ་ཁ་བ། ལྷོ་ནག་ཆེན་པོ་དཀར་སྟོན་ཆོས་འོད་སོགས་མང་དུ་བྱོན་ཞིང་དགེ་བཤེས་གདུགས་ཐོགས་སུམ་བརྒྱ་དང་དྲུག་བཅུ་བྱོན་པར་གྲགས། ཡུམ་ཇོ་སྐྱབས་ལ་སྲས་ལྔ་འཁྲུངས། གསུམ་གཞོན་རིམ་གྱིས་གཤེགས། ཇོ་བསོད་ལོ་ཉེར་ལྔ་ལ་གཤེགས། ཇོ་སྲས་ཐོགས་མེད་གྲགས་པ་འཕྲིན་ལས་ཆེ་ཡང་སོ་བདུན་ལ་ཐེགས། དེའི་སྲས་རྒྱལ་ཚལ་མོ་དང་རྒྱལ་ཚ་རྡོར་སེང་ཡིན། གཅེན་པོ་གཙང་ཚ་ཚུལ་ཤེ་ལོ་ཞེ་བཞི་བཞུགས། སྲས་རྔོག་ཀུན་དགའ་འཁྲུངས་མ་ཐག་དུ་ཡབ་གཤེགས་ནས་དབོན་པོ་གསུམ་ག་མེས་པོས་བསྐྱངས་ཤིང་ཀུན་དགའ་ལོ་བཅུ་ལོན་ཚེ་མེས་པོ་གཤེགས་ནས་སློབ་དཔོན་ར་མོ་ལ་ཆོས་ཚར་བར་མཛད། འདིས་རྗེ་སྒམ་པོ་པའི་དངོས་སློབ་མ་ལ་ནག་ལ་ཆོས་མཐའ་དག་ཞུས། ཚངས་སྤྱོད་ཀྱི་སྡོམ་པ་ཞུས་པ་གདུང་རྒྱུད་དཔེལ་དགོས་གསུངས་ནས་མ་གནང༌། ཕྱིས་ར་མོའི་སྲས་ལྕམ་མོ་སྐུ་མཆེད་གསུམ་གྱི་དུས་བགོ་བཤའ་མཛད་པས་ས་གདན་ཕྱག་རྫས་རྣམས་སྐུ་མཆེད་གསུམ་དང་མར་པའི་གདུང་ཁང་གིས་གཙོས་པའི་བྱིན་རླབས་ལྷ་རྟེན་རྣམས་ཀུན་དགའི་སྐུ་སྐལ་དུ་བྱུང་སྟེ་ཁུར་ནས་བྱོན་པ་ན་ཡོན་བདག་སྤྲེའུ་བྱ་བས་ངའི་ཞིང་སྟེང་འདིར་གཟིམས་ཁང་གྱིས་ཟེར་བ་ལྟར་མཛད་སྟེ་སྤྲེ་ཞིང་དུ་གྲགས་ལོ་དོན་བརྒྱད་བཞུགས། མར་པའི་གདུང་ཁང་གི་རྟེན་འབྲེལ་གྱིས་གདན་ས་དངོས་སུ་སོང་ཞིང་སྲས་རྒྱུད་གདན་ས་རྔོག་གཟི་བརྗིད་གྲགས་པ། འདིས་རབ་བྱུང་མཛད། འདི་ཡན་སྔགས་ཆས་ཅན་རིམ་དགུང་ལོ་བརྒྱད་བཅུ་བཞུགས། དེ་ནས་རིམ་བཞིན་རྔོག་རིན་ཆེན་བཟང་པོ། རྔོག་ཆོས་རྒྱལ་བ། རྔོག་དོན་གྲུབ་དཔལ་བཟང༌། རྔོག་བྱང་ཆུབ་དཔལ་བ། རྔོག་བཀྲ་ཤིས་དཔལ་གྲུབ། རྔོག་བྱང་ཆུབ་དཔལ་གྲུབ། རྔོག་བྱང་ཆུབ་གྲགས་པའི་བར་དུ་སྐྱེས་བུ་དམ་པ་བྱོན་ལ་དེ་དག་གི་མཆེད་ཟླ་དང་རྔོག་ཚང་འོག་མའི་ཞལ་ངོ་ཡང་ཕྲིན་ལས་ཅན་དུ་མ་བྱོན་ཞིང་(ན༢༢བ)
སྤྱིར་སྔར་རྔོག་ཆོས་ཤིན་དུ་དར་བས་ཞལ་ངོ་དང་སློབ་རྒྱུད་ཀྱིས་བྱས་པའི་རྒྱུད་བཤད་དང་སྐྱེད་རྫོགས་ཁོ་ནའང་དེང་དུས་བགྲང་གིས་མི་ལང་བར་སྣང་ངོ༌། །རྗེ་མར་པའི་བཀའ་རྒྱུད་ལས་རྔོག་པའི་བཀའ་རྒྱུད་ཀྱི་སྐབས་སོ། །ཤར་གྱི་ཀ་ཆེན་མཚུར་སྟོན་དབང་གི་རྡོ་རྗེ་ནི་ཡུལ་དོལ་མདའ། གདུང་མཚུར། ཡབ་སྔགས་པ་མཐུ་བོ་ཆེ་ཞིག་གི་སྲས་སུ་འཁྲུངས། སློབ་གཉེར་ལ་དཀའ་བ་དུ་མ་མཛད། ཕྱིས་འབུམ་བཞེང་བའི་ཡིག་མཁན་ལས་རྗེ་མར་པའི་སྙན་པ་ཐོས་སྟེ་དྲོ་བོ་ལུང་དུ་བྱོན། སྐུ་དགྲ་མར་པ་མོན་ནག་བཏུལ། ཕྱིས་དོལ་དུ་ཡང་སྤྱན་དྲངས་ཤིང་སྤྱིར་གསང་བ་འདུས་པའི་རྒྱུད་མན་ངག་རྫོགས་པར་གནང༌། དེ་ལ་སློབ་མའི་གཙོ་བོ་ཁམས་པ་རོ་མཉམ་རྡོ་རྗེ་ནི་རྒྱ་གར་དུ་གསང་འདུས་འཚོལ་དུ་བྱོན་པས་ཉན་ས་མ་རྙེད་པར་བོད་དུ་བྱོན། མཚུར་ལ་རྫོགས་པར་ཞུས། རྒྱུད་ཀྱི་ཊཱི་ཀའང་མཛད་པར་གཉིས་མེད་རྣམ་རྒྱལ་ཆེན་མོ་དྲངས་འདུག་སྐད། ཁོན་འདབ་ཀཱིརྟི་ནི་མང་ར་བ་སེང་གེ་རྒྱལ་མཚན་སོགས་ཀྱི་སློབ་མ་གསང་འདུས་ལ་ཤིན་དུ་མཁས་པ་ཡིན་ཡང་མན་ངག་མ་བྱུང་བས་མཚུར་ལ་བསྟེན་ཞིང་སྒྱུ་མ་ལྟ་བུའི་ཏིང་ངེ་འཛིན་མཐར་ཕྱིན་ནོ། །དེ་ནས་རིམ་པས་བྱ་ཁང་བ་བསོད་རིན། ཐུར་ལ་བ་ཚུལ་ཁྲིམས་སྐྱབས། ཐང་སེ་པ་འཕགས་པ་སྐྱབས། གསེར་སྡིངས་པ་གཞོན་ནུ་འོད། ཀུན་མཁྱེན་ཆོས་སྐུ་འོད་ཟེར། ཀུན་མཁྱེན་འཕགས་འོད། བུ་རིན་པོ་ཆེ། དེས་དར་རྒྱས་སུ་མཛད་ལ། ཕྱིས་རྗེ་ཙོང་ཁ་པ་ཆེན་པོས་དར་ཞིང་རྒྱས་པར་མཛད་ཏོ། །གསང་བ་འདུས་པའི་བཤད་སྒྲུབ་མཚུར་སྟོན་བཀའ་རྒྱུད་ཀྱི་སྐབས་སོ། །ནུབ་ཀྱི་ཀ་ཆེན་གཙང་རོང་གི་མེས་ཆེན་པོ་ནི་ཉང་སྟོད་སྟག་ཚལ་བ་ཡིན། མཚན་བསོད་ནམས་རྒྱལ་མཚན། གནས་གཞི་ར་དོའི་བདག་པོ་ཡིན། སྤོང་དག་ལན་གསུམ་གྱིས་རྗེ་མར་པ་ཤིན་དུ་མཉེས། མ་ཧཱ་མཱ་ཡ་དང་གདམས་ངག་མཐའ་ཡས་པར་གནང༌། སློབ་མ་ཞང་བསོད་ནམས་མཁའ་སོགས་གྲུབ་ཐོབ་ཏུ་མ་བྱོན་ནོ། །མེས་སྟོན་བཀའ་རྒྱུད་ཀྱི་སྐབས་སོ། །བྱང་གི་ཀ་ཆེན་རྗེ་མི་ལ་ནི། ཡུལ་ལ་སྟོད་མང་ཡུལ་གུང་ཐང་གི་བྱེ་(ན༢༣ན)
བྲག་སྐྱ་རྔ། དེ་ལས་རྩ། དེ་ལས་ཀོ་རིན་དུ་འཁྲུངས། གདུང་ཁྱུང་པོ་ཁྱད་པར་མི་ལ། ཡབ་ཤེས་རབ་རྒྱལ་མཚན་དང་ཡུམ་ཉང་ཚ་དཀར་རྒྱན། ཆུང་ངུ་ལ་ཡབ་གྲོངས་པས་ཁུ་བོ་དང་ཨ་ནེས་ནོར་གཞིས་ཕྲོགས། ཡུམ་གྱི་བཀས་དབུས་སུ་བྱོན་སྟེ་མཐུ་སེར་གྱིས་དགྲ་ཐམས་ཅད་བརླག་པར་མཛད། རྫོགས་ཆེན་པ་མཛད་དུས་རོང་སྟོན་ལྷ་དགས་རྗེ་མར་པའི་སྙན་པ་བརྗོད་པ་གསན་པས་མི་བཟོད་པའི་དད་པ་སྐྱེས་སྟེ་དེ་མ་ཐག་བྱོན། རྗེ་མར་པ་ལ་ཡང་བུད་མེད་གཉིས་ཀྱིས་ཤེལ་གྱི་རྡོ་རྗེ་ཞིག་གཏད་ནས་འདི་ཁྲུས་ལ་རྒྱལ་མཚན་གྱི་རྩེར་ཞོག་བླ་མའི་བཀའ་ལུང་ཡིན་ཟེར་བ་ལྟར་བྱས་པས་འོད་ཀྱིས་འཛམ་གླིང་ཁྱབ་པའི་ལྟས་གཟིགས་པས་བསུ་བར་བྱོན་སྟེ་ང་རྒྱལ་མི་སྐྱེ་བའི་ཕྱིར་ཕྲུ་སློག་པ་ལྟར་མཛད། འདི་རྐོས་ཅིག་གསུངས་སྟེ་བཀའི་ཐོག་མ་བསྒྲུབས། ཆང་གནང་བ་འཐུངས་པས་གདམས་ངག་གི་སྣོད་དུ་དགོངས། སྐུ་མཁར་ཟླུམ་པོ། སོག་ཀ་ཟླ་ཁམ། གྲུ་གསུམ་རྣམས་བརྩིགས་ཤིང་བཤིག །མཐར་གྲུ་བཞི་དགུ་ཐོག་རྩེ་མོ་རིན་པོ་ཆེ་འབར་བ་ལྟ་བུ་རྩིགས་གསུངས་ནས་བརྩིགས་ཤིང་མདོ་ཁྱམས་དང་དབུ་རྩེ་སོགས་བརྩིགས། དབང་གྲལ་ནས་ལན་མང་དུ་བཏོན་པ་སོགས་ཡིད་ཆད་ཆེན་པོ་བདུན་གྱིས་སྒྲིབ་པ་སྦྱངས། ཡི་ཆད་ཆེན་པོ་ལན་དགུ་ཐོངས་ན་ཐོས་པས་གྲོལ་བ་ཞིག་འོང་བ་ལ། ད་སྙིང་རུས་ཅིག་དགོས་སྟེ་སླ་ནས་འོང་གསུངས་སྔོན་གྱི་མནལ་ལྟས་ལས་རྡོ་རྗེ་རྒྱལ་མཚན་དུ་མཚན་བཏགས་སྟེ་བདེ་མཆོག་གི་དཀྱིལ་འཁོར་དུ་དབང་བསྐུར་ཚེ་འདི་ནི་མཚོན་བྱེད་དཔེའི་དཀྱིལ་འཁོར་ཡིན། མཚོན་བྱ་དོན་གྱི་དཀྱིལ་འཁོར་འདི་ན་ཞེས་ན་མཁའ་བསྟན་པས་བདེ་མཆོག་གི་ལྷ་ཚོགས་དངོས་སུ་གཟིགས་སྟེ་ལྷ་དང་བླ་མས་གསང་མཚན་བཞད་པའི་རྡོ་རྗེར་བཏགས། གདམས་ངག་ཐམས་ཅད་ཚང་སྤྲུགས་སུ་གནང་ནས་སྒོམ་དུ་བཅུག །མནལ་ལམ་དུ་ཡུལ་གྱི་ཁང་པ་ཅིག །ཡུམ་གྲོངས། སྲིང་མོ་འཁྱར་པ་སོགས་གཟིགས་པས་ཡུལ་ལ་འབྱོན་པར་འདོད་ནས་ཞུར་བྱོན་པས་མཁར་དང་སྐར་ཁུང་ནས་བླ་མའི་དབུ་ལ་ཉི་མ་(ན༢༣བ)
ཤར། བླ་མ་མནལ་ཏུ་སོང༌། ཡུམ་གསོལ་འདྲེན་དུ་བྱུང་བའི་དབུ་སྔས་སུ་གཙང་ལ་ཡར་འགྲོའི་གླུ་ཕུལ་བས་ཁྱོད་འགྲོ་ན་བཏང་བས་ཆོག་སྟེ་ང་གཉིད་དུ་སོང་བ་དང་ཐུག་པས་ཕྱིས་མི་ཕྲད། མཁར་དང་ངའི་མགོ་ལ་ཉི་མ་ཤར་བས་ཁྱོད་ཀྱིས་བསྟན་པ་སྤྱི་དང་བཀའ་རྒྱུད་ཀྱི་བསྟན་པ་ཉིན་མོར་བྱེད། བདག་མེད་མས་ཟས་ཁྱེར་བ་འདིས་ཁྱོད་ཏིང་འཛིན་གྱིས་འཚོ་བའི་རྟེན་འབྲེལ་ཡིན་གསུངས་སྟེ་གདམས་ངག་ཐམས་ཅད་གནང་སྟེ་སྡུག་ཐུག་པའི་དུས་འདི་ལྟོས་དེ་བར་མ་ལྟ་གསུངས་ནས་ཤོག་དྲིལ་ལ་ཐམ་མ་ཞིག་གནང༌། ཁྱོད་ལ་བྱིན་དང་གཞན་ལ་བྱིན། །གལ་སྟེ་སྲང་ལ་བཅལ་ཡོད་ན། །སུམ་འགྱུར་བས་ཀྱང་མི་ལྷག་རི། །གསུང་སྟེ་བསྟན་པ་གཏད། ཆོས་ལའི་བར་སྐྱེལ་ཐུང་མཛད་སྟེ་སྤྱི་བོར་ཕྱག་བཞག་ནས་སྨོན་ལམ་དང༌། གཙང་སིལ་མ་ལ་ཡི་ལ་རྩེ་ན། །བསྟན་མ་བཅུ་གཉིས་ཀྱི་བསུ་མ་ཡོད། །སང་ཉིན་འགྲོ་བའི་ལམ་བར་ལ། །དཔའ་བོ་མཁའ་འགྲོའི་སྐྱེལ་མ་ཡོད། །ཕ་ཡུལ་ཞེན་པའི་མཁར་ཞིང་ན། །མི་རྟག་སྒྱུ་མའི་སློབ་དཔོན་ཡོད། །ཨ་ནེ་སྲིང་མོའི་ཉེ་འཁོར་ལ། །སྒྱུ་མ་བཤིག་པའི་མན་ངག་ཡོད། །ཡུལ་མི་རྩིས་ཆུང་རང་ཡུལ་དེར། །འཕྲལ་གཡེང་བ་མེད་པའི་དགེ་སྦྱོར་ཡོད། །ཟས་དཀོར་ཟས་མེད་པའི་རང་ཟས་ལ། །བདེ་ལ་ལྷ་ཡི་ཕམ་ཕབས་ཡོད། །མི་མེད་ལུང་པའི་བྲག་ཕུག་ན། །འཁོར་འདས་བརྗེ་བའི་ཚོང་འདུས་ཡོད། །མཚམས་དམ་པོ་མི་མེད་ཁྱི་མེད་ན། །རྟགས་མྱུར་དུ་མཐོང་བའི་སྒྲོན་མེ་ཡོད། །ནད་མེད་ཟྭ་ཡི་ཚོགས་འཁོར་ལ། །མ་མཁའ་འགྲོ་མཉེས་པའི་བདུད་རྩི་ཡོད། །འཕྲུལ་འཁོར་གནད་ཀྱི་ཁ་བསྒྱུར་ལ། །འབྲས་རིན་ཆེན་སྐྱེ་བའི་སོ་ནམ་ཡོད། །གྲིབ་དྭངས་པ་ལྷ་ཡི་གཞལ་ཡས་ན། །རང་དོན་ཆེན་འགྲུབ་པའི་ལྟད་མོ་ཡོད། །མི་ལ་རས་པའི་སྙིང་རུས་ལ། །སངས་རྒྱས་བསྟན་པའི་སྲོག་ཤིང་ཡོད། །མར་པ་ལོ་ཙཱའི་བུ་རྒྱུད་ལ། །གཏམ་སྙན་མང་པོའི་ཡོང་སྒོ་ཡོད། །ཅེས་ལུང་བསྟན་སྟེ་གངས་ཏི་སེ་ལ་ཕྱི་ཆུ་བར། བྲག་དམར་སྤོ་མཐོན། ཡོལ་མོ་གངས་ར་རྣམས་ལ་སྒོམས། ཤར་ཕྱོགས་ན་ཙཱ་རི་ཏྲ་ཡོད་སྟེ་ད་ལྟ་དུས་ལ་མ་བབས་མ་འོངས་(ན༢༤ན)
པ་ཁྱོད་ཀྱིས་གྲུབ་རྒྱུད་ཀྱིས་འཛིན་པར་འགྱུར་ཞེས་གནས་དང་རྒྱུད་འཛིན་ལུང་དུ་བསྟན་སྟེ་བྱོན། རྔོག་ལ་ཕྱི་ཕྱག་མཛད། ཞག་གསུམ་ལ་ཡུལ་དུ་ཕེབས། མནལ་ལམ་བཞིན་གཟིགས་པས་སྐྱོ་ཤས་ཆེར་སྐྱེས་སྟེ་དང་པོར་རྐང་ཚུགས་ཕུག་དུ་ཞིང་རིན་ལ་བསྟེན་ནས་བསྒོམས། དེ་ནས་བྲག་དཀར་རྟ་སོར་ཟྭའི་ཚོད་མ་ལ་བསྟེན་སྟེ་བཅུ་གཉིས་ཆ་བཞིའི་དམ་བཅའ་མཛད་ནས་བསྒོམས་ཚེ་སྲིང་མོ་དང་མཛེས་སེའི་ཟས་སྐོམ་གྱིས་རྐྱེན་བྱས་སྟེ་ཁམས་འདུས་པའི་རྣམ་པ་ཅི་ཡང་བྱུང་ཚེ་ཤོག་དྲིལ་གཟིགས་པས་རླུང་སེམས་གཉིས་མེད་ཀྱི་གདམས་ངག་བྱུང་སྟེ་བོགས་སུ་ཐོན། གྲུབ་པ་ཐོབ་ནས་སྨིན་ཁྱུགས་གྲིབ་མའི་རི་དང་ཕན་ཚུན་དུ་འཕུར་ཞིང་བསྒོམས། ལིང་པའི་བྲག་དུ་དབུ་མའི་མར་སྣར་མེ་རླུང་ཚུད་པའི་རྟེན་འབྲེལ་བྲག་སྲིན་མོའི་ཆོ་འཕྲུལ་སྣང་བ་དང༌། སྨན་ལུང་ཆུ་བར་དུ་མགྲིན་པའི་རྩ་མདུད་ཞིག་པའི་རྟེན་འབྲེལ་ཚེ་རིང་མའི་སྐོར་སྣང༌། ཆུ་ལ་མི་བྱིང་པས་ཞུ་ཡས་དར་མ་དབང་ཕྱུག་དང་ཁྱི་དང་ཤ་བ་མ་སྨད་ལྟར་དུལ་བས་ཁྱི་ར་བ་རྡོ་རྗེ་མགོན་པོ་བཏུལ། མཚོ་མ་ཕམ་ཕྱག་སོར་གྱི་རྩེ་ལ་ལེན་པ་དང༌། ཏི་སེའི་རྩེར་གཤེགས་པ་ལ་སོགས་པའི་རྫུ་འཕྲུལ་གྱིས་ན་རོ་བོན་ཆུང་བཏུལ། སྙན་པས་ས་ཐམས་ཅད་ཁྱབ་ཅིང་རྗེ་སྒམ་པོ་བ་ལ་བསྟན་པ་གཏད་སྟེ་དགུང་ལོ་གྱ་བཞི་ལ་མངོན་དགར་གཤེགས། སྣང་བ་དག་པའི་ངོར་སྐུ་གདུང་མ་བྱུང༌། འབྲིང་གིས་ཤེལ་གྱི་མཆོད་རྟེན་དུ་བྱས་པ་དང་སེང་གེ་ལ་བཅིབས་པ་མཁའ་འགྲོས་སྤྱན་དྲངས་པར་མཐོང༌། ཐ་མས་སྤུར་གཉིས་བྱུང་བ་བྲིན་དང་ཆུ་བར་གཉིས་ཀར་བཞུ་ཞིང་གདུང་རུས་མ་བཞག་པར་མཐོང་ངོ༌། །སློབ་མའི་མཆོག་ནི་ལྐོག་གྱུར་དབང་པོ་ཡང་རབ་ཀྱི་དོན་བྱེད་པ་སྔགས་སྐྱེས་ལྷན་ཅིག་སྐྱེད་པའི་སྒྲོན་མེ། མི་མ་ཡིན་འདུལ་བ་བཀྲ་ཤིས་ཚེ་རིང་མ། མི་འདུལ་བ་རྗེ་སྒམ་པོ་པ། རས་ཆུང་པ། འབྲི་སྒོམ་རས་པ། སེ་བན་རས་པ། རས་པ་ཞི་བ་འོད། ཁྱི་ར་རས་པ། ངམ་རྫོང་རས་པ། བདེ་བ་སྐྱོང༌། ར་རྫི་རས་པ་སྟེ་རས་པ་མཆེད་བརྒྱད། སྐུ་སྒྲེས་ཀར་འཁྲུངས་པའི་སྟོན་པ་དྲུག །རས་མ་བཅུ་གཉིས། ཁྱིམ་པའི་ཚུལ་ཅན་གྱི་གྲུབ་ཐོབ་མ་དྲུག་(ན༢༤བ)
སོགས་བགྲང་གིས་མི་ལང་བ་བྱོན། ཞི་བ་འོད། ཁྱི་ར་རས་པ། སངས་རྒྱས་སྐྱབས། རོང་ཆུང་རས་པ། ལྕམ་པྲེ་ཏ། མཛེས་སེ། དཔལ་དར་འབུམ། སལ་ལེ་འོད། རས་ཆུང་མ། ཉ་མ་ལེགས་སེ་སྟེ་ལུས་འདིས་མཁའ་སྤྱོད་དུ་བྱོན་པ་མང་དུ་བྱུང་ངོ༌། །ཁྱད་པར་ཆོས་རྒྱུད་ཟིན་པ་མུས་ཏ་མོ་གླིང་ཁའི་འབྲི་སྒོམ་རས་པ་ནི་རྔོག་དཔྱལ་སོགས་བླ་མ་མང་དུ་བསྟེན་པ་ཅིག་གིས་རྗེ་མི་ལ་རྩ་བའི་བླ་མར་བསྟེན། ལོ་སུམ་བཅུར་སྒྲུབ་པ་མཛད་ཅིང༌། མལ་ཡེར་བ་པ་ལ་སོགས་པའི་སློབ་མ་བྱུང་ངོ༌། །རས་པ་ཞི་བ་འོད་ནི་བྲག་སྒྱེ་ཆུར་སྒྲུབ་པ་རྩེ་གཅིག་དུ་མཛད་མཐར་བྲག་ཕུག་གི་སྤྱི་བོ་བཏོལ་ནས་མཁའ་སྤྱོད་དུ་བྱོན་སྟེ་སློབ་མ་དམ་པ་རས་ཆེན་ནས་བརྒྱུད་པ་ཞི་བ་འོད་ཀྱི་སྙན་རྒྱུད་འཛིན་པ་བྱུང་ངོ༌། །མདོ་བཀྲ་ལྕིམ་ལུང་གི་ངམ་རྫོང་སྟོན་པ་བྱང་ཆུབ་རྒྱལ་པོ་ནི་བྱམས་ཆོས་དང་གསང་སྔགས་ལ་མཁས་པའི་སྟོན་པ་ཅིག་གིས་རྗེ་མི་ལ་རྩ་བའི་བླ་མར་བསྟེན་ནས་སྙན་རྒྱུད་བསྐྱངས་པ་ལ་ངམ་རྫོང་སྙན་རྒྱུད་ཅེས་གུང་ཐང་རས་པ་ནས་རྒྱ་ཕོ་བ་ལུང་པ་ལ་བརྒྱུད་པ་དང་གཉལ་པ་གསུང་བཅད་པ་ནས་དམར་བུ་བྲག་པ་ལ་བརྒྱུད་པ་སོགས་བྱུང་ངོ༌། །སློབ་མའི་གཙོ་བོ་གཅིག་ནི་རས་ཆུང་པ་སྟེ་མང་ཡུལ་གུང་ཐང་གི་པདྨ་དཀར་པོའི་གྲོང་ཕྲེང་རར་གཉན་དར་མ་གྲགས་ཀྱིས་སྲས་སུ་འཁྲུངས་རྡོ་རྗེ་གྲགས་སུ་བཏགས། ལོ་བདུན་ན་ཡབ་གཤེགས། ཡུམ་དང་ཁུ་བོ་འདུས་པ་ཤིན་དུ་སྡང་བར་བྱུང༌། ཀློག་ཚེགས་མེད་དུ་མཁྱེན་ནས་ཀློག་གི་ཟས་ཡོན་གྱིས་མ་ཁུ་བསྐྱངས། ལོ་བཅུ་གཉིས་ལ་རྗེ་མི་ལ་དང་མཇལ་སྟེ་རང་བྱུང་གི་སྒོམ་སྐྱེས། ཡང་མ་ཁུས་ས་གཉན་དུ་མ་རྐོར་བཅུག་པས་བསྙུང་འཛེ་བྱུང༌། ཛོ་གི་རི་བོ་རྩེ་ལྔ་ལ་འགྲོ་བ་ཞིག་གིས་ཀྱལ་མ་ལ་སྦྱར་སྟེ་རྒྱ་གར་དུ་བཏོལ། བླ་མ་ཝ་ལ་ཙཎྜས་གཏུམ་པོ་ཁྱུང་ཤམ་ཅན་གནང་སྟེ་ཟླ་བ་གསུམ་བསྒྲུབས་པས་དང་པོར་བསྙུང་དུ་སོང་ཡང་མཐར་རྟགས་ཁྱད་པར་ཅན་བྱུང༌། ནད་གདོན་ཡུལ་བུད། སླར་གཏང་རག་དུ་གསེར་སྲང་གསུམ་བཙལ་ནས་ཕུལ། རྗེ་བཙུན་མི་ལ་བསྟེན་པས་རས་ཆུང་པར་གྲགས། སླར་ལུས་མེད་(ན༢༥ན)
མཁའ་འགྲོའི་ཆོས་སྐོར་བཞི་ལེན་པ་ལ་བླ་མས་རྒྱ་གར་དུ་མངགས་སྟེ་བྱོན། ཏི་པུ་བ། གྲུབ་པའི་རྒྱལ་མོ། བལ་པོར་ཡེ་རང་པ་རྣམས་ལ་གདམས་ངག་མཐའ་ཡས་གསན། ཏི་པུ་པས་རྗེ་མི་ལ་ལ་ཨ་ག་རུ་ནག་པོའི་ཕྱག་མཁར་སོགས་ཀྱི་སྐྱེས་བསྐུར། ལོ་ཙཱ་བས་ཚིག་གི་ལྷད་བཅུག་པའི་སྐྱོན་རྣམས་བལ་པོར་བྷ་རི་རྣལ་འབྱོར་མ་གྲུབ་ཐོབ་མ་དེས་བསལ། རྗེ་བཙུན་མི་ལས་ཀྱང་རས་ཆུང་པ་ཤེལ་གྱི་མཆོད་རྟེན་དུ་རྟག་དུ་གཟིགས། མུ་སྟེགས་ཀྱི་སྟོན་པ་ཅིག་གིས་ཕན་གནོད་ཀྱི་མན་ངག་མང་དུ་ཕུལ་བས་དེ་ཕྱིན་རླུང་འཚུབ་ཀྱིས་བཏུམས་པར་གཟིགས། བླ་མ་ལ་ཕྱག་ལན་རེ་བ་དང༌། ལོག་རྟོག་སྐྱེ་བ་དང༌། ཐུགས་རྒྱལ་སྐྱེ་བ་ཐམས་ཅད་འདིས་ལན་པར་འཆད། དེས་ན་གནོད་བྱེད་ལྟ་ཞོག་ཕན་བྱེད་ཡིན་ཡང་མུ་སྟེགས་དང་འབྲེལ་བ་ནི་གཏན་མི་རུང་བ་ཡིན་ནོ། །བླ་མས་དཔལ་ཐང་ནས་བསུས་སྟེ་གཡག་རུའི་སྐོར་དང་རྐྱང་མགུར་སྐོར་རྣམས་བྱུང་ཞིང་མཆོག་གི་གདམས་པ་རྣམས་མཁའ་འགྲོས་སྤྱན་དྲངས་ཤིང་མུ་སྟེགས་ཀྱི་མན་ངག་རྣམས་བསྲེགས། དད་པ་རྩ་བ་ནས་ལོག་པ་རྫུ་འཕྲུལ་མང་པོས་བཏུལ་སྟེ་སླར་གསོལ་བ་བཏབ་པས་མཁའ་འགྲོའི་ཆོས་རྣམས་ཚང་བར་བྱུང་སྟེ་དད་པ་ལྷག་པར་སྐྱེས་ནས་སྔར་ལོ་བཅུ་གཉིས་ཕྱགས་ཕྱི་བྱས། ད་དུང་ལོ་བཅུ་གཉིས་མི་འབྲལ་བའི་དམ་བཅའ་ཕུལ། མན་ངག་རྣམས་བླ་མ་ལ་ཡང་ཕུལ། བླ་མས་ཀྱང༌། བཅུ་གསུམ་བར་དུ་ཆིག་རྒྱུད་རྒྱ་ཡིས་གདབ། ཅེས་པ་བདེ་མཆོག་སྙན་རྒྱུད་གནང་བས་ཐུགས་ཚིམ་སྟེ་ཉ་མ་རྣམས་ཀྱིས་རས་ཆེན་ལས་རས་ཆུང་ངོ་མཚར་ཆེ་ཞེས་བསྙེན་བཀུར་གོ་ལོག་དུ་བྱས་པས་དབུས་སུ་འབྱོན་པར་ཞུས་པ་བླ་མས་ཇི་ཙམ་བཤོལ་ཡང་མ་གསན་པར་བྱོན། འཇིག་རྟེན་པའི་ཁྱི་མོ་ཞིག་གིས་རྐང་པ་ནས་འཛིན་པར་འདུག་གོ་དེ་ལ་ཟོན་ཆེར་གྱིས་ཅིག་གསུངས། བླ་མ་བལ་པོ་དང་མཚུར་སྟོན་དང་མཇལ་བས་ཕྱིས་རྒྱ་བོད་ན་རྗེ་མི་ལ་ལས་ལྷག་པ་མི་འདུག་པར་ཡིད་འཆེས། ལྷ་ལྕམ་ལྡེམ་བུའི་སྐོར་གྱིས་ཐུགས་བྱུང་སྟེ་བླ་(ན༢༥བ)
མའི་དྲུང་དུ་བྱོན་སྟེ་རིང་དུ་བཞུགས། བླ་མས་གསེར་གཡུ་ཀ་པཱ་ལ་གང་གནང་ནས་དགོས་པའི་དུས་ཡོད་པས་ཁྱེར་གསུངས། རས་ཆུང་པ་ཁྱོད་དབུས་སུ་འགྲོ་རན་གསུངས་ཞིང༌། བུ་བཞིའི་ནང་གི་དོན་པོ་སོང༌། །སྙན་རྒྱུད་འཛིན་པའི་སྒྲོན་མེ་ཁྱོད། །མ་རིག་མུན་པ་སེལ་ཞིང་སོང༌། །དབུ་རུའི་བྱང་ཕྱོགས་འགྲིམ་ཞིང་སོང༌། །དགེ་བཤེས་འགའ་ཞིག་གདུལ་བྱར་འགྱུར། །ཤམ་པོའི་གངས་ལ་སྒྲུབ་པ་གྱིས། །ལྷོ་ཕྱོགས་ཟུར་ཁ་འགྲིམ་ཞིང་སོང༌། །རྡོ་བོད་མཚམས་སུ་དགོན་པ་ཐོབ། །གསུངས་པས་བྱོན། འདིའི་མང་རེས་འཁྲུངས་ཡུལ་དུ་དགེ་བཤེས་ཁྱུང་པོ་རྩེ་མང་དང༌། དབོན་པོ་གཉན་ཆོས་སྐྱབས། ལ་སྟོད་ཅུང་བར་ལ་སྟོད་ཟངས་རི་བ། མཆོག་དཀར་གི་བྲག་ལ་བཞུགས་ཚེ་མངའ་རིས་པ་གསལ་མཆོག །ཙཱ་རི་སྒོམ་ཆུང༌། དབོན་པོ་གཉན་ནག་ལྷུན་པོ་རྣམས་སྨིན། དེར་ལྷ་འདྲེའི་ཆོ་འཕྲུལ་སྣ་ཚོགས་པ་ལམ་དུ་ལྷོངས། སྣུབས་རོང་དུ་ཅུང་ཟད་བཞུགས་པས་ཇོ་མོ་སྒྲེ་མོ་སྨིན། དབུར་སྟོད་དུ་དགེ་བའི་བཤེས་གཉེན་སྣེ་ཟུར་བས་གདམས་ངག་ཞུས། བྱ་ཡུལ་དུ་སྒོ་བཙིར་བྱུང་བ་ལ་དབྱངས་གསུངས་པས་བྱ་ཡུལ་པ་དད་སྟེ་གདམས་པ་ཞུས། འདིར་སྤྱན་སྔ་ཚུལ་ཁྲིམས་འབར་གྱིས་གདམས་པ་ཞུས་ཞེས་བྲིས་པ་ནི་མི་དག་སྟེ་བྱ་ཡུལ་པས་སྤྱན་སྔ་བཞུགས་ཀྱི་བར་ཉེ་གནས་མཛད་ནས་ཕྱིས་བྱ་ཡུལ་བཏབ་པ་ཡིན་པས་དགེ་བའི་བཤེས་གཉེན་གཞན་ཞིག་དང་ནོར་བ་ཡིན་ནོ། །བསམ་ཡས་སུ་བྱོན་ནས་རྫུ་འཕྲུལ་མང་པོ་བསྟན། གྲ་ཕྱི་ནང་སྦྲགས་སོགས་སུ་བཞུགས་སྟེ་འབྲོ་སྒོམ་དོན་གྲུབ། བུར་སྒོམ་ནག་པོ། འབྲོ་སྒོམ་ལྷ་འོད། བསོད་ནམས་འོད་ཟེར། གཉལ་རྡོ་རྗེ་འོད་ཟེར། རྟ་ཤོད་རས་པ་སྔ་ཕྱི་རྣམས་སྨིན། འཕྱོས་སྐྱི་ཚང་དུ་བཞུགས། ཉང་དགོན་པ་སྐྱབས་ནེ་ཚན། ཤེས་རབ་དབང་ཕྱོགས་སོགས་སྨིན། ར་མོ་སྲིན་མོ་བྲག་དུ་བཞུགས། ཞང་བྲག་རྩེ་བ། ཞང་གྲོམ་པ་སྐྱེས། གཉགས་གཅེར་བུ་བ་སོགས་སྨིན། ཤམྦུ་ཡུ་དཀར་དུ་བཞུགས་སྟེ་བྱར་པོའི་རྣལ་འབྱོར་མ་གསུམ་གྲོལ་(ན༢༦ན)
ནས་མཁའ་སྤྱོད་གྲུབ། མཁར་ཆུར་བྱོན་ནས་རོ་སྙོམས་དང་སངས་རྒྱས་ཐོས་ཆོག་གི་གཏེར་སྦས། སླར་ཤམ་པོའི་ནུབ་གསང་ཕུག་སོགས་དུ་མར་བཞུགས། ཡར་ལུང་དུ་ལྷ་རྗེ་ལྷ་འབར། སྒོམ་ཆེན་སྨོན་ལམ་འབར། དགེ་བཤེས་ཁྱུང་པོ་སོགས་སྨིན། གཡེར་ཁྱུང་པོ་ལྡན་དམར་སྨིན། མ་གཅིག་གྲུབ་པའི་རྒྱལ་མོའི་སྐུའི་བཀོད་པ་ལོ་རོ་གཡོ་བ་གཡོ་བ་བཙུན་ཆུང་མས་སྤྱན་དྲངས་ལམ་དུ་ཤོ་སྟོན་རྡོ་རྗེ་རྒྱལ་མཚན་དང་ཅུང་པ་རྒྱན་ནེ་སོགས་ཀྱིས་མཇལ། ལོ་རོ་རཱ་བྱེས་མགོལ་བཏབ། མཁའ་འགྲོ་བཙུན་ཆུང་མ་ཁྲོམ་གྱི་དབུས་ནས་མཁའ་སྤྱོད་དུ་བྱོན། བྱར་དུ་བྱོན་སྟེ་བྱར་སྨད་དུ་ཐུགས་དམ་ཁྱད་པར་ཅན་བྱུང༌། རྭ་ཤེས་སྣང་སྐུ་མཆེད་སྨིན། བྱེས་མགོལ་དུ་མཁའ་འགྲོ་བཙུན་ཆུང་མའི་ཇོ་ཇོ་གཡོ་བ་འབར་རེ་དེའི་བུ་གྲགས་པ་དཔལ་ཆོས་སྒོར་ཞུགས་པས་སྒོམ་པ་ཆོས་གྲགས་ཅེས་ཟེར་ཞིང་གྲུབ་ཐོབ་ཆེན་པོར་གྱུར་སྟེ་སངས་རྒྱས་སྒོམ་པར་གྲགས། དེའི་རིགས་ཀྱི་སྲས་པོ་སྟོན་པ་ཡང་དག་དཔལ་ཡིན་ལ་དོན་གཉིས་མཐར་ཕྱིན་ན་མཁའ་ལ་སྐྱིལ་ཀྲུང་འཆའ་ཞིང་འཕུར་བ་དང་གྲོང་འཇུག་ནུས། སངས་རྒྱས་སྟོན་ཡང་དུ་གྲགས། ལྷ་ལྕམ་ལྡེམ་བུས་བཤགས་པ་ཕུལ། བླ་མས་གནང་བའི་གསེར་གཡུ་ལས་སྐུ་གསུང་ཐུགས་རྟེན་བྱེད་དུ་བཅུག །ལྷ་ལྕམ་སོགས་ཐམས་ཅད་ཀྱི་ནད་སོས། རྣལ་འབྱོར་དབང་ཕྱུག་དུ་གྱུར། བྱ་ཡུལ་བའི་སློབ་མ་རྩའི་རྒྱལ་བ་ལོ། ལ་སྟོད་ཅུང་བ་ནས་སུམ་པ་ལས་རབ་ཏུ་བྱུང་མདོ་སྔགས་ཀྱི་མཁས་པར་གྱུར་པ་སེང་གེ་དཔལ་གྱིས་སྲིན་མཛུབ་མར་མེར་ཕུལ། ཉེ་གནས་མཛད་པས་ཐུགས་ཀྱི་སྲས་དམ་པ་མཐེབ་རྡུམ་དུ་གྲགས། ཉི་མ་རྗེས་ལ་འོང་གི་ཡོད་བྱ་བའི་མནལ་ལྟས་བཞིན་སྟོད་ལུང་པ་ཡེ་ཤེས་བླ་མ་མདོ་སྔགས་ལ་མཁས་པ་བྱུང་བ་ལ་སྙན་རྒྱུད་ཆིག་རྒྱུད་རྣམས་གནང༌། ལན་གསུམ་མཇལ་བའི་དང་པོ་ཞག་དགུ་བཅུ་གཉིས་པ་ལ་ལྔ་བཅུ། གསུམ་པ་ལ་ཞག་སུམ་བཅུ་ཡིན་ཡང་རྟེན་འབྲེལ་གྱིས་ཕྱེད་ཕྱེད་གསོངས་(ན༢༦བ)
གསུངས་ནས་དང་པོ་ལ་ཞག་ཞེ་ལྔ་བསྡད་སོགས་ཀྱིས་གསུངས། ཕྱིས་ཁྱུང་ཚང་བྲག་ལ་སྒྲུབ་པ་མཛད་པས་རྒྱལ་བ་ཁྱུང་ཚང་བར་གྲགས། འདི་ལ་གླིང་གི་རྣམ་ཐར་ན་ཁྱུང་ཚང་པས་རས་ཆུང་པ་མ་མཇལ་བྱ་བ་དང༌། ལོ་རོའི་བླ་མ་རྣམས་ཀྱི་གསུང་ལས་རྗེ་བཙུན་ལ་ཁྱུང་ཚང་བ་བྱ་བའི་སློབ་མ་མེད་གསུང་བྱ་བ་ཡོད་ཀྱང་ཁྱུང་ཚང་བ་གཞན་ཞིག་དང་ནོར་བའི་མ་དག་པ་འཕེལ་བ་ཞིག་གོ །མོག་པ་ཚེ་སྐོང་དང་སྨུ་སྟེང་ཁ་སོགས་སུ་སློབ་དཔོན་པདྨས་རིགས་ལྔའི་ཞིང་བསྟན་ཞིང་རིགས་ལྔ་ཐམས་ཅད་རང་གི་འཁོར་དུ་གཟིགས། བུད་མེད་ཤིན་དུ་མི་སྡུག་པ་ཅིག་སང་སྤྲུལ་པ་ཅིག་སྤྲུལ་པ་མཇལ་བར་འོང་ངོ་ཟེར་བས་ཁམས་པ་དབུ་སེ་བྱོན། ལན་གསུམ་དུ་བསྟེན། བུ་སློབ་ཅིག་ལ་གདམས་ངག་ཐོབ་ཆེ་བར་གྲགས། གངས་བར་གསེར་ཁའི་རིན་ཆེན་གླིང་པ་གདམས་པས་རྗེས་སུ་གཟུང༌། ཆུ་བར་ནས་ཤེལ་གྱི་མཆོད་རྟེན་མཁའ་འགྲོས་གདན་འདྲེན་པ་གཟིགས་སྟེ་སྐད་ཅིག་གིས་བྱོན་པས་ལམ་དུ་རྗེ་བཙུན་དངོས་དང་མཇལ། སྒྲུབ་ཁང་དུ་བྱོན་པས་གདུང་བཞུ་བ་དང་ཐུག་སྟེ་གཞོན་པ་འགས་མ་བཏང་བས་མགུར་ལྷང་གསུངས་མ་ཐག་སྤུར་ལ་མེ་མཆེད། མེ་ལྕེའི་ནང་ནས་རྗེ་བཙུན་གྱི་སྐུས་ལན་གྱི་གླུ་མཛད། སྣང་བ་ཐམས་ཅད་བརྡར་ཤར་ཞིང་དཔའ་བོ་མཁའ་འགྲོས་བརྡ་འདྲི་བའི་ལན་བཀྲོལ། ཤིང་གི་ལྷ་ལ་ཆོས་གསུངས། སངས་རྒྱས་སྟོན་ཡང་ལ་བྱིན་རླབས་རྟེན་སོགས་རྒྱས་པར་གནང་སྟེ་བྱེས་མགོལ་ལ་སོགས་དགོན་གནས་རྣམས་སྐྱོངས་ཅིག་གསུངས། རྒྱལ་བ་ལོས་ཞབས་ལ་ཐུག་པའི་ཚོགས་པ་རྣམས་སྐྱོངས་ཅིག་གསུངས། སུམ་པ་ལ་ཕུག་མོ་ཆེ་སོགས་སྒྲུབ་གནས་རྣམས་སྐྱོངས་ཅིག་གསུངས་སྟེ་སྐུ་ལུས་འདིས་མཁའ་སྤྱོད་དུ་བྱོན་པར་སྣང་ངོ༌། །དགུང་ལོ་དོན་བརྒྱད་དང་གྱ་བཞི་སོགས་ཅི་རིགས་སྣང་ཞིང་སྒྲུབ་པས་མཉེས་པ་སངས་རྒྱས་སྟོན་ཡང་སོགས་ལྷོའི་བུ་ཆེ་བ་བཞི། ཏེ་ལོའི་སྤྲུལ་པ་ཁྱུང་ཚང་བ་སོགས་བྱང་གི་བུ་ཆེ་བ་བཞི། ཐབས་ལམ་གྱི་བཀའ་བབས་ཟངས་རི་རས་པ་(ན༢༧ན)
