བསྐང་བཤགས་དྭངས་གསལ་མེ་ལོང་།
ཕུར་པ་གསང་བ་སྤུ་གྲི་ལས༔ བསྐང་བཤགས་དྭངས་གསལ་མེ་ལོང་བཞུགས༔
རྩ་བ་གསུམ་ལ་ཕྱག་འཚལ་ལོ༔ ཐུགས་དམ་བསྐང་བའི་ལས་རིམ་ནི༔ ཡིད་དང་མཐུན་པའི་དབེན་གནས་སུ༔ སྒྲུབ་པའི་དཀྱིལ་འཁོར་གཞུང་ལྟར་བྲི༔ ཕྱི་ནང་གསང་བའི་མཆོད་པའི་ཚོགས༔ བསྐང་རྫས་སྤྱན་གཟིགས་སྐར་ལྟར་བཀྲམ༔ ཁྱད་པར་ཚོགས་དང་མར་མེ་སྤོས༔ གཞུང་དུ་བཤད་པའི་བསྐང་རྫས་བཤམས༔ བཀའ་གཏེར་བསྲུང་མའི་མཆོད་ཚོགས་བཀྲམས༔ རྟེན་རྫས་ཡོ་བྱད་འདུ་བྱས་ལ༔ རྣལ་འབྱོར་བདེ་བའི་སྟན་ལ་འདུག༔ གདུང་དབྱངས་རོལ་མོ་དང་བཅས་ཏེ༔ ཧཱུྃ་ཧྲཱི༔ རྨད་བྱུང་གསང་ཆེན་རོལ་པའི་དཀྱིལ་འཁོར་འདིར༔ སྒྲུབ་པའི་རིག་འཛིན་རྣལ་འབྱོར་བདག་ཅག་གིས༔ སྒོ་གསུམ་དད་དང་ཏིང་འཛིན་རྩེ་གཅིག་པས༔ སྲིད་པ་ཕུར་བའི་ལྷ་ཚོགས་བདག་སྒྲུབ་ན༔ དུས་ལས་མི་འདའ་ཐུགས་རྗེའི་དབང་གིས་ནི༔ རྣལ་འབྱོར་སྒྲུབ་པ་པོ་ལ་བརྩེར་དགོངས་ནས༔ ཐུགས་དམ་བསྐང་བའི་གནས་འདིར་གཤེགས་སུ་གསོལ༔ པདྨ་ཉི་ཟླ་རུ་དྲའི་གདན་ལ་བཞུགས༔ ལྟ་བའི་རང་ཞལ་མཇལ་བས་བརྡ་ཕྱག་འཚལ༔ ཡུལ་དང་དབང་པོ་ཟུང་འཇུག་བདེ་བས་མཆོད༔ འགགས་མེད་མི་ཤིགས་ནཱ་དའི་དབྱངས་ཀྱིས་བསྟོད༔ བཛྲ་ཨརྒྷཾ༴སོགས། ཤཔྟ་པྲ་ཏིཙྪ་ཡེ་སྭཱ་ཧཱ༔ མ་ཧཱ་པཉྩ་རཀྟ་བཱ་ལིང་ཏ་ཁཱ་ཧི༔ ཨེ་ཝཾ་གུ་ཧྱ་མ་ཧཱ་སུ་ཁ་པཱུ་ཛ་ཧོ༔ བསྐང་བ་དངོས་ནི༔ ཧཱུྃ་ཧྲཱི༔ དཔལ་ཆེན་རྡོ་རྗེ་གཞོན་ནུའི་ལྷ་ཚོགས་ཀྱི༔ གསང་བ་གསུམ་གྱི་ཐུགས་དམ་བསྐང་བ་ནི༔ མེ་ཏོག་བདུག་སྤོས་མར་མེ་དྲི་ཞལ་ཟས༔ དབྱངས་བདུན་ལྡན་པའི་རོལ་མོས་ཐུགས་དམ་བསྐང༔ དབང་པོའི་མེ་ཏོག་ཚིལ་ཆེན་སྤོས་ཀྱི་སྤྲིན༔ ཚིལ་ཆེན་སྣང་གསལ་མཁྲིས་པའི་དྲི་ཆབ་དང༔ ཤ་རུས་ཞལ་ཟས་ཐོད་རྔའི་རྐང་གླིང་སོགས༔ ནང་གི་དམ་རྫས་དྲག་པོའི་མཆོད་པས་བསྐང༔ རྩ་བརྒྱད་ཡན་ལག་སྟོང་སྦྱར་ཨ་མྲྀ་ཏ༔ དུག་གསུམ་བསྒྲལ་བའི་རཀྟ་རྦ་ཀློང་འཁྲུགས༔ སྣང་སྲིད་རྣམ་དག་དཔལ་གྱི་གཏོར་མས་གཏམས༔ ཁྱད་པར་རྨད་དུ་བྱུང་བའི་རྫས་ཀྱིས་བསྐང༔ ཕྱི་ལྟར་སྟོང་ཉིད་སྙིང་རྗེ་ཟུང་འཇུག་དང༔ ནང་ལྟར་བདག་དང་བདག་མེད་རོ་མཉམ་པ༔ གསང་བ་ཐབས་དང་ཤེས་རབ་རོལ་བ་ཆེ༔ རྨད་བྱུང་གསང་བ་སྦྱོར་བའི་མཆོད་པས་བསྐང༔ ཕྱི་ཡུལ་མ་རྟོག་འཁྲུལ་ཞིང་བཟུང་བའི་དགྲ༔ ནང་གི་སྣང་བ་གཉིས་སུ་འཛིན་པའི་བགེགས༔ དུག་ལྔའི་རྟོག་པ་ཡེ་ཤེས་ལྔའི་དབྱིངས་སུ༔ ཐབས་དང་ཤེས་རབ་སྒྲོལ་བའི་མཆོད་པས་བསྐང༔ སྣང་སྟོང་ལྷ་སྐུའི་ཕྱག་རྒྱ་ཆུ་ཟླའི་གར༔ རིག་སྟོང་དབྱེར་མེད་མངོན་སུམ་གསལ་བ་དང༔ མཚན་མར་འཛིན་པའི་རྟོག་པ་རྣམ་པར་དག༔ རྗེས་སུ་མི་གཡོ་བརྟན་པའི་གདེངས་ཐོབ་པ༔ དྲན་རྫོགས་བསྐྱེད་རིམ་གོམས་པས་ཐུགས་དམ་བསྐང༔ སྲོག་སྔགས་བཟླས་པ་མི་ཤིགས་ནཱ་དའི་དབྱིངས༔ ཆད་ལྷག་གྲྭ་ཟུར་ཉམས་པའི་སྐྱོན་བྲལ་ཞིང༔ སྣང་ཡུལ་སྒྲ་ཀུན་སྔགས་ཀྱི་རྣམ་པར་གྲོལ༔ གཞོམ་མེད་རླུང་སྔགས་ནཱ་དའི་དབྱངས་ཀྱིས་བསྐང༔ སྣང་སྲིད་འཁོར་འདས་བསྡུས་པའི་ཆོས་རྣམས་ཀུན༔ ཆུ་ཟླ་བཞིན་དུ་རང་བཞིན་མེད་པར་སྟོང༔ མཚན་མའི་བློ་ཡིས་ཐ་གྲུ་གཞལ་དཀའ་བའི༔ ངང་དུ་གནས་པ་རྫོགས་རིམ་གཤིས་ཀྱིས་བསྐང༔ གཞི་ཡི་ངོ་བོ་མི་འགྱུར་སྤྲོས་དང་བྲལ༔ ལམ་གྱི་ངོ་བོ་རྟོགས་པའི་གདེང་རྩལ་རྫོགས༔ འབྲས་བུ་ངོ་བོ་ཆོས་ཀུན་རང་གི་སེམས༔ ཏིང་འཛིན་རྩལ་གསུམ་རྫོགས་པས་ཐུགས་དམ་བསྐང༔ ལྟ་བ་ཕྱག་རྒྱ་ཆེན་པོ་བློ་ལས་འདས༔ སྒོམ་པ་ཡེངས་མེད་སྣང་ཚད་སྒྱུ་མར་འབྱོངས༔ སྤྱོད་པ་མ་བཅོས་རྫོགས་ཆེན་སྒྱུ་མའི་གར༔ གྲུབ་པ་གསུམ་ལ་རང་དབང་འབྱོར་བས་བསྐང༔ སྣང་ལ་འཛིན་མེད་རང་བཞིན་མེད་པར་སྟོང༔ དེ་ཡང་གཅིག་ཏུ་མ་འདྲེས་ངང་གིས་སྣང༔ གཉིས་ཀ་རོ་མཉམ་བརྗོད་མེད་བསམ་གཏན་ངང༔ རོ་གཅིག་རྟོགས་པ་ཕྱག་རྒྱ་ཆེན་པོས་བསྐང༔ ཧཱུྃ་ཧྲཱི༔ གཞན་ཡང་ཐུགས་དམ་བསྐང་བའི་དམ་རྫས་ནི༔ གསལ་དག་བརྟན་གསུམ་ལྡན་པའི་ཏིང་འཛིན་གྱིས༔ སྣང་བའི་ཡུལ་ཀུན་དུར་ཁྲོད་གཞལ་མེད་ཁང༔ སྲིད་པའི་གནས་རིགས་རྡོ་རྗེ་ཕུར་པའི་ལྷར༔ གསལ་བ་སྣང་སྲིད་གཞིར་བཞེངས་ཆེན་པོས་བསྐང༔ རང་བྱུང་རིག་པ་རྡོ་རྗེ་གཞོན་ནུའི་སྐུ༔ རྩལ་ལས་བསྐྱེད་པ་འཁོར་ལོ་རྒྱས་འདེབས་ཡུམ༔ གཉིས་མེད་ཐབས་དང་ཤེས་རབ་རོལ་བ་ཆེ༔ དཔལ་ཆེན་ཁྲོ་རྒྱལ་ཡབ་ཡུམ་ཐུགས་དམ་བསྐང༔ སྟོང་ཉིད་སྙིང་རྗེ་ཐབས་ཤེས་རོལ་པ་ལས༔ ཞི་རྒྱས་དབང་དང་དྲག་པོའི་ལས་མཛད་ཅིང༔ གང་འདུལ་ཐབས་ཀྱིས་ལོག་འདྲེན་གདུག་པ་འདུལ༔ སྲས་མཆོག་ཀཱི་ལ་རིགས་བཞིའི་ཐུགས་དམ་བསྐང༔ ཡུལ་དང་སྣང་བ་དབྱིངས་དང་རིག་པ་བཞིའི༔ རྩལ་ལས་ཤར་བ་ལས་བཞིའི་མངའ་བདག་ཆེ༔ རྒྱལ་ཀུན་དགྱེས་བསྐྱེད་བདེ་ཆེན་དབང་ཕྱུག་མ༔ ཀྲོ་དྷི་ཤྭ་རི་ཡུམ་བཞིའི་ཐུགས་དམ་བསྐང༔ རྣམ་ཤེས་ཚོགས་བརྒྱད་ཁམས་དང་དབང་པོ་བཅུ༔ གནས་དག་མི་དགེ་བཅུ་པོ་ཚར་གཅོད་ཅིང༔ ཕྱོགས་བཅུའི་དྲེགས་པ་རུ་ཏྲ་འཇོམས་པའི་གཤེད༔ ཁྲོ་བཅུ་ཡབ་ཡུམ་རྣམས་ཀྱི་ཐུགས་དམ་བསྐང༔ རྣམ་ཐར་བརྒྱད་ལྡན་ཡུལ་བརྒྱད་མ་སྤང་དག༔ ཀཽ་རི་མ་བརྒྱད་སེང་ཧ་ཕྲ་མེན་བརྒྱད༔ དཔལ་གྱི་བཀའ་ཉན་ཅི་བཅོལ་ལས་སྒྲུབ་པའི༔ ལས་བྱེད་མཁའ་འགྲོ་རྣམས་ཀྱི་ཐུགས་དམ་བསྐང༔ ཁམས་བརྒྱད་ཉེ་ཉོན་ཉི་ཤུ་ཉེར་བརྒྱད་དེ༔ གནས་སུ་དག་ཅིང་ཡེ་ཤེས་དབྱིངས་ཀྱི་རྩལ༔ དཀྱིལ་འཁོར་ཆེན་པོའི་མུ་རན་ཁོར་ཡུག་སྐྱོང༔ དབང་མོ་ཉི་ཤུ་རྩ་བརྒྱད་ཐུགས་དམ་བསྐང༔ གཟུང་འཛིན་རྩ་བ་ཉོན་མོངས་སོ་གཉིས་དག༔ ཡང་དག་མ་འདྲེས་བཅོ་བརྒྱད་དོན་དང་ལྡན༔ ཕྱི་ནང་བར་ཆད་བསྲུང་བའི་ལས་མཛད་པ༔ མཁའ་འགྲོ་སོ་གཉིས་གིང་གི་ཐུགས་དམ་བསྐང༔ ཁམས་ལྔ་དབང་ལྔ་ཡུལ་ལྔ་དུག་ལྔ་རྣམས༔ གནས་སུ་དག་པ་དཔལ་གྱི་སྤྲུལ་པའི་ཚོགས༔ ཕྱོགས་བཅུའི་ལོག་འདྲེན་བགེགས་རྣམས་འདུལ་མཛད་པའི༔ བཀའ་འཁོར་ཁྲ་ཐབས་ཉི་ཤུའི་ཐུགས་དམ་བསྐང༔ བྱམས་དང་སྙིང་རྗེ་དགའ་དང་བཏང་སྙོམ་བཞིའི༔ རྩལ་ལས་ཤར་ཞིང་ཕྱོགས་བཞིའི་གཞལ་ཡས་བསྲུང༔ ཞི་རྒྱས་དབང་དང་དྲག་པོའི་ལས་མཛད་པའི༔ ཕྲིན་ལས་སྒོ་མ་བཞི་ཡི་ཐུགས་དམ་བསྐང༔ མི་དགེ་བཅུ་དང་གཟུང་དང་འཛིན་པ་གཉིས༔ རྣམ་པར་དག་ཅིང་ཡེ་ཤེས་དབྱིངས་ཀྱི་རྩལ༔ བཀའ་དང་དམ་ཚིག་གཉན་པོའི་བྱ་ར་བ༔ ཕུར་བསྲུང་དམ་ཅན་བཅུ་གཉིས་ཐུགས་དམ་བསྐང༔ དུག་གསུམ་མ་སྤང་སྙིང་རྗེས་ཁྲོས་པའི་སྐུ༔ རྣམ་པར་ཐར་བ་གསུམ་དང་ཡེ་ནས་ལྡན༔ ཐབས་ཀྱིས་ལོག་པར་འདྲེན་ཀུན་ཚར་གཅོད་མཛད༔ བསེ་ལྕགས་དུང་གི་སྐྱེས་བུའི་ཐུགས་དམ་བསྐང༔ བཀའ་དང་དམ་ཚིག་གཉན་པོའི་གཉེར་ཁ་འཛིན༔ ཡིད་དང་ཆོས་ཀྱི་ཁམས་རྣམས་མཚོན་བྱེད་པའི༔ ཐབས་ཤེས་རང་བཞིན་སུརྱ་ཙནྟྲས་བརྒྱན༔ སྲིང་གཅིག་དཀར་མོ་ཉི་ཟླའི་ཐུགས་དམ་བསྐང༔ མདོར་ན་ཚེ་རབས་སྔོན་ནས་འབྲེལ་བའི་ལྷ༔ སྲིད་པའི་ཕུར་བུ་གསང་བ་སྤུ་གྲི་ཡི༔ བཀའ་འཁོར་སྤྲུལ་པ་དམ་ཅན་རྒྱ་མཚོར་བཅས༔ ལྷ་ཚོགས་བརྒྱ་དང་ཉེར་བརྒྱད་ཐུགས་དམ་བསྐང༔ བརྟན་དང་གཡོ་བའི་ཁམས་རྣམས་མ་ལུས་པ༔ གཟུང་འཛིན་འཆིང་བ་གང་གིས་མ་བསླད་པ༔ མ་བཅོས་ཡེ་གྲུབ་དཔལ་གྱི་ཕོ་བྲང་ཆེ༔ སྣང་སྲིད་གཞིར་བཞེངས་དཀྱིལ་འཁོར་ཐུགས་དམ་བསྐང༔ ཕྱི་ཡི་མཎྚལ་གླིང་བཞི་རི་རབ་དང༔ ནང་གི་མཎྚལ་ཕུང་ལྔ་དབང་པོར་བཅས༔ གསང་བའི་མཎྚལ་དབྱིངས་རིག་ཡེ་ཤེས་ཀྱི༔ གདན་གསུམ་སྲིད་པའི་ཕུར་བུའི་ཐུགས་དམ་བསྐང༔ དབྱིངས་ལས་ཕོ་བྲང་རིག་པ་ཧེ་རུ་ཀ༔ རྟོག་ཚོགས་གང་ཤར་གཙོ་དང་འཁོར་གྱི་ཚུལ༔ གྲངས་མེད་རབ་འབྱམས་རྒྱལ་བའི་སྤྲིན་ཕུང་སྤྲོ༔ དྲན་རྫོགས་རྡོ་རྗེ་གཞོན་ནུའི་ཐུགས་དམ་བསྐང༔ ཧཱུྃ་ཧྲཱིཿ གཞན་ཡང་ཐུགས་དམ་བསྐང་བའི་དམ་རྫས་ནི༔ ཐུན་མོང་ཕྱི་མཆོད་རང་བྱུང་ནང་མཆོད་དང༔ ཏན་གན་སྦྱོར་སྒྲོལ་མཆོད་པས་ཐུགས་དམ་བསྐང༔ ཕྱར་དར་གཡབ་དར་འཕན་གདུགས་སྣ་ཚོགས་དང༔ སྤྱན་གཟིགས་རྒྱན་གྱི་རིགས་བྱེད་ཐུགས་དམ་བསྐང༔ ཐོད་རྔ་རྐང་གླིང་སྣ་ཚོགས་རོལ་མོའི་སྒྲ༔ དབྱར་གྱི་རྔ་ལྟར་ལྡིར་བས་ཐུགས་དམ་བསྐང༔ སྤོས་དང་མཾ་ས་ཚིལ་ཆེན་བདུག་པའི་སྤྲིན༔ སྟོན་གྱི་སྤྲིན་ལྟར་གཡོ་བས་ཐུགས་དམ་བསྐང༔ མཁྲིས་པའི་དྲི་དང་རཀྟ་ཆུ་སེར་རྐང༔ ཞག་དང་རླངས་པ་འཁྲིགས་པས་ཐུགས་དམ་བསྐང༔ ཤ་ཡི་ལྷུ་དུམ་རུས་པའི་གྲམ་ཁྲོད་རྣམས༔ རྫ་རི་ཉིལ་བ་ལྟ་བུས་ཐུགས་དམ་བསྐང༔ མི་མགོའི་སྙིང་དང་ཕྱོགས་བཅུའི་བགེགས་བསྒྲལ་གཟུགས༔ ཕྱོགས་མཚམས་ཀློང་དུ་བརྙིལ་བས་ཐུགས་དམ་བསྐང༔ ཁྱུང་སོགས་འདབ་ཆགས་སེང་སོགས་སྡེར་ཆགས་དང༔ འགྲོལ་རྒྱུག་གཅན་གཟན་མང་པོས་ཐུགས་དམ་བསྐང༔ ལས་མཁན་གྲི་ཐོགས་འབུམ་གྱི་ཐུགས་དམ་བསྐང༔ ལིང་པ་མདའ་འཕེན་འབུམ་གྱི་ཐུགས་དམ་བསྐང༔ བཀའ་འཁོར་ལྷ་སྲིན་སྡེ་བརྒྱད་ཐུགས་དམ་བསྐང༔ མདོར་ན་རྡོ་རྗེ་ཕུར་པའི་དཀྱིལ་འཁོར་ལྷ༔ མ་ལུས་འཁོར་དང་བཅས་པའི་ཐུགས་དམ་བསྐང༔ ཐུགས་དམ་བསྐང་ལ་འགལ་འཁྲུལ་ཉམས་ཆགས་བཤགས༔ ཚངས་པར་མཛད་ནས་རྡོ་རྗེའི་སྐུ་གསུང་ཐུགས༔ ཡོན་ཏན་ཕྲིན་ལས་མཆོག་གི་དངོས་གྲུབ་སྩོལ༔ ས་མ་ཡཱ༔ འདི་ལྟར་ཉམས་སུ་སུས་བླངས་བས༔ དམ་ཚིག་ཉམས་ཆགས་ཐམས་ཅད་སྐོང༔ མཆོག་དང་ཐུན་མོང་དངོས་གྲུབ་ཐོབ༔ ཆོས་སྐྱོང་དམ་ཅན་བསྲུང་མ་ཀུན༔ མཉེས་ནས་ཅི་བཅོལ་ལས་ཀུན་འགྲུབ༔ ས་མ་ཡཱ༔ རྒྱ་རྒྱ་རྒྱ༔ ཅེས་པའང་འགྲོ་འདུལ་ཆེན་པོ་གསང་སྔགས་གླིང་པས་མདོ་སྨད་སའི་ཐིག་ལེ་གནས་ལུང་དཔལ་གྱི་རི་བོའི་གཡས་ཟུར་བྲག་རི་སེང་ཆེན་འགྱིངས་འདྲ་ནས་གདན་དྲངས་པའོ༎