བོད་ཀྱི་སྐབས།
༄། ཆོས་བྱུང་མཁས་པའི་དགའ་སྟོན་གྱི་ཡན་ལག་གསུམ་པ་བོད་ཀྱི་སྐབས་ལ་ལེའུ་བཅུ་ལས་དང་པོ་ཐུགས་རྗེ་ཆེན་པོས་བོད་བདག་གིར་མཛད་ཚུལ་བཞུགས།
རྒྱལ་དང་རྒྱལ་སྲས་ཀུན་གྱི་བརྩེ་ཆེན་ནི། །མངོན་སུམ་གཟུགས་ཀྱིས་ཞིང་ཀུན་ན་གསལ་བས། །འགྲོ་ཀུན་ཕན་བདེར་བྱེད་པོ་སྤྱན་རས་ཀྱིས། །རྟག་པར་ཀུན་ནས་གཟིགས་ལ་གུས་ཕྱག་འཚལ། །འཛམ་གླིང་བྱང་ཕྱོགས་མཐའ་འཁོབ་གངས་རིའི་ཁྲོད། །ཐེག་ཆེན་དར་བ་གདོང་དམར་བོད་ཀྱི་ཡུལ། །ཆུ་བོ་ལོ་ཧི་ཏ་ཡི་རྒྱུད་འདི་རུ། །རྒྱལ་བསྟན་བྱུང་ཚུལ་ད་ནི་བརྗོད་པར་བྱ། །སྟོན་པས་བྱང་ཆུབ་བརྙེས་ནས་སྟོང་གསུམ་དང༌། །ཤར་ནུབ་རྒྱ་མཚོའི་བར་དུ་ཞབས་ཀྱིས་བཅགས། །ཏི་སེའི་ཕྱོགས་བཞིར་སྟོན་པའི་ཞབས་རྗེས་ཡོད། །དེ་ཕྱིར་ལྷ་སོགས་མཆོག་གི་སྣང་བ་རུ། །བོད་ཡུལ་འདི་ཡང་སྟོན་པའི་ཞབས་ཀྱིས་བཅགས། །ཚུ་རོལ་མཐོང་བ་མི་ཡི་མཐུན་སྣང་དུ། །དངོས་སུ་གཤེགས་པའི་མཛད་པ་མ་བསྟན་ཕྱིར། །སྟོན་པའི་ཞབས་ཀྱིས་མ་བཅགས་འོད་ཀྱིས་ཁྱབ། །བྱིན་གྱིས་བརླབས་པའི་ཡུལ་ཞེས་གྲགས་པ་ཡིན། །རི་མཐོ་ས་གཙང་ཆུ་བསིལ་ཚད་པ་མེད། །སྦྲུལ་གདུག་སྟག་གཟིག་ཅེ་སྤྱང་དུག་སྦྲང་མེད། །འཛམ་གླིང་(ཆ༢ན)
ཆུ་བཞིའི་མགོ་བོ་གངས་ཅན་གནས། །ས་ལས་ལྕགས་རིས་རིན་ཆེན་སྣ་ལྔ་འབྱུང༌། །སྤང་ལྗོངས་མཚོ་དང་ཆུ་རྒྱུན་རབ་ཏུ་མང༌། །མུ་སྟེགས་མི་རྒྱུ་མི་ཀུན་ཐེག་ཆེན་མོས། །སྤྲུལ་པའི་ཆོས་རྒྱལ་ལྷ་ཡིས་མི་རྗེ་མཛད། །ལོངས་སྤྱོད་དམན་ཡང་འཛམ་གླིང་ཡུལ་གཞན་ལས། །དེ་ལྟའི་ཁྱད་ཆོས་དུ་མས་ཁྱད་པར་འཕགས། །འདས་པའི་སངས་རྒྱས་གསུམ་གྱིས་མ་ཐུལ་ཞིང༌། །ད་ལྟ་རྒྱལ་བས་ཆོས་འཁོར་མ་བསྐོར་བའི། །ཡུལ་འདི་སྤྱན་རས་གཟིགས་ཀྱི་གདུལ་བར་བསྟན། །སྔོན་ཚེ་སྟོན་པ་འོད་མའི་ཚལ་བཞུགས་ཚེ། །འཛུམ་པ་མཛད་པའི་འོད་ཀྱིས་བོད་ཡུལ་བཀང༌། །སྒྲིབ་སེལ་གྱིས་ནི་འཛུམ་པའི་རྒྱུ་ཞུས་ཚེ། །དུས་གསུམ་རྒྱལ་བའི་གདུལ་བྱར་མ་གྱུར་པ། །འདྲེ་སྲིན་གདུག་པ་དུ་མས་གང་བའི་ཡུལ། །མཐའ་འཁོབ་ཁ་བ་ཅན་གྱི་རྒྱལ་ཁམས་དེར། །མ་འོངས་དམ་ཆོས་ཉི་མ་ཤར་ལྟར་རྒྱས། །སེམས་ཅན་དེ་རྣམས་ཐར་པ་འཐོབ་པར་འགྱུར། །མཐའ་འཁོབ་དེ་ཡི་འདུལ་བའི་གཉེན་པོ་ནི། །སྤྱན་རས་གཟིགས་ཀྱི་དབང་ཕྱུག་ཁོ་ན་ཡིན། །སྔོན་ཚེ་སངས་རྒྱས་སྟོང་གི་སྤྱན་སྔ་རུ། །མཐའ་འཁོབ་གདུལ་དཀའི་སེམས་ཅན་དེ་དག་ཀུན། །བདག་གིས་ཐར་པའི་ལམ་དུ་འདུལ་གྱུར་ཅིག །འདྲེ་སྲིན་གདུག་པའི་སེམས་ཅན་དེ་རྣམས་ཀྱི། །སྐྱོབ་པའི་ཕ་མ་སྒྲོལ་བའི་དེད་དཔོན་དང༌། །མུན་པ་སེལ་བའི་སྒྲོན་མེར་བདག་གྱུར་ཅིག །དུས་གསུམ་རྒྱལ་བའི་དམ་ཆོས་གསུང་རབ་ཀུན། །མཐའ་འཁོབ་ཡུལ་དེར་དར་རྒྱས་གནས་གྱུར་ཅིག །སེམས་ཅན་དེ་རྣམས་རྒྱལ་བའི་མཚན་ཐོས་པས། །ལྷ་མིའི་ལུས་ཐོབ་དད་ཅིང་སྐྱབས་སུ་སོང༌། །དམ་པའི་ཆོས་ལ་ལོངས་སྤྱོད་(ཆ༢བ)
ཉིད་གྱུར་ཅིག །བདག་གིས་གང་ལ་གང་འདུལ་ཐབས་རྒྱ་མཚོས། །སེམས་ཅན་དེ་ཀུན་སྨིན་ཞིང་གྲོལ་བྱས་ནས། །མཐའ་འཁོབ་དེ་ནི་རིན་ཆེན་གླིང་ལྟ་བུར། །དམ་པའི་ཆོས་ཀྱིས་ཀུན་ནས་འབྱོར་བར་ཤོག །དེ་ཁོ་ན་ལྟར་ཤོག་ཅེས་སྨོན་ལས་བཏབ། །དེ་ཕྱིར་རྒྱལ་བ་གཞན་གྱིས་མ་ཐུལ་བ། །སྤྱན་རས་གཟིགས་ཀྱིས་ཐུལ་བའི་རྒྱུ་དེ་ཡིན། །དེ་ཚེ་རྒྱལ་བའི་ཐུགས་ཀ་ནས། །པད་དཀར་ལྟ་བུའི་འོད་ཟེར་བྱུང༌། །བདེ་བ་ཅན་གྱི་ཞིང་སོང་སྟེ། །འོད་དཔག་མེད་ཀྱི་ཐུགས་ཀར་ཐིམ། །དེ་ནས་བྱུང་སྟེ་བདུད་རྩིའི་མཚོ། །པད་མ་ཅན་དུ་ཞུགས་པར་གྱུར། །བདེ་བ་ཅན་གྱི་ཞིང་དེ་ནི། །མཉམ་ཞིང་ཤིན་དུ་རྣམ་པར་དག །བཻ་ཌུརྻ་ཡི་ས་གཞི་ལ། །གསེར་གྱིས་མིག་མང་རིས་སུ་བྲིས། །བདུད་རྩིའི་ཆུ་རྒྱུན་འཁྱིལ་ཞིང་འབབ། །ཡེ་ཤེས་གསལ་བའི་མེ་འོད་འབར། །རིན་ཆེན་བྱང་ཆུབ་ཤིང་གིས་གཏམས། །པདྨའི་སྦུབས་ལས་བརྫུས་སྟེ་སྐྱེ། །བསམ་གཏན་ཟས་ཀྱིས་རྟག་དུ་འཚོ། །ཚུལ་ཁྲིམས་དག་པའི་གོས་ཀྱིས་བཀླུབས། །རང་ལུས་འོད་ཀྱིས་འཇིག་རྟེན་སྣང༌། །ཐམས་ཅད་བཟོད་པའི་སྟོབས་དང་ལྡན། །ཀུན་ཀྱང་མྱང་འདས་བདེ་བ་ཆེ། །རྡོ་རྗེའི་ཚེ་ལ་མངའ་དབང་ཐོབ། །དེ་ཕྱིར་ཕལ་པའི་འབྱུང་བཞི་དང༌། །རྩི་ཤིང་གཞན་གྱི་མིང་ཡང་མེད། །མ་དག་སྐྱེ་བ་རྣམ་བཞིས་དབེན། །བཀྲེས་སྐོམ་འཐབ་རྩོད་ག་ལ་ཡོད། །ཉི་ཟླ་སྒྲོན་མེས་ཅི་ཞིག་བྱ། །ན་ཚ་སྡུག་བསྔལ་རྒ་ཤི་མེད། །ཁམས་གསུམ་འཁོར་བའི་ཉོན་མོངས་བྲལ། །སངས་རྒྱས་སྣང་བ་མཐའ་ཡས་ཀྱི། །ཆོས་ཀྱི་ལོངས་སྤྱོད་རྒྱུན་མི་ཆད། །དེ་ཚེ་པད་ཅན་མཚོ་དབུས་ནས། །པདྨ་གཞན་ཀུན་ཟིལ་གནོན་པའི། །པདྨའི་རྒྱལ་པོ་གཟི་འོད་ནི། །ཉི་ཟླ་འབུམ་ཕྲག་བསྡོམས་འདྲ་བྱུང༌། །ཀུན་ནས་བྱེ་ཞིང་རྒྱས་པའི་ཁོངས། །མཆོག་གི་སྤྲུལ་པའི་སེམས་དཔའ་ནི། །གངས་རིའི་ཕུང་པོ་བྱེ་བ་ལྟར། །དཀར་ཞིང་འོད་འཕྲོ་འཛུམ་བག་ཅན། །(ཆ༣ན)
ཞལ་གཅིག་ཕྱག་བཞི་རྒྱན་ཀུན་ལྡན། །ཞབས་གཉིས་རྡོ་རྗེའི་སྐྱིལ་ཀྲུང་མཛད། །རྩ་བའི་ཕྱག་གཉིས་ཐུགས་ཀའི་དབུས། །ཐལ་མོ་སྦྱར་ཞིང་ཞི་བར་གཟིགས། །གཡས་ཀྱི་འོག་མས་ཤེལ་དཀར་གྱི། །ཕྲེང་བ་འདྲེན་ཞིང་སྐྱེ་འགྲོ་འདུལ། །གཡོན་གྱི་འོག་མས་པད་དཀར་འཛིན། །སྙན་གྱི་ཐད་ཏུ་བྱེ་ཞིང་རྒྱས། །མཚན་དང་དཔེ་བྱད་མ་ལུས་བཀྲ། །ཨེ་ནྱའི་ལྤགས་པས་ཕྲག་གཡོན་བཀབ། །རལ་པའི་ཟུར་ཕུད་ལྔ་དང་ལྡན། །འགྲོ་ཀུན་སྙིང་རྗེའི་གསུང་དབྱངས་འབྱིན། །རྒྱལ་བའི་འོད་ཟེར་མ་གཏོགས་པ། །འོད་གཞན་མ་ལུས་ཟིལ་གནོན་པའི། །འོད་དང་འོད་ཟེར་འཕྲོ་བ་ཞིག །སྤྲིན་རུམ་ཕྱེ་བའི་ཉི་བཞིན་བྱུང༌། །རྒྱལ་པོ་བཟང་པོའི་མཆོག་གིས་བླངས། །དེ་ཚེ་འོད་དཔག་མེད་མགོན་གྱིས། །འདི་ནི་མི་འབྱེད་འཛམ་གླིང་གི །མཐའ་འཁོབ་ཁ་བ་ཅན་གྱི་ཡུལ། །འདུལ་བའི་སྤྲུལ་པའི་སྐུ་མཆོག་ཅེས། །སྤྱི་བོར་ཕྱག་གིས་བྱུགས་མཛད་དེ། །དུས་གསུམ་རྒྱལ་བའི་གདུལ་བྱར་མ་གྱུར་པ། །མཐའ་འཁོབ་ཁ་བ་ཅན་གྱི་སེམས་ཅན་རྣམས། །སྨོན་ལམ་མཐུ་ཡིས་ཁྱོད་ཀྱིས་འདུལ་འགྱུར་བ། །ལེགས་སོ་ལེགས་སོ་རིགས་ཀྱི་བུ་ཁྱོད་ལེགས། །ཁ་བ་ཅན་གནས་འགྲོ་ཀུན་གྱིས། ཁྱོད་མཐོང་ཡིག་དྲུག་སྒྲ་ཐོས་ནས། །མོད་ལ་ངན་སོང་ལས་ཐར་སྟེ། །མཐོ་རིས་ལུས་མཆོག་ཐོབ་གྱུར་ཅིག །འདྲེ་སྲིན་གདོན་བགེགས་ཤ་ཟའི་ཚོགས། །གཞན་གྱི་མདངས་འཕྲོག་སྲོག་གཅོད་པ། །ཀུན་གྱིས་ཁྱོད་མཐོང་ཡིག་དྲུག་ཐོས། །མོད་ལ་ཁྲོ་སྤངས་བྱམས་ལྡན་གྱུར། །གཅན་གཟན་མ་རུངས་གདུག་ཅིང་གཏུམ། །གཞན་གྱི་ཤ་ཁྲག་གིས་འཚོ་རྣམས། །ཁྱོད་མཐོང་ཡིག་དྲུག་ཐོས་པའི་མོད། །བུ་ལ་མ་ལྟར་བྱམས་ལྡན་འགྱུར། །བཀྲེས་སྐོམ་གྱིས་གཟིར་ཉམ་ཐག་རྣམས། །ཁྱོད་མཐོང་ཡིག་དྲུག་ཐོས་ཙམ་གྱིས། །བདུད་རྩིའི་ཆར་གྱིས་ལུས་(ཆ༣བ)
སེམས་ཚིམ། །ཏིང་འཛིན་ཟས་མཆོག་ཐོབ་པར་འགྱུར། །དབང་པོ་མ་ཚང་ནད་ཀྱིས་མནར། །མགོན་མེད་རྣམས་ཀྱིས་ཁྱོད་དྲན་པས། །ནད་བྲལ་དབང་ལུས་ཕུན་ཚོགས་པ། །མཐུ་སྟོབས་ལྡན་པའི་ལུས་གྱུར་ཅིག །ཁྱོད་ལུས་མཐོང་བ་ཙམ་གྱིས་ཀྱང༌། །འཆི་བ་རྣམས་ཀྱི་ཚེ་སྲིང་ཞིང༌། །ནད་ལྡན་ནད་ལས་ཐར་གྱུར་ཅིག །མགོན་མེད་རྣམས་ལ་སྐྱབས་མཆོག་གྱུར། །མཐའ་འཁོབ་ཁ་བ་ཅན་གྱི་ཡུལ་ཁམས་དེར། །ཡི་དམ་ལྷ་ཡི་སྐལ་བ་ཁྱོད་ཡིན་སྟེ། །ཡི་དམ་ཁྱོད་ལ་བརྟེན་ནས་མ་འོངས་དུས། །ཡུལ་དེར་སངས་རྒྱས་བྱང་སེམས་དཔག་མེད་འབྱུང༌། །སངས་རྒྱས་བསྟན་པ་དར་ཞིང་རྒྱས་པར་འགྱུར། །ཆོས་སྐལ་སྙིང་པོ་ཡིག་དྲུག་འདི་ཡིན་སྟེ། །སྙིང་པོ་འདི་ལ་བརྟེན་ནས་མ་འོངས་དུས། །ཤཱཀྱའི་རྒྱལ་པོའི་གསུང་རབ་དམ་ཆོས་ཀུན། །ཡུལ་དེར་དར་རྒྱས་མི་ཀུན་ཆོས་སྤྱོད་འགྱུར། །ཨོཾ་མ་ཎི་པདྨེ་ཧཱུྃ། གཟུང་སྔགས་རྒྱལ་པོ་ཡིག་དྲུག་འདི། །སངས་རྒྱས་ཀུན་གྱི་དགོངས་པའི་མཆོག །གཅིག་དུ་བསྡུས་པའི་བདག་ཉིད་ཡིན། །ཆོས་ཕུང་བརྒྱད་ཁྲི་བཞི་སྟོང་པོ། །གཅིག་དུ་བསྡུས་པའི་སྙིང་པོ་ཡིན། །བདེ་གཤེགས་རྒྱལ་བ་རིགས་ལྔ་དང༌། །གསང་བདག་རྡོ་རྗེ་འཛིན་རྣམས་ཀྱི། །ཡང་རྙིང་བསྡུས་པའི་གཟུངས་སྔགས་ཡིན། །ཡོན་ཏན་ཐམས་ཅད་འབྱུང་བའི་གནས། །དངོས་གྲུབ་ཀུན་གྱི་རྩ་བ་སྟེ། །མཐོ་རིས་ཐར་པའི་ལམ་ཆེན་ཡིན། །ཨོཾ་མ་ནི་པདྨེ་ཧཱུྃ། ཆོས་ཀུན་སྙིང་པོ་ཡིག་དྲུག་འདི། །ལན་གཅིག་མཐོང་བ་ཙམ་གྱིས་ཀྱང༌། །ཕྱིར་མི་ལྡོག་པའི་ས་འཐོབ་སྟེ། །འགྲོ་ཀུན་སྒྲོལ་བའི་དེད་དཔོན་འགྱུར། །ངན་སོང་གསུམ་དུ་ལྷུང་བས་ཀྱང༌། །ཐོས་ན་ལུས་དེ་བོར་མ་ཐག །བདེ་བ་ཅན་དུ་སྐྱེ་བར་འགྱུར། །ལན་གཅིག་ཙམ་ཞིག་དྲན་པས་ཀྱང༌། །གངས་ལ་ཉི་འོད་ཕོག་པ་ལྟར། །ལས་ངན་སྡིག་སྒྲིབ་སྲབ་མོར་བྱེད། །རེག་ན་རྒྱལ་བ་སྲས་བཅས་ཀུན། །(ཆ༤ན)
གཅིག་བསྡུས་དབང་བསྐུར་འཐོབ་པ་ཡིན། །ལན་གཅིག་རྣལ་འབྱོར་བྱས་པས་ཀྱང༌། །ཆོས་ཀུན་རྣམ་སངས་རྒྱས་རྟོགས་སྟེ། །འགྲོ་བ་སྒྲོལ་བའི་འཕྲིན་ལས་བྱེད། །བྲིས་སྟེ་ལུས་ལ་བཅངས་པ་ན། །དེ་ལུས་རྒྱལ་བའི་རིང་སྲེལ་ཡིན། །ནད་གདོན་ཀུན་ལས་རྣམ་པར་རྒྱལ། །གཟུངས་སྔགས་རྒྱལ་པོ་ཡིག་དྲུག་འདི། །རིན་པོ་ཆེ་དང་དར་ཟབ་ནས། །ཐ་ན་རྡོ་བའི་བར་བྲིས་ཀྱང༌། །ཆོས་ཀྱི་ཕུང་པོ་བརྒྱད་ཁྲི་དང༌། །བཞི་སྟོང་མ་ལུས་བྲིས་པ་སྟེ། །ཚེ་གཅིག་གིས་ཀྱང་བྱང་ཆུབ་འཐོབ། །རི་རབ་སྲང་ལ་གཞལ་བས་གྲངས་ཀྱང་ཆོད། །རྒྱ་མཚོའི་བྱེ་མ་འབྲུ་ནས་བགྲང་བར་ནུས། །རྒྱ་མཚོ་སྐྲ་རྩེས་གཏོར་བས་ཟད་ནུས་མོད། །འདི་ལན་གཅིག་བཟླས་བསོད་ནམས་བགྲང་མི་ནུས། །མཆུ་ཞེང་དཔག་ཚད་ལྔ་བརྒྱ་ཏིལ་གྱིས་བཀང༌། །ལོ་བརྒྱར་ཏིལ་རེ་ཕྱུང་ཡང་ཟད་པར་འགྱུར། །ཁོར་ཡུག་ནང་ཁོངས་ཞིང་གཅིག་དུ་གྱུར་པའི། །འབྲུ་ཀུན་རེ་རེ་ནས་ཀྱང་བགྲང་བར་ནུས། །འཛམ་གླིང་ཆུ་བོ་ལྔ་བརྒྱ་ཆུ་བྲན་བཅས། །རྒྱ་མཚོར་འབབ་བཞིན་འདི་ཡི་དགེ་བ་འཕེལ། །ཆུ་བོ་དེ་ཀུན་ཐིགས་པས་བགྲང་ནུས་མོད། །ལན་གཅིག་བརྗོད་པའི་བསོད་ནམས་ཚད་མི་ཟིན། །དུད་འགྲོ་ཀུན་གྱི་སྤུ་ཚོགས་རེ་རེར་འགྲོངས། །ཀ་ཤིའི་རས་ཀྱིས་རྡོ་རྗེའི་རི་རབ་ལ། །བསྐལ་རེར་ལན་རེ་ཕྱིས་ཀྱང་འཛད་འགྱུར་མོད། །འདི་ལན་གཅིག་བརྗོད་མཐུ་ཡང་དེ་ལྟ་མིན། །སྐྲ་རྩེའི་བརྒྱ་ཆས་རྒྱ་མཚོ་འཆིང་གནམ་ཆེ། །ཐིགས་པར་བྱས་པའི་ཚད་ཀྱང་གྲངས་ཀྱིས་ཟིན། །ལོ་གཅིག་ཆར་བབ་ཆར་ཐིགས་གྲངས་ཀྱིས་ཆོད། །ཡིག་དྲུག་ལན་གཅིག་བཟླས་པའི་མཐུ་མི་རྟོགས། །གླིང་བཞིའི་མི་རྣམས་རིང་སོང་ས་ཐོབ་པ། །དེ་ཀུན་བསོད་ནམས་ཕུང་པོ་གཅིག་བྱས་པ། །དེ་ལས་གང་གིས་ཡིག་དྲུག་ལན་གཅིག་ཙམ། །བརྗོད་པའི་བསོད་(ཆ༤བ)
