ཕོ་ཉ་བསེ་ལྕགས་དུང་གསུམ་གྱི་ཕྲིན་ལས་དགྲ་དཔུང་བརླག་པའི་མཚོན་ཆ།
ཕུར་པ་གསང་བ་སྤུ་གྲི་ལས༔ ཕོ་ཉ་བསེ་ལྕགས་དུང་གསུམ་གྱི་ཕྲིན་ལས་དགྲ་དཔུང་བརླག་པའི་མཚོན་ཆ་ཞེས་བྱ་བ་བཞུགས༔ ཤྲཱི་བཛྲ་ཀུ་མ་ར་ཡེ༔ ཕོ་ཉ་བསེ་ལྕགས་དུང་གསུམ་པོ༔ འཁོར་ཞིང་ཕྲིན་ལས་སྒྲུབ་པའི་ཐབས༔ རྗེས་འཇུག་དོན་དུ་བསྟན་པར་བྱ༔ རིན་ཆེན་སྣ་ཚོགས་སྣོད་ནང་དུ༔ རི་རབ་བང་རིམ་བཞི་བ་བྱ༔ དབུས་སུ་རིན་ཆེན་གཏེར་བུམ་ནི༔ ཁ་ལ་ནོར་བུས་མཚན་པ་ཅན༔ ཤར་དུ་དམར་གཏོར་ཟུར་གསུམ་བཞི༔ དེ་བཞིན་ལྷོ་རུ་ནག་པོ་དང༔ བྱང་དུ་དཀར་པོ་ཟུར་གསུམ་བཞི༔ ནུབ་ཏུ་གཅན་གཟན་སྣ་ཚོགས་བཞག༔ སྙིང་དང་ལྕེ་སྤྱང་བྱ་སོགས་བརྒྱན༔ ཤ་ཁྲག་མཐེབ་ཀྱུའི་ཚོགས་ཀྱིས་བརྒྱན༔ གཞན་ཡང་རྒྱུན་གྱི་གཏོར་མ་བཤམས༔ དེ་ནས་ལྷ་ཡི་ང་རྒྱལ་གྱིས༔ བྷྱོ༔ དཔལ་ཆེན་ཆེ་མཆོག་རྡོ་རྗེ་གཞོན་ནུ་ཡི༔ སྐུ་ཡི་བཀའ་ཉན་བསེ་ཡི་མི་བོ་བཞི༔ སྲིན་པོའི་སྐྱེས་བུ་དཀར་པོ་དུང་ཕུར་འདྲིལ༔ ལེ་བརྒན་བེར་གསོལ་བཙན་རྟ་དམར་པོ་ཆིབས༔ གཤིན་རྗེའི་སྐྱེས་བུ་ནག་པོ་ལྕགས་ཕུར་འདྲིལ༔ དར་ནག་བེར་གསོལ་བདུད་རྟ་ནག་པོ་ཆིབས༔ ཡ་བདུད་སྐྱེས་བུ་དམར་པོ་ཟངས་ཕུར་འདྲིལ༔ དར་དམར་བེར་གསོལ་དྲེལ་རྟ་རྐང་གསུམ་ཆིབས༔ གནོད་སྦྱིན་སྐྱེས་བུ་སྔོན་པོ་གཡུ་ཕུར་འདྲིལ༔ སྤྲིན་དཀར་ཐུལ་བ་གསོལ་ཞིང་རྟ་སྔོན་ཆིབས༔ གསུང་གི་བཀའ་ཉན་ལྕགས་ཀྱི་སྐྱེས་བུ་བཞི༔ ཤར་བདུད་དཀར་པོ་གཡུ་སྤྱང་ཐུལ་བ་གསོལ༔ གཡས་པས་ལྕགས་ཀྱུ་གཡོན་པས་མི་སྙིང་ཟ༔ ཆིབས་སུ་ལྕགས་ཀྱི་སྤྱང་མོ་མགོ་དགུ་ཆིབས༔ ལྷོ་བདུད་སྔོན་པོ་དར་ནག་གོ་ཟུ་གསོལ༔ གཡས་པས་མི་ལག་གཡབ་ཅིང་གཡོན་ཞགས་པ༔ ཆིབས་སུ་གཡུ་ཡི་སྤྱང་མོ་མགོ་དགུ་ཆིབས༔ ནུབ་བདུད་ནག་པོ་བཙོ་དམར་ལྭའུ་གསོལ༔ གཡས་པས་སེང་ལྡིང་ཕུར་བུ་གཡོན་ཐོད་ཁྲག༔ ཆིབས་སུ་མཆོང་གི་སྤྱང་མོ་གདོང་ལྔ་ཞོན༔ བྱང་བདུད་ལྗང་གུ་དར་ནག་བེར་ཆེན་གསོལ༔ གཡས་པས་རལ་གྲི་གཡོན་པས་མཆོག་ཕུར་འདྲིལ༔ ཆིབས་སུ་དུང་སྤྱང་དཀར་མོ་རྔམས་པ་ཆིབས༔ ཐུགས་ཀྱི་བཀའ་ཉན་དུང་གི་སྐྱེས་བུ་བཞི༔ སྲིན་པོའི་གིང་ཆེན་དཀར་པོ་དུང་ཕུར་འདྲིལ༔ གཡི་ཐུལ་གསོལ་ཞིང་རིས་བཀྲ་སྟག་ལ་ཆིབས༔ གཤིན་རྗེའི་གིང་ཆེན་སྔོན་པོ་གྲི་ཕུར་འདྲིལ༔ དར་ནག་གོས་གསོལ་གདུག་པ་གཟིག་ལ་ཆིབས༔ བདུད་ཀྱི་གིང་ཆེན་དམར་པོ་ལྕགས་ཕུར་འདྲིལ༔ སྤྱང་དཀར་ཐུལ་བ་གསོལ་ཞིང་དོམ་ནག་ཆིབས༔ གནོད་སྦྱིན་གིང་ཆེན་སེར་པོ་མཆོག་ཕུར་འདྲིལ༔ དར་དམར་བེར་གསོལ་གཏུམ་རྔམས་དྲེད་མོ་ཆིབས༔ གཞན་ཡང་སྤྲུལ་འཁོར་བསམ་གྱིས་མི་ཁྱབ་པ༔ སྡེ་བརྒྱད་དྲེགས་ཚོགས་དམག་གི་གཡུལ་གྱིས་བསྐོར༔ འཁོར་བཅས་འདིར་སྤྱོན་དམ་ཚིག་སྟན་ལ་བཞུགས༔ ཤ་ཁྲག་དམར་གྱིས་བརྒྱན་པའི་གཏོར་མ་དང༔ མཐུན་པའི་དམ་རྫས་ཕུད་སྐྱེམས་འདི་བཞེས་ལ༔ རྣལ་འབྱོར་བདག་ཅག་འཁོར་དང་བཅས་པ་ཡི༔ ནད་གདོན་ཞི་ཞིང་ཚེ་དཔལ་རྒྱས་པ་དང༔ སྣང་བ་དབང་བསྡུད་ལོག་འདྲེན་ཚར་གཅོད་མཛོད༔ བསྟན་པའི་སྤྱི་དགྲ་བླ་མའི་སྐུ་དགྲ་དང༔ ཁྱད་པར་རྣལ་འབྱོར་བདག་ལ་དོ་བརྡོ་ཞིང༔ ཕོད་བཙུགས་བྱེད་པའི་དགྲ་དང་བགེགས་ལ་སོགས༔ མིང་གི་ལྷག་མ་ཙམ་ཡང་མ་ལུས་པར༔ ཐལ་བ་རྡུལ་དུ་བརླག་པའི་ཕྲིན་ལས་མཛོད༔ བཀའ་འགལ་དམ་ལོག་ཉེས་བྱས་དགྲ་བགེགས་ཀྱི༔ ཁམས་དང་སྐྱེ་མཆེད་དབང་པོ་ནང་ཁྲོལ་བཅས༔ ཆོས་སྐྱོང་ཁྱོད་ལ་བརྔན་པའི་ཟས་སུ་འབུལ༔ དགྱེས་པའི་རྐན་སྒྲ་དང་བཅས་རོལ་བར་མཛོད༔ རྡོ་རྗེ་ཕུར་བ་གསང་བ་སྤུ་གྲི་ཡི༔ ཟབ་ཆོས་ཉམས་ལེན་གང་ཟག་བཅས་པ་ཀུན༔ ཁྱོད་ལ་གཏད་དོ་གཉེར་རོ་འཚོ་རྫི་གྱིས༔ ཕྱི་ནང་གསང་བའི་འགལ་རྐྱེན་བར་ཆད་སོལ༔ རྣལ་འབྱོར་བཅོལ་པའི་ཕྲིན་ལས་མ་ལུས་པ༔ ཐོགས་མེད་མྱུར་དུ་འགྲུབ་པའི་ཕྲིན་ལས་མཛོད༔ རྒྱུན་དུ་བརྟེན་ཅིང་གསོལ་མཆོད་ན༔ གང་ལ་དམིགས་པའི་ཕྲིན་ལས་ཉིད༔ ཐོགས་པ་མེད་པར་དེ་བཞིན་སྒྲུབ༔ རྣོ་མྱུར་ནུས་པ་ཐོག་དང་མཚུངས༔ ལས་འཕྲོ་ཅན་དང་འཕྲད་ནས་ཀྱང༔ སངས་རྒྱས་བསྟན་པའི་བཙས་སུ་ཤོག༔ ས་མ་ཡཱ༔ རྒྱ་རྒྱ་རྒྱ༔ ཅེས་པའང་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་རིག་འཛིན་གསང་སྔགས་གླིང་པས་ཤར་རྒྱལ་མོ་རོང་གི་ཉེ་ཆར་གནས་ལུང་དཔལ་གྱི་རི་བོའི་གཡས་ཟུར་བྲག་རི་སེང་ཆེན་འགྱིངས་འདྲའི་ལྟོ་བ་ནས་ཁྲོམ་ཆེན་པོའི་མཐོང་ཆོས་སུ་གདན་དྲངས་པའོ།།