བཤེས་པའི་སྤྲིངས་ཡིག་གི་འགྲེལ་པ་དོན་གསལ།

བཤེས་པའི་སྤྲིངས་ཡིག་གི་འགྲེལ་པ་དོན་གསལ་བཞུགས་སོ། །

ཕྱོགས་བཅུའི་རྒྱལ་བ་སྲས་དང་སློབ་མར་བཅས་པ་ཐམས་ཅད་ལ་ཕྱག་འཚལ་ལོ། །རྣམ་དག་ཕྲིན་ལས་འོད་དཀར་སྟོང་ལྡན་ཐུབ་དབང་རི་བོང་འཛིན་པ་ཡིས། །ཉོན་མོངས་གདུགས་ཀྱིས་རབ་ཏུ་གདུངས་པའི་སྐྱེ་རྒུའི་ཚ་གདུང་འཇིལ་བ་ནི། །ཤིན་ཏུ་བསིལ་བའི་འོད་ཟེར་སྟོང་འགྱེད་སྟོན་ཟླའི་དཀྱིལ་འཁོར་རྒྱས་པའམ། །ཧ་རི་ཙནྡན་དྲི་བསུང་གིས་བསྒོས་མ་ལ་ཡ་ཀླུང་དག་དང་མཚུངས། །གང་གིས་ཆགས་བྲལ་ཡོན་ཏན་བསིལ་ཟེར་ཆ་ཡི་ཆ་ཙམ་འཕྲོས་པས་ཀྱང་། །ཨུཏྤལ་མིག་གི་བུང་བ་ཟུང་ལྡན་རྣམ་དཀར་སོ་ཡི་ཟེའུ་འབྲུ་ཅན། །དྲེགས་བཅས་བདུད་ཀྱིས་ཕོ་ཉར་མངགས་པའི་མཐོ་རིས་བུ་མོའི་བཞིན་རས་ཀྱི། །པདྨོའི་ནགས་ཚལ་མོད་ལ་ཟུམ་བྱེད་ཐུབ་དབང་སྨྲ་བའི་ཟླ་བར་འདུད། །མཐར་ལྟའི་རི་བོ་ལྷུན་སྟུག་ལ་གནས་གཞན་སྡེ་འདབ་བཟང་སྟོང་དག་གིས། །གང་གི་ལྟ་ཟེར་འབར་བའི་གཟི་བརྗིད་ཅུང་ཟད་འགོད་པར་མ་ནུས་ཤིང་། །མཐའ་བྲལ་སྟོང་ཉིད་གདེངས་ཀའི་ནོར་བུས་ས་གསུམ་མུན་པ་སེལ་མཛད་པ། །ཀླུ་སྒྲུབ་ཀླུ་ཡི་དབང་པོ་དེ་ནི་སྐྱེ་རྒུའི་གཙུག་ན་རྒྱལ་གྱུར་ཅིག ། དེ་ཡི་གསུང་རབ་ལེགས་བཤད་རིན་ཆེན་གཏེར། །ཡིད་བཅུགས་བཤེས་ལ་འདོམས་བྱེད་སྙན་ཚིག་འདི། །བློ་བཟང་བཤེས་གཉེན་འགའ་ཡིས་བསྐུལ་བའི་ངོར། །ཇི་ལྟར་ནུས་བཞིན་བདག་གིས་རྣམ་པར་དབྱེ། །ཇི་སྐད་དུ། འཕགས་པ་ལང་ཀར་གཤེགས་པ་ལས། ང་ནི་མྱ་ངན་འདས་འོག་ཏུ། །ཚུལ་རྣམས་འཛིན་པར་འགྱུར་བ་དེ། །བློ་གྲོས་ཆེན་པོ་ཁྱོད་ཤེས་གྱིས། །ལྷོ་ཕྱོགས་བཻ་དའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་བོད་པ་སྟེ། །ཡོད་དང་མེད་པའི་ཕྱོགས་འཇིག་བྱེད། །ང་ཡི་བསྟན་པ་འཇིག་རྟེན་ན། །བླ་མེད་ཐེག་པ་གཙོར་བསྟན་ནས། །རབ་ཏུ་དགའ་བའི་ས་བསྒྲུབས་ནས། །བདེ་བ་ཅན་དུ་དེ་འགྲོའོ། །ཞེས་སོགས་མདོ་སྡེ་དུ་མ་ལས་ལུང་བསྟན་པའི་བདག་ཉིད་ཆེན་པོ་འཕགས་པ་ཀླུ་སྒྲུབ་ཀྱིས། མཛའ་བོ་རྒྱལ་པོ་བདེ་སྤྱོད་བཟང་པོ་ལ་བརྫངས་པ། མངོན་པར་མཐོ་བ་དང་། ངེས་པར་ལེགས་པའི་ཐབས་ཕྱིན་ཅི་མ་ལོག་པ་སྟོན་པར་བྱེད་པ་བཤེས་པའི་སྤྲིངས་ཡིག་ནི། བསྡུས་པའི་དོན་གཉིས་ཀྱིས་ཤེས་པར་བྱ་སྟེ། འདི་ལྟར་མཉན་པར་གདམས་པ་དང་། གདམས་པ་དངོས་སོ། །

གཉན་པར་གདམས་པ།

དང་པོ་ནི། ཡོན་ཏན་རང་བཞིན་དགེ་འོས་བདག་གིས་ནི། །བདེ་བར་གཤེགས་པའི་གསུང་བསྙད་ལས་བྱུང་བའི། །བསོད་ནམས་འདུན་སླད་འཕགས་པའི་དབྱངས་འདི་དག །ཅུང་ཟད་ཅིག་བསྡེབས་ཁྱོད་ཀྱིས་གསན་པའི་རིགས། །ཞེས་གསུངས་ཏེ། ཡོན་ཏན་རང་བཞིན་དགེ་འོས་ཞེས་པ་ནི། གདམས་པ་ལ་རྣ་བ་གཏོད་དུ་གཞུག་པའི་ཕྱིར་རྒྱལ་པོ་ལ་བོད་པའོ། །དེ་ལ་བརྟེན་ཅིང་གོམས་པར་བྱས་པས་ན་ཡོན་ཏན་ཏེ། དགེ་བ་ཡིན་ལ། དེ་ཡི་རང་བཞིན་ནི་རྒྱུ་སྟེ། སྔོན་བསགས་པའི་དགེ་བའི་རྩ་བའི་རྒྱུ་ལས་བྱུང་བ་ནི། ད་ལྟ་དམ་པའི་ཆ ོས་ཉན་པའི་སྣོད་དུ་གྱུར་པའི་ཕྱིར་དགེ་འོས་ཞེས་བྱའོ། །དེས་ན་སྔོན་དགེ་བའི་རྩ་བ་བསགས་པས་དམ་པའི་ཆོས་ཀྱི་སྣོད་དུ་གྱུར་པའི་རྒྱལ་པོ་ཁྱོད་ཀྱིས་གསན་པའི་རིགས་སོ་ཞེས་སྦྲེལ་ལོ། །གང་ཞེ་ན། འཕགས་པའི་དབྱངས་ཞེས་པའི་མིང་ཅན་གྱི་སྡེབ་སྦྱོར་གྱིས་བཅིངས་པའི་ཚིགས་སུ་བཅད་པ་འདི་དག་གོ །ཚད་ཇི་ཙམ་ཞིག་ཅེ་ན། རྒྱལ་པོ་ནི་བྱ་བ་མང་བས་གཞུང་མང་པོ་འཛིན་པར་མི་ནུས་པས། དེའི་ཕྱིར་ཚིག་མངས་པའི་ཉེས་པ་སྤངས་ཏེ་ཅུང་ཟད་ཅིག་བསྡེབས་ཞེས་སོ། །སུ་ཞིག་གིས་ཤེ་ན། དགེ་སློང་ཀླུ་སྒྲུབ་བདག་གིས་སོ། །དགོས་པ་ཅིའི་ཕྱིར་བསྡེབས་ཤེ་ན། བདེ་བར་གཤེགས་པའི་གསུང་རབ་ལས་བསྙད་ཅིང་བསྟན་པ་ལས་བྱུང་བའི་མངོན་པར་མཐོ་བ་དང་། ངེས་པར་ལེགས་པའི་ཐབས་སུ་གྱུར་པའི་བསོད་ནམས་ལ། ས་བདག་ཁྱོད་དང་སེམས་ཅན་གཞན་དག་ཀྱང་འདུན་པར་བྱ་བའི་སླད་དུའོ། །མངོན་མཐོ་དང་ངེས་ལེགས་ཀྱི་ཐབས་ཕྱིན་ཅི་མ་ལོག་པ་ནི། སངས་རྒྱས་ཀྱི་བསྟན་པ་ལས་གཞན་ལ་མེད་དོ། །ཕྱི་རོལ་པ་དག་ནི་ཕྱུགས་ཀྱི་མཆོད་སྦྱིན་དང་། སྐྲ་འབལ་བ་སོགས་ཀྱི་དཀའ་ཐུབ་དང་། བདག་སྒོམ་པའི་རྣལ་འབྱོར་སོགས་ཀྱིས་མཐོ་རིས་དང་ཐར་པ་ཐོབ་པར་འདོད་པའི་ཕྱིར་རོ། །དེ་བས་ན་བདེ་བར་གཤེགས་པའི་གསུང་བསྙད་པ་ལས་བྱུང་བའི་བསོད་ནམས་འདུན་སླད་ཅེས་སྨོས་ཏེ། གཞན་གྱི་གཞུང་ལུགས་ལས་བསོད་ནམས་སུ་བསྟན་པ་དག་ལ་འདུན་པས་ནི།སྐྱེས་བུའི་མངོན་པར་འདོད་པའི་དོན་མི་འགྲུབ་བོ་སྙམ་དུ་དགོངས་སོ། །གལ་ཏེ་ཁྱོད་ཀྱི་སྙན་ངག་འདི་ལ་སྡེབ་སྦྱོར་མཛེས་པ་མེད་པའི་ཕྱིར་མི་ཉན་ནོ་སྙམ་ན། ཚིག་ངན་ཡང་དོན་བཟང་བའི་ཕྱིར། ཁྱད་དུ་བསད་པ་མི་རིགས་སོ་ཞེས་དཔེ་དང་བཅས་ཏེ་སྟོན་པ་ནི། ཇི་ལྟར་བདེ་གཤེགས་སྐུ་གཟུགས་ཤིང་ལས་ཀྱང་། །བགྱིས་པ་ཅི་འདྲའང་རུང་སྟེ་མཁས་པས་མཆོད། །དེ་བཞིན་བདག་གི་སྙན་ངག་འདི་ངན་ཡང་། །དམ་ཆོས་བརྗོད་ལ་བརྟེན་སླད་སྨད་མི་བགྱི། །ཞེས་གསུངས་ཏེ། ཇི་ལྟར་བདེ་བར་གཤེགས་པའི་སྐུ་གཟུགས་ཤིང་དང་། ཞེས་པས་བསྡུས་པ་རྡོ་བ་དང་འཇིམ་པ་སོགས་ལས་བགྱིས་པ་མཛེས་པའམ། མི་མཛེས་པ་ཅི་འདྲ་ཡང་རུང་སྟེ། རྒྱུ་བཟང་ངན་དང་དབྱིབས་མཛེས་མི་མཛེས་སོགས་ཀྱི་ཁྱད་པར་ལ་མི་ལྟ་བར། གཞི་ངོ་བོའི་ཁྱད་པར་ལ་བརྟེན་ནས་མཁས་པ་རྣམས་ཀྱིས་མཆོད་པར་བྱ་བ་དེ་བཞིན་དུ། བདག་གི་སྙན་ངག་འདི་ཡང་བརྗོད་བྱེད་མཛེས་པ་མ་ཡིན་པས་ངན་ཡང་། བརྗོད་བྱ་མངོན་པར་མཐོ་བ་དང ། ངེས་པར་ལེགས་པའི་ཐབས་སུ་གྱུར་པའི་དམ་པའི་ཆོས་བརྗོད་པ་ལ་བརྟེན་པའི་སླད་དུ། ཚིག་འབྲུ་ལ་མི་རྟོན་དོན་ལ་རྟོན་པའི་མཁས་པ་རྣམས་ཀྱིས་བསྔགས་པར་འོས་པའི་ཕྱིར་སྨད་པར་མི་བགྱི་ཞིང་། མཉན་པར་འོས་པ་ཡང་ཡིན་ནོ། །གལ་ཏེ་ཚིག་མཛེས་པ་མེད་ན། འདིའི་དོན་གང་ཡིན་པ་ཁོ་བོས་སྔར་བདེ་བར་གཤེགས་པའི་གསུང་རབ་དུ་མ་ཐོས་པས་ཁོང་དུ་ཆུད་ཟིན་པའི་ཕྱིར་ཡང་འདི་མཉན་པ་ལ་དགོས་པ་མེད་དོ་སྙམ་ན། མ་རྟོགས་པ་རྟོགས་པར་བྱར་མེད་ཀྱང་། རྟོགས་ཟིན་གསལ་འདེབས་པའི་ཕྱིར་མཉན་པར་རིགས་སོ་ཞེས་དཔེ་དང་བཅས་ཏེ་སྟོན་པ་ནི། ཐུབ་པ་ཆེན་པོའི་བཀའ་ནི་སྙན་རྒུ་ཞིག ཁྱོད་ཀྱིས་ཐུགས་སུ་ལྟ་ཡང་ཆུད་མོད་ཀྱི། །རྡོ་ཐལ་ལས་བགྱིས་དགུང་ཟླའི་འོད་ཀྱིས་ནི། །ཆེས་དཀར་ཉིད་དུ་ཅི་སྟེ་མི་བགྱིད་ལགས། །ཞེས་གསུངས་ཏེ། སྒོ་གསུམ་མི་དགེ་བ་ལས་བསྲུངས་པས་ན་ཐུབ་པ། ཉོན་མོངས་པ་དང་སྐྱེ་བའི་བག་ཆགས་མ་ལུས་པ་སྤངས་པས་ན་ཆེན་པོ། སངས་རྒྱས་བཅོམ་ལྡན་འདས་ཀྱི་བཀའ་ནི་ལེགས་པར་གསུངས་པའི་ཕྱིར་སྙན་པ་ཡིན་ལ། དེ་ལྟ་བུ་སྙན་རྒུ་ཞིག་སྟེ་ཐམས་ཅད་རྒྱལ་པོ་ཁྱོད་ཀྱིས་ཐོས་པ་དང་བསམ་པ་དང་བསྒོམ་པའི་སྒོ་ནས་ཐུགས་སུ་ལྟ་ཡང་ཆུད་མོད། འོན་ཀྱང་འདི་མཉན་པས་ཀྱང་དེ་དག་ཆེས་གསལ་བའི་རྐྱེན་དུ་འགྱུར་བའི་ཕྱིར་མཉན་པའི་རིགས་ཏེ། དཔེར་ན་རྡོ་ཐལ་ལས་བགྱིས་པའི་གཞལ་མེད་ཁང་རང་བཞིན་གྱིས་དཀར་བ་ཡིན་ཡང་། དགུང་ཟླའི་འོད་ཀྱིས་འཕོག་པ་ན་ཆེས་ཤིན་ཏུ་དཀར་བར་ཅི་སྟེ་མི་བགྱིད་ལགས་ཏེ་བགྱིད་པ་དེ་བཞིན་ནོ། །

གདམས་པ་དངོས།

གཉིས་པ་གདམ་པ་དངོས་ལ་གསུམ་སྟེ། སྤྱིར་དགེ་བ་སྒྲུབ་པར་གདམས་པ་དང་། འཁོར་བའི་ཉེས་པས་སྐྱོ་བར་བྱ་བ་དང་། མྱ་ངན་ལས་འདས་པའི་ཕན་ཡོན་བསམས་ནས་ལམ་སྒྲུབ་པར་གདམས་པའོ། །དང་པོ་ལ་གསུམ་གྱི། དང་པོ་ཁྱིམ་པ་དང་རབ་ཏུ་བྱུང་བའི་ཕྱོགས་གཉིས་ཀ་ལ་གདམས་པ་ལ་ཡང་གསུམ་གྱི། དང་པོ་རྗེས་དྲན་དྲུག་གི་དད་པ་ལ་གནས་པར་བྱ་བ་ནི། དགེ་ལེགས་ཀུན་གྱི་རྩ་བ་ནི་སངས་རྒྱས་ལ་སོགས་པ་ལ་དམིགས་པའི་དད་པ་ཡིན་ལ། དེ་མངོན་པར་སྤེལ་བའི་ཕྱིར་རྗེས་སུ་དྲན་པ་དྲུག་རྟག་ཏུ་ཡིད་ལ་བྱའོ་ཞེས་སྟོན་པ་ནི། རྒྱལ་བས་སངས་རྒྱས་ཆོས་དང་དགེ་འདུན་དང་། །གཏོང་དང་ཚུལ་ཁྲིམས་ལྷ་རྗེས་དྲན་པ་དྲུག ། རབ་ཏུ་བཀའ་བསྩལ་དེ་དག་སོ་སོ་ཡི། །ཡོན་ཏན་ཚོགས་ཀྱི་རྗེས་སུ་དྲན་པར་བགྱི། །ཞེས་གསུངས་ཏེ། སྡིག་པའི་ཆོས་མ་ལུས་པ་ཕམ་པར་མཛད་པས་ན་རྒྱལ་བ་སྟེ། སངས་རྒྱས་བཅོམ་ལྡན་འདས་ཀྱིས་སངས་རྒྱས་རྗེས་སུ་དྲན་པ་ལ་སོགས་པ། རྗེས་སུ་དྲན་པ་དྲུག་བཀའ་བསྩལ་པ་དེ་དག་ཉིན་རེ་བཞིན་དུ་རྟག་ཏུ་རྗེས་སུ་དྲན་པར་བགྱིའོ། །ཞེས་སྦྲེལ་ལོ། །ཇི་ལྟར་ཞེ་ན། སངས་རྒྱས་ལ་སོགས་པ་དེ་དག་སོ་སོའི་ཡོན་ཏན་གྱི་ཚོགས་མདོ་ལས་ཇི་སྐད་བཤད་པ་རྣམས་ཀྱི་རྗེས་སུ་དྲན་པར་བྱ་ཞིང་ཡིད་ལ་བྱའོ་ཞེས་པའི་ཐ་ཚིག་གོ །

དེ་ལ་སངས་རྒྱས་ཀྱི་ཡོན་ཏན་ནི། འདི་ལྟར་སངས་རྒྱས་བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སོ། །ཞེས་བྱ་བ་སྟེ། བདུད་བཞི་བཅོམ་པ་དང་། སྐལ་པ་མཆོག་དང་ལྡན་པས་ན་བཅོམ་ལྡན་འདས་སོ། །དེ་བཞིན་ཉིད་རྟོགས་པས་སམ། ཇི་སྐད་གསུངས་པ་དེ་ཁོ་ན་ལྟར་ཡིན་གྱི། གཞན་དུ་མི་འགྱུར་བས་ན་དེ་བཞིན་གཤེགས་པའོ། །ཉོན་མོངས་པའི་དགྲ་བཅོམ་པས་སམ། རྙེད་པ་དང་བཀུར་སྟིས་མཆོད་པར་འོས་པས་ན་དགྲ་བཅོམ་པའོ། །ཆོས་རྣམས་ཡང་དག་པར་ཕྱིན་ཅི་མ་ལོག་པར་ཀུན་ནས་རྒྱས་པས་ན་ཡང་དག་པར་རྫོགས་པའི་སངས་རྒྱས་སོ། །ཤེས་རབ་དང་ལྡན་པས་ན་རིག་པ་དང་། དེའི་རྟེན་ཚུལ་ཁྲིམས་དང་ཏིང་ངེ་འཛིན་དང་ལྡན་པས་ན་ཞབས་སུ་ལྡན་པའོ། །མཛེས་པའི་གནས་སུ་གཤེགས་པའི་ཕྱིར་རམ། ཕྱིར་མི་ལྡོག་པའི་ཕྱིར་ན་བདེ་བར་གཤེགས་པའོ། །རྟེན་ཅིང་འབྲེལ་འབྱུང་ཡན་ལག་བཅུ་གཉིས་ཀྱི་རྣམ་པར་བཞག་པ་དང་། ས་དང་རི་ལ་སོགས་པའི་འབྱུང་བ་དང་། གནས་དང་ཚད་ལ་སོགས་པ་ཤེས་པས། སེམས་ཅན་གྱི་འཇིག་རྟེན་དང་། སྣོད་ཀྱི་འཇིག་རྟེན་ལ་སོགས་པ་ཇི་ལྟ་བ་བཞིན་དུ་མཁྱེན་པའི་ཕྱིར་འ ཇིིག་རྟེན་མཁྱེན་པའོ། །ཇི་ལྟར་ཤིང་རྟའི་ཁ་ལོ་བས་ཤིང་རྟ་འདྲེན་པ་ལ་སྦྱར་བར་འོས་པའི་ཕྱུགས་སྔར་མ་སྦྱར་བ་རྣམས་སྦྱོར་བར་བྱེད། སྦྱར་བ་ན་འགའ་ཞིག་ལོག་འདྲེན་བྱེད་པ་རྣམས་ཚར་གཅོད་པར་བྱེད། སྦྱར་ཟིན་པའི་འོག་ཏུ་འཁྱོག་པོར་འགྲོ་བ་རྣམས་ལམ་དྲང་པོ་ལ་རྣལ་དུ་འཇུག་པར་བྱེད། དལ་བུས་འགྲོ་བ་རྣམས་ལྕག་གིས་སྐུལ་བར་བྱེད། ཤིང་རྟ་ལ་སྦྱར་མི་ཉན་པའི་ཕྱུགས་དམུ་རྒོད་རྣམས་རེ་ཞིག་བཏང་སྙོམས་སུ་འཇོག་པ་ལྟར། བཅོམ་ལྡན་འདས་ཀྱིས་ཀྱང་། འཕགས་པའི་ལམ་གྱི་ཤིང་རྟ་ལ་སྦྱར་བར་འོས་པའི་གདུལ་བྱ་རྣམས་དེ་ལ་སྦྱོར་བར་བྱེད། སྦྱར་བ་ན་འགའ་ཞིག་བསྟན་པ་དང་མི་མཐུན་པར་སྤྱོད་པ་རྣམས་ཚར་གཅོད་པར་བྱེད། ལམ་ལོག་པ་ལ་འགྲོ་བ་རྣམས་རྣལ་མ་ལ་འཇུག་པར་བྱེད། ལེ་ལོ་ཅན་རྣམས་བརྩོན་འགྲུས་ཀྱི་ལྕག་གིས་སྐུལ་བར་བྱེད། ལམ་ལ་སྦྱར་དུ་མི་རུང་བའི་དམུ་རྒོད་ཅན་རྣམས་རེ་ཞིག་བཏང་སྙོམས་སུ་འཇོག་པར་མཛད་དེ། དེའི་ཕྱིར་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ཞེས་བྱའོ། །དེ་སྐད་དུ་ཡང་བསྟོད་པ་བརྒྱ་ལྔ་བཅུ་པ་ལས། ཁྱོད་ནི་དངན་འཐེན་བགྱིད་ལ་སྐུལ། །ཆོམ་རྐུན་བགྱིད་པ་ཚར་ཡང་གཅོད། །གྱ་གྱུ་ཅན་རྣམས་རྣལ་དུ་འགོད། །དལ་བུས་བགྱིད་ལ་གཞན་སྐུལ་འདེབས། །དུལ་བ་རྣམས་ནི་ལམ་ལ་སྦྱོར། །དམུ་རྒོད་རྣམས་ལ་བཏང་སྙོམས་མཛད། །དེ་སླད་སྐྱེས་བུ་འདུལ་བ་ཡི། ཁ་ལོ་སྒྱུར་བ་བླ་མེད་ཁྱོད། །ཅེས་གསུངས་པ་ལྟར་རོ། །ལྷ་དང་མི་རྣམས་ནི་ཐར་པའི་ལམ་གྱི་སྣོད་དུ་རུང་བས་གདུལ་བྱའི་གཙོ་བོ་ཡིན་ལ་དེ་དག་ལ་བསམ་པ་ཇི་ལྟ་བ་བཞིན་དུ་ཆོས་སྟོན་པའི་ཕྱིར་ལྷ་དང་མི་རྣམས་ཀྱི་སྟོན་པའོ། །ཡོན་ཏན་དེ་རྣམས་དང་ལྡན་པ་ནི་སངས་རྒྱས་བཅོམ་ལྡན་འདས་ཡིན་ནོ་ཞེས་བསྟན་པའི་ཕྱིར། མིང་འདི་གཉིས་ཀྱང་སྨོས་ཏེ། དེ་ལ་མི་ཤེས་པའི་གཉིད་སངས་པའི་ཕྱིར་དང་། ཤེས་བྱ་ལ་བློ་རྒྱས་པའི་ཕྱིར་སངས་རྒྱས་སོ། །ཆོས་ཀྱི་ཡོན་ཏན་ནི་འདི་ལྟ་སྟེ། བཅོམ་ལྡན་འདས་ཀྱི་ཆོས་ནི་ལེགས་པར་གསུངས་པ། ཡང་དག་པར་མཐོང་བ། ནད་མེད་པ། དུས་ཆད་པ་མེད་པ། ཉེ་བར་གཏོད་པ། འདི་མཐོང་བ་ལ་དོན་ཡོད་པ། མཁས་པ་རྣམས་ཀྱིས་སོ་སོ་རང་གིས་རིག་པར་བྱ་བ་ཞེས་བྱ་བ་སྟེ། འདིས་ནི་མདོར་བསྡུས་ན་བསྟན་པའི་ཆོས་དང་། རྟོགས་པའི་ཆོས་གཉིས་བསྟན་ཏེ། དེ་ལ་ལེགས་པར་གསུངས་པ་ཞེས་པ་ནི། བསྟན་པའི་ཆོས་ཏེ། དེ་ནི་ཐོག་མ་དང་། བར་དང་། ཐ་མར་དགེ་བའི་ཕྱིར་ཏེ། གོ་རིམ་བཞིན་དུ་ཐོས་པ་དང་། བསམ་པ་དང་བསྒོམ་པའི་ཤེས་རབ་བསྐྱེད་པའི་ཕྱིར་རོ། །ལྷག་མས་ནི་རྟོགས་པའི་ཆོས་བསྟན་ཏེ། དེ་ལ་ཡང་ཚིག་དང་པོ་ལྔས་ནི་ལམ་གྱི་བདེན་པ་བསྟན་ཏེ། དེ་ཡང་ཁྱད་གཞི་དང་། ཁྱད་ཆོས་གཉིས་ལས། དང་པོ་ནི་ཉེ་བར་གཏོད་པ་ཞེས་ཏེ། སྒྲུབ་པ་པོ་ལ་འབྲས་བུ་མྱ་ངན་ལས་འདས་པ་ཉེ་བར་གཏོད་པར་བྱེད་པའི་ཕྱིར་ལམ་ཞེས་བྱའོ། །

གཉིས་པ་དེའི་ཁྱད་པར་ནི་གསུམ་སྟེ། རང་བཞིན་གྱིས་རྣམ་པར་དག་པ་དང་། ཤེས་བྱའི་གནས་ལུགས་གསལ་བ་དང་། མི་མཐུན་པའི་ཕྱོགས་འཇོམས་པའོ། །དང་པོ་ནི། འདི་མཐོང་བ་དོན་ཡོད་པ་ཞེས་པ་སྟེ། མར་མེ་ལྟར་རང་བཞིན་གྱིས་འོད་གསལ་བའི་ཕྱིར་རོ། །གཉིས་པ་ནི། ཡང་དག་པ་མཐོང་བ་ཞེས་པ་སྟེ། གནས་ལུགས་ཀྱི་དེ་ཁོ་ན་ཉིད་ཕྱིན་ཅི་མ་ལོག་པར་མཐོང་བའི་ཕྱིར་རོ། །གསུམ་པ་ནི། ནད་མེད་པ་ཞེས་པ་སྟེ། ཉོན་མོངས་པའི་བག་ལ་ཉལ་མ་ལུས་པ་སྤངས་པའི་ཕྱིར་རོ། །དེ་ཡང་དུས་རེ་ཞིག་མ་ཡིན་གྱི། གཏན་ནས་སྤངས་པས་ན་དུས་ཆད་པ་མེད་པ་ཞེས་སོ། །མཁས་པ་རྣམས་ཀྱིས་སོ་སོ་རང་གིས་རིག་པར་བྱ་བ་ཞེས་པས་ནི། འགོག་པའི་བདེན་པ་བསྟན་ཏེ། དེ་ནི་མུ་བཞིར་རྟོག་གི་བརྟག་པར་མི་ནུས་ཤིང་། སྒྲ་དང་ངེས་ཚིག་སོགས་ཀྱིས་བརྗོད་དུ་མེད་པས། རྣལ་འབྱོར་པས་སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ་ཡིན་པའི་ཕྱིར་རོ། །དེ་ལྟར་ན། རྒྱུད་བླ་མ་ལས། གང་ཞིག་ཡོད་མིན་མེད་མིན་ཡོད་མེད་མ་ཡིན་ཡོད་མེད་ལས་གཞན་དུའང་། །བརྟག་པར་མི་ནུས་ངེས་ཚིག་དང་བྲལ་སོ་སོ་རང་གིས་རིག་ཞི་བ། །དྲི་མེད་ཡེ་ཤེས་འོད་ཟེར་སྣང་ལྡན་དམིགས་པ་ཀུན་ལ་ཆགས་པ་དང་། །སྡང་དང་རབ་རིབ་རྣམ་པར་འཇོམས་མཛད་དམ་ཆོས་ཉི་མ་དེ་ལ་འདུད། །ཅེས་གསུངས་པ་དང་མཐུན་པར་ཆོས་ཀྱི་མཚན་ཉིད་བཤད་པ་ཡིན་ནོ། །དགེ་འདུན་གྱི་ཡོན་ཏན་ནི། བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི། ལེགས་པར་ཞུགས་པ། དྲང་པོར་ཞུགས་པ། རིགས་པར་ཞུགས་པ། མཐུན་པར་ཞུགས་པ་སྟེ། ཞེས་སྒྲུབ་པའི་ཡོན་ཏན་བསྟན་ཏེ། ལྷག་པའི་ཚུལ་ཁྲིམས་དང་། སེམས་དང་། ཤེས་རབ་གསུམ་ལ་ཚུལ་བཞིན་དུ་གནས་པའི་ཕྱིར། གོ་རིམ་བཞིན་དུ་ལེགས་པར་ཞུགས་པ་ལ་སོགས་པ་ཡིན་ལ། ཐམས་ཅད་ཀྱང་ལོངས་སྤྱོད་དང་། ཚུལ་ཁྲིམས་དང་། ལྟ་བ་དང་། ཆོ་ག་མཐུན་པར་སྤྱོད་པའི་ཕྱིར་མཐུན་པར་ཞུགས་པ་ཞེས་བྱ། མཆོད་པར་འོས་པའི་ཡོན་ཏན་ནི། བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི། ཀུན་ཏུ་སྦྱིན་པའི་འོས་སུ་གྱུར་པ། རབ་ཏུ་སྦྱིན་པའི་འོས་སུ་གྱུར་པ། བསྐོར་བ་བྱ་བའི་འོས་སུ་གྱུར་པ། ཐལ་མོ་སྦྱར་བའི་འོས་སུ་གྱུར་པ། འཇིག་རྟེན་གྱི་བསོད་ནམས་ཀྱི་ཞིང་། བླ་ན་མེད་པ་ཞེས་པ་སྟེ། བསླབ་པ་གསུམ་གྱི་ཡོན་ཏན་དང་ལྡན་པའི་ཕྱིར། གོ་རིམ་བཞིན་དུ་ཚིག་གཉིས་དང་། གཉིས་དང་། གཅིག་གི་དོན་ཤེས་པར་བྱའོ། །གཏོང་བའི་ཡོན་ཏན་ནི། ཀྱེ་མ་བདག་སྐྱེ་རྒུ་སེར་སྣའི་དྲི་མ་ཀུན་ནས་ལངས་པ་རྣམས་ཀྱི་ནང་ན། སེར་སྣའི་དྲི་མ་དང་བྲལ་བའི་སེམས་ཀྱིས་གནས་ཤིང་མཆོད་སྦྱིན་ཁོར་མོར་བྱེད་པ་དང་། ལག་པ་སྐྱོང་བ་དང་། རྣམ་པར་གཏོང་བ་ལ་དགའ་བ་དང་། སྦྱིན་པ་ལ་འགོད་པར་དགའ་བ་གང་ཡིན་པ་དེ་ནི། བདག་གིས་རྙེད་པ་ལེགས་པར་རྙེད་པ་ཡིན་ནོ། །ཞེས་བྱ་བ་སྟེ། འདིར་ཡང་རང་གི་རྒྱུད་དུ་གཏོགས་པའི་སྦྱིན་པའི་ཡོན་ཏན་སེར་སྣའི་དྲི་མ་སྤངས་པ་དང་སྦྱིན་པའི་ངང་ཚུལ་ཅན་དང་། ལུས་ཀྱིས་བརྩོན་འགྲུས་བརྩམས་པ་དང་། དངོས་པོ་ཡོངས་སུ་གཏོང་བ་དང་། དེ་ལ་མངོན་པར་དགའ་བ་རྣམས་བསྟན་ཏོ། །ཚུལ་ཁྲིམས་ཀྱི་ཡོན་ཏན་ནི། བདག་གི་ཚུལ་ཁྲིམས་ནི་མ་ཉམས་པ་དང་། སྐྱོན་མེད་པ། མ་འདྲེས་པ། མ་གོས་པ། རང་དབང་ཡོད་པ། མཁས་པས་བསྔགས་པ། ཏིང་ངེ་འཛིན་ནི་སྒྲུབ་པ་ཡིན་ནོ་ཞེས་བྱ་བ་སྟེ། འདིས་ཀྱང་རང་གི་རྒྱུད་དུ་གཏོགས་པའི་ཚུལ་ཁྲིམས་ཀྱི་ཡོན་ཏན་རྣམས་བསྟན་ཏེ། ཚིག་གི་དོན་རྣམས་ནི། ཁྱོད་ཀྱི་ཚུལ་ཁྲིམས་མ་ཉམས་མོད་མི་དམའ། །མ་འདྲེས་མ་སྦགས་པ་དག་བསྟེན་པར་མཛོད། །ཅེས་པ་དེར་བཤད་པར་བྱའོ། །ལྷའི་ཡོན་ཏན་ནི། རྒྱལ་ཆེན་བཞིའི་རིས་ཀྱི་ལྷ་དག་དང་། སུམ་ཅུ་རྩ་གསུམ་ནས་གཞན་འཕྲུལ་དབང་བྱེད་ཀྱི་ལྷ་དག་ཡོད་དོ་ཞེས་བྱ་བ་ཡིན་ཏེ། སྐྱེ་བའི་ལྷ་རྣམས་ཀྱི་སྐྱེ་བའི་རྒྱུར་གྱུར་པའི་ཡོན་ཏན་དང་། བདག་ཉིད་ཀྱི་ཚུལ་ཁྲིམས་དང་ཏིང་ངེ་འཛིན་ལ་སོགས་པའི་ཡོན་ཏན་རྣམས་མཚུངས་པར་བྱས་ནས་དྲན་པ་ནི། ལྷ་རྗེས་སུ་དྲན་པ་ཡིན་ནོ། །

སྤྱིར་དགེ་བ་བསྒྲུབ་པར་གདམས་པ།

གཉིས་པ་སྤྱིར་དགེ་བའི་ལས་ལམ་ལ་གནས་པར་གདམས་པ་ནི། དེ་ལྟར་རྗེས་སུ་དྲན་པ་དྲུག་ནི། སེམས་དང་བར་བྱེད་པ་དང་། བསོད་ནམས་ཆེན་པོའི་རྒྱུ་ཡིན་པའི་ཕྱིར། དང་པོར་བསྟན་ནས། དེ་ལ་སེམས་མངོན་པར་དད་པས་དགེ་བ་ལ་འབད་པར་བྱའོ་ཞེས་སྟོན་པའི་ཕྱིར། དགེ་བའི་ལས་ལམ་བཅུ་པོ་ལུས་དང་ནི། །ངག་དང་ཡིད་ཀྱིས་རྟག་ཏུ་བསྟེན་བགྱི་ཞིང་། །ཞེས་གསུངས་ཏེ། འབྲས་བུ་ཡིད་དུ་འོང་བ་དུ་མ་འབྱིན་པས་ན་དགེ་བ། བྱ་བའི་ངོ་བོར་གྱུར་བ་ཡིན་པས་ན་ལས། བདེ་འགྲོར་འགྲོ་བའི་ལམ་ཡིན་པས་ན་ལམ། དེ་ཡང་རྣམ་པ་བཅུ་སྟེ། སྲོག་གཅོད་པ་སྤོང་བ་ནས། ཡང་དག་པའི་ལྟ་བའི་བར་རྣམས་སོ། །དེ་ལ་སྲོག་གཅོད་པ་སྤོང་བ་ལ་སོགས་པ་ལུས་ཀྱི་གསུམ་དང་། བརྫུན་དུ་སྨྲ་བ་སྤོང་བ་ལ་སོགས་པ་ངག་གི་བཞི་དང་། བརྣབ་སེམས་མེད་པ་ལ་སོགས་པ་ཡིད་ཀྱི་གསུམ་རྣམས་གོ་རིམ་བཞིན་དུ། ལུས་དང་ངག་དང་ཡིད་ཀྱིས་རྟག་ཏུ་བསྟེན་པར་བགྱིའོ། །ཞེས་པ་སྟེ། དེ་ལ་དགེ་བའི་ལས་ཀྱི་ལམ་བཅུ་པོ་འདི་དག་ཀྱང་། སྲོག་གཅོད་པ་ལ་སོགས་པ་མི་དགེ་བའི་ལས་ཀྱི་ལམ་བཅུ་རྣམ་པར་སྤངས་པའི་སྒོ་ནས་བསྟེན་པར་བྱ་བ་ཡིན་པས། དེ་དག་གི་མཚན་ཉིད་རྣམ་པར་བཞག་པ་ཇི་ལྟ་བུ་ཞེ་ན། ཉོན་མོངས་ཅན་གྱི་སེམས་དང་། དེའི་བསམ་པས་གཞི་དེ་ཉིད་ལ། ལས་དེ་ཀུན་ཏུ་སྤྱོད་ཅིང་ཡོངས་སུ་རྫོགས་པ་ནི། སྲོག་གཅོད་པ་ལ་སོགས་པའི་ལས་ཀྱི་ལམ་དེ་དག་གི་རང་གི་མཚན་ཉིད་མདོར་བསྡུས་པ་ཡིན་ནོ། །དེ་ལ་ཉོན་མོངས་ཅན་གྱི་སེམས་ནི། འདོད་ཆགས་ལ་སོགས་པ་དུག་གསུམ་གྱིས་ཟིལ་གྱིས་ནོན་པའོ། །གལ་ཏེ་ཉོན་མོངས་ཅན་གྱི་སེམས་ཡོད་ཀྱང་། གཞི་དེ་ལ་དེར་འདུ་ཤེས་པའི་བསམ་པས་ཀུན་ཏུ་མ་སྤྱད་ན། ཡོངས་སུ་རྫོགས་པར་བྱས་ཀྱང་། ལས་ཀྱི་ལམ་ཡོངས་སུ་རྫོགས་པར་མི་འགྱུར་ཏེ། བསམ་པ་དང་སྦྱོར་བའི་ཡན་ལག་གཉིས་མ་ཚང་བའི་ཕྱིར་རོ། །གལ་ཏེ་ཉོན་མོངས་ཅན་གྱི་སེམས་དང་དེའི་བསམ་པ་ཡང་ཡོད་མོད་ཀྱི། སེམས་ཕྱིན་ཅི་ལོག་གིས་དངོས་པོ་གཞན་ཁོ་ན་ཞིག་ལ་ཀུན་ཏུ་སྤྱད་ན་མཐར་ཐུག་པར་གྱུར་དུ་ཟིན་ཀྱང་། ལས་ལམ་ཡོངས་སུ་རྫོགས་པ་མ་ཡིན་ཏེ། བསམ་པ་དང་སྦྱོར་བ་འཛོལ་བའི་ཕྱིར་རོ། །གལ་ཏེ་ཉོན་མོངས་ཅན་གྱི་སེམས་དང་། དེའི་བསམ་པ་ཡང་ཡོད་མོད་ཀྱི། ལས་ཀུན་ཏུ་མ་སྤྱད་ཅིང་། མཐར་ཐུག་པར་མ་གྱུར་ན། ལས་ཀྱི་ལམ་ཡོངས་སུ་རྫོགས་པ་མ་ཡིན་ཏེ། ཀུན་སློང་ཙམ་ལས་སྦྱོར་བ་དང་། དངོས་གཞིའི་ཡན་ལག་མ་ཚང་བའི་ཕྱིར་རོ། །གལ་ཏེ་ཉོན་མོངས་ཅན་གྱི་སེམས་དང་། དེའི་བསམ་པ་ཡང་ཡོད་ལ། དེ་ཉིད་ལ་ཀུན་ཏུ་སྤྱད་མོད་ཀྱི། མཐར་ཐུག་པར་མ་གྱུར་ན། ལས་ཀྱི་ལམ་རྫོགས་པར་མི་འགྱུར་ཏེ། དངོས་གཞིའི་ཡན་ལག་མ་ཚང་བའི་ཕྱིར་རོ། །གལ་ཏེ་ཉོན་མོངས་ཅན་གྱི་སེམས་ཀྱང་ཡོད། དེའི་བསམ་པ་ཡང་ཡོད། གཞི་དེ་ཉིད་ལ་ལས་དེ་ཀུན་ཏུ་སྤྱད་ཅིང་མཐར་ཐུག་པར་གྱུར་ན། མི་དགེ་བའི་ལས་ཀྱི་ལམ་དེ་ཉིད་ཡོངས་སུ་རྫོགས་པ་ཡིན་ནོ། །ལས་ཀྱི་ལམ་བཅུ་པོ་འདི་དག་གི་མཚན་ཉིད་རྒྱས་པར་ནི་རྣམ་པ་ལྔས་རྣམ་པར་བཞག་པར་རིག་པར་བྱ་སྟེ། འདི་ལྟ་སྟེ། གཞི་དང་། བསམ་པ་དང་། སྦྱོར་བ་དང་། ཉོན་མོངས་པ་དང་། ཟིན་པར་བྱས་པས་ཀྱང་ངོ་། །དེ་ལ་གཞི་ནི། གང་ལ་སྲོག་གཅོད་པ་ལ་སོགས་པའི་ལས་ཀྱི་བྱ་བ་འཇུག་པའི་ཡུལ་ཏེ། སེམས་ཅན་དང་། སེམས་ཅན་མ་ཡིན་པའི་དངོས་པོ་གང་ལ་བརྟེན་ནས་སྲོག་གཅོད་པ་ལ་སོགས་པའི་མི་དགེ་བའི་ལས་ཀྱི་ལམ་བཅུའི་རིགས་པར་འབྱུང་བའོ། །བསམ་པ་ནི་གཉིས་ཏེ། འདུ་ཤེས་ཀྱི་བསམ་པ་དང་། བྱེད་པར་འདོད་པའི་བསམ་པའོ། །འདུ་ཤེས་དེ་ཡང་རྣམ་པ་བཞི་སྟེ། གཞི་དེ་ལ་དེར་འདུ་ཤེས་པ་དང་། དེ་མ་ཡིན་པ་ལ་དེར་འདུ་ཤེས་པ་དང་། དེ་ལ་དེ་མ་ཡིན་པར་འདུ་ཤེས་པ་དང་། དེ་མ་ཡིན་པ་ལ་དེ་མ་ཡིན་པར་འདུ་ཤེས་པའོ། །ལས་ལམ་གྱི་ཡན་ལག་ནི། དང་པོ་ཉིད་ཡིན་ཏེ། གཞན་གསུམ་གྱིས་ནི་ལས་ལམ་རྫོགས་པར་མི་འགྱུར་རོ། །བྱེད་པར་འདོད་པའི་བསམ་པ་ནི། གཞི་དེ་ལ་ལས་དེ་ཀུན་ཏུ་སྤྱོད་པར་འདོད་པའོ། །སྦྱོར་བ་ནི། ལས་དེ་བྱ་བའི་ཕྱིར་བདག་གམ་གཞན་གྱི་སྒོ་གསུམ་གྱི་རྩོམ་པ་གང་ཡིན་པའོ། །ཉོན་མོངས་པ་ནི། འདོད་ཆགས་ལ་སོགས་པ་དུག་གསུམ་གང་ཡང་རུང་བའོ། །ཟིན་པར་བྱས་པ་ནི། མངོན་པར་འདོད་པའི་ལས་དེ་ཉིད། དེ་དང་འབྲེལ་བའི་སྦྱོར་བས། དུས་དེ་ཉིད་ཀྱི་ཚེའམ། དུས་དེའི་འོག་ཏུ་ཡོངས་སུ་རྫོགས་པར་གྱུར་བ་སྟེ། དེ་ལྟར་ན་རྣམ་པ་ལྔ་པོ་དེས། མི་དགེ་བ་བཅུའི་ལས་ཀྱི་ལམ་རྣམས་ཀྱི་མཚན་ཉིད་རྣམ་པར་བཞག་པར་རིག་པར་བྱའོ། །

དེ་ལ་སྲོག་གཅོད་པའི་གཞི་ནི། སྲོག་དང་ལྡན་པའི་སེམས་ཅན་ནོ། །གལ་ཏེ་གསོད་པར་བྱེད་པ་དེ་སྲོག་ཆགས་དེ་ལ་སྲོག་ཆགས་ཀྱི་འདུ་ཤེས་ཀྱང་ཡོད་ལ། སྲོག་ཆགས་གང་གསོད་པར་འདོད་པ་དེ་ལ་དེར་འདུ་ཤེས་པ་ཡང་ཡོད་པ་དེ་ནི། དེ་ལ་དེའི་འདུ་ཤེས་ཕྱིན་ཅི་མ་ལོག་པ་ཞེས་བྱའོ། །འདུ་ཤེས་དེ་ལ་བརྟེན་ནས། འདི་གསད་པར་བྱའོ་སྙམ་དུ་སེམས་པ་དེ་ནི། དེའི་གསོད་པའི་བསམ་པའོ། །དེ་འདོད་ཆགས་ལ་སོགས་པ་གསུམ་གྱིས་ཟིལ་གྱིས་མནན་ནས། དེ་ལྟར་སེམས་མངོན་པར་འདུ་བྱེད་པ་དེ་ནི། དེའི་ཉོན་མོངས་པ་ཡིན་ནོ། །བསམ་པ་དེ་དང་། ཉོན་མོངས་པ་ཅན་གྱི་སེམས་ཀྱིས་རང་ངམ། གཞན་གྱིས་གསོད་པར་སྦྱོར་ཞིང་མཚོན་གྱིས་འདེབས་པར་བྱེད་ལ། གལ་ཏེ་བཏབ་མ་ཐག་ཁོ་ནར་སྦྱོར་བ་དེས་ཤི་བར་གྱུར་ན། དུས་དེ་ཉིད་ཀྱི་ཚེ་ལས་ལམ་ཡོངས་སུ་རྫོགས་ལ། སྦྱོར་བ་དེའི་རྐྱེན་གྱིས་གཞན་གྱི་ཚེ་ཤི་ན་ཡང་། གང་གི་ཚེ་ཤི་བ་དེའི་ཚེ་ལས་ལམ་རྫོགས་པ་ཡིན་ནོ། །མ་བྱིན་པར་ལེན་པའི་གཞི་ནི། གཞན་གྱིས་ཡོངས་སུ་བཟུང་བའོ། །འདུ་ཤེས་ནི། དེ་ལ་དེར་འདུ་ཤེས་པའོ། །བསམ་པ་ནི། འཕྲོག་པར་འདོད་པ་ཉིད་དོ། །ཉོན་མོངས་པ་ནི། གསུམ་པོ་གང་ཡང་རུང་བའོ། །མཐའ་ནི་གནས་གཞན་དུ་སྤོས་པའོ། །འདོད་པས་ལོག་པར་གཡེམ་པའི་གཞི་ནི། འཇུག་པར་བྱ་བ་མ་ཡིན་པའི་བུད་མེད་དང་། འཇུག་པར་བྱ་བ་ཡིན་ན་ཡང་། ཡན་ལག་མ་ཡིན་པ་དང་། གནས་མ་ཡིན་པ་དང་། དུས་མ་ཡིན་པ་དག་ཏུ། ཚོང་མ་ཡིན་པ་མི་རིགས་པ་བྱེད་པ་དང་སྐྱེས་པ་ཐམས་ཅད་དང་མ་ནིང་ངོ་། །འདུ་ཤེས་ནི། དེ་ལ་དེར་འདུ་ཤེས་པའོ། །བསམ་པ་ནི། བགྲོད་པར་འདོད་པའོ། །ཉོན་མོངས་པ་ནི། སྔ་མ་ལྟར་རོ། །མཐའ་ནི། གཉིས་ཀྱིས་གཉིས་སྤྲད་པའོ། །བརྫུན་དུ་སྨྲ་བའི་གཞི་ནི། མཐོང་བ་དང་། ཐོས་པ་དང་། བྱེ་བྲག་ཕྱེད་པ་དང་། རྣམ་པར་ཤེས་པ་དང་། དེ་ལས་བཟློག་པའོ། །འདུ་ཤེས་ནི། མཐོང་བ་ལ་སོགས་པ་དང་། བཟློག་པར་འདུ་ཤེས་པའོ། །བསམ་པ་ནི། འདུ་ཤེས་བསྒྱུར་ཏེ་སྨྲ་བ་ཉིད་དོ། །ཉོན་མོངས་པ་ནི། འདྲའོ། །མཐའ་ནི། འཁོར་དང་ཕ་རོལ་འདྲི་བ་ལ་གོ་བར་བྱའོ། །ཕྲ་མའི་གཞི་ནི། སེམས་ཅན་མཐུན་པ་དང་མི་མཐུན་པ་རྣམས་སོ། །འདུ་ཤེས་ནི། དེ་དང་དེ་ལ་དེར་འདུ་ཤེས་པའོ། །བསམ་པ་ནི། དབྱེ་བའམ། མི་འདུམ་པར་འདོད་པའོ། །ཉོན་མོངས་པ་ནི། འདྲའོ། །མཐའ་ནི། དབྱེ་བར་བྱ་བའི་ངག་གི་རྣམ་པར་རིག་བྱེད་སྨྲས་ཏེ་དོན་གོ་བའོ། །ངག་རྩུབ་པོའི་གཞི་ནི། ཀུན་ནས་མནར་སེམས་ཀྱི་རྒྱུར་གྱུར་པའི་སེམས་ཅན་རྣམས་སོ། །འདུ་ཤེས་ནི། དེ་དག་ལ་དེར་འདུ་ཤེས་པའོ། །བསམ་པ་ནི། ངག་རྩུབ་པོ་སྨྲ་བར་འདོད་པའོ། །ཉོན་མོངས་པ་ནི། འདྲའོ། །མཐའ་ནི། དེ་དག་ལ་ངག་རྩུབ་པོས་སྨྲས་པའོ། །ཚིག་འཁྱལ་བའི་གཞི་ནི། དོན་མེད་པ་དང་ལྡན་པའི་དོན་ཏོ། །འདུ་ཤེས་ནི། དེ་ལ་དེར་འདུ་ཤེས་པའོ། །བསམ་པ་ནི། སྨྲ་བར་འདོད་པའོ། །ཉོན་མོངས་པ་ནི། འདྲའོ། །མཐའ་ནི། སྨྲས་པའོ། །བརྣབ་སེམས་ཀྱི་གཞི་ནི། གཞན་གྱི་ནོར་དང་ཡོ་བྱད་དོ། །འདུ་ཤེས་ནི། དེ་ལ་དེར་འདུ་ཤེས་པའོ། །བསམ་པ་ནི། དེ་ལྟར་འདོད་པའོ། །ཉོན་མོངས་པ་ནི། འདྲའོ། །མཐའ་ནི། དེ་དག་ལ་བདག་གིར་བྱ་བར་ངེས་པའོ། །གནོད་སེམས་ཀྱི་གཞི་དང་འདུ་ཤེས་ནི། ངག་རྩུབ་པོ་ཇི་ལྟ་བ་བཞིན་ནོ། །བསམ་པ་ནི། བསྣུན་པ་ལ་སོགས་པ་ཉིད་དོ། །ཉོན་མོངས་པ་ནི། འདྲའོ། །མཐའ་ནི། བསྣུན་པ་ལ་སོགས་པར་ངེས་པའོ། །ལོག་ལྟའི་གཞི་ནི། རྒྱུ་འབྲས་དང་བདེན་བཞི་ལ་སོགས་པ་ཡོད་པའི་དོན་ཏོ། །འདུ་ཤེས་ནི། བདེན་པ་ཡིན་པར་འདུ་ཤེས་པའོ། །བསམ་པ་ནི། དེ་ལྟར་འདོད་པའོ། །ཉོན་མོངས་པ་ནི། འདྲའོ། །མཐའ་ནི། སྐུར་པ་བཏབ་པར་ངེས་པའོ། །ལས་ཀྱི་ལམ་བཅུ་པོ་འདི་དག་གི་རྣམ་པར་བཞག་པ་རྒྱས་པ་ནི། རྣམ་པར་གཏན་ལ་དབབ་པ་བསྡུ་བ་ལ་སོགས་པར་བལྟ་བར་བྱ་སྟེ། འདིར་ནི་ཡི་གེ་མངས་པས་མ་བྲིས་སོ། །ཇི་སྐད་བཤད་པའི་མཚན་ཉིད་ཅན་གྱི་མི་དགེ་བའི་ལས་ལམ་བཅུ་པོ་དེ་དག་ཉིད་ཀྱི་གཞི་ཉེ་བར་གནས་པ་ན་ཡང་སྤོང་ཞིང་དང་དུ་མི་ལེན་པ་ནི། སྲོག་གཅོད་སྤོང་བ་ལ་སོགས་པ་དགེ་བའི་ལས་ཀྱི་ལམ་བཅུ་ཡིན་པར་རིག་པར་བྱའོ། །