ནམས་ཆེས་ཆེར་ཁྱད་པར་འཕགས། །སངས་རྒྱས་བྱེ་བ་འདུས་པས་བསྐལ་པའི་བར། །བསྟན་ཡང་ཕན་ཡོན་ཕྱོགས་རེའང་མི་རྫོགས་ན། །བདེ་བར་གཤེགས་པ་རེ་རེས་ལྟ་ཅི་སྨོས། །སྙིང་པོའི་དམ་པ་ཡི་གེ་དྲུག་འདི་ཡིས། །འགྲོ་རིགས་དྲུག་གི་སྡུག་བསྔལ་སོ་སོར་སེལ། །དྲི་མ་དྲུག་བསལ་ཕ་རོལ་ཕྱིན་དྲུག་རྫོགས། །སངས་རྒྱས་ཀུན་གྱི་སྙིང་པོ་གཅིག་གྱུར་པའོ། །དེ་ཚེ་སངས་རྒྱས་ཐམས་ཅད་ཀུན། །འདུས་སྟེ་དབང་སྐུར་དམ་པ་ཡིས། །སྤྱན་རས་གཟིགས་མཆོག་དེ་དབང་བསྐུར། །འགྲོ་ཀུན་འདུལ་བའི་འཕྲིན་ལས་ལ། །དབང་ཕྱིར་སྣང་མཐའ་འོད་དཔག་མེད། །གཙུག་གི་ནོར་བུ་ལྟ་བུར་མཛེས། །ཕྱོགས་བཅུའི་སངས་རྒྱས་ཐམས་ཅད་ཀྱིས། །མགྲིན་གཅིག་བསྔགས་ཤིང་ཤིས་པ་བརྗོད། །རྒྱལ་སྲས་ཀུན་གྱིས་འདུད་ཅིང་མཆོད། །སླར་ཡང་འོད་དཔག་མེད་མགོན་གྱིས། །ཕན་ཡོན་དཔག་དུ་མ་མཆིས་ཤིང༌། །དུས་གསུམ་སངས་རྒྱས་ཐམས་ཅད་ཀྱི། །འཕྲིན་ལས་གཅིག་དུ་གནས་པ་ཡི། །སྙིང་པོ་ཡི་གེ་དྲུག་པ་འདིས། །ཁ་བ་ཅན་གྱི་མཐའ་འཁོབ་དེར། །འགྲོ་ཀུན་སྨིན་ཞིང་གྲོལ་བར་གྱིས། །དམ་ཆོས་དར་ཞིང་རྒྱས་པར་འགྱུར། །དེ་ལྟར་དབུགས་དབྱུང་ལུང་བསྟན་ཚེ། །སྤྱན་རས་གཟིགས་ཀྱི་དབང་ཕྱུག་དེ། །པུས་བཙུགས་ཐལ་སྦྱར་འདི་སྐད་དུ། །གསོལ་ཞིང་རང་དམ་རང་གིས་བཅས། །བདག་གིས་སེམས་ཅན་གཅིག་ཀྱང་མ་ལུས་པར། །བླ་མེད་བྱང་ཆུབ་མཆོག་དུ་གཟུང་བར་བགྱི། །འགྲོ་ཀུན་བྱང་ཆུབ་ཆེ་ལ་མ་འཁོད་པར། །རང་ཉིད་ཞི་བདེའི་བསམ་པ་སྐྱེས་པ་ན། །སངས་རྒྱས་མ་ལུས་བདག་གིས་བསླུས་པའི་ཕྱིར། །མགོ་བོ་ཨ་རྫྷ་ཀ་ཡི་དོག་པ་ལྟར། །ཚལ་པ་བཅུར་གས་པད་མའི་འདབ་མ་ལྟར། །ལུས་ཀྱང་རྣམ་པ་སྟོང་དུ་བྱེ་གྱུར་ཞེས། །སྙིང་རྗེས་བདེན་ཚིག་སྨོན་ལམ་མཛད་པར་གྱུར། །དེ་ཡི་འཕྲིན་ལས་ནམ་མཁའི་མཐའ། །དཔོག་ནུས་འཇིག་(ཆ༥ན)
རྟེན་ཀུན་ན་མེད། །འོན་ཀྱང་རང་གི་དད་པའི་རྒྱུས། །མདོ་སྡེའི་རྒྱལ་པོ་ཟ་མ་ཏོག །བཀོད་པ་ལས་བྱུང་ཕྱོགས་འགའ་ཞིག །མདོར་བསྡུས་ཅུང་ཟད་བརྗོད་པར་བྱ། །མནར་མེད་དམྱལ་བའི་ལྕགས་ཀྱི་ཁང༌། །འབར་བའི་མེ་སྤུང་གཅིག་གྱུར་ཀྱང༌། །མུན་པའི་རང་བཞིན་སྣང་བ་མེད། །འགྲོ་ཚོགས་གྲངས་མེད་སྲེག་ཅིང་འཚེད། །ལྷུན་པོའང་ཐལ་བར་བྱེད་པ་དེར། །ལྷ་རྣམས་དགའ་བའི་ཚལ་འཇུག་ལྟར། །སྤྱན་རས་གཟིགས་ཀྱི་དབང་པོ་ནི། །སྙིང་རྗེས་ཚམ་ཚོམ་མེད་པར་ཞུགས། །ཡི་གེ་དྲུག་པའི་སྒྲ་ཆེན་བསྒྲགས། །དེ་ནི་ཉེ་བར་སོང་ཙམ་གྱིས། །དམྱལ་བའི་མེ་རྣམས་རང་སར་ཞི། །ཙནྡན་ལྟ་བུར་བསིལ་བར་གྱུར། །ཆུ་གཙང་ཡན་ལག་བརྒྱད་ལྡན་རྫིང༌། །པདྨ་ཨུཏྤ་ལ་ཡིས་ཁེབས། །དམྱལ་བའི་སྣོད་རྣམས་གས་ཤིང་ཞིག །དམྱལ་བ་པ་རྣམས་སྡུག་བསྔལ་ཞི། །དེ་ནས་ལུས་སེམས་ཚིམ་བཞིན་དུ། །ལྟོས་ཤིག་སྐྱེས་བུ་འདོད་པའི་གཟུགས། །ལྟ་བས་མི་ངོམས་འདི་མཐོང་བས། །བདག་ཅག་དབུགས་ཕྱིན་གྱུར་ཏོ་ཞེས། །ཕན་ཚུན་སྨྲ་ཞིང་སྐད་ཅིག་གིས། །རྩ་གསུམ་ལྷ་ཡི་ནང་དུ་སྐྱེས། །ཕྱིར་མི་ལྡོག་པ་ཐོབ་པར་གྱུར། །དམྱལ་སྲུང་གཤིན་རྗེའི་སྐྱེས་བུ་ཀུན། །སྐྲག་ཅིང་འཇིགས་པས་མཚོན་བོར་ནས། །གཤིན་རྗེའི་རྒྱལ་པོའི་དྲུང་སོང་སྟེ། །ལྷ་གཅིག་དམྱལ་བའི་གནས་འདིར་ནི། །སྔོན་མེད་མི་དགེའི་ལྟས་བྱུང་བ། །སྐྱེས་བུ་ལྟ་ན་འདོད་པའི་གཟུགས། །རྒྱན་ཀུན་གྱིས་བརྒྱན་ཅོད་པན་འཕྱང༌། །དེ་འདྲ་ཞིག་ནི་འོངས་མ་ཐག །དམྱལ་བའི་ཟ་མ་ཏོག་རྣམས་གས། །མེ་ཞི་བསིལ་བའི་རྫིང་བུར་གྱུར། །སྲོག་ཆགས་དེ་རྣམས་མི་སྣང་སྟེ། །བདག་ཅག་རྣམས་ཀྱི་ལས་ཀྱི་ས། །འདི་པ་མཁྱེན་བར་མཛོད་ཅེས་སོ། །གཤིན་རྗེའི་རྒྱལ་པོས་འདི་ལྟ་བུ། །སུ་ཡི་མཐུ་སྙམ་བརྟགས་པ་ན། །ཚངས་སོགས་ལྷ་རྣམས་ཀུན་གྱི་ནང༌། །དེ་འདྲའི་མཐུ་ཡོད་(ཆ༥བ)
མ་མཐོང་ནས། །དམྱལ་བའི་ནང་དུ་བལྟས་པ་ན། །སྤྱན་རས་གཟིགས་དབང་བཞུགས་པར་མཐོང༌། །གཤིན་རྗེའི་རྒྱལ་པོས་ལུས་བཏུད་དེ། །དེ་ཞབས་ཡང་ཡང་གཙུག་བླངས་ནས། །ཡོན་ཏན་མཆོག་གིས་རྒྱ་ཆེར་བསྟོད། །སྤྱན་རས་གཟིགས་ཀྱི་དབང་པོ། དབང་ཕྱུག་ཆེན་པོ། དམ་པ་ལ་དགྱེས་པ། དམ་པ་སྩོལ་བ་དབང་དུ་མཛད་པ། སའི་སྤྱན་དམ་པ་མཛད་པ། དབུགས་འབྱིན་པར་མཛད་པ། ཕྱག་བརྒྱ་ཕྲག་སྟོང་བ། སྤྱན་བྱེ་བ་ཕྲག་བརྒྱ་སྟོང་པ། དབུ་བཅུ་གཅིག་པ་རྒོད་པའི་བཞིན། ལྟ་བའི་མཐར་ཕྱིན་པའི་ཆོས་ལ་དགྱེས་པ། སེམས་ཅན་ཐམས་ཅད་ཡོངས་སུ་ཐར་བར་མཛད་པ། རུས་སྦལ་དང་ཆུ་སྲིན་དང་ཉ་རྣམས་དབུགས་འབྱིན་པར་མཛད་པ། ཡེ་ཤེས་ཀྱི་ཕུང་པོ་དམ་པ་ལ་མངའ་མཛད་པ། དགའ་བ་སྩོལ་བ་རིན་པོ་ཆེའི་དཔལ་དམ་པ། མནར་མེད་པ་ཀུན་སྐེམ་པར་མཛད་པ། ཡེ་ཤེས་ཀྱི་དཔལ་གྱིས་བརྒྱན་པ་ཡེ་ཤེས་ལ་དགྱེས་པ། ལྷ་ཐམས་ཅད་ཀྱི་མཆོད་པ་ཕྱག་འཚལ་བ་བཀུར་སྟི་དགྱིད་པ། མི་འཇིགས་པ་སྩོལ་བ་ཕ་རོལ་ཏུ་ཕྱིན་པ་དྲུག་སྟོན་པར་མཛད་པ། ཉི་མ་ལྟ་བུའི་སྤྱན་མཆོག་མཛད་པ། ཆོས་ཀྱི་སྒྲོན་མེ་མཛད་པ། ཇི་ལྟར་དགྱེས་པའི་གཟུགས་ཀྱི་གཟུགས་མཆོག་དྲི་ཟའི་གཟུགས་དང་ལྡན་པ། གསེར་གྱི་རིའི་གཟུགས་དང་མཚུངས་པ། རྒྱ་མཚོ་འཆིང་གནམ་གྱི་ཁོངས་བཞིན་དུ་ཟབ་པ། དོན་དམ་པའི་རྣལ་འབྱོར་རྗེས་སུ་ཐོབ་པ་བདག་གི་ཞལ་སྟོན་པར་མཛད་པ། ཏིང་ངེ་འཛིན་བརྒྱ་སྟོང་དུ་མ་དང་ལྡན་པ་མངོན་པར་དགྱེས་པར་མཛད་པ། སྐུ་བརྒྱན་པ་སྐྱེས་བུ་ཁྱུ་མཆོག །ཁུང་སྒོ་དང་ཁོང་སྒྲིལ་དང་འཕྲུལ་འཁོར་གྱི་ལམ་ལས་ཡོངས་སུ་ཐར་བར་མཛད་པ། སྲིད་པ་ཐམས་ཅད་དང་མ་འབྲེལ་བ། འཁོར་མང་པོ་འབྱུང་བར་འགྱུར་བའི་ཕྲིན་ལས་བསགས་པ། ཡིད་བཞིན་གྱི་ནོར་བུ་རིན་པོ་ཆེ་མཛད་པ། མྱ་ངན་ལས་འདས་པའི་ལམ་སྟོན་པར་མཛད་པ། (ཆ༦ན)
ཡི་དྭགས་ཀྱི་གྲོང་ཁྱེར་སྐེམ་པར་མཛད་པ། སྐྱེ་བོ་ལ་གདུགས་སུ་གྱུར་པ། ནད་ལས་ཡོངས་སུ་ཐར་བར་མཛད་པ། ཀླུའི་རྒྱལ་པོ་དགའ་བོ་དང་བསྙེན་དགའ་བོས་མཆོད་ཕྱིར་ཐོགས་བྱས་པ། དོན་ཡོད་པར་འགྱུར་བའི་ཞགས་པ་སྟོན་པར་མཛད་པ། སྔགས་བརྒྱ་ཕྲག་དུ་མ་དང་ལྡན་པ། ལག་ན་རྡོ་རྗེ་སྐྲག་པར་མཛད་པ། འཇིག་རྟེན་གསུམ་པོ་སྐྲག་པར་མཛད་པ། གནོད་སྦྱིན་དང་སྲིན་པོ་དང་འབྱུང་པོ་དང་ཤ་ཟ་དང་ཕྲ་མེན་ཕོ་དང་ཕྲ་མེན་མོ་དང་རོ་ལངས་དང་གྲུལ་བུམ་དང་རྗེད་བྱེད་རྣམས་སྐྲག་པར་མཛད་པ། སྤྱན་ཨུཏྤལ་སྔོན་པོ་ལྟ་བུ། རིག་པའི་རྒྱལ་པོ་ཉོན་མོངས་པ་ཐམས་ཅད་ལས་གྲོལ་བར་མཛད་པ། ལམ་སྣ་ཚོགས་ལས་ཟློག་པ་ཐར་པ་དམ་པ་ལ་གཞུག་པ་སྐུ་ལ་བྱང་ཆུབ་ཀྱི་ལམ་བསགས་པ་ཡི་དྭགས་ཡོངས་སུ་ཐར་བར་མཛད་པ། ཏིང་ངེ་འཛིན་རྡུལ་ཕྲ་རབ་ལྟ་བུ་བརྒྱ་སྟོང་དང་ལྡན་པ་ལ་ཕྱག་འཚལ་ལོ། །སྤྱན་རས་གཟིགས་དབང་མཆོག་དེ་ཡང༌། །ཡི་དྭགས་གྲོང་ཁྱེར་ཆེན་པོར་སོང༌། །ཀེང་རུས་བསྒྲེངས་འདྲ་མགལ་དུམ་ལུས། །ལྟོ་ཆེན་མགྲིན་པ་ཕྲ་བ་ཡི། །ཡི་དྭགས་དཔག་མེད་མདུན་ན་རྒྱུག །འབར་བའི་གྲོང་ཁྱེར་གསིལ་གྱུར་ཞིང༌། །རྡོ་རྗེའི་སེར་བ་རབ་ཏུ་ཞི། །སྲུང་མ་རྣམས་ཀྱང་བྱམས་པ་ཐོབ། །ཕྱག་སོར་ཞབས་སོར་ཉི་ཤུ་ལས། །བདུད་རྩིའི་ཆུ་བོ་རེ་རེ་ཕབ། །བ་སྤུའི་ཁུང་བུ་ཀུན་ནས་ཀྱང༌། །ཡན་ལག་བརྒྱད་ལྡན་ཆུ་བྱུང་སྟེ། །ཡི་དྭགས་ཀུན་གྱིས་འཐུངས་ཙམ་གྱིས། །ཁ་དང་མགྲིན་པ་ཡངས་པར་གྱུར། །ལུས་ཡོངས་རྫོགས་ཤིང་བཀྲེས་སྐོམ་ཞི། །ཡི་གེ་དྲུག་པའི་ཆོས་ཐོས་པས། །འཇིག་ལྟའི་རི་བོ་བཅོམ་ནས་ནི། །བདེ་བ་ཅན་དུ་སོང་བར་གྱུར། །དེ་ལྟར་སྐད་ཅིག་རེ་རེས་ཀྱང༌། །ངན་འགྲོའི་གནས་ཀུན་སྟོངས་པར་མཛད། །དེ་ཚེ་ཤཱཀྱའི་དབང་པོས་བསྔགས་མཛད་དེ། །སྤྱན་རས་གཟིགས་ཀྱི་དབང་པོའི་སྤོབས་པ་གང༌། །དེ་འདྲ་དེ་(ཆ༦བ)
བཞིན་གཤེགས་པ་རྣམས་ལའང་མེད། །སྔོན་ཚེ་རྫོགས་པའི་སངས་རྒྱས་ལྷག་མཐོང་ལས། །ང་ནི་ཁྱེ་འུ་སྤོས་ཀྱི་བཞིན་གྱུར་པས། །སྤྱན་རས་གཟིགས་ཀྱི་ཡོན་ཏན་བརྗོད་པ་ཐོས། །མིག་གཉིས་ལས་ནི་ཉི་མ་ཟླ་བ་བྱུང༌། །དཔྲལ་བའི་དབྱེས་ནས་ལྷ་ཆེན་དབང་ཕྱུག་སྟེ། །ཕྲག་པའི་ལྷུན་ལས་ཚངས་པ་ཆེན་པོ་བྱུང༌། །སྙིང་ལས་ཁྱབ་འཇུག་མཆེ་བ་ལས་ལྷ་མོ། །ཁ་ལས་རླུང་ལྷ་རྐང་ལས་ས་ཡི་ལྷ། །ལྟོ་བ་ལས་ནི་ཆུ་ཡི་ལྷ་བྱུང་ཚེ། །རྒྱལ་བ་དེ་ཡིས་དབང་ཕྱུག་ཆེ་བོས་ནས། །མ་འོངས་པ་ན་ངན་པའི་དུས་བྱུང་ཚེ། །ཁྱོད་ནི་འཇིག་རྟེན་བྱེད་པོར་གྲགས་པར་འགྱུར། །སེམས་ཅན་དེ་དག་བྱང་ཆུབ་ལམ་སྤངས་སྟེ། །ནམ་མཁའི་འདི་ནི་དབང་ཕྱུག་ཆེན་པོའི་རྟགས། །ས་ནི་ཁྲི་ཡིན་སེམས་ཅན་ཀུན་གྱི་གནས། །དེ་ནི་ཞི་ཞིང་རྟག་ཅེས་ལྟ་ངན་འཛིན། །བྱིས་པ་བླུན་པོ་དུ་མ་བསླུ་འགྱུར་གསུངས། །གཞན་ཡང་རྒྱལ་བ་གཙུག་ཏོར་ཅན་གྱི་ཚེ། །ང་ནི་བྱང་སེམས་སྦྱིན་པའི་དཔལ་དུ་འགྱུར། །ཞིང་དེ་གཞན་འཕྲུལ་དབང་བྱེད་ལྟ་བུར་འགྱུར། །ས་ཆེན་གཡོ་ཞིང་པདྨའི་ཆར་མང་འབབ། །བདེ་བ་ཅན་གྱི་འོད་དཔག་མེད་དྲུང་ནས། །སྤྱན་རས་གཟིགས་དབང་ཞིང་འདིར་འོང་བའི་ལྟས། །སེམས་དཔའ་ཆེ་དེ་གང་དུ་འོང་བར་ཡང༌། །ཆོས་ཉིད་ཀྱིས་ནི་འདི་ལྟར་སྣང་ངོ་གསུངས། །དེ་ནས་དཀར་ཞིང་ཞི་བའི་གཟུགས་ཅན་ཞིག །གསེར་གྱི་པདྨ་རྒྱས་པ་འཛིན་པས་ལྷགས། །རྒྱལ་ལ་ཕུལ་ནས་བསྙུན་གསོལ་སྨེད་པར་བྱེད། །མནར་མེད་ལ་སོགས་ཚ་བའི་དམྱལ་བ་བརྒྱད། །ཤལ་མ་ལི་སོགས་ཉེ་འཁོར་གནས་པ་དང༌། །གྲང་དམྱལ་བརྒྱད་དང་ཡི་དྭགས་འགྲོ་བ་ཀུན། །བདག་གི་ལས་ཀྱི་ས་སྟེ་དེར་སྐྱེས་རྣམས། །སྒྲོལ་ཞིང་སྨིན་བྱེད་བྱང་ཆུབ་ཆེར་འགོད་ཅེས། །མཆིད་ལན་གསོལ་སྟེ་གློག་བཞིན་མི་སྣང་གྱུར། །སྤྱན་རས་གཟིགས་དེའི་བསོད་ནམས་ཕ་མཐའ་ཡས། །(ཆ༧ན)
དེ་འདྲ་དེ་བཞིན་གཤེགས་པ་རྣམས་ལའང་མེད། །རྒྱལ་བ་ཀུན་གྱིས་བགྲང་བར་ཡོང་མི་ནུས། །དེ་ཡི་མཚན་ཙམ་རྗེས་སུ་དྲན་བྱེད་ནའང༌། །དེ་དག་བདེ་བ་ཀུན་དང་ལྡན་པ་ཡིན། །རྒ་ནད་འཆི་བའི་སྡུག་བསྔལ་ཀུན་ལས་ཐར། །དེ་དག་ལུས་དེ་འཁོར་བའི་མཐའ་མ་ཡིན། །གོས་གཙང་དཀར་ལྟར་ཡོན་ཏན་ཚོན་གྱིས་འཛིན། །ངང་པའི་རྒྱལ་པོ་རབ་ཏུ་མགྱོགས་པ་དང༌། །རླུང་གི་ཤུགས་ལྟར་བདེ་བ་ཅན་དུ་འགྲོ། །དེ་བཞིན་གཤེགས་པ་སྣང་བ་མཐའ་ཡས་མཐོང༌། །དངོས་སུ་ཆོས་ཐོས་འཁོར་བའི་སྡུག་བསྔལ་སྤོང༌། །དུག་གསུམ་མི་འགྱུར་རྒ་ཤིར་མི་འགྱུར་རོ། །བཀྲེས་སྐོམ་མི་འབྱུང་ཕྱིན་ཆད་མངལ་མི་གནས། །ཆོས་ཀྱི་རོས་བསྐྱོད་ཞིང་མཆོག་དེ་ཉིད་དུ། །སྤྱན་རས་གཟིགས་ཀྱི་ཡི་དམ་བརྟན་པོ་ནི། །ཡོངས་སུ་རྫོགས་དང་འགྲོ་ཀུན་མ་ཐར་བར། །དག་པའི་འཇིག་རྟེན་དེ་ན་འཛིན་ཞིང་གནས། །སྤྱན་རས་གཟིགས་ཀྱི་དབང་པོ་དམ་པ་དེ། །འཁོར་བའི་སེམས་ཅན་རྒྱ་མཚོ་མ་ལུས་པ། །ཡོངས་སུ་སྨིན་བྱེད་བྱང་ཆུབ་ལམ་རབ་སྟོན། །གང་གང་གཟུགས་ཀྱིས་དེ་དེ་འདུལ་འགྱུར་བ། །དེ་དང་དེ་ལ་གཟུགས་དེས་ཆོས་སྟོན་སྟེ། །རྫོགས་སངས་རྒྱས་ཀྱིས་འདུལ་ལ་སངས་རྒྱས་གཟུགས། །དེ་བཞིན་རང་རྒྱལ་དགྲ་བཅོམ་བྱང་སེམས་དང༌། །དབང་ཕྱུག་ཆེན་པོ་མཐུ་ཆེན་ཚངས་བརྒྱ་བྱིན། །ཉི་མ་ཟླ་བ་མེ་དང་རླུང་གི་ལྷ། །ཆུ་ལྷ་ཀླུ་དང་བགེགས་རྒྱལ་གནོད་སྦྱིན་དང༌། །ངལ་སོས་པོ་དང་རྒྱལ་པོ་ཕ་མ་སོགས། །ཇི་ལྟར་འདུལ་བའི་གཟུགས་དེས་ཆོས་སྟོན་ཏོ། །དེར་ཡང་སེམས་ཅན་ཡོངས་སུ་སྨིན་བྱས་ནས། །མྱ་ངན་འདས་པའི་ས་རབ་སྟོན་པར་བྱེད། །རེ་ཞིག་འཛམ་བུའི་གླིང་འདི་ཉིད་ན་ཡང༌། །རྡོ་རྗེའི་མངལ་ཞེས་བྱ་བའི་ཕུག་པ་ཡོད། །ལྷ་མིན་བྱེ་བ་ཁྲག་ཁྲིག་བརྒྱ་སྟོང་གནས། །དེ་ན་སྤྱན་རས་གཟིགས་ཀྱི་དབང་པོ་ནི། །ལྷ་མིན་གཟུགས་ཀྱིས་ཐེག་པ་ཆེན་པོའི་མདོ། །དཀོན་མཆོག་རྒྱལ་པོ་ཟ་མ་ཏོག་འདི་འཆད། །དེ་དག་(ཆ༧བ)
