དགེ་བཤེས་གྲགས་པ་རིན་ཆེན་ཀྱི་ཞུས་ལན་ནི།

དགེ་བཤེས་གྲགས་པ་རིན་ཆེན་ཀྱི་ཞུས་ལན་ནི། སློབ་དཔོན་གྲགས་པ་རིན་ཆེན་གྱི་ཞུས་འཕྲོད། མཐོང་སྤང་སྤོང་བ་བསམ་གཏན་གྱི་དངོས་གཞི་ཟག་མེད་ཁོ་ན་ལ་བརྟེན་མི་དགོས། རྒྱུན་ཞུགས་ཕྱིར་འོང་གི་བསམ་གཏན་དང་པོའི་ཉེར་སྡོགས་མི་ལྕོགས་མེད་ལ་བརྟེན་ནས་མཐོང་སྤང་གི་ས་བོན་སྤང་། ཕྱིར་མི་འོང་ཆགས་བྲལ་གྱི་སྔོན་སོང་གི་བསམ་གཏན་བཞི་གང་རུང་གི་དངོས་གཞི་ལ་རྟེན་ཅིང་ཟག་མེད་ལ་རྟེན་ནས་མཐོང་སྤང་སྤོང་། བསམ་གཏན་བཞི་དང་གཟུགས་མེད་དང་པོ་གསུམ་ན་ཉོན་མོངས་ཅན་རགས་པ་གསུམ་གསུམ་ཡོད། སྲིད་རྩེ་ན་ཟག་མེད་མེད། བསམ་གཏན་དང་པོའི་དངོས་གཞི་ཐོབ་ཀྱང་ཕྱི་མའི་རགས་པ་སྤང་བྱ་སྤོང་བའི་ཕྱིར་དུ་མངོན་དུ་མི་བྱེད་ཀྱང་། ཡོན་ཏན་མངོན་པར་སྒྲུབ་པའི་ཕྱིར་དུ་མངོན་དུ་བྱེད་དགོས་སོ། །ཅེས་པ་མངའ་རིས་པ་གྲགས་པ་རིན་ཆེན་གྱིས་ཞུས་པའི་ལན་དུ་རི་འདབས་ནས་གནང་བ་དགེའོ།། །།ཤུ་བྷཾ།