རྗེའི་ཚིག་གསུམ་གནད་ཀྱི་གདམས་པ།།
ལྷུན་གྱིས་གྲུབ་ཅིང་འདུས་མ་བྱས། །སྤྲོས་པའི་མཚན་མ་མི་མངའ་ཞིང༌། །དག་པ་གཉིས་ལྡན་ཆོས་ཀྱི་སྐུ། །རིན་ཆེན་བླ་མའི་ཞབས་ལ་འདུད། །དེ་ཡི་ཞལ་ནས་ལེགས་གསུངས་པ།། བདུད་རྩི་གནད་ཀྱི་མན་ངག་འདི། །གུས་བསྟེན་སློབ་མས་སྐུལ་ཕྱིར་ནི། །བརྩེ་བས་མན་ངག་གསུང་བཞིན་འབྲི། །བུ་གཅིག་གུས་པས་ཚུར་ཉོན་དང༌། །རྙེད་དཀའ་བའི་དལ་འབྱོར་ཐོབ་པ་འདི། །མི་རྟག་རྩྭ་ཁའི་ཟིལ་པ་འདྲ། །དེ་ཕྱིར་ཚེ་འདིའི་འདུན་པ་སྤོངས། །རིགས་དྲུག་འཁོར་བའི་དུ་ཁཿལ། །མེ་དོང་ལྟ་བུར་བསམས་ལགས་ན། །དེ་ལས་ཐར་བྱེད་དམ་པའི་ཆོས། །གནས་ལུགས་དོན་ལ་གོམས་པར་མཛོད། །འཁོར་བའི་རྒྱུད་ལས་ཐར་ལགས་ཀྱང༌། །བརྩེ་བའི་མ་རྣམས་བོར་ལགས་ན། །ཉན་རང་དམན་པའི་བྱང་ཆུབ་ཡིན། །སེམས་གསུམ་འབྲལ་མེད་བསྒོམ་ཞིག་གསུངས། །ཚེ་འདི་དོན་ཆེན་སྒྲུབ་ལགས་ན། །ཚད་ལྡན་བླ་མ་རིན་ཆེན་གྱི། །ཅི་གསུང་བཀའ་བཞིན་བསྒྲུབ་པ་ཡིན། །དངོས་གྲུབ་འབྱུང་གིས་མོས་གུས་གྱིས། །རང་གཞན་དོན་འབྱུང་རྫོགས་སངས་རྒྱས། །སྒྲུབ་བྱེད་གནད་ཀྱི་མན་ངག་ནི། །ཟུང་འཇུག་ལམ་གྱི་མཆོག་གྱུར་པ། །ཚིག་གསུམ་གནད་ཀྱི་མན་ངག་འདི་ལྟར་བྱ་གསུངས། སངས་རྒྱས་རྣམས་ཀྱི་གཞུང་ལམ་འདི། །ཚེ་འདིའི་ལྟོས་ཐག་བཅད་ནས་ཀྱང༌། །ཉམས་ལེན་འབྲལ་མེད་བརྩོན་འགྲུས་ཀྱིས། །སྙིང་ལ་ཞོག་ཅིག་སྐྱེས་བུ་རྣམས། །
འཇིག་རྟེན་གསུམ་གྱི་མགོན་པོ་བླ་མ་རིན་པོ་ཆེའི་ཞལ་ནས། འོ་སྐོལ་གྱི་སྟོན་པ་ཐུབ་པ་ཆེན་པོ་མངོན་པར་རྫོགས་པར་སངས་རྒྱས་ནས། སེམས་ཅན་གྱི་ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོར། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་པ་ཡིན། ཆོས་དེ་རྣམས་ཉམས་སུ་ལེན་པ་ལ་ཚུལ་བསམ་གྱིས་མི་ཁྱབ་པ་ཞིག་གསུངས་ན་ཡང་མདོར་བསྡུས་ན།
པཎྜི་ཏ་སྒྲོ་འདོགས་ཕྱི་ནས་གཅོད་པ་དང༌། ཀུ་སཱ་ལི་སྒྲོ་འདོགས་ནང་ནས་གཅོད་པ་གཉིས་ཡིན་ཏེ། དེ་ཡང་པཎྜི་ཏ་སྒྲོ་འདོགས་ཕྱི་ནས་གཅོད་པ་བྱ་བ་སྟེ། བཤད་པའི་བླ་མ་མང་པོ་བསྟེན། བཀའ་བསྟན་བཅོས་སམ་མདོ་སྡེ་དང༌། རྒྱུད་སྡེ་རྣམས་ལ་ཐོས་བསམ་གྱིས་ཤེས་བྱ་བསྐྱངས་པས་ནམ་ཞིག་ན། ཆོས་རྣམས་ནམ་མཁའ་ཕྱིས་བལྟས་ཆོས་སུ་འགྲོ་བར་གསུངས་པ་མི་འདུག་པས། བསྒོམ་པ་མེད་ཀྱང་ཅི་ཞིག་ལྟར་ལ་ཤེས་པ་ཁ་ནང་དུ་ལོག་སྟེ་སེམས་ལྷན་ཅིག་སྐྱེས་པའི་དོན་རྟོགས་ནས་རྟོགས་པ་འཆར་བ་ཡང་ཡོད་པར་འདུག་གསུངས།
གཉིས་པ་ཀུ་སཱ་ལི་སྒྲོ་འདོགས་ནང་ནས་གཅོད་པའི་ལུགས་ནི། ཆོས་མང་པོ་གཅིག་ཐོས་བསམ་མ་བྱས་ཀྱང༌། བླ་མ་དམ་པ་གཅིག་དང་མཇལ། མོས་གུས་བྱས་ཏེ་གསུང་རྡོག་པོ་གཅིག་ཙམ་ལ་གཙིགས་སུ་བྱས་ནས་བསྒོམས་པས། བླ་མའི་བྱིན་རླབས་དང་རང་གི་མོས་གུས་ཀྱི་ཤུགས་ཀྱིས་རང་གི་སེམས་ལྷན་ཅིག་སྐྱེས་པ་སྐྱེ་འཆི་མེད་པའི་དོན་རྟོགས་ཏེ། རྟོགས་པ་ཕུན་སུམ་ཚོགས་པ་ཤར་བའི་དུས་སུ། བཀའ་སྡེ་སྣོད་ཀྱི་དོན་མ་ལུས་པ་ཁོང་དུ་ཆུད་ཅིང་སྣང་བ་དཔེ་ཆར་འཆར་བ་ཡིན། དེ་ཙ་ན་པཎྜི་ཏ་མང་པོས་མཐའ་བསྐོར་ཡང༌། ཆོས་ཀྱི་ལན་འདེབས་པ་ལ་ཐོགས་པ་མེད་ཅིང་ཉམ་ང་མེད་པ་འབྱུང༌། དེ་ལ་སྒོམ་འབྱུང་གི་ཤེས་རབ་ཟེར་བ་ཡིན་ལ། རྣལ་འབྱོར་པ་སེང་གེ་ལྟ་བུ་བྱ་བ་ཡང་དེ་ལྟ་བུ་གཅིག་ལ་ཟེར་བ་ཡིན་གསུངས། འོ་ན་དེ་ལྟ་བུ་རང་ཨེ་ཡོད་དམ་སྙམ་ན་ཡོད་དེ་སློབ་དཔོན་བིརྻ་པ་ལྟ་བུའམ། ཏོག་ཙེ་ལྟ་བུ་ཡིན། བླ་མ་ནཱ་རོ་པས་ཏིལླི་པ་མཉེས་པར་བྱས་པ་ལ་བརྟེན་ནས། ནཱ་རོ་པའི་ཐུགས་ལ་ཚིག་དོན་མ་ལུས་པ་དུས་གཅིག་ལ་འཁྲུངས་པ་ཡིན་གསུངས།
དེ་ལྟར་ལུགས་གཉིས་ལས་འོ་སྐོལ་གྱི་བཀའ་བརྒྱུད་རིན་པོ་ཆེ་འདི་ཀུ་སཱ་ལི་སྒྲོ་འདོགས་ནང་ནས་གཅོད་པའི་ལུགས་ཡིན་གསུངས། དེ་ཡང་ངེད་ཀུ་སཱ་ལི་པ་ཡིན་ཟེར་ནས། གདམས་ཆུང་འགའ་རེ་ཡི་གེར་བྲིས་ནས། དེ་དར་གྱིས་དཀྲིས། མཆན་ཁུང་བསེ་དྲི་ཁ་ཤོས་གཅིག་ཏུ་བཅུག་ནས། འདི་ན་སུ་ལ་ཡང་མེད་པའི་གདམས་པ་ཡོད་པ་ཡིན་ཟེར་བ་དེ་ལ་ཀུ་སཱ་ལི་པ་མི་ཟེར། འོ་ན་གང་ཡིན་ན་རྗེ་རིན་པོ་ཆེའི་ཞལ་ནས། ཆོས་གཅིག་ཉམས་སུ་བླངས་པས་འཁོར་འདས་ཀྱི་ཆོས་ཐམས་ཅད་ལ་གོ་རྟོགས་སྐྱེ་བ་གཅིག་བྱུང་ན་དེ་ཀུ་སཱ་ལི་པ་བྱ་བ་ཡིན་གསུངས། ཆོས་གཅིག་ཉམས་སུ་བླངས་ན་འཁོར་འདས་ཀྱི་ཆོས་ཐམས་ཅད་གོ་ནུས་པའི་ཆོས་དེ་གང་ཡིན་སྙམ་ན། བླ་མ་རིན་པོ་ཆེའི་ཞལ་ནས། དེ་ཚིག་ཉུང་ལ་དོན་འདྲིལ་བ་ཉམས་སུ་བླང་བདེ་བ། ཚིག་རྡོག་པོ་གསུམ་ལས་མེད་ཀྱིས་ཁྱེད་ཀྱིས་འདི་བློ་ལ་ཟུང་ལ་ཉམས་སུ་ལོངས་གསུངས། དེ་གང་ཡིན་ན། ལུས་འདི་ཙུག་སྡོད་ལ་སེམས་འདི་ཙུག་ཞོག་དང༌། ཡོན་ཏན་འདི་འདྲ་ཞིག་སྐྱེ་ཡིས་བྱ་བ་གསུམ་པོ་འདི་ལས་མེད་པ་ཡིན་གསུངས། འདི་ལ་ཡང་སངས་རྒྱས་ཀྱི་ཆོས་རེ་རེ་ལུས་སེམས་ཀྱི་བཞག་ཐབས་མི་འདྲ་བ་རེ་རེ། དེ་རྣམས་ལ་ཡོན་ཏན་གྱི་སྐྱེ་ཚུལ་ཐ་དད་པ་རེ་རེ་སྟེ་བསམ་གྱིས་མི་ཁྱབ་པ་གཅིག་གསུངས་པ་ཡིན་ཏེ།
ད་རེས་ཕྱག་རྒྱ་ཆེན་པོ་ལྔ་ལྡན་ལྟ་བུ་གཅིག་ལ་མཚོན་ན། གསུམ་ཡིན་ཏེ། དངོས་པོའི་གནས་ལུགས་དང༌། ལམ་ཉམས་སུ་ལེན་པའི་ཐབས་དང༌། འབྲས་བུ་སྐྱེ་བའི་ཚུལ་དང་གསུམ་ལས།
དངོས་པོའི་གནས་ལུགས་ནི་ལུས་འདི་གདོད་མ་ནས་དཔའ་བོ་མཁའ་འགྲོའམ་ད་ལའི་རང་བཞིན་སངས་རྒྱས་གཅིག་ཡིན་ཏེ། གསང་བ་འདུས་པ་ལས། ས་ཆུ་སྤྱན་དང་མ་མཱ་ཀཱི། །དཀར་དང་སྒྲོལ་མ་ཞེས་བྱ་བ། །མེ་དང་རླུང་དུ་རབ་ཏུ་གྲགས། །རྡོ་རྗེ་སྐྱེ་མཆེད་ཉིད་དག་ཀྱང༌། །བྱང་ཆུབ་སེམས་དཔའི་ད་ལའི་མཆོག །ཅེས་གསུངས་པས་ཤེས་ལ། སེམས་ཀྱི་རང་བཞིན་ནི་གདོད་མ་ནས་རྣམ་པར་དག་པའི་ཆོས་ཀྱི་སྐུ་སངས་རྒྱས་ཡིན་ཏེ། འདའ་ཀ་ཡེ་ཤེས་ནས། སེམས་རྟོགས་ན་སངས་རྒྱས་ཡིན་པས། སངས་རྒྱས་གཞན་དུ་མི་བཙལ་བའི་འདུ་ཤེས་རབ་ཏུ་བསྒོམ་པར་བྱའོ། །གསུངས་པ་ཡིན། ལུས་སེམས་གཉིས་ཀྱི་གནས་ལུགས་འདི་རྟོགས་ན་སངས་རྒྱས་ཡིན་ལ། མ་རྟོགས་ན་འཁོར་བའི་སེམས་ཅན་ཡིན་ཏེ། དབུ་མ་ནས། འཁོར་བ་དང་ནི་མྱ་ངན་འདས། །གཉིས་སུ་ཡོད་པ་མ་ཡིན་ཏེ། །འཁོར་བའི་མཚན་ཉིད་ཤེས་པ་ལ། །མྱ་ངན་འདས་ཞེས་བརྗོད་པ་ཡིན།། གསུངས་པས། གནས་ལུགས་དེས་མ་ཕན་པར་དེ་མངོན་དུ་གྱུར་པར་བྱེད་པ་ལ།
