ལོངས་སྤྱོད་ཚོགས་ཀྱི་འཁོར་ལོ།
ཕུར་བ་གསང་བ་སྤུ་གྲི་ལས༔ ལོངས་སྤྱོད་ཚོགས་ཀྱི་འཁོར་ལོ་བཞུགས༔ རྩ་བ་གསུམ་ལ་ཕྱག་འཚལ་ལོ༔ གང་ཞིག་དཀྱིལ་འཁོར་འདིར་ཞུགས་ནས༔ ཚོགས་ཀྱི་འཁོར་ལོ་བསྐོར་འདོད་ན༔ ཞིང་ངམ་སྟག་གི་པགས་པའི་སྟེང༔ མཾ་ས་ལ་སོགས་བཟའ་བ་དང༔ ཨ་མྲྀ་ཏ་སོགས་བཏུང་བའི་རིགས༔ འདོད་ཡོན་ལོངས་སྤྱོད་སྐར་ལྟར་བཀྲམ༔ རྡོ་རྗེའི་རིག་མ་གར་བསྒྱུར་ཞིང༔ ཚོགས་ཀྱི་དགའ་སྟོན་སྤེལ་བར་བྱ༔ བདུད་རྩིས་བྲན་ལ་བྱིན་རླབས་ནི༔ ཧཱུྃ༔ ཡེ་ཤེས་རྡོ་རྗེའི་ཏིང་འཛིན་ལས༔ རཾ་ཡཾ་ཁཾ་འཕྲོས་ཚོགས་རྫས་ཀྱི༔ མ་དག་དངོས་འཛིན་བསྲེག་གཏོར་བཀྲུས༔ མི་གཙང་དྲི་མ་དག་པར་གྱུར༔ རཾ་ཡཾ་ཁཾ༔ ལན་གསུམ༔ སླར་ཡང་དཀར་དམར་མཐིང་གསུམ་འོད༔ ཨོཾ་ཨཱ༔ཧཱུྃ་གི་རྣམ་པར་འཕྲོས༔ རོ་མཆོག་བརྒྱ་དང་ལྡན་པ་ཡི༔ ཟག་མེད་ཡེ་ཤེས་བདུད་རྩིར་གྱུར༔ ཨོཾ་ཨཱ༔ཧཱུྃ༔ ལན་གསུམ༔ སྤྱན་འདྲེན་ནི༔ ཧཱུྃ་ཧྲཱི༔ ཆོས་དབྱིངས་སྤྲོས་དང་བྲལ་བའི་ཕོ་བྲང་ནས༔ སྲིད་པ་ཕུར་བུ་རྡོ་རྗེ་གཞོན་ནུའི་སྐུ༔ ཡབ་ཡུམ་སྤྲུལ་པ་བཀའ་ཡི་བསྲུང་མར་བཅས༔ སྔོན་གྱི་ཞལ་བཞེས་ཐུགས་དམ་ཇི་བཞིན་དུ༔ སྣང་སྲིད་ཕུར་བར་གསལ་བའི་གཞལ་ཡས་འདིར༔ ཡེ་ཤེས་སྒྱུ་མར་རོལ་ཞིང་གཤེགས་སུ་གསོལ༔ རྡོ་རྗེའི་སྐུ་གསུང་ཐུགས་ཀྱི་བྱིན་ཕོབ་ལ༔ བཟའ་བཏུང་ཚོགས་རྫས་རྣམས་ལ་བཅུད་ཅིག་སྩོལ༔ སྣང་གསལ་མར་མེ་འདི་ལ་མདང་ཅིག་ཕྱུང༔ བདག་ལ་དབང་བསྐུར་མཆོག་ཐུན་དངོས་གྲུབ་སྩོལ༔ ཨོཾ་ཛྙཱ་ན་བཛྲ་ཀཱི་ལི་ཀཱི་ལ་ཡ་སརྦ་ས་མ་ཡཱ་ཧྲིང་ཧྲིང་ཕེམ་ཛ༔ དེ་ནས་ཚོགས་ཕུད་རིམ་པ་གསུམ་དུ་སྤྲོས་ལ༔ ཧཱུྃ༔ ཚེ་རབས་སྐྱེ་བ་སྔོན་ནས་འབྲེལ་བའི་ལྷ༔ དཔལ་ཆེན་རྡོ་རྗེ་གཞོན་ནུའི་དཀྱིལ་འཁོར་ལ༔ འདོད་ཡོན་ལྔ་ལྡན་གྷ་ནའི་མཆོད་པ་འབུལ༔ བཞེས་ནས་མཆོག་དང་ཐུན་མོང་དངོས་གྲུབ་སྩོལ༔ ཨོཾ་མ་ཧཱ་གྷ་ན་ཙཀྲ་པཱུ་ཛ་ཁཱ་ཧི༔ བཤགས་པ་ནི༔ ཧོ༔ དཀྱིལ་འཁོར་ལྷ་ཚོགས་འཁོར་དང་བཅས་པ་ལ༔ བདག་ཅག་མི་ཤེས་སྒོ་གསུམ་རྨོངས་པའི་ལས༔ ཉམས་ཆགས་མང་པོའི་ཚོགས་རྣམས་ཅི་མཆིས་པ༔ ལོངས་སྤྱོད་ཚོགས་ཀྱི་མཆོད་པས་བཤགས་པར་བགྱི༔ སརྦ་ས་མ་ཡཱ་ཤུདྡྷེ་ཨཱ༔ ཡི་གེ་བརྒྱ་པ་བཟླ༔ ཚོགས་ཀྱི་བསྒྲལ་ལས་ནི༔ རྫས་ལ་འགུགས་བསྟིམ་བྱ་ཞིང༔ ཧཱུྃ༔ ང་ནི་དཔལ་ཆེན་ཆེ་མཆོག་ཀཱི་ལ་ཡ༔ ཁྲོ་གཏུམ་རྔམས་པ་མི་བཟད་འབར་བའི་སྐུ༔ ཕྱག་གཉིས་རི་རབ་ཕུར་བུ་འདྲིལ་ཞིང་འདེབས༔ དགྲ་བགེགས་བྱད་མའི་སྙིང་ཀར་ཀཱི་ལ་ཡ༔ དབང་པོ་རླུང་སེམས་དྭངས་མའི་ཐིག་ལེ་བཅས༔ གསལ་བའི་མར་མེ་རླུང་གིས་བསད་བཞིན་ཐོངས༔ རྣམ་ཤེས་དཔལ་ཆེན་ཐུགས་ཀྱི་སྲས་སུ་ཕཊ༔ ཨོཾ་བཛྲ་ཀཱི་ལི་ཀཱི་ལ་ཡ་ནྲྀ་ཏྲི་ཤ་ཏྲུཾ་ཧུར་ཐུཾ་མ་ར་རྦད༔ ཞེས་ཕུར་བུ་གདབ་ཅིང་མཚོན་གྱིས་གཏུབ་ལ་བསྟབ་པ་ནི༔ ཧཱུྃ༔ རྡོ་རྗེ་གཞོན་ནུའི་ལྷ་ཚོགས་འཁོར་བཅས་རྣམས༔ ཞལ་གདངས་ལྗགས་རྐྱོངས་རྔམས་པའི་མཆེ་གཙིགས་ལ༔ དགྲ་བགེགས་བྱད་མ་བསྒྲལ་བའི་ཤ་ཁྲག་རུས༔ རིགས་རྒྱུད་ནོར་རྫས་ཙམ་ཡང་མ་ལུས་པར༔ ཞལ་ཏུ་བསྟབ་བོ་དྲག་ཏུ་རྔམས་ཟས་མཛོད༔ དུག་ལྔའི་སྐྱེ་རྒྱུད་བརླག་པའི་ཕྲིན་ལས་མཛོད༔ ཨོཾ་བཛྲ་ཀཱི་ལི་ཀཱི་ལ་ཡ་དགྲ་བགེགས་ཀྱི་ཤ་ཁྲག་རུས་གསུམ་ལ་ཁ་རཾ་ཁཱ་ཧི༔ ཞེས་བསྟབ་ལ་ཚོགས་རྫས་དངོས་གྲུབ་ཏུ་རོལ་བ་ནི༔ ཧོ༔ དམ་ཚིག་ཆེན་པོའི་ལོངས་སྤྱོད་རྫས༔ གཟུང་འཛིན་མཚན་མའི་སྐྱོན་དང་བྲལ༔ བྱིན་རླབས་དངོས་གྲུབ་ཡིད་བཞིན་ཟས༔ ཐུགས་རྗེས་དགོངས་ཏེ་དགྱེས་པར་རོལ༔ ཞེས་ལས་རྡོར་གྱིས་ཞུས་པའི་ལན་དུ་སློབ་དཔོན་གྱིས༔ ཧོ༔ རོ་དང་བཅུད་ལྡན་ལོངས་སྤྱོད་ལ༔ བླ་མ་དཀྱིལ་འཁོར་ལྷ་དང་བཅས༔ དགྱེས་པ་ཆེན་པོའི་ངང་ཚུལ་གྱིས༔ དངོས་གྲུབ་དབྱིག་ཏུ་རོལ་བར་བྱ༔ ཨ་ལ་ལ་ཧོ༔ དེ་ནས་ལྷག་མར་ཁ་ཆུ་བྲན་ལ༔ བཤུགས་པ་རྐང་གླིང་རོལ་མོར་བཅས༔ ཧཱུྃ༔ སྔོན་ཚེ་རིག་འཛིན་པདྨ་འབྱུང་གནས་ཀྱིས༔ དཀྱིལ་འཁོར་གྲལ་བཞག་ལྷག་མའི་ཞལ་ཆབ་བྱིན༔ དབང་རྟགས་ཅོད་པན་བཏགས་ཤིང་དམ་ཆུ་བླུད༔ ལྷག་བསྡུད་དབང་ཕྱུག་ཉི་ཤུ་རྩ་བརྒྱད་དང༔ ཀེའུ་སེང་དམ་ཅན་བསྲུང་མའི་ཚོགས་རྣམས་ཀུན༔ ལོངས་སྤྱོད་གྷ་ནའི་ལྷག་མ་འདི་ལོངས་ལ༔ རྒྱལ་བའི་བསྟན་དང་འཇིག་རྟེན་སྐྱོང་བ་དང༔ རྣལ་འབྱོར་བདག་གི་ཕྱི་ནང་བར་ཆད་སོལ༔ འཁོར་སྲུང་རྐྱེན་བཟློག་དགྲ་སོད་ལོག་འདྲེན་ཐུལ༔ བོད་ཁམས་མཐའ་དམག་འགོང་པོའི་སོ་ཁ་སྲུང༔ བཅོལ་པའི་ཕྲིན་ལས་ཡིད་བཞིན་འགྲུབ་པར་མཛོད༔ ཅེས་ལྷག་གཏོར་གཙང་སར་གཤེགས༔ དེ་ནས་ཆད་མདོ་ནི༔ གཏོར་མ་སྨན་རཀ་གིས་བྲན་ལ་བསྐུལ་བ་སོགས་ཟུར་དུ་ཤེས༔ ཧཱུྃ་བྷྱོ༔ སྔོན་ཚེ་འདས་དུས་བསྐལ་པའི་དང་པོ་ལ༔ འོག་མིན་གསང་བ་མཆོག་གི་ཕོ་བྲང་དུ༔ བཅོམ་ལྡན་དཔལ་ཆེན་ཆེ་མཆོག་ཧེ་རུ་ཀས༔ ཕུང་བྱེད་ལོག་འདྲེན་རུ་དྲ་བཏུལ་བའི་ཚེ༔ ཀཽ་རི་མ་བརྒྱད་སེང་ཧ་ཕྲ་མེན་བརྒྱད༔ དབང་ཕྱུག་ཉེར་བརྒྱད་དྲེགས་པ་ཆེ་དགུ་ཡིས༔ སོ་སོའི་གཟུགས་བསྟན་རང་རྟགས་སྲོག་སྙིང་ཕུལ༔ ཐ་ཚིག་གཏོར་མ་ལེན་པར་མ་ཆད་དམ༔ ཁས་བླངས་དམ་ཚིག་བསྲུང་བར་མ་ཆད་དམ༔ རྣལ་འབྱོར་བུ་བཞིན་སྐྱོང་བར་མ་ཆད་དམ༔ གདུག་པའི་དགྲ་བགེགས་སྒྲོལ་བར་མ་ཆད་དམ༔ དམ་རྫས་བཀའ་ཡི་གཏོར་མ་འདི་ལོངས་ལ༔ བདག་གི་བཅོལ་པའི་ཕྲིན་ལས་འགྲུབ་པར་མཛོད༔ ཧཱུྃ་བྷྱོ༔ དེ་འོག་བར་གྱི་བསྐལ་པ་དབུས་མ་ལ༔ བསྐལ་པ་མེ་ལྟར་འབར་བའི་གཞལ་ཡས་ནས༔ བཅོམ་ལྡན་དཔལ་ཆེན་རྡོ་རྗེ་གཞོན་ནུ་ཡིས༔ སྲིད་པའི་དྲེགས་པ་ཆེ་དགུ་དབང་བསྡུས་ནས༔ རྡོ་རྗེའི་བཀའ་དང་དམ་ལ་བཏགས་པའི་ཚེ༔ དུར་ཁྲོད་རོ་ཟ་སུམ་ཅུ་རྩ་གཉིས་དང༔ འགོང་པོ་ཐེའུ་རིང་དམ་སྲི་སྤུན་དགུ་བཅས༔ ཧེ་རུ་ཀ་ཡི་དགོངས་པས་ཟིལ་འོག་བཅུག༔ དམ་ལ་བཏག་ཅིང་སྲོག་སྙིང་གཏའ་རུ་བཟུང༔ དེ་ཚེ་ཕུར་སྲུང་དམ་ཅན་མ་ལུས་པས༔ སོ་སོའི་གཟུགས་བསྟན༴སོགས། འགྲུབ་པར་མཛོད༔ ཧཱུྃ་བྷྱོ༔ དེ་འོག་བསྐལ་པ་ཐ་མ་བོད་ཀྱི་ཡུལ༔ སློབ་དཔོན་ཆེན་པོ་པདྨ་འབྱུང་གནས་ཀྱིས༔ རིག་འཛིན་མཁར་ཆེན་དཔལ་གྱི་དབང་ཕྱུག་དང༔ ཐུགས་ཀྱི་གཟུངས་མ་ཡེ་ཤེས་མཚོ་རྒྱལ་ལ༔ ཕྲིན་ལས་ཕུར་པའི་དཀྱིལ་འཁོར་ཞལ་ཕྱེས་ནས༔ དབང་གིས་སྨིན་ཅིང་གདམས་པས་རྒྱུད་དཀྲོལ་ཚེ༔ ཕུར་བསྲུང་བཅུ་གཉིས་ཉི་ཟླ་ཐོད་ཕྲེང་དང༔ བསེ་ལྕགས་དུང་གི་སྐྱེས་བུ་ལ་སོགས་པའི༔ ཕུར་པའི་བཀའ་གཏེར་བསྲུང་མ་ཐམས་ཅད་ཀྱིས༔ སོ་སོའི་གཟུགས་བསྟན༴སོགས། འགྲུབ་པར་མཛོད༔ ཧཱུྃ་བྷྱོ༔ དེ་འོག་ལྔ་བརྒྱ་ཐ་མ་སྙིགས་མའི་དུས༔ བྱིན་རླབས་སྒྲུབ་གནས་གཏེར་གྱི་ཕོ་བྲང་དུ༔ སློབ་དཔོན་ཆེན་པོ་པདྨ་འབྱུང་གནས་དང༔ གནས་ཡུལ་མ་སྲིང་མཁའ་འགྲོའི་ཚོགས་རྣམས་ཀྱིས༔ རིག་འཛིན་ཆོས་དབང་གསང་སྔགས་གླིང་པ་ལ༔ ལུང་བསྟན་དབུགས་དབྱུང་གཏེར་སྒོ་འབྱེད་པའི་ཚེ༔ ཕུར་བསྲུང་དམ་ཅན་དྲེགས་པ་སྡེ་བརྒྱད་ཀྱིས༔ སོ་སོའི་གཟུགས་བསྟན༴སོགས། འགྲུབ་པར་མཛོད༔ བསྟན་མ་སྐྱོང་བ་ནི༔ གཏོར་མར་བདུད་རྩི་བྲན་ལ༔ ཧཱུྃ༔ བལ་ཡུལ་ཨ་སུ་ར་ཡི་བྲག་ཕུག་ཏུ༔ རིག་འཛིན་བདུད་འདུལ་པདྨ་ཐོད་ཕྲེང་གིས༔ བཀའ་བསྒོས་དམ་ལ་བཞག་པའི་གཡར་དམ་ཅན༔ སྲིད་པའི་རྟེན་འབྲེལ་བཅུ་གཉིས་བསྟན་མའི་ཚོགས༔ འདིར་གཤེགས་དམ་རྫས་བརྒྱན་པའི་གཏོར་མ་ལོངས༔ བོད་ཡུལ་མཐའ་མི་འགོང་པོའི་རྒྱུ་འགྲུལ་ཆོད༔ མུ་སྟེགས་ངན་སྦྱོར་ཅན་གྱི་ནུས་པ་ཆོམས༔ ལོག་འདྲེན་དགྲ་དང་བགེགས་ཀྱི་སྙིང་ཁྲག་འཐུང༔ རྣལ་འབྱོར་བདག་གི་གང་བཅོལ་ཕྲིན་ལས་མཛོད༔ དགོན་གནས་བསྟན་པ་འཛིན་པའི་སྡེ་ཀུན་སྐྱོངས༔ རྒྱལ་ཁམས་ཡུལ་ཕྱོགས་ཀུན་ཏུ་དགེ་ལེགས་སྩོལ༔ རྣལ་འབྱོར་བཅོལ་པའི་ཕྲིན་ལས་འགྲུབ་པར་མཛོད༔ བཛྲ་ཌཱཀྐི་ནི་བྷ་ལིང་ཏ་ཁཱ་ཧི༔ དེ་ནས་རྟ་བྲོ་བརྡུང་བ་ནི༔ གཏོར་གཞོང་ཁ་སྦུབ་ཅིང་འགུགས་གཞུགས་བྱས་ལ༔ ཧཱུྃ༔ སྣང་སྲིད་ཕུར་པའི་ཕོ་བྲང་འོག༔ ལོག་པར་འདྲེནཔ་ཐམས་ཅད་བཀུགས༔ རྡོ་རྗེ་གཞོན་ནུའི་བྲོ་བརྡུང་བས༔ ཕུང་བྱེད་དམ་སྲིའི་སྡེ་ཚོགས་ཀུན༔ སྲན་ཕུང་གཏུན་གྱིས་བཅོམ་པ་བཞིན༔ མིང་མེད་རྡུལ་དུ་བརླག་པར་འགྱུར༔ ཨོཾ་བཛྲ་ཀཱི་ལི་ཀཱི་ལ་ཡ་ཨོཾ་ལཾ་ཨཱ་ལཾ་ཧཱུྃ་ལཾ༔ སྟྭཾ་བྷ་ཡ་ནན་ནན༔ རྗེས་ལ་མཆོད་བསྟོད་བྱ༔ ༼༧ ཧཱུྃ༔ ཕྲིན་ལས་ཕུར་པའི་ལྷ་ཚོགས་ལ༔ བླ་མེད་མཆོད་པ་འབུལ་བ་ནི༔ མེ་ཏོག་བདུག་སྤོས་མར་མེ་དང༔ དྲི་ཆབ་ཞལ་ཟས་རོལ་མོའི་ཚོགས༔ ནམ་མཁའ་མཛོད་ཀྱི་འཁོར་ལོར་འབུལ༔ བཞེས་ནས་དངོས་གྲུབ་མ་ལུས་སྩོལ༔ བཛྲ་པུཥྤེ༴སོགས། ཤཔྟ་པྲ་ཏིཙྪ་ཡེ་སྭཱ་ཧཱ༔ ཧཱུྃ༔ ཐུགས་ཉིད་ཞི་བའི་ངང་ལས་མ་གཡོས་ཀྱང༔ སྙིང་རྗེའི་ཀློང་ལས་དྲག་པོའི་སྐུར་བཞེངས་ཏེ༔ ཞི་རྒྱས་དབང་དྲག་རབ་འབྱམས་ལས་མཛད་པའི༔ ཕུར་པ་ཡོངས་རྫོགས་ལྷ་ལ་ཕྱག་འཚལ་བསྟོད༔ ཅེས་སམ་ཡང་ན། ཧཱུྃ༔ ཆོས་ཉིད་ཞི་བའི་ངང་ཉིད་ལས༔ ཐབས་དང་སྙིང་རྗེའི་གཞན་དབང་གིས༔ གང་འདུལ་འབར་བའི་སྐུར་བཞེངས་པ༔ སྲིད་པ་ཕུར་བུའི་ཚོགས་ལ་བསྟོད༔༽དངོས་གྲུབ་བླང་བ་ནི༔ ཧོ༔ ཚེ་རབས་སྐྱེ་བ་སྔོན་ནས་འབྲེལ་བའི་ལྷ༔ རྡོ་རྗེ་གཞོན་ནུའི་ལྷ་ཚོགས་བདག་བསྒྲུབ་ནས༔ བསྙེན་བསྒྲུབ་མཐར་ཕྱིན་རྟགས་དང་མཚན་མ་རྫོགས༔ ད་ནི་དངོས་གྲུབ་སྩོལ་བའི་དུས་ལ་བབས༔ སྐུ་གསུང་ཐུགས་དང་ཡོན་ཏན་ཕྲིན་ལས་ཆེའི༔ མཆོག་དང་ཐུན་མོང་དངོས་གྲུབ་སྣ་ཚོགས་པ༔ ད་ལྟ་ཉིད་དུ་བདག་ལ་ཆར་ལྟར་ཕོབ༔ ལྷ་ཀླུ་མི་ཡི་ལོངས་སྤྱོད་དངོས་གྲུབ་སྩོལ༔ ཕྲིན་ལས་རྣམ་བཞི་འགྲུབ་པའི་དངོས་གྲུབ་སྩོལ༔ ཡིད་ལ་གང་བསམ་འགྲུབ་པའི་དངོས་གྲུབ་སྩོལ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྣཾ་བཾ་ཧཱུྃ་ཕཊ༔ ཀཱ་ཡ་སིདྡྷི་ཨོཾ༔ ཝཀྐ་སིདྡྷ་ཨཱ༔ ཙིཏྟ་སིདྡྷི་ཧཱུྃ༔ སརྦ་སིདྡྷི་ཧྲཱི༔ ནོངས་བཤགས་ནི༔ ཧོ༔ ཕུར་པའི་དཀྱིལ་འཁོར་འདིར་ཞུགས་ནས༔ ཏིང་འཛིན་མ་གསལ་སྔགས་བཟླས་ཉུང༔ ཆོ་ག་ནོར་འཁྲུལ་རྫས་མ་ཚང༔ ནོངས་པའི་ཚོགས་ཀུན་མཐོལ་ལོ་བཤགས༔ ཨོཾ་ཤྲཱི་བཛྲ་ཀུ་མ་ར་ཤུདྡྷེ་ཨ༔ ཡི་གེ་བརྒྱ་པ་བཟླས༔ རྫོགས་རིམ་ནི༔ ཨཱ༔ སྣང་སྲིད་ཐམས་ཅད་སེམས་ཀྱི་རྩལ༔ སྣོད་བཅུད་འོད་ཞུ་རང་ལ་ཐིམ༔ ལྷ་སྐུ་ཐུགས་སྲོག་ནཱ་དའི་བར༔ འོད་ཡལ་འོད་གསལ་ཀློང་དུ་བཞག༔ སླར་ཡང་ཆུ་ལས་ཉ་འཕར་བཞིན༔ དྲན་རྫོགས་རྡོ་རྗེའི་ལྷ་སྐུར་ལྡང༔ བསྔོ་སྨོན་ནི༔ ན་མོ་བདག་གིས་དུས་གསུམ་ཚོགས་གཉིས་ཅི་བསགས་པ༔ མ་ལུས་མཁའ་མཉམ་འགྲོ་བའི་དོན་དུ་བསྔོ༔ མཁའ་ཁྱབ་སེམས་ཅན་གཅིག་ཀྱང་མ་ལུས་པ༔ རྡོ་རྗེ་གཞོན་ནུའི་གོ་འཕང་མྱུར་ཐོབ་ཤོག༔ བཀྲ་ཤིས་ནི༔ ཧཱུྃ༔ དགོངས་བརྡ་སྙན་བརྒྱུད་རིག་འཛིན་བླ་མ་དང༔ རྒྱུད་སྡེ་བཞི་དང་ཐེག་པ་རིམ་དགུའི་ལྷ༔ ཁྱད་པར་ཕྲིན་ལས་ཕུར་བ་ལས་ཀྱི་རིགས༔ རྡོ་རྗེ་གཞོན་ནུའི་ལྷ་ཚོགས་བཀྲ་ཤིས་ཤོག༔ ཞི་དང་རྒྱས་པ་དབང་དང་དྲག་པོ་ཡི༔ ཕྲིན་ལས་བཞི་ཡིས་གང་འདུལ་ཐབས་དང་ལྡན༔ ཞི་ལས་མ་གཡོས་སྙིང་རྗེས་ཁྲོས་པའི་གར༔ སྲས་མཆོག་ཀཱི་ལ་རིགས་བཞིའི་བཀྲ་ཤིས་ཤོག༔ སྟེང་འོག་ཕྱོགས་བཞི་མཚམས་བརྒྱད་གནས་མཆོག་ནས༔ ཕྱོགས་སྐྱོང་དྲེགས་པའི་སྡེ་ཚོགས་ཐབས་ཀྱིས་འདུལ༔ མི་བཟད་རྔམས་པའི་ཁྲོ་རྒྱལ་ཡབ་དང་ཡུམ༔ ཁྲོ་བཅུ་ཡབ་ཡུམ་རྣམས་ཀྱི་བཀྲ་ཤིས་ཤོག༔ གཞན་ཡང་ཀེའུ་སེང་ཁྲ་ཐབས་སྒོ་སྐྱོང་དང་༔ ཕུར་བསྲུང་བཅུ་གཉིས་བསེ་ལྕགས་དུང་ལ་སོགས༔ རྡོ་རྗེ་གཞོན་ནུའི་བཀའ་ཉན་ལས་བྱེད་མཁན༔ དཀྱིལ་འཁོར་ལྷ་ཚོགས་རྣམས་ཀྱི་བཀྲ་ཤིས་ཤོག༔ ས་མ་ཡཱ༔ ཟབ་རྒྱ༔ གཉན་རྒྱ༔ གཏད་རྒྱ༔ ཨེ་མ་དཔལ་གྱི་དབང་ཕྱུག་དང༔ ཡེ་ཤེས་མཚོ་རྒྱལ་མཆེད་གཉིས་ལ༔ ཕུར་བའི་སྒྲུབ་ཐབས་གྲངས་མང་ཡང༔ དབང་པོའི་ནང་ན་སྙིང་ལྟ་བུ༔ ཡང་ཟབ་གསང་བ་སྤུ་གྲི་འདི༔ ཨོ་རྒྱན་ང་ཡི་ཐུགས་དམ་ཡིན༔ གཏད་དོ་གཉེར་རོ་བཙའ་ཤེས་ཀྱིས༔ ད་ལྟ་རང་རང་ཉམས་ལེན་གྱིས༔ རྒྱ་ཆེར་སྤེལ་བའི་གནས་མེད་ཀྱིས༔ ཤར་ཕྱོགས་རྒྱལ་མོ་རོང་གི་དབུས༔ རྡོ་རྗེ་ཕུར་བའི་སྒྲུབ་གནས་ཆེ༔ སེང་གེའི་གཡུ་རལ་འདྲ་བ་ཡི༔ གྲུ་འཛིན་རི་ཡི་ལྟོ་བར་སྦོས༔ ནམ་ཞིག་དུས་ཀྱི་ཐ་མ་ལ༔ མཆེད་ལྕམ་ཁྱེད་གཉིས་ཟུང་འཇུག་གི༔ སྤྲུལ་པའི་སྐྱེས་བུ་གཅིག་གིས་འབྱིན༔ འགྲོ་དོན་རླབས་ཆེན་འབྱུང་བར་འགྱུར༔ ས་མ་ཡཱ༔ རྒྱ་རྒྱ་རྒྱ༔ ཅེས་ཁམས་དབུས་གཙང་གསུམ་གྱི་མཁས་གྲུབ་ཉི་ཟླ་ལྟ་བུ་སུས་ཀྱང་འགྲན་ཟླ་དང་བྲལ་བའི་རྩོད་བྲལ་དུས་བབས་ཀྱི་གཏེར་སྟོན་ཆེན་པོ་འགྲོ་འདུལ་རིག་འཛིན་གསང་སྔགས་གླིང་པས་མཁའ་སྤྱོད་གནས་ལུང་དཔལ་གྱི་རི་བོའི་གཡས་ཟུར་བྲག་རི་སེང་ཆེན་འགྱིང་འདྲའི་ལྟོ་བ་ནས་གདན་དྲངས་པའོ།།