དགེ་བཤེས་བརྩོན་འགྲུས་དཔལ་གྱི་ཞུས་ལན།

དགེ་བཤེས་བརྩོན་འགྲུས་དཔལ་གྱི་ཞུས་ལན། ཡང་དྲིས་ལན་གཅིག་ལ། ལ་སྟོན་གྱིས་ཕད་ཕུང་ཕུལ་བ་ལྟ་བུ་ཁོར་མོར་སྤྱད་པའི་རྫས་བྱ་བ་ཡིན་པས། སྤྱི་ལ་གནང་བ་མ་ཞུས་པར་སྤྱད་ཀྱང་ཉེས་པ་མེད། སྒོས་སུ་བདག་གིར་བཟུང་ན་ཉེས་པ་ཡོད། དགེ་འདུན་སྤྱི་ལ་ཕུལ་བའི་རྫས་ལ་བོག་རྫས་དང་འཇོག་རྫས་གཉིས་ཡོད། བོག་རྫས་ཡིན་ན་གནང་བ་མ་ཞུས་པར་གཅིག་གིས་ལོངས་སྤྱད་ན་མ་བྱིན་ལེན་གྱི་ཉེས་པ་ཡོད། དགེ་འདུན་གྱི་ཚོགས་ཟངས་ལྟ་བུ་ལ་བཞག་ན། རྫས་འདུ་བ་གཅིག་པ་རྣམས་ཀྱིས་གནང་བ་མ་ཞུས་པར་ལོངས་སྤྱད་ཀྱང་། བདག་གིར་མ་བྱས་ན་ཉེས་པ་མེད། ཅེས་པ་དགེ་སློང་བརྩོན་འགྲུས་དཔལ་གྱིས་ཞུས་པ་ལ་གནང་བའོ།། །།མངྒ་ལཾ་བྷ་ཝནྟུ།