སོགས་བཀའ་བབས་ཀྱི་བུ་བཅུ་བདུན་སོགས་བྱུང་ལ་དེ་རེ་རེས་ཀྱང་འཕྲིན་ལས་ཆེར་བྱུང་ལ། ཁྱད་པར་ཁྱུང་ཚང་པ་ནས་མ་གཅིག་ཨོང་ཇོ་དང་དེས་ཞང་ལོ་གྲུབ་པ་དཔལ་སོགས་ནས་རས་ཆུང་སྙན་རྒྱུད་དར་རོ། །མི་ལའི་བཀའ་རྒྱུད་ལས་དྭགས་པོའི་བཀའ་རྒྱུད་ལས་གཞན་བཤད་པའི་སྐབས་སོ། །མི་འདུལ་བའི་མཆོག་རྗེ་སྒམ་པོ་པ་ནི་མདོ་ལས་དགེ་སློང་འཚོ་བྱེད་དུ་ལུང་བསྟན་ཞིང་ཏིང་འཛིན་རྒྱལ་པོར་ཕྱི་དུས་བྲམ་ཟེ་དང་དགེ་སྦྱོང་རྣམས་ཆོས་སྤོང་བའི་ཚེ་ཟླ་འོད་གཞོན་ནུར་གྱུར་པས་ལུས་དང་སྲོག་བློས་བཏང་སྟེ་ཏིང་ངེ་འཛིན་འདི་འཛིན་པར་དམ་བཅས་ཤིང་ཆོས་སྨྲ་བ་བརྒྱད་བརྒྱ་ལངས་སྟེ་ཏིང་ངེ་འཛིན་འདི་འཛིན་པར་དམ་བཅས་པའི་ཚེ་ལྷ་ཀླུ་བྱེ་བ་བརྒྱད་བཅུ་དང་ཁྲག་ཁྲིག་དྲུག་བཅུས་དེ་དག་གི་གྲོགས་སུ་ཁས་བླངས་པའི་ཟླ་འོད་གཞོན་ནུ་རྗེ་སྒམ་པོ་པ་དང༌། བྱང་ཆུབ་སེམས་དཔའ་བརྒྱད་བརྒྱ་པོ་བཀའ་རྒྱུད་ཀྱི་བླ་མ་གཞན་རྣམས་དང་ལྷ་ཀླུ་རྣམས་བཀའ་སྲུང་དང་སྦྱིན་བདག་སོགས་ཡིན་ནོ། །དེ་ལ་རྗེ་སྒམ་པོ་པ་ནི་འཁྲུངས་ཡུལ་སྐྱལ་བོད་སྙི། གདུང་རུས་ཀྱང་སྙི་བ་ལ་རྒྱ་སྙི་གཡུ་སྙི་བོད་སྙི་གསུམ་ལས་བོད་སྙི་བ་ལ་རུས་ཆེན་ཆེར་ཡོད་པའི་ནང་ནས་སྨན་དང་སྔགས་མཁྱེན་པའི་རྒྱལ་པོ་དགའ། ཡུམ་ཤོ་མོ་བཟའ་ཆེ་ལྕམ། ཆེ་བ་རྒྱ་པ་གསེར་རེ། ཆུང་བ་སྙི་ཆུང་བ། འབྲིང་པོ་རྗེ་འདི་ས་མོ་ལུག་ལ་འཁྲུངས། མཚན་དར་མ་སྐྱབས། སྨན་དང་སྔགས་ལ་མཁས་པར་གྱུར། དབོན་དར་མ་འོད་ཀྱི་ལྕམ་མོ་ཞིག་ཇོ་མོར་ཡོད་པས་སྲས་ཕོ་མོ་གཉིས་བྱོན་པ་ཡང་འདས། ཇོ་མོ་ཡང་ནད་དྲག་པོས་ཐེབས་པས་ཐུགས་སྐྱོ་སྟེ་སྙིང་ནས་ཆོས་བྱེད་པར་འདོད་ཚེ་ཇོ་མོས་ཀྱང་ཆོས་རང་གྱིས་ཅིག་ཟེར་ནས་འདས། ཐམས་ཅད་དགེ་ཕྱོགས་སུ་བཏང༌། རྨོས་མཛད་འཕྲོ་ལ་བྱོན་ཕྱགས་ཀྱི་འཇིམ་པ་བརྡབས་སར་མེ་ཏོག་པདྨ་རེ་སྐྱེས། དྭགས་པོ་དཔྲོངས་ཀར་དགེ་བཤེས་མང་ཡུལ་པ་བློ་ལྡན་ཤེས་རབ་དང་སློབ་དཔོན་ཤ་པ་གླིང་པ་ལས་སྤྲེའུ་ལོ་ཉེར་དྲུག་ལ་ཆིག་རྫོགས་(ན༢༧བ)
མཛད། མཚན་བསོད་ནམས་རིན་ཆེན་དུ་བཏགས། མཁན་པོ་ལ་རྒྱུད་མན་ངག་མང་དུ་གསན། བླ་མ་བྱང་ཆུབ་སེམས་དཔའ་ལ་མི་ལའི་མན་ངག་ཡོད་པར་མཁྱེན་ནས་ཞུས་པས་གནས་པ་བཟང་པོ་ཞག་བཅུ་གསུམ་དུ་ཏིང་ངེ་འཛིན་གཅིག་ལ་འགྲོ་བ་བྱུང༌། ཉོན་མོངས་མགོ་ནོན། འདོད་པའི་ཡོན་ཏན་ལྔ་ཡིད་ལ་མི་འགྱུ་བ་བྱུང༌། ཟངས་དཀར་ལོ་ཙཱ་བ་ལ་ཡོ་ག་དང་བདེ་མཆོག་བྱ་འདུལ་ལ་འདུལ་བ་རྣམས་མཁས་པར་སྦྱངས། དགེ་བཤེས་སྙུག་རུམ་པ་ཟླ་བ་བདུན་བསྟེན་པས་ཀུན་རྫོབ་བྱང་སེམས་ལ་བརྟན་པ་ཐོབ། ལྕགས་རི་གོང་ཁ་བ་དང་རྒྱ་ཡོན་བདག་ཇོ་བོའི་མན་ངག་མཐའ་དག་གསན། ཐོས་བསམ་གྱི་སྒྲོ་འདོགས་ཆོད་ནས་སྒྲུབ་པ་མཛད་པའི་ཚེ་སྒྲིབ་པ་དག་པ་དང་འཇིགས་པ་ལས་གྲོལ་བ་དང་ས་ཐོབ་པ་ལ་སོགས་པའི་ལྟས་སུ་བཤད་པའི་རྨི་ལམ་ཁོ་ན་རྨི། ཕྱི་ནང་གི་སྲིན་བུ་མེད་པ་དང་ཁམ་གྱི་ཟས་ལ་མ་ལྟོས། རྟག་དུ་ཏིང་ངེ་འཛིན་ལ་གནས་པ་བྱུང༌། ལན་ཅིག་སྐྱོ་སངས་ལ་བྱོན་པས་སྤྲང་པོ་གསུམ་ཟས་སྐོམ་ལ་སྨོན་པ་ལ་གཅིག་གིས་རྗེ་བཙུན་མི་ལ་རས་པ་ལྟ་བུ་ཟས་སུ་མཁའ་འགྲོས་བདུད་རྩི་འདྲེན། སེང་གེ་ལ་ཞོན་ནས་ན་མཁའ་ལ་འགྲོ་བ་དེ་ཡིན་ན་དགའ་མོད་ཟེར། དེ་གསན་པ་ཙམ་གྱིས་དད་པ་མི་བཟོད་པ་སྐྱེས། སྔར་གྱི་ཤེས་པ་དེ་མ་ཡིན་པ་ཅིག་ཤར། ཡུན་རིང་དུ་འབྱོན་ཡང་མ་མཁྱེན། དལ་བུས་བྲང་ཁང་དུ་བྱོན་སྟེ་ཡན་ལག་བདུན་པ་བྱས་པས་འཕྲོ་སྟོར་ཞིང་སོང༌། འཇིག་རྟེན་གྱི་ཁམས་ཐམས་ཅད་ཡིད་ཡུལ་དུ་གསལ། སེམས་ཅན་ཐམས་ཅད་ཀྱི་ཁམས་དང་དབང་པོ་ཤེས་པ་སྙམ་བྱེད། དེ་ནས་སྤྲང་པོ་དེ་ཀུན་ལ་གྲུབ་ཐོབ་དེ་ག་ན་ཡོད་དྲིས་པས་བྲིན་དང་སྙེ་ནམ་ན་བཞུགས། མར་པ་ལོ་ཙཱའི་སློབ་མ་ན་རོའི་ཆོས་དྲུག་གསུང་བ་ཡིན་པར་འདུག་སྐུའི་བཀོད་པ་མཐའ་ཡས་པ་སྟོན། སྙན་གྲགས་ཤིན་དུ་ཆེ་བས་ལ་སྟོད་རང་གནས་ཤེས་འོང་ཟེར། དེ་རྣམས་ཟས་སྐོམ་གྱིས་ཚིམ་པར་མཛད། (ན༢༨ན)
ཕྱི་ནས་གར་སོང་མི་འདུག་སྟེ་སྤྲུལ་པར་ཤེས། དེར་འབྱོན་པར་ཐག་བཅད་ཚེ་བོད་ཡུལ་ན་སྒྲ་ཆེ་ཟེར་བའི་རག་དུང་བུས་པ་དང༌། ན་མཁའ་ལ་རྔ་བོ་ཆེ་འདུག་པ་བརྡུངས་པས་སྒྲ་ཆེན་པོ་བྱུང༌། མོན་མོ་ཞིག་གིས་འོ་མ་ཐོད་ཕོར་གང་བྱིན་སྟེ་མི་འདི་རྣམས་ལ་རྔ་བརྡུངས། རི་དྭགས་འདི་རྣམས་ལ་འོ་མ་འདི་བྱིན་ཟེར། འདིས་རི་དྭགས་མང་པོ་དེ་མི་ཁེབ་བྱས་པས། ཐོག་མར་ཁྱོད་རང་འཐུང་དང་སེམས་ཅན་ཐམས་ཅད་ཀྱང་ཁེབ། ང་ནུབ་ཕྱོགས་སུ་འགྲོ་ཟེར། ཕྱིས་རྔའི་སྒྲ་ལ་ཉན་པའི་མི་རྣམས་བཀའ་གདམས་ཀྱི་ཆོས་ཀྱིས་བསྐྱངས་པ་རྣམས་དང་རི་དྭགས་རྣམས་བཀའ་རྒྱུད་ཀྱི་སྒོམ་ཆེན་རྣམས་ཡིན་པར་འདུག་བཀའ་གདམས་ཀྱང་བཀའ་དྲིན་ཆེ་གསུངས། བླ་མ་རྣམས་ལ་འབྱོན་ཕྱག་མཛད་པས་རྒྱ་ཡོན་བདག་བདག་གིས་རྣལ་འབྱོར་པ་དེ་གྲུབ་པ་ཐོབ་ངེས་སུ་འདུག་པས་ཆོས་ཐམས་ཅད་དྲིས་གདམས་ངག་གི་ཁྱོས་མ་ཁྱེར་ལ་ཤོག་གསུངས། སྤྱན་སྔ་བས་ཁྱོད་རྣལ་འབྱོར་པའི་རྩར་ཅིས་ཀྱང་འགྲོ་ན་ངེད་ཀྱི་རྟགས་མ་དོར་བར་ཤོག །ཟངས་ངེད་ཀྱིས་བརྡུངས་ཟངས་སྐད་མིས་འདོན་པར་འདུག་སྟེ་སེར་ཁ་ལ་ཕན་ན་ཁྱི་ཚིལ་ཡིན་ན་ཡང་ཡིན་པས་ཐབས་མེད་གསུངས། སྙུག་རུམ་པས་ང་རྒས་ཀར་ཁྱོད་ཀྱིས་མ་བོར་བར་ཤོག་ཞིག་གསུངས། འདིའི་དུས་རས་པ་རྣམས་ཀྱིས་གདན་ས་ཞིག་སྐོ་བར་ཞུས་ཀྱང་ཟེར། རས་ཆུང་པས་རྒྱུད་པ་སུས་འཛིན་ཞུས་ཀྱང་ཟེར་སྟེ། མདང་རྨི་ལམ་ན་ངའི་ལག་ན་ཤེལ་བུམ་བདུད་རྩིས་གང་བ་ཞིག་འདུག་པ་དབུས་ནས་དགེ་སློང་ཞིག་བྱུང་བས་དངུལ་གྱི་བུམ་པར་བྱོ་ནས་སོང་བ་རྨིས། ངའི་རྒྱུད་པ་འདི་རས་པས་མི་འཛིན་པར་རབ་བྱུང་གིས་འཛིན་པར་འདུག་གསུང་ཞིང༌། འཁོར་དུ་སྤྲུལ་སྐུ་འདུ་བ་འདི་ཨེ་མ་ཧོ། །ཞེས་དྭགས་པོ་ལུང་བསྟན་གྱི་མགུར་གསུངས། དེར་གཙང་ལ་བྱོན་པས་ཉི་མ་ཕྱེད་དང་གཉིས་ཀྱིས་སླེབས་པའི་སར་མགོ་ཡོམས་ཀྱི་བསྙུང་གཞི་བྱུང་ནས་རླུང་བརྒྱལ་ཡང་ཡང་བྱུང༌། རྗེ་བཙུན་ཆོས་གསུང་ཚེ་(ན༢༨བ)
རེས་བཞད། རེས་སྤྱན་ཆབ་ཕྲོམ་ཕྲོམ་འདུག་པ་ན་ཅི་ལགས་ཞུས་པས། ངའི་བུ་དབུས་པ་སྟོན་པ་དེ་འོང་ཞིང་འདུག་པས་དགའ་བ་ཞིག་ཀྱང་བྱུང༌། ངལ་སྟེགས་ཀྱི་ཁ་ནས་ཡང་ཡང་འགྱེལ་ཞིང་འདུག་པས་སྙིང་རྗེ་བ་ཞིག་ཀྱང་བྱུང༌། ད་མྱུར་བར་སླེབ་པ་འདུག་པས་དེའི་མཇལ་སྣ་སུས་བྱས་ལ་ངན་སོང་མེད་གསུངས། ཉ་མ་ཞིག་གིས་ངའི་བུ་མོ་སྒོམ་མ་ཞིག་ཡོད་པ་ལ་མཇལ་སྣ་འཆོལ་ཞེས་བཤད་ཀྱང་ཟེར། རས་པ་ཅིག་གིས་བསུས་སྟེ་བཤད་ཀྱང་ཟེར་སྟེ་ཐུགས་རྒྱལ་ཅུང་ཟད་སྐྱེས་པ་གཅོག་ཕྱིར་ཟླ་བ་ཕྱེད་དུ་མཇལ་ཀ་མ་བྱུང༌། དེ་ནས་ཕ་བོང་ཞིག་གི་སྟེང་ན་བཞུགས་འདུག་པ་ལ་གསེར་དང་ཇ་ཕུལ་པས། གསེར་དང་མ་རྒན་ལོ་མི་མཐུན། །ཇ་ལ་སྐོལ་བའི་ཐབ་ཀ་མེད། །གསུང་ཞེས་ཕལ་ཆེར་ལས་འཆད་ལ། གསེར་གྱི་འབུལ་བ་ཡང་མི་ཞན་སྙམ་པ་ན་ས་རྡོ་གསེར་དུ་མཛད་ནས་ང་རྒྱལ་བཅག་པ་དང་སྟོན་པའི་ཇ་ལན་ཡིན་གསུངས་ནས་སྔོ་གང་བྱུང་བ་བསྡུས་པའི་ཁུ་བ་ལ་ཆབ་བསིལ་བས་རོ་མཆོག་བྱུང་ཞེས་རེ་གཉིས་ན་སྣང༌། ཁྱོད་ཀྱི་མིང་ཅི་གསུངས། བསོད་ནམས་རིན་ཆེན་ལགས་ཞུས་པས་བསོད་ནམས་རིན་ཆེན་ཞེས་ལན་གསུམ་གསུངས་ནས། བསོད་ནམས་ཚོགས་ཆེན་བསགས་ལས་བྱུང༌། །འགྲོ་དྲུག་ཀུན་གྱི་རིན་པོ་ཆེ། །གསུངས། ཆང་ཀ་པཱ་ལ་གང་གསོལ་ཞིང་འདུག་པ་གནང་བས་ཐེ་ཚོམ་པ་ན་རྣམ་རྟོག་མ་མང་བར་འདི་འཐུང་གསུངས། ཐེ་ཚོམ་མེད་པར་གསོལ་བས། གདམས་ངག་རྫོགས་པའི་རྟེན་འབྲེལ་འགྲིག །ཤར་སེང་གེ་དཀར་མོའི་འོ་མ་དེ། །ཞེས་སོགས་སྣེ་ལེན་གྱི་མགུར་མཛད། སིནྡྷུ་རའི་དཀྱིལ་འཁོར་ལ་བརྟེན་ནས་དབང་བསྐུར་མཛད། སྔར་དབང་ཐོས་ཚུལ་དང་ཏིང་ངེ་འཛིན་ཡོད་ཚུལ་ཞུས་པས་འབྲས་བུ་མཐོ་ཡང་འདུ་ཤེས་མེད་པའི་ལྷ་གསུངས་ནས་བཞད། ལར་བོད་ཀྱི་སྙིང་ལ་འདྲེ་ཞུགས་ཨ་ཏི་ཤ་གསང་སྔགས་འཆད་དུ་མ་བཅུག་པས་མི་མང་པོ་འཕུང་གསུངས། བཀའ་(ན༢༩ན)
གདམས་པ་ལའང་གསང་སྔགས་མང་དུ་ཡོད་ཞུས་པས་དེ་ཀུན་གསང་སྔགས་ཡིན་སྟེ་མན་ངག་མིན་གསུངས། ཚོགས་གསོག་པའི་ཐབས་གང་ཆེ་ཞུས་པས། དུས་གསུམ་གྱི་སངས་རྒྱས་ཐམས་ཅད་མཆོད་པ་ལས་སློབ་དཔོན་གྱི་བ་སྤུའི་ཁུང་བུ་གཅིག་མཆོད་པ་བསོད་ནམས་ཆེ། དེ་ལས་ཀྱང་བླ་མའི་གདམས་ངག་ཆུད་མ་ཟོས་པར་ཉམས་སུ་བླངས་ན་བསོད་ནམས་ཆེ་གསུངས། ཚེ་གཅིག་ལ་འཚང་རྒྱ་བ་སྲིད་དམ་ཞུས་པས། ཚེ་འདི་ལ་བལྟོས་པ་སྤུ་ཙམ་མེད་པ་ཅིག་གིས་བླ་མ་མཚན་ལྡན་ཞིག་ལ་དབང་གདམས་ངག་ཞུས་ནས་བར་མ་ཆད་བསྒོམས་ན་རབ་ཚེ་འདི། འབྲིང་འཆི་ཀ་འམ་བར་དོ། ཐ་མ་སྐྱེ་བ་བདུན་ནམ་བཅུ་དྲུག་ན་གྲོལ་བ་ཡིན། ལར་ལྷ་རྗེ་སྟོན་པ་ཁྱོད་ལྟ་བ་ཁ་ཐོ་ལ་སྐུར་བའི་མི་དང་བློ་མ་སྟུན། སྒོམ་པ་ཉམས་སུ་ལེན་པའི་མི་དང་བློ་སྟུན་དེའི་ངག་ལ་ཉོན། གྲོས་ཕུགས་ཚེ་འདི་བློས་བཏང་བའི་བྱ་བཏང་ལ་གྱིས། ཚེ་འདི་པ་རྣམས་ཀྱིས་ཆོས་བརྒྱད་སློབ་ཏུ་འོང་བ་ཡིན། སྤྱིར་སྟོང་ཉིད་ལ་ཤོར་ས་བཞི་ཡོད་སྟེ་སྟོང་ཉིད་རྒྱས་འདེབས་སུ་ཤོར་བ་བྱ་བ་བློའི་ཡུལ་དུ་གྱུར་པ་ཐམས་ཅད་སྟོང་པར་སྒོམ་པ་ཡིན་མོད་བྱ་བ་དང༌། སྟོང་ཉིད་ཤེས་བྱའི་གཤིས་ལ་ཤོར་བ་བྱ་བ་འཁོར་འདས་ཐམས་ཅད་སྟོང་པ་ཉིད་ཡིན་མོད་ཟེར་བ་དང༌། སྟོང་ཉིད་གཉེན་པོར་ཤོར་བ་ཉོན་མོངས་དང་རྣམ་རྟོག་གང་སྐྱེས་ལ་བལྟས་པས་དེ་ག་སྟོང་པ་ཉིད་ཡིན་མོད་ཟེར་བ་དང༌། སྟོང་ཉིད་ཆད་ལྟར་ཤོར་བ་བྱ་བ་ད་ལྟ་ཁོ་བོ་ལ་སྒོམ་དུ་མེད་ཟེར་བ་ཡོད། དེ་ཐམས་ཅད་ཡང་དག་མ་ཡིན། འོན་འང་ལས་དང་པོ་བའི་ཞན་པ་ཕྱོགས་རེ་ཟློག་པ་ལ་ཕན་དུ་རུང་ཙམ་ཡིན། ལར་སེམས་ཀྱི་གཞི་རྩ་མ་ཆོད་ན་བདེ་གསལ་མི་རྟོག་པའི་ཉམས་ཇི་ཙམ་བཟང་ཡང་ཁམས་གསུམ་ལས་མི་འདའ་སྟེ་རྩ་བ་མ་ཆོད་པའི་ཉམས་བྱ་བ་ཡིན། འོ་ན་ལམ་ཡང་དག་པ་གང་ཡིན་ན། མཚན་ལྡན་གྱི་བླ་མས་སློབ་མ་སྣོད་ལྡན་ཁྲིད་སྟེ་(ན༢༩བ)
གཉུག་མའི་ཤེས་པ་སེམས་ཅན་ཐམས་ཅད་ལ་གནས། སངས་རྒྱས་ལ་ཆོས་སྐུའི་དགོངས་པར་རང་གསལ། རྣལ་འབྱོར་པ་ལ་ཐབས་དུ་མས་མཚོན་སྟེ་ངོ་སྤྲད་ནས་བསྒོམས་པས་ལྟ་བ་ཤུགས་ལ་རྟོགས། ཉོན་མོངས་ངང་གིས་འགག་རྣམ་རྟོག་རང་སར་གྲོལ། ཡེ་ཤེས་མངོན་དུ་གྱུར། གནས་ལུགས་ཉམས་སུ་མྱོང་བ་དེ་ངག་དུ་སྨྲར་མི་བཏུབ། བརྗོད་པས་མཚོན་མི་ནུས། གཞོན་ནུ་མའི་བདེ་བའམ་ལྐུགས་པའི་རྨི་ལམ་བཞིན་སྨྲར་མེད། གཞི་དེ་ཀུན་ལ་ཡོད་ཀྱང་ངོ་མ་ཤེས། དེས་ན་རྒྱུད་ལྡན་གྱི་བླ་མ་བསྟེན་པ་གལ་ཆེ་བར་གདའ། གཉུག་མ་ཐ་མལ་གྱི་ཤིག་པ་དེ་བུ་གར་ཡང་མ་གཏད། དཔེ་གང་གིས་ཀྱང་མི་མཚོན། བརྗོད་པ་གང་གིས་ཀྱང་མི་རྟོགས། ཐ་སྙད་གང་གིས་ཀྱང་མི་རིག །དེས་ན་བཅས་བཅོས་མི་བྱ། རང་ག་སོ་མའི་ངང་ལ་ལྷོད་དེ་ཞོག་མཛོད་གསུངས་ནས། ལྟ་བ་ཡིན་པར་ངེས་ཀྱིས་རང་གིས་སེམས་ལ་ལྟོས། ལ་སོགས་པ་གསུངས། དེར་དོ་ནུབ་གསུང་གླེང་ཁོ་ཐག་ཆོད་པ་ཅིག་ཞུ་དགོས་སྙམ་ཡང་གཟི་བརྗིད་མ་བཟོད་པར་མ་ཚད་དུ་གཟིམས། དེ་ནས་ཡོན་ཏན་མ་འཚོང་པར་བྲིན། སྙེ་ནམ་ལ་བསོད་སྙོམས་གྱིས། ནུབ་མོ་སྤྲོ་བདེ་ཕུག་དུ་སྙོགས་གསུང་བ་ལྟར་བྱས། གཏུམ་མོ་གནང་ནས་རས་རྐྱང་མཛད་སྟེ་བསྒོམས་པས་ཞག་བདུན་ན་རྒྱལ་བ་རིགས་ལྔའི་ཞལ་མཐོང་བ་ཞུས་པས་འབྱུང་བ་ལྔའི་རླུང་ཅུང་ཟད་ཟིན་པ་ཡིན་སྐྱོན་ཡོན་གང་ཡང་མ་ཡིན་གསུངས་སྟེ་དུ་སོགས་ཀྱི་རྟགས་སུ་ངོ་སྤྲད། དེ་བཞིན་དུ་སྟོང་གསུམ་འཁོར་ལོ་ལྟར་འཁོར་ཞིང་དྲན་མེད་དུ་བརྒྱལ་བ་རོ་རྐྱང་གི་རླུང་དྷཱུ་ཏིར་ཚུད་པ་དང༌། ན་མཁའ་ཐམས་ཅད་ཐུགས་རྗེ་ཆེན་པོས་གང་བའི་དབུ་ཐོག་ན་ཟླ་བའི་དཀྱིལ་འཁོར་རེ་འདུག་པ་སྤྱི་བོའི་འཁོར་ལོར་ཐིག་ལེ་འཕེལ་བ་དང༌། དམྱལ་བ་ཐིག་ནག་མཐོང་བས་སྙིང་རླུང་དྲག་པོ་བྱུང་བ་གྱེན་རྒྱུའི་རླུང་རྩུབ་ཟིན་ཡིན་ལ་སྒོམ་ཐག་ཐུངས་པས་ཀྱང་ལན་པ་དང༌། ལུས་ལ་འདོད་ལྷ་དྲུག་མཐོང་བ་གོང་མས་(ན༣༠ན)
འོག་མ་ལ་བདུད་རྩིའི་ཆར་ཕབ་པས་ཚིམ་པ་ལ་བདག་གི་མ་སྐོམ་དྲིར་འཆི་བ་མཐོང་བ་མགྲིན་པར་ཐིག་ལེ་འཕེལ་ཞིང་དྷཱུ་ཏིའི་མར་སྣ་ཁ་མ་ཕྱེད་པ་ཡིན་ཞེས་འཕྲུལ་འཁོར་བཙན་ཐབས་ཀྱི་རྡེག་ཆོག་གནང༌། ལུས་འཕར་འདར་སོགས་དྲག་དུ་བྱུང་བ་སྙིང་གར་ཁམས་འཕེལ་བ་ཡིན་འཕྲུལ་འཁོར་འབད་ལས་སྒོམས་གསུང༌། དེ་ནས་དགའ་བདེས་གང་སྟེ་ཟས་སྐོམ་ཡང་ཆེར་མི་དགོས་པ་བྱུང༌། ཡང་ཉི་ཟླ་གཉིས་གཟའ་རྟ་རྔ་ཕྲ་མོས་བཟུང་བ་མཐོང་བ་ན་རོ་རྐྱང་གི་རླུང་ཐིག་དྷཱུ་ཏིར་རོ་མཉམ་པ་ཡིན་སྐྱོན་ཡོན་གང་ཡང་མིན་ལར་ཕོ་རྒོད་རབ་འདུག་ད་ནི་ད་ནི་ད་ནི་གསུང༌། དགྱེས་རྡོར་དམར་པོའི་དཀྱིལ་འཁོར་མཐོང་བས་སྙིང་གར་མ་ལས་ཐོབ་པའི་རཀྟ་བརྟན་པ་དང༌། བདེ་མཆོག་ལོ་ཧི་པའི་ཀེང་རུས་ཀྱི་དཀྱིལ་འཁོར་མཐོང་བ་ན་ལྟེ་བར་དཀར་ཆ་བརྟན་པ་དང༌། ཡང་ལུས་ན་མཁའ་དང་མཉམ་པ་ལ་རིགས་དྲུག་ཐམས་ཅད་ཚང་བ་འོ་མ་འཐུང་བ་མཐོང་བས་རྩ་ཕྲན་ཐམས་ཅད་དུ་ཐིག་ལེས་གང་བ་ཡིན། རླུང་དེ་ཡེ་ཤེས་ཀྱི་རླུང་དུ་བསྒྱུར་དགོས་གསུངས་ནས་མཆོག་གི་གཏུམ་མོ་གནང༌། དེ་ཐམས་ཅད་སྐྱོན་ཡོན་གང་ཡང་མིན་པས་སྒོམས་ཤིག་གསུངས་སྟེ་བསྒོམས་པ་ལས་བྱུང་བས་སྐྱོན་མ་ཡིན་ལ། འདི་དག་ལ་མཆོག་དུ་བཟུང་ན་ལམ་གོང་མའི་བར་ཆོད་བྱེད་པས་ཡོན་ཏན་མ་ཡིན་པར་བསྟན་ཞིང་འདི་ཡན་གྱི་རྟགས་སྣང་ཐམས་ཅད་རྣམ་ཤེས་འགག་པའི་རྟགས་མེ་འབར་བ་ན་དུ་བ་འབྱུང་བ་ལྟར་མཐར་དག་དགོས་པར་བསྟན་པ་ཡིན་ནོ། །དེའི་ཚེ་གསེར་གྱི་པདྨ་ལ་སྐྱིལ་ཀྲུང་བཅས་པ་སོགས་རྨི་ལམ་ངོ་མཚར་ཅན་བཅུ་དྲུག་རྨིས་སྟེ་མ་འོངས་ལུང་བསྟན་རྨི་ལམ་ཞུས་ལན་གྱི་མགུར་མཛད། དེ་ནས་ཟླ་བ་གཅིག་ན་སྨན་བླ་མ་མཆེད་བརྒྱད་དང་སངས་རྒྱས་སྟོང་གི་གཙོ་བོ་ཤཱཀྱ་ཐུབ་པས་མཛད་པ་དང་ལོངས་སྐུའི་ཞིང་རབ་འབྱམས་རྣམས་མཐོང་བས་ནང་པར་ཞུར་བྱོན་པས་བྲག་རྩ་ཅིག་ན་གཟིམས་འདུག་པ་ལ་ཕྱག་འཚལ་ཞིང་ཡོད་པ་ལ་བཞེངས་ནས། ད་ནི་སངས་རྒྱས་དངོས་སུ་མཐོང་སྟེ་ལོངས་(ན༣༠བ)
སྤྲུལ་གཉིས་དངོས་སུ་མཐོང༌། ཆོས་སྐུ་ད་གཟོད་མཐོང་པར་འགྱུར་གྱི་ད་ང་དང་འགྲོགས་མི་དགོས་པས་དབུས་སུ་སོང་ལ་སྒོམས། ད་མངོན་ཤེས་ཀྱི་ཕྲང་ཡོད་སྟེ་མངོན་ཤེས་བྱུང་ཚེ་གསང་བ་གལ་ཆེ། རླུང་ལག་སོར་ལ་ཚུད་ན་རླུང་གི་ཕྲང་ལས་ཐར་བ་ཡིན་གསུངས། ཐལ་བ་ལ་ལག་སོར་བཏང་སྟེ་བཅུན་པས་སྤུ་རུ་རུ་བྱུང་བས་རྩ་རླུང་ལ་དབང་ཐོབ་པ་ནི་མིན་སྟེ་རྩ་རླུང་ལས་སུ་རུང་བ་ཡིན་གསུངས། བུ་ཁྱོད་ལ་སེམས་ཀྱི་ངོ་བོ་བཅོས་མིན་དུ་མཐོང་བའི་རྟོགས་པ་འཆར་ཞིང་མི་རྒན་ང་ལ་ཡང་སངས་རྒྱས་དངོས་སུ་མཐོང་བའི་མོས་གུས་འབྱུང༌། དེའི་རྟོགས་པ་དེ་བརྟན་ནས་ཚོགས་པ་སྐྱོངས་ཅེས་མགུར་བཞེངས་པ། བུ་སྟོན་པ་དབུས་སུ་བཞུད་མི་བཞུད། །སྟོན་པ་དབུས་སུ་བཞུད་པ་ན། །རེས་འགའ་ཟས་ཀྱི་སྣང་བ་འཆར། །ཟས་ཀྱི་སྣང་བ་ཤར་ཙ་ན། །ཟས་སུ་ཟག་མེད་ཏིང་འཛིན་ཟོ། །ཞིམ་མངར་སྒྱུ་མར་ཤེས་པར་མཛོད། །ཅིར་སྣང་ཆོས་སྐུར་ཉམས་སུ་ལོངས། །རེས་འགའ་གོས་ཀྱི་སྣང་བ་འཆར། །གོས་ཀྱི་སྣང་བ་ཤར་ཙ་ན། །གོས་སུ་གཏུམ་མོའི་བདེ་དྲོད་གྱོན། །འཇམ་ལེགས་སྒྱུ་མར་ཤེས་པར་མཛོད། །ཅིར་སྣང་ཆོས་སྐུར་ཉམས་སུ་ལོངས། །རེས་འགའ་ནོར་གྱི་སྣང་བ་འཆར། །ནོར་གྱི་སྣང་བ་ཤར་ཙ་ན། །ནོར་དུ་འཕགས་པའི་ནོར་བདུན་སྤེལ། །ནོར་རྫས་སྒྱུ་མར་ཤེས་པར་མཛོད། །ཅིར་སྣང་ཆོས་སྐུར་ཉམས་སུ་ལོངས། །རེས་འགའ་ཡུལ་གྱི་སྣང་བ་འཆར། །ཡུལ་གྱི་སྣང་བ་ཤར་ཙ་ན། །ཡུལ་དུ་ཆོས་ཉིད་གཏན་ཡུལ་ཟུངས། །ཕ་ཡུལ་སྒྱུ་མར་ཤེས་པར་མཛོད། །ཅིར་སྣང་ཆོས་སྐུར་ཉམས་སུ་ལོངས། །རེས་འགའ་གྲོགས་ཀྱི་སྣང་བ་འཆར། །གྲོགས་ཀྱི་སྣང་བ་ཤར་ཙ་ན། །གྲོགས་སུ་རང་བྱུང་ཡེ་ཤེས་སྟེན། །ཟླ་གྲོགས་སྒྱུ་མར་ཤེས་པར་མཛོད། །ཅིར་སྣང་ཆོས་སྐུར་ཉམས་སུ་ལོངས། །རེས་འགའ་བླ་མའི་སྣང་བ་འཆར། །བླ་མའི་སྣང་བ་ཤར་ཙ་ན། །འབྲལ་མེད་སྤྱི་བོར་གསོལ་བ་ཐོབ། །རྗེད་མེད་སྙིང་གི་དཀྱིལ་དུ་སྒོམས། །བླ་མ་ཡང་སྒྱུ་མ་རྨི་ལམ་འདྲ། །(ན༣༡ན)
ལར་ཐམས་ཅད་སྒྱུ་མར་ཤེས་པར་མཛོད། །ཤར་སྒམ་པོ་བདར་གྱི་རི་བོ་དེ། །རི་རྒྱལ་པོ་གདན་ལ་བཞུགས་པ་འདྲ། །རྩེ་མོ་རིན་ཆེན་པྲོག་ཞུ་འདྲ། །རྒྱབ་རི་དར་དཀར་ཕྱར་བ་འདྲ། །མདུན་རི་རིན་ཆེན་སྤུངས་པ་འདྲ། །རི་བདུན་བློན་པོ་འདུད་པ་འདྲ། །སྤང་ཐང་གསེར་གྱི་མཎྜལ་འདྲ། །རི་དེ་ཡི་མགུལ་ན་གདུལ་བྱ་ཡོད། །ཁྱོད་དེ་རུ་སོང་ལ་འགྲོ་དོན་སྒྲུབས། །བུ་ཁྱོད་ཀྱི་སྐུ་དོན་འགྲུབ་སྟེ་མཆི། །ཞེས་གསུངས། འདི་ནི་ཡེ་ཤེས་མཐོང་བའི་རྟགས་སྟེ་རྡོ་རྗེའི་ཡེ་ཤེས་དང་ཆོས་ཀྱི་སྐུར་ངོ་སྤྲད་པར་བྱ་བ་སངས་རྒྱས་ཀྱི་སའི་བར་དུ་གོང་འཕེལ་དུ་འགྲོ་བ་ཡིན་ནོ། །དེས་ན་རྣམ་ཤེས་དང་ཡེ་ཤེས་ཀྱི་རྟགས་ཕྱེད་པ་ནི་བོད་ན་བཀའ་རྒྱུད་འདི་ལས་གཞན་མི་སྣང་ངོ༌། །དེ་ནས་ཤིང་སྟག་པའི་ནགས་དང་ཆུ་རྡོ་ཟམ་ཞིག་ཡོད་པའི་བར་སྐྱེལ་ཐུང་མཛད། རྟེན་འབྲེལ་གྱི་གནད་ཅིག་གིས་ཆུ་འདིའི་ཕར་ཁར་ཁོ་བོ་མི་འགྲོ། འོ་སྐོལ་ཕ་སྤད་ཀྱི་ཕྲིན་བགོས་འདིར་བྱ་གསུངས་ནས་ཨ་རུ་ར་གསེར་མདོག་ཞིག་དང་མེ་ཆ་ཞིག་གནང༌། ང་ལ་ཡང་ཉམས་མྱོང་ཡུན་རིང་དུ་མ་སྐྱེས་པ་འདི་ལ་བརྟེན་ནས་སྐྱེས། ཁྱོད་ལའང་ཉམས་མྱོང་འཕེལ་འགྲིབ་ཅིག་འབྱུང་བའི་དུས་སུ་འདི་དགོས་པ་ཡིན་གསུངས་ནས་རླུང་སེམས་གཉིས་མེད་གནང༌། ཁྱོད་ལ་སྒོམ་ཆེན་པ་མཐར་ཐུག་པ་ཅིག་འོང༌། བུ་ཁྱོད་ཀྱི་མིང་ཡང་དགེ་སློང་རྡོ་རྗེ་འཛིན་པ་འཇམ་གླིང་གྲགས་པ་བྱ་བ་ཡིན་ནོ། །དབུས་པ་སྟོན་པ་ཕ་ཚན་གྱི་ཁེ་དྲེགས་སྤོངས། གཉེན་འདུན་གྱི་ཐག་པ་ཆོད། ཚེ་འདིའི་རྡོས་ཐག་མེད་པར་གྱིས། རིའི་བུ་གྱིས། ཆོས་ཐམས་ཅད་གཅིག་དུ་དྲིལ་ལ་ཉམས་སུ་ལོངས། མི་རྒན་ང་ལ་ཡང་གསོལ་བ་ཐོབ། དུག་གསུམ་རྒྱས་པའི་མི་དང་འགྲོགས་སུ་མི་རུང༌། སྤྱིར་ཡང་རི་དྭགས་རྨས་མའམ་བྱ་བཞིན་དུ་ཟོན་བག་ཆེ་བར་བྱ། ཞི་བ་དུལ་བ་རྩེ་རེག་ཆུང་བར་བྱ། བཟོད་པ་ཆེ་བར་བྱ། ཐམས་ཅད་དང་མཐུན་པར་བྱ། གཙང་སྦྲ་ཤིན་དུ་ཆེ་བར་བྱ། རྟོག་པ་ཤིན་དུ་ཆུང་བར་བྱ། རི་མཚམས་དང་སྨྲ་བཅད་དང༌། འདག་སྦྱར་(ན༣༡བ)
གསུམ་གྱིས་འདུས་འདའ་བར་བྱ། རང་སེམས་སངས་རྒྱས་སུ་རྟོགས་ཀྱང་བླ་མ་རྡོ་རྗེ་སློབ་དཔོན་མི་སྤོང་པ་ལ་བསླབ། གསག་སྦྱང་གཉིས་པ་རང་སར་དག་ཀྱང་ཚོགས་ཆུང་ངུ་ཆུང་ངུ་ནས་གསག །ལས་འབྲས་ན་མཁའ་ལྟར་གོ་ཡང་སྡིག་པ་ཆུང་ངུ་ནས་འཛེམ། མཉམ་རྗེས་འདྲེས་པའི་ཉམས་ཡོད་ཀྱང་ཐུན་བཞིའི་རྣལ་འབྱོར་རྒྱུན་ཆད་མེད་པར་བླང༌། བདག་གཞན་མཉམ་ཉིད་དུ་གོ་ཡང་ཆོས་དང་གང་ཟག་ལ་སྐུར་བ་མི་གདབ། ཅེས་སོགས་རྒྱས་པར་གསུངས་སྟེ། བུ་ཁྱོད་ཡོས་བུའི་ལོ་རྟའི་ཟླ་བའི་ཚེས་བཅུ་བཞི་ལ་བྲིན་སྙེ་ནམ་གྱི་རི་ལ་སླེབ་པར་གྱིས་ཅིག་གསུང་ནས། བུ་སྤྲོས་བྲལ་སེམས་ལ་ཤར་དུས་སུ། །ཐ་སྙད་ཚིག་ཕྱིར་མ་འབྲེང་ཞིག །ཆོས་བརྒྱད་སྒྲོག་དུ་འཚུད་ཉེན་ཡོད། །བུ་ང་རྒྱལ་མེད་པའི་ངང་ལ་ཞོག །དེ་གོའམ་དབུས་པ་སྟོན་པ་བ། །དེ་གོའམ་དྭགས་པོ་ལྷ་རྗེ་བ། །རང་གྲོལ་ནང་ནས་ཤར་དུས་སུ། །ཚད་མའི་སྦྱོར་བ་མ་བཀོད་ཅིག །དོན་མེད་འབད་རྩོལ་བྱེད་ཉེན་ཡོད། །བུ་རྣམ་རྟོག་མེད་པའི་ངང་ལ་ཞོག །རང་སེམས་སྟོང་ཉིད་རྟོགས་དུས་སུ། །གཅིག་དང་དུ་མར་མ་སྦྲེལ་ཞིག །ཆད་པའི་སྟོང་པར་འགྲོ་ཉེན་ཡོད། །བུ་སྤྲོས་པ་མེད་པའི་ངང་ལ་ཞོག །ཕྱག་རྒྱ་ཆེན་པོ་སྒོམ་དུས་སུ། །ལུས་ངག་གི་དགེ་སྦྱོར་མ་རྩོལ་ཞིག །མི་རྟོག་ཏིང་འཛིན་ཡལ་ཉེན་ཡོད། །བུ་མ་བཅོས་ལྷུག་པའི་ངང་ལ་ཞོག །རྟགས་དང་ལུང་བསྟན་བྱུང་དུས་སུ། །དགའ་རློམ་ཆེད་དུ་མ་འཛིན་ཞིག །བདུད་ཀྱི་ལུང་བསྟན་འབྱུང་ཉེན་ཡོད། །བུ་ཆེད་འཛིན་མེད་པའི་ངང་ལ་ཞོག །རང་སེམས་གཏན་ལ་འབེབས་དུས་སུ། །མངོན་ཤེས་ལ་འདོད་པ་མ་སྐྱེ་ཅིག །རློམ་སེམས་བདུད་ཀྱིས་འཁྱེར་ཉེན་ཡོད། །བུ་རེ་དྭོགས་མེད་པའི་ངང་ལ་ཞོག །དེ་གོའམ་དབུས་པ་སྟོན་པ་བ། །དེ་གོའམ་དྭགས་པོ་ལྷ་རྗེ་བ། །ཞེས་གསུངས་སྟེ་དབུས་སུ་བྱོན། རྗེ་བཙུན་གྱིས་རས་པ་རྣམས་བསྡུས་སྟེ་མདང་རྨི་ལམ་ན་ངའི་རྩ་ནས་བྱ་རྒོད་སེར་པོ་ཅིག་དབུས་སུ་འཕུར་སོང་བ་རི་ཆེན་པོ་ཅིག་གི་རྩེར་བབ་པ་ལ་ངང་པའི་(ན༣༢ན)