བྱམས་དང་ཞི་བས་དམ་ཆོས་ཉན། །མདོ་སྡེའི་དམ་པ་འདི་ཐོས་བདེ་དང་ལྡན། །ཐོས་པས་མཚམས་མེད་ལྔ་དག་ཟད་པར་བྱེད། །འཆི་བའི་ཚེ་ཡང་སངས་རྒྱས་བཅུ་གཅིག་འབྱོན། །རིགས་ཀྱི་བུ་ཁྱོད་ཚུར་ཤོག་མ་འཇིགས་ཤིག །ཁྱོད་ཀྱིས་ཟ་མ་ཏོག་གི་མདོ་སྡེ་ཐོས། །བདེ་བ་ཅན་གྱི་ལམ་ཡང་ལྟ་གོན་བྱས། །གདུགས་དང་རྒྱལ་མཚན་རྣ་ཆ་སེ་མོ་དོའི། །རྣམ་གྲངས་དག་ཀྱང་འདིར་ནི་ལྟ་གོན་བྱས། །ཚུར་ཤོག་ཅེས་གསུངས་དབུགས་འབྱིན་མཛད་པར་འགྱུར། །དེ་ལྟའི་ལྟས་འབྱུང་འཆི་བའི་དུས་ཀྱི་ཚེ། །བར་ཆད་མེད་པར་བདེ་བ་ཅན་དུ་འགྲོ། །དེ་ལྟར་ལྷ་མིན་ཆོས་ཀྱིས་འདུལ་བ་ཡོད། །གཙུག་ཏོར་ཅན་གྱི་རྒྱལ་བ་དེ་འདས་ནས། །ཐམས་ཅད་སྐྱོབ་ཅེས་བྱ་བའི་སངས་རྒྱས་བྱུང༌། །དེ་ཚེ་ང་ནི་བཟོད་པ་སྨྲ་བར་གྱུར། །རྒྱལ་བ་ཐམས་ཅད་སྐྱོབ་དེས་སྤྱན་རས་གཟིགས། །དབང་པོའི་ཡོན་ཏན་རྒྱ་ཆེར་བརྗོད་པ་ཐོས། །དེ་ནི་གསེར་གྱི་ས་གཞིར་སོང༌། །སེམས་ཅན་སྤྱིའུ་ཚུགས་རྣམས་ལ། །འཕགས་ལམ་ཡན་ལག་བརྒྱད་པ་བསྟན། །དངུལ་གྱི་ས་གཞིར་སོང་ནས་ཀྱང༌། །སྐྱེས་བུ་རྐང་བཞི་པ་རྣམས་ལ། །མདོ་སྡེ་ཟ་མ་ཏོག་བསྟན་པས། །ཕྱིར་མི་ལྡོག་པའི་ས་ལ་བཀོད། །གང་ན་ལྕགས་ཀྱི་ས་གཞི་ནི། །ལྷ་མིན་སྟོབས་ལྡན་གནས་པར་སོང༌། །རྒྱལ་ལ་བསོད་སྙོམས་ཕུལ་བ་ཡི། །བསོད་ནམས་ཕུང་པོའི་ཆོས་སྒོ་བཤད། །དེ་ཚེ་ལྷ་མིན་དབང་པོ་དེ། །ངུད་མོ་འབྱིན་བཞིན་གསོལ་བར་བྱེད། །སྟོབས་ལྡན་བདག་ནི་སླས་བཅས་པས། །དུས་མིན་སྦྱིན་པ་བྱས་པ་ཡིས། །ཚེ་འདི་ཉིད་དུ་བཅིངས་པ་ཐོབ། །ཐམས་ཅད་མཁྱེན་པ་ལ་དམིགས་ནས། །སྙིམ་པ་གང་གི་ས་གཏོར་ཡང༌། །འབྲས་བུ་འདུད་རྩིར་འགྲུབ་གྱུར་ན། །བདག་གིས་ཞིང་ངན་ལ་བྱིན་པའི། །འབྲས་བུ་མྱོང་འདི་ལགས་པ་ལྟ། །བདག་གིས་མཆོད་སྦྱིན་བཀང་ས་བཤམས། །ཤིང་རྟ་བ་ལང་རྟ་ཡི་ཐེག །(ཆ༨ན)
རིན་ཆེན་དཔག་མེད་ཀྱིས་གཡོགས་པ། །རེ་རེའང་སྟོང་ཕྲག་དུ་མ་བཤམས། །བུ་མོ་གཞོན་ནུ་རེ་རེ་ཡང༌། །རིན་ཐང་མེད་པའི་རྒྱན་འཆང་བ། །ལྟ་ན་མཛེས་པ་སྟོང་ཕྲག་བཀོད། །རིན་ཆེན་ཁྲི་དང་ཁྲི་འུ་དང༌། །སྣ་ཚོགས་རིན་ཆེན་གོས་དང་རྒྱན། །རེ་རེའང་རི་ལྟར་སྤུངས་པ་བཀོད། །ལྷ་ཡི་ཟས་སྐོམ་རྒྱ་ཆེར་སྦྱར། །བྲམ་ཟེ་འབུམ་ཕྲག་དུ་མ་དང༌། །རྒྱལ་རིགས་འབུམ་ཕྲག་འདུས་གྱུར་སྟེ། །ས་ཆེན་འདི་ནི་གདུགས་གཅིག་བཞིན། །བདག་གིས་རྒྱལ་པོ་བགྱིས་པར་གྱུར། །བདག་གིས་སྡིག་པར་མ་འཚལ་ནས། །རྒྱལ་པོ་ཡི་ནི་ཆུང་མ་རྣམས། །སྙིང་གར་དྲལ་སྟེ་ཁྱེ་འུ་དང༌། །བུ་མོ་གཞོན་ནུ་མང་སྲོག་བཅད། །ཁ་ཤ་བན་དྷ་པ་ལ་སོགས། །རྒྱལ་རིགས་ཆེ་རྣམས་ཁུང་སྒོ་དང༌། །ལྕགས་སྒྲོག་གིས་ནི་ཡན་ལག་བཅིངས། །རྒྱལ་རིགས་འབུམ་ཕྲག་དུ་མ་རྣམས། །ཟངས་ཀྱི་བྲག་ཕུག་ནང་དུ་བསྩལ། །དེ་ལ་ཆབ་སྒོ་བདུན་མཆིས་སྟེ། །དང་པོ་ཤིང་ལས་བགྱིས་པ་ལགས། །དེ་བཞིན་སེང་ལྡེང་འཁར་བ་དང༌། །ཟངས་ལྕགས་དངུལ་དང་གསེར་ལས་བགྱིས། །སྒོ་འཕར་དེ་དག་ཀུན་བཅད་དེ། །གསེར་གྱི་སྒོ་དེར་རི་བོ་བདུན། །བརྩེགས་སྟེ་བཞག་པས་རྣམ་པར་བཀག །ཐོག་མའི་སྒྲིབ་པ་དེ་ཀུན་ནི། །ཁྱེད་ཀྱི་སྤྱན་སྔར་མཐོལ་ཞིང་བཤགས། །ད་དུང་བདག་གིས་མཐུ་བོ་ཆེ། །ཤིང་རྟ་བཅུ་པའི་བུ་འཚོལ་ཕྱིར། །གདུགས་རེ་ཞིང་དུ་སྦྲང་བུ་དང༌། །བོང་བུ་ཕག་དང་མི་སོགས་སུ། །གཟུགས་བསྒྱུར་འཇིག་རྟེན་ཀུན་བཙལ་ཡང༌། །དེ་ནི་མཐོང་བར་མ་གྱུར་ནས། །མཆོད་སྦྱིན་དགྱིད་པར་བརྩམས་པའི་ཚེ། །ཤིང་རྟ་བཅུ་པའི་བུ་འོངས་ནས། །སྒོ་རྣམས་དྲལ་སྟེ་རི་བདུན་བོར། །རྒྱལ་རིགས་བཙོན་དུ་བཅིངས་རྣམས་བཀྲོལ། །བདག་ནི་ཕོ་བྲང་ཁྲིར་འཁོད་ཚེ། །ཟླ་བའི་གླིང་ནས་སློང་བའི་ཕྱིར། །འོངས་ཞེས་བྲམ་ཟེ་མི་འུ་ཐུང༌། །སྨྱིག་མའི་འཁར་བ་ཅན་ཞིག་འོངས། །དེ་ཚེ་དྲང་སྲོང་པ་བ་སངས། །(ཆ༨བ)
བདག་གི་མཁན་པོར་གྲགས་པས་གནས། །པ་བ་སངས་ཀྱིས་བདག་བོས་ནས། །འདིར་ནི་དུས་ཀྱི་སྐྱེས་བུ་འོངས། །ཁྱོད་ཀྱིས་ཤེས་པར་གྱིས་ཤིག་ཟེར། །བྲམ་ཟེ་དེས་ཀྱང་དེ་མ་ཐག །བདག་ཁར་སྭ་ར་སྭ་སྟི་བཅུག །ཅི་འདོད་སློངས་ཞེས་བརྗོད་པའི་ཚེ། །ས་ནི་གོམ་པ་གཉིས་གསོལ་ཟེར། །ཁྱོད་ཀྱིས་གོམ་པ་གཉིས་བསླངས་ན། །བདག་གིས་གོམ་པ་གསུམ་སྦྱིན་སྨྲས། །དེས་ཀྱང་བདག་གིས་བསླང་བ་བསླངས། །བཀྲ་ཤིས་སོ་ཞེས་བརྗོད་བྱས་ནས། །ཆུ་རྒྱུན་ཏིལ་དང་གསེར་བཅས་བསླངས། །པ་སངས་བདག་ལ་འདི་སྐད་དུ། །རྒྱལ་པོ་དྲང་སྲོང་ཁྱོད་ཀྱིས་ནི། །བདག་གི་ཚིག་ལ་མ་ཉན་པས། །ལས་དེའི་འབྲས་བུ་མྱོང་གྱིས་ཟེར། །དེ་མ་ཐག་དུ་ཁྱབ་འཇུག་དེས། །མི་འུ་ཐུང་གཟུགས་མི་སྣང་བྱས། །ལུས་ནི་ཆེན་པོར་བསྒྱུར་བ་དང༌། །ཉི་ཟླ་དེ་ཡི་ཕྲག་པར་གནས། །ལག་ན་མཚོན་མང་ཐོགས་པར་མཐོང༌། །དེ་ཡིས་གོམ་པ་གཉིས་བོར་བས། །ས་ཆེན་འདི་ནི་རབ་ཏུ་མནན། །གོམ་པ་གཉིས་ནི་འདི་ཡིས་ཚང༌། །ད་ནི་གསུམ་པ་བྱིན་ཅིག་ཟེར། །གསུམ་པ་མ་མཆིས་ཞེས་སྨྲས་པས། །ཁོ་བོས་བསླང་བ་བསླངས་ཟིན་གྱིས། །ང་ཡིས་གང་དུ་བཞག་པ་དེར། ལྷ་མིན་ཁྱོད་ནི་འདུག་ཅིག་ལོ། །བདག་ནི་སྡུག་བསྔལ་དྲན་ཉམས་སྟེ། །བཀའ་བསྩལ་དེ་བཞིན་དགྱིད་ཅེས་སྨྲས། །ཁྱབ་འཇུག་མཐུ་བོ་ཆེ་དེ་ཡིས། །བདེན་པའི་ཞགས་པས་བདག་བཅིངས་སྟེ། །འཇིག་རྟེན་གྱི་ནི་བྱེད་པོ་བཞིན། །བདག་ནི་ས་ཡི་འོག་དུ་བཞག །མཆོད་སྦྱིན་གནས་བཤིག་ཡོ་བྱད་རྣམས། །རྒྱལ་རིགས་དེ་དག་རྣམས་ཀྱིས་སྤྱད། །དེ་བས་ལྷ་མིན་སྟོབས་ལྡན་བདག །ཐབས་མ་འཚལ་བས་གནས་མིན་གྱི། །སྦྱིན་པས་བཅིངས་པ་ཐོབ་པར་གྱུར། །ཀྱེ་མ་ལས་ལ་ཕྱག་འཚལ་སྙམ། །རང་གི་ལས་ལ་སེམས་ཤིང་འདུག །དེ་བས་བདག་གིས་ངན་པ་ཡི། །ཞིང་ལ་བྱིན་ཞེས་གསོལ་ལགས་སྟེ། །ཕྱག་ན་པདྨ་བཟང་པོ་ཐོགས་པས་སྐྱབས་མཛོད་ཅིག །(ཆ༩ན)
པདྨའི་དཔལ་གྱིས་བརྒྱན་པ་རལ་པའི་ཅོད་པན་ཅན། །ཐམས་ཅད་མཁྱེན་པས་དབུ་བརྒྱན་འགྲོ་ཀུན་དབུགས་འབྱིན་མཛད། །དམན་དང་ཕོངས་ལ་ཐུགས་བརྩེ་པད་མའི་སྤྱན་བཟང་པོ། །ས་ཡི་སྤྱན་མཆོག་སྨན་པའི་རྒྱལ་པོའི་མཆོག་གྱུར་པ། །སེམས་ཅན་ཤིན་དུ་དག་པ་རྣལ་འབྱོར་རབ་ཐོབ་ཅིང༌། །ཐར་མཆོག་ཐར་པ་ལ་དགྱེས་ཡིད་བཞིན་ནོར་བུ་འདྲ། །ཆོས་མཛད་ཡོངས་སུ་སྐྱོང་མཛད་ཕ་རོལ་ཕྱིན་དྲུག་སྟོན། །བསམ་པ་ལེགས་པར་བྱེད་པ་ཁྱོད་ལ་བདག་ཕྱག་འཚལ། །སྤྱན་རས་གཟིགས་དབང་ཁྱོད་མཚན་གང་གིས་དྲན་བྱེད་པའི། །སེམས་ཅན་དེ་དག་བདེ་བ་དམ་པར་ལྡན་པ་ལགས། །དམྱལ་བ་ཀུན་དང་ཡི་དྭགས་གྲོང་ཁྱེར་དུ་སྐྱེས་པ། །གང་དག་ཁྱོད་མཚན་རྗེས་སུ་དྲན་བྱེད་དེ་དག་ནི། །ངན་སོང་སྡུག་བསྔལ་ཆེ་ལས་ཡོངས་སུ་ཐར་བ་ལགས། །ཁྱོད་མཚན་རྗེས་སུ་དྲན་བྱེད་སེམས་ཅན་དེ་དག་ནི། །བསམས་པ་ལེགས་ལྡན་བདེ་བ་ཅན་གྱི་འཇིག་རྟེན་འགྲོ། །དེ་བཞིན་གཤེགས་པ་འོད་མཐའ་ཡས་ལས་ཆོས་ཉན་འགྱུར། །དེ་ལྟར་བསྟོད་ཅིང་འདུད་པ་ཡི། །ལྷ་མིན་དབང་པོ་དབུགས་འབྱིན་ཕྱིར། །སྤྱན་རས་གཟིགས་ཀྱིས་ལུང་བསྟན་པ། །ཁྱོད་ནི་བདེ་གཤེགས་རྫོགས་སངས་རྒྱས། །ལྷ་མིན་དབང་པོའི་དཔལ་ཞེས་འགྱུར། །ལྷ་མིན་ཐམས་ཅད་བྱང་ཆུབ་འདུལ། །ཁྱོད་འཚང་རྒྱ་བའི་ཞིང་དེ་ན། །དུག་གསུམ་སྒྲ་མེད་ཡིག་དྲུག་གི །རིག་པའི་རྒྱལ་པོ་འཐོབ་པར་འགྱུར། །དེ་ལྟར་ལུང་བསྟན་ལྷ་མིན་དབང་པོ་ཡིས། །ཆོས་ཀྱི་དགབ་པར་མུ་ཏིག་སེ་མོ་དོ། །སྟོང་ཕྲག་འདོམ་ལྡན་རིན་ཐང་མེད་པ་དང༌། །ཅོད་པན་རིན་ཆེན་ཀུན་གྱིས་བརྒྱན་པ་ཕུལ། །སླར་ཡང་སྤྱན་རས་གཟིགས་ཀྱིས་ཆོས་བསྟན་པ། །ལྷ་མིན་རྒྱལ་པོ་ཆེན་པོ་ཁྱོད་ཉོན་ཞིག །མི་རྟག་པ་ཡི་རང་བཞིན་དངོས་རྣམས་ལ། །རྟག་དུ་ལེན་སེམས་ལོངས་སྤྱོད་ཡིད་ལ་བྱེད། །བྲན་དང་བྲན་མོ་ལས་མི་ནོར་དང་འབྲུ། །མཛོད་དང་བང་བ་(ཆ༩བ)
བུ་དང་བུ་མོ་དང༌། །ཆུང་མ་དང་ནི་ཕ་མར་ཞེན་པ་ཡི། །སེམས་ཅན་དེ་དག་མི་ཤེས་གཏི་མུག་སྟེ། །དེ་དག་རྨི་ལམ་མི་ཤེས་འཁྲུལ་བ་འདྲ། །འཆི་བའི་ཚེ་ཡང་སྐྱབས་བྱེད་སུ་ཡང་མེད། །སྲོག་བྲལ་ཚེ་ཡང་འཛམ་གླིང་ལོག་པར་མཐོང༌། །ཆུ་ཆེན་པོ་ཡང་རྣག་ཁྲག་གིས་གང་མཐོང༌། །ལྗོན་ཤིང་ལ་ཡང་འབར་བའི་ཕུང་པོར་སྣང༌། །མཐོང་ནས་སྐྲག་འགྱུར་གཤིན་རྗེའི་སྐྱེས་བུ་ཡིས། །ཞགས་པས་བཅིངས་ནས་ངན་འགྲོར་འཁྲིད་པར་འགྱུར། །སྤུ་གྲིའི་སོ་ཡི་ལམ་གྱིས་རྐང་པ་ཆད། །བཏེག་ཚེ་རྐང་པ་སར་པ་གཞན་འབྱུང་འགྱུར། །བྱ་རོག་བྱ་རྒོད་ཀུ་ར་ར་དང་ཁྱི། །དུ་མས་ཟ་ཞིང་དམྱལ་བའི་སྡུག་བསྔལ་མྱོང༌། །སྤུ་གྲིའི་སོ་ཡི་ལམ་ཆེན་དེ་འདས་ནས། །རྐང་པ་རེ་རེ་ལ་ཡང་བཅུ་དྲུག་གི །སོར་ཚད་ལྕགས་ཀྱི་ཚེར་མ་ལྔ་བརྒྱ་འཛུག །བདག་གིས་སྡིག་པ་ཅི་ཞིག་བྱས་ཞེས་འཁང༌། །དེ་ཚེ་གཤིན་རྗེ་རྣམས་ཀྱིས་འདི་སྐད་སྒྲོག །སྔོན་ཚེ་རྒྱལ་ལ་མཆོད་པ་མ་བྱས་ཤིང༌། །ཡོན་གནས་རྣམས་ལ་བསོད་སྙོམས་མ་ཕུལ་ལོ། །གཎྜི་བརྡུང་བའི་སྒྲ་ཡང་མ་ཐོས་སོ། །སྐུ་གཟུགས་མཆོད་རྟེན་སྐོར་བ་མ་བྱས་ཞེས། །སྤྱོས་ཤིང་བརྒྱད་བཀག་སླར་ཞིང་སྡུག་བསྔལ་བས། །ཀྱེ་མ་བདག་ཅག་མ་དད་སྡིག་པ་ཅན། །དཀོན་མཆོག་གསུམ་གྱིས་སྤངས་པར་གྱུར་ཏོ་ཅེས། །སྨྲེ་སྔགས་འདོན་ཚེ་གཤིན་རྗེའི་སྐྱེས་བུ་ཡིས། །ལས་དེའི་འབྲས་བུ་འདི་ཡིན་མྱོང་གྱིས་ཞེས། །གཤིན་རྗེའི་རྒྱལ་པོའི་དྲུང་དུ་ཁྲིད་པའི་ཚེ། །དེང་ལ་ལས་ཀྱི་ས་རྣམས་འདི་ལ་སྟོན། །རྣམ་པར་སྨིན་པ་ཡོད་མེད་ལྟོས་ཤིག་བསྒོ། །དེ་ནས་ཐིག་ནག་དམྱལ་བ་ཆེན་པོར་བཅུག །ཤག་ཏི་བརྒྱ་དང་སུམ་བརྒྱ་བཏབ་པས་ཀྱང༌། །ཤི་བར་མ་གྱུར་དེ་ཚེ་མེ་འོབས་འཛུད། །དེ་ནས་ལྕགས་ཐོ་བསྲེགས་པ་ཁར་བཅུག་པས། །མཆུ་ཚིག་སོ་ཆག་རྐན་གས་ནང་རོལ་ཀུན། །འུར་འུར་གཅིག་དུ་འབར་ཞིང་ལུས་ཀུན་འཚིག །དེ་བས་རྒྱལ་པོ་འཇིག་རྟེན་འདི་ན་ནི། །སྐྱབས་སུ་གྱུར་པ་གཞན་ཡོད་མ་ཡིན་སྟེ། །ནན་(ཆ༡༠ན)
