དཔལ་ལྡན་རེད་མདའ་བ་ཆེན་པོའི་རྣམ་ཐར་ངོ་མཚར་རྨད་བྱུང་།

དཔལ་ལྡན་རེད་མདའ་བ་ཆེན་པོའི་རྣམ་ཐར་ངོ་མཚར་རྨད་བྱུང་ཞེས་བྱ་བ་བཞུགས་སོ། །

གུ་རུ་ཀུ་མ་ར་མ་ཏི་ལ་ན་མོ། བདེན་གཉིས་གནས་ལུགས་དོན་རྟོགས་མཁྱེན་པ་རྒྱས། །བྱང་ཆུབ་ཐུག་གཉིས་འབྱོངས་པའི་ཐུགས་རྗེ་ཅན། །མཁྱེན་རབ་ཐུགས་རྗེ་འགྲན་ཟླ་མ་མཆིས་པའི། །དཔལ་ལྡན་བླ་མའི་ཞབས་ལ་ཕྱག་འཚལ་ལོ། །འོད་སྲུངས་ཉེ་བར་འཁོར་དང་ཀུན་དགའ་བོས། །དགྲ་བཅོམ་ལྔ་བརྒྱའི་བླ་གོས་ཁྲི་སྟེང་ནས། །ཉམ་ཐག་དབྱངས་ཀྱིས་འདི་སྐད་བདག་ཐོས་ཞེས། །སྟོན་པའི་མཛད་ཚུལ་གུས་པས་བརྗོད་པ་བཞིན། །བཀའ་དྲིན་འཁོར་མེད་ཆོས་རྗེ་རིན་པོ་ཆེ། །མཐོང་བའི་སྐབས་མེད་དྲན་པའི་ཡུལ་དུ་གྱུར། །ཉིན་མཚན་བསམས་ཀྱང་ཡོན་ཏན་མཐའ་མ་རྟོགས། །ཆ་ཡི་ཆ་ཙམ་གུས་པས་བརྗོད་བགྱིས་ན། །ཐུབ་བསྟན་ནུབ་ཁར་དར་ཞེས་གསུང་པའི་དོན། །བསྟན་པའི་འཇུག་འདིར་སྐྱེས་ཆེན་ཁྱོད་བྱོན་ནས། །ལྟ་སྤྱོད་ཉམས་ལེན་རྣམ་དག་སྤེལ་ལ་དགོངས། །རྒྱལ་བས་ལུང་བསྟན་ཁྱོད་ལ་ཕྱག་འཚལ་ལོ། །བསམས་བཞིན་སྲིད་བཞེས་ཆོས་ལྡན་རིགས་སུ་འཁྲུངས། །བསྟན་པའི་སྒོར་ཞུགས་ཡོངས་འཛིན་མཁས་མང་བསྟེན། །སྡོམ་པ་གསུམ་བླངས་སྲོག་པས་གཅེས་པར་བཟུང་། །ཐུབ་པའི་རིང་ལུགས་ཁྱོད་ལ་ཕྱག་འཚལ་ལོ། །མདོ་རྒྱུད་བསྟན་བཅོས་ཀུན་ལ་ལེགས་སྦྱངས་ནས། །རྟག་ཆད་མཐར་ལྟའི་གྲུབ་མཐའ་མ་ལུས་པ། །རྣམ་དག་ལུང་དང་དངོས་སྟོབས་རིགས་པས་བཤིག །ལོག་སྨྲ་ཚར་གཅོད་ཁྱོད་ལ་ཕྱག་འཚལ་ལོ། །ལུང་རྟོགས་ཡོན་ཏན་ཐབས་མཁས་ཐུགས་རྗེ་ཡིས། །གདུལ་བྱའི་ཁམས་དང་བསམ་པ་བག་ལ་ཉལ། །ཇི་བཞིན་མཁྱེན་པ་ཆོས་ཀྱི་འཁོར་ལོ་བསྐོར། །སྐལ་ལྡན་རྗེས་འཛིན་ཁྱོད་ལ་ཕྱག་འཚལ་ལོ། །བདག་མེད་གནས་ལུགས་རྟོགས་པའི་ཤེས་རབ་ཀྱིས། །ཀུན་རྫོབ་རྟེན་འབྲེལ་སྒྱུ་མ་ལྟ་བུར་གཟིགས། །དོན་དམ་ཆོས་དབྱིངས་ནམ་མཁའ་ལྟ་བུར་རྟོགས། །ལྟ་བ་རྣམ་དག་ཁྱོད་ལ་ཕྱག་འཚལ་ལོ། །བཤེས་གཉེན་དུལ་བ་ཞི་བ་ཉེར་ཞི་བ། །སྡོམ་པ་ཀུན་ལྡན་ཉེས་ལྟུང་དྲི་མ་བྲལ། །སྒོ་གསུམ་མ་བཅོས་ལྷུགས་པའི་ངང་ལ་བཞུགས། །སྤྱོད་པ་རྣམ་དག་ཁྱོད་ལ་ཕྱག་འཚལ་ལོ། །ཚེ་འདི་བློས་བཏང་སྒྲུབ་པ་སྙིང་པོར་མཛད། །བདེན་བཞི་རྟེན་འབྲེལ་ཕྱིན་དྲུག་རིམ་གཉིས་སྒོམ། །ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས། །ཉམས་ལེན་རྣམ་དག་ཁྱོད་ལ་ཕྱག་འཚལ་ལོ། །ཐུགས་དམ་ཟབ་མོ་གནད་དུ་བསྣུན་པའི་རྟགས། །བླ་མ་ཡི་དམ་མཁའ་འགྲོ་ཆོས་སྐྱོང་སོགས། །རྒྱུན་དུ་གཟིགས་ཀྱང་རང་རྒྱལ་བརྟུལ་ཤུགས་བརྟེན། །ངོ་མཚར་རྨད་བྱུང་ཁྱོད་ལ་ཕྱག་ཚལ་ལོ། །གངས་རིའི་ཁྲོད་ཀྱི་ཆེ་བཙུན་འབྱོར་ལྡན་གྱིས། །གུས་པས་སྤྱན་དྲངས་རྙེད་དང་བཀུར་སྟིས་མཆོད། །དབང་བསྐུར་སེམས་བསྐྱེད་གདམ་པ་མང་དུ་ཞུས། །ཀུན་གྱིས་མཆོད་པ་ཁྱོད་ལ་ཕྱག་འཚལ་ལོ། །

འབྲུག་གི་ལོ་ལ་མྱ་ངན་འདས་དགོངས་ནས། །གོ་རྟོགས་ཉམས་སུ་མྱོང་བའི་ཟབ་དོན་རྣམས། །སྟོན་པས་བསྟན་པ་གཏོད་པ་ཇི་བཞིན་དུ། །ཆོས་འཁོར་ནན་འདོམས་ཁྱོད་ལ་ཕྱག་འཚལ་ལོ། །འཁོར་འདས་ཆོས་ཀུན་སྐྱེ་བ་མེད་བསྟན་ནས། །དེ་ཉིད་ངང་ལ་མྱ་ངན་འདའ་བཞེད་ནའང་། །གུས་པས་གསོལ་བཏབ་ངོ་རུ་ཞག་བདུན་བར། །སྐུ་ཚེ་བྱིན་རླབས་ཁྱོད་ལ་ཕྱག་འཚལ་ལོ། །འཆི་བ་འོད་གསལ་ལུས་ལ་བརྟེན་མི་སྲིད། །ལུས་སེམས་བྲལ་ནས་རྣམ་ཤེས་སྟོང་པར་བཞུགས། །དབྱིངས་རིག་དབྱེར་མེད་འོད་གསལ་ཡིན་ནོ་ཞེས། །ཡང་ཡང་གསུང་བ་ཁྱོད་ལ་ཕྱག་འཚལ་ལོ། །སྔར་བསྒོམས་འཕོ་བའི་མན་ངག་གསལ་བཏབ་ནས། །རྟགས་རྣམས་མ་རྗེད་དགའ་སྤྲོས་འོད་གསལ་འཇུག །འགོགས་ལས་ལྡང་ཞིང་སྔོན་གྱི་འཕེན་པས་འཕོ། །གསུང་བཞིན་མཛད་པ་ཁྱོད་ལ་ཕྱག་འཚལ་ལོ། །སྐུ་ཚེ་འདི་ཡི་དངོས་ཀྱི་གདུལ་བྱ་ལ། །ཟབ་རྒྱས་ཆོས་ཀྱི་འཁོར་ལོ་བསྐོར་ཟིན་ནས། །འཆི་བ་འོད་གསལ་སྐབས་སུ་གཞན་དོན་གཤེགས། །སྐྱེ་འཆི་དབང་ཐོབ་ཁྱོད་ལ་ཕྱག་འཚལ་ལོ། །སྒྱུ་ལུས་ཀུན་རྫོབ་བདེན་པ་རྣམ་པར་དག །འོད་གསལ་དོན་དམ་བདེན་པ་མངོན་དུ་གྱུར། །ཟུང་འཇུག་རྡོ་རྗེ་འཆང་གི་གོ་འཕངས་བརྙེས། །འཕྲིན་ལས་ལྷུན་གྲུབ་ཁྱོད་ལ་ཕྱག་འཚལ་ལོ། །ཞིང་གཞན་གཤེགས་ཚེ་ས་ཆེན་རབ་ཏུ་གཡོས། །དཔའ་བོ་མཁའ་འགྲོ་ལྷ་རྣམས་འདུས་གྱུར་ནས། །ཕྱི་དང་ནང་དང་གསང་བ་དེ་ཁོ་ནས། །མཆོད་ནས་སྤྱན་དྲངས་ཁྱོད་ལ་ཕྱག་འཚལ་ལོ། །

ཡེ་ཤེས་མེ་ཡིས་ཁྱོད་སྐུ་བཞུ་བའི་ཚེ། །མཁའ་ལ་སྤྲིན་མེད་བར་སྣང་རླུང་ཡང་ཞི། །ས་ལ་དྲོད་རྒྱས་དབྱར་བཞིན་བྱིན་གྱིས་བརླབས། །རྟེན་འབྲེལ་དབང་ཐོབ་ཁྱོད་ལ་ཕྱག་འཚལ་ལོ། །སྟོན་པའི་སྐུ་གདུང་ཆ་བརྒྱད་བགོས་པ་བཞིན། །ཁྱོད་གདུང་དད་ལྡན་ལྷ་མི་གྲངས་མེད་ཀྱིས། །ཕྱོགས་བཅུར་སྤྱན་དྲངས་མཆོད་པའི་རྟེན་དུ་གྱུར། །སྐུ་གདུང་རྒྱས་མཛད་ཁྱོད་ལ་ཕྱག་འཚལ་ལོ། །མཐོང་ཐོས་དྲན་རེག་གཏམ་དུ་བརྗོད་རྣམས་ཀྱིས། །འདི་ཕྱི་བར་དོའི་མགོན་སྐྱབས་དཔུང་གཉེན་མཛད། །བསླུ་མེད་སྐྱབས་གནས་དཔལ་ལྡན་རེད་མདའ་བ། །འདྲེན་མཆོག་དམ་པ་ཁྱོད་ལ་ཕྱག་འཚལ་ལོ། །ཀྱེ་མ་ཀྱེ་ཧུད་བསྟན་པའི་སྲོག་ཤིང་ཆག །བསྟན་འཛིན་དགེ་འདུན་ཕྱོགས་བཅུར་མཐོར་ལགས་སོ། །ཀྱེ་མ་ཀྱེ་ཧུད་ཐར་པའི་རྒྱལ་མཚན་འགྱེལ། །ཐར་འདོད་རྣམས་ཀྱི་ཐར་ལམ་སྟོར་ལགས་སོ། །ཀྱེ་མ་ཀྱེ་ཧུད་ལེགས་བཤད་དགའ་སྟོན་ཉམས། །བློ་གསལ་རྣམས་ཀྱི་རེ་ཐག་བཅད་ལགས་སོ། །ཀྱེ་མ་ཀྱེ་ཧུད་ལྟ་བའི་ཉི་མ་ནུབ། །ཀླུ་སྒྲུབ་ཡབ་སྲས་ལུགས་བཟང་སུ་ཡིས་སྟོན། །ཀྱེ་མ་ཀྱེ་ཧུད་དམ་ཆོས་རྒྱ་མཚོ་སྐམ། །ཐོག་མེད་སྐུ་མཆེད་བཤད་སྲོལ་སུ་ཡིས་སྐྱོང་། །ཀྱེ་མ་ཀྱེ་ཧུད་ལུང་རིགས་མཆེ་སྡེར་མཐོར། །ཕྱོགས་གླང་ཆོས་གྲགས་རིགས་ཚུལ་སུ་ཡིས་སྤེལ། །ཀྱེ་མ་ཀྱེ་ཧུད་ཚུལ་ཁྲིམས་བུམ་པ་བཞིག །ཡོན་ཤཱག་རྣམ་གཉིས་སྡོམ་རྒྱུད་སུ་ཡིས་འཛིན། །ཀྱེ་མ་ཀྱེ་ཧུད་སྤངས་རྟོགས་གོ་རིམ་འཆོལ། །འཕགས་སེང་གཉིས་ཀྱི་ལུང་རིགས་སུ་ཡིས་བསྒྲོག །ཀྱེ་མ་ཀྱེ་ཧུད་ཉམས་རྟོགས་བྱིན་རླབས་ཡལ། །ཏེ་ལོ་ནཱ་རོའི་མན་ངག་སུ་ལ་ཞུ། །ཀྱེ་མ་ཀྱེ་ཧུད་ཕན་བདེ་པད་ཚལ་ཟུང་། །བཤད་སྒྲུབ་བསྟན་པ་ཅིག་ཆར་ནུབ་ལགས་སོ། །ཀྱེ་མ་ཀྱེ་ཧུད་ཉམ་ཐག་ཡིད་རེ་མུག །ཁྱེད་སྐུ་མིག་གིས་མཐོང་བའི་སྐལ་བས་དབེན། །ཁྱོད་གསུང་རྣ་བས་ཐོས་པའི་བསོད་ནམས་མེད། །ཁྱོད་ཐུགས་གང་ན་བཞུགས་ཀྱང་བྱིན་གྱིས་བརློབ། །དགེ་ལེགས་ཡོན་ཏན་ཆུ་གཏེར་ཆེན་པོ་ལས། །ཆུ་ཐིགས་གཅིག་ཙམ་བླངས་ལ་ཉེས་པའི་ཚོགས། །ཇི་སྙེད་མཆིས་པ་ཐམས་ཅད་མཐོལ་ལོ་བཤགས། །ཞབས་འབྲིང་གཉུག་མའི་ཚོགས་ལ་བཟོད་པར་གསོལ། །བླ་མའི་རྣམ་ཐར་ངོ་མཚར་སྨད་བྱུང་འདི། །བཤེས་གཉེན་བསོད་ནམས་གྲགས་དོན་བཀས་བསྐུལ་ནས། །གྲངས་མེད་གདུལ་བྱའི་ཐ་ཤལ་མངའ་རིས་པ། །མི་ཕྱེད་དད་ཐོབ་སངས་རྒྱས་རྩེ་མོས་སྦྱར། །དགེ་བ་འདི་དང་དགེ་བའི་རྩ་བ་གཞན། །མ་ལུས་བློ་ཡིས་གཅིག་ཏུ་སྡོམ་བྱས་ནས། །བླ་མ་མཆོག་ལ་གུས་པས་ཕུལ་བ་ཡིས། །བླ་མ་དམ་པའི་ཐུགས་དགོངས་ཡོངས་རྫོགས་ནས། །དཔལ་ལྡན་བླ་མའི་རྣམ་ཐར་འཁྱོང་པ་ཡི། །སྐུ་གསུང་ཐུགས་ཀྱིས་བྱིན་གྱིས་བརླབ་ཏུ་གསོལ། །བདེན་གཉིས་གནས་ལུགས་དོན་རྟོག་མཁྱེན་པ་རྒྱས། །བྱང་ཆུབ་ཐུགས་གཉིས་འབྱོང་བའི་ཐུགས་རྗེ་ཅན། །མཁྱེན་རབ་ཐུགས་རྗེ་འགྲན་ཟླ་མ་མཆིས་པའི། །དཔལ་ལྡན་བླ་མའི་ཞབས་ལ་ཕྱག་འཚལ་ལོ། །

ཅེས་པ་འདི་མི་འཕྲོག་པའི་མཁྱེན་རབ་དང་ཐུགས་རྗེ་དཔག་ཏུ་མེད་པ་མངའ་བའི་བདག་ཉིད་མཁས་པའི་དབང་པོ་དཔལ་ལྡན་རེད་མདའ་བ་ཞེས་མཚན་ཡོངས་སུ་གྲགས་པ་དེ་ཉིད་ཀྱིས་ཀུན་རྫོབ་ཀྱི་བདེན་པ་གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད། སྤྱི་མཚན་རང་གི་ངོ་བོས་སྟོང་པར་ཐུགས་སུ་ཆུད་ཅིང་། རང་མཚན་ལག་མཐིལ་གྱི་སྐྱུ་རུ་ར་ལྟར་གཟིགས་པ་ཇི་སྙེད་པ་མཁྱེན་པ་དང་། དོན་དམ་བདེན་པ་འཁོར་འདས་ཀྱི་ཆོས་ཐམས་ཅད་ཀྱི་གནས་ལུགས་སྤྲོས་པའི་མཐའ་ཐམས་ཅད་དང་བྲལ་བར་ཐུགས་སུ་ཆུད་པ་ཇི་ལྟ་བ་བཞིན་མཁྱེན་པའི་ཡེ་ཤེས་མངའ་བས་ན་མཁྱེན་པའི་ཡེ་ཤེས་རྒྱས་པའོ། །འགྲོ་བ་མཐའ་དག་འཁོར་བ་སྡུག་བསྔལ་གྱི་རྒྱ་མཚོ་ལས་གྲོལ་བར་འདོད་པའི་ལྷག་བསམ་རྣམ་པར་དག་པའི་གོ་བགོས་ཤིང་སྒྲོལ་བར་བྱེད་པའི་སྦྱོར་བ་ཕུན་སུམ་ཚོགས་པའི་བརྩོན་འགྲུས་དང་ལྡན་པས། སྨོན་པ་དང་འཇུག་པའི་བྱང་ཆུབ་ཀྱི་ཐུགས་གཉིས་འབྱོངས་པས་ན་ཐུགས་རྗེ་ཆེན་པོ་དང་ལྡན་པའོ། །དེ་ལྟ་བུའི་མཁྱེན་རབ་དང་ཐུགས་རྗེ་མཉམ་པའི་ལྷག་པ་གངས་ཅན་གྱི་ཁྲོད་ན་མེད་པས་འགྲན་ཟླ་དང་བྲལ་བའོ། །

བདག་ཉིད་ཆེན་པོའི་ཞལ་མངའ་ནས། སྲིད་ཞི་འབྱོངས་པར་ལྟ་བའི་ཤེས་རབ་དང་། །མཁའ་མཉམ་འགྲོ་ལ་དམིགས་པའི་སྙིང་རྗེ་གཉིས། །རེས་འགའ་རེས་འཇོག་རེས་འགའ་ཟུང་འབྲེལ་བསྒོམ། །ཞེས་གསུང་བསྟོད་པར། ཆོས་རྗེ་བློ་བཟང་གྲགས་པས་མཁྱེན་རབས་གཞན་དང་སྐལ་པ་མི་མཉམ་ཞིང་། །མཁན་ཆེན་ཆོས་རྒྱལ་བས་༈སྙིང་པོ་ཆེན་པོའི་བདེ་དྲོད་རབ་འབར་ན། །ཞེས་སོ། །ཚོགས་གཉིས་ཀྱི་དཔལ་དང་ལྡན་ཞིང་། དབང་རྒྱུད་མན་ངག་ཕྱིན་ཅི་མ་ལོག་པ་ཐོབ་ཅིང་། ཐུགས་སུ་ཆུད་ནས་སྟོན་པ་བླ་མའི་སྐུའི་ཆ་ཐམས་ཅད་ཀྱི་པདྨོ་ལ་རང་གི་ཡན་ལག་ཀུན་གྱི་མཆོག་སྤྱི་བོས་འདུད་པས་ལུས་དང་། གང་གི་དྲིན་གྱི་བདེ་ཆེན་ཉིད། །ཅེས་སོགས་ཀྱི་བསྟོད་པས་ངག་དང་། དད་ཅིང་གུས་པ་བསྐྱེད་པས་ཡིད་དེ། གུས་པའི་སྒོ་ནས་ཕྱག་འཚལ་ལོ། །འོད་སྲུངས་ཉེ་བར་འཁོར་དང་ཀུན་དགའ་བོས། །དགྲ་བཅོམ་ལྔ་བརྒྱའི་བླ་གོས་ཁྲི་སྟེང་ནས། །ཉམ་ཐག་དབྱངས་ཀྱིས་འདི་སྐད་བདག་ཐོས་ཞེས། །སྟོན་པའི་མཛད་ཚུལ་གུས་པས་བརྗོད་པ་བཞིན། །

ཞེས་པ་ནི། སྟོན་པའི་ཉན་ཐོས་བརྒྱད་ཁྲི་བཞི་སྟོང་གི་ནང་ནས་སྦྱངས་པ་དང་། འདུལ་བ་འཛིན་པ་དང་། མང་དུ་ཐོས་པ་རྣམས་ཀྱི་མཆོག་ཏུ་གྱུར་པ་འོད་སྲུངས་དང་། ཉེ་བར་འཁོར་དང་ཀུན་དགའ་བོས་སྟོན་པ་མྱ་ངན་ལས་འདས་པའི་འོག་ཏུ་བསྟན་པ་དམ་པའི་ཆོས་ཡུན་རིང་དུ་གནས་པར་བྱ་བའི་ཕྱིར། བསྟན་འཛིན་དགྲ་བཅོམ་པ་ལྔ་བརྒྱར་གཅིག་གི་མ་ཚང་པ་བསྡུས་ནས། དེ་དག་གི་བླ་གོས་ཀྱི་ཁྲི་སྟེང་ནས་སྟོན་པའི་ཡོན་ཏན་དྲན་ནས། ཉམ་ཐག་པའི་དབྱངས་ཀྱིས་འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་ལ་ཞེས་སོགས་ཀྱི་སྒོ་ནས། སྟོན་པས་དང་པོར་བྱང་ཆུབ་ཀྱི་མཆོག་ཏུ་ཐུགས་བསྐྱེད། བར་དུ་བསྐལ་པ་གྲངས་མེད་གསུམ་དུ་ཚོགས་བསགས། ཐ་མར་མཛད་པ་བཅུ་གཉིས་ཀྱིས་འགྲོ་བའི་དོན་མཛད་པའི་ཚུལ་མངོན་པ། འདུལ་བ། མདོ་སྡེའི་སྡེ་སྣོད་རིན་པོ་ཆེའི་རྣམ་པ་གསུམ་ལེགས་པར་བསྡུས་པ་བཞིན་དུ། བཀའ་དྲིན་འཁོར་མེད་ཆོས་རྗེ་རིན་པོ་ཆེ། །མཐོང་བའི་སྐབས་མེད་དྲན་པའི་ཡུལ་དུ་གྱུར། །ཉིན་མཚན་བསམས་ཀྱང་ཡོན་ཏན་མཐའ་མ་རྟོགས། །འཆི་བ་ཆ་ཙམ་གུས་པས་བརྗོད་བགྱིད་ན། །ཞེས་པ་ནི་བདག་སོགས་གདུལ་བྱ་རྣམས་ལ་ཡང་དག་པའི་ལམ་བསྟན་པའི་བཀའ་དྲིན་འཁོར་བ་མེད་པའི་ཆོས་ཀྱི་རྗེ་དེ་ཉིད་མིག་ཤེས་ཀྱིས་མངོན་སུམ་དུ་མཐོང་བའི་སྐལ་བ་མེད་ཅིང་། ཡིད་ཤེས་ཀྱིས་དྲན་པའི་ཡུལ་འབའ་ཞིག་ཏུ་གྱུར་ཏེ། ཉིན་མཚན་དུ་གུས་པས་བསམས་ཀྱང་ལུང་དང་རྟོགས་པའི་ཡོན་ཏན་གྱི་ཕ་མཐའ་རྟོགས་པར་མི་ནུས་ཏེ། བསྟོད་པར། བཤེས་གཉེན་མཁའ་ལྡིང་དབང་པོ་རྣམས་ཀྱིས་ཀྱང་། །ཁྱོད་ཀྱི་ཡོན་ཏན་མཐའ་མ་མཐོང་བ་ན། །གང་གི་བློ་གྲོས་ཕྱེ་མ་ལེབ་ལྟ་བུས། །དེ་ནི་དཔོག་པར་ནུས་པ་ག་ལ་ཡོད། །ཅེས་སོ། །

དེ་ལྟ་ནའང་རང་གི་སྐལ་བ་དང་འཚམས་པར་མཐོང་ཞིང་ཐོས་པའི་ཡོན་ཏན་ཆའི་ཆ་ཙམ་སྒྲོ་འདོགས་པ་དང་། ལྕམ་བུ་སྤང་ནས་གུས་པས་བརྗོད་པར་བགྱིས་ན་ཐུབ་བསྟན་ནུབ་ཁར་དར་ཞེས་གསུངས་པའི་དོན། བསྟན་པའི་འཇུག་འདིར་སྐྱེས་ཆེན་ཁྱོད་བྱོན་ནས། །ལྟ་སྤྱོད་ཉམས་ལེན་རྣམ་དག་སྤེལ་ལ་དགོངས། །རྒྱལ་བས་ལུང་བསྟན་ཁྱོད་ལ་ཕྱག་འཚལ་ལོ། །ཞེས་པ་ནི་མདོ་ལས། མར་མེ་འཆི་ཁར་གསལ་བ་ལྟར། །ང་ཡི་བསྟན་པ་ནུབ་ཁར་དར། །ཞེས་ལུང་བསྟན་པའི་དགོངས་པ་ཡིན། ཡང་རྙིགས་བསྟན་པའི་འཇུག་འདིར་མཁས་ཤིང་གྲུབ་པ་མཉེས་པའི་སྐྱེས་ཆེན་ཁྱེད་བྱོན་ནས། ལྟ་བ་དང་སྤྱོད་པ་ཉམས་ལེན་རྣམ་པར་དག་པའི་སྒོ་ནས་སངས་རྒྱས་ཀྱི་བསྟན་པ་དར་ཞིང་རྒྱས་པར་མཛད་པ་ལ་དགོངས་པ་ཡིན་ཏེ། དེའི་རྒྱུ་མཚན་སྔར་གངས་རིའི་ཁྲོད་འདིར་མཁས་པའི་དབང་པོ་མང་དུ་བྱོན་ན་ཡང་། འགའ་ཞིག་གིས་ལྟ་བའི་ཆ་དེ་ཁོ་ན་གསལ་བར་མཛད། འགའ་ཞིག་གིས་སྤྱོད་པའི་ཕྱོགས་དེ་ཁོ་ན་གསལ་བར་མཛད། འགའ་ཞིག་གིས་ཉམས་ལེན་གྱི་ཆ་ཁོ་ན་གསལ་བར་མཛད་པ་ཙམ་དུ་ཟད། བཤད་སྒྲུབ་གཉིས་ཀའི་སྒོ་ནས་བསྟན་པ་གསལ་བར་མཛད་པ་ཁྱོད་ལས་གཞན་སྔར་མ་བྱུང་བར་མཐོང་ཞིང་ཐོས་པས་ཁུམས། ཕྱིས་ཀྱང་མི་འབྱུང་སྟེ། བདག་ཉིད་ཆེན་པོའི་གསུང་ལས། མང་པོས་བཀུར་བས་ཆེན་པོར་གྲགས་རྣམས་ཀྱང་། །རྙེད་དང་བཀུར་སྟི་གྲགས་པ་ལྷུར་བྱེད་ཀྱི། །སངས་རྒྱས་བསྟན་པ་ཆེད་ཆེར་མི་འཛིན་ན། །འདི་ན་ཐུབ་བསྟན་གཅེས་འཛིན་དམ་པ་སུ། །མཁས་རློམ་ཕལ་ཆེར་སྨྲ་མཁན་ནེ་ཙོ་བཞིན། །ཚིག་གི་རྗེས་འབྲང་གཞུ་ཙམ་ཀློག་པར་ཟད། །རིགས་དང་མི་རིགས་འབྱེད་ལ་ཐོམ་གྱུར་ན། །འདི་ན་རིགས་ལྡན་ལེགས་བཤད་སྨྲ་བ་གང་། །ཉིན་དང་མཚན་དུ་རྣལ་འབྱོར་བསྒོམས་རྣམས་ཀྱང་། །ལྷག་སྤྱོད་ཀྱིས་ནི་ཏིང་འཛིན་སྒོམ་པ་བཞིན། །ཡང་དག་ལྟ་བའི་གནད་ཀྱིས་དབེན་གྱུར་ན། །འདི་ན་ཡང་དག་ལམ་ཞུགས་སྒྲུབ་པོ་མེད། །ལྟོ་ཕྱིར་རབ་བྱུང་གྲལ་ཕྱིར་བསྙེན་རྫོགས་ཀྱང་། །ཚུལ་ལྡན་བསླབ་ལ་གུས་པའི་དགེ་སྦྱོང་ཉུང་། །ཀྱེ་མ་ཀྱེ་ཧུན་ཤཱཀྱའི་བསྟན་པ་ནི། །མིང་ཙམ་ལུས་པར་ཁོ་བོ་གཅིག་པུས་མཐོང་། །

ཞེས་དང་། བློ་བཟང་བསྟོད་པར། ཀླུ་སྒྲུབ་ཐོག་མེད་གཉིས་ནི་བཞེད་པའི་ལུགས། །ཇི་བཞིན་ཐུགས་སུ་ཆུད་ནས་བརྩེ་བ་ཡིས། །སྐྱོན་བྲལ་གསུང་གི་ལེགས་བཤད་ལེགས་འདོམས་པས། །བསྟན་པའི་གནད་ལ་ངེས་པ་སྟེར་བ་འདི། །ཁྱོད་ཀྱི་རྗེས་སུ་བསྟན་ལས་གཞན་སུ་ཞིག །ཅེས་སོ། །བསམས་བཞིན་སྲིད་བཞེས་ཆོས་ལྡན་རིགས་སུ་འཁྲུངས། །བསྟན་པའི་སྒོར་ཞུགས་ཡོངས་འཛིན་མཁས་མང་བསྟེན། །སྡོམ་པ་གསུམ་བླངས་སྲོག་པས་གཅེས་པར་བཟུང་། །ཐུབ་པའི་རིང་ལུགས་ཁྱོད་ལ་ཕྱག་འཚལ་ལོ། །ཞེས་པ་འདི། བདག་ཉིད་ཆེན་པོ་འདི་སྐུ་ཚེ་སྔ་མར་ཁ་ཆེར་པཎྜི་ཏ་དོན་ཡོད་རྡོ་རྗེ་ཞེས་བྱ་བར་སྐུ་འཁྲུངས་ནས། ཆོས་རྗེ་བློ་བཟང་གྲགས་པ་པཎྜི་ཏ་མ་ཏི་བྷ་ཏྲར་གྱུར་པས་གཙོ་མཛད་གདུལ་བྱ་བསམ་གྱིས་མི་ཁྱབ་པ་ལ་ཆོས་སྡེ་སྣོད་གསུམ། རྒྱུད་སྡེ་བཞིའི་སྤྱི་དོན་ཕྱིན་ཅི་མ་ལོག་པར་བསྟན་ནས། བསྟན་པ་དང་སེམས་ཅན་གྱི་དོན་རྒྱ་ཆེན་པོ་མཛད་ཚུལ།  གསང་བདག་གིས་ཕྱག་རྡོར ་གྲུབ་ཐོབ་ལ་གསུངས་པ་ཡིན། དེ་ནས་བསམས་བཞིན་དུ་གངས་རིའི་ཁྲོ་འདིར་ལྟ་སྤྱོད་ཉམས་ལེན་ཕྱིན་ཅི་ལོག་ཏུ་སྤྱོད་པ་རྣམས་ཚར་བཅད་པའི་ཕྱིར། བོད་ཀྱི་རྡོ་རྗེ་གདན་དཔལ་ལྡན་ས་སྐྱ་དང་ཉེ་བ་ན། རེད་མདའ་ཁབ་སོར་གྲགས་པ་དེར། ཆོས་རྒྱལ་སྲོང་བཙན་སྒོམ་པོའི་ནང་བློན། བློན་པོ་མགར་སྟོངས་བཙན་ཡུལ་སྲུངས་ཀྱི་བརྒྱུད་པ། ཡབ་རེད་མདའི་བློན་ཆེན་བཀྲ་ཤིས་རྒྱལ་མཚན་དང་། ཡུམ་ལྷག་བསམ་རྣམ་པར་དག་པ་བྲམ་ཟེ་མ་གསལ་བའི་ཚུལ་ཁྲིམས་དང་ཚུལ་མཚུངས་པ་ཡེ་ཤེས་ཀྱི་མཁའ་འགྲོ་མ་ཞེས་བྱ་བ་གཉིས་ཀྱི་སྲས་སུ་གྱུར་ཏེ། ལྷུམས་སུ་ཞུགས་པའི་ཚེ་ཡུམ་ལ་ཉི་ཟླ་ཤར་བ་དང་སྒྲོན་མེ་སྤར་བ་དང་། གཙུག་ལག་ཁང་བཞེངས་པ་ལ་སོགས་རྨི་ལྟས་བཟང་པོ་མང་པོ་བྱུང་ཞིང་། ལུས་སྡུག་བསྔལ་དང་བྲལ། སེམས་བདེ་བ་དང་ལྡན་པར་གྱུར་ཏོ། །

བཙས་པའི་ཚེ་ན་ཡང་། ཡུམ་སྲས་གཉིས་ཀ་ལ་བཙའ་བའི་སྡུག་བསྔལ་དང་བྲལ་བར་གྱུར་ཏོ། །བསྟོད་པར། ཁྱོད་ནི་ལུམ་བྷའི་ནགས་སུ་རྒྱལ་བ་བཞིན། །དྲི་མེད་ཡུམ་གྱི་ལྷུམས་ནས་བལྟམས་པའི་ཚེ། །བསོད་ནམས་ཕུན་ཚོགས་ཁྱོད་སྐུ་མ་བཟུང་ཕྱིར། །ཚངས་དབང་ཉིད་དུ་གྱུར་རམ་ཡང་ན་ཤི། །ཞེས་སོ། །དེ་ནས་འོ་མ་དང་ཞོ་དང་། མར་གྱི་ཉིང་ཁུ་སོགས་ཀྱིས་བསྐྱེད་བསྲིང་སྟེ་མཚན་ཡང་རྗེ་བཙུན་ཞེས་བྱ་བར་གསོལ་ཏོ། །སྨྲ་ཤེས་དོན་གོ་ཚུན་ཆད་དཀོན་མཆོག་གསུམ་གྱི་སྒྲ་ཐོས་པའམ་རྟེན་མཐོང་བ་ན་དད་ཅིང་གུས་པ་ཆེར་སྐྱེ་བར་བྱུང་། ཡབ་ཡུམ་གཉིས་ཀ་གཞོན་ནུའི་དུས་ནས་འདས་ཤིང་། ཨ་ནེ་མཚན་ལྡན་གྱི་མཁའ་འགྲོ་མ་བཀྲ་ཤིས་འབུམ་ཞེས་བྱ་བས་གཞོན་ནུ་ཉིད་ནས་མཁས་པའི་དབང་པོ་ཆེན་པོར་གྱུར་གྱི་བར་དུ་ཞབས་ཏོག་སྐྱོ་ངལ་མེད་པར་ཕུལ་བས། དྲིན་ཤིན་ཏུ་ཆེ་གསུངས། བདག་ཉིད་ཆེན་པོ་འདི་བྱིས་པའི་དུས་སུ། ཨ་ནེ་ལ། ང་ཡང་ན་ས་སྐྱ་དཔོན་ཆེན་གྱི་ལག་རྟགས་བླངས་ནས་བོད་ཁམས་བདེ་བ་ལ་འགོད། ཡང་ན་བསྟན་པའི་སྒོར་ཞུགས་ནས་བསྟན་པ་ཉི་མོ་ལྟར་གསལ་བར་བྱེད་གསུངས་པས། ཨ་ནེ་ན་རེ། རྗེ་བཙུན་བློ་བོ་ཆེ། ཁྱོད་ཀྱིས་དེ་གཉིས་ག་མི་འགྲུབ་པར་འདུག་གི་ཧམ་པ་མ་ཆེ་ཟེར། དེ་དུས་མཚན་ཡང་རྗེ་བཙུན་བློ་བོ་ཆེ་གྲགས་པ་བྱུང་། དེ་དུས་འཕགས་ཆེན་ཆོས་བཟང་དཔལ་བ་ལ། སྐྱབས་འགྲོ་སེམས་བསྐྱེད། བསྙེན་གནས་ཀྱི་སྡོམ་པ་སོགས་ཐུགས་རྗེ་ཆེན་པོའི་ཆོས་བསྐོར་མང་དུ་ཞུས།

དེ་ནས་བདག་ཉིད་ཆེན་པོའི་ཐུགས་ལ། དལ་འབྱོར་ཐོབ་པ་དོན་དང་ལྡན་པར་བྱ་བའི་ཕྱིར་བསྟན་པའི་སྒོར་འཇུག་དགོངས་ནས། གངས་ཅན་གྱི་ངུར་སྨྲིག་འཛིན་པ་རྣམས་ཀྱི་གཙུག་གི་རྒྱན་དམ་པར་གྱུར་པ། ས་བཟངས་པཎ་ཆེན་པའི་དྲུང་དུ། དགེ་བསྙེན་དང་དགེ་ཚུལ་གྱི་སྡོམ་པ་དགུང་ལོ་བཅོ་བརྒྱད་པ་ལ་ནོས། མཚན་ཡང་གཞོན་ནུ་བློ་གྲོས་ཞེས་གསོལ། དེ་ནས་ཤེས་བྱའི་གནས་ཐམས་ཅད་ལ་འཇུག་པར་བྱེད་པའི་སྒོ། བཀའ་སྤྱིའི་དགོངས་འགྲེལ། རྒྱས་པའི་བསྟན་བཅོས་ཚད་མ་རྣམ་འགྲེལ་ལ་གཟིགས་པར་དགོངས་ནས། མཁས་པའི་དབང་པོ་ཉ་དབོན་ཀུན་དགའ་དང་། ལུང་རིགས་སྨྲ་བའི་དབང་པོ་མཁན་ཆེན་སངས་རྒྱས་འཕེལ་གཉིས་ཀྱི་ཞབས་ལ་བཏུག་སྟེ། བློ་གྲོས་སྦྱངས་པས། རྣམ་འགྲེལ་ལ་གོ་བ་ཐོ་རེ་བ་ཆགས་ནས། གྲྭ་བསྐོར་མཛད་པས། ཐུགས་རབ་ཆེ་བའི་གྲགས་པ་ཐོབ། དེ་དུས་རྒྱལ་བའི་སྲས་པོ་ཐོག་མེད་བཟང་པོ་དཔལ་བའི་མཚན་ཐོས་པ་ཙམ་གྱིས་བ་སྤུ་གཡོ་ཞིང་། མིག་ནས་མཆི་མ་འཛག་པ་སོགས་བྱུང་སྟེ། དངུལ་ཆུའི་ཆོས་རྫོང་དུ་བྱོན་ཏེ། སེམས་དཔའ་ཆེན་པོའི་དྲུང་དུ་སྨོན་འཇུག་སེམས་བསྐྱེད་བླངས། ཐེག་པ་ཆེན་པོ་བློ་སྦྱོང་ལ་སོགས་པའི་ཆོས་བསྐོར་མང་དུ་ཞུས།