ཆང་ནི། མི་དགེ་བ་མཐའ་དག་གི་རྒྱུ་ཡིན་པས། ཉེས་དམིགས་ཆེ་བའི་ཕྱིར་དང་། བཅས་པའི་ཁ་ན་མ་ཐོ་བ་ཡིན་པས་ལས་ཀྱི་ལམ་རྣམས་ཀྱི་ནང་དུ་མ་འདུས་པས་དེའི་ཕྱིར་ཆང་སྤོང་བ་དང་། ཡང་དག་པའི་འཚོ་བ་བསྟེན་པའི་དབང་དུ་བྱས་ཏེ། ཆང་རྣམས་ལས་ལྡོག་དེ་བཞིན་དགེ་བ་ཡི། །འཚོ་བ་ལ་ཡང་མངོན་པར་དགེས་པར་མཛོད། །ཅེས་གསུངས་ཏེ། བག་མེད་པའི་གནས་ཡིན་པའི་ཕྱིར། འབྲུ་དང་སྦྱར་བ་དང་། བཅོས་པའི་ཆང་རྣམས་ལས་རྣམ་པ་ཐམས་ཅད་དུ་ལྡོག་པ་དང་། གཞན་ལ་མི་གནོད་ཅིང་བག་མེད་པའི་རྒྱུར་མི་འགྱུར་བའི་བཟའ་བ་དང་བཏུང་བ་ལ་སོགས་པ་དགེ་བའི་འཚོ་བ་ལ་ཡང་མངོན་པར་དགེས་པར་མཛོད་ཅེས་སྦྱར་རོ། །དེ་ལྟར་དགེ་བའི་ལམ་ལ་གནས་པས། འདོག་པ་ཇི་ལྟ་བ་བཞིན་དུ་སྦྱིན་པ་བཏང་བར་བྱའོ་ཞེས་བསྟན་པའི་ཕྱིར། ལོངས་སྤྱོད་གཡོ་བ་སྙིང་པོ་མེད་མཁྱེན་ནས། །དགེ་སློང་བྲམ་ཟེ་བཀྲེན་དང་བཤེས་རྣམས་ལ། །སྦྱིན་པ་ཚུལ་བཞིན་བསྩལ་བགྱི་ཕ་རོལ་ཏུ། །སྦྱིན་ལས་གཞན་པའི་གཉེན་མཆོག་མ་མཆིས་སོ། །ཞེས་གསུངས་ཏེ། ཟས་དང་གོས་ལ་སོགས་པའི་ལོངས་སྤྱོད་རྣམས་ནི། མི་བརྟེན་པས་ན་གཡོ་བ། ངོམས་མི་ཤེས་པས་ན་སྙིང་པོ་མེད་པ་ཡིན་ལ། དེ་དག་གི་རང་བཞིན་དེ་ཁོ་ན་ལྟར་མཁྱེན་ནས་དེ་ལ་སྙིང་པོ་བླང་བའི་ཕྱིར་དགེ་སློང་དང་བྲམ་ཟེ་སོགས་ཡོན་ཏན་གྱི་ཞིང་དང་། བཀྲེན་པ་དང་ནད་པ་སོགས་སྡུག་བསྔལ་གྱི་ཞིང་དང་། ཆོས་སྨྲ་བ་དང་ཕ་མ་ལ་སོགས་པ་བཤེས་རྣམས་ཏེ། ཕན་འདོགས་པའི་ཞིང་སྟེ། དེ་རྣམས་ལ་མཆོད་པ་དང་། ཕན་གདགས་པར་འདོད་པས། སྦྱིན་པ་ཚུལ་བཞིན་ཏེ་གུས་པ་དང་བཅས་པས་བསྩལ་པར་བགྱི་སྟེ། དེ་ལྟ་བུའི་སྦྱིན་པ་ལས་མ་འོངས་པ་ན་འབྲས་བུ་ཆེན་པོ་འབྱུང་བའི་ཕྱིར། འཇིག་རྟེན་ཕ་རོལ་ཏུ་སྦྱིན་པ་ལས་གཞན་པའི་ཕན་ཆེར་འདོགས་པའི་གཉེན་མཆོག་མ་མཆིས་སོ། །

ཇི་སྐད་དུ། དབུ་མ་ལ་འཇུག་པར། སྐྱེ་བོ་ཚུལ་ཁྲིམས་རྐང་པ་ཆག་གྱུར་ན། །སྦྱིན་པས་ལོངས་སྤྱོད་ལྡན་ཡང་ངན་འགྲོར་ལྟུང་། །སྐྱེད་བཅས་རྩ་བ་ཡོངས་སུ་ཟད་པས་ན། །ཕྱིན་ཆད་དེ་ལ་ལོངས་སྤྱོད་འབྱུང་མི་འགྱུར། །ཅེས་གསུངས་པ་ལྟར། ཚུལ་ཁྲིམས་དང་བྲལ་བའི་སྦྱིན་པའི་འབྲས་བུ་ནི། ངན་སོང་གི་རྟེན་ལ་ལོངས་སྤྱོད་པས་ན། ཕྱི་མའི་འབྲས་བུའི་དོན་དུ་སྦྱིན་པ་གཞན་སྤེལ་བར་མི་བྱེད་པས། དེ་ཉིད་རྒྱུན་ཆད་པར་འགྱུར་ལ། ཡོན་ཏན་ཚུལ་ཁྲིམས་ཞིང་དུ་རྣམས་འཕེལ་ན། །འབྲས་བུ་ཉེར་སྤྱོད་ཆད་པ་མེད་པར་འགྱུར། །ཅེས་གསུངས་པ་ལྟར། ཚུལ་ཁྲིམས་དང་ལྡན་པའི་སྦྱིན་པས་ནི། ལྷ་མིའི་རྟེན་ལ་འབྲས་བུ་ལོངས་སྤྱོད་ཆེན་པོ་འབྱུང་ལ། དེར་ཡང་ཚུལ་ཁྲིམས་ཀྱིས་ཟིན་པའི་སྦྱིན་པ་གཞན་བཏང་བས། སྐྱེ་བ་གཞན་དུ་རྣམ་སྨིན་རྒྱ་ཆེན་པོ་ལོངས་སྤྱོད་པ་རྒྱུན་མི་ཆད་པར་འགྱུར་རོ། །དེའི་ཕྱིར་སྦྱིན་པ་ལ་སོགས་པའི་བསོད་ནམས་གཞན་ཆུད་མི་ཟ་བའི་ཕྱིར། དེའི་རྟེན་ཚུལ་ཁྲིམས་བསྲུང་བར་གདམས་པ་ནི། ཁྱོད་ཀྱིས་ཚུལ་ཁྲིམས་མ་ཉམས་མོད་མི་དམའ། །མ་འདྲེས་མ་སྦགས་པ་དག་བསྟེན་པར་མཛོད། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལགས་པར་གསུངས། །ཞེས་གསུངས་ཏེ། ཁྱོད་ཀྱིས་ཚུལ་ཁྲིམས་བསྟེན་པར་མཛོད་ཅེས་སྦྲེལ་ལོ། ཁྱད་པར་ཇི་ལྟ་བུ་ཅན་ཞེ་ན། ཡང་དག་པར་བླངས་པའི་བསླབ་པའི་གཞི་གཅིག་ལས་ཀྱང་མ་འདས་པའི་ཕྱིར་མ་ཉམས་པ་དང་། མང་པོ་ལས་མ་འདས་པའི་ཕྱིར་མོད་མི་དམའ་བ་དང་། མི་དགེ་བའི་རྟོག་པ་དང་མ་འདྲེས་པའི་ཕྱིར་མ་འདྲེས་པ་དང་། སྲིད་པ་དང་ལོངས་སྤྱོད་ཀྱི་ཆེད་དུ་མ་བསྔོས་པས་མ་སྦགས་པ་དང་། ཚུལ་ཁྲིམས་དེ་ཉིད་རྣམ་པ་གཞན་དུ་མི་འགྱུར་བའི་ཕྱིར་མ་གོས་པ་དང་། དེ་ལྟ་བུའི་ཡོན་ཏན་དང་ལྡན་པའི་ཚུལ་ཁྲིམས་དེ་ནི། སྲིད་པའི་བྲན་ཉིད་ལས་ཐར་བའི་ཕྱིར་རང་དབང་ཡོད་པ་དང་དེས་ན་ཚུལ་ཁྲིམས་དེ་ལ་མཁས་པ་འཕགས་པ་རྣམས་ཀྱིས་བསྔགས་པ་ཡང་ཡིན་ལ། ཏིང་ངེ་འཛིན་སྒྲུབ་པ་ཡང་ཡིན་ཏེ། ཚུལ་ཁྲིམས་དང་ལྡན་ན་སེམས་མཉམ་པར་འཇོག་པའི་ཕྱིར་རོ། །ཡང་ན་མཛོད་ལས། འཆལ་ཁྲིམས་དེའི་རྒྱུས་འཕེན་མ་བྱུང་། །དེ་གཉེན་པོ་དང་ཞི་ལ་བརྟེན། །ཅེས་པ་ལྟར། འདིས་ཚུལ་ཁྲིམས་ཡོན་ཏན་བཞི་ལྡན་བསྟན་ཏེ། འདི་ལྟར། འཆལ་བའི་ཚུལ་ཁྲིམས་ཀྱི་ཉེས་པས་མ་གོས་པས་མ་ཉམས་པ་དང་། དེའི་རྒྱུ་ཉོན་མོངས་པས་མ་གོས་པས་མོད་མི་དམའ་བ་དང་། ཉོན་མོངས་པའི་གཉེན་པོ་མི་སྡུག་པ་བསྒོམ་པ་ལ་སོགས་པ་ལ་བརྟེན་པས་མ་འདྲེས་པ་དང་། ཞི་བ་མྱང་འདས་ཀྱི་བསམ་པས་ཟིན་པས་མ་སྦགས་པའོ། །དེ་ལྟ་བུའི་ཚུལ་ཁྲིམས་བསྟེན་པ་ལ་ཡོན་ཏན་ཅི་ཡོད་ཅེ་ན། འགྲོ་བ་རྒྱུ་བ་དང་མི་རྒྱུ་བ་ཀུན་གྱི་གཞི་རྟེན་ས་ཡིན་པ་བཞིན་དུ། ཚུལ་ཁྲིམས་ཀྱང་ཏིང་ངེ་འཛིན་དང་ཤེས་རབ་ལ་སོགས་པ་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་ཀུན་གྱི་གཞི་རྟེན་ལགས་པར་སྟོན་པས་གསུངས་པའི་ཕྱིར་ཏེ། ཚུལ་ཁྲིམས་དང་ལྡན་པ་ནི་འགྱོད་པ་མེད་པ་ལ་སོགས་པས་རིམ་གྱིས་ཏིང་ངེ་འཛིན་འཐོབ་ལ། སེམས་མཉམ་པར་བཞག་པས་ནི་ཡང་དག་པ་ཇི་ལྟ་བ་བཞིན་མཐོང་བའི་ཡེ་ཤེས་སྐྱེ་ལ་དེ་ལས་ཀྱང་ཉོན་མོངས་པ་སྤངས་པའི་རྣམ་གྲོལ་འཐོབ་པའི་ཕྱིར་རོ། །

གསུམ་པ་བྱེ་བྲག་ཏུ་ཐེག་ཆེན་གྱི་ལམ་ཕ་རོལ་ཏུ་ཕྱིན་པ་དྲུག་ལ་གནས་པར་གདམས་པ་ནི། དེ་ལྟར་ཐོག་མར་དགེ་བ་བཅུ་དང་། སྦྱིན་པ་དང་ཚུལ་ཁྲིམས་ཀྱིས་རྒྱུད་ཡོངས་སུ་སྦྱངས་ནས། དེའི་འོག་ཏུ་ཐེག་པ་ཆེན་པོའི་ལམ་ཕ་རོལ་ཏུ་ཕྱིན་པ་དྲུག་ལ་ཚུལ་བཞིན་དུ་བསླབ་པར་བྱའོ་ཞེས་བསྟན་པའི་ཕྱིར། སྦྱིན་དང་ཚུལ་ཁྲིམས་བཟོད་བརྩོན་བསམ་གཏན་དང་། །དེ་བཞིན་ཤེས་རབ་གཞལ་མེད་ཕ་རོལ་ཕྱིན། །འདི་དག་རྒྱས་མཛོད་སྲིད་པའི་རྒྱ་མཚོ་ཡི། །ཕ་རོལ་ཕྱིན་པའི་རྒྱལ་བའི་དབང་པོ་མཛོད། །ཅེས་གསུངས་ཏེ། བྱང་ཆུབ་ཀྱི་སེམས་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པའི་ལུས་དང་ལོངས་སྤྱོད་སོགས་བདོག་པ་ཐམས་ཅད་ཡོངས་སུ་གཏོང་བའི་སྦྱིན་པ་དང་། དགེ་བའི་བྱ་བ་ལ་སྤྲོ་བའི་བརྩོན་འགྲུས་དང་། དགེ་བ་ལ་སེམས་རྩེ་གཅིག་པའི་བསམ་གཏན་དང་། ཡང་དག་པ་ཇི་ལྟ་བ་བཞིན་དུ་ཤེས་པའི་ཤེས་རབ་རྣམས། བྱང་ཆུབ་ཀྱི་སེམས་ཀྱིས་ཟིན་པས་ཉན་རང་རྣམས་ཀྱི་སྤྱོད་ཡུལ་མ་ཡིན་པའི་ཕྱིར་གཞལ་མེད་དང་། འཁོར་གསུམ་མི་རྟོག་པས་ཤེས་རབ་ཀྱི་མུ་མཐར་ཕྱིན་པའི་ཕྱིར་ཕ་རོལ་ཏུ་ཕྱིན་པ་ཞེས་ཀྱང་བྱ་སྟེ། འདི་དག་རྒྱས་པ་སྟེ། གོང་ནས་གོང་དུ་ཁྱད་པར་དུ་འགྲོ་བའི་ཚུལ་གྱིས་བསྒྲུབ་པར་མཛོད་ལ། བདག་ཉིད་སྲིད་པའི་རྒྱ་མཚོ་ཡི་ཕ་རོལ་ཏུ་ཕྱིན་ནས། གཞན་དག་ཀྱང་ཕྱིན་པར་མཛད་པའི་རྒྱལ་བའི་དབང་པོ་སྟེ། སངས་རྒྱས་ཉིད་ཐོབ་པར་མཛོད་ཅིག་ཅེས་པའོ། །དེ་ལ་སྦྱིན་པ་དང་ཚུལ་ཁྲིམས་དང་བཟོད་པ་རྣམས་ནི་བསོད་ནམས་ཀྱི་ཚོགས་ཡིན་ལ། བྱང་ཆུབ་སེམས་དཔའ་འཁོར་བ་ན་གནས་པའི་ཚེ། མངོན་མཐོའི་བདེ་བ་ཕུན་ཚོགས་སྒྲུབ་པར་བྱེད་ཅིང་། མངོན་པར་རྫོགས་པར་སངས་རྒྱས་པ་ན་གཞན་དོན་ཕུན་ཚོགས་གཟུགས་ཀྱི་སྐུའི་རྒྱུ་ཡིན་ཏེ། དེ་སྐད་དུ་ཡང་དབུ་མ་འཇུག་པར། སྦྱིན་སོགས་ཆོས་གསུམ་འདི་དག་ཕལ་མོ་ཆེ། །བདེ་བར་གཤེགས་པས་ཁྱིམ་པ་རྣམས་ལ་བསྔགས། །བསོད་ནམས་ཞེས་བྱའི་ཚོགས་ཀྱང་འདི་ཉིད་དེ། །སངས་རྒྱས་གཟུགས་ཀྱི་བདག་ཉིད་སྐུ་ཡི་རྒྱུ། །ཞེས་གསུངས་སོ། །བསམ་གཏན་དང་ཤེས་རབ་ནི་ཡེ་ཤེས་ཀྱི་ཚོགས་ཡིན་ལ། བྱང་ཆུབ་སེམས་དཔའ་འཁོར་བ་ན་གནས་པའི་ཚེ་འཁོར་བའི་ཉེས་པས་མི་གོས་ཤིང་། གཞན་རྗེས་སུ་འཛིན་པའི་རྒྱུ་ཡིན་ལ། མངོན་པར་རྫོགས་པར་སངས་རྒྱས་པའི་ཚེ་རང་དོན་ཕུན་ཚོགས་ཆོས་ཀྱི་སྐུའི་རྒྱུ་ཡིན་ཏེ། རིན་ཆེན་འཕྲེང་བ་ལས། སངས་རྒྱས་རྣམས་ཀྱི་གཟུགས་ཀྱི་སྐུ། །བསོད་ནམས་ཚོགས་ལས་འཁྲུངས་པ་སྟེ། །ཆོས་ཀྱི་སྐུ་དེ་མདོར་བསྡུ་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་གསུངས་པ་ལྟར་རོ། །བརྩོན་འགྲུས་ནི། ཚོགས་གཉིས་ཀའི་རྒྱུ་ཡིན་ཏེ། འཇུག་པར། ཡོན་ཏན་ཐམས་ཅད་བརྩོན་འགྲུས་རྗེས་འགྲོ་ཞིང་། །བསོད་ནམས་བློ་གྲོས་ཚོགས་ནི་གཉིས་ཀྱི་རྒྱུ། །བརྩོན་འགྲུས་གང་དུ་འབར་བར་གྱུར་པ་ཡི། །ས་དེ་བཞི་པ་འོད་འཕྲོ་ཞེས་བྱའོ། །ཞེས་གསུངས་པ་ལྟར་རོ། །དེ་ལྟར་ན་ཕ་རོལ་ཏུ་ཕྱིན་པ་དྲུག་གིས་ཚོགས་གཉིས་བསྡུས་ལ། ཚོགས་གཉིས་ཀྱིས་ཀྱང་བྱང་ཆུབ་སེམས་དཔའི་འཁོར་བ་དང་མྱ་ངན་ལས་འདས་པའི་གནས་སྐབས་ཀྱི་ཕུན་སུམ་ཚོགས་པ་ཐམས་ཅད་མ་ཚང་བ་མེད་པར་འགྲུབ་པའི་ཕྱིར། ཐེག་པ་ཆེན་པོའི་ལམ་ཐམས་ཅད་ཕ་རོལ་ཏུ་ཕྱིན་པ་དྲུག་ཏུ་འདུས་པ་ཡིན་ནོ། །

གཉིས་པ་ཁྱིམ་པ་ལ་གཙོ་ཆེར་གདམས་པ་ལ་དགུ་ཡོད་པའི་དང་པོ་ཕ་མ་ལ་གུས་པར་བྱ་བ་ནི། གང་ལ་ཕ་དང་མ་དག་མཆོད་པ་ཡི། །རིགས་དེ་ཚངས་བཅས་སློབ་དཔོན་བཅས་པའང་ལགས། །དེ་དག་ལ་མཆོད་གྲགས་པར་འགྱུར་བ་དང་། །སླད་མ་ལ་ཡང་མཐོ་རིས་འགྱུར་བ་ལགས། །ཞེས་གསུངས་ཏེ། རིགས་གང་ལ་ཕ་དང་མ་ལ་གུས་པས་མཆོད་པ་དང་བཅས་པའི་རིགས་དེ་མི་དང་མི་མ་ཡིན་པས་བྱས་པའི་གནོད་པ་མེད་པ་དང་། ལྷས་བྱིན་གྱིས་བརླབས་པས་ཚངས་པ་དང་བཅས་པ་དང་། བླ་མའི་ཁྱད་པར་གྱིས་བྱིན་གྱིས་བརླབས་པས་སློབ་དཔོན་དང་བཅས་པ་དང་། མཐོང་ཆོས་ཀྱི་ཡོན་ཏན་ཚེ་འདིར་ཡང་སྙན་པའི་གྲགས་པ་འབྱུང་བར་འགྱུར་བ་དང་། ཕྱི་མའི་ཡོན་ཏན་འཇིག་རྟེན་ཕ་རོལ་ཏུ་ཡང་རྣམ་པ་ཀུན་ཏུ་མཐོ་རིས་ཐོབ་པར་འགྱུར་བ་ལགས་པས་ཁྱིམ་ན་གནས་པ་དག་གིས་བསྒྲིམས་ཏེ་ཕ་མ་ལ་བསྙེན་བཀུར་བགྱིའོ། །ཞེས་པའོ། །གཉིས་པ་བསྙེན་གནས་ལ་གནས་པར་བྱ་བ་ནི། ཁྱིམ་ན་གནས་པས་དུས་ཐམས་ཅད་དུ་ཚངས་པར་སྤྱོད་པ་བྱ་དཀའ་བས། ཉིན་ཞག་གཅིག་པའི་ཚངས་སྤྱོད་ལ་སྦྱར་བའི་ཆེད་དུ། གསོ་སྦྱོང་ཡན་ལག་བརྒྱད་པ་བསྟན་པའི་ཕྱིར། འཚེ་དང་ཆོམ་རྐུན་འཁྲིག་པ་བརྫུན་དང་ནི། །ཆང་དང་དུས་མིན་ཟས་ལ་ཆགས་པ་དང་། །མལ་སྟན་མཐོ་ལ་དགའ་དང་གླུ་དག་དང་། །གར་དང་ཕྲེང་བའི་ཁྱད་པར་རྣམས་སྤོང་ཞིང་། །དགྲ་བཅོམ་ཚུལ་ཁྲིམས་རྗེས་སུ་བྱེད་པ་ཡི། །ཡན་ལག་བརྒྱད་པོ་འདི་དག་དང་ལྡན་ན། །གསོ་སྦྱོང་འདོད་སྤྱོད་ལྷ་ལུས་ཡིད་འོང་བ། །སྐྱེས་པ་བུད་མེད་དག་ལ་སྩོལ་བར་བགྱིད། །ཅེས་གསུངས་ཏེ། འཚེ་བ་སྲོག་གཅོད་པ་དང་། ཆོམ་རྐུན་དང་། མ་བྱིན་པར་ལེན་པ་དང་། འཁྲིག་པ་མི་ཚངས་པར་སྤྱོད་པ་དང ། བརྫུན་དུ་སྨྲ་བ་དང་། འབྲུའི་ཆང་དང་མྱོས་པར་འགྱུར་བ་བག་མེད་པའི་གནས་དང་། དུས་མ་ཡིན་པའི་ཟས་དང་། མལ་སྟན་མཐོན་པོ་ཁྲི་དང་ཁྲིའུ་ཁྲུ་གང་གི་ཚད་ལས་ལྷག་པ་དང་། གླུ་གར་དང་ནད་གསོ་བའི་དོན་མ་གཏོགས་པར་སྤོས་དང་། ཕྲེང་བའི་ཁྱད་པར་རྣམས་ཉིན་ཞག་གཅིག་ཏུ་སྤོང་བའི་སྒོ་ནས། སྔོན་གྱི་དགྲ་བཅོམ་པ་རྣམས་ཀྱི་ཚུལ་ཁྲིམས་ཀྱི་རྗེས་སུ་བྱེད་པའི་ཡན་ལག་བརྒྱད་པོ་འདི་དག་ནི་གསོ་སྦྱོང་ཞེས་བྱ་ལ། དེའི་རྣམ་པར་སྨིན་པ་ནི་ཕྱི་མ་ལ་འདོད་པ་ན་སྤྱོད་པའི་ལྷ་རིས་དྲུག་གི་ལུས་ཡིད་དུ་འོང་བ་སྩོལ་བར་བགྱིད་དེ། སུ་ལ་ཞེ་ན། ཚུལ་ཁྲིམས་དེ་དང་ལྡན་པའི་གླིང་གསུམ་གྱི་སྐྱེས་པ་དང་བུད་མེད་དག་ལ་ཞེས་ཏེ། གཞན་ལ་སོ་སོར་ཐར་པའི་སྡོམ་པ་མེད་པའི་ཕྱིར་རོ། །བསྙེན་གནས་ཀྱི་སྡོམ་པ་ནི་ཡན་ལག་ལྔས་བསྡུས་ཏེ། འདི་ལྟར་གཞན་ལ་གནོད་པ་སྤོང་བ་ཡང་དག་པར་ལེན་པའི་ཡན་ལག་དང་། བདག་དང་གཞན་ལ་གནོད་པ་སྤོང་བ་ཡང་དག་པར་ལེན་པའི་ཡན་ལག་དང་། ཡང་དག་པར་བླངས་པ་ལས་ཉམས་པ་རྣམས་ཕྱིར་གསོ་བའི་ཡན་ལག་དང་། དེ་ལ་གཞན་གྱི་སྲོག་དང་ལོངས་སྤྱོད་ལ་གནོད་པ་སྤོང་བ་དང་། ཡང་དག་པར་བླངས་པ་ལས་མི་ཉམས་པར་བྱ་བའི་ཕྱིར་དྲན་པ་ཉེ་བར་འཇོག་པའི་ཡན་ལག་དང་། དྲན་པ་རྨོངས་པར་མི་འགྱུར་བའི་ཡན་ལག་གོ །དེ་ལ་གཞན་གྱི་སྲོག་དང་ལོངས་སྤྱོད་ལ་གནོད་པ་སྤོང་བ་ཡན་ལག་དང་པོའོ། །མི་ཚངས་པར་སྤྱོད་པ་སྤོང་བ་ནི་ཡན་ལག་གཉིས་པ་ཡིན་ཏེ། འདི་ལྟར་དེ་སྤངས་པ་ནི་རང་གི་ཆུང་མ་ལ་མི་བརྟེན་པས་བདག་ལ་གནོད་པར་མི་འགྱུར་ཞིང་། གཞན་གྱི་ཆུང་མ་ལ་མི་བརྟེན་པས་གཞན་ལ་གནོད་པར་མི་འགྱུར་བའི་ཕྱིར་རོ། །བརྫུན་དུ་སྨྲ་བ་སྤོང་བ་ནི་ཡན་ལག་གསུམ་པ་ཡིན་ནོ། །མྱོས་འགྱུར་སྤོང་བ་མ་གཏོགས་པ། དེ་ལས་གཞན་པའི་གནས་གསུམ་སྤོང་བ་ནི་ཡན་ལག་བཞི་པ་ཡིན་ཏེ། འདི་ལྟ་དེ་རྟག་ཏུ་གར་དང་། གླུ་དང་། རོལ་མོའི་སྒྲ་དང་། སྤོས་དང་། ཕྲེང་བ་དང་། ཁྲི་སྟན་མཐོན་པོ་དང་། དུས་མ་ཡིན་པའི་ཟས་ལ་བརྟེན་པ་དེ་དག་གིས་བདག་ཉིད་དབེན་པར་ཡུད་ཙམ་ཡུད་ཙམ་ལ་མཐོང་བ་ན། བདག་ཉིད་གསོ་སྦྱོང་གིས་གསོ་སྦྱོང་བྱའོ་སྙམ་དུ་དུས་རྟག་ཏུ་དྲན་པ་ཉེ་བར་གནས་པར་འགྱུར་བའི་ཕྱིར་རོ། །མྱོས་འགྱུར་སྤོང་བ་ནི་ཡན་ལག་ལྔ་པ་ཡིན་ཏེ། དེ་ལྟར་བདག་ནི་དྲན་པ་ཉེ་བར་བཞག་སྟེ་གནས་པ་ཡིན་ནོ་སྙམ་དུ་སེམས་ཀྱང་ཡན་ལག་དེ་ནི། ཆང་གི་མྱོས་པས་མྱོས་ཤིང་རྨོངས་ཏེ་རང་དབང་མེད་པར་འཇུག་པར་འགྱུར་བའི་ཕྱིར་རོ། །ཅིའི་ཕྱིར་བསྙེན་གནས་པའི་སྡོམ་པ་ལ་གསེར་དངུལ་ལེན་པ་སྤོང་བ་ཡན་ལག་ཏུ་མ་བཞག་ལ། དགེ་ཚུལ་གྱི་སྡོམ་པ་ལ་དེ་སྤོང་བ་ཡན་ལག་ཏུ་བཞག་ཅེ་ན། དགེ་ཚུལ་ནི་རབ་ཏུ་བྱུང་བའི་ཕྱོགས་ལ་གནས་པས། རབ་ཏུ་བྱུང་བ་ལ་ནི་གནས་གཉིས་ཤིན་ཏུ་མི་མཛེས་ཤིང་། ཚུལ་དང་མི་མཐུན་པ་ཡིན་ཏེ། འདི་ལྟར་འདོད་པ་བསོད་ཉམས་ཀྱི་མཐར་ལྷུང་བ་རྩེད་མོའི་དགའ་བ་དང་ཆ་སྒེག་ཇི་ལྟར་འདོད་པ་བཞིན་དུ་སྤྱོད་པ་ལ་བརྩོན་པ་དང་། གསོག་འཇོག་གི་ལོངས་སྤྱོད་པའོ། །དེ་ལ་ཚུལ་དང་མི་མཐུན་པའི་གནས་དང་པོ་སྤང་བའི་ཕྱིར་ནི། གར་དང་གླུ་དང་རོལ་མོའི་སྒྲ་ལ་སོགས་པ་ནས། དུས་མ་ཡིན་པའི་ཟས་ཀྱི་བར་དུ་སྤོང་བ་བཅས་སོ། །ཚུལ་དང་མི་མཐུན་པའི་གནས་གཉིས་པ་སྤང་བའི་ཕྱིར། གསེར་དངུལ་ལེན་པ་སྤོང་བ་བཅས་ཏེ། གསེར་དངུལ་ནི་གསོག་འཇོག་ཐམས་ཅད་ཀྱི་རྩ་བ་དང་གཙོ་བོ་ཡིན་པའི་ཕྱིར་རོ། ཁྱིམ་པའི་ཕྱོགས་ལ་ནི། དེ་ཙམ་དུ་ཉེས་པ་མི་ཆེ་ཞིང་། ཚུལ་དང་མི་མཐུན་པ་མེད་པས་དེའི་ཕྱིར་བསྙེན་གནས་ཀྱི་ཡན་ལག་ཏུ་གསེར་དངུལ་ལེན་པར་སྤོང་བ་མ་བཅས་སོ། །ཅིའི་ཕྱིར་གར་དང་གླུ་དང་རོལ་མོའི་སྒྲ་དང་སྤོས་དང་ཕྲེང་བ་དང་བྱུག་པ་འཆང་བ་གང་ཡིན་པ་བསྙེན་གནས་པའི་སྡོམ་པ་ལ་ཡན་ལག་གཅིག་ཏུ་བཅས་ལ། དགེ་ཚུལ་ལ་ནི་ཡན་ལག་གཉིས་སུ་མཛད་དེ་བཅས་ཞེ་ན། ཁྱིམ་པ་ལ་ཅི་ནས་ཀྱང་དེ་དང་འགལ་ན་ཉེས་པ་གཅིག་བཤགས་པར་ཟད་ཀྱི། གཉིས་མི་དགོས་པར་བྱ་བའི་ཕྱིར་ཡང་བར་མཛད་ནས་ཡན་ལག་གཅིག་ཏུ་བསྡུས་ལ། རབ་ཏུ་བྱུང་བའི་ཚུལ་དང་མི་མཐུན་པས་དེ་དང་འགལ་ན་ཉེས་པ་གཉིས་བཤགས་དགོས་ཤིང་གཅིག་མ་ཡིན་པས་ལྕི་བར་མཛད་ནས་ཡན་ལག་གཉིས་སུ་བཅས་སོ། །

གསུམ་པ་བསམ་པ་ཕྱིན་ཅི་ལོག་སྤོང་བ་ནི། ཁྱིམ་པ་རྣམས་ནི་བྱ་བ་ངན་པ་ལ་ཆགས་པས། སེར་སྣ་ལ་སོགས་པ་སེམས་ཀྱི་སྐྱོན་མང་དུ་འབྱུང་ལ། དེ་དག་ཀྱང་ངན་སོང་གི་རྒྱུ་ཡིན་པས། དེ་དག་ལས་བཟློག་པའི་ཕྱིར། སེར་སྣ་གཡོ་རྒྱུ་ཆགས་དང་སྙོམས་ལས་དང་། །མངོན་པའི་ང་རྒྱལ་འདོད་ཆགས་ཞེ་སྡང་དང་། །རིགས་དང་གཟུགས་དང་ཐོས་པ་ལང་ཚོ་དང་། །དབང་ཐང་ཆེ་བ་རྒྱལ་བས་དགྲ་བཞིན་གཟིགས། །ཞེས་གསུངས་ཏེ། རང་གི་ཡོ་བྱད་ཀུན་ཏུ་འཛིན་ཅིང་གཏོང་བ་དང་མི་མཐུན་པའི་སེར་སྣ་དང་། རང་གི་ཉེས་པ་བཀབ་པའི་ཐབས་འཛིན་པའི་གཡོ་དང་། གཞན་སླུ་བའི་དོན་དུ་ཡང་དག་པ་མ་ཡིན་པའི་ཡོན་ཏན་ཀུན་ཏུ་སྟོན་པའི་སྒྱུ་དང་། ལུས་དང་ལོངས་སྤྱོད་ལ་སྲེད་པའི་ཆགས་པ་དང་། དགེ་བ་སྒྲུབ་པ་ལ་མི་སྤྲོ་བའི་སྙོམས་ལས་དང་། ཡོན་ཏན་ཁྱད་པར་ཅན་མ་ཐོབ་པ་བདག་གིས་ཐོབ་བོ་སྙམ་དུ་སེམས་ཁེངས་པ་མངོན་པའི་ང་རྒྱལ་དང་། འཁྲིག་པ་ལ་སྲེད་པའི་འདོད་ཆགས་དང་། སེམས་ཅན་ལ་ཀུན་ནས་མནར་སེམས་པའི་ཞེ་སྡང་དང་ཆོས་བརྒྱད་པོ་དེ་དག་དང་། རིགས་ལ་སོགས་པ་ཆོས་ལྔ་ལ་ཆགས་པས་སེམས་ཁེངས་པའི་རྒྱགས་པ་སྟེ། མི་དགེ་བའི་ཆོས་བཅུ་གསུམ་པོ་དེ་དག་ནི། དགེ་བའི་སྲོག་འཕྲོག་པར་བྱེད་པས་དགྲ་དང་འདྲ་བར་གཟིགས་ཏེ། སྐད་ཅིག་ཀྱང་འགྲོགས་པར་མི་བྱའོ་ཞེས་པའོ། །ང་རྒྱལ་ནི་རིགས་སོགས་ཀྱི་ཡོན་ཏན་གཞན་དང་འཇལ་བས་སེམས་ཁེངས་པ་ཡིན་ལ། རྒྱགས་པ་ནི་གཞན་ལ་མི་ལྟོས་པར་རང་གི་རིགས་སོགས་ཀྱིས་སེམས་ཁེངས་པ་སྟེ། མཛོད་དུ། ང་རྒྱལ་ཁེངས་པ་རྒྱགས་པ་ནི། །རང་གི་ཆོས་ལ་ཆགས་པ་ཡིས། །སེམས་ནི་ཡོངས་སུ་གཏུགས་པའོ། །ཞེས་བཤད་དོ། །བཞི་པ་བག་ཡོད་པར་བྱ་བ་ནི། དགེ་བའི་ཆོས་རྣམས་ཀྱི་རྩ་བ་ནི། བག་ཡོད་པ་ཡིན་ལ། ཁྱིམ་པ་རྣམས་ལ་ཡང་བག་དང་བཅས་པར་བྱ་བ་ཡོད་པས། དེ་ལ་འགོད་པར་བཞེད་ནས། བག་ཡོད་བདུད་རྩིའི་གནས་དེ་བག་མེད་པ། །འཆི་བའི་གནས་སུ་ཐུབ་པས་བཀའ་བསྩལ་ཏེ། །དེ་བས་ཁྱོད་ཀྱི་དགེ་ཆོས་སྤེལ་སླད་དུ། །གུས་པས་རྟག་ཏུ་བག་དང་བཅས་པར་མཛོད། །ཅེས་གསུངས་ཏེ། དགེ་བའི་ཆོས་བསྒོམ་ཞིང་། ཟག་པ་དང་བཅས་པའི་ཆོས་རྣམས་ལ་སེམས་བསྲུང་བའི་མཚན་ཉིད་ཅན་གྱི་བག་ཡོད་པ་ནི་འཆི་བ་མེད་པའི་གོ་འཕང་མྱ་ངན་ལས་འདས་པ་བདུད་རྩིའི་གནས་ཡིན་ལ། ཇི་སྐད་བཤད་པ་ལས་བཟློག་པའི་བག་མེད་པ་ནི་འཁོར་བར་སྐྱེ་བ་དང་། འཆི་བའི་སྡུག་བསྔལ་མྱོང་བའི་གནས་ཡིན་ནོ། །ཞེས་ཐུབ་པས་བཀའ་བསྩལ་ཏེ། ཇི་སྐད་དུ། བག་ཡོད་བདུད་རྩིའི་གནས་ཡིན་ཏེ། །བག་མེད་པ་ནི་འཆི་བའི་གནས། །བག་ཡོད་འཆི་བར་མི་འགྱུར་ཏེ། །བག་མེད་པ་ནི་རྟག་ཏུ་འཆི། །ཞེས་གསུངས་པའི་ཕྱིར་རོ། །གང་གི་ཕྱིར་དེ་ལྟར་ཡིན་པ་དེ་བས་ན། ཁྱོད་ཀྱིས་དགེ་བའི་ཆོས་མ་སྐྱེས་པ་བསྐྱེད་པ་དང་། སྐྱེས་པ་གོང་ནས་གོང་དུ་སྤེལ་བའི་སླད་དུ་རྟག་ཏུ་དགེ་བའི་ཆོས་ལ་གོམས་པར་བྱེད་པའི་བག་ཡོད་དང་བཅས་པར་མཛོད་ཅིག ཅེས་པའོ། །

གལ་ཏེ་ཁྱོད་ཀྱིས་ཁོ་བོའི་དོན་བྱེད་པར་འདོད་ན་དང་པོ་ཉིད་ནས་དགེ་བ་ལ་བསྐུལ་བའི་གདམས་པ་འདི་ཅིའི་ཕྱིར་མ་སྨྲས། ཁོ་བོ་སྔར་བག་མེད་པར་གྱུར་ཟིན་པས་ད་ཅི་བྱར་ཡོད་སྙམ་ན། གང་ཞིག་སྔོན་ཆད་བག་མེད་གྱུར་པ་ལས། །ཕྱི་ནས་བག་དང་ལྡན་པར་གྱུར་དེ་ཡང་། །ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ། །དགའ་བོ་སེར་ཕྲེང་མཐོང་ལྡན་བདེ་བྱེད་བཞིན། །ཞེས་གསུངས་ཏེ། སྐྱེས་བུ་གང་ཞིག་སྔོན་ཆད་ཉོན་མོངས་པས་ཟིལ་གྱིས་མནན་པའམ་སྡིག་པའི་གྲོགས་པོའི་དབང་གིས་མི་དགེ་བ་བྱུང་རྒྱལ་དུ་སྤྱད་དེ་བག་མེད་པར་གྱུར་ཏུ་ཟིན་པ་ལས། ཕྱིས་དགེ་བའི་བཤེས་གཉེན་དང་ཕྲད་དེ་བླང་དོར་ལ་གཟོབ་པ་ལྷུར་ལེན་པའི་སྒོ་ནས་བག་ཡོད་པ་དང་ལྡན་པར་གྱུར་པ་དེ་ཡང་། ཟླ་བ་སྤྲིན་གྱི་སྒྲིབ་གཡོགས་དང་བྲལ་བ་ལྟར་ཤིན་ཏུ་མཛེས་སོ། །དེ་ལྟ་བུའི་སེམས་ཅན་འགའ་མཐོང་ངམ་ཞེ་ན། མཐོང་སྟེ། དཔེར་ན། དགའ་བོ་ཞེས་བྱ་བ་བཅོམ་ལྡན་འདས་ཀྱི་གཅུང་ཤཱཀྱ་གཞོན་ནུ་འདོད་ཆགས་ཅན་ཞིག་སྟེ། དེ་རང་གི་ཆུང་མ་དང་སྐད་ཅིག་ཙམ་ཡང་འབྲལ་མི་ཕོད་པ་ན། དེ་བཞིན་གཤེགས་པས་རབ་ཏུ་བྱུང་སྟེ། དེ་དེའི་ཚེའང་ཉིན་མཚན་དུ་རང་གི་ཆུང་མ་ལ་རྟོག་གིས། དགེ་བ་ལ་མ་ཡིན་པ་ན། བཅོམ་ལྡན་འདས་ཀྱིས་དམྱལ་བའི་འཇིགས་པ་མངོན་སུམ་དུ་བསྟན་ཏེ། སྐྲག་པ་བསྐྱེད་ནས་ལམ་བསྒོམ་དུ་བཅུག་པས་དགྲ་བཅོམ་པ་ཐོབ་སྟེ། ཉན་ཐོས་དབང་པོའི་སྒོ་བསྡམས་པ་རྣམས་ཀྱི་མཆོག་ཏུ་ལུང་བསྟན་ཏོ། །སོར་མོའི་ཕྲེང་བ་ནི། བྲམ་ཟེའི་ཁྱིའུ་ཞིག་སྟེ། དེ་བླུན་པ་ཞིག་ཡིན་པས་མཁན་པོས་མི་སྟོང་བསད་དེ་སོར་མོའི་ཕྲེང་བ་བྱས་ན་ཆོས་སུ་འགྱུར་རོ་ཞེས། ཆོས་མ་ཡིན་པ་བསྟན་པས་བསླུས་ཏེ། མི་སྟོང་དུ་གཅིག་གིས་མ་ཚང་བ་བསད་པ་ལས། དེ་བཞིན་གཤེགས་པས་རབ་ཏུ་བྱུང་སྟེ་དགྲ་བཅོམ་པ་ཐོབ་བོ། །མཐོང་ལྡན་ནི་མ་སྐྱེས་དགྲ་སྟེ། དེ་ཡང་སྡིག་པའི་གྲོགས་པོ་ལྷ་སྦྱིན་དང་ཕྲད་པས་ཕ་ཆོས་དང་ལྡན་པའི་རྒྱལ་པོ་བསད་པ་སོགས་སྡིག་པ་མང་དུ་བྱས་པ་ལས། ཕྱིས་སྟོན་པ་ལ་དད་པ་ཐོབ་པས། སྡིག་པའི་འབྲས་བུ་ལས་ཐར་ཏེ། བཅོམ་ལྡན་འདས་ཀྱིས་དགེ་བསྙེན་དད་པ་ཅན་རྣམས་ཀྱི་མཆོག་ཏུ་ལུང་བསྟན་ཏོ། །བདེ་བྱེད་ནི་གཞན་གྱི་ཆུང་མ་ལ་ཉལ་པོ་བྱེད་དུ་འགྲོ་བ་མས་བཟློག་པས། མ་བསད་པ་ཞིག་སྟེ། རབ་ཏུ་བྱུང་བ་ན་མཚམས་མེད་བྱས་པར་ཤེས་ནས། དགེ་འདུན་གྱིས་བསྐྲད་པ་ལས། མཐའ་འཁོབ་ཏུ་ཕྱིན་ནས་གཙུག་ལག་ཁང་བརྩིགས་ཏེ་བསྡད་པས། དེ་ལ་བརྟེན་ནས་རང་བཞིན་དུ་གནས་པའི་དགེ་སློང་མང་པོ་འདུས་པ་ན། དེས་དགེ་འདུན་གྱི་གནས་བརྟན་བྱས་ཏེ། དགེ་འདུན་ཚུལ་བཞིན་དུ་བསྐྱངས་པས། ཚེ་འཕོས་ནས་མཚམས་མེད་པའི་རྣམ་སྨིན་གྱིས། དམྱལ་བར་ཕོ་ལོང་བརྡབས་པ་ཙམ་ཞིག་སྐྱེས་ཏེ། དེ་ནས་ཤི་འཕོས་ནས་ལྷར་སྐྱེསཏེ་བཅོམ་ལྡན་འདས་ཀྱི་ཐད་དུ་རྒྱུན་དུ་ཞུགས་པའི་འབྲས་བུ་ཐོབ་པར་བཤད་དོ། །

ལྔ་པ་བཟོད་པ་ལ་གནས་པར་བྱ་བ་ནི། ཁྱིམ་པ་རྣམས་ནི་མི་འདོད་པ་དུ་མ་ཐོག་ཏུ་བབ་པའི་དབང་གིས་ཁྲོ་བ་མང་བས། དེ་ལས་བཟློག་སྟེ་བཟོད་པའི་ཡོན་ཏན་བསྟན་པའི་ཕྱིར། འདི་ལྟར་བཟོད་མཚུངས་དཀའ་ཐུབ་མ་མཆིས་པས། ཁྱོད་ཀྱིས་ཁྲོ་བའི་གོ་སྐབས་དབྱེ་མི་བགྱི། ཁྲོ་བ་སྤངས་པས་ཕྱིར་མི་ལྡོག་པ་ཉིད། །ཐོབ་པར་འགྱུར་བར་སངས་རྒྱས་ཞལ་གྱིས་བཞེས། །ཞེས་གསུངས་ཏེ། བཟོད་པ་ནི། འདིར་གནོད་པ་ལ་མི་ཁྲོ་ཞིང་། ཁྲོ་བ་སྐྱེས་ཀྱང་རྒྱུན་མི་འཛིན་པ་སྟེ། དེ་དང་མཚུངས་པའི་དཀའ་ཐུབ་གཞན་འགའ་ཡང་མ་མཆིས་པས་དེ་ཁོ་ན་དཀའ་ཐུབ་ཀྱི་མཆོག་ཡིན་ཏེ། མེ་དང་ཆུར་འཇུག་པ་དང་། རྩ་བ་དང་འབྲས་བུ་ཟ་བ་དང་། ཤིང་ཤུན་དང་ལོ་མ་གྱོན་པ་སོགས་ནི། ལུས་གདུང་བ་ཙམ་དུ་ཟད་ཀྱི། དེ་དག་ལས་མཐོ་རིས་ཀྱང་མི་ཐོབ་ན་ཐར་པ་ལྟ་ཅི་སྨོས། དེའི་ཕྱིར་དེ་དག་ནི་དཀའ་ཐུབ་མ་ཡིན་ནོ། །གང་གིས་ཕྱིར་བཟོད་པ་དེ་ལྟར་ཕན་ཡོན་ཆེ་བ་དེ་བས་ན། ཁྱོད་ཀྱིས་དཀའ་ཐུབ་ཀྱི་མཆོག་དེའི་མི་མཐུན་ཕྱོགས་ཁྲོ་བའི་གོ་སྐབས་ཅུང་ཟད་ཀྱང་དབྱེ་བར་མི་བགྱི་སྟེ། བཟོད་པ་བསྟེན་པའི་སྒོ་ནས་ཁྲོ་བ་སྤངས་པས་འདོད་པའི་ཁམས་སུ་ཕྱིར་མི་ལྡོག་པ་ཉིད་ཐོབ་པར་སངས་རྒྱས་ཀྱི་ཞལ་གྱིས་བཞེས་པའི་ཕྱིར་རོ། །དེ་ཡང་མདོ་ལས། དགེ་སློང་དག་འདི་ལྟ་སྟེ། ཁྲོ་བ་སྤོངས་ཤིག ཁྱོད་ཕྱིར་མི་ལྡོག་པའི་གཉའ་བོར་གྱུར་པ་ཡིན་ནོ། །ཞེས་གསུངས་པ་ལྟར་རོ། ཁྲོ་བ་དང་འདོད་པ་ལ་འདུན་པ་གཉིས་ནི། འདོད་ཁམས་ཀྱི་རྒྱུ་ཡིན་ལ། འདོད་པ་ལ་འདུན་པ་མ་སྤངས་པར་ཡང་། ཁྲོ་བ་སྤོངས་མི་ནུས་པས། དེའི་ཕྱིར་ཁྲོ་བ་སྤངས་པས་འདོད་པ་ལས་འདའ་བར་བཤད་དེ། དེ་ལྟར་དང་པོ་ཉིད་ནས་ཁྲོ་བའི་གོ་སྐབས་མི་དབྱེ་བར་བསྟན་ནས། གལ་ཏེ་ཁྲོ་བ་སྐྱེས་ན་ཡང་། དེའི་མོད་ལ་ཞི་བར་བྱ་སྟེ། འཁོན་དུ་གཟུང་བར་མི་བྱའོ་ཞེས་བསྟན་པའི་ཕྱིར། བདག་ནི་འདིས་སྤྱོས་འདིས་བཏགས་ཕམ་པར་བྱས། །འདི་ཡིས་བདག་ནོར་འཕྲོགས་པར་གྱུར་ཏོ་ཞེས། །འཁོན་དུ་འཛིན་པས་འཁྲུག་ལོང་རྣམས་བསྐྱེད་དེ། །འཁོན་འཛིན་རྣམ་སྤངས་བདེ་བར་གཉིད་ཀྱིས་ལོག །ཅེས་གསུངས་ཏེ། གང་གི་ཕྱིར་ཁྲོ་བའི་གོ་སྐབས་དབྱེ་བར་མི་བྱ་བ་དེའི་ཕྱིར། བདག་ནི་འདིས་ཚིག་ངན་པས་སྤྱོས་སོ། །འདིས་བདག་དབྱུག་པ་ལ་སོགས་པས་བཏགས་སོ། །འདིས་བདག་མཐུས་ཕམ་པར་བྱས་སོ། །འདི་ཡིས་བདག་གི་ནོར་ཕྲོགས་པར་གྱུར་ཏོ་ཞེས་གནོད་པའི་མཚན་མ་དམ་དུ་འཛིན་པ། འཁོན་དུ་འཛིན་པས་ལུས་ངག་གི་ཉེས་རྩོམ་དུ་གྱུར་པའི་འཁྲུག་ལོང་རྣམས་བསྐྱེད་ཅིང་སྡུག་བསྔལ་བར་བྱེད་ལ། དེ་ལྟ་བུའི་འཁོན་འཛིན་རྣམ་པར་སྤངས་པས་སེམས་ལ་སྡུག་བསྔལ་མེད་པའི་ཕྱིར། བདེ་བར་གཉིད་ཀྱིས་ལོག་པར་འགྱུར་བས་བསྒྲིམས་ཏེ་འཁོན་འཛིན་སྤང་བར་རིགས་སོ། །སྤྱོད་འཇུག་ལས་ཀྱང་། མདོར་ན་ཁྲོ་བས་བདེར་གནས་པ། །དེ་ནི་འགའ་ཡང་ཡོད་མིན་ཏེ། །ཞེས་དང་། གང་ཞིག་བསྒྲིམས་ཏེ་ཁྲོ་འཇོམས་པ། །དེ་ནི་འདི་དང་གཞན་དུ་བདེ། །ཞེས་གསུངས་པ་བཞིན་ནོ། །