འཁོར་མཐའ་ཡས་པ་འདུས། ཅི་ཞིག་ནས་གྱེས་སོང་བས་ངང་པ་རེ་ལའང་ངང་གཡོག་ལྔ་བརྒྱ་ཙམ་རེ་འདུས་ནས་ལུང་པ་ཐམས་ཅད་ངང་པས་སེར་མྱོག་གིས་གང་བ་རྨིས། དབུས་པ་སྟོན་པ་དེས་འགྲོ་དོན་དཔག་མེད་ཡོང་བར་འདུག་ཁོ་བོ་རྣལ་འབྱོར་པ་ཡིན་ཡང་རྗེས་སུ་རབ་བྱུང་དཔག་མེད་ཡོང་བ་འདུག་པས་ཁོ་བོས་ཀྱང་བསྟན་པ་ལ་བྱ་བ་བྱས་པར་འདུག་གསུང༌། དེ་ནས་བཀའ་གདམས་པའི་ཆས་མཛད་ནས་སྙུག་རུམ་པ་ལ་སྒྲོལ་དཀར་གསན། ཡེ་ཤེས་ཀྱི་མཁའ་འགྲོས་གདུགས་ཚོད་དྲངས། བླ་མའི་གསུང་དྲན་ནས་རྒྱ་བ་གསེར་རེ་ལ་གསེར་མང་པོ་བསྐྱིས་སྟེ་བྱོན་པ་རྗེ་བཙུན་ཡོས་བུ་ལོ་རྟའི་ཟླ་བའི་བཅུ་བཞི་ལ་གཤེགས་ཅེས་ཐོས་པས་ཅུང་ཟད་བརྒྱལ། སངས་པ་ན་གསེར་ཐམས་ཅད་བྲིན་གྱི་ཕྱོགས་སུ་གཏོར་སྟེ་རྗེ་གངས་དཀར་མའི་གདུང་དབྱངས་མཛད། བཀའ་གདམས་ཀྱི་ཚོགས་སུ་ཉམས་མྱོང་ཡལ་བ་ན་བླ་མའི་གསུང་དྲན་སྟེ་གསོལ་བ་བཏབ་པས་བདེ་དྲོད་ཀླུངས་སུ་འཆུད། ཕྱག་རྒྱ་ཆེན་པོའི་རྟོགས་པ་ན་མཁའ་དང་མཉམ་པ་ཤར། སྔར་འདྲིས་ཀྱི་མི་དང་ཕྲད་པ་ལྟར་སེམས་ཀྱིས་སྒྲོ་འདོགས་ཆོད་སྟེ་རྗེ་བཙུན་ཆེན་པོ་དེ་སངས་རྒྱས་དངོས་སུ་འདུག་པ་ལ་ངས་གྲུབ་ཐོབ་ཆེན་པོ་ཅིག་དུ་བཟུང་འདུག་སྙམ་ནས་མོས་གུས་བཅོས་མིན་དུ་སྐྱེས། དུས་གསུམ་གི་སངས་རྒྱས་ཀྱིས་ང་ལུང་བསྟན་ན་ཤིང་འདི་ལ་ཤིང་ཁྱོད་སྐྱེ་བར་གྱུར་ཅིག་ཅེས་བོ་དྷི་ཙའི་ཕྲེང་བ་ལྕང་མ་ལ་བརྒྱབ་པས་ལྕང་མ་ལ་བོ་དྷི་ཙེ་འཕྲལ་དུ་སྐྱེས་སོ། །དེ་ནས་འོལ་ཁ་དགེ་ལུང་དང་འོ་དེ་གུང་རྒྱལ་གྱི་གངས་ལ་བཞུགས་ཚེ་འོ་དེ་གུང་རྒྱལ་གྱིས་སྐྱབས་འགྲོ་སེམས་སྐྱེད་ཞུས་ནས་འདིར་མི་བཞུགས་ན་ངའི་བུ་དྭགས་ལྷ་སྒམ་པོས་ཕྲིན་ལས་སྒྲུབ་པས་དེར་གཤེགས་པ་ཞུ་ཟེར། དེར་དགུང་ལོ་བཞི་བཅུ་རྩ་གྲངས་ནས་སྒམ་པོར་བྱོན། ལོ་བཅུ་གཉིས་འདག་སྦྱར་མཛད་པར་དགོངས་ཚེ་བུད་མེད་ལུས་ལ་ཐལ་བ་བྱུགས་ཤིང་རྨ་བྱའི་སྒྲོ་ཐོགས་པ་ཅིག་གིས། བཅུ་གཉིས་འདག་སྦྱར་བྱས་པ་བས། །བཅུ་གཉིས་བསྟན་(ན༣༢བ)
པ་དཔེལ་ན་དགའ། །ཟེར། དེ་མ་ཐག་དབུས་གཙང་ཁམས་གསུམ་གྱི་སྣོད་ལྡན་མཐའ་ཡས་པ་འདུས་སྟེ་ཐམས་ཅད་རིང་པོར་མ་ལོན་པར་རྩ་རླུང་ཐིག་ལེའི་ཡོན་ཏན་ཡོངས་སུ་རྫོགས་པ། མངོན་ཤེས་དྲུག་ཤར་བ། མ་དག་པའི་དངོས་པོ་བརྒྱད་མི་འཆང་བ། ཅོག་བུའི་སྦྱངས་ཡོན་ཅན། རི་མཚམས་དང་སྨྲ་བཅད་འདག་སྦྱར་གྱིས་དུས་འདའ་བ། སྙིང་རྗེ་པད་དཀར་ལས་དག་པའི་འཁོར་ལུང་བསྟན་པ་ལྟ་བུ་ཤ་སྟག་བྱུང་ངོ༌། །ཡང་ཚེས་བཅུ་བཞི་བཅོ་ལྔ་བཅུ་དྲུག་གསུམ་ལ་དྭགས་པོ་ལྷ་ས་བའི་རབ་གནས་དང༌། ཡོན་བདག་དབྱེར་འབུམ་གྱི་རྟེན་རབ་གནས་དང༌། མཚམས་ནས་བྱུང་སྟེ་དབུས་གཙང་ཁམས་གསུམ་ལ་ཁྲིད་མཛད་པ་དང༌། གཟིམས་མལ་ཉིད་དུ་བཞུགས་པ་སྟེ་སྐུའི་བཀོད་པ་བཞི་དུས་གཅིག་དུ་སྣང༌། འབྱུང་བའི་ཟད་པར་ལྔ་དང་རྟེན་ལ་དངོས་སུ་ཡེ་ཤེས་པ་བསྟིམ་པ་དང༌། སྐུ་སྒམ་པོའི་རི་བས་ཆེ་བ་གཟིམས་ཁང་ཆུང་ངུར་ཆུད་པ་དང༌། ལུས་སྣང་སེམས་གསུམ་འདྲེས་པས་ཀ་བ་ལ་ཕྱག་མ་ཐོགས་པར་གཡུག་པ་དང༌། ཡེ་ཤེས་ཀྱི་མཁའ་འགྲོའི་འདུ་བ་རྒྱུན་མི་ཆད་པ་དང༌། གཙང་པོ་ལ་གདིང་བ་བཏིང་བ་ལ་བཞུགས་ནས་ཆུ་སྦྱིན་མཛད་པ་དང༌། འཇའ་ལ་ཆིབས་པ་ལ་སོགས་ངོ་མཚར་མཐའ་ཡས་པ་བསྟན་ཞིང་སྐུ་ཚེའི་སྨད་ལ་སེམས་ཀྱི་ངོ་བོ་སྟོན་པ་ཕྱག་རྒྱ་ཆེན་པོ་ཆིག་ཆོད་ཁོ་ན་གཙོ་བོར་མཛད་སྟེ། རས་བལ་བཞིན་དུ་ཤེས་པ་གློད་ལ་ཞོག་སོགས་དང༌། མ་བཅོས་བཞག་པའི་སེམས་འདི་སངས་རྒྱས་ཡིན། །ཞེས་སོགས་བླ་མ་རང་སེམས་ལ་བཞུགས་པའི་ཞལ་ཆེམས་མཛད་ཅིང༌། སེམས་ཅན་ལ་ཕན་པ་ནི་དཀའ། གནོད་པ་ནི་ཡོད་པས་གདན་ས་དང་སྐུ་ལྡེར་དང་འབུམ་པ་སོགས་མི་མཛད་པར་ཞུ། གདན་ས་དང་བླ་མའི་རྣམ་ཐར་ལ་སོགས་པ་གང་ཡིན་ན་ཆོས་དང་མཐུན་པ་དེ་ཡིན་པས་རྒྱལ་བའི་བཀའ་དང་མི་འགལ་བ་རེ་མཛད་པར་ཞུ། གསུངས་ནས་དགུང་ལོ་དོན་ལྔ་པ་ཆུ་མོ་བྱ་ལོ་ཁྲུམས་ཀྱི་ཟླ་བའི་བཅོ་ལྔ་རི་སྐེད་ཉི་ཤར་དུས་མྱ་ངན་ལས་འདས། ལྟས་བསམ་གྱིས་(ན༣༣ན)
མི་ཁྱབ་ཅིང་གདུང་བཞུ་པའི་ཐུགས་སྒོ་མང་དུ་བཞུགས་སོ། །རྗེ་དེ་ལ་མཇལ་བ་དང་མོས་པ་བྱས་པས་རྟོགས་པ་སྐྱེས་པ་མང་དུ་བྱུང་ཞིང༌། སྒམ་པོའི་རི་མཐོང་བ་དང་ཞལ་མཐོང་བ་ཙམ་གྱིས་གྲོལ་བ་མང་དུ་ཡོད་ལ། སྤྱིར་ཤོ་སྒོམ་འཕགས་པ། ཟིམ་ཤི་ཡེ་ཤེས་སྙིང་པོ། གསེར་སྒོམ་ཡེ་ཤེས་སྙིང་པོ། རམ་སྙི་ཆོས་གཡུ་སྟེ་གྲུབ་ཐོབ་བཞི། དྭགས་པོ་སྒོམ་ཚུལ། གྲུབ་ཐོབ་དབུ་སེ། ཕག་གྲུ་པ། འབབ་རོམ་པ་སྟེ་རྒྱུད་འཛིན་བཞི། དྭགས་པོ་འདུལ་འཛིན། འགར་སྒོམ་དཀར་པོ། ལྷོ་ལ་ཡག་པ། ཀྱེ་བོ་ཡེ་རྡོར་སྟེ་ཉེ་བའི་སྲས་བཞི། རྨོག་ཅོག་པ། སྒོམ་ཆུང༌། གྲོལ་སྒོམ་ཆོས་གཡུང༌། གསལ་སྟོང་སྒོམ་ཤེ་སྟེ་ཐུགས་ཀྱི་སྲས་བཞི། ཇོ་སྟན། ལེགས་མཛེས། གསལ་བྱང༌། གསལ་མེ་སྟེ་ཉེ་གནས་བཞི། གཞན་ཡང་གཉགས་ནག་པོ་དང་རྫི་སྒོམ་སྐྱེས་སེ་སོགས་མཐའ་ཡས་པར་བྱོན་ནོ། །ཁྱད་པར་རྗེ་སྒོམ་ཚུལ་ནི་བླ་མ་རིན་པོ་ཆེའི་གཅེན་པོ་རྒྱ་བ་གསེར་རེའི་སྲས་སུ་འཁྲུངས། སྐུ་མཆེད་གསུམ་ལས་གཅེན་པོ་སློབ་དཔོན་སྒོམ་པ། བླ་མ་ཆེན་པོས་སོ་བརྒྱད་བཞེས་པ་མེ་སྤྲེ་ལ་འཁྲུངས། འབྲིང་སྒོམ་པ་གྲགས་ཤེས་བྱ་བ་ཡོན་ཏན་དང་ལྡན་པ་བྱོན་ཡང་སྔ་བར་འདས། ཆུང་བ་སྒོམ་ཆུང་ཡིན། སློབ་དཔོན་སྒོམ་པ་ལོ་ལྔ་པར་བླ་མ་རིན་པོ་ཆེ་དང་མཇལ། མཚན་འཛམ་གླིང་གྲགས་པར་བཏགས། མི་གཡོ་བ་ཡི་དམ་དུ་ཕོག་པས་ཞལ་གཟིགས། བཅུ་གཅིག་ལ་སྒྱུ་མ་ལྟ་བུའི་ཏིང་ངེ་འཛིན་འཁྲུངས། བཅུ་བདུན་ལ་མངའ་རིས་པ་ལས་རབ་ཏུ་བྱུང༌། མཚན་ཚུལ་ཁྲིམས་སྙིང་པོར་གསོལ། ཉི་ཤུ་ལ་ཤ་པ་གླིང་པ་ལས་བསྙེན་རྫོགས་མཛད། བླ་མ་ཆེན་པོས་མན་ངག་ཐམས་ཅད་རྫོགས་པར་གནང་སྟེ་བཅོ་བརྒྱད་པར་སྒོམ་མེད་ཀྱི་རྟོགས་པ་སྐྱེས། སྙགས་ལྷ་བྱར་མ་དང་ཤ་འུག་སྟག་སྒོ་ལ་སོགས་པར་སྒྲུབ་པ་མཛད། ཤོ་སྒོམ་འཕགས་པས་ཉམས་ཀྱི་འཆར་ལུགས་གོ་ལགས་སམ་གསུངས་པས། ཉམས་རྟོགས་ངོ་བོ་གཅིག་དུ་འདྲེས། །(ན༣༣བ)
ཆོས་ཀྱི་སྐུ་ལ་འདུ་འབྲལ་མེད། །ཉམས་རྟོགས་ཅན་ལ་ང་མི་སྨོན། །སོགས་གསུངས་པས་འཕགས་པས་བཤུམས། རྗེ་སྒམ་པོའི་ཞལ་ནས་ད་འོ་སྐོལ་གྱིས་ཁོ་མི་ཐུབ་ཉལ་དུ་འགྲོ་གསུངས་སྐད། དབང་ཞུ་ཕུག་དུ་ཞྭ་སྣ་རིང་གི་སྣ་བལྟབ་སྟེ་མནབས་པས་སློབ་དཔོན་སྒོམ་པའི་ཞྭ་ཞེས་སྒོམ་ཞྭར་གྲགས་པ་བྱུང༌། སྒོམ་ཚུལ་འདི་ཀུན་ས་བཅུའི་བྱང་ཆུབ་སེམས་དཔའ་ཁོ་བོས་སད་པར་བྱས་པ་ཙམ་ཡིན་གསུང་ཞིང་སོ་ལྔ་པ་ལྕགས་རྟ་ལ་འཁོར་རྣམས་སྐྱོང་བར་བསྐོས། དེ་ནས་ལོ་གསུམ་ན་བླ་མ་ཆེན་པོ་གཤེགས་པའི་ཐུགས་ལྗགས་ཀྱི་བཞུགས་ཁང་སྒོ་མང་དང་མཆོད་ཁང་རྙིང་མ་དང་སྒོམ་སྡེ་མཛད། སྟོད་ལུང་དུ་མཚུར་ལྷ་ལུང་བཏབ། ལྷ་ས་རྦ་འབྲིང་གི་སྡེ་འཁྲུག་གིས་ཞིག་ཅིང་སྟོངས་པའི་སྐབས་སུ་བླ་མ་རིན་པོ་ཆེ་དང་ཇོ་བོ་ཐ་མི་དད་པས་ཁྱོད་ཀྱིས་ད་འཇོག་ཕོད་དམ་གསུང་ཞིང་གསང་བ་འདུས་པའི་དཀྱིལ་འཁོར་དུ་གཟིགས་ནས། སྔོན་ཆོས་རྒྱལ་ཉིད་ཀྱིས། བྱང་ཆུབ་སེམས་དཔའ་ཤར་ལྷོར་སྐུ་འཁྲུངས་པ། །སྙིང་པོའི་མཐའ་ཅན་སྐྱེས་བུ་དམ་པ་ནི། །གཙུག་ལག་ཁང་ཆེན་འདི་ལ་ཕན་པར་འགྱུར། །ཞེས་ལུང་བསྟན་པ་ལྟར་སྡེ་འཁྲུག་བསྡུམས། ཞིག་གསོ་རྒྱ་ཆེར་མཛད་སྟེ་ཞང་རིན་པོ་ཆེ་ལ་གཏད། ཕྱ་པ་དང་རོང་པ་ཕྱག་སོར་བས་ཞབས་ལ་བཏུགས། གཙང་ནག་པས། སྐལ་མེད་སྐྱེ་བོས་རིང་ནས་ངན་བརྗོད་ཀྱང༌། །མཐོང་དང་འདྲིས་པའི་སྐྱེ་བོ་དད་འགྱུར་ཞིང༌། །མངོན་རློམ་དྲེགས་པ་བརྒྱ་དག་ཟིལ་གནོན་པ། །བསོད་ནམས་གཟི་ལྡན་སྐུ་ལ་སྐྱབས་སུ་མཆི། །ཞེས་བསྟོད་པ་བྱས། དགུང་ལོ་ལྔ་བཅུ་རྩ་བཞི་པ་གླང་ལོ་ལ་སྐུའི་བཀོད་པ་བསྡུས་སོ། །རྣལ་འབྱོར་ཆོས་གཡུང་གཉིས་ཀྱི་ཀླུང་ཤོད་པ་ནི་གྲུབ་ཐོབ་ཆེན་པོར་བཞུགས་ལ། འོལ་ཁ་ཆོས་གཡུང་ནི་ཆོས་དྲུག་གི་ཡོན་ཏན་མཐར་ཕྱིན། སེ་མོ་དོར་ངང་པ་ལ་གྲོང་འཇུག་མཛད་པས་དཔལ་རྒྭ་ལོ་སློབ་མར་འདུས། རྗེ་སྒམ་པོ་བ་དང་དཔོན་སློབ་ཐུགས་རྒྱུད་གཅིག་པར་(ན༣༤ན)
གྲགས། ཚོགས་ཀྱི་རེས་ལ་ལྷའི་བདུད་རྩི་དྲངས། བ་རི་ལོ་ཙཱ་དང་ཕ་དམ་པའི་མཆོད་གནས་མཛད། ཞང་རིན་པོ་ཆེའི་བླ་མར་གྱུར། གོ་བདུན་པ་ས་ལུག་ལ་ཐེགས། ལྷོ་ལ་ཡག་པ་བྱང་ཆུབ་དངོས་གྲུབ་ནི་ཏར་ཁ་བོ་དྷི་རཱ་ཛ་ཞེས་པ་རྙིང་མའི་གྲུབ་ཐོབ་ལོ་བརྒྱ་དང་བཅུ་གཉིས་བཞུགས་པའི་སྲས་ཏར་ཁ་དཔལ་སྐྱེད་དང་ཡུམ་མཁའ་འགྲོ་མ་ཞིག་གི་སྲས་སུ་འཁྲུངས། ཆུང་ངུའི་དུས་ལག་པ་དཀར་པོ་རྒྱན་ཅན་ཞིག་གིས་བུ་རྫི་བྱེད་པ་བྱུང༌། ཀློང་མ་བསླབས་པར་ཤེས། མདོ་སྔགས་མཐའ་དག་ལ་སྦྱངས། སྒོམ་པ་ཞི་མཛེས་ཀྱིས་ཁྲིད་ནས་སྒམ་པོར་བྱོན། ཉི་མ་རྒས་ཀའི་སྦང་ཐན་འདྲ་སྟེ་རྗེ་བཙུན་དང་ངའི་ལས་འབྲེལ་ལྟ་བུ་ཞིག་འདི་དང་ང་ལ་ཡོད་གསུངས་ནས་མཚམས་ཁོང་དུ་བཅུག་ནས་གདམས་ངག་ཐམས་ཅད་གནང༌། རྟོགས་པ་ན་མཁའ་ལྟ་བུ་འཁྲུངས། བླ་མས་ལུང་བསྟན་པ་ལྟར་ཕྱིས་བདེ་མཆོག་གི་སྒྲུབ་ཐབས་དང་དྭགས་པོའི་ཆོས་བཞིའི་འགྲེལ་བ་སོགས་མཛད་སྟེ་དེང་དུའང་དར་རོ། །གྲུབ་ཐོབ་དབུ་སེ་ནི་བསྐལ་བཟང་གི་སངས་རྒྱས་སེང་གེ་ཤཱཀྱའི་བསྟན་པ་ལ་ཚངས་པར་སྤྱོད་པ་སྟེ་ཤར་ཀྲེ་ཤོད་དུ་འཁྲུངས། མཆོག་གི་བླ་མ་ལས་རབ་ཏུ་བྱུང༌། དེའི་ཚེ་མཁའ་འགྲོ་ཐམས་ཅད་ཀྱིས་དབུ་ཞྭ་ནག་པོ་འབུལ་བ་དང་ཀརྨ་པའི་མཚན་གསོལ་(ན༣༤བ)
བར་གཟིགས་པས་ཕྱིས་དབུ་ཞྭ་ནག་པོ་མནབས། ལོ་ཉི་ཤུ་ལ་དབུས་སུ་བྱོན་སྟེ་སྟོད་ལུང་རྒྱ་དམར་བ་དང་ཕྱ་བ་སོགས་བསྟེན། གསུང་རབ་མཐའ་དག་ལ་སྦྱངས། ཤར་བ་པ་དང་དཔལ་རྒྭ་ལོ་སོགས་བསྟེན་སྟེ་གདམས་ངག་བོད་ན་བཞུགས་སོ་འཚལ་གསན། དགུང་ལོ་སུམ་བཅུ་བཞེས་པ་ཆོས་རྗེས་རེ་གཅིག་བཞེས་པ་ན་རྗེ་སྒམ་པོ་པ་ཁུ་དབོན་མཇལ། གདམས་ངག་ཐམས་ཅད་གནང་སྟེ་སྒོམ་ཆེན་བརྒྱད་བརྒྱའི་ནང་ན་སྒོམ་སྲན་ཆེ་བར་གྲགས། ཆོས་རྗེས་ལུང་བསྟན་སྟེ་འོལ་ཁ། ཟངས་རི། ཕག་མོ་གྲུ་མོན་དོམ་ཚང་སོགས་སུ་བསྒོམས། རྗེ་བཙུན་མི་ལའི་དངོས་སློབ་བདུན་གྱི་གདམས་ངག་ཐམས་ཅད་རྫོགས། ཆོས་རྗེས་བུ་ཁྱོད་སྒྲུབ་པ་ཁམས་ཀྱི་ཀམ་པོ་གངས་རར་གྱིས་འགྲོ་དོན་དབུས་གཙང་ཁམས་གསུམ་ཁྱབ་པར་འབྱུང་ཞེས་གཞན་ལ་མ་གནང་བ་སྐྱེད་རིམ་ལྷན་ཅིག་སྐྱེས་མ་དང་རྫོགས་རིམ་རླུང་སེམས་གཉིས་མེད་སོགས་གནད་མཐའ་དག་གནང༌། ཇོ་མོ་གངས་དང་གཞུ་གྲུ་བཞི་ལ་སོགས་པར་སྒྲུབ་པ་མཛད། ཆོས་རྗེ་གཤེགས་པ་མཁྱེན་ནས་བྱོན་པས་ན་མཁའ་ལ་དངོས་སུ་བྱོན། དགུང་ལོ་ང་ལྔ་ལ་ཁམས་སུ་བྱོན་སྟེ་ཀམ་པོ་གནས་ནང་དུ་སྒྲུབ་པ་རྩེ་གཅིག་དུ་མཛད། དོན་ལྔ་ནས་འབྲི་ཆུའི་རྒྱུད་སོགས་སུ་གཞན་དོན་མཛད་སྟེ་བརྒྱད་བཅུ་ནས་མཚུར་ཕུར་དགོན་པ་བཏབ། སྔོན་དགུང་ལོ་ལྔ་བཅུ་ཙམ་གྱི་ཚེ་དཔལ་ཕག་མོ་གྲུབ་པས་ཁྱེད་ཁམས་སུ་མ་འབྱོན། འབྱོན་ནའང་དབང་སྐུར་དང་རབ་གནས་མང་པོ་མ་མཛད་སྐུ་ཚེ་ལ་བར་ཆད་བྱུང་དྭོགས་ཡོད་ཅེས་བྱུང་བ་ན་ཁོ་བོ་དབང་བསྐུར་ཡང་བརྒྱད་བཅུ་རྩ་བཞི་མ་བསྐུར་ཡང་བརྒྱད་བཅུ་རྩ་བཞི་ཡིན་ཞེས་གསུངས་པ་ལྟར་གྱ་བཞི་ལ་རྟེན་དང་ཕྱག་དཔེ་རྣམས་མ་འཐོར་བ་གྱིས་གསུངས་སྟེ་ཐེགས། བཀའ་བབ་ཀྱི་བུ་ལྔ། རྒྱུད་འཛིན་གྱི་བུ་བཞི། ཉེ་གནས་འོད་བཞི། བླ་མ་བཞི། སྔ་བུ་བཞི། ཕྱི་བུ་བཞི་སོགས་མཐའ་ཡས་པར་བྱོན་ཞིང་སྤྲུལ་པའི་སྐུ་རྒྱུན་མི་ཆད་པར་བྱིན་གྱིས་བརླབས་སྟེ་སངས་(ན༣༥ན)
རྒྱས་རས་ཆེན་ལ་བརྒྱུད་པ་གཏད་ཅིང་ཁྱད་པར་གྲུབ་ཐོབ་ཀརྨ་པཀ་ཤིས་ཧོར་རྒྱལ་པོས་བསྟན་པ་གཞིག་མི་ནུས་པར་མཛད། རྗེ་རང་བྱུང་རྡོ་རྗེས་གྲུབ་ཐོབ་མཐའ་ཡས་པ་ཕྱུང༌། རྗེ་རོལ་པའི་རྡོ་རྗེས་རྒྱ་བོད་ཧོར་གསུམ་བཏུལ། རྗེ་དེ་བཞིན་གཤེགས་པས་བོད་རྒྱ་དམག་གི་འཇིགས་པ་ལས་བསྐྱབས། རྗེ་མཐོང་བ་དོན་ལྡན་གྱིས་སྔགས་ཀྱི་གདུལ་བྱ་རྣམས་བཏུལ། རྗེ་བདུན་པས་ལུང་རྟོགས་གཉི་གའི་བསྟན་པ་སྤེལ། ཕྱི་དུས་སྤྱིར་བསྟན་པ་ཐམས་ཅད་དང་ཁྱད་པར་བཀའ་རྒྱུད་ཀྱི་བསྟན་པ་ཉམས་སྟེ་ཟས་གོས་ཀྱིས་ཕོངས་པའི་མུ་ཏོ་པ་ཐམས་ཅད་ཀྱིས་བཀའ་རྒྱུད་པར་ཁ་གཡར་སྟེ་སྒབ་རྡུམ་མགོ་སོག་རེ་བྱས་ནས་ཆང་ཚུལ་ཁ་ཐམས་ཅད་ཉུལ་ཞིང་རྣམ་རྟོག་ཆོས་སྐུ་ཨེ་ཡིན་ཁྱོད་ཀྱིས་རྐྱེན་ཨེ་ཐེག་ཟེར་ཞིང་རྩོད་རུས་བསྣུན་པས་བསད་ཤི་མང་དུ་བྱེད་ཅིང་གྲག་ཤོས་རྣམས་ཀྱང་བླང་དོར་མེད་ཟེར་ཞིང་ལས་འབྲས་ཁྱད་དུ་གསོད། རྙེད་བཀུར་སྣ་རེའི་ཆེད་དུ་མི་བྱ་བ་དང་མི་ཟེར་བ་ཅི་ཡང་མེད་པས་བོད་ཡུལ་གང་བའི་དུས་སུ་བདག་གི་བླ་མ་ཀརྨ་པ་བརྒྱད་པའི་ཞབས་ཀྱིས་སངས་རྒྱས་ཀྱི་བསྟན་པ་རྨང་ནས་བསོས་སྟེ་ཆོས་མིན་རྣམས་ནུབ་ཅིང་ཉན་ཐོས་ཀྱི་ངེས་འབྱུང་ཐེག་ཆེན་གྱི་སེམས་སྐྱེད་གསང་སྔགས་ཀྱི་དམ་ཚིག་རྣམ་པར་དག་པ་དང༌། ཁྱད་པར་བཀའ་རྒྱུད་རིན་པོ་ཆེའི་མར་རྔོག་གི་རྒྱུད་བཤད། མི་ལའི་སྙིང་རུས་དང་མན་ངག །སྒམ་པོ་པའི་ངོ་བོའི་ག་དར། ཕག་གྲུ་པའི་གསང་སྔགས། འབྲི་ཁུང་པའི་ཁྱད་ཆོས་རྣམས་ཀྱི་དགོངས་པ། གཙང་པ་རྒྱ་རས་ཀྱི་རྟེན་འབྲེལ་དང་རོ་སྙོམས། ལོ་རྒོད་ཀྱི་མོས་གུས་དང་ཞེན་ལོག །དེ་ཐམས་ཅད་རླུང་སེམས་དབྱེར་མེད་ཀྱི་ངོ་བོར་གཉིས་མེད་དུ་ཚང་ལ་མ་འདྲེས་པ་དར་བར་མཛད་སྟེ་མར་མི་དྭགས་གསུམ་གྱི་བཀའ་རྒྱུད་ཐམས་ཅད་ཀྱི་བསྟན་པ་རྨང་ནས་བསོས་པ་ཡིན་ལ་རྗེ་བཙུན་གྱིས་རྗེ་དྭགས་པོ་ལ་དུག་གསུམ་རྒྱས་པའི་མི་དང་མ་འགྲོག །སྤྱིར་ཡང་རི་དྭགས་རྨས་མའམ་བྱ་བཞིན་དུ་ཟོན་བག་ཆེ་བར་བྱ། (ན༣༥བ)
ཞི་བ། དུལ་བ། ཅེ་རེག་ཆུང་བར་བྱ། བཟོད་པ་ཆེ་བར་བྱ། ཐམས་ཅད་དང་མཐུན་པར་བྱ། གཙང་སྦྲ་ཤིན་དུ་ཆེ་བར་བྱ། རྟོག་པ་ཤིན་དུ་ཆུང་བར་བྱ། རེ་མཚམས་དང༌། སྨྲ་བཅད་དང༌། འདག་སྦྱར་གསུམ་གྱིས་དུས་འདའ་བར་བྱ། རང་སེམས་སངས་རྒྱས་སུ་རྟོགས་ཀྱང་བླ་མ་རྡོ་རྗེ་སློབ་དཔོན་མི་སྤོང་བ་ལ་བསླབ། གསག་སྦྱང་གཉིས་པོ་རང་སར་དག་ཀྱང་ཚོགས་ཆུང་ངུ་ཆུང་ངུ་ནས་གསག །ལས་འབྲས་ན་མཁའ་ལྟར་གོ་ཡང་སྡིག་པ་ཆུང་ངུ་ནས་འཛེམ། མཉམ་རྗེས་འདྲེས་པའི་ཉམས་ཡོད་ཀྱང་ཐུན་བཞིའི་རྣལ་འབྱོར་རྒྱུན་ཆད་མེད་པར་ཉམས་སུ་བླང༌། བདག་གཞན་མཉམ་ཉིད་དུ་གོ་ཡང་ཆོས་དང་གང་ཟག་ལ་སྐུར་པ་མི་གདབ། ཅེས་གསུངས་པའི་དགོངས་པ་རྫོགས་པར་མཛད་ཏོ། །རྗེ་དུས་མཁྱེན་གྱི་ཉེ་གནས་ན་མཁའ་འོད་ཀྱི་སྐུའི་སྐྱེ་བ་བརྒྱུད་པ་ཤ་གྲགས་པ་སེང་གེ་ནས་བཟུང༌། ཞྭ་དམར་ཅོད་པན་འཛིན་པའི་བཀའ་རྒྱུད་དར་རྒྱས་སུ་གྱུར་ལ། སྤྱིར་ཞྭ་ནག་གི་ཅོད་པན་འཛིན་པ་ན་རིམ་བཅུ་གཅིག་དང༌། ཞྭ་དམར་གྱི་ཅོད་པན་འཛིན་པ་ཉི་ཤུ་རྩ་གཅིག་འབྱོན་པར་གསུངས་པ་ལས་ད་ལྟ་ཞྭ་ནག་གི་ཅོད་པན་འཛིན་པ་དགུ་པ་བྱོན་མ་ཐག་དང་ཞྭ་དམར་གྱི་ཅོད་པོད་ཅན་འཛིན་པ་ལྔ་པ་སེང་ཁྲི་ལ་བཞུགས་པ་ཞབས་བརྟན་པར་གྱུར་ཅིག །རྗེ་སྒོམ་ཚུལ་གྱིས་ལོ་བཅུ་དགུ་གདན་སར་བཞུགས་པ་ནས། རྗེ་སྒོམ་ཆུང༌། ལྷོ་ལ་ཡག་པ། དྭགས་པོ་འདུལ་འཛིན་རྣམས་རྗེ་སྒམ་པོ་བ་ཉིད་ཀྱི་དངོས་སློབ་དང༌། དེ་ནས་རྗེ་འཇིག་རྟེན་མགོན་པོས་གདན་སའི་མིང་མ་མཛད་པར་བསྐྱངས། དེ་ནས་སྤྱན་སྔ་འབྲི་ཁུང་གླིང་པ། དམ་ཆོས་གླིང་པ། ཆོས་ཚུལ་པ་རྣམས་འབྲི་ཁུང་པའི་ཞལ་སློབ་དང༌། དེ་ནས་སྒོམ་པ་མཆེད་ཀྱི་བུ་ཆེན་ལྷ་ལུང་པ། བོར་གནས་པ། ཆོས་དབང་བ་ཡིན་ལ། དེ་ནས་སྤྱན་སྔ་ཇོ་སྲས་པ་ནས་ཕྱི་རུས་གཅིག་པའི་དབོན་རྒྱུད་ཀྱིས་གདན་ས་བསྐྱངས་པ་སྟེ་འདི་ཐམས་ཅད་ཕྱི་མས་སྔ་མ་ལ་ཆོས་གསན་པར་མ་ངེས་སོ། །རྗེ་སྒོམ་ཚུལ་གྱི་སློབ་མའི་གཙོ་བོ་ནི་ཞང་རིན་པོ་ཆེ་སྟེ། འཁྲུངས་ཡུལ་སྐྱིད་ཤོད་ཚ་བ་གྲུ་གདུང་སྣ་ནམ་ཞང༌། ཡབ་རྡོ་རྗེ་སེམས་དཔའ་(ན༣༦ན)
ཡུམ་ཡག་མོ་མང་སྐྱིད་ཀྱི་སྲས་སུ་ཆུ་སྟག་ལ་འཁྲུངས། མཚན་དར་མ་གྲགས། ཆུང་ངུ་ནས་སྤྲུལ་པར་གྲགས་སྟེ་ཐམས་ཅད་ཀྱིས་བྱིན་རླབས་ཞུ། ལོ་དྲུག་པ་ན་ཡབ་ཀྱིས་གཞན་ལ་དམྱལ་བའི་སྡུག་སྔལ་བཤད་པ་གོ་སྟེ་ཅི་ཕན་དྲིས་པས་སྐྱབས་འགྲོ་དང་ལྷ་ཕྱག་ཕན་ཟེར་བས་རྟེན་གྱི་དྲུང་དུ་སྐྱབས་འགྲོ་དང་ཕྱག་མཛད། མས་ཡིག་བརྒྱ་བསླབས་སྟེ་ནང་ནུབ་ཉིན་གསུམ་དུ་མ་ཆག་པར་བཏོན། ཆག་པ་ན་རྨི་ལམ་དུ་བྲེད་སྔངས་བྱུང་བས་འཆག་མ་སྟུབ། དགུ་ནས་བཅོ་བརྒྱད་ཀྱི་བར་ལ་མདོ་སྔགས་མང་དུ་གསན། ལོ་གསུམ་དུ་འདྲེའི་མཐུ་བསྒྲུབས། ཡབ་ཡུམ་གྲོངས་པས་སྐྱོ་སྟེ་ཁམས་སུ་བྱོན། གཞན་གྱི་མཐུ་པ་མཛད་ཚེ་ཅིས་ཀྱང་དྭོགས་མེད་སྐྱེས་མཐུའི་རྫས་རྣམས་གཏོར། རུ་བཙུན་ཆུང་གི་བཤིད་ཀྱི་དུས་རབ་བྱུང་མཛད་པར་བརྩམས་པས་ངེད་ཁམས་པ་ཀུན་དབུས་སུ་འགྲོ་བ་ལ་དབུས་པ་ཁམས་སུ་ཆོས་བྱེད་པ་ག་ན་འོང་ཟེར་བླ་མ་དང་ཡོན་བདག་ཀུན་གྱིས་གཤོལ་ཡང་དེ་སྲིད་མི་འཆི་བའི་གདེང་ཅི་ཡོད་སྙམ་ནས་མཁན་པོ་རྒྱ་སྟོན་མཁར་མགོ་བ་དང་ལས་སློབ་གྲབ་མཁར་བ་ལས་ལོ་ཉེར་དྲུག་ལ་བསྙེན་པར་རྫོགས་སྟེ་མཚན་བརྩོན་འགྲུས་གྲགས་པར་བཏགས། དཔལ་ཆེན་པོ་རྒྭ་ལོ་ཁམས་སུ་བྱོན་པ་མཇལ། མོས་གུས་རྩོལ་མེད་དུ་སྐྱེས། སྔ་ཕྱིར་གདམས་ངག་ཐམས་ཅད་རྫོགས། ཕུགས་སུ་བདག་རབ་སྒང་དུ་མཆིས་ལ་སྒོམ་པར་ཞུ་ཞུས་པས་ནམ་ཕུགས་སེམ་པའི་སྒོམ་ཆེན་པ་སྐྱུག་བྲོ་གསུངས། གདམས་པ་དེ་རང་ཆེ་བར་བྱུང༌། བསྒོམས་པས་ཉམས་མྱོང་ཇི་ལྟ་བུ་ཡང་བྱུང༌། དབུས་སུ་བྱོན་ནས་འགར་གྲོང་བྲག་ལ་བསྒོམས་པས་གེགས་མང་དུ་བྱུང་ནས་སྤོས་ཁར་བྱོན་པས་མ་མཇལ་ཡང་དད་པ་སྐྱེས། གེགས་སེལ་གྱི་སམྤུ་ཏྲ་གནང་བས་ཕན་ཐོགས། ཕྱིས་མཇལ་བ་ན་དཔལ་ཆེན་པོའི་གདམས་ངག་གིས་ཐུགས་ཁེངས་པ་མཁྱེན་སྟེ་གེགས་སེལ་ལ་བསྙད་ནས་ན་རོ་པའི་གདམས་ངག་ལ་བཙུད། ན་ཟ་རྐྱང་པ་མཛད་ནས་བསྒོམས་སྟེ་དེ་ཕྱིན་རླུང་གི་སྐྱོན་མ་བྱུང༌། བཟའ་བཏུང་(ན༣༦བ)
བཟང་པོ་རླུང་བཅོས་དགོས་པའང་ངན་ལང་དུ་འདུག་གསུངས། རྨི་ལམ་ལ་རང་དབང་ཐོབ། རྗེ་ཡེར་པ་བ་མཇལ་ནས་བསམས་པས་སྔར་དགེ་སྦྱོར་བྱས་ཚད་ལ་ཚེ་འདིའི་རྟོག་ངན་ལོ་འདོད་གཡོ་སྒྱུ་ཟོལ་ཟོག་གཞན་གྱི་ཕྱེ་གཏོར་འགམས་པ་སོགས་དང་འདྲེས་པ་ད་གདོད་ཚོར། ཕྱིན་ཆད་ཞེ་དམ་དང་གཉེན་པོས་འབུར་འཇོམས་བྱས། ང་ལ་ནི་ཚེ་འདིའི་རྟོག་ངན་ཁོ་ན་སྤང་དཀའ་བར་བྱུང་གསུངས། ཆོས་བྱེད་ན་གནད་འདི་ཤེས་དགོས་པར་གོ །ལམ་འབྲས་ཞ་མའི་ལུགས་ཀྱི་ལྷ་གོ་རར་ཞུགས་ཤིང་ལུས་ལ་བསྟིམ་པ་མཛད་པས་རྗེ་བཙུན་མའི་སྐུར་ཞག་གསུམ་བཞུགས། རྗེ་སྒོམ་ཚུལ་དང་མཇལ་བས་བཀའ་རྒྱུད་ཀྱི་བྱིན་རླབས་ཞུགས། སེམས་ཀྱི་ངོ་བོ་ཡང་དག་པར་གཟིགས་པས་སྔར་ནས་མཁྱེན་པའི་ཆོས་ཐམས་ཅད་ཇི་ལྟ་བར་རྟོགས་ནས་སྒྲོ་འདོགས་ཀུན་ཆོད། སྤྱིར་དཔལ་རྒྭ་ལོ་ཡེ་ཤེས་མགོན་པོ་ཡིན་ངེས། མལ་ཡེར་པ་བ་རྡོ་རྗེ་རྣལ་འབྱོར་མ་ཡིན་ངེས། དངུལ་ཆུ་བཻ་རོ་བ་ཧེ་རུ་ཀ་ཡིན་ངེས། རྗེ་སྒོམ་ཚུལ་རྡོ་རྗེ་འཆང་ཡིན་ངེས་སྟེ་ཡིན་ངེས་ཀྱི་བླ་མ་བཞི། དེའི་སྟེང་དུ་འོལ་ཁ་བ་དང་གཤེན་པ་རྡོ་རྗེ་སེང་གེ་བསྣན་པས་རྩ་བའི་བླ་མ་དྲུག་ཕྱིར་ཆོས་ཐོབ་ཀྱི་བླ་མ་སོ་དྲུག་ཡོད། མནལ་ལམ་བཟུང་ནས་སུམ་བཅུ་རྩ་གསུམ་དུ་བྱོན། ཨོ་ཌྱན་དུ་འབྱོན་བཞེད་པ་ན་ཡེ་ཤེས་མགོན་པོས་ཕྲིན་ལས་བཞིའི་དངོས་གྲུབ་ཕུལ། གཟའ་དང་རྒྱུ་སྐར་ཐམས་ཅད་ཀྱིས་སྲོག་སྙིང་ཕུལ། རང་ཉིད་ཡི་གེ་ཧཱུྃ་དམར་པོར་གྱུར་པ་རྡོ་རྗེ་རྣལ་འབྱོར་མའི་གསང་བ་ནས་དྲངས། གྲོངས་པ་ཡིན་ནམ་བསམ་པ་ཡུད་ཙམ་ཤར། ལྟེ་བར་འགྲོ་བ་རིགས་དྲུག་ཐམས་ཅད་དང་སྔར་འདས་པའི་བླ་མ་སྟོང་རྩ་བརྒྱད་སོགས་དང༌། མ་འོངས་པ་གཞེང་བའི་མཆོད་ཁང་དང༌། མཆོད་རྟེན་བང་རིམ་གསུམ་ཚར་བའི་སྟེང་ན་ཉིད་ཀྱི་གདུང་བཞུ་བ་སོགས་དང༌། སྙིང་ཁར་འཛམ་གླིང་བྱེ་བ་ཕྲག་བརྒྱ་ན་ཉིད་བྱེ་བ་ཕྲག་བརྒྱས་རྡོ་རྗེ་གདན་ལ་མཆོད་པ་བྱེད་པ་དང༌། མགྲིན་པར་སངས་རྒྱས་ཀྱི་ཞིང་མཐའ་(ན༣༧ན)
