རྡོ་རྗེ་ཕུར་པའི་ཕྲིན་ལས་སྤྱིའི་སྔོན་འགྲོ།
དཔལ་ཆེན་རྡོ་རྗེ་ཕུར་པའི་ཕྲིན་ལས་སྤྱིའི་སྔོན་འགྲོ་ཞེས་བྱ་བ་བཞུགས༔
ཤྲཱི་བཛྲ་ཀུ་མ་ར་ཡེ༔ ཆོས་ཉིད་ཞི་ལས་མ་གཡོས་ཀྱང་༔ ཐབས་ཀྱིས་སྙིང་རྗེའི་སྐུར་སྟོན་པ༔ ཕྲིན་ལས་ཕུར་པའི་ལྷ་ཚོགས་ལ༔ སྒོ་གསུམ་ཐ་མི་དད་པས་འདུད༔ བདག་འདྲ་པདྨ་འབྱུང་གནས་ཀྱིས༔ ཕུར་པ་བི་ཏོ་ཏ་མའི་རྒྱུད༔ མང་པོའི་ནང་ནས་བཅུད་ཕྱུང་བ༔ དབང་པོའི་དྭངས་མ་མིག་ལྟ་བུ༔ མ་འོངས་འགྲོ་བ་སྤྱི་རྣམས་དང་༔ ཁྱད་པར་དཔལ་གྱི་དབང་ཕྱུག་དང༔ ཇོ་མོ་ཡེ་ཤེས་མཚོ་རྒྱལ་ལ༔ མཆོག་ཐུན་དངོས་གྲུབ་ཐོབ་པའི་ཕྱིར༔ ཕྲིན་ལས་གདམས་པ་བསྟན་པར་བྱ༔ ས་མ་ཡཱ༔ དང་པོ་སྐྱབས་ཡུལ་གསལ་གདབ་ནི༔ མདུན་གྱི་ནམ་མཁར་དཔལ་ཆེན་རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་ལ་གཞན་ཡང་རྩ་རྒྱུད་ཀྱི་བླ་མ་ཡི་དམ་མཁའ་འགྲོ་ཆོས་སྐྱོང་དང་བཅས་པས་བསྐོར་བ་མཁའ་ཁྱབ་ཏུ་སད་པར་བསམ་ལ༔ གཉིས་པ་སྐྱབས་འགྲོ་ནི༔ ཧཱུྃ༔ བདེར་གཤེགས་རྒྱལ་བའི་སྐུ་གསུང་ཐུགས༔ ཡོན་ཏན་ཕྲིན་ལས་འདུས་པའི་དཔལ༔ རྡོ་རྗེ་གཞོན་ནུའི་ལྷ་ཚོགས་ལ༔ རྩེ་གཅིག་གུས་པས་སྐྱབས་སུ་མཆི༔ གསུམ་པ་སེམས་བསྐྱེད་ནི༔ ཧོ༔ རིག་པ་འཛིན་པའི་རྣལ་འབྱོར་བདག༔ ཕུར་པའི་དཀྱིལ་འཁོར་འདིར་ཞུགས་ནས༔ འགྲོ་འདུལ་རླབས་ཆེན་སྤྱོད་པ་ཡིས༔ དོན་གཉིས་སྒྲུབ་པར་སེམས་བསྐྱེད་དོ༔ བཞི་པ་ཡན་ལག་བདུན་པ་ནི༔ ཧོ༔ རྡོ་རྗེ་གཞོན་ནུའི་ལྷ་ཚོགས་ལ༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་གསུམ་མཆོད་པ་འབུལ༔ མི་དགེ་འགལ་འཁྲུལ་ཉམས་ཆགས་བཤགས༔ གཞན་ཕན་སྤྱོད་ལ་རྗེས་ཡི་རང༔ གསང་སྔགས་ཆོས་འཁོར་བསྐོར་བར་བསྐུལ༔ འགྲོ་བའི་དོན་དུ་བཞུགས་གསོལ་འདེབས༔ དགེ་ཚོགས་སེམས་ཅན་དོན་དུ་བསྔོ༔ ལྔ་པ་བརྒྱུད་འདེབས་ནི༔ ཨོཾ་སྭ་སྟི༔ སྤྲོས་བྲལ་ཆོས་དབྱིངས་མཁའ་ཁྱབ་ཕོ་བྲང་ནས༔ གདོད་མའི་ཆོས་སྐུ་སྣང་བ་མཐའ་ཡས་ལ༔ གསོལ་བ་འདེབས་སོ་གསང་གསུམ་བར་ཆད་སོལ༔ འོག་མིན་གནས་མཆོག་རི་བོ་ཏ་ལ་ནས༔ རང་གསལ་ལོངས་སྐུ་ཐུགས་རྗེ་ཆེན་པོ་ལ༔ གསོལ་བ་འདེབས་སོ་གསང་གསུམ་བར་ཆད་སོལ༔ མཁའ་སྤྱོད་རྔ་ཡབ་པདྨ་འོད་གླིང་ནས༔ རིག་འཛིན་བདུད་འདུལ་པདྨ་འབྱུང་གནས་ལ༔ གསོལ་བ་འདེབས་སོ་གསང་གསུམ་བར་ཆད་སོལ༔ འཁྲུལ་ཞིག་ཀ་དག་ལྟ་བའི་ཕོ་བྲང་ནས༔ མཁར་ཆེན་སྲས་པོ་དཔལ་གྱི་དབང་ཕྱུག་ལ༔ གསོལ་བ་འདེབས་སོ་གསང་གསུམ་བར་ཆད་སོལ༔ བདེ་སྟོང་ལྷན་སྐྱེས་དགའ་བཞིའི་ཕོ་བྲང་ནས༔ མི་མིན་མཁའ་འགྲོ་ཡེ་ཤེས་མཚོ་རྒྱལ་ལ༔ གསོལ་བ་འདེབས་སོ་གསང་གསུམ་བར་ཆད་སོལ༔ རང་སྣང་རྣམ་དག་བདེ་ཆེན་ཕོ་བྲང་ནས༔ རིག་འཛིན་འགྲོ་འདུལ་གསང་སྔགས་གླིང་པ་ལ༔ གསོལ་བ་འདེབས་སོ་གསང་གསུམ་བར་ཆད་སོལ༔ ལུང་རྟོགས་ཆོས་ཀྱིས་ཕྱུག་པའི་ཕོ་བྲང་ནས༔ འབྲེལ་ཚད་དོན་ལྡན་ལུང་རིག་གླིང་པ་ལ༔ གསོལ་བ་འདེབས་སོ་གསང་གསུམ་བར་ཆད་སོལ༔ པདྨས་ལུང་ཟིན་ལས་འཕྲོ་ལས་ཀྱི་འཕྲོ་ལྡན་པའི༔ ཆོས་བདག་རྩ་བརྒྱུད་བླ་མའི་ཚོགས་རྣམས་ལ༔ གསོལ་བ་འདེབས་སོ་གསང་གསུམ་བར་ཆད་སོལ༔ བྲག་རི་སེང་ཆེན་འགྱིང་འདྲའི་གཏེར་གནས་སུ༔ ཟབ་ཆོས་གསང་བ་སྤུ་གྲིར་གསོལ་བ་འདེབས༔ ཕྱི་ནང་བར་ཆད་ཞི་བར་བྱིན་གྱིས་རློབས༔ གདུག་པའི་དགྲ་བགེགས་བསྒྲལ་བར་བྱིན་གྱིས་རློབས༔ དྲེགས་ཚོགས་བྲན་དུ་ཁོལ་བར་བྱིན་གྱིས་རློབས༔ མཆོག་ཐུན་དངོས་གྲུབ་ཐོབ་པར་བྱིན་གྱིས་རློབས༔ བསྙེན་སྒྲུབ་ཚད་དུ་འཁྱོལ་བར་བྱིན་གྱིས་རློབས༔ མཐའ་ཡས་འགྲོ་བ་གཅིག་ཀྱང་མ་ལུས་པ༔ འཁོར་བ་དོང་ནས་སྤྲུགས་པར་བྱིན་གྱིས་རློབས༔ ཀཱ་ཡ་ཝཀྐ་ཙིཏྟ་སརྦ་སིདྡྷི་ཧཱུྃ༔ ས་མ་ཡཱ༔ རྒྱ་རྒྱ་རྒྱ༔ ཅེས་པའང་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་རིག་འཛིན་གསང་སྔགས་གླིང་པས་ཤར་རྒྱལ་མོ་རོང་གི་ཉེ་ཆར་གནས་ལུང་དཔལ་གྱི་རི་བོའི་གཡས་ཟུར་བྲག་རི་སེང་ཆེན་འགྱིང་འདྲའི་ལྟོ་བ་ནས་ཁྲོམ་གཏེར་དུ་སྤྱན་དྲངས་པའོ།།