དྲུག་པ་སྒོ་གསུམ་གྱི་སྤྱོད་པ་དམན་པ་སྤངས་ཏེ། བཟང་པོ་ལ་བསླབ་པར་གདམས་པ་ནི། སོ་སོ་སྐྱེ་བོ་རྣམས་ལ་ཇི་སྐད་བཤད་པའི་དགེ་བ་དང་མི་དགེ་བའི་སེམས་འདྲེས་མར་འབྱུང་བས། དགེ་བའི་སེམས་རྣམས་ནི་བརྟན་པར་བྱ་ལ། མི་དགེ་བའི་སེམས་རྣམས་ནི་མི་བརྟན་པར་བྱའོ་ཞེས་བསྟན་པའི་ཕྱིར། སེམས་ནི་ཆུ་དང་ས་དང་རྡོ་བ་ལ། །རི་མོ་བྲིས་པ་དེ་འདྲར་རིག་པར་བགྱི། །དེ་ནང་ཉོན་མོངས་ཅན་ལ་དང་པོ་ནི། །མཆོག་སྟེ་ཆོས་འདོད་རྣམས་ལ་ཐ་མ་ལགས། །ཞེས་གསུངས་ཏེ། སེམས་ཅན་གྱི་རིས་ན། སེམས་ཀྱི་འཇུག་པ་མི་བརྟན་པ་དང་། བརྟན་པའི་བྱེ་བྲག་ལས། ཆུ་ལ་རི་མོ་བྲིས་པ་དང་། ས་ལ་རི་མོ་བྲིས་པ་དང་། རྡོ་ལ་རི་མོ་བྲིས་པ་ཇི་ལྟར་བ་བཞིན་རྣམ་པ་གསུམ་དུ་རིག་པར་བགྱི་སྟེ། དེ་རྣམས་ཀྱི་ནང་ནས་ཉོན་མོངས་ཅན་གྱི་སེམས་ལ། དང་པོ་ཆུ་ལ་རི་མོ་བྲིས་པ་ལྟ་བུ་མི་བརྟན་པ་མཆོག་ཡིན་ལ། ཆོས་འདོད་དེ་དགེ་བའི་སེམས་རྣམས་ལ་ཐ་མ་རྡོ་ལ་རི་མོ་བྲིས་པ་ལྟར་བརྟན་པ་མཆོག་ལགས་པས་དེ་བཞིན་དུ་བསྒྲུབ་པར་བྱའོ། །ཇི་ལྟར་སེམས་ཅན་རྣམས་ཀྱི་སེམས་རྣམ་པ་གསུམ་ཡིན་པ་བཞིན་དུ། ངག་ཀྱང་རྣམ་པ་གསུམ་ཡིན་པས། དེ་དག་ལ་ཅི་རིགས་པར་བླང་དོར་བྱའོ་ཞེས་བསྟན་པའི་ཕྱིར། རྒྱལ་བས་སྙིང་ལ་འབབ་དང་བདེན་པ་དང་། །ལོག་པར་སྨྲ་ལྡན་སྐྱེས་བུ་རྣམས་ཀྱི་ནི། །སྦྲང་རྩི་མེ་ཏོག་མི་གཙང་ལྟ་བུའི་ཚིག །རྣམ་གསུམ་བཀའ་བསྩལ་དེ་ལས་ཐ་མ་སྤང་། །ཞེས་གསུངས་ཏེ། སྡིག་པའི་ཆོས་བཅོམ་པའི་རྒྱལ་བས་སྐྱེས་བུ་རྣམས་ཀྱི་ཚིག་རྣམ་པ་གསུམ་བཀའ་བསྩལ་ཏོ། །ཞེས་སྦྲེལ་ལོ། །གསུམ་གང་ཞེ་ན། སྙིང་ལ་འབབ་ཅིང་སྙམ་པ་དང་། བདེན་པ་དང་། ལོག་པར་སྨྲ་བའོ། །དེ་ལ་དང་པོ་ནི་དགའ་བར་བྱས་པས། སྦྲང་རྩི་ལྟ་བུ་དང་། གཉིས་པ་ནི། མཛེས་ཤིང་བསྔགས་པར་འོས་པས་མེ་ཏོག་ལྟ་བུ་དང་། གསུམ་པ་ནི། སྨད་པའི་ཕྱིར་མི་གཙང་བ་ལྟ་བུ་ཡིན་ཏེ། དེ་བས་ན་ཐ་མ་སྤང་ཞིང་། དང་པོ་གཉིས་བསྟེན་པར་བྱའོ། །སེམས་ཅན་འཁོར་བ་ན་གནས་པ་རྣམས་ཀྱི་སྤྱོད་པ་རྣམ་པ་བཞི་ཡོད་དེ། དེ་ལས་ཁྱོད་ཀྱིས་སྤྱོད་པ་མཆོག་ལ་གནས་པར་བྱའོ་ཞེས་བསྟན་པའི་ཕྱིར། སྣང་ནས་སྣང་བའི་མཐར་ཐུག་མུན་པ་ནས། །མུན་པའི་མཐར་ཐུག་སྣང་ནས་མུ་མཐར་ཐུག ། མུན་ནས་སྣང་བའི་མཐར་ཐུག་གང་ཟག་ནི། །བཞི་སྟེ་དེ་དག་རྣམས་ཀྱི་དང་པོ་མཛོད། །ཅེས་གསུངས་ཏེ། མདོ་ལས། སྣང་བ་ནས་སྣང་བར་འགྲོ་བ་ཞེས་སོགས་གང་ཟག་བཞི་གསུངས་ཏེ། འདི་ལྟར་ལྷ་དང་མི་དབང་ཐང་ཆེན་པོ་རྣམས་ཀྱི་ནང་དུ་སྐྱེས་ནས། ཡང་དེ་ཉིད་དུ་སྐྱེ་བ་སྣང་བ་ནས་སྣང་བའི་མཐར་ཐུག་པ་དང་། ངན་འགྲོའམ། མི་དབང་ཐང་ཆུང་ངུ་རྣམས་ཀྱི་ནང་དུ་སྐྱེས་ནས་ཡང་དེ་ཉིད་དུ་སྐྱེ་བ་མུན་པ་ནས་མུན་པའི་མཐར་ཐུག་པ་དང་། ལྷ་མི་དབང་ཐང་ཆེན་པོ་རྣམས་ཀྱི་ནང་དུ་སྐྱེས་ནས། ངན་སོང་གསུམ་དང་། མི་དབང་ཐང་ཆུང་ངུའི་ནང་དུ་སྐྱེ་བ་སྣང་བ་ནས་མུན་པའི་མཐར་ཐུག་པ་དང་། ངན་སོང་གསུམ་དང་མི་དབང་ཐང་ཆུང་ངུ་རྣམས་ཀྱི་ནང་དུ་སྐྱེས་ནས། ལྷ་དང་མི་དབང་ཐང་ཆེན་པོ་རྣམས་སུ་སྐྱེ་བ་མུན་པ་ནས་སྣང་བའི་མཐར་ཐུག་པར་འགྲོ་བ་སྟེ་བཞིའོ། །དེ་དག་ནང་ནས་དང་པོ་སྣང་བ་ནས་སྣང་བར་འགྲོ་བར་མཛོད་ཅིག་ཅེས་པའོ། །

བདུན་པ་གང་དང་འགྲོགས་པའི་མཚན་ཉིད་ཤེས་པར་བྱ་བ་ནི། ཁྱིམ་པ་རྣམས་ནི་སེམས་ཅན་མང་པོ་དང་འགྲོགས་དགོས་ཏེ། དེ་བས་ན་དེ་དག་ལ་ཅི་རིགས་པར་བསྒྲུབ་པར་བསྟན་པའི་ཕྱིར། མི་ནི་ཨ་མྲའི་འབྲས་བཞིན་མ་སྨིན་ལ། །སྨིན་པ་དང་འདྲ་སྨིན་ལ་མ་སྨིན་འདྲ། །མ་སྨིན་མ་སྨིན་པར་སྣང་སྨིན་ལ་ནི། །སྨིན་པ་སྣང་ཞེས་བགྱི་བར་འདྲར་རྟོགས་མཛོད། །ཅེས་གསུངས་ཏེ། མི་ནི་ཨ་མྲའི་འབྲས་བུ་བཞིན་དུ་ཚུལ་བཞི་ཡོད་པས། དེ་དག་གི་མཚན་ཉིད་ཤེས་པར་བྱས་ནས་སྤང་བླང་ཅི་རིགས་པར་བསྒྲུབ་པར་བྱའོ། །ཨ་མྲའི་འབྲས་བུ་ལ་ནི་ཚུལ་བཞི་ཡོད་དེ། ཁ་ཅིག་ནི་ནང་མ་སྨིན་ལ། ཕྱི་སྨིན་པ་འདྲ་བ་དང་། ཁ་ཅིག་ནི་ནང་སྨིན་ལ་ཕྱི་མ་སྨིན་པ་འདྲ་བ་དང་། ཁ་ཅིག་ནི་ནང་ཡང་མ་སྨིན་ལ་ཕྱི་ཡང་མ་སྨིན་པར་སྣང་བ་དང་། ཁ་ཅིག་ནི་ནང་ཡང་སྨིན་ལ་ཕྱི་ཡང་སྨིན་པར་སྣང་བའོ། །དེ་དང་འདྲ་བར་མི་ལ་ཡང་བཞི་ཡོད་པས། དང་པོ་ནི། བསམ་པ་ཉམས་ལ་སྦྱོར་བ་ཕུན་སུམ་ཚོགས་པའོ། །གཉིས་པ་ནི། དེ་ལས་བཟློག་པའོ། །གསུམ་པ་ནི། བསམ་སྦྱོར་གཉིས་ཀ་ཉམས་པའོ། །བཞི་པ་ནི། བསམ་སྦྱོར་གཉིས་ཀ་ཕུན་སུམ་ཚོགས་པའོ། །བརྒྱད་པ་གཞན་གྱི་ཁྱིམ་ཐབ་ལ་ཆགས་པ་སྤོང་བ་ལ་གཉིས་ལས། དང་པོ་མགོ་གནོན་པའི་ཚུལ་ལ་གསུམ་གྱི། དང་པོ་འདུ་ཤེས་བསྒྱུར་ཅིང་མི་གཙང་བར་བལྟ་བ་ནི། འདོད་པས་ལོག་པར་གཡེམ་པ་ནི་ཁྱིམ་པ་རྣམས་ལ་འབྱུང་ཉེ་ཞིང་ཉེས་པ་ཆེ་བས་དེ་ལས་བཟློག་པའི་ཕྱིར། གཞན་གྱི་ཆུང་མ་མི་བལྟ་མཐོང་ན་ཡང་། །ན་ཚོད་མཐུན་པར་མ་དང་བུ་མོ་དང་། །སྲིང་མོའི་འདུ་ཤེས་བསྐྱེད་བགྱི་ཆགས་གྱུར་ན། །མི་གཙང་ཉིད་དུ་ཡང་དག་བསམ་པར་བགྱི། །ཞེས་གསུངས་ཏེ། མདོ་ལས། བཙུན་པ་བུད་མེད་ལ་ཇི་ལྟར་བསྒྲུབ་པར་བགྱི། ཞེས་གསོལ་པ་དང་། ཀུན་དགའ་བོ་མི་བལྟ་བས་སོ། །ཞེས་གསུངས་པ་ལྟར། གཞན་གྱི་ཆུང་མ་ལ་དང་པོ་ཉིད་དུ་མི་བལྟ་ཞིང་། ཇི་ཞིག་ལྟར་མཐོང་ན་ཡང་ན་ཚོད་དང་མཐུན་པར་རྒན་པ་ལ་མ་དང་། གཞོན་པ་ལ་བུ་མོ་དང་། མཉམ་པ་ལ་སྲིང་མོའི་འདུ་ཤེས་བསྐྱེད་པར་བགྱིའོ། །དེ་ལྟར་བསམས་ཀྱང་ཆགས་པར་གྱུར་ན་དྲི་ང་བ་དང་། སྒོ་དགུ་དོད་པ་ལ་སོགས་པ་འོག་ནས་འབྱུང་བའི་མི་གཙང་བ་ཉིད་དུ་ཡང་དག་པར་བསམ་པར་བགྱིའོ། །

གཉིས་པ་སེམས་བསྲུང་ཞིང་དབང་པོའི་སྒོ་བསྡམ་པ་ནི། གལ་ཏེ་མི་གཙང་བ་ཉིད་དུ་བསམས་སུ་ཟིན་ཀྱང་། གཙང་བར་སེམས་ན་སེམས་བསྲུང་བར་བྱའོ་ཞེས་བསྟན་པའི་ཕྱིར། གཡོ་བའི་སེམས་ནི་ཐོས་མཚུངས་བུ་ལྟ་བུ། །གཏེར་བཞིན་སྲོག་དང་འདྲ་བར་བསྲུང་བགྱི་སྟེ། །གདུག་པ་དུག་དང་མཚོན་དང་དགྲ་བོ་དང་། །མེ་བཞིན་འདོད་པའི་བདེ་ལ་ཡིད་འབྱུང་མཛོད། །ཅེས་གསུངས་ཏེ། སྐད་ཅིག་ཀྱང་མི་གནས་པར་ཡུལ་ལ་གཡོ་བའི་སེམས་ནི་རྟག་ཏུ་ཉོན་མོངས་སྐྱེ་བ་དང་མཐུན་པའི་ཡུལ་རྣམས་ལ་བསྲུང་བར་བགྱི། ཇི་ལྟར་ཞེ་ན། ཐོས་པ་མི་ཉམས་པར་བསྲུང་བ་དང་མཚུངས་པར་རམ། བུ་སྡུག་པ་ལྟ་བུར་རམ། ནོར་གྱི་གཏེར་བཞིན་ནམ། གཅེས་པའི་སྲོག་དང་འདྲ་བར་རོ། །དེར་མ་ཟད་འདོད་པའི་བདེ་བ་ལ་ཡིད་འབྱུང་བར་ཡང་མཛོད་ཅིག ཅི་དང་འདྲ་བར་ཞེ་ན། གདུག་པའི་སྦྲུལ་ནི་མ་རུངས་པ་ཉིད་ཀྱིས་དང་། དུག་ནི་གསོད་པར་བྱེད་པ་ཉིད་ཀྱིས་དང་། མཚོན་ནི་སྡུག་བསྔལ་བསྐྱེད་པ་ཉིད་ཀྱིས་དང་། དགྲ་བོ་ནི་བདེ་བའི་གེགས་བྱེད་པ་ཉིད་ཀྱིས་དང་། མེ་ནི་གདུང་བར་བྱ་བ་ཉིད་ཀྱིས་ཡིད་འབྱུང་བར་བྱ་བ་ཡིན་པ་དེ་བཞིན་དུའོ། །ཅིའི་ཕྱིར་འདོད་པའི་བདེ་བ་ཡིད་དུ་འོང་བའི་རྣམ་པར་ཉམས་སུ་མྱོང་བ་དག་ལ་གདུག་པ་ལ་སོགས་པ་བཞིན་དུ་ཡིད་འབྱུང་བར་བྱ་བ་ཡིན་ཞེ་ན། འདོད་པ་རྣམས་ནི་ཕུང་ཁྲོལ་བསྐྱེད་པ་སྟེ། །རྒྱལ་བའི་དབང་པོས་ཀིམ་པའི་འབྲས་འདྲར་གསུངས། །དེ་དག་སྤང་བགྱི་ཞེས་ཏེ། འདོད་པ་རྣམས་ནི་ཉེ་བར་སྤྱོད་པའི་དུས་ན་བདེ་བ་བསྐྱེད་མོད་ཀྱི། འོན་ཀྱང་མཇུག་ཏུ་ཕུང་བ་བསྐྱེད་བྱེད་ཡིན་པས། མཁས་པ་རྣམས་ཀྱིས་ཡིད་འབྱུང་བར་བྱ་བ་ཡིན་ཏེ། འདི་ལྟར་འདོད་པ་རྣམས་ནི་དང་པོ་དགའ་བར་བྱེད་པའི་ཕྱིར་དང་། ཐ་མར་གདུང་བར་བྱེད་པའི་ཕྱིར། རྒྱལ་བའི་དབང་པོས། དཔེར་ན། ཀིམ་པའི་འབྲས་བུའི་ཕྱི་ཤུན་བཟང་ལ་ནང་ངན་པ་དང་འདྲ་བར་གསུངས་སོ། །གཞན་ཡང་འདོད་པ་རྣམས་ནི་འཁོར་བར་འཆིང་བའི་རྒྱུ་ཡིན་པའི་ཕྱིར་ཡང་སྤང་བར་བྱའོ། །ཞེས་བསྟན་པའི་ཕྱིར། དེ་ཡི་ལྕགས་སྒྲོག་གིས། འཁོར་བའི་བཙོན་རར་འཇིག་རྟེན་འདི་དག་བཅིངས་ཞེས་གསུངས་ཏེ། འདོད་པ་དེ་དག་གི་ལྕགས་སྒྲོག་གིས་འཁོར་བའི་བརྩོན་རར་འཇིག་རྟེན་འདི་དག་དམ་དུ་བཅིངས་པའི་ཕྱིར་ཡང་སྤང་བར་བྱའོ། །དེ་ལྟར་ཡུལ་ལ་སེམས་བསྲུང་བ་ལ་དབང་པོ་ཚར་བཅད་དགོས་པས། དེ་ལ་སྲན་བསྐྱེད་པའི་ཕྱིར། དབང་པོ་འདུལ་བ་ལ་བསྔགས་པ་བརྗོད་པ་ནི། གང་དག་དབང་པོ་དྲུག་ཡུལ་རྣམས་ལ་ནི། །རྟག་ཏུ་མི་བརྟན་གཡོ་དང་གང་དག་ཅིག། གཡུལ་ངོར་དགྲ་ཚོགས་ལས་རྒྱལ་དེ་དག་ལས། །མཁས་རྣམས་དང་པོ་དཔའ་རབ་ལགས་པར་འཚལ། །ཞེས་གསུངས་ཏེ། གང་ཟག་གང་དག་མིག་ལ་སོགས་པའི་དབང་པོ་དྲུག གཟུགས་སོགས་ཡུལ་རྣམས་ལ་རྟག་ཏུ་ཕྲད་ནས་འགྱུར་བས་མི་བརྟན་ལ། ཡུལ་མངོན་པར་འདོད་པས་གཡོ་བ་དག་གཉེན་པོས་ལེགས་པར་ཐུལ་བ་དང་། གང་དག་ཅིག་འཐབ་མོའི་གཡུལ་ངོར་དཔའ་ཞིང་བརྟུལ་ཕོད་པའི་དགྲ་ཚོགས་དུ་མ་ལས་རྒྱལ་བ་དེ་དག་ལས་མཁས་པ་རྣམས་དང་པོ་དབང་པོ་ལས་རྒྱལ་བ་དེ་དཔའ་བོའི་རབ་མཆོག་ལགས་པར་འཚལ་ཏེ། སེང་གེ་ལ་སོགས་པ་དུད་འགྲོ་ལ་ཡང་གཡུལ་ངོར་རྒྱལ་བ་དུ་མ་སྣང་ལ། དབང་པོ་ལས་རྒྱལ་བ་མེད་པའི་ཕྱིར་རོ། །

གསུམ་པ་ཆགས་ཡུལ་དང་། ཆགས་ཅན་གྱི་ཉེས་པ་བསམ་པ་ནི། སྔར་མི་གཙང་ཉིད་དུ་ཡང་དག་བསམ་པར་བགྱི། ཞེས་བཤད་ན། ཇི་ལྟར་མི་གཙང་བར་ཡང་དག་པར་བསམ་པར་བྱ་ཞེ་ན། བུད་མེད་གཞོན་ནུའི་ལུས་ནི་ལོགས་ཤིག་ཏུ། །དྲི་ང་བ་དང་སྒོ་དགུ་དོད་པ་དང་། །མི་གཙང་ཀུན་སྣོད་འདྲ་བ་དགང་དཀའ་དང་། །པགས་པས་གཡོགས་དང་རྒྱན་ཡང་ལོགས་ཤིག་གཟིགས། །ཞེས་གསུངས་ཏེ། བུད་མེད་གཞོན་ནུའི་ལུས་ནི་དྲི་ང་བ་དང་། མི་གཙང་བ་འཛགས་པའི་སྒོ་དགུ་དོད་པ་དང་། བཤང་ཅི་ལ་སོགས་པའི་མི་གཙང་བའི་རྫས་སྣ་ཚོགས་ཀྱིས་ནང་གང་བས་མི་གཙང་བ་ཀུན་གྱི་སྣོད་དང་འདྲ་བ་དང་། ཟས་སྐོམ་སོགས་ཇི་ཙམ་སྤྱད་ཀྱང་མི་ཚིམ་པས་དགང་དཀའ་བ་དང་། སྙིང་པོ་མེད་པས་པགས་པས་གཡོགས་པ་ཙམ་ཡིན་པས་ཆགས་པའི་གནས་མ་ཡིན་ལ། འོན་ཏེ་དྲི་དང་རྒྱན་གྱིས་སྤྲས་པས་ཆགས་ན། ལུས་དེ་ལྟ་བུ་ཡང་ལོགས་ཤིག་ཏུ། ༼དྲི་དང་༽བརྒྱན་ཡང་ལོགས་ཤིག་ཏུ་གཟིགས་དང་། དེས་ན་ཆགས་པར་མི་འགྱུར་རོ། །ཞེས་པའོ། །

སྤྱོད་འཇུག་ལས། ལུས་ལ་བསྐུས་པའི་དྲི་དེ་ཡང་། །ཙནྡན་སོགས་ཡིན་གཞན་མིན་ན། །གཞན་གྱི་དྲི་ཡིས་གཞན་དག་ལ། །ཅི་ཡི་ཕྱིར་ན་ཆགས་པར་བྱེད། །ཅེས་གསུངས་པ་བཞིན་ནོ། །དེ་ལྟར་ཡུལ་གྱི་ཉེས་པ་བསྟན་ནས། འདོད་པ་རྣམས་ནི་ཇི་ཙམ་སྤྱད་ཀྱང་ངོམས་མི་ཤེས་སོ་ཞེས་ཡུལ་ཅན་ཆགས་པའི་ཉེས་པ་བསྟན་པའི་ཕྱིར། ཇི་ལྟར་མཛེ་ཅན་སྲིན་བུས་ཉེན་པ་ནི། །བདེ་བའི་དོན་དུ་མེ་ལ་ཀུན་བརྟེན་ཀྱང་། །ཞི་བར་མི་འགྱུར་དེ་དང་འདྲ་བར་ནི། །འདོད་པ་རྣམས་ལ་ཆགས་པའང་མཁྱེན་པར་མཛོད། །ཅེས་གསུངས་ཏེ། ཇི་ལྟར་མཛེ་ཅན་སྲིན་བུས་ཟོས་པས་ཉེན་པ་ནི། བདེ་བར་འདོད་པའི་དོན་དུ་མེ་ལ་ཀུན་ཏུ་བརྟེན་ཀྱང་དེས་ཞི་བར་མི་འགྱུར་བར། སླར་གདུང་བ་འཕེལ་བར་འགྱུར་བ་དང་འདྲ་བར། བྱིས་པ་འདོད་པ་རྣམས་ལ་ཆགས་པའང་འདོད་པའི་གདུང་བ་བསལ་བའི་དོན་དུ་ཡུལ་རྣམས་ལ་བརྟེན་པར་བྱེད་ཀྱང་དེས་ཞི་བར་མི་འགྱུར་གྱི། སླར་ཡང་འཕེལ་བ་ཁོ་ནར་འགྱུར་རོ། །ཞེས་མཁྱེན་པར་མཛོད་ཅིག་ཅེས་པའོ། །རིན་ཆེན་ཕྲེང་བ་ལས་ཀྱང་། གཡན་པ་ཕྲུགས་ན་བདེ་འགྱུར་བ། །དེ་བས་གཡན་པ་མེད་ན་བདེ། །དེ་བཞིན་འཇིག་རྟེན་འདོད་ལྡན་བདེ། །འདོད་པ་མེད་ན་དེ་བས་བདེ། །ཞེས་གསུངས་པ་བཞིན་ནོ། །

གཉིས་པ་ས་བོན་དང་བཅས་པ་སྤོང་བའི་ཚུལ་ལ་དྲུག་གི དང་པོ་དངོས་ནི། གོང་དུ་བཤད་པའི་མི་གཙང་བ་བསྒོམ་པ་སོགས་ཀྱང་འདོད་ཆགས་རེ་ཞིག་རྣམ་པར་གནོན་པ་ཙམ་ཡིན་གྱི། དྲུངས་ནས་འབྱིན་བྱེད་མ་ཡིན་པས། ས་བོན་དང་བཅས་པ་སྤོང་བར་འདོད་པས། ལམ་འདི་བསྒོམ་པར་བྱའོ་ཞེས་བསྟན་པའི་ཕྱིར། དོན་དམ་གཟིགས་པར་བགྱི་སླད་དངོས་རྣམས་ལ། །ཚུལ་བཞིན་ཡིད་ལ་བགྱིད་པ་དེ་གོམས་མཛོད། །དེ་དང་འདྲ་བར་ཡོན་ཏན་ལྡན་པ་ཡི། །ཆོས་གཞན་འགའ་ཡང་མཆིས་པ་མ་ལགས་སོ། །ཞེས་གསུངས་ཏེ། ཡེ་ཤེས་དམ་པའི་སྤྱོད་ཡུལ་དུ་གྱུར་པས་ན་དོན་དམ་པ་སྟེ། ཆོས་རྣམས་ཀྱི་གནས་ལུགས་ཕྱིན་ཅི་མ་ལོག་པ་ཡེ་ཤེས་ཀྱི་མིག་གིས་གཟིགས་པར་བགྱི་བའི་སླད་དུ། གཟུགས་ལ་སོགས་པ་ཕྱི་དང་ནང་གི་དངོས་པོ་རྣམས་ལ་ཡང་དག་པའི་ཤེས་རབ་ཀྱིས་རྣམ་པར་དཔྱད་ནས་གོམས་པར་བྱེད་པའི་ཚུལ་བཞིན་ཡིད་ལ་བགྱིད་པ་དེ་ཡང་དང་ཡང་དུ་མངོན་དུ་བྱེད་པའི་སྒོ་ནས་གོམས་པར་མཛོད་ཅིག དེ་དང་འདྲ་བར་ཉོན་མོངས་འཇོམས་ཤིང་གཉེན་པོ་སྐྱེད་པར་བྱེད་པའི་ཡོན་ཏན་དང་ལྡན་པའི་ཆོས་གཞན་ནི། འགའ་ཡང་འཇིག་རྟེན་ན་མཆིས་པ་མ་ལགས་པའི་ཕྱིར་རོ། །འདིར་དོན་དམ་པ་ནི་གང་། དེའི་ཡུལ་ཚུལ་བཞིན་ཡིད་ལ་བྱེད་པ་བསྒོམ་པ་ནི་ཇི་ལྟ་བུ་ཞེ་ན། ཆོས་རྣམས་ཀྱི་གནས་ལུགས་ཀྱི་དེ་ཁོ་ན་ཉིད་ནི་དོན་དམ་པ་ཞེས་བྱའོ། །དེ་ཡང་ཅི་འདྲ་ཞིག་ཅེ་ན། དབུ་མ་རྩ་བར། གཞན་ལས་ཤེས་མིན་ཞི་བ་དང་། །སྤྲོས་པ་རྣམས་ཀྱིས་མ་སྤྲོས་པ། །རྣམ་རྟོག་མེད་དོན་ཐ་དད་མེད། །དེ་དེ་ཁོ་ནའི་མཚན་ཉིད་དོ། །ཞེས་གསུངས་པ་ལྟར། སྒྲ་དང་རྟོག་པས་སྤྱིའི་ཚུལ་གྱིས་ཀྱང་ཤེས་བྱ་མ་ཡིན་པ། གཞན་གྱིས་བསྟན་པས་རྟོགས་བྱའང་མ་ཡིན་པ། རྣལ་འབྱོར་པས་སོ་སོ་རང་རིག་པའི་ཡེ་ཤེས་ཀྱིས་བརྗོད་དུ་མེད་པའི་ཚུལ་དུ་རིག་པར་བྱ་བ་ཞིག་གོ །དེ་ཡང་གཟུགས་སོགས་རྟེན་ཅིང་འབྲེལ་བར་འབྱུང་བའི་ཆོས་འདི་རྣམས་ཀྱི་རང་བཞིན་ལས། གཞན་དུ་བཙལ་བར་མི་བྱ་སྟེ། རྟེན་འབྲེལ་ལས་གཞན་པའི་དོན་དམ་པའི་ཆོས་རྟོགས་པས་ནི། སུ་ཡང་གྲོལ་བ་མེད་ཅིང་། མ་རྟོགས་པས་འགའ་ཡང་བཅིངས་པ་མེད་པའི་ཕྱིར། ཕྱི་རོལ་པ་རྣམས་ཀྱི་བདག་དང་། གཙོ་བོ་ལ་སོགས་པ་བཞིན་ནོ། །གཟུགས་སོགས་རྟེན་ཅིང་འབྲེལ་བར་འབྱུང་བ་འདི་དག་གི་རང་བཞིན་ཇི་ལྟ་བ་བཞིན་མ་རྟོགས་པས་ནི་བྱིས་པ་རྣམས་བཅིངས་པ་ཡིན་ཏེ། ཕྱི་དང་ནང་གི་གཟུགས་ལ་སོགས་པ་ལ་དངོས་པོར་མངོན་པར་ཞེན་ནས། གང་ཟག་དང་། ཆོས་ཀྱི་བདག་ཏུ་བཟུང་བ་ལས་ནི་བྱིས་པ་རྣམས་འཆིང་བྱེད་ཉོན་མོངས་པ་དང་། རྣམ་པར་རྟོག་པ་མ་ལུས་པ་སྐྱེ་བའི་ཕྱིར་རོ། །ཇི་སྐད་དུ། རིན་ཆེན་ཕྲེང་བར། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་པ་ལས་ཡང་ལས་ཏེ། །ལས་ལས་ཡང་ནི་འཁོར་བར་འགྱུར། །ཞེས་གསུངས་པ་ལྟར་རོ། །གཟུགས་སོགས་རྟེན་འབྲེལ་གྱི་ཆོས་རྣམས། གོང་དུ་ཇི་སྐད་བཤད་པ་ལྟར་གྱི་སྟོང་པ་ཉིད་བརྗོད་དུ་མེད་པའི་ཚུལ་དུ་རྟོགས་པས་ནི། ཉོན་མོངས་པ་དང་། རྣམ་པར་རྟོག་པ་མ་ལུས་པ་སྤངས་ཏེ་གྲོལ་བར་འགྱུར་ཏེ། ཡང་དེ་ཉིད་ལས། དེ་ནི་རང་གཞན་གཉིས་ཀ་དང་། །དུས་གསུམ་དུ་ཡང་མ་ཐོབ་ཕྱིར། །ངར་འཛིན་པ་ནི་ལྡོག་པར་འགྱུར། །དེ་ནས་ལས་དང་སྐྱེ་བ་ཡང་། །ཞེས་གསུངས་སོ། །ཇི་སྐད་བཤད་པའི་ཆོས་རྣམས་ཀྱི་དེ་ཁོ་ན་ཉིད། དེ་ཉིད་བདག་མེད་པ་ཞེས་ཀྱང་བྱ། དེ་རྟོགས་པ་ལས། གཞན་པའི་ཐར་པ་ཐོབ་པའི་ཐབས་མེད་ཅིང་། དེ་རྟོགས་ན་མཐར་འཛིན་གྱི་ལྟ་བ་ཐམས་ཅད་འཇིག་པར་འགྱུར་བས། དབུ་མའི་ལམ་ཡང་དེ་ཡིན་ལ། སངས་རྒྱས་ལས་གཞན་པ་དབང་ཕྱུག་དང་། ཁྱབ་འཇུག་སོགས་ལ་དེ་སྟོན་པའི་ནུས་པ་མེད་དེ། དེ་སྐད་དུ་ཡང་། བཞི་བརྒྱ་པར། ཞི་སྒོ་གཉིས་པ་མེད་པ་དང་། །ལྟ་ངན་ཐམས་ཅད་འཇིག་པ་དང་། །སངས་རྒྱས་རྣམས་ཀྱི་ཡུལ་གྱུར་པ། །བདག་མེད་ཅེས་ནི་བརྗོད་པ་ཡིན། །ཞེས་གསུངས་སོ། །དེ་ལྟ་བུའི་སྟོང་པ་ཉིད་རྟོགས་པའི་ཐབས་ཀྱང་། གཟུགས་ལ་སོགས་པ་ཀུན་རྫོབ་པའི་ཆོས་འདི་དག་རྟེན་ཅིང་འབྲེལ་བར་འབྱུང་བ་རྐྱེན་འདི་པ་ཙམ་གྱི་རང་བཞིན་དུ་རྟོགས་པ་ཉིད་ཡིན་ཏེ། གཞན་དུ་ན་རྟག་ཆད་གང་རུང་གི་མཐར་ལྟུང་བར་འགྱུར་བའི་ཕྱིར་རོ། །དེ་སྐད་དུ་ཡང་མདོ་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རག་ལས་གང་དེ་སྟོང་པར་བཤད། །གང་ཞིག་སྟོང་ཉིད་ཤེས་དེ་བག་ཡོད་ཡིན། །ཞེས་པ་ལྟར་རོ། །རྟེན་འབྲེལ་དེ་ཡང་མཐའ་བཞིའི་སྐྱེ་བ་བཀག་པའི་སྒོ་ནས་ཤེས་པར་བྱ་སྟེ། སློབ་དཔོན་གྱིས་དབུ་མ་ལ་བསྟོད་པ་ལས། སྡུག་བསྔལ་རང་གིས་བྱས་པ་དང་། །གཞན་གྱིས་བྱས་དང་གཉིས་ཀས་བྱས། །རྒྱུ་མེད་རྟོག་གེ་པ་ཡིས་བཏགས། ཁྱོད་ཀྱིས་བརྟེན་ནས་འབྱུང་བར་གསུངས། །ཞེས་དང་། ས་བོན་ཞིག་དང་མ་ཞིག་ལས། །མྱུ་གུ་འབྱུང་བ་མ་ཡིན་ཏེ། ཁྱོད་ཀྱིས་སྐྱེ་བ་ཐམས་ཅད་ནི། །སྒྱུ་མ་འབྱུང་བ་ལྟ་བུར་གསུངས། །ཞེས་བཤད་པ་ལྟར་རོ། །དེ་ལ་དངོས་པོ་རྣམས་ནི་བདག་ལས་སྐྱེ་བ་མ་ཡིན་ཏེ། རང་ཉིད་རང་ལ་བྱེད་པ་འགལ་བའི་ཕྱིར་དང་། སྐྱེ་བ་དོན་མེད་པ་དང་། ཐུག་པ་མེད་པར་ཐལ་བའི་ཕྱིར་རོ། །གཞན་ལས་ཀྱང་མ་ཡིན་ཏེ། ཐམས་ཅད་ལས་ཐམས་ཅད་སྐྱེ་བར་འགྱུར་བ་དང་། མི་མཐུན་པ་དག་ཀྱང་རྒྱུ་འབྲས་སུ་ཐལ་བར་འགྱུར་བའི་ཕྱིར་རོ། །གཉིས་ཀ་ལས་ཀྱང་མ་ཡིན་ཏེ། །ཉེས་པ་གཉིས་ཀ་འབྱུང་བའི་ཕྱིར་དང་། འགལ་བའི་ཕྱིར་རོ། །རྒྱུ་མེད་པ་ལས་ཀྱང་མ་ཡིན་ཏེ། རྟག་ཏུ་ཡོད་པའམ་མེད་པར་འགྱུར་བ་དང་། འབྲས་བུའི་དོན་དུ་རྒྱུ་ལ་འབད་པ་དོན་མེད་པར་འགྱུར་བའི་ཕྱིར་རོ། །དེའི་ཕྱིར་དངོས་པོ་རྣམས་ནི། མཐའ་བཞིའི་སྐྱེ་བ་དང་བྲལ་བས། རྐྱེན་འདི་པ་ཙམ་གྱི་རྒྱུ་དང་རྐྱེན་ལ་རག་ལས་ཏེ་འབྱུང་བ་ཡིན་ལ། དེ་ཉིད་ནི་མཐར་འཛིན་གྱི་ལྟ་བ་ཐམས་ཅད་ཀྱི་གཉེན་པོ་རྟེན་ཅིང་འབྲེལ་བར་འབྱུང་བ་དབུ་མའི་ལམ་ཞེས་བྱ་སྟེ། དབུ་མ་རྩ་བར། རྟེན་ཅིང་འབྲེལ་བར་འབྱུང་བ་གང་། །དེ་ནི་སྟོང་པ་ཉིད་དུ་བཤད། །དེ་ནི་བརྟེན་ནས་གདགས་པ་སྟེ། །དེ་ཉིད་དབུ་མའི་ལམ་ཡིན་ནོ། །ཞེས་གསུངས་སོ། །རྟེན་འབྲེལ་རྟོགས་པ་ལས་གོང་ན་ལྟ་བ་གཞན་ཅུང་ཟད་ཀྱང་མེད་མོད། འོན་ཀྱང་འདི་ནི་ཤིན་ཏུ་རྟོགས་པར་དཀའ་བའི་ཕྱིར། དབུ་མའི་གཞུང་ལུགས་དག་ལ་ཡུན་རིང་དུ་འདྲིས་པར་བྱས་ཏེ་ཤེས་པར་བྱའོ། །

ཚུལ་བཞིན་ཡིད་ལ་བྱེད་པ་བསྒོམ་པ་ནི། དངོས་པོ་རྣམས་རྟེན་ཅིང་འབྲེལ་བར་འབྱུང་བ་སྤྲོས་པའི་མཐའ་ཐམས་ཅད་དང་བྲལ་བར་ཐོས་བསམ་གྱི་ཤེས་རབ་ཀྱིས་ཡོངས་སུ་དཔྱད་ནས། དོན་དེ་ཉིད་ཡང་དང་ཡང་དུ་གོམས་པར་བྱེད་པ་སྟེ། རིགས་པ་དྲུག་ཅུ་པ་ལས། གང་བློ་ཡོད་དང་མེད་པ་ལས། །རྣམ་པར་འདས་ཤིང་མི་གནས་པ། །དེ་དག་ཟབ་མོ་དམིགས་མེད་པའི། །རྐྱེན་གྱི་དོན་ལ་རྣམ་པར་བསྒོམ། །ཞེས་གསུངས་སོ། །དེ་བས་ན་རྟེན་འབྲེལ་གྱི་གནས་ལུགས་ལ་རྣམ་པར་དཔྱོད་པའི་ཤེས་རབ་དང་བྲལ་བའི་རྣམ་རྟོག་བཀག་པ་ཙམ་དང་། ཡོད་མེད་སོགས་མཐའ་གང་རུང་དུ་འཛིན་པའི་ལྟ་བས་ཟིན་པའི་བསྒོམ་པ་གཉིས་ཀ་ཡང་། ཡང་དག་པའི་བསྒོམ་པ་མ་ཡིན་གྱི། ཇི་སྐད་བཤད་པའི་རྟེན་འབྲེལ་གྱི་དོན་ལ་རྣམ་པར་དཔྱོད་པའི་ཤེས་རབ་ཀྱིས་ཟིན་པའི་བསྒོམ་པ་ནི། ཚུལ་བཞིན་ཡིད་ལ་བྱེད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་ཡིན་ནོ། །གཉིས་པ་ཞར་ལ། ཤེས་རབ་དང་ཚུལ་ཁྲིམས་ཀྱི་བསྔགས་པ། ད་ནི་བཤད་མ་ཐག་པའི་ཡང་དག་པའི་ཡུལ་ཅན་གྱི་ཤེས་པ་དེ་ལ་གུས་པ་བསྐྱེད་པའི་ཕྱིར་དེའི་བསྔགས་པ་བརྗོད་པ་ནི། སྐྱེས་བུ་རིགས་གཟུགས་ཐོས་དང་ལྡན་རྣམས་ཀྱང་། །ཤེས་རབ་ཚུལ་ཁྲིམས་བྲལ་བ་བཀུར་མ་ལགས། །དེ་ལྟས་གང་ལ་ཡོན་ཏན་འདི་གཉིས་ལྡན། །དེ་ནི་ཡོན་ཏན་གཞན་དང་བྲལ་ཡང་མཆོད། །ཅེས་གསུངས་ཏེ། སྐྱེས་བུ་རིགས་བཟང་པོ་དང་། གཟུགས་བཟང་པོ་དང་། བསྟན་བཅོས་གཞན་གྱི་ཡུལ་ཅན་གྱི་མང་དུ་ཐོས་པ་དང་ལྡན་པ་རྣམས་ཀྱང་གནས་ལུགས་རྟོགས་པའི་ཤེས་རབ་དང་། འཆལ་ཚུལ་སྤོང་བའི་ཚུལ་ཁྲིམས་ཏེ། ཡོན་ཏན་གཉིས་དང་བྲལ་བ་ན་བཀུར་བ་དང་གུས་པར་བྱ་བའི་འོས་མ་ལགས་ཏེ། སྐྱེས་བུ་དམ་པའི་ཡོན་ཏན་མེད་པའི་ཕྱིར་རོ། །དེ་ལྟ་བས་ན་གང་ལ་ཤེས་རབ་དང་ཚུལ་ཁྲིམས་ཀྱི་ཡོན་ཏན་འདི་གཉིས་དང་ལྡན་པ་དེ་ནི་ཡོན་ཏན་གཞན་རིགས་གཟུགས་སོགས་དང་བྲལ་ཡང་མཆོད་པ་དང་བཀུར་བར་བྱ་བ་ཡིན་ཏེ། སྐྱེས་བུ་དམ་པའི་ཡོན་ཏན་དང་ལྡན་པའི་ཕྱིར་རོ། །དེ་ལ་ཚུལ་ཁྲིམས་དང་ལྡན་པས་མི་དགེ་བ་ལ་མི་འཇུག་ཅིང་། ཡང་དག་པའི་ཤེས་རབ་དང་ལྡན་པས་དགེ་བ་ལ་འཇུག་པའི་ཕྱིར་དང་། དམ་པ་མ་ཡིན་པའི་ལས་མི་དགེ་བ་ལ་མི་འཇུག་ཅིང་། དམ་པའི་ལས་དགེ་བ་ལ་འཇུག་པ་ནི། སྐྱེས་བུ་དམ་པའི་གྲངས་སུ་འགྲོ་བའི་ཕྱིར་རོ། །

གསུམ་པ་འཇིག་རྟེན་གྱི་ཆོས་ལས་ལྡོག་པར་བྱ་བ་ནི། འཇིག་རྟེན་གྱི་ཆོས་བརྒྱད་ལ་གནས་པ་ལ་ནི། འཕགས་པའི་ལམ་སྐྱེ་བ་མེད་པས། འཕགས་པའི་ལམ་སྐྱེ་བ་དང་མཐུན་པར་བྱ་བའི་ཕྱིར་འཇིག་རྟེན་གྱི་ཆོས་བརྒྱད་ལ་མགོ་སྙོམས་པར་བྱ་བར་བསྟན་པའི་ཕྱིར། འཇིག་རྟེན་མཁྱེན་པ་རྙེད་དང་མི་རྙེད་དང་། །བདེ་དང་མི་བདེ་སྙན་དང་མི་སྙན་དང་། །སྟོད་སྨད་ཅེས་བགྱི་འཇིག་རྟེན་ཆོས་བརྒྱད་པོ། །བདག་གི་ཡིད་ཡུལ་མིན་པར་མགོ་སྙོམས་མཛོད། །ཅེས་གསུངས་ཏེ། འཇིག་རྟེན་གྱི་ལུགས་བཟང་པོ་ལེགས་པར་ཤེས་པས་ན། འཇིག་རྟེན་མཁྱེན་པ་ཞེས་རྒྱལ་པོ་ལ་བོད་པ་སྟེ། ལོངས་སྤྱོད་རྙེད་པ་དང་མ་རྙེད་པ་དང་། སིམ་པ་མྱོང་བ་བདེ་བ་དང་། གདུང་བ་མྱོང་བ་མི་བདེ་བ་དང་། མངོན་སུམ་དུ་སྙན་པ་དང་མི་སྙན་པ་དང་། ངོར་བསྟོད་པ་དང་ལྐོག་ཏུ་སྨོད་པ་རྣམས་ལ་ཡིད་བདེ་བ་དང་མི་བདེ་བར་འགྱུར་བ་ནི། འཇིག་རྟེན་པ་རྣམས་དང་མཐུན་པས་འཇིག་རྟེན་གྱི་ཆོས་བརྒྱད་ཅེས་བྱ་ལ། ཁྱོད་ཀྱིས་འཇིག་རྟེན་ལས་འདའ་བའི་སླད་དུ། དེ་དག་བདག་གི་ཡིད་བདེ་མི་བདེའི་ཡུལ་མིན་པར་མགོ་སྙོམས་ལ། མ་རྙེད་པ་སོགས་ཀྱིས་ཡིད་མི་བདེ་བ་དང་། རྙེད་པ་སོགས་ཀྱིས་ཡིད་བདེ་བར་མི་འགྱུར་བར་མཛོད་ཅིག་ཅེས་པའོ། །རྙེད་པ་སོགས་ལ་དམིགས་པའི་ཡིད་བདེ་མི་བདེ་སོགས་འཇིག་རྟེན་གྱི་ཆོས་ཡིན་གྱི། རྙེད་པ་སོགས་མ་ཡིན་ཏེ། འཕགས་པ་རྣམས་ལ་ཡང་མངའ་བའི་ཕྱིར་རོ། །དེས་ན་དམིགས་པའི་དབང་གིས་འཇིག་རྟེན་གྱི་ཆོས་བརྒྱད་དུ་བཞག་གོ །བླ་མ་དང་བྲལ་ཟེ་ལ་སོགས་པའི་དོན་དུ་སྡིག་པ་བྱས་ཀྱང་ཆོས་མ་ཡིན་པར་མི་འགྱུར་རོ་ཞེས་འཇིག་རྟེན་པ་དག་ཆོས་མ་ཡིན་པ་དག་ལ་ཡང་ཆོས་སུ་གྲགས་པ་ཡོད་པས། དེ་བཟློག་པའི་ཕྱིར། ཁྱོད་ཀྱིས་བྲམ་ཟེ་དགེ་སློང་ལྷ་དང་ནི། །མགྲོན་དང་ཡབ་ཡུམ་སྲས་དང་བཙུན་མོ་དང་། །འཁོར་གྱི་སླད་དུའང་སྡིག་པ་མི་བགྱི་སྟེ། །དམྱལ་བའི་རྣམ་སྨིན་སྐལ་ནོད་འགའ་མ་མཆིས། །ཞེས་གསུངས་ཏེ། བྲམ་ཟེ་ནས་འཁོར་གྱི་བར་སེམས་ཅན་གཞན་གྱི་སླད་དུ་ཡང་སྡིག་པ་མི་བགྱི་སྟེ། སྡིག་པའི་འབྲས་བུ་ནི་དམྱལ་བའི་ནང་དུ་རྣམ་པར་སྨིན་པར་འགྱུར་ལ། དེ་བདག་ཉིད་གཅིག་པུས་མྱོང་དགོས་ཀྱིས། བྲམ་ཟེ་ལ་སོགས་པ་སྡུག་བསྔལ་གྱི་སྐལ་པ་ནོད་ཅིང་ལེན་པར་བྱེད་པ་ནི་འགའ་ཡང་མ་མཆིས་པའི་ཕྱིར་རོ། །

གལ་ཏེ་སྡིག་པའི་རྣམ་པར་སྨིན་པའི་འབྲས་བུ་ཡིད་དུ་མི་འོང་བ་ཉིད་ཡིན་ན། ཅིའི་ཕྱིར་དེའི་མོད་ལ་རྣམ་པར་སྨིན་པར་མི་འགྱུར་རམ་ཞེ་ན། ལས་ནི་རྣམ་པ་གསུམ་སྟེ། མཐོང་བའི་ཆོས་ལ་མྱོང་བར་འགྱུར་བ་དང་། སྐྱེས་ནས་མྱོང་བར་འགྱུར་བ་དང་། ལན་གྲངས་གཞན་ལ་མྱོང་བར་འགྱུར་བའོ། །དང་པོ་ནི། ལས་བྱས་པའི་སྐྱེ་བ་དེ་ཉིད་ལ་འབྲས་བུ་རྣམ་པར་སྨིན་པར་འགྱུར་བ་སྟེ། དཔེར་ན་དོམ་དང་རི་དྭགས་རུ་རུའི་སྐྱེས་རབས་བཞིན་ནོ། །གཉིས་པ་ནི། སྐྱེ་བ་ཕྱི་མ་ལ་རྣམ་པར་སྨིན་པར་འགྱུར་བ་སྟེ། དཔེར་ན་མཚམས་མེད་པ་ལྔའི་ལས་བཞིན་ནོ། །གསུམ་པ་ནི། སྐྱེ་བ་གཉིས་པ་ཚུན་ཆད་དུ་རྣམ་པར་སྨིན་པར་འགྱུར་བའོ། །དེ་ལ་སྐྱེས་ནས་མྱོང་བར་འགྱུར་བའི་ལས་ཀྱི་དབང་དུ་བྱས་ནས། སྡིག་པའི་ལས་རྣམས་སྤྱད་པ་འགའ་ཡང་ནི། །དེ་ཡི་མོད་ལ་མཚོན་བཞིན་མི་གཅོད་ཀྱང་། །འཆི་བའི་དུས་ལ་བབ་ན་སྡིག་པ་ཡི། །ལས་ཀྱི་འབྲས་བུ་གང་ལགས་མངོན་པར་འགྱུར། །ཞེས་གསུངས་ཏེ། སྡིག་པའི་ལས་སྤྱད་པས་དེའི་མོད་ལ་མཚོན་བརྡར་བ་རེག་པ་བཞིན་དུ་མི་གཅོད་དེ་གདུང་བར་མི་བྱེད་ཀྱང་། འཆི་བའི་དུས་ལ་བབ་པ་ན། འགྱོད་པས་གདུང་ཞིང་གཤིན་རྗེའི་སྐྱེས་བུ་མི་བཟད་པས་འཚེ་བ་ལ་སོགས་པའི་མཚན་མ་སྡིག་པའི་ལས་ཀྱི་འབྲས་བུ་གང་ལགས་པ་དེ་མངོན་ཞིང་ཤེས་པར་འགྱུར་ཞེས་པ་སྟེ། ཇི་སྐད་དུ། སྤྱོད་འཇུག་ལས། མྱ་ངན་གྱིས་གདུངས་སྐྲངས་པ་ཡི། །གདོང་དམར་མིག་ནས་མཆི་མ་འཛག །ཉེ་དུ་རེ་ཐག་ཆད་པ་དང་། །གཤིན་རྗེའི་ཕོ་ཉའི་བཞིན་ལ་ལྟ། །རང་སྡིག་དྲན་པས་གདུངས་པ་དང་། །དམྱལ་བའི་སྒྲ་ནི་ཐོས་པ་ཡིས། །སྐྲགས་པས་མི་གཙང་ལུས་གོས་ཤིང་། །མྱོས་པར་གྱུར་ཚེ་ཅི་ཞིག་བྱ། །ཞེས་འབྱུང་བ་བཞིན་ནོ། །

བཞི་པ་འཕགས་པའི་ནོར་དང་ལྡན་པར་བྱ་བ་ནི། དེ་ལྟར་འཇིག་རྟེན་གྱི་ཆོས་རྣམས་དང་ཕྲལ་ནས། འཕགས་པའི་ཆོས་ལ་འགོད་པར་བཞེད་ནས། དད་དང་ཚུལ་ཁྲིམས་གཏོང་དང་ཐོས་པ་དང་། །དྲི་མེད་ངོ་ཚ་ཤེས་དང་ཁྲེལ་ཡོད་དང་། །ཤེས་རབ་ནོར་བདུན་ལགས་པར་ཐུབ་པས་གསུངས། །ནོར་གཞན་ཕལ་པ་དོན་མ་མཆིས་རྟོགས་མཛོད། །ཅེས་ཏེ། ལས་འབྲས་དང་བདེན་པ་དང་དཀོན་མཆོག་ལ་མངོན་པར་ཡིད་ཆེས་ཤིང་དང་བའི་དད་པ་དང་། ཁ་ན་མ་ཐོ་བ་སྤོང་བ་ཡང་དག་པར་བླངས་པའི་ཚུལ་ཁྲིམས་དང་། མཆོད་པ་དང་ཕན་གདགས་པར་འདོད་པས་བདོག་པ་གཏོང་བ་དང་། ཀུན་ཤེས་པའི་བསམ་པས་ཐར་པ་དང་མཐུན་པའི་དམ་པའི་ཆོས་ཉན་པའི་ཐོས་པ་སྟེ། དེ་ཡང་རྙེད་བཀུར་དང་གྲགས་པ་འདོད་པ་སོགས་ཀྱི་དྲི་མ་མེད་པའོ། །བདག་ཚུལ་ཁྲིམས་དང་ཐོས་པ་སོགས་འདི་ལྟ་བུ་དང་ལྡན་པས་སྡིག་པ་བྱར་མི་རུང་སྙམ་པ་བདག་ལ་ལྟོས་ཏེ་ཁ་ན་མ་ཐོ་བར་འཛེམ་པ་ངོ་ཚ་ཤེས་པ་དང་། སྡིག་པ་བྱེད་པ་ཆོས་དང་འཇིག་རྟེན་ན་ཡང་སྨད་པས་བདག་གིས་སྡིག་པ་བྱས་པ་འགའ་ཞིག་གིས་ཐོས་ན་སྨོད་པར་འགྱུར་སྙམ་པ་གཞན་ལ་ལྟོས་ནས་ཁ་ན་མ་ཐོ་བར་འཛེམ་པ་ཁྲེལ་ཡོད་པ་དང་། ཆོས་རྣམས་ཀྱི་རང་དང་སྤྱིའི་མཚན་ཉིད་རྣམ་པར་འབྱེད་པའི་ཤེས་རབ་སྟེ། ཆོས་བདུན་པོ་དེ་དག་ནི་འཕགས་པའི་ནོར་བདུན་ལགས་པར་ཐུབ་པས་གསུངས་ཏེ། ཟག་པ་མེད་པའི་བདེ་བའི་རྒྱུ་ཡིན་པ་དང་། ཐུན་མོང་མ་ཡིན་པའི་ཕྱིར་རོ། །གསེར་ལ་སོགས་པ་འཇིག་རྟེན་ན་གྲགས་པའི་ནོར་གཞན་ཕལ་པ་རྣམས་ནི་ཉོན་མོངས་ཉེ་བར་ཞི་བའི་རྒྱུ་མ་ཡིན་པ་དང་། ཐུན་མོང་བ་ཡིན་པའི་ཕྱིར། དོན་མ་མཆིས་ཤིང་གསོག་དང་གསོབ་དང་ཡ་མ་བརླར་རྟོགས་པར་མཛོད་ཅེས་པའོ། །ལྔ་པ་འཕགས་པའི་ནོར་དེའི་འགལ་རྐྱེན་སྤོང་བ་ནི། དེ་ལྟར་འཕགས་པའི་ནོར་བསག་པར་བཤད་ནས། དེ་ཆུད་མི་ཟ་བའི་ཐབས་བསྟན་པའི་ཕྱིར། རྒྱན་པོ་འགྱེད་དང་འདུས་ལ་ལྟ་བ་དང་། །ལེ་ལོ་སྡིག་པའི་གྲོགས་ལ་བརྟེན་པ་དང་། །ཆང་དང་མཚན་མོ་རྒྱུ་བ་ངན་སོང་བ། །གྲགས་པ་ཉམས་པར་འགྱུར་བ་དེ་དྲུག་སྤོངས། །ཞེས་གསུངས་ཏེ། ཆོ་ལོ་ལ་སོགས་པ་རྒྱན་པོ་འགྱེད་པ་དང་། དགའ་སྟོན་ལ་སོགས་པ་ལ་འདུས་པའི་སྐྱེ་བོ་ཕལ་མོ་ཆེ་ལ་ལྟ་བ་དང་། དགེ་བ་ལ་མི་སྤྲོ་བའི་ལེ་ལོ་དང་། གང་དང་འགྲོགས་ན་མི་དགེ་བ་འཕེལ་བའི་སྡིག་པའི་གྲོགས་པོ་ལ་བརྟེན་པ་དང་། ཆང་འཐུང་བ་དང་། མཚན་མོ་ཁྱིམ་དང་གྲོང་གཞན་དུ་རྒྱུ་བ་སྟེ། དྲུག་པོ་འདི་དག་ནི་ཕྱི་མར་ངན་སོང་དུ་སྐྱེ་བ་དང་། ཚེ་འདིར་ཡང་གྲགས་པ་ཉམས་པའི་རྒྱུ་ཡིན་པས་སྤོངས་ཤིག་ཅེས་པ་སྟེ། དེ་དག་ལ་བརྟེན་ནས་ལོངས་སྤྱོད་དང་། ཚེ་དང་། དགེ་བའི་ཆོས་ཉམས་པར་འགྱུར་བའི་ཕྱིར་རོ། །དྲུག་པ་མཐུན་རྐྱེན་ཆོག་ཤེས་པ་ལ་གནས་པར་གདམས་པ་ནི། ནོར་རྣམས་ཀུན་གྱི་ནང་ན་ཆོག་ཤེས་པ། །རབ་མཆོག་ལགས་པར་ལྷ་མིའི་སྟོན་པས་གསུངས། །ཀུན་ཏུ་ཆོག་ཤེས་མཛོད་ཅིག་ཆོག་མཁྱེན་ན། །ནོར་མི་བདོག་ཀྱང་ཡང་དག་འབྱོར་པ་ལགས། །ཞེས་གསུངས་ཏེ། གསེར་ལ་སོགས་པའི་ནོར་རྣམས་ཀུན་གྱི་ནང་ན་སྟེ། དེ་དག་ལས་འདས་པའི་ལོངས་སྤྱོད་ལ་རོ་མི་མྱང་། མ་འོངས་པ་ལ་མངོན་པར་འདོད་པ་མེད། ད་ལྟར་བ་ལ་ལྷག་པར་ཆགས་པ་མེད་པའི་རང་བཞིན་གྱི་ཆོག་ཤེས་པ་ཉིད་རབ་དང་མཆོག་ལགས་པར་ལྷ་མིའི་སྟོན་པ་སངས་རྒྱས་བཅོམ་ལྡན་འདས་ཀྱིས་གསུངས་ཏེ། དེས་པས་ཞུས་པ་ལས། གང་ལ་ཟན་ཅིག་མེད་བཞིན་དུ། །དེ་ནི་གཏོང་ལ་རབ་གནས་ན། །དེ་ནི་འཇིག་རྟེན་ནོར་ཆེ་ཞེས། །ཡང་དག་གཟིགས་པ་རྣམས་ཀྱིས་བཤད། །ཅེས་གསུངས་པ་ལྟ་བུའོ། །དེ་བས་ན་ཀུན་ཏུ་ཆོག་ཤེས་པར་མཛོད་ཅིག་དང་། ཆོག་མཁྱེན་ན་གསེར་ལ་སོགས་པའི་ནོར་ཅུང་ཟད་མི་བདོག་ཀྱང་ཡང་དག་འབྱོར་པ་ལགས་ཏེ། འབྱོར་པའི་དགོས་པ་ཆོག་ཤེས་པ་ཡིན་པའི་ཕྱིར་རོ། །