ཡས་པའི་དབུས་ན་རང་ཉིད་རྣམ་སྣང་དུ་སངས་རྒྱས་ནས་ཆོས་ཀྱི་འཁོར་ལོ་བསྐོར་བ་དང༌། སྤྱི་བོར་རྡོ་རྗེ་རྣལ་འབྱོར་མ་ལྷ་བདུན་གྱི་དཀྱིལ་འཁོར་གཟིགས་ཤིང་འཁོར་ལོ་བཞིར་ཡས་རིམ་གྱིས་དབང་བཞི་ཐོབ་ནས་ཧེ་རུ་ཀའི་རྣམ་པས་ཕྱིར་བྱུང་ནས་མཚོ་སྐྱེས་རྡོ་རྗེར་མཚན་གསོལ་བ་དང༌། ཡང་རྣལ་འབྱོར་མས་ཆོས་ཅིག་གསུངས་པ་ལས་མནལ་སད་ནས་ནམ་སྨིན་གྱི་ལུས་དག་སྟེ་སྒྱུ་འཕྲུལ་དྲ་བའི་སྐུར་གྱུར་ལུས་གཟུགས་སྐུ་དང་སེམས་ཆོས་སྐུར་སངས་རྒྱས་པའོ། །གཞན་ཡང་གནས་བདུན་དུ་གསང་བའི་རྣམ་ཐར་བདུན་ཟབ་ཆོས་དང་བཅས་པ་བསྟན་ཞིང་སྤྱིར་དེའི་དུས་བོད་རྒྱལ་ཁྲིམས་མེད་པ་སིལ་བུར་སོང་བའི་སྐབས་ཡིན་པས་ཐམས་ཅད་ལ་རི་རྒྱ་ཀླུང་རྒྱ་ལམ་རྒྱ་མཛད། རྒྱ་འོག་དུ་མི་འདུ་བ་རྣམས་ལ་དམག་གཡུལ་ངོ་སོགས་དྲག་པོའི་འཕྲིན་ལས་མཛད་པས་སློབ་མ་རྣམས་ལའང་འཁྲུག་གྲལ་དུ་ཕྱག་རྒྱ་ཆེན་པོའི་རྟོགས་པ་སྐྱེས་པ་མང་དུ་བྱུང་ཞིང་དཔོན་དར་མ་གཞོན་ནུས་འཁྲུག་གྲལ་དུ་བདེ་མཆོག་ཞལ་མཐོང༌། ཚལ་གྱི་ན་སྦལ་ལྗོང་གིས་གང་བ་དེ་ལ་ཤིང་རིང་པོའི་སྣ་གཉིས་ལ་ཐག་པ་བཏགས། དེ་ཉིད་ཀྱི་མགུལ་ལ་བཞེས་ནས་འདྲུད་པ་མང་དུ་མཛད་ནས་ན་ཁ་དམར་ཉོག་གིས་སོང་བ་ན་དེ་རིང་དོན་ཆེན་པོ་བྱུང་གསུངས་ནས་མཉེས་པར་མཛད། སྤྱིར་ངན་སོང་གསུམ་བསྒྲལ་བའི་ཞིང་དུ་བཤད་ཀྱང་དྲག་པོའི་འཕྲིན་ལས་མངོན་སུམ་དུ་མཛད་པ་རྒྱ་གར་དུ་བིརྺ་པ་དང་བོད་དུ་ཞང་རིན་པོ་ཆེ་ལས་མ་བྱུང་ཞེས་གྲུབ་ཐོབ་ཨོ་ཌྱན་པས་གསུངས། རྗེ་སྒོམ་ཚུལ་གྱིས་ལུང་བསྟན་སྟེ་མེ་ལུག་ལ་གུང་ཐང་གི་གཙུག་ལག་ཁང་ལྷ་ཆེན་དང་བཅས་པ་བཞེངས། བདེ་མཆོག་གི་ཕོ་བྲང་གཟིགས་སར་ཡང་དགོན་བཏབ། རྫུ་འཕྲུལ་དང་སྐུའི་བཀོད་པ་དང་ཕྲིན་ལས་ནི་མཐའ་ཡས། དོན་གཉིས་པ་ཆུ་གླང་ལ་འབུམ་མོ་ཆེ་རྨང་བཏིང་པའི་བང་རིམ་གསུམ་ཚར་བ་ན་མྱ་ངན་ལས་འདས་སྟེ་དེའི་སྟེང་དུ་གདུང་བཞུ་ཞིང་རྟེན་ངོ་མཚར་ཅན་མང་དུ་བྱོན་ནོ། །སྔོན་ན་མཁའ་འོད་ལ་གདན་སའི་བཀའ་གནང་(ན༣༧བ)
བ་བཅག་པས་སྐུ་ཚེ་ཐུང་བ་དང༌། ཕྱི་མ་ནས་འཕྲིན་ལས་ཆེར་བར་ལུང་བསྟན། མཉམ་མེད་སངས་རྒྱས་ཡེ་ཤེས་ཅེས་པས་ཡར་འབྲོག་སྟག་ལུང་ལ་མཁས་གྲུབ་ཆེན་པོ་དེ་ཁྲིད་གཉེར་མཛད་བཞིན་པ་ལས་ཞང་རིན་པོ་ཆེ་རེ་བདུན་བཞེས་ཚེ་གདན་སར་བསྐོས། ལོ་ཉེར་གཅིག་བཞུགས་སྟེ་སྐུ་འབུམ་ཆེན་མོ། གདུང་རྟེན་མཐོང་གྲོལ་ཆེན་མོ། ཁྱམས་སྨད། ལྕགས་རི་ནང་མ། རྒྱ་ཕིབས་གསེར་ཕྲུ་སོགས་བཞེངས། དེ་ནས་ལྷ་ཕྱུག་པ་ཉི་ཟླ་འོད་ཀྱིས་ལོ་ལྔ། ཁོང་གི་ཉེ་གནས་སངས་རྒྱས་འབུམ་གྱིས་ལོ་ལྔ་བྱས་ཚེ་བླ་ཚང་དང་དཔོན་ཚང་ཞིག་ནས་ཁོང་ཟུར་དུ་བཞུགས་པ་ལས་སྒོམ་སྡེ་བ་བྱུང༌། སླར་སངས་རྒྱས་སྙིང་པོ་ལོ་བདུན། སངས་རྒྱས་རས་པ་ལོ་ཉེར་གསུམ། གསེར་ཁང་སྟེང་པ་ལོ་སོ་གསུམ་སོགས་རིམ་པར་བྱོན་ནོ། །ཞང་རིན་པོ་ཆེའི་བུ་ཆེན་འོད་བཞིར་གྲགས་པ་ལས་ན་མཁའ་འོད་ནི་ཡུལ་གྲའི་འཇད། འདིས་སྤང་གཤོག་ལྷ་རི་ཁ་བཏབ་ཅིང་སངས་རྒྱས་ལྷ་དགེ་སངས་རྒྱས་དཔོན། དེ་ཝ་ཀུ་མ་ར་ཡན་དུ་སྐྱེས་བུ་དམ་པ་བྱོན། འདིའི་ཡན་ལག་ཀོང་པོར་གྱང་མཐོ། ཟུ་རུ་གདོང༌། གསོམ་ཁ་བྲག་སྟེ་དགོན་སྐོར་གསུམ་དང༌། འབྲོག་ཡང་སྟེང་ལ་སོགས་པའོ། །ལྷ་ཕྱུག་པ་ཉི་ཟླ་འོད་ནི་དོལ་གྱི་ཞུར་ན་ལུང་དུ་འཁྲུངས། ལྷ་ཕྱུག་མཁར་བཏབ། བླ་མ་སྤྱན་སྔ་བ། མཁས་པ་སྟོན་ནམ། བླ་མ་བ་ལམ་པ་སོགས་གདན་ས་རིམ་པར་བྱུང་ཞིང་འདི་དག་གི་སློབ་མ་སྣང་སྒོམ་ཞིག་པོས་བྲག་རྟ་སྒར་སྒྲུབ་པའི་རྒྱལ་མཚན་བཙུགས་པ་ནས་མངའ་རིས་གློ་པོ་མེན་ཞང་སོགས་སུ་སྐྱེད་ཚལ་མཐའ་ཡས་པར་འཕེལ་ལོ། །རྟོགས་ལྡན་རུ་ཐོག་པས་མལ་འགྲོ་རུ་ཐོག་བཏབ་ཅིང་དེ་ལས་མཆེད་པའང་དུ་མ་བྱུང་ངོ༌། །ཁ་རག་པ་འདུལ་བ་འོད་ནི་མཚན་དགེ་སློང་དངོས་གྲུབ་བླ་མ་ཟེར། ཞང་རིན་པོ་ཆེས་འདུལ་བ་འོད་དུ་བཏགས། རྟོགས་ལྡན་ཉག་པོ་སེང་གེར་ཡང་གྲགས། འཁྲུག་པ་ལ་སོགས་པ་ཞང་རིན་པོ་ཆེའི་བཀའ་ཐམས་ཅད་བསྒྲུབས། ཁ་རག་དུ་སྒྲུབ་པ་མཐར་ཕྱིན། སློབ་མའི་ནང་ན་གྲུབ་རྟགས་ཆེ་བར་གྲགས། (ན༣༨ན)
དགོན་པ་མང་དུ་བཏབ་ཅིང་དབོན་པོས་གདན་ས་བཟུང་ནས་མགོན་པོའི་གྲུབ་ཐོབ་ཏུ་གྱུར་ཏོ། །འདྲིར་པ་ཤཱཀྱ་འོད་ཀྱིས་བྱང་དུ་དགོན་པ་བཏབ་ཅིང་དར་རྒྱས་སུ་གྱུར་ཏོ། །ཡང་བྲག་ནག་པས་ཞང་གི་ལུང་བསྟན་ལྟར་ཡ་འབྲོག་དུ་བྲག་ནག་བཏབ་སྟེ་དེ་ལས་ལྷོ་བྲག་གི་བདེ་ཆེན་དང་ཞོང་ཁ་སོགས་མཆེད་ཅིང་འདི་ལས་མཁས་བཙུན་སེང་གེ་རྫོང་པ་མཁར་ཆུ་ནས་མཁའ་སྤྱོད་ལ་དངོས་སུ་བྱོན་ནོ། །ཡར་ལུང་པ་གྲགས་པ་སེང་གེས་ཞང་རིན་པོ་ཆེའི་ལུང་བསྟན་བཞིན་མི་ཉག་གི་ཡུལ་དུ་སྒྲུབ་པ་མཛད་སྟེ་རྒྱལ་པོའི་བླ་མར་གྱུར་ནས་གོ་ར་དགོན་མོ་ཆེ་དང་བྷ་ཏི་སོགས་མི་ཉག་གི་ཡུལ་དང་འཕྲིན་ལས་ཧོར་ཡུལ་དུའང་དར་ཞིང་རྒྱས་ལ་ཕྱིས་རྒྱལ་པོ་སེ་ཆེན་གྱིས་ཚལ་པ་སྒོས་མི་དང་གུང་ཐང་སྒོས་ཀྱི་ལྷ་ཁང་དུ་བྱས་ནས་ཞབས་ཏོག་བྱེད་ཅིང་གཙུག་ལག་ཁང་ཟླ་མེད་པར་གྱུར་ཏོ། །རོས་སྐམ་པ་ལོ་སྒོམ་ཉི་མ་ཤེས་རབ་ཀྱིས་རོས་སྐམ་དུ་དར་རྒྱས་བྱུང༌། ཏི་ཤྲི་རས་པ་ཡང་ཞང་རིན་པོ་ཆེས་ཇི་ལྟར་བྱས་ཀྱང་ཕྱག་ཆེན་ཡིན་གསུངས་པས་ངོ་འཕྲོད་པས་རྩ་བའི་བླ་མར་འཛིན། གཙང་པ་རྒྱ་རས་ཀྱི་དབུ་སྐྲ་བཅད་སྟེ་རབ་བྱུང་བསྙེན་རྫོགས་གནང་བས་ཕྱིས་ར་ལུང་པས་དཀོན་གཉེར་ཡང་ལོ་ཤས་བླངས་པ་ཡིན་ནོ། །ཞང་རིན་པོ་ཆེའི་བུ་ཆེན་གཞན་ནི། ལོ་ཞིག་མར་སྒོམ། རི་སྒོམ། སྦྲ་སྒོམ། གཙང་སྟོན་བློ་ལྡན། འཇའ་སྒོམ་བྱང་སྙིང༌། ཤངས་པ་རོལ་པའི་རྡོ་རྗེ་སོགས་དང༌། འཕྲིན་ལས་སྒྲུབ་པའི་བུ་ཆེན། ཆོས་སྐྱོང་གི་སྤྲུལ་པ་དཔོན་དར་མ་གཞོན་ནུ། ཕྲེང་པོའི་ལྷ་བཙུན་དབང་སེང༌། བསམ་ཡས་ཀྱི་བརྩད་པོ་ཁྲི་སེང༌། བཟང་ཡུལ་གྱི་གནས་བརྟན་དགེ་སེང༌། གྲུ་གུ་སྒང་གི་གནས་བརྟན་སེང་གེ་གྲགས། སྒ་འདྲའི་གནས་བརྟན་གྲུབ་ཐོབ་དཀོན་མཆོག་སེང་གེ་སོགས་མི་ཆེན་མང་པོ་དང༌། ལྷ་གཟོ་བ་དབོན་ཕོག་རོ་དང་མར་པ་ལྷ་དཀར་ཞིང་མཁན་ཕག་ལྷ་གཟོ་སོགས་གཟོ་པོའི་རྣམ་པས་འཕྲིན་ལས་སྒྲུབ་ལ། དཔོན་ཆེན་དར་མ་གཞོན་ནུ་ནས་ཉིད་ཀྱི་སྐུ་ཚབ་ལུགས་གཉིས་ཀྱི་བདག་(ན༣༨བ)
པོར་བསྐོས་པའི་ཉེ་གནས་ཆེན་མོ་ལ་རིམ་པར་འབྱགས་པ་ལས་ཚལ་དཔོན་སངས་རྒྱས་དངོས་གྲུབ་ཕྱིན་བློན་པོ་མགར་གྱི་རྒྱུད་ལ་འབྱགས་པའི་ཚལ་པའི་དཔོན་ཆེན་རྣམས་ཀྱིས་ལོ་བརྒྱ་དང་བཞི་བཅུར་ཉེ་བར་དབུས་གཙང་གི་བདག་པོ་དང་འདྲ་བའི་སྐུ་དབང་གིས་ཐམས་ཅད་ལ་ཕ་མ་ལྟར་བྱམས་པས་བསྐྱངས་ཤིང་དེ་སྲིད་བསྟན་པ་དངོས་གནས་ལ་དེ་ཕྱིན་གཟུགས་བརྙན་ལ་སྤྱོད་ཅིང་ཞང་རིན་པོ་ཆེ་ཉིད་ཀྱིས་ལོ་འདི་ལ་མེས་སྲེག་པའི་ལུང་བསྟན་འདུག་ཟེར་བ་ལྟར་བདག་གི་ལོ་ཞེ་བཞི་པ་མེ་མོ་ལུག་ལོ་ཟླ་བ་བཞི་པའི་བཅོ་ལྔའི་མཚན་མོ་མེས་བསྲེགས་པའི་ཚུལ་གྱིས་གཙུག་ལག་ཁང་གི་བཀོད་པ་བསྡུས་པ་ཡིན་ལ་དེང་སང་ཚལ་པའི་ཆོས་ཤེས་པ་མི་སྣང་ཡང་བཀའ་རྒྱ་བཀའ་འབུམ་ཙམ་ལ་ཐམས་ཅད་མོས་པ་བྱེད་པར་སྣང་ངོ༌། །དྭགས་པོའི་བཀའ་རྒྱུད་ལས་རྗེ་སྒོམ་ཚུལ་གྱི་བཀའ་རྒྱུད་གཉིས་པ་ཚལ་པའི་སྐབས་སྟེ་ཕག་གྲུ་བཀའ་རྒྱུད་ལས་གཞན་བཤད་ཟིན་ཏོ། །དཔལ་ཕག་མོ་གྲུ་པ་ནི་མདོ་ཁམས་འབྲི་ཆུའི་རྒྱུད་རྨེ་ཤོད་ཀྱི་རྟག་ངོས་སབ་ཁང་དུ་འཁྲུངས། གདུང་དབའས། ཡབ་ཝེ་ན་ཨ་ཐར། ཡུམ་བཙུན་ནེ། ཡུམ་ལ་གསེར་གྱི་རྡོ་རྗེ་ཞིག་སྐྱེས་པའི་འོད་ཀྱིས་འཇིག་རྟེན་གསལ་བ་རྨིས། ཟོ་ཞབས་སྟོང་པ་ཅིག་ན་མར་འོངས་པ་སྙམ་བྱེད་ཙ་ན་འཁྲུངས་སྟེ་སྐྱེ་བའི་སྡུག་བསྔལ་མ་བྱུང་ཞིང་དེ་དུས་ཡབ་ཀྱིས་ཕག་ཁོག་ཁྱེར་བྱུང་བ་གཟིགས། གནས་པ་རང་འཁྲུངས་སུ་བྱུང༌། སྐྱེ་བ་མང་དུ་དྲན་པ་ཕ་མས་རྨེ་ཤ་བྱིན་པས་བརྗེད། ཡབ་ཡུམ་གྲོངས་པས་གཅུང་པོ་ཤུལ་དུ་བཞག་སྟེ་བྱ་ཁྱི་ལྷ་ཁང་དུ་མཁན་པོ་ལྡིང་ངེ་ཚུལ་ཁྲིམས་འབར་དང་སློབ་དཔོན་ལྡིང་ངེ་འོད་ཟེར་རྒྱལ་ལས་ལོ་དགུ་ལ་རབ་ཏུ་བྱུང༌། མཚན་རྡོ་རྗེ་རྒྱལ་པོར་བཏགས། བྲིས་ཀློག་ལྷ་བྲིས་རང་བྱུང་དུ་མཁྱེན་ནས་མཁན་པོའི་དཔོན་ཡིག་གི་སྡེབས་དང་ལྷ་བྲིས་མཛད། གནས་བཞིའི་དབུས་ན་ཐ་བའི་རྡོ་ཁྲོད་ཆེན་པོ་ཅིག་ཡོད་པ་ཤིང་རྟས་མ་འདྲོངས་པ་སྐུ་ཤེད་ཆེ་བས་སྐུ་རྒྱབ་ལ་བསྣམས་ཀྱིན་པོར། བླ་མ་རྒྱ་ལ་ཆང་མི་གསོལ་བའི་དམ་བཅའ་མཛད། དབུ་རི་(ན༣༩ན)
རྒྱལ་འབར་ལ་ཆོས་གསན་ཞིང་དེ་གཙོ་བོའི་རྣམ་པར་སྣང་རུང་ས་བཅུ་པ་བར་འདུག་གསུང༌། སློབ་དཔོན་དགུའི་ཆོས་རྫོགས། སྤྱིར་ཁམས་སུ་བླ་མ་བཅུ་དྲུག་བཞུགས། སྤྱོད་འཇུག་སོགས་གཞན་ལ་ཡང་བཤད། ལོ་ཉེར་གཉིས་ལ་དབའས་ཆེན་པོ་དང་བསྡོངས་ནས་བོད་དུ་བྱོན། ཡོ་བྱད་ཐམས་ཅད་ཁོང་གིས་སྦྱར། སོག་དུ་དབུས་ཀྱི་ཕྱོགས་ནག་པོ་ར་རི་ཞིག་གིས་གང་འདུག་པ་མི་གཡོ་བའི་རལ་གྲིས་བཅད་པར་གཟིགས། ཐོག་མར་སྟོད་ལུང་རྒྱ་དམར་གྱི་གྲ་སར་རྟ་སྒ་ཕོག་རྒྱ་དམར་བ་དང་ཉང་བྲན་ལ་དབུ་ཚད་བྱམས་ཆོས་དང་སྤྱོད་ཕྱོགས་གསན། ཡང་གད་པ། དོན་སྟེང་པ། བྱ་ཡུལ་པ་སོགས་ལ་བཀའ་གདམས་གསན། ཉེར་ལྔ་ལ་ཟུལ་ཕུར་མཁན་པོ་བྱ་འདུལ། ལས་སློབ་རྒྱ་དམར་བ། ཨར་གྱིས་གསང་སྟོན་མཛད་སྟེ་བསྙེན་པར་རྫོགས་ནས་འདུལ་བ་མཐའ་དག་གསན། གྲ་ས་རྣམས་སུའང་ཐུན་བཞིའི་རྣལ་འབྱོར་ཆག་མ་མྱོང༌། དམར་ཆོས་ཀྱི་རྒྱལ་པོ་ལ་བདེ་མཆོག་གི་རྒྱུད་མན་ངག་གསན། དཔའས་ཆེན་པོ་ཡུལ་དུ་བཞུད་ཚེ་ཕྱག་དཔེ་སོགས་བསྐུར་ནས་ཕྱིར་བཞུགས། འཇང་བྲག་སྟག་པ་དང་རྔོག་མུ་ནེ་ལ་འཕགས་སྐོར་དང་མངོན་པ་ཞུས། བུར་སྒོམ་ལ་རས་ཆུང་པའི་སྐོར་ཞུས་པས་སྣང་བ་བདེ་བར་ཤར། སྟོད་ལུང་ན་སངས་རྒྱས་སྨྱལ་ཆུང་བྱ་བ་དངོས་རིག་གི་རྣལ་འབྱོར་པ་ཅིག་ལ་གདམས་པ་མང་དུ་ཞུས་ཤིང་དགེ་བཤེས་ཁམས་པ་ཁྱེད་ཀྱི་ཕྱི་ལ་མཁའ་འགྲོ་མ་གསེར་རྒྱན་ཅན་བཞི་འབྲང་གི་འདུག །དམ་ཤོད་རི་ནག་གི་དྲུང་དུ་འགྲོ་བའི་དོན་ཡོད་གསུངས། འཇིམ་ལོ་ཙཱ་བ་སོགས་གཞན་ཡང་མང་དུ་བསྟེན། ཁྱད་པར་རྗེ་ས་སྐྱ་པ་ཆེན་པོ་ལ་རྒྱུད་དང་ལམ་འབྲས་ལ་སོགས་རྫོགས་པར་གསན་སྟེ་མཐོང་ལམ་པར་ངོ་སྤྲད། ཆོས་མང་པོ་ཚུར་དྲི་ཞིང་ཁམས་པ་ཤེས་རབ་ཅན་ཞེས་མཉེས། མདོར་ན་གཞུང་མན་ངག་ལ་མི་མཁྱེན་བྱ་བ་མེད། ཁམས་པ་ཡར་འདུ་བ་ཅིག་ལ་ཆོས་ཚང་པའི་གྲགས་པ་བྱུང༌། དགེ་བཤེས་ཞང་སུམ་ཐོག་པ་(ན༣༩བ)
མི་ཆེན་པོ་དེས་ཆོས་ཞུས། མཆོད་གནས་སུ་ཁུར་ཡང་རེ་ཞིག་བཀའ་རྒྱ་བཏབ་སྟེ་སློབ་མའི་ཚུལ་མཛད། དྭགས་པོ་སྙི་སྒོམ་དེ་གྲགས་པ་ཆེ་བར་འདུག་པས་ཞལ་ཞིག་ལྟ། ཆོས་མི་ཤེས་པ་ཞུ་རྒྱུ་མེད། དེ་ནས་ཁམས་ལ་འགྲོ་དགོངས་སྟེ་ཞང་དང་གཉིས་སྒམ་པོར་བྱོན། སྐུ་རིམ་དུ་མཆོད་རྟེན་ཞིག་རྩིག་འདུག་པའི་ལས་ཀ་རེམ་པའི་ཐོག་ཆོད། ཞག་བཞི་ན་མཇལ། ཇ་བཞུར་གྲང་མོ་ཞིག་དྲངས་བྱུང་བས་ཐང་ཆད་པ་ལ་ཇ་གྲང་མོ་འདི་ཕན་སྙམ་པ་ཅིག་བྱུང༌། ཡང་མང་ཇའི་ཚྭ་གཟིགས་འབུལ་འདུག་པ་ཧུབ་གང་བཞེས་ནས་རྐྱན་དུ་བླུག་སོང་བས་གསོལ་རས་ཀྱིས་ཐམས་ཅད་ལ་ཁྱབ་པར་འདུག་སྙམ་པའི་དད་པ་སྐྱེས། ཞང་ལ་མ་དག་པའི་རྣམ་རྟོག་རེ་རེ་བྱུང༌། ཕྱི་ཉིན་དྲུང་དུ་མཇལ་བ་ན་ཕྱག་ན་ཟན་ཞིག་ཆངས་ཆངས་མཛད་ཅིང༌། དགེ་བཤེས་ཁམས་པ་ཁྱོད་ཀྱིས་ཆོས་ཅི་ཤེས་གསུངས། འདི་ལྟར་ཐོས་ཞུས་པས་ཐོས་པ་དེ་ཙམ་ལ་ང་རྒྱལ་རྒྱུ་ཅི་ཡོད། འཕགས་པ་ཀླུ་སྒྲུབ་ཀྱིས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་མཁྱེན་ཡང་ཁེངས་པ་རྡུལ་ཙམ་མི་མངའ། ཁྱོད་ཀྱིས་ལོ་དུ་བསྒོམས་གསུངས། ལོ་བདུན་བསྒོམས་ཞུས་པས། སྒོམ་ཡུན་དེ་ཙམ་ལ་ང་རྒྱལ་རྒྱུ་ཅི་ཡོད། ཁོ་བོས་ལོ་བཞི་བཅུ་བསྒོམས་པ་ཡིན། ཉམས་མྱོང་འདྲ་ཅི་སྐྱེས་གསུངས། མཐོང་ལམ་སྐྱེས་ཚུལ་ཞུས་པས་དེ་ལ་མཐོང་ལམ་དུ་འཛིན་ནམ་གསུངས། རྡོ་རྗེའི་ཚིག་རྐང་ལས་བཤད་ཚུལ་ཞུས་ནས་མཐོང་ལམ་ཡིན་ཞུས་པས། ཨ་ཀྱང་དེ་ལ་མཐོང་ལམ་དུ་འཛིན་ནམ་གསུང༌། བླ་མས་ཀྱང་མཐོང་ལམ་དུ་ངོ་སྤྲད་ཅིས་ཀྱང་ཡིན་ཞུས་པས། ཨ་པ་ཞེ་ནས་རང་དེ་ལ་མཐོང་ལམ་དུ་འཛིན་ནམ་གསུང༌། མདོ་རྒྱུད་ཉམས་མྱོང་ཐམས་ཅད་ཀྱིས་གྲུབ་པའི་མཐོང་ལམ་ཡིན་ཞུས་པས། ཁྱེད་ཀྱི་མཐོང་ལམ་བཟང་པོ་དེ་ལས་ངའི་ཟན་ཆངས་འདི་མི་དགའ་རེ་གསུངས་པས་སྔར་གྱི་བདེ་གསལ་མི་རྟོག་པའི་ཉམས་བཟང་པོ་དེ་ཧྲུལ་གྱིས་ཞིག་ནས་ཤེས་པའི་ངོ་བོ་དེ་སྔར་འདྲིས་ཀྱི་མི་དང་ཕྲད་པ་ལྟར་ཡེར་བྱུང་བ་ན་འོ་མཐོང་ལམ་བྱ་བ་དེ་འདྲ་བ་ཞིག་ཡོང་བ་ཡིན་གསུངས། དེ་ལས་ལྷག་པ་(ན༤༠ན)
ཅིག་བསྟན་དུ་མེད་ཀྱང་ཁོ་བོ་རང་གི་ལུགས་བྱའོ་གསུངས་ནས་ལྷན་ཅིག་སྐྱེས་སྦྱོར་གནང༌། འདི་ལ་ཕྱིས་ཀྱང་ཁོ་བོའང་ཆོས་མིང་ཆེན་པོ་ཅིག་གིས་དེའུ་བསླུས། ཅེས་དང༌། བླ་མ་རིན་པོ་ཆེ་དང་མ་མཇལ་ན་ཁོ་བོའི་མི་ཚེ་འདི་དོན་མེད་དུ་དེའུ་སོང༌། ཞེས་དང༌། བླ་མ་རིན་པོ་ཆེ་དང་མ་མཇལ་གྱི་བར་དུ་སྟོང་ཉིད་སྒོམ་ཤེས་པ་སུ་ཡང་མ་བྱུང་ཞེས་གསུང་བ་ཡིན་ལ་རྗེས་ཀྱང་འོ་སྐོལ་དཔོན་སློབ་གཉིས་ས་བཅུའི་བྱང་སེམས་ཡིན་ཡང་ཁྱོད་ཁོ་བོ་དང་མ་ཕྲད་ན་དོན་འགྲུབ་པར་གདའམ་ཞེས་གསུངས་པ་ཡིན་ནོ། །མཐོང་བྱ་དང་མཐོང་མཁན་ལ་སོགས་པ། །དམིགས་གཏད་ཀྱི་གཉིད་ལས་མ་སངས་པར། །མངོན་སུམ་གྱི་མཐོང་ལམ་རེ་བ་ཚོ། །ཆབ་རོམ་ལ་ཤེལ་དུ་ཞེན་པ་འདྲ། །དུས་རྟག་དུ་ཡོད་པའི་སེམས་ཉིད་ཀྱི། །རང་ཞལ་རང་ཉིད་ལ་མངོན་སུམ་སྟོན། །མཐོང་མ་མཐོང་གི་འཛིན་པ་གཞིག་མཛད་པ། །བཀའ་རྒྱུན་འདི་བསམས་ཀྱིན་ངོ་མཚར་ཆེ། །བར་སྐབས་ཀྱི་ཚིགས་བཅད་ཏོ། །དེ་ནས་ངའི་བླ་མ་དེ་ཚོའང་བླ་མ་འདི་དང་མཇལ་ན་བསམས་སྟེ་བདག་དཔེ་ཆ་ལེན་དུ་འགྲོ་བར་ཞུ་ཞུས་པས་བསྡད་ན་ཁེབས་ཆེ་སྟེ་གསུངས། བླ་མ་རྣམས་ཁྱེད་དྭགས་པོ་སྙི་སྒོམ་ཅན་དུ་ཕྱིན་ཨང་ཟེར་བ་ཙམ་དང་འོ་སྐོལ་ལས་ལྷག་པའི་མན་ངག་ཅང་ཡོད་ཏམ་ཟེར་བ་ལས་མི་འདུག་པས་ཕྱག་དཔེ་བླངས་སྟེ་བྱོན། ཁམས་ལ་འབྱོན་པའི་སྤྲོས་པའང་ཆོད། དབྱངས་རྟ་དང་བསྟོད་པ་མ་བྱས་པ་ཅིག་གྱིས་གསུང་བས་མཉམ་མེད་དམ་པ་མཛད། ད་ནི་གཙང་གི་གནས་གཞི་ཅིག་ལ་འཇུག་ཡོན་བཙལ་སྟེ་ཕུལ་ནས་སྒྲུབ་པ་བྱེད་དགོས་བསམས་པ་ན་ནང་པར་སྔ་བར་ཤོག་གསུངས་སྟེ་ཕྱག་འཚལ་ཞིང་ཡོད་ཙ་ན་ཞལ་འཛུམ་མཛད་ནས་དགེ་བཤེས་ཁམས་པ་འཚོ་བའི་སེམས་ཁྲལ་ནི་མི་འཚལ། ཁྱོད་ཀྱི་གདུལ་བྱ་དམ་ཤོད་རི་ནག་གི་དྲུང་ན་ཡོད་གསུངས། དེ་ལྟར་རྗེ་སྒམ་པོ་པ་དོན་གསུམ་བཞེས་ཤིང་ཉིད་ཞེ་གཅིག་བཞེས་པ་ལྕགས་མོ་ལུག་ལ་མཇལ་ནས་ལོ་ངོ་(ན༤༠བ)
གསུམ་བསྟེན་སྟེ་དོན་ལྔ་ཆུ་བྱ་ལ་ཆོས་རྗེ་མྱ་ངན་ལས་འདས། གཤེགས་ཀར་ང་དང་དགེ་བཤེས་ཁམས་པ་ལ་ཁྱད་རྟ་རྔ་ཙམ་ཡང་མེད་པས་ཐམས་ཅད་ཀྱིས་འདུད་གསུངས་ནས་ཆོས་ཞུས། དུས་ཀྱི་རྒྱལ་པོ་བྱ་ལོ་ཤར་བའི་ཚེ། །ཞེས་པའི་གདུང་དབྱངས་ཀྱང་མཛད། སའི་བཀྲག་ཉམས་སྡོད་མི་འདོད་པར་གྱུར་ཀྱང་འཇིག་རྟེན་པ་ཁྲེལ་ཡོད་ཀུན་ཡང༌། དབྱར་དགུན་རེ་མྱ་ངན་བྱེད་པས་ཁོ་བོའང་སློབ་དཔོན་སྒོམ་པའི་སྡུག་གྲོགས་བྱེད་པ་ཡིན་གསུངས་ནས་འཚོ་བ་བཀྲེན་པ་ལས་མེད་ཀྱང་བཞུགས་སྟེ་སློབ་དཔོན་སྒོམ་པའི་ཞབས་ཏོག་མཛད། ཞེ་བཞི་ལ་འོལ་ཁར་བྱོན་ན་ཟ་ཧྲུལ་བས་བསོད་སྙོམས་མཛད་གསུངས་ནས་ལྡོམ་ལུགས་ཀྱི་མགུར་མཛད་སྟེ་ཉེ་གནས་ཤན་གྲོང་པས་ན་བཟའ་སྐུ་གང་བརྗེས། དམ་ཤོར་བྱ་ར་བྱི། ཡར་ལུངས། འོན་ཚན་སྒང༌། སྤང་ཆུང་དགོན་པ་སོགས་སུ་བཞུགས། སློབ་མའང་མང་དུ་འདུས་སྟེ་རྗེ་དྭགས་པོའི་ལུགས་བཀའ་ཕྱག་ཆུ་བོ་གཉིས་འདྲེས་ཁོ་ནས་བསྐྱངས་ཤིང་འདུལ་བ་ལ་གཙོ་བོར་མཛད། བླ་མ་ས་སྐྱ་པ་སྔོན་ནས་ང་ལ་ཆོས་འདྲི་ཞིང་མཉེས་པ་ལ་ད་ཁོ་བོ་ཆོས་ཐམས་ཅད་ན་མཁའ་ལ་མདུང་བསྐོར་བ་ལྟར་སོང་བ་འདི་ལ་བླ་མའི་ལན་ཚུལ་བཞིན་གདབ་དགོས་སྙམ་ནས་འབུལ་བ་རྣམས་སྐྱེལ་པ་དང་སྒྲེས་པ་འགའ་དབང་བསྐུར་ཞུ་འདོད་དང་བཅས་བྱོན། རྩིས་ཀྱི་ལྷ་ཁང་དུ་ཞག་གསུམ་བཞུགས་པས་དམ་པ་རྒྱ་གར་དང་མཇལ་སྟེ་ཞི་བྱེད་མནལ་ལམ་མ་སོགས་མང་དུ་གསན། ད་རེས་ཆོས་ཀྱང་མི་འདྲི། སྤྱན་རྩའང་འགྱུར་འདུག་སྟེ་འགྲོངས་ལྟས་མ་ལགས་སམ་གསུངས་སྟེ་མྱུར་དུ་གྲོངས། འོན་དུ་ཐུགས་ཟོ་མ་སོད་ནས་ད་ནི་རི་ཁྲོད་ཀྱི་དགོན་པ་ཅིག་འཛིན་དགོས་དགོངས། གྲྭ་པ་རྣམས་ལ་ཁོ་བོ་ཕྱེད་ལམ་ཙམ་དུ་འགྲོ་བས་ཁོ་བོའི་རྗེས་ལ་སུ་ཡང་མ་ཡོང་ཞིག །དབྱར་བཞུགས་ཐོན་ནས་སོ་སོར་ཡུལ་ལ་བྱོན་ཞིག །ཁོ་བོ་མཚམས་བྱེད་པས་ནང་བར་ཡང་སུ་ཡང་མ་ཡོང་ཞིག་གསུངས། དེ་ནུབ་དཔོན་སློབ་བཞིས་བྲོས་སྟེ་བྱོན། མཐར་རྩའི་གྲོང་མདར་གྲོང་འདི་ལ་ཕག་མོ་དང་གྲུ་འདི་ལ་ཕག་མོ་གྲུ་ཟེར་(ན༤༡ན)
ཟེར་བས་ཡི་དམ་ཕག་མོ་བཞུགས་ཤིང་སེམས་ཅན་འཁོར་བའི་ཆུ་ལས་སྒྲོལ་བར་དགོངས་སྟེ་ལུང་བསྟན་གྱི་གནས་དེ་ཡིན་པར་མཁྱེན། འདིའི་ཕུར་བསྡད་ཆོག་གམ་དྲིས་པས་ཆོག་ཡོང་སྟེ་ཚ་རོང་བཙད་པོ་ལ་འདྲི་དགོས་ཟེར་བས་འདྲིར་བྱོན་པ་ན་ཁོ་རང་མིག་མང་རྩེ་ཞིང་འདུག །ཁྱེད་ཀྱི་ལུང་པ་ཡ་གིར་དགོན་པ་ཅིག་བཏབ་ཆོག་གམ་ལན་གཉིས་གསུངས་པས་ཐོབ་ཐོབ་ཟེར། ཡང་གསུངས་པས་བརྒྱ་དགོས་ན་སྟོང་ཐོབ་ཟེར་བས་དར་བའི་རྟེན་འབྲེལ་འགྲིག་སྟེ་ཞེ་དགུ་པ་ས་ཕོ་སྟག་ལ་ཕག་གྲུ་བཟུང༌། དེ་ནས་ལོ་བདུན་འདས་པ་ཤིང་བྱ་ལ་སྟག་ལུང་ཐང་པ་ཉི་ཤུ་རྩ་བཞི་འགྲོ་བ་ཞིག་གིས་མཇལ་སྟེ་ཉེ་གནས་མཛད། གྲ་པ་རྣམས་ཀྱང་རིམ་པས་བྱུང༌། རྒྱ་སྒོམ་རྨི་རས་བྱ་བའི་འཇག་ལྕིལ་དུ་ཚ་བ་ལ་གདན་དྲངས་པས་ཁྱོད་ཀྱི་ལྕིལ་པོ་འདི་སྐྱིད་ལན་གསུམ་གསུངས་པས་མཉེས་ན་འབུལ་ཟེར་བ་ལ་འོ་ན་ངའི་ཀོམ་སྟན་ད་ལྟ་ལོང་ཤོག་གསུངས་སྟེ་གཟིམས་ལྕིལ་མཛད། སྔོན་བྱང་སེམས་ཟླ་བ་རྒྱལ་མཚན་གྱིས་ཁྱོད་ཀྱིས་ཟླ་སྟོད་ལ་མཚམས་གྱིས་ཟླ་སྨད་ལ་ཁྲིད་ཀྱིས་རྐང་བཞིའི་འབུལ་བ་མ་ལེན་དབང་བསྐུར་མ་བྱེད། དེ་ལྟར་བྱས་ན་ཚེ་རིང་ཞིང་འགྲོ་བ་མང་པོ་ལ་ཕན་པར་འགྱུར་ཞེས་ལུང་བསྟན་པ་དང༌། བླ་མ་ལྷ་རྗེའི་རྣམ་པར་ཐར་པ་ཡང་དེ་ཉིད་ཡིན་པས་སློབ་མ་བྱ་བ་བླ་མའི་རྣམ་ཐར་འཛིན་པ་ལ་ཟེར་བ་ཡིན། ཁོ་བོའང་བླ་མའི་རྣམ་ཐར་བཞིན་བྱེད་པ་ཡིན་གསུངས་ནས་དེ་བཞིན་མཛད་ཏོ། །བླ་མ་མགོལ་ཕུ་བ་དང་འགྲོ་མགོན་སྨར་པ་སོགས་ནི་གཞན་བླ་མ་མང་དུ་བསྟེན། ཆོས་གདམས་ངག་ཐམས་ཅད་རྫོགས། ཉམས་མྱོང་གིས་ཐུགས་ཁེངས་པ་རེ་རྗེ་དེའི་དྲུང་དུ་བྱོན། མགོལ་ཕུ་བ་ཕྱག་འཚལ་ཞིང་ཡོད་ཚེ། སྨྲ་བསམ་བརྗོད་མེད་སོགས་ནས། དུས་གསུམ་རྒྱལ་བའི་ཡུམ་ཡང་དེ་ཉིད་ཡིན། །ཞེས་གསུངས་པས་རྟོགས་པ་ངོ་འཕྲོད་པ་ན་འོ་དེ་ལས་ལྷག་པ་མེད་ཀྱིས་དེ་ཉིད་ཀྱི་རྩལ་སྦྱོངས་ཅིག་གསུང༌། འགྲོ་མགོན་སྨར་པ་ཞག་འགའ་ཁམས་མ་བདེ་བ་ལས་སོས་ནས་མཇལ་དུ་ཕྱིན་པས། ཕྱག་མ་འཚལ་བར་སྐྱིལ་ཀྲུང་ཆོས་ལ་བཞུགས་ཅིག་གསུང༌། ཆོས་ཅིའང་མི་གསུང༌། (ན༤༡བ)
ཁམས་ཀྱི་དྲི་རྨེད་མཛད། ང་གང་དུ་བཞུགས་སར་ལུས་གནད་ཆོས་ལ་བཞུགས། ཤེས་པ་ལ་ཅི་བྱུང་ཡང་སུ་ལའང་མ་ཟློ་ཞིག་གསུངས༌། དེ་ལྟར་བྱས་པས་རྟོགས་པ་ཁྱད་པར་ཅན་འཁྲུངས༌། འོ་བཀའ་རྒྱུད་ཀྱི་བྱིན་རླབས་ཞུགས། འཁོར་འདས་ཀྱི་འབྲེལ་ཐག་ཆོད། ཁྱོད་ཀྱིས་དབུ་མའི་དོན་ཡང་གཟོད་གོ་བ་ཡིན། བདག་པོས་མ་ཚོར་བར་སྒོམ་འདེབས་པ་གཞན་གྱིས་མི་ཤེས་གསུངས། འགྲོ་མགོན་ཡེལ་པ་བ་ཐུགས་དམ་དཔྱིས་ཕྱིན་པ་ཅིག་གིས་བར་ཕུ་བ་ལ་དོ་ཧ་ཞུས་པས་བཤད་རྐྱང་དུ་འདུག་པ་དགོངས་སྟེ། ཉིད་ལ་ཕྱག་རྒྱ་ཆེན་པོའི་གཞུང་གི་སྒོམ་ཆེན་སྣང་བ་ལ་ངའི་བླ་མ་རིན་པོ་ཆེ་དང་མཇལ་ན་ཉམས་རྟོགས་ཀྱང་སྐྱེ་བས་འབྱོན་པར་ཞུ་བྱས་པས་ལྟའོ་གསུངས་སྟེ་བྱོན། ཐུགས་རྒྱལ་གྱིས་ཡོན་ཏན་མ་སྐྱེས། ཡང་ཕྱིས་བསྐུལ་སྟེ་བྱོན། བུ་རམ་པདྨའི་བར་ལ་བཏབ་པའི་ཙ་གོ་ར་དྲངས་པས་ཁོང་ཆགས་སྟེ་མ་གསོལ། ཡེལ་པ་བས་བཅག་སྟེ་ད་གསོལ་བར་ཞུ་བྱས་ནས་གསོལ་ཞིང་ཡོད་ཚེ། ཞལ་ནས་ཕར་ཕྱིན། དབུ་མ། གསང་སྔགས། ཕྱག་རྒྱ་ཆེན་པོ་ཐམས་ཅད་སྒོམ་དགོས་པ་ཁོ་ན་ཡིན་པས་སྒོམས་ཅིག་གསུང་བ་ན་སྒོམ་ལུགས་ཅི་ཡང་མ་བསྟན་པར་སྒོམས་ཅིག་གསུང་བ་ཅི་ཡིན་སྙམ་ཚེ་སྒོམ་བྱ་སྒོམ་བྱེད་ཀྱི་འཛིན་པ་ཞིག་སྟེ་གནས་ལུགས་མངོན་དུ་གྱུར་ནས་བཞེངས་སྟེ་ཁྱོད་ནི་མཐོང་དང་ཐོས་དང་དྲན་པས་ཀྱང༌། མིང་ཚིག་ཡི་གེའི་ཚོགས་ལ་མི་ལྟོས་པར། །ཕྱག་རྒྱ་ཆེན་པོའི་རྟོགས་པ་འཆར་བ་ཡི། །བླ་མ་བྱིན་རླབས་ཅན་ལ་ཕྱག་འཚལ་ལོ། །ཞེས་ཕྱག་མཛད། གཞན་ཡང་རླངས་སེང་གེ་རྒྱལ་མཚན་གྱིས་ཞལ་མཐོང་བ་ཙམ་གྱིས་སྒོམ་སྐྱེས། དེ་ལ་སོགས་པ་མཚན་ལ་མོས་པ་ཙམ་དང༌། ཞལ་མཇལ་བ་ཙམ་དང༌། བརྡ་དང་རྣམ་འགྱུར་བསྟན་པ་ཙམ་དང༌། བྱིན་རླབས་གནང་བ་ཙམ་གྱི་གྲོལ་བ་མང་དུ་བྱུང་ངོ༌། །གྲ་པ་སུམ་བརྒྱ་ཙམ་ཚོགས་པ་ན་ཁོ་བོས་ཆོས་བསྟན་ན་ཁྱེད་རྣམས་ལ་ཕན་ཡང་ཚེ་ཐུང་བར་འོང༌། མཚམས་འབའ་ཞིག་བྱས་ཁྱེད་རྣམས་དང་མ་ཕྲད་ན་ཚེ་ཉི་ཟླ་དང་མཉམ་པ་རྒྱ་གར་གྱི་གྲུབ་ཆེན་ལས་ལྷག་པར་འོང་བས་གདམ་ཁ་(ན༤༢ན)