དེ་ནས་གདན་སར་བྱོན་ནས། ཆོས་ཁྲི་ཐང་དུ་ལན་འདེབས་གཅིག་མཛད་པས། གཞུང་ལ་སྦྱོར་བ་བདེ་སང་བ་གཅིག་མ་འཁོད་པ། གྲྭ་བསྐོར་བས་མ་ཤེས་ནའང་། ཁོང་པ་རང་ལ་རང་གིས་ཐུགས་ཤིན་ཏུ་ཁྲེལ་བ་གཅིག་བྱུང་ནས། རྣམ་འགྲེལ་གྱི་གཞུང་ཁོ་རང་ཅི་ཟེར་ཤེས་པ་གཅིག་མ་བྱུང་ན། སློབ་དཔོན་གྱི་ངག་རྒྱུན་གྱིས་བསླུ་བར་འདུག་དགོངས་ནས། ས་སྐྱར་དཔེ་མཚམས་བཅད། གཞུང་ལ་བརྒྱ་ཆེར་བཅུག །སྡེ་བདུན་མདོ་འགྲེལ་པ་འགྲེལ་བཤད་དང་བཅས་པ་གཟིགས། མཁྱེན་རབ་དབང་ཕྱུག་ས་སྐྱ་པཎྜི་ཏ་དང་། འུ་ཡུག་པ་རིགས་པའི་སེང་གེའི་ལེགས་བཤད་རྣམས་ལའང་གཟིགས། སློབ་དཔོན་ཆེ་ཆུང་གཉིས་ལ་ཆོས་མང་དུ་གསན་པས། སྡེ་བདུན་དགོངས་འགྲེལ་དང་བཅས་པའི་དོན་ཕྱིན་ཅི་མ་ལོག་པ་ཐུགས་སུ་ཆུད་ནས། མཁས་པའི་གྲགས་པས་ས་སྟེང་ཁྱབ་པར་གྱུར་ཏེ། རྣམ་འགྲེལ་ལ་འགྲེལ་པ་ཆེ་ཆུང་གཉིས་སྤྱི་དོན་དང་བཅས་པ་མཛད་ནས། གང་གི་ལེགས་བཤད་ཚ་ཟེར་ཕྲ་མོས་ཀྱང་། །མཁས་རློམ་མེ་ཁྱེར་བྱེ་བའི་གཟི་འཕྲོགས་ཅིང་། །རིགས་ཚུལ་འབུམ་ཕྲག་སྟོང་གི་ཟེར་འཕྲོ་བའི། །བློ་གྲོས་འདི་ནི་སྔོན་མེད་ཉི་མ་ཡིན། །ཀུན་གཞིའི་མངལ་ནས་ཐོན་པའི་ས་བོན་རྣམས། །ཤེས་རབ་ཡུམ་གྱི་ལེགས་བསྐྲུན་བརྩོན་འགྲུས་ཀྱི། །མ་མས་རྒྱུན་དུ་བསྐྱངས་པས་གངས་ཅན་འདི། །དཔལ་ལྡན་གྲགས་པའི་གདུང་འཚོབ་ཁོ་བོ་འཁྲུངས། །དེ་ལྟ་ན་ཡང་གངས་རིའི་ཁྲོད་འདི་རུ། །མཁས་རྨོངས་འབྱེད་པའི་ཚུལ་ལ་མི་མཁས་པའི། །ཉ་བའི་ལག་ཏུ་རིན་ཆེན་འགྲིམ་པ་ལྟར། །བློ་ངན་འཚོང་བུའི་ཚོགས་དང་མཉམ་དུ་སྤེལ། །བསྒྲུབས་དང་སུན་འབྱིན་རིགས་པའི་མཆེ་སྡེར་གྱིས། །ཕས་རྒོལ་གླང་པོའི་ཀླད་པ་འགེམས་ནུས་ཀྱང་། །ལེགས་ཉེས་འབྱེད་པའི་གཟུ་བོས་དབེན་པས་ན། །སྨྲ་ངན་ཝ་སྐྱེས་ཚོགས་ཀྱང་རྟག་ཏུ་རྒོལ། །ཅེས་གསུངས་ཤིང་བསྟོད་པར། རིགས་ཚུལ་བརྒྱ་ཕྲག་དུ་མའི་རོ་ལྡན་པའི། །བློ་ཆེན་ལྡན་རྣམས་དགའ་བ་བསྐྱེད་བྱེད་པ། །རྣམ་འགྲེལ་མཛད་པའི་ཐུན་མོང་མིན་པའི་ལུགས། །ཡོངས་སུ་རྫོགས་པར་སྨྲ་བ་ཁྱོད་དུ་བས། །ཞེས་དང་། །སྡེ་བདུན་རལ་པ་འཐུག་པོས་གཉའ་ཁེབས་ཅིང་། །མདོ་ཡི་སྟོབས་རྒྱས་འགྲེལ་བཤད་སོ་སོའི་ཁྱོགས། །ཉིད་ཀྱི་ཤེས་རབ་ངན་པའི་གླང་འཕེན་པ། །ཚད་མ་རི་བོའི་སུལ་ན་རྒྱུ་བ་ལགས། །ཞེས་སོ། །

དེ་ནས་བདག་ཉིད་ཆེན་པོ་དེས། མངོན་པར་རྟོག་པའི་རིམ་པ་གཙོ་བོར་སྟོན་པ། ས་བཅུའི་དབང་ཕྱུག་རྒྱལ་ཚབ་བྱམས་པ་མགོན་པོའི་གསུང་མངོན་པར་རྟོག་པའི་རྒྱན་འགྲེལ་པ་དང་བཅས་པ་ལ་གཟིགས་པར་དགོངས་ནས། ཕར་ཕྱིན་གྱི་གཞུང་སྤར་མ་གཅིག་དབུ་སྔས་སུ་བཅུག་སྟེ་གཟིམ་པའི་མཚན་ལམ་དུ་རྒྱ་གར་སྐད་ནས་རྫོགས་སོའོ་བར་གཞུང་མ་ལུས་པ་འབུར་དུ་དོད་པ་ཕྱག་གིས་གཟུང་ཉན་པ་བྱུང་། རེ་རེ་ནས་བླངས་ནས་ཞལ་དུ་གསོལ་བས། རོ་མཆོག་དང་ལྡན་པ་འབྱུང་ཞིང་། མནལ་སད་པ་དང་ཤིན་ཏུ་དགྱེས་པར་གྱུར་ནས། དེ་རིང་ཇི་ཙམ་ཟིན་ལྟ་དགོངས་ནས་བཟུང་བས། བམ་པོ་ཆེ་བ་འཕྱི་ལ་ཟིན་པ་བྱུང་གསུངས། གཞུང་ཐུགས་སུ་ཆུད་པ་དང་། ལུང་ཆོས་ཀྱི་གོ་བ་ཆ་པེ་ཆགས་པ་བྱུང་ན་ཡང་། ཤིན་ཏུ་མཁས་པ་གཅིག་བྱེད་དགོངས་ནས་སྐྱེ་དགུའི་གཙུག་རྒྱན་ཆོས་ཀྱི་རྗེ་དཔལ་ལྡན་བླ་མ་དམ་པ་བསོད་ནམས་རྒྱལ་མཚན་ལ་སོགས་པ་ཡོངས་འཛིན་དམ་པ་རྣམས་ལས་གསན་ཅིང་། ཁྱད་པར་དུ་ཉི་ཁྲི་སྣང་བ་དང་བརྒྱད་སྟོང་འགྲེལ་ཆེན་ལ་སོགས་པ་རྒྱ་འགྲེལ་རྣམས་དང་། འགྲེ་ཨར་གྱི་འགྲེལ་བཤད་ལ་སོགས་བོད་འགྲེལ་རྣམས་ལ་གཟིགས་པས། འཕགས་སེང་གཉིས་ཀྱི་དགོངས་པ་ཕྱིན་ཅི་མ་ལོག་པར་ཐུགས་སུ་ཆུད་ནས་ཕར་ཕྱིན་གྱི་ཊཱིཀྐ་སྦྱོར་ཊཱིཀ་དོན་བདུན་ཅུ་རྣམས་མཛད་དེ། ཚིག་གི་རྗེས་འབྲང་བྱིས་པའི་བློ་ཅན་རྣམས། །སྔོན་རབས་བཤད་སྲོལ་བཟླས་པས་མགུ་ན་ཡང་། །འབྲས་མེད་སྤུན་པ་འཕྱར་བ་ངལ་མཐོང་ནས། །གཞན་ཟེར་རྣམ་གྲངས་ཟློས་པ་ཁོ་བོས་སྤངས། །སྤྱི་དོན་གཞུང་བརྒྱའི་ཚུལ་དང་མི་འགལ་ཞིང་། །ཚིག་དོན་དངོས་སྟོབས་རིག་པས་བསྒྲུབ་པ་ལ། །མཁས་རློམ་མངོན་པའི་ང་རྒྱལ་ཅན་རྣམས་ཀྱིས། །ཡུན་རིང་བརྟགས་ཀྱང་ཀུན་དགའི་སྐབས་མེད་དོ། །ཞེས་གསུངས། གོན་བྱོ་ཉི་མས་བསྟོད་པར། འཕགས་པའི་བཞེད་གཞུང་མ་ལུས་གཞན་དག་ཀྱང་། །ལན་རེ་ཙམ་གྱིས་མ་ལུས་མཐར་ཕྱིན་ཕྱིར། །རང་དང་གཞན་གྱི་གྲུབ་མཐའ་རྒྱ་མཚོ་ཡི། །ཕ་རོལ་སོན་པའི་གོ་འཕངས་མཉེས་པ་ཡིན། །ཞེས་སོ། །

དེ་ནས་བདག་ཉིད་ཆེན་པོ་དེ་ཆོས་ཐམས་ཅད་ཀྱི་མ་མོ་མངོན་པའི་སྡེ་སྣོད་ལ་གཟིགས་པར་དགོངས་ནས། གནས་ལྔ་རིགས་པའི་པཎྜི་ཏ་ཆེན་པོ་བྱང་ཆུབ་རྩེ་མོའི་ཞབས་ལ་བཏུག་སྟེ། མངོན་པ་གོང་འོག་ཚར་མང་དུ་གསན་ཅིང་། རྒྱས་པའི་བསྟན་བཅོས་ས་སྡེ་ལྔ། བསྡུས་པའི་བསྟན་བཅོས་སྡོམ་རྣམ་གཉིས། པྲ་ཀ་ར་སྡེ་བརྒྱད་འགྲེལ་པ་འགྲེལ་བཤད་དང་བཅས་པ་ལ་གཟིགས་ཤིང་། མཁས་པའི་དབང་པོ་དཔང་ལོ་ཙཱ་བ་བློ་གྲོས་བསྟན་པའི་འགྲེལ་བཤད་ལ་གཟིགས་པས། ཐོགས་མེད་སྐུ་མཆེད་ཀྱི་དགོངས་པ་ཕྱིན་ཅི་མ་ལོག་པ་ཐུགས་སུ་ཆུད་ནས། མངོན་པ་གོང་འོག་གི་ཊཱིཀྐ་བསྡུས་དོན་དང་བཅས་པ་མཛད་དེ། མཁའ་འགྲོའི་དབང་པོ་མཁའ་ལ་སྤྱོད་པའི་མཚན་མ་རྗེས་སུ་མཐོང་གྱུར་ནས། །འདབ་མ་ཤིན་ཏུ་རྒྱས་པ་མིན་པའང་དེ་ཡི་རྗེས་སུ་སློབ་པ་ལྟར། །བློ་གྲོས་སྟོབས་ལྡན་སྔོན་རབ་མཁས་པའི་རྗེས་སུ་འབྲང་ནས་བཤད་པ་ལ། །ཕྲ་དོག་སྒོ་ནས་སྨོད་པར་བྱེད་ཀྱང་འདི་ལ་ཉེས་པ་ཅུང་ཟད་མེད། །ཅེས་གསུངས། བློ་བསྟོད་པར། སྟོབས་བཅུ་མངའ་བ་ཐུབ་པའི་རིང་ལུགས་ལ། །རྣམ་རིག་ཤིང་རྟའི་སྲོལ་འབྱེད་འཛམ་གླིང་རྒྱན། །གང་ཕྱིར་བདེ་བར་གཤེགས་པའི་གདུང་འཚོབ་པ། །ཐོགས་མེད་སྐུ་མཆེད་གཉིས་ཀྱི་བཞེད་པའི་ལུགས། །ཇི་བཞིན་ཐུགས་སུ་ཆུད་པའང་ཁྱོད་དུ་བས། །ཞེས་སོ། །

དེ་ནས་བདག་ཉིད་ཆེན་པོ་དེས། བསྟན་པའི་བྱ་བ་ཡོངས་སུ་རྫོགས་པ་དགེ་སློང་གི་སྡོམ་པ་ནོད་ནས། འདུལ་བའི་བསླབ་བྱ་ཕྱིན་ཅི་མ་ལོག་པར་ཉམས་སུ་ལེན་པའི་སྲོལ་བཏོད་དགོངས་ནས། གནས་བརྟན་དགྲ་བཅོམ་པ་ཆེན་པོ། ལྡོག་ལྷོད་པ་མཁན་ཆེན་ཀུན་དགའ་དཔལ་བཟང་པོའི་དྲུང་དུ་བྱོན་ནས་མཁན་སློབ་དགེ་འདུན་དང་བཅས་པའི་སྤྱན་སྔར་བསྙེན་རྫོགས་ཀྱི་སྡོམ་པ་ནོད་ནས། འདུལ་བ་མདོ་རྩ་ཚར་གཅིག་གསན་པས། མཁན་ཆེན་པ་ལ་ཡང་ཐུགས་བསྐྱེད་ཐོན་པ་བྱུང་། ལྟ་ཁྲིད་ཀྱང་ཞུས། ཆོས་གྲོལ་བ་དང་། མཁན་ཆེན་པས་ཇ་བུར་གཅིག་གནང་ནས། ཁྱེད་སྐྱེས་སྟོབས་ཀྱི་ཐུགས་རབ་ཆེ་ཞིང་། གཞུང་ལུགས་གཞན་ལ་སྦྱངས་པའི་སྟོབས་ཀྱིས་འདུལ་བ་ལ་ཡང་ངེད་པས་ཁྱེད་ཤིན་ཏུ་མཁས་པ་གཅིག་བྱུང་གདའོ། །ཆོས་བདག་པོ་ལ་འཕྲོད་ལགས་སོ། །འདི་ལ་ཁྱེད་ཀྱིས་ཊཱིཀྐ་གཅིག་མཛོད། བསྟོད་འདུལ་གྱི་སྡོམ་རྒྱུད་འདི་མ་ཆད་པ་གཅིག་འཚལ་ལོ། །ཞེས་གསུངས་པའི་ཞལ་ལྟ་བཟང་པོ་གནང་བ་དང་དུ་བླང་སྟེ་འདུལ་བ་ལུང་དང་རྒྱ་འགྲེལ་རྣམས་དང་། བྱ་ཁྱི་སོག་གསུམ་སོགས་བོད་ཀྱི་འགྲེལ་བཤད་རྣམས་ལ་གཟིགས་པས། ཡོན་ཤཱཀ་རྣམ་གཉིས་ཀྱི་དགོངས་པ་ཕྱིན་ཅི་མ་ལོག་པ་ཐུགས་སུ་ཆུད་ཅིང་། མདོ་རྩའི་ཊཱིཀྐ་དང་ལས་ཚོགས་གཉིས་མཛད་ནས། དེ་ཕྱིན་ཆད་འཆད་ཉན་མཛད་དུས་ཀྱང་། དབྱར་གནས་དང་གསོ་སྦྱོང་དགག་དབྱེ་སོགས་མ་ཆག་པར་མཛད་དོ། །ཡོན་ཏན་འོད་ཅེས་ས་གསུམ་རབ་གྲགས་པ། །རྒྱལ་བའི་རང་ལུགས་འཛིན་པ་དེས་མཛད་པ། །ཐུབ་པའི་ནང་མཛོད་འདུལ་བ་འབུམ་སྡེའི་དོན། །མ་ལུས་བསྡུད་བྱེད་ལེགས་བཤད་འདི་བྱས་སོ། །ཞེས་གསུངས་སོ། །བསྟོད་པར། ཐུབ་པས་ལན་གཅིག་མིན་པར་བསྔགས་པ་ཡི། །ཚུལ་ཁྲིམས་འཕགས་པའི་ནོར་བུ་གཟིགས་ནས་ནི། །ཉེར་སྦས་ཟླ་བའི་ནོར་བུ་ཡོན་ཏན་འོད། །ཐམས་ཅད་ཡོད་སྨྲ་མཁས་པའི་དགོངས་པ་བཞིན། །འདུལ་བ་འབུམ་སྡེའི་དགག་བསྒྲུབ་གནང་གསུམ་གྱི། །བསླབ་པའི་གནས་ལ་མཁས་ཤིང་འདའ་མི་བྱེད། །ཅེས་སོ། །

དེ་ནས་བདག་ཉིད་ཆེན་པོ་དེས། སྙིང་པོའི་དོན་གཙོ་བོར་སྟོན་པ་འཕགས་པ་ཀླུ་སྒྲུབ་ཀྱི་ཞལ་མངའ་ནས་མཛད་པ། དབུ་མ་རིག་པའི་ཚོགས་ལ་གཟིགས་པར་བཞེད་ནའང་། དེ་དུས་སུ་གངས་རིའི་ཁྲོད་ན་བཀའ་མ་ཆད་ཙམ་མ་གཏོག་པ་འཆད་ཉན་གྱིས་གཏན་ལ་འབེབས་པ་དང་། སྒོམ་སྒྲུབ་ཀྱིས་ཉམས་སུ་ལེན་པའི་སྲོལ་ཉམས་པར་གྱུར་ནས། ཐུགས་ཤིན་ཏུ་ཆད་པར་གྱུར་ཀྱང་། བཤད་པ་དཔལ་ལྡན་བླ་མ་དམ་པ་ལ་ཞུ་དགོངས་ནའང་། དབུས་ན་བཞུགས་པས་མ་བྱུང་པར། ཆོས་རྗེ་བྱང་སེམས་པ་ལ་རིགས་ཚོགས་བཞི་བརྒྱ་པ། འཇུག་པ་སོགས་དབུ་མའི་བསྐོར་རྣམས་གསན་ནས། དཀོན་མཆོག་གསུམ་ལ་གསོལ་བ་བཏབ། ཐུགས་རབ་ཀྱིས་ཡང་ཡང་དཔྱད་པས། སྔོན་གྱི་སྨོན་ལམ་དང་། སྦྱངས་པའི་མཐུ་དང་། དཀོན་མཆོག་གི་བྱིན་རླབས་ལ་བརྟེན་ནས་ཀླུ་སྒྲུབ་ཡབ་སྲས་དཔལ་ལྡན་ཟླ་བ་གྲགས་པ་དང་བཅས་པའི་དགོངས་པ་ཕྱིན་ཅི་མ་ལོག་པར་ཐུགས་སུ་ཆུད་ཅིང་། མཁས་པ་ཆེན་པོ་ལེགས་ལྡན་འབྱེད་དང་། རང་རྒྱུད་བཤད་གསུམ་གྱི་གཞུང་ལུགས་རྣམས་ཀྱང་མ་འདྲེས་པར་མཁྱེན་ནས། འཆད་ཉན་གྱིས་ལེགས་པར་གཏན་ལ་ཕབ། དེ་དུས་སུ་སློབ་མ་རྣམས་ཀྱིས་རྩ་འཇུག་བཞི་གསུམ་སོགས་གལ་ཆེ་བ་རྣམས་ལ་ཡིག་ཆ་འཇོག་པར་མཛད་པར་ཞུ་ཞེས་ཡང་ཡང་གསོལ་བ་བཏབ་པའི་ངོར་རྩ་འཇུག་བཞི་གསུམ་ཚིག་གསལ་གྱི་སྟོང་ཐུན་གྱི་འགྲེལ་པ་རྣམས་མཛད་ནས། སློབ་དཔོན་ཐམས་ཅད་ཀྱི་འཆད་ཉན་མཛད་པས་དབུ་མའི་འཆད་ཉན་གྱི་སྲོལ་ལེགས་པར་གཏོད་པའི་མཐུ་ལ་བརྟེན་ནས། དེའི་དུས་སུ་ཆོས་ཀྱི་གྲགས་པ་རྒྱལ་མཚན་ཞང་དབོན། ལོ་ཙཱ་བ་སྐྱབས་མཆོག་དཔལ་ཁུ་དབོན། མཁས་པ་ཆེན་པོ་གཡག་སྤྲུག་པ་སངས་རྒྱས་དཔལ་དཔོན་སློབ་རྣམས་ཀྱིས་ཀྱང་དབུ་མ་ལ་འཆད་ཉན་མཛད་པ། གངས་ཅན་གྱི་ཁྲོད་འདིར་དབུ་མའི་བཤད་སྲོལ་དར་ཞིང་རྒྱས་པར་གྱུར་ཀྱང་ཕལ་ཆེར་རང་རྒྱུད་ཀྱི་ལྟ་བའི་ཐོག་ན་གནས་ཤིང་། ཐལ་འགྱུར་གྱི་ལྟ་བ་ཐུགས་སུ་ཆུད་པ་ཙམ་མ་འབྱུང་འདུག་སྟེ། འདི་ཙམ་ཡང་དགའ་མོ་ཡིན། ང་དང་པོར་སློབ་གཉེར་བྱེད་དུས། ས་སྐྱ་སོགས་ན་དབུ་མའི་དཔེ་ཆ་གཅིག་འདུག་ཟེར་ནས། ནོར་མི་ཆེར་བྱེད་པ་འདུག །

དིང་སང་དབུ་མའི་དཔེ་ཆ་ལ་རྩིས་སུ་བྱེད་པ་འདི་ཡང་ཁོ་བོས་བསྟན་པ་ལ་བྱ་བ་བྱས་པ་ཡིན་གསུངས། ཀརྨ་པ་དཀོན་གཞོན་གྱི་གསུང་གིས་དིང་སང་གངས་རིའི་ཁྲོད་ན་མཁས་པ་དང་། བླུན་པོ་ཀུན་དགའ། དབུ་མ་སྣ། དབུ་མ་ཁ་ཟེར་བ་འདི་རེད་མདའ་བའི་དྲིན་ཡིན། དེ་གོང་དུ་ཐང་སག་ན་དབུ་མ་ཤི་རོ་གཅིག་འདུག་ཟེར། གཞན་ཡོད་པའི་ལབ་མ་ཚོར་གསུངས། རྒྱ་གར་བལ་པོ་བོད་ཀྱི་ཡུལ་རྣམས་སུ། །མདོ་དོན་སྨྲ་བའི་མཁས་པ་མང་བྱོན་ཡང་། །ཕལ་ཆེར་རྟོག་པས་སྦྱར་བའི་དོན་ཙམ་ལ། །མཁས་པར་ཟད་ཀྱི་དེ་ཉིད་དོན་ལ་མིན། །ཐུབ་པའི་བསྟན་ལ་ཉིད་ཀྱི་དགོངས་པ་བཞིན། །འཁྲུལ་མེད་སྨྲ་བ་འཕགས་པ་ཀླུ་སྒྲུབ་ཡིན། །དེ་ཡི་བཞེད་གཞུང་རབ་དཀར་ཀུནྡའི་ཚལ། །དེ་བཞིན་འབྱེད་མཁས་དཔལ་ལྡན་ཟླ་བ་ཡིན། །སློབ་དཔོན་དེ་དག་དགོངས་པ་འདི་ཡིན་ཞིང་། །མཁས་རློམ་མང་ཡང་སུ་ལ་ཅི་ཆ་ཡོད། །རྣམ་བཀྲ་ཚོན་གྱི་རི་མོ་གསལ་བ་ཡི། །རྣམ་དབྱེ་དམུས་ལོང་རྣམས་ལ་ཡོད་དམ་ཅི། །ལོང་པས་རིན་ཆེན་གཏེར་ཁ་ཕྱེད་པ་ལྟར། །རྣམ་དག་འཕགས་པའི་མིག་དང་མི་ལྡན་ཡང་། །རྒྱལ་དང་རྒྱལ་བའི་སྲས་ཀྱི་བྱིན་བརླབས་ལས། །རྟེན་འབྱུང་ཟབ་མོའི་དོན་འདི་ཁོ་བོས་རྙེད། །ཅེས་གསུངས།

བསྟོད་པར། སྟོབས་བཅུ་མངའ་བ་ཐུབ་པའི་རིང་ལུགས་པ། །མཐའ་བྲལ་ཤིང་རྟའི་སྲོལ་འབྱེད་འཛམ་གླིང་རྒྱན། །གང་གིས་བདེ་བར་གཤེགས་པའི་གདུང་ཚོབ་པ། །ཀླུ་སྒྲུབ་ཟླ་གྲགས་གཉིས་ཀྱི་བཞེད་པའི་ལུགས། །ཇི་བཞིན་ཐུགས་སུ་ཆུད་པའང་ཁྱེད་དུ་བས། །ཅེས་སོ། །མཐར་ལྟའི་གཡང་ས་རིང་དུ་སྤངས་གྱུར་ལ། །དུས་གསུམ་གཤེགས་པ་རྣམས་ཀྱི་བགྲོད་པའི་ཤུལ། །གཟུང་དང་འཛིན་པའི་འཇིགས་པ་ལས་སྒྲོལ་བ། །དབུ་མའི་ལམ་ནས་ཁྱོད་ནི་གཤེགས་པ་ལགས། །ཞེས་དང་། རྙིགས་མའི་དུས་འདིར་ངན་རྟོག་ཆང་གིས་མྱོས་གྱུར་པས། །དེ་ཉིད་དོན་ལ་སྐྱེ་བོ་རྣམས་ནི་འཁྲུག་པའི་ཚེ། །གང་གིས་སྤྲོས་ཀུན་གསལ་ནས་སྟོང་ཉིད་ཟབ་མོའི་དོན། །ཡང་དག་ལེགས་རྟོག་རྣམ་དཔྱོད་འདི་ནི་ཨེ་མ་མཚར། །ཞེས་སོ། །

དེ་ན་བདག་ཉིད་ཆེན་པོ་དེས་ཐེག་པ་ཐམས་ཅད་ཀྱི་ཡང་རྩེ་རྡོ་རྗེ་ཐེག་པ་ལ་འཇུག་པར་དགོངས་ནས། རྣལ་འབྱོར་གྱི་དབང་ཕྱུག་ཆེན་པོ་བྱང་ཆུབ་རྩེ་མོའི་དྲུང་དུ། དཔལ་གསང་བ་འདུས་པ་མི་བསྐྱོད་རྡོ་རྗེ་ལ་སོགས་པའི་དབང་འགའ་ཞུས། གསང་མཚན་ཡང་མི་བསྐྱོད་རྡོ་རྗེར་གསོལ། རྒྱུད་ལོ་ཙཱ་བ་ནེམ་བཟང་པ་ལ་ཞུས། མན་ངག་ཆོས་ཀྱི་རྗེ་གྲགས་པ་རྒྱལ་མཚན་པའི་དྲུང་དུ་ཞུས། དཔལ་ལྡན་བླ་མ་དམ་པའི་དྲུང་དུ་དགྱེས་པ་རྡོ་རྗེ་ལ་སོགས་པའི་དབང་འགའ་ཞུས། ལོ་ཙཱ་བ་སྐྱབས་མཆོག་དཔལ་བཟང་པོ་ལ་རྒྱུད་ཀྱི་བཤད་པ་ཞུས། བླ་མ་དཔལ་ལྡན་པའི་དྲུང་དུ་ལམ་འབྲས་མན་ངག་ཆོས་སྐྱོང་ཆེ་ཆུང་གི་བསྐོར་དང་བཅས་པ་ཞུས། ས་བཟངས་པཎ་ཆེན་པའི་དྲུང་དུ། བདེ་མཆོག་སོགས་དབང་འགའ་ཞུས། ཆོས་རྗེ་སྐྱབས་མཆོག་པའི་དྲུང་དུ་རྡོ་རྗེ་ཕྲེང་བ། གསང་འདུས་འཇམ་རྡོར། འཇིག་རྟེན་དབང་ཕྱུག །ས་སྐྱ་པའི་ཕ་ཆོས་རྡོ་རྗེ་གཞོན་ནུ་སོགས་མང་དུ་ཞུས། འཕགས་པ་ཀླུ་སྒྲུབ་ཀྱིས་མཛད་པའི་རིམ་ལྔ་མདོར་བྱས། འཕགས་པ་ལྷས་བྱས་པའི་སྤྱོད་བསྡུས་སྒྲོལ་མེ། དཔལ་ལྡན་ཟླ་བས་མཛད་པའི་གསང་འདུས་སྒྲོན་གསལ་ལ་སོགས་པ་འཕགས་ལུགས་ཀྱི་རྒྱ་འགྲེལ་ཐམས་ཅད་དང་། རྒྱལ་པོ་ཨིནྟྲ་བྷོ་དྷི་ལ་སོགས་གསང་འདུས་སྔ་སྲོལ་བ་རྣམས་ཀྱི་དགོངས་པ་ཕྱོགས་གཅིག་ཏུ་བསྡུས་པ། ཤཱནྟི་པས་མཛད་པའི་བཤད་བྱང་སྙེམས་པའི་མེ་ཏོག་དང་། ཡེ་ཤེས་ཞབས་ཀྱིས་མཛད་པའི་སྒྲུབ་ཐབས་ཀུན་ཏུ་བཟང་པོ། མར་མེ་མཛད་ཀྱི་སྒྲུབ་ཐབས་དཀྱིལ་ཆོག །བཞི་བརྒྱ་པ་འགྲེལ་པ་དང་བཅས་པ། ཐ་ག་ནའི་འགྲེལ་པར། རྒྱལ་བས་བྱིན་གྱི་འགྲེལ་པ་ལ་སོགས་པ་དཔལ་གསང་བ་འདུས་པ་ལུགས་གསུམ་གྱི་རྒྱ་འགྲེལ་རྣམས་དང་། བོད་ཀྱི་རྗེ་འགོས་གདོག་ཀླན་གསུམ་དང་། ས་སྐྱ་པ་ཁུ་དབོན། རིན་པོ་ཆེ་བུ་སྟོན་པ་ལ་སོགས་པའི་ལེགས་བཤད་རྣམས་ལ་ཡང་དག་པར་གཟིགས་རྟོག་མཛད་པས། གསང་བ་འདུས་པའི་རྒྱུད་འགྲེལ་ཆ་ལག་དང་བཅས་པའི་ཚིག་དོན་མ་ལུས་པ་ཐུགས་སུ་ཆུད་ནས་རྡོ་རྗེ་འཛིན་པ་ཆེན་པོར་གྱུར་ཏེ། གསང་འདུས་རྩ་བའི་རྒྱུད་ཀྱི་ཊཱིཀྐ། མངོན་རྟོགས། བདག་འཇུག །མཆོད་ཕྲེང་། རིམ་ལྔའི་བསྡུས་དོན་ལ་སོགས་པ་མཛད་ནས། འཕགས་པ་རྡོ་རྗེའི་མན་ངག །བཤད་རྒྱུད་གཞན་གྱི་རྗེས་འབྲངས་ནས། །འདུས་པའི་རྒྱུད་ཆེན་རིམ་པ་ལྔར། །དཔལ་ལྡན་ཟླ་བ་གྲགས་པས་བཤད། །སྔོན་རབས་རྒྱུད་པའི་མན་ངག་དང་། །ཕྱི་མའི་རྒྱུད་ཀྱི་རྗེས་འབྲངས་ནས། །རྒྱུད་དོན་བསྙེན་བསྒྲུབ་ཡན་ལག་བཞིར། །རིན་ཆེན་འབྱུང་ལྡན་ཞི་བས་ཕྱེ། །འཇམ་པའི་དབྱངས་ཀྱི་མན་ངག་གི །རྒྱུད་དོན་བསྐྱེད་པའི་རིམ་པ་དང་། །རྫོགས་རིམ་ཐིག་ལེ་རྣམ་གསུམ་དུ། །སངས་རྒྱས་ཡེ་ཤེས་ཞབས་ཀྱིས་བསྟན། །འཕགས་དང་མཁས་པས་གསལ་བྱས་པའི། །འདུས་པའི་རྒྱུད་ཆེན་ཤིང་རྟའི་སྲོལ། །རིམ་པ་གསུམ་དུ་ཕྱེད་པའི་དོན། །རྙེད་པ་གང་དེ་ཡ་མཚན་ནོ། །ཞེས་གསུངས།

བསྟོད་པར། ཐུབ་པ་ཆེན་པོའི་ཆོས་ཀྱི་རྣམ་གྲངས་ནི། །ཇི་སྙེད་གསུང་པ་ཆོས་ཀྱི་རྩེར་གྱུར་པ། །རྒྱུད་སྡེའི་མཐར་ཐུག་དཔལ་ལྡན་འདུས་པ་ཡི། །མཐའ་དྲུག་ཚུལ་བཞིའི་རྒྱས་བཏབ་རྡོ་རྗེའི་ཚིག །ཇི་བཞིན་ལེགས་པར་ཕྱེ་ནས་རིམ་གཉིས་ཀྱི། །ཏིང་འཛིན་མཆོག་གི་བདེ་ལ་རོལ་བས་ན། །རྡོ་རྗེ་འཛིན་པ་ཞེས་པའི་སྒྲ་དེ་ཡང་། །མགོན་པོ་ཁྱོད་ལ་དོན་དང་བཅས་པར་འཇུག །ཅེས་སོ། །གོང་དུ་བསྟན་པའི་བླ་མ་དེ་རྣམས་གུས་པས་བསྟེན་པ་ཡིན་ཏེ། སྐྱེས་དགུའི་གཙུག་རྒྱན་ཆོས་རྗེ་བསོད་རྒྱལ་དང་། །རྒྱལ་བའི་སྲས་པོ་ཐོགས་མེད་བཟང་པོའི་དཔལ། །མ་ཏི་པཎ་ཆེན་མཁན་ཆེན་བྱང་རྩེ་དང་། །མཁས་པའི་དབང་པོ་ཉ་དབོན་ཀུན་དགའ་སོགས། །བཀའ་དྲིན་ནོད་པའི་བླ་མ་བཅུ་ཕྲག་གཉིས། །ཡུན་རིང་འབད་དེ་གུས་པའི་ཚུལ་གྱིས་བསྟེན། །ཞེས་སོ། །

གོང་དུ་བསྟན་པའི་སོ་ཐར་བྱང་སེམས་རིག་འཛིན་གྱི་སྡོམ་པ་གསུམ་ཡན་ལག་དང་བཅས་པ་སྐུ་སྲོག་པས་ཀྱང་གཅེས་པར་བསྲུངས་པ་ཡིན་ཏེ། ཁོ་བོ་སངས་རྒྱས་བསྟན་ལ་རབ་བྱུང་ནས། །རིགས་དང་མི་རིགས་འབྱེད་ཤེས་ཚུན་ཆོད་དུ། །ལུས་ངག་ཡིད་ཀྱིས་སྤྱོད་པ་ཅི་བྱེད་ཀྱང་། །རབ་ཏུ་བསྒྲིམས་ཏེ་ཐུབ་པའི་གསུང་བཞིན་བསྒྲུབས། །ཐོག་མེད་གོམ་པའི་ཉོན་མོངས་ཤུགས་དྲག་པས། །གལ་ཏེ་མི་རིགས་ཅུང་ཟད་བྱས་ན་ཡང་། །དེ་ཡི་མོད་ལ་དུག་ཟོས་དྲན་པ་བཞིན། །འགྱོད་སེམས་དྲན་པས་སླར་ཡང་ཆོས་བཞིན་བྱས། །ཞེས་གསུངས་སོ། །བསྟོད་པར། གཞན་དག་ཁས་ལེན་ཆུ་ཡི་རི་མོ་བཞིན། །མང་པོ་ཉིད་ཀྱང་འཕྲལ་དུ་ཡལ་བ་བགྱིད།འདིར་མ་དཔེར་ཚིག་རྐང་ཞིག་ཆད་པ་འདྲ། །ཤི་ཡང་དམ་བཅའ་གཞན་དུ་བགྱིད་མ་ལགས། །ཞེས་སོ། །

བདག་ཉིད་ཆེན་པོ་དེ་ཉིད་ནི་ཐུབ་པའི་རིང་ལུགས་པ་བླ་ན་མེད་པ་ཡིན་ཏེ། ཉམས་ལེན་བྱིན་རླབས་ཀྱི་རྒྱུད་པར་རྡོ་རྗེ་འཆང་ནས་བཟུང་སྟེ། བཅུ་དགུ་པ་ལ་བྱོན་ཅིང་། ཟབ་མོ་ལྟ་བའི་རྒྱུད་པར་ཐུབ་པ་ཆེན་པོ་ནས་བཟུང་སྟེ། ཉི་ཤུ་རྩ་གཉིས་པ་ལ་བྱོན་ལ། རྒྱ་ཆེན་སྤྱོད་པའི་རྒྱུད་པར་ཐུབ་པ་ཆེན་པོ་ནས་བཟུང་སྟེ། ཉི་ཤུ་རྩ་བདུན་པ་ལ་བྱོན། རྒྱུད་པ་གསུམ་ཀའི་བཀའ་རྒྱུད་བསྒྲུབ་རྒྱུད་དར་རྒྱས་སུ་མཛད་པ་ཡིན་ནོ། །མདོ་རྒྱུད་བསྟན་བཅོས་ཀུན་ལ་ལེགས་སྦྱངས་ནས། །རྟག་ཆད་མཐར་ལྟའི་གྲུབ་མཐའ་མ་ལུས་པ། །རྣམ་གཞག་ལུང་དང་དངོས་སྟོབས་རིགས་པས་བཤིག །ལོག་སྨྲ་ཚར་གཅོད་ཁྱོད་ལ་ཕྱག་འཚལ་ལོ། །ཞེས་པ་ནི་གོང་དུ་བཤད་པའི་མདོ་རྒྱུད་བསྟན་བཅོས་དེ་དག་ལ་ལེགས་པར་སྦྱངས་པ་ཡིན་ཏེ། རྒྱ་གར་ནས་འགྱུར་བསྟན་བཅོས་ཐམས་དང་། །མདོ་དང་རྒྱུད་སྡེ་ཕལ་ཆེར་ལེགས་པར་བལྟས། །རང་གཞན་གྲུབ་མཐའི་དེ་ཉིད་འབྱེད་པ་ལ། །མཁས་མང་མདུན་སར་འཇིགས་མེད་སྤོབས་པ་ཐོབ། །ཅེས་གསུངས།

བདག་ཉིད་ཆེན་པོ་འདི། དང་པོ་ནས་ཐམས་ཅད་མཁྱེན་པ་བུ་སྟོན་རིན་པེ་ཆེ་ལ་མོས་པ་གཅིག་ཡོད་ནའང་། སློབ་དཔོན་རང་གྲོགས་མཆེད་སོགས་ཀྱི་སྟོབས་ཀྱིས་ཀུན་མཁྱེན་ཆེན་པོའི་གྲུབ་མཐའ་ལ་འདྲིས་ཆེ་བ་གཅིག་བྱུང་ནས། ཇོ་ནང་གི་གྲུབ་མཐའི་རྒྱབ་བརྟེན། རྒྱུད་དུས་ཀྱི་འཁོར་ལོ། མདོ་མྱ་ངན་ལས་འདས་པ་ཆེན་པོ། དགོང་པ་ངེས་འགྲེལ། ལང་ཀར་གཤེགས་པ། བསྟན་བཅོས་རྒྱུད་བླ། ཆོས་དབྱིངས་བསྟོད་པ་སོགས་ལ་བརྟེན་པར་དགོངས་ནས། མདོ་རྒྱུད་བསྟན་བཅོས་དེ་དག་གི་དགོངས་པ་ཕྱིན་ཅི་མ་ལོག་པར་བླངས་ནས་ཇོ་ནང་པའི་གྲུབ་མཐའ་འདི་ཏིང་ཚུགས་པ་གཅིག་བྱེད་དགོངས་ནས། མན་མུན་གྲགས་ཁར་བྱོན་ནས། མདོ་རྒྱུད་བསྟན་བཅོས་དེ་དག་ལ་གཟིགས་རྟོག་ཚར་གསུམ་མཛད་པས། དང་པོ་ལ་ཇོ་ནང་པའི་གྲུབ་མཐའ་མདོ་རྒྱུད་བསྟན་བཅོས་འདི་དག་གི་དགོངས་པ་ཡིན་ངེས་པར་འདུག་དགོངས་པ་བྱུང་། གཉིས་པ་ལ་ཡིན་མིན་ཐེ་ཚོམ་ཟ་བ་གཅིག་བྱུང་། གསུམ་པ་ལ་དགོངས་པ་ལས་ཕྱིན་ཅི་ལོག་ཏུ་གོ་བ་གཅིག་བྱུང་གསུང་། དེ་ནས་གདན་སར་མཁན་ཆེན་སངས་རྒྱས་འཕེལ་བའི་དྲུང་དུ་བྱོན་ནས། ཇོ་ནང་པའི་གྲུབ་མཐའ་འདི་མདོ་རྒྱུད་བསྟན་བཅོས་འདི་དག་གི་དགོངས་པ་ཡིན་བསམ་ནས། ལྟ་རྟོག་ཞིབ་ཏུ་བགྱིས་ན། དགོངས་པ་ལས་ཕྱི་རོལ་དུ་གྱུར་གདའ་ལགས་ཞུས་པས། ཁྱོད་མཁས་དྲག་པས་ཤིན་ཏུ་བདེན་གསུངས་ནས་ཅ་ར་མཛད་པ་བྱུང་། དེ་དུས་དེ་སྟོན་པ་ལ་སྤྲིང་ཡིག་མཛད་པས། མཁན་ཆེན་པ་ཤིན་ཏུ་མ་མཉེས་ཏེ། འཁོན་འཛིན་མཛད་པ་བྱུང་། དེ་ནས་བདག་ཉིད་ཆེན་པོའི་ཐུགས་ལ་མཁན་ཆེན་ཉ་དབོན་པ་འདི་ཐུགས་རབ་ཆེ་ཞིང་། ཚད་མའི་རིགས་པ་ལ་ཤིན་ཏུ་མཁས་པའི་སྟོབས་ཀྱིས་འདི་ལ་ལུང་རིགས་ཀྱི་དགག་བསྒྲུབ་ཞུས་ན་འགྱུར་བར་ངེས། ཁོང་པ་འགྱུར་ན་ཆུ་འོལ་ཁ་ནས་འགྱུར་ནས་དིང་སང་གི་ཇོ་ནང་པ་ཐམས་ཅད་འགྱུར་བ་གཅིག་འོང་བར་འདུག་དགོངས། བརྩེ་ཆེན་དུ་ཉ་དབོན་པོའི་དྲུང་དུ་བྱོན་པས། སྐྱོ་མ་སྔ་བཙན་དུ་སོང་ནས། དངོས་སུ་མི་སྐྱོན་ཡང་། ཐུགས་མི་མཉེས་པའི་རྣམ་འགྱུར་དུ་མ་སྟོན་གྱི་འདུག་པས། ད་ཞུས་ཀྱང་དོན་དུ་མི་འགྱུར་བར་འདུག་དགོངས་ཏེ། གདན་སར་ལོག་བྱོན་ནས། བསྟན་འཛིན་རྣམས་ལ་སྤྲིང་ཡིག་ནོར་བུ་ཕྲེང་བ་མཛད་པས། གངས་རིའི་ཁྲོད་ན་དུས་འཁོར་བར་ཁས་འཆེས་པ་རྣམས་དང་། ཁྱད་པར་དུ་ཇོ་ནང་པ་རྗེས་འབྲང་དང་བཅས་པ་དངོས་སུ་རྩོད་པར་མི་ནུས་ཀྱང་། ལྐོག་ཏུ་རྒྱུད་ཆེར་འཁྲུག་པར་གྱུར་ཏོ། །

དེའི་དུས་སུ་དྲུང་བཞི་ཐོག་པས་གཙོ་མཛད་གདན་ས་ཆེན་པོའི་སྡེ་སྣོད་འཛིན་པ་རྣམས་འཛོམས་པའི་དྲུང་དུ། བདག་ཉིད་ཆེན་པོས་དུས་འཁོར་ལ་འགལ་འདུ་ཡོད་གསུངས། ཀརྨ་པ་དཀོན་གཞོན་པ་འགལ་འདུ་མེད་གསུང་ནས་རྩོད་པའི་སྐབས་སུ། ཀརྨ་པ་ན་རེ། ཤེས་བྱ་ཆོས་ཅན། པདྨ་དཀར་པོ་བླུན་པོར་ཐལ། བླུན་པོ་བདག་སྤྱོད་འདོད་ཅེས་པ་དེ་ས་བཅུའི་དབང་ཕྱུག་གི་གསུང་འཁྲུལ་མེད་ཡིན་པའི་ཕྱིར། གསལ་ཁྱབ་ཁས་བླངས། རྟགས་གྲུབ་སྟེ། རྒྱུད་འབྲེལ་དྲི་མེད་འོད་ཀྱི་རང་ལུགས་ཀྱི་ཚིག་ཡིན་པའི་ཕྱིར་ཟེར་བ་ལ། བདག་ཉིད་ཆེན་པོས། ཤེས་བྱ་ཆོས་ཅན། སྒྲ་རྟག་མི་རྟག་རྩོད་པའི་སྐབས་སུ། སྒྲ་མི་རྟག་པའི་སྒྲུབ་བྱེད་དུ་ཐལ། རྒྱུད་འགྲེལ་དྲི་མེད་འོད་ཉིད་ས་བཅུའི་དབང་ཕྱུག་གི་གསུང་ཡིན་མིན་རྩོད་པའི་སྐབས་སུ། རྒྱུད་འགྲེལ་དྲི་མེད་འོད་ཀྱི་རང་ལུགས་ཀྱི་ཚིག་ཡིན་པ་དེ། རྒྱུད་འགྲེལ་དེ་ཉིད་ས་བཅུའི་དབང་ཕྱུག་གི་གསུང་ཡིན་པའི་སྒྲུབ་བྱེད་ཡིན་པའི་ཕྱིར་ཞེས་གསུང་ནས་སུན་ཕྱུང་ཞིང་། གཞན་ཡང་བླ་མ་ཤར་ཆུང་པ་ལ་སོགས་པས་ཡི་གེར་བཀོད་ནས་རྩོད་པ་འབྱུང་བ་རྣམས་ཀྱང་། སྒྲུབ་བྱེད་བསྒྲུབ་བྱ་དང་མཚུངས་པ་ལས་མ་བྱུང་གསུང་། ཇོ་ནང་པའི་ཕྱོགས་ཀྱི་སྔགས་པ་གཅིག་གིས་ཁྱེད་མཁས་པ་ཆེན་པོ་ཡིན་པ་ལ། དུས་འཁོར་ལ་དགག་པ་མཛད་པར་མི་འོས་ཞུས་པས། དེའི་ལན་དུ། བདེ་བར་གཤེགས་པའི་གསུང་རབ་ལ། །དགག་སྒྲུབ་མཁས་པ་རྣམས་ཀྱིས་བྱེད། །མི་རྣམས་འཕྱིང་པ་འདྲ་བ་ལ། །ཕྱི་ལ་ཅོལ་གཉེར་ཅི་ཞིག་ཡོད། །ཅེས་གསུངས།

དེའི་དུས་སུ་མཁན་ཆེན་བསྟན་རྒྱལ་བས་གཙོ་མཛད། ཇོ་ནང་པ་རྣམས་གྲོས་བྱས་ནས། ཁོ་འདི་ཟེར་ན་རང་རེ་འདི་ཟེར་གྱི་ལུང་རིག་མང་དུ་བརྩམས་ནས། འཇམ་དབྱངས་ཆེན་པོ་ལ་སློབ་དཔོན་གཞོན་བློ་བ་འདི་སྤྱན་དྲོངས། བདེ་གཤེགས་སྙིང་པོ་དྲང་ངེས་ལ་རྩོད་པ་ཡིན་ཞུས་པས། བདག་ཉིད་ཆེན་པོ་དཔོན་སློབ་རྣམས་ས་སྐྱ་ནས་སྤྱན་དྲངས་རྩོད་པའི་སྐབས་སུ། བདག་ཉིད་ཆེན་པོས་འོ་ཀོལ་རྩོད་པ་བྱེད་ན། ཡང་ན་རྒྱུད། ཡང་ན་མདོ། ཡང་ན་བསྟན་བཅོས་ཁོ་ནའི་སྟེང་ནས་བྱེད། བླུན་པོ་མགུ་བའི་རྩོད་པ་སྲས་ཏ་བསྲེ་ཏེ་མི་བྱེད་གསུང་ཞིང་འཇམ་དབྱངས་པས་ཀྱང་དེ་བཞིན་འཐད་ཞུས་པས། ཁོང་གིས་ལྐོག་གྲོས་བྱས་པའི་ལུང་རིགས་རྣམས་ཞིག་ནས། དྲི་བཅས་དང་དྲི་མེད་ཀྱི་དེ་བཞིན་ཉིད་ལ་ཁྱད་མེད་ཅིང་། སྟོབས་སོགས་འདུས་མ་བྱས་ཀྱི་ཡོན་ཏན་གྱིས་བརྒྱན་པའི་བདེ་གཤེགས་སྙིང་པོ་དོན་དམ་པར་གྲུབ་པར་ཁས་བླངས་པ་ལ། བདག་ཉིད་ཆེན་པོས། ཤེས་བྱ་ཆོས་ཅན། རྟག་བརྟན་གྱི་བདེ་གཤེགས་སྙིང་པོ་བདེན་པར་མ་གྲུབ་པར་ཐལ། དེ་དོན་དམ་པར་གཅིག་ཏུའང་མ་གྲུབ། དུ་མར་ཡང་མ་གྲུབ་པའི་ཕྱིར། བསལ་བ་ཁས་བླངས། རྟགས་མ་གྲུབ་ན། གཅིག་ཏུ་གྲུབ་ན་དུ་མ་ལ་ཁྱབ་པ་བུད། དུ་མར་གྲུབ་ན་གཅིག་ཡིན་པ་བུད།

གཞན་ཡང་། ཤེས་བྱ་ཆོས་ཅན། བདེ་གཤེགས་སྙིང་པོ་བདེན་འཛིན་གྱི་བློ་སྤང་དུ་མི་རུང་བར་ཐལ། དེ་བདེན་པར་གྲུབ་པའི་ཕྱིར་གསུངས་པ་ལ། སློབ་དཔོན་བློ་གྲོས་རྡོ་རྗེས། ཤེས་བྱ་ཆོས་ཅན། སྤྲོས་བྲལ་དུ་འཛིན་པའི་བློ་སྤང་དུ་མི་རུང་བར་ཐལ། སྤྲོས་བྲལ་ཡིན་པའི་ཕྱིར། འཁོར་གསུམ་ཁས་བླངས་ཟེར་བ་ལ། དེ་འདྲ་ཚིག་འདྲ་ཙམ་ཡིན་སྙིང་པོ་མེད་གསུངས། དེ་དག་ལ་སོགས་པའི་ལུང་རིགས་དུ་མས་ཇོ་ནང་པའི་གྲུབ་མཐའ་ལ་སྔར་ཞུགས་པ་ལོག་པ་དང་། ཐེ་ཚོམ་ཟ་བ་དང་། ཕྱིས་མི་འཇུག་པའི་འཕྲིན་ལས་མཛད་དོ། །བདག་ཉིད་ཆེན་པོས་དུས་འཁོར་ཆོས་མིན་གསུང་བར་གངས་ཅན་དུ་གྲགས་ནའང་། སྒྲ་ཇི་བཞིན་པ་ལ་ནང་འགལ་ཡོད་གསུང་པ་ལས། ཆོས་མིན་ཞེས་མ་གསུངས་ཏེ། རྩོད་པར། འོན་ཀྱང་འཕགས་པས་མཛད་དམ་མིན་ཀྱང་སླ། །ལེགས་པར་བཤད་པའང་མང་དུ་མཐོང་བས་ན། །ཐར་འདོད་རྣམས་ཀྱི་འཇུག་ངོག་མ་ཡིན་ཞེས། །ཁོ་བོ་འདི་ལ་མཐའ་གཅིག་བཀུར་མི་འདེབས། །ཞེས་དང་། འགལ་སྤོང་དུ། དིང་སང་གངས་རིའི་ཁྲོད་འདིར་མཁས་རློམ་རྣམས། །ལྡེམ་པོའི་ངག་གིས་ཟབ་མོའི་ཚུལ་སྟོན་པ། །དུས་ཀྱི་འཁོར་ལོའི་རྒྱུད་འགྲེལ་དང་བཅས་པའི། །ཚིག་ལ་ཇི་བཞིན་སྨྲ་རུ་མངོན་ཞེན་པས། །རྣམ་གཞག་མདོ་རྒྱུད་ཚོགས་དང་འགལ་བ་ཡི། །ལོག་པའི་ཆོས་ལུགས་མང་དུ་སྤེལ་མཐོང་ནས། །འཁྱོག་པོའི་ཤིང་ལ་སྲོང་བའི་ཚུལ་བསྟན་ནས། །རྒལ་ཞིང་བརྟག་པའི་སྒོ་ནས་བདག་གིས་བྲིས། །ཞེས་དང་།

ངེས་དོན་གསལ་བྱེད་དུ། འདི་དོན་འགྲེལ་བྱེད་མཁས་པ་གཞན་དག་གིས། །སྙིང་པོ་དོར་ནས་སྦུན་པ་ཡང་ཡང་ཕྱར། །རྒྱ་མཚོ་སྲུབས་ལས་བདུད་རྩི་ཇི་བཞིན་དུ། །ཡང་དག་དོན་གྱི་སྙིང་པོ་ཁོ་བོས་བླངས། །འདབ་བརྒྱའི་ཚལ་ནས་སྦྲང་རྩི་བུང་བས་ལེན། །ཆུ་དང་འོ་མ་ངང་པས་སོ་སོར་འབྱེད།སྔོན་འཇིག་རྟེན་ཆགས་པའི་ཚེ། ལྷ་དང་ལྷ་མ་ཡིན་རྣམས་ཀྱིས་རི་རབ་ལ་སྲུབས་ཤིང་བྱས། ཀླུའི་རྒྱལ་པོ་ནོར་རྒྱས་ལ་བསྲུབ་ཐག་བྱས་ནས། རྒྱ་མཚོ་བསྲུབ་པ་ལ། བདུད་རྩི་བུམ་པ་གང་དང་། དུག་ཧ་ལ་བུམ་པ་གང་དང་། ཟླ་བ་ཕྱེད་པ་གཅིག་དང་གསུམ་བྱུང་། དེའི་ཚེ་བདུད་རྩི་ལྷ་རྣམས་ཀྱིས་ཁྱེར། དུག་དབང་ཕྱུག་གིས་མཐུང་པས་མགྲིན་པ་ནག་པོར་སོང་། ཟླ་བ་ཕྱེད་པ་ལྷའི་དབང་པོའི་གཙུག་རྒྱན་བྱེད་ཅེས་གྲགས། དེ་བཞིན་དུ་དུས་ཀྱི་འཁོར་ལོའི་རྒྱ་མཚོ་བསྲུབས་པ་ལས་བྱུང་བའི་དུག་འགའ་ཞིག་ཇོ་ནང་པས་གསོལ། དྲང་དོན་གྱི་ཟླ་བ་ཕྱེད་པ་མཁསཔ་ཞ་ལུ་བ་གཞན་གྱིས་བྱིས་པ་རྣམས་དགའ་བའི་རྒྱན་དུ་བྱས། ངེས་དོན་གྱི་བདུད་རྩི་ཁོ་བོས་བླངས་སོ། །ནོར་བུ་འཆིང་བུ་དེད་དཔོན་མཁས་པས་ཤེས། །ལེགས་བཤད་ཉེས་བཤད་མཁས་པའི་བློ་ཡིས་རྟོགས། །ཡོད་པའི་ལེགས་བཤད་ཕྲག་དོག་མུན་པས་སྒྲིབ། །མེད་པའི་སྐྱོན་རྣམས་བློ་ངན་མིག་གིས་མཐོང་། །གདུག་པའི་སྦྲུལ་གྱིས་འོ་མ་འཐུང་བ་བཞིན། །ལེགས་བཤད་བདུད་རྩིས་ཉོན་མོངས་དུག་འཕེལ་བའི། །ལོག་པའི་རྒྱུན་ཕྱོགས་གཞོལ་བའི་བློ་ངན་རྣམས། །ལེགས་བཤད་ཆུ་ལོན་སྟོང་གིས་མི་ལྡོག་མེད། །གཟུར་གནས་བློ་ལྡན་འགའ་ཡིས་འདི་མཐོང་ན། །ཡིད་ལ་འབབ་འགྱུར་སྙམ་ནས་ངས་འདི་སྦྱར། །ཞེས་གསུངས། དེ་ལྟར་མདོ་རྒྱུད་བསྟན་བཅོས་དེ་དག་གི་དགོངས་པ་དང་མཐུན་ན་ག་ལ་འགེག །ཆོས་སྐུ་རྟག་བརྟན་ཐེར་ཟུག་ཏུ་འདོད་པ་སྔར་རྒྱ་བོད་བལ་གསུམ་གང་དུའང་མ་བྱུང་ཞིང་། ད་ཡང་ལྟ་བ་ངན་པ་ལ་འཇུག་པ་རྒྱུད་བཅད་པའི་ཕྱིར་དགག་པ་མཛད་དེ། དགེ་ལེགས་ས་བོན་ཡོན་ཏན་ཀུན་གྱི་གཞི། །ཡང་དག་ལྟ་བའི་ནོར་མཆོག་འཕྲོག་བྱེད་ཅིང་། །ཐར་པའི་སྲོག་རྩ་གཅོད་པར་བྱེད་པ་ཡི། །ལྟ་ངན་ལས་ལྷག་ཕུང་བྱེད་དགྲ་གཞན་མེད། །ལྟ་ངན་དམན་པའི་ཐད་ལ་མངོན་ཞེན་ཅིང་། །རྟག་ཆད་མཐར་ལྟའི་ཝ་སྐད་ཆེར་སྒྲོག་པ། །འདི་དག་ངུར་སྨྲིག་རྒྱལ་མཚན་འཆང་ན་ཡང་། །ཐུབ་པའི་བསྟན་ལ་མུ་སྟེགས་ཐན་སྐྱེལ་ཡིན། །ཞེས་གསུངས།

དེ་དུས་ཇོ་ནང་པའི་ཕོ་རུས་པ་གཅིག་གིས་ལྡོག་ན་ཡར་ཡོངས་པས། མཁས་པ་གཞོན་བློ་དཔོན་སློབ་རྣམས་འབྱོན་གྱི་འདུག་ཟེར་བ་ཐོས་ནས། ཇོ་ནང་པ་ལ་ང་མི་གཅིག་ལ་ཡོད་མེད་མེད། ཁོ་སོད་ན་ཇོ་ནང་པའི་དགྲ་སྒོ་ཆོག་པ་འདུག་བསམས་ནས། དབུ་ལ་རྡོ་རྡེག་པའི་དམ་བཅའ་བྱས་ཡོངས། དྲུང་པ་དང་འཇལ་བས་ལུས་རེངས། སེམས་དྲན་པ་ཉམས་ནས་བརྡེག་པ་མ་བྱུང་། ཁོ་དྲན་པ་རྙེད་པ་དང་། དགེ་བཤེས་གཟིལ་ཅན་གཅིག་འདུག་སྙམ་པ་བྱུང་། དུས་ཕྱིས་དྲུང་པ་ལ་དད་ནས་མཐོལ་བཤག་ཀྱང་ཕུལ་བར་གྲགས་སོ། །བཟང་ལྡན་དུ་ཀ་བཅུ་པ་ཡོན་ཏན་གྱིས། ཇོ་ནང་པ་ལ་བཀའ་སྐྱོན་མཛད་པ་འདི་ལ། སྡིག་པ་ཆེན་པོ་ཡོང་པ་འདྲ་ཞུས་པས། བདག་ཉིད་ཆེན་པོའི་གསུང་ནས། འདི་འདྲ་ཟེར་བ་ཤིན་ཏུ་མང་སྟེ་དེ་འདྲ་ག་ལ་ཡིན། སྔོན་འཇིག་རྟེན་དུ་སྟོན་པ་བྱོན་པའི་དུས་སུ་ལྷས་བྱིན་ལ་སོགས་པའི་བདུད་རིགས་རྣམས་དང་། མུ་སྟེགས་ཀྱི་སྟོན་པ་དྲུག་གསུམ་བཅོ་བརྒྱད་ལ་སོགས་རྣམས་ལ་ཞེ་སྡང་དང་ཁོང་ཁྲོ་དཔག་ཏུ་མེད་པ་སྐྱེས་པའི་སྡིག་པ་སྟོན་པ་ལ་ཡོང་ངམ། དེའི་རྗེས་སུ་རྒྱན་དྲུག་མཆོག་གཉིས་ལ་སོགས་བྱོན་པ་ལ་ནག་ཕྱོགས་རྣམས་མི་དགའ་བར་གྱུར་པའི་སྡིག་པའང་དེ་དག་ལ་འོང་ངམ། ཁྱད་པར་དུ་འཕགས་པ་ཀླུ་སྒྲུབ་བྱོན་ནས་ཐེག་པ་ཆེན་པོའི་སྲོལ་ཕྱེ་བ་ལ། རང་སྡེ་གཉིས་ཀས་ཐེག་ཆེན་ནི་བཀའ་མིན་ཞེས། སྐུར་པ་བཏབ་པའི་སྡིག་པ་ཡང་བདག་ཉིད་ཆེན་པོ་ལ་འོང་ངམ། ཉི་མའི་དཀྱིལ་འཁོར་ཤར་བའི་ཚེ། འབྱུང་པོའི་བྱ་རྣམས་ལོང་བ་རྟེན་འབྲེལ་གྱི་ཆོས་ཉིད་ཡིན་ཅིང་། གནམ་ཐིག་དྲང་པོར་རྒྱབ་ན་སྒུར་པོ་རས་སུ་འཐོན་པ་ལུགས་ཡིན། བླུན་པོའི་ལབ་དེ་འདྲ་བ་མ་ཟེར་གསུངས། སྡོམ་གསུམ་རབ་དབྱེ་ལས། སངས་རྒྱས་འཇིག་རྟེན་འབྱོན་པ་དང་། །མཁས་རྣམས་བཤད་པ་བྱེད་པ་ལ། །འབྲས་བུ་རྣམ་གསུམ་འབྱུང་བ་འདི། །སངས་རྒྱས་བསྟན་པའི་སྤྱི་ལུགས་ཡིན། །མཁས་པ་རྣམས་ཀྱིས་ཆོས་བཤད་ན། །ཆོས་ལོག་སྤྱོད་པ་ཕམ་བྱེད་ཅིང་། །བདུད་རིགས་ཐམས་ཅད་ཡི་མུག་འགྱུར། །མཁས་པ་ཐམས་ཅད་དགའ་བར་བྱེད། །འདི་འདྲས་བསྟན་པ་འཛིན་པར་བྱེད། །ཅེས་སོ། །

ལྟ་ཚེ་ཆོས་སྐུ་རྟག་བརྟན་འདོད། །སྒོམ་ཚེ་ཅི་སྣང་ཆོས་སྐུར་སྤྱོད། །ཆོས་སྐུ་རྒྱུད་ལྡན་ལུས་ཅན་ཀུན། །ལས་ཀྱི་འཁོར་བར་འཁྱམ་པར་འཚང་། །མཁན་ཆེན་གཡག་པས། སེམས་ཅན་ཐམས་ཅད་སངས་རྒྱ། འཁོར་བ་ལ་ཟད་པ་མེད་གསུངས་པ་ལ་བདག་ཉིད་ཆེན་པོས། སེམས་ཅན་ཐམས་ཅད་སངས་རྒྱ་བར་ཚད་མས་ངེས་པར་ཐལ། དེར་ཚད་མས་གྲུབ་པའི་ཕྱིར་ཞེས་གསུངས་པས། གཡག་པས་ཁྱབ་པ་མ་གྲུབ་གསུངས་ནས་ཚུར་ལྡོག་པས། རྟགས་མ་གྲུབ་ལ་སོགས་པའི་འཕེན་ལེན་མང་དུ་མཛད་ནའང་། དོན་ལ་སྟོན་པ་མཁས་པ་རྣམས་བདག་ཉིད་ཆེན་པོའི་རིག་པ་ལ་མཉེས་ཤིང་། ཚིག་ལ་སྟོན་པའི་མཁས་པ་རྣམས་མཁན་ཆེན་གཡག་པའི་རིག་པ་ལ་མཉེས་པར་གྲགས་སོ། །ཆོས་རྗེ་ལོ་ཙཱ་བ་དང་། ཀརྨ་པ་དཀོན་གཞོན་གཉིས་ཀུན་རྫོབ་ཏུ་ཡོད་པས་ཡོད་པའི་གོ་ཆོད་མི་ཆོད་ལ་རྩོད་པ་མཛད་པས། རྩོད་པ་འགྲེལ་མོ་བྱུང་། པང་ལོ་ཙཱ་བའི་གསུང་ནས་དོན་བརྩོད་ནི་མི་ཡོངས་བར་འདུག ། ཚིག་ལ་སྙིང་པོ་མེད་པས། དྲུང་པ་རྣམས་འོ་བརྒྱལ། གཞན་རྣམས་ཐུགས་དམ་ཆགས་པས་བཞུད་གསུངས།

དེ་ནས་བདག་ཉིད་ཆེན་པོས། དྲུང་པ་འོ་བརྒྱལ་བདག་གིས་བརྩོད་པས་ཆོག་གསུངས་ནས་ཐལ་འགྱུར་འགའ་འཕངས་པས། ཀརྨ་པ་ལ་ཟུག་པར་ཐམས་ཅད་ཀྱི་མཐུན་སྣང་དུ་གྲུབ། དྲུང་གི་གསུང་ནས། དབུས་གཙང་གི་དགེ་བཤེས་ཆེན་པོར་གྲགས་པ་རྣམས་ཀྱང་། དོན་རྒྱབ་འགལ་སོང་ཡང་ཚིག་ཕྱོགས་ཙམ་འགྲིག་ན། རང་རེ་བརྩོད་རྒྱུ་མེད། གྲུབ་མཐའ་མཐུན་ཅེས་སྨྲ། དོན་གཅིག་ཀྱང་ཚིག་ཅུང་ཟད་མི་མཐུན་ན་མགོ་བྱང་མཐུག་ཏུ་སོང་སོང་བརྩོད་ཀྱིན་འདུག་སྟེ་དེ་འདྲ་ལ་སྙིང་པོ་མེད། དྲུང་ལོ་ཙཱ་བ་ཡང་། རིགས་པས་མ་དཔྱད་པར་ཀུན་རྫོབ་ཏུ་ཡོད་པས་ཡོད་པའི་གོ་མི་ཆོད་ནི་མི་གསུང་། གསུངས་ན་ཆད་ལྟར་འགྱུར། ཀརྨ་པ་ཡང་རིགས་པས་དཔྱད་ནས་ཀྱང་ཀུན་རྫོབ་ཏུ་ཡོད་ན་ཡོད་པས་གོ་ཆོད་པར་མི་འདོད། འདོད་ན་རྟག་ལྟར་འགྱུར། གཞོང་སྟོང་ལ་ཁྱི་འཐབ་མི་དགོས་པར་གདའ་གསུང་། དེ་དུས་ཉན་མཁན་རྣམས་ན་རེ། བླ་མའི་ཞབས་ཏོག་ཏུ་འགྲོ་བ། རང་གི་བློ་གྲོས་ཀྱི་ནུས་པ་ཐོན་པ། ངོ་མཚར་ཆེ་ཞེས་ཤིན་ཏུ་དད་པར་གྱུར་ཏོ། །

སྟག་ལུང་ལོ་ཙཱ་བ་ཤཱཀྱ་བཟང་གིས་བཀའ་བཞི་པ་གཅིག་བཏང་ནས། ངེད་རྒྱན་དྲུག་གི་དགོངས་པ་གཅིག་ཏུ་འདོད་པ་ཡིན། ཁྱེད་ཇི་ལྟར་འདོད་ཞུས་པས། དེ་ལ་ངེས་པ་མེད། གཅིག་པ་རྣམས་ནི་གཅིག །མི་གཅིག་པ་རྣམས་ནི་མི་གཅིག་པར་བྱས་པས་འོང་གསུང་། ཁོང་ན་རེ། ཁྱེད་མཁས་པ་ཆེན་པོ་ལགས་པས། ཐག་ཆོད་པའི་ཞལ་ལྟ་གནང་དགོས་ཞེས་ནན་གྱིས་ཞུས་པས། དགོངས་པ་ཨེ་གཅིག་མི་གཅིག་འདི་ལ་ཤེས་མོད། ཀླུ་སྒྲུབ་ཡབ་སྲས་རྗེས་འབྲང་དང་བཅས་པས་ཐོགས་མེད་སྐུ་མཆེད་རྗེས་འབྲང་དང་བཅས་པའི་ལུགས་འགེག་པར་འདུག །ཐོགས་མེད་སྐུ་མཆེད་རྗེས་འབྲང་དང་བཅས་པས། ཀླུ་སྒྲུབ་ཡབ་སྲས་རྗེས་འབྲང་དང་བཅས་པའི་ལུགས་འགེག་པར་འདུག །དེ་ལ་ཐུགས་སམ་བཏང་པས་ཤེས། ལར་དབུ་མ་པ་དང་དངོས་སྨྲ་བ་གཉིས་གྲུབ་མཐའ་གཅིག་ན། དགོངས་པ་མི་གཅིག་པ་བྱ་བ་སུ་ཡོད་པ་ཡིན། ཞེས་གད་མོ་ཆེར་མཛོད། སློབ་དཔོན་བཀའ་བཅུ་པ་དར་མ་ཡིད་ཆེས་འབྲས་རྟག་བླ་མ་རིན་པོ་ཆེ་པའི་དེ་དངོས་ཡིན་པར་གདའ་ལགས་ཞུས་པས། ཁྱེད་ཀྱི་དེ་ད་དུང་སྐྱོར་དང་གསུང་བསྐྱར་བས། གྲུབ་མཐའ་དེ་བཟུང་ན། ཁ་ནག་སྦབས་འགྲོ་བར་གསུང་། ཁོང་གི་འགྲོ་བར་གྱུར་གཅིག་ཅེས་གསུང་ནས། སྨོན་ལམ་འདེབས་ན་སྐུ་དབང་ཆེ། རིགས་པས་ལྡོག་མི་བཏུབ་ཞུས་པས། འོ་ན་དགུག་ཅིག་གསུངས་ནས། ཐལ་འགྱུར་གཅིག་འཕངས་པས། འཁོར་གསུམ་དངོས་འགལ་དུ་སོང་། ལོ་ཟླ་བར་བསམ་བསམ་པ་ཚོ་སྐད་ཅིག་རེ་ལ་ཁུར་རྒྱུགས་གསུང་། དེ་དུས་དབུས་པའི་དགེ་བཤེས་ཀུན་ན་རེ། བློ་བཟང་བ་འཇམ་དབྱངས་ཀྱི་ཞལ་གཟིགས་གར་གཤེགས་སུ་དཔེ་ཆ་མཛོ་རྒྱབ་ཆེ་ཆུང་བཞི་བཀལ་ནས་ཉིན་མཚན་མེད་པར་གཟིགས་པའི་གྲུབ་མཐའ་སྐྱོར་བཟང་པོ་དར་མ་ལྟ་བུས་སྐྱར་བ་ལ་སྐད་ཅིག་མ་ལ་བཤིགས་གཏོང་པས། འཇིགས་སུ་རུང་ཞེས་ཧ་ལས་པར་གྱུར་ཏོ། །

རྣལ་འབྱོར་གྱི་དབང་ཕྱུག་མི་ལ་རས་ཆེན་ལ་སོགས་པ་སྔོན་གྱི་ཕྱག་ཆེན་པ་འགའ་ཡིས་སྐུ་ཚེ་སྔ་མ་ཡང་དང་ཡང་དུ་སྦྱངས་ཤིང་། སྐུ་ཚེ་འདིར་ཡང་རླུང་སེམས་དབང་དུ་འདུས་ཏེ། གང་བྱུང་འདིས་ཆོག་ན་ཅི་བྱས་ཀྱང་སླ་བ་རྣལ་འབྱོར་པའི་སྤྱོད་པ་མཛད་པ་ལ་འཁྲུལ་གཞི་བྱས་ཏེ། དིང་སང་གི་ཕྱག་ཆེན་པར་བསྒོམ་པ་ཕལ་མོ་ཆེ་རྣམས་ནི་ལྷག་པར་ཚུལ་ཁྲིམས་ཀྱི་བསླབ་པ་ལ་གཅེས་སྤྲས་སུ་མཛད་པའི་དམ་པ་རྣམས་ཀྱི་ལུགས། ཉན་ཐོས་ཀྱི་ལུགས་ཡིན་ཞེས་ཁྱད་དུ་བསད་ནས་འཁོར་འདས་ཀྱི་ཆོས་ཐམས་ཅད་སྟོང་ཞིང་བདག་མེད་པ་ཡིན་ཞེས་ཚིག་ཏུ་སྨྲ་ཡང་། དོན་ལ་བདག་དང་བདག་གིར་འཛིན་པའི་གཉེན་པོར་ཅུང་ཟད་ཀྱང་མི་འགྲོ་བ་འདི་དག་ནི་ཆད་པར་ལྟ་བ་ཡིན་ཏེ། ལྟ་བས་སྤྱོད་པ་ཁྱད་མེད་དུ་བསད་ནས། བག་མེད་པའི་སྤྱོད་པ་ལ་ལྷུར་ལེན་པ་ལས་ཆད་པར་ལྟ་བ་གཞན་མེད། འདི་དག་ནི་སོ་སོར་རྟོག་པའི་ཤེས་རབ་ཀྱིས་དཔྱད་ནས་གནས་ལུགས་ཀྱི་དོན་བསྒོམ་པ་རྟོག་སྒོམ་སྐྱོན་ཅན་དུ་བྱེད་ཅིང་། ཡིད་ལ་བྱེད་པ་ཐམས་ཅད་བཀག་སྟེ། མི་རྟོག་པ་ཐོམ་པོ་སྒོམ་པ་ལ་སྐྱོན་མེད་ཀྱི་སྒོམ་དུ་བྱེད་པར་གནང་སྟེ། ལུགས་འདི་ནི་བསྟན་པ་ལས་ཕྱི་རོལ་དུ་གྱུར་པ་ཏིང་འཛིན་རྒྱལ་པོ་ལས་གསུངས་ཏེ། འཇིག་རྟེན་པ་དག་ཏིང་འཛིན་སྒོམ་བྱེད་ཀྱང་། །དེ་ནི་བདག་ཏུ་འཛིན་པ་བཞིག་མི་ནུས། །དེས་ནི་ཉོན་མོངས་ཆེས་ཆེར་རབ་ཏུ་འཁྲུགས། །ལྷག་སྤྱོད་ཀྱིས་ནི་ཏིང་འཛིན་འདིར་སྒོམ་བཞིན། །གལ་ཏེ་ཆོས་ལ་བདག་མེད་སོ་སོར་རྟོག །སོ་སོར་དེ་རྟག་སྒོམ་པར་བྱེད་པ་ནི། །དེ་ནི་མྱ་ངན་འདས་ཐོབ་འབྲས་བུ་རྒྱུ། །རྒྱུ་གཞན་གང་ཡིན་དེ་ནི་ཞི་མི་འགྱུར། །ཞེས་དང་། གང་དག་དྲན་པ་དང་ཡིད་བྱེད་བཀག་ནས། མུན་པ་ལ་མིག་གཅེར་ལྟས་བྱས་ཏེ་ཧད་སྒོམ་བྱེད་པ་དང་། མཚན་མ་ཅི་ཡང་མི་བྱེད་པར། རྣམ་རྟོག་ཐོལ་སྐྱེས་རྦད་ཆོད་བྱེད་པ་ནི། རྒྱ་ནག་ཧ་ཤང་གི་རིང་ལུགས་མ་ནོར་བ་འཛིན་པ་ཡིན་གསུང་། དིང་སང་གི་སྒོམ་ཆེན་པ་འགའ་ཞིག་ཤིན་ཏུ་ལས་སླ་བར་དོ་ཟིན་པ་ཡོད་ཟེར་བ་མང་སྟེ་ཉིན་པར་གྱི་སྣང་བ་འདི་ལ་ཨ་མཐས་ནས། རྨི་ལམ་གྱི་འཁྲུལ་པ་མི་ཟིན། རྨི་ལམ་ཟིན་པར་བར་དོའི་འཁྲུལ་སྣང་མི་ཟིན། རོ་ཁ་གདངས་ལ་གྲོག་ནམ་བབས་སུ་ཡོང་དུ་རེ་ཡང་མི་ཡོངས་གསུངས།