དེ་ལྟར་ཆོག་ཤེས་པའི་ཡོན་ཏན་བཤད་ནས། ཆོག་མི་ཤེས་པའི་ཉེས་དམིགས་བསྟན་པའི་ཕྱིར། དེས་པ་བདོག་མང་ཇི་ལྟར་སྡུག་བསྔལ་བ། །འདོད་པ་ཆུང་རྣམས་དེ་ལྟ་མ་ལགས་ཏེ། །ཀླུ་མཆོག་རྣམས་ལ་མགོ་བོ་ཇི་སྙེད་པ། །དེ་ལས་བྱུང་བའི་སྡུག་བསྔལ་དེ་སྙེད་དོ། །ཞེས་གསུངས་ཏེ། འགྲོགས་ན་བདེ་བས་ན་དེས་པ་ཞེས་རྒྱལ་པོ་ལ་བོས་ནས། གསེར་ལ་སོགས་པའི་བདོག་པ་མང་བ་རྣམས་ཇི་སྐད་དུ། སྤྱོད་འཇུག་ལས། གསག་དང་བསྲུང་དང་བརླག་པའི་སྡུག་བསྔལ་གྱི། །ནོར་ནི་ཕུང་ཁྲོལ་མཐའ་ཡས་ཤེས་བྱ་སྟེ། །ཞེས་བཤད་པ་ལྟར། ཐོག་མ་དང་། བར་དང་། ཐ་མ་རྣམས་སུ་གོ་རིམ་བཞིན་དུ། གསག་པ་དང་། བསྲུང་བ་དང་། བརླག་པའི་སྡུག་བསྔལ་བྱས། ཇི་ལྟར་སྡུག་བསྔལ་བ་དེ་ལྟར་འདོད་པ་ཆུང་བ་རྣམས་ནི་དེ་ལྟར་སྡུག་བསྔལ་བ་མ་ལགས་པ་སྟེ། དཔེར་ན། ཀླུ་མཆོག་སྟེ། ཀླུའི་རྒྱལ་པོ་རྣམས་ལ་བདུན་དང་གསུམ་དང་གཅིག་ལ་སོགས་པའི་མགོ་བོ་ཇི་སྙེད་པ་ཡོད་པ་དག་ལ། དེ་ལས་བྱུང་བའི་སྡུག་བསྔལ་ཡང་དེ་སྙེད་རེ་འབྱུང་བ་བཞིན་ནོ། །ཡང་ན་ཀླུའི་རྒྱལ་པོ་མགོ་བོ་ཇི་སྙེད་ཡོད་པ་དེ་སྙེད་ཀྱི་གཙུག་རྒྱན་གྱི་ནོར་བུ་ཡོད་ལ། ནོར་བུ་ཇི་སྙེད་པ་དེ་སྙེད་ཀྱི་དེ་བསྲུང་བའི་སྡུག་བསྔལ་ཡང་འབྱུང་ངོ་ཞེས་སྦྱར་རོ། །

དགུ་པ་རང་གི་ཁྱིམ་ཐབ་ཀྱི་སྐྱོན་ཡོན་ཤེས་ནས་བསྟེན་ཚུལ་ནི། རང་བཞིན་དགྲར་འབྲེལ་གཤེད་མ་ལྟ་བུ་དང་། ཁྱིམ་ཐབ་བརྙས་བྱེད་རྗེ་མོ་ལྟ་བུ་དང་། །ཆུང་ངུའང་རྐུ་བ་ཆོམ་རྐུན་ལྟ་བུ་ཡི། །ཆུང་མ་གསུམ་པོ་དེ་དག་རྣམ་པར་སྤང་། །ཞེས་གསུངས་ཏེ། རང་བཞིན་གྱི་དགྲ་དང་འབྲེལ་བ་སྟེ་སྐྱེས་པ་གཞན་དང་འགྲོགས་ནས་ཁྱིམ་ཐབ་གསོད་པར་འདོད་པ་གཤེད་མ་ལྟ་བུ་དང་། ཁྱིམ་ཐབ་ལ་བཀུར་སྟི་མི་བྱེད་ཅིང་བརྙས་ཐབས་བྱེད་པ་རྗེ་མོ་ལྟ་བུ་དང་། ནོར་ཆུང་ངུའང་རྐུ་ན་ཆེན་པོ་ལྟ་ཅི་སྨོས་པ་ཆོམ་རྐུན་མ་ལྟ་བུའི་ཆུང་མ་གསུམ་པོ་དེ་དག་རྣམ་པར་སྤང་ངོ་། །འོ་ན་ཇི་ལྟ་བུ་དག་བསྟེན་པར་བྱ་ཞེ་ན། སྲིང་མོ་ལྟ་བུར་རྗེས་མཐུན་གང་ཡིན་དང་། །མཛའ་མོ་བཞིན་དུ་སྙིང་ལ་འབབ་པ་དང་། །མ་བཞིན་ཕན་པར་འདོད་དང་བྲན་མོ་བཞིན། །དབང་གྱུར་གང་ཡིན་རིགས་ཀྱི་ལྷ་བཞིན་བཀུར། །ཞེས་གསུངས་ཏེ། ཇི་ལྟར་སྲིང་མོ་མིང་པོའི་རྗེས་སུ་མཐུན་ཞིང་དེའི་ཚིག་ཁྱད་དུ་མི་གསོད་པ་བཞིན་དུ། ཁྱོའི་རྗེས་སུ་མཐུན་པའི་ཆུང་མ་དང་། ཇི་ལྟར་མཛའ་མོ་སྙིང་ལ་འབབ་ཅིང་བཀུར་སྟི་རིམ་གྲོའི་ཁྱད་པར་གྱིས་དགའ་བར་བྱེད་པ་བཞིན་དུ་ཁྱོའི་སྙིང་ལ་འབབ་པའི་ཆུང་མ་དང་། ཇི་ལྟར་མ་བུ་ལ་ལུས་སེམས་ཀྱི་སྡུག་བསྔལ་དང་བྲལ་བར་འདོད་པས་ཕན་པར་འདོད་པ་བཞིན་དུ་ཁྱོ་ལ་ཕན་པར་འདོད་པའི་ཆུང་མ་དང་། ཇི་ལྟར་བྲན་མོ་དགའ་མགུར་བྱར་ཡོད་པས་དབང་དུ་གྱུར་པ་དེ་བཞིན་དུ་ཁྱོའི་དབང་དུ་གྱུར་པའི་ཆུང་མ་གང་ཡིན་པ་དེ་རྣམས་ནི། རིགས་མི་ཉམས་པའི་རྒྱུ་ཡིན་པས། རིགས་ཀྱི་ལྷ་བཞིན་བཀུར་བའམ་བསྟེན་པར་བྱ་བ་ཡིན་ནོ། །

གསུམ་པ་རབ་བྱུང་དང་ཁྱིམ་པའི་ཕྱོགས་གཉིས་ཀ་ལ། མངོན་མཐོ་དང་ངེས་ལེགས་ཀྱི་ཆོས་སྒྲུབ་པར་གདམས་པ་ལ་གསུམ་སྟེ། ཐུན་མོང་གི་ཆོས་སྒྲུབ་པ་དང་། ཁྱད་པར་དུ་ངེས་ལེགས་ཀྱི་ཆོས་སྒྲུབ་པ་དང་། དེའི་རྟེན་ཐོབ་པ་དོན་ཡོད་པར་བྱའོ། །དང་པོ་ལ་དྲུག་གི དང་པོ་ཟས་ཀྱི་ཚོད་རིག་པ་ནི། ད་ནི་ཏིང་ངེ་འཛིན་ལ་སྦྱར་བའི་ཕྱིར། བསམ་གཏན་གྱི་སྦྱོར་བ་སྟོན་ཏོ། །བསམ་གཏན་ལ་གཅེས་པའི་ཆོས་ནི་གཉིས་ཏེ། ཟས་ཀྱི་ཚོད་རིག་པ་དང་། མི་ཉལ་བ་ལ་བརྩོན་པའོ། །དེ་ལ་ཟས་ཀྱི་ཚོད་རིག་པའི་དབང་དུ་བྱས་ནས། ཁ་ཟས་སྨན་དང་འདྲ་བར་རིག་པ་ཡིས། །འདོད་ཆགས་ཞེ་སྡང་མེད་པར་བསྟེན་བགྱི་སྟེ། །རྒྱགས་ཕྱིར་མ་ལགས་སྙེམས་པའི་ཕྱིར་མ་ལགས། །མཚག་ཕྱིར་མ་ལགས་ལུས་གནས་འབའ་ཞིག་ཕྱིར། །ཞེས་གསུངས་ཏེ། ཁ་ཟས་ཟ་བ་ནི་ཇི་ལྟར་སྨན་འདུ་བའི་ནད་ཀྱི་གཉེན་པོར་ཧ་ཅང་མང་བའམ། ཉུང་བ་མ་ཡིན་པ་རན་པར་བསྟེན་ན་ཕན་པ་ལྟར། ཟས་ཀྱང་བཀྲེས་པའི་ནད་ཀྱི་གཉེན་པོར་ཧ་ཅང་མང་ཉུང་དུ་མ་ཡིན་པར། ཚད་རིག་པ་ཡིས། ཀུན་སློང་འདོད་ཆགས་ཞེ་སྡང་མེད་པར་བསྟེན་པར་བགྱི་སྟེ། དེ་ལྟར་བསྟེན་པའི་ཚུལ་ཡང་། ལུས་ངག་རྒོད་ངག་ཅན་གྱི་རྒྱུར་གྱུར་པའི་དགའ་བ་དང་ཉོན་མོངས་ཅན་གྱིས་རྒྱགས་པ་འབྱུང་བར་བྱའོ་སྙམ་པའི་རྒྱགས་པའི་ཕྱིར་དང་། ལུས་སྟོབས་བསྐྱེད་དེ་དགྲ་ལ་གནོད་པ་བྱའོ་སྙམ་པ་སྙེམས་པའི་ཕྱིར་དང་། ཡན་ལག་དང་ཉིང་ལག་རྒྱས་པར་བྱའོ་སྙམ་པ་མཚག་པའི་ཕྱིར་མ་ལགས་པར། དགེ་བ་སྒྲུབ་པའི་རྟེན་དུ་ལུས་གནས་པ་འབའ་ཞིག་གི་ཕྱིར་བཟའོ་ཞེས་པའོ། །དེ་ལ་རྒྱགས་པ་དང་མཚག་པའི་ཕྱིར་ཟ་བ་ནི་འདོད་ཆགས་ཀྱིས་ཟ་བའོ། །སྙེམས་པའི་ཕྱིར་ཟ་བ་ནི་ཞེ་སྡང་གིས་ཟ་བའོ། །གཉིས་པ་ནམ་གྱི་སྟོད་སྨད་ལ་མི་ཉལ་བར་སྦྱོར་བ་ནི། རིགས་པའི་བདག་ཉིད་ཉིན་པར་མཐའ་དག་དང་། །མཚན་མོའི་ཐུན་གྱི་སྟོད་སྨད་བཟླས་ནས་ནི། །མནལ་ཚེའང་འབྲས་བུ་མེད་པར་མི་འགྱུར་བར། །དྲན་དང་ལྡན་པར་དེ་དག་བར་དུ་མནོལ། །ཞེས་གསུངས་ཏེ། རིགས་པའི་བདག་ཉིད་དེ་དགེ་བའི་རང་བཞིན་གྱི་བྱ་བས་ཉིན་པར་མཐའ་དག་དང་མཚན་མོ་ལ་ཆ་གསུམ་དུ་བྱས་པའི་ཐུན་གྱི་སྟོད་སྨད་དག་བཟླས་པ་སྟེ། འདས་པར་བྱས་ནས། སྟོད་སྨད་དེ་དག་གི་བར་གུང་ཐུན་གྱི་ཆ་ལ་མནལ་མཛོད་ལ། མནལ་བའི་ཚེའང་འབྲས་བུ་སྟེ། དོན་མེད་པར་མི་འགྱུར་བར་བྱ་བའི་ཕྱིར་གཉིད་ཅུང་ཟད་ཅིག་ལོག་སྟེ། ལུས་སེམས་བརྟས་པར་བྱས་ལ་མྱུར་དུ་ལངས་ལ་དགེ་བ་བྱའོ་སྙམ་པའི་དྲན་པ་དང་ཤེས་བཞིན་དང་ལྡན་པར་མནལ་བར་བྱ་སྟེ། དེ་ལྟར་བྱས་ན་གཉིད་དེ་ཡང་ཀུན་སློང་གི་དབང་གིས་དགེ་བར་འགྱུར་བས། གཉིད་ཀྱང་དོན་ལྡན་དུ་འགྱུར་བའི་ཕྱིར་རོ། །

ཇི་སྐད་དུ་བཅོམ་ལྡན་འདས་ཀྱིས་ཀྱང་དེའི་མཚན་མོའི་ཐུན་དང་པོ་ལ་འཆག་པ་དང་། འདུག་པ་དག་གིས་སྒྲིབ་པར་འགྱུར་བའི་ཆོས་རྣམས་ལས་སེམས་ཡོངས་སུ་སྦྱོང་བར་བྱེད་དོ། །ཡོངས་སུ་སྦྱངས་ནས་ཐུན་བར་པ་ལ་གཙུག་ལག་ཁང་གི་ཕྱི་རོལ་ཏུ་རྐང་པ་བཀྲུས་ཏེ། གཙུག་ལག་ཁང་དུ་ཞུགས་ནས། གློ་གཡས་པ་ཕབ་སྟེ། རྐང་པའི་ཐོག་ཏུ་རྐང་པ་བཞག་ལ་དྲན་པ་དང་ལྡན་ཞིང་ཤེས་བཞིན་དུ་སེང་གེའི་ཉལ་ཐབས་སུ་ཉལ་བར་བྱེད་དོ། །ཐུན་ཐ་མ་ལ་མྱུར་བ་མྱུར་བར་ལངས་ནས་འཆག་པ་དང་འདུག་པ་དག་གིས་སྒྲིབ་པར་འགྱུར་བའི་ཆོས་རྣམས་ལས་སེམས་སྦྱོང་བར་བྱེད་དོ། །ཞེས་གསུངས་པ་ལྟ་བུའོ། །གསུམ་པ་ཚད་མེད་པ་བཞི་བསྒོམ་པ་ནི། དེ་ལྟར་ལུས་སེམས་ལས་སུ་རུང་བར་བྱས་ནས། བསམ་གཏན་གྱི་སྦྱོར་བ་ཚད་མེད་བཞི་བསྒོམ་པར་བྱའོ། །ཞེས་བསྟན་པའི་ཕྱིར། བྱམས་དང་སྙིང་རྗེ་དག་དང་དགའ་བ་དང་། །བཏང་སྙོམས་རྟག་ཏུ་ཡང་དག་བསྒོམ་པར་བགྱི། །གོང་མ་བརྙེས་པར་མ་གྱུར་དེ་ལྟ་ནའང་། །ཚངས་པའི་འཇིག་རྟེན་བདེ་བ་ཐོབ་པར་འགྱུར། །ཞེས་གསུངས་ཏེ། སེམས་ཅན་ཐམས་ཅད་ལ་དམིགས་ནས་བདེ་བ་འདོད་པའི་བྱམས་པ་དང་། སྡུག་བསྔལ་དང་བྲལ་བར་འདོད་པའི་སྙིང་རྗེ་དང་། བདེ་བ་དང་ལྡན་པས་ཡིད་བདེ་བའི་དགའ་བ་དང་། ཆགས་སྡང་མེད་པར་མཉམ་སྙོམས་པའི་བཏང་སྙོམས་ཏེ་བཞི་པོ་དེ་དག་ནི། དམིགས་ཡུལ་སེམས་ཅན་ཚད་མེད་པ་ལ་དམིགས་པ་དང་། བསྒོམ་པ་པོ་ལ་བསོད་ནམས་ཚད་མེད་པ་འབྱུང་བས། ཁྱོད་ཀྱིས་ཡང་དག་པར་བསྒོམ་པར་བགྱིའོ། །

དེ་དག་ཀྱང་དམིགས་པའི་བྱེ་བྲག་གིས་རྣམ་པ་གསུམ་སྟེ། སེམས་ཅན་ལ་དམིགས་པ་དང་། ཆོས་ལ་དམིགས་པ་དང་། དམིགས་པ་མེད་པ་དང་གསུམ་སྟེ། དང་པོ་ནི། ཕུང་པོ་ལས་མ་གཏོགས་པའི་སེམས་ཅན་རྫས་ཡོད་དུ་བཟུངས་ནས། དེ་ལྟ་བུའི་སེམས་ཅན་སྡུག་བསྔལ་དང་བྲལ་བ་སོགས་འདོད་པའི་རྣམ་པ་ཅན་ནོ། །གཉིས་པ་ནི། གང་ཟག་གི་བདག་མེད་པར་རྟོགས་པས་ཕུང་པོ་ཆོས་ཙམ་ལ་སེམས་ཅན་དུ་ཉེ་བར་བཏགས་པ་སྡུག་བསྔལ་དང་བྲལ་བར་འདོད་པའི་རྣམ་པ་ཅན་ནོ། །གསུམ་པ་ནི། ཆོས་ཀྱི་བདག་མེད་པ་རྟོགས་པས་སྒྱུ་མ་ལྟ་བུའི་སེམས་ཅན་སྡུག་བསྔལ་དང་བྲལ་བ་སོགས་འདོད་པའི་རྣམ་པ་ཅན་ནོ། །དང་པོ་ནི། སོ་སོ་སྐྱེ་བོ་རྣམས་ལའོ། །གཉིས་པ་ནི། ཉན་རང་འཕགས་པ་རྣམས་ལའོ། །གསུམ་པ་ནི། ཐེག་ཆེན་འཕགས་པ་རྣམས་ལ་ཡོད་དོ། །ཉན་རང་ལ་ཆོས་ཀྱི་བདག་མེད་རྟོགས་པ་ཡོད་པ་ལྟར་ན། ཕྱི་མ་གཉིས་ཐེག་པ་གསུམ་གྱི་འཕགས་པ་ཀུན་ལ་ཡོད་དེ། ངོ་བོ་གཅིག་ལ་ལྡོག་པ་ཐ་དད་པའི་ཚུལ་དུ་གནས་སོ། །བསྒོམ་ཚུལ་ནི། དང་པོ་གསུམ་ལ། མཛའ་བོ་དང་། བར་མ་དང་། དགྲ་བོའི་ཕྱོགས་གསུམ་དུ་ཕྱེ་ནས། དང་པོར་ཕ་མ་སོགས་མཛའ་བོའི་ཕྱོགས་ལ་དམིགས་ནས། དེ་དག་བདེ་བ་དང་ཕྲད་པ་སོགས་འདོད་པའི་རྣམ་པར་བསྒོམ་ལ། དེའི་འོག་ཏུ་བར་མ་རྣམས་ལ། མཐར་དགྲ་བོའི་ཕྱོགས་ལ་དམིགས་ནས་བསྒོམ་སྟེ། མཛའ་བ་དང་དགྲ་བོའི་ཕྱོགས་དག་བདེ་བ་དང་ཕྲད་འདོད་སོགས་མཚུངས་པར་གྱུར་པ་ན། བསྒོམ་པ་ཡོངས་སུ་རྫོགས་པ་ཡིན་ནོ། །བཏང་སྙོམས་ནི། དང་པོ་ཐ་མལ་པའི་ཕྱོགས་ལ་བསྒོམ་ཞིང་། མཐར་སྡུག་པ་དང་མི་སྡུག་པ་ཐམས་ཅད་ལ་སྙོམས་པའི་བར་དུ་བསྒོམ་མོ། །དེ་ལྟར་བསྒོམས་པའི་འབྲས་བུ་ཅིར་འགྱུར་ཞེ་ན། བྱམས་སོགས་དེ་དག་བདག་མེད་རྣམ་པ་གཉིས་ཀྱི་ཤེས་རབ་ཀྱིས་ཟིན་པར་བསྒོམས་པ་ལས་ནི། མྱ་ངན་ལས་འདས་པ་ཐོབ་པར་འགྱུར་ལ། ཇི་ཞིག་ལྟར་གོང་མ་སྟེ། མྱ་ངན་ལས་འདས་པ་མ་ཐོབ་ཀྱང་། ཚངས་པའི་འཇིག་རྟེན་བསམ་གཏན་དང་པོ་སོགས་གཟུགས་ཀྱི་ཁམས་སུ་འདོད་པ་ལས་འདས་པའི་བདེ་བ་ཐོབ་པར་འགྱུར་ཏེ། དེ་དག་བསྒོམས་པས་ཁྲོ་བས་ཡོངས་སུ་གདུང་བ་བྲལ་བའི་བསམ་གཏན་སྐྱོན་མེད་པ་ཞི་བ་ཉམས་སུ་མྱོང་བར་འགྱུར་པའི་ཕྱིར་རོ། །དེའི་ཕྱིར་བྱམས་པ་ལ་སོགས་པ་ནི་བསམ་གཏན་སྐྱེད་བྱེད་ཀྱི་སྦྱོར་བར་གཞུང་འདིར་བཤད་དོ། །

བཞི་པ་བསམ་གཏན་བཞི་བསྒོམ་པ་ནི། བྱམས་སོགས་བསྒོམས་པས་བསམ་གཏན་བཞི་ཐོབ་མོད། དེ་དག་གི་འབྲས་བུ་ཅིར་འགྱུར་ཞེ་ན། འདོད་སྤྱོད་དགའ་དང་བདེ་དང་སྡུག་བསྔལ་དག །རྣམ་པར་སྤངས་པའི་བསམ་གཏན་བཞི་པོ་ཡིས། །ཚངས་དང་འོད་གསལ་དག་དང་དགེ་རྒྱས་དང་། །འབྲས་བུ་ཆེ་ལྷ་རྣམས་དང་སྐལ་མཉམ་འཐོབ། །ཅེས་གསུངས་ཏེ། རྟོག་དཔྱོད་གཉེན་པོའི་ཡན་ལག་གིས་འདོད་སྤྱོད་དེ་འདོད་པ་ལ་འདུན་པ་དང་། རྣམ་འཚེ་སྤངས་ཤིང་དབེན་པ་ལས་སྐྱེས་པའི་དགའ་བ་དང་། བདེ་བ་ཅན་གྱི་སེམས་རྩེ་གཅིག་པ་བསམ་གཏན་དང་པོ་དང་། ནང་རབ་ཏུ་དང་བ་གཉེན་པོའི་ཡན་ལག་གིས་དཔྱོད་པ་སྤངས་ཤིང་། ཏིང་ངེ་འཛིན་ལས་སྐྱེས་པའི་དགའ་བ་དང་། བདེ་བ་ཅན་གྱི་སེམས་རྩེ་གཅིག་པ་བསམ་གཏན་གཉིས་པ་དང་། དྲན་ཤེས་བཞིན་བཏང་སྙོམས་གཉེན་པོའི་ཡན་ལག་གིས་དགའ་བ་སྤངས་ཤིང་བདེ་བ་དང་ལྡན་པའི་སེམས་རྩེ་གཅིག་པ་བསམ་གཏན་གསུམ་པ་དང་། དྲན་པ་དང་བཏང་སྙོམས་ཡོངས་དག་གཉེན་པོའི་ཡན་ལག་གིས་བདེ་བ་དང་སྡུག་བསྔལ་རྣམ་པར་སྤངས་ཤིང་། ཚོར་བ་བཏང་སྙོམས་དང་ལྡན་པའི་སེམས་རྩེ་གཅིག་པ་ནི་བསམ་གཏན་བཞི་པ་སྟེ། དེ་ལྟར་རྒྱུ་སྙོམས་འཇུག་གི་བསམ་གཏན་བཞི་པོ་བསྒོམས་པ་ཡིས། གོ་རིམ་བཞིན་དུ་ཚངས་ཆེན་དང་། འོད་གསལ་དང་། དགེ་རྒྱས་དང་། འབྲས་བུ་ཆེ་བའི་ལྷ་རྣམས་དང་སྐལ་བ་མཉམ་པར་སྐྱེ་བ་འཐོབ། ཅེས་པ་གཙོ་ཆེ་བ་སྨོས་པ་ཡིན་ལ། ཞིབ་ཏུ་ན། བསམ་གཏན་དང་པོ་ཆུང་ངུ་དང་། འབྲིང་དང་། ཆེན་པོ་ཡོངས་སུ་བསྒོམས་པས་གོ་རིམ་བཞིན་དུ། ཚངས་རིས་དང་། ཚངས་པའི་མདུན་ན་འདོན་དང་། ཚངས་ཆེན་རྣམས་སུ་སྐྱེ་ལ། བསམ་གཏན་བཞི་པ་ཆུང་ངུ་འབྲིང་ཆེན་པོར་བསྒོམས་པས། དགེ་ཆུང་དང་། ཚད་མེད་དགེ་དང་། དགེ་རྒྱས་རྣམས་སུ་སྐྱེ་བ་སོགས་ཤེས་པར་བྱའོ། །

ལྔ་པ་ལས་ལྕི་ཡང་གི་དབྱེ་བས་དགེ་སྡིག་ལ་བླང་དོར་ཇི་ལྟར་བྱ་བ་ནི། རྟག་དང་མངོན་པར་ཞེན་དང་གཉེན་པོ་མེད། །ཡོན་ཏན་གཙོ་ལྡན་གཞི་ལས་བྱུང་བའི་ལས། །དགེ་དང་མི་དགེ་རྣམ་ལྔ་ཆེན་པོ་སྟེ། །དེ་བས་དགེ་བ་སྤྱོད་ལ་བརྩོན་པར་བགྱི། །ཞེས་གསུངས་ཏེ། དགེ་བ་དང་མི་དགེ་བའི་ལས་གང་ཁྱད་པར་རྣམ་པ་ལྔ་དང་ལྡན་པ་ནི། འབྲས་བུ་ངེས་པ་དང་མང་པོ་འབྱིན་པའི་ཕྱིར་ཆེན་པོ་ཞེས་བྱའོ། །དེ་དག་ཀྱང་གང་ཞེ་ན། སྦྱོར་བ་དང་། བསམ་པ་དང་། གཉེན་པོ་དང་། གཞིའི་ཁྱད་པར་རྣམས་སོ། །དེ་དག་ལ་སྦྱོར་བའི་ཁྱད་པར་རྣམས་ནི། ལས་དེ་དུས་རྟག་ཏུ་བྱེད་པའོ། །བསམ་པའི་ཁྱད་པར་ནི། ཉོན་མོངས་པ་དང་རབ་ཏུ་དང་བ་སོགས་མངོན་ཞེན་དྲག་པོས་བྱས་པའོ། །གཉེན་པོའི་ཁྱད་པར་ནི། ལས་དེ་ལ་འཇོམས་བྱེད་ཀྱི་གཉེན་པོ་མེད་པའོ། །

གཞིའི་ཁྱད་པར་ནི། གཉིས་ཏེ། ཕན་འདོགས་པའི་གཞི་ནི། ཕ་མ་དང་ཆོས་སྨྲ་བ་དང་། བྱེ་བྲག་ཏུ་ཕན་འདོགས་པ་དོམ་དང་སྤྲེའུ་ལ་སོགས་པའི་སྐྱེས་རབས་བཞིན་ནོ། །ཡོན་ཏན་གཙོར་ལྡན་པའི་གཞི་ནི། དཀོན་མཆོག་གསུམ་དང་། འགོག་པ་ལས་ལངས་པ་སོགས་ཏེ། དེ་དག་ལ་ཕན་གནོད་བྱས་པ་ལས་བྱུང་བ་ནི། གཞིའི་ཁྱད་པར་ལས་ཆེན་པོ་ཡིན་ནོ། །དེ་བས་ན་ཁྱོད་ཀྱིས་མི་དགེ་བ་ཆེན་པོ་སྤངས་ཏེ་དགེ་བ་ཆེན་པོ་སྤྱོད་པ་ལ་བརྩོན་པར་བགྱིའོ། ཁྱོད་ཀྱིས་མི་དགེ་བ་ནི་མང་དུ་སྤྱད། དགེ་བ་ནི་ཉུང་ངུར་སྤྱད་ན། མི་འཇིགས་པར་མི་བྱ་ལ། དེ་ལས་བཟློག་པར་སྤྱད་ན་ཧ་ཅང་འཇིགས་པར་ཡང་མི་བྱའོ། །ཞེས་བསྟན་པའི་ཕྱིར། ལན་ཚྭ་སྲང་འགས་ཆུ་ནི་ཉུང་ངུ་ཞིག །རོ་སྒྱུར་བགྱིད་ཀྱི་གངྒཱའི་ཀླུང་མིན་ལྟར། །དེ་བཞིན་སྡིག་པའི་ལས་ནི་ཆུང་ངུ་ཡང་། །དགེ་བའི་རྩ་བ་ཡངས་ལ་མཁྱེན་པར་མཛོད། །ཅེས་གསུངས་ཏེ། ཇི་ལྟར་ལན་ཚྭ་སྲང་འགའ་སྟེ་ཉུང་ཟད་ཅིག་གིས་ཆུ་ཉུང་ངུ་ཞིག་ལན་ཚྭའི་རོ་ཉིད་དུ་སྒྱུར་བར་བགྱིད་ཀྱི་གངྒཱའི་ཀླུང་ངམ་ཆུ་ཤིན་ཏུ་མང་ན་སྒྱུར་ནུས་པ་མིན་པ་དེ་བཞིན་དུ། སྡིག་པའི་ལས་ཆུང་ངུ་ཡང་དགེ་བའི་རྩ་བ་ཆུང་ཞིང་ཉུང་ན་འབྲས་བུ་འབྱིན་ནུས་ཀྱིས། ཡངས་པ་སྟེ་ཆེ་ཞིང་མང་བ་ལ་འབྱིན་མི་ནུས་པར་མཁྱེན་པར་མཛོད་ལ་དགེ་བ་སྟོབས་ཆེན་མང་དུ་བསྒྲུབ་པར་བགྱིའོ། །དྲུག་པ་སྒྲིབ་པ་ལྔ་སྤོང་བ་ནི། རྒོད་པ་ལ་སོགས་པ་ཆོས་ལྔ་པོ་འདི་དག་ནི། བསམ་གཏན་དང་རྣམ་ཐར་སོགས་ཀྱི་འགལ་ཟླ་ཡིན་པའི་ཕྱིར་འབད་དེ་སྤང་ངོ་ཞེས་བསྟན་པའི་ཕྱིར། རྒོད་དང་འགྱོད་དང་གནོད་སེམས་རྨུགས་པ་དང་། །གཉིད་དང་འདོད་ལ་འདུན་དང་ཐེ་ཚོམ་སྟེ། །སྒྲིབ་པ་ལྔ་པོ་འདི་དག་དགེ་བའི་ནོར། །འཕྲོག་པའི་ཆོམ་རྐུན་ལགས་པར་མཁྱེན་པར་མཛོད། །ཅེས་གསུངས་ཏེ། སྡུག་པའི་ཡུལ་ལ་སེམས་རྣམ་པར་འཕྲོ་བའི་རྒོད་པ་དང་། ངན་པ་བྱས་པའི་ལས་ལ་ཡིད་གཅགས་པའི་འགྱོད་པ་དང་། ཀུན་ནས་མནར་སེམས་ཀྱི་དངོས་པོ་ལ་སེམས་ཁོང་ནས་འཁྲུགས་པའི་གནོད་སེམས་དང་། སེམས་ནང་དུ་ཞུམ་པའི་སྒོ་ནས་ལུས་སེམས་ལས་སུ་མི་རུང་བར་བྱེད་པ་རྨུགས་པ་དང་། གཉིད་ཀྱི་རྒྱུ་ལ་བརྟེན་ནས་འཇུག་པ་རང་དབང་མེད་པར་ནང་དུ་སྡུད་པར་བྱེད་པ་གཉིད་དང་། ཁམ་ཟས་དང་འཁྲིག་པ་སོགས་ཀྱི་འདོད་པ་ལ་འདུན་པ་དང་། ཐར་པ་དང་ཐར་པའི་ལམ་ལ་ཡིད་གཉིས་སུ་གྱུར་པའི་ཐེ་ཚོམ་སྟེ། དེ་རྣམས་ནི་བསམ་གཏན་དང་། རྣམ་ཐར་སོགས་སམ། བསླབ་པ་གསུམ་ལ་སྒྲིབ་པས་ན། སྒྲིབ་པ་ལྔ་པོ་ཞེས་བྱ་སྟེ། འདི་དག་ནི་དགེ་བའི་ནོར་འཕྲོག་པའི་ཆོམ་རྐུན་ལགས་པར་མཁྱེན་པར་མཛོད་ལ་སྤོངས་ཤིག་ཅེས་པའོ། །དེ་ལ་རྒོད་འགྱོད་གཉིས་ནི་གཡོ་བར་ཆོས་མཐུན་པའི་ཕྱིར་དང་། རྨུགས་གཉིད་གཉིས་ནི་བླུན་པར་ཆོས་མཐུན་པའི་ཕྱིར་སྒྲིབ་པ་རེ་རེར་བཞག་གོ །ཡང་ན་མཛོད་དུ་འདོད་ན་སྒྲིབ་རྣམས་མི་མཐུན་དང་། །ཟས་དང་བྱ་བ་གཅིག་པའི་ཕྱིར། །གཉིས་གཅིག་ཅེས་པ་ལྟར། དང་པོ་གཉིས་ནི་ཉེ་དུའི་རྣམ་རྟོག་ལ་སོགས་པའི་རྒྱུ་ལས་བྱུང་བ་དང་། སེམས་འཕྲོ་བར་བྱེད་པར་ཆོས་མཐུན་པ་དང་། ཞི་གནས་ཀྱིས་འཇོམས་པའི་ཕྱིར་གཅིག་ཏུ་བཞག་ལ། ཕྱི་མ་གཉིས་ཀྱང་ཁ་ཟས་ཀྱི་ཚོད་མ་ཟིན་པ་སོགས་ཀྱི་རྒྱུ་ལས་བྱུང་བ་དང་། སེམས་ཞུམ་པར་བྱེད་པ་དང་། སྣང་བའི་འདུ་ཤེས་ཀྱིས་འཇོམས་པས་གཅིག་ཏུ་བཞག་གོ།ཅིིའི་ཕྱིར་སྒྲིབ་པ་ལྔ་ཉིད་ཡིན་ཞེ་ན། དེ་དག་གིས་བསླབ་པ་གསུམ་ལ་གནོད་པར་བྱེད་པའི་ཕྱིར་ཏེ། འདི་ལྟར་འདོད་ལ་འདུན་པ་དང་། གནོད་སེམས་གཉིས་ཀྱིས་ནི་ལྷག་པའི་ཚུལ་ཁྲིམས་ལ་གནོད་དོ། །དེ་དག་གི་གོ་རིམ་བཞིན་འདོད་པ་ལ་སྲེད་པའི་དབང་གིས་དང་པོར་ཚུལ་ཁྲིམས་ཡང་དག་པར་མི་ལེན་ཅིང་། བླངས་པའི་འོག་ཏུ་གཞན་གྱིས་བསླབ་པ་ལ་ལེགས་པར་བསྐུལ་བ་ན། ཀུན་ནས་མནར་སེམས་པའི་དབང་གིས་ཆོས་བཞིན་དུ་ལེགས་པར་མི་སྒྲུབ་པའི་ཕྱིར་རོ། །རྨུགས་གཉིད་གཉིས་ཀྱིས་ལྷག་པའི་སེམས་ལ་གནོད་དེ། དེ་དག་གིས་ཞི་གནས་ཀྱི་རྒྱུ་མཚན་སྒོམ་པ་ན། ནང་དུ་སེམས་ཞུམ་པར་བྱེད་པའི་ཕྱིར་རོ། །རྒོད་འགྱོད་གཉིས་ཀྱིས་ལྷག་པའི་ཤེས་རབ་ལ་གནོད་དེ། རབ་ཏུ་འཛིན་པའི་རྒྱུ་མཚན་སྒོམ་པ་ན། དེ་དག་གིས་ཕྱི་རོལ་ཏུ་ཡེངས་པར་བྱེད་པའི་ཕྱིར་རོ། །ཐེ་ཚོམ་གྱིས་གཉིས་ཀ་ལ་གནོད་དེ། ཞི་ལྷག་ཟུང་འབྲེལ་གྱི་བཏང་སྙོམས་ཀྱི་རྒྱུ་མཚན་སྒོམ་པ་ན། ཐེ་ཚོམ་དུ་གྱུར་པས་གཏན་ལ་མ་ཕེབས་ན། བཏང་སྙོམས་སུ་འཇོག་མི་ནུས་པའི་ཕྱིར་རོ། །

གཉིས་པ་ཁྱད་པར་དུ་ངེས་ལེགས་ཀྱི་ཆོས་སྒྲུབ་པ་ལ་གསུམ་གྱི། དང་པོ་སྦྱོར་ལམ་དབང་པོ་དང་སྟོབས་ལྔ་བསྒོམ་པ་ནི། དེ་ལྟར་སྤང་བྱ་བར་ཆད་ཀྱི་ཆོས་བསྟན་ནས། བསྟེན་བྱ་ཐར་པ་དང་རྗེས་སུ་མཐུན་པའི་ཆོས་བསྟན་པའི་ཕྱིར། དད་དང་བརྩོན་འགྲུས་དག་དང་དྲན་པ་དང་། །ཏིང་འཛིན་ཤེས་རབ་ཆོས་མཆོག་ལྔ་ཉིད་དེ། །འདི་ལ་མངོན་བརྩོན་མཛོད་ཅིག་འདི་དག་ནི། །སྟོབས་དབང་ཞེས་བགྱི་རྩེ་མོར་གྱུར་པའང་ལགས། །ཞེས་གསུངས་ཏེ། བདེན་པ་རྣམས་ལ་མངོན་པར་ཡིད་ཆེས་པའི་དད་པ་དང་། དེ་དག་མངོན་དུ་བྱེད་པ་ལ་སྤྲོ་བའི་བརྩོན་འགྲུས་དང་། བདེན་པ་དང་། དེའི་རྣམ་པ་མ་བརྗེད་པའི་དྲན་པ་དང་། བདེན་པའི་རྣམ་པ་ལ་སེམས་རྩེ་གཅིག་པའི་བསམ་གཏན་དང་། བདེན་པའི་རྣམ་པ་རྣམས་ཡང་དག་པར་རྣམ་པར་འབྱེད་པའི་ཤེས་རབ་སྟེ། ལྔ་པོ་འདི་རྣམས་ལ་མངོན་པར་བརྩོན་ཞིང་གོམས་པར་མཛོད་ཅིག་དང་འདི་དག་འཕགས་ལམ་གྱི་དངོས་རྒྱུར་གྱུར་པའི་ཚེ། ཆོས་མཆོག་ཅེས་བྱ་ལ། དེ་དག་བཟོད་པའི་ཚེ་མི་མཐུན་ཕྱོགས་ཀྱིས་མི་བརྫི་བས། སྟོབས་ཞེས་བྱ་བ་དང་། དྲོད་ཀྱི་ཚེ་བདེན་པ་མངོན་པར་རྟོགས་པ་ལ་དབང་ལྷག་པར་བྱེད་པའི་ཕྱིར། དབང་པོ་ཞེས་བགྱི་བ་དང་། དེ་ཉིད་འཕེལ་བ་ན་དགེ་བའི་རྩ་བ་གཡོ་བའི་རྩེ་མོར་གྱུར་བའི་ཕྱིར། རྩེ་མོར་གྱུར་པ་ཞེས་བགྱི་བའང་ལགས་ཞེས་སོ། །

གཉིས་པ་དེའི་འགལ་རྐྱེན་རྒྱགས་པ་སྤང་བ་ནི། ན་རྒ་འཆི་སྡུག་བྲལ་དང་དེ་བཞིན་དུ། །ལས་ནི་བདག་གིར་བྱ་ལས་མ་འདས་ཞེས། །དེ་ལྟར་ཡང་དང་ཡང་དུ་སེམས་པ་ནི། །དེ་ཡི་གཉེན་པོའི་སྒོ་ནས་རྒྱགས་མི་འགྱུར། །ཞེས་གསུངས་ཏེ། བདག་ནི་ན་བ་དང་རྒ་བ་དང་འཆི་བ་དང་སྡུག་པ་དང་བྲལ་བར་འགྱུར་བ་ལས་མ་འདས་པ་དང་། དེ་བཞིན་དུ་ལས་བདག་གིར་བྱ་བ་ལས་མ་འདས་ཏེ། བདེ་སྡུག་ནི་བདག་གིས་སྔར་བྱས་པའི་ལས་ལ་རག་ལས་ཀྱི། བདག་ལ་ནི་རང་དབང་མེད་དོ། །ཞེས་ཚུལ་བཞིན་དུ་བསམ་པར་བྱ་སྟེ། དེ་ལྟར་ཡང་དང་ཡང་དུ་སེམས་པ་ནི་རྒྱགས་པ་དེའི་གཉེན་པོ་ཡིན་པའི་སྒོ་ནས་རྒྱགས་པར་མི་འགྱུར་རོ་སྙམ་དུ་དགོངས་སོ། །

གསུམ་པ་མཐུན་རྐྱེན་ཡང་དག་པའི་ལྟ་བ་བསྒོམ་པ་ལ་གཉིས་ཀྱི་དང་པོ་མདོར་བསྟན་པ་ནི། དད་པ་ལ་སོགས་པའི་དབང་པོ་སྐྱེ་བའི་རྒྱུ་ནི། ཡང་དག་པའི་ལྟ་བ་ཡིན་པས། དེ་བསྒོམ་པར་བསྟན་པའི་ཕྱིར། གལ་ཏེ་མཐོ་རིས་ཐར་པ་མངོན་བཞེད་ན། །ཡང་དག་ལྟ་ལ་གོམས་པ་ཉིད་དུ་མཛོད། །གང་ཟག་ལོག་པར་ལྟ་བས་ལེགས་སྤྱད་ཀྱང་། །ཐམས་ཅད་རྣམ་པར་སྨིན་པ་མི་ཟད་ལྡན། །ཞེས་གསུངས་ཏེ། འདིར་ཡང་དག་པའི་ལྟ་བ་གཉིས་ཏེ། ཀུན་རྫོབ་ཀྱི་ཡུལ་ཅན་དང་། དོན་དམ་པའི་ཡུལ་ཅན་ནོ། །དང་པོ་ནི། ཕྱི་མར་ལས་དང་འབྲས་བུའི་འབྲེལ་བ་ལ་ཡིད་ཆེས་པའོ། །གཉིས་པ་ནི། ཆོས་རྣམས་ཀྱི་དེ་ཁོ་ན་ཉིད་སྟོང་པ་ཉིད་རྟོགས་པའི་ཤེས་རབ་བོ། །ཡང་དག་པའི་ལྟ་བ་དང་པོ་ནི། མཐོ་རིས་ཀྱི་རྒྱུ་ཡིན་ལ། གཉིས་པ་ནི། ཐར་པའི་རྒྱུ་ཡིན་ནོ། །དེའི་ཕྱིར་གལ་ཏེ་གནས་སྐབས་སུ་མཐོ་རིས་དང་། མཐར་ཐུག་ཐར་པའི་བདེ་བ་མངོན་པར་བཞེད་ན་གོང་དུ་བཤད་མ་ཐག་པའི་ཀུན་རྫོབ་དང་དོན་དམ་པའི་ཡུལ་ཅན་གྱི་ཡང་དག་པའི་ལྟ་བ་ལ་རྟག་ཏུ་གོམས་པར་མཛོད་ཅིག དེ་མ་བསྒོམས་ན་ཅིར་འགྱུར་ཞེ་ན། གལ་ཏེ་ཀུན་རྫོབ་ཀྱི་ཡུལ་ཅན་ཡང་དག་པའི་ལྟ་བ་མེད་པར་གང་ཟག་ལས་རྒྱུ་འབྲས་ལ་སྐུར་བ་འདེབས་པའི་ལོག་པར་ལྟ་བས་སྔར་སྦྱིན་སོགས་ལེགས་པར་སྤྱད་ཀྱང་། རང་རྒྱུད་ཀྱི་ལས་ཐམས་ཅད་རྣམ་པར་སྨིན་པ་མི་ཟད་ཅིང་རྩུབ་པ་དང་ལྡན་པར་འགྱུར་ཏེ། ལོག་ལྟས་དགེ་བའི་རྩ་བ་རྣམས་དྲུངས་འབྱིན་པའི་ཕྱིར་རོ། །ཡང་དོན་དམ་པའི་ཡུལ་ཅན་གྱི་ཡང་དག་པའི་ལྟ་བ་མེད་པའི་གང་ཟག་དངོས་པོ་ལ་མངོན་པར་ཞེན་པའི་ལོག་པར་ལྟ་བ་དང་ལྡན་པས་སྦྱིན་སོགས་ལེགས་པར་སྤྱད་ཀྱང་། ལས་ཐམས་ཅད་ཀྱི་རྣམ་སྨིན་འཁོར་བར་འབྱིན་པའི་ཕྱིར་མི་ཟད་ལྡན་ཞེས་སྦྱར་རོ། །

གཉིས་པ་རྒྱས་པར་བཤད་པ་ལ་ལྔའི་དང་པོ་དྲན་པ་ཉེར་བཞག་བཞི་བསྒོམ་པ་ནི། མི་ནི་ཡང་དག་ཉིད་དུ་མི་བདེ་ཞིང་། །མི་རྟག་བདག་མེད་མི་གཙང་རིག་པར་བགྱི། །དྲན་པ་ཉེ་བར་མ་བཞག་རྣམས་ཀྱིས་ནི། །ཕྱིན་ཅི་ལོག་བཞིར་ལྟ་བ་ཕུང་ཁྲོལ་བ། །ཞེས་གསུངས་ཏེ། མི་ནི་ཡང་དག་ཉིད་དུ་སྟེ་ཤེས་རབ་ཀྱིས་བལྟས་ན། སྡུག་བསྔལ་ཉིད་གསུམ་དང་ལྡན་པས་མི་བདེ་ཞིང་། དུས་གཉིས་པར་མི་སྡོད་པས་མི་རྟག་པ་དང་། དབང་བྱེད་པ་པོའི་སྐྱེས་བུ་མེད་པས་བདག་མེད་པ་དང་། རུས་པ་དང་ཤ་ཁྲག་ལ་སོགས་པ་འདུས་པའི་རང་བཞིན་ཡིན་པས། མི་གཙང་བར་རིག་པར་བགྱི་སྟེ། དེ་ལྟར་དྲན་པ་ཉེ་བར་མ་བཞག་པ་སྟེ། ཤེས་རབ་ཀྱིས་མ་བརྟགས་པ་རྣམས་ཀྱིས་ནི། ལུས་མི་གཙང་བ་ལ་གཙང་བ་དང་། ཚོར་བ་སྡུག་བསྔལ་བ་ལ་བདེ་བ་དང་། སེམས་མི་རྟག་པ་ལ་རྟག་པ་དང་། ཆོས་བདག་མེད་པ་ལ་བདག་དང་ཕྱིན་ཅི་ལོག་བཞིར་ལྟ་བ་དེ་དག་ནི། འཁོར་བ་དང་ངན་སོང་གི་རྒྱུར་གྱུར་པའི་ཕྱིར་ཕུང་ཁྲོལ་བ་སྟེ། དེ་བས་ན་དྲན་པ་ཉེ་བར་བཞག་པར་བགྱིའོ། །གཉིས་པ་ཁྱད་པར་དུ། ཆོས་དྲན་པ་ཉེ་བར་བཞག་པ་བསྒོམ་པ་ནི། གལ་ཏེ་སྡུག་བསྔལ་སོགས་ཡིན་ཡང་། བདག་མེད་པ་ཇི་ལྟར་ཡིན་ཏེ། བདག་མེད་ན་ལས་དགེ་སྡིག་གི་འབྲས་བུ་སུ་ཞིག་གིས་སྤྱོད་པར་འགྱུར་སྙམ་ན། གཟུགས་ནི་བདག་མ་ཡིན་ཞེས་གསུངས་ཏེ་བདག །གཟུགས་དང་ལྡན་མིན་གཟུགས་ལ་བདག་གནས་མིན། །བདག་ལ་གཟུགས་མི་གནས་ཏེ་དེ་བཞིན་དུ། །ཕུང་པོ་ལྷག་མ་བཞི་ཡང་སྟོང་རྟོགས་བགྱི། །ཞེས་གསུངས་ཏེ། གལ་ཏེ་བདག་ཅིག་ཡོད་ན་གཟུགས་སོགས་ཕུང་པོའི་ངོ་བོར་ཡོད་དམ། དེ་ལས་དོན་གཞན་དུ་ཡོད་གྲང་། དང་པོ་མ་ཡིན་ཏེ། མདོ་ལས། གཟུགས་བདག་མ་ཡིན་ཞེས་པ་ནས། རྣམ་པར་ཤེས་པ་བདག་མ་ཡིན་ཞེས་པའི་བར་དུ་གསུངས་པའི་ཕྱིར་རོ། །འདི་ནི་རེ་ཞིག་ལུང་ངོ་། །

འདི་ལ་རིགས་པ་ཅི་ཞིག་ཡོད་ཅེ་ན། བདག་ནི་གཟུགས་ལ་སོགས་པའི་ངོ་བོ་མ་ཡིན་ཏེ། གཟུགས་སོགས་དང་འདྲ་བར་བདག་ཀྱང་མི་རྟག་པ་དང་། དུ་མ་ཉིད་དུ་ཐལ་བར་འགྱུར་བའི་ཕྱིར་དང་། གཟུགས་སོགས་རྫས་སུ་ཡོད་པར་འདོད་པས། བདག་རྫས་སུ་ཡོད་པར་འགྱུར་བ་དང་། བདག་ལྟ་རྫས་ཀྱི་ཡུལ་ཅན་ཡིན་པས་ཕྱིན་ཅི་མ་ལོག་པའི་ཕྱིར་གཉེན་པོས་ས་བོན་སྤང་དུ་མེད་པར་ཐལ་བའི་ཕྱིར་རོ། །དེ་སྐད་དུ་ཡང་དབུ་མ་འཇུག་པར། གལ་ཏེ་ཕུང་པོ་བདག་ན་དེ་ཕྱིར་དེ། །མང་བས་བདག་དེ་དག་ཀྱང་མང་པོར་འགྱུར། །བདག་ནི་རྫས་སུ་འགྱུར་ཞིང་དེ་ལྟ་བ། །རྫས་ལ་འཇུག་པས་ཕྱིན་ཅི་ལོག་མི་འགྱུར། །ཞེས་གསུངས་པ་ལྟར་རོ། །གལ་ཏེ་གཟུགས་སོགས་ལས་གཞན་པ་ཞིག་ཡིན་ན། ལྷས་བྱིན་བ་ལང་དང་ལྡན་པ་ལྟར་གཟུགས་སོགས་དང་ལྡན་པ་ཞིག་གམ། ལྷས་བྱིན་རེ་ལྡེ་ལ་འདུག་པ་བཞིན་དུ་གཟུགས་སོགས་ལ་གནས་པ་ཞིག་གམ། འཁྲི་ཤིང་སོགས་ས་ལ་བརྟེན་པ་ལྟར། དེ་ལ་གཟུགས་སོགས་བརྟེན་པ་ཞིག་ཡིན་གྲང་། དང་པོ་མི་རིགས་ཏེ། བདག་གཟུགས་དང་ལྡན་པ་མ་ཡིན་ཞེས་པ་ནས། རྣམ་པར་ཤེས་པ་དང་ལྡན་པ་མ་ཡིན་ཞེས་པའི་བར་གསུངས་པའི་ཕྱིར་རོ། །འདི་ནི་ལུང་ངོ་། །རིགས་པ་ནི། ཇི་ལྟར་ལྷས་བྱིན་ལ་བ་ལང་དབང་བསྒྱུར་བྱར་ལྡན་པ་ལྟར། བདག་ལ་གཟུགས་སོགས་དབང་བསྒྱུར་བྱར་ལྡན་པ་མ་ཡིན་ཏེ། བདག་མི་འདོད་བཞིན་དུ་གཟུགས་སོགས་ལས་གཞན་དང་གཞན་དུ་འགྱུར་བ་དང་། འཇིག་པ་སོགས་མཐོང་བའི་ཕྱིར་རོ། །ཕྱོགས་གཉིས་པ་ཡང་མི་རིགས་ཏེ། གཟུགས་ལ་བདག་གནས་པ་མ་ཡིན་ཞེས་པ་ནས། རྣམ་པར་ཤེས་པ་ལ་བདག་གནས་པ་མ་ཡིན་ཞེས་པའི་བར་གསུངས་པའི་ཕྱིར་རོ། །དེ་ནི་ལུང་ཡིན་ལ། རིགས་པ་ནི། ལྷས་བྱིན་རེ་ལྡེ་ལ་གནས་པ་ལྟར་གཟུགས་ལ་སོགས་པ་ལ་བདག་བརྟེན་པའི་ཚུལ་གྱིས་གནས་པ་མ་ཡིན་ཏེ། རྟེན་གཟུགས་སོགས་མི་རྟག་པས་བདག་ཀྱང་མི་རྟག་པར་འགྱུར་བའི་ཕྱིར་རོ། །

