བླ་མ་སྒྲུབ་པ་དཔལ་བའི་ཞུས་ལན་མི་ཤིགས་པའི་ཐིག་ལེའི་ངོས་འཛིན་དོན་གསུམ་གྱིས་བསྟན་པ།

བླ་མ་སྒྲུབ་པ་དཔལ་བའི་ཞུས་ལན་མི་ཤིགས་པའི་ཐིག་ལེའི་ངོས་འཛིན་དོན་གསུམ་གྱིས་བསྟན་པ་བཞུགས་སོ། །མི་ཤིགས་པའི་ཐིག་ལེ་ནི་མིང་གི་རྣམ་གྲངས་དང་། སྒྲའི་དོན་དང་། མཚན་གཞི་ངོས་གཟུང་བ་དང་། མཚན་ཉིད་གཏན་ལ་དབབ་པ་རྣམས་ཀྱིས་ཤེས་པར་བྱའོ། དང་པོ་ནི་མི་ཤིགས་པའི་ཐིག་ལེ་དང་། གྲོལ་བའི་ཐིག་ལེ་དང་། ལྷན་ཅིག་སྐྱེས་པའི་ཡེ་ཤེས་དང་། ཟབ་གསལ་གཉིས་མེད་དང་། ཆོས་ཀྱི་དབྱིངས་དང་། མཁའ་ཁྱབ་ནམ་མཁའི་རྡོ་རྗེ་ལ་སོགས་པའོ། །སྒྲའི་དོན་ནི། ཅིའི་ཕྱིར་མི་ཤིགས་པའི་ཐིག་ལེ་ཞེས་བྱ་ཞེ་ན། འདིས་དངོས་པོ་རྣམས་འཇོམས་ཤིང་། དེ་གང་གིས་ཀྱང་གཞོམ་དུ་མེད་པའི་ཕྱིར་དང་། ཐིག་ལེའི་གཟུགས་ཅན་ཡིན་པའི་ཕྱིར། མི་ཤིགས་པའི་ཐིག་ལེ་ཞེས་བྱའོ། །འདི་རྟོགས་པ་ན་ཀུན་རྫོབ་ཀྱི་དངོས་པོ་རྣམས་མི་སྣང་བའི་ཕྱིར། འདིས་དངོས་པོ་འཇོམས་པ་ཡིན་ལ། འཇིག་པའི་དུས་སུ་མེ་ལ་སོགས་པ་འདི་གཞིག་པར་མི་ནུས་པའི་ཕྱིར་གང་གིས་ཀྱང་གཞོམ་དུ་མེད་པའོ། །ཅིའི་ཕྱིར་གྲོལ་བའི་ཐིག་ལེ་ཞེས་བྱ་ཞེ་ན། འདི་རྟོགས་པས་ཉོན་མོངས་པ་དང་ཤེས་བྱའི་སྒྲིབ་པ་རྣམས་ལས་གྲོལ་བའི་ཕྱིར་རོ། །ཅིའི་ཕྱིར་ལྷན་ཅིག་སྐྱེས་པའི་ཡེ་ཤེས་ཞེས་བྱ་ཞེ་ན། གདོད་མ་ནས་ལུས་ཅན་རྣམས་ལ་རང་ཆས་སུ་གྲུབ་པའི་ཡེ་ཤེས་ཡིན་པའི་ཕྱིར་རོ། །ཅིའི་ཕྱིར་ཟབ་གསལ་གཉིས་སུ་མེད་པ་ཞེས་བྱ་ཞེ་ན། ཟབ་མོ་བཏགས་པ་ཐམས་ཅད་དང་བྲལ་བའི་སྟོང་པ་ཉིད་དང་། གཞིའི་དུས་སུ་གསལ་བ་སྣང་ལ་རང་བཞིན་མེད་པའི་སྒྱུ་མ་ལྟ་བུ་དང་། འབྲས་བུའི་དུས་སུ་ཕྱག་རྒྱ་ཆེན་པོའི་སྐུ་འཇའ་ཚོན་ལྟ་བུ་དང་དབྱེར་མེད་པའི་ཕྱིར་རོ། །ཅིའི་ཕྱིར་ཆོས་ཀྱི་དབྱིངས་ཞེས་བྱ་ཞེ་ན། དེ་ཉིད་དག་པ་དང་མ་དག་པའི་གནས་སྐབས་ཀྱི་བྱེ་བྲག་གིས་འཁོར་བ་དང་མྱ་ངན་ལས་འདས་པ་ཐམས་ཅད་ཀྱི་གཞིར་གྱུར་པའི་ཕྱིར་རོ། །ཅིའི་ཕྱིར་མཁའ་ཁྱབ་ནམ་མཁའ་རྡོ་རྗེ་ཞེས་བྱ་ཞེ་ན། ཁམས་གསུམ་རྒྱུ་བ་དང་མི་རྒྱུ་བ་ཐམས་ཅད་དེའི་རྣམ་འགྱུར་ཡིན་པའི་ཕྱིར་དང་། དེའི་རང་བཞིན་གཉེན་པོ་གང་གིས་ཀྱང་གཞོམ་དུ་མི་ནུས་པའི་ཕྱིར་རོ། །གཞན་ཡང་དཔལ་མཆོག