དེ་ལ་སོགས་ཏེ་ལུང་དང་རིགས་པ་དུ་མའི་སྒོ་ནས་སུན་ཕྱུང་བས། སྔར་ཞུགས་པ་ལྡོག་པ་དང་། འཇུག་པ་ཐེ་ཚོམ་ཟ་བ་དང་། ཕྱིས་མི་འཇུག་པ་ལ་སོགས་པའི་འཕྲིན་ལས་མཛད་དོ། །མཐའ་གཉིས་སྤང་བའི་ཆུ་གཏེར་ལ་གནས་ཏེ། །གདེངས་ཅན་དབང་པོ་ཀླུ་སྒྲུབ་རིང་ལུགས་འཛིན། །ཁོ་བོའི་ལྟ་ཟེར་འབར་བའི་གཟི་བརྗིད་ལ། །ཕས་རྒོལ་འདབ་སྟོང་གིས་ནི་རྒོལ་མི་ནུས། །འཇིགས་ཚོགས་ལྟ་རི་སྤོ་མཐོ་འཇོམས་བྱེད་པའི། །ལུང་རིགས་རྡོ་རྗེའི་གནམ་ལྕགས་སྟོང་ཡོད་ཀྱང་། །རྨོངས་པའི་གོ་ཆ་སྲ་བརྟན་ཆེར་དགོས་པའི། །སྐྱེ་བོ་འདི་ལ་བདག་གིས་ཅི་བྱར་ཡོད། །ཅེས་གསུངས་སོ། །བསྟོད་པར། ཁྱོད་ནི་རྩོད་པ་མཛད་ཚེའང་དག་པ་དང་། །རྒྱ་ཆེ་གཟུ་བོར་གནས་པའི་བློ་གྲོས་ཀྱིས། །གཞན་གྱི་ཕྱོགས་ལས་རྣམ་པར་རྒྱལ་བ་སྟེ། །ཁྱོད་ལ་གཡོ་བ་ནམ་ཡང་མངའ་མ་ལགས། །ཞེས་དང་། སྨྲ་བ་ངན་རྣམས་ཚར་གཅོད་པའི། །སུན་འབྱིན་བགྱིད་པའི་གནས་རྣམས་ལ། །སྐྱོན་ཡང་ཡོན་ཏན་ལྟ་བུ་དང་། །ཡོན་ཏན་སྐྱོན་ལྟར་སྣང་བ་ཡི། །ཡང་དག་པ་དང་ལྟར་སྣང་གི །རྣམ་པར་དབྱེ་བའང་ལེགས་པར་བསྟན། །དེ་ལྟར་ལོག་པར་འགྲོ་བ་བཀག །ཅེས་དང་། སྟོང་ཉིད་སེང་གེའི་ང་རོ་ཆེར་སྒྲོགས་ཤིང་། །ལུང་དང་རིག་པའི་མཆེ་སྡེར་རབ་བསྒྲད་དེ། །ལོག་པར་སྨྲ་བའི་ཝ་ཚོགས་ཕམ་བྱས་ནས། །ཐུབ་མཆོག་བསྟན་པ་གངས་རི་ལེགས་པར་འཛིན། །དེ་ཕྱིར་ད་ལྟ་འཛིན་མའི་ཁྱོན་འདི་ན། །ཆེ་བར་རློམ་པ་མང་དུ་སྣང་མོད་ཀྱང་། །བློ་ཆེན་འདི་ནི་འཛམ་གླིང་རྒྱན་གཅིག་པུར། །གཟུར་གནས་བློ་ལྡན་རྣམས་ཀྱི་ངེས་པར་གྱིས། །ཞེས་སོ། །

ལུང་རྟོགས་ཡོན་ཏན་ཐབས་མཁས་ཐུགས་རྗེ་ཡིས། །གདུལ་བྱའི་ཁམས་དང་བསམ་པ་བག་ལ་ཉལ། །ཇི་བཞིན་མཁྱེན་ནས་ཆོས་ཀྱི་འཁོར་ལོ་བསྐོར། །སྐལ་ལྡན་རྗེས་འཛིན་ཁྱོད་ལ་ཕྱག་འཚལ་ལོ། །ཞེས་པ་ནི། དེ་ལྟར་གོང་དུ་བསྟན་པའི་ལུང་རིགས་ཀྱི་ཡོན་ཏན་ཕུན་སུམ་ཚོགས་ཤིང་། གཞན་རྗེས་སུ་འཛིན་པའི་ཐབས་མཁས་ཐུགས་རྗེ་ཆེན་པོ་མངའ་བས། གདུལ་བྱའི་ཁམས་ཐེག་པ་ཆེ་ཆུང་གི་རིགས་སོ་སོར་མཁྱེན་ཅིང་། བསམ་པ་དབང་པོ་རྣོ་བརྟུལ་དང་། བག་ལ་ཉལ་ཉོན་མོངས་ཤས་ཆེ་ཆུང་ཇི་ལྟ་བ་བཞིན་དུ་མཁྱེན་ཅིང་། ཆོས་ཀྱི་འཁོར་ལོ་རང་རང་གི་སྐལ་བ་ཇི་ལྟ་བ་བཞིན་དུ་ཐེག་པ་ཆེ་ཆུང་ཆོས་རྒྱས་འབྲིང་བསྡུས་པ་སྡེ་སྣོད་གསུམ་ལ་སོགས་གང་ལ་གང་འོས་ཀྱི་ཟབ་ཅིང་རྒྱ་ཆེ་བའི་ཆོས་བསྟན་པ། སྨིན་གྲོལ་ཐར་པ་དང་། ཐམས་ཅད་མཁྱེན་པའི་ལམ་ཕྱིན་ཅི་མ་ལོག་པར་བསྟན་ནས། སྐལ་ལྡན་གྱི་གདུལ་བྱ་མཐའ་ཡས་པ་རྗེས་སུ་གཟུང་བའི་གཙོ་བོར་གྱུར་པ་ནི་འདི་དག་སྟེ། སྦྱངས་པའི་མཆོག་གྱུར་ཀུན་མཁྱེན་ཤེས་འོད་དང་། །སྲས་ཀྱི་མཆོག་གྱུར་བློ་བཟང་གྲགས་པའི་དཔལ། །མང་ཐོས་མཆོག་གྱུར་བློ་བཟང་གྲགས་པའི་དཔལ། །འདུལ་འཛིན་མཆོག་གྱུར་བློ་བཟང་གྲགས་པའི་དཔལ། །འཕྲིན་ལས་མཆོག་གྱུར་བློ་བཟང་གྲགས་པའི་དཔལ། །ལྟ་བའི་མཆོག་གྱུར་དགོན་གྱོ་ཉི་མ་གྲགས། །ཉམས་ལེན་མཆོག་གྱུར་ཀུན་དགའ་དཔལ་བཟང་པོ། །བརྩེ་ལྡན་མཆོག་གྱུར་དཔལ་འབྱོར་ཤེས་རབ་དང་། །འཆད་མཁས་མཆོག་གྱུར་བསོད་ནམས་ཤེས་རབ་དང་། །བརྩོད་བཟང་མཆོག་གྱུར་དར་མ་རིན་ཆེན་ཏེ། །གཞུང་ལུགས་རབ་འབྱམས་ཤེས་པའི་བཤེས་གཉེན་བདུན། །བཀའ་བཅུ་པ་ཆེན་པོ་ནམ་མཁའ་བྱང་ཆད་ནི། དེ་དག་དང་ངོ་མཉམ་དུ་བྱེད་དོ། །

གཞན་ཡང་བཀའ་བཅུ་བ་མང་ར་བ་ཡོན་ཏན་རྒྱལ་མཚན། བོ་དོང་བཀའ་བཅུ་པ་གྲགས་པའི་ཚུལ་ཁྲིམས། བྱང་པ་བཀའ་བཅུ་པ་དགེ་ལེགས་དཔལ། གནས་སྙིང་བཀའ་བཅུ་པ་མཆོག་གྲུབ་ལ་སོགས་པ་རྣམས། མདོ་སྟོད་པ་བཀའ་བཞི་འཛིན་པ་སྤྲེ་བོ་ཐང་བཟང་། གཉལ་གྲོ་གོར་བ་ཇོ་གདན་མཚུངས་མེད། ལས་སྟོད་པ་མཁན་ཆེན་བུདྡྷ་ཤྲཱི། སྟ་སྟེང་བ་ཆེན་པོ་བྱང་བསོད། ཆེན་པོ་བྱང་རྒྱལ། བཟང་ལྡན་པ་དོན་གྲུབ་རིན་ཆེན། ངམ་རིངས་པ་དཀོན་མཆོག་དར། མངའ་རིས་པ་ཡི་དམ་དཔལ་ལ་སོགས་པ་བཀའ་བཞི་འཛིན་པ་བཅུ་ཕྲག་གཅིག་གསུང་། ཡང་དེ་ལས་མང་བ་སྣང་། ལུང་རིགས་སྨྲ་བའི་སེང་གེ་སྒྲ་ཚད་པ་ཆོས་བཟང་། ཇོ་གདན་གྲག་ཤེ། སྔོ་ཕྱི་དབོན་པོ་ལ་སོགས་པ་ཕར་ཚད་མཁྱེན་པ་ཡང་ཤིན་ཏུ་མང་། རིག་པ་སྨྲ་བ་རྣམས་ཀྱི་ནང་ན་མཆོག་རྒྱུ་གྱུར་པ། རི་ཕུག་མཁན་ཆེན་བསོད་ནམས་སྐྱབས། དགའ་ལྡན་གྱི་མཁན་ཆེན་ཤཱཀྱ་ཤྲཱི་ལ་སོགས་པ་རིགས་པ་སྨྲ་བའང་ཤིན་ཏུ་མང་། སྟོད་ལུང་པ་བསོད་བྱང་ལ་སོགས་པ་ལུང་ཆོས་སྨྲ་བ་ཡང་མང་དུ་བྱོན། འདི་དག་ནི་བདག་ཉིད་ཆེན་པོའི་གསུང་རབ་ཁོ་ན་ལས་རྟོག་པ་འཁྲུང་པ་ཡིན་ནོ། །

གཞན་ཡང་བདག་ཉིད་ཆེན་པོའི་གསུང་རབ་ལ་གཟིགས་ཤིང་། སྡོམ་ཕྲུག་རྣམས་ཀྱི་ནང་ནས་མཆོག་ཏུ་གྱུར་པ། བོ་དོང་མཁན་ཆེན་ཕྱོགས་ལས་རྣམ་པར་རྒྱལ་བ་ཆོས་ཀྱི་རྒྱལ་མཚན་པ་དང་། གྲགས་རམ་མཁན་ཆེན་ཆོས་རྒྱལ། ངམ་རིངས་པ་མཁན་ཆེན་རིན་ཆེན་དཔལ་བཟང་། བཟང་ལྡན་སྡེ་བདག་སློབ་དཔོན་ཆེན་པོ་ནམ་མཁའ་དཔལ། ལ་སྟོད་ནམ་མཁའི་རྣལ་འབྱོར་མཁྱེན་ལྡན་དྷརྨཱ་མགོན་སེང་། སྟག་ཚང་མཁན་པོ་སེང་གེ་རྒྱལ་མཚན། གསང་བུ་གླིང་སྟོད་མཁན་ཆེན་འོད་ཆེན་པ། གླིང་སྨད་མཁན་ཆེན་བསོད་ནམས་འཕེལ། བཀའ་བཞི་འཛིན་པ་ཆེན་པོ་ནག་རིག །སློབ་དཔོན་ཆེན་པོ་སྙལ་པ་དང་། རྒྱལ་དབང་ལ་སོགས་པ་གསང་ཕུའི་སློབ་དཔོན་ཆེན་པོ་ཕལ་ཆེ་བ་དང་། དགའ་བ་གདོང་པའི་མཁན་ཆེན། བྱ་ཡུལ་རིན་པོ་ཆེ། ལོ་མཁན་པོ། བྱང་རྭ་བྲིང་གི་མཁན་པོ་གཉིས། གླང་སྟག་ཤེར་གསུམ་གྱི་དབོན་ཆེན། རྟ་སྣ་ཆོས་ལུང་གི་མཁན་པོ། ལྷ་བདུན་གྱི་བླ་མ་ལ་སོགས་མངའ་རིས་ཀྱི་སྡེ་སྣོད་འཛིན་པ་རྣམས་ནི། ཉི་ཟླ་ལྟར་གྲགས་པའི་མཁས་པ་པཎྜི་ཏའི་སློབ་རིགས་ཡིན། སྦས་པའི་རྣལ་འབྱོར་གང་ཟག་ཀུ་སུ་ལུའི་སློབ་རིགས་རྣམས་ཀྱི་ནང་ནས་མཆོག་ཏུ་གྱུར་པ། སྒྲ་ཚད་ལ་སོགས་ཐོས་པའི་ཡོན་ཏན་དང་ལྡན་ཡང་། ཀུ་སུ་ལུའི་སྤྱོད་པ་སྐྱོང་ཞིང་། གཞན་ཕན་བྱང་ཆུབ་ཀྱི་སེམས་ཀྱིས་ཐུགས་རྒྱུད་ཤིན་ཏུ་སྣུམ་པར་བྱས་པས། ཆོས་ཀྱི་རྗེ་ཛྙཱ་ན་བ་དང་། ལུང་རིགས་ཡོན་ཏན་ཁུར་གྱིས་ལྗི་ཡང་། ཀུ་སུ་ལུའི་སྤྱོད་པ་ཁོ་ན་ལྷུར་ལེན་པ་མཆོག་བཟང་ལེགས་པའི་བློ་གྲོས་དང་། རྗེ་བཙུན་འཇམ་པའི་དབྱངས་ཀྱི་ཞལ་རྒྱུན་དུ་གཟིགས་ཤིང་། ཀུ་སུ་ལུའི་སྤྱོད་པ་ཉིན་མཚན་འདའ་བ་བླ་མ་རྨི་ལམ་པ་བརྩོན་འགྲུས་སེང་གེ་དང་། དབུས་པ་བདག་པོའི་བླ་མ་ཆོས་རྗེ་རིན་བཟང་པ་དང་། ཚེ་འདི་བློས་བཏང་ཞིང་སྒྲུབ་པ་སྙིང་པོར་མཛད་པ། ནེ་རིང་པ་སྒྲུབ་པ་དཔལ་ལ་སོགས་པ་གཉུག་མའི་འཁོར་བྱ་བྲལ་བ་རྣམས་སོ། །

རྡོ་རྗེ་འཛིན་པའི་མཆོག་ཏུ་གྱུར་པ། ས་སྐྱ་གྲང་མོ་ཆེའི་མཁན་ཆེན་བཟང་པོ་རྒྱལ་མཚན་པ་དང་། ཆོས་རྗེ་ལམ་འབྲས་པ་བློ་བཟང་པ་དང་། རྡོ་རྗེ་འཛིན་པ་ཆེན་པོ་ཆོས་དཔལ་བཟང་པོ་དང་། རྡོ་རྗེ་འཛིན་པ་ཆེན་པོ་བླ་མ་བསོད་གྲགས་པ། བླ་མ་རྒྱལ་བཟང་པ། སྔགས་འཆང་ཀུན་དགའ་ཟླ་བ་ལ་སོགས་པ་རིག་པ་འཛིན་པའི་སློབ་མ་ཤིན་ཏུ་མང་། གཞན་ཡང་རབ་ཏུ་བྱུང་བའི་གདུལ་བྱ་མཐའ་ཡས་སོ། །རིགས་དང་རུས་དང་ཆོ་འཕྲང་དང་བསོད་ནམས་ཀྱི་དཔལ་གྱིས་མངོན་པར་མཐོ་བའི་སློབ་རིགས་ནི། འཛམ་བུ་གླིང་སུམ་གཉིས་ཀྱི་བདག་པོ། རིགས་གསུམ་མགོན་པོའི་སྤྲུལ་པ་ཆོས་རྒྱལ་རྣམ་པ་གསུམ་གྱི་དབོན་སྲས་དམ་པ། ཁྲི་རྒྱལ་བསོད་ནམས་ལྡེ་ཡབ་ཡུམ་སྲས་དང་བཅས་པ། དམ་པ་འབའ་ཞིག་བྱུང་བའི་རིགས་ས་སྐྱ་འཁོན་གྱི་གདུང་རྒྱུད། བླ་མ་དབང་གི་སྲས་པོ། སློབ་དཔོན་ཆེན་པོ་སྟོབས་ཀྱི་འཁོར་ལོས་བསྒྱུར་བའི་རྒྱལ་པོས་སེ་ཆེན་གན་གྱི་གདུང་རྒྱུད་གོང་མ་དགེ་སྦྱོང་པ་འབྱོར་ལྡན་ནེའུ་དཔོན་ནམ། དད་ལྡན་ཡོན་ཏན་རྒྱ་མཚོ། རིག་ལྡན་འུ་ཡུག་ལྷ་བཙུན། གནས་སྙིང་སྟོང་དཔོན་རྒྱལ་བཟང་། སྟོབས་ལྡན་རྒྱ་ཆོས་སྟག་གསུམ་པ། ཁུང་བཙུན་མངའ་རིག་ཞང་བློན་འཁོར་དང་བཅས་པ་ལ་སོགས་པ་གདུལ་བྱ་མཐའ་ཡས་པ་ལ་རྒྱུ་མངོན་པར་མཐོ་བ་དང་། འབྲས་བུ་ངེས་པར་ལེགས་པ་ལ་སོགས་པ་ཐོབ་པའི་ཐབས་ཕྱིན་ཅི་མ་ལོག་པ་བསྟན་ནོ། །ཀུན་མཁྱེན་ཤེར་འོད་བློ་བཟང་གྲགས་པ་སོགས། །གཞུང་ལུགས་ལེགས་པར་ཤེས་པའི་བཤེས་གཉེན་བདུན། །བཀའ་བཞི་ལེགས་པར་སྨྲ་བ་བཅུ་ཕྲག་གཅིག །ཕར་ཚད་ཤེས་པའི་སློབ་མ་བརྒྱ་ཕྲག་རྒལ། །ཞེས་གསུངས་སོ། །

དེ་ལྟར་དངོས་ཀྱི་གདུལ་བྱ་རྣམས་རྗེས་སུ་བཟུང་ནས་མ་འོངས་པའི་གདུལ་བྱ་རྣམས་རྗེས་སུ་གཟུང་བར་བྱ་བའི་ཕྱིར། གོང་དུ་བཤད་པའི་ལེགས་པར་བཤད་པའི་འཕྲེང་བ་དེ་རྣམས་མཛད་དེ། འཛམ་གླིང་མཁས་པའི་རྒྱན་མཆོག་བཀའ་ཆེན་བཞི། །རྩ་འཇུག་བཞི་གསུམ་ཐེག་ཆེན་རྒྱུད་བླ་དང་། །ཆོས་མངོན་མཛོད་དང་དཔལ་ལྡན་འདུས་པ་སོགས། །རྣམ་བཤད་བྱས་པའི་གཞུང་ལུགས་བཅུ་ཕྲག་གཅིག །ཅེས་གསུངས་ཀྱང་། དེར་མ་འདུས་པ་ལུང་ཀུན་ལས་བཏུས་པའི་ཊཱིཀྐ། གསང་འདུས་ཀྱི་དཀྱིལ་ཆོག །བདག་འཇུག །མཆོད་ཕྲེང་། མདོ་རྒྱུད་བསྟན་བཅོས་ཐམས་ཅད་ཀྱི་སྙིང་པོ་གཅིག་ཏུ་བསྡུས་པ་གོ་བདེ་འཇུག་པར་སླ་བའི་མན་ངག །རིན་པོ་ཆེ་བཀའ་བུམ་ཐོར་བུ་བ་ལ་སོགས་པ། རྗེས་འཇུག་གི་གདུལ་བྱ་རྣམས་ཀྱི་སྟོན་པ་ཡི་གེའི་ངོས་ན་གཞུག་པ་དཔེ་ལྔ་བཅུ་རྩ་ལྔ་མཛད་དོ། །མདོ་ལས། ལྔ་བརྒྱ་ཐ་མར་གྱུར་པའི་ཚེ། །ང་ནི་ཡི་གེའི་ངོས་ལ་གནས། །ཞེས་གསུངས། བསྟོད་པར། མཁས་པ་དགྱེས་པའི་ལམ་དུ་འཁྲིད། །མང་ཐོས་ཆུད་མི་ཟ་ཡི་རྒྱུ། །དེ་དོན་བསྒྲུབ་ལའང་རབ་ཏུ་སྦྱོར། །དེ་ཕྱིར་ཁྱོད་ཀྱི་གདུལ་བྱ་ལ། །བགྱི་བར་འོས་པ་མ་ལུས་མཛད། །ཕན་མཛད་ཁྱོད་ལ་དུས་ཀུན་ཏུ། །བདག་ནི་གུས་པས་ཕྱག་འཚལ་ལོ། །ཞེས་སོ། །

བདག་མེད་གནས་ལུགས་རྟོགས་པའི་ཤེས་རབ་ཀྱིས། །ཀུན་རྫོབ་རྟེན་འབྲེལ་སྒྱུ་མ་ལྟ་བུར་གཟིགས། །དོན་དམ་ཆོས་དབྱིངས་ནམ་མཁའ་ལྟ་བུར་རྟོགས། །ལྟ་བ་རྣམ་དག་ཁྱོད་ལ་ཕྱག་འཚལ་ལོ། །ཞེས་པ་ནི། འཁོར་འདས་ཀྱི་ཆོས་ཐམས་ཅད་སྟོང་ཞིང་བདག་མེད་པར་རྟོགས་པའི་ཤེས་རབ་ཟབ་མོས། མ་བརྟགས་ཉམ་དགའ་བའི་རྣམ་འགྱུར་ཀུན་རྫོབ་རྟེན་ཅིང་འབྲེལ་པར་འབྱུང་བ་ཐམས་ཅད་སྒྱུ་མ་དང་རྨི་ལམ་ལྟ་བུར་མ་འདྲེས་པར་སོ་སོར་གཟིགས་ཤིང་། དོན་དམ་བདེན་པ་ཆོས་ཀྱི་དབྱིངས་ནམ་མཁའི་དཀྱིལ་ལྟར་བརྗོད་དུ་མེད་པའི་དོན། སོ་སོར་རང་གིས་རིག་པའི་ཡེ་ཤེས་བརྙེས་པའི་ལྟ་བ་རྣམ་པར་དག་པ་དང་ལྡན་པ་ཡིན་ཏེ། ཁོ་བོ་ལ་དབུ་མའི་རྟོགས་པ་སྐྱེས་ཚུལ་རིམ་པ་བཞི་བྱུང་སྟེ། འདི་ལྟར་དང་པོ་ཆད་སྟོང་། གཉིས་པ་སྣང་སྟོང་། གསུམ་པ་རྟེན་འབྲེལ་སྒྱུ་མར་གོ་བ། བཞི་པ་རྟེན་འབྲེལ་བརྟགས་ཡོད་གཞི་མེད་དུ་གོ་བའོ། །དེ་ལ་དང་པོ་ནི་བུམ་པ་ཐོ་བས་བཅོམ་པ་ལྟར། ཀུན་རྫོབ་རྫས་ཡོད་རིགས་པས་བཤིག་པའི་སྟོང་པ་ཉིད་དེ། འདིས་ཀྱང་རིགས་དཔྱད་ཀྱི་བདེན་འཛིན་བཟློག་ཅིང་། སྟོང་ཉིད་ལ་མོས་པའི་རྒྱུ་ཙམ་བྱེད་དོ། །

གཉིས་པ་ནི། སྣང་བ་སྒྱུ་མ་ལྟ་བུར་སྣང་དུས་ཉིད་ནས་རང་བཞིན་མེད་པར་རྟོགས་པ་སྟེ། འདིས་ཕྱིས་གཟུང་བ་ལ་སྒྲོ་བཀུར་གྱི་རྟོག་པ་མཐའ་དག་བཟློག་ཀྱང་། ནང་མྱོང་རིག་ལ་བྲོད་པའི་ཞེན་པ་མི་འདོར་བས། སེམས་ཙམ་རྣམ་བརྫུན་པའི་ལྟ་བ་ལས་མ་འདས། གསུམ་པ་ནི། ནང་མྱོང་རིག་དང་ཕྱི་གཟུང་བ་གཉིས་ཀ་ཡང་རྒྱུ་རྐྱེན་ལ་རག་ལུས་པས། སྒྱུ་མ་ལྟར་ཀུན་རྫོབ་ཏུ་ཡང་སྣང་བ་ཙམ་ལས་རང་བཞིན་ཅུང་ཟད་ཀྱང་མེད་པར་རྟོགས་པ་སྟེ། འདི་ལ་ཡང་མཐར་འཛིན་གྱི་ཞེན་པ་ཅི་ཡང་མེད་ཀྱང་། རྟེན་འབྲེལ་སྒྲ་རྟོག་ལ་མ་ལྟོས་པའི་དོན་ཆོས་སྒྱུ་མ་ཙམ་དུ་འཛིན་པ་ཡོད་པས། རྣལ་འབྱོར་སྤྱོད་པའི་དབུ་མ་པ་ལས་མ་འདས། བཞི་པ་ནི། རྟེན་འབྲེལ་གྱི་ཆོས་རྣམས་རིགས་པས་ཚུལ་བཞིན་དུ་བཅད་པ་ན། རང་གི་ངོ་བོ་ཅུང་ཟད་ཀྱང་མི་རྙེད་ཅིང་། མ་དཔྱད་པ་ན་ཐ་སྙད་ཀྱི་ཡུལ་དུ་གྱུར་པ། རྟོག་པས་བརྟགས་ཤིང་། མིང་གི་ཐ་རྙེད་དུ་བྱས་པ་ཙམ་གྱིས་བརྟགས་ཡོད་དུ་རྟོགས་པའོ། །དེ་ལྟ་བུའི་རང་བཞིན་གྱི་རྟེན་འབྲེལ་རྟོགས་པའི་བློ་དེ་ཉིད་ཀྱིས། བློ་གཞན་ལ་ལྟོས་མེད་དུ་རྒྱུ་འབྲས་ཕན་ཚུན་མི་འཁྲུལ་བ་དང་། རྟེན་འབྲེལ་རྟག་ཆད་སྤྲོས་པའི་མཐའ་ཐམས་ཅད་དང་བྲལ་བ་གཅིག་འོང་བ་ཡིན་གསུང་། ལྟ་བ་འདི་གཞན་གྱི་ཐུགས་ཡུལ་དུ་མ་ཆུད་པར་ཆད་ལྟ་ཡིན་ཟེར་བ་མང་ན་ཡང་། ཁས་ལེན་ཐམས་ཅད་དང་བྲལ་བའི་ལྟ་བ་འདི་ཀླུ་སྒྲུབ་ཡབ་སྲས་ཀྱི་དགོངས་པ་ཕྱིན་ཅི་མ་ལོག་པ་ཡིན་ཏེ། འཕགས་པ་ཀླུ་སྒྲུབ་ཀྱི་ཞལ་སྔ་ནས། གལ་ཏེ་ངས་དམ་བཅས་འགའ་ཡོད། །དེས་ན་ང་ལ་སྐྱོན་འདི་ཡོད། །ང་ལ་དམ་བཅའ་མེད་པས་ན། །ང་ནི་སྐྱོན་མེད་ཁོ་ན་འོ། །ཞེས་གསུངས་ཀྱང་། འགའ་ཞིག་རང་རྒྱུད་ཀྱི་དམ་བཅའ་མེད། རང་ལུགས་ཀྱི་དམ་བཅས་ཡོད་ཅེས་ཟེར་ཡང་། མིང་སྤོས་པ་ཙམ་མ་གཏོགས་དོན་ལ་ཁྱད་པར་འགའ་ཡང་མེད་གསུང་། མཁས་པ་གཞན་དག་གི་ལྟ་བ་བཟང་བཟང་པོར་འདོད་པ་རྣམས་ཀྱང་། བདག་འཛིན་ལ་གྲོས་དྲིས་ནས་བཞག་པར་ཁོ་ནར་ཟད། ངའི་ལྟ་བ་འདི་ཡང་ང་རང་དང་སྡོངས་ནས་འགྲོ་བ་གཅིག་ཡོང་པར་འདུག་སྟེ། ཤིན་ཏུ་མད། ཆོས་རྗེ་བློ་བཟང་པས་འཇམ་དབྱངས་ཀྱི་ཞལ་གཟིགས་ནས། དབུ་མའི་ལྟ་བ་དགོངས་ཚུལ་ཞུས་པས། ད་དུང་མ་གོ་གསུངས།

འོ་ན་ཁྱེད་དཔོན་སློབ་ལ་ཁྱེད་པས། སློབ་དཔོན་པས་ཀྱང་མ་དགོངས་ཞུས་པས། ཁོང་གིས་གོ་ཡོད། ཞིབ་ཆ་འགའ་ཡར་ནི་མ་གོ་གསུང་། དེ་ལྟར་གྲགས་ཀྱང་། ཆོས་རྗེ་པའི་གདུལ་བྱ་ཕོ་རུས་ཆེ་ཞིང་། མཁྱེན་རབ་ཆུང་བ་འགའ་ཞིག་ཡབ་སྲས་གཉིས་ཆོས་རྗེ་པའི་ལྟ་བ་མཆོག་ཡིན་ཏེ། འཇམ་དབྱངས་ཀྱི་ཞལ་གཟིགས་པའི་ཕྱིར་ཟེར་བ་ནི་མི་རིགས་ཏེ། འཇམ་དབྱངས་དང་མི་དང་མི་བཞིན་འགྲོགས་ཤིང་། སངས་རྒྱས་ཀྱི་བསྟན་པ་ལ་ཡང་ཆོས་རྗེ་པས་ཆེས་ཆེར་ལྷག་པའི་བྱ་བ་མཛད་པ་པཎ་ཆེན་ཞི་བ་འཚོས་ཀྱང་། ཐལ་འགྱུར་གྱི་ལྟ་བ་ཐུགས་སུ་མ་ཆུད་པ་རྒྱ་བོད་ཀུན་ཏུ་གྲགས་ཤིང་། དོན་ལ་ཡང་གནས་ཏེ། རང་རྒྱུད་པའི་ཤིང་རྟ་ཆེན་པོ་ཡིན་པའི་ཕྱིར་རོ། །འཕགས་པ་དང་དངོས་སུ་འཇལ་བས་ལྟ་བ་བཟང་ལ། མ་འཇལ་བས་ལྟ་བ་ངན་པའི་ངེས་པ་མེད་དེ། སློབ་དཔོན་ཆེན་པོ་ལེགས་ལྡན་འབྱེད་དང་། དཔལ་ལྡན་ཟླ་བ་གྲགས་པ་བཞིན་ནོ། །དྲུང་པ་ལ་ཆད་ལྟ་བ་ཡིན་ཟེར་མཁན་བརྡའ་ལགས་ཞུས་པས། ཡོད་ཉེན་ཡོད། སྔོན་སྟོན་པ་འཇིག་རྟེན་དུ་བྱོན་པའི་དུས་སུ་དགེ་སྦྱོང་གོའུ་ཏ་མ་ནི་ཆད་པར་སྨྲ་བའོ། །ཞེས་ཟེར་མཁན་བྱུང་འདུག །དེའི་རྗེས་སུ་ཀླུ་སྒྲུབ་ཡབ་སྲས་དཔལ་ལྡན་ཟླ་བ། ཁུ་བྱུག་ཆེ་ཆུང་ལའང་དེ་བཞིན་ཟེར་མཁན་བྱུང་འདུག །བོད་དུ་ཡང་དབུ་མ་པ་ཆེན་པོ་གངས་པ་ཤིའུ། ཁུ་མདོ་སྡེ། འབར་སྤ་ཚབ་ཉི་མ་གྲགས། ལྕེ་སྒོམ་ཞིག་པོ་སོགས་ལའང་ཆད་ལྟ་བར་གྲགས་འདུག །འུ་བུ་ཡང་ཆད་ལྟ་ཡིན་ཡང་གྲོགས་བཟང་བར་ཡོད་ཀྱི་གསུང་། ཀརྨ་པ་དཀོན་གཞོན་གྱིས་ཀྱང་། ཁྱེད་ཆད་ལྟ་བ་ཡིན་བྱས་པས། ང་ཆད་ལྟ་བ་ཨེ་ཡིན། ངའི་སྤྱོད་པ་འདི་ལ་ལྟོས་གསུངས་པས། ཁྱེད་ཤིན་ཏུ་མད་པར་གདའོ། །བཟོད་པར་གསོལ་ཅེས་ཞུས་པར་གྲགས།

ཕྱོགས་བཅུར་བཞུགས་པའི་རྒྱལ་བ་སྲས་བཅས་རྣམས། །མངོན་སུམ་བྱོན་ནས་དབྱངས་དང་མགྲིན་གཅིག་གིས། །འདི་ལས་གཞན་དུ་ཐར་པའི་ལམ་སྟོན་ཡང་། །བདག་བློ་གཡོ་བ་མེད་དོ་གྲོགས་པོ་དག །ཅེས་གསུངས། དེ་ལྟར་ཕྱིར་མི་ལྡོག་པའི་རྟོགས་པ་བརྟན་པོ་ཐོབ་པ་ཡིན་ནོ། །བཤེས་གཉེན་དུལ་བ་ཞི་བ་ཉེར་ཞི་བ། །སྡོམ་པ་གསུམ་ལྡན་ཉེས་ལྟུང་དྲི་མ་བྲལ། །སྒོ་གསུམ་མ་བཅོས་ལྷུག་པའི་ངང་དུ་བཞག །སྤྱོད་པ་རྣམ་དག་ཁྱོད་ལ་ཕྱག་འཚལ་ལོ། །ཞེས་པ་ནི། ཐེག་པ་ཆེན་པོའི་དགེ་བའི་བཤེས་གཉེན་འདི་ནི། ལྷག་པའི་ཚུལ་ཁྲིམས་ཀྱི་བསླབ་པ་དང་ལྡན་པས། ཐུགས་རྒྱུད་ཤིན་ཏུ་དུལ་བ་ལ། ལྷག་པའི་ཤེས་རབ་ཀྱི་བསླབ་པ་དང་ལྡན་པས་རབ་ཏུ་ཞི་ཞིང་། ལྷག་པ་སེམས་ཀྱི་བསླབ་པ་དང་ལྡན་པས་ཉེ་བར་ཞི་བ་ཡིན་ནོ། །སོ་སོར་ཐར་པ་བསྙེན་གནས་ཀྱི་སྡོམ་པ་ཡན་ལག་བརྒྱད། དགེ་བསྙེན་གྱི་ཡན་ལག་ལྔ། དགེ་ཚུལ་གྱི་ཡན་ལག་བཅུ། དགེ་སློང་གི་ཁྲིམ་ཉིས་བརྒྱ་ལྔ་བཅུ་རྩ་གསུམ་ལ་ཉེས་ལྟུང་གི་དྲི་མའི་སྐྱོན་གྱིས་མ་གོས་པ་ཡིན་ཏེ། གང་ཞིག་ལེགས་གསུང་དམ་ཆོས་འདུལ་བ་ལ། །རབ་ཏུ་བྱུང་ནས་ལེགས་པར་མི་སྡོམ་ཞིང་། །ཐུབ་པའི་བཀའ་ལུང་ཚུལ་མིན་ཟློ་བྱེད་པའི། །དགེ་སྦྱོང་དེ་དག་འཇིག་རྟེན་ཆོམ་རྐུན་ཡིན། །འཁྱོག་པོར་སྨྲ་ལ་གཞན་དག་རླིང་པོར་སེམས། །ངག་མི་བཙུན་པ་དགེ་སྦྱོང་ཚུལ་མིན་པས། །གྱ་གྱུའི་སེམས་དང་དེ་ཡི་ཚུལ་སྤངས་ཏེ། །གསོང་པོར་སྨྲ་ལ་ཁོ་བོ་རྟག་ཏུ་བསྟེན། །འཛད་མེད་སྨྲ་བ་གཞན་དག་སྤོབས་པར་སེམས། །ངག་མི་སྡོམ་པ་དགེ་སྦྱོང་ཚུལ་མིན་པས། མུ་ཅོར་སྨྲ་བ་སྨྱོན་པའི་ཚུལ་སྤངས་ཏེ། །ཞི་བའི་ཚུལ་ལ་ཁོ་བོ་རྟག་ཏུ་བསྟེན། །ཕྱི་ཚུལ་འཆོས་ལ་གཞན་དག་བཙུན་པོར་སེམས། །གཡོ་རྒྱུའི་སྤྱོད་པ་དགེ་སྦྱོང་ཚུལ་མིན་པས། །ཕ་རོལ་བྲིད་བྱེད་ཡོན་པོའི་ཚུལ་སྤངས་ཏེ། །དེས་པའི་ཚུལ་ལ་ཁོ་བོ་རྟག་ཏུ་བསྟེན། །རང་དགའི་སྤྱོད་པ་གཞན་དག་དྲང་པོར་སེམས། །དབང་པོ་མི་སྡོམ་དགེ་སྦྱོང་ཚུལ་མིན་པས། །བག་དང་མི་ལྡན་ཧྲལ་པོའི་ཚུལ་སྤངས་ཏེ། །བག་ཡོད་ཚུལ་ལ་ཁོ་བོ་རྟག་ཏུ་བསྟེན། །བྱ་བྱེད་མང་བ་གཞན་དག་གྲུང་པོར་སེམས། །རྣམ་གཡེང་འདོད་པ་དགེ་སྦྱོང་ཚུལ་མིན་པས། །འདུ་འཛིས་བྲེལ་བ་ཁྱིམ་པའི་ཚུལ་སྤངས་ཏེ། །དོན་ཉུང་ཚུལ་ལ་ཁོ་བོ་རྟག་ཏུ་བསྟེན། །ལོངས་སྤྱོད་འབྱོར་པ་གཞན་དག་དཔལ་དུ་སེམས། །འདོད་ཞེན་ཆེ་བ་དགེ་སྦྱོང་ཚུལ་མིན་པས། །ཟང་ཟིང་དང་བཅས་གྲོང་པའི་ཚུལ་སྤངས་ཏེ། །ཆོག་ཤེས་ཚུལ་ལ་ཁོ་བོ་རྟག་ཏུ་བསྟེན། །གྲོང་འདབ་འགྲིམ་པ་གཞན་དག་གདུལ་བྱར་སེམས། །རྙེད་བཀུར་སྒྲུབ་པ་དགེ་སྦྱོང་ཚུལ་མིན་པས། །ཁེ་སྤོགས་འདོད་པ་ཚོང་པའི་ཚུལ་སྤངས་ཏེ། །བས་མཐའི་གནས་ལ་ཁོ་བོ་རྟག་ཏུ་བསྟེན། །ཞེས་གསུངས་སོ། །