ཏན་དུ་ནི་བསོད་ནམས་གསག་པར་གྱིས། །དེ་ལྟར་བསྟན་ནས་སྤྱན་རས་གཟིགས་དབང་དེ། །གང་ན་ས་ཕྱོགས་མུན་པ་མུན་ནག་གནས། །ལྷ་དང་མི་རྣམས་མི་རྒྱུའི་ཕྱོགས་སུ་སོང༌། །གླིང་དེར་ཉི་མ་ཟླ་བ་མི་སྣང་སྟེ། །ནོར་བུ་མཆོག་སྦྱིན་ཞེས་བྱས་སྣང་བ་བྱེད། །དེ་ན་གནོད་སྦྱིན་སྲིན་པོ་བརྒྱ་སྟོང་གནས། །དེ་དག་ཟ་མ་ཏོག་གི་མདོ་སྡེས་བཏུལ། །མདོ་འདིའི་ཚིགས་སུ་བཅད་པ་གཅིག་ཁོ་ན། །ཉན་འཛིན་སེམས་པའི་བསོད་ནམས་གཞལ་དུ་མེད། །རྒྱ་མཚོའི་ཆུ་ཐིགས་ས་གཞིའི་ཕྲ་རབ་རྡུལ། །གྲངས་ཀྱིས་ཟིན་མོད་མདོ་སྡེ་འདི་འཛིན་པའི། །བསོད་ནམས་དམ་པ་གཞལ་དུ་ཡོད་མ་ཡིན། །གླིང་བཞིའི་ཁྱིམ་གྱི་རྣམ་པ་ཇི་སྙེད་པ། །དེ་སྙེད་ལྷ་རྫས་གཙུག་ལག་ཁང་བྱས་སྟེ། །རེ་རེར་རིན་ཆེན་མཆོད་རྟེན་རིང་སྲེལ་ཅན། །སྟོང་སྟོང་ཉིན་རེར་བགྱིས་པའི་དགེ་བ་ནི། །མདོ་སྡེ་འཛིན་པའི་བསོད་ནམས་ཆ་གཅིག་འགྱུར། །གངྒཱ་བཅུ་གཉིས་བྱེ་སྙེད་རྒྱལ་བ་ཡིས། །བཅུ་གཉིས་བསྐལ་པར་མདོ་སྡེ་འདི་འཛིན་པའི། །བསོད་ནམས་ཕུང་པོ་རྗོད་ཀྱིས་མི་ལང་ན། །ང་གཅིག་འདི་ན་གནས་པས་སྨོས་ཅི་དགོས། །མདོ་འདི་ཡི་གེར་བྲིས་སམ་འབྲིར་བཅུག་པ། །ཆོས་ཕུང་བརྒྱད་ཁྲི་བཞི་སྟོང་བྲིས་པ་སྟེ། །འཁོར་ལོས་སྒྱུར་བའི་བདེ་བ་དུ་མར་མྱོང༌། །མདོ་འདིའི་མིང་ཙམ་འཛིན་ཡང་སྲིད་ལས་ཐར། །ག་ལ་ག་ལར་སྐྱེ་བ་དེ་ཀུན་དུ། །ཚེ་རབས་དྲན་འགྱུར་དེ་ཡི་ལུས་ལ་ནི། །ཙནྡན་རྒྱལ་པོ་ས་མཆོག་དྲི་ངད་ལྡང༌། །ཁ་ནས་ཨུཏྤལ་སྔོན་པོའི་དྲི་བསུང་སྤྲོ། །ལུས་ཡོངས་རྫོགས་ཤིང་སྟོབས་ཆེན་ཤུགས་ལྡན་འགྱུར། །དེ་ལྟར་བསྟན་པས་མུན་ཁམས་འགྲོ་དེ་ཀུན། །ཕྱིར་འོང་དང་ནི་ཕྱིར་མི་འོང་ལ་བཀོད། །སྤྱན་རས་གཟིགས་དེ་སྐད་ཅིག་ཡུད་ཙམ་གྱིས། །གནས་གཙང་ལྷ་ཡི་གནས་སུ་སོང་བར་གྱུར། །(ཆ༡༠བ)
དེ་ན་རྣ་ཆའི་མཆོག་ཅེས་ལྷ་ཡི་བུ། །ཤིན་དུ་དབུལ་བ་ཞིག་གནས་དེ་དྲུང་དུ། །བྲམ་ཟེའི་གཟུགས་ཀྱིས་བསོད་སྙོམས་སློང་མོ་སྤྱད། །དེ་ཡིས་བདག་ལ་ཅང་མ་མཆིས་ཞེས་སྨྲས། །བདག་ལ་ཅུང་ཟད་སྩོལ་ཞེས་སྨྲས་པ་ན། །ལྷ་དེས་བདག་གི་གཞལ་མེད་ཁང་སོང་སྟེ། །ཅི་བདོག་ལྟ་བར་བརྩམས་ཚེ་སྣོད་ཐམས་ཅད། །ལྷ་ཡི་ནོར་བུ་རིན་ཐང་མེད་པས་གང༌། །སྣོད་གཞན་རོ་མཆོག་ལྡན་པའི་བདུད་རྩིས་གཏམས། །གཡོན་ཕྱོགས་ཁང་པ་གོས་རྒྱན་གྱིས་གང་མཐོང༌། །བདག་གིས་དེང་དུས་འདི་ལྟའི་དཔལ་ཐོབ་པས། །བདག་གི་སྒོ་ན་སྣོད་བཟང་བདོག་གོ་སྙམ། །བྲམ་ཟེ་བོས་སྟེ་བདུད་རྩིའི་ཟས་མཆོག་བྱིན། །ལྷ་ཡི་རིན་ཆེན་དུ་མ་བསྟབས་པ་ལས། །དེ་ཡིས་བདེ་ལེགས་བཀྲ་ཤིས་བྱས་པར་གྱུར། །ལྷ་དེས་བྲམ་ཟེ་ཁྱོད་ནི་ག་ལས་འོངས། །ས་དེ་ཅི་འདྲ་ཁྱོད་ནི་སུ་ཞིག་དྲིས། །ང་ནི་ཛེ་ཏའི་ཚལ་ནས་འོངས་པ་སྟེ། །ས་དེ་དགའ་བྱེད་ཡོན་ཏན་དཔག་དུ་མེད། །རྒྱལ་བ་ཐམས་ཅད་སྐྱོབ་པ་ཞེས་བྱ་བཞུགས། །ང་ནི་ལྷ་མིན་མི་དང་ལྷ་མིན་མིན། །ཕོངས་དང་དབུལ་ལ་ལྷག་པར་བརྩེ་ལྡན་པ། །བྱང་ཆུབ་ལམ་སྟོན་བྱང་ཆུབ་སེམས་དཔའ་ཡིན། །ལྷ་དེས་ནོར་བུའི་ཅོད་པན་དང༌། །རྣ་ཆ་ཕུལ་སྟེ་ཆེད་བརྗོད་པ། །ཨེ་མ་ཧོ་ཡོན་ཏན་དག་གི་ཞིང༌། །ཉེས་པ་ཐམས་ཅད་རྣམ་པར་སྤངས། །དེ་རིང་ཉིད་དུ་ས་བོན་བཏབ། །དེ་རིང་ཉིད་དུ་འབྲས་བུ་གྲུབ། །སྤྱན་རས་གཟིགས་དབང་དེ་ཡང་ནི། །སྲིན་མོ་གནས་པའི་གླིང་ཞིག་སོང༌། །སྐྱེས་བུ་ལྟ་ན་མི་ངོམས་པ། །འདོད་པའི་གཟུགས་སུ་བསྟན་བྱས་པས། །སྲིན་མོ་དེ་རྣམས་རབ་ཆགས་སྟེ། །བདག་ཅག་ལུས་དང་ལོངས་སྤྱོད་ཀུན། ཁྱོད་ལ་དབུལ་གྱིས་བཞེས་སུ་གསོལ། །བདག་ཅག་མགོན་སྐྱབས་དཔུང་གཉེན་གླིང༌། །རྟེན་གནས་མཛོད་ཅེས་གསོལ་བ་འདེབས། །(ཆ༡༡ན)
དེས་ཀྱང་བདག་གིས་བསྒོ་བ་བཞིན། །བྱེད་ན་དང་དུ་བླང་ངོ་བརྗོད། །དེ་དག་བཀའ་བཞིན་སྒྲུབ་པར་བྱས། །ཡན་ལག་བརྒྱད་ལྡན་ལམ་བསྟན་ཞིང༌། །ཞལ་ནས་གསུངས་པའི་གཞི་དག་ཀྱང༌། །ཁ་ཐོན་བྱེད་དུ་བཅུག་པ་ཡིས། །དེ་དག་འབྲས་བུའི་གནས་ལ་བཀོད། །ཕྱིན་ཆད་སྲིན་མོའི་ཚུལ་སྤངས་སྟེ། །དམ་པའི་སྡོམ་པས་བསྡམས་སྟེ་གནས། །དེ་ནས་ཝ་ར་ན་སིའི་འགྲམ། །བཤང་གཅིའི་གནས་ན་སྲིན་བུའི་རིགས། །བརྒྱ་སྟོང་དུ་མ་གནས་པར་སོང༌། །བུང་བའི་གཟུགས་སུ་སྤྲུལ་ནས་ནི། །སྒྲ་ནི་བུང་བུང་ཕྱུང་བ་ལས། །སངས་རྒྱས་ཕྱག་འཚལ་ལོ་ཞེས་བརྗོད། །དེ་དག་རྣ་བར་ཐོས་ཙམ་གྱིས། །སངས་རྒྱས་རྗེས་སུ་དྲན་གྱུར་སྟེ། །འཇིག་ལྟའི་རི་བོ་བཅོམ་ནས་ནི། །བདེ་བ་ཅན་གྱི་འཇིག་རྟེན་སོང༌། །སྤོས་དྲི་ཞིམ་པ་ཞེས་བྱ་བའི། །བྱང་ཆུབ་སེམས་དཔར་མིང་མཐུན་གྱུར། །དེ་ནས་མ་ག་ངྷ་འདས་པ། །དགོན་པ་ཆེན་པོའི་གནས་སུ་སོང༌། །དེ་ན་ལོ་གྲངས་ཉི་ཤུའི་བར། །དགོན་པར་གནས་པའི་སེམས་ཅན་ཚོགས། །གཅིག་གིས་གཅིག་ཟ་མང་གཟིགས་སྟེ། །ཐོག་མར་ལྷ་ཡི་ཆུ་ཡི་ཆར། །ཕབ་པས་རབ་ཏུ་ངོམས་པར་བྱས། །ལྷ་ཡི་ཟས་ཀྱི་ཆར་ཕབ་པས། །ཚིམ་ཚེ་འབྲུ་དང་འདོད་རྒུའི་ཆར། །ཕབ་པས་རབ་ཏུ་ཚིམ་པའི་ཚེ། །དེ་དག་འདུས་ནས་གཅིག་ལ་གཅིག །འདི་འདྲ་ལྷ་གང་ཞིག་གི་མཐུ། །དེ་ཚེ་དེ་ན་ཆེས་རྒན་པ། །རྒུར་པོ་བ་ལང་སྣ་ལྟར་གྱུར། །བརྒྱ་སྟོང་ལོ་ལོན་ཞིག་གནས་པས། །བཅོམ་ལྡན་སྤྱན་རས་གཟིགས་ཀྱི་དབང༌། །མ་གཏོགས་ལྷ་གཞན་གང་གི་ཡང༌། །མཐུ་འདི་འདྲ་བར་མི་འགྱུར་རོ། །མུན་པར་གྱུར་ལ་སྒྲོན་མེ་ཉི་མས་འཚིག་ལ་གདུགས། །སྐོམ་གྱིས་གདུངས་ལ་ཆུ་སྟེ་སྐྲག་པའི་དབུགས་འབྱིན་མཛད། །ནད་ཀྱིས་གདུངས་ལ་སྨན་པ་ཉམ་ངའི་ཕ་མར་གྱུར། །མནར་མེད་སྐྱེས་པ་རྣམས་ལ་མྱ་(ཆ༡༡བ)
ངན་འདས་ལམ་སྟོན། །སྤྱན་རས་གཟིགས་དེའི་ཡོན་ཏན་རྒྱ་ཆེན་དེ་ལྟ་ཡིན། །དེ་ཡི་མཚན་ཙམ་སུས་དྲན་པ། །དེ་ནི་འཇིག་རྟེན་འདི་ན་དཀོན། །དེ་ནི་འཁོར་བའི་མཐའ་མ་ཡིན། །བཅོམ་ལྡན་འདས་དེ་ལ་དམིགས་ནས། །རྟག་དུ་མེ་ཏོག་སྤོས་འབུལ་བ། །དེ་ནི་བྱང་ཆུབ་སེམས་དཔར་འགྱུར། །མནྜལ་ཕུལ་ན་འཁོར་སྒྱུར་འཐོབ། །མེ་ཏོག་ཕུལ་བས་དྲི་ཞིམ་ཞིང༌། །མདངས་བཟང་ལུས་ཡོངས་རྫོགས་པར་འགྱུར། །དེ་ལྟར་བསྟན་སྟེ་རང་གནས་སོང༌། །སྤྱན་རས་གཟིགས་དབང་དམ་པ་ཡང༌། །འོང་བའི་ལྟས་ཆེན་ངོ་མཚར་བ། །རྒྱལ་སྲས་གཞན་ལ་མེད་པའི་ཆོས། །དཔག་ཡས་ཕུལ་བྱུང་ངོ་མཚར་གྱིས། །ཛེ་ཏའི་ཚལ་ཀུན་བཀང་བྱས་ནས། །རྒྱལ་བ་ཐམས་ཅད་སྐྱོབ་དྲུང་སོང༌། །རྒྱལ་བས་བསྔགས་ཤིང་རླབས་ཆེན་གྱི། །སྤྱོད་པ་རྒྱ་མཚོ་དེ་ཐོས་པས། །རྒྱལ་སྲས་མ་ལུས་ངོ་མཚར་གྱུར། །འདི་ནི་རྣམ་པར་སྣང་བྱེད་འདོད་བྱེད་ལ་སོགས་པ། །ཏིང་འཛིན་མཐའ་ཡས་གཞལ་དུ་མེད་པ་ལྡན་པ་སྟེ། །སྤུ་ཁུང་རེ་ནའང་ཏིང་འཛིན་བརྒྱ་སྟོང་དུ་མ་གནས། །འདི་ཡི་བསོད་ནམས་ཡེ་ཤེས་དེ་ལྟར་དཔག་དུ་མེད། །ཚོགས་ཆེན་དེ་ལྟ་དེ་བཞིན་གཤེགས་ལའང་མ་མཆིས་ན། །བྱང་ཆུབ་སེམས་དཔར་གྱུར་པ་དག་ལ་ལྟ་ཅི་སྨོས། །ལེགས་པར་ཉོན་ཞིག་སྔོན་བྱུང་ཚེ། །ང་ནི་ཚོང་དཔོན་ཞིག་དུ་གྱུར། །དེ་ཚེ་ཚོང་པ་ལྔ་བརྒྱར་བཅས། །སིངྒྷའི་གླིང་དུ་ཚོང་ལ་སོང༌། །ཟོང་མང་བཞོན་པས་བསྐྱས་བྱས་སྟེ། །གྲོང་དང་གྲོང་ཁྱེར་གྲོང་བརྡལ་ལྗོངས། །ཚོང་འདུས་མང་པོ་རྣམས་བརྒྱུད་ནས། །རྒྱ་མཚོའི་གྲུ་བོ་ཆེ་ལ་ཞུགས། །གྲུ་ཡི་གདོས་པ་འཛིན་པ་ལ། །ཅི་ཀོ་རིན་ཆེན་གླིང་ལོགས་སམ། །ནས་ཀྱི་གླིང་ངམ་སིངྒྷའི་གླིང༌། །འོན་སྟེ་སྲིན་མོའི་གླིང་དུའམ། །གང་གི་ཕྱོགས་སུ་རླུང་ལངས་དྲིས། །དེས་ཀྱང་སིངྒྷའི་གླིང་ལོགས་སུ། །(ཆ༡༢ན)
གསེར་མ་ལངས་ཀྱིས་ལྷ་ཁྱོད་ཀྱིས། །མཁྱེན་པར་མཛོད་ཅེས་བདག་ལ་སྨྲས། །དེ་ནས་གྲུ་ཆེན་དུ་ཞུགས་སྟེ། །དར་ཆེན་རབ་ཏུ་འཕྱར་ནས་སོང༌། །འདིར་གཞན་དག་གིས་སྨྲས་པ། །གནམ་སྔོན་ཞུ་བ་འཁྱིལ་འདྲ་བཻ་ཌཱུརྻ། །སྔོན་པོའི་གུར་གྱིས་ཕྱོགས་ཀུན་གཏམས་པ་བཞིན། །དབུ་བའི་དོ་ཤལ་ཆིལ་ཆིལ་སྒྲ་ལྡན་པ། །མུ་ཏིག་དོ་ཤལ་ཀུན་ནས་བཀྲམ་པ་བཞིན། །ཉ་ཆེན་སྣ་ཚོགས་འཕྱོང་ཞིང་འཁྱུག་པ་ནི། །སྒྱུ་མའི་མཁན་པོས་སྤྲུལ་པ་བྱས་པ་བཞིན། །མི་བརྟན་པ་རྣམས་འདི་ཀོ་རྨི་ལམ་མམ། །མངོན་སུམ་ཉིད་ཅེས་སོམ་ཉིའི་ཁྱོགས་ལ་འཕྱང༌། །རབ་ཡངས་ཕ་མཐའ་མི་མངོན་མཚོ་ཆེན་དེ། །ཡངས་པའི་མཁའ་དང་དབྱེར་མེད་གྱུར་པའི་ནང༌། །ཉི་ཟླ་གཟའ་སྐར་འཁོར་བ་སྙམ་དུ་བྱེད། །དེ་སྟེང་གྲུ་ཆེན་ནང་ན་གཞལ་མེད་ཁང༌། །རྒྱན་མང་གིས་སྤྲས་རྒྱལ་མཚན་བ་དན་འཕྱར། །རྟ་མཆོག་མཚོ་ཆེན་བརྒལ་བའི་དབྱིབས་ཀྱིས་འགྲོ། །རེས་འགའ་རླབས་ཀྱི་རི་བོའི་རྩེར། །ནམ་མཁའི་དབྱིངས་སུ་ཕྱིན་པ་སྙམ། །རེས་འགའ་རླབས་ཀྱི་གཤོང་བུ་རུ། །གཏིང་དུ་ནུབ་པ་སྙམ་དུ་བྱེད། །རེས་འགའ་ཉ་ཆེན་རུས་སྦལ་ཆེ། །རི་བོ་འདྲ་བས་འདེགས་པ་སྙམ། །འདིས་ནི་འཁོར་བའི་རྒྱ་མཚོའི་ནང༌། །མི་ཡི་གྲུ་བཟང་རྙེད་དཀའ་བ། །རྙེད་པའང་སྣ་ཚོགས་རྐྱེན་མང་པོས། །མི་བརྟན་གཡོ་འདི་མཚོན་ནམ་སྙམ། །བར་སྐབས་ཀྱི་ཚིགས་བཅད་དོ། །དེ་ཚེ་སིངྒྷའི་གླིང་གནས་པའི། །སྲིན་མོ་གདུག་སེམས་ལྡན་རྣམས་ཀྱི། །རེ་བའི་རྒྱལ་མཚན་གཡོས་པ་ལས། །འཛམ་གླིང་ཚོང་པ་འོང་ངོ་ཞེས། །དུས་མིན་རླུང་ཆེན་བཏང་བ་ཡིས། །གྲུ་དེ་དུམ་བུ་དུམ་བུར་ལྷགས། །ཚོང་པ་དེ་རྣམས་བརྐྱལ་བ་ཡིས། །ཆུ་ཡི་འགྲམ་སུ་ཕྱིན་པར་གྱུར། །དེ་ཚེ་སྲིན་མོ་ལྔ་བརྒྱ་ཞིག །བུད་མེད་གཞོན་ནུར་གཟུགས་བསྒྱུར་ནས། །དེར་འོངས་ཅ་ཅོའི་སྒྲ་འབྱིན་ཞིང༌། །(ཆ༡༢བ)
རས་ཀྱི་བླ་གོས་བྱིན་སྟེ་བླངས། །ཚོང་པ་དེ་དག་རང་རང་གི །གོས་བཙིར་སྐམ་པར་གྱུར་པའི་ཚེ། །ཙམ་པ་ཀ་ཡི་ཤིང་དྲུང་གནས། །འདིར་སྨྲས་པ། དུས་མིན་རླུང་ཆེན་མུན་པ་འཁྱིལ་འདྲ་དྲག་དུ་འཚུབ་པ་ཀུན་ནས་ལངས། །རྒྱ་མཚོའི་ཆུ་ཀུན་སྲོག་ཆགས་བཅས་པ་ནམཁར་སྐས་ལ་འཛེག་པ་སྙམ། །ཆིལ་ཆིལ་འུར་འུར་ཆེམ་ཆེམ་སྒྲ་ལྡན་དབུ་བར་བཅས་པའི་ཆུའི་ཕུང་པོ། །ཀེ་ལ་ཤ་ཡི་རི་བོར་འགྲན་པས་གྲུ་ཆེན་མཁར་འདེགས་གཏིང་དུ་འདོར། །ཚོང་པའི་ཚོགས་རྣམས་ཅི་བྱ་གཏོལ་བྲལ་ཕ་མ་ཕུ་ནུ་གཉེན་བཤེས་འབོད། །བརྟན་པོར་འདོད་རྣམས་ཚངས་དང་བརྒྱ་བྱིན་ཕྱུགས་བདག་སོགས་ལ་འབོད་ཅིང་གསོལ། །དེ་ཚེ་སྐྱོབ་པ་སུ་ཡང་མེད་དེ་གྲུ་ཆེན་ཚལ་པ་ཚལ་པར་ལྷགས། །འདི་ནི་མི་ལུས་གྲུ་བཟང་འདི། །མཐོ་རིས་ཡོན་ཏན་རྒྱན་དུ་མས། །མཛེས་ཤིང་སྲ་བར་བྱས་ན་ཡང༌། །འཆི་བདག་སྲིན་མོས་བཏང་བ་ཡི། །རྒ་ནད་རླུང་དམར་དྲག་གཡོ་བས། །ལུས་ཀྱི་གྲུ་དང་སེམས་ཀྱི་མི། །སོ་སོར་འབྱེད་པ་མཚོན་ནམ་སྙམ། །སྐྱབས་མིན་སྐྱབས་སུ་འཁྲུལ་བ་རྣམས། །རི་ཤིང་མཚོ་དང་གཉེན་དང་ནི། །རྒྱལ་པོ་ལྷ་དང་ལྷ་མིན་སོགས། །སྐྱབས་སུ་གསོལ་མོད་རང་ཉིད་ཀྱང༌། །མཚོར་ལྷུང་དེ་ཡིས་སུ་ཞིག་སྐྱོབ། །རྒ་ནད་ཤི་བའི་འཇིགས་ཆེན་ལ། །སྐྱབས་གྱུར་དམ་ཆོས་ལས་གཞན་མེད། །གཏིང་མཐའ་མི་མངོན་ཆུ་གཏེར་དུ་ནུབ་མི་དེ་རྣམས། །བརྐྱལ་བའི་ཤུགས་ཀྱིས་ཕ་རོལ་འགྲམ་ངོགས་ཕྱིན་པར་གྱུར། །དེ་ཚེའང་སྲིན་མོའི་ཚོགས་ལ་སྡུག་པའི་འདུ་ཤེས་འཛིན། །ལྕགས་ཀྱུས་ཉ་བཞིན་གཡོ་ཡིས་བསླུས་ལ་ཕན་པར་འཁྲུལ། །འདིས་ནི་ལྔ་པར་གྱུར་རྣམས་ཀྱང༌། །ཕ་མཐའ་མི་མངོན་བར་མ་དོའི། །སྲིད་པར་འཁྱམས་ཤིང་ལས་ཀྱིས་བརྐྱལ། །དེ་ཚེའང་སྲིད་པའི་བཙོན་ར་ལ། །ཆགས་དང་སྲིད་པས་བཅིངས་པ་ཡིས། །སྐྱེ་བའི་(ཆ༡༣ན)