ལམ་ཐབས་ཉམས་སུ་བླངས་པའི་རིམ་པ་གསུངས་པ་ཡིན་པས། ལུས་འདི་ཙུག་སྡོད་ལ། སེམས་འདི་ཙུག་ཞོག་དང༌། ཞེས་པ་འདི་གསུངས་པ་ཡིན། འོ་ན་ལུས་ཅི་ཙུག་འཇོག་པ་ཡིན་སྙམ་ན། བླ་མས་བསྟན་པ་འདི་ཙུག་འཇོག་པ་ཡིན། བླ་མས་བསྟན་པ་གང་ཡིན་ན། བསམ་གཏན་གྱི་འཁྲུལ་འཁོར་གནད་བརྒྱད་དང་ལྡན་པར་འཇོག་པ་ཡིན་ཏེ། རྐང་པ་དཀྱིལ་ཀྲུང་བཅའ་བ་དང༌། ལག་པ་མཉམ་བཞག་བྱ་བ་དང༌། སྒལ་ཚིགས་སྲང་བ་དང༌། ཡང་མགྲིན་པ་གུག་བར་བྱ། མིག་སྣ་རྩེར་དབབ། ལྕེ་རྐན་ལ་སྦྱར། དབང་པོ་ཐུར་དུ་འཆང་བ། དཔུང་པ་རྒོད་གཤོག་བཞིན་ཡངས་པར་བྱ་སྟེ། ལུས་གནད་བརྒྱད་པོ་དེ་ལས་མ་གཡོས་པར་སྡོད་པ་དེ་ལ་ལུས་འདི་ཙུག་སྡོད་བྱ་བ་ཟེར་བ་ཡིན་གསུངས། སེམས་འདི་ཙུག་ཞོག་དང་བྱ་བ་སེམས་ཅི་ཙུག་འཇོག་པ་ཡིན་སྙམ་ན། སེམས་བླ་མས་བསྟན་པ་དེ་ཙུག་འཇོག་པ་ཡིན་ཏེ། གང་ཡིན་ན་ཕྱག་རྒྱ་ཆེན་པོ་ལྔ་ལྡན་དུ་འཇོག་པ་ལ་ཟེར་བ་ཡིན་པས་ལུས་དེ་ཙུག་གཏད་ནས། དང་པོ་བྱམས་པ་དང་སྙིང་རྗེ། བྱང་ཆུབ་ཀྱི་སེམས་ཀྱི་སྟེང་དུ་མ་ཡེངས་པར་སིང་ངེ་འཇོག་པ་ཡིན། གཉིས་པ་དེའི་རྗེས་ལ་རང་གི་ལུས་ཡི་དམ་གྱི་ལྷའི་སྟེང་དུ་བརྒྱན་ལ་སོགས་པ་གསལ་བར་འཇོག་པ་ཡིན། གསུམ་པ་དེའི་རྗེས་ལ་ལུས་ཁོང་སྟོང་སྙིང་པད་མ་འདབ་མ་བརྒྱད་ཀྱི་ལྟེ་བ་ལ་རྩ་བའི་བླ་མ་གསལ་བར་བསྒོམ། བཞི་བ་བློ་སྔ་ཕྱིའི་བར་དེར་བླ་མས་བསྟན་པ་བཞིན་དུ་སེམས་དེ་བཞིན་ཉིད་མ་བཅོས་པའི་ངང་དུ་འཇོག་པ་ཡིན་ཏེ། དེ་ལྟར་བཞག་པས་སེམས་རྣམ་པར་མི་རྟོག་པ་དེའི་ངང་དུ་གནས་ཀྱིན་འདུག་ན། དེ་སྐྱེ་བ་མེད་པའི་སྒོ་བྱ་བ་ཡིན་པས། དེ་ལ་དགའ་བ་མི་བྱ་བར་གནས་ཚད་དུ་ བཞག དེ་ལ་མི་གནས་པར་རྣམ་རྟོག་སྣ་ཚོགས་སུ་སྐྱེ་ན་འགག་པ་མེད་པའི་སྒོ་བྱ་བ་ཡིན་པས། དེ་ལ་མི་དགའ་བ་མི་བྱ་བར་བྱང་ཆུབ་ཀྱི་སེམས་དང༌། ཡི་དམ་དང་བླ་མ་བསྒོམ་མོ། །སེམས་མི་རྟོག་པ་ལ་མི་གནས་པར་རྟོག་པ་སྐྱེ། རྟོག་པ་ལ་ཡང་མི་གནས་པར་འཕྲོ་ན། གནས་པ་མེད་པའི་སྒོ་བྱ་བ་ཡིན་པས། ཆགས་སྡང་མི་བྱ་བར་གང་བྱུང་ཡོན་ཏན་དུ་ཤེས་པར་བྱས་ལ། སེམས་མ་བཅོས་པ་ལ་བཞག ལྔ་བ་བསྔོ་བ་ཞེ་ཐག་པ་ནས་བྱ། དེ་སེམས་འདི་ཙུག་བྱ་བྱ་བ་ཡིན། དེ་ལྟར་ལམ་ལྔ་ལྡན་ཉམས་སུ་བླངས་པས།
འབྲས་བུའི་འབྱུང་ཚུལ་ནི། ཡོན་ཏན་འདི་འདྲ་གཅིག་སྐྱེ་ཡི་བྱ་བ་ཡིན་གསུངས། ཡོན་ཏན་ཅི་འདྲ་གཅིག་སྐྱེ་ན་བླ་མས་བསྟན་པའི་ལུས་སེམས་གཉིས་ཀྱི་དགེ་སྦྱོར་སྐྱེ་བ་དེ། དེ་ཡང་དང་པོ་ལུས་དེ་ལྟར་བཞག་པས་ལུས་ཀྱི་ཡོན་ཏན་གཅིག་སྐྱེ། རྐང་པ་དཀྱིལ་ཀྲུང་བཅས་པས་ཟས་མི་འཇུ་བ་མི་འོང༌། ཁ་སྨྲས་ཀྱི་བར་དུ་མི་ཚུགས། གནད་དེས་ས་རླུང་ལ་གནད་དུ་འགྲོ་ཞིང༌། ས་རླུང་དབང་དུ་འདུ་བའི་ཡོན་ཏན་འབྱུང་བ་དང༌། ལག་པ་མཉམ་བཞག་བྱས་པས། མེ་རླུང་ལ་གནད་དུ་འགྲོ་ཞིང༌། མེ་རླུང་དབང་དུ་འདུ་བའི་ཡོན་ཏན་འབྱུང་བ་དང༌། གནད་དེས་བདེ་བའི་ཏིང་ངེ་འཛིན་འབྱུང་བ་ཡིན། ཚིགས་སྲང་པ་དང༌། དཔུང་པ་ཡངས་པར་བྱས་པས། ཁྱབ་བྱེད་ཀྱི་རླུང་ལ་གནད་དུ་འགྲོ་ཞིང་དབང་དུ་འདུས་རླུང་རང་གནས་སུ་ཚུད་པས། རྩ་ཟུག་རླུང་ཟུག་སྙིང་ཟུག་ཡོང་བའི་སྐྱོན་མི་འབྱུང་བ། མགྲིན་པ་དགུ་བར་བྱས་པས་རྩ་མགོ་མནན་པས། རླུང་གི་རླུང་ལ་གནད་དུ་འགྲོ་ཞིང༌། དབང་དུ་འདུས་པའི་ཡོན་ཏན་འབྱུང༌། མི་རྟོག་པའི་ཏིང་ངེ་འཛིན་སྐྱེའོ། །རླུང་གི་རླུང་ལ་གནད་དུ་འགྲོ་ཞིང༌། དབང་དུ་འདུས་པའི་ཡོན་ཏན་འབྱུང༌། མི་རྟོག་པའི་ཏིང་ངེ་འཛིན་སྐྱེའོ། །ལྕེ་རྐན་ལ་སྦྱར་བ་དང༌། དབང་པོ་ཐུར་དུ་འཕྱང་པས། ཆུ་རླུང་ལ་གནད་དུ་འགྲོ་ཞིང་དབང་དུ་འདུས་པ་ཡིན། ཁ་ཆུ་སྣ་ཆུ་མི་འབྱུང་ངོ༌། །མིག་སྣ་རྩེར་ཕབ་པས་ནམ་མཁའི་རླུང་ལ་གནད་དུ་འགྲོ་ཞིང༌། དབང་དུ་འདུས་པ་ཡིན། དེས་གསལ་བའི་ཏིང་ངེ་འཛིན་སྐྱེའོ། །ཡང་འཁྲུལ་འཁོར་དེ་ལ་གནས་པས་ལུས་ངག་མི་དགེ་བ་བདུན་སྤངས་པས། སྤོང་བ་བདུན་གྱི་ཚུལ་ཁྲིམས་འོང་སྟེ། ལྷག་པ་ཚུལ་ཁྲིམས་ཀྱི་བསླབ་པར་འོང༌། ལུས་གནད་དེས་རྟོག་པ་གཞན་དུ་མ་སྤངས་པས་ལྷག་པ་སེམས་ཀྱི་བསླབ་པར་འོང༌། ལུས་སེམས་གཉིས་སྟོང་པར་ཤེས་པའི་ལུས་གནད་རེ་ལ། ཡོན་ཏན་དང་སྐྱོན་སྐྱེད་པར་ཤེས་པའི་དུས་སུ་ལྷག་པ་ཤེས་རབ་ཀྱི་བསླབ་པར་འོང་གསུངས། ཡང་འཁྲུལ་འཁོར་ལ་གནད་དུ་བསྣུན་པས་གནས་སྐབས་དང་མཐར་ཐུག་ཐམས་ཅད་དུ་བྱང་ཆུབ་སྙིང་པོ་ལ་བྱོན་ནས་སངས་རྒྱས་པའི་འཁྲུལ་འཁོར་ནས་བཟུང་ནས། ཐ་མ་གཉིད་ལོག་པའི་ལུས་གནད་ཀྱི་བར་དུ་ལུས་གནད་ཐ་དད་པའི་སྒོ་ནས་སེམས་ཅན་གྱི་དོན་འབྱུང་བ་ནི་སྤྲུལ་པའི་སྐུ་ཡིན། ལུས་གནད་དེས་ལུས་ལ་ཐིག་ལེ་གནས་པས། རང་བཞིན་བདེ་བ་ཆེན་པོར་ལོངས་སྤྱོད་པའི་ལྷར་ཤར་བའི་སྒོ་ནས་སེམས་ཅན་གྱི་དོན་འབྱུང་བ་ནི་ལོངས་སྤྱོད་རྫོགས་པའི་སྐུ་ཡིན་ལ། འཁྲུལ་འཁོར་དེ་ལ་གནད་དུ་བསྣུན་པས། སེམས་སྤྲོས་པའི་མཐའ་ཐམས་ཅད་དང་བྲལ་བ་ཆོས་ཀྱི་སྐུར་རྟོགས་པ་ནི། ཆོས་ཀྱི་སྐུའི་སངས་རྒྱས་ཡིན་ཏེ། འཇམ་དཔལ་ནས། རྡོ་རྗེ་དཀྱིལ་ཀྲུང་རྫོགས་སངས་རྒྱས། །ཞེས་གསུངས་པ་དེ་ལྟ་བུ་ཡིན་གསུངས། དེ་ནས་སངས་རྒྱས་སངས་རྒྱས་པའི་དུས་སུ་ཡང་ལུས་གནད་དེ་ཉིད་ཀྱིས་དོན་གྲུབ་པར་མཛད་པ་ཡིན། དེའི་དུས་སུ་ཕྱག་གཡས་པ་ནམ་མཁའ་ལ་མ་སླང་སྟེ། ས་མནོན་མཛད་ནས་སངས་རྒྱས་པ་ཡིན་ཏེ། དེ་ལ་དགོས་པ་ཁྱད་པར་ཅན་གཅིག་ཡོད་པར་འདུག་གསུངས། དེས་མྱ་ངན་ལས་པའི་ཆོས་ཐམས་ཅད་ལུས་གནད་དུ་གོ་བ་བྱ་བ་དེ་ལྟ་བུ་ཡིན་ལ། ཡང་ལུས་གཡས་སུ་ཡོ་ན་ཞེ་སྡང་སྐྱེ་ཞིང་ཕོ་གདོན་གྱིས་བར་དུ་གཅོད། གཡོན་དུ་ཡོ་ན་ཆགས་པ་སྐྱེ་ཞིང་མོ་གདོན་གྱིས་བར་དུ་གཅོད། རྒྱབ་ཏུ་དགྱེ་ན་ཀླུ་བཙན་གྱིས་བར་དུ་གཅོད། མདུན་དུ་དགུ་ན་གཏི་མུག་སྐྱེ་ཞིང་ས་བདག་གིས་བར་དུ་གཅོད། དེ་ལྟར་དུག་གསུམ་སྐྱེད་པས་ལུས་ངག་ཡིད་གསུམ་གྱིས་ལ་སོགས་པས། རིགས་དྲུག་ཏུ་རྟེན་འབྲེལ་བཅུ་གཉིས་ཀྱི་ཚུལ་དུ་འཁོར་བར་འཁྱམས་པར་ཤེས་པ་ནི་འཁོར་བའི་འདུག་ལུགས་གོ་བ་ཡིན་ཏེ། མཚན་བརྗོད་ལས། ལུས་མེད་ལུས་ཏེ་ལུས་ཀྱི་མཆོག །ལུས་ཀྱི་མཐའ་ནི་རྟོགས་པ་པོ། །ཞེས་གསུངས་པ་ཡང༌། དེ་ལྟ་བུ་ཡིན་གསུངས། དེས་ན་ལུས་གནད་རེ་རེས་འཁོར་འདས་ཀྱི་བྱུང་ཚུལ་ཐ་དད་པ་བསྐྱེད་པར་ཤེས་པའི་དུས་སུ། གསང་བ་རྟེན་འབྲེལ་ལུས་གནད་ཤེས་པ་བྱ་བར་འོང༌།