དེ་ལྟར་གཞན་གནོད་གཞི་བཅས་སྤོང་བ་སོ་སོར་ཐར་པའི་ཚུལ་ཁྲིམས་རྣམ་པར་དག་པ་ཡིན་ནོ། །གཞན་ཕན་མཐའ་དག་སྒྲུབ་པ་བྱང་ཆུབ་སེམས་དཔའི་ཚུལ་ཁྲིམས་ཀྱང་རྣམ་པར་དག་པ་ཡིན་ཏེ། རྙེད་དང་བཀུར་སྟི་ཆགས་པ་ཡིས། །བདག་བསྟོད་གཞན་ལ་སྨོད་པ་དང་། །ཞེས་པའི་ཉེས་པས་མ་གོས་ཏེ། གང་དུ་གནས་ན་སྣང་ཤས་འཕེལ་འགྱུར་ཞིང་། །རང་རྒྱུད་བརྙེད་བཀུར་ཞག་པས་འཆིང་བྱེད་པ། །གཞན་རྒྱུད་ཕྲག་དོག་འགྲན་སེམས་ཀྱིས་གདུངས་པའི། །གནས་དེར་སྐད་ཅིག་ཙམ་ཡང་མི་གནས་སོ། །གཞན་གྱིས་ཉེས་པ་ནམ་ཡང་མི་གླེང་ཞིང་། །དོན་དང་ལྡན་ཞིང་ཆོས་མཐུན་ལ་གཏོགས་པ། །དམག་དང་ཆོམ་རྐུན་རྒྱལ་པོའི་གཏམ་ལ་སོགས། །འཁྲུལ་པའི་བཀའ་མཆིད་ནམ་ཡང་མི་བགྱིད་དོ། །ཞེས་གསུངས། སྡུག་བསྔལ་མགོན་མེད་གྱུར་པ་ལ། །སེར་སྣས་མཆོད་གཏོར་མི་གཏེར་དང་། །ཞེས་པའི་ཉེས་པས་མ་གོས་ཏེ། ཆོས་དོན་དུ་གཉེར་བའི་གདུལ་བྱ་མགོན་མེད་རྣམས་ལ་དཔེ་མཁྱུད་སྤངས་ཏེ། མདོ་རྒྱུད་བསྟན་བཅོས་ཀྱི་དགོངས་པ་རང་ནམ་ཚིམ་གྱི་བར་དུ་སྟོན་པའི་ཕྱིར་རོ། །

གདུལ་བྱ་རྫས་དོན་དུ་གཉེར་བ་མགོན་མེད་པ་རྣམས་ལ་ཡང་རྫས་ལ་སེར་སྣ་སྤངས་ཏེ། དབུལ་འཕོངས་ཀྱི་རེ་བ་བསྐོང་བར་མཛད་དོ། །བདག་ཉིད་ཆེན་པོ་འདི་མང་ཡུལ་གྱི་གྲོང་ན་བཞུགས་པའི་དུས་སུ། ཞབས་ཏོག་པ་མེད་པ་ལ། འཛེ་ཕོ་ཕ་ཕད་གཉིས་ཡོང་ནས། བསོད་སྙོམས་གྲགས་པ་གཅིག་གནང་བར་ཞུ་ཞུས་པས། ནང་དུ་གཤེགས་ནས། ཙམ་སྐྱལ་ཀོག་གེ་གཅིག་གནང་པས། ཤ་གཅིག་ཀྱང་ཐུགས་ལ་ཐོག་ཟེར་བ་ལ། ཤ་ལག་པ་གཅིག་གནང་། སྐུ་བྱུག་གི་ཆས་མར་གཅིག་ཀྱང་གནང་བར་ཞུ་ཟེར་ནས་བཙལ་བས་མར་གོང་ཕྱེད་བཤག་གཅིག་རྙེད་པའང་གནང་། རས་ལྕགས་འགའ་ཡར་ཡང་གནང་ཞེས་གྲགས། དགའ་བ་གདོང་དུ་ཁམས་པ་གཅིག་གིས་ཇ་ལ་གདན་དྲངས་བསྔོ་རྟེན། གྷང་དཀར་པོ་གཅིག་ཕུལ། ཚུལ་བྱོན་པའི་ལམ་དུ་སྤྲང་པོ་གཅིག་གིས་གནང་སྦྱིན་ཞུས་པས་ཕྱག་ཕྱིར་བཙུན་ཆུང་གཅིག་ཡོད་པ་ལ་གོས་ཡུག་དེ་བྱིན་གསུངས་ནས་གནང་། ཡང་ལྷ་སར་གཤེགས་པའི་ལམ་དུ་སྤྲང་པོ་གཉིས་ལ་དངུལ་གྱི་རྡོ་རྗེ་རེ་རེ་གནང་། ལྷ་སར་སྤྲང་པོ་མང་པོ་འདུས་ནས། གནང་སྦྱིན་ཞུས་པས། ཉེ་འཁོར་ན་ཡོད་པའི་གྲོགས་ཐམས་ཅད་བོས་ཤིག་གསུངས་པས། ཁོང་པས་ལྷ་ས་སྡེ་བཞིའི་སྤྲང་པོ་ཐམས་ཅད་བསྡུས་ནས། སྤྲང་རྫུས་དང་བཅས་པས་ལྔ་བརྒྱ་ཙམ་བྱུང་པ་ལ། དར་ཁ་དང་གོས་ཁ་འདྲེས་པ་སྤུང་ནས་སྤྲང་པོ་འཕྲང་ལ་བཤར་ནས། སྣ་ཟིན་རེ་གནང་པས་སྤྲང་པོ་རྒན་པོ་གཅིག་ན་རེ། ལྷ་སར་བླ་མ་ང་བཟང་ཟེར་བ་མང་པོ་བྱུང་སྟེ། འབར་བ་པ་དང་འདི་གཉིས་ལས་དྲག་པ་མ་བྱུང་། འབར་བ་པས་རིན་རྒྱབ་དར་ཁ་རེའི་ཐག་སྐྱེ། འདིས་རང་རེའི་གསོད་དེ་ཁ་ལ་དར་ཁ་གོས་ཁ་གང་ཟིན་རེ་བྱུང་པ་ཡིན་ཟེར་རོ། །

བུལ་རོང་དུ་བཞུགས་དུས། ཀོ་ཀར་གྱིས་ཤ་ཕྱེད་གང་ཟག་ལ་བཞག ། མར་གོང་གཅིག་བྱ་རོག་འགའ་ཡིས་གང་མཐོར་ལ་བཞག་པ་སོགས། རྫས་ལ་སེར་སྣ་མི་འདའ་བ་ཡིན་ཏེ། བདག་པོ་བ་ལ་བདག་གིར་འཛིན་པ་དང་བྲལ་བའི་ཕྱིར། གསེར་དངུལ་གོས་དར་སོགས་ཅི་ཕུལ་ཡང་སྤྱན་གཟིགས་པ་ཙམ་མ་གཏོགས་གཅེས་སྤྲས་སུ་འཛིན་པའི་ཕྱག་ལེན་དང་ཞལ་ལྟ་སོགས་གང་ཡང་མི་མཛད་དོ། །གཞན་གྱི་བཤགས་ཀྱང་མི་ཉན་པར། ཁྲོས་ནས་གཞན་ལ་འཚོག་པ་དང་། ཅེས་པའི་ཉེས་པ་ཡང་མི་མངའ་སྟེ། བདག་ཉིད་ཆེན་པོ་གཙང་དུ་གཤེགས་ཤུལ་དུ། ཆོས་རྗེ་རྣམ་གཉིས་རྭ་སྒྲེང་དུ་བྱོན་དུས། ཉིན་གཅིག་བྱ་བྲལ་དུ་ཆོས་རྗེ་ལོ་ཙཱ་བས། ཆོས་རྗེ་བློ་བཟང་གྲགས་པ་ལ། ཁྱེད་ཡབ་སྲས་གཉིས་ཀྱི་འདིར་ཟླ་བ་གཉིས་གསུམ་དུ་སྐུ་མཚམས་དམ་པོ་མཛད་ནས། ཆོས་ཀྱི་འབེལ་གཏམ་མང་དུ་མཛད་པ་ཡོད་པར་གདའ་བ། དྲུང་རྗེ་བཙུན་པ་ལ་ཐུན་མོང་མ་ཡིན་པའི་ཡོན་ཏན་ཅི་མངའ་གསུང་གི་གདའ་ཞུས་པས། བླ་མའི་ཡོན་ཏན་མཁས་བཙུན་བཟང་གསུམ་པ་ཆོས་མཐུན་གྱི་རྣལ་འབྱོར་བ་དང་བྲལ་བ་དེར་གདའ་ཞུས་པས། དེའང་མིན་པའི་ཐུན་མོང་མིན་པ་འདྲ་གསུངས་བསྡོག་པ་ད་ལན་ཅིས་ཀྱང་གསུང་པར་ཞུ་ཞུས་པས། བླ་མའི་ཡོན་ཏན་ཆུང་ཤོས་གདའ་ལགས་ནའང་། ས་སྐྱ་ནས་འཆད་ཉན་བཤོལ་ཏེ། བུལ་རོང་དུ་ཞལ་གཟིགས་ནས། ཐ་མ་ད་ལྟའི་བར་ལ་ཁོང་ཁྲོ་ཚ་འཁྲུག་པ་གཅིག་ཀྱང་སྐྱེས་མ་མྱོང་གསུང་གིན་གདའ་ལགས་གསུངས་ནས། སྤྱན་ཆབ་ཆེར་གཡོས་པས། ཆོས་རྗེ་ལོ་ཙཱ་བས་ཀྱང་སྤྱན་ཆབ་བཏང་ནས་གསུང་གཏོན་ཏེ་བཤུམས་ཞེས་ཐོས། ཐེག་པ་ཆེན་པོ་སྤོང་བྱེད་ཅིང་། །དམ་ཆོས་འདྲར་སྣང་སྟོན་པ་འོ། །

ཞེས་པའི་ཉེས་པའི་མངའ་སྟེ། ཐེག་པ་ཆེན་པོ་དབུ་སེམས་གཉིས་རྡོ་རྗེ་ཐེག་པ་དང་བཅས་པ་ཕྱིན་ཅི་མ་ལོག་པར་དགོངས་པའི་ཕྱིར་རོ། །ཉོན་མོངས་ལམ་དུ་བསྒྱུར་བ་རིག་འཛིན་གྱི་སྡོམ་པ་ལའང་ཉེས་ལྟུང་གི་མ་རེག་སྟེ་རྩ་བའི་ལྟུང་བ་བཅུ་བཞི། ཡན་ལག་གི་བརྒྱད་རྣམས་ཀྱིས་ཕལ་ཆེར་མ་གོས་ཤིང་། རེ་རེ་ཙམ་བྱུང་སྲིད་ནའང་དུས་ལས་མ་འདས་པར་བཤགས་སྡོམ་མཛད་པའི་ཕྱིར། ཐེག་ཆེན་བསླབ་པའི་བསམ་སྦྱོར་ཉམས་པ་མེད། །ཅེས་སོ། སྐུའི་སྤྱོད་པ་མ་བཅོས་པ་ཡིན་ཏེ། ཚུལ་འཆོས་དང་བྲལ། གསུང་གི་སྤྱོད་པ་མ་བཅོས་པས་བཞོགས་བློངས་ཁ་ཟག་ཐོབ་འཇབ་སོགས་དང་བྲལ། ཐུགས་ཀྱི་སྤྱོད་པ་མ་བཅོས་པ་རྣམས་སེམས་གཡོ་རྒྱུ་སོགས་དང་བྲལ། གང་བྱུང་གིས་ཆོག་ན་ཅི་བྱས་ཀྱང་བདེ་བ་ཁྱབ་བརྡལ་ལྷུག་པའི་སྤྱོད་པ་མཛད་དོ། །ཚེ་འདི་བློས་བཏང་སྒྲུབ་པ་སྙིང་པོར་མཛད། །བདེན་གཉིས་རྟེན་འབྲེལ་ཕྱིན་དྲུག་རིམ་གཉིས་བསྒོམ། །ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེད། །ཉམས་ལེན་རྣམ་དག་ཁྱོད་ལ་ཕྱག་འཚལ་ལོ། །ཞེས་པ་ནི། ཁོ་བོ་དབེན་པ་བརྟེན་པའི་རྒྱུ་མཚན་ཡང་། །འཁོར་དང་གྲོགས་ཀྱིས་ཡིད་སུན་ཕྱུང་བ་འམ། །རྙེད་བཀུར་གྲགས་པ་འདོད་ཕྱིར་མ་ཡིན་གྱི། །གཞན་དུ་ན་འཁོར་བའི་སྡུག་བསྔལ་མེ་འོབས་ལྟར་ཤིན་ཏུ་བརྣག་དཀའ་བར་མཐོང་བའི་ཕྱིར།

དེ་ཡང་འདི་ལྟར། སྲིད་པའི་ཕུན་ཚོགས་ཤིན་ཏུ་གནོག་ཆུང་ཞིང་། །རབ་མང་ཉེས་པའི་ཚོགས་དང་ལྡན་རིགས་ནས། །རང་གཞན་སྲིད་པའི་མཚོ་ལས་བསྒྲལ་བྱའི་ཕྱིར། །མང་ཐོས་བདག་ནི་དབེན་པའི་གནས་སུ་འགྲོ། །ཆར་འདོད་བྱི་འུས་འབྲུག་སྒྲ་ཐོས་པ་ལྟར། །དབེན་པའི་གཏམ་འདི་ཁོ་བོའི་སྙིང་ལ་འབབ། །ཐོས་པའི་དོན་རྣམས་དོན་ཡོད་བྱ་བའི་ཕྱིར། །གཞོན་ནུ་བློ་གྲོས་དབེན་པའི་གནས་སུ་འགྲོ། །ངང་པའི་ཚོགས་ཀྱིས་པདྨོའི་མཚོ་མཐོང་ལྟར། །བས་མཐའི་གནས་ལ་ཁོ་བོ་སེམས་རབ་གཡོ། །དལ་འབྱོར་ལུས་ལ་སྙིང་པོ་བླང་བྱའི་ཕྱིར། །གཞོན་ནུ་བློ་གྲོས་དབེན་པའི་གནས་སུ་འགྲོ། །བུང་བ་གཞོན་ནུ་འདབ་བརྒྱའི་ཚལ་མཐོང་ལྟར། །ཁོ་བོའི་ཡིད་ནི་དབེན་པའི་རོ་ལ་ཆགས། །ཏིང་འཛིན་བདུད་རྩིའི་རོ་དེ་མྱང་བྱའི་ཕྱིར། །གཞོན་ནུ་བློ་གྲོས་དབེན་པའི་གནས་སུ་འགྲོ། །དཔྱིད་དུས་བསིལ་བའི་མ་ལ་ཡ་རླུང་ལྟར། །ནགས་ཀྱི་སྨན་ལྗོངས་ཁོ་བོའི་ཡིད་ལ་འབབ། །ཉོན་མོངས་བདུད་ཀྱི་སྡེ་དེ་གཞོམ་བྱའི་ཕྱིར། །གཞོན་ནུ་བློ་གྲོས་དབེན་པའི་གནས་སུ་འགྲོ། །གསུངས་ནས། ས་སྐྱའི་བརྒྱ་དཔོན་དང་། བཟང་ལྡན་གྱི་མཁན་པོ་སོགས་མཛད་པའི་ཞུ་བ་ཕུལ་ནས། མི་ལོ་བཅོ་བརྒྱད་ཀྱི་བར་དུ་བསྟན་པ་ལ་བསམ། འཆད་ཉན་བྱས་ནས། རྒས་ཁ་འདིར་སྡེ་གོག་གཅིག་ལ་མི་འཇུག་གསུངས་ཏེ། སྐུ་ཚེ་འདིའི་ཕུན་ཚོགས་ཐམས་ཅད་སྤངས་ནས། གངས་བུ་མེ་དཀར་པོའི་གངས་མགུལ་གཡུ་ལུང་རྡོ་རྗེ་རྫོང་གི་དབེན་གནས་སུ་སྒྲུབ་པ་ལ་བྱོན་ནས། ལོ་ལྔའི་བར་དུ་རྩེ་གཅིག་ཏུ་སྒྲུབ་པ་མཛད་པའི་ཚེ། གང་ཟག་གི་བདག་མེད་གཏན་ལ་འབེབས་པ་ཉན་ཐོས་ཀྱི་སྒོམ། བདེན་བཞི་མི་རྟག་སོགས་སྐད་ཅིག་བཅུ་དྲུག་བསྒོམས། གཟུང་བ་ཆོས་ཀྱི་བདག་མེད་གཏན་ལ་འབེབས་པ་རང་རྒྱལ་གྱི་སྒོམ། རྟེན་འབྲེལ་ཡན་ལག་བཅུ་གཉིས་ལུགས་འབྱུང་ལུགས་ལྡོག་ཏུ་བསྒོམས། འཛིན་པ་ཆོས་ཀྱི་བདག་མེད་བསྟན་ལ་འབེབས་པ་བྱང་སེམས་ཀྱི་སྒོམ། ཕ་རོལ་ཏུ་ཕྱིན་པ་དྲུག་འཁོར་གསུམ་རྣམ་དག་ཏུ་བསྒོམས། ཉོན་མོངས་ལམ་དུ་འགྱུར་བར་རིག་འཛིན་གྱི་སྒོམ། བསྐྱེད་རྫོགས་ཟུང་འཇུག་ཏུ་བསྒོམས་པས་ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེད་པ་ཡིན་ཏེ། རྣལ་འབྱོར་རྡོ་རྗེའི་སྐུ་ལ་རྟག་བཞུགས་པ། །ཏིང་འཛིན་ཡོངས་སུ་རྫོགས་པའི་ཡན་ལག་སྟེ། །དེ་ནི་རྡོ་རྗེ་སེམས་དཔའ་ཞེས་སུ་བརྗོད། །བདེ་གཤེགས་རྣམས་ཀྱི་དབང་མཆོག་བཞི་པར་གྲགས། །མི་གནས་མྱ་ངན་འདས་པའང་དེ་ཡིན་ཏེ། །ཕྱག་རྒྱ་ཆེན་པོའི་དངོས་གྲུབ་དམ་པ་ཐོབ། །ཅེས་གསུངས།

དེ་དུས་སུ། གངས་ཅན་གྱི་བཤད་སྒྲུབ་པ་ཀུན་གྱིས་མ་རྟོགས་པ་དང་། ལོག་པར་རྟོག་པ་དང་། ཐེ་ཚོམ་གྱི་སྒྲོ་འདོགས་ཐམས་ཅད་གཅོད་པར་བྱེད་པའི་གནས་དམ་པར་གྱུར་ཅིང་། ཀུན་མཁྱེན་བཞིན་དུ་དྲི་བ་ཀུན་གྱི་ལན་འདེབས་པར་མཛད་དོ། །ཐུགས་དམ་ཟབ་མོ་གནད་དུ་སྣུན་པའི་རྟགས། །བླ་མ་ཡིད་དམ་མཁའ་འགྲོ་ཆོས་སྐྱོང་སོགས། །རྒྱུན་དུ་གཟིགས་ཀྱང་རང་རྒྱལ་བརྟུལ་ཤུགས་བརྟེན། །ངོ་མཚར་སྨད་བྱུང་ཁྱོད་ལ་ཕྱག་འཚལ་ལོ། །ཞེས་པ་ནི་གོང་དུ་བསྟན་པའི་ཐུགས་དམ་ཟབ་མོ་དེ་དག་གིས་ཉིན་མཚན་ཁོར་ཡུག་ཏུ་འདའ་བའི་ཚེ་དག་པའི་སྣང་བ་བསམ་གྱིས་མི་ཁྱབ་པ་གཟིགས་ཀྱང་རང་རྒྱལ་བཞིན་ཏུ་མི་སྨྲ་བའི་བརྟུལ་ཞུགས་བརྟེན་པར་མཛད་དོ། །འགའ་ཡར་གྱིས། དྲུང་པས་ཐུགས་དམ་མཛད་པ་ལ་རྟགས་ཁྱད་པར་ཅན་ཅི་བྱུང་ལགས་ཞུས་པས། མི་ཚེ་ཆོས་ལ་སྐྱལ་བ་ལ་རྟགས་ཐན་ཐུན་ཡོད་སྲིད་དེ། མི་བཤད་འཇིག་རྟེན་གྱི་བྱ་བ་ཆུང་ངུ་ལའང་བསངས་ནས་བསྒྲུབས་ན་འགྲུབ་ཀྱིན་འདུག་པ། རྟགས་རྣམས་བཤད་ན་ཉམས་པར་འགྱུར་ཞིང་། མཁའ་འགྲོའང་མི་མཉེས་པ་འདུག་གསུངས་ནས། ཆེད་དུ་གཉེར་ནས་ཞུས་པ་ཕལ་ཆེར་མི་གསུངས། ཡེངས་མ་ལམ་ལ་ཐལ་ལོ་གསུངས་པ་དང་། དབེན་སར་ཡང་ཡང་ནན་གྱི་ཞུས་པ་གསུངས་པ་རེ་རེ་ཙམ་བདག་གིས་ཐོས་པ་འདི་ལྟར་ལགས།

བུ་ལེར་བླ་མ་རྒྱལ་བཟང་པས། མཁན་ཆེན་གཡག་པའི་གསུངས་ནས། སློབ་དཔོན་གཞོན་ནུ་བློ་བའི་དབུ་མ་ལའང་རྒྱུད་པའི་བླ་མ་མེད། ང་ཡང་སློབ་དཔོན་མེད་རུང་སྟོན་གསུངས་པ་དང་། ལ་ལ་ན་རེ་ཟླ་གྲགས་ཀྱི་སྐུའི་སྐྱེ་བ་ཡིན། ལ་ལ་ན་རེ་ཟླ་གྲགས་ལ་དངོས་སུ་ཆོས་གསན་ཟེར་བ་གང་ལགས་ཞུས་པས། དབུ་མའི་ཚིག་གི་རྒྱུད་པ་ནི་ཡོད། དོན་གྱི་རྒྱུད་པ་ཡོང་པ་དཀའ་མོར་འདུག །དཔལ་ལྡན་ཟླ་བ་གྲགས་པའི་སྐྱེ་བ་མིན་པར་ཐག་ཆོད། ཆོས་ཉན་མ་ཉན་དཔོན་སློབ་ནང་བྱན་ཚུད་ཅིང་མི་ཕྱེད་པའི་དད་པ་ཐོབ་པར་གྲགས། མིན་ན་ལོག་ལྟ་སྐྱེ་བའི་རྒྱུར་འགྱུར་གསུངས། བདག་གི་དྲུང་པའི་སྐུ་གསུང་ཐུགས་ཀྱི་སྤྱོད་པ་ཅི་སྟོན་ཡང་ཡོན་ཏན་དུ་མཐོང་བ་མ་གཏོགས། སྐྱོན་དུ་མི་རྟོག་པར་མཆིས་པས། ཅིས་ཀྱང་གསུང་བར་ཞུ་ཞུས་པས། ཡུད་གཅིག་ཅི་ཡང་མི་གསུང་བར་འདུག །ཡེངས་མ་ངང་ལ་དཔལ་ལྡན་ཟླ་བ་རིག་འཛིན་གྱི་གོ་འཕང་བརྙེས་ནས། དིང་སང་ཡང་རྒྱ་གར་ན་བཞུགས་ཡོད་པ་ཡིན། སྐལ་ལྡན་གྱི་གདུལ་བྱ་རྗེས་སུ་འཛིན་པ་ལ། ཁོང་གི་དྲུང་རང་དུ་སྙག་དགོས་པ་ཡང་མ་ཡིན་གསུངས་པ་དང་། བླ་མ་ལྷ་པས་ཕྱག་རྡོར་གྲུབ་ཐོབ་ཏུ་མི་རྐང་བཙུགས་བཏང་ནས། སློབ་དཔོན་གཞོན་བློ་དང་། བྱང་པ་འཇམ་དབྱངས་ཀྱིས་གཅིག་གིས་ལྟ་ལོག་གི་བདག་རྐྱེན་བྱས། གཅིག་གིས་ལྟ་ལོག་དར་རྒྱས་སུ་བྱས་པ་འདི། ཕྱི་མ་གར་སྐྱེ་ གསང་བདག་ལ་ཞུ་གྲོགས་ཞུ་བྱས་པས། ཕྱག་རྡོར ་གྲུབ་ཐོབ་ཀྱིས་གསང་བདག་ལ་ཞུས་པའི་ལན་ལ་སློབ་དཔོན་གཞོན་བློ་བ་ཐེག་པ་ཆེན་པོའི་གང་ཟག་ཁྱད་པར་ཅན་ཡིན། ཁོང་གི་ལྟ་བ་དེ་ཡང་། ཟླ་གྲགས་ཀྱིས་རྨི་ལམ་དུ་བསྟན་པ་ཡིན་གསུང་། འཇམ་དབྱངས་པ་འདི་ས་པཎ་གྱི་དངོས་སློབ་མི་ཕྱེད་པའི་དད་པ་ཐོབ་པ་གཅིག་ཡིན། ད་ལྟ་ལོངས་སྤྱོད་དང་ལྡན་པ་ཡང་ས་པཎ་ལ་ཚོགས་འཁོར་གཅིག་ཞུས་པའི་རྣམ་སྨིན་ཡིན་ཟེར་བའི་ལན་ཁྱེར་འོངས་པས། ལྷ་པ་ན་རེ། དེ་ག་ཡིན་ཕྱག་རྡོར་གྱི་གྲུབ་ཐོབ་གཅིག་ཡོད་ན་ངའི་སྣ་བར་ཐོས་དོགས་མེད་གསུངས་ཟེར། དེའི་ལོ་རྒྱུས་བདག་ཉིད་ཆེན་པོ་ལ་སློང་རྩེར་ཞུས་པས། ཁོང་གི་ཡིད་ལ་ང་དམྱལ་བར་སྐྱེ་བ་འདུག་ཟེར་བ་གཅིག་ཡོང་དུ་རེ་བ་ཡིན་ཏེ། དེ་རང་མི་ཡོང་མཆིས་གསུངས། ཡང་བུལ་རོང་དུ་བཞུགས་པའི་དུས། ཞབས་བསྐོར་མཛད་འཕྲོ་ལ་ཁོ་དེ་བ་བྲག་ཡ་གི་ན་སྒྲོལ་མ་གཅིག་ཞུགས་ཀྱིན་འདུག་གསུང་། གང་ན་གདའ་ལགས་ཞུས་པས། ཕྱག་མཛུབ་གཙུག་ནས་ཡ་གི་གསུངས། མི་གདའ་ལགས་ཞུས་པས་དེ་ཀ་ཡིན་གསུངས་སོ། །

སྨུ་རྫིང་དུ་གསང་འདུས་ཀྱི་རྒྱུད་གསུང་དུས་སྒྲུབ་ཆེན་མ་དཔལ་མོའི་དབོན་མོ་སྒྲུབ་ཆུང་མ་ཡང་ཉན་གིན་ཡོད་པ་ཆོས་ཐུན་གྱི་མགོ་ཟུག་ནས་གྲོལ་གྲོལ་གྱི་བར་རྒྱུན་དུ་རྒོད་པ་འགའ་ཡར་བྱུང་། རྗེས་སུ་ཁྱོད་རྒོད་པ་ཅི་ཡིན་དྲིས་པས། མཁའ་འགྲོའི་རིགས་བསམ་གྱིས་མི་ཁྱབ་པ་ཁ་དོག་རྒྱན་དང་གོས་དང་སྤྱོད་ཚུལ་མི་འདྲ་བ་དུ་མ་ཆོས་ཉན་དུ་བྱུང་བ་ལ་རྒོད་པ་ཡིན་ཟེར། ཆོས་རྗེ་བློ་བཟང་པ་དཔོན་སློབ་འོ་དེ་གུང་རྒྱལ་གྱི་གངས་ལ་བཞུགས་དུས་དགོང་མོ་ཐུན་གཏོར་གཅིག་ལ། ཚོགས་པར་རྟོག་ལྡན་འཇམ་དཔལ་རྒྱ་མཚོས་ནམ་མཁའ་ལ་མཁའ་འགྲོའི་ཚོགས་མང་དུ་འདུས་ནས་བསྟོད་པ་འདི་འདོན་ཀྱིན་འདུག་པ་གཟིགས། གངས་བུ་ལེ་དཀར་པོའི་གཡས་མགུལ་ན། །རྣལ་འབྱོར་དབང་ཕྱུག་རེད་མདའ་བ། །མཐའ་བྲལ་གྱི་དབུ་མ་ཐུགས་སུ་ཆུད། །རྒྱུད་སྡེ་མཐར་ཐུག་དཔལ་གསང་འདུས། །ཐུན་མོང་མ་ཡིན་ཀླུ་སྒྲུབ་ལུགས། །བུལ་རོང་དུ་བཞུགས་དུས། མི་ནག་པོ་ཆུང་ངེ་བ། གདོང་པ་བཞི་ཡོད་པ་གཅིག་གཏོར་མ་ལེན་དུ་བྱུང་པ་ལ། ཁྱེད་གང་ནས་འོང་བྱས་པས། ཏེ་སེ་ནས་འོང་ཟེར། ཞལ་བཞི་པ་ཡིན་པར་གྲགས་སོ། །ཉེ་གནས་མཆོག་ལེགས་ལ་མདང་ཆོས་སྐྱོང་ཆུང་པ་དེ་ཡོང་འདུག་པས། གཏོར་མ་འབགས་འདུག ། ད་མན་ཆད་མ་འབག་པ་གྱིས་གསུངས་པས། མདང་སྤུ་ཏྲ་དེ་འོང་ཁ་ལྷག་ལྷག་ནས་སོ་བསོད་དུ་མ་བཅུག་གསུང་། སྨུ་རྫིངས་དུ་རྒྱུད་མཆོད་བྱས་དུས་སྒྲུབ་ཆུང་མས་གཟིགས་པས། བདག་ཉིད་ཆེན་པོའི་མགུལ་ནས་འཇིག་རྟེན་དབང་ཕྱུག་མས་འཁྱུད་ནས་ཐོད་པ་ཤ་ལྔའི་བདུད་རྩི་ལྔས་གང་བ་དྲུང་པ་ལ་ཡང་ཞུས། ཁོང་རང་ཡང་གསོལ་གྱིན་འདུག་ཟེར། བུལ་རོང་དུ་ཚོགས་འཁོར་གཅིག་གི་དུས་སུ་བླ་མ་སྒྲུབ་པ་དཔལ། སློབ་དཔོན་སངས་རྒྱས་དཔལ། བདག་དང་གསུམ་ཡོད་པ་ལས། དྲུང་གི་གསུང་ནས། ངའི་ཡིད་ལ་ད་རང་སངས་རྒྱས་ཀྱི་བསྟན་པ་རྣལ་མ་མེད་བསམ་ནའང་བུ་རྒྱུད་མགོ་འཆད་ནས་མ་གྲོལ་གྱི་བར། འཇིག་རྟེན་དབང་ཕྱུག་མའི་རྟའི་རྨིག་པ་ཟད་ཟད་བསྐོར་བ་བྱེད་པ་སྒྲུབ་ཆུང་མ་དེས་མཐོང་ཟེར་གྱིན་འདུག །ད་དུང་ཡང་བསྟན་པ་ལ་ཨ་ཐོ་ཡང་ཡོད་པར་འདུག་གསུངས། བུལ་རོང་དུ་རྟ་ཁྲིད་ཀྱི་གསོལ་འདེབས་མཛད་དུས་མཚན་མོ་བུད་མེད་དཀར་མོ་གསུམ་ཡོང་ནས། གསོལ་འདེབས་དེ་ལ་ཀོག་འདི་འདྲ་གཅིག་མཛད་པར་ཞུ་ཟེར་ནས། ཁོང་རྣམས་ཀྱིས་ཀོག་འདི་བྱས་ནས་བླངས་སོ། །

ཡང་བུལ་རོང་དུ་སྒྲུབ་ཆུང་མ་ལ་རིམ་ལྔའི་དམིགས་པ་ཞག་བཅུ་གསུམ་ཙམ་ནས་རེ་རེ་འབོག་ཀྱིན་ཡོད་པ་ལ། དམིགས་པ་གཅིག་ཞག་གཉིས་ཙམ་ལ། མི་གཞོན་གོས་དཀར་པོ་གྱོན་པ་གཅིག་འོངས་ནས་ཆུ་ཆུ་མེ་ཐོང་། ཚོད་མ་ཀོལ་བ་སོགས་གཡོག་གང་དགོས་བྱེད་ཅིང་། གཏམ་མི་ཟེར་བ་གཅིག་བྱུང་། སྒྲུབ་ཆུང་མས་ཀྱང་ཡེ་མ་ལབ། དམིགས་པ་ཞུ་རུ་ཕྱིན་དུས་ཞག་གཉིས་ཙམ་གྱི་གོང་དུ་མི་གཞོན་དེ་འབྱུང་བའི་ལོ་རྒྱུས་ཞུས་ནས། ཅི་ལགས་སམ་ཞུས་པས། ཅི་ཡིན་མི་ཤེས་ཁྱེད་རང་དགེ་སྦྱོར་ལ་འབུངས། ངས་ཀྱང་དམིགས་པ་གཟུང་གིས་གསུངས། ལོག་ནས་ཕྱིན་པས་མི་དེ་ད་དུང་སྔར་བཞིན་གཡོག་གང་དགོས་བྱེད་ཀྱིན་འདུག །ཞག་བཅུ་ཙམ་སོང་པ་དང་། ང་འགྲོ་འདོད་པ་ཡིན་ཏེ། ཁྱེད་ཀྱི་བླ་མས་ལུང་པ་མེས་བཀང་ནས་འགྲོ་ས་མི་འདུག །བླ་མ་ལ་ཐུགས་དམ་སློད་ཟེར་བ་ཞུ་གྲོགས་གྱིས་ཟེར་བ་ལན་ཅི་ཡང་མ་བྱས། ཡང་དམིགས་པ་ཞུ་རུ་ཕྱིན་དུས་ཁྱེད་ཀྱི་མི་ད་དུང་འདུག་གམ་གསུངས། ཁོང་ཟེར་ཚུལ་ཞུས་པས། ངས་ཐུགས་དམ་ཙམ་ཆེར་བྱས་པ་མེད། ད་ཁོང་རང་འགྲོ་ཡོང་གསུང་། དྲུང་ནས་སྲུང་འཁོར་བཤིག་པས། ལོག་ཕྱིན་དུས་སོང་ནས་མི་འདུག །དཔེ་དཀར་བར་ཆོད་ལ་ཡོང་པར་འདུག་གསུངས། བྲག་དཀར་སྟ་སོར་བཞུགས་དུས་ཀྱང་དཔེ་དཀར་གྱི་གཟུགས་དགོན་པའི་ཁོང་ཁེབ་པ་གཅིག་བྱུང་ནས། དྲུང་པ་ལ་མིག་ངན་ལྟ་ཡིན་འདུག །ཐུགས་དམ་ལ་བཞུགས་པས་རང་ཡལ་ལ་སོང་། ཡང་བུལ་རོང་དུ་སློབ་དཔོན་ནམ་མཁའ་དཔལ་བས་ཞུ་ཞིག་ཕུལ་ནས་མངའ་རིགས་པའི་མངའ་བདག་དེ་གྲོངས་སམ་ཞེས་སྒྲོགས་ཀྱིན་བརྡའ་ལགས་པས། ཐུགས་དམ་ལ་འདོགས་པར་ཞུ་ཞུས་པས། དེ་ནུབ་དམིགས་ནས་གསང་འདུས་ཀྱི་སྒྲུབ་མཆོད་གཅིག་མཛད། ནམ་ལངས་པ་དང་། མངའ་བདག་པ་གནས་པོ་ཆེའི་སྐྱེལ་མ་ལ་བྱོན་པའི་ཆ་ལུགས་ཇི་ལྟ་བ་བཞིན་སྐུ་མདུན་དུ་བྱུང་པས་དྲུང་ནས་ཡེངས་མ་ངང་ལ། ཁྱེད་གྲོངས་འདུག་ཟེར་བ་ཨེ་བདེན་གསུངས་པས། དབུ་གུག་པ་གསུམ་མཛད་ནས་བཞུགས་ཁྲི་ལ་ཐིམ་སོང་གསུངས།

ཡང་ཆོས་རྗེ་ཛྙཱ་ན་བ་གྲོངས་དུས་ཀྱང་། བླ་མ་ཛྙཱ་ན་བ་དེ་མདང་སང་འདིར་བྱོན་བྱུང་སྟེ། སྐུ་གཤེགས་པ་འདྲ་གསུང་། དུས་ཚོད་བསྒྲིག་པས་དེའི་ནུབ་དང་འགྲིག་པར་བྱུང་། སྨྱུང་གཞི་དྲག་པོ་གཅིག་བྱུང་དུས་ཐུགས་དམ་ལ་བཞུགས་ཀྱང་སྨྱུང་ཟུག་ཆེས་པས་སྐུ་སྤར་སྤར་འཕར་བ་དང་། རྒྱུ་ཆུ་ལྟར་འགྲུག་པ་བྱུང་དུས། གང་གིས་རྟེན་ཅིང་འབྲེལ་པར་འབྱུང་། །འགག་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོངས་པ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་སྟོན་པ། །རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་དེ་ལ་ཕྱག་འཚལ་ལོ། །ཞེས་པ་ལན་གསུམ་སྟོན་པས་སྨྱུང་སངས་པ་བྱུང་། བླ་མ་སྒྲུབ་པ་དཔལ་བས་ཞབས་ཏོག་མཛད་དུས། རྟུག་པ་ཐུག་བཤེག་པས་འཕྱིས་ཏེ། གདན་ཡོལ་བར་འདུག་དགོངས། ཁོང་པ་རང་གི་བཤོས་གཡོས་ཤིང་། ཡོད་པ་ལ་བླ་མས་ཕེབས་ཀྱང་ནང་དུ་འགྲོ་མ་ནུས་པར་སྒོ་གསེང་ནས་གཟིགས་པས། བཤོས་དཀྲུག་སྟེ་སྐུ་མདུན་དུ་ཕོག་སྟེ། ཆོས་ཐམས་ཅད་མིང་ཙམ་བརྡའ་ཙམ་ཐ་སྙད་ཙམ་བཏགས་པ་ཙམ་མོ་གསུངས་ནས། གཤོས་ཕྲུའི་ནང་ནས་ཀ་གསོལ་ཀྱིན་འདུག་པས་ཁོང་ཤིན་ཏུ་དད་པར་གྱུར་ཏོ། །

