ཞང་ཀུན་སྤངས་དགེ་སྦྱོང་བ་ལ་དོན་ཐོབ་ཀྱིས་གདམས་པ།
ཞང་ཀུན་སྤངས་དགེ་སྦྱོང་བ་ལ་དོན་ཐོབ་ཀྱིས་གདམས་པ།
ཀུན་སྤངས་པའི་སྙན་དུ་ཞུ་བ། སྐུ་ཁམས་བཟང་བའི་ཐད་ནས། གསུང་ཡིག་རྟེན་བཅས་ཡིག་ནང་བཞིན་འཕྲོད་པས་སེམས་སྤྲོ། འདིར་ཡང་ད་ལྟ་མཚམས་པར་ཁམས་དྭངས་པར་བདོག སྐབས་ཞུས་དེང་སང་བོད་ཀྱི་སྒྲུབ་རྒྱུད་པ་ཕལ་ཆེ་བའི་ཆོས་སྐད། སེམས་ལ་ལས་མི་འཆོལ་བར་མི་རྟོག་པར་འཇོག་པ་ཞི་ལྷག་གི་ཉམས་ལེན་དང་། བོགས་འདོན་དུ་བྱེད་པར་གདའ། དེ་ནི་སྔོན་གྱི་རྒྱ་ནག་གི་མཁན་པོ་ཧྭ་ཤང་མཧཱ་ཙི་ནའི་ལུགས་དང་མཐུན་པར་སྣང་ཞིང་། །ཧྭ་ཤང་གི་ལུགས་དེ་སྒྲིབ་གཉིས་ཀྱི་གཉེན་པོ་རྣམ་པར་མི་རྟོག་པའི་ཡེ་ཤེས་ཀྱི་རྒྱུ། དངོས་པོའི་དེ་ཁོ་ན་ཉིད་ལ་རྣམ་པར་དཔྱོད་པའི་སོ་སོར་རྟོག་པའི་ཤེས་རབ་སྤངས་པས་ཉམས་ལེན་གོལ་བར་གཟིགས་ནས་རྒྱལ་པོས། ཀ་མ་ལ་ཤི་ལ་གདན་དྲངས་ནས་ཧྭ་ཤང་གི་ལུགས་དེ་སུན་ཕྱུངས། ཞི་ལྷག་ཉམས་ལེན་གྱི་ཚུལ་ཕྱིན་ཅི་མ་ལོག་པར་སྟོན་པའི་སྒོམ་རིམ་རྣམ་པ་གསུམ་མཛད། །བསྟན་པ་སྔ་དར་གྱི་དུས་སུ་དེའི་ཉམས་ལེན་ཕྱིན་ཅི་མ་ལོག་པ་ཡོད་པར་གདའ་ནའང་། དུས་ཕྱིས་དེའི་ཉམས་ལེན་རྒྱུན་ཆད། ཕྱི་དར་གྱི་སྒྲུབ་རྒྱུད་པ་རྣམས་སྒོམ་གྱི་ཞི་ལྷག་གི་ངོས་འཛིན་རྣམ་རྟོག་སྒོམ་དུ་གོ་ནས་དེ་ལ་མི་མོས། རང་གི་བླ་མ་བརྒྱུད་པའི་མན་ངག་ཏུ་བསྒོམས་ནས། རྟོག་པ་ཁ་ཚོམས་ཀྱི་མི་སྒོམ་པ་ལ་གཙོ་བོར་བྱེད་པར་གདའ། བླ་མ་བཀའ་བཞི་པའི་ལམ་རིམ་དེ་སྒོམ་རིམ་ལ་སོགས་པ་ཤིང་རྟ་ཆེན་པོ་རྣམས་ཀྱི་བསྟན་བཅོས་ཚད་མར་བྱས་ནས་རྒྱས་པར་མཛད་གདའ་ཞིང་། དེ་ལས་དང་པོ་པ་རྣམས་ཀྱི་གོ་དཀའ་བར་གདའ་ན་ཡང་། ངེད་ཀྱིས་ལས་དང་པོ་པ་རྣམས་ཀྱིས་ཞི་ལྷག་ཉམས་སུ་ལེན་ཚུལ་མདོར་བསྡུས་པ་གོ་བདེ་བ་ཅིག་བྱས་བདོག་པས། འདི་ལ་གཟིགས་ནས་མ་བདེ་བ་གདའ་ན་ཡི་གེར་བཀོད་ནས་འདིར་ཐོང་མཛོད། ཡི་གེ་གཟིགས་པའི་རྟེན་མཚོན་བར་ཇ་དཀར་ཐུམ་བུ་ཅིག་ལ་ཐེ་ཙེ་སྦྱར་བ་འབུལ། འབྲུག་ལོ་ཟླ་བ་ལྔ་པའི་ཚེས་བཅུ་ལ་ཕུལ་བ་དགེ།། །།