ཕྱོགས་གསུམ་པ་ཡང་མ་ཡིན་ཏེ། བདག་ལ་གཟུགས་གནས་པ་མ་ཡིན་ཞེས་པ་ནས། རྣམ་པར་ཤེས་པ་ལ་གཟུགས་གནས་པ་མ་ཡིན་ཞེས་པའི་བར་དུ་གསུངས་པའི་ཕྱིར་རོ། །དེ་ནི་ལུང་ཡིན་ལ། རིགས་པ་ནི། འཁྲི་ཤིང་ལ་སོགས་པ་ས་ལ་བརྟེན་པ་ལྟར། བདག་ལ་གཟུགས་སོགས་ཕུང་པོ་བརྟེན་པ་མ་ཡིན་ཏེ། བདག་རྟག་པ་ལ་བརྟེན་པའི་གཟུགས་སོགས་གཏན་མི་འཇིག་པར་ཐལ་བའི་ཕྱིར་དང་། དེ་དག་གི་སྐྱེ་འཇིག་བདག་ལ་རག་ལས་པར་གྱུར་ན། དེའང་མ་ཡིན་ཏེ། བདག་མེད་པའི་ཕྱི་རོལ་གྱི་གཟུགས་སྐྱེ་བ་དང་འཇིག་པར་ཡང་དམིགས་པའི་ཕྱིར་རོ། །གཟུགས་ལ་དཔྱད་པ་དེ་བཞིན་དུ། ཚོར་བ་ལ་སོགས་པའི་ཕུང་པོ་ལྷག་མ་བཞི་ལ་ཡང་ངོ་བོ་དང་། དོན་གཞན་གྱི་བདག་གིས་སྟོང་ཚུལ་གོང་དུ་བཤད་པའི་ལུང་དང་རིགས་པ་དེ་དག་གིས་རྟོགས་པར་བགྱིའོ། །ཇི་སྐད་བཤད་པ་ལས་བཟློག་སྟེ། གཟུགས་བདག་ཏུ་ལྟ་བ་ལ་སོགས་པ་ཕུང་པོ་ལྔ་པོ་རེ་རེ་ལ་ཡང་རྣམ་པ་བཞི་བཞིར་ལྟ་བ་ནི། འཇིག་ཚོགས་ལ་ལྟ་བའི་མཐའ་ཉི་ཤུ་ཞེས་མདོ་ལས་གསུངས་ལ། དེའི་གཉེན་པོ་གཟུགས་བདག་མ་ཡིན་ཞེས་སོགས་གསུངས་སོ། །

ད་ནི་རྒྱུ་མེད་པ་དང་མི་མཐུན་པའི་རྒྱུ་སྤངས་པའི་སྒོ་ནས། ཕུང་པོ་རྣམས་རྗེས་སུ་མཐུན་པའི་རྒྱུ་དང་རྐྱེན་ལས་སྐྱེ་བར་བསྟན་པའི་ཕྱིར། ཕུང་པོ་འདོད་རྒྱལ་ལས་མིན་དུས་ལས་མིན། །རང་བཞིན་ལས་མིན་ངོ་བོ་ཉིད་ལས་མིན། །དབང་ཕྱུག་ལས་མིན་རྒྱུ་མེད་ཅན་མིན་ཏེ། །མེ་ཤེས་ལས་དང་སྲེད་ལས་བྱུང་རིག་མཛོད། །ཅེས་གསུངས་ཏེ། གཟུགས་ལ་སོགས་པའི་ཕུང་པོ་རྣམས་ནི་གཞན་ལ་རག་མ་ལས་པར། འདོད་རྒྱལ་གནམ་བབ་ཏུ་བྱུང་བ་མ་ཡིན་ཏེ། སོ་སོར་ངེས་པའི་རྒྱུ་དང་རྐྱེན་ཡོད་མེད་ཀྱི་རྗེས་སུ་འགྲོ་ལྡོག་བྱེད་པར་དམིགས་པའི་ཕྱིར། ཁ་ཅིག དུས་ཀྱིས་འབྱུང་བ་སྨིན་པར་བྱེད། །དུས་ཀྱིས་སྐྱེ་རྒུ་སྡུད་པར་བྱེད། །དུས་ཀྱིས་གཉིད་ལོག་སད་པར་བྱེད། །དུས་ནི་འདའ་བར་དཀའ་བ་ཡིན། །ཞེས་དུས་རྟག་པ་ཞིག་ལས་སྐྱེ་བར་སྨྲ་བ་ཡང་མ་ཡིན་ཏེ། གཟུགས་སོགས་དངོས་པོ་རྣམས་ལས་མ་གཏོགས་པའི་དུས་མ་དམིགས་པའི་ཕྱིར་དང་། དུས་རྟག་པ་ལས་སྐྱེས་པའི་དངོས་པོ་རྣམས་སྐྱེ་འཇིག་ཅིག་ཅར་བྱེད་པར་ཐལ་བའི་ཕྱིར་རོ། །གྲངས་ཅན་པ་དག་རྡུལ་མུན་པ་སྙིང་སྟོབས་གསུམ་ཆ་མཉམ་པར་གྱུར་པའི་རང་བཞིན་རྟག་པ་ཞིག་ཡོངས་སུ་གྱུར་པ་ལས་འབྱུང་བར་འདོད་པ་ཡང་མ་ཡིན་ཏེ། རང་བཞིན་དང་རྣམ་འགྱུར་གཅིག་ཡིན་ན། རྣམ་འགྱུར་བཞིན་དུ་རང་བཞིན་ཡང་མི་རྟག་པར་འགྱུར་ལ། ཐ་དད་ཡིན་ན་ནི་ཐམས་ཅད་གཙོ་བོའི་རང་བཞིན་དུ་འདོད་པ་འགལ་བའི་ཕྱིར་རོ། །ངོ་བོ་ཉིད་ལས་སྐྱེ་བ་ཡང་མ་ཡིན་ཏེ། རྒྱུ་དང་རྐྱེན་ལ་རག་མ་ལས་པར་ཐལ་བའི་ཕྱིར་དང་། རང་བཞིན་གཞན་ལ་ལྟོས་པར་མི་རིགས་པའི་ཕྱིར་རོ། །ཡང་རིགས་པ་ཅན་པ་ལ་སོགས་པ་དག ཕྲ་ཞིང་བསམ་གྱིས་མི་ཁྱབ་རབ་ཏུ་སྲབ་བྱེད་ཀུན་རིག་ཐམས་ཅད་བྱེད། །རྣལ་འབྱོར་གོམས་པས་ཐོབ་པའི་བློ་ཅན་བསམ་གཏན་པ་ཡི་བསམ་གཏན་ཡུལ། །ཉི་མ་ཟླ་བ་ས་ཆུ་མེ་རླུང་ཕྱོགས་དང་ནམ་མཁའི་ལུས་ཅན་ཏེ། །ཞི་བའི་བདེ་དགའ་འགྲུབ་པར་འདོད་པ་རྣམས་ཀྱིས་དབང་ཕྱུག་རྟག་ཏུ་བསྒོམ། །ཞེས་བཤད་པ་ལྟ་བུའི་ཡོན་ཏན་ཅན་གྱི་དབང་ཕྱུག་རྟག་པ་ཞིག་ལས་འབྱུང་བར་སྨྲ་བ་ཡང་མ་ཡིན་ཏེ། རྟག་པས་འབྲས་བུ་བསྐྱེད་པ་གཞན་ལ་མི་ལྟོས་པ་ཐམས་ཅད་ཅིག་ཅར་སྐྱེ་བར་ཐལ་བའི་ཕྱིར་དང་། དབང་ཕྱུག་གི་འདོད་པ་ལ་ལྟོས་ནས་རིམ་གྱིས་འབྱུང་ན། འདོད་པ་དབང་ཕྱུག་ལས་ཐ་དད་པའི་རྒྱུ་ལས་འབྱུང་བས། ཐམས་ཅད་དབང་ཕྱུག་གིས་བྱས་པར་འགལ་ཞིང་། དབང་ཕྱུག་ལས་འབྱུང་ན་དེ་ཡང་ཅིག་ཅར་འབྱུང་བར་འགྱུར་ཞིང་། འདོད་པ་གཞན་ལ་ལྟོས་ན། ཐུག་པ་མེད་པར་ཐལ་བར་འགྱུར་རོ། །དེའི་ཕྱིར་མི་མཐུན་པའི་རྒྱུ་ལས་འབྱུང་བ་ཡང་མ་ཡིན་ལ། རྒྱུ་མེད་པ་ཅན་ལས་བྱུང་བ་ཡང་མ་ཡིན་ཏེ། རྟག་ཏུ་ཡོད་པའམ་ཡང་ན་ནམ་ཡང་མེད་པར་ཐལ་བར་འགྱུར་བའི་ཕྱིར་རོ། །འོ་ན་གང་ལས་འབྱུང་བ་ཡིན་ཞེ་ན། དཔེར་ན་ས་ལུད་ཀྱིས་གཡོགས་པའི་ས་བོན་སྐྱོན་མེད་ཆུས་བརླན་པར་བྱས་པ་ལས་མྱུ་གུ་མངོན་པར་འགྲུབ་པ་བཞིན་དུ། མ་རིག་པས་གཡོགས་པའི་ལས་སྟོབས་ལྡན་སྲེད་པས་བརླན་པར་བྱས་པ་ལས། ཡང་སྲིད་པའི་མྱུ་གུ་མངོན་པར་འགྲུབ་པ་དེའི་ཕྱིར། མི་ཤེས་ལས་དང་སྲེད་ལས་བྱུང་རིག་མཛོད། །ཅེས་གསུངས་སོ། །

གསུམ་པ་འགལ་རྐྱེན་ཀུན་སྦྱོར་གསུམ་སྤོང་བ་ནི། ཡང་སྲིད་པ་ལས་གྲོལ་བར་འདོད་པས་སྐྱེ་བའི་རྒྱུ་ཇི་སྐད་བཤད་པ་དེ་དག་སྤང་དགོས་པས། དེ་ཇི་ལྟར་སྤང་སྙམ་ན། ཚུལ་ཁྲིམས་བརྟུལ་ཞུགས་མཆོག་འཛིན་རང་ལུས་ལ། །ཕྱིན་ཅི་ལོག་པར་ལྟ་དང་ཐེ་ཚོམ་སྟེ། །ཀུན་ཏུ་སྦྱོར་བ་འདི་གསུམ་ཐར་པ་ཡི། །གྲོང་ཁྱེར་སྒོ་འགེགས་ལགས་པར་མཁྱེན་པར་མཛོད། །ཅེས་གསུངས་ཏེ། ལྟ་བ་ངན་པའི་རྗེས་སུ་འབྲང་བའི་ཚུལ་ཁྲིམས་དང་བརྟུལ་ཞུགས་ཀྱིས་དག་གྲོལ་དུ་འཛིན་པ་ཚུལ་ཁྲིམས་དང་བརྟུལ་ཞུགས་མཆོག་འཛིན་དང་། རང་ལུས་ཉེ་བར་ལེན་པའི་ཕུང་པོ་ལྔ་ལ། བདག་དང་བདག་གི་བའི་རྣམ་པར་ཕྱིན་ཅི་ལོག་ཏུ་ལྟ་བ་སྟེ། འཇིག་ཚོགས་སུ་ལྟ་བ་དང་། ཐར་པ་དང་ཐར་པའི་ལམ་ལ་ཡིད་གཉིས་ཟ་བའི་ཐེ་ཚོམ་སྟེ། ཀུན་ཏུ་སྦྱོར་བ་འདི་གསུམ། དཔེར་ན་འགྲོ་མི་འདོད་པ་དང་། ལམ་ལོག་པ་ལ་བརྟེན་པ་དང་། ཡང་དག་པའི་ལམ་ལ་ཐེ་ཚོམ་ཟ་བ་མངོན་པར་འདོད་པའི་ཡུལ་དུ་ཕྱིན་པའི་གེགས་ཡིན་པ་བཞིན་དུ། འཇིག་ལྟས་བདག་ཏུ་མངོན་པར་ཞེན་ནས། དེ་མེད་པའི་ཐར་པ་ཐོབ་པ་མི་འདོད་པ་དང་། ཚུལ་ཁྲིམས་དང་བརྟུལ་ཞུགས་མཆོག་འཛིན་གྱིས་ཐར་ལམ་ལོག་པ་ལ་བརྟེན་པ་དང་། ཐེ་ཚོམ་གྱིས་ཡང་དག་པའི་ལམ་ལ་ཐེ་ཚོམ་ཟ་བས་ཐར་པའི་གྲོང་ཁྱེར་གྱི་སྒོ་འགེགས་ལགས་པར་མཁྱེན་པར་མཛོད་ལ་སྤོངས་ཤིག་ཅེས་པའོ། །བཞི་པ་མཐུན་རྐྱེན་བསླབ་པ་གསུམ་ལ་བསླབ་པ་ནི། འོ་ན་དེ་ལྟ་བུའི་སྒྲིབ་པ་ལས་གྲོལ་བའི་གྲོགས་གྱིས་ཤིག་ཅེ་ན། འདི་ལ་གཞན་གྱིས་གྲོགས་ཅི་ཡང་བྱར་མེད་ཀྱིས། རང་གི་སེམས་ལ་རག་ལས་སོ་ཞེས་བསྟན་པའི་ཕྱིར། ཐར་པ་བདག་ལ་རག་ལས་འདི་ལ་ནི། །གཞན་གྱིས་གྲོགས་བགྱིར་ཅི་ཡང་མ་མཆིས་པས། །ཐོས་དང་ཚུལ་ཁྲིམས་བསམ་གཏན་ལྡན་པ་ཡིས། །བདེན་པ་རྣམ་པ་བཞི་ལ་འབད་པར་མཛོད། །ཅེས་གསུངས་ཏེ། ཐར་པ་ཞེས་བྱ་བ་གཞན་ཅི་ཡང་མེད་ཀྱིས་སེམས་ཉོན་མོངས་པའི་འཆིང་བ་ལས་གྲོལ་བ་ཡིན་ལ། དེ་ནི་བདག་ཉིད་ཀྱིས་ཐར་པའི་ཐབས་གོམས་པར་བྱེད་པ་ལ་རག་ལས་ཀྱིས། འདི་ལ་གང་ཟག་གཞན་གྱིས་གྲོགས་ཅི་ཡང་བགྱི་བར་མ་མཆིས་པས་རང་གིས་འབད་དོ་ཞེས་པའོ། །ཐར་པའི་ཐབས་དེ་གང་ཞེ་ན། ཚུལ་གནས་ཐོས་དང་བསམ་ལྡན་པས། །བསྒོམ་པ་ལ་ནི་རབ་ཏུ་སྦྱོར། །ཞེས་བཤད་པ་ལྟར་དང་པོ་གཞི་ངེས་པར་འབྱུང་བའི་སེམས་ཀྱིས་ཟིན་པའི་སོ་སོ་ཐར་པ་རིས་བདུན་གང་རུང་གི་ཚུལ་ཁྲིམས་ལ་གནས་ནས། བདེན་པ་དང་རྗེས་སུ་མཐུན་པའི་གསུང་རབ་ལ་ཐོས་བསམ་ཚུལ་བཞིན་དུ་བྱས་ཏེ། ཐོས་པའི་དོན་ལ་རྩེ་གཅིག་ཏུ་འཇོག་པའི་བསམ་གཏན་དང་ལྡན་པ་ཡིས། སྡུག་བསྔལ་ལ་སོགས་པའི་བདེན་པ་རྣམ་པ་བཞི་ལ་དམིགས་ནས། དེ་དག་གི་ཀུན་རྫོབ་ཀྱི་དེ་ཁོ་ན་ཉིད་མི་རྟག་པ་ལ་སོགས་པ་རྣམ་པ་བཅུ་དྲུག་དང་། དོན་དམ་པའི་དེ་ཁོ་ན་ཉིད་སྤྲོས་པའི་མཐའ་ཐམས་ཅད་དང་བྲལ་བའི་སྟོང་པ་ཉིད་བསྒོམ་པ་ལ་འབད་པར་མཛོད་ཅིག་ཅེས་པའོ། །འདིས་ནི་བསླབ་པ་རིན་པོ་ཆེ་གསུམ་པོ་ཉིད་ཐར་པའི་ཐབས་ཡིན་ནོ་ཞེས་བསྟན་པ་ཡིན་ལ། དེ་དག་ཏུ་བསླབ་པ་ཐམས་ཅད་འདུས་སོ་ཞེས་བསྟན་པའི་ཕྱིར། ལྷག་པའི་ཚུལ་ཁྲིམས་ལྷག་པའི་ཤེས་རབ་དང་། །ལྷག་པའི་སེམས་ལ་རྟག་ཏུ་བསླབ་པར་བགྱི། །བསླབ་པ་བརྒྱ་རྩ་ལྔ་བཅུ་ལྷག་གཅིག་ནི། །གསུམ་པོ་འདི་ནང་ཡང་དག་འདུ་བར་འགྱུར། །ཞེས་གསུངས་ཏེ། མྱ་ངན་ལས་འདས་པར་ཡོངས་སུ་བསྔོས་པའི་སྤོང་བ་བདུན་གྱི་རང་བཞིན་གྱི་ལྷག་པའི་ཚུལ་ཁྲིམས་དང་། འཕགས་ལམ་སྐྱེ་བ་དང་རྫས་སུ་མཐུན་པའི་བསམ་གཏན་གཞིའི་རང་བཞིན་གྱི་ལྷག་པའི་སེམས་དང་། བདག་མེད་རྣམ་པ་གཉིས་རྟོགས་པའི་ལྷག་པའི་ཤེས་རབ་རྣམས་ལ་རྟག་ཏུ་བསླབ་པར་བགྱི་སྟེ། བསླབ་པ་གསུམ་པོ་འདི་དག་ནི་ཐར་པ་ཐོབ་པའི་ཐབས་ཆ་ཚང་བ་དང་། ཕྱིན་ཅི་མ་ལོག་པ་ཡིན་པའི་ཕྱིར་རོ། །འདི་ལྟར་ཚུལ་ཁྲིམས་ཀྱིས་རྒྱུད་མ་སྨིན་པ་སྨིན་པར་བྱེད་ཅིང་། ཏིང་ངེ་འཛིན་གྱིས་ཉོན་མོངས་མགོ་གནོན་ལ། ཤེས་རབ་ཀྱིས་དྲུངས་འབྱིན་པའི་སྒོ་ནས་སྨིན་པ་གྲོལ་བར་བྱེད་པའི་ཕྱིར་རོ། །འདི་དག་ནི་བསླབ་པ་ཐམས་ཅད་སྡུད་བྱེད་ཀྱང་ཡིན་ཏེ། འདི་ལྟར་སོ་སོ་ཐར་པ་ལས་གསུངས་པའི་ཕམ་པ་བཞི། ལྷག་མ་བཅུ་གསུམ། སྤང་ལྟུང་སུམ་ཅུ། འབའ་ཞིག་པ་དགུ་བཅུ། སོར་བཤགས་བཞི། ཉེས་བྱས་བརྒྱ་རྩ་བཅུ་གཉིས་ཏེ། བསླབ་པ་བརྒྱ་རྩ་ལྔ་བཅུ་ལྷག་གཅིག་སྟེ་ཉིས་བརྒྱ་ལྔ་བཅུ་རྩ་གསུམ་པོ་རྣམས་ནི། ལྷག་པའི་ཚུལ་ཁྲིམས་ཡིན་པའི་ཕྱིར། གསུམ་པོ་འདིར་འདུ་བར་འགྱུར་བས། དེའི་ཕྱིར་གསུམ་པོ་འདི་ལ་འབད་དེ་བསླབ་བོ་ཞེས་པའོ། །

ལྔ་པ་དེའི་རྒྱུར་ལུས་སུ་རྟོགས་པའི་དྲན་པ་བསྲུང་བ་ནི། དབང་ཕྱུག་ལུས་རྟོག་དྲན་པ་བདེ་གཤེགས་ཀྱིས། །བགྲོད་པ་གཅིག་པའི་ལམ་དུ་ཉེ་བར་བསྟན། །དེ་ནི་བསྒྲིམས་ནས་མངོན་པར་བསྲུང་བགྱི་སྟེ། །དྲན་པ་ཉམས་པས་ཆོས་ཀུན་འཇིག་པར་འགྱུར། །ཞེས་གསུངས་ཏེ། དབང་ཕྱུག་ཅེས་རྒྱལ་པོ་ལ་བོས་ནས། ལུས་འགྲེང་བ་དང་འདུག་པ་སོགས་ཀྱི་གནས་སྐབས་ཐམས་ཅད་ལ་རྣམ་པར་དཔྱོད་པ་ནི། ལུས་སུ་རྟོག་པའི་དྲན་པ་སྟེ། དེ་ནི་བདེ་གཤེགས་ཀྱི་བགྲོད་པ་གཅིག་པ་སྟེ། ངེས་པར་བདེ་བླག་ཏུ་ཐོབ་པའི་ལམ་དུ་བསྟན་ཏེ། མདོ་ལས། དགེ་སློང་དག་སེམས་ཅན་རྣམས་རྣམ་པར་དག་པར་བྱེད་པ་དང་། སྡུག་བསྔལ་དང་། ཡིད་མི་བདེ་བ་ལས་ཡང་དག་པར་འདའ་བར་བྱེད་པ་དང་། རིགས་པའི་ཆོས་རྟོགས་པར་བྱེད་པ་དང་། མྱ་ངན་ལས་འདས་པ་མངོན་སུམ་དུ་བྱེད་པའི་ལམ་ནི་འདི་ལྟ་སྟེ། ལུས་སུ་རྟོག་པའི་དྲན་པ་ཡིན་ནོ། །ཞེས་གསུངས་པའི་ཕྱིར་རོ། །དེ་བས་ན་ལུས་སུ་རྟོག་པའི་དྲན་པ་དེ་ནི། དགོས་པ་ཆེ་བའི་ཕྱིར་བསྒྲིམས་ནས་མངོན་པར་བསྲུང་བར་བགྱི་སྟེ། དྲན་པ་དེ་ཉམས་པས་དགེ་བའི་ཆོས་གཞན་ཀུན་ཀྱང་འཇིག་པར་འགྱུར་ན་མྱ་ངན་ལས་འདས་པ་ཐོབ་པར་བྱེད་པ་རྣམས་སྨོས་ཅི་དགོས་ཞེས་པའོ། །

གསུམ་པ་དེའི་རྟེན་ཐོབ་པ་དོན་ཡོད་པར་བྱ་བ་ལ་གསུམ་གྱི། དང་པོ་ལུས་མི་རྟག་ཅིང་སྙིང་པོ་མེད་པར་བསམས་ཏེ་མ་ཆགས་པར་བྱ་བ་ནི། ཚེ་ནི་གནོད་མང་རླུང་གིས་བཏབ་པ་ཡི། །ཆུ་ཡི་ཆུ་བུར་བས་ཀྱང་མི་རྟག་ན། །དབུགས་རྔུབ་དབུགས་འབྱུང་གཉིད་ཀྱིས་ལོག་པ་ལས། །སད་ཁོམ་གང་ལགས་དེ་ནི་ངོ་མཚར་ཆེ། །ཞེས་གསུངས་ཏེ། སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་ལྟ་དང་མཚུངས། །སྐྱེས་བུའི་ཚེ་འགྲོ་ནམ་མཁའི་གློག་འདྲ་སྟེ། །རི་གཟར་འབབ་ཆུ་བཞིན་དུ་མྱུར་མགྱོགས་འགྲོ། །ཞེས་གསུངས་པ་ལྟར། སྐྱེས་བུའི་ཚེ་ནི། ཕྱི་རོལ་གྱི་མི་དང་མི་མ་ཡིན་པས་འཚེ་བ་དང་། ནང་འབྱུང་བ་འཁྲུགས་པ་སོགས་གནོད་པ་མང་པོ་དང་འབྲེལ་བས། རླུང་གིས་བཏབ་པའི་ཆུའི་ཆུ་བུར་བས་ཀྱང་ཆེས་མི་རྟག་ན། དབུགས་ནང་དུ་རྔུབ་པ་ལས་ཕྱིར་འབྱུང་བ་དང་། གཉིད་ཀྱིས་ལོག་པ་ལས་སླར་སད་པ་ཁོམ་པ་སྟེ། མ་ཤི་བར་སླར་ཡང་གནས་པའི་སྐབས་ཡོད་པ་གང་ལགས་པ་དེ་ནི་ངོ་མཚར་ཆེ་སྟེ། སྟེས་དབང་ཙམ་མོ། །དེ་ལྟར་ཚེ་མི་རྟག་ཅིང་ལུས་ལ་ཡང་ཆགས་པར་བྱ་བའི་སྙིང་པོ་མེད་དོ་ཞེས་བསྟན་པའི་ཕྱིར། ལུས་མཐའ་ཐལ་བ་མཐར་སྐམ་མཐར་འདྲུལ་ཞིང་། །ཐ་མར་མི་གཙང་སྙིང་པོ་མ་མཆིས་པར། །རྣམ་པར་འཇིག་དེངས་མྱགས་པར་འགྱུར་བ་སྟེ། །སོ་སོར་འགྱེས་ཆོས་ཅན་དུ་མཁྱེན་པར་མཛོད། །ཅེས་གསུངས་ཏེ། ཇི་སྐད་དུ་བཅོམ་ལྡན་འདས་ཀྱིས། དགེ་སློང་དག་ཤི་ཞིང་དུས་ལས་འདས་པའི་ལུས་ཉེ་དུ་རྣམས་ཀྱིས་མེར་བསྲེགས་པའམ། ཆུར་བསྐྱུར་བའམ། ས་འོག་ཏུ་འཇུག་པར་བྱེད་ཅིང་། ཡང་ན་རླུང་དང་ཉི་མ་དག་གིས་སྐེམས་པར་འགྱུར། ཡང་ན་ནི་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་སྣ་ཚོགས་ཀྱིས་ཟ་བར་འགྱུར་རོ་ཞེས་གསུངས་ཏེ། དེ་ལ་མེར་བསྲེགས་པས་ཐལ་བ་དང་། རླུང་དང་ཉི་མས་མཐར་སྐམ་པ་དང་ཆུར་བསྐྱུར་བས་མཐར་འདྲུལ་ཞིང་སྲོག་ཆགས་ཀྱིས་ཟོས་པ་མཐར་མི་གཙང་བ་ཉིད་དུ་འགྱུར་ཏེ། དེ་ལྟ་བས་ན་ལུས་འདི་ལ་སྙིང་པོ་མ་མཆིས་ཏེ། མེས་རྣམ་པར་འཇིག་པ་དང་། རླུང་དང་ཉི་མས་དེངས་པ་དང་། ཆུས་རུལ་ཞིང་མྱགས་པ་དང་། སྲོག་ཆགས་རྣམས་ཀྱིས་ཁམ་གྱིས་དུམ་བུ་དུམ་བུར་བཅད་པས། སོ་སོར་འགྱེས་ཆོས་ཅན་དུ་མཁྱེན་པར་མཛོད་ཅིག ཆོས་བརྟན་པ་རྣམས་ཀྱང་མཐར་འཇིག་པར་ངེས་ན། ལུས་ལ་སྨོས་ཅི་དགོས་ཞེས་བསྟན་པའི་ཕྱིར། ས་དང་ལྷུན་པོ་རྒྱ་མཚོ་ཉི་མ་བདུན། །འབར་བས་བསྲེགས་པའི་ལུས་ཅན་འདི་དག་ཀྱང་། །ཐལ་བ་ཙམ་ཡང་ལུས་པར་མི་འགྱུར་ན། །ཤིན་ཏུ་ཉམས་ཆུང་མི་ལྟ་སྨོས་ཅི་འཚལ། །ཞེས་གསུངས་ཏེ། གང་ཡང་བརྟན་ཞིང་སྲ་བའི་དངོས་པོ་སའི་དཀྱིལ་འཁོར་དང་། ལྷུན་པོ་གསེར་གྱི་རི་བདུན་དང་བཅས་པ་དང་། ཕྱི་དང་ནང་གི་རྒྱ་མཚོ་དག་ཀྱང་འཇིག་རྟེན་མེས་འཇིག་པའི་ཚེ། ཉི་མ་འདི་ཉིད་ཀྱིས་རྩི་ཤིང་ནགས་ཚལ་རྣམས་བསྲེགས། གཉིས་པས་ཆུ་ཕྲན་རྣམས་སྐམས། གསུམ་པས་མཚོ་མ་དྲོས་པ་ཆུ་བོ་ཆེན་པོ་བཞི་དང་བཅས་པ་སྐེམས། བཞི་པ་དང་ལྔ་པས། རྒྱ་མཚོ་ཆུའི་ཟིལ་པ་ཙམ་དུ་སྐེམས་སོ། །དྲུག་པས་ནི་ཆུའི་ཐིགས་པ་ཙམ་ཡང་མ་ལུས་པ་སྐེམས་ཤིང་། ས་ཆེན་རི་རབ་དང་བཅས་པ་དུ་བར་འཐུལ་བར་བྱེད་དོ། །བདུན་པ་བྱུང་བའི་ཚེ་མེ་ལྕེ་གཅིག་ཏུ་གྱུར་ཏེ་ཐལ་བའི་ལྷག་མ་ཡང་མ་ལུས་པར་འགྱུར་རོ་ཞེས་བཤད་པ་ལྟར། ཉི་མ་བདུན་ཤར་ནས་མེ་ལྕེ་གཅིག་ཏུ་འབར་བས་བསྲེགས་པའི་མཐུས་ལུས་ཅན་ཏེ་གཟུགས་ཅན་བརྟན་པ་འདི་དག་ཀྱང་ཐལ་བ་ཙམ་ཡང་ལུས་པར་མི་འགྱུར་བར་འཇིག་ན། ཤིན་ཏུ་ཉམས་ཆུང་བའི་མིའི་ལུས་ལྟ་སྨོས་ཀྱང་ཅི་འཚལ་ཏེ། འདི་མི་རྟག་པས་གཞོམ་མི་ནུས་པའི་སྐབས་མེད་དོ། །ཞེས་པའོ། །

ཚེ་མི་རྟག་པ་དང་། ལུས་སྙིང་པོ་མེད་པ་དེའི་ཕྱིར། འཁོར་བ་ལ་ཡིད་འབྱུང་བར་བྱ་བ་ཡིན་ནོ། །ཞེས་བསྟན་པའི་ཕྱིར། དེ་ལྟར་འདི་ཀུན་མི་རྟག་བདག་མེད་དེ། །སྐྱབས་མེད་མགོན་མེད་གནས་མེད་དེ་སླད་དུ། །འཁོར་བ་ཆུ་ཤིང་སྙིང་པོ་མེད་པ་ལ། །མི་མཆོག་ཁྱོད་ཀྱིས་ཐུགས་ནི་དབྱུང་བར་མཛོད། །ཅེས་གསུངས་ཏེ། དེ་ལྟར་གཟུགས་ཅན་རྣམས་མི་རྟག་པར་མ་ཟད། ཉེ་བར་ལེན་པ་ཕུང་པོ་ལྔ་པོ་འདི་ཀུན་ཀྱང་སྔར་བཤད་པ་ལྟར་མི་རྟག་ཅིང་བདག་མེད་དེ། སྡུག་བསྔལ་ལས་སྐྱོབ་པའི་སྐྱབས་མེད་ལ། ཕན་འདོགས་པའི་མགོན་མེད་ཅིང་། ཐ་མལ་པར་འདུག་པའི་གནས་སྐབས་ཀྱང་མེད་པ་དེའི་སླད་དུ། འཁོར་བ་ཆུ་ཤིང་ལྟར་སྙིང་པོ་མེད་པ་འདི་ལ། མི་མཆོག་ཁྱོད་ཀྱིས་ཐུགས་དབྱུང་བ་སྟེ། སྐྱོ་བར་མཛོད་ཅིག་ཅེས་པའོ། །གཉིས་པ་དལ་འབྱོར་རྙེད་པར་དཀའ་བ་བསམས་ནས། དོན་ཡོད་པར་བྱ་བ་ནི། རྒྱ་མཚོ་གཅིག་གནས་གཉའ་ཤིང་བུ་ག་དང་། །རུས་སྦལ་ཕྲད་པ་བས་ཀྱང་དུད་འགྲོ་ལས། །མི་ཉིད་ཆེས་ཐོབ་དཀའ་བས་མི་དབང་གིས། །དམ་ཆོས་སྤྱད་པས་དེ་འབྲས་མཆིས་པར་མཛོད། །ཅེས་གསུངས་ཏེ། འཇིག་རྟེན་རྒྱ་མཚོ་གཅིག་ཏུ་གྱུར་པ་ན། རུས་སྦལ་ཞར་བ་ལོ་བརྒྱ་བརྒྱ་ནས་ལན་རེ་རེ་སྟེང་དུ་འབྱུང་བ་ཞིག་གནས་ཤིང་། དེ་ན་གཉའ་ཤིང་བུ་ག་གཅིག་པ་རླུང་གིས་ཕྱོགས་ཐམས་ཅད་དུ་དེད་པ་ཅིག་ཀྱང་ཡོད་པ་དེའི་བུ་ག་དང་རུས་སྦལ་གྱི་མགྲིན་པ་ཕྲད་དེ་དེར་ཆུད་པ་བས་ཀྱང་། དུད་འགྲོ་ནས་མི་ཉིད་དུ་སྐྱེ་བ་ཆེས་ཐོབ་པར་དཀའ་སྟེ། དུད་འགྲོ་རྣམས་བླུན་པས་དགེ་བ་སྟོབས་ལྡན་སྐྱེད་མི་ནུས་པའི་ཕྱིར་རོ། །དོན་འདི་མདོ་ལས། དགེ་སློང་དག་འཇིག་རྟེན་རྒྱ་མཚོ་གཅིག་ཏུ་གྱུར་པའི་ནང་ན། རུས་སྦལ་ལོང་བ་ཚེ་རིང་པོར་འཚོ་བ་ཞིག་གནས་ཤིང་། དེ་ལོ་བརྒྱ་འདས་ནས་ལན་ཅིག་གྱེན་དུ་འབྱུང་ལ། རྒྱ་མཚོ་ཆེན་པོ་དེ་ན་གཉའ་ཤིང་བུ་ག་གཅིག་པ་ཅིག་ཡོད་པ་དེ་ཤར་གྱི་རླུང་གིས་བདས་ན་ནི་ནུབ་ཕྱོགས་སུ་འགྲོ་ཞེས་སོགས་བཀའ་བསྩལ་ནས། དགེ་སློང་དག་གང་དུ་རུས་སྦལ་ལོང་བ་གྱེན་དུ་བྱུང་བའི་མགྲིན་པ་གཉའ་ཤིང་དེའི་བུ་གར་ཆུད་པར་འགྱུར་བའི་དུས་དེ་ནི་ཡོད་ཀྱི། དགེ་སློང་དག་མིར་སྐྱེ་བ་ཐོབ་པ་ནི་དེ་བས་ཀྱང་ཆེས་ཐོབ་པ་དཀའ་བར་ང་སྨྲའོ། །ཞེས་གསུངས་སོ། །དེ་བས་ན་མི་དབང་གིས་དམ་ཆོས་སྤྱོད་ཅིང་། བསྒྲུབ་པ་སྙིང་པོར་མཛད་པས་མི་ལུས་འདིར་འབྲས་བུ་མཆིས་པར་མཛོད་ཅིག དེ་ལྟར་མིའི་ལུས་ནི་ཤིན་ཏུ་ཐོབ་པར་དཀའ་བའི་ཕྱིར། གལ་ཏེ་དེ་ཆུད་གསོན་པར་བྱེད་ན་ནི། བླུན་པ་ཉིད་དོ་ཞེས་བསྟན་པའི་ཕྱིར། གང་ཞིག་གསེར་སྣོད་རིན་ཆེན་སྤྲས་པ་ཡིས། །ངན་སྐྱུགས་འཕྱགས་པར་བགྱིད་པ་དེ་བས་ཀྱང་། །གང་ཞིག་མི་རུ་སྐྱེས་ནས་སྡིག་པ་དག། བགྱིད་པ་དེ་ནི་ཆེས་རབ་བླུན་པ་ལགས། །ཞེས་གསུངས་ཏེ། སྐྱེས་བུ་གང་ཞིག་གསེར་ལས་བྱས་པའི་སྣོད་རིན་པོ་ཆེ་སྣ་ཚོགས་ཀྱིས་སྤྲས་པ་ཡིས་༼ཞིག༽བཤང་གཅི་སོགས་ངན་སྐྱུགས་འཕྱག་པར་བགྱིད་ན། གནས་མ་ཡིན་པར་སྤྱོད་པའི་ཕྱིར་འཇིག་རྟེན་ན་སྨད་པར་བྱ་བ་ཡིན་ན། དེ་བས་ཀྱང་གང་ཞིག་མི་རུ་སྐྱེས་ནས་སྡིག་པ་བགྱིད་པ་དེ་དག་ཆེས་ཤེས་རབ་བླུན་པ་ལགས་ཏེ། གསེར་སྣོད་བས་མི་ཉིད་ཆེས་རྙེད་པར་དཀའ་བའི་ཕྱིར་དང་། རྣམ་སྨིན་མི་ཟད་པ་འབྱིན་པས་ངན་སྐྱུགས་པས་སྡིག་པ་ཆེས་སྨད་པའི་ཕྱིར་རོ། །

གསུམ་པ་ཁྱད་པར་དུ་རྒྱལ་པོ་ཡང་རྟེན་ཁྱད་པར་ཅན་ཐོབ་པས་འབད་པར་གདམས་པ་ནི། མཐུན་པར་གྱུར་པའི་ཡུལ་ན་གནས་པ་དང་། །སྐྱེས་བུ་དམ་པ་ལ་ནི་བརྟེན་པ་དང་། །བདག་ཉིད་ལེགས་སྨོན་སྔོན་ཡང་བསོད་ནམས་བགྱིས། །འཁོར་ལོ་ཆེན་པོ་བཞི་ནི་ཁྱོད་ལ་མངའ། །ཞེས་གསུངས་ཏེ། གང་དུ་གནས་ན་འཕགས་ལམ་སྐྱེ་བ་དང་རྗེས་སུ་མཐུན་པའི་ཡུལ་དུ་གནས་པ་དང་། གང་དང་འགྲོགས་ན། ཉེས་པ་འགྲིབ་ཅིང་ཡོན་ཏན་འཕེལ་བར་འགྱུར་བའི་སྐྱེས་བུ་དམ་པ་ལ་བརྟེན་པ་དང་། བདག་ཉིད་ལེགས་པར་སྨོན་ཞིང་། བསམ་པ་བཞིན་སྦྱོར་བས་ཀྱང་ལེགས་པར་སྒྲུབ་པ་དང་། སྔོན་ཡང་བསོད་ནམས་བགྱིས་པས་རྒྱུད་སྨིན་པ་དང་། བཞི་ནི་ཤིང་རྟའི་འཁོར་ལོ་དང་འདྲ་བས་འཁོར་ལོ་ཞེས་བྱས་ཏེ། དཔེར་ན་འཁོར་ལོ་འཆམ་པའི་ཤིང་རྟས་བགྲོད་པར་བྱ་བའི་གནས་བདེ་བླག་ཏུ་ཕྱིན་པར་ནུས་པ་བཞིན་དུ། དེ་དག་དང་ལྡན་པའི་ལམ་གྱིས་ཀྱང་ཐར་པར་བདེ་བླག་ཏུ་ཕྱིན་པར་ནུས་པའི་ཕྱིར་རོ། །དེ་བས་ན་འཁོར་ལོ་ཆེན་པོ་བཞི་ནི་ཁྱོད་ལ་མངའ་བས་ལམ་སྒྲུབ་པའི་རྒྱུ་ཚོགས་ཚང་བའི་ཕྱིར་ལམ་སྒྲུབ་པ་ལ་འབད་པར་བྱའོ། །འཕགས་ལམ་བསྐྱེད་པ་ལ་སྐྱེས་བུ་དམ་པ་ལ་བསྟེན་པ་གཙོ་བོ་ཡིན་པར་བསྟན་པའི་ཕྱིར། དགེ་བའི་བཤེས་གཉེན་བསྟེན་པ་ཚངས་པར་སྤྱོད། །ཡོངས་སུ་རྫོགས་པར་ཐུབ་པས་གསུངས་དེའི་ཕྱིར། །སྐྱེས་བུ་དམ་པ་བསྟེན་བགྱི་རྒྱལ་བ་ལ། །བརྟེན་ནས་རབ་ཏུ་མང་པོས་ཞི་བ་ཐོབ། །ཅེས་གསུངས་ཏེ། ལམ་སྒྲུབ་པ་ན་ཐོག་མར་དགེ་བའི་བཤེས་གཉེན་ལ་བརྟེེན་པར་བགྱི་སྟེ། དེ་ཉིད་ནི་ཚངས་པར་སྤྱོད་པ་ཡོངས་སུ་རྫོགས་པའི་རྒྱུ་ཡིན་པར་ཐུབ་པས་གསུངས་པས་སོ། །ཇི་སྐད་དུ། མདོ་ལས། ཀུན་དགའ་བོ་འདི་ལྟ་སྟེ། དགེ་བའི་བཤེས་གཉེན་དང་། དགེ་བའི་གྲོགས་པོ་ནི་ཚངས་པར་སྤྱོད་པ་ཡོངས་སུ་རྫོགས་པ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ་སྐྱེ་བའི་ཆོས་ཅན་རྣམས་དགེ་བའི་བཤེས་གཉེན་ལ་བརྟེན་ནས་སྐྱེ་བ་ལས་ཡོངས་སུ་གྲོལ་ཞེས་འབྱུང་ངོ་། །གང་གི་ཕྱིར་དེ་ལྟ་ཡིན་པ་དེའི་ཕྱིར་རྟག་པར་སྐྱེས་བུ་དམ་པ་ལ་བརྟེན་པར་བགྱི་སྟེ། རྒྱལ་བ་ལ་བརྟེན་ནས་སེམས་ཅན་རབ་ཏུ་མང་པོས་ཞི་བ་ཐོབ་པ་བཞིན་ནོ། །དེ་ལ་ཚངས་པར་སྤྱོད་པ་ནི་འདིར་ཐར་པའི་ལམ་སྟེ། སྲིད་པའི་ཉེས་པ་མ་ལུས་པ་ཚངས་པ་མྱ་ངན་ལས་འདས་པའི་དོན་དུ་སྤྱོད་པའི་ཕྱིར་རོ། །སྐྱེས་བུ་དམ་པའི་མཚན་ཉིད་གང་ཞེ་ན། རྒྱན་ལས། བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་ལྷག་པ་བརྩོན་བྱས་ལུང་གིས་ཕྱུག །དེ་ཉིད་རབ་ཏུ་རྟོགས་པ་སྨྲ་མཁས་ལྡན། །སྙིང་རྗེའི་བདག་ཉིད་སྐྱོ་བ་སྤངས་ལ་བརྟེན། །ཞེས་གསུངས་པ་ལྟར། བསླབ་པ་རིན་པོ་ཆེ་གསུམ་ལ་གནས་ཤིང་། སྡེ་སྣོད་གསུམ་གྱི་ལུང་གིས་ཕྱུག་པ། གནས་ལུགས་ཀྱི་དེ་ཁོ་ན་ཉིད་རྟོགས་ཤིང་རྟོགས་པ་ལྟར་བརྡ་སྤྲོད་པ་ལ་མཁས་པ། སློབ་མ་ལ་སྙིང་བརྩེ་ཞིང་གདམས་པ་དང་། རྗེས་སུ་བསྟན་པ་འཆད་པ་ལ་སྐྱོ་བ་མེད་པའོ། །

ཐར་ལམ་སྒྲུབ་པའི་མི་མཐུན་ཕྱོགས་དང་དྲལ་བའི་རྟེན་ཁྱད་པར་ཅན་རྙེད་པའི་ཕྱིར་ཡང་འབད་པར་རིགས་སོ་ཞེས་བསྟན་པའི་ཕྱིར། ལོག་པར་ལྟ་བ་འཛིན་དང་དུད་འགྲོ་དང་། །ཡི་དྭགས་ཉིད་དང་དམྱལ་བར་སྐྱེ་བ་དང་། །རྒྱལ་བའི་བཀའ་མེད་པ་དང་མཐའ་འཁོབ་ཏུ། །ཀླ་ཀློར་སྐྱེ་དང་གླེན་ཞིང་ལྐུགས་པ་ཉིད། །ཚེ་རིང་ལྷ་དང་གང་ཡང་རུང་བར་ནི། །སྐྱེ་བ་ཞེས་བགྱི་མི་ཁོམ་སྐྱོན་བརྒྱད་པོ། །དེ་དག་དང་བྲལ་ཁོམ་པ་རྙེད་ནས་ནི། །སྐྱེ་བ་བཟློག་པའི་སླད་དུ་འབད་པར་མཛོད། །ཅེས་གསུངས་ཏེ། གལ་ཏེ་དུད་འགྲོ་དང་ཡི་དྭགས་དང་། དམྱལ་བར་སྐྱེ་བ་སྟེ་ངན་སོང་གསུམ་དང་། རྒྱལ་བའི་བཀའ་མེད་པ་སྟེ། སངས་རྒྱས་མ་བྱོན་པའི་འཇིག་རྟེན་དུ་སྐྱེས་པ་དང་། བྱོན་ཡང་དེའི་སྒྲ་མི་ཐོས་པའི་མཐའ་འཁོབ་ཏུ་ཀླ་ཀློར་སྐྱེ་བ་དང་། ཡུལ་དབུས་ཡིན་ཡང་གླེན་ཞིང་ལྐུགས་པ་དང་། རྒྱུ་འབྲས་དང་ཐར་པ་དང་དེའི་ལམ་ལ་སྐུར་པ་འདེབས་པའི་ལོག་པར་ལྟ་བ་འཛིན་པ་སྟེ། མིའི་འགྲོ་བ་པ་བཞི་དང་། སེམས་ཅན་འདུ་ཤེས་མེད་པར་སྐྱེས་པ་ཚེ་རིང་ལྷ་དང་བརྒྱད་ལས་གང་ཡང་རུང་བར་སྐྱེ་བ་བླངས་པ་ནི། མི་ཁོམ་པ་ཞེས་བགྱི་སྟེ། ཐར་པ་སྒྲུབ་པའི་སྐབས་མེད་པའི་ཕྱིར་རོ། །རྒྱལ་པོ་ཁྱོད་ཀྱིས་སྐྱོན་བརྒྱད་པོ་དེ་དག་དང་བྲལ་ཞིང་། ཐར་པ་སྒྲུབ་ཏུ་ཁོམ་པའི་རྟེན་ཁྱད་པར་ཅན་རྙེད་ནས་ནི་དེ་དོན་ཡོད་པར་བྱ་བའི་ཕྱིར། སྐྱེ་བ་བཟློག་པའི་སླད་དུ་ལམ་སྒྲུབ་པ་ལ་འབད་པར་མཛོད་ཅིག་ཅེས་པའོ། །

འཁོག་བའི་ཉེས་པས་བསྒྲུབ་པ་གདམས་པ།

གཉིས་པ་འཁོར་བའི་ཉེས་པས་སྐྱོ་བར་བྱ་བ་ལ་གསུམ་གྱི། དང་པོ་མདོར་བསྟན་པ་ནི། དེས་པ་འདོད་པས་ཕོངས་དང་འཆི་བ་དང་། །ན་དང་རྒ་སོགས་སྡུག་བསྔལ་དུ་མ་ཡི། །འབྱུང་གནས་འཁོར་བ་ལ་ནི་སྐྱོ་མཛད་ཅིང་། །འདི་ཡི་ཉེས་པ་ཤས་ཀྱང་གསན་པར་མཛོད། །ཅེས་གསུངས་ཏེ། དེས་པ་ཞེས་རྒྱལ་པོ་ལ་བོས་ནས། ཟས་གོས་སོགས་འདོད་པས་ཕོངས་པ་དང་། མཐར་འཆི་བ་དང་གནས་སྐབས་སུ་འབྱུང་བར་འགྱུར་བའི་ན་བ་དང་། ན་ཚོད་འགྱུར་བའི་རྒ་བ་དང་སོགས་པས་བསྡུས་པ་མྱ་ངན་དང་སྨྲེ་སྔགས་འདོན་པ་སོགས་སྡུག་བསྔལ་དུ་མའི་འབྱུང་གནས་འཁོར་བ་ལ་སྐྱོ་བར་མཛད་དགོས་ཏེ། འཁོར་བ་ལས་ཡིད་མ་བྱུང་ན། ཐར་པ་དོན་གཉེར་གྱི་བློ་མི་སྐྱེ་བའི་ཕྱིར་རོ། །དེ་སྐྱེ་བའི་ཐབས་སུ་འཁོར་བ་འདིའི་ཉེས་པ་ཤས་ཀྱང་སྟེ་ཕྱོགས་ཙམ་བརྗོད་ཀྱིས་གསན་པར་མཛོད་ཅིག་ཅེས་ཏེ། འཁོར་བའི་ཉེས་པ་རྫོགས་པར་བརྗོད་མི་ནུས་ཤིང་། ཕྱོགས་གཅིག་ཐོས་པས་ཀྱང་ཡིད་འབྱུང་བའི་ཕྱིར་རོ། །གཉིས་པ་རྒྱས་པར་བཤད་པ་ལ། འཁོར་བའི་ཉེས་པ་རིལ་བརྗོད་མི་ནུས་པས་ཕྱོགས་གཅིག་བརྗོད་པར་བྱ་སྟེ། དེ་ལ་ཡང་བདུན་ཡོད་པའི་དང་པོ་ངེས་པ་མེད་པའི་ཉེས་པ་ནི། ཕ་ནི་བུ་ཉིད་མ་ནི་ཆུང་མ་ཉིད། །སྐྱེ་བོ་དགྲར་གྱུར་པ་དག་བཤེས་ཉིད་དང་། །བཟློག་པ་ཉིད་དུ་མཆི་བས་དེ་སླད་དུ། །འཁོར་བ་དག་ན་ངེས་པ་འགའ་མ་མཆིས། །ཞེས་གསུངས་ཏེ། ཡང་དང་ཡང་དུ་སྐྱེ་བ་ལེན་པ་ན་ཕ་ནི་རེས་འགའ་བུ་ཉིད་དང་། མ་ནི་ཆུང་མ་ཉིད་དང་། སྐྱེ་བོ་དགྲར་གྱུར་པ་དག་ཀྱང་གཞན་དུ་མཛའ་བཤེས་ཉིད་དང་། དེ་ལས་བཟློག་སྟེ་བུ་ཉིད་ཕར་འགྱུར་བ་སོགས་སུ་མཆི་བས། དེའི་སླད་དུ་འཁོར་བ་དག་ན་དགྲ་གཉེན་དུ་ངེས་པ་འགའ་ཡང་མ་མཆིས་པས། དགྲ་གཉེན་གྱི་ཕྱོགས་དག་ལ་ཆགས་སྡང་སྤོངས་ཤིག་ཅེས་པའོ། །གཉིས་པ་ངོམས་མི་ཤེས་པའི་ཉེས་པ་ནི། རེ་རེས་རྒྱ་མཚོ་བཞི་ལས་ལྷག་པ་ཡི། །འོ་མ་འཐུངས་ཏེ་ད་དུང་སོ་སོ་ཡི། །སྐྱེ་བོའི་རྗེས་སུ་འབྲང་བའི་འཁོར་བ་པས། །དེ་བས་ཆེས་མང་ཉིད་ཅིག་བཏུང་འཚལ་ལོ། །ཞེས་གསུངས་ཏེ། སེམས་ཅན་རེ་རེས་ཀྱང་སྔོན་ཆད་ཕྱོགས་བཞིའི་རྒྱ་མཚོ་བཞི་ལས་ལྷག་པའི་འོ་མ་འཐུངས་ཏེ། འོ་མ་འཐུངས་པའི་སྐྱེ་བ་ལ་ཐོག་མ་མེད་པའི་ཕྱིར་རོ། །དེ་ལྟ་ན་ཡང་ད་དུང་སོ་སོ་སྐྱེ་བོའི་རྗེས་སུ་འབྲང་བ་སྟེ། འཕགས་པའི་ལམ་ལ་མ་བཞུགས་པའི་འཁོར་བ་པས། སྔར་གྱི་དེ་བས་ཆེས་མང་བའི་འོ་མ་ཞིག་བཏུང་འཚལ་ཏེ། ཐར་པ་ཆ་མཐུན་གྱི་དགེ་བ་མ་བསྐྱེད་པའི་བྱིས་པ་རྣམས་ཀྱི་འཁོར་བ་ལ་ཕྱི་མཐའ་མེད་པའི་ཕྱིར་རོ། །