ས་སྐྱར་མང་ཇ་གཅིག་ལ་དུང་མ་བྱུང་པར་བྱོན་ཏེ། གཙོ་ཐབ་ཀྱི་འགྲམ་དུ་བཞུགས་ནས་ཁྲོམ་ཆུ་ལ་སྤྱན་ཧ་རེ་གཟིགས་ཏེ། སྤྱན་ཆབ་ན་ར་ར་འདུག །ཇ་གསོལ་རྒྱག་ཀྱང་མ་ཆད། ནང་དུ་ལོག་བྱོན་ཀྱང་མ་ཆད། ཕེབས་པ་དང་། སྤྲོ་བོ་ཐར་བཟང་གིས་ཁྱེད་ཀྱི་སློབ་དཔོན་དེ་ཟ་བཞིན་ཀྱང་ངུ་། འགྲོ་ཡིན་ཀྱང་ངུ་བ་ཅི་ཡིན་ཟེར་བས། བདག་གི་སྣང་བ་ལ་ཉ་སྲམ་གྱིས་ཟ་བ་གཟིགས་ནས་སྤྱན་ཆབ་བྱུང་བ་ཡིན་ནམ་སྙམ་དེ་ཅི་ལགས་ཞུས་པས། དེ་ཡང་མ་ཡིན། ཁྲོམ་ཆུ་ཁྲོ་ཁྲོ་ལོ་འགྲོ་ཡིན་འདུག་པ་དེ་ལ། རྟེན་འབྲེལ་ཡན་ལག་བཅུ་གཉིས་གཅིག་བརྟགས་ནས་བསྒོམས་པས། སྟོང་པ་ཉིད་ཀྱི་ལྟ་བ་རྣལ་མ་གཅིག་སྐྱེས་བྱུང་། སྟོང་ཉིད་སྙིང་རྗེའི་སྙིང་པོ་ཅན་དུ་འདུག་པས་མཆི་མ་བྱུང་བ་ཡིན་གསུང་། ཤངས་སུ་ཆོས་བར་ལ་བྱོན་དུས་དྲུང་པ་ལ་ཆིབས་གཅིག་ཡོད་པ་བཤོལ་ནས་བྱོན། གྲྭ་བ་རྣམས་སྔོན་ལ་བྱོན་ནས་རབ་ལ་རྒལ། དྲུང་ནས་རྟ་གང་འགྲོ་བ་བཏང་ནས། འཁོར་མོ་ཟབ་མོ་གཅིག་ལ་ཆུད་འདུག་པ་ལ། གྲྭ་བ་རྣམས་ཀྱིས་རྒྱུག །ཀུ་ཅོ་བྱས་ཀྱང་རྟ་ཐད་ཀ་ལ་བཏང་པས་ཆུ་ལ་ཐུགས་ཁ་ཙམ་མན་ཆད་ནུབ་པ་བྱུང་རུང་རྟ་བཏང་ཀྱང་མ་ཤོར་བ་འདུག དེ་འདྲའི་མཛད་ལུགས་ཞུས་པས། རྟ་ཁོ་རྐང་ལག་གཙུག་པ་གཅིག་མི་འགྱེལ་བར་འདུག་གསུངས། གཞན་ཡང་ཆོས་བར་ལ་གཤེགས་དུས་ས་ཆ་ཡངས་པ་རྣམས་སུ་ཐུགས་དམ་ལ་ཡེངས་ནས། ཞལ་གང་ཚུར་ཚུགས་སུ་གཤེགས་ཏེ། སྤྱན་འདྲེན་དུ་འགྲོ་དགོས་མང་དུ་བྱུང་ཟེར། མངའ་རིས་ནས། ཆོས་རྗེ་གྲགས་པའི་ཕྱག་ཕྱི་མཛད་དེ་རྩང་པོ་ལ་གཤེགས་དུས་ཀྱང་། ཐུགས་དམ་ལ་འབྱམས་ནས། ཆིབས་པས་ཡང་ཡང་བསྐྱུར། ཞབས་ཐོག་བྱ་དགོས་མང་དུ་བྱུང་པས། རྟ་རྫི་ན་རེ། སློབ་དཔོན་གཞོན་བློའི་མི་དགོས་པའི་སྒོམ་འདིས། སྡུག་རིར་བསོད་པ་འདུག་ཟེར། ཤེལ་དཀར་གྱི་འདུ་ཁང་དུ་གཟིམས་པ་མཛད། སྤྱི་ཁང་གི་སྟེང་ན་གདན་གསོལ་བ་མཛད་ཀྱིན་ཡོད་པ་ལ། ཉིན་གཅིག་བདག་གིས་སངས་རྒྱས་ཀྱི་དུས་མཆོད་གཅིག་ཞུས་དུས། མི་དྲུག་བདུན་གཅིག་སྤྱི་ཁང་ན་ཡོད་པས། མ་མཐོང་པར་དྲུང་པ་སྟེང་ན་ཕེབས་འདུག ཁང་པ་དོག་མོ་འདིར་འུ་རེགས་པས་མ་མཐོང་པར་དྲུང་པས་ཕེབས་པ་རྫུ་འཕྲུལ་ཡིན་ནམ་ཞེས་ངོ་མཚར་དུ་གྱུར།

དྲུང་ནས་དབུས་ལ་བྱོན་པའི་དུས་སུ། ཆོས་རྗེ་དཔོན་སློབ་སུམ་བརྒྱ་ཙམ་གྱིས་སེར་འཕྲེང་གིས་བསུས། ཆོས་རྗེ་བས་ཕྱག་ཕུལ་བ་ལ་ཕྱག་ལན་མཛད་བཞེད་པ་ལ། མི་མཛད་པར་ཞུ་ཞུས་ནས། དེ་མར་ཆད་ཕྱག་ལན་མ་མཛད་པས། དབུས་པའི་དགེ་བཤེས་ཆེན་པོ་རྣམས་ཀྱང་། ཕྱག་ལན་མཛད་པའི་སྤྲོ་བ་དང་བྲལ་བར་གྱུར་ཀྱང་། དྲུང་གནས་གསང་སྡེའི་མཁན་པོ། སྟན་ལུང་ལོ་ཙཱ་བ་སོགས་ལ་ཕྱག་ཕར་མཛད་པས། ཇོ་བོ་བཟང་པའི་གྲགས་པ་ཡང་ཆེར་ཐོག་གོ །དེ་ནས་དགའ་བ་གདོང་དུ་ཆོས་རྗེ་བློ་བཟང་གྲགས་པས་གཙོ་མཛད། བཀའ་བཅུ་པ་ནམ་མཁའ་བྱང་ཆད། བསོད་ཤེ་དར་མ། བཀའ་བརྒྱད་པ་འགའ་ཡར་དང་། ཕར་ཚད་མཁྱེན་པ་ལྔ་བརྒྱ་ཙམ་ལ་དབུ་མ་འཇུག་པ་དང་། ལྟ་ཁྲིད་གསུངས་པས། མེ་ཏོག་གི་ཆར་བབས་ཐམས་ཅད་ཤིན་ཏུ་གུས་པར་གྱུར་ཏོ། །

དེ་དུས་གསང་ཕུ་བ་ལྡན་མ་ཀུན་སེང་ལངས་ཏེ། ཆོས་རྗེ་ཡབ་སྲས་གཉིས་ལ་ཞུ་བ་རེ་ཡོད་པས། གསན་དུ་གསོལ། གཙང་ན་མཁས་པ་རེད་མདའ་བ། དབུས་ན་མཁས་པ་བློ་བཟང་ཟེར་ནས། ཁྱེད་ཡབ་སྲས་གཉིས་དབུས་གཙང་གི་བསྟན་པའི་བདག་པོར་གྲགས་གདའ་བས། ད་ཞལ་འཛོམས་དུས་འདིར། ཐེག་པ་གསུམ་གྲུབ་མཐའ་བཞིའི་བཤད་སྲོལ་མཛད་པ་རྣམས་ལྐོག་ཏུ་མི་མཛད་པར། བདག་ཅག་དབུས་གཙང་གི་དོན་གཉེར་བ་རྣམས་ཀྱི་ལོག་རྟོག་དང་ཐེ་ཚོམ་བསལ་བའི་ཕྱིར། ཚོགས་སུ་འབེལ་གཏམ་མཛད་པར་ཞུ་བ་དང་། ལུང་རིགས་ཀྱིས་དགག་བསྒྲུབ་མཛད་ནས་ཁོ་ཐག་ཆོད་པའི་ཆོས་འཁོར་ཡུན་རིང་དུ་བསྐོར་དུ་གསོལ། དེ་ནས་རྗེ་བཙུན་ཆེན་པོ་ཡང་གངས་བུ་ལེ་དང་། ཆོས་རྗེ་རྗེ་བློ་བཟང་གྲགས་པ་ཡང་འོ་དེ་གུང་རྒྱལ་གྱི་གངས་ལ་གཤེགས་མི་གསུང་བར་དབུས་གཙང་གི་གཞུང་དུ་བསྟན་པའི་བྱ་བ་རྒྱ་ཆེན་པོ་མཛད་དུ་གསོལ་ཞེས་ཞུས་སོ། །དེ་དུས་དྲུང་ནས་དགེ་འདུན་རྣམས་ལ་མང་ཇ་དར་འགྱེད་དང་བཅས་པ་མཛད་དོ། །དེ་ནས་སྣེའུར་བྱོན་དུས། ཡབ་སྲས་གཉིས་ཀྱི་གཙོ་མཛད། དགེ་བཤེས་བཟང་ལ་རགས་པ་བདུན་ཅུ་ཙམ་གྱིས་ཚ་བྲལ་དུ་གསང་ཕུ་བའི་དགེ་བཤེས་གཅིག་ལངས་ནས། ཁྱེད་ཡབ་སྲས་གཉིས་ལ་ཞུ་བ་ཚིག་རེ་ཡོད་པས། མི་འཆབ་པར་གསོང་པོར་གསུང་བ་ཞུ། བླ་མ་རྗེ་བཙུན་པའི་གསུང་ནས། སྤྱིར་བཀའ་བསྟན་བཅོས་ཀྱི་དགོངས་པ་གཞུང་ལུགས་མགོ་འཇུག་གི་འགང་གོ་བ་རེ་དགོས་པ་ཡིན། ཚིག་གི་ཕྲེང་བ་རེ་བལྟས་ཏེ་ཤེས་ཤེས་རང་ལ་སྙིང་པོ་ཙམ་མེད་གསུངས་པ་ཨེ་བདེན་ཞུས་པས། ངས་དེ་འདྲ་རང་བྱས་སུ་མ་ཚོར། ལར་དེ་འདྲ་གཅིག་འདུག་པ་གསུངས་པས་བླ་མའི་དྲུང་ནས་དོན་གྱིས་ཞལ་གྱིས་བཞེས་པར་གདའ་བས། མི་འཆབ་པར་གསུངས་པ་ཐུགས་ལ་བཏགས་ཟེར། བླ་མ་རིན་པོ་ཆེའི་གསུང་ནས། གཞུང་ལུགས་ཀྱི་འགངས་གཤོག་ན་ངའི་བླ་མ་དགོས་པ་ཡིན། དཀའ་གནས་ཀྱི་ཚིག་སྤུ་རིས་འབྱེད་ན། ཨ་བོ་རྒན་ཆེན་དགོས་པ་ཡིན་གསུངས་པ་ཨེ་བདེན་ཞུས་པས། ཆོས་རྗེ་པ་ཞལ་འཛུམ་མཛད་ནས། ཅང་མི་གསུང་པ་ལ་ཁོང་ན་རེ། ཡབ་སྲས་གཉིས་ཀྱང་ཇོ་བོ་བཟང་ངན་མཆོད་རྟེན་གྱི་བང་རིམ་བཞིན་ལོག་གེ་འདུག་ཟེར་རོ། །

ཡང་སྣེའུའི་ཚ་གྲལ་གཅིག་ཏུ་སློབ་དཔོན་སྙལ་པ་ཟེར་བ་གསང་ཕུ་གླིང་བསྟོད་ཀྱི་གདན་ས་བྱེད་རྒྱུ་གྲྭ་པ་བརྒྱ་ཙམ་ཡོད་པ་གཅིག་གིས། ཞབས་དབང་གནང་པ་ཞུ་ཞུས་པས། ཁྱེད་འདྲ་བའི་དགེ་བཤེས་ཆེན་པོ་ལ་དེ་འདྲ་གར་ཡོང་གསུངས་ནས་མ་གནང་པས། ང་ཡང་ཚེ་འཇུག་འདིར་དཔལ་ལྡན་རེད་མདའ་བའི་ཞབས་ཀྱི་པད་མོ་དྲི་མ་མེད་པ་ལ་གཏུག་ཟེར་བ་གཅིག་འདོད་པ་ཡིན། བཙུན་རྒན་འཇིགས་མི་དགོས་རྐང་པ་བཞོག་ཞུས་པས། འོ་ན་གཡའ་གསུང་ནས་ཞབས་དབང་མཛད་དོ། །དེ་ནས་ལྷ་སར་བྱོན་ནས། དགེ་འདུན་བརྒྱད་བརྒྱ། མི་ནག་པ་དྲུག་བརྒྱ་ཙམ་ལ་སྐྱིད་སྡུག་ལམ་ཁྱེར་གཅིག་གསུངས། དེ་དུས་ཆོས་རྗེ་བློ་བཟང་གྲགས་པས་ཇོ་བོའི་དྲུང་དུ་མཆོད་པ་རྒྱ་ཆེན་པོ་བཤམས་ཏེ། བླ་མ་ཇོ་བོའི་དྲུང་དུ་བཞུགས་ཏེ་སྨོན་ལམ་མཛད་དུ་གསོལ་ཞུས་ནས། ཁོང་པ་རང་གིས་གཙོ་མཛད་དགེ་འདུན་ལྔ་བརྒྱ་ཙམ་གྱིས་ཡན་ལག་བདུན་པ་རྒྱས་པ་གཅིག་ཕུལ། གཙོ་བོ་བཟང་པོ་སྤྱོད་པའི་སྨོན་ལམ་དང་། ཁོང་པ་རང་གིས་མཛད་པའི་བདེ་བ་ཅན་གྱི་སྨོན་ལམ་རྒྱ་ཆེར་བཏབ། ཁྱད་པར་དུ་རྗེ་བཙུན་ཐམས་ཅད་མཁྱེན་པ་ཀུ་མ་ར་མ་ཏིས་གཙོ་མཛད་བསྟན་པའི་རྩ་ལགས་སྐྱེས་ཆེན་ཞལ་བཞུགས་ཐམས་ཅད་བསྟན་པ་དང་སེམས་ཅན་གྱི་དོན་དུ་ཞབས་བརྟན་པར་གྱུར་ཅིག ཅེས་པ་ལན་གསུམ་མཛད་དོ། །

དེ་དུས་དྲུང་ནས་ཞབས་དབང་སུ་ཞུ་ལ་གནང་། ཆོས་རྗེ་པས་ཡེ་མ་གནང་པས། གསང་ཕུ་བའི་གྲྭ་པ་རྣམས་ན་རེ། རེད་མདའ་བ་ཁོ་འཆི་བས་མི་འཇིགས་པའི་ཞབས་དབང་སུ་ཞུ་ལ་གནང་གིན་འདུག བློ་བཟང་འཆི་བས་འཇིགས་པས་སུ་ལ་ཡང་མི་གནང་པ་འདུག་ཟེར་བ་ཡང་བྱུང་། དེ་ནས་རྭ་སྒྲེང་ལ་འབྱོན་དུས་བྲག་དཀར་མོ་པ། བྱ་ཡུལ་རིན་པོ་ཆེ། ལོ་མཁན་པོ། འབྲི་ཁུང་པའི་སྟག་རྩེ་རྫོངས་པ་རྣམས་ཀྱིས་འབུལ་སྣོད་ཕུན་སུམ་ཚོགས་པ་མཛད། དེ་ནས་སྟག་རྩེ་ཕུ་ལ་བྱོན་པས། དགེ་འདུན་སུམ་བརྒྱ་ཙམ་གྱི་གདན་ཆད་ནས་ཀུན་བསོད་སྙོམས་ལ་བྱོན་པས། གདན་ཐེབ་ཙམ་བྱུང་། དེ་ནས་ལོ་པའི་ཚོགས་པ་ཆོས་འབྲེལ་ཞུར་བྱུང་སྟེ། ཙམ་པ་མཛོ་རྒྱབ་ཉི་ཤུ་ལྷག་པ་ཙམ་གཅིག་ཕུལ་པས། སླར་མི་ཐེག་པའི་སྡུག་བསྔལ་དུ་གྱུར། ཆོས་རྗེ་ཡབ་སྲས་ནམ་མཁའ་མཛོད་ལ་མངའ་མཉེས་པ་འདྲ་ཟེར་བའི་གྲགས་པ་བྱུང་། དེ་ནས་རྭ་སྒྲེང་དུ་ཕྱག་ཕེབས། དངུལ་གདུགས་ཅན་ཆེ་ཆུང་། གསང་འདུས་འཇམ་རྡོར་གྱི་གཙོ་མཛད་རྟེན་གསུམ་ངོ་མཚར་ཅན་རྣམས་ལ་ཕྱག་དང་མཆོད་པ་རྒྱ་ཆེན་ཕུལ་ནས། དགོན་པ་གོང་དུ་ཡབ་སྲས་གཉིས་སྐུ་མཚམས་བཅད་པའི་བུ་སྒོ་ནས། གཞི་བྱེས་ཀྱི་ཚོགས་པ་དྲུག་བརྒྱ་ཙམ་ལ་སྐལ་བ་དང་འཚམས་པའི་ཆོས་ཀྱི་འཁོར་ལོ་བསྐོར་ཚུལ་ནི།

བདག་ཉིད་ཆེན་པོས། གསང་འདུས་རིམ་ལྔའི་ཁྲིད། དབུ་མའི་ལྟ་ཁྲིད། ཐེག་པ་ཆེན་པོའི་བློ་སྦྱོང་། བཞི་བརྒྱ་པའི་བཤད་པ། སྐུ་མཚམས་གྲོལ་ནས། རིག་པ་དྲུག་བཅུ་པའི་བཤད་པ་རྒྱས་པ་གཅིག་གནང་ནས། གྲོལ་དུས་ཁོ་བོ་ཀླུ་སྒྲུབ་ཡབ་སྲས་ཀྱི་དགོངས་པ་འཆད་ན་དེ་ལྟ་བུ་འཆད། མི་རེ་རེའི་རྟོག་པ་དང་བསྟུན་ནས་གཞུང་ལུགས་འཆད་པ་ཀུན་མཁྱེན་གྱིས་ཀྱང་དཀའ་གསུངས། ཆོས་རྗེ་པ་འབྲི་ཁུང་དུ་བྱོན་ཤུལ། བཀའ་བཅུ་པ་གཉིས་ཀྱིས་གཙོ་མཛད། གསང་བདེ་གུང་གསུམ་རྩེ་ཐང་སོགས་ཀྱི་དགེ་བའི་བཤེས་གཉེན་ཡང་དག་པ་བདུན་ཅུ་ཙམ་ལ་གསང་འདུས་རྒྱུད་འགྲེལ་ཆ་ལག་དང་བཅས་པ། དབུ་མ་རྒྱན་གྱི་བཤད་པ་རྒྱས་པ་གཅིག་གནང་པས། ལྡན་མ་དཀོན་སེང་དང་། ནམ་མཁའ་གཤོག་རལ་ལ་སོགས་པ་ཅུང་མི་དད་པ་རྣམས་ཀྱང་མི་ཕྱེད་པའི་དད་པ་ཐོབ་པར་གྱུར་ཏོ། །དེ་ནས་ཡབ་སྲས་གཉིས་སྟག་ལུང་མདོར་ཞལ་འཛོམས་དུས། འོལ་ཀ་སྟག་རྩེ་བའི་ཇོ་མོ་ཆོས་འབྲེལ་ཞུར་ཡོང་པ་གཅིག་ལ། ཆོས་སྨྱོ་བྱུང་པ་ལ། དྲུང་གི་གསུང་ནས་དགེ་འདུན་གཅིག་རྒྱུགས་ལ་ཇོ་མོ་མ་གིའི་ལག་པ་གཡས་པ་འོག་ཏུ་བཞོག་ལ། ཁྱེད་ཀྱི་ལག་པ་གཡས་པས་སྟེང་ནས་རྒྱོབ་དང་གསུང་པ་ལ། དེ་བཞིན་བྱས་པས་ཇོ་མོ་སྨྱོ་བ་སངས། འཁོར་ཕལ་མོ་ཆེའི་བསམ་པ་ལ། འདི་སྡེ་སྣོད་ལ་མཁས་པ་མིན་པར། བགེགས་སེལ་སོགས་མི་མཁྱེན་སྙམ་པ་ཡོད་པ་ལ། ཀུན་ངོ་མཚར་ཆེ་བར་གྱུར་ཏོ། །དེ་ནས་སྟག་ལུང་དུ་སྤྱན་དྲངས་ཏེ། སྟག་ལུང་རིན་པོ་ཆེས་ན་བཟའ་ཕྱིབས་པ། ཇ་སིག་སོགས་འབུལ་སྣོད་རྒྱ་ཆེན་པོ་མཛད། ཚོགས་པས་ཚོགས་ཆོས་ཞུས། སྟག་ལུང་པ་ཀུན་གུས་པར་གྱུར་ཏོ། །

དེ་ནས་གནམ་རྩེ་ལྡེང་གི་གཙུག་ལག་ཁང་དུ་ཆོས་རྗེ་ལོ་ཙཱ་བ་སྐྱབས་མཆོག་དཔལ་བཟང་པོ་དང་། ཆོས་རྗེ་ཡབ་སྲས་གཉིས་ཀྱིས་གཙོ་མཛད་དབྱར་གནས་ཁས་བླང་པའི་དགེ་འདུན་ལྔ་བརྒྱ། ཕྱོགས་ནས་ཆོས་འབྲེལ་ལ་འདུས་པ་དང་བཅས་པ་བརྒྱད་བརྒྱ་ཙམ་བྱུང་པ་ལ་ཆོས་ཀྱི་འཁོར་ལོ་བསྐོར་ཚུལ་ནི། བདག་ཉིད་ཆེན་པོས་གུང་ཆོས་འདུལ་བ། དབུ་མ་རྩ་འཇུག་གཉིས། གསང་འདུས་ཀྱི་རྒྱུད། ལྟ་ཁྲིད་རྣམས་གནང་། གཞན་ཡང་ཕྱོགས་ནས་བྱོན་པ་རྣམས་ལ་ཆོས་འབྲེལ་ཅི་འདོད་གནང་། དེ་དུས་ཆོས་རྗེ་བློ་བཟང་གྲགས་པས་དབྱར་གནས་རྒྱགས་གང་བྱུང་གི་དངོས་པོ་དྲག་པ་རྣམས་འབུལ་བའི་དམ་བཅའ་མཛད་ནས། གསེར་སྲང་རེའི་མཎྜལ་ཐེངས་གསུམ་ཕུལ། གཞན་ཡང་དངོས་པོ་བྱུང་རེས་ཀྱིས་སྤྱན་དྲངས་ནས། ཁོང་པ་རང་གིས་འབུལ་བ་འབུལ། སྨོན་ལམ་འདེབས། བསྔོ་བ་ཞུ་བ་སོགས་མཛད་ཅིང་། དེའི་གོང་དུ་ཡང་གསེར་གར་ལུག་དང་། ལི་སྐུའི་འཇམ་དཔལ་ཞལ་གཉིས་ཀྱིས་གཙོ་མཛད། གསེར་དངུལ་གོས་དར་སོགས་འབུལ་སྣོད་རྒྱ་ཆེན་པོ་མཛད་ཅིང་། རྗེས་སུ་ཡང་དངུལ་བྲེ་ཆེན་ན་བཟའ་ཆ་ཚང་ཐང་འགའ་ཡར། གསོལ་ཇ་རྒྱུན་མ་ཆད་པར་ཕུལ་ནས། རྟག་ཏུ་ངུས་ཆོས་འཕགས་བསྟེན་པ་བཞིན་མཛད་དོ། །དབྱར་གནས་གྲོལ་བ་དང་། གཙང་དུ་བྱོན་ནས་ས་སྐྱར་ཕྱག་ཕེབས་ཏེ། འཇམ་དབྱངས་ཀྱི་དྲུང་དུ། ཏ་ཧུན་གྱི་སྣམ་སྦྱར་བཟང་པོ་གཅིག བླ་རེ་གཅིག ཚོགས་པ་སྟོང་བསྐོར་བརྒྱད་བརྒྱ་ཙམ་ལ་མང་ཇ་འགྱེད་དང་བཅས་པ་མཛད། དེ་ནས་བུལ་རོང་ཏུ་སྐུ་མཚམས་དམ་པོ་ལ་ལོ་གསུམ་བཞུགས་དུས་བུ་ལེ་རྒྱུན་དུ་གཏོར་མ་ལེན་དུ་ཡོང་གིན་ཡོད་པ། ཉིན་གཅིག་སྒྲུབ་ཆུང་མས་ཀྱང་མཐོང་ནས། རྒོད་པས་ཅི་འདུག་གསུང་། ཁོ་བུ་ལེ་གཏོར་མ་ལེན་དུ་ཡོང་གི་གདའ་ཞུས་ཟེར། དང་པོ་སྨུ་རྫིང་དུ་ཆོས་བར་མཛད་དུས་ནམ་ལངས་པ་དང་། གཞི་བདག་མོ་ཁྱུང་ལུང་མ་སྐུ་མདུན་ན་ཡར་རྡོལ་ནས། རྒྱན་ཆ་ལུགས་བསམ་གྱིས་མི་ཁྱབ་པ་དང་ལྡན་པ། ཕྱག་འཚལ། བྱིན་བརླབས་ཞུས་ནས་ས་ལ་ཐིམ་སོང་། སྔ་དྲོ་ཚ་དུས་སུ་གཞི་བདག་མོའི་གཟུགས་གྱང་ངོས་ལ་བྲིས་པ་གཅིག་གཟིགས་ནས། མོ་འདི་འདྲ་བ་གཅིག་མི་འདུག འདི་བས་བརྒྱ་འགྱུར་གྱིས་མཛེས་པ་གཅིག་འདུག་གསུངས། དེའི་དུས་བུད་མེད་གཅིག་ལ་གཞི་བདག་མོ་བབས་ནས། སྔོན་གྱི་དགེ་སློང་དེ་ཚོ་ཕེབས་པས། ཞབས་ཏོག་ཡང་དག་པ་ཕུལ་ཟེར་ནས། སྔོན་གྱི་དགེ་སློང་ནི་བྱང་སེམས་ཟླ་བ་རྒྱལ་མཚན། དེ་དུས་མཁན་ཆེན་དཔལ་འབྱོར། སློབ་དཔོན་དར་མ་སོགས་ལྔ་ལ་མཛོད་ཀྱི་རང་འགྲེལ་གྱི་སྟེང་ནས་མཛུབ་ཁྲིད་མཛད་པས་ལྔ་ཀས་མཛོད་དགའ་མོ་ཤེས་པ་རེ་བྱུང་། འདི་འདྲ་བའི་འཆད་ཉན་བྲོད་པོ་ཡིན་ཞེས་མཉེས་ཚོར་ཆེན་པོ་མཛད་དོ། །

ངམ་རིངས་རྩེ་མོར་བློ་བཟང་སོགས་དཔོན་སློབ་བཅུ་དྲུག་གིས་ཆོས་བར་མཛད་དུས་ངམ་རིངས་ཤོད་ན་མཁན་ཆེན་བསྟན་རྒྱལ་བ་དཔོན་སློབ་བདུན་བརྒྱ་ཙམ་འཆད་ཉན་མཛད་ཀྱིན་འདུག་པས། དྲུང་པའི་ཐུགས་དགོངས་ལ་ཁོང་དཔོན་སློབ་བདུན་བརྒྱ་པོ་དང་ངེད་དཔོན་སློབ་བཅུ་དྲུག་པོ་བསྟན་པ་ལ་སུ་ཕན་ཆེའམ་དགོངས་པ་གཅིག་བྱུང་། དུས་ཕྱིས་ཁོང་བདུན་བརྒྱ་པོས་བློ་བཟང་གྲགས་པ་གཅིག་པོ་ཡང་མི་དོ་བར་འདུག་གསུང་། དང་པོ་བུ་སྟོན་རིན་པོ་ཆེའི་སྲས་ཀྱི་ཐུ་བོ་མཁན་ཆེན་དྷརྨཱ་ཤྲཱི་དཔོན་སློབ་ལྔ་བཅུ་ཙམ་བཀའ་བཞི་ལ་འཆད་ཉན་ཡང་དག་མཛད་པ་གཟིགས་པས། ངས་ཀྱང་བསྟན་པ་དང་སེམས་ཅན་ལ་ཕན་ཐོགས་འདི་ཙམ་ཡོང་པ་གཅིག་བྱུང་ན་དགོངས་པ་བྱུང་བ་ལ། དུས་ཕྱིས་བསྟན་པ་དང་སེམས་ཅན་ལ་ཁོང་པས་ང་དངོས་སུ་ཕན་ཆེ་བ་གཅིག་བྱུང་འདུག་གསུངས། ཁྲི་རྒྱལ་བསོད་ནམས་ལྡེ་པས། འཕགས་པ་ཐོགས་མེད་སངས་རྒྱས་ཀྱིས་ལུང་བསྟན་པའི་སྐྱེས་བུ་ཆེན་པོར་འདུག་པ་ལ། རྗེ་བཙུན་བྱམས་པས་དབུ་མ་མི་སྟོན་པ་ཅི་ལགས་ཞུས་པས། འོ་ན་ཨ་མ་ཚོས་བུ་ཚ་ལ་དང་པོར་སྒྲུབ་གོང་རྫིས་ནས་མི་སྟེར་བ་བར་ཟླ་ཁ་གཏེར་བ་ཅི་ཡིན་གསུངས། ལན་ཞུ་བའི་སྤོབ་པ་དང་བྲལ་ལོ། །ཡང་ལོངས་སྤྲུལ་སངས་རྒྱས་མིན་ཟེར་བ་མང་པོ་གདའ་ལགས་པ། ཇི་ལྟར་ལགས་ཞུས་པས། དིང་སང་གི་མཁས་པ་འདི་ཚོ་ལ་ངེས་པ་ཙམ་མི་འདུག ངས་དུས་འཁོར་རྒྱུད་འགྲེལ་ལ་འགལ་འདུ་ཡོད་བྱས་པ་ལ། ཆོས་སྤོང་གི་ལས་ཡིན་ཟེར་འདུག ལོངས་སྤྲུལ་སངས་རྒྱས་མིན་ཟེར་མཁན་བྱུང་རུང་། དེ་འདྲའི་ལུགས་ཀྱང་ཡོད་ཟེར་ནས་ཅི་རུ་ཡང་མི་སྒོམ་པར་འདུག་སྟེ། ལོངས་སྤྲུལ་སངས་རྒྱས་མིན་ན། མདོ་རྒྱུད་ཐམས་ཅད་བཀའ་མིན་པར་འགྱུར་བ་ལ་སོགས་པ་ཉེས་པ་ཤིན་ཏུ་ཆེ་གསུངས།

གནས་བརྟན་དངོས་གྲུབ་ན་རེ། འུ་བའི་བླ་མ་འདིའི་ཀུན་སྤྱོད་བསམ་གྱིས་མི་ཁྱབ་པར་འདུག བླུན་པོ་གཅིག་དང་སྡོངས་ཀྱང་དེ་བས་དྲག་ཙམ། ཕར་ཚད་ཤེས་པ་གཅིག་དང་སྡོངས་ཀྱང་དེ་བས་དྲག་ཙམ། བཀའ་བཞི་མཁྱེན་པ་གཅིག་དང་སྡོངས་ཀྱང་དེ་བས་དྲག་ཙམ། མཁན་ཆེན་གཅིག་དང་སྡོངས་ཀྱང་དེ་བས་ཆེས་མངོན་པར་མཐོ་བར་མཛད་ཀྱིན་འདུག ང་ནི་ལྷག་པར་དེ་རང་ལ་མོས་པ་གཅིག་བྱུང་ཟེར། བཀའ་བཅུ་པ་ཡོན་ཏན་ན་རེ། ངས་བླ་མ་འདི་བས་དཀོན་མཆོག་ལ་དད་གུས་ཆེ་བ་མ་མཐོང་གི་གྲོང་ཇོ་བོ་ལ་འཇལ་དུ་བྱོན་རེས་ཀྱིས་ཇོ་བོའི་ཕྱག་ལ་འཇུས་ནས། སྤྱན་རས་གཟིགས་མགོན་ཁྱེད་སྐུ་ཅི་འདྲ་དང་། །ཞེས་སོགས་ཀྱི་ཤླཽ་ཀ་འདོན་ཀྱིན་སྤྱན་ཆབ་ཕྲོལ་ཕྲོལ་ཡོང་གིན་འདུག་ཟེར། དེ་ཨེ་བདེན་ནམ་སྙམ་ནས་དུས་ཕྱིས་ཆེད་དུ་གཉེར་ནས་བདག་གིས་ཀྱང་བལྟས་པས། བདེན་པར་གདའོ། །གསང་བུ་བའི་སློབ་དཔོན་རྒྱལ་དབང་ན་རེ། ངས་བླ་མ་སུ་བྱ་བའི་རྩར་བསྡད་དེ། སྡུག་བསྔལ་རང་འགག་པ་འགྲོ་བ་རེད་མདའ་བ་མིན་པ་མ་མཐོང་ཟེར། འཇམ་དབྱངས་པ་ན་རེ། འགའ་ཞིག་ད་ལྟ་བོད་ན་སློབ་དཔོན་པས་མཁས་པ་མེད་ཟེར་ནའང་། ངའི་ལུགས་ཀྱི་རྒྱ་གར་ཤར་ནུབ་རྒྱ་ནག་བལ་པོ་རྣམས་ན་བསྟན་པ་རྣལ་མ་མེད་པར་འདུག་པས་ད་ལྟ་འཛམ་བུ་གླིང་ན་སློབ་དཔོན་མཁས་པ་བས་མཁས་པ་མེད་པར་གོ་གསུངས། དྲུང་ནས་ཁྲི་བསྐོར་གཞན་དུ་གཤེགས་ཙ་ན། ཞལ་དུ་མི་འདོན་ཡང་ཐུགས་ཁྲལ་ཆེར་མཛད། བྱང་དུ་ཕེབས་ཟེར་བ་གསན་མ་ཁད་ཤིན་ཏུ་གཏམ་སྙན་རྟེན་གསུམ་བྱིན་བརླབས་ཅན་རེ་ཡོད་ནའང་ཡོད་ཟེར་བ་ལ། དེ་འདྲ་དང་མཉམ་པོ་མིན། གཞུང་ལུགས་པ་ཆེན་པོ་ཕྱག་ཕེབས་པ་ཙམ་གྱིས་ཕྱོགས་བཀྲ་ཤིས་པ་ཡིན་ཟེར་ནས་མཉེས་ཚོར་ཆེན་པོ་མཛད་དོ། །

མཁན་ཆེན་བསོད་ནམས་སྐྱབས་པ་ན་རེ། ངའི་བླ་མའི་ཡོན་ཏན་ཆུང་ཤོས་གཞན་གྱིས་མི་དོ། བླ་མ་རི་ཕུག་ཏུ་བཞུགས་ཀྱང་། གོས་དར་གྱི་ན་ཟ་འཕང་མེད་ལ་བསྒོམ། གཞན་སྡེ་བདག་ཏུ་བསྒོམ་པ་རྣམས་ཀྱང་། ནང་དུ་ཧྲུལ་ཆས་གྱོན་ཤིང་། ཕྱིར་འགྲོ་དུས་བཟོ་པར་འདུག་སྟེ་གསུང་ཤིན་ཏུ་མོད། སྨུ་རྫིང་ན་བཞུགས་དུས་བཀའ་བཅུ་པ་དོན་སེང་གིས་འཇལ་དུ་ཕྱིན་པས་ཆོས་ཞུས། གྲོལ་བ་དང་འགྲོ་བའི་གྲབས་བྱས་པས། ཁྱེད་དེ་རིང་འགྲོ་ན་རྟ་ཟུར་གྱི་ཟམ་པ་ཐོན་ཙམ་དེར་རྒྱུགས་གསུངས། བདག་ཅག་དེ་ཕྱོགས་ལ་མི་འགྲོ་ལགས་ཞུས་པས། ཨ་ཧ་ང་ནི་བུལ་རོང་ན་ཡོད་པའི་བསམ་པ་གཅིག་བྱུང་འདུག་གསུངས། བདག་གིས་དྲུང་དུ་ཕྱིན་ནས། བཀའ་བཅུ་པ་ལ་དེ་ལྟར་གསུངས་ལགས་སམ་ཞུས་པས། དེ་བྱུང་། ང་ལ་བུལ་རོང་གི་ལུང་པ་ཡ་གི་ཕ་ཡུལ་གྱི་སྣང་བ་ཅིག་འཆར་གྱིན་འདུག་སྟེ་བག་ཆག་བརྟས་པ་ཡིན་གསུངས། རི་ཁྲོད་དགའ་མོ་ཡ་གི་རྙེད་པ་འཕགས་ཆེན་ཆོས་བཟང་དཔལ་གྱི་བཀའ་དྲིན་ཡིན་གསུངས། འཕགས་ཆེན་ཆོས་བཟང་དཔལ་ལ་འཇལ་དུ་བྱོན་དུས་ཁྱེད་བསྟན་པ་རིན་པོ་ཆེའི་བདག་པོ་ཡིན་པས། དེ་ལྟར་ཐུགས་ཁུར་བཞེས་ཤིག སངས་རྒྱས་ཀྱི་བསྟན་པ་རིན་པོ་ཆེ་འདི་ཁྱེད་ཀྱི་ཕྱག་ན་ཡོད་དོ། །བསྟན་པ་རིན་པོ་ཆེ་འདི་ལ་ཁྱེད་ཤེས་སོ། །ཞེས་གསུང་ནས། ཕྱག་ནས་བཟུང་ཞིང་ཞལ་ལྟ་མང་པོ་གནང་བའི་མཐར། ཁྱེད་ཀྱིས་བསྟན་པ་རིན་པོ་ཆེ་ལ་སྔར་ཕྱག་བཞེས་མཛད་པའི་བརྩོམ་པ་མཛད་པ་རྣམས་ཀྱི་དཀར་ཆག་ཀྱང་འདིར་འཁོད་གསུངས་ནས། གོང་དུ་བསྟན་པའི་གསུང་སྒྲོས་རྣམས་དགུང་ལོ་ཉི་ཤུ་རྩ་བདུན་པ་ཡར་བཅད་ལོ་འདི་ལ་འདི་མཛད་ཀྱི་དཀར་ཆག་ཀྱང་མཛད་དོ། །