ཡང་དེར་འཁྲུལ་འཁོར་གྱི་ཡོན་ཏན་ཐོབ་པས་འཁྲུལ་འཁོར་གྱི་དངོས་གྲུབ་བྱ་བ་ཡོང་བ་ཡིན་གསུངས། དེ་ཙ་ན་འཁོར་འདས་ཀྱི་ཆོས་ཐམས་ཅད་ལུས་གནད་ཀྱི་འཁོར་ལོ་གཅིག་པུ་གོ་བས་ཆོས་ཐམས་ཅད་གོ་བ་ཡིན་པས་ཆོས་ཆུང་བ་མིན་གསུངས། ནང་རྟེན་འབྲེལ་ལུས་ཀྱི་འཁྲུལ་འཁོར་དུ་གོ་བའི་དུས་སུ། དགེ་སྦྱོར་ཅི་བྱས་པ་ཐམས་ཅད་ལུས་གནད་དུ་གོ་བ་དང༌། ཕྱིའི་སྣང་བ་ཐམས་ཅད་ལུས་གནད་དུ་གོ་བ་སྟེ། བསམ་པ་དེས་གསང་བ་རྟེན་འབྲེལ་ལུས་བྱིན་གྱིས་རླབས་ནས་ལུས་དེ་འཁྲུལ་འཁོར་གྱི་ལུས་སམ། རྟེན་འབྲེལ་གྱི་སྐུ་བྱ་བ་གཅིག་ཏུ་གྱུར་པའི་དུས་སུ། ལྟ་སྟངས་ལ་སོགས་ལུས་ཀྱི་གནད་རེ་རེས་སེམས་ཅན་གྱི་གནད་རེ་རེས་སེམས་ཅན་གྱི་དོན་མང་པོ་འགྲུབ་པ་དང༌། རང་གི་ལུས་མཐོང་བ་ཙམ་གྱིས་གཞན་གྱི་ཡོན་ཏན་བསྐྱེད་ཅིང་སྐྱོན་སེལ་བར་ནུས་པ་འབྱུང་གསུངས། གསང་བ་རྟེན་འབྲེལ་སྣང་བ་བྱིན་གྱིས་རླབས་པའི་དུས་སུ། རྡོ་རྗེ་ལུས་ཀྱི་གནས་ལུགས་མངོན་དུ་གྱུར་པ་ཡིན་བྱ་བའི་སྙན་པ་བྱུང་ནས། གཞན་གྱིས་བསྙེན་བཀུར་བྱེད་པ་འོང༌། འཁྲུལ་འཁོར་གཙིགས་སུ་བྱེད་པའི་འཁོར་འདུས་ནས་རང་གི་དོན་གྲུབ་འོང་བ་དང༌། གང་དུ་ཕྱིན་པ་ཐམས་ཅད་དུ་འཁྲུལ་འཁོར་གྱིས་འཕྲིན་ལས་བཞིའི་སྒོ་ནས་སེམས་ཅན་སྨིན་གྲོལ་བྱེད་པ་འབྱུང་སྟེ། དེ་ཆོས་ཆེ་བ་ཡིན་གསུངས།
གཉིས་པ་སེམས་ལྔ་ལྡན་གྱི་སྟེང་དུ་བཞག་པའི་ཡོན་ཏན་ནི། དང་པོ་བྱང་ཆུབ་ཀྱི་སེམས་ཀྱི་སྟེང་དུ་སེམས་བཞག་པའི་ཡོན་ཏན་ནི། བྱམས་སྙིང་རྗེ་བྱང་ཆུབ་སེམས་ཀྱི་རང་བཞིན་དུ་གྱུར་པའི་དུས་སུ། ཆགས་སྡང་ལ་སོགས་པའི་རྟོག་པས་མ་གཙེས་པར་ལུས་སེམས་བདེ་བ་ནི་བདེ་བ། གཞན་དོན་དུ་གསལ་བ་ནི་གསལ་བ། བྱང་ཆུབ་ཀྱི་སེམས་དེ་གསལ་ཡང་དེ་ལས་གཞན་པའི་རྟོག་པ་མེད་པ་ནི། མི་རྟོག་པར་འོང་གསུངས། ཡང་བསམ་པ་བྱང་ཆུབ་ཀྱི་སེམས་དེས་ཞེ་སྡང་ལ་སོགས་པའི་རྟོག་པ་སྤངས་པ་ནི་ཚུལ་ཁྲིམས་ཀྱི་བསླབ་པ། གཞན་དོན་དེའི་སྟེང་ན་སེམས་གནས་པ་ནི་ཏིང་ངེ་འཛིན་གྱི་སླབ་པ་ཡིན། བསམ་པ་བཟང་པོ་རེ་རེས་འཕྲིན་ལས། བསམ་གྱིས་མི་ཁྱབ་པ་འགྲུབ་པར་ཤེས་པའམ། སེམས་སྟོང་པ་ཉིད་དོན་དམ་པ་བྱང་ཆུབ་ཀྱི་སེམས་ཀྱི་རང་བཞིན་དུ་རྟོགས་པ་ནི་ལྷག་པ་ཤེས་རབ་ཀྱི་བསླབ་པར་འོང་གསུངས། ནང་རྟེན་འབྲེལ་བྱང་ཆུབ་ཀྱི་སེམས་ཀྱི་བསམ་པ་དེས། གསང་བ་རྟེན་འབྲེལ་ལུས་བྱིན་གྱིས་བརློབ་པ། རྡོ་རྗེའི་ལུས་དེ་ཉིད་ཀུན་རྫོབ་བྱང་སེམས་ཐིག་ལེས་གང་བས་ལུས་བདེ་བ་ཆེན་པོ་བྱང་ཆུབ་ཀྱི་སེམས་སུ་རོ་གཅིག་པ་དང༌། ཕྱིའི་སྣང་བ་ཐམས་ཅད་སྒྱུ་མར་འཆར་བ་དང༌། ལུས་མཐོང་བ་ཙམ་གྱིས་ཕ་རོལ་གྱི་ཞེ་སྡང་ལ་སོགས་པ་ཞི་བར་ནུས་པ་དང༌། གཞན་བློ་གཏོད་ཅིང་བག་ཕེབས་པ་དང༌། བྱམས་སྙིང་རྗེ་བྱང་ཆུབ་ཀྱི་སེམས་སྐྱེ་བར་ནུས་པ་འབྱུང༌། གསང་བ་རྟེན་འབྲེལ་བྱང་ཆུབ་སེམས་ཀྱི་ལུས་དེས། ཕྱི་རྟེན་འབྲེལ་སྣང་བ་བྱིན་གྱིས་བརླབས་ཏེ། བྱང་ཆུབ་ཀྱི་ཐུགས་འབྱོངས་པ་ཡིན་བྱ་བའི་སྙན་པའི་སྒོ་ནས་གཞན་བསྙེན་བཀུར་དང་ཞབས་ཏོག་བྱེད་པ་དང༌། སེམས་གསུམ་ལ་གཙོར་བྱེད་པའི་འཁོར་འདུས་ནས་རང་གི་འཕྲིན་ལས་སྒྲུབ་པ་དང༌། གང་དུ་ཕྱིན་པ་ཐམས་ཅད་དུ་བྱམས་སྙིང་རྗེ་བྱང་ཆུབ་སེམས་ཀྱིས་སེམས་ཅན་སྨིན་གྲོལ་བྱེད་པ་དང༌། སེམས་བསྐྱེད་ཞུ་བ་མང་པོ་འབྱུང་བ་དང༌། རིན་པོ་ཆེའི་བྱེ་བྲག་མང་པོ་འབུལ་བ་འབྱུང་གསུངས། མཐར་ཐུག་སངས་རྒྱས་སྤྲུལ་པའི་སྐུར་བྱོན་ནས་འཁོར་བ་མ་སྟོངས་ཀྱི་བར་དུ་མཆོག་དང་སྐྱེ་དམན་སྤྲུལ་པའི་སྒོ་ནས་སེམས་སྨིན་གྲོལ་བྱེད་པ་འབྱུང༌། ཡང་དོན་བྱེད་མཁན་དང་བྱ་རྒྱུ་དང་བྱས་པ་ལས་བྱུང་བའི་འབྲས་བུ་གསུམ་རང་གི་སེམས་ལ་སེམས་སྟོང་ཉིད་དུ་རྟོགས་པ་ནི་ཆོས་སྐུ་ཡིན་ལ། སྣང་བ་དང་སྟོང་པ་གཉིས་སུ་མེད་པར་བདེ་བ་ཆེན་པོར་ལོངས་སྤྱོད་པ་ནི་ལོངས་སྤྱོད་རྫོགས་པའི་སྐུ་ཡིན་ཏེ། བྱང་ཆུབ་སེམས་ཀྱི་རང་བཞིན་སྐུ། །དཔལ་ལྡན་རྡོ་རྗེ་འཆང་ལ་འདུད། །ཅེས་གསུངས་པ་ཡང་དེ་ལྟ་བུ་ལ་ཟེར་བ་ཡིན་གསུངས། མ་སེམས་ཅན་མར་མ་ཤེས་པའི་དོན་དམ་པ་བྱང་ཆུབ་ཀྱི་སེམས་དེ་ཁོ་ན་ཉིད་མ་ཤེས་པས་མ་རིག་པ། དེས་བདག་གཞན་དུ་བཟུང་བས་ལས་བསགས་ནས་སྲིད་པ་གསུམ་དུ་འཁོར་བར་ཤེས་པའི་དུས་སུ་འཁོར་བའི་འདུག་ལུགས་ཤེས་པ་ཡིན། དེས་ན། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་ཡིན། །ཞེས་གསུངས་པ་ཡང་དེ་ལྟ་བུ་ཞིག་ལ་ཟེར་བ་ཡིན། དེས་ན་བྱང་ཆུབ་ཀྱི་སེམས་གཅིག་པུ་གོ་བས་འཁོར་འདས་ཀྱི་ཆོས་ཐམས་ཅད་གོ་བ་ཡིན་གསུངས། སྡུད་པ་ལས། བྱང་ཆུབ་སེམས་མེད་རྒྱལ་འབྱུང་འཇིག་རྟེན་ཡོད་མེད་ན། །འབྲས་བུ་བརྒྱ་བྱིན་ཚངས་པ་ཉན་ཐོས་ག་ལ་འབྱུང༌། །གསུངས་པ་ཡང་དེ་ལྟ་བུ་ཞིག་ལ་ཟེར་བ་ཡིན་གསུངས། གཉིས་པ་ཡི་དམ་གྱི་ལྷ་ལ་སེམས་བཞག་པའི་ཡོན་ཏན་གང་ཡིན་ནི། རང་གི་སེམས་ཡི་དམ་གྱི་ལྷ་རྒྱན་ཆ་ལུགས་ལ་སོགས་པ་གསལ་བའི་དུས་སུ་དགེ་སྦྱོར་ཅི་བྱས་པ་ཐམས་ཅད་ཀྱང་ལྷའི་རྣམ་པར་