གོ་འཇོ་དཔོན་ཆེན་ལ་གདམས་པ།
གོ་འཇོ་དཔོན་ཆེན་ལ་གདམས་པ།
གང་གི་ཞབས་རྡུལ་སྐབས་གསུམ་དབང་པོ་དང་། །འཕྲོག་བྱེད་བདེ་བྱེད་དབྱིག་གི་སྙིང་པོ་སོགས། །འཇིག་རྟེན་མཆོད་འོས་གཙུག་གིས་གུས་བསྟེན་པའི། །སྟོན་པ་མཉམ་ཉིད་དེ་ཡིས་ཁྱེད་ལ་སྐྱོང་། །གང་གིས་སྔོན་ཚེ་རྒྱལ་བའི་སྤྱན་སྔ་རུ། །བསྟན་དང་བསྟན་འཛིན་སྐྱོང་བར་ཞལ་བཞེས་ནས། །དམ་བཅས་དོན་ལ་གཡེལ་བ་མི་མངའ་བའི། །དམ་ཅན་མཐུ་ལྡན་རྣམས་ཀྱིས་ཁྱོད་ལ་སྲུངས། །ཕས་རྒོལ་གླང་ཆེན་འཇོམས་པའི་ལུས་གྲིམས་ཤིང་། །བསོད་རྣམས་རལ་པའི་ཁུར་ཀྱིས་རབ་ཏུ་བརྗིད། །དམག་དཔུང་རུ་མཚོན་བརྡར་བའི་མཆེ་སྡེར་ཅན། །མི་དབང་མི་ཡི་སེང་གེ་རྒྱལ་གྱུར་ཅིག །བསོད་ནམས་ཆེན་པོའི་དཔལ་གྱིས་མངོན་པར་མཐོ་བའི་ཀུན་ཏིང་གུ་ཤེར་པའི་དྲུང་དུ། དགེ་སློང་བློ་གྲོས་ཀྱིས་གསོལ་བ། སྙུན་མི་མངའ་ཞིང་ཟོ་མདོག་བདེ་བའི་ངང་ནས་གསུང་ཤོག་རྟེན་བཅས་གནང་བ་འདིར་འཕྲོད་པས་སེམས་རངས་པར་གྱུར། སྐབས་ཞུས་རང་རེའི་དྲུང་ནས། སྤྱིར་བསྟན་པ་ལ་མོས་ཤིང་། ཁྱད་པར་དཔལ་ལྡན་ས་སྐྱ་པའི་ཆོས་བརྒྱུད་དང་། མཁྱེན་རབ་ཀྱི་དབང་ཕྱུག་ཆོས་ཀྱི་རྗེ་ས་སྐྱ་པཎྜི་ཏ་ལ་མི་ཕྱེད་པའི་དད་མོས་ཡོད་ཟེར་བའི་སྙན་གྲགས་ཐོས་པས་དགའ་སྤྲོ་ཤིན་ཏུ་འཕེལ། འགྲོ་བ་མཐར་ཐུག་གི་བདེ་སྐྱིད་སངས་རྒྱས་ཀྱི་བསྟན་པ་ལ་རག་ལས་ཤིང་། གནས་སྐབས་ཀྱི་བདེ་སྐྱིད། སྡེ་ཆོས་ལྡན་དུ་སྐྱོང་བའི་རྒྱལ་པོ་དང་། སྡེ་དཔོན་ལ་རག་ལས་པ་ལགས་པས། བསྟན་པ་རིན་པོ་ཆེའི་བདག་རྐྱེན་བཤད་སྒྲུབ་ཀྱི་སྡེ་དང་། དགེ་བའི་བཤེས་གཉེན་གྱི་ཞབས་ཏོག བསྐྱང་རན་ཚུལ་བཞིན་དུ་བསྒྲུབ་པ་དང་། ཆབ་སྲིད་ཆོས་ལྡན་དུ་སྐྱོང་བའི་འཕྲིན་ལས་སྔར་ལུགས་བཞིན་དུ་མཛད་དུ་གསོལ། ཞུ་ཡིག་གཟིགས་པའི་རྟེན། སྐུ་ཁམས་བཟང་ཞིང་སྐུ་ཚེ་བརྟན་པ་དང་། ཚེ་རབས་ཐམས་ཅད་དུ་ཆོས་ལྡན་གྱི་རིགས་སུ་འཁྲུངས་ནས་བསྟན་པ་དང་སེམས་ཅན་ལ་ཕན་ཐོགས་པའི་སྨོན་ལམ་འདེབས་པ་ལགས། རྟ་ལོ་ཟླ་བ་བཅུ་གཉིས་པའི་ཚེས་བཅོ་ལྔ་ལ་གངས་བུ་ལེ་དཀར་པོའི་གཡས་མགུལ། གཡུ་ལུང་རྡོ་རྗེ་རྫོང་གི་དབེན་གནས་ནས་ཕུལ་བ་དགེ་ལེགས་སུ་གྱུར་ཅིག། ། །