འདམ་དུ་འཚུད་གྱུར་པ། །འདི་ཉིད་མཚོན་པར་བྱེད་དམ་སྙམ། །བར་སྐབས་ཀྱི་ཚིགས་བཅད་ཏོ། །དེ་ནས་ཚོང་པ་དེ་རྣམས་ཀྱིས། །བདག་ཅག་འཛམ་བུའི་གླིང་ཕྱིན་པའི། །ཐབས་ཅི་ཡོད་ཅེས་དྲིས་པ་ན། །བུད་མེད་དེ་དག་བདག་ཅག་ལ། །ཐབས་མ་མཆིས་ཞེས་ཁ་རོག་འཁོར། །སླར་ཡང་བཞིན་གྱི་མདངས་ཕྱུང་སྟེ། །ཟུར་མིག་གཡོ་བས་བསླུ་བཞིན་པར། །བདག་ཅག་བུད་མེད་གཞོན་ནུ་སྟེ། ཁྱིམ་ཐབ་དང་ནི་གནས་རྟེན་མཛོད། །འདི་རྣམས་ཁྱེད་ཅག་རྣམས་ཀྱི་ནི། །ཁབ་དང་སྐྱེད་མོས་ཚལ་ལོ་ཞེས། །ཟེར་ཞིང་ཚོང་པ་རེ་རེ་ཁྲིད། །དེ་དག་རྣམས་ཀྱི་གཙོ་མོ་དེས། །བདག་ཁྲིད་ལྷ་ཡི་ཁ་ཟས་ཀྱི། །རོ་ཡི་མཆོག་གིས་ཚིམ་པར་བྱས། །དེ་ནས་རྩེ་བར་རྩོམ་པ་ལ། །མི་ཡི་རེག་པས་ཚིམ་བྱས་སྟེ། །དེ་ལྟར་ཞག་བདུན་འདས་པར་གྱུར། །དེ་ནས་རེ་ཞིག་བུད་མེད་དེ། །གཉིད་ཀྱིས་ལོག་བཞིན་གད་མོའི་སྒྲ། །རབ་ཏུ་སྙན་པ་རྒོད་པ་ཐོས། །ངོ་མཚར་སྐྱེས་ནས་དྲིས་པ་དང༌། །དེ་ཡིས་འདི་ནི་སིངྒྷ་ལའི། །གླིང་གི་སྲིན་མོའི་གནས་ལགས་སྟེ། ཁྱོད་སྲོག་བཅད་པར་གྱུར་ཏ་རེ། །ཞེས་ཟེར་རྒྱུ་མཚན་ཅི་ཞེས་དྲིས། །དེས་ཀྱང་ཁྱོད་ཐུགས་མི་འཆེས་ན། །གཡས་ཀྱི་ལམ་སྲང་ཟུང་ལ་བཞུད། །དེ་ན་ལྕགས་ཀྱི་གྲོང་ཁྱེར་ནི། །མཐོ་ཞིང་ར་བས་བསྐོར་བ་ལ། །སྐར་ཁུང་རྟ་བབས་མེད་པ་ཅིག །མཆིས་པར་ཚོང་པ་བརྒྱ་སྟོང་ནི། །བསྩལ་ཞིང་བོར་ནས་ལ་ལ་གསོན། །ལ་ལ་གུམ་སྟེ་གནས་ཀྱིས་གཟིགས། །ཞེས་ཟེར་ངས་ཀྱང་གླེན་པ་ཡི། །དྲ་བ་ཞེས་བྱའི་གཉིད་སྟུག་གིས། །བུད་མེད་དེ་ནི་ནོན་བྱས་ནས། །བདག་ཉིད་འཚོ་བར་བྱེད་པ་ཡི། །རལ་གྲི་ཟླ་བ་ལྟར་སྣང་ཐོགས། །གཡས་ཕྱོགས་ལམ་སྲང་བཟུང་སྟེ་ཕྱིན། །ལྕགས་ཀྱི་གྲོང་ཁྱེར་ཆེན་པོ་དེ། །ཁོ་ར་ཁོར་ཡུག་དུ་བསྐོར་ཡང༌། །(ཆ༡༣བ)
དེ་ལ་བུ་ག་ཡོད་མ་མཐོང༌། །དེ་དྲུང་མེ་ཏོག་ཙམ་པ་ཀའི། །སྡོང་པོ་ཅིག་ནི་འདུག་པ་ལ། །འཛེགས་སྟེ་ལུ་བའི་སྒྲ་བྱས་པས། །ཚོང་པ་མང་པོ་དེ་ཀུན་གྱིས། །ཚོང་དཔོན་ཆེན་པོ་མཁྱེན་པར་མཛོད། །འདི་ནི་སྲིན་མོའི་གླིང་ཡིན་སྟེ། །བདག་ཅག་ལྕགས་ཀྱི་ཁང་པར་བསྩལ། །འཛམ་གླིང་ཚོང་པ་འོངས་པ་རྣམས། །ཕྱི་མ་རྩེ་དགས་བྲིད་བྱེད་ཅིང༌། །སྔ་མ་ལྕགས་ཁང་འདི་རུ་འཛུད། །ཉིན་རེ་བཞིན་ཡང་མི་བརྒྱ་བརྒྱ། །ཁྲིད་དེ་ཟོས་ནས་རུས་པ་རྣམས། །ལྕགས་ཀྱི་གྲོང་ཁྱེར་འདི་རུ་འདོར། །ཞེས་སྟེ་སྔོན་བཞིན་སྨྲས་པར་གྱུར། །ངས་ཀྱང་མྱུར་བར་སླར་ལོག་ཚེ། །སྙན་པར་རྒོད་ཅིང་དེ་ན་རེ། །གཟིགས་སམ་རྟགས་ལ་བབ་བམ་ཟེར། །ཐབས་ནི་གང་གིས་ཐར་ཞེས་དྲིས། །རྟ་མཆོག་རྒྱལ་པོ་བཱ་ལ་ཧ། །ཞེས་བྱ་སྙིང་རྗེར་ལྡན་པ་ཅིག །བཅོ་ལྔའི་ཟླ་བ་ཉ་ཚེ་འབྱུང༌། །རྟ་མཆོག་ཅང་ཤེས་དམ་པ་དེས། །བེ་ཏ་ཐམས་ཅད་ཅེས་བྱ་བའི། །སྨན་གྱི་རྒྱལ་པོ་ཟོས་ནས་ནི། །བཻཌཱུརྻ་ཡི་བྱེ་མའི་དབུས། །ཆུ་རྒྱུན་ཡན་ལག་བརྒྱད་པ་འཐུངས། །གསེར་གྱི་བྱེ་མའི་ངོས་ལ་ནི། །ཕན་ཚུན་འགྲེ་ཞིང་སྤྲུག་པར་བྱེད། །འདི་ནས་ཕ་རོལ་སུ་འགྲོ་ཞེས། །མི་ཡི་སྐད་དུ་སྨྲ་ཞིང་འཚེར། །དེ་ཚེ་ཁྱོད་ཀྱིས་རྟ་རྒྱལ་མཆོག །བདག་ནི་ཕ་རོལ་འགྲོ་ཞེས་སྨྲོས། །དེ་སྐད་བསྒོ་བ་མཉན་བྱས་ནས། །མལ་དུ་ལྷན་ཅིག་ཉལ་བ་དང༌། །བུད་མེད་དེ་ཡང་སད་གྱུར་སྟེ། །འཕགས་པའི་སྲས་ཁྱོད་ལུས་རེ་གྲང༌། །ཞེས་ཟེར་གྲོང་གི་ཕྱི་རོལ་དུ། །བཤང་གཅིའི་ཆེད་དུ་ཕྱིན་ཞེས་བརྗོད། །དེ་ནས་གདུགས་ཤར་གྱུར་པའི་ཚེ། །ཚོང་པའི་ཚོགས་རྣམས་གྲོང་ཁྱེར་གྱི། །ཕྱིར་ཁྲིད་དབེན་པར་སོང་ནས་ནི། །མཆིས་བྲང་ཇི་ལྟར་མཛའ་ཞེས་དྲིས། །ཁ་ཅིག་བདག་ལ་མཛའ་ཞིང་གུས། །རྩེ་དགས་ཡོངས་སུ་འཛིན་ཏོ་ཟེར། །དེ་བཞིན་ལྷ་ཡི་ཟས་སྐོམ་དང༌། །གོས་དང་རྒྱན་དང་དྲི་སོགས་ཀྱིས། །ཡིད་རབ་འཛིན་ཞེས་སོ་སོར་སྨྲས། །ཁ་ཅིག་བདག་ལ་ཅི་(ཆ༡༤ན)
ཡིས་ཀྱང༌། །བྲེལ་བ་མེད་པས་སྐྱིད་དོ་ཟེར། །ང་ཡིས་བདག་ཅག་སྲིན་མོ་ལ། །ཆགས་པར་བྱ་བ་མི་རིགས་སྨྲས། །དེ་དག་མྱོས་ནས་ཅི་ལགས་ཀོ། སྲིན་མོ་ལགས་པ་མང་ཏམ་ཟེར། །ངས་ཀྱང་དཀོན་མཆོག་གསུམ་བདེན་ན། །ངེས་པར་སྲིན་མོ་འོ་ཞེས་སྨྲས། །དེ་ཀུན་ད་ནི་སྐྱབས་སུ་ཡོད། །ཅི་ཡིས་ཐར་པར་འགྱུར་ཞེས་འདྲི། །རྟ་མཆོག་རྒྱལ་པོའི་ཚུལ་བརྗོད་དེ། །ད་ནི་བཅོ་ལྔའི་མཚན་མོའི་ཚེ། །བུད་མེད་དེ་རྣམས་མྱོས་བྱེད་ཀྱི། །སྨན་གྱིས་སོ་སོར་མྱོས་པར་གྱིས། །མྱོས་ཚེ་གསེར་གྱི་བྱེ་མའི་སྟེང༌། །རྟ་མཆོག་དྲུང་དུ་འདུས་ཞེས་སྨྲས། །དེ་ནས་བཅོ་ལྔའི་ཟླ་བ་ནི། །རབ་གསལ་དཀར་བའི་འོད་བཀྱེ་ཚེ། །རྟ་མཆོག་དེ་ནི་ཟླ་བ་ཡི། །ཟེར་དང་འགྲོགས་སྟེ་གླིང་དེར་འོངས། །སྨན་ཟོས་ཆུ་འཐུངས་འགྲེ་ཞིང་སྤྲུགས། །དེ་ཚེ་སིངྒྷའི་གླིང་ཀུན་འགུལ། །འཛམ་བུའི་གླིང་དུ་སུ་འགྲོ་ཞེས། །ལན་གསུམ་སྨྲས་ཚེ་བདག་ཅག་ནི། །སྒྲོལ་བར་མཛོད་ཅེས་ཀུན་གྱིས་སྨྲས། །ཁྱེད་ཅག་སུས་ཀྱང་གླིང་འདི་ལ། །ཕྱི་མིག་ལྟ་བར་མི་བྱའོ། །གང་ལའང་ཆགས་པར་མ་བྱེད་ཅིག །ཅེས་སྨྲས་ཐོག་མར་ང་ཡིས་བཞོན། །དེ་ནས་གཞན་ཀུན་བཞོན་བྱས་སྟེ། །ཉི་ཟླ་བཞིན་དུ་མཁའ་ལ་ཆས། །དེ་ཚེ་སྲིན་མོ་དེ་དག་རྣམས། །སད་དེ་ཕྱི་བཞིན་བསྙེགས་བྱས་ནས། །སྙིང་རྗེའི་སྐད་དུ་སྨྲེ་སྔགས་བཏོན། །དེ་ཚེ་ང་ཡི་ཚོང་ཕྲུག་རྣམས། །ཆགས་སྟེ་སླར་ལོག་བལྟས་པ་དང༌། །ཁ་བུབ་ལྷུང་སྟེ་ཆུ་ནང་ནུབ། །བུད་མེད་དེ་རྣམས་སྤྲུལ་པ་བཤིག །རལ་པ་གཟིངས་ཅིང་མིག་དམར་ལ། །མཆེ་བའི་དཔལ་ཅན་སྲིན་མོ་ཡི། །རང་གཟུགས་བསྟན་སྟེ་མི་དེ་རྣམས། །ཆུ་ནས་དྲངས་སྟེ་ཡུད་ཀྱིས་ཟོས། །ཁྲག་ཐིགས་པོ་བའི་ས་རྣམས་ཀྱང༌། །མཛུབ་མོས་དྲུད་ཅིང་ཟ་བར་བྱེད། །རྟ་མཆོག་འཛམ་བུའི་གླིང་ཕྱིན་ཚེ། །ལྷུང་བའི་ཚོང་ཕྲུག་རྣམས་ལ་ནི། །མྱ་ངན་བྱེད་ཅིང་མཆི་མ་ཕྱུང༌། །ང་ལ་ལན་གསུམ་བསྐོར་བྱས་ནས། །རྟ་(ཆ༡༤བ)
མཆོག་དེ་ནི་མི་སྣང་གྱུར། །ངས་ཀྱང་རིམ་གྱིས་ཁྱིམ་དུ་ཕྱིན། །ཕ་མ་གཉིས་ནི་མྱ་ངན་གྱིས། །མིག་ལྡོངས་གྱུར་པས་བདག་འོངས་པར། །ཤེས་སྟེ་མགུལ་ནས་འཇུས་སྟེ་ངུས། །བསླངས་པས་མིག་ཀྱང་དག་པར་གྱུར། །བདག་ཅག་ནོར་ནི་མི་དགོས་ཀྱི། །བུ་ཁྱོད་གསོན་པར་རྙེད་ཏོ་ཟེར། །ཉེ་དུར་བཅས་པ་ཀུན་དགའ་གྱུར། །འདིར་སྨྲས་པ། སྲིན་མོས་མཛེས་པར་བསྒྱུར་བ་ཡི། །གཟུགས་དང་ལང་ཚོ་བཟའ་བཏུང་དང༌། །རྒྱན་དང་རྩེ་དགས་བྲིད་པ་ལྟར། །ཚེ་འདིར་འདོད་པའི་ཡོན་ཏན་གྱི། །སྣང་བ་ཡུད་ཙམ་འདི་ཡིས་འབྲིད། །མཐའ་མར་སྲིན་མོས་རང་གཟུགས་ཉིད། །བསྟན་ནས་ཟ་བར་བྱེད་པ་ལྟར། །འདུས་བྱས་རང་སོར་མཛེས་ན་ཡང༌། །མཐའ་མར་མི་རྟག་འཇིག་པ་དང༌། །སྡུག་བསྔལ་ལས་ཀྱང་སྡུག་བསྔལ་བའི། །རང་གཟུགས་མངོན་སུམ་གསལ་བར་འགྱུར། །ཇི་ལྟར་སྲིན་མོའི་གཙོ་སོ་དེས། །གྱ་གྱུས་བསླུ་བར་བརྩོན་ན་ཡང༌། །གཉིད་ནི་འཐིབས་པོས་ནོན་པའི་ཚེ། །རང་མཚང་རང་གིས་བསྒྲགས་པ་ལྟར། །འདུས་བྱས་སྣང་བ་འདི་ཀུན་ཡང༌། །བརྟགས་ན་རང་མཚང་རང་གིས་སྟོན། །ལྕགས་ཁང་བོར་བའི་ཚོང་པ་ཡིས། །སྲིན་མོའི་ངང་ཚུལ་མངོན་སུམ་དུ། །རིག་ལྟར་གཤིན་རྗེའི་རྒྱལ་པོའི་དྲུང༌། །བགྲོད་ཚེ་ཀུན་གྱིས་ལས་འབྲས་མཐོང༌། །ལྕགས་ཁང་སྲ་བ་དེར་འཚུད་ནས། །ཤེས་ཀྱང་བྱ་བའི་ཐབས་ཟད་ལྟར། །དམྱལ་བའི་ས་གཞིར་བཟོས་པའི་ཚེ། །ལས་འབྲས་གོ་ཡང་འཕྱིས་པ་ཡིན། །སྲིན་མོས་ཟིན་རྣམས་འདོན་པའི་ཕྱིར། །རྟ་མཆོག་རྒྱལ་པོས་བརྩོན་པ་ལྟར། །སངས་རྒྱས་བྱང་ཆུབ་སེམས་དཔའ་རྣམས། །འགྲོ་ཀུན་གནས་ན་གཞན་དོན་བརྩོན། །འོན་ཀྱང་ཟླ་བ་ཉ་ཚེ་ལས། །གཞན་དུ་རྟ་རྒྱལ་མི་སྣང་ལྟར། །དགེ་བའི་ཆ་ཤས་མ་རྫོགས་པར། །བཤེས་གཉེན་དམ་པ་འཕྲད་མི་འགྱུར། །གཏིང་ཟབ་རྒྱ་མཚོའི་ནང་གནས་པའི། །ཉམ་ང་སྲིན་མོའི་གླིང་དེ་ནས། །གཞན་གྱིས་(ཆ༡༥ན)
ཐར་བར་མི་ནུས་ཀྱང༌། །རྟ་རྒྱལ་སྟོབས་ཆེན་ལ་བརྟེན་ནས། །ཡུད་ཀྱིས་འཛམ་གླིང་བགྲོད་པ་ལྟར། །འཇིགས་རུང་སྲིད་པའི་རྒྱ་མཚོ་ནི། །གཏིང་མཐའ་མི་མངོན་ཕྱོགས་འཁྲུལ་བ། །འདི་ལས་ཐར་ཐབས་གཞན་མེད་ཀྱང༌། །དགེ་བའི་གཤེས་གཉེན་དམ་པ་ལ། །བསྟེན་ན་ཐར་པར་ཡུད་ཀྱིས་བགྲོད། །རྟ་རྒྱལ་ཕན་པར་དགའ་བ་དེའི། །ཚིག་བཞིན་མ་བྱས་སྲིན་མོ་ཡི། །ལུས་དང་ལོངས་སྤྱོད་ལ་ཆགས་པས། །ཕྱི་མིག་ལྟ་བའི་ཚོང་པ་རྣམས། །བཞོན་ཡང་ལྷུང་ནས་སྲིན་མོ་ཡིས། །ཟོས་ལྟར་ཡོངས་འཛིན་བསྟེན་གྱུར་ཀྱང༌། །དེ་ཡིས་བསྟན་པའི་གདམས་ངག་བཞིན། །བླང་དོར་ལེགས་པར་མ་བྱས་སྟེ། །སྲིད་པའི་འབྱོར་པ་ལ་ཞེན་ན། །ལྷུང་སྟེ་ངན་འགྲོར་ཐུག་མེད་འགྲོ། །བློ་གྲོས་བརྟན་ཞིང་རབ་ཏུ་ཟབ། །རྟ་རྒྱལ་ཚིག་ལ་ཡིད་འཆེས་པ། །སྲིན་མོའི་གླིང་གི་ཚུལ་རིག་པས། །ངེས་པར་འཛམ་གླིང་འགྲོ་འདོད་པའི། །དེད་དཔོན་བདེ་བླག་ཐར་བ་ལྟར། །སྲིད་པའི་ངང་ཚུལ་ཡོངས་རིག་པས། །ཐར་པའི་གྲོང་དུ་འགྲོ་འདོད་པ། །ཡོངས་འཛིན་སྲོག་ལྟར་བསྟེན་པ་རྣམས། །བྱང་ཆུབ་མཆོག་དུ་བདེ་བླག་འགྲོ། །དེད་དཔོན་དེས་ཀྱང་ཕ་མ་ཡི། །མྱ་ངན་བསལ་ཞིང་མིག་ཕྱེ་ནས། །ཉེ་དུ་དགའ་བར་བྱས་པ་ལྟར། །བྱང་ཆུབ་ཐོབ་ནས་མར་གྱུར་པའི། །འགྲོ་ཀུན་བདེ་བའི་གནས་ལ་འགོད། །དེ་ལྟར་སྔོན་བྱུང་གཏམ་འདི་ཡིས། །ཆོས་ཚུལ་རྒྱ་ཆེར་བསྟན་པ་སྙམ། །བར་སྐབས་ཀྱི་ཚིགས་སུ་བཅད་པའོ། །སྒྲིབ་པ་རྣམ་སེལ་ཉོན་ཞིག་ང་ནི་དེད་དཔོན་ཚེ། །དེ་ལྟའི་སྡུག་བསྔལ་འཇིགས་རུང་མི་བཟད་མྱོང་བ་ལས། །བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་ནི། །རྟ་མཆོག་སྟོབས་ཆེན་གྱུར་པས་འཆི་བའི་འཇིགས་ལས་བསྒྲལ། །སྤྱན་རས་གཟིགས་དེའི་བསོད་ནམས་ཀྱི། །ཚོགས་ནི་ང་ཡིས་བགྲང་མི་ནུས། །བ་སྤུའི་ཁུང་བུ་རེ་རེའི་གཏམ། །(ཆ༡༥བ)
ཅུང་ཟད་བཤད་ཀྱིས་ཉན་པར་གྱིས། །གསེར་ཞེས་བྱ་བའི་སྤུ་ཁུང་ན། །དྲི་ཟ་ཁྲག་ཁྲིག་བརྒྱ་སྟོང་གནས། །ཀུན་ཀྱང་འཕགས་པའི་ཆོས་ལ་གནས། །སྣང་བའི་ཡིད་བཞིན་ནོར་བུ་ལས། །དགོས་འདོད་ཇི་ལྟར་བསམས་པ་འགྲུབ། །ནག་པོ་ཞེས་བྱའི་སྤུ་ཁུང་ན། །མངོན་པར་ཤེས་ལྡན་དྲང་སྲོང་ཚོགས། །གསེར་གྱི་རི་དང་རིན་ཆེན་གྱི། །ལྗོན་པ་ལ་བརྟེན་མཐའ་ཡས་གནས། །སྤུ་ཁུང་རིན་ཆེན་རྣ་ཆ་ན། །ཆགས་བྲལ་དྲི་ཟའི་བུ་མོའི་ཚོགས། །གཟུགས་མཆོག་ལྡན་པ་མཐའ་ཡས་གནས། །སྤུ་ཁུང་དེ་ཀུན་ན་མཁའ་བཞིན། །བཟུང་དང་རེག་པར་མི་ནུས་སོ། །ཀུན་དུ་བཟང་པོས་ལོ་བཅུ་གཉིས། །སོང་ཡང་སྤུ་ཁུང་དེ་མ་མཐོང༌། །བ་སྤུའི་ཁུང་བུ་རེ་རེ་ན། །གནས་པ་དེས་ཀྱང་མ་མཐོང་ན། །རྒྱལ་སྲས་གཞན་གྱིས་ལྟ་ཅི་སྨོས། །ང་ནི་གཡོ་མེད་སྒྱུ་སྤངས་ཕྲ་བར་སྣང་ཞིང་བལྟ་རུ་མེད། །གཟུགས་མེད་གཟུགས་ཆེ་ལག་པ་བརྒྱ་སྟོང་དབུ་ནི་བཅུ་གཅིག་ལྡན། །བྱེ་བ་བརྒྱ་སྟོང་སྤྱན་མངའ་རྣལ་འབྱོར་ཆེན་པོ་རྣལ་འབྱོར་མཆོག །མྱ་ངན་འདས་པའི་ལམ་གནས་དཔེ་མེད་ཐུགས་མངའ་ཤེས་རབ་ཆེ། །སྲིད་ལས་གྲོལ་བྱེད་དབང་པོ་ལྟར་མི་སྣང་ཞིང་ཆོས་སྟོན་མཁས། །ཆོས་རྣམས་ཐམས་ཅད་ཀུན་དུ་སྒྲིབ་པ་མེད་པར་གྱུར་པའོ། །དེ་བཞིན་སྤྱན་རས་གཟིགས་ཀྱི་དབང་པོ་སུས་ཀྱང་མི་མཐོང་སྟེ། །དེ་ཡི་རང་བཞིན་ཉིད་ཀྱི་ལུས་ནི་རྒྱལ་བས་མི་གཟིགས་ན། །ཀུན་དུ་བཟང་སོགས་བྱང་ཆུབ་སེམས་དཔའ་རྣམས་ཀྱིས་ལྟ་ཅི་སྨོས། །སྤྱན་རས་གཟིགས་དབང་དེ་ནི་ཆོ་འཕྲུལ་བསམ་གྱིས་མི་ཁྱབ་སྟོན། །བྱེ་བ་ཁྲག་ཁྲིག་བརྒྱ་སྟོང་དུ་མའི་སེམས་ཅན་ཡོངས་སྨིན་བྱེད། །དེ་ཀུན་བྱང་ཆུབ་ལམ་འཇོག་བདེ་བ་ཅན་གྱི་འཇིག་རྟེན་འགྲོ། །དེ་བཞིན་གཤེགས་པ་འོད་དཔག་མེད་མཐོང་དམ་ཆོས་ཉན་པ་འཐོབ། །གཞན་ཡང་བ་སྤུའི་ཁུང་བུ་ནི། །བདུད་རྩིའི་ཐིགས་པ་ཅེས་བྱ་(ཆ༡༦ན)
