སྣང་སྲིད་ལྷ་འདྲེའི་གླུད་རྫོངས།
སྣང་སྲིད་ལྷ་འདྲེའི་གླུད་རྫོངས་ནི༔ གས་ཆག་མེད་པའི་སྣོད་ནང་དུ༔ བན་བོན་བླ་མ་རྗེ་དཔོན་དང༔ ཐ་མལ་གྲྭ་སློབ་སྐྱེས་ཕོ་མོ༔ རྟ་དྲེལ་ནོར་ཕྱུགས་ལ་སོགས་པ༔ རང་དང་འདྲ་བའི་གཟུགས་བཅས་ལ༔ བཟའ་བཏུང་ནོར་རྫས་རིགས་བྱེད་ཀུན༔ གླུད་ཀྱི་ཆས་སུ་ཕང་མེད་བསགས༔ ནམ་མཁའ་མདའ་འཕང་རྒྱང་བུ་དང༔ དར་ཚོན་སྟག་གཟིག་རས་མོ་སོགས༔ རང་ལ་ཡོ་བྱད་གང་ཡོད་པ༔ མ་ལུས་གླུད་ཀྱི་རྫས་སུ་བཤམས༔ རྣལ་འབྱོར་ལྷ་ཡི་ཏིང་འཛིན་གྱིས༔ སྔགས་ཀྱི་བྱིན་གྱིས་བརླབས་བྱས་ཏེ༔ རོལ་མོ་སྙན་པའི་དབྱངས་དང་བཅས༔ ཞེས་པ་དང་པོ་བྱིན་གྱིས་བརླབས་པ་ནི༔ རཾ་ཡཾ་ཁཾ་གིས་བསངས༔ ཨོཾ་སྭཱ་བྷ་ཝ༴སོགས་ཀྱིས་སྦྱངས༔ སྟོང་པའི་ངང་ལས་རིན་པོ་ཆེ་སྣ་ཚོགས་ལས་གྲུབ་པའི་ཡོན་བདག་གི་གཟུགས་གླུད་མཛེས་ཤིང་ཡིད་དུ་འོང་བ་ཕུང་ཁམས་སྐྱེ་མཆེད་ཐམས་ཅད་ཡོངས་སུ་རྫོགས་པ༔ སྨྲ་མཁས་ཤིང་ཤེས་རིག་བཀྲ་བ༔ སྣང་སྲིད་ལྷ་འདྲེ་ལ་ཤག་འདེབས་པ༔ འགྲོ་མཁས་ཤིང་ལྡེམ་ལྡེམ་བྱེད་པ༔ མཛེས་པའི་རྒྱན་ཆ་སྣ་ཚོགས་དང༔ དར་དང་ཟ་འོག་སོགས་འཇམ་པའི་གོས་ཀྱིས་སྤུད་པ༔ མཁོ་དགུའི་ཡོ་བྱད་ཟས་གོས་ལོངས་སྤྱོད་རྟ་ནོར་ར་ལུག་ནམ་མཁའ་མདའ་འཕང་རྒྱང་བུ་ལ་སོགས་སྲིད་འདིར་གནས་པའི་དཀོར་ནོར་བསམ་གྱིས་མི་ཁྱབ་པ་ནམ་མཁའ་མཛོད་ཀྱི་དཔལ་ཡོན་དང་ལྡན་པར་གྱུར༔ སྔགས་དྲུག་ཕྱག་དྲུག་གིས་བྱིན་གྱིས་བརླབས་ལ༔ སྨྲེང་ནི༔ ཀྱཻ༔ སྔོན་ཚེ་བསྐལ་པའི་དང་པོ་ལ༔ ལྷ་ཡི་དབང་པོ་བརྒྱ་བྱིན་ཉིད༔ བདུད་བཞིའི་དགྲ་ཡིས་ཟིན་པ་ལ༔ སྟོན་པ་ཤཱཀྱ་ཐུབ་པ་ཡིས༔ རང་གཟུགས་གླུད་གཏོར་བསྔོས་ནས་ཀྱང༔ བརྒྱ་བྱིན་གདོན་ལས་ཐར་བར་བྱས༔ སྲིད་པ་དེ་ལ་དཔེ་བླངས་ནས༔ དེ་རིང་བདག་དང་ཡོན་བདག་གིས༔ རང་གི་གཟུགས་ལས་ཆེར་ལྷག་པའི༔ འདོད་ཡོན་ལྔ་ལྡན་གླུད་གཏོར་འདི༔ ལུས་དག་ཡིད་གསུམ་ཚབ་ཏུ་སྦྱིན༔ སྣང་སྲིད་ལྷ་འདྲེས་བཞེས་སུ་གསོལ༔ ཀྱཻ༔ འབྱུང་བ་བཞི་ལ་བརྟེན་བྱས་པའི༔ གཟུགས་ཅན་མི་ཡི་རིགས་གྱུར་ཀུན༔ སྐྱེ་ནས་འཆི་བའི་རང་བཞིན་ཏེ༔ གླུད་བཟང་འདི་ལ་སྐྱེ་འཆི་མེད༔ ཕ་ནི་གནམ་གྱི་སྨན་ཆར་དང༔ མ་ནི་ས་གཞིའི་འབྲུ་དྲུག་སྟེ༔ བུ་ནི་གླུད་བཟང་ལྷུན་གྱིས་གྲུབ༔ རྒྱུ་ལ་མ་བརྟེན་ཡིད་ཀྱི་ལུས༔ རྣལ་འབྱོར་ཏིང་འཛིན་ཆོ་འཕྲུལ་ལས༔ ཤ་ནི་དམར་པོ་བསེ་ལས་གྲུབ༔ རུས་ནི་དཀར་པོ་དུང་ལས་གྲུབ༔ ཁྲག་ནི་རང་བྱུང་མཚལ་ལས་གྲུབ༔ འགྲོ་མཁས་སྟོང་གསུམ་ཡུད་ཀྱིས་འཁོར༔ སྨྲ་མཁས་གཤིན་རྗེར་ཤག་ཡུས་འདེབས༔ བརྩེ་མཁས་སྟོང་གསུམ་སྒྱུ་མར་བསྒྱུར༔ མི་བརྒྱ་ལས་ལྷག་གླུད་བཟང་གཅིག༔ བདག་གིས་སྔགས་དང་ཕྱག་རྒྱ་ཡིས༔ བྱིན་གྱིས་བརླབས་ཤིང་དམིགས་པས་སྤྲུལ༔ སྣང་སྲིད་ལྷ་འདྲེ་ཀུན་ལ་སྦྱིན༔ བསྔོས་པ་བཞིན་དུ་ཐོབ་ནས་ཀྱང༔ སྔོན་བསད་སྲོག་གི་ལན་ཆགས་འཇལ༔ བརྡུང་བརྡུང་ན་ཚའི་ཤ་འཁོན་འཇལ༔ ཕྲོག་ཕྲོག་ནོར་རྫས་ལོངས་སྤྱོད་འཇལ༔ ཟོས་ཟོས་དཀོར་གྱི་བག་ཆགས་འཇལ༔ ཤ་འཁོན་བུ་ལོན་བྱང་གྱུར་ཅིག༔ བདག་དང་ཡོན་བདག་འཁོར་བཅས་ལ༔ སྡེ་བརྒྱད་ཟ་ཁ་སྟོན་པ་དང༔ ལྷ་འདྲེའི་གཡུལ་འཁྲུགས་བྱུང་བའམ༔ གཤིན་རྗེའི་བསུན་མ་བྱུང་བའི་ཚེ༔ འདིར་ཚོགས་ལྷ་འདྲེ་ཁྱེད་རྣམས་ཀྱིས༔ བཞེས་པ་མ་ནོར་ཤོལ་ཐོབ་ཅིག༔ བདག་ཅག་དཔོན་སློབ་འཁོར་བཅས་ཀྱིས༔ འབུལ་ཞིང་སྦྱིན་པ་མི་ནོར་གྱིས༔ དགྲ་འདྲེ་གང་དང་འཕྲད་པའི་ཚེ༔ ངེད་ཀྱི་སྔོན་གྱི་ལན་ཆགས་ཀུན༔ འདིར་ཚོགས་ལྷ་འདྲེ་ཁྱེད་རྣམས་ལ༔ བཤགས་ཤིང་བསྔོས་པ་ཚར་ཟིན་ཞེས༔ ཀུན་ལ་མི་གསང་བསྒྲགས་པ་ཡིན༔ དེ་ཕྱིར་ནམ་ཡང་མ་ནོར་བར༔ བདག་ཅག་རྣམས་ལ་གནོད་མ་བྱེད༔ བཟུང་བ་ཐོངས་ལ་བཅིངས་པ་ཁྲོལ༔ བསྡམས་པ་ཀློད་ལ་མནན་པ་ཁྱོགས༔ གལ་ཏེ་དམ་ལས་འདས་པ་ན༔ ཡི་དམ་ལྷ་ཚོགས་ཐུགས་ཁྲོས་ནས༔ ཁྲོ་མཚོན་མེ་དཔུང་དམར་ནག་གིས༔ བསད་ཅིང་གཞོམ་པར་ཐེ་ཚོམ་མེད༔ དེ་ཕྱིར་དམ་ལས་མ་འདའ་བར༔ མི་བས་གླུད་བཟང་འདི་བཞེས་ལ༔ བདག་ཅག་འཁོར་དང་བཅས་པ་ལ༔ ཆགས་ཆེ་ཉམ་ང་ཐམས་ཅད་ཟློག༔ ཐན་ལྟས་ཆོ་འཕྲུལ་ཐམས་ཅད་བསྒྱུར༔ བྱད་ཕུར་རྦོད་གཏོང་རྡུལ་དུ་བརླག༔ གླུད་ཀྱི་ལམ་བསྟན་དགྲ་ལ་བསྟན༔ གཤེགས་སོ་བཞུད་དོ་ཤ་ར་ར༔ སྣང་སྲིད་ལྷ་འདྲེའི་དམག་དང་བཅས༔ གནོད་པར་བྱེད་པའི་ཡུལ་དུ་སོང༔ དགྲ་ཁམས་གཏན་ནས་སྟོང་པར་མཛོད༔ ཅེས་ལོ་བདུད་སྟེང་དུ་ཁྱེར༔ མཚམས་བཅད༔ བསྲུང་འཁོར་བསྒོམ༔ ས་མ་ཡཱ༔ རྒྱ་རྒྱ་རྒྱ༔ ཅེས་དབུས་ལྕགས་པོ་རི་ནས་རིག་འཛིན་གསང་སྔགས་གླིང་པས་གདན་དྲངས་པའོ༎