་དང་པོ་ལས། །ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཞེས་དང་། བརྟག་གཉིས་ལས། ལུས་ལ་ཡེ་ཤེས་ཆེན་པོ་གནས། །རྟོག་པ་ཐམས་ཅད་རྣམ་པར་སྤངས། །ཅེས་དང་། སཾ་བུ་ཊི་ལས། ཇི་སྲིད་ལུས་ལ་རྣམ་གནས་པ། །དེ་སྲིད་ལས་དང་ལས་མིན་བྱེད། །གང་ཚེ་ལས་ཀྱི་ལུས་བཅོམ་པ། །དེ་ཚེ་ལྷ་རུ་གྱུར་པ་ཡིན། །ཅེས་དང་། ཆོས་དབྱིངས་བསྟོད་པ་ལས། གང་ཞིག་ཀུན་ཏུ་མ་ཤེས་ན། །སྲིད་པ་གསུམ་དུ་རྣམ་འཁོར་ཞིང་། །སེམས་ཅན་ཀུན་ལ་ངེས་གནས་པའི། །ཆོས་ཀྱི་དབྱིངས་ལ་ཕྱག་འཚལ་ལོ། །གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱངས་པ་བྱས་པ་ལས། །དག་པ་དེ་ཉིད་མྱ་ངན་འདས། །ཆོས་ཀྱི་སྐུ་ཡང་དེ་ཉིད་དོ། །ཅེས་སོགས་མདོ་དང་རྒྱུད་སྡེ་དུ་མ་ཞིག་ནས་མིང་གི་རྣམ་གྲངས་དུ་མ་ཞིག་གིས་བསྟན་ཏེ། མཚན་གཞི་ངོས་གཟུང་བ་ནི། ལུས་ལེན་པའི་རྣམ་པར་ཤེས་པ་སྟེ། དེའང་། ཀུན་གཞི་ལྟར་ན། ཀུན་གཞིའི་རྣམ་སྨིན་གྱི་ཆ་དང་། ཁས་མི་ལེན་ན་ཡིད་ཀྱི་རྣམ་པར་ཤེས་པའི་རང་བཞིན་ནོ། །མཚན་ཉིད་གཏན་ལ་དབབ་པ་ལ། རྟེན་གང་ལ་གནས་པ་དང་། ངོ་བོ་ཇི་ལྟ་བུ་ཡིན་པ་དང་། ཉམས་སུ་ལེན་ཚུལ་རྣམས་ཀྱིས་ཤེས་པར་བྱའོ། །

རྟེན་གང་ལ་གནས་པ་ནི། ལུས་ཅན་རྣམས་ཀྱི་སྙིང་ཁའི་པདྨ་ཁ་སྦྱར་གྱི་དབུས་ན་གནས་ཏེ། ཞལ་ལུང་གི་འགྲེལ་པར། ཇི་སྲིད་འདི་ནི་ལུས་གནས་པ། །ཞེས་པ་ནི། ནང་བཅུད་ཀྱི་སེམས་ཅན་རྣམས་ཀྱི་སྙིང་ཁའི་པདྨ་ཁ་སྦྱར་གྱི་དབུས་ན་ཐིག་ལེ་གནས་པའོ། །ཞེས་དང་། དུས་འཁོར་ལས། མཁའ་ཁྱབ་ནམ་མཁའི་རྡོ་རྗེ་ཅན་ནི་ཡུལ་དང་རྣམ་པ་བྲལ་བ་ལུས་ཅན་ཀུན་གྱི་སྙིང་གི་དབུས་ནའོ། །ཞེས་བཤད་ཅིང་། དེ་དག་དང་མཐུན་པར་འཕགས་པ་ཐོགས་མེད་ཀྱིས་ཕ་མའི་ཁུ་ཁྲག་འདྲེས་པའི་ནུར་ནུར་པོའི་ཕྱོགས་གང་དུ་བར་དོའི་ལུས་ལེན་པའི་རྣམ་པར་ཤེས་པ་ཞུགས་པ་དེར་ལུས་ཀྱི་ཐོག་མ་སྙིང་ཁར་ཆགས་ཤིང་། འཆི་འཕོ་བ་ན་ཡང་སྙིང་ཁ་ནས་ཡིད་འཆི་འཕོ་བར་བཤད་དོ། །དེ་བས་ན། མི་ཤིགས་པའི་ཐིག་ལེའི་མཚན་གཞིའི་ངོ་བོ་ལུས་ལེན་པའི་རྣམ་པར་ཤེས་པ་ཡིན་ལ། དེ་ཉིད་རབ་ཏུ་གྲགས་པའི་སྙིང་ཁའི་པདྨ་ཁ་སྦྱར་གྱི་ནང་། ཆོས་ཀྱི་འཁོར་ལོ་འདབ་བརྒྱད་པའི་ལྟེ་བའི་རྩ་དབུ་མའི་ནང་ནས། ཀུན་རྫོབ་ཀྱི་གཟུགས་ཡུངས་དཀར་སྦོམ་པོའི་ཚད་ཙམ། དབྱིབས་ཧཱུྃ་ཡིག་འཁྱོག་པོའི་རྣམ་པ་ལྟ་བུར་གནས་ལ། དེ་ལྟེ་བའི་གཏུམ་མོའི་མེས་བཞུས་བ་ན་ལུས་ཅན་རྣམས་ཀྱི་སྙིང་དགའ་བར་བྱེད་པས་དཔྱིད་ཅེས་བྱ་སྟེ། དེ་སྐད་དུ་ཡང་སམ་བུ་ཊི་ལས། སྙིང་གི་དབུས་ན་པདྨ་ནི། འདབ་མ་བརྒྱད་པ་ཟེ་འབྲུ་ཅན། །དེ་ཡི་དབུས་ན་གནས་པའི་རྩ། །ཆུ་ཤིང་གི་ནི་མེ་ཏོག་ལྟར། །ཁ་ནི་འོག་ཏུ་འཕྱང་བཞིན་པ། །དེའི་དབུས་ན་དཔའ་བོ་ནི། །ཡུངས་དཀར་གྱི་ནི་འབྲུ་ཚད་ཙམ། །མི་ཤིགས་ཧཱུྃ་གི་ས་བོན་ཏེ། །བ་མོ་ཁ་བ་ལྟར་འཛག་པ། །ལུས་ཅན་རྣམས་ཀྱི་སྙིང་དགའ་བྱེད། །དེ་ནི་དཔྱིད་ཅེས་བྱ་བར་བརྗོད། །ཅེས་གསུངས་སོ། །དེ་བས་ན་མི་ཤིགས་པའི་ཐིག་ལེའི་མིང་ཅན་གྱི་ལུས་ལེན་པའི་རྣམ་ཤེས་ཀྱི་ངོ་བོ། །རབ་ཏུ་གྲགས་པའི་སྙིང་ཁའི་དབུས་ཀྱི་འཁོར་ལོའི་དབུས། རྩ་དབུ་མའི་དབུས་ན་ཡོད་པར་བསྙོན་མི་ནུས་པར་གྲུབ་ལ། དེའི་ཕྱིར་ཕྱག་ཐིག་གི་རྗེས་སུ་འབྲངས་ནས། རྩ་དབུ་མ་སྒལ་ཚིགས་ཀྱི་མདུན། སྲོག་རྩ་དང་གཞིབས་ནས་ཡོད་པ་སོགས། རྩ་འཁོར་གྱི་རྣམ་གཞག་ཕལ་ཆེ་བ་ལ་གནོད་ཅིང་། ཕྱག་ཐིག་ཀྱང་། ཨ་ཙ་ར་དམར་པོས་བྱས་པའི་ཡང་དག་པ་མ་ཡིན་ཞེས་ཞི་བ་འོད་ཀྱི་སྔགས་ལོག་སུན་འབྱིན་ན་སྣང་། འདི་ཡང་དག་ཡིན་མིན་ཕྱིས་དཔྱད་པར་བྱའོ། །ངོ་བོ་ཇི་ལྟ་བུ་ཡིན་པ་ནི། ཀུན་རྫོབ་ཀྱི་ངོ་བོ་ནི་ཐིག་ལེ་འོད་ཟེར་ལྔ་པ་ཙ་ན་ཀའི་འབྲས་བུ་ཙམ་མམ། ཡུངས་དཀར་གྱི་གཟུགས་ཙམ་དུ་གནས་ལ། དོན་དམ་པའི་ངོ་བོ་ནི། ཟབ་གསལ་གཉིས་སུ་མེད་པའི་ཡེ་ཤེས་ནམ་མཁའ་ལྟར་དག་པའི་ཡེ་ཤེས་ཀྱི་ངོ་བོར་གནས་པའོ། །

དེ་ལྟར་ཞལ་ལུང་འགྲེལ་བ་ལས། གཉིས་སུ་མེད་པའི་ཡེ་ཤེས་ཞེས་པ་ནི། ཟབ་མོ་དང་གསལ་བ་གཉིས་སུ་མེད་པའི་ཡེ་ཤེས་ནམ་མཁའ་དག་པ་གང་ཡིན་པའོ། །དེ་ཀུན་རྫོབ་ཀྱི་གཟུགས་སུ་ཇི་ལྟར་གནས་ཞེ་ན། ཐིག་ལེ་ཁ་དོག་ལྔ་པ་ཙ་ན་ཀའི་འབྲུ་ཚད་ཙམ་དུ་རྣམ་པར་གནས་ཏེ་ཞེས་དང་། གྲོལ་བའི་ཐིག་ལེའི་འགྲེལ་པར། མི་ཤིགས་པའི་ཐིག་ལེའི་ནང་དུ་གཟུགས་ཞེས་པ་ནི། སྙིང་ཁ་སྦྱོར་ཙ་ན་ཀའི་གཟུགས་སམ་ཡུངས་དཀར་གྱི་གཟུགས་ཙམ་དུ་གནས་ཏེ་ཞེས་གསུངས་སོ། །ཐིག་ལེའི་གཟུགས་ཅན་དེ་ཉིད་དབྱིབས་ཇི་ལྟར་གནས་ཞེ་ན། རྡོ་རྗེ་དཀྱིལ་འཁོར་རྒྱན་ལས། སྙིང་གི་དབུས་ན་མི་ཤིགས་པ། །གསལ་ཤིང་མར་མེ་དག་དང་མཚུངས། །མི་འབྱུང་མཆོག་ཏུ་ཕྲ་བ་སྟེ། །ཨ་ནི་གཙོ་བོ་དམ་པའོ། །ཞེས་ཨ་ཡིག་ཨ་ཐུང་གི་རྣམ་པ་ལྟ་བུ་སྟེ། དེ་ཡང་ཤེལ་འཕྲེང་ཨ་ཐུང་ཐག་བརྒྱུས་པ་ལྟ་བུར་ཤེས་པར་བྱའོ། །ཤེས་པ་ཉིད་ཐིག་ལེའི་གནས་སུ་ཇི་ལྟར་འགྱུར་ཞེ་ན། ཤེས་པ་ཉིད་གཟུགས་ཅན་གྱི་རྣམ་པར་གྱུར་པ་ཉིད་ལ་གཟུགས་ཅན་གྱི་ཐ་སྙད་འདོགས་ཀྱི་ཤེས་པ་ལས་མ་གཏོགས་པའི་གཟུགས་མེད་དོ། །

ཐ་སྙད་དུ་དོན་ཁས་ལེན་པ་ལྟར་ན། ཤེས་པའི་རྣམ་པ་ལས་ཐ་སྙད་དུ་དོན་ཡོད་པར་དཔོག་པ་ཡིན་ཏེ། རིགས་པ་དྲུག་བཅུ་པར། འབྱུང་བ་ཆེ་ལས་སོགས་བཤད་པ། རྣམ་པར་ཤེས་སུ་ཡང་དག་འདུ། །དེ་ཤེས་པས་ནི་འབྲལ་འགྱུར་ན། །ལོག་པར་རྣམ་བཏགས་མ་ཡིན་ནམ། །ཞེས་བཤད་པ་ལྟར་རོ། །དུས་འཁོར་འགྲེལ་པར། འདིར་སེམས་ཅན་ཐམས་ཅད་ཀྱི་སྙིང་ཁའི་ནང་ན་གནས་པ་ནི་ཡེ་ཤེས་སོ། །དེ་ཡང་གཞོམ་དུ་མེད་པའི་སྒྲ་སྟེ། རྟག་ཏུ་ནཱ་དའི་མཚན་ཉིད་དོ། །ཅེས་པའི་གཞོམ་དུ་མེད་པའི་སྒྲ་ནི་རླུང་སྟེ། དེའི་དབྱིབས་ནི་ནཱ་དའི་མཚན་ཉིད་ཅེས་པ་དབྱིབས་སྟོན་པ། ཡིག་གེ་ནཱ་ད་དང་ཨ་ཤད་དང་ཨ་ཐུང་ངུ་རྣམས་དོན་ཅིག་པས། སྙིང་དབུས་ན་ལྷན་གཅིག་སྐྱེས་པའི་རླུང་ཨ་ཤད་ཀྱི་རྣམ་པ་ལྟ་བུ་བསྟན་པ་ཡིན་ལ། དེ་ཐིག་ལེར་ཇི་ལྟར་འབྱུང་ཞེ་ན། དེ་ཉིད་གཏུམ་མོའམ་འདོད་ཆགས་ཀྱི་མེས་བཞུ་བ་ན་ཐིག་ལེར་འགྱུར་བ་ཡིན་ཏེ། སྤྱོད་བསྡུས་སུ་རླུང་གི་ལས་སྟོན་པ་ན་ཐབས་ཤེས་ཀྱི་རྩ་སྦུབས་ན་ཡོད་པའི་རླུང་རྣམས་འདོད་ཆགས་ཀྱི་མེས་ཐིག་ལེར་བཞུ་བ་ན། རྡོ་རྗེ་དང་པདྨར་འབབ་པར་བཤད་པས་སོ། །

དེ་བས་ན་ཐོག་མར་རྣམ་ཤེས་མངལ་དུ་ཞུགས་པ་ན། རྣམ་ཤེས་རླུང་དང་དབྱེར་མེད་དུ་འདྲེས་ནས་འཇུག་པས། རླུང་ཨ་ཤད་ཀྱི་རྣམ་པ་ལྟ་བུ་དང་། ཕྱིས་འདོད་ཆགས་ཀྱི་མེས་བཞུ་བ་ན། ཐིག་ལེ་ཨ་ཤད་ལྟ་བུར་འགྱུར་བས་རེས་འགའ་ཐིག་ལེ་དང་། རེས་འགའ་རླུང་དུ་བསྟན་པ་ཡིན་ནོ། །འཕགས་ལུགས་པའི་སེམས་དབེན་གྱི་མཚན་གཞིའི་ངོ་བོ་ཡང་། མི་ཤིགས་པའི་ཐིག་ལེ་ཉིད་ཡིན་ཏེ། སྤྱོད་བསྡུས་སུ། འཇམ་དཔལ་གྱི་ཏིང་ངེ་འཛིན་སྟོན་པ་ན། སེམས་ཅན་རྣམས་ཀྱི་ལུས་ཀྱི་ནང་ན་གནས་པའི་སེམས་གསུམ་གྱི་བདག་ཉིད་ཀྱི་ཡིད་