གསུམ་པ་ལུས་ཡང་དང་ཡང་དུ་འདོར་བའི་ཉེས་པ་ནི། རེ་རེའི་བདག་ཉིད་རུས་པའི་ཕུང་པོ་ནི། །ལྷུན་པོ་མཉམ་པ་སྙེད་ཅིག་འདས་གྱུར་ཏེ། །ཞེས་གསུངས་ཏེ། སེམས་ཅན་རེ་རེས་ཀྱང་སྔོན་ཆད་འཁོར་བར་སྐྱེ་བ་བླངས་པའི་བདག་ཉིད་ཀྱི་རུས་པའི་ཕུང་པོ་ནི། ལྷུན་པོ་དང་མཉམ་པའམ་དེ་བས་ལྷག་པ་སྙེད་ཅིག་འདས་གྱུར་ཏེ། ད་དུང་ལམ་ལ་མ་འབད་ན། དེ་བས་ཆེས་མང་བའི་རུས་པ་འདོར་དགོས་སོ། །བཞི་པ་ཡང་དང་ཡང་དུ་ཉིང་མཚམས་སྦྱོར་བའི་ཉེས་པ་ནི། མ་ཡི་ཐུག་མཐའ་རྒྱ་ཤུག་ཚིག་གུ་ཙམ། །རིལ་བུར་བགྲངས་ཀྱང་ས་ཡིས་ལང་མི་འགྱུར། །ཞེས་གསུངས་ཏེ། སེམས་ཅན་རེ་རེའང་སྔར་བདག་གི་མའམ། མའི་མར་གྱུར་པ་ལྟ་བུའི་གྲངས་ཀྱིས་ཐུག་པའི་མཐའ་ཡང་སའི་དཀྱིལ་འཁོར་ལས། རྒྱ་ཤུག་གི་ཚིག་གུ་ཙམ་གྱི་རིལ་བུ་བཅད་ཅིང་བགྲངས་ཀྱང་། ས་ཡིས་ལང་བར་མི་འགྱུར་བར་འཛད་ཀྱིས། སེམས་ཅན་གཅིག་གི་མར་གྱུར་བའི་གྲངས་ནི་ཟད་པར་མི་འགྱུར་ཏེ། ད་དུང་ཡང་ལམ་ལ་མ་འབད་ན་དེ་བས་ཀྱང་མང་བར་འགྱུར་རོ། །དོན་དེ་ཡང་མདོ་ལས། དགེ་སློང་དག་དཔེར་ན་སྐྱེས་བུ་འགའ་ཞིག་གིས་ས་ཆེན་པོ་འདི་ལས་རྒྱ་ཤུག་གི་ཚིག་གུ་ཙམ་གྱི་རིལ་བུ་ཐོགས་ཏེ། འདི་ནི་བདག་གི་མའོ། །འདི་ནི་བདག་གི་མ་དེའི་མའོ་ཞེས་འདོར་བར་བྱེད་ན། དགེ་སློང་དག་ས་ཆེན་པོའི་འཇིམ་པ་ནི་ཆེས་སྔར་ཟད་པར་འགྱུར་གྱིས། མི་རྣམས་ཀྱི་མའི་རྒྱུད་ནི། དེ་ལྟ་མ་ཡིན་པར་ང་སྨྲའོ། །ཞེས་གསུངས་པ་ལྟ་བུའོ། །

ལྔ་པ་ཡང་ཡང་མཐོ་དམན་དུ་འགྱུར་བའི་ཉེས་པ་ནི། བརྒྱ་བྱིན་འཇིག་རྟེན་མཆོད་འོས་གྱུར་ནས་ནི། །ལས་ཀྱི་དབང་གིས་ཕྱིར་ཡང་ས་སྟེང་ལྟུང་། །འཁོར་ལོས་བསྒྱུར་རྒྱལ་ཉིད་དུ་གྱུར་ནས་ཀྱང་། །འཁོར་བ་དག་ཏུ་ཡང་བྲན་ཉིད་དུ་འགྱུར། །ཞེས་གསུངས་ཏེ། བརྒྱ་བྱིན་ནི་ལྷ་རྣམས་ཀྱིས་ཀྱང་མཆོད་ན་གཞན་གྱིས་ལྟ་ཅི་སྨོས། དེ་ལྟ་བུ་འཇིག་རྟེན་གྱི་མཆོད་འོས་སུ་གྱུར་ནས་ཀྱང་སྔོན་གྱི་ལན་གྲངས་གཞན་ལ་མྱོང་འགྱུར་གྱི་ལས་ཀྱི་དབང་གིས་ཕྱིར་ཡང་ས་སྟེང་དུ་མི་ཕལ་པའམ་ངན་སོང་དུ་ཡང་ལྟུང་ལ། འཁོར་ལོས་བསྒྱུར་བའི་རྒྱལ་པོ་རིན་ཆེན་སྣ་བདུན་དང་ལྡན་ཞིང་གླིང་བཞི་ལ་དབང་བྱེད་པ་ཉིད་དུ་གྱུར་ནས་ཀྱང་། འཁོར་བ་ན་འཁོར་བའི་གནས་སྐབས་དག་ཏུ། ལས་ཀྱི་དབང་གིས་མི་ཡང་བྲན་ཉིད་དམ། ངན་སོང་དུ་ཡང་ལྟུང་བར་འགྱུར་རོ། །དེ་ལྟར་དབང་ཆེ་བ་ལ་ཡིད་བརྟན་དུ་མེད་པར་བསྟན་ནས། འདོད་པའི་བདེ་བ་ལ་ཡིད་བརྟན་དུ་མེད་པར་སྟོན་པ་ནི། མཐོ་རིས་བུ་བོའི་ནུ་མ་རྐེད་པ་ལ། །རེག་པའི་བདེ་བ་ཡུན་རིང་མྱོང་ནས་སླར། །དམྱལ་བར་འཐག་གཅོད་དབང་བའི་འཕྲུལ་འཁོར་གྱི། །རེག་པ་ཤིན་ཏུ་མི་ཟད་བསྟེན་འཚལ་ལོ། །ཞེས་གསུངས་ཏེ། ལྷར་སྐྱེས་ཏེ་མཐོ་རིས་ཀྱི་བུ་མོའི་ནུ་མ་དང་རྐེད་པ་ལ་རེག་པའི་འདོད་པའི་བདེ་བ་ཡུན་རིང་མྱོང་ནས་སླར་ཡང་སྡིག་པའི་ལས་ཀྱི་དབང་གིས་དམྱལ་བར་སྐྱེས་པ་ན། བསྡུས་འཇོམས་སུ་ལྕགས་ཀྱི་རི་ཆེན་པོའི་བར་དུ་འཐག་པ་དང་། ཐིག་ནག་ཏུ་མཚོན་གྱིས་གཅོད་པ་དང་། ཚ་བ་དང་རབ་ཏུ་ཚ་བར་མཚོན་ནམ་སྲོག་ཆགས་མི་ཟད་པས་མཆུ་དང་སྡེར་མོས་དབད་པ་སྟེ་ཕད་པའི་འཕྲུལ་འཁོར་གྱི་རེག་པ་ལས་བྱུང་བའི་སྡུག་བསྔལ་ཤིན་ཏུ་མི་བཟད་པ་སྔར་ལས་ཡུན་རིང་བ་བསྟེན་འཚལ་ལོ། །གནས་ལས་བྱུང་བའི་བདེ་བ་ལ་ཡིད་བརྟན་མེད་པར་སྟོན་པ་ནི། རྐང་པའི་རེག་པས་ནེམས་པར་བདེ་བཟོད་པ། །ལྷུན་པོའི་སྤོ་ལ་ཡུན་རིང་གནས་ནས་ནི། །སླར་ཡང་མེ་མུར་རོ་མྱགས་རྒྱུ་བ་ཡི། །སྡུག་བསྔལ་མི་ཟད་འཕོག་སྙམ་བགྱིད་འཚལ་ལོ། །ཞེས་གསུངས་ཏེ། རྐང་པའི་རེག་པས་མནན་ན་ནེམས་ཀྱིས་བྱེད་པ། བཏེག་ན་སྤར་གྱིས་བྱེད་པའི་བདེ་བ་བཟོད་དུ་རུང་བ་དང་ལྡན་པའི་རིན་པོ་ཆེ་སྣ་བཞི་ལས་གྲུབ་པའི་ལྷུན་པོའི་སྤོ་ལ་ཡུན་རིང་སྟེ། ལྷའི་ལོ་སྟོང་དུ་གནས་ནས་སླར་ཡང་དམྱལ་བར་མེ་མུར་པུས་ནུབ་ཙམ་དང་། རོ་མྱགས་ཏེ་ཕྱི་སའི་འདམ་དུ་རྒྱུ་བའི་སྡུག་བསྔལ་མི་ཟད་པ་འཕོག་པ་སྟེ། མྱོང་དགོས་སོ་སྙམ་དུ་ཐུགས་ལ་བགྱིད་འཚལ་ལོ། །སྐྱེད་མོས་ཚལ་དུ་རོལ་པའི་བདེ་བ་ལ་ཡིད་འབྱུང་བར་བྱ་བའི་ཕྱིར། མཐོ་རིས་བུ་མོས་འབྲོངས་ཤིང་དགའ་བ་དང་། །རྣམ་པར་མཛེས་འཚལ་སོན་པར་རྩེས་ནས་སླར། །འདབ་མ་རལ་གྲི་འདྲ་ཚལ་གནས་རྣམས་ཀྱིས། །རྐང་ལག་རྣ་བ་སྣ་གཅོད་འཐོབ་པར་འགྱུར། །ཞེས་གསུངས་ཏེ། མཐོ་རིས་བུ་མོས་འབྲོངས་ཤིང་སྟེ་ལྷའི་བུ་མོ་མང་པོས་ཉེ་བར་བསྟེན་ཅིང་འཁོར་གྱིས་བསྐོར་བའི་དགའ་བའི་ཚལ་དང་། རྣམ་པར་མཛེས་པའི་ཚལ་དུ་སོན་ཏེ། འདོད་པའི་དགའ་བ་ལ་ཡུན་རིང་རྩེད་ནས། སླར་ཡང་དམྱལ་བར་འདབ་མ་རལ་གྲི་འདྲ་བའི་ཚལ་གྱི་གསེབ་ཏུ་ཕྱིན་ཏེ། དེ་ལ་གནས་པའི་ལོ་མ་མཚོན་རྣོན་པོ་སྣ་ཚོགས་པ་རླུང་གིས་བསྐྱོད་དེ། ལྷུངས་པ་རྣམས་ཀྱིས་རྐང་ལག་དང་རྣ་བ་དང་སྣ་གཅོད་དེ། ལུས་དང་ཡན་ལག་ཐམས་ཅད་བཅད་ཅིང་ཕུག་པའི་སྡུག་བསྔལ་ཐོབ་པར་འགྱུར་རོ། །

གཞན་ཡང་། དལ་གྱིས་འབབ་པ་ལྷ་ཡི་བུ་མོ་ནི། །གདོང་མཛེས་གསེར་གྱི་པདྨ་ལྡན་ཞུགས་ནས། །སླར་ཡང་དམྱལ་བར་ཆུ་བོ་རབས་མེད་པར། །ཚྭ་སྒོ་བཟོད་གླགས་ཆུ་ཚན་འཇུག་འཚལ་ལོ། །ཞེས་གསུངས་ཏེ། ལྷའི་རྫིང་བུ་ཆུ་ཡན་ལག་བརྒྱད་དང་ལྡན་པ་དལ་གྱིས་འབབ་པ་ལྷའི་བུ་མོ་གདོང་མཛེས་པ་དག་གིས་བསྐོར་བ་གསེར་གྱི་པདྨ་དང་ལྡན་པར་ཁྲུས་ཀྱི་དོན་དུ་ཞུགས་པའི་བདེ་བ་ཡུན་རིང་མྱོང་ནས། སླར་ཡང་དམྱལ་བར་ཐལ་ཚན་གྱི་ཆུ་བོ་རབ་མེད་ཚྭ་རྒོ་ཅན་གྱི་ཆུ་ཚན་བཟོད་གླགས་ཏེ། བཟོད་པར་མི་ནུས་པའི་རེག་པ་དང་ལྡན་པར་འཇུག་འཚལ་ལོ། །དེ་ལྟར་འདོད་ལྷ་འོག་མ་གཉིས་ཀྱི་བདེ་བ་ལ་ཡིད་བརྟན་དུ་མེད་པར་བསྟན་ནས། འཐབ་བྲལ་བ་སོགས་འདོད་ལྷ་གོང་མ་རྣམས་དང་། ཁམས་གོང་གི་བདེ་བ་ལ་ཡང་ཡིད་བརྟན་དུ་མེད་པར་སྟོན་པ་ནི། ལྷ་ཡུལ་འདོད་བདེ་ཤིན་ཏུ་ཆེན་པོ་དང་། །ཚངས་ཉིད་ཆགས་བྲལ་བདེ་བ་ཐོབ་ནས་སླར། །མནར་མེད་མེ་ཡི་བུད་ཤིང་གྱུར་པ་ཡི། །སྡུག་བསྔལ་རྒྱུན་མི་འཆད་པར་བསྟེན་འཚལ་ལོ། །ཞེས་གསུངས་ཏེ། འཐབ་བྲལ་ཡན་ཆད་ཀྱི་ལྷ་ཡུལ་པའི་འདོད་པའི་བདེ་བ་འོག་མ་དག་ལས་ཆེས་ཁྱད་པར་དུ་འཕགས་པ་ཤིན་ཏུ་ཆེན་པོ་དང་། གཟུགས་ཁམས་ཚངས་པའི་འཇིག་རྟེན་གྱི་འདོད་པ་ལས་འདོད་ཆགས་དང་བྲལ་བའི་བདེ་བ་ཐོབ་ནས་སླར་ཡང་ལན་གྲངས་གཞན་ལ་མྱོང་འགྱུར་གྱི་མི་དགེ་བའི་དབང་གིས་མནར་མེད་མེ་ཡི་བུད་ཤིང་སྟེ། མེ་མི་ཟད་པས་བསྲེགས་པར་གྱུར་པའི་སྡུག་བསྔལ་རྒྱུན་མི་འཆད་ཅིང་མཚམས་མེད་པ་བསྟེན་པར་འཚལ་ལོ། །གཞན་ཡང་། ཉི་མ་ཟླ་བ་ཉིད་ཐོབ་རང་ལུས་ཀྱི། །འོད་ཀྱིས་འཇིག་རྟེན་མཐའ་དག་སྣང་བྱས་ཏེ། །སླར་ཡང་མུན་ནག་སྨག་ཏུ་ཕྱིན་གྱུར་ནས། །རང་གི་ལག་པ་བརྐྱངས་པའང་མི་མཐོང་འགྱུར། །ཞེས་གསུངས་ཏེ། ལྷའི་བུ་ཉི་མ་དང་ཟླ་བ་ཉིད་དུ་སྐྱེ་བ་ཐོབ་ནས་རང་ལུས་ཀྱི་འོད་ཀྱིས་ཞེས་ཏེ། རྟེན་དང་བརྟེན་པ་མ་ཕྱེ་བར་འཇིག་རྟེན་ན་གྲགས་པ་ལྟར་བརྗོད་པ་སྟེ། གཞལ་མེད་ཁང་གི་འོག་གཞིའི་འོད་ཀྱིས་འཇིག་རྟེན་མཐའ་དག་སྣང་བར་བྱས་ཏེ། སླར་ཡང་འཇིག་རྟེན་གྱི་བར་ཉི་ཟླའི་འོད་མེད་པའི་མུན་ནག་སྨག་ཏུ་གྱུར་པ་དག་ཏུ་ཕྱིན་ཅིང་སྐྱེས་ནས་རང་གི་ལག་པ་བརྐྱངས་པའང་མཐོང་བར་མི་འགྱུར་རོ། །

དྲུག་པ་གྲོགས་མེད་པའི་ཉེས་པ་ནི། དེ་ལྟར་ནོངས་པར་འགྱུར་འཚལ་བསོད་ནམས་ནི། །རྣམ་གསུམ་མར་མེའི་སྣང་བ་རབ་བཞེས་ཤིག །གཅིག་པུ་ཉི་མ་ཟླ་བས་མི་བརྫི་བའི། །མུན་ནག་མཐའ་ཡས་ནང་དུ་འཇུག་འཚལ་ལོ། །ཞེས་གསུངས་ཏེ། དེ་ལྟར་ཚེ་མི་རྟག་པ་དང་། མཐོ་དམན་སྣ་ཚོགས་པར་འགྱུར་བ་ཡིན་པ་དང་། ནོངས་པར་ཏེ་འཆི་བར་འགྱུར་འཚལ་བས། ཁྱོད་ཀྱིས་སྦྱིན་པ་དང་། ཚུལ་ཁྲིམས་དང་། བསྒོམས་པ་ལས་བྱུང་བའམ། ལུས་དང་ངག་དང་ཡིད་ཀྱི་རང་བཞིན་གྱི་བསོད་ནམས་རྣམ་པ་གསུམ་ངན་སོང་གི་མུན་པ་མུན་ནག་ཆེན་པོ་སེལ་བར་བྱེད་པའི་མར་མེའི་སྣང་བ་རབ་ཏུ་བཞེས་ཤིག གལ་ཏེ་བསོད་ནམས་ཀྱི་སྣང་བ་མེད་ན། གྲོགས་མེད་པས་གཅིག་པུ་ཉི་ཟླའི་འོད་ཀྱིས་མི་བརྫི་བ་སྟེ། གཞོམ་མི་ནུས་པའི་ངན་སོང་གསུམ་གྱི་མུན་ནག་མཐའ་ཡས་པར་འཇུག་འཚལ་ལོ། །དེ་ལྟ་བུའི་མུན་ནག་ཏུ་ཞུགས་པ་ན་གྲོགས་དང་སྐྱབས་སུ་གྱུར་པ་དང་། མར་མེའི་སྣང་བ་ལྟ་བུ་ནི་དག་པ་ཁོ་ན་ཡིན་ཏེ། ཇི་སྐད་དུ། རྒྱ་ཆེར་རོལ་པ་ལས། དགེ་བའི་ལས་བྱས་རྗེས་སུ་འབྲང་བྱེད་ཅིང་། །ཕྱི་བཞིན་འགྲོ་བར་གྱུར་པ་མ་གཏོགས་པ། །འདུས་བྱས་དག་ལ་གྲོགས་ཡོད་མ་ཡིན་ཏེ། །སྐྱབས་མེད་གཉེན་བཤེས་མེད་ཅིང་འཁོར་ཡང་མེད། །ཅེས་གསུངས་པ་ལྟ་བུའོ། །

བདུན་པ་འགྲོ་ལྔའི་ངེས་པའི་སྡུག་བསྔལ་ཉམས་སུ་མྱོང་བའི་ཉེས་པ་ལྔའི་དང་པོ་དམྱལ་བའི་སྡུག་བསྔལ་ནི། རེ་ཞིག་དམྱལ་བ་རྣམས་ཀྱི་གྲངས་སྤྱིར་བསྟན་པའི་ཕྱིར། སེམས་ཅན་ཉེས་པ་སྤྱད་པ་སྤྱོད་རྣམས་ལ། །ཡང་སོས་ཐིག་ནག་རབ་ཏུ་ཚ་བ་དང་། །བསྡུས་འཇོམས་ངུ་འབོད་མནར་མེད་ལ་སོགས་པའི། །དམྱལ་བ་རྣམས་སུ་རྟག་ཏུ་སྡུག་བསྔལ་འགྱུར། །ཞེས་གསུངས་ཏེ། སེམས་ཅན་སྒོ་གསུམ་གྱི་ཉེས་པ་སྤྱད་པར་སྤྱོད་པ་རྣམས་ཀྱིས། ཡང་སོས་དང་ཐིག་ནག བསྡུས་འཇོམས། ངུ་འབོད་དང་ངུ་འབོད་ཆེན་པོ་དང་། ཚ་བ་དང་རབ་ཏུ་ཚ་བ་དང་མནར་མེད་པ་དང་། སོགས་པས་བསྡུས་པ་ལྷག་མ་རྣམས་དང་། ཉི་ཚེ་བ་དང་། གྲང་བའི་དམྱལ་བ་རྣམས་སུ་རྟག་ཏུ་སྡུག་བསྔལ་དག་མྱོང་བར་འགྱུར་རོ། །དེ་ལ་ཡང་སོས་ནི། དེར་སྐྱེས་པའི་སེམས་ཅན་རྣམས་ཕན་ཚུན་མཐོང་བ་ན་སྐྲག་ནས་གང་བླངས་པ་མཚོན་ཆ་རྣོན་པོར་གྱུར་ཏེ། འཕངས་པས་ཡན་ལག་དང་ཉིང་ལག་བཅད་ཅིང་བརྒྱལ་ནས་ས་ལ་འགྱེལ་བ་ན། ནམ་མཁའ་ནས་ཡང་ཁྱེད་རྣམས་སོས་པར་གྱུར་ཅིག་ཅེས་པའི་སྒྲ་བྱུང་བ་ན། ཡང་སོས་ཏེ་སྔ་མ་བཞིན་བྱས་ཏེ། གཞི་དེ་ལས་ཡུན་རིང་པོར་སྡུག་བསྔལ་མྱོང་བར་འགྱུར་ཏེ། སེམས་ཅན་དེ་ནི་ཡང་སོས་ཞེས་བྱའོ། །ཐིག་ནག་ཏུ་སྐྱེས་པའི་སེམས་ཅན་རྣམས་ལ། དམྱལ་སྲུང་རྣམས་ཀྱིས་ལུས་ལ་ཐིག་ནག་པོ་བཞི་དང་བརྒྱད་ལ་སོགས་པ་བཏབ་ནས། མཚོན་སྣ་ཚོགས་པས་གཤེག་ཅིང་གཅོད་པར་བྱེད་ལ། གཞི་དེ་ལས་ཡུན་རིང་པོར་སྡུག་བསྔལ་མྱོང་བར་འགྱུར་ཏེ། སེམས་ཅན་དེ་ནི་ཐིག་ནག་ཞེས་བྱའོ། །བསྡུས་འཇོམས་ནི། དམྱལ་སྲུང་གིས་སེམས་ཅན་རྣམས་ཕྱོགས་གཅིག་ཏུ་བསྡུས་ནས། རི་ར་དང་ལུག་གི་གདོང་པ་འདྲ་བ་སོགས་ཀྱི་བར་དུ་བཅུག་ནས་འཚིར་ཞིང་། ཡང་འདུས་པ་ན། ལྕགས་ཀྱི་འཕྲུལ་འཁོར་གྱི་ནང་དུ་བཅུག་ནས་བུར་ཤིང་ལྟར་འཚི་བར་བྱེད་ཅིང་སྒོ་ཀུན་ནས་ཁྲག་གི་རྒྱུན་འབབ་པའོ། །ཡང་འདུས་པ་ན། ལྕགས་ཀྱི་ཕ་བོང་གི་ཆར་བབས་པས་བརྡུངས་ཤིང་ཀུན་ནས་དམྱལ་བར་བྱེད་དེ། གཞི་དེ་ལས་ཡུན་རིང་པོར་སྡུག་བསྔལ་མྱོང་བར་འགྱུར་རོ། །སེམས་ཅན་དེ་ནི་བསྡུས་འཇོམས་ཞེས་བྱའོ། །ངུ་འབོད་ནི། སེམས་ཅན་དེ་གནས་ཚོལ་ཞིང་འགྲོ་བ་ན། ལྕགས་ཀྱི་ཁང་པའི་ནང་དུ་འཇུག་པར་བྱེད་ལ། དེར་ཞུགས་པ་ན་མེ་བཏང་སྟེ། འབར་ཞིང་ཀུན་ཏུ་རབ་ཏུ་འབར་བས་བསྲེགས་པར་གྱུར་ཏེ། དེ་དག་དེ་ན་ངུ་ཞིང་ཉམ་ཐག་པའི་སྐད་འབྱིན་པར་གྱུར་ཏེ། གཞི་དེ་ལ་ཡུན་རིང་པོར་སྡུག་བསྔལ་མྱོང་བར་འགྱུར་རོ། །སེམས་ཅན་དེ་ནི་ངུ་འབོད་ཅེས་བྱའོ། །ངུ་འབོད་ཆེན་པོ་ནི། ངུ་འབོད་ཀྱི་སྐབས་སུ་བཤད་པའི་ཁང་པ་དེ་ལྟ་བུ་ཉིས་སྦྲག་གི་ནང་ན་འདུག་པར་རིག་པར་བྱའོ། །ཚ་བ་ནི་དམྱལ་བའི་སྲུང་མས་སེམས་ཅན་དེ་དག་ལྕགས་ཀྱི་བུམ་པའི་ནང་དུ་ཁྲོ་ཆུ་འབར་བས་འཚེད་པ་དང་། ལྕགས་ཀྱི་སླ་ང་འབར་བའི་ནང་དུ་རྔོད་པ་དང་། ལྕགས་ཀྱི་ས་གཞི་འབར་བའི་སྟེང་དུ་ཐོ་བ་འབར་བས་བརྡུང་བ་དང་། ལྕགས་ཀྱི་གསལ་ཤིང་འབར་བས་འཕོངས་ནས་སྤྱི་བོའི་བར་དུ་ཐལ་བྱུང་དུ་ཕུག་པས་བ་སྤུའི་བུ་ག་དང་སྒོ་ཐམས་ཅད་ནས་མེ་འབར་བར་གྱུར་ཏེ། གཞི་དེ་ལ་ཡུན་རིང་དུ་སྡུག་བསྔལ་མྱོང་བར་འགྱུར་རོ། །སེམས་ཅན་དེ་ནི་ཚ་བ་ཞེས་བྱའོ། །རབ་ཏུ་ཚ་བ་ནི། སྡུག་བསྔལ་སྔ་མའི་སྟེང་དུ་གསལ་ཤིང་རྩེ་གསུམ་པས་ཕུག་སྟེ། སྤྱི་བོ་དང་ཕྲག་པ་གཉིས་སུ་ཕྱུང་ནས་སྒོ་ཀུན་ནས་མེ་འབར་བ་དང་། ལྕགས་ལེབ་འབར་བས་ལུས་འཁྲི་བ་དང་། ལྕགས་ཀྱི་ས་གཞི་འབར་བ་ལ་ལྕགས་ཕུར་བརྒྱས་རྒྱོང་བ་ལ་སོགས་པ་ཡོད་དེ། གཞི་དེ་ལས་ཡུན་རིང་དུ་སྡུག་བསྔལ་མྱོང་བར་འགྱུར་རོ། །སེམས་ཅན་དེ་ནི་རབ་ཏུ་ཚ་བ་ཞེས་བྱའོ། །མནར་མེད་ནི། ཕྱོགས་བཞི་ནས་མེའི་ཕུང་པོ་འོངས་པ་སེམས་ཅན་དེའི་ལུས་ལ་མེ་ལྕེ་གཅིག་ཏུ་གྱུར་ཏེ། སྨྲེ་སྔགས་འདོན་པ་ཙམ་མ་གཏོགས་པ་སེམས་ཅན་དང་མེ་ལྕེ་དབྱེར་མི་ཕྱེད་པར་འགྱུར་བའོ། །འདི་ལ་སྡུག་བསྔལ་མྱོང་བ་ལ་བར་དང་མཚམས་མེད་པས་མནར་མེད་པ་ཅེས་བྱའོ། །གཞི་དེ་ལས་སྡུག་བསྔལ་ཡུན་རིང་དུ་མྱོང་སྟེ། སེམས་ཅན་དེ་ནི་མནར་མེད་པ་ཞེས་བྱའོ། །དེ་ལ་ཉེ་འཁོར་བ་ནི། སེམས་ཅན་དམྱལ་བ་ཆེན་པོའི་ཕྱོགས་བཞི་ན་སྒོ་བཞི་ཡོད་པའི་ཕྱི་རོལ་ན་སྡུག་བསྔལ་ལྷག་པ་བཞི་བཞི་ཡོད་དེ། འདི་ལྟར་དང་པོ་ནི་སྒོའི་ཕྱི་རོལ་ན་མེ་མ་མུར་པུས་ནུབ་ཙམ་ཡོད་ལ། དེར་རྐང་པ་འདེགས་འཇོག་བྱེད་པ་ན། ཤ་དང་པགས་པ་སོགས་སྐྱེ་འཇིག་བྱེད་པར་འགྱུར་རོ། །དེ་དང་འདབས་འབྱོར་ན་རོ་མྱགས་ཕྱི་སའི་འདམ་དྲི་ཤིན་ཏུ་མནམ་པ་ཡོད་དེ། དེར་འབོགས་པ་ན་དེར་འགྱེལ་ཏེ། མགོ་དང་། རྐང་པ་སོགས་བྱིངས་ཏེ། དེ་ན་ཡོད་པའི་སྲོག་ཆགས་འབུ་མཆུ་རྣོན་གྱིས་ཤ་ལ་སོགས་པ་འབིགས་པར་བྱེད་དོ། །དེ་དང་འདབས་ཆགས་པ་ན། སྤུ་གྲིས་གཏམས་པའི་ལམ་ཡོད་ལ། དེར་ཕྱིན་པས་རྐང་པ་འདེགས་འཇོག་གིས་ཤ་སྐྱེ་འཇིག་བྱེད་དོ། །དེ་དང་འདབས་ཆགས་པ་ན། ནགས་ཚལ་རལ་གྲི་ལོ་མ་ཅན་ཡོད་ལ། དེར་བསིལ་གྲིབ་ལ་འཁོད་པ་ན་ཤིང་ལས་རལ་གྲི་རྣམས་ལྷུངས་ཏེ། ཡན་ལག་དང་ཉིང་ལག་རྣམས་གཅོད་ཅིང་ས་ལ་འགྱེལ་བ་ན། ཁྱི་སྲེ་བོ་དག་གིས་བཤུལ་ཤ་འཐོག་ཅིང་ཟའོ། །དེ་དང་འདབ་ཆགས་པ་ན་ལྕགས་ཀྱི་ཤིང་ཤལ་མ་ལིའི་ཚལ་ཡོད་དེ། དེར་སོང་བས། དེ་ལ་འབབ་འཛེག་བྱེད་དུ་འཇུག་ཅིང་། ཡང་འཛེག་པ་ན་ཚེར་མ་རྣམས་ཁ་འཐུར་དུ་ལྟ་བར་འགྱུར་ལ། མར་འབབ་པ་ན་གྱེན་དུ་ལྟ་བས། ལུས་འབིགས་ཤིང་གཤོག་པར་བྱེད་དོ། །དེ་ན་ཡོད་པའི་ཁྭ་ཏ་ལྕགས་ཀྱི་མཆུ་ཅན་གྱིས་མིག་འབྲས་དག་འཐོག་ཅིང་ཟའོ། །དེ་དང་འདབས་ཆགས་པ་ན། ཆུ་ཀླུང་རབ་མེད་ཅེས་པ། འགྱུར་བྱེད་ཀྱི་ཆུ་ཁོལ་མས་གང་བ་ཡོད་དེ། དེར་ལྷུངས་པ་ན་ངོས་གཉིས་ན་སྐྱེས་བུ་དབྱུག་པ་ཐོགས་པ་དག་གིས་བསྲུངས་ནས་ཕྱིར་འབྱུང་དུ་མི་སྟེར་ལ། གལ་ཏེ་ཕྱིར་བྱུང་ན་ལྕགས་ཀྱི་ས་གཞི་འབར་བ་ལ་གན་རྐྱལ་དུ་བསྒྱེལ་ནས། ཁ་ལྕགས་ཀྱི་འབྱེད་སྤྱད་ཀྱིས་ཕྱེ་ནས། ལྕགས་ཀྱི་ཐུ་ལུམ་འབར་བའམ་ཟངས་ཞུན་ལྡུག་པར་བྱེད་དེ། གཞི་དེ་ལས་སྡུག་བསྔལ་ཡུན་རིང་དུ་མྱོང་བར་འགྱུར་རོ། །དེ་ལ་སྤུ་གྲིས་གཏམས་པ་ལ་སོགས་པ་བཞི་ནི། མཚོན་ཆར་འདྲ་བའི་ཕྱིར་ལྷག་པ་གཅིག་ཏུ་བྱས་སོ། །དེ་དག་ཕྱོགས་བཞིའི་བྱེ་བྲག་གིས་བཅུ་དྲུག་ཏུ་འགྱུར་ཏེ། ཇི་སྐད་དུ། མཛོད་ལས། བརྒྱད་པོ་ཀུན་ལ་ལྷག་བཅུ་དྲུག །མེ་མ་མུར་དང་རོ་མྱགས་འདམ། །སྤུ་གྲིའི་ལམ་སོགས་ཆུ་བོའོ། །ཞེས་གསུངས་པ་ལྟར་རོ། །དེ་ལ་གྲང་བའི་དམྱལ་བར་སྐྱེས་པའི་སེམས་ཅན་རྣམས་ཀྱིས་ནི། གྲང་བའི་སྡུག་བསྔལ་འདི་ལྟ་བུ་ཉམས་སུ་མྱོང་སྟེ། ཆུ་བུར་ཅན་དུ་སྐྱེས་པ་རྣམས་ནི། ས་དེ་ན་ཡོད་པའི་ལྷགས་པ་ཆེན་པོས་བཏབ་སྟེ། ལུས་ཐམས་ཅད་ཆུ་བུར་བྱུང་བ་བཞིན་དུ་འཁུམས་པར་འགྱུར་བའོ། །ཆུ་བུར་རྡོལ་བ་ནི། ཆུ་བུར་རྡོལ་བ་བཞིན་དུ་འཁུམས་པར་འགྱུར་བའོ། །སོ་ཐམ་ཐམ་པ་དང་། ཀྱི་ཧུར་ཟེར་བ་དང་། ཨ་ཆུ་ཟེར་བ་རྣམས་ནི། གྲང་བས་ཉེན་ནས་ཚིག་ཏུ་བརྗོད་པ་ལས་སེམས་ཅན་དེ་དག་གི་མིང་དུ་བཏགས་པའོ། །ཨུཏྤལ་ལྟར་གས་པ་ནི། ས་དེ་ན་ཡོད་པའི་ལྷགས་པ་ཆེན་པོས་བཏབ་སྟེ། པགས་པ་རྣམས་སྔོ་ཞིང་ཁ་ལྔའམ་དྲུག་ཏུ་གས་པར་གྱུར་པའོ། །པདྨ་ལྟར་གས་པ་ནི། པགས་པ་སྔོན་པོ་ལས་འདས་ནས་དམར་པོར་གྱུར་ཅིང་ཁ་བཅུའམ་དེ་ལས་ལྷག་པར་གྱུར་པའོ། །པདྨ་ལྟར་གས་པ་ཆེན་པོ་ནི། པགས་པ་ཤིན་ཏུ་དམར་པོར་གྱུར་ནས་ཁ་བརྒྱའམ་དེ་ལས་ལྷག་པར་གས་པར་འགྱུར་བའོ། །ཉི་ཚེ་བའི་སེམས་ཅན་དམྱལ་བ་རྣམས་ཀྱིས་སྡུག་བསྔལ་འདི་ལྟ་བུ་དག་མྱོང་སྟེ། རྒྱལ་པོའི་ཁབ་ཀྱི་བ་ལང་གི་བཤན་པ་སྐྱེས་པ་ཁང་པ་བརྩེགས་པ་ཙམ་ཉེན་སྐད་ཀྱིས་ངུ་ཞིང་ནམ་མཁའ་ལ་འོང་བ་དང་། བ་ལང་གི་བཤན་པའི་སློབ་མ་རུས་གོང་གི་དྲི་ང་བ་ལ་བྱ་རོག་སོགས་ཀྱིས་འཐོག་པར་སྐྱེས་པ་སོགས་དང་། གཞན་ཡང་འཕགས་པ་དགེ་འདུན་སྲུངས་ཀྱི་རྟོགས་བརྗོད་ལྟ་བུ་མྱོང་ངོ་། །དེའང་འདི་ལྟར་ཚེ་དང་ལྡན་པ་གྲོ་བཞིན་སྐྱེས་མཚོའི་འགྲམ་དུ་ལམ་ནོར་ནས། མྱ་ངམ་གྱི་ཐང་ལ་འཁྱམས་ཏེ་རིམ་གྱིས་སོང་བ་ན་སེམས་ཅན་གཅིག་མཚན་མོ་གཞལ་མེད་ཁང་བཟང་པོའི་ནང་ན། ལྷའི་ལོངས་སྤྱོད་བཟང་པོ་དང་ལྡན་པའི་བདེ་བ་མྱོང་ནས་ནམ་ལངས་པ་ན་གཞལ་མེད་ཁང་མི་སྣང་བར་གྱུར་ཅིང་ལུས་ས་ལ་ལྷུང་སྟེ་གཅན་གཟན་འཇིགས་སུ་རུང་བས་ཟ་ཞིང་དབང་བའི་སྡུག་བསྔལ་ཆེན་པོ་མྱོང་ནས། ཉི་མ་ནུབ་ནས་ཡང་ལྷའི་དཔལ་མྱོང་བ་མཐོང་ནས་དྲིས་པས། ཉིན་བར་གཞན་གྱི་སྲོག་གཅོད་ཅིང་། །མཚན་མོ་ཚུལ་ཁྲིམས་ཡོན་ཏན་ལྡན། །ལས་དེའི་འབྲས་བུ་བཟང་པོ་དང་། །སྡིག་ཏོ་འདི་ནི་མྱོང་བ་ཡིན། །ཞེས་དང་། དེ་ནས་རིམ་གྱིས་ཕྱིན་པ་དང་། ཉིན་མོ་ལྷའི་དཔལ་མྱོང་ཞིང་། མཚན་མོ་སྲིན་པོའི་བུད་མེད་ཆེན་པོ་ཞིག་གིས་ཀུན་ནས་དཀྲིས་ཤིང་མགོ་ནས་རིམ་གྱིས་ཟོས་པས་མི་ཟད་པའི་སྡུག་བསྔལ་མྱོང་། ཡང་ཉིན་བར་སྔར་བཞིན་འགྱུར་བ་མཐོང་ནས། དེ་ལ་སྔ་མ་བཞིན་དྲིས་པས། མཚན་མོ་བྱི་བོ་བྱེད་ལ་ཆགས། །ཉིན་བར་ཚུལ་ཁྲིམས་ཡོན་ཏན་ལྡན། །ལས་དེས་འབྲས་བུ་བཟང་པོ་དང་། །སྡིག་ཏོ་འདི་ནི་མྱོང་བ་ཡིན། །ཞེས་ལུང་ལས་བཤད་པ་ལྟར་རོ། །ད་ནི་ཚ་བའི་དམྱལ་བ་དེ་དག་གི་སྡུག་བསྔལ་གྱི་ཁྱད་པར་འགའ་ཞིག་བསྟན་པར་བཞེད་ནས། ཁ་ཅིག་ཏིལ་བཞིན་འཚིར་ཏེ་དེ་བཞིན་གཞན། །ཕྱེ་མ་ཞིབ་མོ་བཞིན་དུ་ཕྱེ་མར་རློག ཁ་ཅིག་སོག་ལེས་འདྲ་སྟེ་དེ་བཞིན་གཞན། །སྟ་རེ་མི་ཟད་སོ་རྣོན་རྣམས་ཀྱིས་གཤགས། །ཞེས་སོགས་གསུངས་ཏེ། བསྡུས་འཇོམས་ནི། ལྕགས་ཀྱི་བཙིར་སྤྱད་ཀྱིས་ཏིལ་མར་འཚིར་བ་བཞིན་བཙིར་བས་ཁྲག་གི་རྒྱུན་འབབ་པ་དང་། དེ་བཞིན་དུ་དེ་ན་སེམས་ཅན་གཞན་ནི། ལྕགས་ཀྱི་མཆིག་དང་མཆིག་གུ་འབར་བས་འབྲས་ལ་སོགས་པའི་ཕྱེ་མ་ཞིབ་མོ་བཞིན་ཕྱེ་མར་རློག་གོ །ཐིག་ནག་གི་སེམས་ཅན་ཁ་ཅིག་སོག་ལེ་འབར་བས་འདྲ་སྟེ། དེ་བཞིན་དུ་དེ་ན་གཞན་དག་ནི་སྟ་རེ་སོ་རྣོན་འབར་བ་དག་གིས་གཤོགས་པར་བྱེད་དོ། །དེ་བཞིན་གཞན་དག་ཁྲོ་ཆུ་བཞུས་པ་ཡི། ཁུ་བ་འབར་བ་འཁྲིགས་པ་ལྡུད་པར་བགྱིད། ཁ་ཅིག་ལྕགས་ཀྱི་གསལ་ཤིང་རབ་འབར་བ། །ཚེར་མ་ཅན་ལ་ཀུན་ཏུ་བརྒྱུད་པར་བགྱིད། །དེ་བཞིན་དུ་ཚ་བ་ནའམ། ཆུ་བོ་རབ་མེད་ཀྱི་འགྲམ་ན་གཞན་དག་ལ་ནི་ལྕགས་ཀྱི་སྐམ་པ་འབར་བས་ཁ་ཕྱེ་ནས་དེར་ཁྲོ་ཆུ་བཞུས་པ་སྟེ། བསྐོལ་བའི་ཁུ་བ་མེ་སྟག་འབར་བ་ཕྲེང་བ་འཁྲིགས་པ་དག་ལྡུད་པར་བགྱིད། ཚ་བ་ན། ཁ་ཅིག་ལྕགས་ཀྱི་གསལ་ཤིང་མེ་རབ་ཏུ་འབར་བ་ཚེར་མ་ཅན་ལ་ཀུན་ཏུ་བརྒྱུད་པར་བགྱིད། ཁ་ཅིག་ལྕགས་ཀྱི་མཆེ་བ་ལྡན་པའི་ཁྱི། །གཏུམ་པོས་དབད་ཅིང་ལག་པ་གནམ་དུ་བསྒྲེངས། །དབང་མེད་གཞན་དག་ལྕགས་མཆུ་རྣོན་པོ་དང་། །སེན་མོ་མི་ཟད་ལྡན་པའི་ཁ་རྣམས་འཐོག། ཉེ་འཁོར་བའི་སྡུག་བསྔལ་མྱོང་བ་ཁ་ཅིག ལོ་མ་རལ་གྲི་ལྟ་བུའི་ཚལ་ན། ལྕགས་ཀྱི་མཆེ་བ་ལྡན་པའི་ཁྱི་གཏུམ་པོ་སྐད་ཆེར་འབྱིན་པ་དག་གིས་ལུས་དབད་ཅིང་ཟོས་པས་ལག་པ་གནམ་དུ་བསྒྲེངས་ཏེ། འོ་དོད་འབོད་དོ། །རང་དབང་མེད་པ་གཞན་ནི་ཤལ་མ་ལིའི་རྩེ་མོར་ལྕགས་ཀྱི་མཆུ་རྣོན་པོ་དང་། ལྕགས་ཀྱི་སེན་མོ་མི་ཟད་ཅིང་རྣོ་བ་དང་ལྡན་པའི་ཁྭ་ལ་སོགས་པའི་བྱའི་ཚོགས་རྣམས་ཀྱིས་མིག་འབྱིན་ཞིང་ཤ་རྣམས་འཐོག་གོ །ཁ་ཅིག་སྲིན་བུ་སྦུར་བ་སྣ་ཚོགས་དང་། །ཤ་སྦྲང་སྦྲང་མ་ནག་པོ་ཁྲི་ཕྲག་དག །རེག་ན་མི་ཟད་རྨ་སྲོལ་ཆེར་འབྱིན་པས། །ཟ་བར་བགྱིད་ཅིང་འདྲེ་ལྡོག་སྨྲེ་སྔགས་འདོན། ཁ་ཅིག་ནི་རང་གི་ལུས་ཀྱི་སྲིན་བུ་དང་ཕྱི་རོལ་སྦུར་བའི་རིགས་ཁ་དོག་དང་། དབྱིབས་སྣ་ཚོགས་དང་། ཤ་སྦྲང་དང་སྦྲང་མ་ནག་པོ་ཁྲི་ཕྲག་མང་པོ་རེག་ན་ཚོར་བ་མི་ཟད་པ་འབྱུང་ཞིང་རྨ་སྲོལ་ཆེར་འབྱིན་པ་དག་གིས་ཟ་བར་བགྱིད་ཅིང་དེའི་རྒྱུ་ལས་མི་བརྟན་པར་འདྲེ་ལྡོག་ཅིང་སྨྲེ་སྔགས་འདོན་ཏོ། །འདི་ཉེ་འཁོར་གྱི་སྡུག་བསྔལ་ལོ། ཁ་ཅིག་མདག་མེ་འབར་བའི་ཚོགས་སུ་ནི། །རྒྱུན་མི་འཆད་པར་རབ་བསྲེགས་ཁ་ཡང་བགྲད། ཁ་ཅིག་ལྕགས་ལས་བྱས་པའི་ཟངས་ཆེན་དུ། །སྤྱིའུ་ཚུགས་འབྲས་ཀྱི་ཅུང་པེང་བཞིན་དུ་འཚེད། །ཚ་བ་ན་སེམས་ཅན་ཁ་ཅིག་དམྱལ་སྲུང་གིས་ལྕགས་ཀྱི་མདག་མེ་འབར་བའི་ཚོགས་སུ་རྒྱུན་མི་འཆད་པ་སྟེ། ཡུན་རིང་དུ་བསྲེགས་ཤིང་རབ་ཏུ་བསྲེགས་པས་ཁ་ཡང་བགྲད། ཁ་དངས་བྱེད་པ་ཙམ་ལས་གཞན་པའི་མཐུ་མེད་དོ། །ཡང་དེ་ན་ཁ་ཅིག་ལྕགས་ལས་བྱས་པའི་ཟངས་ཏེ། སྣོད་ཆེན་པོ་བ་ཚྭ་ཅན་གྱི་ཆུས་གང་བ་མེ་འབར་བའི་ནང་དུ་སྤྱིའུ་ཚུགས་སུ་འཚེད་པར་བྱེད་དེ། དཔེར་ན་ཆུ་ཟངས་གང་བསྐོལ་བའི་ནང་དུ་འབྲས་ཀྱི་ཅུང་པེང་སྟེ། འབྲས་ཕྱེ་ལས་སྦྲུས་པའི་གོང་བུ་བསྐྱུར་བ་ན་རེས་འོག་ཏུ་འགྲོ་ཞིང་། རེས་སྟེང་དུ་འགྲོ་བ་བཞིན་ནོ། །དེ་ལྟར་དམྱལ་བ་ཆེན་པོའི་སྡུག་བསྔལ་རགས་པ་མདོ་ཙམ་བསྟན་ནས། དེའི་རྒྱུ་ལ་གནས་པ་རྣམས་སྐྲག་པ་བསྐྱེད་པ་ནི། སྡིག་ཅན་དབུགས་འབྱུང་འགག་པ་ཙམ་ཞིག་གི །དུས་ཀྱི་བར་དུ་ཆོད་རྣམས་དམྱལ་བ་ཡི། །སྡུག་བསྔལ་གཞལ་ཡས་ཐོས་ནས་རྣམ་སྟོང་དུ། །མི་འཇིགས་གང་ལགས་རྡོ་རྗེའི་རང་བཞིན་ནོ། །ཞེས་གསུངས་ཏེ། དམྱལ་བ་མྱོང་ངེས་ཀྱི་ལས་བྱས་པའི་སྡིག་ཅན་གང་དག་དམྱལ་བའི་སྡུག་བསྔལ་མྱོང་བ་ལ་དབུགས་འབྱུང་འཇུག་འགག་པའི་ཡུན་ཙམ་ཞིག་གི་དུས་ཀྱི་བར་དུ་ཆད་པ་ཟད་དེ། དབུགས་འགགས་མ་ཐག་དམྱལ་བར་ཉིང་མཚམས་སྦྱོར་བའི་ཕྱིར་རོ། །དེ་ལྟ་ན་ཡང་དེ་དག་གོང་དུ་བཤད་པའི་དམྱལ་བའི་སྡུག་བསྔལ་གཞལ་དུ་མེད་པ་ཐོས་ནས་རྣམ་པ་སྟོང་དུ་སྟེ། དུ་མར་སེམས་མི་འཇིགས་ཤིང་ལུས་མི་འགས་པ་གང་ལགས་པ་དེའི་ལུས་སེམས་ནི་ངེས་པར་རྡོ་རྗེའི་རང་བཞིན་དུ་ངེས་ཏེ། གཞན་དུ་ན་ཆེས་ཤིན་ཏུ་ཡང་འཇིགས་པར་རིགས་པའི་ཕྱིར་རོ། །དེའི་རྒྱུ་མཚན་འདི་ལྟར། དམྱལ་བ་བྲིས་པ་མཐོང་དང་ཐོས་པ་དང་། །དྲན་དང་བཀླགས་དང་གཟུགས་སུ་བགྱིས་རྣམས་ཀྱང་། །འཇིགས་པ་བསྐྱེད་པར་འགྱུར་ན་མི་ཟད་པའི། །རྣམ་སྨིན་ཉམས་སུ་མྱོང་ན་སྨོས་ཅི་འཚལ། །ཞེས་གསུངས་ཏེ། དམྱལ་བ་རི་མོར་བྲིས་པ་མཐོང་བ་དང་། སྔོན་མྱོང་བ་དྲན་པ་དང་། གཞན་ལས་ཐོས་པ་དང་། གླེགས་བམ་བཀླགས་པ་དང་། འཇིམ་པ་སོགས་ལ་གཟུགས་སུ་བགྱིས་པའི་ཚུལ་རྣམས་ཀྱིས་ཀྱང་འཇིགས་པར་བསྐྱེད་ན། ཤིན་ཏུ་མི་ཟད་པའི་རྣམ་པར་སྨིན་པ་མངོན་སུམ་དུ་ཉམས་སུ་མྱོང་བ་སྨོས་ཅི་འཚལ་བའི་ཕྱིར་རོ། །དམྱལ་བ་ཀུན་སྡུག་བསྔལ་མཚུངས་སམ་ཞེ་ན། མ་ཡིན་ཏེ། གོང་མ་གོང་མ་ལས། འོག་མ་འོག་མ་རྣམས་སྡུག་བསྔལ་ཆེ་ཞིང་། ཐམས་ཅད་ལས་མནར་མེད་ཆེའོ་ཞེས་བསྟན་པའི་ཕྱིར། བདེ་བ་ཀུན་གྱི་ནང་ན་སྲེད་ཟད་པའི། །བདེ་བའི་བདག་པོ་བགྱིད་པ་ཇི་ལྟ་བར། །དེ་བཞིན་སྡུག་བསྔལ་ཀུན་གྱི་ནང་ན་ནི། །མནར་མེད་དམྱལ་བའི་སྡུག་བསྔལ་རབ་མི་ཟད། །ཅེས་གསུངས་ཏེ། བདེ་བ་ཀུན་གྱི་ནང་ན་ཁམས་གསུམ་གྱི་སྲེད་པ་མ་ལུས་པ་ཟད་པའི་རྣམ་པར་གྲོལ་བའི་བདེ་བ་ལས་གོང་ན་གཞན་མེད་པའི་ཕྱིར། བདག་པོ་སྟེ། མཆོག་ཡིན་པ་ཇི་ལྟ་བ་དེ་བཞིན་དུ། མི་དགེ་བའི་འབྲས་བུ་སྡུག་བསྔལ་ཀུན་གྱི་ནང་ནས་ནི་མནར་མེད་པའི་སྡུག་བསྔལ་ཉིད་མི་ཟད་ཅིང་ཆེའོ། །དམྱལ་བ་དེའི་སྡུག་བསྔལ་དེ་ཇི་ལྟར་ཆེ་ཞེ་ན། དེ་ལ་འགྲན་བཟོད་པའི་དཔེ་གཞན་མིའི་ནང་ན་མེད་དོ། །ཞེས་སྟོན་པའི་ཕྱིར། འདི་ན་ཉིན་གཅིག་མདུང་ཐུང་སུམ་བརྒྱ་ཡིས། །རབ་ཏུ་དྲག་བཏབ་སྡུག་བསྔལ་གང་ལགས་པ། །དེས་ནི་དམྱལ་བའི་སྡུག་བསྔལ་ཆུང་ངུ་ལའང་། །འོལ་ཡང་མི་བགྱི་ཆར་ཡང་མི་ཕོད་དོ། །ཞེས་གསུངས་ཏེ། མིའི་ནང་འདི་ན་ཉིན་གཅིག་རངས་པོར་མདུང་ཐུང་སུམ་བརྒྱ་ཡིས། དུས་གཅིག་ལ་ཤུགས་རབ་ཏུ་དྲག་པོས་བཏབ་པའི་སྡུག་བསྔལ་གང་ལགས་པ་དེས་ནི་དམྱལ་བའི་སྡུག་བསྔལ་ཆུང་ངུ་ཉི་ཚེ་བ་ལྟ་བུའི་ཡང་འོལ་སྤྱི་ཙམ་ཡང་མི་བགྱི། བརྒྱ་སྟོང་ལ་སོགས་པའི་ཆར་ཡང་མི་ཕོད་དོ། །དེ་ལྟ་བུའི་སྡུག་བསྔལ་དུས་ཇི་སྲིད་དུ་མྱོང་བར་བྱ་དགོས་ཤེ་ན། སོ་སོའི་ཚེ་ཚད་ནི། མཛོད་དུ། ཡང་སོས་ལ་སོགས་དྲུག་རིམ་བཞིན། །འདོད་ལྷའི་ཚེ་དང་ཉིན་ཞག་མཉམ། །དེས་ན་དེ་དག་རྣམས་ཀྱི་ཚེ། །འདོད་ལྷའི་ཚེ་དང་འདྲ་བ་ཡིན། །ཞེས་དང་། རབ་ཏུ་ཚ་ཕྱེད་མནར་མེད་ནི། །བར་གྱི་བསྐལ་པའོ། །ཞེས་བཤད་པ་ལྟར་ཡིན་ལ། སྤྱིའི་དབང་དུ་བྱས་ནས། དེ་ལྟར་སྡུག་བསྔལ་ཤིན་ཏུ་མི་བཟད་ལོ། །བྱེ་བ་ཕྲག་བརྒྱར་ཉམས་སུ་མྱོང་ཡང་ནི། །ཇི་སྲིད་མི་དགེ་དེ་ཟད་མ་གྱུར་པ། །དེ་སྲིད་སྲོག་དང་བྲལ་བར་མི་འགྱུར་རོ། །ཞེས་གསུངས་ཏེ། བཤད་མ་ཐག་པའི་ཚུལ་དེ་ལྟར་སྡུག་བསྔལ་ཤིན་ཏུ་མི་བཟད་པ་བྱེ་བ་ཕྲག་བརྒྱར་ཏེ་ཤིན་ཏུ་ཡུན་རིང་བ་ཉམས་སུ་མྱོང་ཡང་། ཇི་སྲིད་རྒྱུ་མི་དགེ་བ་དེ་ཟད་པར་མ་གྱུར་པ་དེ་སྲིད་དུ་སྲོག་དང་བྲལ་བར་མི་འགྱུར་ཏེ། དམྱལ་བ་མྱོང་འགྱུར་གྱི་ལས་དེ་སྟོབས་དང་ལྡན་པའི་ཕྱིར་རོ། །ཇི་སྐད་བཤད་པའི་དམྱལ་བའི་སྡུག་བསྔལ་ནི། མི་དགེ་བའི་རྒྱུ་ལས་བྱུང་བས། དེ་དག་སྤང་བར་རིགས་སོ། །ཞེས་སྟོན་པ་ནི། མི་དགེའི་འབྲས་འདི་རྣམས་ཀྱི་ས་བོན་ནི། །ལུས་ངག་ཡིད་ཀྱི་ཉེས་སྤྱད་ཁྱོད་ཀྱིས་ནི། །ཅི་ནས་དེ་རྡུལ་ཙམ་ཡང་མ་མཆིས་པ། །དེ་ལྟར་ཉིད་ཀྱི་རྩལ་གྱིས་འབད་པར་མཛོད། །ཅེས་གསུངས་ཏེ། མི་དགེ་བའི་འབྲས་བུ་དམྱལ་བའི་སྡུག་བསྔལ་འདི་རྣམས་ཀྱི་ས་བོན་ནི། སྲོག་གཅོད་སོགས་ལུས་དང་། རྫུན་སྨྲ་སོགས་ངག་དང་། བརྣབ་སེམས་སོགས་ཡིད་ཀྱི་ཉེས་སྤྱད་ཆེན་པོ་རྣམས་ཡིན་ལ། རྒྱལ་པོ་ཁྱོད་ཀྱིས་ཅི་ནས་ཀྱང་ཉེས་སྤྱད་གསུམ་པོ་དེ་རྡུལ་ཙམ་ཡང་མ་མཆིས་པ་དེ་ལྟར་ཉིད་ཀྱི་རྩལ་ཏེ་ནུས་པ་ཅི་ཡོད་ཀྱིས་འབད་པར་མཛོད་ཅིག །

