བླ་མ་བསོད་ནམས་གྲགས་པ་ལ་གདམས་པ།
བླ་མ་བསོད་ནམས་གྲགས་པ་ལ་གདམས་པ།
བླ་མ་བསོད་ནམས་གྲགས་པའི་གདམས་པ་བཟང་པོ་ཕུལ་བའི་ཡི་གེ་ཤའི་རྟེན་དང་བཅས་པ་འཕྲོད་པས་རྗེས་སུ་ཡི་རངས། སྐབས་ཀྱི་དོན། ཕྱི་ནང་ཆོས་རྣམས་རྨི་ལམ་སྒྱུ་མ་བཞིན། །མེད་བཞིན་སྣང་བ་འཁྲུལ་བའི་ཡོ་ལང་དུ། །ངེས་པར་ཤེས་ནས་མི་བརྗེད་དྲན་པ་ཡིས། །རྟག་པར་སྐྱོང་བ་སྟོང་ཉིད་ལམ་ཁྱེར་ཡིན། །མཐའ་མེད་འཁོར་བར་ཆུད་པའི་ཐར་མེད་བཙོན། །སོས་མེད་ནད་ཀྱིས་ཐེབས་པའི་དུཿཁ་ཅན། །འཁྲུལ་སྣང་བདེན་པར་ཞེན་པའི་འགྲོ་བ་རྣམས། །ཐོག་མེད་དྲིན་ཅན་མ་ཡིན་བརྩེ་བས་སྐྱོངས། །ཅེས་པ་བུ་ལེ་ནས་སྤྲིངས་པ་དགེའོ།། །།