གྱིས་ཅེས་གསུངས་པས་དགེ་བཤེས་རླངས་སོགས་རྒན་པ་རྣམས་ཀྱིས་འགྲོ་དོན་མཛད་པར་ཞུས། མི་ཉག་སྒོམ་རིང་སོགས་རྣམས་ཀྱིས་སྒྲུབ་པ་མཛད་པར་ཞུས། དེར་སྒྲུབ་པ་མཛད་པ་ན་དགེ་བཤེས་ཞང་བྱོན་སྟེ་ཞུ་ཕོད་མཛད་པས་ཚོགས་པ་བསྐྱངས། ཅི་དགོས་ཀྱང་རྟེན་འབྲེལ་འབའ་ཞིག་གིས་མཛད། སྐུ་འདའ་བའི་ལོ་ལ་ཚོགས་པ་བརྒྱད་བརྒྱ་ཙམ་འདུས་ཤིང་ཐམས་ཅད་ཡོན་ཏན་ཡོངས་སུ་རྫོགས་པ་ཤ་སྟག་དུ་བྱུང༌། ཕག་མོ་གྲུར་བྱོན་ནས་གྲོང་དུ་འབྱོན་མ་མྱོང༌། སྔོན་དབང་བསྐུར་གསན་དུས་ཚོགས་ཀྱི་ཤ་ཆང་མ་གསོལ་བས་ད་གསོལ་ན་བླ་མ་དེ་ཀུན་གྱི་དབུ་སྐོར་བར་འགྲོ་གསུངས་ནས་ཤ་ཆང་ལྟ་ཅི་སྨོས་སྟེ་ཡང་དགོན་དུ་ཚིལ་བུའི་སྡོར་འདེབས་མ་མྱོང༌། སྐུ་འདའ་ཁར་ཡང་སྨན་རྟའི་སིངས་པོ་ཙམ་ཡང་མ་གནང༌། མདོར་ན་སྐལ་ལྡན་མཐའ་ཡས་པ་ཚེགས་ཆུང་ངུས་གྲོལ་བར་མཛད་ཅིང་ཕག་མོ་གྲུར་ལོ་བཅུ་གསུམ་བཞུགས་ནས་ལྕགས་ཕོ་སྟག་གི་ལོ་ཟླ་བ་བདུན་པའི་ཉེར་ལྔའི་སྔར་དྲོ་མྱ་ངན་ལས་འདས་སྟེ་ངོ་མཚར་གྱི་ལྟས་མང་དུ་བྱུང་ངོ༌། །སྐྱེས་རབས་ཀྱང་དགེ་སློང་ཆོས་ཀྱི་དཔལ་དུ་གྱུར་པ་སོགས་སྐྱེས་རབས་ཆེན་མོར་གསུངས་པ་ལྟར་སྟེ་ཐུན་མོང་གི་གདུལ་བྱའི་སྣང་བ་སོ་སྐྱེ་ལྟར་བསྟན་པའོ། །སྐལ་པ་མཆོག་གི་གདུལ་བྱ་ལ་རྒྱལ་པོ་ཨིནྡྲ་བོ་དྷི་བར་པ་དང༌། ཡང་པཉྩ་པ་ནས་གསང་བ་བཀྲོལ། སོགས་སྐུའི་བཀོད་པ་བརྒྱད་དང༌། སྲོང་བཙན་སྒམ་པོ་སོགས་རྒྱལ་པོའི་སྐུའི་བཀོད་པ་བཞི་དང༌། ག་ཡ་དྷར་ལ་སོགས་པའི་སྐུའི་བཀོད་པ་བཞི་ལ་སོགས་གསང་བའི་མཛོད་སྒོ་དབྱེ་བ་ལས་བསྟན་པ་ལྟར་དང༌། སྐུ་འདི་ཉིད་ཀྱིས་དུས་གཅིག་ལ་ཨོ་ཌྱན་ནས་བདེ་མཆོག་གི་རྒྱུད་མན་ངག་ལེན་པ་དང༌། འདི་ལ་སྟོན་པའི་བདག་ཉིད་མེ་ཡི་རླུང༌། །ཞེས་པ་ཙཀ་ཀྲ་སམ་བྷ་རར་བཤད་ཀྱང་ཛ་ཡིག་དགོས་པས་ཛཱ་ལ་སཾ་བྷ་ར་འདྲ་བ་སྡོམ་པ་ཞེས་པ་འབྱོར་བར་སྣང༌། ཉེ་བའི་ཞིང་ཙཱ་གོང་དུ་མཁའ་འགྲོ་བཏུལ་ནས་ནད་ཡམས་བཅད་པ་(ན༤༢བ)
དང༌། རྒྱ་གར་གྱི་མུན་པ་མི་བཟད་པའི་དུར་ཁྲོད་དུ་རྣལ་འབྱོར་པ་གཏི་མུག་རྡོ་རྗེ་མཆོག་སྒྲུབ་པའི་ཚོགས་གྲལ་དུ་བྱོན་པ་དང༌། རྒྱ་གར་ལྷོ་ཕྱོགས་སུ་མུ་སྟེགས་ཀྱི་རྒྱལ་པོ་ཤྲཱི་ནག་པོ་བཏུལ་པ་དང༌། ཛམྦུའི་གླིང་གི་ཤར་ལྷོ་གླིང་ཕྲན་ཞིག་དུ་དགེ་སློང་བློ་གྲོས་རྒྱལ་པོར་བསྟན་པ་དང༌། གླིང་དེ་ཉིད་ཀྱི་ནུབ་ཕྱོགས་སུ་སྔོན་སྐྱེ་བ་དུ་མའི་གོང་གི་མ་ཞིག་ངན་འགྲོར་ལྷུང་བར་འདུག་པ་ལས་དྲངས་པ་དང༌། བྱང་སྟག་ལུང་གི་སའི་མི་མ་ཡིན་ཐམས་ཅད་བཏུལ་སྟེ་ས་ཆུ་ཐམས་ཅད་བྱིན་གྱིས་བརླབས་པ་དང༌། རྒྱ་ནག་གི་རྒྱལ་པོ་ཟ་མ་ཧོ་སྡིག་པ་ལས་ལྡོག་པའི་ཕྱིར་ནད་བསལ་བ་དང༌། དུར་ཁྲོད་ཧ་ཧ་རྒོད་པར་འབྱུང་པོ་རེངས་བྱེད་བཏུལ་བ་དང༌། ཁམས་ཀྱི་ལྷོར་ཟིང་ཨ་བསྟན་རྒྱའོ་འདྲེར་སྐྱེས་པ་བཏུལ་བ་དང༌། ཕག་མོ་གྲུ་ཉིད་ན་བཞུགས་པ་སྟེ་བཅུ་གཉིས་ཅིག་ཆར་བསྟན་པ་ནི་དབང་པོ་འབྲིང་ལ་གྲུབ་ཐོབ་ཆེན་པོར་བསྟན་པའི་རྣམ་པར་ཐར་པའོ། །འདས་པའི་སངས་རྒྱས་འཁོར་བ་འཇིག་དང་ད་ལྟར་སྟོན་པ་ཉིད་དང་མ་འོངས་པའི་མི་སྐྱོད་སྨན་པའི་རྒྱལ་པོར་ཞལ་གྱིས་བཞེས་པ་ནི་གདུལ་བྱ་ཡང་རབ་ལ་སངས་རྒྱས་ཉིད་དུ་བསྟན་པའི་རྣམ་པར་ཐར་པའོ། །དེའི་སློབ་མ་ལ་སྤྱིར་ཚོགས་པ་བརྒྱད་བརྒྱ་ལ་གདུགས་ཐོགས་ལྔ་བརྒྱར་གྲགས་ཤིང་ཁྱད་པར་དུ་བུ་ཆེན་ཉེར་བཞི་ལ། མོས་གུས་མཐར་ཐུག་སྟག་ལུང་པ། རྟོགས་པའི་མཐར་ཐུག་སྣ་ཕུ་པ། ཤེས་རབ་མཐར་ཐུག་པར་ཕུ་པ། ནུས་པའི་མཐར་ཐུག་མཆན་བུ་རྒྱ་རས་སྟེ་མཐར་ཐུག་གི་བུ་བཞི། སྐལ་ལྡན་ཡེ་ཤེས་སེང་གེ་མི་ཉག་སྒོམ་རིང༌། ཉག་རེ་སེ་བོ། ཀུན་ལྡན་རས་ཆུང་སྟེ་གདམས་པའི་བུ་བཞི། འཇིག་རྟེན་མགོན་པོ། ཆོས་རྗེ་ལྡུམ། ཆོས་རྗེ་གཏུམ། བནྡྷེ་ཕུག་པ་དང་རོ་གཅིག་རྟོགས་པ་ཕྱེད་དང་བཞི་སྟེ་གཏུམ་ལ་གཟུགས་སྐུའི་ས་བོན་མ་ཐེབས་པས་ཕྱེད་མར་འཇོག་གོ །གཤེན་དགོན་དཀར་བ། མྱང་ཤན་གྲོང་པ། རྔོག་སེང་གེ་ཁ་པ། རྩི་ལུང་པ་རྣམས་ལ་ཐུགས་ཀྱི་སྲས་བཞི་ཟེར། རིན་པོ་ཆེ་ཤུག་ཚར་བ། ལྷ་ས་པ་དགེ་འདུན་(ན༤༣ན)
སྐྱབས། གྲུ་གུ་བློ་གྲོས་སེང་གེ་རྒྱན་ཐང་པ་སྟེ་ཡི་གེ་མའི་བུ་བཞི། བླ་མ་སྨར་པ། ཡལ་ཕུག་པ། དགྱེར་སྒོམ་པ། སེང་གེ་དཔལ་སྟེ་ཉེ་བའི་སྲས་བཞི་ཞེས་སྔ་རབས་རྣམས་འདྲེན་ལ། པར་ཕུ་བ་ནི་སྔོན་རྟེན་འབྲེལ་གྱིས་རྟོགས་པ་སྐྱེད་ཅིང་སྟོད་ལུང་ཕུར་པར་དགོན་པ་མཛད་ནས་དོ་ཧའི་འཕྲིན་ལས་ཤིན་དུ་ཆེ། མཆན་བུ་རྒྱ་རས་ནི་མགོན་པོའི་གྲུབ་པ་ཐོབ། མི་ཉག་སྒོམ་རིང་ནི་ཁོའི་དྲུང་དུ་རལ་གྲི་ཞིག་བཞག །ཁོའི་ཕ་གསོད་མི་དེ་ཁྲིད་ནས་བྱོན་པས་ཁོ་ཞེ་སྡང་སྐྱེས་སྟེ་རལ་གྲི་ཁྱེར་ནས་དེད་པས་ཁྱོད་རང་གི་ཞེ་སྡང་ལ་ལྟོས་གསུངས་པས་ངོ་བོ་མཐོང་སྟེ་དེ་འདག་སྦྱར་ཡུན་རིང་དུ་བྱས་ནས་བསྐྱངས། ཕྱིས་འགྲོ་མགོན་གྱི་སློབ་མ་སར་པ་རྣམས་ལ་སྒོམ་ལུགས་སློབ་ཅིང་ཉམས་ལྟ་མཛད། འགྲོ་མགོན་གཤེགས་ནས་འབྲི་ཁུང་བཟུང་སྟེ་ཁྱེད་རྣམས་བླ་མ་ངན་དུ་མི་འགྲོ་གསུང་ངོ༌། །ཉག་རེ་སེ་བོ་དོམ་ལ་ཆིབས་ཤིང་ཀླུ་མི་མགོན་དཀར་པོ་རོལ་དུ་ཁྲིད་ནས་འབྱོན། ཀམ་པོ་རྡོ་རྗེ་དཔལ་བརྩེགས་བཏུལ། ཁམས་སུ་སྣེ་དགོན་བཏབ་བོ། །གཤེན་དགོན་དཀར་བ་རྡོ་རྗེ་དབང་ཕྱུག་ནི་ཞང་རིན་པོ་ཆེའི་བླ་མ་གཤེན་པ་ཡིན་པར་དེབ་སྔོན་པ་སོགས་འཆད་ཀྱང་ཞང་གི་བླ་མ་དེ་ནི་གཤེན་པ་རྡོ་རྗེ་སེང་གེ་ཡིན་ནོ། །ཉང་ཤན་གྲོང་པ་ནི་ཞབས་ཏོག་ཤིན་དུ་ཆེ། འཁྲུངས་ཡུལ་དུ་སྒྲུབ་པ་མཛད། མཁའ་སྤྱོད་དུ་བྱོན་པར་གྲགས། རྔོག་སེང་གེ་ཁ་པ་ནི་ལྗང་སེང་གེ་ཁ་འདེབས་མཁན་ཡིན། ཕྱིས་འཁྲུངས་ཡུལ་དུ་བཞུགས། འདིའི་སློབ་མ་དཔལ་ཆེན་ཆོས་ཡེས་ཡིན། རྩི་ལུང་པ་ནི་རྗེ་འཇིག་རྟེན་མགོན་པོའི་ལས་སློབ་མཛད། འོན་དང་དོལ་གྱི་རྩི་ལུང་བཏབ། རྒྱན་ཐང་པ་ནི་སྤྲུལ་པའི་བྱ་རོག་གིས་གཏོར་སྣོད་བཞག་སར་གཡེ་རྒྱན་ཐང་གི་དགོན་པ་བཏབ། རྗེ་འཇིག་རྟེན་མགོན་པོའི་བསྟན་བཅོས་གླང་པོ་ཆེའི་བེམས་ཀྱང་དེ་ན་བཞུགས་པར་གྲགས། གཞན་ཡང་མཆེད་གྲོགས་ལས་སློབ་མར་གྱུར་པའི་མི་ཆེན་ཕྱིས་རྗེ་འཇིག་རྟེན་མགོན་པོའི་མཁན་པོ་མཛད་པ་ཞང་སུམ་ཐོག་པ་དང༌། སངས་རྒྱས་གཉན་རས་ཅེས་བྱ་བ་མ་ཡུལ་དང་ལོ་རོར་མགོན་(ན༤༣བ)
པ་མཛད་དེ་མི་རབས་འགའ་ཡར་དུ་སྒྲུབ་རྒྱུད་བཟང་དུ་བྱུང་བ་ལ་སོགས་པ་ནི་ཆེས་མང་ངོ༌། །གདུང་གི་ཐུགས་མེས་མ་གནོད་པ་གདུང་རྟེན་བཀྲ་ཤིས་འོད་འབར་དུ་བཞུགས་ཤིང༌། འཇག་ལྕིལ་དུ་སྐུ་གདུང་གི་ཞབས་རྗེས་དུས་བཟང་ལ་འཁོར་བ་ལ་ལས་མཐོང་ལ་ལས་མི་མཐོང་བ་ཞིག་བྱུང༌། གདུང་ཐལ་དང་དྲི་འདམ་ལ་སྐུ་འདྲ་རིན་པོ་ཆེ་བཞེངས་པ་ལ་ཚོན་གང་ཡང་མ་བཞེས་པས་གཟོ་བོ་རྣམས་སྐྱོ་ཞིང་དྲོ་ལ་སོང་བའི་བར་དུ་ར་རྫི་བུ་མོ་ལྐུགས་མ་ཞིག་འདུག་པ་དེས་ཚོན་ཐམས་ཅད་བསྲེས་ནས་བཞག་འདུག་པ་དེ་ཀ་བྱུགས་པས་བཞེས་སྟེ་སྐུ་མདོག་སྨུག་ནག་འདི་བྱུང་བས་ཞལ་བཞུགས་དུས་ཀྱི་སྐུ་རྣམས་སྐུ་མདོག་དཀར་བར་སྣང་ཡང་འདི་བསྙུང་དུས་ཀྱི་སྐུ་མདོག་ཡིན་པར་སྣང་ཞིང༌། འདིའི་འདམ་དྲས་རོ་ལས་རུ་མ་བྱས་སྟེ་བཞེངས་པ་ལ་དྲས་མ་དང༌། ཆོས་ཁྲི་སྟེང་དུའང་དེ་ལྟར་བཞེངས་པས་བུད་མེད་ཅིག་ག་ནས་འོངས་ཆ་མེད་པར་བྱུང་ནས་ངའི་བླ་མ་རིན་པོ་ཆེ་འདི་རང་འདྲ། འདི་ཀ་ལ་ཞོག་ཟེར་བ་བཞག་པ་སློབ་མ་མང་པོ་ལ་ཆོས་གསུངས་པ་དེའི་སྐུའི་སྟ་ཟུར་ནས་བྱི་བས་བྲུས་པས་ལྟོས་ཅིག་ཞེས་གསུང་བྱོན་པ་དེའི་ས་ལ་རུམ་བྱས་ནས་བཞེངས་པ་ལ་བྱི་ས་མ་ཞེས་གྲགས་པ་ཡིན་ནོ། །ལི་དཀར་དམར་སོགས་རྒྱུ་སྣ་ཚོགས་འདྲེས་པ་ལ་གསང་འདུས་འཇམ་པའི་རྡོ་རྗེ་བླུག་པས་ཡབ་ལི་དཀར་དང་ཡུམ་ལི་དམར་ཤངས་རྩེ་འབྲེལ་བ་ཞིག་བྱོན། ཕྱིས་འབྲི་གདན་བྱེ་བའི་དུས་ཤངས་རྩེ་འབྲེལ་བ་དེ་ཆད། རྗེ་འཇིག་རྟེན་མགོན་པོ་ང་དྲུག་བཞེས་པའི་ས་རྟ་ལ་འབྲི་ཁུང་པས་མང་མཁར་སྒང་དུ་བཞེངས་པ་ན་རྡོ་རྗེ་གདན་ཚུན་འདུ་གསུང་ཡང་སྟག་ལུང་པས་ངའི་བླ་མའི་སྐུ་རྗེན་པར་མི་འཇོག་ཞེས་འཇག་ལྕིལ་མཆོད་ཁང་གིས་བཏུམས་པ་མཛད། བྲག་བརྐོས་ཆེན་མོ་སོགས་མཛད་སྟེ་མཆོད་ཁང་ཆེན་མོ་སྐོར་ཁང་བཅས་པ་མཛད། བཀའ་རྒྱུད་ཚུགས་པའི་བུ་ཆེན་གྱི་གཙོ་བོ་བརྒྱད་ལས་བསྟན་པའི་བདག་པོར་གྱུར་པ་སྐྱུ་ར་རིན་པོ་ཆེ་ནི་མདོ་ཁམས་འབྲི་ཀླུང་དམ་པ་ཆོས་ཕྱུག་གི་ཡུལ་ཙར་སྟོད་གཡོན་ལུང་གི་གྲོང་ཙུ་དུར་འདྲུ་(ན༤༤ན)
རྒྱལ་སྐྱུ་རའི་གདུང་འཛིན་པར་མཛད་ཏོ། །དེ་ཡང་སྔོན་རྒྱལ་པོ་གླང་དར་གྱི་དུས་ཙམ་ན་སྐྱུ་རའི་སྔགས་འཆང་ཆེན་པོ་ཅིག་ལ་ཡེ་ཤེས་ཀྱི་མཁའ་འགྲོའི་གཙོ་མོ་སྣ་ནམ་བཟའ་ཆོས་ཀྱི་དབང་ཕྱུག་བླངས་པ་ལ་ང་ལ་སངས་རྒྱས་ཀྱི་བསྟན་པ་འཛིན་པའི་བུ་བཞི་འོང་ཟེར་ཞིང་ཤ་གཟུག་གཅིག་དྲངས་པས་ཕག་ནས་གྲི་གྲུག་དང་ཐོད་པ་ཕྱུང་སྟེ་ཤའི་གསུམ་ཆ་གཅིག་ཐོད་པར་གཏོར་མ་བྱས་ནས། ཆ་གཅིག་རང་གིས་ཟོས། ཆ་གཅིག་ཁོལ་མོ་ལ་བྱིན་སྐད། གཟུགས་སྣ་ཚོགས་སུ་བསྒྱུར་ཞིང་རི་རབ་ཁང་ཁྱིམ་ལ་ཐོགས་མེད་དུ་རྒྱུ་ཞིང་དུས་མིན་དུ་འགྲོ་འོང་བྱེད། མཐར་སྐུ་ལུས་འདིས་བཀའ་སྲུང་ཀུན་གྱི་གཙོ་མོར་གྱུར་སྟེ་རྒྱུད་འཛིན་རྣམས་ཀྱིས་མཚན་ནས་བོས་པ་ཙམ་གྱིས་དགྲ་ཁ་ཕུང་དུ་འགྲོ་བ་དེང་སང་ཡང་འབྲི་ཁུང་ཨ་ཕྱི་ཞེས་གྲགས་པ་དེའི་སྲས་ན་མཁའ་དབང་ཕྱུག་གི་རྒྱུད་པ་ཨ་མེས་དབང་རྒྱལ་བྱ་བ་ནུས་པ་ཅན་དེའི་སྲས་བཞི་པ་མདོ་སྔགས་ལ་མཁས་པ་འཇིགས་བྱེད་ཀྱི་རྣལ་འབྱོར་པ་རྡོ་རྗེ། ཡུམ་བཙུན་མ་ཞེས་བྱ་བ་བུད་མེད་བུ་དང་བྲལ་བ་ལ་བུ་ཡིད་ལ་མ་བྱེད་དང་སྡུག་བསྔལ་མི་སྐྱེའི་ཞེས་སྟོན་པ་ཅིག་གི་སྲས་སུ་ཆུ་མོ་ཕག་ལོ་ལ་འཁྲུངས༌། ལྷུམས་སུ་འཇུག་པ་ནས་ལྟམ་པའི་སྐབས་ཀུན་དུ་རྡོ་རྗེ་མཆུའི་པོ་ཏི་དཀར་པོ་འོད་ཀྱི་རྣམ་པར་ཡུམ་གྱིས་གཟིགས། སྐུ་གཅེས་པས་བོན་པོ་ལ་གཏད་སྟེ་དེས་མཚན་དཔལ་བ་ཐར་དང་ཕྱིས་རང་གིས་བཙུན་པ་སྐྱབས་སུ་མཚན་སྤོས། དགུང་ལོ་དྲུག་ནས་ཀློག་མཁས་པར་མཁྱེན་སྟེ་ཟ་ཡོན་གྱིས་མི་ངས་ཀྱིས་ཉེན་པའི་སྐྱེ་བོ་མང་པོ་བསྐྱབས་ཤིང་ད་ལྟའང་འབྲི་ཁུང་ཐེལ་བའི་ཀློག་ཞེས་ཀློག་ཆོད་ཆེ་ཞིང་སྐྱོན་ཆུང་བ། ས་སྒྲ་ར་སྒྲ་སོགས་ཐོན་འཕུལ་རྟེན་སོགས་ལའང་མཆུ་སྦྱོར་ཐ་དད་པ་ཐོན་པ་ཡོད་ཏོ། །སློབ་དཔོན་ལྔ་དྲུག་ཙམ་ཡོད། ཆོས་མང་དུ་གསན། སྒྱུ་མ་ལྟ་བུའི་ཏིང་ངེ་འཛིན་འཁྲུངས། མནལ་ལམ་དུའང་སངས་རྒྱས་ཀྱི་ཞིང་མང་པོ་བྱང༌། མདོ་རྒྱུད་ལས་གསུངས་པའི་ལས་ཚོགས་རྣམས་གྲུབ། ཆོས་མཁས་པ་དང་ནད་སེལ་བ་དང་མཐུ་ཆེ་བ་སོགས་ནུས་པ་ཆེའི་གྲགས་པ་ཐོབ། འོན་ཡང་དཔལ་ཕག་མོ་(ན༤༤བ)
གྲུ་པའི་སྙན་པས་ཐུགས་ཕྲོགས་སྟེ་དམ་ཅན་རྡོར་ལེགས་ཀྱིས་འཕྲིན་ལས་བསྒྲུབས་སྟེ་བྱོན། ཆས་པའི་ཉིན་ཁམས་ནས་དབུས་ཀྱི་བར་འཇའ་ས་འབྲེལ། བླ་མ་དེའི་དྲུང་ན་གདུགས་ཐོགས་པ་ལྔ་བརྒྱ་ཡོད་ཀྱང་ཐུགས་ཀྱི་སྲས་ང་རང་ཡིན་སྙམ་དུ་ངམ་ངམ་པ་བྱུང༌། མནལ་ལམ་དུ་རྗེ་ཕག་མོ་གྲུ་པ་སྤྱན་རས་གཟིགས་སུ་མཇལ། སྦལ་ལོ་ཙཱ་བ་ལ་དབས་རྡོ་རྗེ་རྒྱལ་པོ་སྐུ་ཁམས་བཟང་ངམ་བྱས་པས་ཁོ་ཁྲོས་སྟེ་རྡོ་ཕྱར་བྱུང༌། གཅིག་ན་རེ་ཁམས་པ་ཕག་མོ་གྲུར་འགྲོ་བར་འདུག་ཟེར་བས་འོ་ན་སོང་ཞིག་བླ་མ་རིན་པོ་ཆེ་སྐུ་ཁམས་བཟང་ངོ་ཟེར། ཁོང་ནི་མ་ག་དྷར་ལོ་བཅུ་གཉིས་བསྡད་པ་ཅིག་ཕག་མོ་གྲུར་གཟིམས་ལྕིལ་ལ་སྐོར་བ་བདུན་བྱས་པས་ཐུགས་དམ་འཁྲུངས་པ་ཡིན་པར་སྣང༌། དེ་ནས་དགུང་ལོ་ཉེར་ལྔ་པ་མེ་ཕག་གི་མཇུག་ལ་ཕག་མོ་གྲུར་མཇལ། ཇ་དང་དར་ཟབ་དང་རྟ་ཀུན་ཕུལ་བས་ཁོ་བོ་རྐང་བཞིའི་འབུལ་བ་མི་ལེན་པ་ཡིན་ཞེས་རྟ་མ་བཞེས། ཇ་དེ་ལ་ཕྱག་བཅུག་མནམས་ནས་བཟང་པོ་ཅིག་འདུག་ཐོན་པར་སྐོལ། འདི་འདི་རྣམས་བོས་གསུངས་སྟེ་དབུ་ཆེ་བརྒྱད་བཅུ་ཙམ་ཚོགས་པ་ལ་དྲངས། རྗེ་ཉིད་ཀྱིས་ཡང་ཡང་བཞེས་པས་སྐུ་གཟི་མདངས་དང་ལྡན་པར་གྱུར། བླ་མ་འདི་ལྟ་བུ་རྙེད་པ་ང་རེ་ཚོགས་བསགས་སྙམ་པ་ན། ཁྱོད་ད་ང་རང་ལ་རེ་ཆེ་བར་འདུག་སྟེ་ངས་ཁྱེད་རྣམས་ཀྱི་དོན་དུ་དཀའ་བ་དཔག་མེད་སྤྱད་པ་ཡིན་གསུངས། སྔར་རྟོགས་ལྡན་ཐོད་པ་བོར་ཆོག་ཡིན་ཡང་སྲིད་མི་ལེན། འོན་ཡང་ད་དུང་ཁོ་བོའི་སློབ་མ་མ་ཚང་གསུང་ཞིང་ངའི་རྒྱུད་པ་འདི་ནི་དགེ་བསྙེན་ས་བཅུ་པ་ཅིག་གིས་འཛིན་གསུང་བ་ལ་ཆོས་རྗེ་ཉིད་ཕེབས་ཕྱིན་ཆད་ད་ནི་ངའི་འཁོར་ཚང་གསུང་ཞིང་རྟོགས་ལྡན་སྐྱེ་བའི་འཁོར་ལོ་སྐོར་བྱ་བ་སོགས་གསུངས་པས་སྔ་མ་ཁ་ཅིག་མ་མོས་སྐད། ལན་ཅིག་རྗེ་བཞེངས་ནས་ལུས་གནད་བཅོས། མདུན་དུ་ཡི་གེ་གསུམ་གསུང་ཆེན་པོ་ཅིག་མཛད་ནས་ཁྱོད་ལ་སྒོམ་ཆེན་བཟང་པོ་ཅིག་འོང༌། (ན༤༥ན)
སྒོམ་ཆེན་ཙམ་ལ་བཟང་བ་ཞིག་འོང༌། དེ་ལ་ཁོ་བོ་དགའ་བ་ལགས་མོད་གསུངས། དག་སྣང་ལ་ལྟེམ་རྐྱང་བྱུང་བས་སེར་ཕྱག་གི་ཞེ་དམ་མཛད་པས་སོར་ཆུད། མོས་གུས་ལ་ལྟེམ་རྐྱང་བྱུང་བ་ཞུས་པས་དེ་ཕྱིན་ཆད་ལྟེམ་རྐྱང་མ་བྱུང༌། སངས་མ་རྒྱས་ཀྱི་བར་དུ་ཆོས་ལྔ་པོ་འདི་དང་མ་བྲལ་བར་གྱིས། རྟོགས་པ་འདིས་ཆོག་སྙམ་ན་ད་དུང་མང་དུ་གོར་ཡོད་པ་ཡིན་གསུངས། ཆོས་བསྒུགས་ཀྱི་སར་ཡང་ཡན་ལག་བདུན་པ་ཁོ་ན་ཕུལ། ཕྱག་རྟེན་སྣ་རེ་མེད་པར་མཇལ་མ་མྱོང༌། བྱང་ཆུབ་སེམས་སྡོམ་གནང་ནས་ཁྱོད་ཀྱི་མིང་ནི་བྱང་ཆུབ་སེམས་དཔའ་རིན་ཆེན་དཔལ་ལོ་གསུངས། ཐམས་ཅད་མཁྱེན་པའི་ཡེ་ཤེས་ཇི་ལྟར་འཆར་ཞུས་པས་དེ་ཁྱོད་རང་གིས་ཤེས་ནས་འོང་ལན་གསུམ་གསུངས། གཤེགས་ཀར་བླ་མའི་ཐུགས་ཀ་ནས་གསེར་གྱི་རྡོ་རྗེ་བྱུང་སྟེ་རྗེ་འདིའི་ཐུགས་ཀར་ཐིམ་པ་དེར་ཡོད་ཀུན་གྱིས་མཐོང༌། ལྕིལ་པོའི་རྡོ་ཡན་ཆོད་སྐུ་འབུམ་གྱི་ཕྱོགས་སུ་བཏང༌། ཕྱིས་གཡེ་ཆུང་དུ་བླ་མ་ཡལ་གྱིས་ཞབས་ཏོག་བྱས་སྟེ་སྒྲུབ་པ་མཛད་པས་ཕྱི་ནང་གི་རྟེན་འབྲེལ་ཐམས་ཅད་ཤར། རླུང་དབུ་མར་ཆུད། ཆོས་ཟབ་མོ་འདི་རྣམས་བླ་མས་སྔོན་ནས་གསུངས་འདུག་པ་སྙམ་ནས་མོས་གུས་ཁྱད་པར་ཅན་སྐྱེས། སྒྲོལ་མ་ཞལ་གཟིགས། སླར་ཡང་ལོ་གཉིས་སྒྲུབ་པ་མཛད་པ་ན་བསྙུང་འཛེ་དྲག་པོ་ཐོག་བབས་སུ་བྱུང་བས་རྐྱེན་བྱས་སྟེ་སྙིང་རྗེ་བློ་རྡེག་དུ་འཁྲུངས་པས་ཀླུ་ཆེན་པོ་དེ་ཡང་སྐུ་ལུས་ལས་བུད་པར་གཟིགས་པས་བསྙུང་གཞི་སྐད་ཅིག་གིས་གྲོལ། རྟོགས་པ་མཐར་ཕྱིན་སྟེ་སངས་རྒྱས་ཐམས་ཅད་དང་དགོངས་པ་མཉམ་པ་ཉིད་དུ་གྱུར། འོན་ཡང་གཞན་གྱི་ངོར། ཞག་ཕྱེད་དང་བཞི་ཡི་ནང་པར་ལ། །མི་ཁོ་བའི་ལས་ངན་རང་སར་དག །ཞེས་གསུངས། སྔོན་བླ་མ་རིན་པོ་ཆེས་ཀྱང་ཁྱོད་རབ་ཏུ་བྱུང་གསུངས་པ་ལ། རང་བཞིན་ཁ་ན་མ་ཐོ་བ་བརྒྱད་ཁལ་དང་འདྲ་བའི་སྟེང་དུ་བཅས་པའི་ཁ་ན་མ་ཐོ་བ་སྤོང་བ་གོང་ཚ་ལྟ་བུ་མི་ཐེག་དགོངས་ནས་མ་བླངས། ཕྱིས་གཡེ་(ན༤༥བ)
ཆུང་ངུ་བཅས་རང་ངོ་བོ་གཅིག་པ་དང་བཀག་པ་ཡེ་བཀག་གནང་བ་ཡེ་གནང་དང་ཆོས་ཀྱི་རྒྱལ་པོས་འགྲོ་བ་སྤྱི་ལ་བཅས་པ་དང་ཉམས་པ་ལས་མ་བླངས་པ་ཉེས་པ་ལྕི་བ་སོགས་ཀྱི་གནད་དགོངས་པས་རབ་ཏུ་མི་འབྱུང་ཀ་མེད་དུ་འདུག་པར་མཁྱེན་ནས་དགུང་ལོ་སོ་ལྔ་པ་མེ་མོ་བྱ་ལོ་ལ་ཞང་གིས་མཁན་པོ་དང༌། རྩི་ལུང་པས་སློབ་དཔོན། སྨྱལ་བ་འདུལ་འཛིན་གྱིས་གསངས་སྟོན་མཛད་སྟེ་བསྙེན་པར་རྫོགས། སྨྱལ་འདུལ་ལ་འདུལ་བ་གསན། དཔལ་ཆེན་བིརྺ་པ་དང་མཉམ་པའི་རྣལ་འབྱོར་དབང་ཕྱུག་ཞིག་དགེ་སློང་དུ་ཕེབས་པ་འདི་ཕོ་རྒོད་ཡིན་གསུངས། བླ་མ་ལྡུམ་སྐུ་ལུས་གུམ་པ་དམིགས་པས་ཞག་གསུམ་ལ་བསལ། མཁན་པོ་ལ་བསྙུང་འཛེ་ཐོག་བབས་སུ་བྱུང་བ་ཞག་བཅོ་ལྔས་བསལ། གཞན་ཡང་བྱིན་རླབས་མཛད་པར་ཙམ་གྱིས་ནད་ཞི་བ་དང༌། ནུས་པ་ཕུལ་དུ་བྱུང་བས་སྐྱེ་བོ་དག་བློར་མ་ཆུད་སྟེ་རྒྱུན་རྐྱེན་སྣ་ཚོགས་པ་གླེང་བ་ན་རྗེ་ཕག་མོ་གྲུ་པའི་སློབ་མ་ཙཱ་རི་བ་བྱ་བ་གྲུབ་ཐོབ་ཏུ་གྲགས་པ་ཅིག་ན་རེ་ངས་ལྟ་ཟེར་སྐད། ཁོང་གིས་མཇལ་བས་དད་པ་ཐོབ་སྟེ་དེ་གྲུབ་ཐོབ་རྩོད་མེད་དུ་འདུག །ངེད་གཉིས་བླ་མ་མི་གཅིག་པར་འདུག །ངའི་བླ་མ་དགེ་བཤེས་ཁམས་པ་ཡིན་པར་འདུག །ཁོང་གི་བླ་མ་སངས་རྒྱས་ཡིན་པར་འདུག་ཟེར་སྐད་སྟེ་མདོ་ལས་ཀྱང་སངས་རྒྱས་ལ་དག་ས་པ་རྣམས་ཀྱིས་བསམ་གྱིས་མི་ཁྱབ་པ་ཆོས་ཀྱི་དབྱིངས་ཐམས་ཅད་པར་མཐོང་བ་དང༌། ཐེག་ཆེན་གྱི་འཕགས་པས་རྟག་པའི་སྐུར་མཐོང་བ་དང༌། སོ་སྐྱེས་མྱ་ངན་ལས་འདའ་བར་མཐོང་བ་རྣམས་མོས་པའི་ཁྱད་པར་ཡིན་ལ་རང་ཉིད་རྒྱུད་ཚོད་མཐོར་སོང་ནས་མོས་གུས་གོང་འཕེལ་དུ་འགྱུར་བ་ཡིན་ནོ། །དེར་གདན་སར་ཕེབས་པས་སྟོང་ཉིད་སྙིང་རྗེའི་རྣལ་འབྱོར་གྱིས་འཛེ་འུར་འདེད་མཛད་པའི་བླ་མ་གྲལ་དབུ་ལ་བཞུགས་ཅེས་གཏམ་བཏང་པས་འཛེ་འུར་འདེད་པར་མཚན་གྲགས། གདན་སར་ལོ་ངོ་གསུམ་བཞུགས་ལ་ཁོང་རྣམས་རྩིང་སྤྱོད་བྱས་པས་མི་བཞུགས་པར་དགོངས། རྗེ་གོང་མས་ཟ་འོག་གི་འབོལ་རྙིང་པ་འདི་ཁོང་རང་ཚོ་ལ་གཏོད་ལ་ཁྱོད་རང་བྱང་ཕ་གིར་སོང་གསུང་བ་གཟིགས་སྟེ་གཞི་བ་(ན༤༦ན)
ཚོ་ལ་གདན་ས་འཕྲོད་ཡོད་ཏོ་གསུངས་ནས་བྱོན། འབྲི་ཁུང་གི་གཞི་བདག་བར་ལྷས་བོན་པོའི་གཟུགས་ཀྱིས་བསུས། ཤ་བ་དང་བྱ་རྒོད་ལ་སྒོམ་བཏབ། ལམ་དུ་གསང་ཕུར་རྩེགས་དབང་ཕྱུག་སེང་གེ་དང་གཙང་པ་འཇམ་དཔལ་སེང་གེ་སོགས་ལ་གདམས་པ་གསུངས། མི་དང་མི་མ་ཡིན་ཐམས་ཅད་ཀྱིས་བསུས་ནས་དགུང་ལོ་སོ་བརྒྱད་པ་ལྕགས་ཕོ་བྱི་བ་ལ་འབྲི་གུང་དུ་བྱོན། སྐལ་ལྡན་གྱི་སློབ་མ་མང་དུ་འདུས་ཤིང་བྱང་དུ་བྱོན་པས་གཉན་ཆེན་པོ་ཐང་ལྷས་གསུ་བ་བྱས། ཉི་མ་གཏོད་ལ་མནན། མཁན་པོ་ཀོལ་ཏི་པས་སེམས་སྐྱེད་གསལ་མ་བཏབ་པ་དང་གསོ་སྦྱོང་ལ་འཚོག་དཀའ་བ་ན་ཕྱིས་མི་མཛད་པར་དགོངས་པས་ཚངས་པ་དང་བརྒྱ་བྱིན་གྱིས་གསོ་སྦྱོང་དང་རབ་བྱུང་གནང་བར་གསོལ་བ་བཏབ། དམ་ཤོད་དུ་བྱོན། ཐུགས་རྗེས་འཁྲུག་པ་ཡུན་རིང་དུ་ཞི། དྭགས་པོར་བྱོན་སྟེ་མུ་གེ་ཡོད་པ་ཕེབས་མ་ཐག་ནས་ཞི་སྟེ་བཀའ་དྲིན་ཚད་མེད་པར་གྱུར། དགུང་ལོ་དྲུག་བཅུའི་དུས་རྟེན་འབྲེལ་མཛད་པས་སྐུ་ཚེའི་བར་ཆད་ཞི། དམུ་ཆུའི་བསྙུང་འཕྲུལ་འཁོར་གྱིས་དྭངས། ཕྱིས་དམ་ཤོད་པའི་རབས་ཆད་ཅིག་གི་ཡོ་བྱད་དང་གསུང་རབ་གདན་སར་ཕུལ་བ་ལ་བརྟེན། ལུང་པའི་མི་ཐམས་ཅད་ཀྱིས་གདན་ས་བཤིག་པར་ཐག་ཆོད་ཚེ་སློབ་མའི་བདེ་ལེགས་བླ་མ་ལ་རྟེན་འབྲེལ་སྒྲིག་དགོས་པར་དགོངས། གསུང་རབ་དེས་གཙོ་བྱས་ཕག་གྲུའི་གསུང་རབ་ཀུན་སྒམ་པོར་ཕུལ་བས་རྩོད་པའང་རང་ཞི། ཕྱིས་ཕག་གྲུ་དར་བའི་རྟེན་འབྲེལ་མཐའ་དག་འགྲིག་པས་རྗེ་ཉིད་ཀྱི་འཕྲིན་ལས་འདི་ཆེ་ཞིང་བླ་མའི་ཐུགས་དགོངས་རྫོགས་པར་བྱས་པ་ལ་དེ་ཙམ་ཞིག་གྲུབ་གསུང་ཞིང་འདི་ནི་ན་རོ་བའི་དཀའ་བ་བཅུ་གཉིས་ལས་ལྷག་ཞེས་གསུངས་ལ། གཞན་ཀུན་གྱིས་སྐུར་པ་བཏབ། ཕྱིས་བླ་མའི་གདན་ས་ངས་བརྒྱ་འགྱུར་དུ་བཏང་ངོ་གསུངས་ནས་རྗེ་སྤྱན་སྔ་བསྐོས་པ་ཡིན་ནོ། །གནས་ཆེན་དང་རི་ཕྲན་ཀུན་གྱི་གཞི་བདག་གིས་མཆོད་གནས་ཞུས་སྟེ་ཐམས་ཅད་ལ་རི་པ་གནང༌། ལྷ་མོ་ལོ་ཏོག་འབྱོར་མ་ལ་སོགས་འདུས་པ་རིན་པོ་ཆེ་ཏོག་གི་གཟུངས་ནས་གསུངས་པའི་(ན༤༦བ)