དྲུང་ནས་གྲོད་ཆུང་དུ་བཞུགས་དུས། ཀྱི་རོང་ཇོ་བོ་ལ་ཕྱག་ཞབས་ཀྱི་གདུ་བུ་རྣམས་ཚོད་ཀྱིས་བརྡུང་ནས་འབུལ་དུ་བཏང་པས། ཀྲིག་རན་པར་བྱུང་། དྲུང་ནས་ཕྱག་ཚད་མཛད་པ་ལགས་སམ་ཞུས་པས། མ་བྱས་ཆེ་ཆུང་མཚམས་པ་ཇོ་བོ་རང་གི་ཐུགས་རྗེ་ཡིན་གསུངས། བདག་གིས་མཁན་ཆེན་གཡག་པ་ལ་འཇལ་དུ་ཕྱིན་དུས་ཁོང་པ་ལ་ཆོས་རྗེ་ལོ་ཙཱ་བ། རྗེ་བཙུན་པ་བློ་བཟང་གྲགས་པ་གསུམ་གང་ལྷག་ཞུས། སློབ་དཔོན་གཞོན་བློ་བ་ལྟ་བུའི་དགེ་བའི་བཤེས་གཉེན་དིང་སང་དཀའ་མོར་གཏད་ཡོང་གསུང་ཞིང་། ཁོང་པས་ཕར་ཕྱིན་གྱི་ཊཱིཀྐ་དེ་ལ་བལྟས་པས་ནང་འགལ་འགའ་ཡར་འདུག ཁོང་བྱམས་ཆོས་སེམས་ཙམ་ཡིན་གསུང་ནའང་། ང་བཀའ་རུ་དེ་འདོད་དེ། བྱམས་པ་སངས་རྒྱས་ཡིན་པའི་ཕྱིར། ཁོང་གསང་འདུས་པ་ཆེན་པོ་ཡིན་པས། འཇམ་དབྱངས་དཀྱིལ་འཁོར་གྱི་གཙོ་བོར་མཛད་ཀྱིན་ཡོད་ཀྱང་། འཇམ་དབྱངས་དང་བྱམས་པ་གཉིས་སངས་རྒྱས་ཡིན་ན་ཡིན་སྙམ། མིན་ན་མིན་སྙམ་ཡིན་ང་ཟེར་ཀྱིན་འདུག་སློབ་དཔོན་ལ་ཞུས་ཤིག་གསུངས་ནས་ཞུས་པས། ནང་འགལ་ཐན་ཐུན་ཡོད་སྲིད། འཁྲུལ་མེད་སྨྲ་བའི་འཕགས་པར་ངས་ཁས་བླང་པ་མེད། ཁོང་གིས་ནང་འགལ་དུ་བཟུང་བ་རྣམས་ནང་འགལ་ཨེ་ཡིན་མི་ཤེས། བསྟན་པ་འདི་གཞིར་བཞག་ལ་བྱམས་པ་བྱང་སེམས་དང་། བྱམས་ཆོས་ལྔ་བསྟན་བཅོས་སུ་བཤད་འདུག ཁོང་རང་སངས་རྒྱས་པས་ལྷག་གསུངས་ནའང་དབང་ཆེ། རྡོ་རྗེ་ཐེག་པའི་རྒྱ་ཕར་ཕྱིན་ཐེག་པ་ལ་བཀབ་རུང་ཞྭ་དཔེ་ལྷམ་ལ་བཀབ་པ་བྱ་བ་མཁས་པའི་ལུགས་མ་ཡིན་གསུངས།

མཁན་ཆེན་ཆོས་དཔལ་བའི་གསུང་ནས་འུ་རང་མཐོང་ལམ་ཐོབ་ཐོབ་ལྟ་བའི་ལབ་མ་ཟེར། དེ་ནས་ཤེས་ཡོང་གསུང་ཟེར་པ་དྲུང་དུ་བསྐྱར་པས། མཐོང་ལམ་ལྟ་བའི་རིགས་རྣམ་པར་དག་པའི་འབྲས་བུ་ཡིན་པ་ལ་ལྟ་བ་མ་ཤེས་པར་མཐོང་ལམ་གཅིག་ཐོབ་ངོས་ཤེས། ཁ་ཕྱེ་ན་ཟོང་ཟད་པའི་ལབ་ཡིན་གསུང་། ཆོས་རྗེ་ལོ་ཙཱ་བ་དང་བླ་མ་དབང་པས་གདན་འདྲེན་བཏང་པས། ཁམས་བཟང་ཞིང་རྟེན་འབྲེལ་འགྲིག་ཡོང་པར་ཞུ་ཞུས་པས། ལོ་ཙཱ་བས་དགོན་པ་བརྩིགས་ནས་ཁལ་ཉིས་སྟོང་ཙམ་བསགས། དེའི་རྒྱབ་ཆ་ཤ་མར་གོས་སྟན་མེ་ཤིང་སོགས་བསྒྲུབས་ནས་ད་ནམ་ཕེབས་པ་གཅིག་ཡོང་ན་ཞེས་ཡིད་སྨོན་དུ་མཛད་ཅིང་གདན་འདྲེན་པ་བཏང་པས། ངེད་ན་སོ་རྒས། ཤ་ལུས་ལྕིས་པས། འགྲུལ་མི་ཕེར་བ་འདུག་གསུངས་ནས། ཐུགས་དམ་གྱི་གཙོ་བོར་འཇམ་དབྱངས་ཀྱི་ལི་སྐུ་མཚར་མོ་གཅིག་ཞུ་རྟེན་ལ་ཕུལ་ནས་མ་བྱོན། དྲུང་ནས་ཐུགས་ཤེས་ཀྱིས་མཁྱེན་ནས་སྟག་ཚང་དུ་དུས་གཟིང་ཆེན་པོ་ཡོང་པ་དང་། ཡོན་མཆོད་གཉིས་ཀའི་སྐུ་ཚེ་ཐུང་ངུ་ལས་མི་ཡོང་བ་མཁྱེན་ནས་མ་བྱོན་པར་གྲགས། བུལ་རོང་དུ་སྔ་རྟིང་ལ་ལོ་བཅུ་གཉིས་བཞུགས་པ་ལ། ལོ་ལྔ་དྲུང་པ་རང་གིས་ཐུགས་དམ་རྩེ་གཅིག་ཏུ། ལོ་བདུན་ལ་ཆོས་འཁོར་ཅི་རིགས་སུ་བསྐོར་ཅིང་བུལ་རོང་ཤོད་དུ་བཞུགས་དུས་མཁན་ཆེན་དཔལ་འབྱོར་བ་ཆོས་རྗེ་མཆོག་བཟང་པས་གཙོ་མཛད་ཆོས་ཁོ་ན་དོན་དུ་གཉེར་བའི་དགེ་འདུན་ཤ་སྟག་བརྒྱ་བཅུ་ཙམ་ལ་གསང་འདུས་ཀྱི་རྒྱུད། རྩ་འཇུག་བཞི་གསུམ་ལྟ་ཁྲིད་སོགས་ཞིབ་རྒྱས་སུ་གནང་། གསན་མཁན་རྣམས་ལ་ཡང་བྱ་རྒྱུ་ཆོས་ལས་མེད་པས། ཉིན་མཚན་ཆོས་ཁོ་ནས་འདའ་བ་བྱུང་། ས་ཆ་བགྲོད་དཀའ་མོ་དེར་ཡང་། ས་སྐྱ་ཚུན་ཐམས་ཅད་སྙགས་ནས། བསྙེན་བཀུར་བཟང་ལ་མང་བ་བྱུང་། བུལ་རོང་དུ་བསྟན་པ་རྙེད་དང་བཀུར་སྟིར་བཅས་པ་དེ་བས་ལྷག་པ་དུས་གསུམ་དུ་ཁྱབ་ཟེར་རོ། །

དེའི་ཕྱི་ལོ་སྨུ་རྫིང་དུ་སློབ་དཔོན་ཆེན་པོ་ནམ་མཁའ་དཔའ་བས་གཙོ་མཛད། བྲག་རམ་མཁན་ཆེན། སློབ་དཔོན་ལས་སྟོན། འདར་པ་མགོན་སེང་། སྒྲུབ་ཆེན་མ་དཔལ་མོ་ཡོན་བདག་དཔོན་པོ་རྟོག་ལྡན་སོགས་བརྒྱ་བརྒྱད་བཅུ་ཙམ་ལ་གསང་འདུས་ཀྱི་རྒྱུད། རྩ་འཇུག་གཉིས། ལྟ་ཁྲིད་དང་བཅས་པ་གནང་ངོ་། །ཆོས་སུམ་གཉིས་ཙམ་སོང་པ་དང་། སྒྲུབ་ཆེན་མ་དཔལ་མོ་ལ། ནམ་སྨད་མི་མ་ཡིན་ཆེན་པོ་གཅིག་དངོས་སུ་ཡོང་ནས་ཁྱོད་ནམ་ལངས་པ་དང་། བླ་མའི་དྲུང་དུ་རྒྱུགས་ལ་ཕྱག་གསུམ་ཕུལ། དྲུང་ནས་བསྟན་པ་དང་སེམས་ཅན་གྱི་དོན་ལ་ཡུན་རིང་དུ་བཞུགས་སུ་གསོལ་ཞེས་ལན་གསུམ་གསོལ། བར་ཆད་ཆེན་པོ་བྱུང་དོགས་འདུག་གོ་ཟེར་བ་དེ་ཐོས་པས་སྒྲུབ་ཆེན་མ་དེ་ལངས་ཏེ་ཐུགས་མ་བདེ་བ་བྱུང་། ནམ་ལངས་པ་དང་། དྲུང་དུ་ཞུ་བ་གལ་ཅན་གཅིག་ཡོད་པས། ཅིས་ཀྱང་ཡོང་པ་ཞུ་ཞུས་པས་ཤོགས་གསུངས་ནས། གོང་དུ་ཟེར་བ་བཞིན་ཕྱག་ཕུལ་གསོལ་བ་བཏབ་ནས་འདི་བདག་ལ་གྱིས་ཟེར་མཁན་གཅིག་བྱུང་པ་མ་གཏོགས་བདག་གིས་རྫུན་ནམ་ཟོག་ཡིན་ན་དྲུང་གི་བཀའ་སྲུང་རྣམས་ཀྱིས་ཆད་པ་ཆོད་བྱས་པས། མནའ་སྐྱེལ་གྱིན་ཁྱེད་ལ་རྫུན་ཡིན་ཟེར་བའི་གལ་མེད་འཆི། ངེད་ས་སྐྱར་འཆད་ཉན་བྱེད་དུས། ལོ་གྲངས་འདི་ཙམ་ན་འཆི་ཟེར་བའི་སྒྲ་ཆེན་པོ་འབྱུང་བ་ཡིན་ཏེ། དེ་དུས་བརྟགས་པས། རེ་གཅིག་པ་ལ་འཆི་བ་འདུག་སྙམ་པ་བྱུང་། ད་ལོ་མི་འཆི་ཡང་སང་ཕོད་སྐྱས་ཆེན་ཡིན་པས་སྙམ་གྱིན་འདུག་གསུང་། དྲུང་པ་ལ་སྐེག་ཆེན་པས་བསུ་སྐེག་སྐྱོན་ཆེ་བ་གཅིག་གདའ་ལགས། དེ་དུས་ཀྱི་ལོ་དེ་གང་ཡིན་བརྩི་བར་ཞུ་དང་ཞུས་པས། རྩིས་པས་སྒྲུབ་ཆེན་མ་དང་གཅིག་པར་བྱུང་། དེ་ནས་ཆོས་གྲོལ་བ་དང་། བུལ་རོང་དུ་བྱོན་པས་སྐུ་མཚམས་དམ་པོ་གཅིག་མཛད་པར་ཞུ། བདག་གིས་ཀྱང་གདན་བཞུགས་གཅིག་ལ་འོངས་ཞུས་ནས་རྗེས་སུ་གདན་བཞུགས་ཟབ་པོ་གཅིག་ཕུལ་བས་ལོ་འགའ་ཡར་སྐུ་ཁམས་བཟང་པོ་ཡོང་པའི་ལྟས་བྱུང་གསུངས། དེའི་ཕྱི་ལོ་མངའ་རིས་ཕྱོགས་ས་ཆ་བཟང་ཞིང་། མི་བློ་ལས་སུ་རུང་བ་འདུག་པས། འགྲོ་གསུངས་ནས། འཇམ་དབྱངས་པས་རྒྱ་མཁར་པར་བརྡས་པས་མ་ནོན། ཆེན་པོ་དཔལ་ལྡན་པས་ཅུང་ཐུགས་བརྡས་ནས། ཞུ་བ་ཕུལ་ཡང་མ་གསན་པར་མངའ་རིས་སུ་བྱོན། ཡར་རེ་རེས་ནེ་རིང་པའི་དབོན་པོ་གཉིས་ལ་དགེ་ཚུལ་གྱི་བསླབ་བྱ་རྣམས་གནང་། དཔོན་པོ་རྟོག་ལྡན་པ་ལ་དགེ་སློང་གི་སྡོམ་པ་རྣམས་གནང་། ཁོང་རྣམ་པས་ཀྱང་། འབུལ་འདེགས་ཕུན་སུམ་ཚོགས་པ་མཛད་ནས། སྟག་རྩེ་བས་གྲགས་ན་ཕར་བསྐྱལ། དེ་ནས་མངའ་རིས་པས་བསུ་སྟེ། རྫོང་ཁར་དུ་ཕྱག་ཕེབས། གུང་ཐང་ཁབ་པས་ཤང་ལེན་ཕུན་སུམ་ཚོགས་མཛད་དོ། །

དེ་ནས་མང་ཡུལ་དུ་བྱོན་ཏེ། རང་བྱོན་འཕགས་པའི་དྲུང་དུ་ཕྱག་དང་མཆོད་པ་རྒྱ་ཆེན་པོ་ཕུལ། ཐང་ཤེར་པ་དཔོན་པོ་ལ་རབ་བྱུང་གི་སྡོམ་པ་གནང་ནས། མེ་ཏོག་མདང་ཅན་གྱི་ནགས་ཁྲོད་དུ་སྒྲུབ་པ་ལ་བྱོན་ནོ། །དེ་དུས་གཞི་བདག་བཙན་རྗེ་ཟེར་བ། ཆོས་ལ་དཀར་བ་གཅིག་ཡོད་པ་ཡོང་ནས། ང་ལ་ཆང་གཅིག་འདྲེན་གྱིན་འདུག་ཆང་མི་འཐུང་པ་ལ་སྙམ་པས་མར་ཁུར་སོང་ནས་དུམ་པ་གཅིག་འཐུང་ནས་བཞག འབུལ་བ་ཟང་ཟིང་མང་པོ་བྱེད་ཀྱིན་འདུག དེ་ནས་ཞག་བཞི་ལྔ་ནས། རྒྱའི་འབུལ་བ་དེ་སླེབས་བྱུང་། དེ་གཞི་བདག་གིས་ཚོར་བ་འདྲ་སྙམ་པ་གཅིག་བྱུང་གསུངས། དེ་ནས་སྐུ་མཚམས་གྲོལ་བ་དང་། བདག་ཆེན་མས་བོད་དུ་སྤྱན་དྲངས། དཔོན་སློབ་རྣམས་ར་འདབས་སུ་དབྱར་རྒྱགས་བཏེག་འབུལ་བ་ཡང་ཕུན་སུམ་ཚོགས་པར་ཕུལ། དེ་དུས་དྲུང་སློབ་དཔོན་མས་གཙོ་མཛད། ཆེན་པོ་ཆོས་དཔལ་བ། སློབ་དཔོན་ཡི་དམ་དཔལ། བཀའ་བཅུ་བ་དོན་ཡོད་སེང་གེ་བ་ལ་སོགས་བརྒྱ་བརྒྱད་བཅུ་ཙམ་ལ། གསང་འདུས་རིམ་ལྔ། ལྟ་ཁྲིད་བློ་སྦྱོང་། རྩ་འཇུག་གཉིས། གསང་འདུས་ཀྱི་རྒྱུད་ཀྱི་བཤད་པ་ལ་སོགས་ཟབ་རྒྱས་སུ་གནང་ཞིང་། མངའ་བདག་སྐུ་མཆེད། བདག་མོ་མཆེད། ཞང་བློན་འགའ་ཡར་ལ་ཡང་གསང་འདུས་ཀྱི་དབང་གནང་། དཔོན་ཞང་ནམ་མཁའ་སྟོབས་རྒྱལ་བ་ཁུ་དབོན་ལ་བསྙེན་རྫོགས་དང་རབ་བྱུང་གི་སྡོམ་པ་གནང་། དེ་དུས་མངའ་བདག་ཡུམ་སྲས་རྣམས་ལ་བསྟན་འགྱུར་བཞོངས་གསུངས་ཞལ་ལྟ་གནང་པས། བདག་ཆེན་མའི་གསུང་ནས། དྲུང་ནས་ཐུགས་རྗེས་བཟུང་བའི་ཞལ་ལྟ་ཡིན། བདག་ཅག་དང་ཅི་འབྱོར་བྱེད་པར་ཞུ་ཞུས་པས། དེ་ཤིན་ཏུ་ལེགས་གསུངས་ནས་མཉེས་ཚོར་ཆེར་མཛད་དོ། །

ཁོང་ཚོས་བློས་མ་བླངས་ན། པཎ་ཆེན་ཤཱཀྱ་ཤྲཱིས་ཀྱང་བོད་ཡུལ་གྱི་འབུལ་སྣོད་ཐམས་ཅད་ཁྲོ་ཕུའི་བྱམས་པ་བཞེངས་པ་ལ་བཏང་གསུངས། ངས་ཀྱང་སྤུ་རངས་མན་ཆད་འདི་འགྲིམས་ནས་བསྟན་འགྱུར་གྲུབ་ཙམ་གྱི་དངོས་ཆ་འགྲུབ་བསམས་པ་གཅིག་བྱུང་ནའང་། སྡེ་པས་བཞེངས་པ་ཤིན་ཏུ་ལེགས་གསུངས་ནས། བདག་ཆེན་མ་ལ། བཀའ་རུ་མ་དངུལ་བྲེ་ཆེན་གཅིག གོས་ཕྱི་ནང་བཟང་པོ་ལྔ། བེར་ཐུལ་ཐོང་རིས་རེ་རེ། རྒྱའི་རྡོར་དྲིལ་གཅིག གདན་དཀར་རྣམས་གནང་ནས། བདག་ཆེན་མས་ཀྱང་། ཐུགས་ཁུར་ཆེར་བཞེས་འབད་རྩོལ་བཏོན་པས། ལོ་གཅིག་གི་ཁོངས་སུ་བར་ཆད་མེད་པར་གྲུབ་པས་བླ་མ་བྱིན་རླབས་ཆེ་ཞིང་། ཡོན་བདག་མོ་སྐུ་བསོད་དང་བློ་སྟོབས་ཆེ་བའི་གྲགས་པ་བྱུང་ངོ་། །དེ་ནས་རབ་གནས་ལ་རྫོང་ཁར་སྤྱན་དྲངས་ཏེ། དཔལ་གསང་བ་འདུས་པའི་དཀྱིལ་འཁོར་ཞལ་ཕྱེ་ནས་སྒྲུབ་མཆོད་རྒྱས་པར་མཛད་པས། གསུང་རབ་ཞལ་དྲོ་ཞིང་བྱིན་བརླབས་ཆེ་བ། མཆོད་གནས་ངོ་དྲོ་ཡོན་བདག་བཀྲ་ཤིས་པ་ཕྱོགས་བྱིན་ཆགས་པའི་རབ་གནས་མཛད་དོ། །དྲུང་དུ་གསེར་ངོན་པོ་སྲང་བདུན། གོས་ཏ་ཧུན་གྱི་སྣམ་བེམ་གཅིག་གིས་མགོ་བྱས་འབུལ་སྣོད་རྒྱ་ཆེན་པོ་མཛད་དུས། དྲུང་གི་ཞལ་ལྟས་བདག་མོ། མི་ལུས་ཐོབ་པ་དོན་ཡོད་པ་བྱ་བ་དེ་ལྟ་བུ་ལ་ཟེར་བ་ཡིན། ཆོས་ལ་བྱ་བ་བྱས་པ་རང་སངས་རྒྱས་སུ་སྐྱེ་བར་མདོ་སྡེ་དུ་མ་ནས་གསུངས། དིང་སང་ཡང་དབུས་གཙང་གི་སྡེ་པ་སུ་སྟོབས་ཆེ་ཡང་། སྣག་ཤོག་གླེགས་ཤིང་། བློ་བུ་དགོས་ན་འབྱོར་པ་ཤིན་ཏུ་དཀའ། དེ་ལྟར་བསྒྲུབས་པའི་དགེ་རྩ་བླ་མེད་རྫོགས་པའི་བྱང་ཆུབ་ཏུ་བསྔོ་བ་ཡང་རྒྱ་ཆེན་པོ་མཛད་དོ། །

བསྟན་འགྱུར་བཞེངས་པའི་མགོ་ཚུགས་པ་ཙམ་ལ། དྲུང་ནས་བླ་མ་སྒྲུབ་པ་དཔལ་ལ་བསྟན་འགྱུར་འདི་བར་ཆད་མེད་པར་འགྲུབ་པར་འདུག ངའི་རྨི་ལམ་དུ་དབུས་གཙང་ཐམས་ཅད་དུ་ཐོས་པའི་དུང་ཐེང་བདུན་འབུས་པ་རྨིས་གསུངས། རྭ་སྒྲེང་དུ་བཞུགས་དུས་མཚན་ལམ་དུ། ཆོས་རྗེ་བློ་བཟང་པ་དང་གཉིས་གཞུང་ལམ་ཆེན་པོ་གཅིག་ལ་སངས་རྒྱ་རུ་འགྲོ་བ་ཟེར་འགྲོ་ཡིན་འདུག་པས། བློ་བཟང་པ་འགྱོག་ཙམ་འགྲོ་ཡི་འདུག ཁོང་ལམ་ན་མཆོད་རྟེན་གཅིག་འདུག་པ་ལ་བསྐོར་བ་བྱེད་ཅིང་འདུག ངས་མ་བྱས་པར་ཕྱིན་པས། སངས་རྒྱས་པ་ཡིན་ཟེར་བའི་ཁྲི་ཆེན་པོ་གཅིག་འདུག་པ་དེར་ངས་སྔོན་ལ་འཛེགས། ཁོང་གིས་ཀྱང་དེ་མ་ཁད་ཕེབས་བྱོན། ཁོང་ལས་ཁྱེད་སངས་རྒྱ་བར་ཞུ་བྱས་པས། ཁོང་ན་རེ། བླ་མ་བྱང་ཆུབ་སྔོན་ལ་མཛད་པར་ཞུ་ཟེར་ནས་ངས་སྔོན་ལ་སངས་རྒྱས་པ་རྨིས། ཁོང་བར་སྐབས་སུ་བསྐོར་བ་བྱེད་པ་དེ། རང་དོན་ཡིད་བྱེད་གཅིག་བྱུང་བ་ཡིན་ནམ་སྙམ་པ་བྱུང་གསུངས། དེ་ལ་སོགས་པའི་ངོ་མཚར་རྨད་དུ་བྱུང་བའི་ཡོན་ཏན་མཐའ་ཡས་སོ། །

གངས་རིའི་ཁྲོད་ཀྱི་ཆེ་བཙུན་འབྱོར་ལྡན་གྱིས། །གུས་པས་སྤྱན་དང་རྙེད་དང་བཀུར་སྟིས་མཆོད། །དབང་བསྐུར་སེམས་བསྐྱེད་གདམས་པ་མང་དུ་ཞུས། །ཀུན་གྱི་མཆོད་འོས་ཁྱེད་ལ་ཕྱག་འཚལ་ལོ། །ཞེས་པའི་རིགས་དང་གཏོང་པ་ལ་སོགས་པ་མཐོ་རིས་ཀྱི་ཡོན་ཏན་བདུན་གྱི་མངོན་པར་མཐོ་བ་འཇམ་དབྱངས་ནམ་མཁའ་རིན་ཆེན་པས། བདག་ཉིད་ཆེན་པོ་མཁས་པའི་གྲགས་པ་ཐོབ་ནས་སུ་འཆད་ཉན་མཛད་པའི་དུས་སུ་དཔོན་སློབ་རྣམས་ཡང་ཡང་བཏེགས། གསུང་སྒྲོས་མང་པོ་བཞེངས་ནས། བློ་གསལ་རྣམས་ལ་གནང་། བཞེངས་མཁན་རྣམས་ལ་ཡང་སྣག་ཤོག་སོགས་ཆས་ཁ་མང་པོ་གནང་། གསུང་སྒྲོས་ལ་འཆད་ཉན་མཛད་པ་རྣམས་ཀྱི་བདག་རྐྱེན་ཡང་དག་པ་མཛད། བུལ་རོང་དུ་ཕྱག་ཕེབས་མར་བཅད་ཀྱང་། ཕྱོགས་ནས་འདུས་པའི་བྱ་བྲལ་བ་གང་བྱུང་རྣམས་བཏེགས། བཀྲེན་པ་རྣམས་ལ་ཅི་འདོད་ཀྱི་གསུང་སྒྲོས་རྣམས་བྲིས་ནས་གནང་བ་སོགས་བཤད་སྒྲུབ་མཛད་པའི་ཞབས་ཏོག་ཡང་དག་པ་མཛད་པས་ན། སྦྱིན་བདག་རྣམས་ཀྱི་གཙོ་བོ་ཡིན་ནོ། །རིགས་དང་རུས་དང་། ཆོ་འཕྲང་གིས་མངོན་པར་མཐོ་བ་ཁྲི་རྒྱལ་བསོད་ནམས་ལྡེ་པ་ཡབ་ཡུམ་གྱིས་དཔོན་སློབ་གང་ཡོད་ལོ་གཉིས་ཀྱི་བར་དུ་བཏེགས། མངའ་རིས་སུ་ཆོས་ཀྱི་འཁོར་ལོ་བསྐོར་བའི་བདག་རྐྱེན་ཡང་མཛད་ཅིང་། དཔོན་སློབ་རྣམས་ལ་འབུལ་སྣོད་ཕུན་སུམ་ཚོགས་པ་མཛད་ནས། མི་ཕྱེད་པའི་དད་པ་ཐོབ་པས་སྦྱིན་བདག་གི་མཆོག་ཡིན་ནོ། །སྣེལ་པས། དཔོན་སློབ་འཁོར་བཅས་དགའ་བ་གདོང་དང་། རྭ་སྒྲེང་དུ་ནམ་བཞུགས་བར་བཏེག་ཅིང་། འབུལ་སྣོད་རྒྱ་ཆེན་པོ་ཡང་མཛད། དཔོན་ཡོན་ཏན་རྒྱ་མཚོས་གནམ་རྩེ་ལྡེང་དུ་བཞུགས་དུས། རྒྱག་འཁོར་མར་བཏེག་ཅིང་། འབུལ་སྣོད་ཕུན་སུམ་ཚོགས་པ་ཡང་མཛད། གླིང་དཀར་བས་ཡར་མར་གྱི་ཞབས་ཏོག་འབུལ་སྣོད་བཅས་པ་ཡང་བསྒྲུབས། གནས་སྙིང་སྟོང་དཔོན་རྒྱལ་མཚན་བཟང་པོས་འཆད་ཉན་མཛད་དུས། དཔོན་སློབ་རྣམས་ཀྱི་བཤད་ཉན་གྱི་བདག་རྐྱེན་ཡང་དག་པ་མཛད།

འབྲི་ཁུང་ཆེན་པོ་ཤེས་རབ་དཔལ་བས། ན་བཟའ་ཇ་དཀར་སིག་ཆེན་ལ་སོགས་འབུལ་སྣོད་རྒྱ་ཆེན་པོ་བསྒྲུབས། སློབ་དཔོན་སེང་གེ་བཟང་པོས་ནས་ཁལ་བརྒྱ་ཕུལ་ནས། སློབ་དཔོན་རྣམས་བཏེག ཆུ་འདུས་པས་སྤྱན་དྲངས་ནས། ཆོས་འཁོར་བསྐོར་བའི་བདག་རྐྱེན་འབུལ་སྣོད་ཡང་དག་པ་མཛད། ཤྲི་རི་འཛམ་བུ་གླིང་དུ་བསོད་ནམས་འོད་ཟེར་བས། དཔོན་སློབ་རྣམས་ཀྱི་དབྱར་རྒྱགས་བཏེག་ནས་ཆོས་འཁོར་བསྐོར། མང་ཡུལ་སེང་གེ་མཁར་དུ་དབོན་པོ་བསོད་ནམས་གྲུབ་ཀྱིས་དཔོན་སློབ་འཁོར་བཅས་ཟླ་གཅིག་བཏེག་ནས་ཆོས་འཁོར་བསྐོར། ལན་འདེ་གུང་སྟིངས་སུ་བླ་མ་འཇམ་དཔལ་གླིང་པ་ལྕམ་སྲིང་གིས་དཔོན་སློབ་སུམ་བརྒྱ་ཙམ་ཟླ་བ་གསུམ་གྱི་བར་དུ་བཏེགས། དྲུང་དུ་ཡང་ན་བཟའ་ལ་སོགས་འབུལ་སྣོད་ཕུན་སུམ་ཚོགས་པ་དང་། བྱ་བྲལ་བ་རྣམས་ལའང་ན་བཟའ་རེ་ཕུལ། སྟག་རྩེ་བས་སྨུ་རྫིང་དུ་ཆོས་འཁོར་བསྐོར་བའི་བདག་རྐྱེན་དང་ཡར་མར་གྱི་དཔོན་སློབ་རྣམས་ཀྱི་ཞབས་ཏོག་འབུལ་སྣོད་དང་བཅས་པ་མཛད། ཁྱད་པར་ཁོང་རང་གྲོངས་དུས། ཐུགས་དམ་འདོག་ཐིག་པོ་ཞོ་དྲུག་བཅུ་རྩ་དྲུག་འགོར་བ་གཅིག་ཕུལ། བྱ་བྲལ་བ་རྣམས་ལའང་འགྱེད་དང་བཅས་པ་བསྒྲུབས། དྲུང་ཨ་ཕྱི་བ་དང་། དཔོན་ཞང་ཀུན་སྤངས་པས་འབུལ་འདེགས་བཟང་པོ་མཛད། ཁྱད་པར་དྲུང་སློབ་དཔོན་མས་ཞབས་ཏོག་གི་འཐིལ་དུ་ཞུགས་ནས་ཡང་དག་པ་མཛད། ཤེས་རབ་པ་སྐུ་མཆེད་པས་ཀྱང་ཞབས་ཏོག་ཕུན་སུམ་ཚོགས་པ་མཛད། གཞན་ཡང་མངའ་རིས་ཀྱི་དཔོན་རིག་འབྱོར་ལྡན་དད་པ་ཅན་རྣམས་ཀྱིས་ཞབས་ཏོག་ཡང་དག་པ་བསྒྲུབས། དྲུང་ནས་ཀྱང་དབུས་གཙང་གི་སྦྱིན་བདག་དེ་རྣམས་ཐམས་ཅད་ལ་དབང་བསྐུར། སེམས་བསྐྱེད་ལུང་ཁྲིད་ལ་སོགས་གང་ལ་གང་འོས་ཀྱི་ཆོས་ཀྱི་འབྲེལ་པ་གནང་ནས། དལ་འབྱོར་ཐོབ་པ་དོན་དང་ལྡན་པ་མཛད་པས། སངས་རྒྱས་དངོས་ལྟ་བུར་མི་ཕྱེད་པའི་དད་པ་ཐོབ་ནས་གངས་ཅན་གྱི་སྐྱེ་བོ་ཕལ་མོ་ཆེའི་འདྲེན་པ་དམ་པར་གྱུར་ཏོ། །

ཀུན་མཁྱེན་ཤེས་འོད་ལ་སོགས་པ་མདོ་ཁམས་ཀྱི་བུ་སློབ་རྣམས་དང་། བཀའ་བཅུ་པ་ཀུན་དགའ་དཔལ་ལ་སོགས་པ་དབུས་གཙང་གི་བུ་སློབ་རྣམས་ཀྱིས་ཀྱང་འབྱོར་པ་དང་བཏུན་ནས་གུས་པས་མཆོད་དོ། །གཞན་ཡང་གནམ་གྱི་མཐའ་མ་རྒྱ་ནག་པོའི་ཡུལ་ནས། ཏ་མིང་རྒྱལ་པོས་རྒྱན་གོས་བཟང་པོ་ཕྱི་ནང་ལྔ། སྣམ་སྦྱར་བཟང་པོ། སྐུ་འགག་བེར་ཐུལ། ཐོང་རིངས། དབུ་ཐེབ། ལྷམ། སྐུ་སྐྱེག ཕྱག་ཕྲེང་། རྡོར་དྲིལ་ཆ་གཉིས། ཏིང་ཤག་ཆ་གཉིས། རྟེན་ཁེབས་གཉིས། གདན་དཀར་གཉིས། གསོལ་ཁེབས་གཅིག མཎྜལ་གྱི་རྒྱན་གསུམ། ཙནྡན་དཀར་པོ་གདུམ་གཅིག ཇ་དཀར་རྒྱ་མ་ལྔ་བཅུ་རྣམས་ཕུལ། གུ་གེ་རྒྱལ་པོས། ཁ་ཆེ་གུར་གུམ་ཞོ་ལྔ་བཅུའི་མགོ་བྱས་འབུལ་སྣོད་མང་དུ་བྱུང་ངོ་། །འབྲུག་གི་ལོ་ལ་མྱ་ངན་འདའ་དགོངས་ནས། །གོ་རྟོག་ཉམས་སུ་མྱོང་བའི་ཟབ་དོན་རྣམས། །སྟོན་པས་བསྟན་པ་གཏོད་པ་ཇི་བཞིན་དུ། །ཆོས་འཁོར་ནན་འདོམས་ཁྱོད་ལ་ཕྱག་འཚལ་ལོ། །ཞེས་པ་ནི་མང་གུང་གི་མཚམས་གླིང་རྩེ་དཔལ་གྱི་དབེན་གནས་སུ། འབྲུག་གི་ལོ་ལ་དགེ་འདུན་བརྒྱ་ཕྲག་གཅིག་ལ་ཆོས་ཀྱི་འཁོར་ལོ་བསྐོར་བའི་དུས་སུ། དེའི་ལོ་མྱ་ངན་ལས་འདའ་བ་མཁྱེན་ནས། གུང་ལོ་དྲུག་ཅུ་རྩ་ལྔའི་བར་དུ་ཐོས་བསམ་བསྒོམ་གསུམ་གྱིས་རྒྱལ་བ་སྲས་དང་སློབ་མར་བཅས་པ་ཐམས་ཅད་ཀྱི་དགོངས་པ་ཟབ་མོ་ཕྱིན་ཅི་མ་ལོག་པ་རྟོགས་ཤིང་། ཐུགས་ཉམས་སུ་བཞེས་པའི་དོན་རྣམས་སྟོན་པ་བཅོམ་ལྡན་འདས་ཀྱིས་འོད་སྲུངས་ཆེན་པོ་དང་། ཀུན་དགའ་བོ་ལ་སོགས་ལ་ངའི་མདོ་སྡེ་རིན་པོ་ཆེ་འདི་ཁྱེད་ལ་གཏད་དོ། །

ཁྱེད་རྣམས་ཀྱིས་ཟུངས་ཤིག་ཆོངས་ཤིག ལྷོགས་ཤིག ཀུན་ཆུབ་པར་གྱིས་ཤིག གཞན་ལ་ཡང་རྒྱ་ཆེར་སྟོན་ཅིག་ཅེས་ཡང་དང་ཡང་དུ་གསུངས་པ་བཞིན་དུ། བདག་ཉིད་ཆེན་པོ་འདིས་ཀྱང་། གདུལ་བྱའི་ཐ་མ་རྣམས་ལ་གསང་འདུས་རིམ་ལྔའི་ཁྲིད། ལྟ་ཁྲིད་ཚར་གཉིས། འཇུག་པ་ཚར་གསུམ་བཏུད་ནས་གསུངས། རྩ་བ་ཚར་གཅིག་རྒྱས་པར་གསུངས། སྨོན་འཇུག་གི་སེམས་བསྐྱེད་ལན་གཉིས་ཉིན་གཅིག་ལ་གསུངས། གསང་འདུས་ཀྱི་དབང་ཐེངས་གཉིས་གནང་། ལྕེ་བསྒོམ་རྫོང་པའི་མན་ངག་རིན་སྤུངས་ཀྱི་ལུང་གནང་། བྱ་བྲལ་བ་རྣམས་ཀྱིས་ལོ་མང་པོའི་བར་དུ་གསོལ་བ་བཏབ་ཀྱང་མ་གནང་པའི་གསུང་རབ་ཐམས་ཅད་ཀྱི་སྙིང་པོ་བསྡུས་པ་བཀའ་འབུམ་ཐོར་བུ་བའི་ལུང་རྣམས་གནང་། སྔར་ནས་གསུངས་པ་དང་མི་འདྲ་བར་དཀའ་བའི་གནས་རྣམས་ལན་གསུམ་གསུམ་བསྐྱར་ནས་གསུངས། དེ་ལྟར་ངེས་པར་གྱིས་ཤིག་ཅེས་ཡང་ཡང་གསུངས་ཞིང་། ཁྱད་པར་དུ་འཕགས་པ་ཀླུ་སྒྲུབ་ཀྱི་ལུགས་ཁ་ན་མ་ཐོ་བ་མེད་པ་འདི་ལ་མ་བརྟེན་པར་སངས་རྒྱ་མི་ནུས་པར་ཁས་ལེན་ཨེ་ནུས། ཞེས་ཆོས་མགོ་གཞུག་ལ་ལན་གཉིས་གསུམ་གསུངས་ཀྱང་། ལན་ཞུ་མཁན་མ་བྱུང་འདུག བདག་ཉིད་ཆེན་པོའི་བཞེད་པས་སངས་རྒྱ་བའི་ཐབས་རྡོ་རྗེ་ཐེག་པ་དང་། ཕར་ཕྱིན་ཐེག་པ་གཉིས་ལས་མ་གསུངས་ཤིང་། དེ་གཉིས་ཀྱི་ལམ་གྱི་གཙོ་བོ་ཡང་རྫོགས་རིམ་དང་ལྟ་བ་རྣམ་གཉིས་ཡིན་ལ། དེ་གཉིས་མིང་ཐ་དད་ཀྱིས་བསྟན་པ་ཙམ་མ་གཏོགས་ངོ་བོ་བདག་མེད་པའི་ཤེས་རབ་ཁོ་ན་ཡིན། དེས་སྟོན་པའི་གནས་ཀྱི་དོན་དེ་ལས་གནས་ལུགས་ཀྱི་དོན་གཞན་དུས་གསུམ་གྱི་སངས་རྒྱས་ཀྱིས་མ་གསུངས་ཤིང་། དེ་ཕྱིན་ཅི་མ་ལོག་པར་འཕགས་པ་ཀླུ་སྒྲུབ་ཀྱིས་བསྟན་པ་འདི་ཁོ་ན་ཡིན་སྙམ་དུ་དགོངས་པ་ཡིན། འཕགས་པ་ཀླུ་སྒྲུབ་ཞབས་ཀྱི་ལུགས་ལས་ནི། །ཕྱི་རོལ་གྱུར་ལ་ཞི་བའི་ཐབས་མེད་དོ། །ཞེས་པས་གཞུང་འཇུག་པར་མཛད་པ་ཡིན་ནོ། །

