སློབ་དཔོན་གྲགས་རྒྱལ་གྱི་ཞུས་ལན།
སློབ་དཔོན་གྲགས་རྒྱལ་གྱི་ཞུས་ལན། ལྟུང་བ་སྡེ་ལྔ་ནི། ཕམ་པ་བཞི། དགེ་འདུན་ལྷག་མ་བཅུ་གསུམ། སྤང་ལྟུང་སུམ་ཅུ། ལྟུང་བྱེད་འབའ་ཞིག་པ་དགུ་བཅུ། སོ་སོར་བཤགས་པ་བཞི། ཉེས་བྱས་བརྒྱ་དང་བཅུ་གཉིས་རྣམས་སོ། །ཕམ་པའི་མཚན་ཉིད་ལྷག་མ་མེད་པའི་ལྟུང་བ། ལྷག་མའི་མཚན་ཉིད། དགེ་འདུན་ལ་སྤོ་དགུ་སོགས་ཆད་ལས་བཅད་པའི་སྒོ་ནས་ལྡད་བར་བྱ་བའི་ལྟུང་བ། སྤང་ལྟུང་གི་མཚན་ཉིད་གང་ལས་ལྟུང་བ་བྱུང་བའི་དངོས་པོ་དེ་ཞག་གཅིག་སྤངས་ནས་བཤགས་པར་བྱ་བ། འབའ་ཞིག་པའི་མཚན་ཉིད། དངོས་པོ་སྤང་བ་ལ་མི་ལྟོས་པར་ལྟུང་བ་དེ་ཉིད། མིང་གིས་བཤགས་པར་བྱ་བ། སོར་བཤགས་ཀྱི་མཚན་ཉིད། དགེ་འདུན་ལ་མི་རིགས་ཀྱི་སྒོ་ནས་སྨྲེ་སྔགས་ཀྱི་ཚུལ་དུ་བཤགས་པར་བྱ་བ། ཉེས་བྱས་ཀྱི་མཚན་ཉིད། འདས་པ་དང་བཅས་པའི་མིང་གིས་བཤགས་པར་བྱ་བ། ཤ་ཐེག་པ་ཆེ་ཆུང་གི་ལུགས་ལ། རང་བཞིན་གྱི་ཁ་ན་མ་མཐོ་བ་ཡིན། བྱང་སེམས་ཀྱི་སྡོམ་པ་བླངས་པ་ལ། ཁྱིམ་པ་ལ་ཉེས་བྱས། དགེ་སློང་ལ་འབའ་ཞིག་པ་ཡིན་པས་བཅས་པའི་ཁ་ན་མ་མཐོ་བ་ཡིན་ཏེ། ཉན་ཐོས་ཀྱི་དགེ་སློང་ལ་དམིགས་པའི་ཤ་ཉེས་བྱས། རྣམ་གསུམ་དག་པའི་ཤ་ཉེས་མེད་ཡིན། འཆབ་སེམས་ཕལ་པའི་ཡན་ལག་ཏུ་མདོ་སྡེ་བ་འདོད། བྱེ་བྲག་སྨྲ་བ་མི་འདོད། བསླབ་པ་ཕུལ་བས་སྡོམ་པ་གཏོང་། །ཉམས་པས་མི་གཏོང་ཕམ་པ་དང་། ཕས་ཕམ་པ་ཁྱད་པར་མེད། ཅེས་པ། སློབ་དཔོན་གྲགས་རྒྱལ་གྱིས་ཞུས་པ་ལ་གནང་བའོ།། །།དགེའོ། །