གཏོར་ཟློག་དྲག་པོའི་འཁྲུལ་འཁོར།
ཕུར་བ་གསང་བ་སྤུ་གྲི་ལས༔ གཏོར་ཟློག་དྲག་པོའི་འཁྲུལ་འཁོར་ཞེས་བྱ་བ་བཞུགས༔ཤྲཱི་བཛྲ་ཀུ་མ་ར་ཡ༔ ཕུར་བ་གསང་བ་སྤུ་གྲི་ཡི༔ གཏོར་བཟློག་བརྩོན་པར་བྱེད་འདོད་པས༔ ས་ནག་མཎྚལ་གྲུ་བཞི་ལ༔ མ་ཏྲཾ་རུ་དྲ་བྲིས་པ་ཡི༔ སྙིང་གར་ནྲྀའམ་ཏྲི་ཡིས་མཚན༔ དེ་ཕྱིར་ཆོས་འབྱུང་བསྣོལ་མ་དང༔ པདྨ་འདབ་བཞི་ཕྱོགས་མདོག་ཅན༔ འཁོར་ལོ་རྩིབས་བཅུ་མུ་ཁྱུད་མཚན༔ རྡོ་རྗེའི་རྭ་བ་མེ་རིས་བསྐོར༔ དེ་སྟེང་ལྕགས་ཀྱི་མཉྫུའི་ཁར༔ ཟངས་ལྕགས་བསེ་སོགས་གང་རུང་སྣོད༔ དཔལ་གྱི་བཤོས་བུ་ཁྲུ་གང་བ༔ ཟུར་གསུམ་ཁྲག་གིས་བྱུགས་པ་ཡི༔ གདོང་ལ་ཁྲོ་ཞལ་དག་གིས་མཚན༔ དེ་མཐར་རང་འདྲའི་བཤོས་བུ་བཞི༔ དེ་རྒྱབ་ཁྲོ་བཅུའི་དཔལ་གཏོར་དང༔ འཁོར་གྱི་གྲངས་ཀྱི་གཏོར་མ་འམ༔ ཡང་ན་མཐེབ་ཀྱུ་སྐྱུ་གུས་བསྐོར༔ ཤ་ཁྲག་འབྲུ་སྣས་གཏོར་འདབ་སྤྲས༔ ཉ་བོ་བཅུ་དང་གཏོར་བཅུ་གཟུགས༔ རྩེ་ལ་མར་ཚོན་ཁྱུང་གིས་བརྒྱན༔ གཏོར་གདུགས་རྨ་བྱའི་ཐིག་ལེས་མཛེས༔ རྩང་དང་མཚེ་ཡུངས་རྒྱུ་ཞགས་བསྐོར༔ བྱད་ཐག་ཚོན་སྐུད་སྣ་ལྔས་བཅིངས༔ ཐུན་དང་ཟོར་རྫས་ཡོ་བྱད་བསགས༔ གཡང་གཞི་ནག་པོའི་སྟེང་དུ་བཞག༔ དནལ་ཆེན་ཁྲོ་རྒྱལ་ལྷ་ཚོགས་ལ༔ བཟློག་པའི་ཕྲིན་ལས་བཅོལ་བ་ནི༔ ཧཱུྃ༔ བཞེངས་ཤིག་ཆོས་ཉིད་དབྱིངས་ནས་སྐུར་བཞེངས་ཤིག༔ དཔལ་ཆེན་རྡོ་རྗེ་གཞོན་ནུ་ཁྲོ་བོའི་རྒྱལ༔ སྣང་སྲིད་ཁྲོ་རྒྱལ་ཡོངས་ཀྱི་སྤྱི་དཔལ་ཆེ༔ དུས་གསུམ་རྒྱལ་ཀུན་ཕྲིན་ལས་སྲས་གཅིག་པུ༔ ཞལ་གསུམ་ཕྱག་དྲུག་མི་བཟད་རྔམས་པའི་གཟུགས༔ ཞལ་གཡས་དཀར་པོ་བཞད་ཅིང་འཛུམ་པའི་ཞལ༔ རྒོད་པའི་སྟོབས་ཀྱིས་སྟེང་ཕྱོགས་ལྷ་གདོན་བཟློག༔ གཡོན་ཞལ་དམར་ནག་རྔམས་ཤིང་གཤེ་བ་ཡིས༔ ཁྲོས་པའི་སྟོབས་ཀྱིས་འོག་ཕྱོགས་ཀླུ་གདོན་ཟློག༔ དབུས་ཞལ་མཐིང་ནག་ཁྲོ་འཁྲུགས་གཏུམ་པའི་ཞལ༔ མི་སྡུག་སྟོབས་ཀྱིས་བྱད་མ་རྦོད་གཏོང་ཟློག༔ སྤྱན་དགུ་སྡང་མིག་ཁྲག་ལྟར་གཡོ་བར་བྱེད༔ འཁྱུག་པའི་སྟོབས་ཀྱིས་གཟའ་སྐར་ཆོ་འཕྲུལ་ཟློག༔ ཞལ་གདངས་ལྗགས་དམར་གློག་ལྟར་འཁྱུག་པ་ཡིས༔ རྔམས་པའི་སྟོབས་ཀྱིས་སྲིད་གསུམ་ལོག་འདྲེན་ཟློག༔ མཆེ་བ་དཀར་པོ་ཟུར་གསུམ་རི་ལྟར་གཙིགས༔ གཟིར་བའི་སྟོབས་ཀྱིས་དུག་གསུམ་དགྲ་བགེགས་ཟློག༔ སྨ་ར་སྨིན་མ་ཨག་ཚོམ་མེ་སྟག་འཕྲོ༔ ཚ་བའི་དབལ་གྱིས་མ་རུང་དགྲ་བགེགས་ཟློག༔ ཤངས་ནས་དྲག་པོའི་འཐོར་རླུང་འུར་སྒྲ་འབྱིན༔ རྔུབ་པའི་སྟོབས་ཀྱིས་དམ་ཉམས་བྱད་མ་ཟློག༔ དབུ་ལ་ཐོད་སྐམ་རིགས་ལྔའི་རྩེ་ཕྲན་བརྒྱན༔ བརྗིད་པའི་སྟོབས་ཀྱིས་དུག་ལྔའི་དགྲ་བགེགས་ཟློག༔ དབུ་སྐྲ་དམར་སེར་མེ་ཡི་ཚྭ་ཚྭ་འཕྲོ༔ འཇིགས་པའི་སྟོབས་ཀྱིས་ལོག་འདྲེན་དགྲ་བགེགས་ཟློག༔ དང་པོའི་ཕྱག་གཉིས་གྲི་གུག་ཐོད་ཁྲག་བསྣོལ༔ ལོག་འདྲེན་བགེགས་ཀྱི་སྲོག་སྙིང་དཀྲུག་ཅིང་རྔུབས༔ མ་མོའི་ཁྲག་ནད་སྡང་བའི་དགྲ་ལ་ཟློག༔ བར་པ་གཉིས་ཀྱིས་ཕུར་བུ་རལ་གྲི་འཛིན༔ བདག་འཛིན་འཆིང་བའི་དགྲ་བགེགས་སྒྲོལ་བར་བྱེད༔ མཚོན་གྱི་བསྐལ་པ་སྡང་བའི་དགྲ་ལ་ཟློག༔ ཐ་མས་ཁ་ཊྭཾ་སྡིག་པ་མགོ་དགུ་བསྡམས༔ དུག་གསུམ་དགྲ་བགེགས་སྒྲོལ་ཞིང་སྙིང་ཁྲག་འཐུང༔ ནད་ཀྱི་བསྐལ་པ་སྡང་བའི་དགྲ་ལ་ཟློག༔ མགོ་རློན་ལྔ་བཅུའི་དོ་ཤལ་ཕྲེང་བས་བརྒྱན༔ དགྲ་བགེགས་འབྱུང་པོའི་མགོ་བཅད་སྤེལ་མར་བརྒྱུས༔ འཁོར་འདས་གཡོ་འཁྲུགས་དམ་ཉམས་དགྲ་ལ་ཟློག༔ རྡོ་རྗེའི་གཤོག་དྲུག་བར་སྣང་ཁེབ་པར་འགེང༔ རིགས་དྲུག་འཁོར་བའི་གནས་རིས་དོང་ནས་སྤྲུགས༔ དུག་ལྔ་སེར་སྣའི་གཡོ་འཁྲུགས་དགྲ་ཟློག༔ གླང་ཆེན་ཀོ་རློན་སྟག་གི་ཤམ་ཐབས་མནབས༔ བྱོལ་སོང་གཙོ་བརྒྱད་ཟིལ་གྱིས་གནོན་པར་བྱེད༔ མཆེ་གཙིགས་གཅན་གཟན་གཡོ་འཁྲུགས་དགྲ་ལ་ཟློག༔ ཞིང་ཆུང་སྐུ་རགས་སྦྲུལ་གྱི་ཆུན་པོས་བརྒྱན༔ སྣང་སྲིད་སྒྱུ་མར་སྟོན་ཅིང་ཀླུ་དབང་བསྡུད༔ མཛེ་རིགས་བཅོ་བརྒྱད་སྡང་བའི་དགྲ་ལ་ཟློག༔ ཞབས་བཞི་གྱད་ཀྱི་འདོར་སྟབས་ཚུལ་དུ་བགྲད༔ བདུད་བཞི་གན་རྐྱལ་གནོན་ཅིང་བརྫི་བར་བྱེད༔ བདུད་སྲིན་འབྱུང་པོའི་དམག་སྣ་དགྲ་ལ་ཟློག༔ དཔའ་ཞིང་མི་སྡུག་སྒེག་པའི་ཆ་བྱད་ཅན༔ དྲག་ཤུལ་མཐུ་ཡིས་ས་གསུམ་གཡོ་བར་བྱེད༔ མི་བཟད་གཟུགས་ཀྱི་ཆོ་འཕྲུལ་དགྲ་ལ་ཟློག༔ ཞལ་ནས་ཧཱུྃ་ཕཊ་བྷྱོ་བཟློག་འབྲུག་ལྟར་ལྡིར༔ རྔམས་པའི་གར་གྱིས་བྱད་མའི་བླ་ཡིད་འཕྲོག༔ དབང་པོ་རྨུགས་ཤིང་དམྱལ་ཐག་གཅོད་པར་བྱེད༔ བྱིང་འཐིབ་རྨུག་ནད་དམ་ཉམས་དགྲ་ལ་ཟློག༔ བྷྱོ༔ ཤེས་རབ་ཡུམ་ཆེན་འཁོར་ལོ་རྒྱས་འདེབས་མ༔ སྐུ་མདོག་མཐིང་ནག་རྔམས་ཤིང་ཁྲོས་པའི་ཞལ༔ སྤྱན་གསུམ་སྡང་མིག་ཕྱོགས་བཅུར་གཟིགས་པ་ཡིས༔ ཕྱོགས་སྐྱོང་ཕོ་མོ་བརྒྱལ་ཞིང་འགྱེལ་བར་བྱེད༔ ཕྱོགས་བཅུའི་ལྷ་འདྲེའི་གདུག་རྩུབ་དགྲ་ལ་ཟློག༔ ཞལ་གདངས་ལྗགས་འདྲིལ་མཆེ་བ་གཙིགས་པ་ཡིས༔ ས་གསུམ་བླ་འཕྲོག་དུག་གསུམ་ཟས་སུ་ཟ༔ ལྷ་ཀླུ་གཉན་གསུམ་གདུག་རྩུབ་དགྲ་ལ་ཟློག༔ ལྕགས་ཀྱི་སྨ་ར་སྨིན་མ་མེ་སྟག་འཕྲོ༔ བྱད་མའི་སྲ་བའི་རུས་ཆེན་གཞོམ་པར་བྱེད༔ གཏི་མུག་ཤི་འདྲེའི་གདུག་རྩུབ་དགྲ་ལ་ཟློག༔ ནུ་མ་འཕྱང་ཞིང་བྷ་ག་དྲག་ཏུ་བགྲད༔ དགྲ་བགེགས་བརྗིད་པའི་ཤ་ལ་རླབ་པར་བྱེད༔ ཞེ་སྡང་རྒྱལ་པོའི་གདུག་རྩུབ་དགྲ་ལ་ཟློག༔ སྡང་མིག་སྤྱན་ལས་ཁྲག་གི་རྦ་ཀློང་གཡོ༔ དམ་ཉམས་ཆུ་ཁམས་ཁྲག་གི་བཅུད་བསྡུད་བྱེད༔ འདོད་ཆགས་སྲིན་མོའི་གདུག་རྩུབ་དགྲ་ལ་ཟློག༔ ཐོད་སྐམ་དབུ་བརྒྱན་ཐོད་རློན་ཕྲེང་བས་སྤྲས༔ དུག་ལྔ་འདུ་བྱེད་ལྔ་བཅུའི་རྟོག་ཚོགས་གཞོམ༔ ཉོན་མོངས་འཁྲུལ་རྟོག་ལྷ་འདྲེའི་གདུག་རྩུབ་ཟློག༔ ཕྱག་གཡས་གྲི་གུག་རྣོན་པོ་མཁའ་ལ་ཕྱར༔ བྱད་མ་དགུག་ཅིང་ཚལ་པ་དུམ་བུར་གཏོང༔ བཅད་གཏུབ་གཤིན་རྗེའི་གདུག་རྩུབ་དགྲ་ལ་ཟློག༔ གཡོན་པས་ཐོད་པ་ཁྲག་བཀང་ཡབ་ལ་སྟོབས༔ དམར་བཀལ་ལྷོག་གཟེར་གདུག་རྩུབ་གཏོང་བར་བྱེད༔ རིམ་ཡམས་ནད་རིགས་ཐམས་ཅད་དགྲ་ལ་ཟློག༔ གཟིག་གི་ཤམ་ཐབས་རུས་པའི་རྒྱན་དྲུག་གསོལ༔ ཡེ་ཤེས་ཐུགས་རྗེས་རིགས་དྲུག་གནས་རིགས་སྟོངས༔ ཁམས་གསུམ་འཇོམས་བྱེད་དམ་ཉམས་དགྲ་ལ་ཟློག༔ ཞབས་གཉིས་ཡབ་ཀྱི་རྐེད་ལ་འཁྲིལ་ཞིང་སྦྱོར༔ སྲིད་གསུམ་འཁོར་བ་རྒྱ་ཡིས་འདེབས་པར་བྱེད༔ འཆིང་སྡོམ་ཕོ་ཉ་སྡང་བའི་དགྲ་ལ་ཟློག༔ ཤིན་ཏུ་ཁྲོ་ཞིང་ཆགས་པའི་ཉམས་འགྱུར་ལྡན༔ སོ་སོར་རྟོག་པའི་ཡེ་ཤེས་ཀློང་དུ་སྦྱོར༔ ཆགས་པའི་ཡུལ་འཇིགས་སྡང་བའི་དགྲ་ལ་ཟློག༔ བྷྱོ༔ དེ་ཡི་ཕྱི་རིམ་འཁོར་ལོ་རྩིབས་བཞི་ལ༔ བདུད་བཞི་ཕོ་མོ་བསྣོལ་བའི་གདན་སྟེང་དུ༔ ཤར་དུ་ཐུགས་སྲས་བཛྲ་ཀཱི་ལ་ཡ༔ རྒྱལ་གདོན་ལ་སོགས་ཞེ་སྡང་དགྲ་དང་བགེགས༔ མེ་ལོང་ཡེ་ཤེས་ངང་དུ་བཟློག་ཏུ་གསོལ༔ ལྷོ་རུ་ཡོན་ཏན་རཏྣ་ཀཱི་ལ་ཡ༔ གཤིན་རྗེ་ལ་སོགས་ང་རྒྱལ་དགྲ་དང་བགེགས༔ མཉམ་ཉིད་ཡེ་ཤེས་ངང་དུ་བཟློག་ཏུ་གསོལ༔ ནུབ་དུ་གསུང་མཆོག་པདྨ་ཀཱི་ལ་ཡ༔ སྲིན་པོ་ལ་སོགས་འདོད་ཆགས་དགྲ་དང་བགེགས༔ སོར་རྟོག་ཡེ་ཤེས་ངང་དུ་བཟློག་ཏུ་གསོལ༔ བྱང་དུ་ཕྲིན་ལས་ཀརྨ་ཀཱི་ལ་ཡ༔ དམ་སྲི་ལ་སོགས་བྱང་ཕྱོགས་དགྲ་དང་བགེགས༔ བྱ་གྲུབ་ཡེ་ཤེས་ངང་དུ་བཟློག་ཏུ་གསོལ༔ ཛ༔ ཕྱི་རིམ་འཁོར་ལོ་རྩིབས་བཅུའི་གདན་སྟེང་དུ༔ ཕྱོགས་སྐྱོང་ཕོ་མོ་བྱི་ཆིངས་བསྣོལ་བའི་སྟེང༔ ཤར་ཕྱོགས་ཁྲོ་ཆེན་རྣམ་པར་རྒྱལ་བ་ཡིས༔ དྲི་ཟ་ལ་སོགས་ཤར་གྱི་དགྲ་བགེགས་ཟློག༔ ལྷོ་རུ་ཁྲོ་རྒྱལ་འཇམ་དཔལ་གཤིན་རྗེའི་གཤེད༔ གཤིན་རྗེ་ལ་སོགས་ལྷོ་ཡི་དགྲ་བགེགས་ཟློག༔ ནུབ་ཕྱོགས་རྟ་མགྲིན་པདྨ་ཧེ་རུ་ཀས༔ ཆུ་ལྷ་ལ་སོགས་ནུབ་ཀྱི་དགྲ་བགེགས་ཟློག༔ བྱང་དུ་ཁྲོ་ཆེན་བདུད་རྩི་འཁྱིལ་བ་ཡིས༔ གནོད་སྦྱིན་ལ་སོགས་བྱང་གི་དགྲ་བགེགས་ཟློག༔ ཤར་ལྷོ་ཁྲོ་རྒྱལ་དབྱུག་པ་སྔོན་པོ་ཡིས༔ མེ་ལྷ་ལ་སོགས་ཤར་ལྷོའི་དགྲ་བགེགས་ཟློག༔ ལྷོ་ནུབ་ཁྲོ་རྒྱལ་མི་གཡོ་མགོན་པོ་ཡིས༔ སྲིན་པོ་ལ་སོགས་ལྷོ་ནུབ་དགྲ་བགེགས་ཟློག༔ ནུབ་བྱང་ཁྲོ་རྒྱལ་གཞན་གྱིས་མི་ཐུབ་པས༔ རླུང་ལྷ་ལ་སོགས་ནུབ་བྱང་དགྲ་བགེགས་ཟློག༔ བྱང་ཤར་ཁྲོ་རྒྱལ་ཁམས་གསུམ་རྣམ་རྒྱལ་གྱིས༔ དབང་ལྡན་ལ་སོགས་བྱང་ཤར་དགྲ་བགེགས་ཟློག༔ སྟེང་ཕྱོགས་ཁྲོ་བོ་ཧཱུྃ་ཆེན་ཀཱ་ར་ཡིས༔ ལྷ་དང་གཟའ་གདོན་སྟེང་གི་དགྲ་བགེགས་ཟློག༔ འོག་ཕྱོགས་ཁྲོ་རྒྱལ་མ་ཧཱ་བ་ལ་ཡིས༔ ས་བདག་ལ་སོགས་འོག་གི་དགྲ་བགེགས་ཟློག༔ ཛ༔ དེ་ཡི་ཕྱི་རིམ་མུ་ཁྱུད་ཁོར་ཡུག་ལ༔ ཀཽ་རི་དཀར་མོ་ཞིང་དབྱུག་བྷནྡྷ་འཛིན༔ དབྱུག་ཏོ་ཅན་གྱི་དམག་ཚོགས་དགྲ་ལ་ཟློག༔ ཙཽ་རི་སེར་མོས་མདའ་གཞུ་འགེངས་ཤིང་འཕེན༔ མཚོན་ཆ་ཅན་གྱི་དམག་ཚོགས་དགྲ་ལ་ཟློག༔ པྲ་མོ་དམར་མོས་ཆུ་སྲིན་རྒྱལ་མཚན་འཛིན༔ ཕྱར་ཞིང་གཡབ་པའི་དམག་ཚོགས་དགྲ་ལ་ཟློག༔ བཻ་ཏ་ནག་མོས་རྡོ་རྗེ་དུང་ཁྲག་འཐུང༔ གསོར་བྱེད་ཅན་གྱི་དམག་ཚོགས་དགྲ་ལ་ཟློག༔ པུསྐ་དམར་སེར་རྒྱུ་མ་འདྲེན་ཅིང་རྩེ༔ འཇིབ་ཅིང་འཐེན་པའི་དམག་ཚོགས་དགྲ་ལ་ཟློག༔ ཀསྨ་རི་དམར་ཤེལ་གྱི་སྤུ་གྲི་ཕྱར༔ གསོད་ཅིང་བཤའ་བའི་དམག་ཚོགས་དགྲ་ལ་ཟློག༔ སྨེ་ཤ་སྨུག་ནག་རྔམ་བྱེད་གློ་སྙིང་ཟ༔ རྔམས་ཟས་བྱེད་པའི་དམག་ཚོགས་དགྲ་ལ་ཟློག༔ ཙནྡྷ་དམར་མོ་བེ་ཅོན་དུང་ཁྲག་འཐུང༔ ཕྱར་ཞིང་རྔུབ་པའི་དམག་ཚོགས་དགྲ་ལ་ཟློག༔ སེང་གདོང་སྔོན་མོ་རྒྱུ་མ་ཟ་ཞིང་འདྲེན༔ མགོ་བརྙན་ཅན་གྱི་དམག་ཚོགས་དགྲ་ལ་ཟློག༔ བྱ་ཀྲི་སྟག་གདོང་ལག་གཉིས་ཐུར་དུ་བསྣོལ༔ ཤ་ལ་གཏུམ་པའི་དམག་ཚོགས་དགྲ་ལ་ཟློག༔ སྲི་ལ་ཝ་གདོང་ཐོད་ཁྲག་ཧུབ་ཀྱིས་འཐུང༔ ཁྲག་ལ་གདུང་བའི་དམག་ཚོགས་དགྲ་ལ་ཟློག༔ ཤྭ་ན་མཐིང་ནག་སྤྱང་གདོང་བམ་ཆེན་འདྲལ༔ ཟ་ཞིང་བཤུ་བའི་དམག་ཚོགས་དགྲ་ལ་ཟློག༔ ཀྲི་ཏ་རྒོད་གདོང་དམར་སེར་རུས་པ་འཆའ༔ རུས་ལ་རྔམས་པའི་དམག་ཚོགས་དགྲ་ལ་ཟློག༔ ཀང་ཀ་དུར་བྱའི་གདོང་ཅན་མི་སྙིང་ཟ༔ ནང་ཁྲོལ་ཟ་བའི་དམག་ཚོགས་དགྲ་ལ་ཟློག༔ ཁ་ཁ་བྱ་རོག་གདོང་ཅན་མིག་ཚིལ་འབྲུ༔ དྲུང་ནས་འབྱིན་པའི་དམག་ཚོགས་དགྲ་ལ་ཟློག༔ ཧུ་ལུ་འུག་པའི་གདོང་ཅན་ཞིང་ཕྲག་གཟར༔ འཁུན་ཞིང་ཧུས་འདེབས་དམག་ཚོགས་དགྲ་ལ་ཟློག༔ ཛ༔ གཞན་ཡང་དབང་ཕྱུག་ཉི་ཤུ་རྩ་བརྒྱད་ནི༔ སྲིན་མོ་ནག་མོ་གཡག་གདོང་རྡོ་རྗེ་འཛིན༔ རྡུངས་ཤིང་འབིགས་པའི་དམག་ཚོགས་དགྲ་ལ་ཟློག༔ ཚངས་པ་སྦྲུལ་གདོང་དམར་སེར་པདྨ་འཛིན༔ དུག་གཟེར་ཅན་གྱི་དམག་ཚོགས་དགྲ་ལ་ཟློག༔ ལྷ་ཆེན་གཟིག་གདོང་དྲི་ཤུལ་རྩེ་གསུམ་འཆང༔ རྔམས་ཤིང་གཤེ་བའི་དམག་ཚོགས་དགྲ་ལ་ཟློག༔ གཏོགས་འདོད་སྲེ་གདོང་འཁོར་ལོ་རྩིབས་བཅུ་འཆང༔ ཉུལ་ཞིང་རྒྱུ་བའི་དམག་ཚོགས་དགྲ་ལ་ཟློག༔ གཞོན་ནུ་དྲེད་གདོང་ལག་གཉིས་མདུང་ཐུང་འཕེན༔ གཟིར་ཞིང་བསྣུན་པའི་དམག་ཚོགས་དགྲ་ལ་ཟློག༔ བརྒྱ་བྱིན་དོམ་གདོང་རྒྱུ་མའི་ཞགས་པ་འཛིན༔ གཏུམ་ཞིང་འཆིང་བའི་དམག་ཚོགས་དགྲ་ལ་ཟློག༔ ཞི་བ་ཆུ་སྲིན་གདོང་ཅན་བུམ་པ་འཛིན༔ ཁྱུར་མིད་གཏོང་བའི་དམག་ཚོགས་དགྲ་ལ་ཟློག༔ རྡོ་རྗེ་ཕ་ཝཾ་གདོང་ཅན་སྤུ་གྲི་འཕྱར༔ སྐེ་ནས་གཅོད་པའི་དམག་ཚོགས་དགྲ་ལ་ཟློག༔ བདུད་རྩི་སྡིག་པའི་གདོང་ཅན་པདྨ་འཛིན༔ ཁོང་ཁྲག་འཇིབ་པའི་དམག་ཚོགས་དགྲ་ལ་ཟློག༔ ཟླ་བ་དཀར་མོ་ཁྲ་གདོང་བེ་ཅོན་འཛིན༔ ཕྱར་ཞིང་བརྡུངས་བའི་དམག་ཚོགས་དགྲ་ལ་ཟློག༔ བེ་ཅོན་ཝ་གདོང་ནག་མོ་དུག་མདའ་འཕེན༔ མྱོས་ཤིང་གསོད་པའི་དམག་ཚོགས་དགྲ་ལ་ཟློག༔ སྲིན་མོ་སྟག་གདོང་ནག་མོ་གྲི་གུག་གདེངས༔ འཛིན་ཅིང་སྒྲོལ་བའི་དམག་ཚོགས་དགྲ་ལ་ཟློག༔ ཟ་བ་བྱ་རྒོད་གདོང་ཅན་ཁ་ཊྭཾ་འཛིན༔ སྒོ་གསུམ་འབིགས་པའི་དམག་ཚོགས་དགྲ་ལ་ཟློག༔ དགའ་བ་རྟ་གདོང་དམར་མོ་ལྕགས་སྒྲོག་འཛིན༔ དམ་དུ་སྡོམ་པའི་དམག་ཚོགས་དགྲ་ལ་ཟློག༔ སྟོབས་ཆེན་ཁྱུང་གདོང་སྔོན་མོ་དུག་སྦྲུལ་ཟ༔ གཞོམ་ཞིང་འཆིང་བའི་དམག་ཚོགས་དགྲ་ལ་ཟློག༔ སྲིན་མོ་ཁྱི་གདོང་སྔོན་མོ་བམ་ཆེན་འདྲལ༔ གཟིར་ཞིང་ཟ་བའི་དམག་ཚོགས་དགྲ་ལ་ཟློག༔ འདོད་པ་པུ་ཤུད་གདོང་ཅན་རྒྱུ་མ་ཟ༔ འཐེན་ཅིང་གཅོད་པའི་དམག་ཚོགས་དགྲ་ལ་ཟློག༔ ནོར་སྲུང་ཤ་གདོང་དྲིལ་བུ་ཀླད་རྐང་ཟ༔ ལྡག་ཅིང་མྱང་བའི་དམག་ཚོགས་དགྲ་ལ་ཟློག༔ རླུང་ལྷ་སྤྱང་གདོང་བ་དན་ཞིང་ཆུང་ཟ༔ ཕྱར་ཞིང་གཡབ་པའི་དམག་ཚོགས་དགྲ་ལ་ཟློག༔ མི་མོ་སྐྱིན་གདོང་གསལ་ཤིང་ཐོད་ཁྲག་འཛིན༔ གཟིར་ཞིང་རྔུབ་པའི་དམག་ཚོགས་དགྲ་ལ་ཟློག༔ ཕག་མོ་ནག་མོ་ཕག་གདོང་སྒྲོལ་གྲི་ཕྱར༔ བརྡེག་ཅིང་འདྲད་པའི་དམག་ཚོགས་དགྲ་ལ་ཟློག༔ རྡོ་རྗེ་ཁྭ་གདོང་ནག་མོ་དྲིལ་བྷན་འཁྱུད༔ འཛིན་ཅིང་འཁྲིལ་བའི་དམག་ཚོགས་དགྲ་ལ་ཟློག༔ སྣ་ཆེན་གླང་ཆེན་སྔོ་སྐྱ་བམ་ཁོག་འདྲལ༔ ནང་ཁྲོལ་ཟ་བའི་དམག་ཚོགས་དགྲ་ལ་ཟློག༔ ཆུ་ལྷ་ཆུ་སྦྲུལ་གདོང་ཅན་རོ་ལ་ཟ༔ སྤྲུགས་ཅིང་མིད་པའི་དམག་ཚོགས་དགྲ་ལ་ཟློག༔ རྡོ་རྗེ་ཁུ་བྱུག་གདོང་ཅན་ལྕགས་ཀྱུ་དཀར༔ སྙིང་ནས་འཛིན་པའི་དམག་ཚོགས་དགྲ་ལ་ཟློག༔ རཏྣ་ར་གདོང་སེར་མོ་རྒྱུ་ཞགས་སེར༔ སྐེ་ནས་འཆིང་བའི་དམག་ཚོགས་དགྲ་ལ་ཟློག༔ པདྨ་སེང་གདོང་དམར་མོས་ལྕགས་སྒྲོག་འཛིན༔ ཡན་ལག་སྡོམ་པའི་དམག་ཚོགས་དགྲ་ལ་ཟློག༔ ཀརྨ་སྦྲུལ་གདོང་ལྗང་གུ་དྲིལ་བུ་འཛིན༔ ཡིད་སེམས་མྱོས་བྱེད་དམག་ཚོགས་དགྲ་ལ་ཟློག༔ ཛ༔ གཞན་ཡང་རྡོ་རྗེ་གཞོན་ནུའི་བཀའ་འཁོར་དུ༔ གནས་ཡུལ་མཁའ་འགྲོ་སུམ་ཅུ་སོ་གཉིས་ནི༔ སྐུ་མདོག་ཕྱག་མཚན་རང་རང་ཆ་ལུགས་རྫོགས༔ སྤྲུལ་བསྒྱུར་མི་བཟད་འབར་བའི་སྐུར་བཞེངས་ལ༔ རིགས་བཞིའི་མཁའ་འགྲོའི་བསུན་མ་དགྲ་ལ་ཟློག༔ ནང་བ་ཆོས་དང་ཕྱི་པ་མུ་སྟེགས་ཀྱི༔ མཐུ་གཏད་ངན་སྔགས་བྱེད་པ་དགྲ་ལ་ཟློག༔ དགེ་ལ་འདུན་པའི་བན་སྔགས་བོན་གསུམ་གྱིས༔ མདོ་སྒྲུབ་གཏོར་ཟོར་འཕེན་པ་དགྲ་ལ་ཟློག༔ དཔའ་བོ་མཁའ་འགྲོ་དམ་ཅན་བསྲུང་མ་ཡིས༔ མདོ་སྒྲུབ་གཏོར་ཟོར་འཕེན་པ་དགྲ་ལ་ཟློག༔ དཔའ་བོ་མཁའ་འགྲོ་དམ་ཅན་བསྲུང་མ་ཡི༔ གཡོ་འཁྲུགས་ཕྲག་དོག་གདུག་རྩུབ་དགྲ་ལ་ཟློག༔ ཕོ་རྒྱུད་མགོན་པོའི་གདུག་རྩུབ་དགྲ་ལ་ཟློག༔ མོ་རྒྱུད་ལྷ་མོའི་གདུག་རྩུབ་དགྲ་ལ་ཟློག༔ གཉིས་མེད་མ་ནིང་གདུག་རྩུབ་དགྲ་ལ་ཟློག༔ དྲེགས་པ་སྡེ་བརྒྱད་གདུག་རྩུབ་དགྲ་ལ་ཟློག༔ མི་མཐུན་ལོ་ཟླ་ཀེག་དང་ཟ་མའི་ཀེག༔ འབྱུང་བའི་དགྲ་གཤེད་ཐམས་ཅད་དགྲ་ལ་ཟློག༔ སྤར་ཁ་སྨེ་བ་བླ་ཁམས་ལ་སོགས་པའི༔ ལོ་བདུད་དྲུག་ཅུའི་གདུག་རྩུབ་དགྲ་ལ་ཟློག༔ ཛ༔ བཀའ་སྡོད་རྡོ་རྗེའི་གིང་ཆེན་བཅོ་བརྒྱད་ནི༔ སྔོ་སྐྱ་མི་བཟད་འཇིགས་པའི་ཚུལ་སྟོན་ཅིང༔ ཧ་ཧ་རུ་ལུ་ཀྭི་བསྭོའི་རྔམས་སྒྲ་སྒྲོགས༔ ཤ་དང་ཁྲག་མེད་རྩ་རྒྱུས་རུས་པའི་ལུས༔ སྐམ་བྱེད་རུས་པའི་ནད་རྣམས་དགྲ་ལ་ཟློག༔ འཇིགས་ཚུལ་མི་འདྲ་རྣམ་འགྱུར་བཅོ་བརྒྱད་ལྡན༔ དགྲ་བོའི་ཁམས་ཆེན་བཅོ་བརྒྱད་རྔམས་ཟས་བྱེད༔ ཕོ་ཉ་གིང་གི་དམག་ཚོགས་དགྲ་ལ་ཟློག༔ གཡས་པ་ཐམས་ཅད་ཐོད་དབྱུག་འབར་བ་ཕྱར༔ ལོག་འདྲེན་དགྲ་བགེགས་དབྱུག་ཏོས་གཞོམ་པར་བྱེད༔ བརྡུང་བྱེད་ཅན་གྱི་ དམག་ཚོགས་དགྲ་ལ་ཟློག༔ གཡོན་པ་ཐམས་ཅད་ལྕགས་ཀྱུ་མེ་འབར་བསྣམས༔ དགྲ་བོའི་སྙིང་ནས་བཟུང་ཞིང་འཐེན་པར་བྱེད༔ འགུགས་བྱེད་གིང་གི་དམག་ཚོགས་དགྲ་ལ་ཟློག༔ ལག་པས་རྙབ་ཅིང་གར་བབ་ཟས་སུ་ཟ༔ དགྲ་བགེགས་སྐེ་ནས་བཟུང་ཞིང་འཆིང་བར་བྱེད༔ སྒྲོལ་བྱེད་གིང་ཆེན་དམག་ཚོགས་དགྲ་ལ་ཟློག༔ གནམ་ལ་འཕྱོ་ཞིང་ས་ལ་རྐང་བྲོ་བརྡུང༔ དགྲ་བགེགས་ཤ་མྱོག་རུས་མྱོག་འཐག་པར་བྱེད༔ གཏུམ་པ་གིང་ཆེན་དམག་ཚོགས་དགྲ་ལ་ཟློག༔ དགྲ་བོའི་ཁམས་ལྔ་དབང་པོ་ལྔ་དང་བཅས༔ དུག་ལྔ་བསྒྲལ་ནས་སྐུ་ལྔའི་དབྱིངས་སུ་སྦྱོར༔ སྦྱོར་བྱེད་གིང་གི་དམག་ཚོགས་དགྲ་ལ་ཟློག༔ ཛ༔ ཕོ་བྲང་ཆེན་པོའི་ཕྱོགས་མཚམས་སྟེང་འོག་ཏུ༔ དཔལ་གྱི་བཀའ་ཉན་ཁྲ་ཐབས་ཉི་ཤུའི་ཚོགས༔ ཁྲོ་བཅུ་ཡབ་ཡུམ་སྤྲུལ་པའི་ཆོ་འཕྲུལ་ལས༔ སྟེང་ཕྱོགས་ཁྲ་ཐབས་ཕག་དང་སྨིག་བུའི་མགོ༔ ལྷ་གདོན་ཕོ་མོ་སྒྲོལ་ཞིང་ཟ་བར་བྱེད༔ ནམ་མཁའ་ལྷ་ཡི་བྱད་སྣ་དགྲ་ལ་ཟློག༔ འོག་ཕྱོགས་ཁྲ་ཐབས་དོམ་དང་བྱི་བའི་མགོ༔ ས་བདག་བདུད་སྲིན་ཕོ་མོ་སྒྲོལ་བར་བྱེད༔ ས་འོག་ཀླུ་ཡི་བྱད་སྣ་དགྲ་ལ་ཟློག༔ ཤར་གྱི་ཁྲ་ཐབས་སྟག་དང་བྱ་རྒོད་མགོ༔ དམ་ཉམས་དགྲ་བོའི་མིག་འབྲས་འབྱིན་པར་བྱེད༔ ཤར་ཕྱོགས་དྲི་ཟའི་ བྱད་སྣ་དགྲ་ལ་ཟློག༔ ལྷོ་ཕྱོགས་ཁྲ་ཐབས་ཤ་བ་འུག་པའི་མགོ༔ དམ་ཉམས་དགྲ་བོའི་རྒྱུ་མ་ཟ་བར་བྱེད༔ ལྷོ་ཕྱོགས་གཤིན་རྗེའི་ བྱད་སྣ་དགྲ་ལ་ཟློག༔ ནུབ་ཕྱོགས་ཁྲ་ཐབས་བྱི་ལ་པུ་ཤུད་མགོ༔ དམ་ཉམས་དགྲ་བོའི་ནང་ཁྲོལ་ཟ་བར་བྱེད༔ ནུབ་ཕྱོགས་ཀླུ་དབང་ བྱད་སྣ་དགྲ་ལ་ཟློག༔ བྱང་ཕྱོགས་ཁྲ་ཐབས་སེང་གེ་ཕ་ཝཾ་མགོ༔ དགྲ་བོའི་གློ་སྙིང་རྔམས་ཟས་ཟ་བར་བྱེད༔ བྱང་ཕྱོགས་གནོད་སྦྱིན་ བྱད་སྣ་དགྲ་ལ་ཟློག༔ ཤར་ལྷོའི་ཁྲ་ཐབས་གཡག་དང་བྱ་རོག་གདོང༔ དམ་ཉམས་དགྲ་བོའི་ཡན་ལག་གཅོད་པར་བྱེད༔ ཤར་ལྷོ་མེ་ལྷའི་ བྱད་སྣ་དགྲ་ལ་ཟློག༔ ལྷོ་ནུབ་ཁྲ་ཐབས་གཟིག་དང་ཁྭ་ཏའི་མགོ༔ དམ་ཉམས་དགྲ་བོའི་རྐང་དམར་འཇིབ་པར་བྱེད༔ ལྷོ་ནུབ་སྲིན་པོའི་ བྱད་སྣ་དགྲ་ལ་ཟློག༔ ནུབ་བྱང་ཁྲ་ཐབས་སྤྱང་ཀི་ཁྲ་ཡི་མགོ༔ དགྲ་བོའི་ལྷུ་ཆེན་བཅུ་གཉིས་སིལ་བུར་ཕྲོལ༔ ནུབ་བྱང་རླུང་ལྷའི་ བྱད་སྣ་དགྲ་ལ་ཟློག༔ བྱང་ཤར་ཁྲ་ཐབས་དྲེད་དང་སྲེ་མོང་མགོ༔ དགྲ་བགེགས་ཡན་ལག་གཟུགས་བཞིར་རོལ་བར་བྱེད༔ བྱང་ཤར་དབང་ལྡན་ བྱད་སྣ་དགྲ་ལ་ཟློག༔ ཛ༔ དཔལ་གྱི་བཀའ་ཉན་ཅི་བཅོལ་ལས་སྒྲུབ་པ༔ ནམ་གྱི་སྲོད་ལ་དགྲ་བགེགས་འགུགས་མཛད་མ༔ ལྕགས་ཀྱི་སྤྱང་མོ་རྔམས་པ་མགོ་དགུ་པ༔ ཤྭ་ན་མུ་ཁ་ཆེན་མོའི་དུས་ལ་བབ༔ འགུགས་མཛད་ཆེན་མོའི་གདུག་རྩུབ་དགྲ་ལ་ཟློག༔ ཐོ་རངས་དུས་སུ་དགྲ་བོའི་བླ་འགུགས་མ༔ གསེར་གྱི་འཕར་བ་འཇིགས་པའི་ལྕེ་བརྒྱད་མ༔ སྲི་ལ་མུ་ཁ་ཆེན་མོའི་དུས་ལ་བབ༔ འཆིང་མཛད་ཆེན་མོའི་ གདུག་རྩུབ་དགྲ་ལ་ཟློག༔ ནམ་གུང་དུས་སུ་དགྲ་བགེགས་སྒྲོལ་མཛད་པ༔ ཟངས་ཀྱི་ཝ་མོ་མགྱོགས་པའི་རྐང་གསུམ་མ༔ སྲི་ཀ་མུ་ཁ་ཆེན་མོའི་དུས་ལ་བབ༔ སྡོམ་མཛད་ཆེན་མོའི་གདུག་རྩུབ་དགྲ་ལ་ཟློག༔ ནམ་ཕྱེད་དགྲ་བོའི་བླ་ལེན་སྲོག་འཕྲོག་མ༔ མི་བཟད་གཡུ་ཡི་ཁྱི་མོ་རལ་བ་ཅན༔ ཤྲྀ་ལ་མུ་ཁ་ཆེན་མོའི་དུས་ལ་བབ༔ མྱོས་བྱེད་ཆེན་མོའི་གདུག་རྩུབ་དགྲ་ལ་ཟློག༔ ཉིན་གུང་དུས་སུ་དགྲ་བོའི་ཚེ་འཕྲོག་མ༔ རེ་ཏི་ནག་མོ་དྲེལ་རྟ་རྐང་གསུམ་ཆིབས༔ བདག་ཉིད་ཆེན་ཆེན་མོ་ཁྱོད་ཀྱི་དུས་ལ་བབ༔ རྡོ་རྗེ་མཁའ་འགྲོའི་གདུག་རྩུབ་དགྲ་ལ་ཟློག༔ ནམ་ལང་དུས་སུ་དགྲ་བགེགས་སྒྲོལ་མཛད་པ༔ རེ་མ་མ་ཛ་སེར་སྨན་ཤ་ཡུ་མོ་ཆིབས༔ བདག་ཉིད་ཆེན་ཆེན་མོ་ཁྱོད་ཀྱི་དུས་ལ་བབ༔ རིན་ཆེན་མཁའ་འགྲོའི་གདུག་རྩུབ་དགྲ་ལ་ཟློག༔ ཉི་མའི་ཕྱེད་ཡོལ་དགྲ་བགེགས་འཇོམས་མཛད་པ༔ རི་ཏི་ནག་མོ་ཆུ་གླང་སྨྱོན་པ་ཆིབས༔ བདག་ཉིད་ཆེན་ཆེན་མོ་ཁྱོད་ཀྱི་དུས་ལ་བབ༔ པདྨ་མཁའ་འགྲོའི་གདུག་རྩུབ་དགྲ་ལ་ཟློག༔ ཉི་ནུབ་དུས་སུ་དགྲ་བགེགས་སྒྲོལ་མཛད་པ༔ རེ་མ་ཛུ་དམར་རྔ་མོང་གྭ་པ་ཆིབས༔ བདག་ཉིད་ཆེན་ཆེན་མོ་ཁྱོད་ཀྱི་དུས་ལ་བབ༔ ཀརྨ་མཁའ་འགྲོའི་གདུག་རྩུབ་དགྲ་ལ་ཟློག༔ ས་ལ་བརྟེན་བྱས་དགྲ་བགེགས་སྒྲོལ་མཛད་མ༔ ཡ་བྱིན་མཐིང་ནག་ཀླུ་རྟ་སྔོན་པོ་ཆིབས༔ ས་བདག་ཆེན་ཆེན་མོ་ཁྱོད་ཀྱི་དུས་ལ་བབ༔ ས་གཡོ་བྲག་རྙིལ་གདུག་རྩུབ་དགྲ་ལ་ཟློག༔ ཆུ་ལ་བརྟེན་བཅས་དགྲ་བགེགས་གསོད་མཛད་པ༔ དེ་བྱིན་སེར་ནག་ཆུ་སྲིན་དམར་སེར་ཆིབས༔ ས་བདག་ཆེན་ཆེན་མོ་ཁྱོད་ཀྱི་དུས་ལ་བབ༔ ཆུ་ཆེན་གཡོ་འཁྲུགས་འཁྱག་གྲི་དགྲ་ལ་ཟློག༔ མེ་ལ་བརྟེན་བཅས་དགྲ་བགེགས་གསོད་མཛད་པ༔ བསེ་བྱིན་དམར་ནག་མེ་ཡི་འབྲུག་ལ་ཆིབས༔ ས་བདག་ཆེན་ཆེན་མོ་ཁྱོད་ཀྱི་དུས་ལ་བབ༔ གསོན་བསྲེགས་མེ་ཡི་གཡོ་འཁྲུགས་དགྲ་ལ་ཟློག༔ རླུང་ལ་བརྟེན་བཅས་དགྲ་བགེགས་སྒྲོལ་མཛད་པ༔ ཕག་བྱིན་ལྗང་ནག་རེ་འབྱམས་ནག་པོ་ཆིབས༔ ས་བདག་ཆེན་ཆེན་མོ་ཁྱོད་ཀྱི་དུས་ལ་བབ༔ བསྐྱོད་བྱེད་འཐོར་རླུང་དྲག་པོ་དགྲ་ལ་ཟློག༔ ཛ༔ དཔལ་ཆེན་ཆེ་མཆོག་སྐུ་ཡི་བཀའ་སྡོད་ཆེ༔ ཤར་ཕྱོགས་སྲིན་པོའི་སྐྱེས་བུས་དུང་ཕུར་འདྲིལ༔ ཟ་བྱེད་སྐྱེས་བུའི་གདུག་རྩུབ་དགྲ་ལ་ཟློག༔ ལྷོ་ཕྱོགས་གཤིན་རྗེའི་སྐྱེས་བུས་གསེར་ཕུར་འདྲིལ༔ གསོད་བྱེད་སྐྱེས་བུའི་གདུག་རྩུབ་དགྲ་ལ་ཟློག༔ ནུབ་ཕྱོགས་ཡ་བདུད་སྐྱེས་བུས་ཟངས་ཕུར་འདྲིལ༔ གཏུམ་བྱེད་སྐྱེས་བུའི་གདུག་རྩུབ་དགྲ་ལ་ཟློག༔ བྱང་ཕྱོགས་གནོད་སྦྱིན་སྐྱེས་བུས་ལྕགས་ཕུར་འདྲིལ༔ བརླག་བྱེད་སྐྱེས་བུའི་གདུག་རྩུབ་དགྲ་ལ་ཟློག༔ གསུང་གི་བཀའ་ཉན་ལྕགས་ཀྱི་སྐྱེས་བུ་བཞི༔ ཤར་བདུད་དཀར་པོ་ཤེལ་གྱི་ཕུར་བུ་འདྲིལ༔ ལྷ་བུའི་བདུད་ཀྱི་བར་ཆད་དགྲ་ལ་ཟློག༔ ལྷོ་བདུད་སྔོན་པོ་ལྕགས་ཀྱི་རལ་གྲི་འཕྱར༔ ཕུང་པོའི་བདུད་ཀྱི་བར་ཆད་དགྲ་ལ་ཟློག༔ ནུབ་བདུད་ནག་པོ་སེང་ལྡིང་ཕུར་བུ་འདྲིལ༔ ཉོན་མོངས་བདུད་ཀྱི་བར་ཆད་དགྲ་ལ་ཟློག༔ བྱང་བདུད་ལྗང་གུ་གནམ་ལྕགས་རལ་གྲི་འཕྱར༔ འཆི་བདག་བདུད་ཀྱི་བར་ཆད་དགྲ་ལ་ཟློག༔ ཐུགས་ཀྱི་བཀའ་ཉན་དུང་གི་སྐྱེས་བུ་བཞི༔ ཤར་གིང་དཀར་པོ་ཤེལ་གྱི་སྤུ་གྲི་འཕྱར༔ ཟ་བྱེད་གིང་གི་གདུག་རྩུབ་དགྲ་ལ་ཟློག༔ ལྷོ་གིང་སྔོན་པོ་གྲི་ཕུར་གཟིར་ཞིང་འདྲིལ༔ གསོད་བྱེད་གིང་གི་དམག་ཚོགས་དགྲ་ལ་ཟློག༔ ནུབ་གིང་དམར་པོ་ཟངས་ཀྱི་ཕུར་བུ་འདྲིལ༔ གཟིར་མཛད་གིང་གི་གདུག་རྩུབ་དགྲ་ལ་ཟློག༔ བྱང་གིང་སེར་པོ་མཆོག་ཆེན་ཕུར་བུ་འདྲིལ༔ འཆིང་མཛད་གིང་གི་དམག་ཚོགས་དགྲ་ལ་ཟློག༔ ཛ༔ གཞན་ཡང་གཏེར་གྱི་བསྲུང་མར་ཁས་བླངས་པའི༔ བདུད་ཀྱི་ཡུམ་ཆེན་དཀར་མོ་ཉི་ཟླ་ཞེས༔ སྤྲུལ་པ་འཁོར་དང་ཡང་འཁོར་མ་ལུས་པ༔ ཁྲོ་འཁྲུགས་མི་བཟད་རྔམས་པའི་སྐུར་བཞེངས་ལ༔ མ་རུང་ལོག་པར་འདྲེན་པའི་དགྲ་དང་བགེགས༔ ཁྱོད་ཀྱི་མཐུ་སྟོབས་ནུས་པས་བཟློག་ཏུ་གསོལ༔ དབང་ཕྱུག་ཆེན་མོ་ཁམས་གསུམ་སྲོག་ལ་དབང༔ འདོད་པའི་ཁམས་ཀྱི་བྱད་མ་རྦོད་གཏོང་ཟློག༔ གཟུགས་ཁམས་གནས་པའི་བྱད་མ་རྦོད་གཏོང་ཟློག༔ གཟུགས་ཀྱི་ཁམས་ཀྱི་རྟག་ཆད་ལྟས་ངན་ཟློག༔ ཆོས་ཟོར་བོན་ཟོར་འཕེན་པ་དགྲ་ལ་ཟློག༔ སྔགས་པས་ཕུར་བུས་བྲུབ་པ་དགྲ་ལ་ཟློག༔ ས་ལ་མནན་གཏད་བྱེད་པ་དགྲ་ལ་ཟློག༔ ཆུ་ལ་ཀླུ་གཏད་བྱེད་པ་དགྲ་ལ་ཟློག༔ མེ་ལ་སྦྱིན་སྲེག་བྱེད་པ་དགྲ་ལ་ཟློག༔ རླུང་ལ་འཁོར་ལོ་བསྐོར་བ་དགྲ་ལ་ཟློག༔ མུ་སྟེགས་ངན་སྔགས་བྱེད་པ་དགྲ་ལ་ཟློག༔ ཨ་ཙ་ར་ཡི་མིག་འཕྲུལ་དགྲ་ལ་ཟློག༔ སྡེ་བརྒྱད་ཆོ་འཕྲུལ་འགྱེད་པ་དགྲ་ལ་ཟློག༔ མི་ལ་མིག་འཕྲུལ་སྟོན་པ་དགྲ་ལ་ཟློག༔ ཕྱུགས་ལ་ཐན་གཟུགས་སྐྱེས་པ་དགྲ་ལ་ཟློག༔ མ་མོའི་ནད་རྐྱལ་ཁ་ཕྱེ་དགྲ་ལ་ཟློག༔ གཤིན་རྗེའི་འཁོར་ལོ་བསྐོར་བ་དགྲ་ལ་ཟློག༔ བདུད་ཀྱི་ཁྲམ་ལ་འདེབས་པ་དགྲ་ལ་ཟློག༔ བཙན་གྱི་ཤྭ་རྡེའུ་འགྲིམ་པ་དགྲ་ལ་ཟློག༔ གཟའ་ཡི་གཟུགས་སྟོན་རྒྱུག་པ་དགྲ་ལ་ཟློག༔ ཐེའུ་རིང་རྩིས་འདེབས་བླ་རྐུན་དགྲ་ལ་ཟློག༔ འགོང་པོས་ཟ་ཁ་སྟོན་པ་དགྲ་ལ་ཟློག༔ ལྷ་ཡིས་ཐོག་དང་རྡོ་འབེབ་དགྲ་ལ་ཟློག༔ ཀླུ་ཡིས་མཛེ་ནད་གཏོང་བ་དགྲ་ལ་ཟློག༔ ཛ༔ ཕོ་བྲང་ཕྱོགས་བཞི་སྐྱོང་བའི་སྒོ་མ་བཞི༔ དཀར་མོ་པུ་ཤུད་མགོ་ཅན་ལྕགས་ཀྱུ་འཛིན༔ འགུགས་པའི་ལས་མཛད་གདུག་རྩུབ་དགྲ་ལ་ཟློག༔ སེར་མོ་སྐྱ་ཀའི་མགོ་ཅན་ཞགས་པ་འཛིན༔ འཆིང་བའི་ལས་མཛད་གདུག་རྩུབ་དགྲ་ལ་ཟློག༔ དམར་མོ་སྲིན་བྱའི་མགོ་ཅན་ལྕགས་སྒྲོག་འཛིན༔ སྡོམ་པའི་ལས་མཛད་གདུག་རྩུབ་དགྲ་ལ་ཟློག༔ ལྗང་མོ་ཁྲ་ཡི་མགོ་ཅན་དྲིལ་བུ་འཛིན༔ མྱོས་པའི་ ལས་མཛད་གདུག་རྩུབ་དགྲ་ལ་ཟློག༔ ཛ༔ དཔལ་ཆེན་རྡོ་རྗེ་གཞོན་ནུ་ཡབ་དང་ཡུམ༔ བཀའ་སྡོད་སྤྲུལ་པར་བཅས་པ་ཐམས་ཅད་ཀྱིས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཕྱོགས་བཅུའི་བྱད་མ་རྦོད་གཏོང་མ་ལུས་པ༔ བཟློག་ཅིང་བསྒྱུར་བའི་ཕྲིན་ལས་མཛད་དུ་གསོལ༔ གཙོ་བོའི་བཀའ་ཆད་ཁྲིམས་ལ་གཏུགས་པ་ཟློག༔ བློན་པོས་གྲོས་ངན་གཡུལ་འདེབས་ཤོམ་པ་ཟློག༔ འབངས་མི་ཁ་འདུམ་ནང་དབྱེན་བྱེད་པ་ཟློག༔ ཇག་པས་རྟ་རྒྱུག་འཕྲོག་བཅོམ་གསོད་པ་ཟློག༔ རྐུན་མས་འཇབ་ཤིང་ནོར་རྫས་འཁྱེར་བ་ཟློག༔ ཉེས་མེད་ཁྲིམས་གཏུགས་ཤག་ཡུས་འདེབས་པ་ཟློག༔ མཐོ་གནོན་བྱེད་ཅིང་མི་ལ་གླེང་བ་ཟློག༔ དམའ་ཡུས་སྙོག་ཅིང་སྐུར་བ་འདེབས་པ་ཟློག༔ ངོས་ནས་མིག་ངན་ཅེ་རེ་ལྟ་བ་ཟློག༔ ལྐོག་ནས་ཉུལ་ཞིང་ཀྲོང་ངེ་ཉན་པ་ཟློག༔ ཁྲིམས་བདག་འདུན་མར་མི་ཁ་གླེང་བ་ཟློག༔ མི་ལ་ན་ཚ་གཟེར་ནད་གཏོང་བ་ཟློག༔ ཕྱུགས་ལ་གོད་ཁ་ར་བ་སྟོང་པ་ཟློག༔ ཟས་ནོར་སྟོར་བརླགས་བང་མཛོད་ཞིག་པ་ཟློག༔ བཙུན་པའི་སྡོམ་ཉམས་ཚུལ་ཁྲིམས་འཆལ་བ་ཟློག༔ སྔགས་པའི་དམ་ཉམས་གསང་རྒྱ་དཀྲལ་བ་ཟློག༔ གཟའ་ཚང་མི་མཐུན་དབྱེན་ཁས་ཕྱེ་བ་ཟློག༔ རིགས་རྒྱུད་མི་འཚོ་ཆུང་སྲིས་ཟ་བ་ཟློག༔ ནད་སྣ་རིམ་སྣ་གདོན་སྣ་ཟུག་པ་ཟློག༔ ཆགས་ཆེ་ཉམས་ང་བཀྲ་མི་ཤིས་པ་ཟློག༔ མོ་ངན་རྩིས་ངན་རྨི་ལམ་འཁྲུགས་པ་ཟློག༔ འགོ་བའི་ལྷ་སྲུང་ཕྲག་དོག་གདུག་རྩུབ་ཟློག༔ མདོར་ན་མི་འདོད་རྐྱེན་གྱི་དོགས་པ་ཀུན༔ ཁྲོ་རྒྱལ་འཁོར་བཅས་མཐུ་ནུས་སྟོབས་ཀྱིས་ཟློག༔ ཤ་ཁྲག་དམར་གྱི་གཏོར་མ་འདི་བཞེས་ལ༔ མི་མཐུན་དགྲ་བགེགས་བཟློག་པའི་ཕྲིན་ལས་མཛོད༔ ཞེས་དམར་གཏོར་འབུལ༔ རཀྟ་སྦྲེང༔ དར་ནག་གཡབ༔ དམོད་བཅོལ་བྱ༔ སྒོ་དབྱེ་ཞིང་ཟོར་འཕེན་པར་བྱའོ༔ མི་མཐུན་དགྲ་བགེགས་མ་ལུས་པ༔ རྡུལ་དུ་བརླགས་པའི་མཚོན་ཆའོ༔ ལས་འཕྲོ་ཅན་དང་འཕྲད་ནས་ཀྱང༔ དགྲ་བགེགས་སྒྲོལ་བའི་གྲོགས་སུ་ཤོག༔ ས་མ་ཡཱ༔ རྒྱ་རྒྱ་རྒྱ༔ ཅེས་པའང་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གསང་སྔགས་གླིང་པས་གནས་ལུང་དཔལ་གྱི་རི་བོའི་གཡས་ཟུར་བྲག་རི་སེང་ཆེན་འགྱིངས་འདྲའི་ལྟོ་བ་ནས་ཁྲོམ་གཏེར་དུ་གདན་དྲངས་པའོ༎ དགེ་ལེགས་འཕེལ།