ཡོད། །སར་གནས་ལྷ་སྲས་ཚོགས་ཀྱིས་གང༌། །དྲི་ཟའི་གླུ་དབྱངས་ཀྱིས་གང་བའི། །རིན་ཆེན་རི་བོར་ངལ་གསོ་ལ། །ཐེག་ཆེན་ཆོས་ཀྱི་གཏམ་བགྲོ་ཞིང༌། །བྱམས་ལྡན་འཆག་པར་བརྩོན་པས་གང༌། །དེ་ནས་སྤུ་ཁུང་རྡོ་རྗེའི་སྒོར། །རིན་ཆེན་རི་དང་ལྗོན་པ་དང༌། །རྫིང་བུ་ཁང་བཟང་བསམ་ལས་འདས། །རྒྱལ་སྲས་ཡོན་ཏན་ཆེ་ལྡན་པའི། །མི་འམ་ཅི་ཚོགས་དེ་ན་གནས། །ཕར་ཕྱིན་དྲུག་གི་གཏམ་བྱེད་ཅིང༌། །རིན་ཆེན་འཆགས་ས་རྣམས་ན་འཆག །རྟག་པར་སྤྱན་རས་གཟིགས་ཀྱི་མཚན། །རྗེས་སུ་དྲན་པར་བྱེད་པ་སྟེ། །དེ་ཚེ་ཡོ་བྱད་མ་ལུས་འབྱུང༌། །དེ་འདས་ནས་ནི་བ་སྤུའི་ཁུང༌། །ཉི་མའི་འོད་ཅེས་བྱ་བ་ཡོད། །རེ་རེའང་རྩེ་མོ་ཁྲི་ཉིས་སྟོང༌། །ལྡན་པའི་གསེར་གྱི་རི་བོ་ཁྲི། །རེ་རེའི་ངོས་ཀྱང་ལྷ་རྫས་ཀྱི། །སྐྱེད་ཚལ་ཁང་བཟང་རྫིང་ལྗོན་ཤིང༌། །བརྒྱ་སྟོང་བྱེ་བ་དུ་མས་བརྒྱན། །རིན་ཆེན་ཤ་རི་ཏི་ག་ལས། །ཡོ་བྱད་མ་ལུས་ཐམས་ཅད་འབྱུང༌། །རྒྱལ་སྲས་བྱེ་བ་བརྒྱ་སྟོང་ནི། །ཡིག་དྲུག་རྗེས་སུ་དྲན་པའི་མོད། །མྱ་ངན་འདས་པའི་ས་རྟོགས་ཤིང༌། །རྒྱལ་བ་བདུན་དང་སྤྱན་རས་གཟིགས། །ཀུན་ནས་གཤེགས་སྟེ་དབུགས་འབྱིན་མཛད། །གཞན་ཡང་བ་སྤུའི་ཁུང་བུ་ནི། །དབང་པོའི་རྒྱལ་པོ་ཞེས་བྱ་ཡོད། །རྒྱལ་སྲས་ཕྱིར་མི་ལྡོག་ཤ་སྟག །བྱེ་བ་བརྒྱ་སྟོང་མང་པོ་གནས། །འཁོར་བའི་དུ་ཁའི་མིང་ཡང་མེད། །ལྷ་ཡི་གསེར་ཁྲི་བརྒྱད་ཁྲིར་འཁོད། །པདྨ་ལྟར་སྣང་ནོར་བུ་ལས། །ཇི་ལྟར་བསམས་པ་བཞིན་དུ་འགྲུབ། །དེ་ནས་བ་སྤུའི་ཁུང་བུ་ནི། །རྩི་སྨན་ཆེན་པོ་ཞེས་བྱ་ཡོད། །ཐོག་མའི་སེམས་བསྐྱེད་ལྡན་པ་ཡི། །རྒྱལ་སྲས་ཁྲག་ཁྲིག་མཐའ་ཡས་གནས། །སྲིད་པའི་དུ་ཁས་ཡིད་སྐྱོ་ཞིང༌། །རྣམ་པར་ཐར་པའི་སྒོ་གསུམ་ལ། །མཉམ་པར་འཇོག་པས་འདའ་བར་བྱེད། །དེ་ནས་སྣ་ཚོགས་རྒྱལ་ཞེས་པའི། །སྤུ་ཁུང་ན་ནི་རང་སངས་རྒྱས། །བྱེ་བ་ཁྲག་(ཆ༡༦བ)
ཁྲིག་བརྒྱ་སྟོང་གནས། །ཆོ་འཕྲུལ་སྣ་ཚོགས་སྟོན་པར་བྱེད། །རིན་ཆེན་རི་རྒྱལ་སྣ་ཚོགས་ལ། །གནས་ཅིང་རྟེན་ཅིང་འབྲེལ་འབྱུང་གི །ཆོས་ཀྱི་གཏམ་ཆེན་བགྲོ་བར་བྱེད། །དེ་སོགས་བརྗོད་དུ་མེད་པ་ཡི། །བ་སྤུའི་ཁུང་བུ་འདས་ནས་ནི། །ཀུན་གྱི་མཐའ་མར་སྤུ་ཁུང་ནི། །རྒྱལ་མཚན་རྒྱལ་པོ་ཞེས་བྱ་ཡོད། །འདི་ནི་རྡོ་རྗེའི་རང་བཞིན་སྟེ། །དཔག་ཚད་བརྒྱད་ཁྲི་བཞི་སྟོང་ལྡན། །རིན་ཆེན་རི་དང་ནོར་བུ་ཡི། །ལྗོན་ཤིང་ཁང་བརྩེགས་ཚོགས་ཀྱིས་གཏམས། །ཟླ་ལྟར་བཟང་བའི་རིན་ཆེན་གྱིས། །རྟག་དུ་སྣང་བའི་བྱ་བ་བྱེད། །ཁང་བརྩེགས་རྣམས་ན་རྒྱལ་བའི་སྐུ། །འཛམ་གླིང་འདི་ལ་ཞལ་ཕྱོགས་ནས། །ཕར་ཕྱིན་དྲུག་གི་ཆོས་སྟོན་པ། །རེ་རེ་བཞུགས་ཤིང་འགྲོ་བ་འདུལ། །དེ་ནས་སྤྱན་རས་གཟིགས་དབང་གི །རྐང་པ་གཡས་པའི་མཐེ་བོང་ལས། །རྒྱ་མཚོ་ཆེན་པོ་བཞི་བྱུང་སྟེ། །རེ་རེའང་གཏིང་དཔག་མི་ནུས་སོ། །རྒོད་མའི་ཁ་ཡི་གདོང་འདྲར་འབབ། །དེ་ཚེ་ཐལ་བའི་ལྷག་མ་ལྟར། །སྐད་ཅིག་གིས་ནི་མི་སྣང་འགྱུར། །སྤྱན་རས་གཟིགས་ཀྱི་དབང་ཕྱུག་གི །ཡོན་ཏན་རྣམ་འཕྲུལ་དེ་འདྲ་འོ། །སྤྱན་རས་གཟིགས་དེའི་མཚན་ཙམ་ཞིག །གང་གིས་འཛིན་པར་བྱེད་པ་དང༌། །ཡི་གེ་དྲུག་པའི་རིག་སྔགས་ཀྱི། །རྒྱལ་མོ་རྗེས་སུ་དྲན་བྱེད་པ། །དེ་དག་བ་སྤུའི་ཁུབ་བུ་ཡི། །ཞིང་མཆོག་དེ་དག་རྣམས་སུ་སྐྱེ། །སླན་ཆད་སྲིད་པར་མི་འཁོར་སྟེ། །བ་སྤུའི་ཁུང་ནས་བ་སྤུ་ཡི། །ཁུང་བུ་གཞན་དུ་འགྲོ་བར་འགྱུར། །མྱ་ངན་འདས་པའི་མཐའ་ཡི་བར། །ཞིང་མཆོག་དེ་དག་རྣམས་སུ་གནས། །དེ་ལྟར་སྟོན་པས་བཀའ་བསྩལ་ཏོ། །རྒྱལ་སྲས་སྒྲིབ་པ་རྣམ་སེལ་གྱིས། །ཡི་གེ་དྲུག་པའི་རིག་སྔགས་ཀྱི། །རྒྱལ་མོ་ཇི་ལྟར་བཙལ་གསོལ་པས། །སླར་ཡང་རྒྱལ་བས་བཀའ་བསྩལ་པ། །འདི་ནི་སངས་རྒྱས་ཀྱིས་ཀྱང་མི་མཁྱེན་ན། །བྱང་ཆུབ་སེམས་དཔར་གྱུར་པས་ལྟ་ཅི་སྨོས། །སྤྱན་རས་གཟིགས་དབང་སྙིང་པོ་རབ་མཆོག་སྟེ། །གང་གིས་སྙིང་པོ་འདི་ཤེས་ཐར་(ཆ༡༧ན)
པ་ཤེས། །རྣལ་འབྱོར་དཔག་དུ་མེད་ཕྱིར་སྒྲུབ་པར་དཀའ། །ཡི་གེ་དྲུག་པའི་རིག་སྔགས་འདི་ཡི་ཕྱིར། །དེ་བཞིན་གཤེགས་རྣམས་བསྐལ་པ་བཅུ་དྲུག་དུ། །འཇིག་རྟེན་ཁམས་རྣམས་ཀུན་དུ་གཤེགས་མཛད་ན། །བྱང་ཆུབ་སེམས་དཔར་གྱུར་པས་སྨོས་ཅི་དགོས། །སུ་ཞིག་ཡིག་དྲུག་རིག་སྔགས་ཆེན་མོ་འདི། །རྟག་དུ་འཛིན་ཞིང་ཟློས་པར་བརྩོན་པ་ཡི། །སེམས་ཅན་དེ་དག་བསོད་ནམས་ཕ་མཐའ་ཡས། །ཡིག་དྲུག་རིག་སྔགས་གང་དུ་ཟླ་བ་དེར། །སངས་རྒྱས་གངྒཱའི་ཀླུང་གི་བྱེ་མ་སྙེད། །དགུ་བཅུ་རྩ་དགུ་དེ་རུ་འདུ་བར་འགྱུར། །ཕྲ་རབ་རྡུལ་གྲངས་སྙེད་ཀྱི་རྒྱལ་སྲས་འདུ། །ཕར་ཕྱིན་དྲུག་གི་སྒོ་ན་གནས་པར་འགྱུར། །ལྷ་ཡི་སྡེ་རིས་སུམ་བཅུ་རྩ་གཉིས་ཀྱི། །ལྷ་ཡི་བུ་རྣམས་འདུ་ཞིང་མཆོད་པར་བྱེད། །རྒྱལ་པོ་ཆེན་པོ་བཞི་ཡིས་ཕྱོགས་བཞི་སྲུང༌། །ཀླུ་ཡི་རྒྱལ་པོ་རྒྱ་མཚོ་མཆིང་ནམ་དང༌། །མ་དྲོས་འཇོག་པོ་ལ་སོགས་བྱེ་བ་ནི། །ཁྲག་ཁྲིག་བརྒྱ་སྟོང་དུ་མས་ཡོངས་སུ་སྲུང༌། །དེ་ནི་བླ་གབ་མེད་པར་གནས་ཚེ་ཡང༌། །ས་བླའི་གནོད་སྦྱིན་དག་གིས་སྲུང་བར་བྱེད། །དེ་ཡི་བ་སྤུའི་ཁུང་བུ་རེ་རེ་ལའང༌། །དེ་བཞིན་གཤེགས་པ་བྱེ་བ་ཕྲག་རེ་བཞུགས། །དེ་དག་ཀུན་གྱིས་ཁྱོད་ཀྱིས་འདི་འདྲ་བའི། །ཡིད་བཞིན་ནོར་མཆོག་ཐོབ་པ་ཐོབ་གྱུར་སྟེ། །ཁྱོད་ཀྱིས་རུས་ཀྱི་རིགས་ཀྱང་བདུན་བརྒྱུད་ཚུན། །ཐར་པར་བྱས་ཀྱིས་ལེགས་སོ་ལེགས་པར་བྱས། །ཁྱོད་ཀྱི་ལྟོར་གནས་སྲོག་ཆགས་ཐམས་ཅན་ཀྱང༌། །ཕྱིར་མི་ལྡོག་པའི་བྱང་ཆུབ་སེམས་དཔའ་འཐོབ། །ལེགས་སོ་ལེགས་ཞེས་མགྲིན་གཅིག་གསུང་བར་འགྱུར། །ཡི་གེ་དྲུག་པའི་རིག་སྔགས་ཆེན་མོ་འདི། །ལ་ལ་ཞིག་གི་ལུས་ལ་འཆང་བྱེད་ན། །དེ་ལུས་རྡོ་རྗེའི་ལུས་སུ་རིགས་པར་འགྱུར། །དེ་ནི་རྒྱལ་བའི་རིང་སྲེལ་མཆོད་རྟེན་ཉིད། །རྒྱལ་བའི་ཡེ་ཤེས་གནས་པར་རིག་པར་བྱ། །སུ་ཞིག་རིག་སྔགས་ཆེན་མོ་འདི་ཟློས་པ། །དེ་ཡི་སྤོབས་པ་ཟད་པ་མེད་པར་འགྱུར། །(ཆ༡༧བ)
ཡེ་ཤེས་ཕུང་པོ་རྣམ་པར་དག་པ་འཐོབ། །བྱམས་པ་དང་ནི་སྙིང་རྗེ་ཆེན་པོར་འགྱུར། །དེ་ནི་ཉི་མ་རེ་རེ་བཞིན་དུ་ཡང༌། །ཕ་རོལ་ཕྱིན་པ་དྲུག་པོ་ཡོངས་རྫོགས་འགྱུར། །རིག་འཛིན་འཁོར་ལོས་སྒྱུར་བའི་དབང་ཕྱུག་འཐོབ། །ཡི་གེ་དྲུག་པའི་རིག་སྔགས་འདི་འཛིན་པ། །སུ་ཞིག་བྱམས་སམ་ཞེ་སྡང་གིས་ཀྱང་རུང༌། །དབུགས་ཕྱིར་འབྱུང་དང་ནང་དུ་རྔུབ་པས་ཀྱང༌། །རྒྱལ་བའི་སྲས་པོ་ཕྱིར་མི་ལྡོག་པར་འགྱུར། །བླ་མེད་བྱང་ཆུབ་མངོན་རྫོགས་མྱུར་འཚང་རྒྱ། །རིག་པའི་རྒྱལ་པོ་འདི་ལ་སུ་ཞིག་གིས། །ལག་གིས་རེག་ཀྱང་སྲིད་མཐའི་སེམས་དཔར་འགྱུར། །སྐྱེས་པ་བུད་མེད་ཁྱེའུ་བུ་མོ་དང༌། །བྱ་དང་རི་དགས་ལ་སོགས་སུས་ཀྱང་རུང༌། །ཡི་གེ་དྲུག་པའི་རིག་སྔགས་འདི་མཐོང་ན། །དེ་ཀུན་ཐམས་ཅད་རྒྱལ་སྲས་སྲིད་མཐའ་འཛིན། །མི་ཡི་སྡུག་བསྔལ་བརྒྱད་པོ་མེད་པར་འགྱུར། །དེ་ཡིས་རྣལ་འབྱོར་བསམ་གྱིས་མི་ཁྱབ་འཐོབ། །དེ་ལྟར་ཡི་གེ་དྲུག་པའི་རིག་སྔགས་འདི། །ཟློས་པར་བྱེད་ན་བསྐུལ་བར་འགྱུར་རོ་གསུངས། །སྒྲིབ་སེལ་གྱིས་ནི་འདི་སྐད་གསོལ། །དེ་ལྟར་ཕན་ཡོན་ཚད་མེད་པའི། །རིག་སྔགས་དམ་པའི་རྒྱལ་པོ་དེ། །བདག་གིས་གང་ལས་འཐོབ་པར་འགྱུར། །ཡི་གེ་དྲུག་པའི་རིག་སྔགས་གང༌། །བདག་ལ་སུ་ཞིག་སྩོལ་བྱེད་པ། །དེ་ལ་རིན་ཆེན་སྣ་བདུན་གྱིས། །འཛམ་གླིང་བཀང་སྟེ་དབུལ་བར་བགྱི། །འབྲི་བའི་ཡོ་བྱད་ཀྱིས་འཕོངས་ན། །བདག་གིས་ལྤགས་པ་ཤོག་བུར་བྱས། །རྐང་གི་རུས་པས་སྨྱུ་གུ་དང༌། །ཁྲག་གིས་གནག་ཚར་བྱས་ནས་ནི། །རིག་སྔགས་དེ་ནི་འབྲི་བར་བགྱིད། །བཅོམ་ལྡན་འདས་ཀྱིས་སླར་ཡང་བཀའ་བསྩལ་པ། །ཡི་གེ་དྲུག་པའི་རིགས་སྔགས་འདི་ཡི་ཕྱིར། །འཇིག་རྟེན་ཁམས་ཀྱི་ཕྲ་རབ་རྡུལ་སྙེད་ཀྱི། །འཇིག་རྟེན་ཁམས་སུ་སོང་བར་ངས་དྲན་སྟེ། །དེ་བཞིན་གཤེགས་པ་བྱེ་བ་ཁྲག་ཁྲིག་ཚོགས། །བརྒྱ་སྟོང་དུ་མ་བསྙེན་ཅིང་བཀུར་བྱས་ཀྱང༌། །རིག་སྔགས་མཆོག་འདི་མ་ཐོས་མ་ཐོབ་ནས། །སངས་རྒྱས་དམར་པོའི་(ཆ༡༨ན)
མཆོག་གི་སྤྱན་སྔ་རུ། །ང་ཡིས་མཆི་མ་ཕྱུང་སྟེ་ངུས་པ་དང༌། །རྒྱལ་བ་དེ་ཡིས་བདག་གི་དབུགས་ཕྱུང་སྟེ། །དེ་ལྟར་སྙིང་རྗེར་མཆི་མ་མ་འབྱིན་པར། །བདེ་གཤེགས་པདྨའི་དམ་པ་ཞེས་བྱ་བ། །དེ་ཡིས་རིག་སྔགས་ཆེན་མོ་འདི་མཁྱེན་གྱིས། །རྒྱལ་བ་དེ་ཡི་སྤྱན་སྔར་སོང་ཞིག་གསུངས། །ངས་ཀྱང་ཕྱིན་སྟེ་གུས་པར་གསོལ་བ་བཏབ། །མིང་ཙམ་དྲན་ཀྱང་སྡིག་པ་ཀུན་འབྱང་ཞིང༌། །བྱང་ཆུབ་དམ་པ་རྙེད་དཀའ་འཐོབ་འགྱུར་བ། །ཡི་གེ་དྲུག་པའི་རིག་སྔགས་འཚོལ་བའི་ཆེད། །འཇིག་རྟེན་དུ་མར་བདག་ཕྱིན་ཉོན་མོངས་ཀྱང༌། །དོན་མ་མཆིས་ཀྱིས་ཁྱོད་ཀྱིས་བདག་ལ་སྩོལ། །དེ་བཞིན་གཤེགས་པ་པདྨའི་མཆོག་དེ་ཡིས། །རྡུལ་ཀུན་རེ་རེས་བགྲང་བར་ནུས་པ་སོགས། །བཅུ་གཉིས་དཔེ་ཡིས་ཡོན་ཏན་རྒྱ་ཆེར་བཤད། །ཡི་གེ་དྲུག་པའི་ཕན་ཡོན་བགྲང་མི་ལང༌། །བསམ་གཏན་སྤྱོད་ཡུལ་བསམ་གྱིས་མི་ཁྱབ་སྟེ། །ང་ནི་སྒོམ་པར་ནན་ཏན་བརྩོན་མ་ཡིན། །སྤྱན་རས་གཟིགས་ཀྱི་དབང་པོའི་ཆོས་དེ་ཡང༌། །ཕྲ་ཞིང་མི་གསལ་ཤིན་དུ་སྙིང་པོའི་ཆོས། །དེ་ནི་དགེ་བ་ལ་གནས་དེ་བཞིན་དུ། །རིག་སྔགས་ཆེན་མོ་འདི་ནི་ཐབས་མཁས་པའོ། །ངས་ཀྱང་ཡི་གེ་དྲུག་པའི་རིག་སྔགས་ཆེད། །ཞིང་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག །དུ་མར་འཁྱམས་ཤིང་སོང་ཡང་མ་རྙེད་ནས། །དེ་བཞིན་གཤེགས་པ་སྣང་བ་མཐའ་ཡས་ཀྱི། །སྤྱན་སྔར་ཐལ་སྦྱར་ཆོས་ལ་གུས་པ་ཡི། །ཤུགས་ཀྱིས་མཆི་མ་ཕྱུང་སྟེ་སངས་རྒྱས་དེས། །ཡིག་དྲུག་རིག་སྔགས་ཆེན་མོའི་རིག་པའི་རྒྱལ། །སྒོམ་པའི་བརྩོན་འགྲུས་བྱ་བར་བཞེད་དམ་གསུངས། །བཅོམ་ལྡན་འདས་འཚལ་བདེ་གཤེགས་བདག་འཚལ་སྟེ། །སྐོམ་པ་ཆུ་འཚོལ་ཇི་བཞིན་ཞིང་མང་མཆིས། །སངས་རྒྱས་ཁྲག་ཁྲིག་བརྒྱ་སྟོང་བསྙེན་བཀུར་ཀྱང༌། །རིག་སྔགས་རྒྱལ་མོ་འདི་ནི་མ་ཐོབ་ཀྱིས། །བཅོམ་ལྡན་འདས་ཁྱོད་མགོན་སྐྱབས་རྟེན་དང་གནས། །དབང་(ཆ༡༨བ)
