དྲག་པོ་རྩང་གི་བསྐུལ་བཟློག
ཕུར་བ་གསང་བ་སྤུ་གྲི་ལས༔ དྲག་པོ་རྩང་གི་བསྐུལ་བཟློག་བཞུགས༔ ཧེ་རུ་ཀ་ལ་ཕྱག་འཚལ་ལོ༔ དྲག་པོ་རྩང་གི་བསྐུལ་བཟློག་འདི༔ ཡང་ཟབ་བཟློག་པའི་མདེའུ་སྟེ༔ གཏོར་མ་འགུགས་གཞུག་དྲག་ཏུ་བྱ༔ ཏིང་འཛིན་གསལ་བའི་ང་རྒྱལ་གྱིས༔ བྷྱོ༔ དང་པོ་རྩང་བྱུང་གང་ནས་བྱུང༔ རྩང་བྱུང་ལྷ་ཡི་ཡུལ་ནས་བྱུང༔ མ་ལ་ཡ་ཡི་རྩེ་མོ་རུ༔ བཅོམ་ལྡན་རྟ་ཕག་ཡབ་ཡུམ་གྱིས༔ མ་ཏྲཾ་རུ་ཏྲ་འདུལ་བའི་ཚེ༔ ཕུང་བྱེད་རུ་ཏྲའི་ཆས་རྣམས་ཀུན༔ ཡེ་ཤེས་ཆས་སུ་བྱིན་གྱིས་བརླབས༔ དེ་ཚེ་ཁོ་ཡི་རུས་རྩིབས་ལས༔ དྲག་པོའི་རྩང་ཕུར་ཟུར་གསུམ་བྱུང༔ བྷྱོ༔ བར་དུ་རྩང་བྱུང་གང་ནས་བྱུང༔ རྩང་བྱུང་གཉན་གྱི་ཡུལ་ནས་བྱུང༔ མཐུ་ཆེན་ཕྱག་ན་རྡོ་རྗེ་ཡིས༔ གཉན་རྗེ་མི་ཟན་དམར་པོ་ཉིད༔ རིགས་སྔགས་དམོད་པས་བསྒྲལ་བའི་ཚེ༔ ཁོ་ཡི་གཞུང་རུས་སྒལ་ཚིགས་ལས༔ གདུག་རྩུབ་དྲག་པོའི་རྩང་ཕུར་བྱུང༔ བྷྱོ༔ ཐ་མ་རྩང་བྱུང་གང་ནས་བྱུང༔ རྩང་བྱུང་ཀླུ་ཡི་ཡུལ་ནས་བྱུང༔ བྱ་ཁྱུང་རྒྱལ་པོ་གྷ་རུ་ཌས༔ མལ་དྲོས་ཀླུ་རིགས་བསྒྲལ་བའི་ཚེ༔ ཁོ་ཡི་པུས་མོའི་ལྷ་ང་ལས༔ གདུག་རྩུབ་དྲག་པོའི་རྩང་ཕུར་བྱུང༔ བྷྱོ༔ དེ་ནས་རྩང་བྱུང་གང་ནས་བྱུང༔ རྩང་བྱུང་ཤར་གྱི་ཕྱོགས་སུ་བྱུང༔ དཔལ་ཆེན་བཛྲ་ཧེ་རུ་ཀས༔ ལྷ་བུའི་བདུད་ཆེན་བསྒྲལ་བའི་ཚེ༔ ཁོ་ཡི་ཕྱག་མཚན་ཐོད་དབྱུག་ལས༔ གདུག་རྩུབ་དྲག་པོའི་རྩང་ཕུར་བྱུང༔ བྷྱོ༔ དེ་ནས་རྩང་བྱུང་གང་ནས་བྱུང༔ རྩང་བྱུང་ལྷོ་ཡི་ཕྱོགས་སུ་བྱུང༔ དཔལ་ཆེན་རཏྣ་ཧེ་རུ་ཀས༔ ཕུང་པོའི་བདུད་ཆེན་བསྒྲལ་བའི་ཚེ༔ ཁོ་ཡི་ལག་ངར་གཡས་པ་ལ༔ གདུག་རྩུབ་དྲག་པོའི་རྩང་ཕུར་བྱུང༔ བྷྱོ༔ དེ་ནས་རྩང་བྱུང་གང་ནས་བྱུང༔ རྩང་བྱུང་ནུབ་ཀྱི་ཕྱོགས་སུ་བྱུང༔ དཔལ་ཆེན་པདྨ་ཧེ་རུ་ཀས༔ ཉོན་མོངས་བདུད་ཆེན་བསྒྲལ་བའི་ཚེ༔ ཁོ་ཡི་དབུ་མའི་རྩ་རྒྱུས་ལས༔ གདུག་རྩུབ་དྲག་པོའི་རྩང་ཕུར་བྱུང༔ བྷྱོ༔ དེ་ནས་རྩང་བྱུང་གང་ནས་བྱུང༔ རྩང་བྱུང་བྱང་གི་ཕྱོགས་སུ་བྱུང༔ དཔལ་ཆེན་ཀརྨ་ཧེ་རུ་ཀས༔ འཆི་བདག་བདུད་ཆེན་བསྒྲལ་བའི་ཚེ༔ ཁོ་ཡི་ལག་གི་ཁྲམ་ཤིང་ལས༔ གདུག་རྩུབ་དྲག་པོའི་རྩང་ཕུར་བྱུང༔ བྷྱོ༔ དེ་ལྟར་བྱུང་ཚད་ཕྱོགས་བསྡུས་པས༔ རྩང་ཕུར་སུམ་ཅུ་སོ་བརྒྱད་བྱུང༔ མགོ་བོ་རྒྱ་མདུད་འཆང་ཟུང་དང༔ སྨད་ཆ་ཟུར་གསུམ་ཚུལ་དུ་བཞོག༔ དྲག་པོའི་གཏོར་ཟོར་ལྕགས་རི་ལ༔ དྲྭ་བ་དམར་ནག་བྲེས་ཤིང་བཙུགས༔ རྩང་ཕུར་རེ་རེའི་རྩ་རྩེ་ལས༔ ལས་བྱེད་ཕོ་ཉ་འབུམ་འབུམ་འགྱེད༔ མགོ་བོ་རྒྱ་མདུད་ནད་རླངས་འཕྲོ༔ སྐེད་པ་འཆང་ཟུང་དུག་ཆར་འབེབ༔ དབལ་རྩེ་མཚོན་གྱི་བུ་ཡུག་འཚུབས༔ བྱད་མའི་སྙིང་ལ་ཀཱི་ལ་ཡ༔ བྷྱོ༔ གདུག་པའི་རྩང་ཕུར་རེ་རེ་ལས༔ ཟ་བྱེད་ཕོ་ཉ་འབུམ་འབུམ་འགྱེད༔ གསོད་བྱེད་གཅན་གཟན་རྡུལ་ལྟར་འཚུབས༔ རྔམས་བྱེད་སྲིན་མོའི་དམག་གིས་གང༔ ཕྲ་ཐབས་ཚོགས་ནི་སེར་ལྟར་གཏིབས༔ ཕུར་སྐྱོང་བསྲུང་མ་གློག་ལྟར་འཁྱུགས༔ དབང་ཕྱུག་ཉེར་བརྒྱད་རྔམ་ཞིང་ཉུལ༔ གིང་ཆེན་བཅོ་བརྒྱད་གཟའ་ལྟར་རྒྱུ༔ མཁའ་འགྲོ་སོ་གཉིས་སྤྲིན་ལྟར་འདུ༔ སྤྲུལ་པ་ཡང་སྤྲུལ་སྟོང་གསུམ་གང༔ བྱད་མ་སྒྲོལ་བའི་དུས་ལ་བབ༔ གདུག་རྩུབ་རྩང་ཕུར་ཕོ་ཉའི་ཚོགས༔ ཁྱེད་ཀྱི་ཐུགས་དམ་དུས་ལ་བབ༔ བྷྱོ༔ བསྐུལ་ཞིང་དམིགས་པ་ཙམ་གྱིས་ནི༔ རྩང་ཕུར་ཤ་ཟ་ཧབས་སེ་ཧབ༔ རྩང་ཕུར་ཁྲག་འཐུང་ལྗིབས་སེ་ལྗིབ༔ རྩང་ཕུར་རུས་འཆའ་ཕྲོམས་སེ་ཕྲོམ༔ བཀྲེས་པའི་གླལ་བ་ཁྱུགས་སེ་ཁྱུག༔ སྐོམ་པའི་མིད་སྒྲ་ཁྲོགས་སེ་ཁྲོག༔ དགྲ་བོའི་སྟེང་དུ་ཆེར་རྔམས་ནས༔ ད་འགྲོ་གང་ཡིན་འུར་སྒྲ་སྒོག༔ དུས་ལ་བབ་པོ་རྩང་ཕུར་རྣམས༔ མ་གཡེལ་དགྲ་བོ་སྒྲོལ་བར་མཛོད༔ བྷྱོ༔ སྟོབས་དང་ལྡན་པའི་རྩང་ཕུར་རྣམས༔ ད་ནི་བཟློག་པའི་དུས་ལ་བབ༔ ཟ་བྱེད་གདོན་སྣ་ཉེར་གཅིག་ཟློག༔ འཇབ་བྱེད་བླ་རྐུན་རྣམ་བཞི་ཟློག༔ སྲོག་གཅོད་གཤིན་རྗེའི་བསུན་མ་ཟློག༔ ནག་པོ་བདུད་ཀྱི་ཁྲམ་སྣ་ཟློག༔ མ་མོའི་ནད་རྐྱལ་ཁ་ཕྱེ་ཟློག༔ བཙན་གྱི་ཤྭ་ལ་འགྲིམ་པ་ཟློག༔ ཐེའུ་རིང་རྩིས་ལ་འདེབས་པ་ཟློག༔ འགོང་པོས་ཟ་ཁ་སྟོན་པ་ཟློག༔ ཀླུ་ཡིས་དུག་རླངས་འགྱེད་པ་ཟློག༔ འགྲོ་ལམ་རྩང་བཞིན་འཛུག་པ་ཟློག༔ ཟ་ལམ་དུག་གཡོས་བྱེད་པ་ཟློག༔ སྔོན་ནས་གསོད་ཟེར་འགུགས་པ་ཟློག༔ རྗེས་ནས་གཅོད་ཟེར་འདེད་པ་ཟློག༔ དམག་དང་ཇག་པས་གཡུལ་འདེབས་ཟློག༔ ཁྲམ་དང་གཡོ་སྒྱུའི་སྐོར་མགོ་ཟློག༔ རྐུས་དང་མ་ཉེས་ཁ་ཡོག་ཟློག༔ གདུལ་བྱ་སྙན་གྲགས་འགགས་པ་ཟློག༔ མེ་ལ་སྦྱིན་སྲེག་འདེབས་པ་ཟློག༔ རླུང་ལ་འཁོར་ལོ་བསྐོར་བ་ཟློག༔ ཆུ་ལ་ཀླུ་གཏད་བྱེད་པ་ཟློག༔ ས་ལ་མནན་གཏད་བྱེད་པ་ཟློག༔ ནད་སྣ་རིམས་སྣ་ཟུག་པ་ཟློག༔ ཁ་མཆུ་མི་ཁ་ཕོག་པ་ཟློག༔ སྡེ་བརྒྱད་ཐན་ལྟས་གཏོང་བ་ཟློག༔ རྣམ་རྟོག་ཆོ་འཕྲུལ་འགྱེད་པ་ཟློག༔ མི་མཐུན་ཕྱོགས་རྣམས་མ་ལུས་ཟློག༔ བྷྱོ༔ དཔལ་གྱི་བཀའ་སྡོད་ཕོ་ཉའི་ཚོགས༔ ཁྱོད་ཀྱི་ཐུགས་དམ་དུས་ལ་བབ༔ གདུག་པའི་རྩང་ཕུར་རེ་རེ་ལས༔ རྣལ་འབྱོར་ཏིང་ངེ་འཛིན་གྱི་འཕྲུལ༔ ཁྲ་ཐབས་ཕོ་ཉ་འབུམ་འབུམ་འཕྲོ༔ དགྲ་བགེགས་སྙིང་ལ་ཀཱི་ལ་ཡ༔ ཕྱི་ནི་རྒྱུ་མའི་ཞགས་པས་བཅིང༔ མ་མོའི་རིམས་གཟེར་དབུགས་ཀྱིས་བཀང༔ བྱད་མ་འཁོར་དང་བཅས་པ་རྣམས༔ བྱད་མ་འཁོར་དང་བཅས་པ་རྣམས༔ རིམས་ཡམས་འབྲུམ་བུ་ལ་སོགས་པས༔ གཅིག་ཀྱང་མ་ལུས་མྱོས་པར་གྱིས༔ ཚོན་སྐུད་སྣ་ལྔས་མཐའ་ནས་བསྡམས༔ བདུད་བཙན་ཀླུ་གཉན་གཤིན་རྗེ་ལྔས༔ སྟོང་གསུམ་བྱད་ཀྱི་ཐག་པ་སྟེ༔ བྱད་མ་འཆིང་ཞིང་རེངས་པར་གྱིས༔ ཆོས་འབྱུང་ཟུར་གསུམ་དྲྭ་མིག་འབར༔ ལས་ཀྱི་གཤིན་རྗེའི་བཤན་ཁང་སྟེ༔ བྱད་མ་འཆོར་མེད་གཟིར་དུ་ཆུགས༔ སྟོད་ལ་དུག་ཁྲག་དམར་པོས་བྱུག༔ གཟའ་ནད་འཐིབ་པའི་ངར་བཏགས་པས༔ བྱད་མ་གཟའ་དང་གདོང་ཐུག་སྤྲོད༔ སྨད་དབལ་རོ་སོལ་ནག་པོས་བྱུགས༔ ཀླུ་ནད་མཛེ་ཡིས་ངར་བཏགས་པས༔ བྱད་མ་ཀླུ་ཡིས་འཆོར་མེད་སྡོམས༔ མཚེ་ཡུངས་སྐེ་ཚེ་ཤིང་ཚེས་བརྒྱན༔ སྡེ་བརྒྱད་དྲེགས་པའི་མཚོན་ཆར་འབར༔ བྱད་མ་སྡེ་བརྒྱད་གཡུལ་ཟས་གྱིས༔ རྡོ་དཀར་རྡོ་ནག་ཟངས་ལྕགས་ཐུན༔ ཁྲོ་ཆུང་མེ་ཡི་ཚྭ་ཚྭ་འཕྲོས༔ བྱད་མ་དམ་ཉམས་རྡུལ་དུ་རླགས༔ དུས་ལ་བབ་པོ་རྩང་ཕུར་རྣམས༔ བྱད་མ་གཟུགས་མེད་དགྲ་བགེགས་ཀུན༔ བཟློག་ཅིང་བསྒྱུར་བའི་ཕྲིན་ལས་མཛོད༔ ས་མ་ཡཱ༔ རྒྱ་རྒྱ་རྒྱ༔ ཅེས་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་རིག་འཛིན་གསང་སྔགས་གླིང་པས་མཁའ་སྤྱོད་གནས་ལུང་དཔལ་གྱི་རི་བོ་ནས་གདན་དྲངས་པའོ༎