གཉིས་པ་དུད་འགྲོའི་སྡུག་བསྔལ་ནི། རེ་ཞིག་སྤྱིའི་དབང་དུ་བྱས་ནས། དུད་འགྲོའི་སྐྱེ་གནས་ན་ཡང་གསོད་པ་དང་། །བཅིང་དང་བརྡེག་སོགས་སྡུག་བསྔལ་སྣ་ཚོགས་པ། །ཞི་འགྱུར་དགེ་བ་སྤངས་པ་རྣམས་ལ་ནི། །གཅིག་ལ་གཅིག་ཟ་ཤིན་ཏུ་མི་བཟད་པ། །ཞེས་གསུངས་ཏེ། མི་ལྟར་འགྲེང་སྟེ་མི་འགྲོ་བར་དུད་དེ་འགྲོ་བས་ན་དུད་འགྲོ་སྟེ། དེའི་སྐྱེ་གནས་སུ་གཏོགས་པ་རྣམས་ན་ཡང་མི་ལ་སོགས་པ་གཞན་གྱིས་གསོད་པ་དང་ཞགས་པ་ལ་སོགས་པས་བཅིང་བ་དང་། ལྕག་གིས་རྡེག་པ་སོགས་མི་དང་མི་མ་ཡིན་པའི་གནོད་པ་མཐའ་ཡས་པ་དང་། ཞི་བ་མྱ་ངན་ལས་འདས་པའི་དགེ་བ་ངེས་འབྱེད་ཆ་མཐུན་སོགས་སྤངས་པ་སྟེ། དེ་དག་སྐྱེ་བའི་སྣོད་དུ་མི་རུང་བའི་དུད་འགྲོ་རྣམས་ལ་ནི། ཕན་ཚུན་གཅིག་ལ་གཅིག་ཟ་བ་རྣམ་སྨིན་འབྱིན་པར་ངེས་པས་ཤིན་ཏུ་མི་ཟད་པ་དང་ལྡན་ནོ། །སོ་སོའི་སྡུག་བསྔལ་གྱི་དབང་དུ་བྱས་ནས། ཁ་ཅིག་མུ་ཏིག་བལ་དང་རུས་པ་དང་། །ཤ་དང་པགས་པའི་ཆེད་དུ་འཆི་བར་འགྱུར། །དབང་མེད་གཞན་དག་རྡོག་པ་ལག་པ་དང་། །ལྕག་དང་ལྕགས་ཀྱུ་གདབ་པས་བཏབ་སྟེ་བཀོལ། །ཞེས་སོགས་གསུངས་ཏེ། དུད་འགྲོ་ཁ་ཅིག་མུ་ཏིག་གི་ཕྱིར་དང་། ཁ་ཅིག་བལ་གྱི་ཕྱིར་དང་། གླང་པོ་ཆེ་ལ་སོགས་པ་རུས་པའི་ཕྱིར་དང་། རི་དྭགས་ལ་སོགས་པ་ཤའི་ཕྱིར་དང་གཟིག་ལ་སོགས་པ་པགས་པའི་ཕྱིར་དུ་འཆི་བར་འགྱུར་ལ། རང་དབང་མེད་པ་ལྷ་མིའི་ཡོ་བྱད་དུ་གྱུར་པའི་དུད་འགྲོ་གཞན་རྟ་དང་མ་ཧེ་དང་བོང་བུ་དང་གླང་པོ་ཆེ་དང་གླང་ལ་སོགས་པ་དག་ནི་གོ་རིམ་བཞིན་དུ་རྡོག་པ་དང་། ལག་པ་དང་ལྕག་དང་ལྕགས་ཀྱུས་གདབ་པ་སྟེ་མཚོན་ཆ་དག་གིས་བཏབ་སྟེ་བཀོལ་བས་སྡུག་བསྔལ་བར་འགྱུར་རོ། །

གསུམ་པ་ཡི་དྭགས་ཀྱི་སྡུག་བསྔལ་ནི། རེ་ཞིག་སྤྱིའི་དབང་དུ་བྱས་ནས། ཡི་དྭགས་ན་ཡང་འདོད་པས་ཕོངས་པ་ཡིས། །བསྐྱེད་པའི་སྡུག་བསྔལ་རྒྱུན་ཆགས་མི་འཆོས་པ། །བཀྲེས་སྐོམ་གྲང་དྲོ་ངལ་དང་འཇིགས་པ་ཡིས། །བསྐྱེད་པ་ཤིན་ཏུ་མི་ཟད་བསྟེན་འཚལ་ལོ། །ཞེས་གསུངས་ཏེ། ཡི་དྭགས་སུ་སྐྱེས་ན་ཡང་འདོད་པས་ཕོངས་པས་བསྐྱེད་པའི་སྡུག་བསྔལ་རྒྱུན་ཆགས་མི་འཆོས་པ་བསྟེན་འཚལ་ལོ། །ཞེས་སྦྲེལ་ལོ། །དེ་ལ་རྒྱུན་ཆགས་མི་འཆོས་པ་ནི། ནམ་ཡང་འདོད་པ་འབྱོར་པའི་སྐབས་མེད་པས། སྡུག་བསྔལ་དེ་བཟློག་པའི་ཐབས་མེད་པའི་ཕྱིར་རོ། །དེ་ཉིད་ཇི་ལྟ་བུ་ཞེ་ན། བཀྲེས་སྐོམ་དང་དགུན་གྲང་བ་དང་སོ་ག་དྲོ་བ་དང་། ཟས་སྐོམ་ཚོལ་བའི་དོན་དུ་རྒྱུག་པས་ངལ་བ་དང་། སྐྱེས་བུ་མཚོན་ཆ་ཐོགས་པ་ལ་སོགས་པ་མཐོང་བ་ན་འཇིགས་ཤིང་སྐྲག་པས་བསྐྱེད་པ་ཤིན་ཏུ་མི་བཟད་པའོ། །ད་ནི་དེ་དག་གི་སྡུག་བསྔལ་གྱི་ཁྱད་པར་འགའ་ཞིག་བསྟན་པར་བྱ་སྟེ། དེ་ལ་བཀྲེས་སྐོམ་གྱི་སྡུག་བསྔལ་གྱི་དབང་དུ་བྱས་ནས། ཁ་ཅིག་ཁ་ནི་ཁབ་ཀྱི་མིག་ཙམ་ལ། །ལྟོ་བ་རི་ཡི་གཏོས་ཙམ་བཀྲེས་པས་ཉེན། །མི་གཙང་གྱི་ནར་བོར་བ་ཅུང་ཟད་ཀྱང་། །འཚལ་བའི་མཐུ་དང་ལྡན་པ་མ་ལགས་སོ། །ཞེས་གསུངས་ཏེ། ཁ་ཁབ་མིག་ཙམ་དུ་ཆུང་ལ་ལྟོ་བ་རི་ཡི་གཏོས་ཙམ་ཤིན་ཏུ་ཆེ་སྟེ་དགང་དཀའ་བས། བཀྲེས་པས་ཉེན་པར་གྱུར་ཏེ། མི་གཙང་བ་གྱི་ནར་བོར་བ་བཤང་གཅི་སོགས་ཅུང་ཟད་རྙེད་ཀྱང་ཁ་ཆུང་བས་འཚལ་བ་སྟེ་ཟ་བའི་ནུས་པ་དང་ལྡན་པ་མ་ལགས་པའི་ཕྱིར་རོ། །ལུས་མི་སྡུག་པ་དང་ཁ་འབར་བའི་དབང་དུ་བྱས་ཏེ། ཁ་ཅིག་པགས་རུས་ལུས་ཤིང་གཅེར་བུ་སྟེ། །ཏ་ལ་ཡ་ཐོག་བསྐམས་པ་ལྟ་བུ་ལགས། ཁ་ཅིག་མཚན་ཞིང་ཁ་ནས་འབར་བ་སྟེ། །ཟས་སུ་འབར་བའི་ཁར་བབས་བྱེ་མ་འཚལ། །ཞེས་གསུངས་ཏེ། ཁ་ཅིག་ལུས་ནི་ཤ་མེད་པར་པགས་རུས་ཙམ་ལུས་ཤིང་གོས་མེད་པས་གཅེར་བུ་སྟེ། དཔེར་ན་ཤིང་ཏ་ལ་ཡ་ཐོག་སྟེ་རྩེ་མོ་བསྐམས་པ་ཤུན་པ་དང་བྲལ་བ་ལྟ་བུ་ལགས་ཞེས་སོ། ཁ་ཅིག་ཉིན་བར་མ་ཡིན་གྱི་མཚན་མོ་རེ་རེ་ཞིང་ཁ་ནས་མེ་འབར་བ་སྟེ། མེ་འབར་བའི་ཁར་བྱེ་མ་ཚ་བ་དག་འབབ་ཅིང་བབས་པ་དེ་དག་ཟས་སུ་འཚལ་བ་སྟེ་ཟ་བར་བྱེད་དོ། །ཡི་དྭགས་ཀྱི་སྨད་རིགས་ཀྱི་སྡུག་བསྔལ་ཁྱད་པར་དུ་བསྟན་པའི་ཕྱིར། སྨད་རིགས་འགས་ནི་རྣག་དང་ཕྱི་ས་དང་། ཁྲག་སོགས་མི་གཙང་བ་ཡང་མི་རྙེད་དོ། །ཕན་ཚུན་གདོང་དུ་འཚོག་ཅིང་མགྲིན་པ་ནས། །ལྦ་བ་བྱུང་བ་སྨིན་པའི་རྣག་འཚལ་ལོ། །སྨད་རིགས་ཏེ་ཤིན་ཏུ་བསོད་ནམས་ཆུང་བ་འགས་ནི་རྣག་དང་ཕྱི་ས་དང་ཁྲག་ལ་སོགས་པ་མི་གཙང་བ་ཡང་མི་རྙེད་ན། བཟང་པོ་ལྟ་སྨོས་ཀྱང་ཅི་དགོས། འོན་ཀྱང་དེ་དག་ཕན་ཚུན་མཐོང་བ་ན། ཁྲོས་ཏེ་གཅིག་གིས་གཅིག་ལ་གདོང་དུ་འཚོག་ཅིང་ལག་ནས་ཐོ་བ་བྱུང་ནས། ཕན་ཚུན་བསྣུན་པས། མགྲིན་པ་ནས་ལྦ་བ་བྱུང་བ་སྨིན་པའི་རྣག་ཁོང་དུ་ཟགས་པ་རྣམས་ཟས་སུ་འཚལ་ལོ། །དེ་དག་གི་སྡུག་བསྔལ་གྱི་ཁྱད་པར་གཞན་བསྟན་པའི་ཕྱིར། འདི་དག་རྣམས་ལ་སོ་གའི་དུས་སུ་ནི། །ཟླ་བའང་ཚ་ལ་དགུན་ནི་ཉི་མའང་གྲང་། །ལྗོན་ཤིང་འབྲས་བུ་མེད་འགྱུར་འདི་དག་གིས། །བལྟས་པ་ཙམ་གྱིས་ཀླུང་ཡང་བསྐམ་པར་འགྱུར། །ཞེས་གསུངས་ཏེ། སྨད་རིགས་འདི་དག་རྣམས་ལ་ནི་སོ་གའི་དུས་སུ་ཟླ་བ་ཡང་ཚ་བའི་རྐྱེན་དུ་འགྱུར་ལ། དགུན་ནི་ཉི་མ་ཡང་གྲང་བའི་རྐྱེན་དུ་འགྱུར་བ་དེ་ལྟ་བུའི་ཚ་གྲང་གི་སྡུག་བསྔལ་མྱོང་ཞིང་དེ་དག་གིས་བལྟས་པ་ཙམ་གྱིས་ལྗོན་ཤིང་འབྲས་བུ་སྨིན་པ་ཕུན་སུམ་ཚོགས་པས་གང་ཞིང་ཡལ་ག་དུད་པ་རྣམས་ཀྱང་། ཡལ་ག་དང་འབྲས་བུ་མེད་ཅིང་སྐམ་པོར་སྣང་བར་འགྱུར་བ་དང་། ཡན་ལག་བརྒྱད་དང་ལྡན་པའི་ཆུ་ཀླུང་ཡང་བསྐམས་པ་དང་། མདག་མ་འབར་བས་གང་བ་དང་། སྲིན་བུ་དང་བཅས་པའི་མི་གཙང་བ་དུ་མས་གང་བ་ཉིད་དུ་སྣང་བར་འགྱུར་རོ། །དེ་དག་གིས་སྡུག་བསྔལ་དེ་ཡུན་ཇི་སྲིད་དུ་མྱོང་ཞེ་ན། བར་ཆད་མེད་པར་སྡུག་བསྔལ་བསྟེན་གྱུར་པ། །ཉེས་པར་སྤྱད་པའི་ལས་ཀྱི་ཞགས་པ་ནི། །སྲ་བས་བཅིངས་པའི་ལུས་ཅན་ཁ་ཅིག་ལོ། །ལྔ་སྟོང་དག་དང་ཁྲིར་ཡང་འཆི་མི་འགྱུར། །ཞེས་གསུངས་ཏེ། བར་ཆད་མེད་པ་སྟེ་རྒྱུན་ཆགས་སུ་སྡུག་བསྔལ་བསྟེན་པར་གྱུར་པའི་ལུས་ཅན་དེ་རྣམས་ནི། ཚེ་ཚད་རྫོགས་པར་ཐུབ་པ་ཁ་ཅིག་མི་ལོ་ལྔ་སྟོང་དང་། ཁྲིར་ཡང་ཟས་སྐོམ་སོགས་མི་འབྱོར་ཡང་འཆི་བར་མི་འགྱུར་ཏེ། ཉེས་སྤྱད་ཀྱི་ལས་ཀྱི་ཞགས་པ་སྲ་བས་བཅིངས་པའི་ཕྱིར་རོ། །སྡུག་བསྔལ་དེ་ལྟ་བུ་མྱོང་བའི་རྒྱུ་གང་ཞེ་ན། དེ་ལྟར་ཡི་དྭགས་རྣམས་ཀྱིས་སྣ་ཚོགས་པའི། །སྡུག་བསྔལ་རོ་གཅིག་ཐོབ་པ་གང་ལགས་པ། །དེ་ཡི་རྒྱུ་ནི་སྐྱེ་བོ་འཇུངས་དགའ་བ། །སེར་སྣ་འཕགས་མིན་ལགས་པར་སངས་རྒྱས་གསུངས། །སྔར་བཤད་པ་དེ་ལྟར་ཡི་དྭགས་རྣམས་ཀྱིས་བཀྲེས་སྐོམ་ལ་སོགས་པ་སྣ་ཚོགས་པའི་སྡུག་བསྔལ་མྱོང་བ་ཐམས་ཅད་ཀྱང་། སྡུག་བསྔལ་ཉིད་དུ་གཅིག་པས་རོ་གཅིག་སྟེ། དེ་ལྟ་བུ་ཐོབ་པ་གང་ལགས་པ་དེ་ཡི་རྒྱུ་ནི། སྐྱེ་བོ་འཇུངས་དགའ་བ་སྟེ་སེར་སྣ་གོམས་པར་བྱས་པ་ཡིན་ལ། དེ་ཡང་འཕགས་མིན་ཏེ་མི་དགེ་བ་སྟོབས་ལྡན་ལགས་པར་སངས་རྒྱས་གསུངས། ཇི་སྐད་དུ། སྡུད་པ་ལས། སེར་སྣ་ཅན་ནི་ཡི་དྭགས་གནས་སུ་སྐྱེ་བར་འགྱུར། །ཅི་སྟེ་མིར་སྐྱེས་ན་ཡང་དེ་ཚེ་དབུལ་པོར་འགྱུར། །ཅེས་གསུངས་པ་ལྟར་རོ། །

བཞི་པ་ལྷའི་སྡུག་བསྔལ་ནི། མཐོ་རིས་ན་ཡང་བདེ་ཆེན་དེ་དག་གི། འཆི་འཕོའི་སྡུག་བསྔལ་ཉིད་ནི་དེ་བས་ཆེ། །དེ་ལྟར་བསམས་ནས་ཡ་རབས་རྣམས་ཀྱིས་ནི། །ཟད་འགྱུར་མཐོ་རིས་སླད་དུ་སྲེད་མི་བགྱི། །ཞེས་གསུངས་ཏེ། མཐོ་རིས་ཏེ་འདོད་པའི་ལྷ་ན་ཡང་འདོད་པའི་ཡུལ་ཕུན་སུམ་ཚོགས་པ་སྤྱོད་པའི་བདེ་བ་ཆེན་པོ་ཡོད་མོད་ཀྱི། དེ་དག་གི་འཆི་འཕོ་བའི་དུས་ཀྱི་སྡུག་བསྔལ་ནི་བདེ་བ་དེ་བས་ཆེ་སྟེ། ཇི་སྐད་དུ། ཀྱི་ཧུད་ཤིང་རྟ་སྣ་ཚོགས་ཚལ། །ཀྱི་ཧུད་རྫིང་བུ་དལ་གྱིས་འབབ། །ཀྱི་ཧུད་སྡུག་བའི་རྣམ་ཤེས་ལྷ། །སྨྲེ་སྔགས་འདོན་ཅིང་ས་ལ་ལྟུང་། །ཞེས་བཤད་པ་ལྟར་རོ། །དེ་ལྟར་བསམས་ནས་ཡ་རབས་ཏེ་རྟོགས་ལྡན་རྣམས་ཀྱིས་མཐོ་རིས་ཀྱི་བདེ་བའི་སླད་དུ་ཡང་སྲེད་པར་མི་བགྱི་སྟེ། བདེ་བ་དེ་ཡང་ཟད་པར་འགྱུར་བས་སྙིང་པོ་མེད་པའི་ཕྱིར་རོ། །ལྷ་དག་རྫུས་སྐྱེས་ཡིན་པས་གནད་གཅོད་པའི་སྡུག་བསྔལ་ནི་མེད་ན། ཇི་ལྟར་དེ་དག་འཆི་བའི་ཚེ་སྡུག་བསྔལ་འབྱུང་ཞེ་ན། ལུས་ཀྱི་སྡུག་བསྔལ་མེད་ཀྱང་། འཆི་ལྟས་ཀྱིས་ཟིན་པ་ན་སེམས་ཀྱི་སྡུག་བསྔལ་ཤིན་ཏུ་ཆེན་པོ་འབྱུང་ངོ་ཞེས་བསྟན་པའི་ཕྱིར། ལུས་ཀྱི་ཁ་དོག་མི་སྡུག་འགྱུར་བ་དང་། །སྟན་ལ་མི་དགའ་མེ་ཏོག་ཕྲེང་རྙིང་དང་། །གོས་ལ་དྲི་མ་ཆགས་དང་ལུས་ལ་ནི། །སྔོན་ཆད་མེད་པའི་རྡུལ་འབྱུང་ཞེས་བགྱི་བ། །མཐོ་རིས་འཆི་འཕོ་སྦྲོན་བྱེད་འཆི་ལྟས་ལྔ། །མཐོ་རིས་གནས་པའི་ལྷ་རྣམས་ལ་འབྱུང་སྟེ། །ས་སྟེང་མི་རྣམས་འཆི་བར་འགྱུར་བ་དག །སྦྲོན་པར་བྱེད་པའི་འཆི་ལྟས་རྣམས་དང་འདྲ། །ཞེས་གསུངས་ཏེ། གང་གི་ཚེ་ལྷ་རྣམས་འཆི་བར་གྱུར་པ་དེའི་ཚེ། ལུས་ཀྱི་ཁ་དོག་མཛེས་པ་དག་ཉམས་ནས་མི་སྡུག་པར་འགྱུར་བ་དང་། རང་གི་སྟན་ལ་འདུག་པར་མི་དགའ་བ་དང་། རྒྱན་གྱི་མེ་ཏོག་གི་ཕྲེང་བ་རྣམས་རྙིང་པ་དང་། གོས་ལ་དྲི་མ་ཆགས་པ་དང་། ལུས་ལ་སྔོན་ཆད་རྡུལ་འབྱུང་བ་མེད་པ་ལས། དེའི་ཚེ་འབྱུང་བ་དང་ལྔ་ནི་གང་མཐོང་ན་ལྷ་རྣམས་ཡིད་མི་བདེ་བ་སྐྱེ་བར་འགྱུར་བའི་མཐོ་རིས་ལྷ་རྣམས་ཀྱི་འཆི་འཕོ་བ་སྦྲོན་པར་བྱེད་པའི་སྔ་ལྟས་སམ་རྟགས་ཡིན་ཏེ། དཔེར་ན་ས་སྟེང་མི་རྣམས་འཆི་བར་འགྱུར་བ་དག་སྦྲོན་པར་བྱེད་པའི་འཆི་ལྟས་སྣ་ཞོམ་པ་དང་། གཤིན་གྱི་དྲི་མ་འབྱུང་བ་ལ་སོགས་པ་དང་འདྲའོ། །འཆི་འཕོ་བའི་སྡུག་བསྔལ་འབྱུང་བ་འབའ་ཞིག་ཏུ་མ་ཟད་ཀྱི། ཤི་བའི་འོག་ཏུ་ངན་སོང་གི་སྡུག་བསྔལ་དག་ཀྱང་མྱོང་བར་འགྱུར་རོ་ཞེས་བསྟན་པའི་ཕྱིར། ལྷ་ཡི་འཇིག་རྟེན་དག་ནས་འཕོས་པ་ལ། །གལ་ཏེ་དགེ་བའི་ལྷག་མ་འགའ་མེད་ན། །དེ་ནས་དབང་མེད་དུད་འགྲོ་ཡི་དྭགས་དང་། །དམྱལ་བར་གནས་པ་གང་ཡང་རུང་བར་འགྱུར། །ཅེས་གསུངས་ཏེ། ལྷའི་འཇིག་རྟེན་ནས་ཤི་འཕོས་པ་རྣམས་ལ། གལ་ཏེ་མཐོ་རིས་སུ་སྐྱེ་འགྱུར་གྱི་དགེ་བའི་ལྷག་མ་འགའ་མེད་ན་དེ་ནས་མཐོ་རིས་སུ་གནས་པའི་དབང་མེད་པར་དུད་འགྲོ་དང་། ཡི་དྭགས་དང་དམྱལ་བ་རྣམས་ལས་གང་ཡང་རུང་བ་རྣམས་སུ་ལྟུང་ཞིང་སྡུག་བསྔལ་མྱོང་བར་འགྱུར་རོ། །

ལྔ་པ་ལྷ་མ་ཡིན་གྱི་སྡུག་བསྔལ་ནི། ལྷ་མིན་དག་ནའང་རང་བཞིན་གྱིས་ལྷ་ཡི། །དཔལ་ལ་སྡང་ཕྱིར་ཡིད་ཀྱི་སྡུག་བསྔལ་ཆེ། །དེ་དག་བློ་དང་ལྡན་ཡང་འགྲོ་བ་ཡི། །སྒྲིབ་པས་བདེན་པ་མཐོང་བ་མ་མཆིས་སོ། །ཞེས་གསུངས་ཏེ། ལྷ་མ་ཡིན་རྣམས་ནི་ང་རྒྱལ་ཆེ་བའི་ཕྱིར། རང་བཞིན་གྱིས་ང་རྒྱལ་ལས་བྱུང་བའི་ལྷའི་དཔལ་ལ་སྡང་བའི་ཕྱིར་མི་བཟོད་པས་བསྐྱེད་པའི་ཡིད་ཀྱི་སྡུག་བསྔལ་ཆེ་སྟེ། ཕྲག་དོག་ནི་ཡིད་ཤིན་ཏུ་གདུང་བར་བྱེད་པའི་ཕྱིར་རོ། །གཞན་ཡང་ལྷ་དང་གཡུལ་འགྱེད་པའི་ཚེ། ལུས་བཅད་པ་དང་དྲལ་བ་ལ་སོགས་པའི་སྡུག་བསྔལ་ཡོད་ཅིང་། དེ་དག་དགེ་སྡིག་ལ་རྣམ་པར་དཔྱོད་པའི་བློ་དང་ལྡན་པ་ཡིན་ཡང་བདེན་པ་མཐོང་བ་མ་མཆིས་ཏེ། འགྲོ་བའི་སྒྲིབ་པ་སྟེ་རྣམ་སྨིན་གྱི་སྒྲིབ་པ་ཅན་ཡིན་པའི་ཕྱིར་རོ། །འགྲེལ་པར། ལྷ་མ་ཡིན་མི་དགེ་བས་འཕངས་ཤིང་། དགེ་བས་རྫོགས་པར་བཤད་ཀྱང་། དེ་དག་ལྷའི་འགྲོ་བ་པ་ཡིན་པའི་ཕྱིར། འཕེན་བྱེད་དགེ་བས་འཕངས་པར་འཕགས་པ་ཐོགས་མེད་ཀྱིས་བཤད་དོ། །གསུམ་པ་དོན་བསྡུ་བ་ནི། དེ་ལྟར་འཁོར་བའི་ཉེས་པ་བཤད་ནས། དེ་ལ་མངོན་པར་མི་དགའ་བའི་འདུ་ཤེས་བསྒྲུབ་པའི་ཕྱིར། འཁོར་བ་དེ་འདྲ་ལགས་པས་ལྷ་མི་དང་། །དམྱལ་བ་ཡི་དྭགས་དུད་འགྲོ་རྣམས་དག་ཏུ། །སྐྱེ་བ་བཟང་པོ་མ་ལགས་སྐྱེ་བ་ནི། །གནོད་པ་དུ་མའི་སྣོད་གྱུར་ལགས་མཁྱེན་མཛོད། །ཅེས་གསུངས་ཏེ་གང་གི་ཕྱིར་འཁོར་བ་ནི། ཇི་སྐད་བཤད་པའི་ཉེས་པ་དེ་འདྲ་བ་དང་ལྡན་པ་ལགས་པས། ལྷ་མི་ལ་སོགས་པའི་འགྲོ་བ་དག་ཏུ་སྐྱེ་བ་བཟང་པོ་མ་ལགས་པ་སྐྱེ་བ་ནི་ཉེ་དུའི་གནོད་པ་ལ་སོགས་པ་གནོད་པ་དུ་མའི་སྣོད་དམ་རྟེན་དུ་གྱུར་པར་མཁྱེན་པར་མཛོད་ཅིག

མྱང་འདས་ཕན་ཡོན་བསམ་ནས་ལམ་ལ་འཇུག་པ།

གསུམ་པ་མྱང་འདས་ཀྱི་ཡོན་ཏན་བསམས་ནས་ལམ་བསྒྲུབ་པ་ལ་གཉིས་ལས། དང་པོ་ཐེག་པ་ཐུན་མོང་གི་དབང་དུ་བྱས་པ་ལ་ཡང་གཉིས་ཀྱི། དང་པོ་ཕན་ཡོན་གྱི་མྱང་འདས་ཐོབ་བྱ་ཡིན་པར་བསྟན་པ་ནི། དེ་ལྟར་འཇིག་རྟེན་ལ་མངོན་པར་མི་དགའ་བའི་བློ་བསྐྱེད་ནས་མྱང་འདས་བསྒྲུབ་པའི་ཕྱིར། མགོའམ་གོས་ལ་གློ་བུར་མེ་ཤོར་ན། །དེ་དག་ཕྱིར་བཟློག་བགྱི་བ་བཏང་ནས་ཀྱང་། །ཡང་སྲིད་མེད་པར་བགྱི་སླད་འབད་འཚལ་ཏེ། །དེ་བས་ཆེས་མཆོག་དགོས་པ་གཞན་མ་མཆིས། །ཞེས་གསུངས་ཏེ། རང་གི་མགོའམ་གོས་ལ་གློ་བུར་དུ་མེ་ཤོར་ན། ལུས་སྲོག་འཇོམས་པས་མྱུར་དུ་བཟློག་པར་བྱ་བ་ཡིན་མོད། འཁོར་བའི་ཉེས་དམིགས་ཤེས་པའི་མཁས་པས་ནི། དེ་དག་ཕྱིར་བཟློག་བགྱི་བ་བཏང་ནས་ལུས་སྲོག་ལ་མི་ལྟ་བའི་བརྩོན་འགྲུས་ཀྱིས་ཡང་སྲིད་མེད་པར་བགྱི་བའི་སླད་དུ་འབད་འཚལ་ཏེ། ཡང་སྲིད་མེད་པ་དེ་བས་ཆེས་མཆོག་ཏུ་གྱུར་པའི་སྐྱེས་བུའི་དགོས་པ་གཞན་མ་མཆིས་པའི་ཕྱིར་རོ། །ཡང་སྲིད་མེད་པ་དེ་ཇི་ལྟར་ཐོབ་ཅེ་ན། བསླབ་པ་རིན་པོ་ཆེ་གསུམ་གྱིས་འཐོབ་བོ་ཞེས་བསྟན་པའི་ཕྱིར། ཚུལ་ཁྲིམས་དག་དང་ཤེས་རབ་བསམ་གཏན་གྱིས། །མྱ་ངན་འདས་ཞི་དུལ་བ་དྲི་མེད་པའི། །གོ་འཕང་མི་རྒ་མི་འཆི་ཟད་མི་འཚལ། །ས་ཆུ་མེ་རླུང་ཉི་ཟླ་བྲལ་ཐོབ་མཛོད། །ཅེས་གསུངས་ཏེ། ཚུལ་ཁྲིམས་དང་ཤེས་རབ་དང་བསམ་གཏན་ཏེ་སྔར་བཤད་པའི་བསླབ་པ་གསུམ་གྱིས་མྱ་ངན་ལས་འདས་པ་ཐོབ་པར་མཛོད་ཅིག་ཅེས་སྦྲེལ་ལོ། །མྱ་ངན་ལས་འདས་པ་ནི་གཉིས་ཏེ། ཕུང་པོ་ལྷག་མ་མེད་པ་དང་། ལྷག་མ་དང་བཅས་པའོ། །དེ་ལ་དང་པོ་ནི། ཟག་བཅས་ཀྱི་ཕུང་པོ་མ་ལུས་པ་འགགས་པའི་ཕྱིར་ཞི་བ། གཉིས་པ་ནི། དབང་པོ་དུལ་བ་གཉི་ག་ཡང་ཉོན་མོངས་པའི་རྙོག་པ་མེད་པས་དྲི་མ་མེད་པ་ན་ཚོད་འགྱུར་བ་མེད་པས་མི་རྒ་བ། སྲོག་འགྱུར་བ་མེད་པས་མི་འཆི་བ། ནམ་ཡང་ཟད་པ་མེད་པས་ཟད་མི་འཚལ་བའོ། །ཡང་ཕྱི་རོལ་པ་ཁ་ཅིག ཁ་བ་དུང་དང་རྒྱ་སྤོས་དང་། །བ་ཞོ་བ་མོ་མུ་ཏིག་མདོག། གདུགས་དཀར་བཟུང་བའི་དབྱིབས་འདྲ་བ། །ཐར་པ་ཡིན་པར་རྒྱལ་བས་བཤད། །ཅེས་སོགས་ཐར་པ་གཟུགས་ཅན་དུ་འདོད་པ་དག་ལས་ཁྱད་པར་དུ་བྱ་བའི་ཕྱིར། ས་ཆུ་མེ་རླུང་ཉི་ཟླ་བྲལ་ཐོབ་མཛོད། །ཅེས་གསུངས་སོ། །

གཉིས་པ་དེའི་རྒྱུ་ཚོགས་བསྒྲུབ་པར་གདམས་པ་ལ་བདུན་གྱི། དང་པོ་བྱང་ཆུབ་ཀྱི་ཡན་ལག་བདུན་ནི། ད་ནི་གང་མངོན་དུ་འགྱུར་ན། མྱ་ངན་ལས་འདས་པ་ཐོབ་པར་འགྱུར་བའི་ཆོས་དེ་བསྟན་པའི་ཕྱིར། དྲན་དང་ཆོས་རབ་འབྱེད་དང་བརྩོན་འགྲུས་དང་། །དགའ་དང་ཤིན་ཏུ་སྦྱངས་དང་ཏིང་འཛིན་དང་། །བཏང་སྙོམས་འདི་བདུན་བྱང་ཆུབ་ཡན་ལག་སྟེ། །མྱ་ངན་འདས་ཐོབ་བགྱིད་པའི་དགེ་ཚོགས་ལགས། །ཞེས་གསུངས་ཏེ། མཐོང་ལམ་གྱི་གནས་སྐབས་ཀྱི་བདེན་པའི་དམིགས་པ་མ་བརྗེད་པའི་དྲན་པ་དང་། ཆོས་རབ་ཏུ་རྣམ་པར་འབྱེད་པའི་ཤེས་རབ་དང་། དགེ་བ་ལ་སྤྲོ་བའི་བརྩོན་འགྲུས་དང་། དམིགས་པ་དེ་ཉིད་ལ་ཡིད་བདེ་བའི་དགའ་བ་དང་། ལུས་སེམས་ལས་སུ་རུང་བའི་ཤིན་ཏུ་སྦྱངས་པ་དང་། ཏིང་ངེ་འཛིན་དང་། བྱིང་རྒོད་མེད་པར་རྣལ་དུ་འདུག་པའི་བཏང་སྙོམས་དང་། འདི་བདུན་ནི་བྱང་ཆུབ་ཀྱི་ཡན་ལག་ཅེས་བྱ་སྟེ། མཐོང་ལམ་བྱང་ཆུབ་ཀྱི་ཡན་ལག་ཡིན་པའི་ཕྱིར་རོ། །ཇི་ལྟར་མཐོང་ལམ་བྱང་ཆུབ་ཀྱི་ཡན་ལག་ཡིན་ཞེ་ན། མདོ་སྡེ་རྒྱན་དུ། རང་བཞིན་ཡན་ལག་གནས་ཡན་ལག །གསུམ་པ་ངེས་འབྱུང་ཡན་ལག་སྟེ། །བཞི་པ་ཕན་ཡོན་ཡན་ལག་ཡིན། །རྣམ་གསུམ་ཉོན་མོངས་མེད་ཡན་ལག །ཅེས་བཤད་པ་ལྟར། དྲན་པ་ནི། མཐོང་ལམ་བྱང་ཆུབ་ཀྱི་གནས་ཀྱི་ཡན་ལག་ཡིན་ཏེ། དྲན་པ་ཉེ་བར་གནས་པ་ནི། དགེ་བའི་ཆོས་རྣམས་ཡིད་ཀྱི་མངོན་པར་བརྗོད་པའི་སྒོ་ནས་མི་ཉམས་པར་བྱེད་པའི་ཕྱིར་རོ། །དེ་ཡང་ཤེས་བྱ་མ་རྟོགས་པ་རྟོགས་པར་བྱེད་པས་འཁོར་ལོ་རིན་པོ་ཆེས་གཡུལ་མ་ཕེབས་པ་ཕེབས་པར་བྱེད་པ་དང་འདྲ་སྟེ། རྒྱན་དུ། ཤེས་བྱ་མ་རྒྱལ་རྒྱལ་བྱའི་ཕྱིར། །དྲན་པ་ལ་ནི་ཀུན་ཏུ་སྤྱོད། །ཅེས་གསུངས་སོ། །ཤེས་རབ་ནི་ངོ་བོ་ཉིད་ཀྱི་ཡན་ལག་ཡིན་ཏེ། མཐོང་ལམ་བྱང་ཆུབ་ནི། ཤེས་རབ་ཀྱི་རང་བཞིན་ཡིན་པའི་ཕྱིར་རོ། །དེ་ཡང་གང་ཟག་དང་ཆོས་སུ་འཛིན་པའི་རྟོག་པ་འཇོམས་པས། གླང་པོ་ཆེས་ཕྱིར་རྒོལ་བ་འཇོམས་པ་དང་འདྲ་སྟེ། འདི་ཡིས་རྣལ་འབྱེད་རྟོག་པ་ཡི། །མཚན་མ་ཐམས་ཅད་འཇོགས་པར་བྱེད། །ཅེས་པ་ལྟར་རོ། །བརྩོན་འགྲུས་ནི། ངེས་པར་འབྱུང་བའི་ཡན་ལག་སྟེ། འདིས་བགྲོད་བྱ་ཇི་སྲིད་པར་འགྲོ་བ་བྱེད་པའི་ཕྱིར་རོ། །དེས་མངོན་པར་ཤེས་པ་མྱུར་དུ་སྒྲུབ་པས། རྟ་མཆོག་གིས་མྱུར་དུ་ུས་གཞི་རྒྱ་མཚོའི་མཐར་ཐུག་པར་འགྲོ་བ་དང་འདྲ་སྟེ། འདི་ཡི་བརྩོན་འགྲུས་མ་ལུས་པ། །མྱུར་དུ་རྟོགས་པ་བྱ་ཕྱིར་འཇུག ། ཅེས་བཤད་པ་ལྟར་རོ། །དགའ་བ་ནི། ཕན་ཡོན་གྱི་ཡན་ལག་སྟེ། སེམས་རྒྱུད་སིམ་པར་བྱེད་པའི་ཕྱིར་རོ། །དེ་ནི་ནོར་བུའི་སྣང་བའི་ཁྱད་པར་གྱིས། རྒྱལ་པོ་དགའ་བར་བྱེད་པ་དང་འདྲ་སྟེ། ཆོས་ཀྱི་སྣང་བ་འཕེལ་བའི་ཕྱིར། །དགའ་བས་རྟག་ཏུ་རྒྱས་པར་འགྱུར། །ཅེས་པ་ལྟར་རོ། །ཤིན་ཏུ་སྦྱངས་པ་ནི། གང་གིས་ཉོན་མོངས་པར་མི་འགྱུར་བར་བྱེད་པའི་ཡན་ལག་སྟེ། དེས་ཉོན་མོངས་པའི་རྒྱུ་གནས་ངན་ལེན་འཇིག་པར་བྱེད་པའི་ཕྱིར་རོ། །དེ་ནི་བཙུན་མོས་རྒྱལ་པོའི་བདེ་བ་མྱོང་བར་བྱེད་པ་དང་འདྲ་སྟེ། སྒྲིབ་པ་ཀུན་ལས་ཐར་པའི་ཕྱིར། །ཤིན་ཏུ་སྦྱངས་པའི་བདེ་བ་ཐོབ། །ཅེས་པ་ལྟར་རོ། །ཏིང་ངེ་འཛིན་ནི། གང་དུ་ཀུན་ནས་ཉོན་མོངས་པར་མི་འགྱུར་བའི་ཡན་ལག་སྟེ། དེ་ལ་གནས་པ་ནི། གནས་འགྱུར་བའི་ཕྱིར་རོ། །འདིས་འདོད་པའི་དོན་ཀུན་སྒྲུབ་པའི་ཕྱིར། ཁྱིམ་བདག་ལྟ་བུ་སྟེ། ཏིང་ངེ་འཛིན་ལ་བསམས་པའི་དོན། །འབྱོར་པ་ཉེ་བར་སྐྱེ་བར་འགྱུར། །ཅེས་པ་ལྟར་རོ། །བཏང་སྙོམས་ནི། ཀུན་ནས་ཉོན་མོངས་པ་མེད་པའི་ངོ་བོ་ཡིན་ཏེ། བརྣབ་སེམས་དང་ཡིད་མི་བདེ་བ་དང་བྲལ་བའི་ཉོན་མོངས་ཅན་མ་ཡིན་པའི་གནས་སྐབས་ཀྱི་ངོ་བོ་ཡིན་པའི་ཕྱིར་རོ། །དེ་ནི་བློན་པོས་དཔུང་གི་ཚོགས་ཡན་ལག་བཞི་འདོད་གནས་བྱེད་པ་དང་འདྲ་སྟེ། བཏང་སྙོམས་ཀྱིས་ནི་ཐམས་ཅད་དུ། །འདི་ནི་ཇི་ལྟར་འདོད་བཞིན་གནས། །ཞེས་གསུངས་པ་ལྟར་རོ། །དེ་བས་ན་དེ་རྣམས་ནི་མྱ་ངན་ལས་འདས་པ་ཐོབ་པར་བགྱིད་པའི་རྒྱུ་དགེ་ཚོགས་ལགས་ཏེ། བསྒྲུབ་པར་བགྱིའོ། །

གཉིས་པ་ཞི་གནས་དང་ལྷག་མཐོང་ནི། ཞི་གནས་དང་ལྷག་མཐོང་ཟུང་དུ་འབྲེལ་བས་མྱ་ངན་ལས་འདས་པ་ཐོབ་བོ་ཞེས་བསྟན་པའི་ཕྱིར། ཤེས་རབ་མེད་པར་བསམ་གཏན་ཡོད་མིན་ཏེ། །བསམ་གཏན་མེད་པར་ཡང་ནི་ཤེས་རབ་མེད། །གང་ལ་དེ་གཉིས་ཡོད་པས་སྲིད་པ་ཡི། །རྒྱ་མཚོ་གནག་རྗེས་ལྟ་བུར་འཚལ་བར་བགྱི། །ཞེས་གསུངས་ཏེ། ཆོས་རྣམས་ཀྱི་རང་དང་སྤྱིའི་མཚན་ཉིད་ལེགས་པར་ཤེས་པའི་ཤེས་རབ་མེད་པར་བསམ་གཏན་སྐྱེ་བ་ཡོད་པ་མ་ཡིན་ཏེ། ཤེས་རབ་ཀྱིས་ཤེས་བྱའི་གནས་ལ་ཐེ་ཚོམ་མེད་པར་སྒྲོ་འདོགས་ཆོད་པ་ན། དམིགས་པ་ལ་བདེ་བར་སེམས་མཉམ་པར་འཇོག་པའི་ཕྱིར་རོ། །བསམ་གཏན་མེད་པར་ཡང་ནི་ཡང་དག་པ་ཇི་ལྟ་བ་བཞིན་ཤེས་པའི་ཤེས་རབ་མེད་དེ། སེམས་མཉམ་པར་བཞག་ན་ཡང་དག་པ་ཇི་ལྟ་བ་བཞིན་དུ་ཤེས་ཞེས་གསུངས་པའི་ཕྱིར་རོ། །རྣལ་འབྱོར་པ་གང་ལ་དམིགས་པ་ལ་སེམས་རྩེ་གཅིག་པའི་བསམ་གཏན་དང་། ཡང་དག་པ་ཇི་ལྟ་བ་བཞིན་དུ་ཤེས་པའི་ཤེས་རབ་དེ་གཉི་ག་ཡོད་པ་དེ་ཡིས་སྲིད་པའི་རྒྱ་མཚོ་གནག་རྗེས་ཀྱི་ཆུ་ལྟ་བུར་འཚལ་བར་བགྱི་སྟེ། མྱུར་དུ་སྐམ་པའམ་རྒལ་བར་ནུས་པའི་ཕྱིར་རོ། །ཤེས་རབ་ནི་འདིར་གང་ཟག་དང་ཆོས་ཀྱི་བདག་མེད་རྟོགས་པ་ལ་འདོད་དེ། གཞན་གྱིས་སྲིད་པའི་རྩ་བ་གཅོད་མི་ནུས་པའི་ཕྱིར་རོ། །བསམ་གཏན་མེད་པའི་ཤེས་རབ་ནི། མི་བརྟན་པའི་ཕྱིར་ཉོན་མོངས་པ་དྲུངས་འབྱིན་མི་ནུས་ལ། ཤེས་རབ་མེད་པར་ཡང་བསམ་གཏན་གྱིས་ཉོན་མོངས་པ་མངོན་འགྱུར་མགོ་གནོན་པ་ཙམ་བྱེད་ཀྱི། ས་བོན་དྲུངས་འབྱིན་པར་མི་ནུས་པས། དེའི་ཕྱིར་ཞི་གནས་དང་ལྷག་མཐོང་ཟུང་དུ་འབྲེལ་བའི་ལམ་གྱིས་མྱ་ངན་ལས་འདས་པ་ཐོབ་པ་ཡིན་ནོ། །དེ་དག་ལ་ལྷག་མཐོང་གཙོ་ཆེའོ། །ཞི་གནས་མི་གཙོ་སྟེ། ཇི་སྐད་དུ། བསྟོད་པ་བྱེད་པ་དག་གིས། ཁྱོད་ཀྱི་བསྟན་ལ་མི་ཕྱོགས་པའི། །སྐྱེ་བོ་མ་རིག་གིས་ལྡོངས་པ། །སྲིད་རྩེའི་བར་དུ་སོང་ནས་ཀྱང་། །སྡུག་བསྔལ་ཡང་འབྱུང་སྲིད་པ་སྒྲུབ། །ཅེས་དང་། ཁྱོད་ཀྱི་བསྟན་པའི་རྗེས་འབྲང་བ། །བསམ་གཏན་དངོས་གཞི་མ་ཐོབ་ཀྱང་། །བདུད་ཀྱི་མིག་རས་བཙའ་བཞིན་དུ། །སྲིད་པ་རྣམས་ནི་བཟློག་པར་བགྱིད། །ཅེས་གསུངས་པ་ལྟ་བུའོ། །དེ་བས་ན་ཐར་པ་འདོད་པ་རྣམས་ཀྱིས་སེམས་ལས་སུ་རུང་བའི་ཞི་གནས་ཙམ་ཐོག་མར་བསྒྲུབས་ནས། དེའི་འོག་ཏུ་དྲན་པ་ཉེ་བར་བཞག་པ་ནས་བཟུངས་ཏེ། སོ་སོར་རྟོག་པའི་ཤེས་རབ་ཀྱིས་བདག་མེད་པ་རྣམ་པ་གཉིས་སྒོམ་པའི་རྣལ་འབྱོར་ལ་བརྩོན་པར་བྱའོ། །སོ་སོར་རྟོག་པའི་ཤེས་རབ་དང་བྲལ་བའི་སེམས་གནས་པ་ཙམ་བསྒོམས་པས་ནི། འཇིག་རྟེན་པའི་ཆགས་བྲལ་ཡང་མི་ཐོབ་ན། ཐར་པ་ལྟ་ཅི་སྨོས།