འཆར་བ་དང༌། ཕྱིའི་སྣང་བ་ཐམས་ཅད་ལྷར་འཆར་ཞིང་སྣོད་ཐམས་ཅད་གཞལ་ཡས་ཁང་དུ་འཆར་ཏེ། དེ་ལྟར་རང་ལྷར་གསལ་བའི་དུས་སུ། ལུས་སེམས་གཉིས་བདེ་ཆེན་དུ་ཤར་བ་ནི་བདེ་བ། རང་ལྷར་གསལ་བ་ནི་གསལ་བ། རང་སེམས་ལྷའི་རྒྱན་ཆ་ལུགས་ལ་སོགས་པར་གསལ་ཀྱང་དེའི་རྗེས་སུ་རྟོག་པ་མི་འབྲང་པ་ནི་མི་རྟོག་པར་འོང་གསུང༌། ཡང་གསལ་བའི་དུས་སུ་ཐ་མལ་དང་ཞེ་སྡང་ལ་སོགས་པའི་རྟོག་པ་སྤངས་པ་ནི་ལྷག་པ་ཚུལ་ཁྲིམས་ཀྱི་བསླབ་པ། ལྷ་གསལ་བའི་སྟེང་དུ་སེམས་གནས་པ་ནི་ཏིང་ངེ་འཛིན་གྱི་བསླབ་པ། ཕྱག་མཚན་ལ་སོགས་པའམ་རྒྱན་ལ་སོགས་པ་རེ་རེས་འཕྲིན་ལས་ཐ་དད་པ་འགྲུབ་པར་ཤེས་པའི་ལྷ་སེམས་སྐྱེ་བ་མེད་པར་ཤེས་པ་ནི་ལྷག་པ་ཤེས་རབ་ཀྱི་བསླབ་པར་འོང་བ་ཡིན་གསུངས། དེ་ལྟར་ན་ནང་རྟེན་འབྲེལ་སེམས་ཡི་དམ་ལྷར་གསལ་བའི་བསམ་པ་དེས། གསང་བ་རྟེན་འབྲེལ་ལུས་བྱིན་གྱིས་བརླབས་པའི་དུས་སུ། རྡོ་རྗེའི་ལུས་ལ་རྩ་དང་རླུང་དང༌། ཐིག་ལེ་དང་ཡི་གེ་དང་གནས་ཀྱི་ཚུལ་དུ་ལྷའི་རང་བཞིན་དུ་ཡོད་པ་དང་གཉིས་སུ་མེད་པར་གྱུར་ཏེ་ལུས་ལྷའི་རང་བཞིན་དུ་གྱུར་པའི་དུས་སུ། རྒྱུད་དག་པ་རྣམས་ཀྱིས་ལྷར་མཐོང་བ་དང༌། སྤྱན་གཟིགས་པ་ཙམ་གྱིས་གདོན་སྐྲག་པ་དངངས་ནུས་པ་དང༌། མཆིལ་མ་བཏབ་པས་ནད་ཞི་བ་དང༌། ལུས་ཀྱིས་རེག་པ་ཙམ་གྱིས་གནོད་པ་ལ་སོགས་ཞི་བར་འབྱུང་གསུངས། གསང་བ་རྟེན་འབྲེལ་ལུས་ལྷར་སྣང་བ་དེས། ཕྱིའི་རྟེན་འབྲེལ་སྣང་བ་བྱིན་གྱིས་བརླབས་ཏེ། ཡི་དམ་ལྷ་ལ་བརྟན་པ་ཐོབ་པ་ཡིན་བྱ་བའི་སྒོ་ནས་བསྙན་བཀུར་དང་ཞབས་ཏོག་བྱེད་པ་འབྱུང་བ་དང༌། དཔའ་བོ་དང་ཌཱ་ཀི་ཐམས་ཅད་དབང་དུ་འདུ། ལྷའི་ཏིང་ངེ་འཛིན་ལ་མནོ་བསམ་བྱེད་པའི་འཁོར་འདུས་ནས་འཕྲིན་ལས་སྒྲུབ་པ་དང༌། གང་དུ་ཕྱིན་ཡང་ཐམས་ཅད་དུ་དབང་ཞུ་བ་དང༌། བསྐྱེད་རྫོགས་ཞུ་བ་མང་པོ་བྱུང་ནས་གཞན་དོན་རྒྱ་ཆེན་པོ་འགྲུབ་པ་དང༌། ཡེ་ཤེས་ཀྱི་ཆོས་སྐྱོང་བ་ཐམས་ཅད་དབང་དུ་འདུས་ནས་འཕྲིན་ལས་བཞི་ཡིས་སེམས་ཅན་སྨིན་ཅིང་གྲོལ་བར་བྱེད་པ་འབྱུང་གསུངས། མཚན་བརྗོད་ནས། རྒྱུ་འཕྲུལ་དྲྭ་བའི་ཚུལ་སྟན་པ། །འདི་ནི་རྣམ་དག་ལེགས་པའི་ལམ། །ཞེས་གསུངས་པ་ཡང་དེ་ལྟ་བུ་གཅིག་ལ་ཟེར་བ་ཡིན་གསུངས། མཐར་ཐུག་སངས་རྒྱས་པའི་དུས་སུ། ལྷ་སྐུ་སྣ་ཚོགས་སུ་སྣང་ཞིང༌། དོན་དམ་པ་ཆོས་ཀྱི་སྐུར་རྟོགས་པ་ནི། ཆོས་ཀྱི་སྐུར་སངས་རྒྱས་སུའོ། །ལྷའི་སྐུ་བདེ་བ་ཆེན་པོ་དང་སྟོང་པ་གཉིས་སུ་མེད་པ་བདེ་བ་ཆེན་པོར་ལོངས་སྤྱོད་པ་ནི། ལོངས་སྤྱོད་རྫོགས་པའི་སངས་རྒྱས་ཀྱི་སྐུར་གྱུར་ནས་དཀྱིལ་འཁོར་གྱི་འཁོར་ལོར་སྣང་ནས། ལྷ་དཔའ་བོ་གཅིག་པའི་སྣང་བའི་སྒོ་ནས་དུས་འཁོར་བ་མ་སྟོངས་ཀྱི་བར་དུ་སེམས་ཅན་གྱི་དོན་དུ་འབྱུང་བ་ནི་ལོངས་སྐུའི་སངས་རྒྱས་ཡིན་ཏེ། རྡོ་རྗེ་འཕྲེང་བ་ནས། སྒྱུ་མ་ལྟ་བུའི་ཏིང་ངེ་འཛིན་གནས། །བར་དོའི་གྲོང་ཁྱེར་དེས་མི་མཐོང༌། །ཞེས་གསུངས་པ་དེ་ལྟ་བུ་གཅིག་ལ་ཟེར་བ་ཡིན་གསུངས། ཡང་རང་ལྷར་མ་ཤེས་ཤིང་ཐ་མལ་དུ་ཞེན་པས་དུག་གསུམ་གྱིས་ལུས་ངག་ཡིད་གསུམ་གྱིས་ལས་བསགས་པས། ཁམས་གསུམ་སྐྱེ་འཆིའི་དུ་ཁཿལ་ཟོ་ཆུན་གྱི་ཁྱུད་མོ་བཞིན་འཁོར་བར་གོ་བ་ནི་འཁོར་བའི་འདུག་ལུགས་གོ་བ་སྟེ། སྡུད་པ་ནས། ཡེ་ཤེས་ཚུལ་སྒོ་ཐབས་དང་རྩ་བ་ཇི་སྙེད་པ། །དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང༌། །ཞེས་གསུངས་པ་ཡང་དེ་ལྟ་བུ་གཅིག་ལ་ཟེར་བ་ཡིན་གསུངས། དེ་ལྟར་གོ་བས་འཁོར་འདས་ཐམས་ཅད་གོ་བ་བྱ་བ་ཡིན་ཏེ། ཆོད་དེ་ཆེ་བ་ཡིན་གསུངས།།
གསུམ་པ་སྙིང་གི་དཀྱིལ་དུ་བླ་མའི་སྟེང་དུ་སེམས་བཞག་པའི་ཡོན་ཏན་ནི། བླ་མ་གསལ་ཞིང་རང་གི་སེམས་དང་བླ་མའི་སྐུ་གསུང་ཐུགས་དབྱེ་བ་མེད་པར་གྱུར་ཏེ་རང་སེམས་བླ་མ་སོང་བའི་དུས་སུ། དགེ་སྦྱོར་ཅི་བྱས་ཐམས་ཅད་བླ་མའི་འཕྲིན་ལས་སུ་འཆར་བ་དང༌། ཕྱིའི་སྣང་བ་ཐམས་ཅད་བླ་མའམ་སློབ་དཔོན་དུ་འཆར་ལ་བླ་མའི་སྟེང་དུ་སེམས་གནས་ཤིང་གསལ་དུས་སུ་ལོག་རྟོག་གི་ལུས་སེམས་མ་གཙེས་ཏེ། ལུས་སེམས་བདེ་ལ།
རང་སེམས་བླ་མར་གསལ་བ་ནི། གསལ་བ་ཡིན། བླ་མའི་འཕྲིན་ལས་སྣ་ཚོགས་གསལ་ཡང་དེའི་རྗེས་སུ་རྟོག་པ་མི་འབྲང་བ་ནི་མི་རྟོག་པའོ། །ཡང་བླ་མའི་སྟེང་དུ་སེམས་གནས་པའི་དུས་སུ་ཉོན་མོངས་པའི་རྟོག་པ་སྤངས་པ་ནི་ལྷག་པ་ཚུལ་ཁྲིམས་ཀྱི་བསླབ་པ་ལ།
ཕྱི་ནང་གསང་གསུམ་གྱི་བླ་མའི་སྟེང་ན་སེམས་གནས་པ་ནི། ཏིང་ངེ་འཛིན་གྱི་བསླབ་པ་ཡིན། བླ་མའི་འཕྲིན་ལས་སྣ་ཚོགས་ཤེས་པའམ།
བླ་མར་འཛིན་པའི་སེམས་སྐྱེ་བ་མེད་པར་ཤེས་པ་ནི། ལྷག་པ་ཤེས་རབ་ཀྱི་བསླབ་པར་འོང་གསུངས། ནང་རྟེན་འབྲེལ་རང་གི་སེམས་བླ་མར་གསལ་བའི་བསམ་པ་དེས། གསང་བ་རྟེན་འབྲེལ་ལུས་བྱིན་གྱིས་བརླབས་ཏེ། རང་ལུས་བླ་མའི་སྐུར་གྱུར་པའི་དུས་སུ། གཞན་གྱི་ལམ་སྣ་འདྲེན་པའི་བླ་མ་བྱ་བར་རེད་ནས། གཞན་སངས་རྒྱས་ལ་འགོད་པའི་ནུས་པ་འབྱུང་བ་དང་མཚན་ཐོས་པའམ་གསུང་ཙམ་གྱིས་གཞན་དད་གུས་སྐྱེ་ནུས་པ་དང༌། དགེ་སྦྱོར་ལ་སོགས་ཡོན་ཏན་བསྐྱེད་པ་དང༌། སྐྱོན་འདག་ནུས་པ་འབྱུང༌། ཡང་གསང་བ་རྟེན་འབྲེལ་ལུས་ཀྱིས་སྣང་བ་བྱིན་གྱིས་བརླབས་ཏེ་མཚན་ཉིད་དང་ལྡན་པའི་བླ་མ་ཡིན་བྱ་བའི་སྙན་པའི་སྒོ་ནས་གཞན་བསྙེན་བཀུར་དང་ཞབས་ཏོག་བྱེད་པ་འབྱུང་བ་དང༌། མོས་གུས་ལ་གཙིགས་སུ་བྱེད་པའི་འཁོར་འདུས་ནས། རང་གི་འཕྲིན་ལས་སྒྲུབ་པ་དང༌། སངས་རྒྱས་སུ་ལྟ་བ་དང༌། གང་དུ་བྱོན་པ་ཐམས་ཅད་སྐུ་གསུང་ཐུགས་ཀྱི་རྣམ་པར་ཐར་པ་མཛད་པ་ཐམས་ཅད་ཀྱིས། སེམས་ཅན་སྨིན་ཅིང་གྲོལ་བའི་འཕྲིན་ལས་གྱི་དོན་འགྲུབ་པ་ཡིན་གསུངས། མཚན་བརྗོད་ནས། འགྲོ་བའི་བླ་མ་སྟོན་པ་པོ། །དམ་ཚིག་ཆེན་པོ་དེ་ཉིད་མཁྱེན། །གསུངས་པ་ཡང་དེ་ལྟ་བུ་གཅིག་ལ་ཟེར་བ་ཡིན་གསུངས། མཐར་ཐུག་སངས་རྒྱས་པའི་དུས་སུ། རང་སེམས་བླ་མ་དག་པ་གཉིས་ལྡན་ཆོས་ཀྱི་སྐུའི་སངས་རྒྱས་སུ་འགྱུར་ལ། དེའི་ངང་ལ་གནས་པ་དང་སྟོང་པ་གཉིས་སུ་མེད་པར་བདེ་ཆེན་དུ་ལོངས་སྤྱོད་པས་ལོངས་སྐུའི་སངས་རྒྱས་ས་ལ་གནས་པའི་བྱང་ཆུབ་སེམས་དཔའི་བླ་མར་སྣང་བ་དང༌། ཚོགས་ལམ་ཆེན་པོ་ལ་སྤྲུལ་སྐུའི་བླ་མར་སྣང་བ་ནས་བཟུང་སྟེ་ལོ་ཀའི་སྲིན་བུ་ལ་བུང་བའི་སྐད་དུ་ཆོས་སྟོན་པའི་བླ་མའམ། ཀ་ཁ་སློབ་པ་ལ་སོགས་པའི་སྒོ་ནས་དུས་འཁོར་བ་མ་སྟོངས་ཀྱི་བར་དུ་སེམས་ཅན་གྱི་དོན་འབྱུང་བར་གོ་བ་མྱ་ངན་ལས་འདས་པའི་འདུག་ཚུལ་ལོ། །