པོ་ཉམས་ལ་མིག་དང་ལམ་སྟོར་ལམ། །ཉི་མས་གདུངས་པ་རྣམས་ལ་སྐྱོབ་པའི་གདུགས། །ལམ་གྱི་བཞི་མདོར་གནས་ཀྱི་སཱ་ལ་སྟེ། །ཆོས་ཀྱིས་ཕོངས་པ་རྣམས་ལ་མཐའ་ཡས་སྟོན། །སེམས་རབ་བརྟན་པའི་གོ་ཆ་ཉིད་གྱུར་ཅིག །དེ་ནས་སངས་རྒྱས་སྣང་བ་མཐའ་ཡས་དེས། །ཀ་ལ་པིངྐའི་དབྱངས་སྙན་གསུང་ཕྱུང་བས། །སྤྱན་རས་གཟིགས་དབང་བོས་སྟེ་བཀའ་བསྩལ་པ། །རིགས་ཀྱི་བུ་ཁྱོད་ལྟོས་ཤིག་ལེགས་པར་ལྟོས། །དེ་བཞིན་གཤེགས་པ་པདྨའི་མཆོག་འདི་ནི། །དེ་བཞིན་གཤེགས་པ་ཉིད་དུ་གྱུར་བཞིན་དུ། །ཡི་གེ་དྲུག་པའི་སྔགས་ཆེན་འཚོལ་བའི་སླད། །བྱེ་བ་ཁྲག་ཁྲིག་བརྒྱ་སྟོང་དུ་མ་ཡི། །ཞིང་ཁམས་དུ་མར་ཀུན་ནས་གཤེགས་མཛད་ཀྱིས། །ཡི་གེ་དྲུག་པའི་རིག་སྔགས་དབུལ་བར་གྱིས། །དེ་ནས་སྤྱན་རས་གཟིགས་ཀྱི་དབང་པོ་དེས། །རས་བྲིས་ཆོ་ག་དཀྱིལ་འཁོར་འཇུག་ཚུལ་དང༌། །གསང་བར་གདམས་པ་ལ་སོགས་རྒྱ་ཆེར་བསྟན། །ཨོཾ་མ་ཎི་པདྨེ་ཧཱུྃ། རིག་པའི་མཆོག་འདི་སྤྱན་རས་གཟིགས་དབང་གིས། །དེ་བཞིན་གཤེགས་པ་ང་ལ་བྱིན་མ་ཐག །ས་ཆེན་གཡོས་ཤིང་རྒྱ་མཚོ་རྣམ་པར་འཁྲུགས། །བགེགས་རྣམས་སྐྲག་ཅིང་འགྲོ་ལ་འཚེ་བྱེད་པའི། །གནོད་སྦྱིན་ཆེན་པོ་ཤ་ཟ་དུ་མ་དང༌། །ནག་པོ་ཆེན་པོ་བུད་མེད་བཅས་པར་བྲོས། །ངས་ཀྱང་མུ་ཏིག་མཆོག་གི་སེ་མོ་དོ། །བརྒྱ་སྟོང་རི་བ་སྤྱན་རས་གཟིགས་ལ་ཕུལ། །དེས་ཀྱང་སྤྱི་བོར་བླངས་སྟེ་བདེ་བར་གཤེགས། །སྣང་བ་མཐའ་ཡས་དེ་ལ་གུས་པས་ཕུལ། །དེ་ཡིས་བླངས་ནས་སླར་ཡང་ང་ལ་བྱིན། །ང་ཡིས་རིག་སྔགས་རྒྱལ་པོ་འདི་རྙེད་ནས། །པདྨའི་ཞིང་ཁམས་ཉིད་དུ་གཤེགས་སོ་ཞེས། །བདེ་གཤེགས་པདྨའི་མཆོག་ལས་ང་ཡིས་ཐོས། །གང་གིས་རིག་སྔགས་མཆོག་འདི་འབྲི་འམ་འབྲིར་བཅུག་ན། །དེ་ཡིས་ཆོས་ཕུང་བརྒྱད་ཁྲི་བཞི་སྟོང་བྲིས་པར་འགྱུར། །རྒྱལ་སྐུ་ཕྲ་རབ་རྡུལ་མཉམ་ལྷ་ཡི་གསེར་ལས་བྱེད། །བྱས་ནས་རིང་སྲེལ་བཅུག་པ་ཉིན་རེ་བཞིན་(ཆ༡༩ན)
བྱེད་ན། །དེ་ཡི་རྣམ་སྨིན་ཡི་གེ་དྲུག་པའི་རིག་སྔགས་འདིའི། །ཡིག་འབྲུ་གཅིག་གི་འབྲས་བུའི་རྣམ་པར་སྨིན་པ་ཙམ། །ཡོན་ཏན་བསམ་གྱིས་མི་ཁྱབ་ཐར་པར་ཤིན་དུ་གནས། །རིགས་ཀྱི་བུ་འམ་བུ་མོ་གང་ཞིག་འདི་ཟློས་ན། །དེས་ནི་ཏིང་འཛིན་དམ་པ་འདི་དག་ཐོབ་པར་འགྱུར། །ནོར་བུ་རིན་ཆེན་འཛིན་དང་དམྱལ་དང་བྱོལ་སོང་སྐེམ། །རྡོ་རྗེའི་གོ་ཆ་རྐང་པ་རབ་གནས་ཀུན་ཐབས་མཁས། །འཐོར་དང་ཆོས་རྣམས་ཀུན་ལ་འཇུག་པ་བསམ་གཏན་རྒྱུན། །ཆོས་ཀྱི་ཤིང་རྟ་ལ་འདུག་མཐའ་ཡས་པེ་འུ་དང༌། །འདོད་ཆགས་ཞེ་སྡང་ཀུན་ལས་ཡོངས་སུ་ཐར་བར་བྱེད། །ཕ་རོལ་ཕྱིན་དྲུག་འཆང་དང་རི་རབ་ཆེན་པོ་འཛིན། །སེམས་ཅན་སྲིད་པ་ལས་འགྲོལ་སངས་རྒྱས་ཞིང་ཀུན་སྟོན། །དེ་བཞིན་གཤེགས་ཀུན་གཟིགས་དང་ཤིན་དུ་གནས་པའི་གནས། །དེ་དག་ལ་སོགས་ཏིང་འཛིན་དམ་པ་བརྒྱ་རྩ་བརྒྱད། །ཡི་གེ་དྲུག་པའི་རིག་སྔགས་འཛིན་དེས་ཐོབ་པར་འགྱུར། །དེ་བས་སྒྲིབ་པ་རྣམ་སེལ་ཁྱོད། །འཁོར་མོ་འཇིག་གི་གྲོང་ཁྱེར་ན། །རིག་སྔགས་ཆེན་མོ་འདི་འཛིན་པའི། །ཆོས་སྨྲ་ཡོད་ཀྱིས་དེའི་གན་སོང༌། །རིག་སྔགས་མཆོག་འདི་འཛིན་པའི་ཆོས་སྨྲ་དེ་དག་དཀོན། །དེ་དག་དེ་བཞིན་གཤེགས་དང་མཉམ་པར་བལྟ་བར་བྱ། །འགྲོ་བའི་བསོད་ནམས་ཆེན་པོའི་གྲོང་དང་ཕུང་པོ་དང༌། །ཕྱིན་ཅི་མ་ལོག་གསུང་དང་རིན་ཆེན་ཕུང་པོ་བཞིན། །འདོད་རྒུ་སྦྱིན་བྱེད་ཡིད་བཞིན་ནོར་བུ་ལྟ་བུ་དང༌། །ཆོས་ཀྱི་མཛོད་དང་འགྲོ་བ་སྒྲོལ་བའི་མཉན་པ་བཞིན། །ལྟ་བར་བྱ་ཡི་དམ་ཆོས་སྨྲ་བ་དེ་དག་གི །སྤྱོད་པ་མཐོང་ནས་ཐེ་ཚོམ་སྐྱེ་བར་མི་བྱའོ། །རིགས་ཀྱི་བུ་ཁྱོད་བྱང་ཆུབ་སེམས་དཔའི་ས་བོར་ནས། །ངན་སོང་སྡུག་བསྔལ་མི་བཟད་ནང་དུ་སྐྱེ་ས་རེ། །ཆོས་སྨྲ་དེ་ནི་ཚུལ་ཁྲིམས་ཞིག་ཅིང་སྤྱོད་པ་ཉམས། །ཆུང་མ་དང་ནི་བུ་དང་བུ་མོས་ཡོངས་སུ་བསྐོར། །ངུར་སྨྲིག་གོས་ཀྱང་བཤང་དང་གཅི་བས་(ཆ༡༩བ)
གོས་གྱུར་པ། །སྤྱོད་ལམ་མ་བསྡམས་པ་ཡིན་ཁྱོད་ཀྱིས་ཤེས་པར་གྱིས། །དེ་ལྟར་འཚལ་ལོ་ཞེས་གསོལ་ནས། །རྒྱལ་སྲས་སྒྲིབ་པ་རྣམ་སེལ་དེ། །རབ་ཏུ་བྱུང་དང་ཁྱིམ་པ་དང༌། །ཁྱེ་འུ་དང་ནི་བུ་མོ་ཡི། །གཟུགས་ཅན་བྱང་ཆུབ་སེམས་དཔའི་ཚོགས། །བརྒྱ་ཕྲག་དུ་མས་བསྐོར་སྟེ་སོང༌། །ལྷ་ཡི་གདུགས་དང་ཅོད་པན་དང༌། །རྒྱན་ཆ་གོས་བཟང་མེ་ཏོག་སོགས། །མཐའ་ཡས་མཆོད་པའི་ཚོགས་ཁྱེར་སྟེ། །ཝ་ར་ཎ་སིའི་གྲོང་དུ་སོང༌། །སྤྱོད་ལམ་མ་བསྡམས་པ་དེ་ལ། །ཐེ་ཚོམ་མེད་པའི་དད་པ་ཡིས། །རྐང་པར་མགོ་བོས་ཕྱག་འཚལ་ནས། །མཆོད་པ་དེ་དག་ཀུན་གྱིས་མཆོད། །མདུན་དུ་ཐལ་མོ་སྦྱར་ནས་བསྟོད། །ཨེ་མ་ཧོ། ཆོས་གཏེར་མྱོང་བྱེད་བདུད་རྩིའི་གཏེར་བསགས་པ། །རྒྱ་མཚོ་ཆེ་དང་མཉམ་པ་ཁྱོད་ལ་དཔག་མི་ནུས། །མིར་གྱུར་ཀུན་དང་ལྷ་ལ་སོགས་པའི་འགྲོ་བ་ཀུན། །ཁྱོད་ལས་ཆོས་ཉན་དེ་ཀུན་ཐམས་ཅད་འཁོར་དུ་འདུ། །ཁྱོད་ནི་རྡོ་རྗེ་ཆེ་མཚུངས་ཆོས་ཀྱི་རྣམ་གྲངས་འཆང༌། །སེམས་ཅན་འཁོར་བས་བཅིངས་པ་མང་པོ་ཡོངས་ཐར་མཛད། །གྲོང་ཁྱེར་འདིར་གནས་ཁྱོད་ཀྱིས་རྟག་དུ་ཡོངས་སྡུད་ཅིང༌། །ཁྱོད་མཐོང་དེ་དག་བསོད་ནམས་དམ་པ་ལྡན་པ་ལགས། །མཐོང་མ་ཐག་དུ་སྡིག་པ་ཀུན་འཕྲོག་མཛད། །ཞུགས་ཀྱིས་ནགས་ཚལ་མྱུར་བར་སྲེག་པ་བཞིན། །ཁྱོད་ནི་བདེ་གཤེགས་ཀུན་གྱིས་རབ་ཏུ་མཁྱེན། །བྱང་སེམས་བྱེ་བ་ཁྲག་ཁྲིག་བརྒྱ་སྟོང་མང༌། །ཚངས་དང་ཁྱབ་འཇུག་དབང་ཕྱུག་ཉི་ཟླ་རླུང༌། །ཆུ་བདག་མེ་ལྷ་ཆོས་རྒྱལ་གཤིན་རྗེ་དང༌། །རྒྱལ་ཆེན་བཞི་མདོ་ཁྱོད་ལ་མཆོད་ཕྱིར་བརྩོན། །ཆོས་སྨྲ་དེ་ཡིས་སླར་སྨྲས་པ། །གྲོགས་པོ་ཉོན་མོངས་པ་རྣམས་ནི། །འཕགས་པ་མིན་པར་སྤྱོད་པའོ། །དེ་ནི་འཁོར་བའི་མཚན་མ་སྟེ། །སྐྱེ་རྒུའི་འཁོར་ལོ་སྐྱེད་པར་བྱེད། །ཡིག་དྲུག་རིག་སྔགས་སུས་ཤེས་པ། །དུག་གསུམ་དག་གིས་མི་གོས་སྟེ། །འཛམ་བུ་(ཆ༢༠ན)
ཆུ་བོའི་གསེར་བཟང་པོ། །ནམ་ཡང་དྲི་མས་མི་གོས་བཞིན། །རིག་སྔགས་རྒྱལ་མོ་འདི་ནི་དཀོན་པའི་ཚིག་ཡིན་སྟེ། །རྡོ་རྗེའི་ཚིག་དང་མི་ཕྱེད་བླ་མེད་ཡེ་ཤེས་ཚིག །མི་ཟད་པ་ཡི་ཡེ་ཤེས་ལྟག་ན་མེད་པའི་ཚིག །ཐར་པར་འཇུག་བྱེད་བདེ་གཤེགས་ཡེ་ཤེས་རྣམ་དག་ཚིག །དུག་གསུམ་དང་ནི་འཁོར་བའི་སྡུག་བསྔལ་ཡོངས་སྤོང་ཚིག །ཐབས་མཁས་ཀུན་ལྡན་ཆོས་རྣམས་ཀུན་ལ་འཇུག་བྱེད་ཚིག །བསམ་གཏན་རྣམ་ཐར་ཏིང་འཛིན་ཀུན་ལ་འཇུག་པའི་ཚིག །རྟག་དུ་ལྷ་རྣམས་འདོད་པར་བྱེད་པའི་ཚིག་ཡིན་ནོ། །འདི་ན་གང་ཞིག་ཐར་འདོད་ཀྱང༌། །ཐར་པའི་ཐབས་ལ་རྨོངས་པ་རྣམས། །དབང་པོའི་སྒོ་དང་དཀར་པོའི་སྒོ། །དེ་བཞིན་སྙན་པའི་བསྒོ་བ་སོགས། །གོས་ཀྱི་བསྒོ་བ་སྣ་ཚོགས་དང༌། །ཉི་མ་རྒྱུ་སྐར་བརྟགས་བྱས་ནས། །དབང་ཕྱུག་འཇུག་སྲེད་ན་མཁའ་ལྡིང༌། །གཅེར་བུ་པ་དང་རི་མི་སོགས། །སྣ་ཚོགས་གནས་ལས་རབ་འབྱུང་ཡང༌། །དེ་དག་ལ་ཡང་ཐར་པ་མེད། །མགོན་མིན་བརྟུལ་ཞུགས་ཅན་ཡང་མིན། །ཚངས་དང་ཁྱབ་འཇུག་དབང་ཕྱུག་དང༌། །ལྷ་དབང་ཉི་ཟླ་རླུང་ལྷ་ཆུ། །མེ་དང་གཤིན་རྗེ་རྒྱལ་ཆེན་བཞི། །དེ་སོགས་ལྷ་རྣམས་མང་པོ་ཡང༌། །རྟག་དུ་ཡི་གེ་དྲུག་པ་ཡི། །རིག་སྔགས་རྒྱལ་མོ་འདི་ཉིད་སློང༌། །ཇི་ལྟར་ཤེས་རབ་ཕ་རོལ་ཕྱིན་མ་ནི། །རྒྱལ་བ་ཀུན་སྐྱེད་ཡུམ་དུ་གྲགས་མོད་ཀྱི། །དེ་ཡང་རིག་སྔགས་རྒྱལ་མོ་འདི་ཉིད་ལ། །ཐལ་མོ་སྦྱར་ནས་ཕྱག་འཚལ་འདུད་བྱེད་ན། །སངས་རྒྱས་བྱང་སེམས་བཅས་པ་སྨོས་ཅི་དགོས། །འདི་ནི་འབྲས་ལྟར་སྙིང་པོར་གྱུར་པ་སྟེ། །འདི་ལ་ཅུང་ཟད་ཙམ་ཞིག་བཟླས་པས་ཀྱང༌། །ཐེག་མཆོག་གསུང་རབ་ཡན་ལག་བཅུ་གཉིས་དང༌། །ཞི་དང་ཐར་པ་དམ་པ་ཐོབ་པར་འགྱུར། །རྣལ་འབྱོར་གཞན་ཀུན་ཕུབ་མ་ལྟ་བུ་སྟེ། །འདི་ནི་འབྲས་ཀྱི་རྨེ་འུ་(ཆ༢༠བ)
ལྟ་བུ་ཡིན། །རྒྱལ་བའི་སྲས་རྣམས་ཕར་ཕྱིན་དྲུག་པོ་ལས། །རེ་རེའི་ཕྱིར་ཡང་དཀའ་ཚེགས་ཆེར་འབྱིན་མོད། །འདི་ཉིད་གཅིག་པོ་བཟླས་པས་ཕར་ཕྱིན་དྲུག །ལྷན་ཅིག་དཀའ་བ་མེད་པར་ཡོངས་སུ་རྫོགས། །ལ་ལ་འདི་ལ་ལག་གིས་རེག་བྱེད་ཀྱང༌། །དེ་ཡང་ཕྱིར་མི་ལྡོག་པ་ཐོབ་པར་འགྱུར། །དེ་ཡི་མིང་ཙམ་འཛིན་པའང་དཀོན་པ་སྟེ། །འདི་མིང་ལན་གཅིག་བཟུང་ཡང་རྒྱལ་ཀུན་ལ། །ཡོ་བྱད་ཀུན་གྱིས་རྟག་པར་བསྟབས་པར་འགྱུར། །དེ་ནས་ཆོས་ཀྱི་མཁན་པོ་དེ། །ཅུང་ཟད་སེམས་ཤིང་འདུག་པ་ལས། །སྟེང་གི་མཁའ་ལས་ཡིག་དྲུག་གི །རིག་སྔགས་བྱིན་ཞེས་སྒྲ་བྱུང་ངོ༌། །སྒྲ་འདི་གང་ལས་བྱུང་སེམས་ཚེ། །སླར་ཡང་མཁའ་ལས་རྒྱལ་སྲས་འདིས། །དཀའ་བ་དུ་མས་བརྩོན་བྱས་ཀྱི། །ཡིག་དྲུག་བྱིན་ཞིག་ཞེས་ཐོས་ནས། །སྟེང་གི་མཁའ་ལ་བལྟས་པ་དང༌། །འདམ་བུའི་མདོག་ལྟར་ཀུན་ནས་དཀར། །རལ་པའི་ཅོད་པན་མཛེས་པ་འཆང༌། །ཐམས་ཅད་མཁྱེན་པ་དབུར་བཞག་པ། །ཕྱག་ན་པདྨ་བཟང་པོ་ཐོགས། །པདྨའི་དཔལ་གྱིས་བརྒྱན་བྱས་པ། །དེ་འདྲའི་གཟུགས་བཟང་མཐོང་གྱུར་ནས། །སྤྱན་རས་གཟིགས་ཀྱི་དབང་པོ་ཡིས། །ཡི་གེ་དྲུག་པ་བྱིན་པར་གནང༌། །ཚུར་ཤོག་གུས་པར་བླང་བར་གྱིས། །ཨོཾ་མ་ཎི་པད་མེ་ཧཱུྃ། འདི་ནི་བྱིན་པར་གྱུར་མ་ཐག །ས་ཆེན་གཡོས་ཤིང་རྒྱ་མཚོ་འཁྲུགས། །མོད་དེར་སྒྲིབ་པ་རྣམ་སེལ་གྱིས། །མི་ཟད་པ་ཡི་ཆོས་ཉིད་དང༌། །བྱམས་དང་སྙིང་རྗེ་དགའ་བ་དང༌། །རྣལ་འབྱོར་སྤྱོད་དང་ཐར་པར་འཇོག །ཐམས་ཅད་སྣང་བྱེད་བཀོད་པའི་རྒྱལ། །ཆོས་འཛིན་པ་སོགས་ཏིང་འཛིན་ནི། །མཐའ་ཡས་དུ་མ་ཐོབ་པར་གྱུར། །རིན་ཆེན་བདུན་གྱིས་གླིང་བཞི་ནི། །བཀང་ནས་ཡོན་དུ་དབུལ་རྩོམ་ཚེ། །ཆོས་ཀྱི་མཁན་པོ་དེས་སྨྲས་པ། །འདིས་ནི་ཡི་གེ་གཅིག་ཉིད་ཀྱི། །ཡོན་གྱི་ཆར་ཡང་(ཆ༢༡ན)
ཡོང་མེད་ན། །དྲུག་གི་ཡོན་ཏུ་ལྟ་ཅི་སྨོས། །འོན་ཀྱང་ང་ནི་ཁྱོད་ཅག་ལས། །ཅི་ཡང་ལེན་པར་འདོད་པ་མེད། །ཁྱོད་ཀྱང་བྱང་ཆུབ་སེམས་དཔའ་སྟེ། །ཁྱོད་ནི་འཕགས་ཀྱིས་མི་འཕགས་མིན། །ཁྱོད་ནི་ང་ཡིས་འདུལ་བྱ་ཉིད། །དེ་ནས་རྒྱལ་སྲས་སྒྲིབ་སེལ་གྱིས། །བརྒྱ་སྟོང་རི་བའི་མུ་ཏིག་གི །ཕྲེང་བ་དེ་ལ་ཕུལ་བ་དང༌། །མཁན་པོ་འདི་ནི་ངའི་ཚིག་གིས། །དེ་བཞིན་གཤེགས་པ་རྫོགས་སངས་རྒྱས། །ཤཱཀྱ་ཐུབ་ལ་ཕུལ་ཞིག་གསུངས། །རྒྱལ་སྲས་སྒྲིབ་པ་རྣམ་སེལ་གྱིས། །ཆོས་སྨྲའི་རྐང་པར་ཕྱག་བྱས་ནས། །དེ་ནི་རྙེད་པའི་དམ་པ་རྙེད། །བསམ་པ་ཡོངས་སུ་རྫོགས་པ་ཡིས། །སྟོན་པའི་སྤྱན་སྔར་གུས་པས་སོང༌། །མཁན་པོའི་ཚིག་གིས་སྐྱེས་ཀྱང་ཕུལ། །སྟོན་པས་ཀུན་ནས་དགའ་བར་མཛད། །དེ་ནས་སྒྲིབ་པ་རྣམ་སེལ་གྱིས། །སྤྱན་རས་གཟིགས་དབང་ལྟར་འཚལ་ཞེས། །གསོལ་ཚེ་ཛེ་ཏའི་ཚལ་འདི་རུ། །ང་ལ་ལྟ་དང་མཆོད་པ་དང༌། །དབང་ཕྱུག་ཆེན་པོ་ལུང་སྟོན་ཕྱིར། །མྱུར་དུ་འོང་བར་འགྱུར་རོ་གསུངས། །དེ་ནས་བདེ་བ་ཅན་གྱིས་ཞིང༌། །སྤྱན་རས་གཟིགས་དབང་བཞུགས་པ་དེས། །འོད་ཟེར་སྣ་ཚོགས་བཀྱེ་བ་ཡིས། །ཛེ་ཏའི་ཚལ་ཀུན་སྣང་བྱས་སྟེ། །ལན་གསུམ་བསྐོར་ནས་འོད་དེ་ནི། །དམྱལ་བའི་གནས་སོང་གསལ་བར་བྱས། །ཛེ་ཏའི་ཚལ་ཀུན་ལྷ་ཡི་གསེར། །ལས་བྱས་བཀོད་པ་མཐའ་ཡས་སྣང༌། །སྐར་ཚོགས་དབུས་ན་ཟླ་བ་ལྟར། །རྒྱལ་སྲས་ཀུན་ལས་ཕུལ་བྱུང་བ། །སྤྱན་རས་གཟིགས་ཀྱི་དབང་པོ་དེ། །སྤྲིན་ཕུང་ནང་ནས་གློག་ཕྲེང་ལྟར། །སྐད་ཅིག་ཙམ་གྱིས་དེར་འོངས་སྟེ། །སྟོན་པའི་འོད་ཟེར་མ་གཏོགས་པ། །འོད་གཞན་ཐམས་ཅད་ཟིལ་གྱིས་མནན། །བསྟོད་ཅིང་ཕྱག་འཚལ་གཡས་སུ་བསྐོར། །སྟོན་པས་བཀའ་བསྩལ་རིགས་གྱིས་བུ། །ངལ་ལམ་ཆད་དམ་ཉོན་མོངས་སམ། །འགྲོ་མང་ཡོངས་སུ་སྨིན་བྱས་སམ། །དེས་ཀྱང་བདག་གིས་སེམས་ཅན་རྣམས། །སྨིན་པར་བྱེད་པའི་ལས་བསྒྲུབས་སོ། །ཞེས་གསོལ་སླར་ཡང་ལེགས་སོ་ཞེས། །རྒྱལ་བས་དབུགས་འབྱིན་དམ་པ་མཛད། །དེས་ཀྱང་གསེར་(ཆ༢༡བ)
