བླ་མ་སྒྲུབ་པ་དཔལ་ལ་ཆོས་གསུམ་ལ་བརྩམས་ཏེ་གདམས་པ།
བླ་མ་སྒྲུབ་པ་དཔལ་ལ་ཆོས་གསུམ་ལ་བརྩམས་ཏེ་གདམས་པ། ན་མོ་ལོ་ཀེ་ཤྭ་ར་ཡ། གང་ལ་ཆགས་པས་རྟག་ཏུ་སྡུག་བསྔལ་ཞིང་། །མེ་ཡི་འོབས་དང་མི་གཙང་རྫབ་ལྟ་བུའི། །འཁོར་བ་འདི་ལ་བདེ་བའི་སྐབས་མེད་ཀྱི། །ཞེན་ལོག་རྒྱུན་དུ་བསྟེན་གཅིག་སྒྲུབ་པ་དཔལ། །ཉོན་མོངས་ནད་ཆེན་སེལ་བའི་སྨན་གཅིག་པུ། །དུས་གསུམ་རྒྱལ་བ་ཀུན་ཀྱི་བགྲོད་གཅིག་ལམ། །མཐའ་བྲལ་དབུ་མའི་ལམ་ལས་གཞན་མེད་ཀྱི། །ཡེངས་མེད་སྟོང་ཉིད་སྒོམས་ཤིག་བསྒྲུབ་པ་དཔལ། །ལས་ཉོན་དབང་གིས་རྒྱུད་ལྔའི་འཁོར་བ་རུ། །དུཿཁ་རྒྱུད་མར་མྱོང་བའི་འགྲོ་བ་འདི། །ཐོག་མེད་དུས་ཀྱི་དྲིན་ཅན་མ་ཡིན་གྱི། །སྙིང་རྗེ་རྒྱུན་དུ་སྒོམས་ཤིག་སྒྲུབ་པ་དཔལ། །མདོར་ན། འཁོར་བ་ལ་ཡིད་འབྱུང་བས་མཉམ་བཞག་ཏུ་སྟོང་ཉིད་སྒོམས་ཞིང་། རྗེས་ཐོབ་ཏུ་སྙིང་རྗེ་སྒོམ་པ་ལ་ཉམས་ལེན་ཀྱི་གཙོ་བོ་མཛད་དོ། །ཅེས་པ་དགེ་སློང་གཞོན་ནུ་བློ་གྲོས་ཀྱིས་སྦྱར་བའོ།། །།