བསྟོད་བསྐུལ་མཚོན་ཆའི་འཁོར་ལོ།
ཕུར་པ་གསང་བ་སྤུ་གྲི་ལས༔ བསྟོད་བསྐུལ་མཚོན་ཆའི་འཁོར་ལོ་བཞུགས༔
བཛྲ་ཀུ་མ་ར་ཡེ༔ ཆོས་ཉིད་དབྱིངས་ལས་སྙིང་རྗེས་རབ་ཁྲོས་པའི༔ ནམ་མཁའི་རྡོ་རྗེ་འདུས་མ་བྱས་པའི་སྐུ༔ དུས་གསུམ་ཁྲོ་རྒྱལ་ཡོངས་ཀྱི་སྤྱི་གཟུགས་རྗེ༔ རྡོ་རྗེ་གཞོན་ནུའི་ཚོགས་ལ་གུས་པས་འདུད༔ རྡོ་རྗེ་ཕུར་པ་གསང་བ་སྤུ་གྲི་ཡི༔ བསྟོད་བསྐུལ་མཚོན་ཆའི་འཁོར་ལོ་ཞེས་བྱ་བ༔ དམ་ཉམས་རུ་ཏྲ་དྲེགས་པ་འདུལ་བའི་ཕྱིར༔ ཐབས་ཀྱིས་སྒྲོལ་བྱེད་དྲག་པོའི་བསྟོད་བསྐུལ་བསྟན༔ ཕྲིན་ལས་གནད་དུ་བསྣུན་ཅིག་ས་མ་ཡཱ༔ དང་པོ་ཡི་དམ་སྟོད་ལས་གཞུང་བཞིན་བསྲིང༔ བར་དུ་ཚོགས་དང་བསྐང་བས་མཉེས་པར་བྱ༔ ཐ་མ་བསྐུལ་བའི་ལས་ལ་འཇུག་པ་ནི༔ གཏོར་མ་ཤ་ཁྲག་རུས་པ་དག་གིས་བརྒྱན༔ ཟག་མེད་ཡེ་ཤེས་བདུད་རྩིར་བྱིན་བརླབས་ནས༔ དམིགས་བྱ་འགུགས་ཤིང་དབྱེར་མེད་བསྟིམས་ནས་སུ༔ རང་ཉིང་རྡོ་རྗེ་གཞོན་ནུའི་ང་རྒྱལ་གྱིས༔ ཧཱུྃ་བྷྱོ༔ ཆོས་ཉིད་སྟོང་པ་ཐབས་ཀྱི་རོལ་པ་ལས༔ ཤེས་རབ་རང་གསལ་སྙིང་རྗེའི་སྐུར་བཞེངས་པ༔ བཅོམ་ལྡན་དཔལ་ཆེན་རྡོ་རྗེ་གཞོན་ནུ་ཆེ༔ སྤྲུལ་པ་བཀའ་འཁོར་ཕོ་ཉ་ཡང་སྤྲུལ་བཅས༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ བསྟན་འགྲོར་འཚེ་བྱེད་ཞིང་བཅུའི་དགྲ་དང་བགེགས༔ མིང་གི་ལྷག་མ་ཙམ་ཡང་མ་ལུས་པ༔ རྡུལ་དུ་བརླགས་ཅིང་སྒྲོལ་བའི་ཕྲིན་ལས་མཛོད༔ བྷྱོ་ཛ༔ བསྐལ་པའི་མེ་ལྟར་འབར་བའི་ཀློང་དཀྱིལ་ནས༔ ལོག་འདྲེན་རུ་ཏྲ་དྲེགས་པ་བསྣོལ་བའི་སྟེང༔ དཔལ་ཆེན་རྡོ་རྗེ་གཞོན་ནུ་ཁྲོ་བོའི་རྒྱལ༔ མཐིང་ནག་ཞལ་གསུམ་ཕྱག་དྲུག་ཞབས་བཞི་བགྲད༔ གཡས་དཀར་གཡོན་དམར་དབུས་མཐིང་ཁྲོ་ཞིང་གཏུམ༔ དང་པོའི་ཕྱག་གཉིས་གྲི་གུག་ཐོད་ཁྲག་བསྣོལ༔ བར་བ་ཕུར་བུ་རལ་གྲི་གདེངས་ཤིང་ཕྱར༔ ཐ་མ་ཁ་ཊྭཾ་སྡིག་པ་མགོ་དགུ་བསྡམས༔ གཡས་ཞལ་དཀར་པོ་ཞི་ཞིང་དགོད་པ་ཡིས༔ སྟེང་ཕྱོགས་ལྷ་གདོན་མ་ལུས་འདུལ་བར་བྱེད༔ གཡོན་ཞལ་དམར་པོ་གཤེ་ཞིང་ཁྲོ་བ་ཡིས༔ འོག་ཕྱོགས་ཀླུ་གདོན་མ་ལུས་འཇོམས་པར་མཛད༔ དབུས་ཞལ་མཐིང་ནག་རྔམས་ཤིང་ཁྲོས་པ་ཡིས༔ སྲིད་པ་གསུམ་གྱི་དགྲ་བགེགས་འཇོམས་པར་བྱེད༔ སྤྱན་གསུམ་སྡང་མིག་ཁྲག་ལྟར་གཡོ་བ་ཡིས༔ དུག་གསུམ་སྐྱེ་རྒྱུད་དྲུང་ནས་འབྱིན་པར་མཛད༔ སྨ་ར་སྨིན་མ་ཨག་ཚོམ་མེ་ལྟར་འཕྲོ༔ ཁམས་གསུམ་རུ་ཏྲ་བསྲེག་ཅིང་འཇོམ་པར་བྱེད༔ ཞལ་གདངས་ལྗགས་འདྲིལ་མཆེ་གཙིགས་རྐན་སྒྲ་རྡེབ༔ དུག་ལྔའི་དགྲ་བགེགས་གསོལ་ཞིང་རྔམས་ཟས་མཛད༔ ཐོད་པ་སྐམ་པོ་ལྔ་ཡིས་དབུ་བརྒྱན་པས༔ དུག་ལྔའི་རྟོག་པ་གཏན་ནས་བརླག་པར་བྱེད༔ རློན་པ་ཁྲག་འཛག་ལྔ་བཅུའི་དོ་ཤལ་སྤྲས༔ རྟོག་འཛིན་འཆིང་བ་ལྔ་བཅུ་བརླག་པར་མཛད༔ དབུ་སྐྲ་དམར་སེར་ནམ་མཁའི་དབྱིངས་ལ་འཕྲོ༔ སྟོང་ཉིད་རྟག་ཆད་ལྟ་བ་རྨིང་ནས་འཇོམས༔ བསྐྱོད་བྱེད་རྡོ་རྗེའི་གཤོག་དྲུག་མཁའ་ལ་གདེངས༔ ཕ་རོལ་ཕྱིན་པ་དྲུག་གི་དོན་དང་ལྡན༔ གླང་ཆེན་ཀོ་རློན་སྟག་གི་ཤམ་ཐབས་གསོལ༔ ཕྱོགས་བཅུའི་རུ་དྲ་ཕོ་མོ་གཏན་ནས་བརླག༔ ཞིང་ཆུང་སྐུ་རེག་སྦྲུལ་ཆུན་མགོ་ཕྲེང་བརྒྱན༔ སྣང་སྲིད་སྒྱུ་མར་སྟོན་ཅིང་དབྱིངས་སུ་འདྲེན༔ ཞབས་བཞི་དྲེགས་པ་ཕོ་མོའི་སྙིང་ཀར་བརྫིས༔ བདུད་བཞི་བརླག་ཅིང་སྐུ་བཞིར་འགོད་པར་བྱེད༔ ཐབས་ཀྱིས་ཁྲོས་པ་དཔལ་ཆེན་ཧེ་རུ་ཀ༔ གདོད་ནས་ཆོས་ཉིད་ཡེ་ཤེས་མངོན་གྱུར་ཀྱང༔ ཐབས་ཀྱིས་ལོག་འདྲེན་རུ་དྲ་འདུལ་བའི་ཕྱིར༔ སྙིང་རྗེའི་ཀློང་ནས་མི་བཟད་སྐུར་བཞེངས་ལ༔ ཐུགས་དམ་བསྐུལ་ལོ་དྲག་པོའི་ཕྲིན་ལས་མཛོད༔ བྷྱོ་ཛ༔ ཤེས་རབ་སྙིང་རྗེ་ཆེན་པོའི་རོལ་རྩལ་ལས༔ སྦྱོར་སྒྲོལ་ཡུམ་ཆེན་འཁོར་ལོ་རྒྱས་འདེབས་མ༔ མཐིང་ནག་ཞལ་གཅིག་ཕྱག་གཉིས་ཁྲོ་འཛུམ་སྒེག༔ གཏུམ་ཞིང་རྔམས་དང་ཁྲོ་ཚུལ་སྟོན་པ་ཡིས༔ འཁྲུལ་རྟོག་དགྲ་བགེགས་ལོག་འདྲེན་འཇོམས་པར་བྱེད༔ ཕྱག་གཡས་སྒྲོལ་བྱེད་གྲི་གུག་མཁའ་ལ་ཕྱར༔ ལོག་འདྲེན་རུ་དྲ་ཐམས་ཅད་སྒྲོལ་བར་མཛད༔ གཡོན་པས་ཐོད་ཁྲག་དཔལ་ཆེན་ཞལ་དུ་སྟོབ༔ དུག་ལྔ་ཡེ་ཤེས་ལྔ་རུ་སྒྲོལ་བར་བྱེད༔ ཐོད་སྐམ་དབུ་བརྒྱན་ཐོད་རློན་ཕྲེང་བས་བརྒྱན༔ ཕྱོགས་བཅུའི་བྱད་མ་རྡུལ་དུ་བརླག་པར་མཛད༔ གཟིག་གི་ཤམ་ཐབས་རུས་པའི་རྒྱན་དྲུག་གསོལ༔ ཁམས་གསུམ་འཁོར་བའི་གནས་རིས་སྟོངས་པར་བྱེད༔ ཞབས་གཉིས་ཡབ་ཀྱི་རྐེད་ལ་འཁྲིལ་ཞིང་སྦྱོར༔ སྙིང་རྗེས་སྒྲོལ་ཞིང་སྟོང་ཉིད་དབྱིངས་སུ་སྦྱོར༔ མཉེས་བྱེད་བདེ་བསྐྱེད་འཁོར་ལོ་རྒྱས་འདེབས་ཡུམ༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ གཟུང་ཞིང་འཛིན་པས་བཅིངས་པའི་དགྲ་བགེགས་ཀུན༔ སྐྱེ་རྒྱུད་རྩད་ནས་གཅོད་པའི་ཕྲིན་ལས་མཛོད༔ བྷྱོ་ཛ༔ དེ་ཡི་ཕྱི་རིམ་འཁོར་ལོ་རྩིབས་བཞི་ལ༔ ཤར་དུ་ལྷ་བདུད་ཕོ་མོ་བསྣོལ་བའི་སྟེང༔ ཐུགས་ཀྱི་སྲས་མཆོག་བཛྲ་ཀཱི་ལ་ཡཱ༔ དཀར་པོ་ཁྲོ་ཞིང་འཛུམ་མདངས་སྟོན་པ་ཡིས༔ ལྷ་བུའི་བདུད་ཀྱི་བར་ཆད་རྡུལ་དུ་བརླག༔ ཕྱག་གཡས་གནམ་ལྕགས་རྡོ་རྗེ་རྩེ་དགུ་བསྣམས༔ རྒྱལ་བསེན་འགོང་པོའི་ཀླད་པ་འགེམ་པར་བྱེད༔ གཡོན་པས་ཞི་བའི་ཕུར་བུ་དབལ་དྲུག་པ༔ རཱུ་དྲ་དགྲ་བགེགས་སྙིང་ལ་གཟིར་བར་བྱེད༔ དུར་ཁྲོད་ཆས་རྫོགས་རང་འོད་ཡུམ་དང་འཁྲིལ༔ སྟོང་ཉིད་དབྱིངས་སྦྱོར་ཤེས་རབ་ཀློང་དུ་སྒྲོལ༔ ཐུགས་ཀྱི་སྲས་མཆོག་བཛྲ་ཀཱི་ལ་ཡཱ༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ མི་མཐུན་གདུག་པའི་ཕྱོགས་རྣམས་ཞི་བ་དང༔ ཞེ་སྡང་དགྲ་བགེགས་བརླག་པའི་ཕྲིན་ལས་མཛོད༔ བྷྱོ་ཛ༔ ལྷོ་རུ་ཕུང་པོའི་བདུད་ཆེན་བསྣོལ་བའི་སྟེང༔ ཡོན་ཏན་སྲས་མཆོག་རཏྣ་ཀཱི་ལ་ཡཱ༔ གཡས་པས་རིན་ཆེན་འཁོར་ལོ་རྩིབས་སྟོང་བསྣམས༔ ལོག་འདྲེན་དགྲ་བགེགས་བྱད་མ་རྡུལ་དུ་བརླག༔ གཡོན་པས་རྒྱས་པའི་ཕུར་བུ་ཟུར་བཞི་པ༔ ལོག་འདྲེན་དགྲ་བགེགས་སྙིང་ལ་དྲིལ་ཞིང་འདེབས༔ དུར་ཁྲོད་ཆས་རྫོགས་རང་འོད་ཡུམ་དང་འཁྲིལ༔ ཐབས་ཀྱིས་སྦྱོར་ཞིང་སྙིང་རྗེའི་ཀློང་དུ་སྒྲོལ༔ ཡོན་ཏན་སྲས་མཆོག་རཏྣ་ཀཱི་ལ་ཡཱ༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ ཚེ་བསོད་དཔལ་འབྱོར་ཐམས་ཅད་རྒྱས་པ་དང༔ ང་རྒྱལ་དགྲ་བགེགས་བརླག་པའི་ཕྲིན་ལས་མཛོད༔ བྷྱོ་ཛ༔ ནུབ་ཕྱོགས་ཉོན་མོངས་བདུད་ཆེན་ཕོ་མོའི་སྟེང༔གསུང་གི་སྲས་མཆོག་པདྨ་ཀཱི་ལ་ཡཱ༔ སྐུ་མདོག་དམར་པོ་གཡས་པས་པདྨ་དང༔ གཡོན་པས་དབང་གི་ཕུར་པ་ཟླ་གམ་དབྱིབས༔ ལོག་འདྲེན་དགྲ་བགེགས་སྙིང་ལ་གཟིར་ཞིང་འདེབས༔ དུར་ཁྲོད་ཆས་རྫོགས་རང་འོད་ཡུམ་དང་འཁྲིལ༔ ཨེ་དབྱིངས་སྦྱོར་ཞིང་ཝཾ་གྱི་ཀློང་དུ་སྒྲོལ༔ གསུང་གི་སྲས་མཆོག་པདྨ་ཀཱི་ལ་ཡཱ༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ རླུང་སེམས་སྣང་བ་དབང་དུ་འདུ་བ་དང༔ འདོད་ཆགས་དགྲ་བགེགས་བརླག་པའི་ཕྲིན་ལས་མཛོད༔ བྷྱོ་ཛ༔ བྱང་ཕྱོགས་འཆི་བདག་བདུད་ཆེན་ཕོ་མོའི་སྟེང༔ ཕྲིན་ལས་སྲས་མཆོག་ཀརྨ་ཀཱི་ལ་ཡཱ༔ སྐུ་མདོག་ལྗང་ནག་གཡས་པས་རྒྱ་གྲམ་ཕྱར༔ སྲོག་བདག་བེ་ཧར་ཀླད་པ་གཞོམ་པར་བྱེད༔ གཡོན་པས་དྲག་པོའི་ཕུར་པ་ཟུར་གསུམ་པ༔ ཕྱོགས་བཅུའི་བྱད་མའི་སྙིང་ལ་བྲོ་བརྡུང་འདེབས༔ དུར་ཁྲོད་ཆས་རྫོགས་རང་འོད་ཡུམ་དང་འཁྲིལ༔ བདག་འཛིན་སྒྲོལ་ཞིང་བདག་མེད་དབྱིངས་སུ་སྦྱོར༔ ཕྲིན་ལས་སྲས་མཆོག་ཀརྨ་ཀཱི་ལ་ཡཱ༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ རྣལ་འབྱོར་བདག་ལ་འཚེ་བའི་དགྲ་བགེགས་དང༔ ཕྲག་ཏོག་དགྲ་བགེགས་བརླག་པའི་ཕྲིན་ལས་མཛོད༔ བྷྱོ་ཛ༔ དེའི་ཕྱིར་འཁོར་ལོ་རྩིབས་བཅུའི་པད་ཉིའི་དབུས༔ ཕྱོགས་སྐྱོང་ཕོ་མོ་བྱི་ཆིང་བསྣོལ་བའི་སྟེང༔ ཤར་དུ་ཁྲོ་ཆེན་རྣམ་པར་རྒྱལ་བ་ནི༔ ཞལ་གསུམ་ཕྱག་དྲུག་དཀར་དམར་མཐིང་ལ་རྔམས༔ གཡས་གསུམ་རྡོ་རྗེ་ལྕགས་ཀྱུ་ཐོ་བ་འཛིན༔ དྲི་ཟ་ཕོ་མོ་འགུགས་ཤིང་སྒྲོལ་བར་བྱེད༔ གཡོན་གསུམ་དྲི་ཤུལ་བེ་ཅོན་ཐོད་ཁྲག་འཛིན༔ ཞེ་སྡང་རྒྱལ་པོའི་སྡེ་ཚོགས་གཏན་ནས་བརླག༔ དུར་ཁྲོད་ཆས་རྫོགས་མདའ་སྙེམས་མ་དང་འཁྲིལ༔ ཁྲོ་འཁྲུགས་གཏུམ་པ་མེ་དཔུང་ཀློང་ནས་བཞེངས༔ ཐུགས་དམ་བསྐུལ་ལོ་ཕྲིན་ལས་མ་གཡེལ་བར༔ དྲི་ཟ་ལ་སོགས་ཤར་ཕྱོགས་དགྲ་དང་བགེགས༔ མིང་མེད་རྡུལ་དུ་བརླག་པའི་ཕྲིན་ལས་མཛོད༔ བྷྱོ་ཛ༔ ལྷོ་རུ་ཁྲོ་རྒྱལ་འཇམ་དཔལ་གཤིན་རྗེའི་གཤེད༔ གཡས་དཀར་གཡོན་དམར་དབུས་སེར་ཕྱག་དྲུག་པ༔ གཡས་གསུམ་རིན་ཆེན་འཁོར་ལོ་ཐབས་ཀྱི་མདའ༔ གཤིན་རྗེ་ཕོ་མོ་ཐམས་ཅད་འཁྲུགས་ཤིང་སྒྲོལ༔ གཡོན་གསུམ་ཞགས་པ་ཁྲམ་ཤིང་ཐོད་ཁྲག་བསྣམས༔ ང་རྒྱལ་དམ་སྲིའི་ཕུང་ལྔ་གཏན་ནས་བརླག༔ དུར་ཁྲོད་ཆས་རྫོགས་དུར་ཁྲོད་བདག་མོར་འཁྲིལ༔ ཁྲོ་འཁྲུགས་གཏུམ་པ་མེ་དཔུང་ཀློང་ནས་བཞེངས༔ ཐུགས་དམ་བསྐུལ་ལོ་ཕྲིན་ལས་མ་གཡེལ་བར༔ གཤིན་རྗེ་ལ་སོགས་ལྷོ་ཕྱོགས་དགྲ་དང་བགེགས༔ མིང་མེད་རྡུལ་དུ་བརླག་པའི་ཕྲིན་ལས་མཛོད༔ བྷྱོ་ཛ༔ ནུབ་ཏུ་རྟ་མགྲིན་པདྨ་ཧེ་རུ་ཀ༔ གཡས་དཀར་གཡོན་མཐིང་དབུས་ཞལ་དམར་ནག་རྔམས༔ གཡས་གསུམ་པདྨ་ཐོད་དབྱུག་བེ་ཅོན་བསྣམས༔ ཀླུ་གདོན་ས་བདག་ཕོ་མོ་འགུགས་ཤིང་སྒྲོལ༔ གཡོན་གསུམ་ལྕགས་སྒྲོགས་སྦྲུལ་ཞགས་ཐོད་ཁྲག་འཛིན༔ འདོད་ཆགས་སྲིན་མོའི་སྡེ་ཚོགས་གཏན་ནས་བརླག༔ དུར་ཁྲོད་ཆས་རྫོགས་རྡོ་རྗེ་གཏུམ་མོར་འཁྲིལ༔ ཁྲོ་འཁྲུགས་གཏུམ་པ་མེ་དཔུང་ཀློང་ནས་བཞེངས༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ ཀླུ་གཉན་ལ་སོགས་ནུབ་ཕྱོགས་དགྲ་དང་བགེགས༔ མིང་མེད་རྡུལ་དུ་བརླག་པའི་ཕྲིན་ལས་མཛོད༔ བྷྱོ་ཛ༔ བྱང་དུ་ཁྲོ་རྒྱལ་བདུད་རྩི་འཁྱིལ་བ་ནི༔ གཡས་དམར་གཡོན་སྨུག་དབུས་ཞལ་ལྗང་ནག་འབར༔ གཡས་གཡས་གསུམ་རྒྱ་གྲམ་ཕུར་བུ་བུམ་པ་བསྣམས༔ གནོད་སྦྱིན་ཕོ་མོ་འགུགས་ཤིང་སྒྲོལ་བར་བྱེད༔ གཡོན་གསུམ་དྲིལ་བུ་བྷན་དམར་རྒྱུ་ཞགས་བསྣམས༔ ཕྲག་དོག་རུ་དྲའི་སྡེ་ཚོགས་གཏན་ནས་བརླག༔ དུར་ཁྲོད་ཆས་རྫོགས་རླུང་འབྱིན་མ་དང་འཁྲིལ༔ ཁྲོ་འཁྲུགས་གཏུམ་པ་མེ་དཔུང་ཀློང་ནས་བཞེངས༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ གནོད་སྦྱིན་ལ་སོགས་བྱང་ཕྱོགས་དགྲ་དང་བགེགས༔ མིང་མེད་རྡུལ་དུ་བརླག་པའི་ཕྲིན་ལས་མཛོད༔ བྷྱོ་ཛ༔ ཤར་ལྷོ་ཁྲོ་རྒྱལ་དབྱུག་པ་སྔོན་པོ་ནི༔ གཡས་མཐིང་གཡོན་སྨུག་དབུས་ཞལ་སྔོ་ནག་རྔམས༔ གཡས་གསུམ་སྟྭ་རེ་གྲི་གུག་ལྕགས་ཀྱུ་བསྣམས༔ མེ་ལྷ་ཕོ་མོ་འགུགས་ཤིང་སྒྲོལ་བར་བྱེད༔ གཡོན་གསུམ་མེ་དཔུང་སྡིག་མཛུབ་ཐོད་ཁྲག་འཛིན༔ བདག་འཛིན་འགོང་པོའི་སྡེ་ཚོགས་གཏན་ནས་བརླག༔ དུར་ཁྲོད་ཆས་རྫོགས་རྡོ་རྗེ་སྡེར་མོར་འཁྲིལ༔ ཁྲོ་འཁྲུགས་གཏུམ་པ་མེ་དཔུང་ཀློང་ནས་བཞེངས༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ མེ་ལྷ་ལ་སོགས་ཤར་ལྷོའི་དགྲ་དང་བགེགས༔ མིང་མེད་རྡུལ་དུ་བརླག་པའི་ཕྲིན་ལས་མཛོད༔ བྷྱོ་ཛ༔ ལྷོ་ནུབ་ཁྲོ་རྒྱལ་མི་གཡོ་མགོན་པོ་ནི༔ གཡས་དཀར་གཡོན་དམར་དབུས་སྨུག་ཁྲོ་ཞིང་གཏུམ༔ གཡས་གསུམ་རྡོ་རྗེ་སྡིག་པ་ཐོ་བ་བསྣམས༔ སྲིན་པོ་ཕོ་མོ་འགུགས་ཤིང་སྒྲོལ་བར་བྱེད༔ གཡོན་གསུམ་དྲིལ་བུ་བྷན་དམར་རྔེའུ་ཆུང་འཛིན༔ གཟུང་འཛིན་འཁྲུལ་བའི་སྡེ་ཚོགས་གཏན་ནས་བརླག༔ དུར་ཁྲོད་ཆས་རྫོགས་གཏུན་ཁུང་མ་དང་འཁྲིལ༔ ཁྲོ་འཁྲུགས་གཏུམ་པ་མེ་དཔུང་ཀློང་ནས་བཞེངས༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ སྲིན་པོ་ལ་སོགས་ལྷོ་ནུབ་དགྲ་དང་བགེགས༔ མིང་མེད་རྡུལ་དུ་བརླག་པའི་ཕྲིན་ལས་མཛོད༔ བྷྱོ་ཛ༔ ནུབ་བྱང་ཁྲོ་རྒྱལ་གཞན་གྱིས་མི་ཐུབ་པ༔ གཡས་དཀར་གཡོན་དམར་དབུས་མཐིང་གཤེ་བའི་ཞལ༔ གཡས་གསུམ་རྡོ་རྗེ་ཐོ་བ་ཞགས་པ་བསྣམས༔ རླུང་ལྷ་ཕོ་མོ་འགུགས་ཤིང་སྒྲོལ་བར་བྱེད༔ གཡོན་གསུམ་འཁོར་ལོ་རལ་གྲི་ཐོད་ཁྲག་བསྣམས༔ འཁྲུལ་རྟོག་ལྷ་འདྲེའི་སྡེ་ཚོགས་གཏན་ནས་བརླག༔ དུར་ཁྲོད་ཆས་རྫོགས་མདའ་སྙེམས་མ་དང་འཁྲིལ༔ ཁྲོ་འཁྲུགས་གཏུམ་པ་མེ་དཔུང་ཀློང་ནས་བཞེངས༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ རླུང་ལྷ་ལ་སོགས་ནུབ་བྱང་དགྲ་དང་བགེགས༔ མིང་མེད་རྡུལ་དུ་བརླག་པའི་ཕྲིན་ལས་མཛོད༔ བྷྱོ་ཛ༔ བྱང་ཤར་ཁྲོ་བོ་ཁམས་གསུམ་རྣམ་པར་རྒྱལ༔ གཡས་དཀར་གཡོན་ལྗང་དབུལ་ཞལ་དམར་ནག་ཁྲོ༔ གཡས་གསུམ་རལ་གྲི་སྦྲུལ་ཞགས་མདའ་གཞུ་བསྣམས༔ དབང་ལྡན་ཕོ་མོ་འགུགས་ཤིང་སྒྲོལ་བར་བྱེད༔ གཡོན་གསུམ་བེ་ཅོན་རྔེའུ་ཆུང་བྷནྡྷ་འཛིན༔ རྣམ་རྟོག་འཁྲུལ་འཛིན་སྡེ་ཚོགས་གཏན་ནས་བརླག༔ དུར་ཁྲོད་ཆས་རྫོགས་གསོད་བྱེད་མ་དང་འཁྲིལ༔ ཁྲོ་འཁྲུགས་གཏུམ་པ་མེ་དཔུང་ཀློང་ནས་བཞེངས༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ དབང་ལྡན་ལ་སོགས་བྱང་ཤར་དགྲ་དང་བགེགས༔ མིང་མེད་རྡུལ་དུ་བརླག་པའི་ཕྲིན་ལས་མཛོད༔ བྷྱོ་ཛ༔ དཔལ་ཆེན་མདུན་གཡས་རྩིབས་ལ་ཧཱུྃ་ཀཱ་ར༔ གཡས་སེར་གཡོན་དམར་དབུས་ཞལ་དཀར་དམར་ཁྲོ༔ གཡས་གསུམ་ཁྱུང་དང་མི་མགོ་ལྷ་མིན་སྙིང༔ ལྷ་གདོན་གཟའ་སྐར་ཕོ་མོ་འགུགས་ཤིང་སྒྲོལ༔ གཡོན་གསུམ་རྒྱུ་ཞགས་སྒྲོལ་གྲི་དུང་ཁྲག་འཐུང༔ ཡུལ་མེད་གཉིས་འཛིན་ལྷ་འདྲེ་རྡུལ་དུ་བརླག༔ དུར་ཁྲོད་ཆས་རྫོགས་སྒྲ་འབྱིན་མ་དང་འཁྲིལ༔ ཁྲོ་འཁྲུགས་གཏུམ་པ་མེ་དཔུང་ཀློང་ནས་བཞེངས༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ ལྷ་གདོན་ལ་སོགས་སྟེང་ཕྱོགས་དགྲ་དང་བགེགས༔ མིང་མེད་རྡུལ་དུ་བརླག་པའི་ཕྲིན་ལས་མཛོད༔ བྷྱོ་ཛ༔ དཔལ་ཆེན་མདུན་གཡོན་རྩིབས་ལ་སྟོབས་པོ་ཆེ༔ གཡས་དཀར་གཡོན་དམར་དབུས་མཐིང་ཆར་སྤྲིན་མདོག༔ གཡས་གསུམ་གཏུན་ཤིང་མདུང་ཐུང་རལ་གྲི་འཛིན༔ ས་བདག་ཕོ་མོ་འགུགས་ཤིང་སྒྲོལ་བར་བྱེད༔ གཡོན་གསུམ་ཐོད་ཁྲག་རུས་སྦལ་གཏུན་ཁུང་འཛིན༔ འཁྲུལ་རྟོག་ལོག་འདྲེན་རུ་དྲ་གཏན་ནས་བརླག༔ དུར་ཁྲོད་ཆས་རྫོགས་བསྐྱོད་བྱེད་མ་དང་འཁྲིལ༔ ཁྲོ་འཁྲུགས་གཏུམ་པ་མེ་དཔུང་ཀློང་ནས་བཞེངས༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ ས་བདག་ལ་སོགས་འོག་ཕྱོགས་དགྲ་དང་བགེགས༔ མིང་མེད་རྡུལ་དུ་བརླག་པའི་ཕྲིན་ལས་མཛོད༔ བྷྱོ་ཛ༔ དེ་ཡི་ཕྱི་རིམ་མུ་ཁྱུད་ཁོར་ཡུག་ལ༔ ཚོགས་བརྒྱད་དག་པ་གནས་ཀྱི་མ་མོ་བརྒྱད༔ རྣམ་ཤེས་ཡུལ་བརྒྱད་དག་པའི་སེང་ཧ་བརྒྱད༔ མཁའ་འགྲོ་སོ་གཉིས་གིང་ཆེན་བཅོ་བརྒྱད་དང༔ གནས་ཉུལ་མ་མོ་དབང་ཕྱུག་ཉི་ཤུ་བརྒྱད༔ སྐུ་མདོག་ཕྱག་མཚན་སྣ་ཚོགས་ཅིར་ཡང་སྟོན༔ འདོད་དགུར་བསྒྱུར་བའི་གཟུགས་ཅན་འཕྲུལ་མོ་ཆེ༔ ཟས་སུ་ཉམས་པའི་ཤ་དང་ཁྲག་ལ་དགྱེས༔ ལས་སུ་དགྲ་བགེགས་གསོད་དང་གཅོད་ལ་བརྩོན༔ ནམ་མཁའི་ལུས་ཅན་གར་ཡང་ཐོགས་པ་མེད༔ ཧ་ཧ་ཧཱུྃ་ཕཊ་རྒྱོབ་སོད་འབྲུག་ལྟར་ལྡིར༔ དཀྱིལ་འཁོར་མུ་རན་སྐྱོང་ཕྱིར་བཀའ་སྡོད་ཚོགས༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ ཕྱོགས་བཅུའི་དགྲ་བགེགས་བྱད་མ་རྦོད་གཏོང་རྣམས༔ མིང་གི་ལྷག་མ་ཙམ་ཡང་མ་ལུས་པར༔ ཐལ་བ་རྡུལ་དུ་བརླག་པའི་ཕྲིན་ལས་མཛོད༔ བྷྱོ་ཛ༔ ཕོ་བྲང་སྟེང་འོག་ཕྱོགས་བཞི་མཚམས་བརྒྱད་དུ༔ ཧཱུྃ་དཀར་སྤྲུལ་པ་ཕག་དང་སྨྲིག་བུའི་མགོ༔ རྣམ་རྒྱལ་སྤྲུལ་པ་སྟག་དང་བྱ་རྒོད་གདོང༔ གཤིན་རྗེ་གཤེད་སྤྲུལ་ཤ་བ་འུག་པའི་མགོ༔ རྟ་མགྲིན་སྤྲུལ་པ་བྱི་ལ་པུ་ཤུད་གདོང༔ བདུད་རྩི་འཁྱིལ་སྤྲུལ་སེང་གེ་ཕ་ཝཾ་མགོ༔ དབྱུག་སྔོན་སྤྲུལ་པ་གཡག་དང་བྱ་རོག་གདོང༔ མི་གཡོ་མགོན་སྤྲུལ་གཟིག་དང་ཁྭ་ཏའི་མགོ༔ འདོད་རྒྱལ་སྤྲུལ་པ་སྤྱང་ཀི་ཁྲ་ཡི་གདོང༔ ཁམས་གསུམ་རྣམ་རྒྱལ་དྲེད་དང་སྲེ་མོང་མགོ༔ སྟོབས་ཆེན་སྤྲུལ་པ་དོམ་དང་བྱི་བའི་གདོང༔ ཕྱོགས་བཅུའི་ལོག་འདྲེན་དགྲ་བགེགས་རྡུལ་དུ་བརླག༔ ཁྲོ་བཅུའི་སྤྲུལ་པ་ཁྲ་ཐབས་ཉི་ཤུའི་ཚོགས༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ ཕྱོགས་བཅུའི་དགྲ་བགེགས་བརླག་པའི་ཕྲིན་ལས་མཛོད༔ བྷྱོ་ཛ༔ ཕོ་བྲང་ཆེན་པོའི་བར་ཁྱམས་ལ་གནས་པའི༔ ཕུར་བསྲུང་དམ་ཅན་མ་མོ་བཅུ་གཉིས་དང༔ སྲིང་གཅིག་དཀར་མོ་ཉི་ཟླ་གཙོ་དང་འཁོར༔ བསེ་ཡི་སྐྱེས་བུ་ལྕགས་ཀྱི་སྐྱེས་བུ་བཞི༔ དུང་གི་སྐྱེས་བུ་བཞི་སོགས་བཀའ་ཉན་འཁོར༔ སྤྲུལ་འཁོར་དྲེགས་པ་སྡེ་བརྒྱད་དམག་གིས་བསྐོར༔ ཅི་བགྱིས་བཀའ་ཉན་དཔལ་གྱི་ཕོ་ཉའི་ཚོགས༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ བསྟན་འགྲོ་ཡོངས་ལ་གནོད་པའི་དགྲ་བགེགས་དང༔ ཁྱད་པར་བདག་ལ་དོ་བརྡོ་ཕོད་བཙུགས་པའི༔ ལོག་འདྲེན་གཏན་ནས་བརླག་པའི་ཕྲིན་ལས་མཛོད༔ བྷྱོ་ཛ༔ ཕོ་བྲང་ཕྱོགས་བཞི་སྐྱོང་བའི་སྒོ་མ་བཞི༔ ཤར་དུ་པུ་ཤུད་མགོ་ཅན་ལྕགས་ཀྱུ་འཛིན༔ ལྷོ་རུ་སྐྱ་ཀའི་མགོ་ཅན་ཞགས་པ་འཛིན༔ ནུབ་ཏུ་སྲིན་བྱའི་མགོ་ཅན་ལྕགས་སྒྲོག་འཛིན༔ བྱང་དུ་ཁྲ་ཡི་མགོ་ཅན་དྲིལ་བུ་བསྣམས༔ ཚད་མེད་རྣམ་པ་བཞི་ཡི་རྩལ་ཤར་ཞིང༔ ཞི་རྒྱས་དབང་དང་དྲག་པོའི་ལས་མཛད་པའི༔ ལོག་འདྲེན་འགུག་འཆིང་སྡོམ་མྱོས་རྣམ་པ་བཞི༔ ཐུགས་དམ་གནད་ནས་བསྐུལ་ལོ་མ་གཡེལ་བར༔ བདུད་བཞི་དགྲ་བགེགས་བརླག་པའི་ཕྲིན་ལས་མཛོད༔ བྷྱོ་ཛ༔ དཔལ་ཆེན་རྡོ་རྗེ་གཞོན་ནུའི་ལྷ་ཡི་ཚོགས༔ གཙོ་འཁོར་སྤྲུལ་པར་བཅས་པ་ཐམས་ཅད་ཀུན༔ ཐུགས་ཉིད་ཞི་བའི་ངང་ལས་མ་གཡོས་ཀྱང༔ ཐབས་ཀྱིས་ལོག་འདྲེན་འདུལ་ཕྱིར་སྐུར་བཞེངས་ཤིག༔ སྐུ་ཡི་རྩལ་ཕྱུངས་ནུས་པའི་སྟོབས་བསྐྱེད་ལ༔ བསྟན་པ་སྤྱི་ལ་གནོད་པའི་དམ་སྲིའི་རིགས༔ སེམས་ཅན་ཡོངས་ལ་འཚེ་བ་བསྒྲལ་བའི་ཞིང༔ རྣལ་འབྱོར་བདག་ལ་སྡང་བའི་དགྲ་དང་བགེགས༔ མིང་གི་ལྷག་མ་ཙམ་ཡང་མ་ལུས་པར༔ མངོན་སྤྱོད་དྲག་པོས་ཐལ་བ་རྡུལ་དུ་རློག༔ ཐུགས་དམ་མ་གཡེལ་ཕྲིན་ལས་ཕུར་པའི་ལྷ༔ མ་ནོར་མ་ཤོར་ལོག་འདྲེན་དགྲ་དང་བགེགས༔ ཁུག་ཅིག་སྒྲོལ་ཞིག་ཕུར་པའི་བཀའ་བསྲུང་རྣམས༔ དཀྱིལ་འཁོར་ལྷ་ཚོགས་འཁོར་དང་བཅས་པ་ཡིས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་དུས་ལ་བབ་པོ་ས་མ་ཡཱ༔ ཅེས་རྦད་བསྐུལ་དྲག་ཏུ་བྱ༔ ལོག་འདྲེན་དགྲ་བགེགས་མ་ལུས་པ༔ ཐལ་བ་རྡུལ་དུ་བརླག་པར་འགྱུར༔ ལས་འཕྲོ་ཅན་དང་འཕྲད་ནས་ཀྱང༔ དགྲ་བགེགས་སྒྲོལ་བའི་གྲོགས་སུ་ཤོག༔ ས་མ་ཡཱ༔ རྒྱ་རྒྱ་རྒྱ༔ ཅེས་ཁམས་དབུས་གཙང་གསུམ་གྱི་མཁས་གྲུབ་ཉི་ཟླ་ལྟ་བུ་སུས་ཀྱང་འགྲན་ཟླ་དང་བྲལ་བའི་རྩོད་བྲལ་དུས་བབ་ཀྱི་གཏེར་སྟོན་ཆེན་པོ་འགྲོ་འདུལ་རིག་འཛིན་གསང་སྔགས་གླིང་པས་མཁའ་སྤྱོད་གནས་ལུང་དཔལ་གྱི་རི་བོའི་གཡས་ཟུར་བྲག་རི་སེང་ཆེན་འགྱིངས་འདྲའི་ལྟོ་བ་ནས་གདན་དྲངས་པའོ༎