གྱི་པདྨ་མཆོག །དེ་བཞིན་གཤེགས་ལ་ཕུལ་ནས་ནི། །སངས་རྒྱས་སྣང་བ་མཐའ་ཡས་ཀྱིས། །མེ་ཏོག་འདི་དག་སྐྱེས་སུ་བསྐུར། །སྐུར་གསོལ་གསུང་བར་མཛད་ཅེས་གསོལ། །སྟོན་པས་ཕྱག་གིས་བཞེས་ནས་ནི། །སྐུ་ཡི་གཡོན་ལོགས་སུ་བཞག་གོ །དེ་ནས་དབང་ཕྱུག་ཆེན་པོ་ཡིས། །སྟོན་པའི་ཞབས་ལ་ཕྱག་འཚལ་ནས། །བྱང་ཆུབ་ལུང་བསྟན་སྩོལ་ཞེས་གསོལ། །སྟོན་པའི་ཞལ་ནས་སྤྱན་རས་གཟིགས། །འདི་ཡིས་ཁྱོད་ལ་ལུང་སྟོན་འགྱུར། །ཞེས་གསུང་དབང་ཕྱུག་ཆེན་པོ་ཡིས། །འཕགས་པའི་ཞབས་ལ་མགོས་བཏུད་ནས། །སྤྱན་རས་གཟིགས་ཀྱི་དབང་པོ་དམ་པ་དབང་ཕྱུག་ཆེན་པོ་ཆོས་འཛིན་ལ། །པདྨའི་ཞབས་མངའ་པདྨ་ལ་དགྱེས་ཕྱག་ན་པདྨ་བཟང་པོ་མངའ། །པདྨའི་དཔལ་དང་ལྡན་པ་ཡོངས་སུ་བསྐོར་བ་འགྲོ་བའི་དབུགས་འབྱིན་མཛད། །ས་ཡི་སྤྱན་མཆོག་མཛད་པ་ཚིམ་པར་མཛད་ལ་གུས་པས་ཕྱག་འཚལ་ལོ། །སྤྱན་རས་གཟིགས་ཀྱི་དབང་པོས་བཀའ་བསྩལ་པ། །ཁྱོད་ནི་འཇིག་རྟེན་ཆེ་བ་ཞེས་བྱ་བར། །རྫོགས་པའི་སངས་རྒྱས་ལྷ་མིའི་སྟོན་པ་ནི། །དབང་ཕྱུག་ཞེས་བྱར་རྫོགས་འཚང་རྒྱ་བར་འགྱུར། །དེ་ནས་ལྷ་མོ་ཨུ་མ་ཡོང་ནས་ནི། །ཞབས་ལ་ཕྱག་འཚལ་བསྟོད་པས་བསྟོད་པར་བརྩོན། །བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་མཆོག །སྲོག་སྦྱིན་མཛད་པ་ས་ཡི་སྤྱན་མཆོག་ལྡན་པ་པདྨ་བཟང་པོ་མངའ། །པདྨའི་དཔལ་དང་ལྡན་པས་ཡོངས་སུ་བསྐོར་བ་མྱང་འདས་ས་སྟོན་པ། །ལེགས་པར་དགང་བར་མཛད་པ་ཆོས་སྦྱིན་པ་ལ་གུས་པས་ཕྱག་འཚལ་ལོ། །བུད་མེད་དམད་པའི་ལུས་ལས་ཡོངས་སུ་ཐར་བར་མཛོད། །མངལ་ན་གནས་ཅིང་ཤ་མས་གང་བའི་སྡུག་བསྔལ་དང༌། །རྟག་དུ་འཛིན་པ་ལས་ནི་བདག་ཡོངས་ཐར་བར་མཛོད། །བླ་མེད་བྱང་ཆུབ་མཆོག་ཏུ་(ཆ༢༢ན)
དབུགས་འབྱིན་མཛད་དུ་གསོལ། །སྤྱན་རས་གཟིགས་ཀྱི་དབང་པོས་བཀའ་བསྩལ་པ། །སྲིང་མོ་ཁྱོད་ནི་འཇིག་རྟེན་གངས་རི་ཡི། །གཡས་ལོགས་ཕྱོགས་སུ་ཨུ་མའི་དབང་ཕྱུག་ཅེས། །མངོན་པར་རྫོགས་འཚང་རྒྱ་ཞེས་ལུང་བསྟན་ཏོ། །སྟོན་པའི་ཞལ་ནས་སྒྲིབ་པ་རྣམ་སེལ་ལྟོས། །སྤྱན་རས་གཟིགས་འདིས་འདི་རྣམས་ལུང་བསྟན་སྟེ། །དབང་ཕྱུག་ཆེན་པོའི་ལེའུ་འདི་བཤད་ཏོ། །སྒྲིབ་སེལ་དགའ་ཞིང་རངས་པ་ཡིས། །སྟོན་པའི་གཙོ་ལ་འདི་སྐད་གསོལ། །སྤྱན་རས་གཟིགས་དབང་མཐོང་བ་ཡིས། །ལོང་བ་ཡིས་ནི་མིག་ཐོབ་ལྟར། །དེ་རིང་བདག་གསོན་འབྲས་བུ་མཆིས། །བསམ་གྲུབ་བསམ་རྫོགས་བྱང་ཆུབ་ཀྱི། །ལམ་ལ་བར་ཆད་མེད་པར་གྱུར། །ལེགས་པར་དགོངས་པ་ཆོས་ཀྱི་སྐུ། །མྱ་ངན་འདས་པ་ད་སྟོན་ཏོ། །སྤྱན་རས་གཟིགས་ཀྱི་ཡོན་ཏན་ཚོགས། །སླར་ཡང་ཉན་པར་འཚལ་ལོ་ཞེས། །སྟོན་པའི་སྤྱན་སྔར་གསོལ་བར་གྱུར། །རྒྱལ་བས་བཀའ་བསྩལ་དཔེར་ན་རི་རྒྱལ་ཁོར་ཡུག་དང༌། །ཁོར་ཡུག་ཆེ་དང་མུཉྩི་ལི་ང་ནག་པོ་ཆེ། །གསུས་གཞོལ་མི་སྟོན་ཀུན་དུ་གཏོགས་དང་འབར་བའི་ཁ། །རྩེ་མོ་བརྒྱ་པ་ཁང་པའི་རི་དང་ནོར་བུ་ཆེ། །སྟོན་པའི་རི་དང་དུས་མ་ཡིན་པར་སྟོན་པ་སོགས། །རི་རྒྱལ་དེ་ཀུན་སྲང་གཅིག་ལ་ནི་ཚད་གཞལ་ན། །སྲང་གི་གྲངས་དེ་མ་ལུས་ང་ཡིས་གཞལ་ནུས་ཀྱིས། །སྤྱན་རས་གཟིགས་དབང་བསོད་ནམས་ཕུང་པོ་བགྲང་མི་ནུས། །ཕྲ་རབ་རྡུལ་ཚད་བཟུང་ནུས་རྒྱ་མཚོ་ཐིགས་པས་དྲོངས། །ཤྲི་ཤའི་ཚལ་གྱི་འདབ་མ་རེ་རེ་ནས་བགྲང་ནུས། །སྤྱན་རས་གཟིགས་དབང་བསོད་ནམས་ཚོགས་ནི་བགྲང་མི་ནུས། །གླིང་བཞིའི་མི་ཀུན་ཡིག་མཁན་གྱུར་པས་རི་རབ་ནི། །གྲོ་གའི་ཕུང་པོར་གྱུར་ལ་རྒྱ་མཚོ་མཆིང་ནམ་ཆེ། །གནག་ཚར་བྱས་པས་ཟད་པའི་བར་དུ་བྲིས་བྱས་པའི། །(ཆ༢༢བ)
ཡིག་འབྲུ་རེ་རེ་ནས་ནི་ང་ཡིས་བགྲང་ནུས་མོད། །རྒྱལ་སྲས་འདི་ཡི་བསོད་ནམས་ཚད་ནི་ཟིན་མ་ཡིན། །དེ་བཞིན་གཤེགས་པ་གངྒའི་བྱེ་སྙེད་བཅུ་གཉིས་ལ། །ཡོ་བྱད་ཀུན་གྱིས་བསྐལ་མང་མཆོད་པའི་བསོད་ནམས་དེ། །སྤྱན་རས་གཟིགས་ཀྱི་དབང་པོའི་སྐྲ་རྩེ་གཅིག་ལ་གནས། །རྒྱལ་སྲས་འདི་ནི་ཏིང་འཛིན་བརྒྱ་ཕྲག་མང་ལྡན་སྟེ། །རབ་འཇོམས་རྒྱན་བྱེད་རྒྱན་མི་བྱེད་དང་གློག་གི་སྦྱིན། །བཟོད་བྱེད་གཟི་ཆེན་རྣམ་བྱེད་རྡོ་རྗེའི་ཕྲེང་མཆོག་སྦྱིན། །མཐུ་བརྒྱ་བཀོད་པ་མཐའ་ཡས་སྤོབས་པའི་ཕུང་པོ་དང༌། །རྒྱལ་དབང་རྣམ་མང་རྡོ་རྗེའི་སྒོ་དང་རྟག་མཆོག་སྦྱིན། །དབང་ཡོངས་ཐར་བྱེད་ཞེ་སྡང་ཡོངས་ཐར་དབང་མཆོག་མིག །ཉིན་བྱེད་མཆོག་སྤྱན་ཆོས་མངོན་དང་ནི་རྡོ་རྗེའི་མངལ། །ཤིན་དུ་སྟོན་པ་མྱ་ངན་འདའ་བྱེད་འོད་མཐའ་ཡས། །རྣལ་འབྱོར་བྱེད་དང་འཐོར་བ་འཛམ་གླིང་དག་པའི་མིག །རྒྱལ་ཞིང་མཆོག་སྤྱན་བྱམས་དང་འགྲོ་གནས་མི་ཟད་བྱེད། །མནར་མེད་སྐེམ་དང་རྒྱ་མཚོ་ལྟར་ཟབ་འཁོར་བརྒྱ་པ། །དེ་སོགས་ཏིང་འཛིན་གཞན་ཡང་བརྒྱ་སྟོང་མང་ལྡན་ཉིད། །སྔོན་ཚེ་རྒྱལ་བ་ལོག་པར་དད་སེལ་བྱུང་བའི་དུས། །ང་ནི་བྱང་ཆུབ་སེམས་དཔར་གྱུར་པས་རྒྱལ་དེ་ལས། །སྤྱན་རས་གཟིགས་ཀྱི་ཡོན་ཏན་བརྗོད་པ་དེ་ལྟ་ཐོས། །བྱང་ཆུབ་སེམས་དཔའ་ཀུན་དུ་བཟང་པོ་ལ་སོགས་དང༌། །འདི་འདྲའི་ཚུལ་དུ་ཏིང་ངེ་འཛིན་གྱིས་འགྱེད་པའང་མཐོང༌། །གང་ཚེ་ཀུན་བཟང་རྡོ་རྗེ་གྱེན་འཕགས་ཏིང་འཛིན་ཞུགས། །དེ་ཚེ་སྤྱན་རས་གཟིགས་དབང་མཐོང་བའི་ཏིང་འཛིན་འཇུག །ཀུན་བཟང་ཟླ་བ་མཆོག་ཅན་ཏིང་འཛིན་ལ་ཞུགས་ཚེ། །སྤྱན་རས་གཟིགས་དབང་ཉི་མ་དམ་པའི་སྤྱན་ལ་འཇུག །གང་ཚེ་ཀུན་བཟང་བྱུག་པའི་ཏིང་ངེ་འཛིན་ཞུགས་ཚེ། །སྤྱན་རས་གཟིགས་དབང་ནམ་མཁའི་འཛོད་ལ་སྙོམས་པར་འཇུག །ཀུན་དུ་བཟང་པོ་རྣམ་པར་བྱེད་ལ་སྙོམས་འཇུག་ཚེ། །སྤྱན་རས་གཟིགས་ཀྱི་དབང་ཕྱུག་(ཆ༢༣ན)
རྡོ་རྗེའི་ལྕགས་ཀྱུར་གནས། །གང་ཚེ་ཀུན་བཟང་བཟང་པོའི་འགྲོས་ལ་སྙོམས་ཞུགས་ཚེ། །སྤྱན་རས་གཟིགས་དབང་རྒྱ་མཚོ་ལྟར་ཟབ་ཏིང་འཛིན་གནས། །ཀུན་དུ་བཟང་པོ་སེང་གེའི་གླལ་གྱིས་རྩེ་བའི་ཚེ། །སྤྱན་རས་གཟིགས་དབང་སེང་གེ་རྣམ་རོལ་གྱིས་ཟིལ་གནོན། །ཀུན་བཟང་མཆོག་སྦྱིན་ཏིང་ངེ་འཛིན་ལ་མཉམ་བཞག་ཚེ། །སྤྱན་རས་གཟིགས་དབང་མནར་མེད་སྐེམ་པའི་ཏིང་འཛིན་བྱེད། །ཀུན་དུ་བཟང་པོ་བ་སྤུའི་ཁུང་བུ་ཀུན་འབྱེད་ཚེ། །སྤྱན་རས་གཟིགས་དབང་སྤུ་ཁུང་མ་ལུས་འབྱེད་པར་བྱེད། །དེ་ནས་ཀུན་དུ་བཟང་པོ་ངོ་མཚར་ཐོབ་གྱུར་སྟེ། །སྤྱན་རས་གཟིགས་དབང་ཁྱོད་ཀྱི་སྤོབས་པ་ཕུལ་བྱུང་བ། །དེ་ལྟ་ལེགས་སོ་ལེགས་སོ་ཞེས་སྨྲས་སངས་རྒྱས་དེས། །ཀུན་བཟང་ཁྱོད་ཀྱིས་སྤྱན་རས་གཟིགས་དབང་སྤོབས་པ་ནི། །ཅུང་ཟད་ཙམ་ཞིག་མཐོང་དུ་ཟད་དེ་རྒྱལ་སྲས་འདིའི། །སྤོབས་པ་ཅི་འདྲ་དེ་འདྲ་དེ་བཞིན་གཤེགས་ལའང་མེད། །དེ་སྐད་སངས་རྒྱས་དེ་ལས་ང་ཡིས་ཡོངས་སུ་ཐོས། །དེ་ལྟར་ཡོན་ཏན་རྒྱ་ཆེན་བཀའ་བསྩལ་ནས། །མདོ་འདི་ཡོངས་སུ་གཏད་པར་བྱ་བའི་ཕྱིར། །སུ་ཞིག་ཐེག་ཆེན་མདོ་སྡེ་ཟ་མ་ཏོག །བཀོད་པའི་རྒྱལ་པོ་འདི་ཡི་མིང་ཐོས་ཀྱང༌། །དེ་དག་སྔོན་གྱི་ལས་ཀྱི་སྒྲིབ་པ་འབྱང༌། །མཚམས་མེད་ལྔ་སོགས་དམད་པའི་ལས་བྱེད་པའི། །སྡིག་ཅན་རྣམས་ཀྱང་མདོ་སྡེ་འདི་འཛིན་ན། །མི་ཟད་སྡིག་པ་ཀུན་ལས་ཡོངས་སུ་ཐར། །འདི་ན་རི་རབ་རི་ཡི་རྒྱལ་པོའི་གཡས་ངོས་ན། །སྔོན་གྱིས་བདེ་གཤེགས་དྲུག་གིས་དྲི་མ་མེད་པ་ཡི། །མཐར་རུ་(ཆ༢༣བ)
བརྟགས་པ་ཡོད་སྟེ་ད་ལྟར་ངས་ཀྱང་བརྟགས། །གང་ཞིག་གོས་དཀར་ཁ་དོག་སྔོན་པོར་འགྱུར་བ་དང༌། །སྔོན་པོའི་གོས་ནི་ཁ་དོག་དཀར་པོར་འགྱུར་བའོ། །དེ་ལས་སྔ་མ་ཤོས་ནི་སྡིག་པའི་ཕུང་པོ་སྟེ། །ཕྱི་མ་ཤོས་ནི་ཆོས་ཀྱི་ཕུང་པོར་བལྟ་བར་བྱ། །དེ་བཞིན་མདོ་སྡེ་རྒྱལ་པོ་ཟ་མ་ཏོག་བཀོད་འདིས། །སྡིག་པའི་ཕུང་པོ་ཐམས་ཅད་སྲེག་ཞིང་དཀར་པོར་བྱེད། །དབྱར་དུས་ཙ་དང་ནགས་ཚལ་ཤིན་དུ་སྔོ་གྱུར་པ། །དེ་ཚེ་ཁ་བརྒྱ་པ་ཞེས་ཀླུ་ཡི་རྒྱལ་པོ་ཅིག །གནས་ནས་ལངས་སྟེ་དེ་དག་ཐམས་ཅད་སྲེག་པར་བྱེད། །དེ་བཞིན་མདོ་འདི་སྡིག་པའི་ནགས་ཚལ་སྲེག་བྱེད་ཡིན། །མདོ་སྡེ་འདི་ཐོས་སེམས་ཅན་དེ་དག་བདེ་དང་ལྡན། །དེ་ཀུན་སོ་སོའི་སྐྱེ་བོ་མིན་པར་རིག་པར་བྱ། །བྱང་ཆུབ་སེམས་དཔའ་ཕྱིར་མི་ལྡོག་དང་འདྲ་བར་ལྟོས། །འཆི་བའི་ཚེ་ན་སངས་རྒྱས་བཅུ་གཅིག་མངོན་གཤེགས་སྟེ། །མ་འཇིགས་མ་འཇིགས་ཁྱོད་ཀྱིས་མདོ་སྡེའི་རྒྱལ་པོ་ཐོས། །སླན་ཆད་མི་འཁོར་སྐྱེ་རྒ་ན་འཆི་མཐོང་མི་འགྱུར། །མི་སྡུག་མི་འཕྲད་སྡུག་ཅིང་འདོད་པ་མཐོང་བར་འགྱུར། །རིགས་ཀྱི་བུ་ཁྱོད་བདེ་བ་ཅན་གྱིས་ཞིང་དུ་སོང༌། །བདེ་གཤེགས་སྣང་མཐའ་ཡས་ལས་དམ་ཆོས་ཐོས་འགྱུར་ཞེས། །དབུགས་འབྱིན་མཛད་མཐོང་དེ་དག་བདེ་ནས་བདེ་བར་འགྲོ། །བཀའ་ཆེམས་ཁ་ཅིག་ལས་སྤྱན་རས་གཟིགས་ཛེ་ཏའི་ཚལ་ཏུ་འོངས་ནས་སྟོན་པ་མྱ་ངན་ལས་མི་འདའ་བར་གསོལ་བ་བཏབ་པའི་ཚེ་ངའི་གདུལ་བྱ་རྫོགས་སོ་ཞེས་གསུང་བ་ན་ད་དུང་ཁ་བ་ཅན་གྱི་སེམས་(ཆ༢༤ན)
ཅན་མ་ཐུལ་ལོ། །ཞེས་ཞུས་པས་དེ་ནི་ཁྱོད་ཀྱིས་གདུལ་བར་བྱ་བ་ཡིན་ནོ་ཞེས་ཁ་བ་ཅན་དུས་དེར་གཏད་པར་ཡང་གསུངས་སོ། །དེ་ལྟར་རྒྱལ་དང་རྒྱལ་སྲས་ཀུན་གྱི་བླ། །སྤྱན་རས་གཟིགས་ཀྱི་དབང་པོའི་རྒྱལ་པོ་དེས། །བོད་ཡུལ་འདི་ནི་ཐུགས་རྗེས་བདག་གིར་མཛད། །ཡུལ་འདིའི་འགྲོ་རྣམས་ལོངས་སྤྱོད་དམན་ན་ཡང༌། །ལྷ་སྐལ་ཐུགས་རྗེ་ཆེན་པོ་སྤྱན་རས་གཟིགས། །ཆོས་སྐལ་སྙིང་པོ་ཡི་གེ་དྲུག་མ་སྟེ། །དེ་ཕྱིར་ཡུལ་གྲུ་གཞན་ལས་ཁྱད་པར་འཕགས། །བོད་ཡུལ་དུ་ཆོས་བྱུང་ཚུལ་གྱི་སྐབས་ལས་ཟ་མ་ཏོག་བཀོད་པའི་མདོ་ལས་བྱུང་བའི་འཕགས་པ་སྤྱན་རས་གཟིགས་ཀྱི་རྣམ་པར་ཐར་པ་ཕྱོགས་ཙམ་དང་དེས་བོད་ཡུལ་ཇི་ལྟར་བདག་གིར་མཛད་པའི་ཚུལ་བཀའ་ཆེམས་ལྟར་བསྟན་པའི་སྐབས་སྟེ་དང་པོའོ།། །།སྭ་སྟི། ལྗོན་ཤིང་ངོས་ལ་སྤྲུལ་པའི་གཟུགས་འཆར་འདི། །རིག་པའི་འབྱུང་གནས་གཉལ་གྱི་སྒང་རྒྱུད་ནས། །རིག་བྱེད་པ་ནི་ཚེ་དབང་དར་པོས་གཙོས། །དཔོན་སློབ་དགུ་ཡིས་ལེགས་པར་བཟབས་སྟེ་བརྐོས། །མཐུན་རྐྱེན་ཕུན་སུམ་ཚོགས་པའི་སྦྱིན་བདག་ནི། །བྱ་ཡུལ་དཔོན་ས་ཚོགས་གཉིས་གྲུབ་མས་མཛད། །དགེ་ཚོགས་མ་ལུས་བྱང་ཆུབ་འཐོབ་ཕྱིར་སྔོ།། །།