དགོས་འདོད་ཐམས་ཅད་འབྱུང་བ་ནི། ཆོས་གསུམ་དང་ལྡན་པའི་རིན་པོ་ཆེ། །ཞེས་གསུངས་པ་ཡང་དེ་ལྟ་བུ་གཅིག་ལ་ཟེར་བ་ཡིན་གསུངས། ཡང་དང་པོ་བླ་མ་མ་གཤེགས་བར་དུ་མོས་གུས་མ་ཤེས། ཐ་མར་ལོག་པའི་སློབ་དཔོན་གྱིས་ཟིན་ཏེ། སློབ་དཔོན་གྱི་རྟེན་འབྲེལ་མ་འགྲིག་པས། སྲེད་ལེན་དང་ལས་ཀྱི་དུཿཁའི་འཁྲུལ་འཁོར་དུ་གྱུར་ཏེ། འཁོར་བར་འཁོར་བ་ཤེས་པ་ནི་འཁོར་བའི་འདུག་ཚུལ་ཡིན་ཏེ། སྡུད་པ་ནས། རྐྱེན་རྣམས་འཚོགས་ནས་སྡུག་བསྔལ་འཁྲུལ་འཁོར་རབ་ཏུ་འབྱུང༌། །མ་རིག་འཁྲུལ་འཁོར་འདི་ནི་ཟད་མེད་འཕེལ་བ་མེད། །ཅེས་གསུངས་པ་ཡང་དེ་ལྟ་བུ་གཅིག་ལ་ཟེར་བ་ཡིན་གསུངས། བླ་མའི་མོས་གུས་གཅིག་པུ་གོ་བས་འཁོར་འདས་ཀྱི་ཆོས་ཐམས་ཅད་གོ་བ་ཡིན་ཏེ། དེ་ཡང་ཆོས་ཆུང་བ་མིན་གསུངས་སོ།།
བཞི་པ་ཕྱག་རྒྱ་ཆེན་པོ་ལ་སེམས་མ་ཡེངས་པའི་ངང་དུ་སེམས་བཞག་པའི་ཡོན་ཏན་ནི། བླ་མ་སྔ་ཕྱིའི་བར་དེ་སེམས་མ་བཅོས་པ་སོ་མའི་ངང་དུས་དེར་ཐང་ལྷོད་ཐམས་ཅད་བྲལ་བར་བཞག་པས། བླ་མས་བསྟན་པའི་དགེ་སྦྱོར་གཅིག་སྐྱེ་སྟེ། དེ་ཅི་འདྲ་གཅིག་སྐྱེ་ན། སེམས་རྣམ་པར་མི་རྟོག་པ་གསལ་སིང་ངེ་བ་སྐད་ཅིག་མ་ཙམ་ཞིག་སྐྱེ་སྟེ། དེ་ག་བླ་མས་བསྟན་པའི་ཕྱག་རྒྱ་ཆེན་པོ་ཡིན། ངོ་ཤེས་པར་བྱས་ནས་སྐྱོང་དགོས་ཏེ། དེ་ག་རང་སེམས་སངས་རྒྱས་ཆོས་སྐུ་ཡིན། སེམས་རྟོག་མེད་གསལ་སྟོང་སྐད་ཅིག་མ་དེ་ག་སྒོམ་ཡིན་དགེ་སྦྱོར་ཡིན་ཏེ། དེ་ག་ལ་བླ་མ་ཏིལླི་པས། ཀྱེ་ཧོ་འདི་ནི་རང་རིག་ཡེ་ཤེས་ཏེ། །ངག་གི་ལམ་འདས་ཡིད་ཀྱི་སྤྱོད་ཡུལ་མིན། །ཏིལླི་ང་ཡིས་ཅི་ཡང་བསྟན་དུ་མེད། །རང་རིག་ཉིད་ལ་མཚོན་ཏེ་ཤེས་པར་བྱོས། །ཞེས་གསུངས་པ་ཡང་དེ་ལ་ཟེར་བ་ཡིན། བླ་མ་ནཱ་རོ་པས། མི་མནོ། མི་བསམ། མི་སེམས། མི་སྒོམ། མི་དཔྱད། སེམས་ཡང་དག་པ་ཉིད་དུ་གྲོལ། ཞེས་གསུངས་ཡང་དེ་ལ་ཟེར་བ་ཡིན་གསུངས། སེང་གེ་བཟང་པོས་མངོན་རྟོགས་རྒྱན་ལས། འདི་ལ་བསལ་བྱ་ཅི་ཡང་མེད། །གཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །ཞེས་གསུངས་པ་ཡང་དེ་ག་ལ་ཟེར། དབུ་མ་ནས། སེམས་ནི་སེམས་སུ་མ་མཆིས། སེམས་ཀྱི་རང་བཞིན་འོད་གསལ་བའོ། །ཞེས་གསུངས་པ་ཡང་དེ་ལ་ཟེར། བྲམ་ཟེ་ཆེན་པོའི་ཞལ་ནས། འཇུར་བུས་བཅིངས་པའི་སེམས་ཉིད་འདི། །གློད་ན་གྲོལ་བར་ཐེ་ཚོམ་མེད། །ཅེས་གསུངས་པ་ཡང་དེ་ག་ཡིན། རྣམ་སྣང་བྱང་ཆུབ་པའི་རྒྱུད་ལས། གང་ལ་བརྟག་བྱ་རྟོག་བྱེད་ཡོད། །དེ་ནི་བྱང་ཆུབ་ཡོད་མ་ཡིན། །བྱང་ཆུབ་ནམ་མཁའི་མཚན་ཉིད་ནི། །རྟོག་པ་ཐམས་ཅད་སྤངས་ཕྱིར་རོ། །ཞེས་གསུངས་པ་ཡང་དེ་ཡིན། དེ་དགེ་སྦྱོར་ཡིན་སྒོམ་ཡིན། དེ་ཁྱད་དུ་མི་གསད་པར་ལྟོ་གོས་ལ་གྱོང་སྐུར་ནས། དབེན་པ་བསྟེན་ལ་སྐྱོང་བ་གལ་ཆེ་གསུངས། བླ་མ་རིན་པོ་ཆེའི་ཞལ་ནས། དགེ་སྦྱོར་སྐད་ཅིག་མ་དེ་སྐྱོང་བ་ཡང༌། དཔེར་ན་མེ་དོན་དུ་གཉེར་བ་གཅིག་གིས་སྤྲ་བ་དང་མེ་རྡོ་དང་མེ་ལྕགས་དང་སྐྱེས་བུའི་རྩོལ་བའི་རྟེན་འབྲེལ་བསྒྲིགས་པས། མེ་རྟ་དམར་བ་ཞིག་བྱུང་བ་དེ་ཁྱད་དུ་མ་བསད་པར་གསོ་བའི་དུས་སུ། མེ་ལྕེ་ལ་སོགས་དལ་བུས་མ་གསོས་པར་ས་རྡོ་བཏབ་ན་མེ་དེ་འཆི་བ་ཡིན། དགེ་སྦྱོར་སྐད་ཅིག་མ་ཙམ་དེ་མ་བསྐྱང་བར་གཏུམ་མོ་ལ་སོགས་པའི་དགེ་སྦྱོར་གཞན་བསྒོམས་ན། སྐད་ཅིག་མ་ཙམ་དེ་ཡལ་ནས་འགྲོ་བ་ཡིན། ཡང་མེ་དེ་ཡང་ལ་སོགས་དལ་བུས་གསོས་ཏེ། ས་རྡོ་མ་བཏབ་ན་མེ་དེ་ཤིག་ཙམ་ནས་ལ་སོགས་པ་ཇེ་ཆེ་ཇེ་ཆེ་སོང་ནས། གཟོད་ས་རྡོ་བཏབ་ཀྱང་ནགས་ཚལ་ལ་སོགས་སྲེག་པའི་གྲོགས་སུ་འགྲོ་བ་ཡིན། དེ་དང་འདྲ་བ་དགེ་སྦྱོར་སྐད་ཅིག་མ་དེ་རང་དབེན་པ་བསྟེན་ཅིང་བསྐྱངས་ཏེ་གཏུམ་མོ་ལ་སོགས་པ་དམིགས་པ་གཞན་མང་པོ་མ་བྱས་ན། དགེ་སྦྱོར་སྐད་ཅིག་མ་གཅིག་དང་གཉིས་ལ་སོགས་པར་རྒྱུན་ཇེ་རིང་ཇེ་རིང་སོང་ནས་གོམས་པའི་དུས་སུ། གཏུམ་མོ་ལ་སོགས་དགེ་སྦྱོར་གང་བསྒོམ་ཡང་ཕྱག་རྒྱ་ཆེན་པོའི་ངང་དུ་ལྷན་ལྷན་འགྲོ་བ་གཅིག་ཡོང་བ་ཡིན། གསུངས། ཡང་མེ་ཆུང་ངུ་རེ་རླུང་ཆེན་པོ་གཅིག་གིས་བུས་པས་འཆི་བ་ཡིན། དེ་དང་འདྲ་བར་དགེ་སྦྱོར་བརྟན་པ་མ་ཐོབ་པ་དེ་ལ་ཉོན་མོངས་པ་ལ་སོགས་པའི་རྟོག་པ་ཕྲ་བས་ཀྱང་གནོད་པ་ཡིན། ཡང་མེ་ཆེན་པོ་འབར་བའི་དུས་ན་རླུང་ཆེན་པོ་བྱུང་ན་ཡང་ནགས་ཚལ་སྲེག་པའི་གྲོགས་སུ་འགྲོ་བ་ཡིན། དེ་དང་འདྲ་བར་དགེ་སྦྱོར་ལ་བརྟན་པ་ཐོབ་པའི་དུས་སུ་ཉོན་མོངས་པ་ལ་སོགས་པའི་རྟོག་པ་ཅི་བྱུང་ཡང༌། དགེ་སྦྱོར་དེའི་གྲོགས་སུ་འགྲོ་སྟེ། ནགས་ཚལ་སྲེགས་པའི་མེ་ལ་རླུང་ཆེན་པོ་ཡང་གྲོགས་སུ་འགྱུར། སྐྱེས་བུ་ཡེ་ཤེས་སྤྱན་ལ་ཉོན་མོངས་གྲོགས་སུ་འགྱུར་བྱ་བ་དེ་ལ་ཟེར་བ་ཡིན་གསུངས། འདི་རྩེ་གཅིག་གི་དགེ་སྦྱོར་ཡིན་གསུངས། རང་བཞིན་ངོ་བོ་མཚན་ཉིད་གསུམ་ལས་འདི་སེམས་ཀྱི་རང་བཞིན་གསལ་བ། སྟོན་གྱི་ནམ་མཁའ་དག་པ་ལྟ་བུ་དེ་ལ་རྣམ་པར་རྟོག་པས་གོ་མ་འགགས་པ་ཞིག་ཡོང༌། སེམས་ཅན་རྣམ་རྟོག་སྤོངས་ལ་སེམས་མི་རྟོག་པ་དེ་མེ་ལོང་གཡའ་དག་པ་ལྟར་གསལ་བ་ཞིག་འོང་སྟེ། དེ་ག་ལ་གསལ་སྟོང་ནམ་མཁའ་མཐའ་དབུས་མེད་པར་གསུངས་པ་ཡིན། ཉམས་སུ་མྱོང་བ་མངོན་པ་རྟོག་པ་གསུམ་ལས་ཨེན་ཅིག་བླ་མ་ཉམས་སུ་ལེན་མཛད་པ་ཡིན། ཉམས་བདེ་བ་གསལ་བ་མི་རྟོག་པ་གསུམ་ལས་དགེ་སྦྱོར་དེའི་ངང་ལ་གནས་པའི་དུས་སུ་ལུས་ཡང་ཞིང་ཟོ་མདོག་བདེ་བ་དང༌། སེམས་ཉོན་མོངས་པ་ལ་སོགས་པའི་རྟོག་པས་དབེན་ཞིང་བདེ་སིང་ངེ་འདུག་པ་ནི་བདེ་བ་ཡིན། ཡང་སེམས་རྟོག་པས་སྟོང་པའི་ངང་ལས་སིང་ངེ་གསལ་བའམ། དེའི་ངང་ནས་སངས་རྒྱས་ཀྱི་ཞིང་ཁམས་ལ་སོགས་པ་གསལ་བ་ནི་གསལ་བ་ཡིན། མི་རྟོག་པ་དེའི་དུས་སུ་སེམས་སྟོང་པའམ། དབང་པོ་ལྔའི་ཡུལ་ལྔ་གསལ་ཀྱང་དེ་དག་གི་རྗེས་སུ་རྟོག་པ་མི་འབྲང་པ་ནི་མི་རྟོག་པ་ཡིན། ཉམས་འདི་ཁྲིད་བྱེད་པའི་བླ་མ་མིན་པ་ལ་བཤད་ན་ཡལ་འགྲོ་བ་ཡིན་པས་མི་བཤད་པ་གལ་ཆེ་གསུངས། ཡང་མཚན་བཅས་སམ་མཚན་མེད་ཀྱི་དགེ་སྦྱོར་གང་ལ་ཡང་གནད་དུ་བསྣུན་པའི་དུས་སུ། མཉམ་རྗེས་གང་ཡང་རུང་སྟེ་སྐྱོན་དང་ཡོན་ཏན་གང་བྱུང་ཡང༌། ད་འདི་ལས་བྱུང་འདུག་སྙམ་པ་ཤེས་པ་དེ་ཉམས་མྱོང་བྱ་བར་འོང་བ་ཡིན་ཞིང་དངོས་པོ་བསམ་པ་གསུམ་ལས། རྩེ་གཅིག་གི་དུས་སུ་འདིར་སྣང་སེམས་གཉིས་ལ་དབང་མ་ཐོབ་པས། ཞིང་གིས་སྒྱུར་བས་ཞིང་གཙོ་ཆེ་བ་ཡིན་གསུངས། དེ་ཡང་རྫས་དང་ལུས་དང་ཉམས་གསུམ་ལ་ཞེན་པ་བོར་ནས་དབེན་པ་བསྟེན་ཅིང་རྩེ་གཅིག་གི་དགེ་སྦྱོར་བསྐྱངས་པས། དེ་ལས་བོགས་ཐོན་ནས་སྤྲོས་བྲལ་གྱི་དགེ་སྦྱོར་འཆར་ཏེ། དགེ་སྦྱོར་རྩེ་གཅིག་འདིའི་ངང་ནས་བླ་མའི་བྱིན་རླབས་གཅིག་དང་རང་གི་མོས་གུས་ཀྱི་ཤུགས་ཀྱིས་སེམས་སྐྱེ་འཆི་མེད་པ་སྤྲོས་པའི་མཐའ་བརྒྱད་དང་བྲལ་བ་རང་གི་སེམས་ལྷན་ཅིག་སྐྱེས་པའི་ཡེ་ཤེས་ཀྱི་སྐུར་ལྷན་གྱིས་རྟོགས་ཏེ། སེམས་ཀྱི་རྩ་བ་ཆོད་པ་ཞིག་འབྱུང་བ་དེ་སྤྲོས་བྲལ་གྱི་དགེ་སྦྱོར་ཡིན། འདི་ལ་རྟོགས་པར་མཛད་དེ་སེམས་ཀྱི་ངོ་བོ་མཐོང་བ་ཡིན་གསུངས། ངོ་བོ་དེ་ཡང་སྐྱེ་འགག་གི་ཆོས་ཐམས་ཅད་དང་བྲལ་བ་ཞིག་ཡིན། རྟོགས་པ་དེས་ཉོན་མོངས་པ་མངོན་དུ་རྒྱུ་སྤངས་པས་ལྷག་པ་ཚུལ་ཁྲིམས་ཀྱི་བསླབ་པར་འོང་ལ། སེམས་སྐྱེ་འཆི་མེད་པའི་ངང་དུ་གནས་པ་དང༌། དེ་ལྟར་མ་རྟོགས་པའི་སེམས་ཅན་ལ་སྙིང་རྗེ་སྐྱེ་བའི་ངོས་ནས། ལྷག་པ་ཏིང་ངེ་འཛིན་གྱི་བསླབ་པར་འོང་བ་ཡིན། སེམས་སྐྱེ་མེད་རྩ་བྲལ་དུ་རྟོགས་པ་དེའི་ངང་ནས་ཆོས་སྤྱི་བྱེ་བྲག་ཐམས་ཅད་ཤ་མོའི་སུལ་ཆེ་བའམ། རྒྱུ་འབྲས་མ་འདྲེས་པར་མཁྱེན་པ་ནི་ལྷག་པ་ཤེས་རབ་ཀྱི་བསླབ་པར་འོང་གསུངས་སོ། །དེ་ལྟར་རང་གི་སེམས་ཆོས་སྐུར་རྟོགས་པའི་དུས་སུ་དགེ་སྦྱོར་ཅི་བྱས་པ་ཐམས་ཅད་ཕྱག་རྒྱ་ཆེན་པོ་སྐྱེ་བ་མེད་པ་འཆར་ཞིང༌། སྣང་བ་ཐམས་ཅད་ཆོས་སྐུར་འཆར་བ་ཡིན། ནང་རྟེན་འབྲེལ་བསམ་པས་གསང་བ་རྟེན་འབྲེལ་ལུས་བྱིན་གྱིས་བརླབས་པའི་དུས་སུ། རང་གི་ལུས་འོད་དམ་འཇའ་ཚོན་ལྟ་བུ་ཞིག་ཏུ་གྱུར་ཏེ། རང་གི་ལུས་གཞན་གྱིས་མཐོང་བའམ་མཚན་ཐོས་པའམ་གསུང་ཐོས་པ་ཙམ་གྱིས། ཡིད་ཆགས་པ་དང་གཞན་གྱི་སེམས་ཀྱི་མདུད་པ་གྲོལ་བར་ནུས་ཤིང་རྟོགས་པ་སྐྱེ་བར་ནུས་པ་དང༌། དགེ་སྦྱོར་སྐྱེ་བར་ནུས་པ་འབྱུང༌། ཚིག་གིས་སྨོན་ལམ་བཏབ་པ་དང་བདེན་པ་ཐམས་ཅད་འགྲུབ་པ་དང༌། རབ་གནས་བྱས་པའི་དུས་སུ་མེ་ཏོག་འཆགས་པ་དང༌། ཆོས་མང་པོ་འབུལ་བ་འབྱུང་བ་དང༌། ཁྱད་པར་དུ་རཏྣི་གླེགས་བམ་མང་པོ་འབུལ་བ་ཡོང་བ་ཡིན་གསུངས། ཡང་གསང་བ་རྟེན་འབྲེལ་ལུས་དེས་ཕྱི་རྟེན་འབྲེལ་སྣང་བ་བྱིན་གྱིས་བརླབས་པའི་དུས་སུ་རྟོགས་པ་ཕུན་སུམ་ཚོགས་པ་མངའ་བ་ཡིན་ཞེས་པའི་སྒོ་ནས་བསྙེན་བཀུར་དང་ཞབས་ཏོག་དཔག་ཏུ་མེད་པ་བྱེད་པ་འོང༌། སྙིང་པོའི་དོན་གཙིགས་སུ་བྱེད་པའི་འཁོར་འདུས་ནས་རང་གི་དོན་སྒྲུབ་པ་འབྱུང་བ་དང༌། གང་དུ་བྱོན་པ་ཐམས་ཅད་དུ་བདག་མེད་པའི་སེང་གེའི་སྒྲས་སེམས་ཅན་སྨིན་གྲོལ་བྱེད་པ་འབྱུང་གསུངས། འཇམ་དཔལ་ནས། དོན་ཟབ་དོན་ནི་རྒྱ་ཆེ་ཞིང༌། །དོན་ཆེན་མཚུངས་མེད་རབ་ཞི་བ། །ཞེས་པ་ཡང་དེ་ལྟ་བུ་གཅིག་ལ་ཟེར་བ་ཡིན་གསུངས། ཞིང་དངོས་པོ་བསམ་པ་གསུམ་ལས། སྤྲོས་བྲལ་གྱི་དུས་སུ། བསམ་པ་གཙོ་ཆེ་བ་ཡིན་ཏེ། ཞིང་རང་གི་སེམས་ཀྱིས་བྱེད་པར་གོ་བས་ཡིན་གསུངས། འོ་ན་སྤྲོས་བྲལ་རྟོགས་པ་ཡིན་ན། ཉམས་དང་རྟོགས་པའི་ཁྱད་པར་གང་ཡིན་སྙམ་ན། རྩེ་གཅིག་གི་དུས་ན་ངེས་ཤེས་མ་སྐྱེས་ཏེ། སེམས་ཀྱི་རྩ་བ་མ་ཆོད་པས། བདེ་གསལ་མི་རྟོག་པ་གསུམ་ལ་རློམས་སེམས་ཞེན་པ་ཡོད་ལ། སྤྲོས་བྲལ་གྱི་དུས་ན་རང་གི་སེམས་སྐྱེ་འཆི་མེད་པར་རྟོགས་ཏེ་ངེས་ཤེས་སྐྱེས་པས་སེམས་ཀྱི་རྩ་བ་ཆོད་པའི་སྟོབས་ཀྱིས་ཉམས་ལ་སོགས་པ་ལ་རློམས་པའམ། ཞེན་པའི་མཁན་པོ་མེད་པར་རྟོགས་པས་རྟོགས་པར་འོང་བ་ཡིན་གསུངས། འོ་ན་ལྟ་བ་དང་རྟོགས་པའི་ཁྱད་ཅི་ཡིན་ན། རྗེ་རིན་པོ་ཆེའི་ཞལ་ནས་བཀའ་བརྒྱུད་རིན་པོ་ཆེ་འདི་ལ་ལྟ་བ་མེད་པ་ཡིན་གསུངས། འོ་ན་ཡང་ལྟ་བའི་མཆོག་བླ་མ་ལ་སངས་རྒྱས་སུ་ལྟ་བ་མ་གཏོགས་པ་གཞན་མེད། འོན་ཀྱང་སྤྱི་ཙམ་གྱི་དབང་དུ་བྱས་ན་ཐོས་བསམ་གྱི་སྒོ་ནས། ཆོས་ཐམས་ཅད་སྐྱེ་བ་མེད་པར་འདུག་སྙམ་པའི་སྙམ་ཙམ་གྱི་ཤེས་པ་དང་བྲལ་བ་དེ་ལྟ་བ་ཡིན་ལ། སྙམ་བྱེད་ཀྱི་ཤེས་པ་དང་བྲལ་བའི་ཤེས་པ་དེ་རང་སྐྱེ་འཆི་མེད་པར་སྐྱེ་མེད་དང་ལྷན་གྱིས་རྟོགས་པ་དེ་ལ་རྟོགས་པ་ཟེར་བ་ཡིན་གསུངས། དེ་ལ་དགོངས་ནས་ཆོས་རྗེས། གྲུབ་མཐའ་བློ་ཡི་མདུད་པ་ལ། །སངས་རྒྱས་དགོངས་པ་འཁྲུལ་པ་ཡིན། །ལར་མ་གོ་བ་ལ་སྟོན་པར་ཟད། །འདི་འདྲ་གཅིག་བྱ་བའི་བརྗོད་པ་ཐམས་ཅད་དང་བྲལ་བ་གཅིག་ཡིན་གསུངས། འོ་ན་མཉམ་བཞག་དང་རྗེས་ཐོབ་ཀྱི་ཁྱད་པར་གང་ཡིན་ཞེ་ན། རྗེ་རིན་པོ་ཆེ་ཞལ་ནས། སྤྱི་ཙམ་གྱི་དབང་དུ་བྱས་ན། སྟན་ལ་འདུག་རུང་འགྲོ་ཡང་རུང་སྟེ་མཚན་མ་ཅན་ནམ་མཚན་མ་མེད་པའི་དགེ་སྦྱོར་གྱི་སྟེང་ན་སེམས་གནས་པ་དེ་མཉམ་བཞག་ཡིན། འགྲོ་ཡང་རུང་སྟན་ལ་འདུག་ཀྱང་རུང་སྟེ། དེ་དག་ལས་གཞན་པའི་རྟོག་པ་སྐྱེ་བ་དེ་མཉམ་བཞག་ལས་ལངས་པ་ཡིན་ལ། རྗེ་རིན་པོ་ཆེ་བཞེད་ཀྱི་དེ་དང་ཁྱད་པར་གྱི