ལོ་ཏོག་གི་ལྷ་མོས་འབྲུས་གང་བའི་བྲེ་བོ་འབུལ་དུ་བྱུང་བ་སོགས་བྱུང་སྟེ་ནས་ཆེས་མོད་པས་སྐྱི་ཤོད་པ་རྣམས་འབྲི་ཁུང་ནས་ནས་སྒྲུབ་པ་བྱུང༌། གཉོས་ཀྱི་བུར་སྟོན་ལ་ལྔ་ཁྲི་ལྔ་སྟོང་ལྔ་བརྒྱ་ཚོགས་པ་དང༌། དགེ་སློང་འབུམ་ཕྲག་ལྷག་པས་ཚུལ་ཤིང་ལེན་པ་བྱུང༌། བླ་ཡེལ་རྩིག་པའི་ཚེ་ལས་ཆེས་ཐུན་ཆེས་སོ་ཞེས་ནགས་ཤོད་མཁན་པོས་འབར་བས་རྩིག་པ་རྣམས་མགོན་པོ་བེང་གིས་བཤིག །ཙཱ་རིའི་དག་པ་ཤྲཱིའི་བཀོད་པའི་མཆོད་རྟེན་བཀྲ་ཤིས་སྒོ་མང་རྟ་རྔའི་དྲ་བར་བཅུག་སྟེ་མཁའ་འགྲོས་གཟིགས་ཕུལ། སིངྒ་གླིང་ནས་དགྲ་བཅོམ་པས་མགོན་པོ་ཀླུ་སྒྲུབ་ཡིན་ཞེས་མེ་ཏོག་པདྨ་དཀར་པོའི་མཆོད་པ་ཕུལ། གཞན་ཡང་སྐུའི་བཀོད་པས་འཛམ་གླིང་གི་རྒྱལ་པོ་ཆེན་པོ་བཅུ་གསུམ་བཏུལ། རྡོ་རྗེ་གདན་ལ་གར་ལོག་གི་དམག་ཟློག་སྟོང་ཉིད་རྒྱུ་འབྲས་དབྱེར་མེད་བསྟན་པས་སྟན་པ་ཉི་མ་ཤར་བ་ལྟར་མཛད། རིག་སྤྱོད་ཁྱད་པར་དུ་འཕགས་པ་ཚུལ་ཁྲིམས་རིན་པོ་ཆེ་ཡིན་ཞེས་སྟོན་ཞིང་ཤ་ཆང་གི་ཚོགས་འཁོར་ཡང་མི་མཛད། སྐུ་གཤེགས་གར་ཡང་གློ་བ་སྐམ་པོ་ཅིག་གསོལ་ཐུག་ལ་འདེབས་པར་ཞུས་པའང་མ་གནང༌། དཔལ་ཕག་མོ་གྲུ་པ་ལ་སྐྱོབ་པ་རིན་པོ་ཆེ་ཞེས་དང་འཇིག་རྟེན་གསུམ་གྱི་མགོན་པོ་འབའ་ཞིག་དུ་གསུང་བས་སློབ་མ་རྣམས་ཀྱིས་ཀྱང་རྗེ་ཉིད་ལ་མཚན་དེ་ལྟར་དུ་འདོན། ཐུགས་ཀྱི་དགོངས་པ་ཐམས་ཅད་ཡོངས་སུ་རྫོགས་ནས་དགུང་ལོ་དོན་ལྔ་པ་མངོན་པར་བྱང་ཆུབ་པའི་ཟླ་བའི་ཉེར་ལྔ་ལ་མྱ་ངན་ལས་འདས། སྤྱན་སྔ་བ་རྣམས་ཀྱིས་གསོལ་བ་བཏབ་པས་སླར་བཞེངས་སྟེ་ཞག་གཉིས་བཞུགས། གསོལ་བ་བཏབ་པ་བཞིན་ཚོགས་སུ་ཞལ་བསྟན་ཞིང་ཆོས་གསུངས། བཞུགས་པར་ཞུས་པས་ཁོ་བོའི་གདུལ་བྱ་རྫོགས་གསུངས། དུས་མཆོད་གང་ལ་འཛིན་ཞུས་པས་མཆོད་པ་བླ་མ་ལ་འབུལ་བས་ཉེར་ལྔ་ལ་ཟུང་ཞིག་གསུངས་སྟེ་མྱ་ངན་ལས་འདས། ངོ་མཚར་ནི་མཐའ་ཡས་པ་བྱུང་ངོ༌། །སློབ་མའང་སྤྱན་སྔ་དབོན་རིན་པོ་ཆེ། རྗེ་སྤྱན་སྔ་བ། སྤྱན་སྔ་འབྲི་ཁུང་གླིང་པ། སྤྱན་སྔ་དམ་ཆོས་གླིང་པ་སོགས་ཐུགས་ཀྱི་སྲས་རྣམས་དང༌། (ན༤༧ན)
གཉོས་འགར་ཆོས་གསུམ་སོགས་རྣལ་འབྱོར་གྱི་དབང་ཕྱུག་བགྲང་ལས་འདས་པ། དཔལ་ཆེན་ཐག་མ་པ་སོགས་དཔལ་ཆེན་བཅུ་གཉིས། མདོར་ན་སློབ་མ་དང་ཡང་སློབ་ཀྱིས་ཨོ་ཌྱན་ནས་ཁ་ཆེ་རྒྱ་གར་སོགས་འཛམ་གླིང་ཐམས་ཅད་ཀྱི་གནས་ཆེན་མིང་ཆེ་ཆུང་གྲགས་མ་གྲགས་བས་མཐའ་རི་ཁྲོད་ཐམས་ཅད་དུ་མང་བ་ཁྲི་ཕྲག་ནས་ཉུང་བ་གཅིག་གཉིས་ཀྱི་བར་མ་ཁྱབ་པ་མེད་ལ་དེ་ཐམས་ཅད་ཚེ་བློས་བཏང་སྡོམ་གསུམ་རྣམ་པར་དག་པ་འབའ་ཞིག་ཤས་ཆེའོ། །སྔོན་སྒམ་པོ་པའི་དུས་ཀྱེ་པོ་ཡེ་རྡོར་གྱིས་བྱོན་པ་ཙམ་ལས་གཞན་མིས་མི་བགྲོད་པའི་དུས་གཉོས་འགར་ཆོས་གསུམ་གྱིས་བརྟུལ་ཞུགས་ཀྱི་སྤྱོད་པ་དང་ཡེ་ཤེས་ཀྱི་རྩལ་གྱིས་ཙཱ་རི་ཏྲའི་གནས་སྒོ་ཕྱེ་སྟེ་སྒྲུབ་རྒྱུད་ཀྱི་རྣལ་འབྱོར་གྱི་དབང་ཕྱུག་རྣམས་ཀྱི་སྒོམ་པའི་གནས་དང་སྐྱེ་བོ་མཆོག་དམན་བར་མ་ཐམས་ཅད་ཀྱི་སྐོར་བ་སོགས་ཚོགས་གསོག་སྒྲིབ་སྦྱོང་གི་ཡུལ་ཟླ་མ་མཆིས་པར་གྱུར་ཏོ། །ཁྱད་པར་དུ་གཉོས་ཆེན་པོ་ནི་ཁ་རག་གི་གཉོས་ལོའི་རྒྱུད་གཉོས་ནག་གྲགས་པ་དཔལ་གྱི་སྲས་ཡིན། ཡབ་ཆོས་དང་མདོ་ཕྱོགས་མཁས། ཐག་མ་པ་དང་ཝལ་ཏི་ལས་བསྙེན་རྫོགས་མཛད། ཆོས་རྗེས་རྗེས་སུ་བཟུང༌། ཏི་སེར་ལྷ་ནང་དུ་སྒྲུབ་པ་མཛད་པས་ལྷ་ནང་པར་གྲགས། བྱང་དུ་ལྷ་ཐེལ་སོགས་བཏབ། ལྷ་པ་ཉིས་སྟོང་བརྒྱད་བརྒྱ་སོགས་བྱུང་ཞིང་དབོན་པོ་ལྷ་རིན་ཆེན་རྒྱལ་པོ་ལ་སོགས་པ་ལྷ་བའི་བཀའ་རྒྱུད་བཟང་བར་བྱུང་ལ། འགར་དམ་པ་གཞོན་ནུ་རྡོ་རྗེ་འམ་ཤཱཀྱ་དཔལ་ནི་རྨེ་འདོར་དུ་ལྕགས་བྱི་ལ་འཁྲུངས། འཇིགས་བྱེད་ཀྱི་གྲུབ་ཐོབ་ཡིན། གདན་ས་ཐེལ་དུ་གནང་ཡང་མ་བཞེས། འབྲི་ཁུང་དུ་ཐུགས་དམ་སྐད་གཏོང་བ་མཛད། དྭགས་པོར་འདྲེ་དམག་བཏུལ། ཟུ་རེར་ཆོས་སྡིངས་བཏབ་པ་གདན་སའི་འགྲན་ཟླར་སོང་དོགས་མ་བཟུང༌། ཕྱིས་པོ་བོར་ཕུ་ལུང་དགོན་པ་བཏབ་ཅིང་ད་དུང་དར། དཔལ་ཆེན་ཆོས་ཡེའི་རྗེས་འབྲེང་ལ་ནག་ཚང་པར་གྲགས་སོ། །མཁས་པ་གྲུ་སྐྱ་མོ་ཞེས་བྱ་བ་ཤིན་དུ་མཁས་པ་ཅིག་གིས་རྩོད་དུ་འོངས་པས་ཞལ་མཇལ་བ་(ན༤༧བ)
ཙམ་གྱིས་བྱིན་རླབས་ཞུགས། ཚིག་རེ་རེ་གསུངས་པས་སྒྲོ་འདོགས་ཐམས་ཅད་ཆོད། སྒོམ་མེད་ཀྱི་རྟོགས་པ་འཁྲུངས་སྟེ་རྗེའི་དགོངས་པ་རྩལ་དུ་བཏོན་པ་ཐེག་ཆེན་བསྟན་པའི་སྙིང་པོ་རྩ་འགྲེལ་མཛད། སྤྱན་སྔ་འབྲི་ཁུང་གླིང་པ་ནི་འདན་གྱི་ཡུལ་དུ་སྐྱུ་ར་ལྷ་སྒྲའི་རྒྱུད་ཡབ་སྟོན་པ་སངས་རྒྱས་དཔལ་དང་ཡུམ་རིན་ཆེན་སྒྲོལ་མ་ལ་སྲས་དྲུག་གི་དང་པོར་འཁྲུངས། རྗེ་འཇིག་རྟེན་མགོན་པོའི་ཞེ་བཞི་པ་མེ་ལུག་ལ་འཁྲུངས་པར་དེབ་སྔོན་ན་སྣང་ལ་རྣམ་ཐར་ན་སྤྲེ་ལོ་པར་བྲིས་སྣང༌། གཉིས་པ་ཐུབ་པ་བསོད་སྙོམས་པ། ཐ་ཆུང་སྤྱན་སྔ་སྒམ་པོ་པ་ཡིན་ལ་ཆུང་ངུ་ནས་འབྲི་ཀློག་མཁས་པར་མཁྱེན། ལས་འབྲས་ཀྱི་བླང་དོར་མཁས་ཤིང་དད་པ་ཆེ། བཅུ་བདུན་པ་ལ་དཔལ་ལྡན་དད་ཕུ་བ་མཇལ། མཚན་རིན་ཆེན་རྒྱལ་པོར་བཏགས། སྤྲོས་བྲལ་གྱི་རྟོགས་པ་སྐྱེས། དད་ཕུ་བ་གཤེགས་ནས་དགུང་ལོ་ཉེར་གཅིག་པ་ལ་འབྲི་ཁུང་དུ་དད་ཕུ་བའི་གྲ་པ་དུ་མ་དང་ལྷན་དུ་བྱོན། ཆོས་རྗེའི་མནལ་ལམ་དུ་ཞིང་ཧྲེབ་བེ་བ་ཞིག་ལ་ནས་རྡོག་བཞི་ལྔ་ཙམ་ཆགས་པའི་སྙེ་མ་ཐོ་རེ་འདུག་པ་ནས་ཁ་ཡར་ཞིག་སྐུ་ཕག་དུ་བསྣམས་པ་རྨིས་པའི་ནང་བར་བྱུང་ནས་ཅིག་གིས་བླ་མ་རིན་པོ་ཆེ་དང་དཔལ་ཆེན་དད་ཕུ་བ་གཉིས་སྙིང་གར་ཞལ་སྤྲད་སྟེ་སྒོམ་མམ་བཤིབས་ནས་སྒོམ་ཟེར་བ་ལ་ལན་མ་གསུངས། ཚོགས་ཆོས་ཀྱི་དུས་ད་ནང་ཅིག་ན་རེ་དེ་སྐད་ཟེར་དུ་བྱུང༌། ཁོ་དང་ང་གཉིས་བཤིབ་པ་རྣམ་རྟོག་ཡང་ཟ་གསུངས་པས་དེ་གདམས་ངག་དུ་སོང་བས་དེ་ཀུན་ལ་ཁྱད་པར་ཅན་རེ་བྱུང་ཞེས་པའི་ནང་ཚན་ཡིན། རྩོམ་ཡིག་པ་མཛད་པས་མཉེས་ཤིང་ལུང་མཉེལ་བའི་ཚུལ་སྟོན་པ་རྣམས་མཉེལ་བསོས་པ་ཐུགས་ཤིན་དུ་མཉེས། སྐུ་ན་བྱོན་པ་དང་ཚེམས་འགའ་རེ་བྱོན་པ་དང་ལྗགས་ལྡིབ་པས་གསུང་མི་གསལ་ཙམ་ལ་དང་པོར་ཐུགས་མ་གང་ཙམ་བྱུང༌། དེ་མ་ཐག་ཉམས་མྱོང་གིས་ཟིན་སྟེ་དེ་ཕྱིན་བླ་མ་ཆོས་སྐུའི་མོས་གུས་ལ་ལྟེམ་རྐྱང་མ་བྱུང་ཞིང་བྱིན་རླབས་ཐམས་ཅད་ཞུགས་པས་སྔ་མའི་ལོག་རྟོག་ཅུང་ཟད་སྟེ་ལྷོངས་ཡིན་པར་མཁྱེན། གཟིམས་(ན༤༨ན)
གཡོག་སོགས་སྤྱན་སྔའི་བྱ་བ་ཀུན་གུས་པར་མཛད་ཐུགས་ལ་བཏགས་སྟེ་ནོར་དང་མགྲོན་མ་གཏད། མཇལ་སྣ་དང་ཞུ་སྣ་མ་བཅོལ་ཁྱད་པར་བཀའ་བཀྱོན་གྱི་བཀའ་བབ་སྟེ་སུ་ལ་ཐུགས་མ་མཉེས་ཀྱང་ཉིད་ལ་བཀའ་བཀྱོན། དེ་ཙམ་གྱིས་དད་པ་ལྷག་པར་འཕེལ། བདག་ནི་འདི་རང་ངོ་མཚར་ཆེ་སྙམ། འབྲི་ཁུང་གི་རི་བྱ་རྒོད་ཕུང་པོའི་རི་མདོའི་གླིང་གཞིར་བཤད་པ་ལྟ་བུ་དང༌། གཟིམས་ཆུང་གསེར་ཁང་ཕོ་བྲང་རྣམ་སྣང་གི་སྙིང་པོ་ཅན་དང༌། བླ་ཡེལ་སོགས་ཨ་མོ་ནི་ཀ་གི་རྡོ་ལེབ་བཏེག་མནན་གྱིས་འཕར་ནེམ་དུ་བྱེད་པ་ལ་སོགས་པ་རྡུལ་ཕྲ་རབ་རེ་རེ་ལའང་སངས་རྒྱས་ཀྱི་ཞིང་ཐ་དད་པ་མཐའ་ཡས་གནས་པ་སོགས་ཉིན་རེ་ཞིང་གོང་འཕེལ་དུ་གཟིགས། འཕགས་པ་ཀུན་དགའ་བོས་གསེར་མདོག་གི་རྟོགས་བརྗོད་གསུང་བ་གཟིགས། ཐུགས་དམ་སྒོ་མང་གཞེང་བའི་ཚད་རྟེན་བཞུགས་དཀར་ཆག་སོགས་དགོངས་པ་རྫོགས་པར་མཛད། འབྲི་ཁུང་གི་གདན་ས་གྱིས་གསུང་ཡང་བདག་གིས་ཀུན་སྤངས་ཀྱི་སྤྱོད་པས་འཕྲིན་ལས་དཔེལ་ཞུས། དགུང་ལོ་སོ་གཅིག་པ་གླང་ལོ་ལ་རྗེ་འཇིག་རྟེན་མགོན་པོ་གཤེགས། གདུང་བཞུ་བའི་ཚེ་ཐུགས་མ་ཉམས་པ་ཕྱག་དུ་བྱོན་པ་སོགས་གདུང་ཅུང་ཟད་ཀྱང་མ་གོད་པར་སྐུ་འབུམ་འཛམ་གླིང་རྒྱན་དུ་བཞུགས་ཤིང་རྗེ་རིན་པོ་ཆེ་སྣམ་སྦྱར་དང་དབུ་ཞྭ་མནབས། ཕྱག་མཁར་ཀོམ་ཚུགས་མཛད་པ་ཅིག་ཁོ་བོ་འདི་ན་རྟག་དུ་ཡོད་པ་ཡིན་གསུང་བ་གཟིགས། སྤྱིར་ཚོགས་པ་ཐམས་ཅད་ཀྱིས་སློབ་དཔོན་དུ་བཀུར་ཞིང་མཆེད་གྲོགས་རྣམས་ཀྱིས་ཀྱང་དག་སྣང་མང་དུ་མཐོང་བ་སོགས་ཀྱིས་འབུལ་ནོད་ཀྱི་རླབས་འཕྱུར་བ་ཡོང་ཡང་ཟུར་གྱི་ཐབ་སྐྱོང་སྐྱིད་ཆོས་སོགས་སྐད་ཅིག་ཀྱང་མི་མཛད་པར་ཞལ་བཞུགས་རིང་བླ་མ་དང་གཤེགས་ནས་ཀྱང་གདན་ས་འབའ་ཞིག་དུ་གཏོང༌། ཆོས་རྗེ་རིན་པོ་ཆེས་ཀྱང་ཐུགས་ཀྱི་སྲས་སུ་དགོངས་ནས་ཁྱད་ཆོས་ཀྱི་མཛོད་ཐམས་ཅད་གཏད། ཕྱིས་གནམ་མཚོ་ཏི་སེ་ལ་སོགས་པར་བྱོན་ཞིང་ཐུགས་དམ་གྱི་སྤངས་རྟོགས་ཡོངས་སུ་རྫོགས། མངའ་རིས་ཡ་ཙེ། (ན༤༨བ)
གར་ལོག་ལ་སོགས་པའི་རྒྱལ་བློན་འབངས་བཅས། པཎྜི་ཏ་དང་རྣལ་འབྱོར་པ་ལ་སོགས་པ་མཐའ་ཡས་པས་ཞབས་སྤྱི་བོར་བླངས་ཤིང་གུས་པས་མཆོད། སོ་དགུ་པ་ཤིང་བྱ་ལ་འབྲི་ཁུང་དུ་བྱོན། ལོ་མཇུག་ལ་ལྷོ་བྲག་དུ་བྱོན། ལམ་དུ་ས་པཎ་གྱིས་ཞབས་རྗེན་སྤོས་རེང་གིས་བསུས། ཁྱི་ལོའི་དབྱར་དྲོ་བོ་ལུང་ཕུལ་བ་བཞེས། དགུན་མཁར་ཆུར་ཁྱད་ཆོས་བརྒྱ་དགུ་བཅུ་པ་དང་དེ་རྗེས་བརྒྱ་ལྔ་བཅུ་པ་ཡི་གེར་མཛད། ཕྱིས་རང་བཞེད་རྐྱང་པ་ཅན་དང༌། གཞན་འདོད་བསྣན་པ་དང༌། སྤྱི་བཞེད་བསྣན་པ་སོགས་མང་དུ་མཛད་ཅིང་ཟིན་བྲིས་ཀྱང་མང་དུ་བྱུང་བ་སངས་རྒྱས་ཐམས་ཅད་ཀྱི་བསྟན་པ་གཅིག་པ་སྟོན་པས་དགོངས་གཅིག་ཅེས་གྲགས་ལ། ཕྱི་རབས་ནི་བསྟན་དགོངས་གཉིས་ཅེས་རྗེ་འཇིག་རྟེན་མགོན་པོའི་ཆོས་ཀྱི་སྙིང་པོར་གྲགས་སོ། །སྐུ་ཚེའི་སྨད་ཕལ་ཆེར་དྭགས་པོར་བཞུགས་ཤིང་སྒམ་པོའི་གདན་སར་ཡང་བཞུགས་ལ། འབྲི་ཁུང་དུ་འབུལ་བ་ཞབས་ཏོག་བགྲང་གིས་མི་ལང་བ་མཛད་ཅིང༌། འབྲུག་མདར་མགར་དམ་པ་དང་མཇལ་ཞིང་ཆོས་གསན་རེས་མཛད། སྤྱིར་རྐང་བཞི་ལ་མི་རྟེན་པ་སོགས་ཀུན་སྤངས་ཀྱི་བརྟུལ་ཞུགས་མཛད་ཀྱང་དགེ་སློང་གཙང་མ་ལྔ་བརྒྱ་རེ་རྒྱུན་མི་ཆད་ཅིང་ཆོས་ཀྱི་འཕྲིན་ལས་ནི་མཐའ་ཡས་པ་ཡིན་ལ་དགུང་ལོ་ལྔ་བཅུ་རྩ་ལྔ་ལ་སྐུའི་བཀོད་པ་བསྡུས་པར་བསྟན་ནོ། །ཤྲི་ཕུག་པ་མདོ་ཁམས་སུ་འཕྲིན་ལས་ཆེ་ཞིང་ཡུལ་སྐྱོང་ལྷ་ཁང་བཞེངས། ཕོ་བོ་བཀྲ་ཤིས་ནི་ཟངས་རི་བ་ཡིན་ཡི་གེ་ཨར་སྤྲུལ་པ་སོགས་མཛད། ཆོས་རྗེ་ཤིན་དུ་མཉེས་པས་ཁོང་གི་གསུང་བཀའ་འབུམ་དུ་ཡང་བཅུག་སྐད། གཙང་ཞིག་གིས་གཉལ་དུ་སྒྲུབ་པ་མཛད། དབུ་ཞྭ་ངང་པས་ཁྱེར་ནས་བཞག་སར་ངང་བསྐྱལ་གྱི་དགོན་པ་བཏབ། ཆང་ལ་མཉེས་པས་ཆང་གི་མཆོད་པ་དར། དེའི་སྐྱེ་པ་སྨྱལ་ཚན་གསུམ་དགའ་ལྡན་གྱི་ཟ་ར་དགེ་སློང་ཡིན་པས་གཙང་ཞིག་གི་སྐུ་ལ་ཆང་མཆོད་བྱས་པས་གཟི་ཡོང་སྐད། ཆོས་རྒྱུད་བཟང་དུ་བྱོན་ཞིང་གསལ་རྗེ་བས་ཡུལ་མི་ཐམས་ཅད་སྲོག་(ན༤༩ན)
སྡོམ་ལ་བཀོད། དེ་ལ་སོགས་པ་འགྲོ་དོན་ཅན་བྲིས་ཀྱིས་མི་ལང་ངོ༌། །ཁྱད་པར་དུ་གདན་ས་ཕག་མོ་གྲུར་རྗེ་འཇིག་རྟེན་མགོན་པོ་ཉིད་ཀྱིས་གདན་ས་ལོ་གསུམ་མཛད། དེ་ནས་ལོ་ཉེར་བརྒྱད་ཀྱི་བར་འབྲི་ཁུང་ནས་ཕྱི་རྒྱ་ཙམ་སྐྱོང་བ་ལས་གདན་ས་དངོས་མེད། དེ་ནས་རྗེ་སྤྱན་སྔ་བསྐོས་སྟེ་དེ་ཡང་ཆོས་རྗེ་རིན་པོ་ཆེས་འགྲོ་མགྲོན་ཡེལ་པ་བ་ཕག་མོ་གྲུར་གདན་འདྲེན་ལ་བཏང་བས་ང་རྒས་པས་མི་འོང༌། ངའི་འདི་ན་བཙུན་ཆུང་ཤེས་རབ་ཅན་ཞིག་ཡོད་པ་གཏོང་བས་གདན་ས་འཕེར་བ་ཞིག་འཆོས་ལ་སྐོ་བར་ཞུ་ཟེར་བ་བྱུང་བ་དེ་ཡིན། དེ་ཡང་མདོ་སྟོད་གནས་དྲུག་གི་སར་འཁྲུངས། གདུང་རླངས་ལྷ་གཟིགས། དཔོན་ཆེན་རྒྱལ་བ་སྐྱབས་དང་ཡུམ་འགྲོ་ལྡོག་བཟའ་ཁུ་བྱུག་སྨན་གྱི་སྲས་གསུམ་གྱི་གཅེན་པོར་འཁྲུངས། བཅུ་གསུམ་ལ་ལྷ་གཟིགས་ཀྱི་སྤྱི་གནས་གཡུག་གུར་མཁན་པོ་རྗོད་མགོ་བ་དང་སློབ་དཔོན་སྟོན་པ་ལས་རབ་ཏུ་བྱུང༌། འགྲོ་མགོན་ཡེལ་པ་བ་ལས་གདམས་ངག་གསན། བཅོ་ལྔ་པ་ལ་ཆོས་རྗེ་རིན་པོ་ཆེ་དང་མཇལ། བུ་ཚ་འདི་ཀུན་མིག་རྩ་དང་གྲུང་ཞྭ་བུའི་གྱོན་ལུགས་དང་བྱས་པས་ཁྱོད་ཀྱང་སྒོམ་ཆེན་ཅིག་དུ་རྫུ་བར་འོང་གསུངས་སྟེ་སྔོན་རྗེ་ཉིད་ལ་ཆོས་རྗེ་གོང་མས་ལུང་བསྟན་པ་དེ་དང་འདྲ་གསུངས་པ་ཡིན། ཕྱག་སྤྱི་བོར་བཞག་པ་ཙམ་གྱིས་ཏིང་ངེ་འཛིན་གྱི་རྒྱལ་པོ་འཁྲུངས། གཟིམས་གཡོག་མཛད་ཅིང་ཆོས་ཐམས་ཅད་གསན། གསན་ཚད་སྐད་ཅིག་ཀྱང་མི་བསྙེལ་བར་མཛད། དགུང་ལོ་བཅོ་བརྒྱད་པ་ལ་ཞང་སུམ་ཐོག་པ་དང་ལྷ་འབྲི་སྒང་པ་ལས་བསྙེན་པར་རྫོགས། ལོ་སོ་བཞི་མ་ལོན་གྱི་བར་འབྲལ་མེད་དུ་བསྟེན་པ་ལ་ཆོས་རྗེས་དབུའི་ལྟག་པ་གཟིགས་མ་མྱོང༌། བླ་མ་རིན་པོ་ཆེ་ལ་ངའི་ཡོ་བྱད་ཀྱི་ཕུད་འབུལ་བ་ཡིན། ཚོགས་པ་བསྐྱངས་པའི་ཕུད་འདི་ཡིན་པས་བླ་མའི་གདན་སར་འབུལ་གསུངས་ནས་ཆོས་རྗེ་ཉིད་ཀྱིས་ཀྱང་ཕྱག་དང་བཀུར་སྟི་མཛད་སྟེ་སོ་བཞི་པ་ས་འབྲུག་ལ་ཕག་མོ་གྲུའི་གདན་སར་ཕེབས། གདན་སར་ཕེབས་འཕྲལ་ནས་གདན་ས་(ན༤༩བ)
དར་ཞིང་རྒྱས། ཕྱི་ནང་གི་འཁྲུག་རྩོད་ཐམས་ཅད་ཞི། དགེ་འདུན་ཐམས་ཅད་ཀྱང་ཚུལ་ཁྲིམས་དང་ཏིང་འཛིན་ལ་བཀོད། ཆོས་རྗེས་རིན་པོ་ཆེའི་རྣམ་ཐར་ཇི་བཞིན་མཛད། བསམ་ཡས་བཙད་པོའི་ལྟོས་མ་ཚུགས། གདན་ས་ལོ་ཉེར་དྲུག་མཛད་ནས་སླར་འབྲི་ཁུང་གི་གདན་ས་ལོ་ཉི་ཤུ་རྩ་གཅིག་མཛད། དོར་ཏའི་ཧོར་དམག་རྫུ་འཕྲུལ་གྱི་རྡོ་ཆར་ཕབ་པས་བཏུལ་སྟེ་གྱ་གཅིག་ལ་འབྲི་ཁུང་དུ་གཤེགས། སློབ་མ་རིན་པོ་ཆེ་གྲགས་བསོད་པ་རྒྱལ་བའི་གཅེན་པོ་ཤར་གླིང་དབོན་པོར་གྲགས་པས་ཁམས་སུ་ཟླ་དགོན་བཏབ། གཞན་ཡང་ཡང་དགོན་པ་དང་སྙེ་མདོ་ཐམས་ཅད་མཁྱེན་པ་སོགས་བྱོན། དབོན་པོ་རྒྱལ་བ་ཐོག་བརྡུགས་པ་གྲགས་པ་བརྩོན་འགྲུས་ཀྱིས་གདན་ས་ལོ་སོ་གསུམ། སྐུ་ལ་ཐོག་གིས་མ་ཚུགས། རྒྱལ་པོ་ཧུ་ལའི་འབུལ་མོ་ཆེ་ལན་གསུམ། སིངྒྷ་གླིང༌། ཏི་ར་ཧུ་ཏི། ཡ་ཙེ་རྣམས་ཀྱི་རྒྱལ་པོས་འབུལ་བ་བྱས། བཅུ་གཉིས་པ་རྡོ་རྗེ་རིན་ཆེན་གྱིས་ལོ་བཅུ་བཞི། གྲགས་ཡེ་བ་ལོ་བཞི། གཉིས་མཆོད་པ་གྲགས་པ་རིན་ཆེན་ལོ་ཉེར་གཉིས། འདིའི་སློབ་མ་དུང་མཚོ་རས་པས་སེམས་ཁྲིད་ཡིད་བཞིན་ནོར་བུའི་གཏེར་བཏོན་སྟེ་འཕྲིན་ལས་ཆེ་ཞིང་བཀའ་རྒྱུད་བཟང་དུ་བྱུང༌། ཚེས་བཞི་རྙིང་མ་བ་གྲགས་པ་རྒྱལ་མཚན་ལོ་སོ་བཞི། འདིའི་སློབ་མ་རྡོར་འཛིན་སངས་རྒྱས་རྒྱལ་མཚན། མགོན་གཞོན་པ། མཚུངས་མེད་རིན་ཆེན་གཞོན་ནུ་སོགས་ཡིན། བཅུ་གཉིས་སར་མ་བ་གྲགས་པ་ཤེས་རབ་ལོ་བཅུ་གཅིག་འདི་འགྲོ་མགོན་རིན་པོ་ཆེ་དངོས་སུ་གྲགས། ཚེས་བཞི་སར་མ་བ་གྲགས་པ་བྱང་ཆུབ་ལོ་བརྒྱད། བསོད་གྲགས་པ་ལོ་ཉི་ཤུ། དཔལ་ལྡན་བཟང་པོ་ལོ་དགུ། ཉེར་གཉིས་རིན་པོ་ཆེ་བསོད་ནམས་རྒྱལ་མཚན་ལོ་བཅོ་བརྒྱད། དེའི་བར་དུ་སྐྱེས་བུ་དམ་པ་ཕལ་ཆེར་བྱོན་ལ། ཕྱིས་སུ་ཞྭ་དམར་ཅོད་པན་འཛིན་པ་བཞི་པས་གདན་ས་ཡུན་རིང་དུ་མཛད་ཅིང་སྤྱིར་རླངས་ལྷ་གཟིགས་ཀྱི་གདུང་གིས་(ན༥༠ན)
གདན་ས་དངོས་དང་སྐུ་ཚབ་མཛད་པ་རྒྱུན་མ་ཆད་ཏོ། །ཕག་གྲུའི་དཔོན་རབས་ནི། དཔལ་ཕག་གྲུ་པའི་དུས་དགེ་བཤེས་རླངས་རྒན་ཕོ་བ་ན་བ་ལ་རྟེན་འབྲེལ་མཛད་སྟེ་སྟག་ལུང་ཐང་པ་ལ་བྱང་ཕ་གིར་སོང་ལ་རླངས་ཀྱི་གཙོ་བོ་ང་ཡིན། འཛམ་གླིང་གི་མི་ཆེན་ང་ཡིན། ངའི་སོ་བུད་པ་འདི་བྱང་གཡག་གི་ཤ་ཟ་བས་བུད་པ་ཡིན་གྱིས་གསུང་བ་ལྟར་བྱས་པས་རས་པ་སྟོན་རིན་གྱིས་འཛམ་བུ་གླིང་གི་མི་ཆེན་ཁྱོད་ཡིན་ན་འཛམ་གླིང་གི་མི་ཆེན་ཟད་པ་ཡིན་ཟེར་བས་སྟོན་རིན་གྱིས་རྟེན་འབྲེལ་ཟློག་ཞུས་པས་ཨའུ་ཙི་གཟིམས་ལྕིལ་ལ་ཕྱག་དང་སྐོར་བ་ལྡོག་ལ་གྱིས་གསུངས་པ་འདི་རྟེན་འབྲེལ་གྱི་ཐོག་མ་མཛད་པ་ཡིན་ལ་ཁྱད་པར་རྗེ་འཇིག་རྟེན་མགོན་པོས་རྟེན་འབྲེལ་དུ་མ་མཛད་པས་ལྷ་གཟིགས་རླངས་ཀྱི་གདུང་ལ་བོད་ཀྱི་རྒྱལ་པོ་བྱུང་བ་ཡིན་ནོ། །དེ་ཡང་རླངས་ཀྱི་པོ་ཏི་སེར་རུ་ལ་སོགས་ལས་བྱུང་བ་བསྡུ་ན། སྔོན་དུང་གི་སྒོ་ང་ལས་ལྷའི་བུ་ལྟ་ན་སྡུག་པ་ཅིག་དུ་གྱུར་སྟེ་བསམས་ཚད་གྲུབ་པས་ཡིད་སྨོན་རྒྱལ་པོར་བཏགས་སྟེ་ལྷ་མིའི་རྗེར་གྱུར། དེའི་རྒྱུད་པ་མང་ལྡོམ་སྟག་བཙན་དང་ཚངས་སྲས་ལྷ་མོའི་བུ་བཙས་མ་ཐག་མས་སྨོད་བོར་སྟེ་ལྷ་རིའི་རྩེར་དར་བས་ལྷའི་ཁྱེའུ་སྤྱི་གཙུག་ནས་རླངས་པ་འབྱུང་བ། ལྷ་དང་སྲོག་ཆགས་ཀུན་གྱིས་མཆོད་པ་ཅིག་བྱུང་བས་རླངས་པའི་རྒྱུ་མཚན་ལས་རླངས་ཅེས་སམ་ལག་པས་བླངས་པས་བླངས་ཅེས་ཀྱང་གྲགས་ཤིང་དེའི་རྒྱུད་མཚོ་མ་ཕམ་གྱི་འགྲམ་དུ་བཙས་པས་མཚོ་བཟང་ལྷ་གཟིགས་བྱུང་བ་ཕྱིན་རླངས་ལྷ་གཟིགས་སུ་གྲགས་ལ་ཕྱག་བྲིས་ཅན་མང་དུ་བྱུང་ཞིང་ཁྱད་པར་སློབ་དཔོན་པདྨའི་དངོས་སློབ་ལྷ་འདྲེ་བྲན་དུ་བཀོལ་པ་ཨ་མི་བྱང་ཆུབ་འདྲེ་སྐོལ་ནས་མི་རབས་བཅུ་གསུམ་ན་བོད་ཀྱི་བདག་པོ་ཡོང་བར་ལུང་བསྟན་པ་བཞིན་སྤྱིར་ཁྲི་དཔོན་རྡོ་རྗེ་དཔལ་འབྲི་ཁུང་སྒོམ་པ་ཤག་རིན་གྱིས་དབུས་ཀྱི་དཔོན་ལ་བསྐོས་དུས་སྣེ་གདོང་སོགས་གཞིས་ཀ་བཅུ་གཉིས་བཏབ། ཕྱིས་དབོན་རིན་ཆེན་(ན༥༠བ)
སྐྱབས་ཀྱི་སྲས་ཏ་སི་ཆེན་པོ་བྱང་ཆུབ་རྒྱལ་མཚན་གྱིས་དབུས་གཙང་གི་བདག་པོ་ལོ་བཞི་བཅུ་ཙམ་མཛད་ཅིང་རྩེས་དང་བཏབ། དབོན་པོ་འཇམ་དབྱངས་གོའོ་ཤྲི་ཤཱཀྱ་རྒྱལ་མཚན་ལ་བོད་ཆོལ་ཁ་གསུམ་ཞེས་པའི་ལུང་བྱུང་སྟེ་རྒྱལ་ས་ལོ་དགུ་དེ་ནས་གྲགས་བྱང་བ། བསོད་གྲགས་པ། དབང་གྲགས་པ་རྒྱལ་མཚན། བདག་པོ་གྲགས་པ་འབྱུང་གནས་སོགས་བྱོན་ཞིང་བོད་ཤིང་གི་སྒོ་གཏོད་པ་མཐའ་དག་གི་རྒྱལ་པོར་གྲགས་པའོ། །དཔལ་ཕག་གྲུ་པའི་གདན་ས་བཀའ་རྒྱུད་ཀྱི་སྐབས་སོ། །སྐྱོབ་པ་རིན་པོ་ཆེ་ཉིད་འདའ་ཁར་མཁན་ཆེན་གུ་ར་བ་ལ་ཁྲི་འདི་ཁྱོད་ཀྱིས་བཟུང་ལ་ལོ་གསུམ་ན་བསོད་ནམས་གྲགས་པ་ལ་གཏོད་གསུངས་སྟེ་དབོན་རིན་པོ་ཆེ་བསྐོས་ནས་ཞག་གསུམ་ན་གཤེགས་སོ། །དབོན་རིན་པོ་ཆེ་ནི་སྐྱོབ་པ་རིན་པོ་ཆེའི་ཁུ་བོ་དཀོན་མཆོག་རིན་ཆེན་གྱི་སྲས་ཨ་མེ་གྲགས་རྒྱལ་གྱི་སྲས་གསུམ་ལས་ཆེ་བ། འབྲིང་དབོན་རྒྱུད་རྡོ་རྗེ་སེང་གེ་ཆུང་བ་གཅུང་རིན་པ་ཆེ་རྡོ་རྗེ་གྲགས་པའོ། །དཔལ་ཤྲཱི་ཕུག་པ་མངགས་སྟེ་ལོ་བཅུ་བཞི་ལ་ཆོས་རྗེ་རིན་པོ་ཆེ་མཇལ། སྦྱངས་པ་མཛད་ཅིང་ཟབ་ཆོས་ཐམས་ཅད་གསན། ཐོག་མར་ལོ་བཅུ་གསུམ། བར་དུ་ལོ་དྲུག་མཐའ་མར་ལོ་བཞི་རྣམས་སྒྲུབ་པ་མཛད། སོ་ལྔ་ལ་ཁྲིར་ཕེབས། སོ་དགུ་ལ་སྒོ་མང་བཞེངས། ཞེ་དགུ་ལ་ཐེགས། རྗེ་འཇིག་རྟེན་མགོན་པོ་ཉིད་དང་ཐུགས་རྒྱུད་གཅིག་པར་གསུངས། རྗེ་སྤྱན་སྔས་གདན་ས་ལོ་ཉེར་གཅིག་མཛད། གཅུང་རིན་པོ་ཆེ་ལོ་དྲུག་ལ་འཇིག་རྟེན་མགོན་པོ་མཇལ། འདི་སྟེ་ལོ་པ་ཡིན། ངེད་རང་ཐམས་ཅད་ལས་ལྷག་པ་འོང་ཞེས་ལུང་བསྟན། དབོན་རིན་པོ་ཆེ་ལས་གདམས་པ་རྫོགས་མཆོག་མ་ཐོབ་བར་ཐེམ་པ་ལས་འདའ་རི་ཞེས་དམ་བཅས་མཛད་སྟེ་སྒྲུབ་པ་མཛད། ཉེར་ལྔ་ལ་དབོན་རིན་པོ་ཆེ་གཤེགས་ཀྱང་སྒྲུབ་པ་མ་བཀྲོལ་བར་སྨྲ་བའི་སེང་གེ་སྤྱན་སྔ་བ་གདན་སར་སྐོས་གསུངས་སྟེ་སླར་ཡང་ལོ་སུམ་བཅུར་སྒྲུབ་པ་མཛད། ཞེ་(ན༥༡ན)
དྲུག་ལ་གདན་སར་ཕེབས། ཀརྨ་པག་ཤི་ཧོར་རྒྱལ་པོས་ཙནྡན་གྱི་མེ་ལ་ཞག་ཕྱེད་དང་བཞིར་བསྲེགས་པས་ཞིང་འཕོ་བར་བཞེད་ཚེ་ཏེ་ལོ་པ་སེང་གེ་བཅིབས་ནས་བྱོན་སྟེ་ཡི་གེ་གསུམ་ཐུགས་ཀར་བསྟིམས་སྟེ་མེའི་གཉེན་པོར་མེ་ཐོང་ཞིག་ཁོ་བོ་སྟོང་ཀུན་ན་ཡོད་ཅིང་འབྲི་ཁུང་ན་གཅུང་རྡོ་རྗེ་གྲགས་པའོ་ཞེས་གསུངས། ཁེ་ར་ཁེ་ཏའི་ཧོར་དམག་འདམ་དུ་སླེབས་ཚེ་བདེ་མཆོག་དངོས་སུ་བསྟན་པས་སུ་ལ་ཡང་མ་གནོད་པར་ཕྱིར་ལོག །སྒོ་མང་དང་བཀའ་བསྟན་དང་གཙུག་ལག་ཁང་ཀ་བ་བརྒྱ་དང་བརྒྱད་བཅུ་ལྷ་ཆེན་དུ་མ་གསེར་ཐོག་གསེར་ཕྲུ་དང་བཅས་པ་བཞེངས། དགེ་འདུན་ཁྲི་ཕྲག་བཅུ་གསུམ་གྱིས་མེ་ཏོག་འཐོར། རེ་དགུ་ལ་དྭགས་པོ་རྫམ་ཏུ་ཐེགས། དབོན་རྒྱུད་པའི་སྲས་ཆེ་བ་ཐོག་ཁ་བ་རིན་ཆེན་སེང་གེ་མེ་ཁྱི་ལ་འཁྲུངས། གཅུང་རིན་པོ་ཆེའི་ཆོས་ཐམས་ཅད་རྫོགས། ལོ་བཅུ་བདུན་སྒྲུབ་པ་མཛད། གཅུང་རིན་པོ་ཆེ་ཐེགས་ཀྱང་བུག་སྒོ་ནས་འགྲོ་དོན་མཛད་པ་ལས་གདན་ས་མ་བཞེས། ང་གསུམ་པ་ལ་ཁྲིར་ཕེབས་ནས་གདན་ས་ལོ་བདུན་མཛད་སྟེ་ང་དགུ་པ་ལ་གཤེགས། གཅུང་ཐ་ཆུང་མཚམས་བཅད་པ་གྲགས་པ་བསོད་ནམས་ནི་ཆུ་བྱི་ལ་འཁྲུངས། བཅུ་དགུ་ལ་བསྙེན་རྫོགས་དང་སྒྲུབ་པ་ལོ་བཅུ་གསུམ་མཛད། ཁྲི་ལོ་གསུམ་མཛད་སྟེ་ཞེ་དགུ་ལ་ཐེགས། རྗེ་འཇིག་རྟེན་མགོན་པོས་གདན་ས་སྣུབས་ལ་མ་སྐོ་གསུང་བ་ཡོད་ཀྱང་ཞལ་ངོ་སྐུ་ན་ཕྲ་པས་ཆོས་སྒོ་པ་སྣུབས་སྟོན་རྡོ་རྗེ་ཡེ་ཤེས་ཁྲི་ལ་བསྐོས། དེ་ནས་ལོ་དྲུག་པ་ལྕགས་སྟག་ལ་གླིང་ལོག་བྱུང༌། སྒོ་མང་བཅུ་གསུམ་དང་ལྷ་ཁང་ཆེན་མོ་དང་གླིང་བསྲེགས། གླིང་ནས་ན་མཁའ་ལ་འཕུར་སྟེ་ཆུ་འཕན་གྱི་རྩེར་བབ། སླར་མཁའ་སྤྱོད་དུ་སོང་བའང་ཁྲི་ཕྲག་ཙམ་བྱུང་བར་གྲགས། སྐུ་འབུམ་འཛམ་གླིང་རྒྱན་དང་གསེར་ཁང་ཆོས་རྗེ་སོགས་མེ་བརྡུགས་ལ་བཞུགས། ཞལ་ངོ་ཀོང་པོར་བྱོན། སྒོམ་པ་དབོན་པོ་སྟོད་ཧོར་ལ་བྱོན་སྟེ་(ན༥༡བ)
འཇམ་ལམ་བཅད་པས་སླར་གསོ་བའི་ཆ་རྐྱེན་དཔག་མེད་ཕུལ་ནས་བཅུ་གཉིས་པ་རྡོ་རྗེ་རིན་ཆེན་དགུང་ལོ་བཅུ་གསུམ་ལ་ཁྲིར་ཕེབས་ཤིང་ཉམས་པ་བསོས། ལོ་ཉེར་བརྒྱད་གདན་ས་མཛད། རྡོ་རྗེ་རྒྱལ་པོས་ལོ་སོ་ལྔ། ཉེར་གཉིས་རིན་པོ་ཆེས་གདན་ས་ལོ་སོ་དགུ་ནས་ཀུན་སྤངས་མཛད། ཆོས་རྗེ་དོན་གྲུབ་རྒྱལ་པོས་ལོ་བཅོ་ལྔ་གདན་ས་མཛད། དེ་ནས་དབང་རིན་པོ་ཆེ་སྔ་མ་རྒྱལ་སྲིད་སྤངས་ནས་རི་བོ་རྩེ་ལྔ་ལ་བྱོན། དེའི་སྲས་ཆོས་རྒྱལ་རིན་ཆེན་དཔལ་དང་དེའི་སྲས་ཆོས་རྒྱལ་རིན་ཆེན་དཔལ་བཟང་གཉི་གའང་ཞལ་ངོ་དཀོན་པས་གདུང་རྒྱུད་པ་མཛད་དགོས་བྱུང་བས་གདན་སར་མ་ཕེབས་ཀྱང་གྲུབ་ཐོབ་ཆེན་པོར་བཞུགས་ཤིང་འདི་སྐབས་གླིང་པ་མཐའ་དག་མཚན་ཉིད་པར་གྱུར་ཡོད་ཀྱང༌། སླར་དབང་རིན་པོ་ཆེས་བསྟན་དགོངས་ཟབ་ཆོས་སོགས་རྙེད་གྲགས་ལ་ཇི་མི་སྙམ་པར་སྟག་ལུང་ཆོས་རྗེ་ལ་གསན་ཞིང་རྗེ་འཇིག་རྟེན་མགོན་པོ་དངོས་སུ་འབྱོན་པར་ལུང་བསྟན་པ་རྗེ་ཀུན་དགའ་རིན་ཆེན་གྱིས་འབྲི་ཁུང་པའི་བསྟན་པ་རྨང་ནས་གསོ་བར་མཛད་སྟེ་སླར་ཕག་མོ་རྩེར་གདུང་རྒྱུད་ཀྱི་བཞུགས་སྟན་ཆགས་པ་ལས་ཆོས་དང་སྲིད་ཀྱི་བསྟན་པ་རྒྱ་ཆེར་འཕེལ་བ་འདི་ཡིན་ནོ། །ཕག་གྲུ་བཀའ་རྒྱུད་ལས་འབྲི་ཁུང་གདན་རབས་ཀྱི་སྐབས་སོ། །སྟག་ལུང་ཐང་པ་ནི་མདོ་ཁམས་གཡང་ཤོད་བོང་ར་སྟེང་དུ་འཁྲུངས། གདུང་དབྲའི་ནང་ཚན་གྭ་ཟི། ཡབ་བན་བློན་ཀླུ་འབར་ཡུམ་དགེ་གསུམ་གྱི་སྲས་སུ་ཆུ་ཁྱི་ལ་འཁྲུངས། ཕྱི་ལོ་འབྲི་ཁུང་ཆོས་རྗེ་འཁྲུངས་པ་ཡིན། ཡུམ་སྔ་བར་གྲོངས། ཕྱིས་བཅོ་བརྒྱད་ལ་ཐང་སྐྱ་ལྷ་ཁང་དུ་གླ་གང་པ་ཤེས་རབ་རྡོ་རྗེ་དང་སློབ་དཔོན་ཚར་སྟོན་ལས་རབ་ཏུ་བྱུང༌། མཚན་བཀྲ་ཤིས་དཔལ་སློབ་དཔོན་འགའ་ལ་ཆོས་དུ་མ་གསན། རྒྱ་གར་ལ་འབྱོན་པར་ཡང་ཡང་བརྩམས་ཀྱང་མ་ཐོན། ཕག་གྲུ་པའི་སྐུ་མཐོང་པས་འདིའི་དུང་དུ་མི་འགྲོ་རི་སྙམ་པའི་ཞེ་བཅད་བྱུང༌། མནལ་ལམ་དུ་སྐས་རིང་པོ་ཅིག་ལ་འཛེགས་པས་མི་དཀར་པོ་(ན༥༢ན)
ཅིག་གིས་ངས་མ་འཐེན་ན་མི་ཐོན་ཟེར་བ་དང༌། ལམ་དུ་རྟ་ཆུ་རབ་འབྱམས་པ་ལ་རྟས་པོ་ཏོ་ཅིག་ལ་རྐང་ཚུགས་ནས་ཐོན་པས་དེ་ཁོ་བོས་བྱས་པ་ཡིན་གསུངས། ཕག་མོ་གྲུར་མཇལ་བས་ཁོ་བོ་གར་འདུག་ཀྱང་ཁྱོད་འོང་དགོས་པ་ཡིན་སྐྱེ་བ་འདི་ཁོ་ནའི་བླ་མ་མ་ཡིན་གསུངས། མ་མཇལ་བ་ནས་སར་པའི་ལུས་ལས་སར་པ་ཅིག་ཆད་ནས་ཁོ་བོ་ལ་ཐིམ་གསུངས་ཅིང་འདི་བྱ་ཡུལ་པ་འདྲ་ཨང་གསུངས། ད་གསོལ་བ་བཏབ་པ་གཅིག་པུས་ཆོག་སྙམ་ནས་གསེར་ཞོ་གང་ཕུལ་སྟེ་བདག་ཞུ་ཡས་དངོས་གྲུབ་ལྟ་བུ་ཞིག་བྱེད་པ་ཡིན་ཆོས་ཀྱང་མི་ཞུ་བྱས་པས་ཞལ་འཛུམ་མཛད་སྟེ་དེ་དད་པས་ཁམས་སོས་བ་བྱ་བ་ཡིན། ད་དུང་གསོལ་བ་ཐོབ་པ་མང་དུ་འཆར་རྒྱུ་ཡོད། ཆོས་གསུང་ཚད་ཉོན་གསུངས་སྟེ་གསུངས་ཚད་ཟིན་བྲིས་སུ་བཏབ། ལན་ཅིག་ཞལ་བ་ལ་བྲིས་ནས་སླར་གཟིགས་པས་དེ་ཕྱིན་བརྗེད་པ་མ་བྱུང༌། ཁོ་བོའི་ཆོས་ཀྱི་བདག་པོ་ཁྱོད་ཀྱིས་བྱེད་པ་ཡིན་ཡང་གསུངས། དཔལ་ཕག་མོ་གྲུབ་པ་གཤེགས་ནས་མལ་གྲོར་བྱོན། མཆད་ཀ་བ་ལ་ཆོས་ཀྱང་གསན། ཡང་དབྱར་ཞིག་ཕག་མོ་གྲུར་གདུང་རྟེན་ལ་སོགས་པའི་བྱ་བ་མཛད། སེ་སླེར་བཞུགས་དུས་སངས་རྒྱས་སྒོམ་པས་ཕྱི་ནས་དཔལ་ཕག་གྲུ་བའི་གསུང་ཉིད་དུ་ཚོར་སྟེ་སྔར་ཆོས་རྗེའི་གསུང་ནས་ང་གར་འགྲོ་སར་ཁྱོད་ཁྲིད་པ་ཡིན་གསུང་བ་དེ་འདི་ཡིན་པར་འདུག་གསུངས་ནས་འབྲལ་མེད་དུ་བཞུགས། ཞང་ཤོ་མ་ར་བ་སྒྲེས་པོ་ཅིག་གིས་མཁན་པོ་དང་མར་བཅོམ་ཐག་པས་ལས་སློབ་མཛད་སྟེ་བསྙེན་པར་རྫོགས། སྟག་ལུང་དུ་བཞུགས་ཀྱང་ད་དུང་མི་ནོན་པས་འཕོས་ཟེར་བ་བྱུང་སྟེ་སེ་བ་ལུང་དུ་ལོ་བདུན་བཞུགས། སླར་དགུང་ལོ་སོ་དགུ་པ་ལྕགས་བྱི་ལ་ཕོད་མདོ་བ་དང་དར་པྲས་རོང་གསུམ་གྱིས་གདན་དྲངས་སྟེ་སྟག་ལུང་དུ་བྱོན། བླ་བྲང་ནག་པོར་ཕྱགས་ཕབ། བྱ་རོག་གིས་རྩྭ་ཤིང་དང་བོང་བ་སོགས་ཡང་དགོན་དུ་བསྐྱལ་བས་དེར་སྤོས། སྤྱིར་རྒྱུན་དུ་བཞེས་པ་དང་ཆབ་ཚའི་དུས་མ་གཏོགས་གསུང་བཅད་མཛད། ཟླ་སྨད་ལ་མཚམས་མཛད། རབ་ཏུ་བྱུང་ཕྱིན་ཁྱིམ་པའི་ཁང་པར་(ན༥༢བ)
མ་བྱོན། ཤ་ཆང་ཞལ་དུ་མ་བཞེས། ཤ་ཆང་གི་མགྲོན་མི་བྱེད། གླིང་གསེབ་ཏུ་བུད་མེད་མི་འཇོག་པ་སོགས་ཀྱི་སྲོལ་མཛད། སྟག་ལུང་དུ་སུམ་སྟོང་གི་དགེ་འདུན་ཚོགས། ཕག་མོ་གྲུར་འབུལ་ཆེན་ཡང་ཡང་མཛད། ཕག་གྲུའི་གསུང་རབ་རྣམས་སྒམ་པོར་ཐེགས་པ་གསན་པས་ཐུགས་མ་བདེ་བ་ལྟར་མཛད་ཅིང་དགུང་ལོ་རེ་དགུ་རྟ་ལོ་ལ་སྐུ་འདའ་བར་བསྟན། དེ་མ་ཐག་སངས་རྒྱས་སྒོམ་པ་ཡང་གཤེགས། སྐུ་ཡལ་བ་རིན་ཆེན་མགོན་ནི་སྐུའི་དབོན་པོར་འཁྲུངས། རྗེ་སྐུ་ཡལ་བ་དེ་ཉིད་བྱོན་པ་ཡིན་གསུངས་པས་སྐུ་ཡལ་བར་གྲགས། འཁྲུངས་འཕྲལ་ཡབ་ལ་ཤུལ་ན་བུ་ཅིག་སྐྱེས་འདུག་པ་ང་ལ་ཕུལ་གསུངས་ཤིང་ཕྱིས་རབ་ཏུ་བྱུང་ལ་མིང་རིན་ཆེན་མགོན་ཏུ་ཐོགས་ཤིག་གསུངས། གླིང་དུ་སྒྲུབ་པ་ལོ་བདུན་མཛད། བཅུ་དགུ་ལ་བསྙེན་རྫོགས་མཛད། ཉི་ཤུ་ལ་སྟག་ལུང་ཐང་པ་གཤེགས་ཀར་གདན་སར་བསྐོས། དངུལ་གདུང་ཆེན་མོ་དང་སྟག་ལུང་ཐང་པའི་དངུལ་སྐུ་ཆེན་མོ། སྐུ་འབུམ་ཆེན་མོ་ལྷ་ཁང་ཀ་བ་བརྒྱད་བཅུའི་ས་རྣམས་མཛད། ལུགས་གཉི་གའི་དར་རྒྱས་ཆེ་ཞིང་གཟིམས་ཁྱིའང་སྟག་ལུང་ལྡོག་ཚ་ཟེར་བ་འདི་ནས་བྱུང༌། འདིའི་དབོན་པོ་སངས་རྒྱས་ཡར་བྱོན་ནི་དབོན་ཆེན་མགོན་རྒྱལ་གྱི་སྲས་སུ་སྟག་ལུང་ཐང་པའི་རེ་གཉིས་པ། སྐུ་ཡལ་པའི་བཅུ་གསུམ་པ་ཆུ་ཕག་ལ་འཁྲུངས། མཚན་ཤེས་རབ་བླ་མ། བཅུ་དགུ་ལ་དབུས་སུ་བྱོན་ཞིང་བསྙེན་རྫོགས་མཛད། སྐུ་ཡལ་བ་ལས་གདམས་ངག་རྫོགས་སྟེ་ལོ་བཅོ་ལྔར་སྒྲུབ་པ་མཛད། བདུན་བཅུ་ལ་བདེ་བར་གཤེགས། ཁུ་དབོན་དེ་གཉིས་ཀྱི་སློབ་མ་ཀོང་དོ་བ་དར་ཤེས་མགོན་པོའི་གྲུབ་པ་ཐོབ། ཀོང་དགོན་བཏབ་སྟེ་དར་རྒྱས་ཆེར་བྱུང༌། སངས་རྒྱས་དབོན་གྲགས་པ་དཔལ་རྗེ་སྒམ་པོ་པའི་སྐུའི་སྐྱེ་བར་གྲགས་པ་གྲུབ་རྟགས་མང་དུ་བསྟན་པ་དེ་ལ་གདན་ས་གཏད་སྟེ་དཔེ་ཆ་རྟེན་གསུམ་བྱིན་རླབས་ཅན་འདི་རྣམས་དང་མ་བྲལ་བར་གྱིས་ཅིག་གསུང༌། ས་སྐྱ་པའི་འགྲོ་མགོན་འཕགས་པ་རིན་པོ་ཆེ་ལ་དབོན་པོ་མཾ་ག་ལ་གུ་རུ་ཕུལ་སྟེ་སྟག་ལུང་གི་བདག་(ན༥༣ན)
རྐྱེན་ཞུས། དབོན་རྣམ་པ་གཉིས་ཐུགས་མ་མཐུན་པར་སྣང་བའི་ཚེ་ས་སྐྱ་བས་མཾ་ག་ལ་གུ་རུའི་བདག་རྐྱེན་མཛད་པས་སངས་རྒྱས་དབོན་གྱིས་གདན་ས་ལོ་གཅིག་མཛད་སྟེ་རྗེ་བཙུན་མི་ལའི་ཕྱག་མཁར་དང་ཞལ་སྐྱོགས་ཀྱིས་གཙོས་པའི་རྟེན་གསུམ་ཕྱག་དཔེ་ཐམས་ཅད་བསྣམས་སྟེ་ཁམས་སུ་བྱོན། སྟག་ལུང་ཐང་པ་ཉིད་ཀྱིས་འདེབས་པར་དགོངས་ཤིང་ཕྱིས་གདན་འདྲེན་བྱུང་དུས་འབྲི་ཆུ་ལ་ཕྱགས་བསྐུར་བ་སོགས་རྟེན་འབྲེལ་མཛད་པ་བཞིན་རི་བོ་ཆེའི་སྡེ་ཆེན་པོ་མ་ལས་བུ་དགའ་བར་གྲགས་པ་དེ་ཆགས་སྟེ་དེང་སང་དུའང་དར་ཞིང་རྒྱས་སོ། །མཾ་ག་ལ་གུ་རུ་ཆོས་ཡགས་ཀྱི་སྲས་སུ་སངས་རྒྱས་ཡར་བྱོན་གྱི་ཉེར་དགུ་པ་ལྕགས་མོ་ཡོས་ལ་འཁྲུངས། ཁམས་སུ་རབ་བྱུང་མཛད། ཉེར་ལྔ་ལ་དབུས་སུ་ཕེབས། སངས་རྒྱས་ཡར་བྱོན་ལས་གདམས་པ་གསན་སྟེ་སྒྲུབ་པ་ལོ་བཅུ་དྲུག་མཛད། རོ་གཅིག་གི་རྟོགས་པ་ཕུལ། ཞེ་གསུམ་པ་ཆུ་བྱ་ལ་གདན་སར་ཕེབས། ལྷ་ཆེན་སྟོང་གསུམ་ཟིལ་གནོན་བཞེངས། རེ་བདུན་མེ་བྱ་ལ་ཐེགས། དེ་ནས་རིམ་བཞིན་དཔལ་བཟང་པོ་ལོ་བཅུ་གསུམ། རཏྣ་གུ་རུ་སོ་གཅིག །རཏྣཱ་ཀཱ་ར་ཉི་ཤུ་རྩ་གཉིས་འདི་ནས་ཆོ་ག་རྣམས་དར་བས་དཔལ་ལྡན་བླ་མའི་རྗེས་སུ་འབྲེང་པ་རྣམས་གོས་བཟང་བས་སྨུག་ཁྱུ་བ་དང༌། ཞ་ལུ་བའི་རྗེས་འབྲེང་རྣམས་དར་ཟབ་གོན་པ་མང་བས་ཁྲ་ཁྱུ་བར་གྲགས། ན་མཁའ་དཔལ་བཟང་ལོ་བཅོ་ལྔ་འདི་ཡན་ཡར་བྱོན་ཡིན་ལ་འདི་ནས་དབོན་རྒྱུད་བོད་དུ་འཁྲུངས་པ་ཡིན་ནོ། །བཀྲ་ཤིས་དཔལ་བརྩེགས་ལོ་བཅོ་ལྔ་འདི་སྟག་ལུང་ཐང་པ་དངོས་སུ་བྱོན་པར་གྲགས་འཕྲིན་ལས་ཤིན་དུ་ཆེ། བྱང་ཆུབ་རྒྱ་མཚོ་ལོ་བདུན་འདི་ཞྭ་དམར་པ་ཆོས་དཔལ་ཡེ་ཤེས་དང་ཐུགས་རྒྱུད་གཅིག་པར་གྲགས། བཀྲ་ཤིས་དཔལ་ལོ་སོ་གཅིག་དེ་ནས་མཁས་གྲུབ་ངག་དབང་གྲགས་པ་བྱོན་སྟེ་བསྟན་པ་མཐའ་དག་གི་བདག་པོ་ལྟ་བུ་མཛད། དེ་ནས་བཀྲ་ཤིས་དཔལ་བ། རྣམ་རྒྱལ་གྲགས་པའི་བར་དུ་བསྟན་པ་ཡོངས་རྫོགས་ཀྱི་དགེ་བའི་བཤེས་གཉེན་ཚད་ལྡན་འབའ་ཞིག་བྱོན་ལ། གླིང་ཆགས་(ན༥༣བ)
ནས་ད་ལྟའི་བར་ཕ་རོལ་གྱི་དམག་གི་གནོད་པ། སེར་དམག་སྐུལ་བ། གླིང་གསེབ་ཏུ་བུད་མེད་འོང་མ་མྱོང་བ་འདི་ལྟ་བུ་བསམ་གྱིས་མི་ཁྱབ་ལ། མེ་མོ་ལུག་གི་ལོ་སོས་ཀ་གུང་ཐང་མེས་གཤེགས་པའི་དགུན་བཅུ་གཉིས་པའི་བཅོ་ལྔ་ལ་ལྷ་ཁང་ཆེན་མོ་ལྷ་ཆེན་བཅུ་གསུམ་སོགས་མེ་ལྷས་བཞེས་ཅིང་སླར་ཆོས་ཀྱི་རྗེ་སྐུ་མཆེད་རྣམས་ཀྱིས་ཉམས་པ་གསོ་བར་མཛད་ལ་གླིང་གི་དར་རྒྱས་ནི་གོང་འཕེལ་དུ་བཞུགས་པ་འདི་ཡིན་ནོ། །ཕག་གྲུ་བཀའ་རྒྱུད་ལས་སྟག་ལུང་བཀའ་རྒྱུད་ཀྱི་ས་བོན་ཙམ་སྟེ་རྒྱས་པར་ལྷོ་རོང་ཆོས་བྱུང་ལས་ཤེས་པར་བྱའོ། །ཟ་ར་བ་བསྐལ་ལྡན་ཡེ་ཤེས་སེང་གེ་ནི་མོན་འགར་དུ་འཁྲུངས། ཆུང་དུས་ར་ལུག་འཚོ་བ་ན་ཕག་མོ་གྲུ་མཐོང་བ་ཙམ་གྱིས་རང་བྱུང་གི་སྒོམ་སྐྱེས་ཆོས་རྗེས་ངོ་སྤྲོད་བཏབ་པ་ཙམ་གྱིས་རྟོགས་པ་ཕུ་ཐག་ཆོད་སྟེ་གྲ་རབས་སུ་ཟ་ར་དགོན་པ་བཏབ་ནས་བཞུགས། དེའི་སློབ་མ་གཡམ་བཟང་ཆོས་རྗེ་ནི་གཙང་ཞལ་གྱི་དམར་མོར་ས་གླང་ལ་འཁྲུངས། ཏིང་ངེ་འཛིན་རང་བྱུང་དུ་སྐྱེས། བྱ་ཞིང་དང་མཆད་ཀར་དུ་བཀའ་གདམས་པ་མཛད། རྒྱ་དུར་དུ་ཀླུབས་དཀར་ལས་བསྙེན་པར་རྫོགས་སྟེ་འདུལ་བ་མཁས་པར་སྦྱངས་པས་སྣུབས་འདུལ་བ་འཛིན་བར་གྲགས། ཟ་ར་བ་ཆེན་པོ་དང་མཇལ་བ་ཙམ་གྱིས་རྟོགས་པ་ཁྱད་པར་ཅན་སྐྱེས། གདམས་ངག་ཐམས་ཅད་གནང་སྟེ་ཁོ་བོ་རབས་མི་ཆད་པར་འདུག་གསུངས། ར་མོ་མཐའ་ལུང་ལ་སོགས་པར་སྒྲུབ་པ་རིང་དུ་མཛད། ཤམྦུས་སྲོག་སྙིང་ཕུལ། སོ་བརྒྱད་པ་མེ་སྟག་ལ་གཡམ་བཟང་བཏབ། ལྷ་མོ་ཙནྜི་ཀས་བཀའ་སྲུང་དུ་ཁས་བླངས་སྟེ་གཡམ་བཟང་ལྷ་མོ་ཞེས་ཤིན་དུ་གཉན་པར་གྲགས། ཆོས་རྒྱལ་སྲོང་བཙན་སྒམ་པོའི་སྔོན་གནས་གསལ་བར་དྲན། ཚོགས་པ་ཆེར་བསྐྱངས་ཤིང་བཀའ་རྒྱུད་རིན་པོ་ཆེའི་ཁྲི་སྲོལ་མ་ཉམས་པར་མཛད། སྨྱལ་ལྷོ་བྲག་པར་ལུང་སོགས་མཐའ་དག་དུ་ལམ་རྒྱ་དང་གཞན་དོན་རྒྱ་ཆེར་མཛད། རེ་ལྔ་པ་སྦྲུལ་ལོ་ལ་ཐེགས། སློབ་མ་སྤྱན་སྔའི་སྒོམ་བཞི་སྐད་པ་སྨྱལ་དཔལ་(ན༥༤ན)
རི་པ་སངས་རྒྱས་བྱ་སྒོམ། གོར་གདོང་པ་སངས་རྒྱས་ལྷ་སྒོམ། གསེར་ལྔ་པ་སངས་རྒྱས་ལེ་སྒོམ། གོར་གདོང་པ་སངས་རྒྱས་ལྷ་སྒོམ། གསེར་ལྔ་པ་སངས་རྒྱས་ལེ་སྒོམ། དབོན་སར་བ་སངས་རྒྱས་རྒྱ་སྒོམ་རྣམས་སོ། །ཉེ་གནས་རིན་ཆེན་ཇོ་སྲས་ཀྱིས་གདན་ས་ལོ་དགུ། རྟོགས་ལྡན་རྒྱལ་པོ་དགེ་མཛེས་འོད་ཀྱི་ལོ་སོ་བརྒྱད་མཛད་སྟེ་གཙུག་ལག་ཁང་ཆེན་མོ་བཏབ། མཁར་ཆུ་བ་ཆོས་བསམ་འོད་ཀྱིས་ལོ་བཅོ་བརྒྱད། ཟ་ར་བ་བདེ་ལེགས་འོད་ཀྱིས་ཉི་ཤུ་རྩ་བཞི། གདུང་རྒྱུད་པ་བཀྲ་ཤིས་འོད་ཀྱིས་ཉེར་བརྒྱད། དེས་ལྷ་གྲགས་འོད་པ་བསྐོས་སྟེ་དེ་ཕྱིན་ལྷས་བཟུང་ངོ༌། །ཕག་གྲུ་བཀའ་རྒྱུད་ལས་གཡའ་བཟང་བཀའ་རྒྱུད་ཀྱི་སྐབས་སོ། །དབྱེར་སྒོམ་ཆེན་པོ་ནི་ཡར་ལུང་དུ་འཁྲུངས། མལ་ཀ་བ་ཅན་པ་དང་རྣལ་འབྱོར་ཆོས་གཡུང་ལས་ཆོས་རྫོགས། ཕྱིས་འགྲོ་མགོན་རིན་པོ་ཆེ་ལས་རྟོགས་པ་བརྙེས་གྲུབ་ཐོབ་ཆེན་པོར་གྱུར་སྟེ་སྙེ་ཕུ་ཤུགས་གསེབ་བཏབ་སྟེ་འཕྲིན་ལས་ཆེའོ། །ཁམས་སུ་འགྲོ་མགོན་དམར་ཡེལ་གཉིས་སུ་གྲགས་པའི་དམར་བ་ལ་གཙང་དུ་བྱོན་ན་འཕྲིན་ལས་ཉིད་དང་མཉམ་པར་ལུང་བསྟན་ནའང་ཁམས་སུ་བྱོན་ཤོ་དགོན་བཏབ་པས་ཚོགས་པ་ཉིས་སྟོང་ཙམ་འདུས། གདན་སའང་ཤ་ཡང་དགོན་པ། རྨོག་སྤྱན་སྔ་བ། རྣལ་རིན་ཆེན་གླིང་བ། དེའི་སློབ་མ་འགའ་ལི་ཆོས་འོད་ཀྱིས་རི་རྒྱ་དགོན་དང་རྒྱལ་དགོན་སོགས་བཏབ། དབང་འོད་ཟེར་བླ་མས་ཐུགས་རྗེ་ཆེན་པོ་གྲུབ་སྟེ་རིལ་བུས་འགྲོ་དོན་ཆེར་མཛད་ཏོ། །འགྲོ་མགོན་ཡེལ་ཕུག་པས་ནི་ཤར་རྡོ་རྫོང་ལྷོ་ཡེལ་ཕུག་བྱང་རྟ་རྣ་སོགས་བཏབ་སྟེ་འཕྲིན་ལས་ཆེའོ། །ཕག་གྲུ་བཀའ་རྒྱུད་ལས་ཤུག་གསེབ་པ་དང་དམར་ཡེལ་གྱི་སྐབས་སོ། །རྒྱལ་ཚ་རིན་ཆེན་མགོན་ནི་གཙང་སྟོད་ཤབ་ཀྱི་སྨད་དུ་སྣུབས་ཀྱི་སྔགས་འཆང་ནུས་པ་ཅན་འབའ་ཞིག་གི་རྒྱུད་པར་འཁྲུངས། བླ་མ་བརྒྱད་བཅུ་རྩ་གཉིས་བསྟེན། བླ་མ་བཅུ་གསུམ་གྱི་གདམས་ངག་གི་བཀའ་བབ། ཕག་མོ་གྲུ་པ་རྩ་བའི་བླ་མར་འཛིན། ཡུལ་དུ་འདུག་པས་སྐྱེ་ཤིས་འཇིགས་པ་རྣམས་ལ་ཆོས་སྦྱིན་ཞིག་གསུང་བ་ལྟར་མཛད། ཁྲོ་ཕུ་བཏབ། དོན་གཉིས་ཤིང་ཡོས་ལ་(ན༥༤བ)
ཐེགས། ཉེར་ལྔ་བཞེས་པའི་ས་འབྲུག་ལ་དབོན་པོ་ཀུན་ལྡན་རས་པ་གཅེན་པོའི་སྲས་སུ་འཁྲུངས། ཕག་མོ་གྲུར་ཁུ་བོའི་རྒྱགས་སྐྱེལ་དུ་བྱོན་པས་མི་ལའི་རྣམ་ཐར་གསུང་བ་དང་འགྲིག་པས་དེ་ཙམ་ཞིག་མི་བྱེད་རི་ཞེས་ཆོས་ར་དེ་ཀར་མགོ་ཅོག་དང་ཞེ་མནའ་ལན་གསུམ་བྱས། རྟོགས་པའི་མཐར་ཕྱིན་ཞིང་གྲུབ་པ་ཐོབ་སྟེ་ཕྱིས་མུ་གེའི་དུས་ཅིག་ངས་ནས་ཀྱི་ཆར་འབེབས་སམ། ཆོས་རྒྱུད་འབྲི་གདན་ལྟ་བུ་ཞིག་བྱའམ། ལུས་འདིས་མཁའ་སྤྱོད་དུ་འགྲོ་འདོམས་ཤིག་གསུངས་པས་ནས་ཀྱི་ཆར་འབེབས་པར་ཞུས་པས་དབུ་རྩེའི་སྒོ་ལ་མཁའ་འགྲོ་མ་རྣམས་ནས་སླང་ཞེས་ཕྱག་མཁར་ཏུག་ཏུག་མཛད་པས་སྒོ་བར་ནས་ནས་ཟད་མི་ཤེས་པ་ཞག་ལྔའི་བར་ཡུལ་མི་ཀུན་གྱིས་ལེན་ཚད་བྱུང་སྟེ་ནས་གཞན་ལས་ཉིས་འགྱུར་གྱིས་ཆེ་བ་ཞིག་བྱུང༌། འདི་འདེམ་ཁ་ནོར་བ་ཡིན་སྐད། ལོ་བདུན་བཅུར་གཞན་དོན་མཛད། དེབ་སྔོན་ན་རྒྱལ་ཚ་དང་ཀུན་ལྡན་སྐུ་མཆེད་དུ་བྲིས་པ་ནི་མི་དག་སྟེ། ཁུ་བོ་ཤཱཀྱ་ཐུབ་པ་ལ། །དབོན་པོ་རིགས་གསུམ་མགོན་པོ་ཡོད། །ཅེས་ཁུ་དབོན་དུ་བཤད་ཏོ། །ཁྲོ་ཕུ་ལོ་ཙཱ་བ་ནི་ཀུན་ལྡན་གྱི་གཅུང་པོ་ཇོ་འཕན་དང་ཡུམ་གསལ་བྱེད་ཀྱི་སྲས་ཡིན། ཡབ་དེ་མཐུ་ཤིན་དུ་ཆེ་ཡི་དམ་གྱི་ཞལ་གཟིགས་ཀྱང་མཐུ་མང་པོ་མཛད་པས་སྐྱེ་བ་བདུན་ནས་དཔོན་སློབ་བཅུ་གཅིག་དམྱལ་བར་སྐྱེ་བར་མཁྱེན་སྟེ་གཅེན་པོ་ལ་ཆོས་གསན་ནས་ཐུགས་དམ་རྩེ་གཅིག་དུ་མཛད་པས་གདེང་ཚད་ཁྱད་པར་ཅན་རྙེད་ཏོ། །ཀུན་ལྡན་གྱི་ཉེར་ལྔ་པ་ས་འབྲུག་ལ་འཁྲུངས། རིན་པོ་ཆེ་རྒྱལ་ཚས་མཁན་པོ་མཛད་སྟེ་ལོ་བཅུ་ལ་དགེ་ཚུལ་དང་ཉི་ཤུ་ལ་བསྙེན་རྫོགས་མཛད། མཚན་ཚུལ་ཁྲིམས་ཤེས་རབ་ཡིན། གཙང་ནག་གཙང་དཀར་ལ་ཚད་འདུལ་དང་ཞང་དགེ་བ་ལ་ལོ་ཙཱ་སོགས་གཞུང་ལུགས་མཐའ་དག་སྦྱངས། དགུང་ལོ་བཅུ་གཉིས་པ་ལ་ས་སྐྱར་རྩེ་མོ་གཤེགས་བའི་ཆོས་འཁོར་བྱུང་བ་སོགས་ཆོས་འཁོར་དུ་མ་ལ་བྱོན། འཆད་རྩོད་གཉི་ག་ལ་ཀུན་ངོ་མཚར་དུ་གྱུར། སྣུར་པའི་ལུགས་(ན༥༥ན)
གསང་སྔགས་མཐའ་དག་སྦྱངས། རྒྱལ་ཚ་དང་ཀུན་ལྡན་གྱི་གདམས་ངག་ཐམས་ཅད་རྫོགས་རྟོགས་པ་ཁྱད་པར་ཅན་འཁྲུངས་ཤིང་ཕྱིས་རྗེ་སྒམ་པོ་བའི་སློབ་མ་གྲུབ་ཐོབ་སློང་རྩེ་པས་བོགས་བཏོན་པས་སྒྲོ་འདོགས་ཆོད་སྟེ་ཕྱིས་པཎ་གྲུབ་གསུམ་དང་མཇལ་ཡང་རྟོགས་པ་ལ་སྐྱེད་འདོན་མ་དགོས། རིན་པོ་ཆེ་རྒྱལ་ཚས་ཁྱོད་རག་དུང་བཞིན་དུ་ཇེ་སྦོམ་ལ་འགྲོ་གསུངས། ལོ་ཉེར་བཞི་ལ་རྒྱལ་ཚ་གཤེགས་ནས་བལ་པོར་བྱོན། སྦྱངས་པ་རྒྱ་ཆེར་མཛད། རྣམ་སྲས་ཀྱིས་འཕྲིན་ལས་ཐམས་ཅད་བསྒྲུབས། པཎ་གྲུབ་གསུམ་སྤྱན་དྲངས། ཁྲོ་ཕུའི་བྱམས་ཆེན་ཁྲུ་བརྒྱད་བཅུ་པ་ཕོ་བྲང་དང་བཅས་པ་བཞེངས། བཤད་སྒྲུབ་མཐའ་དག་དར་རྒྱས་སུ་མཛད། བཤད་གྲ་ལ་མཁས་པ་གཟང་རིང་བསྐོས་ཤིང་ཕྱིས་མཆོད་རྟེན་ཆེན་མོ་ཡང་མཛད། བླ་ཆེན་བསོད་དབང་དང་ཁྲོ་ཕུ་སེམས་དཔའ་ཆེན་པོས་གདན་ས་རིམ་པར་མཛད་ཅིང་ཡང་རྩེ་བ་རིན་ཆེན་སེང་གེ་དང་བུ་སྟོན་ཐམས་ཅད་མཁྱེན་པ་ལ་སོགས་ཁྲོ་ཕུའི་བཀའ་རྒྱུད་བཟང་ལ་མང་བ་བྱུང་ངོ༌། །ཁྲོ་ཕུའི་བཀའ་རྒྱུད་ཀྱི་སྐབས་སོ། །ཕག་གྲུ་བཀའ་རྒྱུད་ལས་གླིང་གི་བཀའ་རྒྱུད་ལས་གཞན་བཤད་པའི་སྐབས་སོ། །གྲུབ་ཐོབ་གླིང་རས་པ་ནི་ཡུལ་ཉང་སྟོད་བཞེངས་ཀྱི་གླང་པོ་སྣར་གདུང་གླིང་སྨད་པ། ཡབ་སྨན་དང་སྔགས་མཁྱེན་པ་རྒྱལ་པོ་སྒྲུབ་བེ་ཡུམ་གཏུམ་མོ་དར་སྐྱིད་ཀྱི་སྲས་སུ་ས་སྤྲེ་ལ་འཁྲུངས། སྨན་དང་སྔགས་ལ་སྦྱངས། འོ་མ་ཐང་བ་ལས་རབ་ཏུ་བྱུང༌། ཞང་དང་ར་ལོ་སོགས་བསྟེན། ཇོ་མོ་སྨན་མོ་དང་བསྡོངས་རྣལ་འབྱོར་བའི་ཆ་བྱད་མཛད། སྔོན་བྱང་ཆུབ་སེམས་དཔའ་གཉིས་ཀྱིས་བུད་མེད་ལ་ཆོས་བསྟན་པ་ལ་དགེ་སློང་དྲུག་བཅུས་འཁྲིག་པའི་སྐུར་བ་བཏབ་པས་དེ་གཉིས་ལ་ཀུན་མ་མོས། དེས་དྲུག་བཅུ་པོ་ངན་སོང་དང་མི་ཁོམ་པ་མཐའ་ཡས་མྱོང་ནས་མཐར་སྟོན་པའི་དྲུང་དུ་བྱང་ཆུབ་སེམས་དཔའ་དྲུག་ཅུར་གྱུར་ནས་གཤེགས་ཤིང་ཕྱིས་སྡོམ་པར་ཁས་བླངས་པའི་བྱང་ཆུབ་སེམས་དཔའ་བརྩོན་འགྲུས་འོད་དུ་གྱུར་པའི་སྐྱེ་བ་དཀོན་བརྩེགས་གཟིགས་པས་མཁྱེན། སྨན་མོ་དང་(ན༥༥བ)
འབྲེལ་བའང་དེའི་ལས་ཀྱི་ལྷག་མ་ཡིན། རྒྱལ་བ་ཁྱུང་ཚང་བ་ལ་གདམས་པ་ཞུས། ཁྱུང་ཚང་པ་རས་ཆུང་པ་དངོས་དང་མཇལ་བའི་ལོ་རྒྱུས་མང་པོ་གསུང་བ་ལ་མ་དད་པས་ཕྱིས་ཀྱང་དྲོད་ཆུང་བར་བྱུང་ལོ་རོར་བྱོན་ཏེ་ལོ་ལ་དབང་ཞུས། སུམ་པ་ལ་གདམས་པ་ཐམས་ཅད་རྫོགས་པར་ཞུས། མནལ་ལམ་དུ་མི་དཀར་པོ་ཅིག་གིས་ད་དེ་ལོ་ཕྱེད་དང་ལྔ་ན་དོན་འགྲུབ་ཅེས་པ་བྱུང༌། སོ་བརྒྱད་པ་ཤིང་བྱའི་དགུན་ཕག་མོ་གྲུར་བྱོན་དད་པ་དབང་མེད་དུ་སྐྱེས། བྱ་རི་དྭགས་འདི་རྣམས་ཀྱང་བླ་མའི་སྤྲུལ་པ་ཡིན་སྙམ་པ་བྱུང༌། རྗེ་འགྲོ་མགོན་དེ་རྣལ་འབྱོར་པ་དང་ཁྱིམ་ཐབ་ཅན་ལ་མི་མཉེས་ཀྱང་ཉིད་ལ་ཤིན་དུ་ཐུགས་ལ་འདོགས་པར་བྱུང༌། ལོ་བདུན་ཟླ་བ་བདུན་གྱི་མཚམས་ཀྱི་དམ་བཅའ་བྱས་ནས་བསྒོམས་པས་ཞག་གསུམ་ན་རྟོགས་པ་ཟང་ཐལ་དུ་ཤར་སྟེ་ཚོགས་སུ་བྱོན་སྟེ། རྗེ་ཡི་ཞལ་ནས་གཉུག་མའི་དོན། །སྒོམས་ཅིག་གསུངས་ནས་བསྒོམས་ལགས་པས། །སྒོམ་བྱ་དང་སྒོམ་བྱེད་སྟོར་ནས་ཐལ། །སྒོམ་ཐུན་མཚམས་སུ་བཟུང་རྒྱུ་ཡང་མི་གདའོ། །སོགས་ཀྱི་རྟོགས་པ་ཕུལ་བས་མཉེས་ཤིང་ཆུ་བོ་གངྒཱ་ཚུན་ལ་རྟོགས་པ་མཐོ་བར་གྲགས། འགྲོ་མགོན་གྱིས་རྟེན་འབྲེལ་མཛད་སྟེ་ཇོ་མོ་ཕྱིར་བསློག་ཁམས་སུ་བྱོན་སྟེ་ཟང་ཟིང་ཅི་ཡང་མ་བསྣམས་པར་བྱོན། ལོ་རོའི་བླ་མ་རྣམས་མཇལ་ནས་ཕག་མོ་གྲུར་བྱོན་པས་གདུང་ཡང་སྦྱངས་ཟིན་འདུག་ནས། གྲོང་ཁྱེར་རྩྭ་མཆོག་ལྟ་བུ་ཡི། །དཔལ་ཕག་མོ་གྲུ་ཡི་ནགས་ཁྲོད་དུ། །སོགས་ཀྱི་གདུང་དབྱངས་མཛད། སྦྲགས་ཡང་རྫོང་སོགས་དབུས་གཙང་གི་ས་མང་པོར་བཞུགས། སྣ་ཕུར་གཙད་པོས་གདན་དྲངས་སྟེ་དགོན་པ་བཟུང༌། བསམ་ཡས་སུ་བུད་མེད་ཅིག་གིས་པོ་ཏི་ཅིག་བྱིན་པ་མིད་པར་ཕྱིན་ཆོས་ཐམས་ཅད་མི་མཁྱེན་པར་མ་བྱུང༌། རྒྱུད་ཀྱི་འགྲེལ་པ་བྱེད་པར་མཁའ་འགྲོ་མས་བཀའ་གནང་ནས་ཅུང་ཞིག་མཛད་པས་མ་ཉན་བར་བཤད་ཟེར་ནས་སྐུར་པ་འདེབས་པ་བྱུང་བས་(ན༥༦ན)
བཟོད་གསོལ་མགུར་དུ་བཞེངས་ནས་འཕྲོ་བཅད། དཔལ་ཧེ་རུ་ཀ་དངོས་སུ་བཞུགས་པས་འགྲོ་བའི་དོན་མཛད་སྟེ། ང་མེད་མ་སེམས་རང་གི་སེམས་ལ་ལྟོས། །སེམས་ཀྱི་དེ་ཉིད་མཐོང་ན་ང་དང་མཇལ། །ཞེས་སོགས་ཀྱི་ཞལ་ཆེམས་དཔེ་གསེབ་ཏུ་བཅུག་སྟེ་རེ་གཅིག་ལ་ཆོས་གསུང་འཕྲོ་ལ་དམ་སེལ་ཅན་གཉིས་བྱུང་བས་གཤེགས་པར་བསྟན། གདུང་བཞུ་ཚེ་དུ་བ་གཏན་མེད་ཅིང་དྲི་བཟང་ཁྱད་པར་ཅན་དང་མེ་ལྕེ་ལ་རི་མོ་སྣ་ཚོགས་པ་བྱུང་ངོ༌། །དེའི་སློབ་མ་ཀུན་གོ་གཅིག་གིས་ཆོད་པ་གཙང་པ་རྒྱ་རས་ནི་ཧ་བོ་གང་བཟང་དང་ཉེ་བའི་ཉང་སྟོད་ཁུ་ལེའི་སར་འཁྲུངས། ཡབ་རྒྱ་ཟུར་སོ་ཚབ་བེ་ཡུམ་མར་བཟའ་དར་སྐྱིད། སྲས་བདུན་གྱི་ཐ་ཆུང་ཡིན། ཡུམ་གྱིས་གཅེས་པར་བྱས་ནས་བོན་པོ་ལ་བཅོལ་སྟེ་གཡུང་དྲུང་དཔལ་དུ་བཏགས། དགུང་ལོ་བཅུ་གཉིས་ལ་སློབ་དཔོན་རྟ་ཐང་པ་ལ་དབུ་སྐྲ་བཅད། ཤེས་རབ་བདུད་རྩི་འཁོར་ལོ་ཞེས་བཏགས། ཉེར་གཉིས་ཡན་ལ་སློབ་དཔོན་བརྒྱད་ཙམ་ལ་མངོན་པ་ཚད་མ་ཡོ་ག་བཀའ་གདམས་རྫོགས་ཆེན་སོགས་ཆོས་མང་དུ་སྦྱངས། ཆེ་སར་བཏོན་ཞིང་ཆོས་མཁས་པར་གྲགས། གྲུབ་ཐོབ་གླིང་ར་ལུང་ན་བཞུགས་པ་དང་མཇལ་སྟེ་ཆོས་མ་ཞུས་ཀྱང་བྱིན་རླབས་དེ་དུས་ཞུགས། དེ་ནས་སྣ་ཕུར་བྱོན་གདམས་ངག་ཞུས་ནས་བསྒོམས་པས་ཞག་བདུན་ན་རས་ཐུབ་པ་བྱུང༌། ཕྱག་ཆེན་གྱི་སེམས་གནས་དཀའ་བར་བྱུང་ཡང་བརྩོན་འགྲུས་སྐྱེད་པས་ཉིན་མཚན་ཁོར་ཡུག་གི་གནས་པ་བཟང་པོ་བྱུང༌། བླ་མ་ལ་ཞུས་པས་དེ་ཡང་ཡིན་སྟེ་རྟོགས་པ་ཅིག་ཡོད་ཀྱི་གསུངས། ཇི་ཞིག་ན་ཉམས་ཐམས་ཅད་དག་ནས་རྟོགས་པ་ལྷག་གིས་ཤར་བས་བླ་མ་ལ་མོས་གུས་བཟོད་མེད་དུ་སྐྱེས། བློ་སྣ་ཐུང་སྦུང་ཙེར་སོང༌། འཐོར་པ་སྙུང་ཚབས་ཆེ་བ་ཞིག་བྱུང་བ་གྲུབ་ཐོབ་ཆེན་པོས་ང་རང་གིས་ནད་གཡོག་བྱེད་གསུངས་ནས་མཛད། སྣ་ཕུའི་མཆོད་ཁང་བཞེང་པས་གྲ་པ་མཚམས་བྱེད་པ་དང་ཕྱོགས་ལ་འགྲོ་བ་ལ་གསེར་ཞོ་(ན༥༦བ)