གསུམ་པ་བསམ་བྱ་མ་ཡིན་པའི་གནས་སྤངས་ཏེ། རྟེན་འབྲེལ་རྟོགས་པར་བྱ་བ་ནི། མྱ་ངན་ལས་འདས་པའི་ལམ་ཡང་དག་པར་ལྟ་བའི་གེགས་སུ་གྱུར་པ་བསམ་བྱ་མ་ཡིན་པ་སེམས་པ་བཟློག་པའི་ཕྱིར། ལུང་མ་བསྟན་པ་བཅུ་བཞི་འཇིག་རྟེན་ན། །ཉི་མའི་གཉེན་གྱིས་རབ་གསུངས་གང་ལགས་པ། །དེ་དག་རྣམས་ལ་བསམ་པར་མི་བགྱི་སྟེ། །དེ་ཡིས་བློ་ནི་ཞི་བར་བགྱིད་མ་ལགས། །ཞེས་གསུངས་ཏེ། ལུང་མ་བསྟན་པའི་ལྟ་བ་བཅུ་བཞི་ཉི་མའི་གཉེན་ཏེ། སངས་རྒྱས་བཅོམ་ལྡན་འདས་ཀྱིས་ལུང་རིང་མོ་ནས་གསུངས་པ་འདི་ལྟ་སྟེ། བདག་དང་འཇིག་རྟེན་རྟག་མི་རྟག གཉི་ག་ཡིན་གཉི་ག་མ་ཡིན། ཅེས་པ་སྔོན་གྱི་མཐའ་ལ་བརྟེན་པ་བཞི་དང་། བདག་དང་འཇིག་རྟེན་མཐའ་དང་ལྡན་མི་ལྡན། གཉི་ག་ཡིན་གཉི་ག་མ་ཡིན་ཅེས་པ་ཕྱི་མའི་མཐའ་ལ་བརྟེན་པ་བཞི་དང་། དེ་བཞིན་གཤེགས་པ་གྲོངས་ཕན་ཆད་འབྱུང་མི་འབྱུང་། གཉི་ག་ཡིན་གཉི་ག་མ་ཡིན་ཅེས་མྱ་ངན་ལས་འདས་པ་ལ་བརྟེན་པ་བཞི་དང་། ལུས་དེ་སྲོག་ཀྱང་དེ་ཞེས་པ་དང་། ལུས་ཀྱང་གཞན་སྲོག་ཀྱང་གཞན་ཞེས་པ་ལུས་སྲོག་ལ་བརྟེན་པ་གཉིས་སོ། །དེ་ལ་སྲོག་ནི་བདག་གི་རྣམ་གྲངས་སོ། །ཅིའི་ཕྱིར་ལུང་མ་བསྟན་པ་ཞེས་བྱ་ཞེ་ན། དོན་འདི་དག་ཕྱི་རོལ་པ་འགའ་ཞིག་གིས། དེ་བཞིན་གཤེགས་པ་ལ་ཞུས་པ་ལ། བདག་རྟག་པ་ལས་བརྩམས་ཏེ་འདྲི་བར་མཁྱེན་ནས། རྟག་པའམ་མི་རྟག་པ་སོགས་སུ་ལུང་བསྟན་པ་ན། ཁྱད་གཞི་མེད་པར་ཁྱད་པར་གྱི་ཆོས་ལ་དཔྱོད་པ་མི་འཐད་པར་དགོངས་ཤིང་། ཁྱད་གཞི་བདག་མེད་དོ་ཞེས་བཀག་ན་དོན་དུ་མི་འགྱུར་བར་དགོངས་ནས། ལུང་མི་སྟོན་པ་དེའི་ཕྱིར་ལུང་དུ་མི་སྟོན་པ་ཞེས་བྱའོ། །ཡང་ན་བདག་ནི་ཕུང་པོ་ལ་བརྟེན་ནས་བཏགས་པའི་གང་ཟག་གོ འཇིག་རྟེན་ནི་ཉེ་བར་ལེན་པའི་ཕུང་པོ་ལྔའོ། །དེ་དག་ནི་རྟེན་ཅིང་འབྲེལ་བར་འབྱུང་བ་ཡིན་པའི་ཕྱིར་རང་བཞིན་མེད་པ་ཡིན་ལ། དེའི་ཕྱིར་རྟག་མི་རྟག་སོགས་སུ་མ་གྲུབ་སྟེ། ཇི་སྐད་དུ། རྟེན་ཅིང་འབྲེལ་བར་འབྱུང་བ་གང་། །དེ་ནི་ངོ་བོ་ཉིད་ཀྱིས་ཞི། །ཞེས་བཤད་པ་ལྟར་རོ། །དེ་བས་ན་དེ་དག་རྟག་མི་རྟག་སོགས་སུ་ལུང་བསྟན་པར་བྱ་བ་མ་ཡིན་ལ། ཟབ་མོའི་དོན་གྱི་སྣོད་མ་ཡིན་པར་དགོངས་ནས། རྟེན་འབྲེལ་རང་བཞིན་མེད་པར་ཡང་མ་གསུངས་པས། དེའི་ཕྱིར་ལུང་དུ་མ་བསྟན་པ་ཞེས་པ་སྟེ། ཇི་སྐད་དུ། རིན་ཆེན་ཕྲེང་བར། འཇིག་རྟེན་མཐའ་དང་ལྡན་ནམ་ཞེས། །ཞུས་ན་རྒྱལ་བ་མི་གསུང་བཞུགས། །གང་ཕྱིར་དེ་ལྟར་ཟབ་པའི་ཆོས། །སྣོད་མིན་འགྲོ་ལ་མི་གསུང་བ། །དེ་ཉིད་ཕྱིར་ན་མཁས་རྣམས་ཀྱིས། །ཀུན་མཁྱེན་ཐམས་ཅད་མཁྱེན་པར་ཤེས། །ཞེས་གསུངས་སོ། །དེ་ལྟ་བུའི་ལྟ་བ་དེ་དག་ལ་བསམ་པར་མི་བགྱི་སྟེ། གང་གི་ཕྱིར་བསམ་པར་ནུས་ཤིང་། བསམས་ན་ཕན་ཡོན་ཡོད་པ་དེ་ནི་བསམ་པར་རིགས་པ་ཡིན་ན། འདི་དག་ལ་ནི་ཁྱད་གཞི་མེད་པའི་ཕྱིར། བསམ་པར་མི་ནུས་ལ། བསམས་ན་ལྟ་བ་ངན་པའི་སྦྲུལ་གྱིས་ཟིན་ནས། ཉོན་མོངས་པའི་དུག་འཕེལ་བར་འགྱུར་བའི་ཕྱིར། དེ་ལ་བསམས་པ་དེ་ཡིས་བློ་ཞི་བར་བགྱིད་པ་མ་ལགས་སོ། །བསམ་པར་ནུས་ཤིང་བསམས་ན་ཞི་བ་ཐོབ་པའི་ཕན་ཡོན་དང་བཅས་པ་ནི། རྟེན་ཅིང་འབྲེལ་བར་འབྱུང་བ་ཡིན་ནོ། །ཞེས་བསྟན་པའི་ཕྱིར། མ་རིག་པ་ལས་ལས་ཏེ་དེ་ལས་ནི། །རྣམ་ཤེས་དེ་ལས་མིང་དང་གཟུགས་རབ་འབྱུང་། །དེ་ལས་སྐྱེ་མཆེད་དྲུག་སྟེ་དེ་དག་ལས། །རེག་པ་ཀུན་ཏུ་འབྱུང་བར་ཐུབ་པས་གསུངས། །རེག་པ་ལས་ནི་ཚོར་བ་ཀུན་འབྱུང་སྟེ། །ཚོར་བའི་གཞི་ལས་སྲེད་པ་འབྱུང་བར་འགྱུར། །སྲེད་ལས་ལེན་པ་སྐྱེ་བར་འགྱུར་བ་སྟེ། །དེ་ལས་སྲིད་པ་སྲིད་ལས་སྐྱེ་བ་ལགས། །སྐྱེ་བ་ཡོད་ན་མྱ་ངན་ན་རྒ་དང་། །འདོད་པས་འཕོངས་དང་འཆི་བས་འཇིགས་སོགས་ཀྱི། །སྡུག་བསྔལ་ཕུང་པོ་ཤིན་ཏུ་ཆེ་འབྱུང་སྟ། །སྐྱེ་བ་འགགས་པས་འདི་ཀུན་འགག་པར་འགྱུར། །ཅེས་གསུངས་ཏེ། ཐུབ་པ་བཅོམ་ལྡན་འདས་ཀྱིས་རྟེན་འབྲེལ་གྱི་མདོ་ལས་དགེ་སློང་དག་འདི་ཡོད་ན་འདི་འབྱུང་། འདི་སྐྱེས་པའི་ཕྱིར་འདི་སྐྱེ། འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་ཅེས་བྱ་བ་ནས། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་སྟེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པ་འདི་འབྱུང་བར་འགྱུར་རོ། །ཞེས་དང་། དེ་བཞིན་དུ་མ་རིག་པ་འགགས་པས་འདུ་བྱེད་འགག་པ་ན། སྐྱེ་བ་འགགས་པས་རྒ་ཤི་དང་མྱ་ངན་དང་སྨྲེ་སྔགས་འདོན་པ་དང་། ཡིད་མི་བདེ་བ་དང་འཁྲུག་པ་རྣམས་འགག་སྟེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པ་འདི་འགག་པར་འགྱུར་རོ། །ཞེས་སོགས་གསུངས་པ་རྣམས་འདིར་སྟོན་ཏོ། །དེ་ལ་ཕུང་པོ་ལ་བདག་དང་བདག་གིར་ལྟ་བའི་མ་རིག་པ་ལས་བསོད་ནམས་དང་། བསོད་ནམས་མ་ཡིན་པ་དང་། མི་གཡོ་བའི་ལས་རྣམས་འབྱུང་སྟེ། ལས་དེ་ལས་ནི་ལས་ཀྱི་བག་ཆགས་ཅན་གྱི་སྐྱེ་བ་ལེན་པར་བྱེད་པའི་རྣམ་པར་ཤེས་པ་སྐྱེ་ལ། རྣམ་ཤེས་དེ་ལས་ནུར་ནུར་པོ་ལ་སོགས་པའི་གནས་སྐབས་ཀྱི་ཕུང་པོ་ལྔའི་རང་བཞིན་གྱི་མིང་དང་གཟུགས་རབ་ཏུ་འབྱུང་སྟེ། དེ་ལས་མིང་ནི། ཚོར་བ་ལ་སོགས་པའི་ཕུང་པོ་བཞི་ཡིན་ལ། གཟུགས་ནི། དེ་དང་ལྷན་ཅིག་པའི་འབྱུང་བ་དང་འབྱུང་བ་ལས་གྱུར་པ་རྣམས་སོ། །མིང་གཟུགས་དེ་འཕེལ་བ་ལས་མིག་ལ་སོགས་པ་ནང་གི་སྐྱེ་མཆེད་དྲུག་འབྱུང་སྟེ། སྐྱེ་མཆེད་དྲུག་པོ་དེ་དག་ལས་ཡུལ་དབང་རྣམ་ཤེས་གསུམ་འདུས་པའི་རེག་པ་ཀུན་ཏུ་འབྱུང་བར་འགྱུར་རོ། །རེག་པ་ལས་ནི། བདེ་སྡུག་གི་ཚོར་བ་ཀུན་ཏུ་འབྱུང་བར་འགྱུར་ལ། ཚོར་བའི་གཞི་ལས་བདེ་བ་ཐོབ་འདོད་དང་། སྡུག་བསྔལ་འདོར་འདོད་ཀྱི་སྲེད་པ་འབྱུང་བར་འགྱུར་རོ། །སྲེད་པ་ལས་ནི། བདེ་སྡུག་ལ་བླང་དོར་རྩོམ་པར་བྱེད་པའི་སྲེད་པ་ཤས་ཆེར་འཕེལ་བ་ལེན་པ་སྐྱེ་བར་འགྱུར་བ་སྟེ། དེ་ལས་ནི། དེས་གསོས་བཏབ་པ་ལས་ཀྱི་བག་ཆགས་ཡང་སྲིད་ལེན་པ་ལ་ནུས་པ་མཐུ་ཅན་དུ་གྱུར་པའི་སྲིད་པ་འབྱུང་བར་འགྱུར་རོ། །སྲིད་པ་དེ་ལས་ཕྱི་མའི་སྐྱེ་བ་འབྱུང་ལ། སྐྱེ་བ་ཡོད་ན། ཁམས་འགྱུར་བའི་ན་བ་དང་། ན་ཚོད་འགྱུར་བའི་རྒ་བ་དང་། སྲོག་འགྱུར་བའི་འཆི་བ་དང་། ལུས་སེམས་གདུང་བར་བྱེད་པའི་མྱ་ངན་དང་། ཟས་གོས་སོགས་འདོད་པས་འཕོངས་པ་དང་སོགས་ཀྱིས་བསྡུས་པ་སྨྲེ་སྔགས་འདོན་པ་དང་། ཡིད་མི་བདེ་བ་སོགས་སྡུག་བསྔལ་གྱི་ཕུང་པོ་ཤིན་ཏུ་ཆེན་པོ་བདག་དང་བདག་གི་བ་དང་བྲལ་བ་འདི་འབའ་ཞིག་འབྱུང་སྟེ། མ་རིག་པ་འགགས་པས་འདུ་བྱེད་འགག་པ་ནས། སྐྱེ་བ་འགགས་པས་རྒ་ཤི་སོགས་སྡུག་བསྔལ་གྱི་ཕུང་པོ་ཆེན་པོ་འདི་ཀུན་འགག་པར་འགྱུར་རོ། །

ཡན་ལག་བཅུ་གཉིས་པོ་འདི་དག་དུས་ཇི་སྲིད་ཅིག་ལ་རྫོགས་ཤེ་ན། ཚེ་གསུམ་ལ་རྫོགས་ཀྱི་མང་ཉུང་དུ་མ་ཡིན་ཏེ། འདི་ལྟར་མ་རིག་པ་དང་འདུ་བྱེད་དང་རྣམ་ཤེས་དག་ནི། སྔོན་གྱི་སྐྱེ་བ་ལ་ཡོངས་སུ་རྫོགས་ཏེ། དེ་དག་ནི་སྐྱེ་བ་འཕེན་བྱེད་ཡིན་པའི་ཕྱིར་རོ། །མིང་གཟུགས་ནས་ཚོར་བའི་བར་ནི་ཚེ་བར་པ་ལ་རྫོགས་ཏེ། དེ་ནི་རྣམ་སྨིན་གྱི་རང་བཞིན་ཡིན་པའི་ཕྱིར་རོ། །སྲེད་པ་དང་ལེན་པ་དང་སྲིད་པ་གསུམ་ཡང་བར་པ་ལ་རྫོགས་ཏེ། རྣམ་སྨིན་དེ་དག་གི་རྐྱེན་ལས་བྱུང་བའི་ཕྱིར་རོ། །སྐྱེ་བ་དང་རྒ་ཤི་ནི་ཚེ་ཕྱི་མ་ལ་རྫོགས་ཏེ། ཚེ་འདིའི་ཐ་མ་སྲིད་པ་ཡིན་ལ། དེའི་རྐྱེན་ལས་སྐྱེ་བ་འགྲུབ་པའི་ཕྱིར་རོ། །སྐྱེ་བའི་རྐྱེན་ལས་ཀྱང་རྒ་ཤི་འབྱུང་བའི་ཕྱིར་རོ། །དེ་ལ་སྐྱེ་བ་དང་པོ་གཉིས་ནི་བར་མ་ཆད་དུ་འབྱུང་བའི་ངེས་པ་མེད་དེ། ད་ལྟར་གྱི་མིང་གཟུགས་འདི་དག་སྔོན་བསྐལ་བ་བརྒྱའི་ཕ་རོལ་གྱི་མ་རིག་པ་སོགས་ཀྱིས་འཕངས་པ་སྲིད་པའི་ཕྱིར་རོ། །ཅི་སྟེ་སྐྱེས་ནས་མྱོང་འགྱུར་གྱི་ལས་ཀྱི་རྣམ་སྨིན་ཡིན་ན། ཚེ་དང་པོ་གཉིས་བར་མ་ཆད་དུ་འབྱུང་བ་སྲིད་དོ། །ཚེ་ཐ་མ་གཉིས་ནི། བར་མ་ཆད་ཁོ་ནར་འབྱུང་སྟེ། ཚེ་ཕྱི་མའི་སྐྱེ་བ་དང་རྒ་ཤི་དག ཚེ་འདིའི་སྲིད་པའི་རྐྱེན་ལས་འབྱུང་བའི་ཕྱིར་རོ། །དེ་བས་ན་ཚེ་འདིའི་སྐྱེ་བ་དང་རྒ་ཤི་རྣམས་ནི། ཚེ་འདིའི་མིང་གཟུགས་དང་རྟེན་འབྲེལ་ཚར་གཅིག་མ་ཡིན་ཏེ། འདིའི་སྲེད་ལེན་གྱི་རྐྱེན་ལས་འབྱུང་བ་མ་ཡིན་པའི་ཕྱིར་རོ། །འོ་ན་ཅི་ཞེ་ན། སྐྱེ་བ་སྔ་མའི་མིང་གཟུགས་དང་རྟེན་འབྲེལ་ཚར་གཅིག་ཡིན་ཏེ། དེ་དག་གི་སྲེད་ལེན་སྲིད་པའི་རྐྱེན་ལས་ཚེ་འདིའི་སྐྱེ་བ་དང་། རྒ་ཤི་འབྱུང་བའི་ཕྱིར་རོ། །དེ་བས་ན་ཚེ་འདིར་ཡང་བྱིས་པ་རྣམས་ལ་རྟེན་འབྲེལ་ཡན་ལག་བཅུ་གཉིས་ཡོད་མོད། དེ་དག་ནི། སྔོན་དང་ཕྱི་མའི་མཐའ་བར་གསུམ་གའི་རྟེན་འབྲེལ་གྱི་ཡན་ལག་ཚོགས་པ་ཡིན་ཏེ། དེ་ལ་སྐྱེ་བ་དང་རྒ་ཤི་ནི། སྔོན་གྱི་རྟེན་འབྲེལ་ཡིན་ནོ། །མ་རིག་པ་དང་འདུ་བྱེད་དང་རྣམ་ཤེས་རྣམས་ནི། ཕྱི་མའི་རྟེན་འབྲེལ་ཡིན་ཏེ། མ་འོངས་པའི་སྐྱེ་བ་འགའ་ཞིག་འཕེན་བྱེད་ཡིན་པའི་ཕྱིར་རོ། །མིང་གཟུགས་ནས་སྲིད་པའི་བར་ནི། ཚེ་འདིའི་རྟེན་འབྲེལ་ཡིན་པའི་ཕྱིར་རོ། །དེ་ལྟར་ཚེ་འདིར་ཡོད་པའི་ཡན་ལག་བཅུ་གཉིས་པོ་དག་ནི། སྔོན་དང་ཕྱི་མའི་མཐའ་ལ་རྨོངས་པ་ཟློག་བྱེད་ཀྱང་ཡིན་ཏེ། མིང་གཟུགས་ནས་ཚོར་བའི་བར་དང་། སྐྱེ་བ་དང་རྒ་ཤི་དག་ནི། གོ་རིམ་བཞིན་དུ་སྔོན་གྱི་མཐས་འཕངས་པའི་འབྲས་བུ་དང་། མངོན་པར་འགྲུབ་པའི་འབྲས་བུ་ཡིན་པའི་ཕྱིར། དེ་དག་ལས་སྔོན་གྱི་མཐའི་སྐྱེ་བ་ཡོད་པར་རྗེས་སུ་དཔག་གོ །མ་རིག་པ་སོགས་གསུམ་དང་། སྲེད་པ་ལ་སོགས་པ་གསུམ་ནི། གོ་རིམ་བཞིན་དུ་ཕྱི་མའི་མཐའི་སྐྱེ་བ་འཕེན་པར་བྱེད་པ་དང་། མངོན་པར་འགྲུབ་པར་བྱེད་པའི་རྒྱུ་ཡིན་པས། ཕྱི་མའི་མཐའི་སྐྱེ་བ་ཡོད་པར་རྗེས་སུ་དཔག་གོ །ཇི་ལྟར་ཚེ་འདིར་ཡོད་པའི་ཡན་ལག་བཅུ་གཉིས་པོ་དག་ལ། སྔོན་དང་ཕྱི་མའི་མཐའི་རྒྱུ་དང་། འབྲས་བུ་ཇི་ལྟར་རྣམ་པར་བཞག་པ་ལྟར། སྔོན་དང་ཕྱི་མའི་མཐའི་རྟེན་འབྲེལ་ཡན་ལག་བཅུ་གཉིས་དག་ལ་ཡང་དེ་ཁོ་ན་ལྟར་བརྩི་བར་བྱ་སྟེ། དེ་ལྟར་མགལ་མེའི་འཁོར་ལོ་ལྟར་སྲིད་པའི་ཡན་ལག་བཅུ་གཉིས་ཐོག་མ་དང་ཐ་མ་མེད་པར་འཁོར་བའི་ཚུལ་ལེགས་པར་ཁོང་དུ་ཆུད་པར་འགྱུར་ཏེ། ཇི་སྐད་དུ་སློབ་དཔོན་ཉིད་ཀྱིས། གསུམ་པོ་རྣམས་ལས་གཉིས་འབྱུང་སྟེ། །གཉིས་ལས་བདུན་འབྱུང་བདུན་ལས་ཀྱང་། །གསུམ་འབྱུང་སྲིད་པའི་འཁོར་ལོ་དེ། །ཉིད་ནི་ཡང་དང་ཡང་དུ་འཁོར། །ཅེས་གསུངས་པ་ལྟར་རོ། །

དེ་ལྟ་བས་ན་ཇི་སྐད་བཤད་པའི་མཚན་ཉིད་ཅན་གྱི་རྟེན་ཅིང་འབྲེལ་བར་འབྱུང་བ་དེ་ཉིད་ཚུལ་བཞིན་དུ་བསམས་པས། ཆོས་ཀྱི་དེ་ཁོ་ན་ཉིད་མཐོང་བ་བསྟན་པའི་ཕྱིར། རྟེན་ཅིང་འབྲེལ་བར་འབྱུང་འདི་རྒྱལ་བ་ཡི། །གསུང་གི་མཛོད་ཀྱི་གཅེས་པ་ཟབ་མོ་སྟེ། །གང་གིས་འདི་ནི་ཡང་དག་མཐོང་བ་དེས། །སངས་རྒྱས་དེ་ཉིད་རིག་པ་རྣམ་མཆོག་མཐོང་། །ཞེས་གསུངས་ཏེ། དེ་ལྟར་ན་ཇི་སྐད་བཤད་པའི་རྟེན་ཅིང་འབྲེལ་བར་འབྱུང་བ་འདི་ནི། རྒྱལ་བའི་གསུང་གི་གཅེས་པ་ཡིན་ཏེ། གསུང་རབ་ཀུན་གྱི་སྙིང་པོའི་དོན་ཡིན་པའི་ཕྱིར་རོ། །དེ་ནི་བདག་དང་གཞན་དང་གཉི་ག་དང་། རྒྱུ་མེད་པ་དང་བྲལ་བས་གཞན་གྱིས་རྟོགས་པར་དཀའ་བའི་ཕྱིར་ཟབ་མོ་སྟེ། དེའི་ཕྱིར་གང་གིས་རྟེན་ཅིང་འབྲེལ་བར་འབྱུང་བ་འདི་ནི་ཡང་དག་པར་མཐོང་བ་དེས་སངས་རྒྱས་དེ་ཁོ་ན་ཉིད་རིག་པ་རྣམ་མཆོག་མཐོང་སྟེ། སངས་རྒྱས་ནི་ཆོས་ཀྱི་སྐུས་རབ་ཏུ་ཕྱེ་བས་རྟེན་འབྲེལ་གྱི་གནས་ལུགས་ལས་ཐ་མི་དད་པའི་ཕྱིར་རོ། །ཇི་སྐད་དུ། སཱ་ལུ་ལྗང་པའི་མདོ་ལས། གང་གིས་རྟེན་ཅིང་འབྲེལ་བར་འབྱུང་བ་ཤེས་པ་དེས་ཆོས་ཤེས་སོ། །གང་གིས་ཆོས་ཤེས་པ་དེས་དེ་བཞིན་གཤེགས་པ་ཤེས་སོ། །ཞེས་གསུངས་པ་བཞིན་ནོ། །

བཞི་པ་འཕགས་ལམ་ཡན་ལག་བརྒྱད་བསྒོམ་པ་ནི། དེ་ལྟར་རྟེན་ཅིང་འབྲེལ་བར་འབྱུང་བ་ལ་མཁས་པས་ནི། འཕགས་པའི་བདེན་པ་བཞི་ལ་དམིགས་པའི་ལམ་འབྱུང་ངོ་ཞེས་བསྟན་པའི་ཕྱིར་ཡང་དག་ལྟ་དང་འཚོ་དང་རྩོལ་བ་དང་། དྲན་དང་ཏིང་འཛིན་དག་དང་ལས་མཐའ་དང་། །ཡང་དག་རྟོག་ཉིད་ལམ་གྱི་ཡན་ལག་བརྒྱད། །འདི་ནི་ཞི་བར་བགྱི་སླད་བསྒོམ་པར་བགྱི། །ཞེས་གསུངས་ཏེ། རྩ་བར་སྡེབ་སྦྱོར་གྱི་དབང་གིས། གོ་རིམ་འཆོལ་བར་བསྟན་ཀྱང་། རིམ་པ་བཞིན་བཤད་ན། མཐོང་ལམ་དུ་རྟོགས་པའི་དོན་བློ་གྲོས་ཀྱིས་ཡོངས་སུ་དཔྱོད་པར་བྱེད་པའི་ཤེས་རབ་ཡང་དག་པའི་ལྟ་བ་དང་། རང་གིས་རྟོགས་པ་བཞིན་གཞན་ལ་སྟོན་པའི་ངག་ཀུན་ནས་སློང་བའི་ཡང་དག་པའི་རྟོག་པ་དང་། རྟོག་པ་དེས་ཀུན་ནས་བསླངས་པའི་ཡང་དག་པ་ཇི་ལྟ་བ་བཞིན་སྟོན་པའི་ངག་གི་རྣམ་པར་རེག་བྱེད་ཡང་དག་པའི་ངག་དང་། བྱ་བ་མ་ཡིན་པ་སྤོང་བའི་ལུས་ངག་གི་རྣམ་པར་རེག་བྱེད་ཡང་དག་པའི་ལས་ཀྱི་མཐའ་དང་། ཆོས་དང་མཐུན་པའི་ཟས་གོས་སོགས་ཀྱི་འཚོ་བ་ཡང་དག་པའི་འཚོ་བ་དང་། ལམ་བསྒོམ་པ་ལ་བརྩོན་པ་ཡང་དག་པའི་རྩོལ་བ་དང་། ལམ་གྱི་དམིགས་པ་མ་བརྗེད་པ་ཡང་དག་པའི་དྲན་པ་དང་། དམིགས་པ་དེ་ལ་རྩེ་གཅིག་ཏུ་གནས་པ་ཡང་དག་པའི་ཏིང་ངེ་འཛིན་དང་། བརྒྱད་པོ་འདི་དག་ནི་སྒོམ་ལམ་གྱི་གནས་སྐབས་ན་འཕགས་པའི་ལམ་གྱི་ཆ་ཤས་དང་འཁོར་ཡིན་པའི་ཕྱིར། ལམ་གྱི་ཡན་ལག་བརྒྱད་ཅེས་བྱ་སྟེ། དེ་ལ་ཡང་དག་པའི་ལྟ་བ་ནི། ཡོངས་སུ་དཔྱོད་པའི་ཡན་ལག་ཡིན་ཏེ། དེས་མཉམ་གཞག་ཏུ་ཇི་ལྟར་མྱོང་བའི་དེ་ཁོ་ན་ཉིད་ངེས་པར་འཛིན་པའི་ཕྱིར་རོ། །རྟོག་པ་ནི། གཞན་ལ་གོ་བར་བྱེད་པའི་ཡན་ལག་ཡིན་ཏེ། དེས་ཇི་ལྟར་རྟོགས་པ་རྣམ་པར་བཞག་ནས་ངག་ཀུན་ནས་སློང་བའི་ཕྱིར་རོ། །ཡང་དག་པའི་ངག་ལ་སོགས་པ་གསུམ་ནི་གཞན་ཡིད་ཆེས་པའི་ཡན་ལག་ཡིན་ཏེ། དེ་ལ་ཡང་དག་པའི་ངག་གིས་རྟོགས་པ་དང་མཐུན་པར་དྲི་བ་དང་ལུང་སྟོན་པ་འབེལ་པའི་གཏམ་གཏན་ལ་འབེབས་པས་རྣལ་འབྱོར་པ་ལྟ་བ་རྣམ་པར་དག་པར་ཤེས་སོ། །ཡང་དག་པའི་ལས་ཀྱི་མཐས་འགྲོ་བ་དང་ལྡོག་པ་སོགས་སྤྱོད་པ་ཕུན་སུམ་ཚོགས་པས་ཚུལ་ཁྲིམས་རྣམ་པར་དག་པར་ཤེས་སོ། །ཡང་དག་པའི་འཚོ་བས་ནི། ཇི་ལྟར་སྣང་བ་བཞིན་ཆོས་གོས་སོགས་ཚོལ་བས་འཚོ་བ་རྣམ་པར་དག་པར་ཡིད་ཆེས་སོ། །རྩོལ་བ་ནི་ཉོན་མོངས་པའི་སྒྲིབ་པ་སྦྱོང་བའི་ཡན་ལག་ཡིན་ཏེ། དེས་བརྩོན་འགྲུས་བརྩམས་པས་ཀུན་སྦྱོར་ལྷག་མ་རྣམས་སྤོང་བའི་ཕྱིར་རོ། །དྲན་པ་ནི། ཉེ་བའི་ཉོན་མོངས་པའི་སྒྲིབ་པ་སྦྱོང་བའི་ཡན་ལག་ཡིན་ཏེ། དེས་ཡང་དག་པའི་ཞི་གནས་སོགས་ཀྱི་མཚན་མ་མ་བརྗེད་པས་ཉེ་བའི་ཉོན་མོངས་པ་བྱིང་རྒོད་སོགས་ཀྱི་སྐབས་མེད་པར་བྱེད་པའི་ཕྱིར་རོ། །ཏིང་ངེ་འཛིན་ནི། ཡོན་ཏན་ཁྱད་པར་ཅན་ལ་སྒྲིབ་པ་སྦྱོང་བའི་ཡན་ལག་ཡིན་ཏེ། དེས་མངོན་པར་ཤེས་པ་སོགས་ཡོན་ཏན་མངོན་པར་བསྒྲུབ་པའི་ཕྱིར་རོ། །དེ་དག་ཀྱང་དབུས་མཐར། ཡོངས་སུ་དཔྱོད་བྱེད་གོ་བྱེད་དང་། །རྣམ་གསུམ་གཞན་ཡིད་ཆེས་པར་བྱེད། །མི་མཐུན་ཕྱོགས་ཀྱི་གཉེན་པོར་ནི། །ལམ་གྱི་ཡན་ལག་དེ་བརྒྱད་དོ། །ཞེས་བཤད་པ་ལྟར་རོ། །དེ་བས་ན་འདི་དག་ནི་ཞི་བ་མྱ་ངན་ལས་འདས་པ་ཐོབ་པར་བགྱི་བའི་སླད་དུ་བསྒོམ་པར་བགྱིའོ། །

ལྔ་པ་ལམ་བདེན་གྱི་དམིགས་པ་འཕགས་པའི་བདེན་པ་བསྟན་པ་ནི། སྐྱེ་འདི་སྡུག་བསྔལ་སྲེད་པ་ཞེས་བགྱི་བ། །དེ་ནི་དེ་ཡི་ཀུན་འབྱུང་རྒྱ་ཆེན་ཏེ། །འདི་འགོག་པ་ནི་ཐར་པ་ལགས་ཏེ་ལམ། །དེ་ཐོབ་འཕགས་ལམ་ཡན་ལག་དེ་བརྒྱད་ལགས། །ཞེས་གསུངས་ཏེ། ཉེ་བར་ལེན་པའི་ཕུང་པོ་ལྔ་པོ་སྐྱེ་བའི་རང་བཞིན་འདི་ནི་སྡུག་བསྔལ་ཡིན་ཏེ། མདོ་ལས། མདོར་ན་ཉེ་བར་ལེན་པའི་ཕུང་པོ་ལྔ་ནི་སྡུག་བསྔལ་ལོ་ཞེས་བཤད་པ་ལྟར་རོ། །ཟག་བཅས་ཀྱི་ཕུང་པོ་ལ་ཆགས་པའི་སྲེད་པ་ཞེས་བགྱི་བ་དེ་ནི། སྡུག་བསྔལ་འདི་ཀུན་འབྱུང་བ་ཡིན་ཏེ། མདོ་ལས། སྡུག་བསྔལ་ཀུན་འབྱུང་འཕགས་པའི་བདེན་པ་གང་ཞེ་ན། སྲེད་པ་ཡང་ཀུན་འབྱུང་བ་ཅན་དགའ་བའི་འདོད་ཆགས་དང་བཅས་པ་དེ་དང་། དེ་ལ་མངོན་པར་དགའ་བའི་ངང་ཚུལ་ཅན་དེ་ཞེས་གསུངས་པ་ལྟར་རོ། །དེ་ནི་སྲིད་པར་སྐྱེ་བ་ཀུན་གྱི་རྒྱུ་ཡིན་པའི་ཕྱིར་རྒྱ་ཆེན་ནོ། །སྡུག་ཀུན་འདི་དག་མ་ལུས་པ་འགག་པ་ནི། འགོག་པའི་བདེན་པ་སྟེ་དེ་ཉིད་ཐར་པ་ལགས་ལ་དེ་ཐོབ་བྱེད་ཀྱི་ལམ་ནི། འཕགས་ལམ་ཡན་ལག་བརྒྱད་པོ་བཤད་མ་ཐག་པ་དེ་དག་ལགས་སོ། །མྱ་ངན་ལས་འདས་པ་ཐོབ་པའི་ལམ་ལ་སྦྱར་བར་བྱ་བའི་ཕྱིར། དེ་ལྟར་ལགས་པས་འཕགས་པའི་བདེན་པ་བཞི། །མཐོང་བར་བགྱི་སླད་རྟག་ཏུ་བརྩོན་པར་བགྱི། །ཞེས་གསུངས་ཏེ། ཤེས་བྱ་སྤང་བྱ་མངོན་དུ་བྱ་བ་བསྟེན་པར་བྱ་བའི་ཕྱིར། བདེན་པ་བཞི་པོ་གོང་དུ་བཤད་པ་དེ་ལྟར་ལགས་པས། ཁྱོད་ཀྱིས་ཀྱང་འཕགས་པའི་བདེན་པ་བཞི་པོ་དེ་ཡི་དེ་ཁོ་ན་ཉིད་མཐོང་བར་བགྱི་བའི་སླད་དུ་རྟག་ཏུ་ལམ་བསྒོམ་པ་ལ་བརྩོན་པར་བགྱིའོ། །བཞི་པོ་འདི་དག་ནི་ཀུན་རྫོབ་ཏུ་དེ་ཁོ་ན་ལྟར་གནས་པས་འཕགས་པའི་བདེན་པ་ཞེས་བྱ་སྟེ། དཔེར་ན་ཡང་དག་པའི་ཐ་སྙད་ལ་འཕགས་པའི་ཐ་སྙད་ཅེས་ཟེར་བ་བཞིན་ནོ། །ཡང་ན་འདི་དག་དེ་ཁོ་ན་ལྟར་དུ་འཕགས་པ་རྣམས་ཀྱིས་གཟིགས་པའི་ཕྱིར་འཕགས་པའི་བདེན་པ་ཞེས་བྱའོ། །

དྲུག་པ་བདེན་པ་མཐོང་བ་སྐྱེས་བུའི་རྩོལ་བ་ལ་བརྟེན་པས་ཞུམ་པར་མི་བྱ་བ་ནི། བདག་ཅག་ཁྱིམ་པ་རྒྱལ་སྲིད་ལ་གནས་པ་རྣམས་ཀྱིས་ཇི་ལྟར་བདེན་པ་མཐོང་བར་ནུས་ཤེ་ན། པང་ན་དཔལ་གནས་ཁྱིམ་པ་རྣམས་ཀྱིས་ཀྱང་། །ཤེས་པས་ཉོན་མོངས་ཆུ་བོ་ལས་བརྒལ་བགྱི། །ཞེས་གསུངས་ཏེ། གང་གི་པང་ན་རྒྱལ་སྲིད་ཀྱི་དཔལ་གནས་པའམ། ཡང་ན་བུ་ལ་སོགས་པ་ཕུན་སུམ་ཚོགས་པའི་དཔལ་གནས་པའི་ཁྱིམ་པ་རྒྱལ་པོ་གཟུགས་ཅན་སྙིང་པོ་ལ་སོགས་པས་ཀྱང་། ཡང་དག་པའི་ཤེས་པས་བདེན་པ་མཐོང་སྟེ། ཉོན་མོངས་པའི་ཆུ་བོ་ལས་བརྒལ་པར་བགྱིས་ཀྱིས། རྒྱལ་པོ་ཁྱོད་ཀྱིས་ཀྱང་དེ་ལྟར་མཛོད་ཅིག་ཅེས་པའོ། །འཕགས་པའི་ལམ་སྐྱེས་བུའི་རྩལ་གྱིས་བསྒྲུབ་པར་བྱ་བ་ཡིན་ནོ། །ཞེས་བསྟན་པའི་ཕྱིར། གང་དག་ཆོས་མངོན་བགྱིས་པ་དེ་དག་ཀྱང་། །གནམ་ནས་བབས་པ་མ་ལགས་ལོ་ཐོག་བཞིན། །ས་རུམ་ནས་འཐོན་མ་ལགས་དེ་དག་སྔོན། །ཉོན་མོངས་རག་ལས་སྐྱེ་བོ་ཁོ་ནར་བས། །ཞེས་གསུངས་ཏེ། གང་ཟག་གང་བདེན་པ་བཞིའི་ཆོས་མངོན་སུམ་དུ་བགྱིས་པའི་འཕགས་པ་ཇི་སྙེད་ཅིག་བྱོན་པ་དེ་དག་ཀྱང་ཐོག་མ་ཉིད་ནས་འཕགས་པར་གྱུར་ཟིན་ཅིག་གནམ་ནས་བབས་པའམ། ལོ་ཐོག་བཞིན་ས་རུམ་ནས་འཐོན་ཏེ་འོངས་པ་མ་ལགས་ཀྱི། དེ་དག་ཀྱང་སྔོན་ཉོན་མོངས་པ་ལ་རག་ལས་པ་སྟེ། ཉོན་མོངས་པའི་གཞན་དབང་དུ་གྱུར་པའི་སོ་སོ་སྐྱེ་བོར་བས་པ་ལས། ཕྱིས་དགེ་བའི་བཤེས་གཉེན་ལ་བརྟེན་ནས་ལམ་བསྒྲུབས་ནས་འཕགས་པར་གྱུར་པ་སྟེ། དེའི་ཕྱིར་ཁྱོད་ཀྱིས་ཀྱང་མི་ཞུམ་པར་ལམ་བསྒྲུབ་པ་ལ་འབད་པར་བགྱིའོ། །

བདུན་པ་མདོར་བསྡུས་ཏེ་གདམས་པ་ནི། བསྙེངས་དང་བྲལ་ལ་མང་དུ་གསོལ་ཅི་འཚལ། །ཕན་པའི་གདམས་ངག་དོན་པོ་འདི་ལགས་ཏེ། ཁྱོད་ཀྱིས་ཐུགས་དུལ་མཛོད་ཅིག་བཅོམ་ལྡན་གྱིས། །སེམས་ནི་ཆོས་ཀྱི་རྩ་བ་ལགས་པར་གསུངས། །ཞེས་གསུངས་ཏེ། ཕས་ཀྱི་རྒོལ་བས་བག་ཚ་བ་མེད་པས་ན་བསྙེངས་པ་དང་བྲལ་ཞེས་རྒྱལ་པོ་ལ་བོས་ནས། ཧ་ཅང་མང་དུ་གསོལ་ཅི་འཚལ་ཏེ། མི་དགེས་ཀྱིས། གནས་སྐབས་དང་མཐར་ཐུག་ཏུ་ཕན་པའི་གདམས་ངག་དོན་པོ་སྟེ། གཙོ་བོའམ་གཅེས་པ་འདི་ལགས་ཏེ། ཁྱོད་ཀྱི་ཐུགས་མི་དགེ་བ་ལས་བཟློག་ནས། དགེ་བ་ལ་བཅུག་པའི་སྒོ་ནས་དུལ་བ་སྟེ་ཐུལ་བར་མཛོད་ཅིག དེ་ལྟ་ན་ལུས་ངག་ཡིད་གསུམ་ཐམས་ཅད་དག་པར་འགྱུར་ཏེ། བཅོམ་ལྡན་འདས་ཀྱིས་འཇིག་རྟེན་སེམས་ཀྱིས་ཁྲིད་པ་སྟེ། སེམས་ཀྱིས་ཡོངས་སུ་དྲངས་པ་ཡིན། །སེམས་ཀྱི་ཆོས་ནི་གཅིག་པུ་ཡི། །དབང་གི་རྗེས་སུ་ཆོས་ཀུན་འགྲོ། །ཞེས་དང་། སེམས་དུལ་བ་ནི་ལེགས་པ་སྟེ། །སེམས་དུལ་བས་ནི་བདེ་བ་འདྲེན། །ཅེས་སེམས་ནི་ཆོས་ཀྱི་རྩ་བར་ལགས་པར་གསུངས་པའི་ཕྱིར་རོ། །ཇི་སྐད་བཤད་པ་དེ་ཐམས་ཅད་བསྒྲུབས་ན། སངས་རྒྱས་ཀྱི་བསྟན་པ་ལ་ལེགས་པར་གནས་པར་འགྱུར་བར་མ་ཟད་ཕྱོགས་གཅིག་བསྒྲུབས་པས་ཀྱང་དོན་དང་བཅས་པར་འགྱུར་རོ། །ཞེས་བསྟན་པའི་ཕྱིར། ཁྱོད་ལ་དེ་སྐད་གདམས་པ་གང་ལགས་ཏེ། །བས་པར་དགེ་སློང་གིས་ཀྱང་བགྱི་བར་དཀའ། །འདི་ལས་གང་ཞིག་སྤྱོད་པའི་ངོ་བོ་དེའི། །ཡོན་ཏན་བསྟེན་པས་སྐུ་ཚེ་དོན་ཡོད་མཛོད། །ཅེས་གསུངས་ཏེ། རྒྱལ་པོ་ཁྱོད་ལ་དེ་སྐད་གདམས་པ་གང་ལགས་པ་དེ། བས་པར་ཏེ་རྫོགས་པར་གཅིག་ཏུ་དགེ་བ་ལ་གཞོལ་བའི་དགེ་སློང་གིས་ཀྱང་བགྱི་བར་དཀའ་ན། བྱ་བ་མང་པོས་གཡེངས་པའི་ཁྱིམ་པས་སྨོས་ཅི་དགོས།

འོན་ཀྱང་གདམས་པ་འདི་དག་ལས་གང་ཡང་རུང་བ་ཞིག་སྤྱོད་པ་སྟེ་བསྒྲུབས་པའི་ངོ་བོ་དེ་ལྟ་བུའི་ཉེས་པ་སྤང་བ་དང་། ཡོན་ཏན་རྣམས་བསྟེན་ཅིང་གོམས་པས་སྐུ་ཚེ་དོན་ཡོད་པར་མཛོད་ཅིག་དང་། དེ་ལྟ་ན་ཡང་སངས་རྒྱས་ཀྱི་བསྟན་པ་ལ་གནས་པ་དང་། རིམ་གྱིས་ཡོན་ཏན་གཞན་ཡང་ཐོབ་པར་འགྱུར།

གཉིས་པ་ཐེག་ཆེན་གྱི་ལམ་གྱི་འབྲས་བུ་དང་བཅས་པ་སྒྲུབ་པར་གདམས་པ་ལ་གཉིས་ལས། དང་པོ་ལམ་གྱི་བྱ་བ་ནི། དེ་ལྟར་ཆོས་བསྟན་པས་སེམས་མགུ་བར་གྱུར་པ་དེ་ཐེག་པ་ཆེན་པོའི་ལམ་ལ་གཞུག་པར་བཞེད་ནས། ཀུན་གྱི་དགེ་བ་ཀུན་ལ་ཡི་རང་ཞིང་། །ཉིད་ཀྱིས་ལེགས་པར་སྤྱད་པ་རྣམ་གསུམ་ཡང་། །སངས་རྒྱས་ཉིད་ཐོབ་བགྱི་སླད་ཡོངས་བསྔོས་ནས། །དེ་ནས་དགེ་བའི་ཕུང་པོ་འདི་ཡིས་ཁྱོད། །སྐྱེ་བ་དཔག་ཏུ་མེད་པ་ལྷ་མི་ཡི། །འཇིག་རྟེན་ཀུན་གྱི་རྣལ་འབྱོར་དབང་མཛད་ནས། །འཕགས་པ་སྤྱན་རས་གཟིགས་དབང་སྤྱོད་པ་ཡིས། །སྐྱེ་བོ་ཉམ་ཐག་མང་པོ་རྗེས་བཟུངས་ཏེ། །འཁྲུངས་ནས་ན་རྒ་འདོད་ཆགས་ཞེ་སྡང་རྣམས། །བསལ་ཏེ་སངས་རྒྱས་ཞིང་དུ་བཅོམ་ལྡན་འདས། །འོད་དཔག་མེད་དང་འདྲ་བར་འཇིག་རྟེན་གྱི། །མགོན་པོ་སྐུ་ཚེ་དཔག་ཏུ་མེད་པར་མཛོད། །ཅེས་གསུངས་ཏེ། སོ་སོ་སྐྱེ་བོ་དང་། འཕགས་པ་ཀུན་གྱི་ཟག་བཅས་དང་ཟག་མེད་ཀྱི་དགེ་བ་ཀུན་ལ་ཇི་ལྟར་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་རྗེས་སུ་ཡི་རང་བར་མཛད་པ་དེ་ལྟར། བདག་གིས་ཀྱང་རྗེས་སུ་ཡི་རང་བར་བགྱིའོ། །ཞེས་ཚིག་ཏུ་བརྗོད་པས་རྗེས་སུ་ཡི་རང་བར་བགྱི་ཞིང་། བདག་དགེ་བ་འདིས་སེམས་ཅན་མགོན་མེད་པ་རྣམས་ཀྱི་མགོན། སྐྱབས་མེད་པ་རྣམས་ཀྱི་སྐྱབས་སུ་གྱུར་ཅིག ཅེས་ཉིད་ཀྱི་ལུས་ངག་ཡིད་གསུམ་གྱིས་ལེགས་པར་སྤྱད་པ་རྣམ་པ་གསུམ་ཡང་། སངས་རྒྱས་ཐོབ་པར་བགྱི་བའི་སླད་དུ་ཡོངས་སུ་བསྔོས་ནས། དེ་ནས་རྗེས་སུ་ཡི་རང་བ་དང་བསྔོས་པའི་དགེ་བའི་ཕུང་པོ་འདི་ཡིས་ཁྱོད་འཇིག་རྟེན་གྱི་མགོན་པོ་འཁོར་བ་ཇི་སྲིད་མ་སྟོངས་ཀྱི་བར་དུ་གནས་པས། སྐུ་ཚེ་དཔག་ཏུ་མེད་པར་མཛོད་ཅིག་ཅེས་སྦྲེལ་ལོ། །ཅི་ཞིག་མཛད་ནས་ཤེ་ན། སངས་རྒྱས་ཀྱི་ཆོས་ཡོངས་སུ་སྨིན་པ་དང་། སེམས་ཅན་ཡོངས་སུ་སྨིན་པར་བྱས་ནས་ཏེ། དེ་ལ་དང་པོ་ནི། དགེ་བའི་ཕུང་པོ་འདིས་ལམ་སྒྲུབ་པའི་གནས་སྐབས་སུ། སྐྱེ་བ་དཔག་ཏུ་མེད་པ་ལྷ་དང་མིའི་འཇིག་རྟེན་དུ་སྐྱེས་ཏེ། གཟུངས་དང་ཏིང་ངེ་འཛིན་ལ་སོགས་པ་ཡོན་ཏན་དཔག་ཏུ་མེད་པའི་རྣལ་འབྱོར་ལ་དབང་མཛད་ནས་དང་། གཉིས་པ་སེམས་ཅན་སྨིན་པར་བྱ་བ་ནི། ཇི་ལྟར་འཕགས་པ་སྤྱན་རས་གཟིགས་དབང་ཕྱུག་གིས་སེངྒེ་དང་གླང་པོ་ཆེ་ལ་སོགས་པའི་འཇིགས་པ་ལས་སྐྱེ་བོ་ཉམ་ཐག་པ་རྣམས་བསྐྱབས་པ་བཞིན་དུ། དེ་དང་རྗེས་སུ་མཐུན་པའི་སྤྱོད་པ་ཡིས་སྐྱེ་བོ་ཉམ་ཐག་མང་པོ་རྗེས་སུ་བཟུངས་ཏེ། ཚོགས་ཡོངས་སུ་རྫོགས་པར་བྱས་ནས། སྲིད་པ་ཐ་མ་པར་འཁྲུངས་ནས། ན་རྒས་བསྡུས་པ་སྡུག་བསྔལ་གྱི་བདེན་པ་དང་། འདོད་ཆགས་ཞེ་སྡང་སོགས་ཀུན་འབྱུང་གི་བདེན་པས་བསྡུས་པ་རྣམས་བསལ་བར་མཛད་ནས་སོ། །གང་དུ་ཞེ་ན། རང་གི་དགེ་བའི་རྩ་བས་ཡོངས་སུ་སྦྱངས་པའི་སངས་རྒྱས་ཀྱི་ཞིང་དུའོ། །ཅི་དང་འདྲ་བར་ཞེ་ན། ཞིང་དང་འཁོར་དང་སྐུ་ཚེ་ལ་སོགས་པ་ཇི་ལྟར་བདེ་བ་ཅན་དུ། བཅོམ་ལྡན་འདས་འོད་དཔག་ཏུ་མེད་པ་སངས་རྒྱས་པ་དང་འདྲ་བར་རོ། །

གཉིས་པ་འབྲས་བུ་ནི། དེ་ལྟར་སངས་རྒྱས་ཉིད་ཐོབ་ནས་སེམས་ཅན་གྱི་དོན་ཅི་རན་མཛད་དེ། མྱ་ངན་ལས་འདས་པ་ཐོབ་པར་མཛོད་ཅིག་ཅེས་བསྟན་པའི་ཕྱིར། ཤེས་རབ་ཚུལ་ཁྲིམས་གཏོང་འབྱུང་གྲགས་ཆེན་དྲི་མ་མེད། །ལྷ་ཡུལ་ནམ་མཁའ་དང་ནི་ས་སྟེང་རྒྱས་མཛད་ནས། །ས་ལ་མི་དང་མཐོ་རིས་ལྷ་ནི་ན་ཆུང་མཆོག །བདེ་དགའ་དགའ་བ་ངེས་པར་རབ་ཏུ་ཞི་མཛད་དེ། །ཉོན་མོངས་ཉམ་ཐག་སེམས་ཅན་ཚོགས་ཀྱི་འཇིགས་སྐྱེ་དང་། །འཆི་བ་ཞི་མཛད་རྒྱལ་བའི་དབང་པོ་ཉིད་བརྙེད་ནས། །འཇིག་རྟེན་ལས་འདས་མིང་ཙམ་ཞི་ལ་མི་བསྙེངས་པ། །མི་བགྲེས་ནོངས་པ་མི་མངའི་གོ་འཕང་བརྙེས་པར་མཛོད། །ཅེས་གསུངས་ཏེ། དེ་ལྟ་བུའི་རྒྱལ་བའི་དབང་པོ་བརྙེས་ནས། ཟག་བཅས་ཀྱི་ཕུང་པོ་མ་ལུས་པ་འགགས་པ་ན། འཇིག་རྟེན་ལས་འདས་པ་དངོས་པོ་མེད་པས་མིང་ཙམ། གནོད་པ་མེད་པས་ཞི་བ། འཇིགས་པ་མེད་པས་མི་བསྙེངས་པ། ཟག་པ་མེད་པས་མི་བགྲེས་པ། མི་འགྱུར་བས་ནོངས་པ་སྟེ་འཆི་བ་མེད་པ་མྱ་ངན་ལས་འདས་པའི་གོ་འཕང་བརྙེས་པར་མཛོད་ཅིག རྒྱལ་བའི་དབང་པོ་ཁྱད་པར་ཇི་ལྟ་བུ་ཞིག་བརྙེས་ནས་ཤེ་ན། ས་ལ་གནས་པའི་མི་དང་། མཐོ་རིས་འདོད་ལྷ་རིས་དྲུག་ནི་ལྷ་ཡི་ན་ཆུང་མཆོག་བསྟེན་པའི་བདེ་དགའ་ལ་སོགས་པ་འདོད་པའི་བདེ་བ་ལ་དགའ་ཞིང་བག་མེད་པར་གྱུར་པ་རྣམས་སྐྱོ་བར་བྱས་ཏེ། ཚུལ་ཁྲིམས་ལ་སོགས་པ་འཕགས་ལམ་གྱི་སྦྱོར་བ་དང་། འཕགས་ལམ་དངོས་ལ་བཀོད་ནས་ཞི་བར་མཛད་དེ། ཉོན་མོངས་པས་ཉོན་མོངས་ཤིང་། སྡུག་བསྔལ་གྱིས་ཉམ་ཐག་པའི་སེམས་ཅན་ཚོགས་ཀྱི་འཇིག་ལྟས་གཙོ་བྱས་པའི་འཇིགས་པ་དང་། མི་ཤེས་པ་དང་ལས་དང་སྲིད་པ་གསུམ་གྱིས་གཙོ་བྱས་པའི་སྐྱེ་བ་དང་ལས་དང་ཚེ་ཟད་པ་དང་། ཡ་ང་བ་མ་སྤངས་པས་བྱས་པའི་འཆི་བ་རྣམས་ཞི་བར་མཛད་པ་དེ་ལྟ་བུའི་རྒྱལ་བའི་དབང་པོ་བརྙེས་ནས་སོ། །ཅི་ཞིག་བྱས་ནས་ཤེ་ན། གནས་ལུགས་ངེས་པར་འབྱེད་པའི་ཤེས་རབ་དང་། མ་ཉམས་པ་ལ་སོགས་པའི་ཡོན་ཏན་དང་ལྡན་པའི་ཚུལ་ཁྲིམས་དང་། ཐམས་ཅད་ལ་ཆགས་པ་མེད་པའི་གཏོང་བ་ཕུན་སུམ་ཚོགས་པའོ། །ཞེས་པའི་གྲགས་པ་ལྷ་ཡུལ་དང་ནམ་མཁའ་བར་སྣང་དང་ས་སྟེང་མིའི་འཇིག་རྟེན་རྣམས་སུ་རྒྱས་པར་མཛད་ནས་སོ། །

ཀླུ་ཡིས་ཡོངས་བཟུངས་གསུང་རབ་ཆུ་གཏེར་ལས་བྱུང་བའི། །ལེགས་བཤད་པདྨོ་དགེ་ལེགས་སྦྲང་རྩི་འབྱུང་གནས་འདི། །བློ་གྲོས་བློ་ཡི་ཉིན་བྱེད་ཟེར་གྱིས་རྣམ་ཕྱེ་ཡིས། །སྐལ་བཟང་འཕུར་ལྡིང་བུང་བའི་ཚོགས་རྣམས་ཡི་རང་བྱོས། །ཐུབ་པའི་གསུང་དང་དམ་པ་རྣམས་ཀྱིས་ལེགས་བཤད་ཀྱི། །གཏམ་བཟང་སྒྲོགས་པ་འཇིག་རྟེན་འདི་ན་ཡོད་གྱུར་པ། །དེ་སྲིད་འགྲོ་འདི་ལེགས་པའི་མགོན་དང་བཅས་པ་སྟེ། །དྲི་མེད་མཁའ་ལ་ཉི་འོད་ཤར་བཞིན་རྣམ་པར་མཛེས། །དགེ་ལེགས་འཇོམས་བྱེད་མེ་ཏོག་མདའ་ཅན་ཕྱོགས་འཕེལ་ཞིང་། །ཐུབ་པའི་བསྟན་པ་ལྐོག་མར་སྐྱེ་བོའི་སྲོག་ཕྱིན་འདྲ། །སྐྱེ་རྒུའི་ཚོགས་ཀྱང་ཞི་གྱུར་ཆོས་ཀྱི་ལམ་ལས་ཉམས། །དགེ་བར་འདོད་རྣམས་གཅིག་ཏུ་དགེ་བའི་ལམ་ལ་བརྟེན། །བདག་གིས་འདིར་འབད་རྣམ་པར་དཀའ་བའི་དགེ་བ་གང་། །ཀུ་མུ་ཏ་དང་པདྨའི་རྡུལ་ལྟར་རབ་དཀར་བ། །ཐོབ་པ་གང་དེས་འགྲོ་འདི་ལྟ་བའི་ཆུ་བོ་ལས། །རྣམ་པར་བརྒལ་ནས་རྣམ་གྲོལ་གླིང་དུ་ཕྱིན་གྱུར་ཅིག །

བདག་ཉིད་ཆེན་པོ་འཕགས་པ་ཀླུ་སྒྲུབ་ཀྱིས་མཛད་པ་བཤེས་པའི་སྤྲིངས་ཡིག་གི་འགྲེལ་པ་དོན་གསལ་བ་ཞེས་བྱ་བ་འདི་ནི། ཡོན་ཏན་རིན་པོ་ཆེ་དུ་མའི་བདག་ཉིད་སྡེ་སྣོད་འཛིན་པ་ཆེན་པོ་མཁན་ཆེན་རྒྱལ་བ་དཔལ་བའི་གསུང་གིས་བསྐུལ་ཞིང་། ལུང་རིགས་སྨྲ་བ་གཙོ་མདོ་བ་ཀུན་དགའ་བཟང་པོ་ལ་སོགས་པ། རང་གི་སློབ་མ་དགེ་བའི་བཤེས་གཉེན་འགས་ཀྱང་གསོལ་བ་བཏབ་པའི་ངོར། ཤཱཀྱའི་དགེ་སློང་གཞོན་ནུ་བློ་གྲོས་ཀྱིས་དཔལ་ས་སྐྱའི་ཆོས་གྲྭ་ཆེན་པོར་སྦྱར་བ་རྫོགས་སོ།།། །།