འདི་ཡང་བླ་མ་སྒྲུབ་པ་དཔལ་གྱི་ཞུས་ལན།
འདི་ཡང་བླ་མ་སྒྲུབ་པ་དཔལ་གྱི་ཞུས་ལན། ཁྱེད་ཀྱི་ཡི་གེ་རྟེན་བཅས་འདིར་འཕྲོད་ལགས། སྤྱིར་ངེད་ཀྱིས་གསུང་རབ་ལ་ཐོས་བསམ་བྱས་པའི་གོ་ཡུལ་ཙམ་མ་གཏོགས། བསྒོམས་པའི་ཉམས་མྱོང་ནི་ཅི་ཡང་མེད། ཁྱེད་རང་གིས་ཉམས་ལེན་དགའ་མོ་མཛད་གདའ་བ་དང་། གོ་ཡུལ་གྱི་དྲི་བ་ཡི་གེར་བཀོད་པ་རྣམས་ཀྱང་ཕྱིན་ཅི་མ་ལོག་པ་གདའ་བས་རྗེས་སུ་ཡིད་རང་། དྲི་བ་ཕྱི་མ་འདི་རྣམས་ལ་རང་རེས་ལན་བྱེད་པ་མ་འཕྲོད། ངེད་ཟླ་བ་ལྔ་པ་ཤར་ཤར་ཙམ་འདི་རུ་མཚམས་དམ་པར་སྡོད་རྩིས་སུ་བདོག དེ་བར་རང་རེའི་རྫོང་སུ་བཞུགས་ནས། ངེད་མཚམས་གསེངས་རྟིང་མཇལ་ནས་གསུང་གླེང་ཞིབ་ཏུ་བགྱིད་པར་ཞུ་གསུང་། དེ་ནས་ཁོང་པ་སྐུ་མཚམས་མ་གྲོལ་བར་བདག་ནེ་རིངས་སུ་འགྲོ་དགོས་པར་བྱུང་ནས། སྔར་གྱི་ལན་ཞུས་པས། ད་རེས་གདམས་པ་འདི་ཁྱེར་ལ་བཞུད། རྗེས་ནས་ཐེངས་ངེས་པ་ཅིག་ལ་ལན་བྲིས་ནས་བསྐུར་བ་ཡིན་གསུང་། དེའི་གདམས་པ་ནི། ཐེགས་པ་ཆེན་པོའི་གཞི་ལམ་འབྲས་གསུམ་གསལ་བར་བྱེད་པ་ཕྱག་རྒྱ་ཆེན་པོ་རྡོ་རྗེའི་གླུ་ཞེས་པ་དེ་ཡིན། དྲི་བ་ཕྱི་མ་ཞི་ལྷག་གི་རྒྱུ་འབྲས་བྱེད་ལས་སོགས་ཀྱི་ལན་ནི། ཐེག་པ་ཆེན་པོ་དབུ་མ་ལུགས་ཀྱི་གཞི་ལམ་འབྲས་བུ་གསུམ་གྱི་གནད་མདོར་བསྡུས་པ་ཞེས་པ་དེ་ཡིན་ནོ།། །།དགེའོ། །