དབང་གནང་དུས་དང་། དབུ་མའི་སྐབས་འགའ་ཡར་དུ་སྤྱན་ཆབ་ཡང་ཡང་གཏོང་བའི་རྒྱུ་མཚན་ནི་ཆོས་དང་ཆོས་སྨྲ་བའི་གང་ཟག་ལ་དད་ཅིང་གུས་པ་སྐྱེས་པའི། ངས་ཀླུ་སྒྲུབ་ཀྱི་ལྟ་བ་བཟང་པོ་འདི་བསྟན་ཀྱང་། དད་པ་ཙམ་མ་གཏོགས་ཕྱིན་ཅི་ལོག་པར་གོ་བ་མ་བྱུང་པར། གདུལ་བྱ་ཐུགས་ཆད་ནས་ཟེར་ལོ་གྱིས་དང་། གོ་བ་མི་གོ་གསུང་པ་དང་། ཡེ་གསང་ཆེན་མོར་འདུག་གི་གསུང་ཞིང་། ཟབ་མོ་ལྟ་བའི་བསྟན་པ་ནུབ་འགྲོ་བར་གཟིགས་ཏེ། ཐུགས་མུག་ནས་བཤུམས་པར་གོའོ། །འཁོར་འདས་ཆོས་ཀུན་སྐྱེ་བ་མེད་དྲན་ནས། །དེ་ཉིད་ངང་ལ་མྱ་ངན་འདའ་བཞེད་ནའང་། །གུས་པས་གསོལ་བཏབ་ངོ་རུ་ཞག་བདུན་བར། །སྐུ་ཚེ་བྱིན་བརླབས་ཁྱོད་ལ་ཕྱག་འཚལ་ལོ། །ཞེས་དང་། གང་ཚེ་དེ་ཉིད་སྐྱེ་མེད་ཡིན་ཞིང་བློ་དང་སྐྱེ་བ་དང་བྲལ་བ། །ཞེས་པའི་སྐབས་སུ་ཡུལ་ཅན་གྱིས་བསྡུས་པ། འཁོར་འདས་ཀྱི་ཆོས་ཐམས་ཅད་སྐྱེ་བ་མེད་པར་བསྟན་ཏོ། །རང་ཉིད་ཀྱང་ཆོས་ཀྱི་དབྱིངས་སུ་མྱ་ངན་ལས་འདའ་བར་བཞེད་ནས་བསྙུང་བའི་ཚུལ་བསྟན་ན་ཡང་། གདུལ་བྱ་རྣམས་ཀྱི་མྱ་ངན་ལས་མི་འདའ་བར་གསོལ་བ་བཏབ་པའི་ངོར་ཞག་བདུན་གྱི་བར། སྐུ་ཚེ་བྱིན་གྱིས་བརླབས་ནས་སྐུ་ཁམས་དངས་ཏེ། ད་ལོའི་ཆོས་འདི་བར་ཆད་ཀྱང་མང་པ་གཅིག་བྱུང་བས། གྲོལ་བའི་རིགས་མི་འདུག་གསུངས་ནས། དམིགས་པ་སྤུངས་ནས་གནང་། འཇུག་པའི་བཤད་པ་ཡང་གྲོལ་བར་མཛད་དོ། །

འཆི་བ་འོད་གསལ་ལུས་ལ་བརྟེན་མི་སྲིད། །ལུས་སེམས་བྲལ་ནས་རྣམས་ཤེས་སྟོང་པར་ཞུགས། །དབྱིངས་རིག་དབྱེར་མེད་འོད་གསལ་ཡིན་ནོ་ཞེས། །ཡང་ཡང་གསུང་པ་ཁྱོད་ལ་ཕྱག་འཚལ་ལོ། །ཞེས་པ་འདི་དིང་སང་གི་མན་ངག་པ་ཕལ་ཆེར་ཉེར་ཐོབ་མུན་ཆེན་གྱི་གནས་སྐབས་སུ་ཞི་གནས་ཀྱི་མཐུས་སེམས་ལུས་ལ་ཡུན་རིང་དུ་གནས་པ་ལ། འཆི་བ་འོད་གསལ་དུ་འདོད་ནའང་དེ་འདྲ་མདོ་རྒྱུད་ཀྱི་དགོངས་པ་མ་ཡིན། ལུས་སེམས་བྲལ་ནས་སྟོང་ཆེན་ཆོས་ཀྱི་དབྱིངས་སུ་ཞུགས་ནས། དབྱིངས་རིག་དབྱེར་མེད་དུ་གྱུར་པ་ལ་འཆི་བ་འོད་གསལ་ཞེས་ཟེར་བ་ཡིན། འདི་ལྟར་བཤད་ན་མང་པོ་གཅིག་དགྲ་རུ་འགྲོ་སྟེ། འདི་མི་ཟེར་ཁ་མེད་ཡིན་པས། ཐམས་ཅད་ཀྱི་ཡིད་ལ་ཟུངས་ཤིག ཅེས་མང་དུ་གསུངས་སོ། །སྔར་བསྒོམས་འཕོ་བའི་མན་ངག་གསལ་བཏབ་ནས། །རྟགས་རྣམས་མ་བརྗེད་དགའ་སྤྲོས་འོད་གསལ་འཇུག །འགོག་ལ་ལྡང་ཞིང་སྔོན་གྱིས་འཕེན་པས་འཕོ། །གསུང་ཞིང་མཛད་པ་ཁྱོད་ལ་ཕྱག་འཚལ་ལོ། །ཞེས་པ་འདི་དེང་སང་གི་འཆི་ཙ་ན་འཕོ་བ་འདེབས་ཟེར་བའི་ལག་ལེན་གཅིག་དར་འདུག་ནའང་། ཕྱི་དབུག་མ་ཆད་པ་ལ་འདེབས་པ་ཡིན། ཕྱི་དབུགས་ཆད་ནས་བཏབ་ཀྱང་ཐོས་པའི་གོ་སྐབས་མེད། དེའང་། སྔར་འཕོ་བའི་གནད་མན་ངག་སྒོམ་མྱོང་ན། མི་གསལ་བ་གསལ་བར་བྱེད་པ་ལ་གཞན་གྱིས་འཕོ་བ་འདེབས་པ་ཡིན། མན་ངག་མ་ཐོབ་པའི་སྐྱེ་བོ་ཐ་མལ་པ་ལ་འཕོ་བའི་མན་ངག་བསྟན་ཀྱང་ཁོ་ལ་ཅི་ཡང་མི་ཕན། དེ་བས་མཚན་དང་། གཟུངས་བྱིན་རླབས་ཅན་བརྗོད་པ་དོན་ཆེ། མན་ངག་དང་ལྡན་པ་འཆི་བའི་ཚེ། སྔར་རང་གིས་བསྒོམས་པའི་འཕོ་བའི་མན་ངག་རྣམས་ལེགས་པར་གསལ་བཏབ་ནས། ང་འདི་འདྲ་གཅིག་ཏུ་སྐྱེས་ན་སྙམ་པའི་འཕེན་པ་དྲག་ཏུ་སྔོན་དུ་བཏང་ནས། འབྱུང་བ་བཞི་ཐིམ་པའི་རྟགས་དང་། སྣང་བ་གསུམ་ཤར་བའི་རྟགས་རྣམས་མ་བརྗེད་པར་བྱས་ནས། རྟགས་རྣམས་རྫོགས་པ་དང་། ད་ང་འོད་གསལ་དོན་དམ་པའི་བདེན་པ་མངོན་སུམ་དུ་བྱེད་པ་འདུག་སྙམ་པའི་དགའ་སྤྲོ་ཆེར་སྐྱེ་ཞིང་། ཕ་ཁྱིམ་དུ་བུ་འགྲོ་བ་ལྟར་བྲོད་པ་དང་བཅས་ནས་ཆོས་ཀྱི་དབྱིངས་ལ་ཞུགས་པ་ལ་འཆི་བ་འོད་གསལ་མངོན་དུ་བྱས་པ་ཟེར་བ་ཡིན། དེའི་ངང་ལ་འཕོ་བའི་རྣམ་རྟོག་མེད་ཀྱང་། མངོན་གྱི་འཕེན་པའི་དབང་གིས་གང་འདོད་པའི་སྐྱེས་གནས་སུ་འཕེན་ནུས་པ་ལ་འཕོ་བ་ཐེབས་པ་ཟེར་བ་ཡིན། ཉན་ཐོས་རྣམས་འགོགས་པ་ལ་སྙོམས་པར་འཇུག་པའི་ཚེ། ཞག་དང་ཟླ་བ་དང་ལོ་འདི་ཙམ་གྱི་བར་དུ་སྙོམས་པར་འཇུག་ཅིང་། སྙོམས་འཇུག་གི་ངང་ལས་ལྡང་བའི་འདུ་ཤེས་མེད་ཀྱང་སྔོན་གྱི་འཕེན་པའི་དབང་གིས་དུས་ལས་མི་འདའ་བར་ལྡང་བ་ཡིན། དཔེར་ན་གཉིད་ལོག་པའི་སྔོན་ལ་ནང་པར་སྔ་མོར་ལྡང་མཉམ་པའི་འཕེན་པ་བཏང་ནས་ཉལ་བས། གཉིད་ཀྱི་ངང་ལ་ལྡང་བའི་བློ་མེད་ཀྱང་། འཕེན་པས་སྔ་མོར་གཉིད་སད་པ་བཞིན་ནོ། །ཞེས་གསུང་ཞིང་། ཇི་ལྟར་གསུང་བ་བཞིན་དུ་མྱ་ངན་ལས་འདའ་བའི་དུས་སུ་ཡང་མངོན་དུ་མཛད་དོ། །

སྐུ་ཚེ་འདི་ཡི་དངོས་ཀྱི་གདུལ་བྱ་ལ། །ཟབ་རྒྱས་ཆོས་ཀྱི་འཁོར་ལོ་བསྐོར་ཟིན་ནས། །འཆི་བ་འོད་གསལ་སྐབས་སུ་གཞན་དོན་གཤེགས། །སྐྱེ་འཆི་དབང་ཐོབ་ཁྱོད་ལ་ཕྱག་འཚལ་ལོ། །ཞེས་པ་ནི། གོང་དུ་བསྟན་པ་དེ་ལྟར་གྱི་གདུལ་བྱའི་ཚོགས་རྣམས་ལ། རང་རང་གི་སྐལ་བ་དང་འཚམས་པར་ཟབ་པ་དོན་དམ་བདེན་པ་དང་། རྒྱ་ཆེ་བ་ཀུན་རྫོབ་ཀྱི་བདེན་པ་གཉིས་ཀྱི་སྒོ་ནས་ཐར་པ་དང་ཐམས་ཅད་མཁྱེན་པ་ཐོབ་པའི་ཐབས་ཆོས་ཀྱི་འཁོར་ལོ་མ་ལུས་པ་བསྐོར་ཟིན་ནས། རང་ཉིད་མྱ་ངན་ལས་འདའ་བ་ལ་འཇིགས་པ་དང་། ཡ་ང་བ་དང་། བག་ཚ་བ་མི་མངའ་བ་ཡིན་ཏེ། སློབ་དཔོན་སངས་རྒྱས་དཔལ་གྱི་སྒྲུབ་ཆེན་མ་ན་རེ། ཚེ་སྒྲུབ་མ་མཛད་ན་སྐུ་ཚེ་ཐུང་ཟེར་གདའ་ལགས། ཚེ་སྒྲུབ་མཛད་ན་ཞུས་པས། དྲུག་ཅུ་ཁ་རལ་གྱིས་དུས་སུ། དྲུག་ཅུ་རྩ་ལྔ་སོང་འདུག ད་ཚེ་རིང་བའི་རྟེན་འབྲེལ་མི་སྒྲིགས་གསུང་བ་དང་། སྙུང་པ་ལྡོག་པའི་སྔ་དྲོ་བླ་མ་རྒྱལ་བཟང་གིས་ཕྱག་ཕུལ་ནས། དྲུང་ནས་བསྟན་པ་དང་། སེམས་ཅན་གྱི་དོན་ལ་ཞབས་བརྟན་པར་བཞུགས་སུ་གསོལ། ཞེས་ཞུས་པས། ད་ན་བ་ཡུན་ཐུང་བ་དང་། འཆི་བ་ཟུག་ཆུང་བ་བྱུང་ན་བསམ་པ་མ་གཏོགས་བྱ་བ་འདི་རང་མ་འགྲུབ་སྙམ་པའི་བློའི་ལྷག་མ་ལུས་པ་མེད་གསུངས་ནས། གང་ལ་སྐྱབས་ན་བསླུ་མེད་དཀོན་མཆོག་གསུམ། །འབྲལ་མེད་སྤྱི་གཙུག་རྒྱན་དུ་བཞུགས་སུ་གསོལ། །སྣང་སྟོང་སྒྱུ་མའི་རྣལ་འབྱོར་རི་ཁྲོད་པ། །སེམས་སྣོང་མེད་ཀྱི་གླུ་སྐད་འདི་བཞིན་ལེན། །ཤུལ་ན་འཕྲེང་བའི་ཟས་ནོར་ལུས་པ་མེད། །གདོང་ན་འཚེར་བའི་ལས་ངན་བསགས་པ་མེད། །ཐེག་ཆེན་བསླབ་པའི་བསམ་སྦྱོར་ཉམས་པ་མེད། །ད་སྒྱུ་མའི་ལུས་སེམས་བྲལ་ཡང་འགྱོད་པ་མེད། །ཅི་སྣང་སྒྱུ་མར་རྟོགས་པའི་ཤེས་རབ་ཡོད། །འགྲོ་དྲུག་ཕ་མར་ཤེས་པའི་ལྷག་བསམ་ཡོད། །ཐབས་ཤེས་ཟུང་དུ་འབྲེལ་བའི་ཉམས་ལེན་ཡོད། །ད་སྒྱུ་མའི་ལུས་སེམས་བྲལ་ཡང་འགྱོད་པ་མེད། །ཐོག་མར་གསུང་རབ་དགོངས་དོན་ཚུལ་བཞིན་བཙལ། །བར་དུ་བློ་གསལ་གདུལ་བྱའི་ཚོགས་ལ་བཤད། །ཐ་མར་འདྲིས་པའི་དོན་ལ་རྩེ་གཅིག་བསྒོམས། །ད་སྒྱུ་མའི་ལུས་སེམས་བྲལ་ཡང་འགྱོད་པ་མེད། །རྒྱལ་བའི་བསྟན་པ་སྲོག་ལས་གཅེས་པར་བཟུང་། །རིགས་དང་མི་རིགས་ཚུལ་བཞིན་རྣམ་པར་ཕྱེ། །འཆད་རྩོད་རྩོམ་པས་དལ་འབྱོར་དོན་ཡོད་བྱས། །ད་སྒྱུ་མའི་ལུས་སེམས་བྲལ་ཡང་འགྱོད་པ་མེད། །འགྱོད་མེད་བདེ་དྲོད་ཀྱི་མགུར་མ་འདི། །གངས་བུ་ལེའི་འགུལ་དུ་བླངས་པ་ཡིན། །མི་ཁོ་བོའི་རྗེས་འཇུག་བསྐལ་ལྡན་རྣམས། །མི་ང་བཞིན་བྱེད་ན་འདི་བཞིན་མཛོད། །གསུང་བ་བཞིན་གོང་དུ་བསྟན་པ་དེ་ལྟར་འཆི་བ་འོད་གསལ་གྱི་དམིགས་པ་རྒྱས་པར་གསུངས་ནས། ཆོས་ནང་པར་གྱི་གྲོལ་བར་གདའོ། །

ཞེས་གསུངས་ཞིང་། ནང་པར་ཆོས་གསུང་བའི་དུས་མར་བཅད་བསྙུང་བའི་ཚུལ་བསྟན་ནས། གསུང་མི་གནང་ཞིང་། གསོལ་མི་དགོངས་ཙམ་མ་གཏོགས་སྙུང་ཟུག་མེད་པས། ཐུགས་དམ་གྱི་རིམ་པ་རྣམས་མ་ཆག་ཅིང་། ཇི་ལྟར་བཞེད་པ་བཞིན་འཕོ་བ་མཛད་ནས། འབྲུག་ལོ་ཟླ་བ་བཅུ་པའི་ཉེར་དགུའི་ཉི་ཤར་ལ། སྐུ་ལུས་གཟུགས་ཀྱི་སྐུ་འོད་གསལ་ཆོས་ཀྱི་སྐུར་མྱ་ངན་ལས་འདས་པའི་ཚུལ་བསྟན་ཏོ། །སྐྱེ་འཆི་ལ་དབང་ཐོབ་པ་ཡིན་ཏེ། བསམ་བཞིན་དུ་སྲིད་པ་བཞེས་ཞིང་བཞེད་པ་ཤིན་ཏུ་མྱ་ངན་ལས་འདས་པའི་ཕྱིར་རོ། །སྒྱུ་ལུས་ཀུན་རྫོབ་བདེན་པ་རྣམ་པར་དག ། འོད་གསལ་དོན་དམ་བདེན་པ་མངོན་དུ་གྱུར། །ཟུང་འཇུག་རྡོ་རྗེ་འཆང་གི་གོ་འཕང་བརྙེས། །ཕྲིན་ལས་ལྷུན་གྲུབ་ཁྱོད་ལ་ཕྱག་འཚལ་ལོ། །ཞེས་པ་ནི་སྔོན་གྱི་འཕེན་པའི་དབང་གིས་འཆི་བ་འོད་གསལ་ལས་བར་དུ་སྒྱུ་ལུས་སུ་བཞེངས་ནས། ཀུན་རྫོབ་བདེན་པ་རྣམ་པར་དག་པ་མཚན་དང་དཔེ་བྱད་ཡོངས་སུ་རྫོགས་པ་ལོངས་སྐུ་མཉེས་ཏེ། རྟེན་དེ་ཉིད་ལ་འོད་གསལ་དོན་དམ་པའི་བདེན་པ་རྣམ་པར་དག་པ་ཆོས་ཀྱི་སྐུ་མངོན་སུམ་དུ་མངོན་དུ་མཛད་པ་ནི། དབང་ཕྱུག་བརྒྱད་ལྡན་ཟུང་འཇུག་རྡོ་རྗེ་འཆང་གི་གོ་འཕང་བརྙེད་པར་འགྱུར་ཏེ། ཞི་རྒྱས་དབང་དྲག་ཕྲིན་ལས་རྣམ་པ་བཞིས་འབད་མེད་ལྷུན་གྲུབ་རྒྱུན་མི་འཆད་དུ་གཞན་དོན་མཛད་པས་འཁོར་བ་སྡུག་བསྔལ་གྱི་རྒྱ་མཚོ་སྐེམས་པར་མཛད་དོ། །

ཞིང་གཞན་གཤེགས་ཚེ་ས་ཆེན་རབ་ཏུ་གཡོས། །དཔའ་བོ་མཁའ་འགྲོ་ལྷ་རྣམས་འདུས་གྱུར་ཏེ། །ཕྱི་དང་ནང་དང་གསང་བ་དེ་ཁོ་ནས། །མཆོད་ནས་སྤྱན་དྲངས་ཁྱོད་ལ་ཕྱག་འཚལ་ལོ། །ཞེས་པ་ནི། སྐྱེས་བུ་དམ་པ་རྣམས་བལྟམས་པ་དང་། ཆོས་ཀྱི་འཁོར་ལོ་བསྐོར་བ་དང་། མྱ་ངན་ལས་འདས་པའི་དུས་སུ། འཇིག་རྟེན་ལ་གནོད་པར་མི་འགྱུར་བའི་ས་གཡོ་བར། མདོ་ལས་གསུངས་པ་ལྟར་བྱུང་བ་ཀུན་ལ་གསལ་ལོ། །དཔའ་བོ་མཁའ་འགྲོ་དཀར་ཕྱོགས་ལ་དགའ་བའི་ལྷ་ཀླུ་སོགས་ནམ་མཁའ་ལ་འདུས་པར་གྱུར་ཏེ། ཕྱིའི་མཆོད་པ་འདོད་ཡོན་ལྔ། ནང་མཆོད་པ་ཤ་ལྔ་བདུད་རྩི་ལྔ། གསང་བའི་མཆོད་པ་དགའ་བཞིའི་བདེ་བ། དེ་ཁོ་ན་ཉིད་ཀྱི་མཆོད་པ་གནས་ལུགས་རྟོགས་པའི་ལྟ་བས་རང་རང་གིས་ཇི་ལྟར་ནུས་པ་ལྟར་མཆོད་ནས། བདག་ཉིད་ཆེན་པོ་གར་གཤེགས་པའི་གནས་སུ་སྤྱན་དྲངས་པ་ཡིན་ནོ། །ཀུན་གྱིས་ཐོས་པའི་དུང་དང་རྔ་བོ་ཆེའི་སྒྲ་སྐད་བསམ་གྱིས་མི་ཁྱབ་པ་བྱུང་ཞིང་། སྔར་སྣམ་མ་མྱོང་བའི་དྲི་བཟང་པོ་ཀུན་གྱིས་ཚོར་བ་ཡང་ཡང་བྱུང་། བླ་མ་བསོད་ནམས་གྲགས་པ་སོགས་འགའ་ཡར་གྱི་མཚན་མོ་བླ་བྲང་ཀུན་འོད་ཀྱིས་ཁེངས་པ་གཟིགས། དེ་ལ་སོགས་པ་དགེ་བའི་ལྟས་བསམ་གྱིས་མི་ཁྱབ་པ་བྱུང་ངོ་། །

ཡེ་ཤེས་མེ་ཡིས་ཁྱོད་སྐུ་བཞུ་བའི་ཚེ། །མཁའ་ལ་སྤྲིན་མེད་བར་སྣང་རླུང་ཡང་ཞི། །ས་ལ་དྲོད་རྒྱས་དབྱར་བཞིན་བྱིན་གྱིས་བརླབས། །རྟེན་འབྲེལ་དབང་ཐོབ་ཁྱོད་ལ་ཕྱག་འཚལ་ལོ། །ཞེས་པ་ནི། དཔལ་གསང་བ་འདུས་པའི་དཀྱིལ་འཁོར་གྱི་ཞལ་ཕྱེ་ནས། སྒྲུབ་པའི་མཆོད་པ་རྒྱས་པར་ཕུལ་ཏེ། ཡེ་ཤེས་ལྔའི་མེས་རྣམ་པར་སྨིན་པའི་སྐུ་སྦྱང་བའི་ཚེ། སྐད་ཅིག་དེ་ཉིད་ལ་རྒྱན་ནམ་མཁའ་སྤྲིན་སོགས་སྒྲིབ་གཡོགས་ཀུན་དང་བྲལ་ཞིང་བཻ་ཌཱུརྻའི་རང་མདོག་ཡོངས་སུ་རྫོགས་པར་བསྟན། བར་སྣང་ལ་རླུང་དང་ཚུབ་མ་སོགས་ཀྱི་རྡུལ་དང་བྲལ་བར་གྱུར། ས་གཞི་ལ་གློ་བུར་དྲོད་ཆེར་རྒྱས་ཏེ། གྲང་པས་ཉེན་དང་བྲལ་བ། དབྱར་བཞིན་དུ་བྱིན་གྱིས་བརླབས་པ་ནི། རྟེན་ཅིང་འབྲེལ་བར་འབྱུང་བ་ལ་དབང་ཐོབ། ལྟ་བ་རྣམ་པར་དག་པའི་མཐུ་ཡིན་པར་ཀུན་གྱིས་གོའོ། །སྟོན་པའི་སྐུ་གདུང་ཆ་བརྒྱད་བགོས་པ་བཞིན། །ཁྱོད་གདུང་དད་ལྡན་ལྷ་མི་གྲངས་མེད་ཀྱིས། །ཕྱོགས་བཅུར་སྤྱན་དྲངས་མཆོད་པའི་རྟེན་དུ་གྱུར། །སྐུ་གདུང་རྒྱས་མཛད་ཁྱོད་ལ་ཕྱག་འཚལ་ལོ། །ཞེས་པ་ནི། སྔོན་གྱི་གྱད་ཀྱིས་ཡུལ་ཤིང་ས་ལ་ཟུང་གི་དྲུང་དུ། བཅོམ་ལྡན་འདས་མྱ་ངན་ལས་འདས་པའི་དུས་དུ། སྐུ་གདུང་རིང་བསྲེལ་རྣམས་ལྷ་དང་ཀླུ་དང་མི་རྣམས་ཀྱི་ཆ་བརྒྱད་དུ་བགོས་པ་བཞིན་དུ། བདག་ཉིད་ཆེན་པོ་འདིའི་སྐུ་གདུང་བྱིན་བརླབས་ཀྱི་སྙིང་པོ་ཅན་རྣམས་ཀྱི་སྐལ་བ། ལྷ་ཀླུ་སོགས་མི་མ་ཡིན་གྱིས་ཀྱང་སྤྱན་དྲངས་པར་གྲགས་ཏེ། གདུང་ཁང་ཞལ་ཕྱེ་དུས་ཕྱག་ཞབས་ཀྱི་རྐང་འགའ་ཡར་མ་ཚང་པར་མཐུན་སྣང་དུ་གྲུབ་བོ། །

ལྷག་མ་རྣམས་ནང་རྟེན་ཕྱི་རྟེན་སྐུ་འདྲའི་ནང་དུ་གཞུག་རྒྱུ་དང་། བུ་སློབ་ཀྱི་མཆོག་ཆོས་རྗེ་བློ་བཟང་གྲགས་པས་གཙོ་མཛད་རབ་ཏུ་བྱུང་བའི་གདུལ་བྱ་རྣམས་དང་། སྦྱིན་བདག་གི་མཆོག་ཏུ་གྱུར་པ་ཁྲི་བསོད་ནམས་རྒྱལ་མཚན་ལྡེ་པ་སྐུ་མཆེད་ཀྱིས་ཐོག་དྲངས་ཁྱིམ་པའི་གདུལ་བྱ་རྣམས་ལ་བཀྱེ་ནས་ལྷ་ཀླུའི་གནས་དང་། བོད་གངས་ཅན་གྱི་ཁྲོད་ཐམས་ཅད་དུ་མཆོད་པའི་རྟེན་དུ་གྱུར་ཏོ། །མཐོང་ཐོས་དྲན་རེག་གཏམ་དུ་བརྗོད་རྣམས་ཀྱི། །འདི་ཕྱི་བར་དོའི་མགོན་སྐྱབས་དཔུང་གཉེན་མཛད། །བསླུ་མེད་སྐྱབས་གནས་དཔལ་ལྡན་རེད་མདའ་བ། །འདྲེན་མཆོག་དམ་པ་ཁྱོད་ལ་ཕྱག་འཚལ་ལོ། །ཞེས་པ་ནི། དཔལ་ལྡན་བླ་མ་དེའི་སྐུ་མཐོང་བའམ། གསུང་ཐོས་པའི་ཡོན་ཏན་དྲན་པའམ། ཕྲིན་ལས་ཀྱིས་རེག་པའམ། མཚན་བརྗོད་པའི་གདུལ་བྱ་རྣམས་ཀྱི་ཚེ་འདིའི་སྐུ་དྲིན་མགོན། ཕྱི་མའི་སྐྱབས། བར་དོའི་དཔུང་གཉེན་དམ་པར་གྱུར་པ་གནས་སྐབས་དང་། མཐར་ཐུག་ཀུན་ཏུ་བསླུ་བ་མེད་པའི་སྐྱབས་གནས་འདྲེན་མཆོག་དམ་པ་དེ་ལ་བདག་སོགས་གདུལ་བྱ་ཐམས་ཅད་སྒོ་གསུམ་གུས་པས་སྐྱབས་སུ་མཆི་ཞིང་ཕྱག་འཚལ་ལོ། །མཆོད་དོ། །བསྟོད་དོ། །རྣམ་པ་ཀུན་ཏུ་རྗེས་སུ་གཟུང་དུ་གསོལ།

ཀྱེ་མ་ཀྱེ་ཧུད་བསྟན་པའི་སྲོག་ཤིང་ཆག །བསྟན་འཛིན་དགེ་འདུན་ཕྱོགས་བཅུར་འཐོར་ལགས་སོ། །ཀྱེ་མ་ཀྱེ་ཧུད་ཐར་པའི་རྒྱལ་མཚན་འགྱེལ། །ཐར་འདོད་རྣམས་ཀྱི་ཐར་ལམ་སྟོར་ལགས་སོ། །ཀྱེ་མ་ཀྱེ་ཧུད་ལེགས་བཤད་དགའ་སྟོན་ཉམས། །བློ་གསལ་རྣམས་ཀྱི་རེ་ཐག་བཅད་ལགས་སོ། །ཀྱེ་མ་ཀྱེ་ཧུད་ལྟ་བའི་ཉི་མ་ནུབ། །ཀླུ་སྒྲུབ་ཡབ་སྲས་ལུགས་བཟང་སུ་ཡིས་སྐྱོང་། །ཀྱེ་མ་ཀྱེ་ཧུད་དམ་ཆོས་རྒྱ་མཚོ་སྐམས། །ཐོགས་མེད་སྐུ་མཆེད་བཤད་སྲོལ་སུ་ཡིས་སྟོན། །ཀྱེ་མ་ཀྱེ་ཧུད་ལུང་རིགས་མཆེ་སྡེར་འཐོར། །ཕྱོགས་གླང་ཆོས་གྲགས་རིགས་ཚུལ་སུ་ཡིས་སྤེལ། །ཀྱེ་མ་ཀྱེ་ཧུད་ཚུལ་ཁྲིམས་བུམ་པ་ཞིག །ཡོན་ཤག་རྣམ་གཉིས་སྡོམ་རྒྱུན་སུ་ཡིས་འཛིན། །ཀྱེ་མ་ཀྱེ་ཧུད་སྤངས་རྟོགས་གོ་རིམ་འཆོལ། །འཕགས་སེང་གཉིས་ཀྱི་ལེགས་བཤད་སུ་ཡིས་བསྒྲོག །ཀྱེ་མ་ཀྱེ་ཧུད་ཉམས་རྟོགས་བྱིན་བརླབས་ཡལ། །ཏེ་ལོ་ནཱ་རོའི་མན་ངག་སུ་ལ་ཞུ། །ཀྱེ་མ་ཀྱེ་ཧུད་ཕན་བདེའི་པད་ཚལ་ཟུམ། །བཤད་སྒྲུབ་བསྟན་པ་གཅིག་ཅར་ནུབ་ལགས་སོ། །ཀྱེ་མ་ཀྱེ་ཧུད་ཉམ་ཐག་ཡི་རེ་མུག ། ཁྱོད་སྐུ་མིག་གིས་མཐོང་བའི་སྐལ་བས་དབེན། །ཁྱོད་གསུང་རྣ་བས་ཐོས་པའི་བསོད་ནམས་མེད། །ཁྱེད་ཐུགས་གང་ན་བཞུགས་ཀྱང་བྱིན་གྱིས་བརློབས། །

རྗེས་སུ་མཆོད་པ་ཕུལ་བའི་ཚུལ་ནི། བླ་མ་བསོད་ནམས་གྲགས་པས་གཙོ་མཛད། བུ་སློབ་བརྒྱ་ཕྲག་གཅིག་ལྷག་ཙམ་གྱིས་ཞག་བཅོ་བརྒྱད་ཀྱི་བར་དུ་ཕྱི་ནང་གི་དཀྱིལ་འཁོར་ཆེན་པོ་འདི་དག་གིས་ཞལ་ཕྱེ་ནས་གུས་པས་གསོལ་བ་བཏབ་པ་ནི། བླ་མ་བསོད་ནམས་གྲགས་པ་དང་། ཆེན་པོ་ཆོས་དཔལ་བ་གཉིས་ཀྱིས་གཙོ་མཛད་ཀྱིས། ཀྱཻ་རྡོ་རྗེ་སློབ་དཔོན་ཡི་དམ་དཔལ་བ་དང་། བླ་མ་ཡོན་ཏན་རྒྱལ་བས་གཙོ་མཛད་རྣམས་ཀྱིས་ཀུན་རིག བླ་མ་རྒྱལ་བཟང་པས་གཙོ་མཛད། བྱ་བྲལ་བ་རྣམས་ཀྱིས་ཆོས་རྗེའི་ཐུགས་དམ་གྱི་གཙོ་བོ་དཔལ་གསང་བ་འདུས་པ་དང་། བཅོམ་ལྡན་འདས་འཁོར་ལོ་བདེ་མཆོག སློབ་དཔོན་བཀའ་བཞི་པས་གཙོ་མཛད་དགེ་འདུན་བྱིང་གིས་བདེ་གཤེགས་བརྒྱད་ལ་མཆོད་པ། བདག་གིས་བླ་མ་མཆོད་པ་ལ་སོགས་པའི་སྒྲུབ་མཆོད་ཕུལ་ཏེ་གསོལ་བ་བཏབ། དེ་དུས་ནང་སོ་རང་གི་ཕྱག་རྫས་གང་ཡོད་ཀྱིས་ཅི་ལྡང་བྱས་པའི་ལྷག་མ། ཁབ་ནང་སོས་ཞག་གསུམ། བདག་ཆེན་མས་ཞག་གཉིས། དྲུང་དཔོན་སློབ་མས་གཙོ་མཛད་རྣམས་ཀྱིས་ཞག་གསུམ་བཏེགས་ནས། གདུང་གི་དྲུང་ནས་གཙོ་མཛད་དགེ་འདུན་རྣམས་ལ་བསྙེན་བསྐུར་འབུལ་འདེགས་ཕུན་སུམ་ཚོགས་པ་མཛད་དོ། །

རྟེན་རང་བྱོན་འཕགས་པའི་སྐུ་ཚད་མཉམ་པའི་རྗེ་བཙུན་འཇམ་པའི་དབྱངས་ཁྲི་རྒྱབ་དང་བཅས་པ་བཞེངས་པའི་ཟངས་གསེར། བཟོ་གནས་པའི་ཡོན་རྒྱགས་སོགས་ཀྱི་སྦྱིན་བདག་གིས་ཐིལ། དྲུང་བདག་པོ་པས་མཛད་ཅིང་། གཞན་ཡང་བདག་ཆེན་མས་གཙོ་མཛད། བུ་སློབ་རྣམས་ཀྱིས་དད་ཅིང་གུས་པས་ཕུལ་བ་དང་། ནང་སོ་རང་གི་ཐིག་པོ་སོགས་ཕྱག་རྫས་ཀྱི་བཞུགས་གང་ཡོད་བཏང་ནས། མང་ཡུལ་འཕགས་པའི་གཙུག་ལག་ཁང་དུ་བཞུགས་སུ་གསོལ་ཅིང་། སྐུ་འདྲའི་སྦྱིན་བདག་ཆེན་པོ་ཆོས་དཔལ་བས་མཛད་ནས། གཙུག་ལག་ཁང་དེ་ཉིད་ན་བཞུགས་པའི་སྤྱན་མངར་བདག་ཉིད་ཆེན་པོ་རང་གིས། ཇོ་བོའི་དྲུང་དུ་ཕུལ་བའི་སྐོང་བུ་ལ་དངུལ་དམ་གཅིག་མནན་ནས། སྐོང་རྐྱེན་བཟང་པོ་བརྩེགས་ཏེ་ཕུལ་བའོ། །རྟེན་གཉེར་ཆེན་པོ་དང་། སློབ་དཔོན་ཡོན་རིན་པས་མཛད། ཐིལ་བཞུགས་བླ་མ་རྒྱལ་བཟང་པ་དང་། ཉེ་གནས་མཆོག་ལེགས་ཀྱིས་མཛད་དོ། །དགེ་ལེགས་ཡོན་ཏན་ཆུ་གཏེར་ཆེན་པོ་ལས། །ཆུ་ཐིག་ཙམ་ཞིག་བླངས་ལ་ཉེས་པའི་ཚོགས། །ཇི་སྙེད་མཆིས་པ་ཐམས་ཅད་མཐོལ་ལོ་བཤགས། །ཞབས་འབྲིང་གཉུག་མའི་ཚོགས་ལ་བཟོད་པར་གསོལ། །བླ་མའི་རྣམ་ཐར་ངོ་མཚར་རྨད་བྱུང་བའི། །བཤེས་གཉེན་བསོད་ནམས་གྲགས་སོགས་བཀས་བསྐུལ་ནས། །གྲངས་མེད་གདུལ་བྱའི་ཐ་ཤལ་མངའ་རིས་པ། །མི་ཕྱེད་དད་ཐོབ་སངས་རྒྱས་རྩེ་མོས་སྦྱར། །དགེ་བ་འདི་དང་དགེ་བའི་རྩ་བ་གཞན། །མ་ལུས་བློ་ཡིས་གཅིག་ཏུ་བསྡོམས་བྱས་ནས། །བླ་མ་མཆོག་ལ་གུས་པས་ཕུལ་བ་ཡིས། །བླ་མ་དམ་པའི་ཐུགས་དགོངས་རྫོགས་པ་དང་། །སྐུ་གསུང་ཐུགས་ཀྱི་བྱིན་བརླབས་འཇུག་པར་ཤོག །

རྣམ་ཐར་ཞིབ་རྒྱས་སུ་བརྗོད་པ་བློའི་ཡུལ་མ་ཡིན་ཞིང་། དྲུང་རང་ནས་ཀྱང་ངས་འདི་ལྟར་བྱས། འདི་བཞིན་བྱུང་སོགས་ཆེར་མི་གསུང་པ་དང་། རྒྱུན་དུ་ཞབས་ཏོག་ཕུལ་བའི་རྒྱུས་ཅན་ལ་འདྲིས་མེད་པའི་སྟོབས་ཀྱིས། གོ་རིམ་གོང་འོག་ནོར་བ་སོགས་ཉེས་པའི་ཚོགས་ཐམས་ཅད་བཟོད་པར་མཛད་དུ་གསོལ། འདིས་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་པར་གྱུར་ཅིག །ཅེས་པ་འདི་དབང་ཕྱུག་མི་ལ་རས་ཆེན་གྱི་བསྟི་གནས་རྐང་ཚུགས་ཕུག་གི་རི་ཁྲོད་དུ་སྦྱར་བའོ།། །།དགེ་ལེགས་སུ་གྱུར་ཅིག །རྗེ་བཙུན་ཆེན་པོ་རེད་མདའ་བའི་གསུང་སྒྲོས་མདོར་བསྡུས་པའོ། །མངྒ་ལཾ། བྷ་ཝནྟུ།། །།