དུ་བཤད་ཅིང་། དེ་ཡང་ལུས་ཅན་ཀུན་གྱི་སྙིང་གི་དབུས་ན་གནས་པའི་མི་ཤིགས་པའི་མིང་ཅན་གྱི་ཐིག་ལེ་རྣམ་པར་ཤེས་པ་དེ་ཉིད་གནས་སྐབས་ཀྱི་བྱེ་བྲག་གིས་སེམས་གསུམ་དུ་འགྱུར་བ་ཡིན་ཏེ། མ་དག་པའི་གནས་སྐབས་སུ་རང་བཞིན་གྱི་རྣམ་པར་རྟོག་པ་དང་། གསེར་དང་རང་བཞིན་དུ་དབྱེར་མེད་དུ་འདྲེས་པས་སོ་སོར་མི་བྱེད་ཅིང་། རང་བཞིན་རྣམ་རྟོག་འདོད་ཆགས་ལས་གྱུར་པ་གསལ་བ་ཙམ་དང་། ཞེ་སྡང་ལས་གྱུར་པ་ཤིན་ཏུ་གསལ་བ་དང་། གཏི་མུག་ལས་གྱུར་པ་མི་གསལ་བའི་བཏགས་ཀྱི་བྱེ་བྲག་གིས་དེ་དག་གི་རང་བཞིན་རྟོག་མེད་ཀྱི་སྣང་བ་གསལ་བ་དང་། ཆེས་གསལ་བ་དང་། མི་གསལ་བ་གསུམ་ཡོད་པ་རྗེས་སུ་དཔོག་པ། དེ་དག་མངོན་དུ་འགྱུར་བའི་ཐབས་ནི། རྣལ་འབྱོར་པས་བསྐྱེད་རིམས་མཐར་ཕྱིན་ཏེ། ངག་དབེན་གྱིས་རླུང་སྦྱངས་ཏེ། རླུང་ལ་རྣམ་པར་རྒྱལ་བ་ཐོབ་པ་ན་ཕྱག་རྒྱ་མཚན་ཉིད་དང་ལྡན་པ་བསྟེན་ནས། བླ་མའི་མན་ངག་ལྟར་ཉམས་སུ་བླངས་པས་སེམས་གསུམ་ཅི་རིགས་པར་མངོན་དུ་གྱུར་ཏེ། རིམ་ལྔ་ལས། སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཡེ་ཤེས་གསུམ་གྱི་དབྱེ་བ་ནི། །འདི་ཉིད་ཀྱིས་ནི་མཚོན་པར་འགྱུར། །ཞེས་བཤད་ཅིང་། དེ་ཡང་སེམས་དབེན་གྱིས་སེམས་ཅན་རྣམས་ཀྱི་སྙིང་ཁའི་པདྨ་ཁ་སྦྱར་གྱི་དབུས་ན་ཐིག་ལེ་གནས་པའོ། །ཞེས་པ་དང་། དུས་འཁོར་ལས་ལས་ཀྱི་སྐབས་སུ་ཕྱག་རྒྱ་ལ་རྟེན་ནས་སེམས་གསུམ་པོ་ཀུན་རྫོབ་གྱི་རང་གི་ངོ་བོ་རང་བཞིན་བརྒྱད་ཅུའི་རྣམ་རྟོག་གི་དྲི་མ་དང་བྲལ་བའི་གསལ་རིག་ཙམ་མངོན་དུ་གྱུར་པ་ཡིན་གྱི། དོན་དམ་པའི་ངོ་བོར་སྟོང་པ་ཉིད་མངོན་དུ་གྱུར་པ་ནི་མིན་ནོ། །ཞེས་དང་། ཞལ་ལུང་ལས། གསལ་ཞིང་རབ་དགའ་མཁའ་འདྲ་བ། །གཞན་དུ་རིག་པར་མི་འགྱུར་བ། །བུད་མེད་སྒྱུ་མའི་ཕྱག་རྒྱ་ནི། །སྒྱུ་མ་ཀུན་ལས་ཁྱད་པར་འཕགས། །ཅེས་ན། ཕྱག་རྒྱ་ལ་རྟེན་ནས་ཟབ་གསལ་གཉིས་མེད་ཉམས་སུ་ལེན་པར་བཤད་ཀྱང་། སེམས་དབེན་གྱི་གནས་སྐབས་དང་མངོན་དུ་འགྱུར་ཚུལ་མི་འདྲ་སྟེ། སེམས་དབེན་གྱི་གནས་སྐབས་སུ་སེམས་ཀྱི་ཀུན་རྫོབ་ཀྱི་རང་གི་ངོ་བོ་ཙམ་མཐོང་བ་ཡིན་ལ། འདིའི་གནས་སྐབས་སུ་རྣལ་འབྱོར་པས་ཕྱག་རྒྱ་ལ་རྟེན་ནས་འོད་གསལ་མངོན་དུ་བྱས་པས་ཟབ་མོ་སྟོང་པ་ཉིད་དང་། གསལ་བ་ཕྱག་རྒྱ་ཆེན་པོའི་སྐུ་འཇའ་ཚོན་ལྟ་བུ་སྣང་ཙམ་ན་རང་བཞིན་མེད་པ་གཉིས་དབྱེར་མི་ཕྱེད་པའི་ཟུང་འཇུག་དམིགས་མེད་ཀྱི་ཡེ་ཤེས་མངོན་སུམ་དུ་གྱུར་པ་ཡིན་ནོ། །ཟབ་གསལ་གཉིས་མེད་ཀྱི་དོན་ཡང་ཡིན་ཏེ། གྲོལ་བའི་ཐིག་ལེ་ལས། རྣམ་པར་རྟོག་པ་ཀུན་བྲལ་བས། །བསམ་བརྗོད་ཡུལ་ལས་ཤིན་ཏུ་འདས། །མཁའ་བཞིན་དྲི་མེད་ཀུན་འབྱུང་བ། །བརྟགས་བྲལ་ཟབ་མོ་ཉིད་ཅེས་བྱ། །ཕྱག་རྒྱ་ཆེན་པོའི་གཟུགས་འཆང་བ། །སྒྱུ་མ་འཇའ་ཚོན་ལྟ་བུ་རུ། །རང་དང་གཞན་གྱི་རྒྱུད་སྦྱོར་བས། །ཡང་དག་གསལ་བ་ཞེས་བྱའོ། །ཅེས་བཤད་དོ། །དོན་དམ་སྣང་མེད་རྟོགས་པ་འོད་གསལ་མིན་ནམ་ཟབ་གསལ་གཉིས་མེད་རྟོགས་པ་ནི་སྣང་མེད་མ་ཡིན་ནོ། །

ཞེ་ན། དོན་དམ་རྟོགས་པ་འོད་གསལ་དུ་འདོད་པ་ཐམས་ཅད་ཡང་། དོན་དམ་བདེན་པའི་བཞེད་ཚུལ་ལ་ཀླུ་སྒྲུབ་ཀྱི་རྗེས་སུ་འབྲང་བའི་དབུ་མ་པ་དག་མི་མཐུན་ཏེ། དབུ་མ་སྒྱུ་མ་ལྟ་བུ་དང་། རབ་ཏུ་མི་གནས་པ་གཉིས་ཡོད་པར་རྒྱ་བོད་ཀྱི་མཁས་པ་དག་ལ་གྲགས་ཤིང་། ཀླུ་སྒྲུབ་ཀྱི་རྗེས་སུ་འབྲང་བའི་གཞུང་རྣམས་ཀྱི་དོན་ཡང་དེ་བཞིན་དུ་གནས་མོད། འོན་ཀྱང་རྔོག་ལོའི་སྤྲིང་ཡིག་བདུད་རྩིའི་ཐིགས་པར། དབུ་མ་གཉིས་སུ་འདོད་པ་རྨོངས་པ་མཚར་སྐྱེད་མིན། །ཞེས་དགག་པ་མཛད་པ་ནི། ཁོང་རང་གིས་དབུ་མའི་ཤིང་རྟ་ཆེན་པོ་རྣམས་ཀྱི་དགོངས་པ་སོ་སོར་མ་ཕྱེད་པའི་སྐྱོན་ཡིན་ཏེ། དོན་ལ་དབུ་མ་གཉིས་སུ་མེད་པ་མ་ཡིན་ལ། འཕགས་སེང་དང་ཞི་བ་འཚོ་དཔོན་སློབ་དང་། དེ་དག་དང་མཐུན་པའི་རྡོ་རྗེ་ཐེག་པའི་བླ་མ་ཡེ་ཤེས་ཞབས་ལ་སོགས་པ་མང་པོ་ཞིག་དབུ་མ་སྒྱུ་མ་ལྟ་བུར་བར་སྣང་ཞིང་། ཟླ་གྲགས་ལེགས་ལྡན་འབྱེད་དེ་དག་མཐུན་པའི་རྡོ་རྗེ་ཐེག་པའི་བླ་མ་དག་དབུ་མ་རབ་ཏུ་མི་གནས་པར་སྣང་བའོ། །དེའི་རྒྱུ་མཚན་འདིར་མི་སྤྲོ། སྐབས་སུ་བབ་པ་ཞལ་ལུང་ཡེ་ཤེས་ཞབས་ཀྱི་དགོངས་པ་ཟབ་གསལ་གཉིས་མེད་སྒྱུ་མ་ལྟ་བུ་ལ་མཐར་ཐུག་ཏུ་སྐྱེལ་བ་ཡིན་གྱི། རབ་ཏུ་མི་གནས་པའི་འདོད་པ་ལྟར་སྟོང་ཉིད་ཡན་གར་བ་མཐར་ཐུག་ཏུ་མི་བཞེད་དེ། གྲོལ་བའི་ཐིག་ལེ་ལས། དེས་ན་ཟབ་གསལ་བྱང་ཆུབ་ནི། གཉིས་མེད་རྟོགས་པས་དེ་གྲོལ་ལོ། །ཟབ་མོ་ཁོ་ན་རྟོགས་པས་མིན། །གསལ་བ་དག་ཀྱང་དེ་བཞིན་ནོ། །དེ་ཕྱིར་ཐལ་བྱུང་ཟབ་མོ་ཡིས། གྲོལ་འདོད་དེ་ལ་བདག་མི་དད། །དེ་བས་གཉིས་མེད་རང་བཞིན་དུ། །རྟོགས་པས་ཚེ་འདི་འབྲས་ཐོབ་ངེས། །ཅེས་བཤད་དོ། དེ་བས་ན་འཕགས་ལུགས་དང་། ཡེ་ཤེས་ཞབས་ལུགས་གཉིས་གྲུབ་མཐའི་དབང་གིས་འོད་གསལ་ངོས་འཛིན་ཚུལ་ནི་མི་ཅིག་ལ། ཟུང་འཇུག་གི་ངོས་འཛིན་ཚུལ་ནི་ཅིག་ཏེ། འཕགས་ལུགས་པའི་བདེན་གཉིས་ཟུང་དུ་འཇུག་པའི་རྣལ་འབྱོར་དང་། ཡེ་ཤེས་ཞབས་ལུགས་པའི་ཟབ་གསལ་གཉིས་མེད་ཀྱི་ཡེ་ཤེས་དོན་གཅིག་ཅིང་། གཉིས་ཀས་ཀྱང་དེ་དག་རྫོགས་རིམས་མཚན་ཉིད་པར་འདོད་པའི་ཕྱིར་རོ། །

བྱེད་ལས་ནི། མ་དག་པའི་གནས་སྐབས་ན་མི་ཤིགས་པའི་ཐིག་ལེ་ལས་རང་བཞིན་བརྒྱད་ཅུའི་རྣམ་པར་རྟོག་པ་དང་། དེ་ལ་རླུང་དང་མེ་ལ་སོགས་པ་ཕུང་པོ་ཁམས་དང་སྐྱེ་མཆེད་ཀྱིས་བསྡུས་པའི་ཁམས་གསུམ་རྒྱུ་བ་དང་མི་རྒྱུ་བ་ཐམས་ཅད་འདི་ལས་འབྱུང་སྟེ། ཞལ་ལུང་ལས། ད་ནི་གཉིས་མེད་ཡེ་ཤེས་ཉིད། ཀུན་རྫོབ་གཟུགས་ལ་རྟེན་ནས་ཀྱང་། །མི་གཡོ་ལ་སོགས་གཡོ་དང་བཅས། །ཐམས་ཅད་རབ་ཏུ་མི་སྣང་ཡང་། ཐིག་ལེ་འགོག་པར་མི་འགྱུར་སྟེ། །རྒྱུ་དང་མི་རྒྱུ་བཅས་པ་ཀུན། །སླར་ཡང་དེ་ལས་འབྱུང་བར་བྱེད། །ཅེས་གསུངས་སོ། །དག་པའི་གནས་སྐབས་སུ་སློབ་པ་དང་མི་སློབ་པའི་ཟུང་འཇུག་གཉིས་ཀྱིས་རང་གཞན་གྱི་རྒྱུད་སྨིན་པ་དང་གྲོལ་བར་བྱེད་པའི་འཕྲིན་ལས་ཐམས་ཅད་འདིའི་འཕྲིན་ལས་ཡིན་ནོ། །མི་ཤིགས་པའི་ཐིག་ལེ་ཉམས་སུ་ལེན་ཚུལ་ནི། སྤྱིར་བླ་མེད་ཀྱི་རྫོགས་རིམས་ཐམས་ཅད་འདི་མངོན་དུ་འགྱུར་བའི་ཐབས་སྟོན་པ་ཡིན་ལ། ཁྱད་པར་དུ་མི་ཤིགས་པའི་ཐིག་ལེ་དང་། གསང་བའི་ཐིག་ལེ་དང་། སྤྲུལ་བའི་ཐིག་ལེ་སྟེ། ཐིག་ལེ་གསུམ་གི་སྒོ་ནས་མྱུར་དུ་མངོན་དུ་འགྱུར་ཚུལ་ནི། ཞལ་ལུང་དང་གྲོལ་བའི་ཐིག་ལེ་ལས་ཤེས་པར་བྱའོ། །

ཞེས་གསུངས་པ་འདི་ནི། མི་ཤིགས་པའི་ཐིག་ལེ་འདི་ངེས་དོན་རྫོགས་རིམ་གྱི་གཞི་ཤིན་ཏུ་གལ་ཆེ་བ་གཅིག་ཡིན་ནའང་། གཞན་ཀྱི་ཤེས་དཀའ་གསུང་བ་ལ། མ་རྒྱུད་ཀྱི་མི་ཤིགས་པའི་ཐིག་ལེ་མདོར་བསྡུ་ན། མ་རྒྱུད་པས་རླུང་ཐམས་ཅད་ཀྱི་ཕྲ་ཤོས་སེམས་ཀྱི་རྟེན་ལྷན་སྐྱེས་ཀྱི་རླུང་དང་། ཕ་རྒྱུད་འཕགས་ལུགས་པས་ཡི་གེ་ཐམས་ཅད་ཀྱི་ཕྲ་ཤོས་ཨ་ཐུང་ངམ། དེས་མཚོན་པའི་དོན་སྐྱེ་མེད་ཀྱི་དོན་འོད་གསལ་ལམ་དང་། ཡེ་ཤེས་ཞབས་ལུགས་པས་རླུང་འོད་ཟེར་ལྔ་དང་དབྱེར་མེད་པའི་རྣམ་ཤེས་ཐམས་ཅད་ཀྱི་ཕྲ་ཤོས་མཚོན་བྱེད་ཀྱི་ཐིག་ལེ་ལས་བཤད་དེ། འདི་གསུམ་ངོ་བོ་གཅིག་ལ་ལྡོག་པ་ཐ་དད་ངོ་བོ་སོ་སོ་ཡིན་རྒྱས་པར་ཞུས་པས་མཁྱེན་རབ་ཀྱི་མངའ་དབང་ཕྱུག་ཐུགས་རྗེའི་བདག་ཉིད་རྗེ་བཙུན་དམ་པ་ཀུ་མ་ར་མ་ཏིས་ལེགས་པར་བཀའ་སྩལ་བ་འདིས་མ་རྒན་སེམས་ཅན་ཐམས་ཅད་སྒྲིབ་གཉིས་གཞིག་ཅིང་གཞོམ་པར་མི་ནུས་པའི་མི་ཤིགས་པའི་ཐིག་ལེ་དེ་ཁོ་ན་ཉིད་མངོན་དུ་བྱས་ནས་ཟབ་གསལ་གཉིས་མེད་ཀྱི་འཇའ་ལུས་ཕྱག་རྒྱ་ཆེན་པོ་ཐོབ་པར་གྱུར་ཅིག ། རིམ་ལྔའི་ཟིན་བྲིས་འདི་འཕགས་པའི་རིམ་ལྔ་དང་། མ་རྒྱུད་ཀྱི་རྩ་རླུང་གི་འདུ་འཕྲོད་ལས་བྱུང་བའི་ཉམས་དང་། རིམ་ལྔ་གུང་སྒྲིགས་པར་སྣང་། འཕགས་པ་ཡབ་སྲས་ཀྱི་གཞུང་གི་དངོས་བསྟན་དང་མཐུན་སྙམ་པ་མི་གདའ་ནའང་། ཁྱད་པར་མི་ཤིགས་པའི་ཐིག་ལེ་འདི་ངེས་དོན་རྫོགས་རིམ་གྱི་གཞི་ཤིན་ཏུ་གལ་ཆེ་བ་གཅིག་ཡིན་ནའང་། བུ་སྟོན་རིན་པོ་ཆེས་ཀྱང་ངོས་མ་ཟིན། འདིར་ཡང་སྲོག་རླུང་ལ་བཟུང་བས་འཁྲུལ། མི་ཤིགས་པའི་ཐིག་ལེ་ངོས་འཛིན་ཉམས་སུ་ལེན་ཚུལ་དང་བཅས་པ། འཇམ་དཔལ་ཞལ་ལུང་དང་ཡེ་ཤེས་ཞབས་ཀྱི་རྒྱ་གཞུང་ནས་ཤེས་དགོས། གཞན་གྱིས་མི་ཤེས། དཔྱིད་ཐིག་གི་ཟིན་བྲིས་རྣམས་ལེགས་པ་སྣང་ངོ་། །འདིར་ཡང་སྲོག་རླུང་ལ། ཞུ་བདེ་ལྷན་སྐྱེས་ལ་རྫོགས་རིམ་དུ་བྱས་སྣང་སྟེ། དཔྱད་རྒྱུ་འགའ་རེ་ཡོད། བུ་སྟོན་རིན་པོ་ཆེའི་སྦྱོར་དྲུག་གི་སྐོར་འདི་རྣམས་ལབ་ལོབ་མང་ཡང་ཉམས་ལེན་གྱི་གནད་འཆུགས། ཧྭ་ཤང་གི་སྒོམ་གྱི་ཉམས་ལེན་དང་གནད་ཅིག མཐར་ཐུག་གི་འབྲས་བུ་ངོས་འཛིན་ལུགས་ཧྭ་ཤང་གི་ངོས་བཟང་སྟེ། ཐར་པ་ནམ་མཁའ་དང་འདྲ་བར་འདོད་པའི་ཕྱིར་དང་། བྱང་ཆུབ་ནམ་མཁའི་མཚན་ཉིད་དེ། །ནམ་མཁའ་ལ་ནི་མཚན་ཉིད་མེད། །ཅེས་གསུངས་པ་དང་མཐུན་པའི་ཕྱིར་རོ། སྦྱོར་དྲུག་པ་ཐར་པ་གཟུགས་ཅན་དུ་འདོད་པ་ནི། ཁ་བ་རྒྱ་སྤོས་མེ་ཏོག་དང་། །བ་ཞོ་བ་མོ་མུ་ཏིག་མདོག །གདུགས་དཀར་བཟུང་བའི་དབྱིབས་འདྲ་བ། །ཐར་པ་ཡིན་པར་རྒྱལ་བས་བཤད། །ཅེས་རྒྱལ་བ་པ་འདོད་པ་དང་མཚུངས་པའི་ཕྱིར་རོ།། །།ཤུ་བྷཾ་མ་སྡུ་སརྦ་ཛ་ག་ཏཾ།