རེའི་ཆད་པ་འབེབས་ཀྱི་འདུག་པས་གསེར་ཞོ་གང་ཕུལ་ནས་མཚམས་བྱེད་པར་ཞུས་པས་ཁྱོད་རང་སླེའུ་ཆུང་དུ་སོང་ལ་གྱིས་གསུངས། དེར་ག་རེ་བླ་མ་མ་མཉེས་པའི་སྒྲུབ་པས་ཅི་བྱེད་བསམས་ནས་བཤགས་པ་བྱས། ད་མཁར་ལས་བྱེད་པར་ཞུ་བྱས་པས་འོ་ཆོས་གོ་བ་བྱ་བ་དེ་ཙུག་འོང་བ་ཡིན་གསུངས་ནས་ཤིན་དུ་མཉེས། ཞར་ལ་ཕྱག་དཔེ་འབྲི་བ་དང༌། གྲོགས་མཆེད་སྙོམས་ཆུང་གི་དཔེ་བྲིས་སོགས་འཁྲོབས་པར་མཛད། ཆོས་སྐད་མཛད་པ་ན་དཔོན་སློབ་སུས་ཀྱང་མ་ཐུབ་པས་ཤེས་རབ་ཅན་དུ་གྲགས། སྒོམ་དུ་འགྲོ་བར་ཞུས་པས་ལོ་གསུམ་ན་མཁར་ཆུར་བཏང་གིས་དེ་བར་འདིར་སྡོད་གསུངས་ནས་སྤྱིར་སྣ་ཕུར་ལོ་ལྔ་བཞུགས་རིང་གདམས་ངག་ཐམས་ཅད་ཚར། རླུང་ཕྱི་ནང་སྲེ་བ་དང་རྩིག་པ་ལ་མ་ཐོགས་པ་སོགས་རྗེ་མི་ལའི་ཡོན་ཏན་ལྟ་བུ་བྱུང༌། རྣལ་འབྱོར་པ་མ་མཛད་པར་གཙང་སྒོམ་མཛོད་ཅེས་མཁའ་འགྲོ་མ་སྐལ་བཟང་གིས་ལུང་བསྟན། ཞར་ཆོས་པའང་མཛད། བདེ་མཆོག་གི་དབང་གནང་བའི་སྟ་གོན་གྱི་ཚེ་རྨི་ལམ་ན་གསེར་བཏུལ་མ་གཞོང་པ་གང་མ་བཏུལ་བ་གང་འདུག་པ་ལ་དགྲ་ལ་ཞེ་འཚེར་བ་བག་ཙམ་འདུག་པ་རྨིས་པས་རྨི་ལྟས་བཟང༌། གཏོར་ཟན་སྐྱོང་དགོས་པར་འདུག་གསུངས། དེ་མ་གྲུབ་པས་སྐུ་ཚེ་ཐུང་བར་བྱུང༌། སྤྱི་ལས་དང་ནད་པའི་གཡོག་ཀུན་ལ་སླེབས་པར་བྱས། དེ་ནས་ནན་གྱིས་མཁར་ཆུར་འགྲོ་བར་ཞུས་ནས་བྱོན་པས་གསེར་སྟེང་དུ་སླེབས་དུས་གྲུབ་ཐོབ་ཆེན་པོ་གཤེགས་པ་གསན་ནས་བྱོན་པས་གདུང་བཞུ་བ་དང་ཐུག་གདུང་དབྱངས་མཛད། དགུང་ལོ་ཉེར་བརྒྱད་ནས་ཉེར་དགུར་འཕོ་བ་ལ་མཁར་ཆུར་བྱོན། གྲང་ལ་འཚོ་བ་དཀོན་པས་འཁོར་རྣམས་ཀྱིས་མ་ཚུགས། ཉིད་ཀྱིས་ལྕགས་ཕུར་ཅན་དུ་འདག་སྦྱར་ལ་ལོ་གསུམ་བཞུགས་པས་སྙིང་རླུང་འདྲེ་དམག་ལ་སོགས་ཕྱི་ནང་གི་ཆོ་འཕྲུལ་ཅི་ཡང་བྱུང་ཡང་འཆི་ནུས་ཐོག་འགེལ་དུ་ཉམས་སུ་བླངས་པས་ཕྱག་རྒྱ་ཆེན་པོའི་རྟོགས་པ་ན་མཁའ་ལྟ་བུ་ཤར། རྟེན་འབྲེལ་ཐམས་ཅད་མེ་ལོང་ལ་གཟུགས་བརྙན་བཞིན་དུ་གསལ། (ན༥༧ན)
རོ་སྙོམས་ཀྱི་གཏེར་ཡང་རྙེད། མཚུར་ཕུར་རིན་པོ་ཆེ་དབུ་སེ་དང་མཇལ། ཐུགས་ཡིད་འདྲེ་བར་བྱུང་ཞིང་ཐབས་ལམ་གྱི་གནད་དུ་མ་གསན། འབྲི་ཁུང་རིན་པོ་ཆེ་ལ་ཆོས་གསན། ཙཱ་རི་ལ་བྱོན་སྟེ་གཟིགས་སྣང་ཁྱད་པར་ཅན་བྱུང༌། ཀློང་རྡོལ་བཏབ། ཞང་རིན་པོ་ཆེ་དང་མཇལ་བས་སྙིང་རྗེ་ལ་བོགས་ཐོན། ཅིས་ཀྱང་རབ་ཏུ་བྱུང་གསུངས་ནས་དགུང་ལོ་སོ་གསུམ་པ་ལ་མཁན་པོ་གཟད་པས་རབ་བྱུང་དང་ཞང་རིན་པོ་ཆེས་མཁན་པོ་མཛད་སྟེ་བསྙེན་རྫོགས་མཛད། ཕ་ལས་རྒྱའི་ཆོས་ལ་མངའ་བརྙེས་ཀྱང༌། །བུ་གཙང་སྒོམ་བྱེད་པའི་སྒོམ་ཆེན་ཡིན། །ར་ཐུག་ལུག་ཐུག་གི་སྒོམ་ཆེན་མིན། །བོང་རེང་སྐྱ་བོའི་ཆོས་པ་མིན། །ཞེས་དང༌། རྒས་ཀྱང་རབ་བྱུང་བྱས་པ་འདི། །སངས་རྒྱས་བསྟན་པའི་ཆེ་བ་ཡིན། །ཆོས་མགོ་མཇུག་ལོག་པར་མི་དགོངས་འཚལ། །ཞེས་ཀྱང་གསུངས། དགེ་ཡེ་ཆོས་བྱུང་ན་འདི་གླིང་རས་ལ་སྦྱར་བ་ནི་ཤིན་དུ་འཁྲུལ་ལོ། །རྣམ་ཐར་ན་མི་སྣང་ཡང་དེང་སང་ངག་སྒྲོས་ལ། རྗེ་འཇིག་རྟེན་མགོན་པོས་སྒོམ་ཞྭ་སྐྱེལ་ཏུ་བཏང་བ་གསོལ་པས་ཞང་རིན་པོ་ཆེའི་ཞྭ་སྣ་རིང་མི་མཛད་པར་སྒོམ་ཞྭ་གསོལ་བ་བྱུང་ཟེར་རོ། །འབྲུག་དང་ར་ལུང་སོགས་བཟུང་སྟེ་ཚོགས་པ་མང་དུ་འདུས། སྐྱོ་ཤས་ཤིན་དུ་ཆེ། གཞན་མི་དགའ་བ་མི་མཛད་པ་སོགས་གཞན་དོན་དང་འབྲེལ་བའི་རྣམ་ཐར་བཅུ་དང༌། སུ་དང་འགྲོགས་ཀྱང་གོང་དུ་འཁུར་ཞིང་སྣ་ཐག་གཞན་ལ་མི་འཆོར་བ་སོགས་སྐུའི་རྣམ་ཐར་གསུམ། དགོས་མེད་ཀྱི་དྲག་སྔགས་རྣམ་གསུམ་རྟག་དུ་འདྲེན་པས་ཕྱི་ཚིག་གི་རྡོས་ཐག་ཆོད་པ་སོགས་གསུང་གི་རྣམ་ཐར་གསུམ། རྣམ་པར་ཐར་པའི་སྒོ་གསུམ་དང་མི་འབྲལ་བ་སོགས་ཐུགས་ཀྱི་གསུམ། རང་གཞན་སུ་ཡང་བཅས་རང་གི་མི་དགེ་བས་གོས་སུ་མི་འཇུག་པ་སོགས་སྐུ་གསུང་ཐུགས་ཐུན་མོང་གི་རྣམ་ཐར་གསུམ་སྟེ་ཐུན་མོང་མ་ཡིན་པའི་རྣམ་ཐར་བཅུ་གཉིས་མཛད། དགུང་ལོ་ང་གཅིག་པ་ལྕགས་ལུག་ལ་(ན༥༧བ)
རང་སེམས་ཆོས་སྐུར་རྟོགས་ན་ང་དང་མཇལ། །ཞེས་སོགས་ཀྱི་ཞལ་ཆེམས་མཛད་སྟེ་གཤེགས། ཞེ་དགུ་ལ་གཤེགས་ཟེར་བ་ནི་མ་དག་པ་འཕེལ་བའོ། །སློབ་མའང་དང་པོར་ཆེ་བ་སྦ་རྐྱང་གཉིས། བར་དུ་ཆེ་བ་རྒྱ་འབྲས་གཉིས། མཐའ་མར་ཆེ་བ་ལོ་རྒོད་གཉིས་ཅེས་གྲགས་པའི་སྦ་རི་བས་སྦ་རི་བྱང་ཆུབ་གླིང་གོང་བཏབ་ཅིང་ཆུ་བོ་རི་ལ་ཁ་ཤར་སོགས་མཆེད། རྐྱང་མོ་ཁ་བས་རྐྱང་མོ་ཁ་བཏབ། རྒྱ་ཡགས་པས་གྲར་རྒྱ་ཡགས་བཏབ། འབྲས་མོ་བས་ཉང་སྟོད་འབྲས་མོ་བཏབ་སྟེ་རེ་རེ་ཞིང་འཕྲིན་ལས་ཆེར་བྱུང༌། ཁྱད་པར་རྗེ་ཉིད་ཀྱི་གདུང་གི་དབོན་པོ་ཆོས་ཀྱི་སྲས་དབོན་རས་དར་མ་སེང་གེ་ནི་མེ་བྱ་ལ་འཁྲུངས། སོ་ལྔ་ལ་ཆོས་རྗེ་གཤེགས་ནས་གདན་ས་མཛད་སྟེ་བུ་ཆེན་ཕྱི་ཚར་རྣམས་ཀྱི་བླ་མའང་ཡིན། རེ་གཅིག་ལ་གཤེགས། དེའི་དབོན་པོ་རིམ་བཞིན་གཞོན་ནུ་སེང་གེ་ལྕགས་སྤྲེ་ལ་འཁྲུངས། རེ་བདུན་ལ་ཐེགས། ཉི་མ་སེང་གེ་ལྕགས་ཕག་ལ་འཁྲུངས། སོ་བདུན་ལ་ཐེགས། སྤོས་སྐྱ་བ་སེང་གེ་རིན་ཆེན་ནི་ས་རྟ་ལ་འཁྲུངས། ང་དྲུག་ལ་ཐེགས། སེང་གེ་རྒྱལ་པོ་ས་གླང་ལ་འཁྲུངས། སོ་བདུན་ལ་ཐེགས། འཇམ་དབྱངས་ཀུན་དགའ་སེང་གེ་ཤིང་སྟག་ལ་འཁྲུངས། སོ་བཞི་ལ་ཐེགས། བློ་གྲོས་སེང་གེ་ཤིང་བྱ་ལ་འཁྲུངས། ཞེ་དྲུག་ལ་ཐེགས། ཤེས་རབ་སེང་གེ་ལྕགས་ཕག་ལ་འཁྲུངས། ཉེར་གཉིས་ལ་ཐེགས། འདི་ཡན་ལ་སེང་གེ་དགུ་ཚར་དུ་གྲགས་སོ། །ཡེ་ཤེས་རིན་ཆེན་ཤིང་འབྲུག་ལ་འཁྲུངས། ལྔ་བཅུ་ལ་ཐེགས། རྒྱལ་དབང་ཆོས་རྗེ་ས་སྤྲེ་ལ་འཁྲུངས། འཕྲིན་ལས་ཤིན་དུ་ཆེ་ཞིང་སྒམ་པོའི་གདན་སའང་མཛད་སྟེ་ཞེ་དགུ་ལ་ཐེགས། འདི་ཡན་དུ་གདན་ས་མཛད་པ་རྣམས་གཙང་སྒོམ་མཛད། གདུང་རྒྱུད་པ་ཁྱིམ་པ་མཛད་ཅིང་བུ་ཆེན་འགྲོ་དོན་འཕེར་བ་རེ་རེ་ཞིང་མང་ལ་ཕྱིས་ཀྱང་རྟོགས་ལྡན་ལྷ་བཙུན་པ་དང་བླ་མ་བསམ་གཏན་པ་དང༌། འབྲུག་སྨྱོན་ཀུན་དགའ་ལེགས་པ་སོགས་(ན༥༨ན)
རྣལ་འབྱོར་གྱི་དབང་ཕྱུག་དུ་མ་བྱུང་ངོ༌། །བར་འབྲུག་དུ་གྲགས་པ་ར་ལུང་གི་གདན་ས་བཀའ་རྒྱུད་ཀྱི་སྐབས་སོ། །རྗེ་རྒོད་ཚང་པ་ནི་ལྷོ་བྲག་དོ་ལོ་ཆུང་ཁྲར་འཁྲུངས། གདུང་ཆུ་ཅལ། ཡབ་མོན་གྲགས། ཡུམ་ཟུག་མོ་དཔལ་རྒྱན་གྱི་སྲས་སུ་ས་བྱ་ལ་འཁྲུངས། མཚན་མགོན་པོ་དཔལ་དུ་བཏགས། གླིང་རས་སྐུ་འདའ་བའི་ཚེ་བྱིན་རླབས་ཐམས་ཅད་འཕོས། འཁྲུངས་ནས་ཞག་དགུ་ཚུན་ཆད་ཐམས་ཅད་དྲན། དགུང་ལོ་གསུམ་ནས་ཡབ་ཡུམ་བྲལ་སྟེ་ཡབ་ཀྱིས་གཅེས་པར་གསོས། དགུང་ལོ་ལྔ་དྲུག་ནས་ཀློག་ཚེགས་མེད་དུ་མཁས་པར་མཁྱེན་སྟེ་ཡབ་སྲས་གཉིས་ཀ་བདེ་བར་འཚོ། སློབ་དཔོན་བརྒྱད་ཙམ་ལ་སྒྲ་སྨྲ་སྒོ་སོགས་དང༌། བསྟན་རིམ། དབུ་མ། སྤྱོད་འཇུག་ཕར་ཕྱིན་སོགས་གསན་པས་ཇི་ལྟ་བར་མཁྱེན། ལོ་རེ་ལ་མདོ་མང་ལན་གཉིས་རེ་གཟིགས་པས་ཀུན་ཐུགས་ལ་ཆུབ་པ་ལྟར་ཡོད། བཅུ་གཉིས་ནས་གླུ་བྲོ་ཁོ་ན་མཛད་པས་ལྷ་ལས་འཕོས་པར་གྲགས། ལོ་རེ་ལ་ལྷ་ས་ལན་གསུམ་དུ་བསྐོར་སྟེ་ཆོས་ཀྱི་དངོས་གྲུབ་ཁོ་ན་ཞུས་པས་ལྷོ་པའི་དད་པ་ཅན་ཞེས་གྲགས། ཆོས་རྒྱུད་གང་ལ་འཇུག་གམ་སྙམ་པ་ན། མནལ་ལམ་དུ། རྒྱུད་པ་བཟང་བ་མང་ན་ཡང༌། །དྭགས་པོའི་བཀའ་རྒྱུད་གོང་ན་མེད། །ཅེས་སོགས་བྱུང༌། གྲོགས་བཤེས་ཀུན་གྱིས་གཤོལ། ལན་ཅིག་གཙང་པའི་གླུ་མཁན་དུ་མས། དགོན་པ་ར་ལུང་གི་ཆོས་རྗེ་རྒྱ་རས་ལ། །ཚེ་འདི་ཕྱི་གཉིས་ཀྱི་བདེ་ལེགས་ཡོད། །སྙིང་ནས་ལྷ་ཆོས་ལ་གཤེགས་ན་དེ་རུ་གཤེགས། །ཟེར་བ་གསན་པས་ཐུགས་མི་བཟོད་པ་སྐྱེས་སྟེ་ལོ་བཅུ་དགུ་པ་ལ་བྱོན། ཡབ་ཀྱིས་ཀྱང་ཁྱོད་ཀྱིས་ཆོས་གྱིས་ལ་ང་འདྲོངས་པར་གྱིས་ཕ་ཡུལ་དུ་མ་སྡོད་ཅེས་བསྐུལ་སྟེ་ར་ལུང་དུ་བྱོན། ཆོས་རྗེ་ཆོས་གསུང་བ་དང་མཇལ་བས་དད་པ་ལྷག་པར་སྐྱེས་སྟེ་བྱིན་རླབས་ཞུགས། མཚན་མགོན་པོ་རྡོ་རྗེར་བཏགས། མཁན་སློབ་ལས་དགེ་ཚུལ་མཛད་སྟེ་འདུལ་བ་མདོ་རྩ་གསན་པས་ཚེགས་མེད་པར་མཁྱེན། ཆོས་རྗེ་རིན་པོ་ཆེས་(ན༥༨བ)
གཏོར་དབང་ཞིག་གནང་ནས་ཁྲིད་བསྐྱངས་པས་རྣམ་རྟོག་འབའ་ཞིག་བྱུང་བ་ཞུས་པས་རྟོག་པ་རང་ཐུག་འདུག་ལྟོས་གསུངས། རྟོག་པ་ལ་རང་བཞིན་མི་འདུག་ཞུས་པས་དེ་ཀ་ལྟར་སྒོམས་གསུངས། སྟོང་པ་ཡིན་ན་འགྱུར་མི་ཐད་སྙམ་པ་ན་སྟོང་པ་རང་འགྱུར་བར་ཤེས། བྱི་བས་གནོད་པ་བྱས་པས་སྣང་བ་སེམས་ཡིན་པར་ཐག་ཆོད། ཆོས་གསུངས་ཚད་ལ་བསམ་མནོ་དོགས་དཔྱོད་མཛད་པས་སྒྲོ་འདོགས་ཐམས་ཅད་ཆོད་སྟེ་དཔེ་ཆར་མི་ལྟོས་པར་གྱུར། དཔོན་སློབ་སུས་ཀྱང་ཆོས་སྐད་ཀྱི་ལན་མ་ལྡོན་པས་ཐུགས་རབ་ཀྱི་གྲགས་པ་ཐོབ། འབྲི་ཁུང་རིན་པོ་ཆེ་ལ་ཟབ་ཆོས་གསན། ཉེར་གསུམ་ལ་འགྲོ་མགོན་གཤེགས་སྟེ་མཁར་ཆུར་སྒྲུབ་པ་ལོ་གསུམ་མཛད་པའི་དབྱར་དང་པོ་ལ་རྣམ་རྟོག་དང་ཡེ་ཤེས་རྩེ་སྤྲོད་ཀྱི་དུས་དང༌། དེ་ནས་ཉོན་མོངས་མགོ་ནོན་སྟེ་ཉིན་པར་རྐྱེན་གྱིས་མི་གནོད་པ་བྱུང༌། ད་དུང་སློབ་གཉེར་ཅིག་བྱ་བར་སེམ་པ་ན་ཆོས་རྗེ་རས་པ་བྱོན་སྟེ་བུ་སྒྲུབ་པ་ཁོ་ན་གྱིས་མི་ལའི་རྣམ་ཐར་སྐྱོངས། ཚུར་འདུས་པ་རྣམས་རི་ཁྲོད་ཏུ་སྐྱོངས། འབྲུག་དུ་སྐུ་འབུམ་རྩིག་པ་ལ་རྒྱུག་གསུང་བ་ལ་མ་སླེབས་པས་ཕྱིས་འཁོར་དང་ལོངས་སྤྱོད་ཀྱི་རྟེན་འབྲེལ་ཅུང་ཟད་འཕྱུགས། པདྨའི་ཐུགས་དམ་གྱི་ནང་ལ་ལན་གསུམ་དྲངས་པས་བདེ་སྟོང་གི་ཡེ་ཤེས་སྐྱེས། ཉེར་ལྔ་ལ་གངས་ཏི་སེ་ལ་བྱོན། སྙེ་མོར་ཐུགས་མ་བདེ་བ་ན་ཅི་བྱུང་ཡང་སྡུག་བསྔལ་མི་མཛད་པ་དམ་བཅའ་དང་པོ་མཛད། དེ་བཞིན་དུ་རྐྱེན་རེ་ལ་བསྟེན་ནས་བཟང་ངན་འབྲིང་གསུམ་སྤྱི་བོར་འཁུར་བ། སུ་ལ་ཡང་སྐུར་པ་མི་འདེབས་པ། གནོད་ལན་དུ་འཕན་འདོགས་པ། ཉིན་མཚན་ཐུན་དྲུག་དུ་དགེ་སྦྱོར་བདུན་པ་ལ་འབད་པ། བླ་མའི་མོས་གུས་དང་མ་བྲལ་བ། གང་ལའང་བདག་གིར་མི་འཛིན་པ། བླ་མ་ལ་སངས་རྒྱས་ཀྱི་འདུ་ཤེས་དང་མ་བྲལ་བ། འཁོར་བ་མ་སྟོངས་ཀྱི་བར་དུ་གཞན་དོན་མཛད་པ། སྡུག་བསྔལ་བདག་ལ་ལེན་པ། བདེ་དགེ་གཞན་ལ་སྟེར་བ། ལེ་ལོར་མ་ལུས་པར་ཚོགས་གཉིས་གསོག་པ་སྟེ་དམ་བཅའ་བཅུ་གཉིས། དེ་མཐར་འདོན་(ན༥༩ན)
པའི་གོ་ཆ་དང་བཅུ་གསུམ་མཛད། ཡང་ལུས་ཀྱིས་མཚམས་འདག་སྦྱར་རི་ཁྲོད་གསུམ་གྱིས་དུས་འདའ་བ། ངག་སྨྲ་བཅད་བསྙེན་པ་གསོལ་འདེབས་གསུམ་གྱིས་འདའ་ཞིང་ལོང་གཏམ་ཚིག་གསུམ་དུ་མི་སྦྲེལ། ཡིད་ཀྱིས་འཁྲུལ་རྟོག་གསུམ་མི་སྦྲེལ་བ་སྟེ་སྐུ་གསུང་ཐུགས་ཀྱི་དམ་བཅའ་གསུམ། ཡང་གཞི་བདག་བཟུང་མི་མཛད་པ། རང་དོན་དུ་གྲོང་དུ་མི་འགྲོ་བ། སྔར་ཤུལ་དུ་ཕྱིས་མི་གཤེགས་པ། ཚེ་འདིའི་ཞལ་ཏ་མི་མཛད་པ། ཅི་ཡོད་ལྟོས་མེད་དུ་གཏོང་བ། གཞན་མི་དགའ་བ་སྐད་ཅིག་ཡང་མི་མཛད་པ། ཅི་བྱུང་རོ་སྙོམས་ཀྱིས་ལམ་དུ་འཁྱེར་བ་སྟེ་དམ་བཅའ་བདུན། ཡང་མོས་གུས་ཀྱིས་བླ་མས་ཅི་གསུངས་སྒྲུབ་པ། དག་སྣང་གིས་སྣང་སྲིད་བླ་མར་ལྟ་བ། ཞེན་ལོག་གིས་ཚེ་འདི་བློས་གཏོང་བ། གང་བྱུང་ལ་ཟློག་གོམ་གྱིས་ཐོག་རྫིས་མཛད་པ། བྱ་བ་གང་བྱེད་མཐར་འདོན་པ་སྟེ་ཁྱད་འཕགས་ཀྱི་དམ་བཅའ་ལྔ་སོགས་མཛད་སྟེ་ཐམས་ཅད་མཐར་ཕྱིན། ཏི་སེ་དང་ཛཱ་ལནྡྷ་རར་ལོ་བཞི། འདི་ནས་ཉིན་མཚན་ཁོར་ཡུག་གི་སྒོམ་བྱུང་ཞིང༌། རྟེན་འབྲེལ་ཤར། ཕོ་མ་ལྷ་ཁབ་ཏུ་ལོ་གསུམ། དེར་ཆོས་རྗེ་རས་པ་འདི་ས་བཅུ་པ་བ་ཡིན་ནམ་སྙམ་པ་བྲེད་ཙམ་བྱུང་བ་བར་ཆད་དུ་མཁྱེན། དེ་ཕྱིན་བླ་མ་ལ་སངས་རྒྱས་ཀྱི་འདུ་ཤེས་དང་མ་བྲལ། ཙཱ་རིར་ལོ་གསུམ། དེར་སྐུ་རྒྱབ་སྒལ་བར་སོང་རུང་གཞན་གྱི་ཙམ་ངོས་དྲངས། སྣང་གྲགས་བདེ་ཆེན་དུ་ཤར། སྒོམ་མེད་ཀྱི་རྟོགས་པ་མཐར་ཕྱིན། སླར་རྒྱལ་གྱི་ཤྲིའི་རིར་ལོ་གསུམ་རྣམས་རྩེ་གཅིག་དུ་སྒྲུབ་པ་མཛད། རྡོ་རྗེ་རྣལ་འབྱོར་མས་པོ་ཏི་ཅིག་བྱིན་པ་མིད་པས་ཆོས་ཐམས་ཅད་མཁྱེན། སོ་དགུ་ནས་རྒོད་ཚང་དུ་ལོ་བདུན་འདི་ནས་སྒྲུབ་ཁོང་ནས་གཞན་དོན་ཡང་མཛད། རྒས་ཀྱིན་རི་ཁྲོད་ཇེ་མཐོར་འགྲོ། གསུངས་ནས་སྟེང་འགྲོ། བདེ་ཆེན་སྟེང་ལ་སོགས་པར་གཞན་དོན་མཛད་སྟེ་དགུང་ལོ་བདུན་བཅུ་པ་ལ་གདན་ས་མ་སྐོ། རྟེན་མ་བཞེང༌། སུ་ཆོས་བཞིན་བྱེད་པ་རྣམས་ངའི་གདན་ས་ཡིན་ནོ་གསུངས་ནས་བར་འབྲོག་རྡོ་རྗེ་གླིང་(ན༥༩བ)
དུ་ཐེགས། སློབ་མ་མཐའ་ཡས་ཀྱང་བརྟུལ་ཞུགས་རང་དང་མཉམ་པ་གྲུབ་ཐོབ་ཨོ་ཌྱན་པ་ནི་རྙིང་མའི་གྲུབ་ཐོབ་འབའ་ཞིག་གི་རྒྱུད་པར་རྒྱུས་ནག་པོ་ཇོ་འཕན་གྱི་སྲས་སུ་ལ་སྟོད་ལྷོ་ནས་ཟླུམ་དུ་ལྕགས་ཕོ་སྟག་ལ་འཁྲུངས། བུ་དོང་རིན་རྩེ་དང་དུས་འཁོར་བ་སངས་རྒྱས་རྡོ་རྗེ་སོགས་ལ་མཚན་ཉིད་དང་དུས་འཁོར་མཁས་པར་སྦྱངས། མཚན་རིན་ཆེན་དཔལ། རྗེ་རྒོད་ཚང་པ་ལས་ཅིག་ཅར་བའི་རྟོགས་པ་ཐོས་གྲོལ་བྱུང༌། ཆོས་རྗེས་ལུང་བསྟན་སྟེ་ཨོ་ཌྱན་ཏུ་བྱོན། རྡོ་རྗེ་རྣལ་འབྱོར་མ་ལས་བསྙེན་སྒྲུབ་གསན། རྗེ་རྒོད་ཚང་པའི་དགོན་གནས་ཐམས་ཅད་བསྐྱངས། རྒྱ་བོད་བལ་གསུམ་དུ་བསྟན་པའི་བདག་པོ་མཛད། རྒྱལ་པོ་སེ་ཆེན་གྱིས་འཕགས་པ་རིན་པོ་ཆེའི་ཐམ་ག་ཕུལ་བ་མ་བཞེས། དགུང་ལོ་བརྒྱད་བཅུ་པ་ས་བྱ་ལ་ཐེགས། སློབ་མ་རྗེ་རང་བྱུང་བ། རིན་པོ་ཆེ་མཁར་ཆུ་བ། མཁས་བཙུན་བསོད་ནམས་འོད་ཟེར། རྟོགས་ལྡན་ཟླ་སེང་བ། སྙེ་མདོ་བ་སྐུ་མཆེད་དང་ཆག་ལོ་དབོན་པོ་སོགས་མང་དུ་བྱུང་ཞིང་ཟླ་སེང་བའི་རྗེས་འབྲེང་འོན་ཆོས་སྡིངས་པ་དང་ཤེལ་བྲག་པ་སོགས་ཀྱང་ཡིན་ནོ། །གཞན་ཡང་སྒྲུབ་ཚུགས་རང་དང་མཉམ་པ་སྤྱིལ་མཁར་བ། དཀའ་སྤྱད་རང་དང་མཉམ་པ་ཕོ་རི་བ། སྙིང་རྗེ་རང་དང་མཉམ་པ་མ་མདུན་པ། རྟེན་འབྲེལ་རང་དང་མཉམ་པ་སྲས་བདེ་ལེགས་རྒྱལ་མཚན་འདིས་ཟང་ཟང་ནེ་རིང་བཏབ། རྟོགས་པ་རང་དང་མཉམ་པ་ཡང་དགོན་པ་ནི་རྙིང་མའི་གྲུབ་ཐོབ་ཀྱི་བརྒྱུད་པར་ལ་སྟོད་ལྷོའི་ལྷ་གདོང་དགོན་པར་ཆུ་བྱ་ལ་འཁྲུངས། གསུང་བྱེ་འཕྲལ་ནས་ཆོས་ཐོགས་མེད་དུ་གསུངས། མངོན་མཁྱེན་དང་གྲུབ་རྟགས་མངའ། ཀོ་བྲག་པ། རྗེ་སྤྱན་སྔ། ས་པཎ་སྟེ་རྩ་བའི་བླ་མ་བཞིར་གྲགས་ཀྱང་ཆོས་རྗེའི་རྒྱུད་པ་འཛིན། ཞེ་དྲུག་ལ་ཐེགས། སློབ་མ་མཁས་བཙུན་རྒྱལ་མཚན་འབུམ་ནས་རིན་པོ་ཆེ་ཤེས་རབ་འབུམ་སོགས་དང་རྟོགས་ལྡན་ཤེས་མགོན་པ་སོགས་བཀའ་རྒྱུད་བཟང་དུ་བྱུང་ཞིང༌། སློབ་མའི་གཙོ་བོ་སྤྱན་སྔ་རིན་ལྡན་ནི་དིང་རིར་ཆུ་བྱི་ལ་འཁྲུངས། ལོ་ཉེར་གཉིས་ལ་ཡང་དགོན་པ་བཅུ་(ན༦༠ན)
གཉིས་པ་ཞེས་པའི་ཕྱགས་ཕྱི་བྱས་སྟེ་འབྲལ་མེད་དུ་བསྟེན། ཕྱིས་དིང་རིར་འཕྲིན་ལས་བསྐྱངས། ཟུར་ཕུག་པ་རིན་ཆེན་དཔལ་ནི་ཤེན་གྱི་དཔེའུ་ཆུང་དུ་འཁྲུངས། མདོ་སྔགས་ཀྱི་སྦྱངས་པ་མང་དུ་མཛད། གྲུབ་ཆེན་ཨོ་ཌྱན་པ་དང་སྤྱན་སྔ་རིན་ལྡན་ལས་རྟོགས་པ་རྙེད། གདམས་ངག་རྫོགས་སྟེ་ཤྲི་ཟུར་ཕུག་དུ་འཕྲིན་ལས་བསྐྱངས། སློབ་མ་རི་བ་དགེ་འདུན་རྒྱལ་མཚན་དང་དེའི་སློབ་མ་གཙང་པ་བློ་བཟང་པ་བྱ་བའི་འཕྲིན་ལས་ཅན་བྱུང་ངོ༌། །སློབ་མའི་གཙོ་བོ་ནི་འབའ་ར་བ་སྟེ་ཤངས་ཀྱི་ཆབ་ལི་གྲོང་དུ་ས་སྐྱའི་ཉེ་གནས་ཆེན་མོའི་རྒྱུད་པར་ལྕགས་ཁྱི་ལ་འཁྲུངས། དཔལ་ལྡན་བླ་མ་སྐུ་མཆེད་ཀྱི་གསོལ་ཇ་བ་མཛད་པ་ལས་བྲོས་སྟེ་བླ་མ་དུ་མ་བསྟེན། ཟུར་ཕུག་པ་ལས་གདམས་ངག་ཐམས་ཅད་རྫོགས། འཕྲིན་ལས་ཤིན་དུ་ཆེ་ཞིང་པ་གྲོར་གྱ་གཉིས་ལ་ཐེགས། སློབ་མ་རྒྱུད་པ་ཟིན་པ་དུ་མ་བྱུང་ལ་ཁྱད་པར་དུ་དོལ་ལྷ་སྣ་བ་ཀློང་མཁར་བ་རིན་ཆེན་ཚུལ་ཁྲིམས། དེའི་སློབ་མ་ལུམ་པ་བ་ཀུན་དགའ་དོན་གྲུབ། དེའི་སློབ་མ་འབྲོག་ཁང་དམར་བ་ཀུན་དགའ་དཔལ་ལྡན་ནི་སྒྲུབ་པ་མཐར་ཕྱིན། མོན་རྩེ་བ་ཆེན་པོ་ཅེས་གྲགས་སྟེ་ཐུད་ལ་སོགས་པ་བཏབ་ཅིང་རེ་གཉིས་བཞུགས་ལ་རྒྱུད་འཛིན་མང་ངོ༌། །བཀའ་རྒྱུད་རིན་པོ་ཆེ་ཉིད་ལས་ཀྱང་ཞེན་ལོག་མོས་གུས་རོ་སྙོམས་གསུམ་རྩལ་དུ་འདོན་ཞིང་ཚེ་འདི་ལ་ཕྱི་ཕྱག་བཙལ་བ་འགྲོ་མགོན་གཙང་པ་རྒྱ་རས་ཀྱི་བཀའ་རྒྱུད་འདི་ཡིན་ཡང་དུས་ཀྱི་དབང་གིས་ཤུག་འབྲུག་རྩོད་པ་དང་ལྷ་འབྲུག་རྩོད་པ་སོགས་དུ་མ་བྱུང་ཞིང་ལོ་རས་ཀྱི་དབོན་པོ་རྣམས་ཀྱིས་ཀྱང་འཐབ་རྩོད་མང་དུ་མཛད་པ་དང་རྗེ་རྒོད་ཚང་བའི་སྐུ་ཚེའི་སྨད་ལ་ད་འབྲུག་པའི་སྒྲུབ་ཚུགས་དེ་ཉམས་འདུག་གསུངས་པ་ལྟར་གྱུར་ཀྱང་རྗེ་རྒོད་ཚང་པས་ཆོས་རྗེའི་ཆོས་ཆུ་བབས་སུ་གསུངས་པ་རྣམས་ཀྱང་ཁྲིད་ཆེན་བརྒྱད་དུ་ཕྱེ། ཐམས་ཅད་ཀྱང་ཐུགས་ཉམས་སུ་མྱོང་བའི་རྟོགས་ཆོས་ཀྱིས་བརྒྱན་པས་གནད་ཟིན་པ། གཞན་ལ་སྟོན་པ་ལས་བརྒྱ་འགྱུར་གྱིས་ལྷག་པར་རང་གིས་ཉམས་སུ་བཞེས་པས་ཆོས་རྣམ་ཐར་གྱིས་བསྟན་པ། དཔང་ལོ་ཆེན་པོས་སྤྱོད་འཇུག་ལ་རྒོད་ཚང་(ན༦༠བ)
པ་དང་གུ་རུ་ཐོགས་མེད་ལས་མཁས་པ་མེད་གསུང་བ་ལྟར་སེམས་དཔའ་ཆེན་པོ་རྣམས་ཀྱི་རྣམ་ཐར་ཐམས་ཅད་རྫོགས་པ། ངའི་རྒྱུད་པ་ལ་འཐབ་རྩོད་མི་འོང༌། རྟོགས་པའི་བསྟན་པ་འདི་བྱམས་པ་ལ་ཐུག་གིས་མ་སོང་འདུག་ན་ཁོ་རྒོད་ཚང་པས་རྟེན་འབྲེལ་མ་ཤེས་ཀྱིས་གསུངས་སྟེ་རྒོད་ཚང་པ་ལས་བརྒྱུད་པའི་ཆོས་ཀྱིས་དེ་ཕྱིན་གྱི་བོད་ཀྱི་ཆོས་རྒྱུད་ཐམས་ཅད་ལ་ཁྱབ་ཅིང་ཀུན་གྱི་ཚད་མར་གྱུར་པ་འདི་ཡིན་ནོ། །ཕག་གྲུ་བཀའ་རྒྱུད་ཀྱི་ནང་ཚན་གླིང་གི་བཀའ་རྒྱུད་ལས་རྗེ་རྒོད་ཚང་པ་ལས་བརྒྱུད་པ་སྟོད་འབྲུག་དུ་གྲགས་པའི་སྐབས་སོ། །རྒྱལ་བ་ལོ་རས་ནི་གདུང་ལོ་ནད། གཞུང་གྲགས་ཆེན་དུ་ཡབ་རྣལ་འབྱོར་ཤེས་རབ་དང༌། ཡུམ་མར་བཟའ་སྐྱིད་ཀྱིས་ལྷ་སར་ཇོ་བོ་ལ་གསོལ་བ་བཏབ་པས་འཁྲུངས། ལོ་བཅུ་དྲུག་ལ་འགྲོ་མགོན་གཞུང་དུ་ཕེབས་པ་ལ་དབང་ཆོས་གསན་པས་རྟོགས་པ་ངོ་འཕྲོད་སྟེ་ཕྱིས་ཀྱང་སྐྱེད་འདོན་དུ་མ་བྱུང༌། བཅོ་བརྒྱད་པ་ལ་བྲོས་ནས་མཁན་པོ་སྦལ་ཏི་ལས་རབ་ཏུ་བྱུང༌། མཚན་དབང་ཕྱུག་བརྩོན་འགྲུས་ཆོས་རྗེ་ལ་གདམས་ངག་རྣམས་གསན་སྟེ་རས་རྐྱང་མཛད། ཆོས་རྗེ་གདན་དྲངས་སྟེ་ནས་ཁལ་ཉི་སྟོང་བརྒྱད་བརྒྱ་སོགས་ཕུལ་སྟེ་ཆོས་རྗེ་འབུལ་བས་འཚེངས། གཉེན་རབས་ཆད་ཀྱིས་འཚངས། མཐའ་བཞི་བོར་གྱིས་འཚེངས། ལོ་རས་ཆོས་ཀྱིས་འཚེངས་བྱ་བ་བྱུང༌། སྲོག་ལ་བབ་ཀྱང་གནོད་ལན་མི་བྱེད། སྐྱེ་བོའི་ཁྱིམ་དུ་མི་འབྱོན། སྒོས་སུ་དད་ཟས་མི་གསོལ། གཞན་ལ་གཡར་སྐྱི་མི་མཛད། རྟག་དུ་ཅོག་པུར་བཞུགས། གཉིས་ཚོགས་ཀྱི་ལོང་གཏམ་མི་བྱེད་པ་སྟེ་དམ་བཅའ་ཆེན་པོ་དྲུག་རྟག་དུ་དབེན་པ་བསྟེན། རས་རྐྱང་དང་ཞབས་རྗེན་མཛད་པ། ཟས་སྟན་གཅིག །དུས་གཏོར་དང་ཐུན་གཏོར་མ་ཆག་པ། བདེ་མཆོག་གི་སྐྱེད་རྫོགས་ཐུན་བཞིར་སྒོམ་པ། མཚམས་ཀྱི་དུས་མ་གཏོགས་སང་ཕན་ཆད་ལྡང་བ་མི་འཛིན་པ་སྟེ་ཞར་བྱུང་གི་དམ་བཅའ་དྲུག །འཛེ་སྤྲང་ཡན་ཆད་ཞེ་ནས་གོང་དུ་འཁུར་པ་ཁྱད་པར་གྱི་དམ་བཅའ་གཅིག་དང་(ན༦༡ན)
བཅུ་གསུམ་མཛད་པས་ཆོས་རྗེའི་ཞལ་ནས་སྟོན་པས་ཀྱང་ལོ་དྲུག་དཀའ་བ་མཛད་པ་ཡིན། ལོ་དྲུག་སྐྱོངས་ལ་དེ་ནས་ཅི་བདེར་མཛོད་གསུངས༌། ལོ་ངོ་བདུན་དུ་བསྟེན་གདམས་ངག་ཐམས་ཅད་རྫོགས། ཆོས་རྗེ་གཤེགས་ནས་ཁ་རག་གི་གངས། གནམ་མཚོ་སེ་མོ་དོ་སོགས་ལ་དཀའ་བ་མཐའ་ཡས་པ་སྤྱད་སྟེ་སྒྲུབ་པ་མཛད། གྲུབ་ཐོབ་དབུ་སེ་ན་མཁའ་ལ་བྱོན་སྟེ་ངའི་གདན་ས་མཚུར་ཕུ་ནས་བྱང་དུ་ཉིན་ལམ་གཅིག་གི་སར་དགོན་པ་ཐོབ། སེམས་ཅན་ལ་ཕན་ཞེས་ལུང་བསྟན་པས་དབུ་རི་བཏབ། གཙང་ཕྱོགས་སུ་འགྲོ་དོན་ཆེར་མཛད་ནས་ལྷོ་བྲག་ཁོ་ཐིང་ལྷ་ཁང་གི་ཞིག་པ་བསོས་ཅིང་སེང་གེ་རིར་དགུང་ལོ་རེ་བཞི་ལ་ཐེགས། དབོན་པོ་ཙཱ་རི་རས་ཆེན་དང་སངས་རྒྱས་དབོན་གྱིས་གདན་ས་བསྐྱངས་ཤིང་རྒྱུད་འཛིན་ཉང་སྟོད་པ་འཇམ་དབྱངས་མགོན་པོ་མཁས་ཤིང་གྲུབ་པ་དང༌། སྟོད་ལུང་པ་རྟོགས་ལྡན་མགོན་ཡེས་ཅེས་བྱ་བ་གྲུབ་ཐོབ་ཆེན་པོ་དེ་ལ་སོགས་པ་བྱོན་ལ། ཕྱིས་རྒྱལ་བ་ལོའི་སྐུ་སྐྱེར་གྲགས་པ་གཙང་ཆེན་ཆོས་ཀྱི་དབང་ཕྱུག་གིས་སླར་ཡང་དར་བར་མཛད་ནས་དགོན་གནས་རྣམས་ཞྭ་དམར་ཅོད་པན་འཛིན་པ་བཞི་པ་ལ་ཕུལ་སྟེ་བསྟན་པའི་ཆུ་བོ་དབྱེར་མེད་པར་གྱུར་ཏོ། །སྨད་འབྲུག་དུ་གྲགས་པའི་སྐབས་སྟེ་སྤྱིར་ཕག་གྲུ་བ་བཀའ་རྒྱུད་ཀྱི་སྐབས་སོ། །ཆོས་བྱུང་མཁས་པའི་དགའ་སྟོན་གྱི་ཡན་ལག་ཆེན་པོ་ལྔའི་ཡན་ལག་གསུམ་པ་བོད་ཀྱི་སྐབས་ལས་རྗེ་མར་མི་དྭགས་གསུམ་གྱི་བཀའ་རྒྱུད་རིན་པོ་ཆེ་ཡན་ལག་དང་བཅས་པ་སྤྱིར་བསྟན་པའི་ཆོས་བྱུང་སྟེ་ལེའུ་ཚན་བདུན་པའོ། །མར་མི་དྭགས་པོའི་བཀའ་རྒྱུད་རིན་ཆེན་གྱི། །བསྟན་འཛིན་ཡན་ལག་བཅས་པ་བྱུང་ཚུལ་འདི། །གནམ་གཤེགས་དཔལ་འབྱོར་བཟང་མོའི་དགོངས་རྫོགས་ཕྱིར། །ལྷོ་སྟོད་གནས་སུ་པར་དུ་བསྒྲུབས་པ་ཡི། །ཡིག་རྐོས་གཉིས་ཀྱི་བྱེད་པོ་གཡེ་པ་ཡིན། །དགེ་བས་འགྲོ་ཀུན་སྙིང་པོའི་དོན་རྟོགས་ཤོག །