དགེ་བཤེས་མཆོག་བཟང་གི་ཞུས་ལན།
དགེ་བཤེས་མཆོག་བཟང་གི་ཞུས་ལན། དགེ་བཤེས་མཆོག་བཟང་གི་ཡི་གེ་བུ་རམ་གི་རྟེན་བཅས་འཕྲོད། ཉིད་ཀྱི་དྲི་བ། སེམས་གནས་ཡུན་རིང་དུ་སྒོམས་པའི་ཞི་གནས་ཀྱི་ཉམས་ལ། འཁོར་འདས་སྟོང་པར་འདུག་སྙམ་པ་ཡང་སྐྱེ་བ་སྲིད་པས། དེ་ཙམ་གྱིས་སྔར་གྱི་མཚན་འཛིན་འཇིག་མི་ནུས། སེམས་གནས་པའི་ཞི་གནས་བརྟན་པོ་ལ་རྟེན་ནས། དངོས་པོའི་དེ་ཁོ་ན་ཉིད་ལ་སོ་སོར་རྟོག་པའི་ཤེས་རབ་ཀྱིས་ཚུལ་བཞིན་དུ་དཔྱད་དེ་བསྒོམས་པའི་མྱོང་བ་ཡིན་ན། སྔར་བྱས་ཀྱི་དགེ་བ་ལ་མངོན་ཞེན་གྱི་མཚན་འཛིན་ཞིག་པས་མེ་ལ་ཤིང་བསྣན་པ་ལྟར་སྟོབས་ཆེར་འགྲོ་ཞིང་། མི་དགེ་བ་ལ་མཚན་འཛིན་ཞིག་པས་མེ་ལ་ཆུ་བཏབ་པ་ལྟར་རྣམ་སྨིན་འབྱིན་མི་ནུས་པར་འགྱུར་རོ། །འཁོར་བའི་སྡུག་བསྔལ་དྲན་པའི་ངེས་འབྱུང་དང་། སྲིད་ཞི་སྟོང་པར་རྟོགས་པའི་ཤེས་རབ་དང་། འགྲོ་ཀུན་ཕ་མར་སེམས་པའི་བྱམས་པ་གསུམ། མ་གཡེངས་དྲན་པས་རྟག་ཏུ་སྐྱོངས་ཅིག་ཨང་། །བུ་ལེ་ནས་དགེའོ། །