ཕྱི་ནང་སྒོ་དབྱེ།
ཕུར་བ་གསང་བ་སྤུ་གྲི་ལས༔ ཕྱི་ནང་སྒོ་དབྱེ་བཞུགས༔ ཛ༔ དཔལ་ཆེན་རྡོ་རྗེ་གཞོན་ནུ་ཡི༔ ཕོ་བྲང་ཕྱི་ཡི་སྒོ་བསྲུང་ནི༔ ཤར་ཕྱོགས་རྒྱལ་པོ་ཡུལ་འཁོར་བསྲུང༔ དྲི་ཟ་འབུམ་གྱི་ཚོགས་དང་བཅས༔ མཆོད་སྦྱིན་གཏོར་མ་འདི་བཞེས་ལ༔ གཏོར་མའི་ཟོར་ལམ་ཤར་དུ་ཕྱེས༔ ཧཱུྃ༔ ལྷོ་ཕྱོགས་རྒྱལ་པོ་འཕགས་སྐྱེས་པོ༔ གཤིན་རྗེ་འབུམ་གྱི་ཚོགས་དང་བཅས༔ མཆོད་སྦྱིན་གཏོར་མ་འདི་བཞེས་ལ༔ གཏོར་མའི་ཟོར་ལམ་ལྷོ་རུ་ཕྱེས༔ བཾ༔ ནུབ་ཕྱོགས་རྒྱལ་པོ་མིག་མི་བཟང༔ ཀླུ་དབང་འབུམ་གྱི་ཚོགས་དང་བཅས༔ མཆོད་སྦྱིན་གཏོར་མ་འདི་བཞེས་ལ༔ གཏོར་མའི་ཟོར་ལམ་ནུབ་དུ་ཕྱེས༔ ཧོ༔ བྱང་ཕྱོགས་རྒྱལ་པོ་རྣམ་ཐོས་སྲས༔ གནོད་སྦྱིན་འབུམ་གྱི་ཚོགས་དང་བཅས༔ མཆོད་སྦྱིན་གཏོར་མ་འདི་བཞེས་ལ༔ གཏོར་མའི་ཟོར་ལམ་བྱང་དུ་ཕྱེས༔ ཧཱུྃ༔ མཚམས་བཞིར་རང་རང་ཕྱོགས་སྐྱོང་བ༔ མེ་ལྷ་སྲིན་པོ་རླུང་ལྷ་དང༔ དབང་ལྡན་ལ་སོགས་དྲེགས་པའི་ཚོགས༔ ཡུལ་འདིའི་གཞི་བདག་འཁོར་བཅས་རྣམས༔ མཆོད་སྦྱིན་གཏོར་མ་འདི་བཞེས་ལ༔ ཟོར་ལམ་ཕྱོགས་མཚམས་ཀུན་ཏུ་ཕྱེས༔ ཅེས་གསེར་སྐྱེམས་དང་གཏོར་མ་འབུལ༔ ནང་གི་སྒོ་དབྱེ་ནི༔ དཔལ་འབར་གྱིས་གཏོར་མའི་མདོས་ཐག་བཅད་ལ༔ ཧཱུྃ༔ ཕོ་བྲང་ཤར་གྱི་སྒོ་མ་ནི༔ པུ་ཤུད་མགོ་ཅན་ལྕགས་ཀྱུ་འཛིན༔ ཤར་ཕྱོགས་ཞི་བའི་སྒོ་ཕྱེས་ལ༔ ནད་གདོན་ཞི་བའི་ཕྲིན་ལས་མཛོད༔ ཕོ་བྲང་ལྷོ་ཡི་སྒོ་མ་ནི༔ སྐྱ་ཀའི་མགོ་ཅན་ཞགས་པ་འཛིན༔ ལྷོ་ཕྱོགས་རྒྱས་པའི་སྒོ་ཕྱེས་ལ༔ ཚེ་བསོད་དཔལ་འབྱོར་རྒྱས་པར་མཛོད༔ ཕོ་བྲང་ནུབ་ཀྱི་སྒོ་མ་ནི༔ སྲིན་བྱའི་མགོ་ཅན་ལྕགས་སྒྲོག་འཛིན༔ ནུབ་ཕྱོགས་དབང་གི་སྒོ་ཕྱེས་ལ༔ ཁམས་གསུམ་དབང་དུ་འདུ་བར་མཛོད༔ ཕོ་བྲང་བྱང་གི་སྒོ་མ་ནི༔ ཁྲ་ཡི་མགོ་ཅན་དྲིལ་བུ་འཛིན༔ བྱང་ཕྱོགས་དྲག་པོའི་སྒོ་ཕྱེས་ལ༔ གནོད་བྱེད་དགྲ་བགེགས་རྡུལ་དུ་རློགས༔ སྒོ་བས་སྒོ་ཕྱེས་ཤ་ར་ར༔ འཕྲང་བས་འཕྲང་སོལ་སི་ལི་ལི༔ གཏོར་མའི་དབལ་ཟོར་ད་ལ་ལ༔ ཁྲ་ཐབས་ལས་བྱེད་ཁྱུགས་སེ་ཁྱུགས༔ དྲག་པོའི་དམག་གཡོས་དཔུངས་སེ་དཔུང༔ དགྲ་བགེགས་ཐལ་བ་རྡུལ་དུ་རློགས༔ བཅོལ་པའི་ཕྲིན་ལས་གྲུབ་པར་མཛོད༔ དེ་ནས་ཟོར་འཕེན་པ་ནི༔ སྨན་དང་རཀྟ་བདུད་རྩིས་བྲན་ཅིང་ཟོར་བསྒྲིགས་ལ༔ སྔགས་པས་ཞྭ་ནག་སོགས་ཆས་གྱོན་ལ༔ གསེར་སྐྱེམས་ཐོགས་ཏེ༔ རཾ་ཡཾ་ཁཾ༔ ཨོཾ་ཨཱ༔ཧཱུྃ༔ རྩ་རྒྱུད་བླ་མ་ཡི་དམ་ཞི་ཁྲོའི་ལྷ༔ དཔའ་བོ་མཁའ་འགྲོ་དམ་ཅན་བསྲུང་མར་བཅས༔ ཁྱད་པར་རྡོ་རྗེ་གཞོན་ནུའི་ལྷ་ཚོགས་རྣམས༔ གསེར་སྐྱེམས་འདི་བཞེས་དགྲ་བགེགས་སྟེང་དུ་ཆས༔ ཕུར་བསྲུང་བཅུ་གཉིས་བསེ་ལྕགས་དུང་གསུམ་དང༔ ཁྲ་ཐབས་ཉི་ཤུ་དབང་ཕྱུག་ཉེར་བརྒྱད་བཅས༔ མཁའ་འགྲོ་སོ་གཉིས་གིང་ཆེན་བཅོ་བརྒྱད་ཚོགས༔ ཀེའུ་སེང་མཁའ་འགྲོ་དཀར་མོ་ཉི་ཟླ་རྣམས༔ གསེར་སྐྱེམས་འདི་བཞེས་ཁྲོ་འཁྲུགས་སྐུར་བཞེངས་ལ༔ དགྲ་བགེགས་བྱད་མའི་སྟེང་དུ་དམག་ལ་ཆས༔ དྲེགས་པ་སྡེ་བརྒྱད་མགུར་ལྷ་བསྟན་མ་དང༔ ཡུལ་ལྷ་གཞི་བདག་དབེན་རིའི་བསྲུང་མ་རྣམས༔ བྱད་མ་སྒྲོལ་ཕྱིར་ཟོར་གྱི་དམག་ལ་ཆས༔ བི་ན་ཡ་ག་ལ་སོགས་བགེགས་རིགས་དང༔ མི་ནད་ཕྱུགས་ནད་རིམས་ཡམ་སྣ་འདྲེན་རྣམས༔ ཐན་བདག་འགོང་པོ་སྣང་སྲིད་ལྷ་འདྲེའི་ཚོགས༔ གསེར་སྐྱེམས་འདི་བཞེས་དེ་རིང་དམག་ལ་ཆས༔ ཟོར་འདི་མ་ཡོ་མ་ནོར་དགྲ་བོའི་སྟེང༔ སྣང་སྲིད་ལྷ་འདྲེ་རྣམས་ཀྱི་སྣ་ཁྲིད་ཀྱིས༔ སྡེ་བརྒྱད་དྲེགས་པའི་དམག་གི་དཔུང་བསྐྱེད་ལ༔ ཕུར་བསྲུང་ཁྲ་ཐབས་ཚོགས་ཀྱི་གཏོར་ཟོར་འདི༔ སྤྲིན་མེད་མཁའ་ནས་གནམ་ལྕགས་ཐོག་བབས་བཞིན༔ བྱད་མ་འཁོར་དང་བཅས་པའི་སྟེང་དུ་རྒྱོབ༔ འགོ་བའི་ལྷ་ཕྲོལ་དཔུང་གི་གཉེན་འདུན་སོད༔ བསམ་པའི་སྙིང་ཕྱུངས་རྙབ་པའི་ལག་པ་ཆོད༔ ཕུང་ཁམས་རྩ་རླུང་ཐིག་ལེའི་རྒྱ་རལ་ཆུགས༔ ཆུང་མ་སྨྱོར་ཆུག་བུ་ཚ་གྲི་རུ་སོད༔ འགྲོགས་པའི་གཉེན་ཕྱེས་འོག་གི་རྟ་རྐང་ཆོག༔ རྡོ་རྗེ་གཞོན་ནུའི་ལྷ་ཚོགས་བསྙེན་བསྒྲུབ་ནས༔ ཕུར་བསྲུང་དམ་ཅན་བརྟེན་ཅིང་མཆོད་པ་ལ༔ འབྲས་བུ་ཡོད་མེད་དེ་རིང་ལས་འདིས་ཤེས༔ དེ་ཕྱིར་རྡོ་རྗེ་གཞོན་ནུའི་བཀའ་འཁོར་དང༔ ཕུར་སྐྱོང་དམ་ཅན་ཚོགས་རྣམས་མ་གཡེལ་བར༔ མིང་བྱང་གཟུགས་ལ་བཀོད་པའི་དགྲ་དང་བགེགས༔ དམིགས་ཤིང་ཞེ་ལ་བརྣག་པའི་བྱད་མ་འདིའི༔ ཚེ་བླ་སྲོག་དང་ཡིད་འགྱུའི་རྣམ་ཤེས་ཉིད༔ དོ་ནུབ་ཉི་མ་ནུབ་དང་དུས་མཉམ་ལ༔ ཁ་རྗེ་དབང་ཐང་བཅས་པ་རྡུལ་དུ་རློགས༔ ད་རེས་ཕུར་བསྲུང་དམ་ཅན་ཁྱེད་བསྐུལ་བས༔ ལས་འདི་ཞག་གཅིག་ཙམ་ཡང་མ་འགྱང་བར༔ འགྲོ་བ་ཀུན་གྱི་དབང་པོའི་མངོན་སུམ་དུ༔ རྟགས་དང་མཚན་མ་ཆོ་འཕྲུལ་སྣ་དགུ་ཐོངས༔ བླ་སྲོག་རྣམ་ཤེས་མར་མེ་བསད་པ་བཞིན༔ དྲག་ཤུལ་མཐུ་ཡིས་སྐད་ཅིག་ཐལ་བར་རློགས༔ ཉེས་ཞིག་མེད་ན་ངེད་ཀྱིས་མི་བསྐུལ་གྱིས༔ ཕུར་བསྲུང་དམ་ཅན་ཚོགས་ཀྱིས་ར་མདའ་ལྡོག༔ ལོ་ཟླ་ཇི་སྲིད་ཞག་ལ་མ་འགྱང་བར༔ ནམ་ཕྱེད་འབྱུང་བ་ཆུ་ཡང་གཉིད་ལོག་གིས༔ དུས་དེར་དགྲ་བོའི་བླ་ཡིད་ཁུག་ལ་སྒྲོལ༔ རྒྱུ་འབྲས་ལས་དབང་བཙན་ཞེས་སྙད་མ་འདོགས༔ སྔོན་གྱི་ལས་འཕྲོ་ཡིན་ཟེར་བཤོལ་མ་འདེབས༔ སྲོག་གི་ལན་ཆགས་ཡིན་ཟེར་ལས་མ་གཡེལ༔ ལོ་དང་ཟླ་བར་འགྱངས་བའི་དུས་མ་འདེབས༔ དོ་ནུབ་ཉི་མའི་གུང་ཐུན་འདི་ཉིད་ལ༔ བྱད་མ་དགྲ་བགེགས་སྟེང་དུ་ཟོར་ལ་ཡ༔ ཕ་མ་བུ་རྟ་སྒོ་ནོར་ཕྱུགས་དང་བཅས༔ དགུན་གྱི་སྤང་རི་མེ་ཡིས་གཞོམ་པ་བཞིན༔ འཁོར་སློབ་འབངས་བཅས་ཁ་ཕུང་རྗེས་མེད་ཐོངས༔ ཐུགས་དམ་དུས་ལ་བབ་པོ་ས་མ་ཡཱ༔ ཅེས་གསེར་སྐྱེམས་མཆོད༔ གཟུ་དཔང་ནི༔ ཧཱུྃ༔ མི་མངོན་དབྱིངས་ན་བཞུགས་པ་ཆོས་ཀྱི་སྐུ༔ གང་འདུལ་ལོངས་སྐུ་སྣ་ཚོགས་སྤྲུལ་པའི་སྐུ༔ སྐུ་གསུམ་བརྒྱུད་པའི་བླ་མ་གཟུ་དང་དཔང་༔ བཞི་བཅུ་རྩ་གཉིས་ཞི་བའི་ལྷ་ཚོགས་དང༔ ཆེ་མཆོག་ལ་སོགས་ཁྲག་འཐུང་ཁྲོ་བོའི་ཚོགས༔ རྒྱུད་སྡེ་བཞི་དང་ཐེག་པ་རིམ་དགུའི་ལྷ༔ ཁྱད་པར་ཕུར་པའི་ལྷ་ཚོགས་གཟུ་དང་དཔང༔ གནས་ཡུལ་ཞིང་སྐྱོང་མཁའ་འགྲོའི་ཚོགས་རྣམས་དང༔ ཕོ་རྒྱུད་མོ་རྒྱུད་གཉིས་མེད་མ་ནིང་རྒྱུད༔ རྒྱུད་གསུམ་དྲེགས་པ་སྡེ་བརྒྱད་ཚོགས་རྣམས་དང༔ ཁྱད་པར་ཕུར་སྐྱོང་བསྲུང་མ་གཟུ་དང་དཔང༔ ངས་ནི་མ་ཉེས་ཉམས་ཆུང་ཚུལ་བཟུང་སྟེ༔ དབེན་པའི་གནས་བརྟེན་དཀོན་མཆོག་སྐྱབས་ཚོལ་ཞིང༔ ཚེ་གཅིག་སངས་རྒྱས་བསྒྲུབ་པར་དམ་བཅས་ཀྱང༔ བྱད་མ་དགྲ་བགེགས་འདི་ཡིས་མ་སྟེར་རོ༔ ས་ལ་བྱི་ལྟར་འཛུལ་ཀྱང་དེད་ནས་བྱུང༔ གནམ་ལ་བྱ་ལྟར་འཕུར་ཡང་དེད་ནས་བྱུང༔ ཆུ་ལ་ཉ་ལྟར་འཕྱོ་ཡང་དེད་ནས་བྱུང་༔ རྣལ་འབྱོར་ང་ཡི་འཁོར་སློབ་གཡོག་དང་བཅས༔ མི་བསད་ནོར་ཕྲོག་རྐུས་དང་མ་མཆུ་བྱེད༔ བཙན་བཙུག་གླེང་འདེབས་ཉེས་མེད་ཁྲིམས་ཀྱིས་མནར༔ མཐོང་ན་སྡང་མིག་ཐོས་ན་རྣ་བ་འགེབ༔ ཡོད་ན་དགྲ་བརྒྱབ་མེད་ན་སྐྱུག་བྲོ་བལྟ༔ མཐུ་གཏད་མདོ་སྒྲུབ་རླུང་འཁོར་བསྲེག་མནན་བྱེད༔ མུ་སྟེགས་ངན་སྔགས་ཨ་ཙར་མིག་འཕྲུལ་སྟོན༔ མ་ཉེས་ཤག་འདེབས་རྔོན་རྒྱ་ཆོས་ཁྲིམས་བཤིགས༔ དམ་ཉམས་འདི་ཡིས་མ་ཉེས་གཅིག་ཀྱང་མེད༔ སངས་རྒྱས་བསྟན་པ་སྨད་ནས་བླ་བཙོང་ཞིང༔ དཔལ་ལྡན་བླ་མ་དམ་པའི་སྐུ་ལ་བརྡོ༔ རྒྱལ་ཁམས་ཡོངས་ལ་འཚེ་ཞིང་གནོད་པ་བྱེད༔ བསྒྲལ་བའི་ཞིང་བཅུ་དངོས་སུ་ཚང་བས་ན༔ ཕུར་པའི་ལྷ་ཚོགས་ཐུགས་དམ་གནད་ནས་བསྐུལ༔ མ་གཡེལ་གཏུམ་དྲག་རྔམས་པའི་སྐུར་བཞེངས་ལ༔ དེ་རིང་འཕང་བ་ཟོར་གྱི་ལས་མཐའ་འདིས༔ དགྲ་ཁམས་ཆམ་ལ་དབབ་པའི་ཕྲིན་ལས་མཛོད༔ དེ་ནས་ཟོར་བསྐུལ་ནི༔ དམར་གཏོར་བཤམས་ཏེ་རཀྟ་བྲན་ལ༔ ཧཱུྃ༔ སྔོན་ནས་བསྒྲུབ་བསྒྲུབ་བསྙེན་ཅིང་སྙིང་ནས་བརྟེན༔ བར་དུ་གྲུབ་པའི་འབྲས་བུ་དངོས་སུ་བརྙེས༔ ཐ་མ་ལས་བཞིའི་ཕྲིན་ལས་རབ་འབྱམས་བདག༔ ད་ནི་བྱད་མ་སྒྲོལ་བའི་དུས་ལ་བབ༔ བྷྱོ༔ དཔལ་ཆེན་རྡོ་རྗེ་གཞོན་ནུ་ཡབ་དང་ཡུམ༔ སྲས་མཆོག་རིགས་བཞིའི་ལྷ་ཚོགས་དབྱིངས་ནས་བཞེངས༔ ཁྲོ་བཅུ་ཡབ་ཡུམ་ཁྲ་ཐབས་ཕོ་ཉའི་ཚོགས༔ བཀའ་སྡོད་སྤྲུལ་པའི་ལྷ་ཚོགས་སྐུར་བཞེངས་ཤིག༔ ཁྱོད་ཐུགས་ཆོས་ཉིད་ཞི་ལས་མ་གཡོས་ཀྱང༔ དེ་རིང་བསྟན་འགྲོའི་སྤྱི་དགྲ་དམ་སྲིའི་རིགས༔ རྣལ་འབྱོར་བདག་ལ་སྒོས་སུ་སྡང་བྱེད་པའི༔ ལོག་འདྲེན་བྱད་མ་དགྲ་བགེགས་སྒྲོལ་བའི་ཕྱིར༔ སྐུ་ཡི་རྩལ་ཕྱུངས་གསུང་གི་ནུས་པ་བསྐྱེད༔ ཐུགས་ཀྱི་ཁྲོ་གཏུམ་མི་བཟད་དྲག་ཤུལ་ཕྱུངས༔ དོ་ནུབ་དགྲ་ལ་དྲག་པོའི་ཟོར་འཕེན་པས༔ མིང་དང་རིགས་འདྲ་རུས་སོགས་མ་ནོར་བར༔ དམིགས་པའི་ཡུལ་གྱུར་དགྲ་བོའི་སྟེང་དུ་རྒྱོབ༔ ཚ་བའི་མེ་ཟོར་དམར་པོ་ཤ་ར་ར༔ གྲང་བའི་ཆུ་ཟོར་དུག་ཁྲག་ཐོ་རོ་རོ༔ གཡབ་པའི་རླུང་ཟོར་འཚུབས་མ་ཡུགས་སེ་ཡུག༔ ཀོང་གི་ས་ཟོར་རི་ལྟར་ཉི་ལི་ལི༔ སྔགས་ཀྱི་མཚོན་ཟོར་རྣོ་དབལ་ཏ་ལ་ལ༔ འཕེན་པའི་རྡོ་ཟོར་ཐོག་ལྟར་ཡེ་རེ་རེ༔ བསད་པའི་མཚོན་ཟོར་རྣོ་ངར་ཟིངས་སེ་ཟིང༔ དྲག་པོའི་ཡུངས་ཟོར་སེར་ལྟར་རི་ལི་ལི༔ ནམ་མཁའི་སྒོང་ཟོར་ཐོག་ལྟར་རྦད་དེ་རྦད༔ རྣོ་བའི་མདའ་ཟོར་ཚ་ངར་རྦུད་དེ་རྦུད༔ ཁྲག་ཟོར་དམར་པོ་ཆར་ལྟར་སི་ལི་ལི༔ མཚེ་ཡི་ཐུན་ཟོར་རྦབ་ལྟར་ཧྲི་ལི་ལི༔ དྲེགས་པའི་གཏོར་ཟོར་གཟའ་ལྟར་ཡ་ལ་ལ༔ དཔལ་གྱི་གཏོར་ཟོར་དྲག་པོ་ཆེམས་སེ་ཆེམ༔ རྣལ་འབྱོར་ཏིང་འཛིན་དབལ་ཟོར་ཏ་ལ་ལ༔ རྩང་ཟོར་དབལ་ལྡན་མདའ་ལྟར་སྤྲིངས་སེ་སྤྲིང༔ སྣ་ཚོགས་ཐུན་གྱི་ཟོར་རྫས་ཐ་ར་ར༔ དེ་རིང་ཕུར་པའི་ལྷ་ཚོགས་དམག་ལ་ཆས༔ དགྲ་བོའི་ཁམས་ལྔ་དབང་ལྔ་རྡུལ་དུ་རློགས༔ ཀེའུ་སེང་མ་མོ་བཅུ་དྲུག་ཟོར་ལ་ཆས༔ དགྲ་བོའི་ཚོགས་བརྒྱད་ཡུལ་བརྒྱད་རྔམས་ཟས་ཀྱིས༔ གནས་ཡུལ་མཁའ་འགྲོ་སོ་གཉིས་ཟོར་ལ་ཆས༔ དགྲ་བོའི་ཤ་ཁྲག་རུས་གསུམ་དུམ་བུར་ཐོངས༔ གསོད་བྱེད་གིང་ཆེན་བཅོ་བརྒྱད་ཟོར་ལ་ཆས༔ བྱད་མའི་ཁམས་ཆེན་བཅོ་བརྒྱད་དཔའ་ཟས་རོལ༔ སྤྲུལ་པའི་ཁྲ་ཐབས་ཉི་ཤུ་ཟོར་ལ་ཆས༔ ཕྱོགས་བཅུའི་དམ་ཉམས་བྱད་མ་བརླག་པར་མཛོད༔ དབང་ཕྱུག་ཉི་ཤུ་རྩ་བརྒྱད་ཟོར་ལ་ཆས༔ དགྲ་བོའི་རྒལ་ཚིགས་ཉེར་བརྒྱད་ཞལ་དུ་སྟོབས༔ མཐུ་ཆེན་མ་མོ་བཅུ་གཉིས་ཟོར་ལ་ཆས༔ དགྲ་བོའི་ལྷུ་ཆེན་བཅུ་གཉིས་ཁམས་ཟས་ཀྱིས༔ བསེ་ལྕགས་དུང་གི་སྐྱེས་བུ་ཟོར་ལ་ཆས༔ བྱད་མའི་ཤ་ཁྲག་རུས་གསུམ་ཟས་སུ་ཟོ༔ གཏེར་བསྲུང་དཀར་མོ་ཉི་ཟླ་ཟོར་ལ་ཆས༔ དགྲ་བོའི་མོ་རྒྱུད་སྐྱེ་བ་མངལ་ནས་སྐོམས༔ བདུད་རྒྱལ་ཐོད་པའི་ཕྲེང་ཅན་ཟོར་ལ་ཆས༔ དགྲ་བོའི་ཕོ་རྒྱུད་སྐྱེས་པ་རྩད་ནས་ཆོད༔ སྤྲུལ་འཁོར་ལྷ་སྲིན་སྡེ་བརྒྱད་ཟོར་ལ་ཆས༔ དགྲ་བོའི་ནོར་རྫས་དྲེགས་པའི་གཡུལ་ཟས་ཀྱིས༔ གཉུག་གནས་ཡུལ་ལྷ་གཞི་བདག་ཟོར་ལ་ཆས༔ དགྲ་བོའི་ཟས་ནོར་ཐམས་ཅད་ལོངས་སྤྱོད་ཀྱིས༔ སྣང་སྲིད་ལྷ་འདྲེ་ཐམས་ཅད་ཟོར་ལ་ཆས༔ དགྲ་བོའི་གནས་ཁང་ལྷ་འདྲེའི་འདུ་གནས་ཀྱིས༔ དེ་རིང་དྲག་པོའི་གཏོར་ཟོར་འདི་འཕེན་པས༔ སྟེང་ཕྱོགས་མཐོ་ལ་འདུག་ཚད་ཞབས་བསྐུམས་ཤིག༔ འོག་ཕྱོགས་དམའ་ལ་གནས་ཚད་དབུ་ཐུམས་ཤིག༔ ཕྱོགས་མཚམས་བར་ན་གནས་ཚད་སྐུ་བཟུར་ལ༔ ཟོར་ལམ་མ་ཡོ་དགྲ་བོའི་སྟེང་དུ་བསྒྱུར༔ གནམ་ལྕགས་ཐོག་གིས་ས་མཁར་གཏོར་བའམ༔ རྩྭ་ཕུང་སྐམ་པོར་མེ་རི་མཆེད་པ་བཞིན༔ བྱད་མ་དགྲ་བགེགས་མི་ནོར་འཁོར་བཅས་རྣམས༔ མིང་གི་ལྷག་མ་ཙམ་ཡང་མ་ལུས་པར༔ ཐལ་བ་རྡུལ་དུ་བརླག་པའི་ཕྲིན་ལས་མཛོད༔ ཕྲིན་ལས་དྲག་ཏུ་བསྐུལ་ལོ༔ ས་མ་ཡཱ༔ ཞེས་དར་ནག་གཡབ༔ དམར་སྦྲེང༔ དམོད་བཅོལ་དྲག་ཏུ་བྱ༔ འདིས་ནི་གང་ལ་དམིགས་པ་རྣམས་ཞག་གསུམ་ཚུན་ཐོགས་མེད་དུ་འགྱུར་རོ༔ ས་མ་ཡཱ༔ དེ་ནས་སྔགས་པས་འཆམས་སྟབས་དང་བསྟུན་ཏེ༔ མེ་ཟོར་ཐོགས་ལ༔ བྷྱོ༔ དཔལ་ཆེན་རྡོ་རྗེ་གཞོན་ནུ་ཡི༔ ཕོ་ཉ་རྔམས་པ་གློག་ལྟར་འཁྱུགས༔ ཕྱག་ན་ཚ་བའི་མེ་ཟོར་བསྣམས༔ དམ་ཉམས་དགྲ་བོའི་སྙིང་ལ་རྒྱོབ༔ རྩ་སྔགས་ཤམ། དགྲ་བགེགས་བྱད་མ་ཛྭ་ལ་རཾ་ཟོར་ཡ་ཟོར་ཡ༔ ཆུ་ཟོར་ཐོགས་ལ། བྷྱོ༔ རྡོ་རྗེ་གཞོན་ནུའི་བཀའ་ཉན་པ༔ ཀཽ་རི་ལ་སོགས་མ་བརྒྱད་ཀྱིས༔ ཕྱག་ན་གྲང་བའི་ཆུ་ཟོར་བསྣམས༔ བྱད་མའི་སྟེང་དུ་མ་ར་ཡ༔ རྩ་སྔགས་ཤམ། ཁཾ་བྷི་ཡ་ཤུདྡྷེ་ཟོར་ཡ་ཟོར་ཡ༔ རླུང་ཟོར་ཐོགས་ལ༔ བྷྱོ༔ ཁྲོ་རྒྱལ་ཆེ་མཆོག་བཀའ་ཉན་པ༔ སེང་ཧ་ཕྲ་མེན་རྣམ་བརྒྱད་ཀྱིས༔ ཕྱག་ན་གཡབ་པའི་རླུང་ཟོར་ཐོགས༔ དགྲ་བགེགས་ལས་རླུང་རྟ་ལ་སྐྱོན༔ སྔགས་ཤམ། ཡཾ་ཡཾ་མ་ར་ཡ་རྦད༔ ཀོང་ཟོར་ཐོགས་ལ༔ བྷྱོ༔ དཔལ་གྱི་བཀའ་ཉན་ལས་བྱེད་མ༔ གནས་གསུམ་མཁའ་འགྲོ་སོ་གཉིས་ཀྱིས༔ ཕྱག་ན་ཀོང་གི་ས་ཟོར་ཐོགས༔ དམ་ཉམས་དགྲ་བོའི་སྟེང་དུ་རྒྱོབ༔ རྩ་སྔགས་ཤམ། མ་ར་ཡ་རྦད་བྷྱོ༔ རྡོ་ཟོར་ཐོགས་ལ༔ བྷྱོ༔ ཕུར་བའི་བཀའ་སྡོད་ཕྲིན་ལས་བདག༔ རྡོ་རྗེའི་གིང་ཆེན་བཅོ་བརྒྱད་ཀྱིས༔ ཕྱག་ན་འཕེན་པའི་རྡོ་ཟོར་ཐོགས༔ དམ་ཉམས་དགྲ་བོའི་སྙིང་ལ་རྒྱོབ༔ སྔགས་ཤམ། མ་ར་ཡ་རྦད༔ གཏོར་ཟོར་ཐོགས་ལ༔ བྷྱོ༔ དཀྱིལ་འཁོར་ཆེན་པོའི་མུ་རན་སྐྱོང༔ དབང་ཕྱུག་ཉི་ཤུ་རྩ་བརྒྱད་ཀྱིས༔ ཕྱག་ན་སྔགས་ཀྱི་གཏོར་ཟོར་ཐོགས༔ དགྲ་བོའི་ལུས་ཀྱི་དཀྱིལ་དུ་རྒྱོབ༔ སྔགས་ཤམ། མ་ར་ཡ་རྦད༔ མཚོན་ཟོར་ཐོགས་ལ༔ བྷྱོ༔ ཁྲོ་བཅུ་ཡབ་ཡུམ་སྤྲུལ་པ་ལས༔ ལས་མཁན་ཁྲ་ཐབས་ཉི་ཤུ་ཡི༔ ཕྱག་ན་སྣ་ཚོགས་མཚོན་ཟོར་ཐོགས༔ དགྲ་བོ་འཁོར་བཅས་སྟེང་དུ་རྒྱོབ༔ སྔགས་ཤམ། མ་ར་ཡ་རྦད༔ ཡུངས་ཟོར་ཐོགས་ལ༔ བྷྱོ༔ དཔལ་གྱི་བཀའ་ཉན་ལས་བྱེད་མ༔ དམ་ཅན་མ་མོ་བཅུ་གཉིས་ཀྱིས༔ ཕྱག་ན་དྲག་པོའི་ཡུངས་ཟོར་ཐོགས༔ དགྲ་བོའི་མི་ནོར་སྟེང་དུ་རྒྱོབ༔ སྔགས་ཤམ། མ་ར་ཡ་རྦད༔ མདའ་ཟོར་ཐོགས་ལ༔ བྷྱོ༔ སྐུ་གསུང་ཐུགས་ཀྱི་བཀའ་སྡོད་ཆེ༔ བསེ་ལྕགས་དུང་གསུམ་སྐྱེས་བུའི་ཚོགས༔ ཕྱག་ན་རྣོ་བའི་མདའ་ཟོར་ཐོགས༔ དགྲ་བོའི་སྲོག་གི་རྩ་ལ་རྒྱོབ༔ སྔགས་ཤམ། མ་ར་ཡ་རྦད༔ ཁྲག་ཟོར་ཐོགས་ལ༔ བྷྱོ༔ དཔལ་ཆེན་ཕོ་ཉ་ཟོར་གྱི་བདག༔ དཀར་མོ་ཉི་ཟླ་འཁོར་བཅས་ཀྱིས༔ ཕྱག་ན་ཁྲག་ཟོར་དམར་པོ་ཐོགས༔ བྱད་མ་འཁོར་བཅས་སྟེང་དུ་རྒྱོབ༔ སྔགས་ཤམ། མ་ར་ཡ་རྦད༔ མཚེ་ཟོར་ཐོགས་ལ༔ བྷྱོ༔ རྡོ་རྗེ་གཞོན་ནུའི་ཡང་འཁོར་བྲན༔ དྲེགས་པ་སྡེ་བརྒྱད་ཐམས་ཅད་ཀྱིས༔ ཕྱག་ན་དྲག་པོའི་མཚེ་ཟོར་ཐོགས༔ དགྲ་བོའི་ཤ་ཁྲག་རུས་ལ་རྒྱོབ༔ སྔགས་ཤམ། མ་ར་ཡ་རྦད༔ རྩང་ཟོར་ཐོགས་ལ༔ བྷྱོ༔ དྲག་པོའི་འཁོར་དུ་གནས་པ་ཡི༔ སྡེ་བརྒྱད་སྣང་སྲིད་ལྷ་འདྲེ་ཡིས༔ ཕྱག་ན་གསོད་བྱེད་རྩང་ཟོར་ཐོགས༔ དགྲ་བོའི་གསང་བའི་རྩ་ལ་རྒྱོབ༔ སྔགས་ཤམ། མ་ར་ཡ་རྦད༔ སྒོང་ཟོར་ཐོགས་ལ༔ བྷྱོ༔ དཔལ་ཆེན་སྤྲུལ་པའི་ཆོ་འཕྲུལ་ལས༔ ཁྲོ་ཆུང་ཕོ་ཉ་ལས་མཁན་འཕྲོས༔ ཕྱག་ན་ནམ་མཁའི་སྒོང་ཟོར་ཐོགས༔ དགྲ་བོའི་ཀླད་པའི་དཀྱིལ་དུ་རྒྱོབ༔ སྔགས་ཤམ། མ་ར་ཡ་རྦད༔ ཁྲམ་ཟོར་ཐོགས་ལ༔ བྷྱོ༔ དཔལ་ཆེན་ཁྲོ་རྒྱལ་སྤྲུལ་པ་ལས༔ ལས་བྱེད་གཤིན་རྗེའི་ཕོ་ཉ་འཕྲོས༔ ཕྱག་ན་ཚེ་ལེན་ཁྲམ་ཟོར་ཐོགས༔ དགྲ་བགེགས་ཁྲམ་ལ་ད་ཐོབ་ཅིག༔ ཡ་མ་ར་ཙ་མ་ར་ཡ་རྦད༔ ཕུང་ཟོར་ཐོགས་ལ༔ བྷྱོ༔ ཕྲིན་ལས་ལྷ་མཆོག་ཁྲོ་རྒྱལ་གྱིས༔ སྤྲུལ་པ་རང་འདྲའི་ཁྲོ་ཆུང་འཕྲོས༔ ཕྱག་ན་བསྣུན་པའི་ཕུང་ཟོར་ཐོགས༔ བྱད་མའི་སྙིང་གི་དཀྱིལ་དུ་རྒྱོབ༔ ཀཱི་ལ་ཡ་མ་ར་ཡ་རྦད༔ དེ་ནས་གཏེར་བསྲུང་གི་ཟོར་ཐོགས་ལ༔ བྷྱོ་གསང་བ་སྤུ་གྲིའི་གཏེར་བསྲུང་ཆེ༔ དཀར་མོ་ཉི་ཟླ་འཁོར་དང་བཅས༔ དགྲ་བོའི་སྟེང་དུ་ཆེར་འཁྲོས་ནས༔ བསྲུང་མའི་དམག་ཚོགས་སྐར་ལྟར་འཁྲུགས༔ ཤ་ལ་དགྱེས་ཤིང་ཁྲག་ལ་འཐུང༔ ད་འགྲོའི་ཆས་སྒྲ་དི་རི་རི༔ ད་གསོད་གད་རྒྱངས་ལྷངས་སེ་ལྷང༔ ད་ཟ་གླལ་བ་ཁྱུགས་སེ་ཁྱུག༔ བསྒྲུབ་བརྟེན་གསོལ་བའི་གཏོར་ཟོར་འདི༔ དུག་དང་ནད་ཀྱི་རླངས་པ་འཐུལ༔ སྣ་ཚོགས་མཚོན་གྱི་ཆར་བ་འབེབ༔ ལྷ་ཡི་གནམ་རྡོ་འཕང་བ་བཞིན༔ དགྲ་བོ་བྱད་མའི་སྙིང་ལ་རྒྱོབ༔ མ་ར་ཡ་རྦད༔ དེ་ནས་བཀའ་བསྲུང་གི་ཟོར་ནི༔ བྷྱོ༔ གསང་བ་སྤུ་གྲིའི་བཀའ་བསྲུང་ཆེ༔ དམ་ཅན་མ་མོ་བཅུ་གཉིས་པོ༔ འཁོར་དང་བཅས་པ་ཆེར་འཁྲོས་ནས༔ དགྲ་བོའི་སྟེང་དུ་ཟོར་ལ་ཆས༔ སྤྲུལ་པའི་དམག་ཚོགས་ཉེ་རེ་རེ༔ བཀའ་སྡོད་སྤྲུལ་པ་ཤ་ར་ར༔ ལྕགས་སྤྱང་མང་པོ་ཉི་ལི་ལི༔ ཕྱག་ན་མཚོན་ཆ་རུབས་སེ་རུབ༔ ཕུར་བསྲུང་བསྐུལ་ལོ་དགྲ་ལ་ཆས༔ སྣ་ཚོགས་དྲག་པོའི་གཏོར་ཟོར་འདི༔ བྱད་མ་དགྲ་བོའི་སྟེང་དུ་རྒྱོབ༔ བཀྲག་མདངས་ལུས་ཀྱི་འཁྲུལ་འཁོར་ཆོམས༔ རྣམ་ཤེས་སྲོག་གི་ཐག་པ་ཆོད། །མ་གཡེལ་མ་འཕང་དགྲ་ལ་ཡ༔ ཐལ་བ་རྡུལ་ཕྲན་བཞིན་དུ་རློགས༔ མ་ར་ཡ་རྦད༔ བསེ་ལྕགས་དུང་གསུམ་གྱི་ཟོར་ཐོགས་ལ༔ བྷྱོ༔ རྡོ་རྗེ་ཕུར་པའི་བཀའ་སྡོད་ཆེ༔ བསེ་ལྕགས་དུང་གསུམ་སྐྱེས་བུའི་ཚོགས༔ དགྲ་བོའི་སྟེང་དུ་རབ་ཁྲོས་ནས༔ སྤྲུལ་པ་ཡང་སྤྲུལ་སེར་ལྟར་འབེབ༔ སྣ་ཚོགས་མཚོན་གྱི་བུ་ཡུག་འཚུབས༔ བསྐུལ་ལོ་བྱད་མའི་སྟེང་དུ་བསྐུལ༔ དྲག་པོའི་རྫས་ཀྱི་གཏོར་ཟོར་འདི༔ མ་ནོར་དགྲ་བགེགས་སྟེང་དུ་རྒྱོབ༔ དགྲ་བོའི་ཕོ་རྒྱུད་རྩད་ནས་ཆོད༔ མོ་རྒྱུད་སྐྱེ་བ་མངལ་ནས་སྐོམ༔ ཆུང་རྒྱུད་མཐའ་རྩ་སྐྱེ་རྒྱུད་བཅས༔ ཐལ་བ་རྡུལ་ཕྲན་བཞིན་དུ་རློག༔ མ་ར་ཡ་རྦད༔ དེ་ནས་ཟོར་ཆེན་ཐོགས་ལ༔ བྷྱོ༔ དཔལ་ཆེན་རྡོ་རྗེ་གཞོན་ནུ་ཆེ༔ སྦྱོར་སྒྲོལ་འཁོར་ལོ་རྒྱས་འདེབས་ཡུམ༔ ཀཱི་ལ་རིགས་བཞི་ཁྲོ་བཅུའི་ཚོགས༔ ཀུན་ཀྱང་གཏུམ་རྔམས་ཆེར་འཁྲུགས་ནས༔ དམ་ཉམས་བྱད་མ་ཞེ་ལ་བརྣག༔ ཕྱག་ན་དྲག་པོའི་གཏོར་ཟོར་ཐོགས༔ ངོ་བོ་ནད་མཚོན་དུག་གསུམ་ཟོར༔ རྣམ་པ་ཁྲོ་ཆུ་ཞུན་མ་ལས༔ གྲུབ་པའི་དཔལ་གཏོར་ཟུར་གསུམ་པ༔ ཆེ་ཆུང་དབུས་ཀྱི་རི་རྒྱལ་ཙམ༔ རྣོ་དབལ་སྤུ་གྲིའི་སོ་རྩེ་འབར༔ དུག་དང་ནད་ཀྱི་རླངས་པ་འཕྲོ༔ སྣ་ཚོགས་མཚོན་ཆ་སྐར་ལྟར་འཁྲུགས༔ དྲག་པོའི་ཐུན་རྫས་ཐོ་རོ་རོ༔ མེ་རླུང་འཚུབ་མ་འུ་རུ་རུ༔ ཟོར་ལས་གློག་འོད་འཁྱུག་པ་ཡིས༔ རྡོ་རྗེ་ཅན་ཡང་འཐུམ་ནུས་བྱེད༔ ཟོར་ལས་མཚོན་གྱི་ཆར་བབས་པས༔ སྲིད་པ་གསུམ་ཡང་བརླག་པར་བྱེད༔ ཟོར་ལས་དུག་རླངས་འཕྲོ་བ་ཡིས༔ ཀླུ་རྒྱལ་མྱོས་ཤིང་བརྒྱལ་བར་བྱེད༔ ཟོར་ལས་ནད་ཞགས་འཁྱིལ་བ་ཡིས༔ ལྷ་མོ་ནག་མོ་བརྒྱལ་བར་བྱེད༔ ཟོར་ལས་མེ་དཔུང་འབར་བ་ཡིས༔ ཨགྣེ་ར་ཛ་ཡིན་ཀྱང་བསྲེག༔ ཟོར་ལས་འཐོར་རླུང་འཚུབ་པ་ཡིས༔ རླུང་ལྷ་ཡིན་ཀྱང་བསྐྱོད་པར་བྱེད༔ ཟོར་ལས་ཁྲག་ཆུའི་རྒྱུན་འབེབ་པ༔ ཁྲོ་ཆུའི་ཕ་བོང་ཡིན་ཀྱང་ཕྱག༔ ཟོར་ལས་བུ་ཡུག་འཚུབ་པ་ཡིས༔ གཟའ་རྒོད་ཡིན་ཀྱང་ཁ་འཐམ་བྱེད༔ དུག་ལྔ་འདུས་པའི་གཏོར་ཟོར་འདི༔ སྡང་བའི་དགྲ་དང་གནོད་པའི་བགེགས༔ ཁྱད་པར་ཡིད་ལ་གང་དམིགས་པའི༔ བྱད་མ་དམ་ཉམས་སྟེང་དུ་རྒྱོབ༔ གནམ་ནས་ཐོག་མདའ་ལྟུང་བ་བཞིན༔ དགྲ་བོའི་ཤ་རུས་ས་དང་བསྲེས༔ ས་ནས་བཙན་རྒྱོགས་འཕང་བ་བཞིན༔ ཡུལ་མཁར་ནོར་རྫས་གནམ་དུ་གཏོར༔ མཁའ་ནས་གཟའ་རྒོད་རྒྱུག་པ་བཞིན༔ གདོང་ཐུག་སྤྲོད་ལ་རྡུལ་དུ་རློགས༔ སྲན་ཕུང་གཏུན་གྱིས་བཅོམ་པ་བཞིན༔ ཤ་ཁྲག་རུས་གསུམ་ཕྱེ་མར་གཏོར༔ གྲལ་ལ་འཚོགས་འགྱེད་གཏོང་བ་བཞིན༔ ནོར་རྫས་ལོངས་སྤྱོད་བགོས་ལ་ཟོ༔ དོན་སྙིང་དབང་པོ་རྣམ་ལྔ་བཅས༔ རྡོ་རྗེ་གཞོན་ནུའི་ཞལ་དུ་སྟོབས༔ སྙིང་ཁྲག་ཞག་དང་བཅས་པ་རྣམས༔ འཁོར་ལོ་རྒྱས་འདེབས་ཞལ་དུ་སྟོབས༔ ཡན་ལག་གཟུགས་བཞི་ལྷུ་བཞི་རྣམས༔ སྲས་མཆོག་ཡབ་ཡུམ་ཞལ་དུ་སྟོབས༔ ཚོགས་བརྒྱད་ཁམས་དང་དབང་པོ་བཅུ༔ ཁྲོ་བཅུ་ཡབ་ཡུམ་ཞལ་དུ་སྟོབས༔ རྣམ་ཤེས་བརྒྱད་དང་ཡུལ་བརྒྱད་རྣམས༔ ཀེའུ་སེང་མཁའ་འགྲོའི་ཞལ་དུ་སྟོབས༔ རྩ་རླུང་ཐིག་ལེའི་འཁྲུལ་འཁོར་རྣམས༔ མཁའ་འགྲོ་སོ་གཉིས་ཞལ་དུ་སྟོབས༔ བྱད་མའི་ཁམས་ཆེན་བཅོ་བརྒྱད་པོ༔ གིང་ཆེན་བཅོ་བརྒྱད་ཞལ་དུ་སྟོབས༔ སྒལ་ཚིགས་ཉི་ཤུ་རྩ་བརྒྱད་པོ༔ དབང་ཕྱུག་ཉེར་བརྒྱད་ཞལ་དུ་སྟོབས༔ གཟུགས་ཀྱི་ལྷུ་ཆེན་བཅུ་གཉིས་པོ༔ མ་མོ་བཅུ་གཉིས་ཞལ་དུ་སྟོབས༔ ཤ་ནི་ལྕགས་ཀྱི་སྐྱེས་བུས་ཟོ༔ ཁྲག་ནི་བསེ་ཡི་སྐྱེས་བུས་འཐུང༔ རུས་ནི་དུང་གི་སྐྱེས་བུས་འཆོ༔ གློ་སྙིང་དཀར་མོ་ཉི་ཟླས་རོལ༔ རུས་རྩིབ་གཤིན་རྗེའི་ཁྲམ་ཤིང་གྱིས༔ རྒྱུ་མ་མ་མོའི་ཞགས་པ་གྱིས༔ མཁལ་མ་ཐེའུ་རིང་རྩིས་རྡོ་གྱིས༔ མིད་པ་བཙན་གྱི་རྒྱུ་ལམ་གྱིས༔ མཆིན་པ་བདུད་ཀྱི་ཤ་གདར་གྱིས༔ མཚེར་བ་ཀླུ་ཡི་སྲོག་ཆགས་ཀྱིས༔ རྐང་པས་འདྲེ་འབོད་གླིང་བུ་གྱིས༔ ཐོད་པ་གནོད་སྦྱིན་ཁྲག་ཕོར་གྱིས༔ སྒོ་ནོར་འགོང་པོའི་ཁ་ཟས་གྱིས༔ འོག་རྟ་བཙན་གྱི་ཆིབས་སུ་གྱིས༔ བུ་རྒྱུད་སྲི་ཡི་ཁ་ཟས་ཀྱིས༔ གཡོག་འཁོར་པེ་དཀར་ཕོ་ཉ་གྱིས༔ གཉེན་འདུན་ཤག་པོ་གང་ཡང་རུང་༔ ཉེས་ཅན་བཙོན་དུ་ཁྲིད་པ་བཞིན༔ མང་པོའི་ནང་ནས་ཁུག་ལ་ཤོག༔ ཉུང་ངུའི་ནང་ནས་གནད་དུ་བསྣུན༔ གནོད་ན་འགོ་བའི་ལྷ་ཡང་རུང་༔ སྡང་ན་ཕ་མ་སློབ་དཔོན་རུང༔ མངོན་སྤྱོད་དྲག་པོའི་ཕྲིན་ལས་ཀྱིས༔ སྒྲོལ་བྱེད་དྲག་པོའི་གཏོར་ཟོར་འདི༔ དམ་ཉམས་དགྲ་བོའི་སྙིང་ལ་རྒྱོབ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྣན་བཾ་ཧཱུྃ་ཕཊ༔ ཛཿཧཱུྃ་ཨ༔ མ་རཀྨོ་ཡཀྨོ་ཀ་ལ་རཱུ་པ་བྱད་མ་དགྲ་བགེགས་ཀྱི་སྲོག་རྩ་ལ་ཡཾ་ཡཾ༔ སྙིང་རྩ་ལ་ཡཾ་ཡཾ༔ སྙིང་ལ་ཕྲིལ་ཕྲིལ༔ སྲོག་ལ་ཆུམ་ཆུམ༔ ཙིཏྟ་སྲོག་ལ་དུང་དུང་༔ སྙིང་ཁྲག་ཤད་ཛ༔ ཐུམ་རི་ལི་ལི༔ སྙིང་རྩེགས་རྩེགས༔ འུར་འུར༔ ཤིག་ཤིག༔ འགུལ་འགུལ༔ མྱག་མྱག༔ སོད་སོད༔ དྷ་དྷི་མ་མཱ་ཀརྨ་ཤྲྀ་ཀྲེམ་ཀ་ར་ཡེ༔ མ་ར་ས་ན༔ པྲ་མརྟ་ན་ཡེ་དགྲ་བགེགས་བྱད་མ་གནོད་བྱེད་ཀྱི་སྲོག་སྙིང་ལ་མ་ར་ཡ་ཧཱུྃ་ཕཊ༔ ཞེས་འཕང་ལ་ཟོར་གྱི་ཕྱི་ལམ་བཅད་པ་ནི༔ སྔགས་པས་མཚོན་ཆ་ཐོགས་ཅིང་ཁ་ཕྱིར་གྱུ་ནས༔ ཧཱུྃ༔ ང་ནི་རྡོ་རྗེ་གཞོན་ནུའི་སྐུ༔ སྲིད་གསུམ་འདི་ན་ང་དབང་ཆེ༔ ཟོར་སྣ་དགྲ་བགེགས་སྟེང་དུ་བསྒྱུར༔ གདུག་རྩུབ་དྲག་པོས་ཕྱི་ལམ་ཆོད༔ དྲེགས་པ་སྡེ་བརྒྱད་ཕྱི་ལམ་ཆོད༔ སྣང་སྲིད་ལྷ་འདྲེའི་ཕྱི་ལམ་ཆོད༔ མི་འདོད་ཆོ་འཕྲུལ་ཕྱི་ལམ་ཆོད༔ རྦོད་གཏོང་བྱད་ཁའི་ཕྱི་ལམ་ཆོད༔ ཐུགས་ནས་ཧཱུྃ་གི་ཕྲེང་བ་འཕྲོས༔ ཁྲོ་ཆུང་ཕོ་ཉ་སྐར་ལྟར་འཁྲུགས༔ བྷྱོ་བཟློག་རྦད་ཀྱི་སྔགས་སྒྲ་སྒྲོག༔ མཚོན་ཆ་སྣ་ཚོགས་བྲབ་རྫས་བྱེད༔ བར་ཆད་འཇུག་པའི་གོ་སྐབས་མེད༔ སྟེང་འོག་ཕྱོགས་མཚམས་ཐམས་ཅད་ཀུན༔ མཚོན་ཆ་ལྔ་ཡི་གུར་ཁང་འཁྲིགས༔ བར་མཚམས་ལྕགས་ཀྱི་སྡིག་པས་གཏམས༔ ཁྲོ་ཆུང་མེ་ཡི་ཚྭ་ཚྭ་འཕྲོ༔ གཞིག་མེད་རྡོ་རྗེའི་གུར་དུ་གྱུར༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྣན་བཾ་ཧཱུྃ་ཕཊ༔ ཧཱུྃ་ཧཱུྃ་ཧཱུྃ༔ བུདྡྷ་བཛྲ་རཏྣ་པདྨ་ཀརྨ་ཀཱི་ལ་རཀྵ་བྷྲུཾ་ཧཱུྃ༔ ཞེས་པས་བསྲུང་བའི་འཁོར་ལོ་བགོ༔ ནང་དུ་ལོག་ནས་བསྟན་མ་མཆོད༔ རྟ་བྲོ་བརྡུང༔ ལས་ཀྱི་རྗེས་མི་མངོན་པར་མཐའ་བསྡུད་པར་བྱའོ༔ ས་མ་ཡཱ༔ རྒྱ་རྒྱ་རྒྱ༔ ཅེས་པའང་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་རིག་འཛིན་གསང་སྔགས་གླིང་པས་ཨོ་རྒྱན་ཆེན་པོའི་ལུང་བྱང་དུས་རྟགས་དང་མཐུན་པར་མདོ་སྨད་རྒྱལ་མོ་རོང་གི་ཉེ་ཆར་གྲུ་འཛིན་གནས་ལུང་དཔལ་གྱི་རི་བོའི་གཡས་ཟུར་བྲག་རི་སེང་ཆེན་འགྱིངས་འདྲའི་ལྟོ་བ་ནས། རབ་བྱུང་བཅོ་ལྔ་པའི་ནང་ཚན་རྣམ་གནོན་ལྕགས་འབྲུག་ལོའི་ཧོར་ཟླ་དང་པོའི་ཉེར་ལྔ། དཔའ་བོ་མཁའ་འགྲོ་འདུ་བའི་དུས་ཆེན་བཟང་པོའི་ཉི་ཤར་འབྲུག་གི་དུས་ཚོད་དང་མཐུན་པར་ལུང་ཟིན་སྐལ་ལྡན་གྱི་ཆོས་བདག་དུ་མ་དང་། བླ་དཔོན་ཆེ་དྲེགས་མང་པོའི་གཙོས་འདུས་པ་གྲངས་ལས་འདས་པའི་དབང་པོའི་མངོན་སུམ་དུ་ཀུན་གྱི་ཡིད་ཆེ་བར་དམ་རྫས་ཡེ་ཤེས་ཀློང་དགུའི་བཅུད་ལེན་མྱོང་གྲོལ་རིལ་བུ་ཁྱད་འཕགས་དུ་མ་དང་། ཟབ་ཆོས་རྡོ་རྗེ་ཕུར་བའི་སྒྲུབ་སྐོར་བཅས་གདན་དྲངས་ཤིང་། སླར་ཡང་ལུང་ཟིན་ཆོས་ཀྱི་བདག་པོ་མཁོན་ཆེན་ཀླུ་དབང་སྲུང་གི་ཟློས་གར་མ་ཧཱ་ཙི་ནའི་རིགས་ལས་སོན་པའི་སྤྲུལ་པའི་སྐུ་ལུང་རིག་ཆོས་ཀྱི་གླིང་པ་དང་། གསང་སྔགས་སྣོད་རུང་གི་ཕྲིན་ལས་དར་རྒྱས་མིའི་དབང་པོའི་མཆེད་ཟླ་བཙུན་པ་རིག་འཛིན་དཔལ་བཟང་སོགས་དབྱི་ཁོག་དཔོན་སྡེ་ཡོངས་ཀྱིས་བསྐུལ་ངོར། ཕྱིས་ནག་པ་ཟླ་བའི་དམར་ཕྱོགས་ཀྱི་རྒྱལ་བ་གསུམ་པར་དཔལ་ལེན་པ་མེད་པའི་ཌཱཀྐིའི་བརྡ་རིས་ཆེན་མོའི་ཤོག་སེར་ལས་དག་པར་ཕབ་པའི་ཡི་གེ་པ་ནི་སྨྱུག་འཛིན་པ་ཀརྨ་ཝརྡྷ་ཞེས་པས་བྲིས་པའི་དགེ་བས་རྒྱལ་བསྟན་རིན་པོ་ཆེ་སྤྱི་དང་། བྱེ་བྲག་ཏུ་ཟབ་ཆོས་རྡོ་རྗེ་ཕུར་བ་གསང་བ་སྤུ་གྲིའི་ཕྲིན་ལས་ཕྱོགས་དུས་དང་གནས་སྐབས་ཀུན་ཏུ་དར་ཞིང་རྒྱས་ནས་ཡུན་རིང་དུ་གནས་པའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཱཾ་བྷ་ཝནྟུ།