་ཆོས་ཡིན་པས། སེམས་རྣམ་པར་མི་རྟོག་པ་དེ་མཉམ་གཞག་ཡིན་ལ། དེའི་རྗེས་སྣང་བ་ཐམས་ཅད་མི་བདེན་པ་སྒྱུ་མར་འཆར་བ་ནི་རྗེས་ཡིན་ཏེ། དེས་མི་ཕྱིན་པ་ལ་མིའི་རྗེས་འོང་བ་དང་འདྲ་གསུངས། ཁ་ཅིག་མི་རྟོག་པའི་རྗེས་ཆགས་སྡང་སྐྱེ་བ་དེ་ལ་རྗེས་ཡིན་ཟེར་ཏེ། དེ་མི་འཐད། དེ་ལྟར་སོང་ན་མི་ཕྱིན་པའི་རྗེས་ལ་སྤྲེའུའི་རྗེས་བྱུང་བ་དང་འདྲ་གསུངས། འོ་ན་གང་ཡིན་ན་ཉོན་མོངས་པ་དེ་ས་བོན་མ་རིག་པ་བག་ལ་ཉལ་མི་གསལ་བའི་ཚུལ་དུ་རྒྱུད་ལ་ཡོད། ཆགས་སྡང་དེ་དེའི་རྗེས་ཡིན་གསུངས། མཆོག་གསུམ་ལས་འཆི་བ་ལ་དབང་མ་ཐོབ་པས་མཆོག་ཆུང་ངུ་ཡིན། རྒྱ་གསུམ་ལས་སྤྲོས་བྲལ་གྱི་རྟོག་པ་དེས་རྣམ་རྟོག་རྩ་བྲལ་དུ་རྟོགས་པས་རྟོག་པའི་རྒྱ་ལས་གྲོལ་བ་ཡིན་གསུངས། སྤྲོས་བྲལ་གྱི་དགེ་སྦྱོར་དེ་ཡང་ཞེན་པ་གསུམ་བཏང་ནས་རི་ཁྲོད་ལ་སོགས་ལ་གོམས་པར་བྱས་པས། དེ་ལས་ཀྱང་བོགས་ཐོན་སྟེ་རོ་གཅིག་གི་རྟོགས་པ་འཆར་ཏེ། ཇི་ལྟ་བུ་གཅིག་འོང་ན། སྣང་བ་དང་སེམས་གཉིས་སུ་མེད་པར་རྟོགས། ཡུལ་ཡུལ་ཅན་གཉིས་སུ་མེད་པར་གོ སྣང་སྟོང་གཉིས་མེད་དུ་ཤེས་ཏེ་ཟུང་འཇུག་གི་རྟོགས་པ་འཁྲུངས་པ་ཡིན་གསུངས། འོ་ན་སྤྲོས་བྲལ་དང༌། རོ་གཅིག་གི་ཁྱད་པར་གང་ཡིན་སྙམ་ན། སྤྲོས་བྲལ་གྱི་དུས་ན་སེམས་སྟོང་པར་རྟོགས་ཀྱང་སྣང་བ་སྟོང་པར་མ་རྟོགས་ལ། རྒྱུ་འབྲས་བག་ཙམ་གོ་ཡང་རྒྱུ་འབྲས་མཐའ་དག་མ་གོ ཉོན་མོངས་པ་རགས་པ་སྤངས་ཀྱང་མངོན་དུ་རྒྱུ་བག་རེ་སྐྱེ། སྐྱེ་བ་ལ་དབང་ཐོབ་ཀྱང་འཆི་བ་ལ་དབང་མ་ཐོབ། རོ་གཅིག་གི་དུས་སུ་སྣང་སེམས་གཉིས་སུ་མེད་པར་རྟོགས། ཉོན་མོངས་པ་མངོན་དུ་རྒྱུ་མི་སྐྱེ། སྐྱེས་ཀྱང་དགེ་སྦྱོར་འཆར། འདི་སེམས་ཀྱི་མཚན་ཉིད་ཡིན་པས་འཁོར་འདས་དུ་མར་སྣང་ཞིང་རྒྱུ་འབྲས་མཐའ་དག་གོ། སྐྱེ་འཆི་གཉིས་ཀ་ལ་དབང་ཐོབ། རོ་གཅིག་གི་དུས་སུ་མཉམ་པ་ཉིད་རྟོགས་པས་དངོས་པོ་གཙོ་ཆེ། ཟུང་འཇུག་རྟོགས་པས་མཆོག་འབྲིང་པོ་འོང་སྟེ། རྟོགས་པ་དེའི་ངང་དུ་ལུས་འོད་དམ་འཇའ་ལྟ་བུར་འབྱོངས་ཏེ། ལུས་ཤུལ་དུ་མ་ལུས་ཏེ་འཆི་རྒྱུ་མེད་པས་སྐྱེ་འཆི་གཉིས་ཀ་ལ་དབང་ཐོབ་སྟེ་ར་ཛ་ཨིནྡྲ་བྷུ་ཏིའམ། བྲམ་ཟེ་ཆེན་པོ་ལྟ་བུ་ཡིན་གསུངས། དེ་ལྟར་ཟུང་འཇུག་ཏུ་སོང་བས་ལུས་རྒྱ་ལས་གྲོལ་ཏེ། མཆོག་འབྲིང་པོ་ཡིན་གསུངས། རོ་གཅིག་དེ་ཡང་སྤྲོས་མེད་དམ་ཤིན་ཏུ་སྤྲོས་མེད་ཀྱི་སྤྱོད་པ་ བརྟེན་ཅིང་གོམས་པར་བྱས་པས། སྒོམ་མེད་ཀྱི་རྟོགས་པ་འཆར་ཏེ། སེམས་གདོད་མ་ནས་སྟོང་ཞིང་རྣམ་པར་དག་པ་དང༌། རོ་གཅིག་མན་ཆད་ཀྱིས་ཉོན་མོངས་པ་དང་རྣམ་རྟོག་རྐྱེན་གློ་བུར་གྱི་དྲི་མ་དག་པར་བྱས་པས་ཡིན། བསྒོམ་བྱ་སྒོམ་བྱེད་དང་བྲལ་ཞིང་མཉམ་རྗེས་མེད་པའི་དག་པ་གཉིས་ལྡན་དྲི་མེད་ཆོས་ཀྱི་སྐུའི་སངས་རྒྱས་སུ་འཆར་བ་ཆུ་ལ་ཆུ་བཞག་པའམ་མར་ལ་མར་བཞག་པ་ལྟར། ཆོས་ཀྱི་སྐུར་སངས་རྒྱས་ཏེ་རང་བཞིན་གྱི་དོན་འགྲུབ་པར་བྱས་པ་ཡིན་གསུངས། མཆོག་གསུམ་ལས་འདི་མཆོག་ཆེན་པོ་ཡིན། སྣང་བ་རབ་ཆོད་པས་སྣང་བའི་རྒྱ་ལས་གྲོལ་བ་ཡིན་གསུངས། འོ་ན་རོ་གཅིག་དང་སྒོམ་མེད་ཀྱི་ཁྱད་གང་ཡིན་སྙམ་ན། རོ་གཅིག་གི་དུས་སུ་མྱོང་བ་ཆ་ཕྲ་མོ་ཞིག་ཡོད། སྒོམ་མེད་ཀྱི་མྱོང་བ་ཆ་ཕྲ་མོ་ཞིག་རྩ་བ་ནས་སྤངས་ཏེ་དྲི་མ་མེད། སྣང་བ་ཐམས་ཅད་གཉིས་མེད་ཀྱི་ངང་དུ་ཞི། མཉམ་གཞག་འབའ་ཞིག་ཡིན་གླང་ཆེན་བཞུགས་ཀྱང་མཉམ་བཞག་ལ། བཞེངས་ཀྱང་མཉམ་པར་བཞག་པ་བྱ་བ་ཡང་དེ་ག་ལ་ཟེར་བ་ཡིན་གསུངས། འཁོར་བའི་ས་བོན་བག་ཆགས་དང་བཅས་པ་རྩ་བ་ནས་སྤངས་ཏེ། སྤོང་བ་ཕུན་སུམ་ཚོགས་པའི་ཡོན་ཏན་དང༌། ཡེ་ཤེས་ཕུན་སུམ་ཚོགས་པའི་ཡོན་ཏན་མངའ་ཞིང༌། སྐུ་གསུམ་ཡེ་ཤེས་ལྔར་སངས་རྒྱས་པ་ཡིན་ཏེ། མེ་ལོང་གཡའ་དག་པ་ལ་གཟུགས་བརྙན་གསལ་བ་དང་འདྲ་བར། ཆོས་སྐུ་དག་པ་གཉིས་ལྡན་དུ་སངས་རྒྱས་ཏེ་དེ་ཇི་ལྟ་བ་མཁྱེན་པའི་ཡེ་ཤེས་ཡིན། དེ་ལྟར་ཆོས་ཀྱི་སྐུ་དག་པ་གཉིས་དང་ལྡན་པ་དེའི་ངང་ནས། སེམས་ཅན་གྱི་ཁམས་དང་བག་ལ་ཉལ་དང་བསམ་པའི་ཚོགས་ཐམས་ཅད་དང་རྒྱུ་འབྲས་ཐམས་ཅད་མ་འདྲེས་པར་མཁྱེན་པ་ནི་ཇི་སྙེད་པ་མཁྱེན་པའི་ཡེ་ཤེས་ཡིན་ལ། ཡང་རང་དོན་ཆོས་ཀྱི་སྐུ་རྟོགས་པའི་བདག་རྐྱེན་དང་གདུལ་བྱ་གྱེན་དུ་ཕྱོགས་པའི་གཞན་རྐྱེན་དང༌། སྔོན་དུ་ཐབས་གོམས་པར་བྱས་པའི་རྟེན་འབྲེལ་གསུམ་འཛོམས་པ་ལ་བརྟེན་ནས། ས་ལ་གནས་པའི་བྱང་ཆུབ་སེམས་དཔའ་རྣམས་ལ་ལོངས་སྤྱོད་རྫོགས་པའི་སྐུའི་སངས་རྒྱས་སུ་བྱོན་ནས་དོན་བྱེད་པ་དང༌། ཚོགས་ལམ་མན་ཆད་རྣམས་ལ་མཆོག་དང་སྐྱེ་བ་དམན་པའི་སྤྲུལ་པ་སྣ་ཚོགས་སུ་བྱོན་ནས། དུས་འཁོར་བ་མ་སྟོངས་ཀྱི་བར་དུ་རྟག་པ་དང་ཁྱབ་པ་དང་རྒྱ་ཆེ་བ་དང༌། རྒྱུན་མི་འཆད་པར་སེམས་ཅན་གྱི་དོན་འབྱུང་བ་ནི་མྱ་ངན་ལས་འདས་པའི་འདུག་ལུགས་ཡིན། ཆོས་རྗེའི་ཞལ་ནས། སྐྱོན་དག་ཡོན་ཏན་རབ་རྫོགས་པ། །སངས་རྒྱས་སྐུ་གསུམ་ངོ་མཚར་ཆེ། །ཞེས་གསུངས་པ་ཡང་དེ་ལྟ་བུ་གཅིག་ལ་ཟེར་བ་ཡིན་གསུངས། ཡང་སེམས་ཅན་གྱི་དེ་ཁོ་ན་ཉིད་དེ་རྒྱལ་བ་སྲས་དང་བཅས་པ་བསྐྱེད་པའི་མ་ཡིན་ཏེ། དེ་མ་ཤེས་པ་ནི་མ་རིག་པ་ཡིན། མ་རིག་པ་དེ་ལས་སྣང་བ་གསུམ་འབྱུང་སྟེ། དེ་ཡང་སྣང་བ་ལས་མ་རིག་པ་ལས་གྱུར་པའི་རྟོག་པ་བདུན་འབྱུང༌། མཆེད་པ་ལས་གྱུར་པའི་རྟོག་པ་སུམ་ཅུ་སོ་གཉིས་འབྱུང༌། ཉེར་ཐོབ་ལས་འདོད་ཆགས་ལས་གྱུར་པའི་རྟོག་པ་བཞི་བཅུ་འབྱུང་སྟེ། རང་བཞིན་བརྒྱད་ཅུའི་རྣམ་པར་བསྟེན་ནས་བདག་གཞན་དུ་འབྱུང༌། དེར་ཆགས་སྡང་གཉིས་ཀྱིས་ལུས་ངག་ཡིད་གསུམ་གྱི་ལས་བསགས་ནས། སྲིད་པའི་རྩེ་མོ་ནས་མནར་མེད་ཀྱི་བར་དུ་རྟེན་འབྲེལ་བཅུ་གཉིས་ཀྱི་ཚུལ་དུ་འཁོར་བར་འཁྱམས་པ་ཤེས་པ་ཡིན་ཏེ། རྣམ་འགྲེལ་ལས། བདག་གཞན་ཆ་ལས་འཛིན་དང་སྡང༌། །དེ་གཉིས་དང་ནི་འབྲེལ་བ་ལས། །ཉེས་པ་ཐམས་ཅད་འབྱུང་བ་ཡིན། །ཞེས་གསུངས་པའི་ཚུལ་ཡིན་གསུངས། དེ་འཁོར་བའི་འདུག་ལུགས་ཡིན་ཏེ། ཕྱག་རྒྱ་ཆེན་པོ་གཅིག་པུ་གོ་བས། འཁོར་འདས་ཀྱི་ཆོས་ཐམས་ཅད་གོ་བ་ཡིན་ཏེ། དེ་ཡང་ཆོས་ཆུང་བ་མིན་གསུངས། ཀླུ་སྒྲུབ་ཀྱིས། སྟོང་པ་ཁོ་ནའི་ཆོས་རྣམས་ལ། །སྟོང་པ་ཁོ་ན་སྐྱེ་བར་ཟད། །འགྲོ་ཀུན་རྒྱུ་དང་འབྲས་བུ་སྟེ། །འདི་ལས་སེམས་གཞན་ཅི་ཡང་མེད། །ཅེས་གསུངས་པའམ། ཆོས་རྗེས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་སེམས་ཅན་མེད། །གསུངས་པ་ཡང་དེ་ལྟ་བུ་ལ་ཟེར་བ་ཡིན་གསུངས།།
ལྔ་བ་བསྔོ་བ་ལ་སེམས་བཞག་པའི་ཡོན་ཏན་གང་ཡིན་སྙམ་ན། དམིགས་པ་མེད་པའི་བསྔོ་བ་བྱ་སྟེ། སེམས་བསྔོ་བའི་རང་བཞིན་དུ་གྱུར་པའི་དུས་སུ། དགེ་སྦྱོར་ཅི་བྱས་པ་ཐམས་ཅད་བསྔོ་བའི་རྣམ་པར་འཆར་བ་དང༌། བསྔོ་བའི་སྣང་བ་ཐམས་ཅད་བསྔོ་བའི་བྱེད་ལས་སུ་འཆར་བ་འབྱུང༌། ཡང་བསྔོ་བ་འགྲུབ་པའི་དུས་སུ་ལུས་སེམས་བདེ་བ་ནི་བདེ་བ་ལ། བསྔོ་བའི་རྣམ་པ་གསལ་ བ་ནི་གསལ་བ་ཡིན་ལ་བསྔོ་བ་བསྔོའོ། །རྒྱུ་བསྔོས་པ་གསུམ་གསལ་ཀྱང་དེའི་རྗེས་སུ་རྟོག་པ་མི་འབྲང་བ་ནི་མི་རྟོག་པ་ཡིན་གསུངས། ཡང་བསྔོ་བ་བྱེད་པའི་དུས་སུ་ཞེ་སྡང་ལ་སོགས་རྟོག་པ་སྤངས་པ་ནི་ལྷག་པ་ཚུལ་ཁྲིམས་ཀྱི་བསླབ་པར་འོང༌། བསྔོ་བའི་རྣམ་པ་ལ་སེམས་གནས་པ་ནི་ལྷག་པ་སེམས་ཀྱི་བསླབ་པ། ཞིང་བསམ་དངོས་པོ་གསུམ་རང་གི་སེམས། སེམས་སྟོང་པར་རྟོགས་པ་ནི་ཤེས་རབ་ཀྱི་བསླབ་པ་ཡིན་གསུངས། ནང་རྟེན་འབྲེལ་བསྔོ་བའི་བསམ་པ་དེས། གསང་བའི་རྟེན་འབྲེལ་ལུས་བྱིན་གྱིས་བརླབས་སྟེ། ལུས་དེ་བསྔོ་བ་བྱེད་པའི་དུས་སུ་གཞན་གྱི་དགེ་བ་མི་འཛད་པའི་གཏེར་དུ་སྦེད་པའི་སྣང་བ་འབྱུང༌། ཕྱིའི་རྟེན་འབྲེལ་སྣང་བ་བྱིན་གྱིས་བརླབས་པའི་དུས་སུ། བསྔོ་བ་ལ་གཙིགས་སུ་བྱེད་པ་ཡིན་ཞེས་པའི་སྒོ་ནས་གཞན་བསྙེན་བཀུར་བྱེད་པ་འབྱུང་བ་དང༌། བསྔོ་བ་ལ་སོ་ནམ་བྱེད་པའི་འཁོར་འདུས་ནས། རང་གི་དོན་སྒྲུབ་པ་དང༌། གང་དུ་ཕྱིན་པ་ཐམས་ཅད་དུ་བསྔོ་བའི་འཕྲིན་ལས་ཀྱིས་སེམས་ཅན་སྨིན་གྲོལ་བྱེད་པ་འབྱུང་གསུངས། མཐར་ཐུག་སངས་རྒྱས་པའི་དུས་སུ་སྤྲུལ་སྐུ་གསུམ་གྱི་དུས་འཁོར་བ་མ་སྟོངས་ཀྱི་བར་དུ་སེམས་ཅན་གྱི་དོན་རྒྱུན་མི་འཆད་པར་འབྱུང་བ་ནི་སྤྲུལ་པའི་སྐུ་ཡིན། འཁོར་གསུམ་མི་རྟོག་པའི་མི་དམིགས་པ་སྟོང་ཉིད་དུ་རྟོགས་པ་ནི་ཆོས་ཀྱི་སྐུ་ཡིན་ལ། ཟུང་འཇུག་གཉིས་སུ་མེད་པའི་བསྔོ་བས་སྣང་བ་དང་སྟོང་པ་གཉིས་སུ་མེད་པར་བདེ་ཆེན་དུ་ལོངས་སྤྱོད་པས་ལོངས་སྤྱོད་རྫོགས་པའི་སྐུའི་སངས་རྒྱས་ཡིན་ཏེ། མདོ་ལས། ཐབས་དང་ཤེས་རབ་རྐང་གཉིས་གཤོག་པ་བརྐྱང་བྱས་ནས། །གར་འདོད་སར་ཕྱིན་བདེ་བའི་གནས་ཐོབ་འགྱུར། །ཞེས་པ་ཡང་དེ་ལྟ་བུ་ལ་ཟེར་བ་ཡིན་གསུངས། ཡང་བསྔོ་བ་མ་ཤེས་པའམ། ཤེས་ཀྱང་མི་དམིགས་པའི་བསྔོ་བས་མ་ཟིན་པས། འཁོར་བར་འཁྱམས་པར་ཤེས་དུས་སུ་བསྔོ་བའི་གོ་བས་འཁོར་འདས་ཀྱི་ཆོས་ཐམས་ཅད་གོ་ནུས་པ་ཡིན་ཏེ། དེ་ཆོས་ཟབ་པ་ཡིན་གསུངས། སྡུད་པ་ནས། ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པའང་དེ་འདྲར་རྒྱལ་བས་གསུངས། གསུངས་པ་ཡང་དེ་ལྟ་བུ་ལ་ཟེར་བ་ཡིན་གསུངས། དེ་ནས་ལྔ་ལྡན་ལྟ་བུ་གཅིག་ལ་གནད་དུ་བསྣུན་པའི་དུས་སུ་འཁོར་འདས་ཀྱི་ཆོོས་ཐམས་ཅད་གོ་ནས་འོང་བ་ཡིན་ཏེ། སློབ་དཔོན་ཀླུ་སྒྲུབ་ཀྱིས། འཁོར་བའི་རྩ་བ་འདུ་བྱེད་དེ། །དེ་ཕྱིར་མཁས་པས་འདུ་མི་བྱེད། །ཅེས་པ་དང༌། སེམས་ཉིད་གཅིག་པུ་ཀུན་གྱི་ས་བོན་ཡིན། །ཞེས་པ་དང༌། བག་ཆགས་དག་ལས་བྱུང་བས་ན། །བག་ཆགས་ས་བོན་དག་ཏུ་བཤད། །བག་ཆགས་རྗེས་མཐུན་འཚོགས་པ་ན། །སྲིད་པའི་མྱུ་གུ་དེས་སྐྱེད་དེ། །ཞེས་གསུངས་པ་ཡང་དེ་ལྟ་བུ་ལ་ཟེར་བ་ཡིན་གསུངས། དེ་རྣམས་ཀྱིས་ཀུ་སཱ་ལི་སྒྲོ་འདོགས་ནང་ནས་གཅོད་པའི་ལུགས། བླ་མའི་རྒྱ་རྡོག་པོ་རེ་རེ་ལ་ནན་ཏན་དུ་བྱས་བྱས་པས། འཁོར་འདས་ཀྱི་ཆོས་ཐམས་ཅད་གོ་ནུས་པ། ལུས་འདི་ཙུག་སྡོད་ལ། སེམས་འདི་ཙུག་ཞོག་དང༌། ཡོན་ཏན་འདི་འདྲ་ཞིག་སྐྱེ་ཡིས་བྱ་བའི་གསུང་རིན་པོ་ཆེ་ལ་བརྟེན་པའི་ཆོས་གཅིག་སྙན་དུ་གསོལ་བ་ལགས། ད་བསྔོ་བ་མཛད་པར་ཞུ་འཚལ། སྔོན་དབྱངས་ཡང་དལ་འབྱོར་སྡོང་པོ་ལ། །བསླབ་གསུམ་དྲི་མེད་ཡལ་ག་ཅན། །དྲན་ཤེས་མོས་གུས་ལོ་འདབ་རྒྱས། །བྱང་ཆུབ་མེ་ཏོག་འབྲས་ལྡན་པའི། །གུས་བསྟེན་སློབ་མས་ཞུས་པ་ཡིན། །གསུམ་ཚན་བཅུ་ཡི་མན་ངག་འདི། །བཀོད་པའི་དགེ་བ་རྒྱ་མཚོའི་དེས། །འགྲོ་ཀུན་ལྔ་ལྡན་རབ་བརྟེན་ནས། །མི་ཤེས་སྡུག་བསྔལ་སྤངས་ནས་ཀྱང༌། །ཡེ་ཤེས་ལྔ་ལྡན་རྫོགས་སངས་རྒྱས། །སྐུ་ལྔ་དབྱེར་མེད་རྡོ་རྗེ་འཆང༌། །འགྲོ་མགོན་བླ་མ་རིན་ཆེན་གྱི། །སྐུ་ཡི་བཀོད་པ་གར་བཞུགས་སུ། །མཐའ་ཡས་ཡེ་ཤེས་སྤྱོད་ནུས་ཤོག །འགྱུར་མེད་མོས་གུས་ཏིང་འཛིན་གྱིས། །སྐུ་གསུང་ཐུགས་གསང་མཛོད་འཛིན་ཤོག །འགྲོ་མགོན་རྗེ་ཡི་བཀའ་དྲིན་གྱིས། །དགོས་འདོད་ནོར་བུ་སེམས་ལ་རྙེད། །ཆགས་སྡང་གཉིས་ཀྱི་སྡོས་ཐག་བཅད། །འཁོར་འདས་གཉིས་ཀྱི་རེ་དོགས་བྲལ། །རོ་མཉམ་ངང་ནས་བྱང་སེམས་འཕེལ། །མཉམ་བཞག་ནང་དུ་གཞན་དོན་རྫོགས། །ལྷ་དང་རང་སེམས་དབྱེར་མེད་པས། །གཅིག་པུར་བསྡད་ཀྱང་འཕྲིན་ལས་རྒྱས། །ཞེན་མེད་ཆོས་སྐུའི་མོས་གུས་ཀྱིས། །རང་སེམས་རྟོགས་པའི་རྣལ་འབྱོར་བདེ། །མད་ཀྱང་ཀུ་རེ་བགྱིས་པ་ལགས། །འགྲོ་མགོན་རྗེ་ཡི་གསུང་བཞིན་བཀོད། །འདི་ལ་འགལ་འཁྲུལ་མཆིས་སྲིད་ན། །ཉམས་རྟོགས་ལྡན་ལ་བཟོད་པར་གསོལ། །སློབ་དཔོན་པད་མས་བྱིན་གྱིས་བརླབས་པའི་གནས། ཡོན་ཏན་རིན་པོ་ཆེ་གཅལ་དུ་བཀྲམ་པའི་གཅལ་ཀ་ཕྱུགས་སྐྱོངས་སུ། ཤཱཀྱའི་དགེ་སློང་མན་ཛྙུ་ཤྲི་ཞེས་བྱ་བས། གསུང་རིན་པོ་ཆེ་བདུད་རྩི་ཚིགས་གསུམ་གནད་ཀྱི་མན་ངག་ཅེས་བྱ་བ། གུས་པ་དང་བརྩེ་བའི་བསམ་པས་ཡི་གེར་བཀོད་པའོ།།