དབང་ཆོག་བར་ཆད་ཀུན་སེལ།

ཕུར་བ་གསང་བ་སྤུ་གྲི་ལས༔ དབང་ཆོག་བར་ཆད་ཀུན་སེལ་བཞུགས༔

རྡོ་རྗེ་གཞོན་ནུའི་ལྷ་ལ་འདུད༔ བདག་འདྲ་པདྨ་འབྱུང་གནས་ཀྱིས༔ ཕྱི་ནང་བླ་མ་སྟོང་རྩ་བརྟེན༔ ཁྱད་པར་བླ་མ་བརྒྱ་རྩ་བརྒྱད༔ སྒོས་སུ་འཕགས་པའི་རིག་འཛིན་བཅུ༔ དེའི་ནང་ཕུར་བའི་བཀའ་བབས་པའི༔ རིག་འཛིན་པྲ་བྷ་ཧསྟི་ལ༔ དཔལ་ཆེན་རྡོ་རྗེ་གཞོན་ནུ་ཡི༔ རྒྱུད་དང་སྒྲུབ་ཐབས་མན་ངག་ཞུས༔ གསང་བ་ཡང་གསང་ཆེར་ཟབ་པ༔ ཕུར་བ་གསང་བ་སྤུ་གྲི་ཡི༔ ཉམས་ལེན་དད་ལྡན་རྣལ་འབྱོར་ལ༔ ཐོག་མར་དབང་གིས་རྒྱུད་སྨིན་ཅིང༔ དེ་ནས་ཉམས་སུ་ལེན་པར་བྱ༔ ས་མ་ཡཱ༔ དེ་ནས་དཀྱིལ་འཁོར་རིམ་པ་ནི༔ སྒྲུབ་པའི་གཞུང་ལྟར་བྲིས་པའི་སྟེང༔ ཚོམ་བུ་ལྷ་གྲངས་བཅས་པ་བཀོད༔ དབུས་སུ་སྒྲུབ་རྟེན་ཕུར་བུ་དང༔ མདུན་དུ་བུམ་པ་རྫས་ཚང་བ༔ བཀོད་ལེགས་རྒྱན་གྱིས་སྤྲས་པ་བཤམས༔ གཡས་སུ་བླ་མ་ཡབ་ཡུམ་གྱི༔ བྱང་སེམས་ཐོད་པའི་ནང་དུ་བླུགས༔ ཆང་དང་རྩ་བརྒྱད་སྟོང་སྦྱར་བཤམས༔ རྒྱབ་ཏུ་རིག་མའི་སྣང་བརྙན་བཞག༔ གཡོན་དུ་རྡོར་སེམས་མེ་ལོང་དང༔ ལྷ་ཙཀ་བརྡ་ཡིག་གླེགས་བམ་བཤམས༔ ཤར་ལྷོར་མངའ་གསོལ་ཆས་རྣམས་དང༔ ལྷོ་ནུབ་དཔའ་བོའི་ཤ་སྣ་ལྔ༔ ནུབ་བྱང་བདུད་རྩི་རྣམ་ལྔ་དང༔ བྱང་ཤར་ལྷ་གྲངས་ཙཀ་ལི་བཤམས༔ དངོས་གྲུབ་རྫས་ལ་བཟའ་བཏུང་དང༔ དྲེགས་པའི་སྲོག་དབང་དང་འབྲེལ་ན༔ གཞུང་གི་དཀྱིལ་འཁོར་མདུན་དག་ཏུ༔ ས་ནག་མཎྚལ་མདའ་གང་ལ༔ ཆང་དང་དུག་ཁྲག་གིས་བྲན་ནས༔ སྟེང་དུ་རོ་སོལ་ནག་པོས་བྱུགས༔ དེ་དབུས་ཆོས་འབྱུང་བསྣོལ་མ་བྲི༔ དེ་ཕྱིར་འཁོར་ལོ་རྩིབས་བཅུ་གཉིས༔ མུ་ཁྱུད་རིམ་པ་གསུམ་གྱིས་མཚན༔ རྡོ་རྗེའི་ར་བ་མེ་རིས་བསྐོར༔ དབུས་སུ་ཆོས་སྐྱོང་སྤྱི་གཏོར་དང༔ འཁོར་ལོའི་རྩིབས་ལ་ཕུར་བུ་རེ༔ ཉ་བོ་རེ་རེའི་སྙིང་ཀར་གཟུགས༔ མུ་ཁྱུད་བསེ་ལྕགས་དུང་གསུམ་གྱི༔ ཙ་ཀ་ལི་ཡིས་བསྐོར་བར་བྱ༔ དེ་ཕྱིར་མཚོན་ཆ་སྣ་ཚོགས་དང༔ མདའ་ཟོར་དུག་ཟོར་ཁྲག་ཟོར་དང༔ མཚེ་ཟོར་ཡུངས་ཟོར་རྡོ་ཡི་ཟོར༔ དུག་ཟོར་གཏོར་མའི་ཟོར་གྱིས་བསྐོར༔ ཤར་དུ་སྒྲོལ་གྲི་ལྷོར་ཐོད་ཁྲག༔ ནུབ་ཏུ་རྩང་ཕུར་བྱང་ཉ་བོ༔ མཚམས་ཀུན་ཐུན་གྱི་ཕྱེ་མས་གཏམས༔ ཕྱི་ནང་གསང་གསུམ་མཚན་ལྡན་པའི༔ བླ་མ་བསྙེན་བསྒྲུབ་མཐར་ཕྱིན་ཏེ༔ ཞིང་ངམ་གཅན་གཟན་ཁྲི་ལ་འདུག༔ སློབ་བུས་ཐལ་སྦྱར་པུས་བཙུགས་ཤིང༔ སྒྲུབ་ཁང་དེ་ཡི་སྒོ་དྲུང་དུ༔ མོས་གུས་གསོལ་བ་འདི་ལྟར་གདབ༔ ཨེ་མ་རིགས་དང་དཀྱིལ་འཁོར་ཀུན་གྱི་བདག༔ ཕྲིན་ལས་རིག་འཛིན་བླ་མ་དགོངས༔ སྒོ་གསུམ་སྣོད་རུང་བདག་ཅག་ལ༔ རྡོ་རྗེ་ཕུར་བའི་དབང་མཆོག་སྩོལ༔ ལན་གསུམ༔ སློབ་དཔོན་གྱིས་དྲི་བ་ནི༔ ཧོ༔ ཁྱེད་ཅག་སུ་ཡིན་རིགས་ཀྱི་བུ༔ རྡོ་རྗེ་གཞོན་ནུའི་དབང་མཆོག་ནི༔ དམ་མེད་རྣམས་ལ་སྦྱིན་མི་རུང༔ བཀའ་དང་དམ་ཚིག་བསྲུང་ནུས་སམ༔ ཞེས་དྲིས་པའི་ལན་དུ་སློབ་མས༔ ཀྱེ༔ རྡོ་རྗེ་སློབ་དཔོན་དགོངས་སུ་གསོལ༔ ངེད་ཅག་རང་དོན་དོར་ནས་སུ༔ གཞན་ཕན་སྨོན་འཇུག་སེམས་བསྐྱེད་ཀྱིས༔ སྔགས་ཀྱི་སྡོམ་པ་ཚུལ་བཞིན་སྲུང༔ སློབ་དཔོན་གྱིས༔ ཧོ༔ དེ་ལྟར་ཡིན་ན་ཧེ་རུ་ཀའི༔ དཀྱིལ་འཁོར་འདིར་ཞུགས་སྐལ་བ་བཟང༔ ངས་ནི་རང་དོན་མཐར་ཕྱིན་ཏེ༔ ཁྱེད་ཅག་དབང་གིས་སྨིན་པར་བྱ༔ དེ་སྒོ་དྲུང་ཁྲུས་བྱས་ཤིང༔ སྒྲུབ་ཁང་ནང་མའི་སྒོ་དྲུང་འཁོད༔ སློབ་དཔོན་ཏིང་འཛིན་ང་རྒྱལ་གྱིས༔ བགེགས་ལ་བཀའ་བསྒོ་གཏོར་མ་སྦྱིན༔ ཐུན་བྲབ་གུ་གུལ་བདུག་རྗེས་སུ༔ བླ་མའི་མདུན་འཁོད་བསྲུང་འཁོར་བསྒོམ༔ མཐའ་ནས་ཡོལ་བ་བྲེས་པར་བྱ༔ ཐོག་མར་ཆོས་ཀྱི་ལོ་རྒྱུས་ནི༔ འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བཅོམ་ལྡན་འདས་དཔལ་ཆེན་པོ་རྡོ་རྗེ་གཞོན་ནུའི་གོ་འཕང་རིན་པོ་ཆེ་ཚེ་འདི་ཉིད་ལ་ཅི་ནས་ཀྱང་ཐོབ་པར་བྱ༔ དེའི་ཆེད་དུ་གསང་སྔགས་རྡོ་རྗེ་ཐེག་པའི་ལམ་གྱི་འཇུག་སྒོ་དང་པོ་སྨིན་བྱེད་ཀྱི་དབང་བསྐུར་ཟབ་མོ་ཞུས་ནས་ཚུལ་བཞིན་དུ་ཉམས་སུ་བླང་བར་བགྱིའོ་སྙམ་པའི་བསམ་པ་བྱང་ཆུབ་མཆོག་ཏུ་སེམས་བསྐྱེད་པ་སྔོན་དུ་བཏང་ནས་ཆོས་ཉན་པའི་ཀུན་སྤྱོད་དང་ཀུན་སློང་གི་རིམ་པ་རྣམས་སྤང་བླང་མ་འཛོལ་བའི་ངང་ནས་ལེགས་པར་གསན་འཚལ༔ གང་གསན་པར་བྱ་བའི་ཆོས་ཀྱི་རིམ་པ་ནི༔ རྒྱལ་བ་ཐབས་ལ་མཁས་ཤིང་ཐུགས་རྗེའི་བདག་ཉིད་ཅན་དེས་གདུལ་བྱ་འགྲོ་བའི་ཁམས་དབང་བསམ་པ་དང་རྗེས་སུ་མཐུན་པར་དྲང་ངེས་ཀྱི་ཆོས་སྒོ་ཇི་སྙེད་ཅི་སྙེད་ཅིག་གསུངས་པ་ལས༔ ད་ལམ་གྱི་ཆོས་དང་གང་ཟག་གི་ལོ་རྒྱུས་མདོར་བསྡུས་ཙམ་འཆད་ན༔ རྗེ་བཙུན་བརྟན་པའི་འཁོར་ལོའི་སྒྱུ་འཕྲུལ་ཆོས་རྒྱལ་ཚངས་པ་ལྷ་ཡི་མེ་ཏོག་གི་ཐུགས་བསྐྱེད་དུས་སུ་སྨིན་ནས་སྟོན་པའི་ཞལ་སྐྱིན་ཨོ་རྒྱན་སངས་རྒྱས་གཉིས་པ་བོད་དུ་གདན་དྲངས་ཤིང་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་རྟེན་བརྟེན་པ་དང་བཅས་པ་གྲུབ་ནས་རབ་གནས་ཀྱི་མངའ་གསོལ་མཛད༔ རྒྱ་བོད་ཀྱི་པཎ་གྲུབ་ལོ་ཙ་བ་མང་པོས་མདོ་དང་སྔགས་ཀྱི་ཆོས་རྣམས་བསྒྱུར༔ ཁྱད་པར་བླ་ན་མེད་པའི་ཆོས་ཀྱི་འཁོར་ལོ་བསྐོར་བའི་དུས་སུ་རང་བྱུང་པདྨ་རྒྱལ་པོ་དེ་ཉིད་ཀྱིས་རྒྱ་གར་གྱི་རིག་འཛིན་པྲ་བྷ་ཧསྟི་ལ༔ ཕུར་པ་བི་ཏོ་ཏ་མའི་རྒྱུད་དང་སྒྲུབ་ཐབས་དཔག་ཏུ་མེད་པ་ཞུས་པའི་ནང་ཚན༔ ཕུར་བ་གསང་བ་སྤུ་གྲི་འདི་ཉིད་ནི་རྒྱུད་ཀྱི་དགོངས་དོན་རྣམས་ཀྱི་བཅུད་ཕྱུངས་ཏེ༔ མ་འོངས་འགྲོ་བ་རྣམས་ཀྱི་དོན་དུ་སྙིང་པོའི་བཅུད་དྲིལ་བ༔ དཔེར་ན་རྩི་ཐོག་གི་དྭངས་མ་མར་ལྟ་བུ༔ ས་ཡི་དྭངས་མ་གསེར་ལྟ་བུ༔ དབང་པོའི་དྭངས་མ་མིག་ལྟ་བུ༔ ལུས་ཀྱི་དྭངས་མ་སྙིང་ལྟ་བུ༔ གསང་བ་བས་ཀྱང་ཆེས་གསང་བའི་ཁྱད་ཆོས་འདི་ཉིད་ཀྱི་སྒོ་ནས་གུ་རུ་རིན་པོ་ཆེ་ཉིད་ཡི་དམ་གྱི་ལྷ་དང་དབྱེར་མེད་པའི་ཉམས་ལེན་མཐར་ཕྱིན་ནས༔ སླར་ཡང་མི་སྣང་བའི་རྒྱས་གདབ་པར་དགོངས་ཀྱང་གཟུངས་མ་ཡེ་ཤེས་མཚོ་རྒྱལ་དང༔ མཁར་ཆེན་དཔལ་གྱི་དབང་ཕྱུག་ལྕམ་སྲིང་གཉིས་ཀྱིས་གསེར་གྱི་མཎྚལ་ལ་གཡུ་ཡི་ཚོམ་བུ་བཀོད་དེ་ཞུས་པ༔ ཀྱཻ་མ་གུ་རུ་རིན་པོ་ཆེ༔ ཕུར་པའི་ཆོས་རྣམས་ཀུན་གྱི་བཅུད༔ གསང་བ་སྤུ་གྲིའི་སྒྲུབ་ཐབས་འདི༔ ངེད་ཅག་ལྕམ་སྲིང་རྣམ་གཉིས་ཀྱིས༔ ད་ལྟ་དངོས་གྲུབ་ཐོབ་ཕྱིར་དང༔ མ་འོངས་ལས་ཅན་འགྲོ་དོན་དུ༔ ཡང་ཟབ་མན་ངག་བསྟན་དུ་གསོལ༔ ཞེས་ཞུས་པས༔ བདག་ཉིད་ཨོ་རྒྱན་ཆེན་པོ་ཡི༔ ཡང་ཟབ་མན་ངག་དང་བཅས་པ་གནང་ཞིང༔ ལྕམ་སྲིང་ཁྱེད་གཉིས་ཀྱིས་ཆོས་འདི་གཞན་ལ་མ་སྤེལ་བར་གསང་བའི་རྒྱས་ཐོབ་ལ་རང་རང་གིས་ཉམས་ལེན་གྱིས་ཤིག༔ ཞེས་བཀའ་བསྒོས་པ་བཞིན་དཔལ་གྱི་དབང་ཕྱུག་བསྒྲགས་ཀྱི་ཡང་རྫོངས་སུ་བྱོན་ཏེ༔ སྒྲུབ་པ་ཞག་བདུན་མཛད་པའི་ནུབ་ཀྱི་ཐོ་རེངས་རི་རྩིབས་དེར་ཀིང་ཀིང་དང་ཆོམ་ཆོམ་ཟེར་བའི་སྒྲ་གཅིག་ཐོས་པས་སྤུ་ཟིང་སྐྱེ་སྟེ་མར་བལྟས་པས་ལྕགས་ཀྱི་སྤྱང་མོ་མགོ་དགུ་པ༔ ཁ་ནས་མེ་འབར་བ༔ སྣ་ནས་དུ་བ་འཐུལ་བ༔ ལྕེ་ལ་གློག་འཁྱུག་པ༔ ཁ་ནས་ཁྲག་ཏུ་སྐྱུག་པ༔ སྤུ་རྩེ་ལས་མེ་སྟག་འཕྲོ་བ་གཅིག་དཔལ་གྱི་དབང་ཕྱུག་གི་སྒྲུབ་ཁང་ལ་ཁ་གྱུ་ནས་འོང་བས་འཇིགས་པ་སྐྱེ་ཞིང་ནང་དུ་ལོག་ནས་རང་ཉིད་གསང་བ་སྤུ་གྲིའི་ལྷར་བསྒོམ་ཏེ༔ བསྙེན་ཕུར་ལག་ཏུ་ཐོགས་ནས་བསྡད་པས༔ འཚུབ་མ་ནག་པོ་ཞིག་དང་བསྡོངས་ནས་སྒོར་བྱུང་ཐག་བསྙེན་ཕུར་བསྒྲིལ་བས་ཁོ་བརྒྱལ་ཞིང་བྱི་བ་ཚོན་གང་བ་ཞིག་ཏུ་གྱུར་ཏོ༔ དེ་ནས་དཔལ་གྱི་དབང་ཕྱུག་ཏིང་ངེ་འཛིན་ལས་བཞེངས་ཏེ༔ གུ་རུ་རིན་པོ་ཆེ་བྲག་དམར་གཡའ་མ་ལུང་དུ་བཞུགས་པའི་མདུན་དུ་ཕྱིན་ཏེ༔ ལོ་རྒྱུས་ཞུས་པས་གུ་རུའི་ཞལ་ནས༔ དེ་དམ་སྲི་ཏེ་ཕུར་ནག་མོ་ཡིན་པར་འདུག་པས༔ བསད་པ་དང་མནན་པའི་ལས་ཀྱིས་འདུལ་དགོས་གསུངས་ནས་སླར་ཕུང་སྲི་མནན་པའི་ལས་ཚོགས་མཛད་ནས་ཕྱིར་དེང་ངོ༔ དེ་ལྟར་གྱི་ལོ་རྒྱུས་རྣམས་གླེང་ནས་རྗེ་ཡི་སྙན་དུ་ཐོས་པས་རྒྱལ་བློན་བཙུན་མོ་དང་བཅས་པ་གུ་རུའི་དྲུང་དུ་ལྷགས་ནས་གསེར་གཡུའི་མཎྚལ་ཕུལ་ཞིང༔ དུས་གསུམ་སངས་རྒྱས་ཐམས་ཅད་འདུས་པའི་ངོ་བོ་གུ་རུ་རིན་པོ་ཆེ་ཉིད་ཀྱིས་བདག་ཅག་བདག་ཅག་རྗེ་འབངས་གཞན་གྱིས་མ་ཐོས་པའི་ཟབ་ཆོས་ཞིག་དཔལ་གྱི་དབང་ཕྱུག་ལྕམ་སྲིང་གཉིས་ལ་གནང་འདུག་པས༔ བདག་ཅག་འདིར་འདུས་པ་རྣམས་ལ་བརྩེ་བར་དགོངས་ཏེ་གནང་དུ་གསོལ་ཞེས་ཞུས་པས༔ གུ་རུའི་ཞལ་ནས་ཁྲི་སྲོང་ལྡེའུ་བཙན་ཁྱོད་ཀྱིས་ཉམས་སུ་ལེན་ནུས་སམ༔ དེ་ལྟར་མི་ནུས་ན་བརྒྱུད་པ་སྤེལ་བར་མི་བྱའོ༔ ནུས་ན་ཕ་ལས་བུ་ལྷག་པ༔ གསའ་ལས་སྟག་གི་ཕྲུ་གུ་བཞིན་དུ་ཉམས་ལེན་གྱི་གདེང་ཚད་རྫོགས་པའི་དཔལ་གྱི་དབང་ཕྱུག་ལྕམ་སྲིང་གཉིས་ལས་དབང་མནོས་ཤིང༔ ཁྱོད་རང་གཅིག་པུ་ལས་གཞན་ལ་སྤེལ་བའི་གནས་མེད་དོ༔ ཞེས་གསུངས་ནས་མ་གནང་བས་རྒྱལ་པོའི་ཐུགས་དགོངས་ལ༔ དཔལ་གྱི་དབང་ཕྱུག་འབངས་ཡིན་པས་རྗེ་ཡིས་འབངས་ལ་དབང་ཞུས་ན་མི་འཐད་སྙམས་ནས༔ སེམས་ཀྱི་འཁྲུལ་འཁོར་གཞིག་པ་ལས༔ ཡང་ཅིག་ཐུགས་དགོངས་ལ༔ དེ་ལྟར་བཀའ་བབས་དང་ལྡན་པ་ཞིག་ཡིན་ན་དབང་ཞུས་ན་རུང་ངམ་སྙམས་ཤིང༔ དང་པོ་ཐོ་འཚམས་ཤིག་བྱས་ཏེ་དམིགས་ནུས་ཀྱི་གཟེར་ཡོད་མེད་བལྟ་དགོས་ཐུགས་ལ་ཤར་ཏེ༔ ཉི་ཤར་ཙ་ན་ཕོ་བྲང་ལ་གཤེགས་སོ༔ དེའི་ནུབ་ཀྱི་ཐོ་རེངས་ཁར་ཨ་ཙ་ར་མིག་འཕྲུལ་དང་ལྡན་པ་ཞིག་ཡོད་པ་དེ་ཉིད་ལ་ཁྱོད་མི་མ་ཡིན་གྱི་གཟུགས་ཤིག་བརྫུས་ལ་ཡེ་ཤེས་མཚོ་རྒྱལ་སྟག་ཚང་སེང་གེ་བསམ་གྲུབ་ཏུ་ཡོད་པའི་སྒྲུབ་ཁང་དུ་སོང་ལ༔ ཐོ་འཚམས་སྣ་ཚོགས་གྱིས་ཤིག་ཅེས་བཀའ་བསྒོས་ནས་གསེར་གྱི་པ་ཏྲ་ཞིག་བྱིན་པས་ཁོ་མཉེས་ཤིང་དེ་ལྟར་བྱེད་པར་ཁས་བླངས་ནས་ལྕགས་ཀྱི་ཕོ་རོག་ནག་པོ་འཇིགས་སུ་རུང་བ་ཟངས་ཀྱི་མཆུ་ཡོད་པ༔ སྤུ་གྲིའི་གཤོག་པ་གདེངས་བ༔ ལྕགས་ཀྱི་སྡེར་མོ་བགྲད་པ༔ ཁ་ནས་མི་སྙན་པའི་སྒྲ་སྣ་ཚོགས་སྒྲོགས་པ་ཞིག་ཏུ་སྤྲུལ་ནས་ཡེ་ཤེས་མཚོ་རྒྱལ་ཕུར་བའི་ཏིང་ངེ་འཛིན་བསྒོམ་པའི་གན་དུ་སོང་ངོ༔ ཁོས་མཚོ་རྒྱལ་གྱི་བསྙེན་ཕྲེང་ལག་ནས་འཕྲོག་ཏེ་མཁའ་ལ་འཕུར་ནས་རྒྱལ་པོ་ལ་བདེན་རྟགས་སུ་སྟོན་དགོས་སྙམས་ནས་འཕུར་ཚེ༔ ཡེ་ཤེས་མཚོ་རྒྱལ་གྱིས་ཕུར་པའི་རྩ་སྔགས་བརྗོད་ཅིང་བསྡིགས་མཛུབ་ལས་ཕུར་གཟིར་བས༔ ཁོ་སྟེང་འོག་བསྒྱུར་ཞིང་མཚོ་རྒྱལ་གྱི་སྒོ་དྲུང་དུ་ལྷུང་འོང་བས་ཆོ་འཕྲུལ་ཅི་ཡང་མ་ནུས་པ་སྔར་གྱི་ཨ་ཙ་རའི་གཟུགས་སུ་གྱུར་ཏོ༔ དེ་ནས་མཚོ་རྒྱལ་གྱིས་ལས་བཞིའི་ཕྱག་རྒྱས་འགུགས་འཆིང་སྡོམ་མྱོས་བྱས་ནས༔ ཁྱོད་སུའི་ཆོ་འཕྲུལ་ཡིན་ཞེས་དྲིས་པས་ཁོ་རྗེ་ཡིས་བཏང་བ་ཡིན་ཞེས་རང་མཚང་སྨྲས་སོ༔ དེར་ཨ་ཙ་ར་བཏང་བས་རྒྱལ་པོའི་དྲུང་དུ་ཕྱིན་ཏེ་ལོ་རྒྱུས་ཞིབ་ཏུ་ཞུས་པས༔ རྗེ་ཡི་ཐུགས་ལ་ཡིད་ཆེས་དང་ངེས་ཤེས་ཀྱི་མྱུ་གུ་འཁྲུངས་ནས༔ དེ་བཤགས་པ་བྱེད་ཅིང་༔ གུ་རུའི་བཀའ་བཞིན་ལྕམ་སྲིང་གཉིས་ཀྱི་དྲུང་དུ་ཕྱིན་ནས་དབང་ཞུ་ཐུགས་ལ་དགོངས་ཏེ་དཔལ་གྱི་དབང་ཕྱུག་མཆེད་ལྕམ་གཉིས་དབུ་རྩེ་རིམ་གསུམ་དུ་གདན་དྲངས་ནས་བཤགས་པ་བྱས་ཏེ༔ རིན་པོ་ཆེ་སྣ་ཚོགས་ཀྱི་མཎྚལ་ཕུལ་ཞིང་ཕུར་བ་གསང་བ་སྤུ་གྲིའི་དབང་ཞུས་ནས༔ སླར་རྒྱལ་པོས་ཐུགས་དམ་མཛད་དེ་བསམ་ཡས་མཆིམས་ཕུར་སྒྲུབ་པ་བྱས་པའི་ཚེ༔ གཏོར་མ་ཞག་ཏུ་འཁྱིལ་ཞིང་༔ བར་ཆད་བཟློག་པའི་ལྟས་མང་དུ་བྱུང༔ སླར་གུ་རུའི་ཞལ་ནས༔ ཁྱད་དུ་འཕགས་པའི་ཆོས་འདི་ཉིད་ད་ལྟ་ཀུན་ལ་སྤེལ་བའི་གནས་མེད་ཀྱི༔ མ་འོངས་འགྲོ་བ་རྣམས་ཀྱི་དོན་དུ༔ གངས་ཅན་ལྗོངས་ཀྱི་ཤར་གྱི་ཕྱོགས༔ མདོ་སྨད་ས་ཡི་ཐིག་ལེ་ཆེ༔ ང་ཡིས་བྱིན་རླབས་སྒྲུབ་གནས་སུ༔ མི་སྣང་ཟབ་མོ་གཏེར་དུ་སྦོས༔ ཞེས་གསུངས་པ་བཞིན་འཕྲུལ་གྱི་ཡི་གེར་བཏབ་ནས་མཚོ་རྒྱལ་མིང་སྲིང་གཉིས་ཀྱིས་ཟག་མེད་མི་ཤིགས་པའི་རྒྱས་བཏབ་ཏེ༔ གཏེར་བསྲུང་དཀར་མོ་ཉི་ཟླ་སོགས་ཕུར་སྐྱོང་བསྲུང་མའི་ཚོགས་ལ་གཉེར་དུ་གཏད་ནས་གཏེར་དུ་སྦས་པ་དེ་ཉིད་ཨོ་རྒྱན་ཆེན་པོའི་ལུང་བྱང་དུས་རྟགས་དང་མཐུན་པར་མཁར་ཆེན་ལོ་ཙཱ་དཔལ་གྱི་དབང་ཕྱུག་ལྕམ་སྲིང་ཟུང་འཇུག་གི་སྒྱུ་འཕྲུལ་ཁམས་དབུས་གཙང་གསུམ་ཀུན་ཏུ་མཚན་ཉི་ཟླ་ལྟ་བུར་གྲགས་ཤིང༔ གུ་རུ་རིན་པོ་ཆེའི་གསང་བ་གསུམ་དང་དབྱེར་མེད་པའི་གཏེར་ཆེན་ཆོས་ཀྱི་རྒྱལ་པོ་རིག་འཛིན་གསང་སྔགས་གླིང་པ་ཞེས་རྩོད་བྲལ་དུས་བབ་ཀྱི་གཏེར་སྟོན་ཆེན་པོ་དེ་ཉིད་ཀྱིས་ཤར་ཕྱོགས་རྒྱལ་མོ་རོང་གི་ཉེ་ཆར་མཁའ་སྤྱོད་གནས་ལུང་དཔལ་གྱི་རི་བོའི་གཡས་ཟུར་བྲག་རི་སེང་ཆེན་འགྱིངས་འདྲའི་ལྟོ་བ་ནས་གུ་རུ་རིན་པོ་ཆེས་འཁྲུལ་མེད་རྡོ་རྗེའི་ལུང་གིས་བསྔགས་པའི་སྐལ་ལྡན་ཆོས་ཀྱི་བདག་པོ་དུ་མ་དང༔ འདུས་པ་གྲངས་ལས་འདས་པའི་དབང་པོའི་མངོན་སུམ་དུ་རྟེན་འབྲེལ་གོ་མ་ལོག་པར་ངོ་མཚར་རྨད་དུ་བྱུང་བའི་ལྟས་དུ་མ་དང་བཅས་ཏེ་གདན་དྲངས་བའི་ཟབ་ཆོས་རྡོ་རྗེ་ཕུར་བ་གསང་བ་སྤུ་གྲིའི་དབང་བསྐུར་བའི་སྐབས་སུ་བབ་པ་ཡིན་པས༔ དེ་ལ་སློབ་དཔོན་གྱི་བགྱི་འོས་དང་སློབ་མའི་བགྱི་འོས་གཉིས་སུ་ཡོད་པ་ལས༔ དང་པོ་ནི་སྔོན་དུ་གྲུབ་པར་བགྱིས་ནས༔ ད་ཁྱོད་རང་གི་ངོ་སྐལ་དུ་གྱུར་པ་ལ་ལྷ་དང་བླ་མ་དབྱེར་མེད་པའི་ངེས་ཤེས་དང་ལྡན་པའི་སྒོ་ནས་ཞིང་ཁམས་འབུལ་བར་ཞུ༔ མཎྚལ་ཕུལ་ལ༔ གསོལ་བ་གདབ་པ་ནི༔ ཧོ༔ རིགས་དང་དཀྱིལ་འཁོར་ཀུན་གྱི་བདག༔ བླ་མ་དཔལ་ཆེན་ཧེ་རུ་ཀས༔ རྡོ་རྗེ་ཕུར་པའི་དབང་བཞི་ཡིས༔ བདག་རྒྱུད་སྨིན་གྲོལ་དངོས་གྲུབ་སྩོལ༔ ལན་གསུམ༔ སྐྱབས་སེམས་སྔོན་འགྲོའི་སྐབས་ལྟར་རྗེས་ཟློས་དང་བཅས་ལན་གསུམ་བརྗོད༔ ཡན་ལག་བདུན་པ་ནི༔ ཧོ༔ སྲིད་པ་རྡོ་རྗེ་ཕུར་བའི་ལྷར༔ གཉིས་མེད་ཚུལ་གྱིས་གུས་ཕྱག་འཚལ༔ ཀུན་བཟང་མཆོད་སྤྲིན་རྒྱ་མཚོ་འབུལ༔ སྡིག་ལྟུང་འདུས་མ་བྱས་ངང་བཤགས༔ ཟག་མེད་དགེ་ལ་རྗེས་ཡི་རང༔ གདོད་མའི་ཀློང་དུ་རྟག་བཞུགས་ནས༔ དོན་དམ་ཆོས་འཁོར་བསྐོར་བར་བསྐུལ༔ དགེ་ཚོགས་འོད་གསལ་དབྱིངས་སུ་བསྔོ༔ རང་བྱུང་ཡེ་ཤེས་སྐུ་ཐོབ་ཤོག༔ ཞེས་རྗེས་ཟློས་བྱ༔ སླར་ཡང་སྡོམ་པ་བཟུང་བ་ནི༔ ཧོ༔ རྡོ་རྗེ་གཞོན་ནུའི་ལྷ་ཚོགས་དགོངས༔ བྱང་ཆུབ་སྙིང་པོར་མཆིས་ཀྱི་བར༔ མཐའ་ཡས་འགྲོ་བ་ཀུན་དོན་དུ༔ སོ་ཐར་བྱང་སེམས་སྔགས་སྡོམ་རྣམས༔ ངོ་བོ་གནས་འགྱུར་ཅིག་ཤར་བཟུང༔ གནད་ཀྱི་མི་འགལ་ཡོན་ཏན་འཕེལ༔ དུས་སྐབས་གང་གཙོའི་ཕྱག་ལེན་ལ༔ རྣལ་འབྱོར་བདག་གིས་འདེབས་པར་བགྱི༔ སྡོམ་བཟུང་ལན་གསུམ་རྗེས་ཟློས་བྱ༔ ཨོཾ་ཙཀྵུ་བྷནྡྷ་ཝ་ར་མ་ན་ཡེ་སྭཱ་ཧཱ༔ ཞེས་མིག་དར་གཏད༔ ཨོཾ་ཨ་ཁཾ་ཝི་ར་ཧཱུྃ༔ ཞེས་མེ་ཏོག་གཏད༔ དེ་ནས་ཡེ་ཤེས་དབབ་པ་ནི༔ སྒྱུ་ལུས་ཡི་དམ་ལྷ་རུ་གསལ༔ ཞེས་གསུངས་པས་ན༔ དེ་ནས་ཡེ་ཤེས་དབབ་པའི་སླད་དུ་དམིགས་པ་འདི་བཞིན་དུ་མཛོད་ཅིག༔ ཨོཾ་མ་ཧཱ་ཤུ་ནྱ་ཏ་ཛྙཱ་ན་དྷརྨ་དྷརྟུ་ཨཏྨ་ཀོ྅ཧཾ༔ ཕྱི་ནང་གི་ཆོས་ཐམས་ཅད་མི་དམིགས་པ་འོད་གསལ་སྟོང་པ་ཉིད་ཀྱི་དབྱིངས་ལས་ཁྱེད་རང་རྣམས་གང་དུ་གནས་པའི་གོ་སར་པདྨ་ཉི་ཟླ་རུ་ཏྲ་ཕོ་མོའི་རོ་བསྣོལ་བའི་སྟེང་དུ་རིག་པ་ཡེ་ཤེས་ཀྱི་རང་རྩལ་ཧཱུྃ་ཡིག་མཐིང་ནག་མེ་རི་འབར་བ་ཞིག་ཆད་དེ་ཡོངས་སུ་གྱུར་པ་ལས་སློབ་བུ་ཁྱེད་རང་རྣམས་སྐད་ཅིག་གིས་དཔལ་ཆེན་པོ་རྡོ་རྗེ་གཞོན་ནུ་ཞལ་གསུམ་ཕྱག་དྲུག་ཞབས་བཞི་འདོར་སྟབས་སུ་བགྲད་པ༔ གཡས་དཀར་གཡོན་དམར་དབུས་ཞལ་མཐིང་ནག་རྔམ་ཞིང་ཁྲོས་པ༔ སྤྱན་དགུ་སྡང་མིག་ཁྲག་ལྟར་གཡོ་བ༔ སྨ་ར་སྨིན་མ་ཨག་ཚོམ་ལས་མེ་སྟག་འཕྲོ་བ༔ ཞལ་གདངས་ཤིང་ལྗགས་འདྲིལ་བ༔ མཆེ་བ་གཙིགས་ཤིང་རྐན་སྒྲ་རྡེབ་པ༔ ཐོད་སྐམ་ལྔ་ཡིས་དབུ་རྒྱན་དང༔ ཐོད་པ་ཁྲག་འཛག་པ་ལྔ་བཅུའི་དོ་ཤལ་སྤྲས་པ༔ དབུ་སྐྲ་དམར་སེར་མེ་ཡི་ཚྭ་ཚྭ་འཕྲོ་བ༔ ཕྱག་དང་པོ་གཉིས་ཀྱིས་གྲི་གུག་དང་ཐོད་ཁྲག་ཐུགས་ཀར་བསྣོལ་བ༔ བར་མ་གཉིས་ན་ཕུར་བུ་དང་རལ་གྲི་འཛིན་པ༔ ཐ་མ་གཉིས་ཀྱིས་ཁ་ཊྭཾ་དང་སྡིག་པ་མགོ་དགུ་པ་བསྡམས་ནས་འཛིན་པའོ༔ གླང་ཆེན་གྱི་ཀོ་བ་རློན་པས་སྟོད་གཡོགས་ཤིང༔ སྟག་གི་པགས་པའི་ཤམ་ཐབས་མནབ་པ༔ ཞིང་ཆུང་གི་སྐུ་རགས་དང་སྦྲུལ་གྱི་ཆུན་པོས་བརྒྱན་པ༔ དཔལ་གྱི་ཆས་བཅུ་དང་དུར་ཁྲོད་ཀྱི་ཆས་བརྒྱད་རྫོགས་པ༔ སྤྱི་བོར་ཨོཾ་དཀར་པོ༔ མགྲིན་པར་ཨཱཿདམར་པོ༔ ཐུགས་གར་ཧཱུྃ་མཐིང་ཀ་ལས་འཕྲོས་པའི་འོད་ཟེར་དང༔ དཀྱིལ་འཁོར་གྱི་བདག་པོ་བླ་མའི་ཐུགས་ཀ་ནས་འཕྲོས་པའི་འོད་ཟེར་གྱིས་ཕྱོགས་བཅུའི་ཞིང་ཁམས་རབ་འབྱམས་ན་བཞུགས་པའི་པདྨ་འབྱུང་གནས་ལ་སོགས་བརྒྱུད་པའི་བླ་མ་རྣམས་དང༔ མདོར་ན་ཡི་དམ་རྒྱུད་སྡེ་བཞི་དང་ཐེག་པ་རིམ་དགུས་བསྡུས་པའི་དཀྱིལ་འཁོར་གྱི་ལྷ་ཚོགས༔ མ་སྲིང་མཁའ་འགྲོ་དམ་ཅན་བསྲུང་མ་དང་བཅས་པ་ཐམས་ཅད་རྡོ་རྗེ་ཕུར་བའི་དཀྱིལ་འཁོར་གྱི་རྣམ་པར་སྤྱན་དྲངས་ཏེ་ཁྱེད་རང་རྣམས་ལྷར་གསལ་བ་ལ་ཐིམ་པས༔ རྡོ་རྗེ་གཞོན་ནུའི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་བདག་ཉིད་དུ་དབང་འབྱོར་བར་མོས་ལ༔ ཨོཾ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནི་བཛྲ་ཀཱི་ལི་ཀཱི་ལ་ཡ་སརྦ་དྷཀྐི་ནི་ས་མ་ཡ་ཧྲིཾ་ཧྲིཾ་ཕེཾ་ཛ༔ ཛྙཱ་ན་ཨ་ཝེ་ཤ་ཡ་ཨ་ཨཱ༔ སྤོས་དང་ཚིལ་ཆེན་གུ་གུལ་བསྲེག༔ གདུང་རྔ་རོལ་མོ་དབྱངས་དང་བཅས༔ ཧཱུྃ༔ ཆོས་དབྱིངས་སྤྲོས་དང་བྲལ་བའི་ཕོ་བྲང་ནས༔ སྐུ་གསུམ་རྒྱལ་བ་རབ་འབྱམས་མ་ལུས་དང༔ ཡི་དམ་མཁའ་འགྲོ་དམ་ཅན་བསྲུང་མའི་ཚོགས༔ དཔལ་ཆེན་རྡོ་རྗེ་གཞོན་ནུའི་ལྷ་ཚོགས་རྣམས༔ ཐུགས་རྗེའི་དབང་གིས་སྤྱན་འདྲེན་གཤེགས་སུ་གསོལ༔ ཁྱེད་ཀྱི་གསང་བ་གསུམ་གྱི་དཀྱིལ་འཁོར་ནས༔ སྲིད་པ་ཕུར་བུ་སྒྲུབ་པའི་རིག་འཛིན་ལ༔ འགྱུར་མེད་སྐུ་ཡི་བྱིན་ཆེན་དབབ་ནས་ཀྱང༔ རྡོ་རྗེ་གཞོན་ནུའི་ལྷ་རུ་བྱིན་གྱིས་རློབས༔ འགགས་མེད་གསུང་གི་བྱིན་ཆེན་དབབ་ནས་ཀྱང༔ སྒྲ་གྲགས་ཕུར་བའི་སྔགས་སུ་བྱིན་གྱིས་རློབས༔ འཁྲུལ་མེད་ཐུགས་ཀྱི་བྱིན་ཆེན་དབབ་ནས་ཀྱང༔ གདོད་མའི་ཧེ་རུ་ཀ་རུ་བྱིན་གྱིས་རློབས༔ ཡོན་ཏན་ཕྲིན་ལས་བྱིན་གྱིས་བརླབས་ནས་ཀྱང༔ མཆོག་དང་ཐུན་མོང་དངོས་གྲུབ་སྩལ་དུ་གསོལ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་ས་མ་ཡ་ཛ་ཛ༔ བརྟན་བཞུགས་ནི༔ སུ་པྲ་ཏིཥྛ་བཛྲ་ཡེ་སྭཱ་ཧཱ༔ པུཥྤེ་པྲ་ཏིཙྪ་ཧོ༔ ལྷ་ངོ་བསྟན་པ་ནི༔ འོ་འདི་ན་སྣང་བའི་ཡུལ་ཐམས་ཅད་སྲིད་པ་རྡོ་རྗེ་ཕུར་པ་མ་བསྒྲུབ་ཡེ་གྲུབ་ཀྱི་དཀྱིལ་འཁོར་ཡེ་ནས་ཡིན་པ་ལ་གཙོ་དང་འཁོར་གྱི་བྱེ་བྲག་དང་དཀྱིལ་འཁོར་གསུམ་གྱི་རྣམ་གྲངས་སོགས་ཐ་དད་དུ་མ་ངེས་ཀྱང༔ གདུལ་བྱའི་མོས་བློ་དང་མཐུན་པའི་ཕྱིར་བུམ་པ་སོགས་ཡོ་བྱད་ལྷར་གསལ་བ་ནི་ཕྱི་མཚན་མ་རྫས་ཀྱི་དཀྱིལ་འཁོར་ཡིན་ནོ༔ སྒྱུ་ལུས་ལྷ་སྐུར་སྒོམ་པ་དང༔ སྒྲ་གྲགས་སྔགས་ཀྱི་རང་བཞིན༔ དྲན་རྟོག་རྡོ་རྗེ་གཞོན་ནུའི་ཡེ་ཤེས་ཀྱི་རོལ་བར་གསལ་བ་ནི་ནང་དོན་དམ་རང་བྱུང་གི་དཀྱིལ་འཁོར་དང་རིག་པའི་རྩལ་སྟོང་ཞིང་མ་འགག་པ་གསལ་ཞིང་ངོས་བཟུང་དང་བྲལ་བ་སྨྲ་བསམ་བརྗོད་དུ་མེད་པ་ཅིས་ཀྱང་མ་བསླད་པའི་ངོ་བོ་ནི་དཔལ་ཆེན་རྡོ་རྗེ་གཞོན་ནུའི་ཐུགས་ཇི་སྙེད་མཁྱེན་པའི་ཡེ་ཤེས་ཀྱི་འབྲས་བུ་སྟེ་གསང་བ་རང་བཞིན་ལྷུན་གྲུབ་ཀྱི་དཀྱིལ་འཁོར༔ ཆོས་ཐམས་ཅད་ཀྱི་དབྱིངས༔ སངས་རྒྱས་ཐམས་ཅད་ཀྱི་དགོངས་པ་སྟེ་དེ་ལྟར་ངོ་ཤེས་པར་གྱིས་ལ་ལྷ་དང་རིག་པ་དབྱེར་མི་ཕྱེད་པར་གཟུགས་དང་མེ་ལོང་གི་སྣང་ཆ་བཞིན་རང་སེམས་ཀྱི་རྩལ་ཡིན་པར་ངོས་ཟུངས་ཤིག༔ དངོས་གཞིའི་དབང་དོན་དུ་མཎྚལ་ཕུལ་ལ་གསོལ་བ་གདབ་པ་ནི༔ ཨོཾ༔ ནམ་མཁའི་རྡོ་རྗེས་རྒྱལ་བ་ལྔར༔ དབང་མཆོག་ཇི་ལྟར་སྩལ་བ་བཞིན༔ ཡེ་ཤེས་ཆེན་པོའི་བརྡ་ཡི་དབང༔ རིག་འཛིན་བདག་ལ་དེང་འདིར་སྩོལ༔ ལན་གསུམ༔ དེ་ལྟར་གསོལ་བ་གདབ་པས༔ སློབ་དཔོན་དང་དཀྱིལ་འཁོར་གྱི་གཙོ་བོ་དབྱེར་མེད་པའི་ཐུགས་ཀ་ནས་འོད་ཟེར་འཕྲོས༔ ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པ་རྣམས་རྡོ་རྗེ་ཕུར་བའི་དབང་གི་ལྷའི་དཀྱིལ་འཁོར་གྱི་རྣམ་པར་མདུན་གྱི་ནམ་མཁར་ཨོཾ་བཛྲ་ས་མ་ཛ༔ ཞེས་སྤྱན་དྲངས་ལ༔ སློབ་དཔོན་གྱི་ཐུགས་ཀ་ནས་སྤྲོས་པའི་ལྷ་མོ་རྣམས་ཀྱིས་ཀུན་ཏུ་བཟང་པོའི་མཆོད་པའི་སྤྲིན་གྱི་ཕུང་པོ་དཔག་ཏུ་མེད་པ་ཐོགས་ཏེ་དབང་ལྷ་རྣམས་མཆོད་ཅིང་བསྟོད་པར་གྱུར་བར་བསམ་ལ༔ ཧཱུྃ༔ ནམ་མཁའ་གང་བའི་ལྷ་ཚོགས་ལ༔ རང་བྱུང་སྤྲུལ་བའི་ལྷ་མོའི་ཚོགས༔ མེ་ཏོག་བདུག་སྤོས་མར་མེ་དང༔ དྲི་ཆབ་ཞལ་ཟས་རོལ་མོའི་ཚོགས༔ སྨན་རཀ་གཏོར་གསུམ་ལ་སོགས་པའི༔ ཕྱི་ནང་གསང་བའི་མཆོད་པའི་སྤྲིན༔ རབ་འབྱམས་ནམ་མཁའི་མཐའ་ཀླས་འབུལ༔ མི་ཤིགས་ན་དཱའི་དབྱངས་ཀྱིས་བསྟོད༔ ཨརྒྷཾ༴སོགས། ཤཔྟ་མ་ཧཱ་པུ་ཛ་ཨ་མྲྀ་ཏ་རཀྟ་བྷ་ལིང་ཏ་ཁཱ་ཧི༔ སློབ་དཔོན་གྱིས་ཐལ་མོ་སྦྱར་ལ་གསོལ་བ་འདེབས་པ་ནི༔ རྡོ་རྗེ་ཅན་གྱི་སངས་རྒྱས་ལ༔ འགྲོ་བ་སྐྱོབས་པའི་ཆེད་དུ་དབང༔ ཡོན་ཏན་འབྱུང་ཇི་ལྟར་སྩལ༔ དེ་ལྟར་འདི་ལའང་སྩལ་དུ་གསོལ༔ མེ་ཏོག་འཐོར༔ རོལ་མོ་འཁྲོལ་ཞིང་བུམ་དབང་ནི༔ ཧཱུྃ༔ བུམ་པ་མཚན་ཉིད་ཡོངས་རྫོགས་པ༔ ཧེ་རུ་ཀ་ཡི་ཕོ་བྲང་སྟེ༔ རྡོ་རྗེ་གཞོན་ནུའི་ལྷ་ཚོགས་བཞུགས༔ རིགས་ཀྱི་བུ་ལ་དབང་བསྐུར་རོ༔ ལུས་ཀྱི་སྒྲིབ་པ་དག་ནས་ཀྱང༔ རྡོ་རྗེའི་སྐུ་རུ་འགྲུབ་པར་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྣན་བཾ་ཧཱུྃ་ཕཊ༔ ཀ་ཡ་ཨ་བྷི་ཥིཉྩ་ཨོཾ༔ བུམ་པ་སྤྱི་བོར་བཞག་ཅིང་བདུད་རྩི་བླུད༔ གསང་དབང་བསྐུར་བ་ནི༔ བླ་མ་ཡབ་ཡུམ་ཀྱི་བྱང་སེམས་ཐོགས་ལ༔ ཧཱུྃ༔ མཚན་དང་ལྡན་པའི་ཀཱ་པ་ལར༔ རིགས་ལྔ་ཡབ་ལྔའི་ཕོ་བྲང་ནང༔ ཡུམ་ལྔའི་བདུད་རྩི་ཞག་ཏུ་བསྐྱིལ༔ ཐབས་ཤེས་བྱང་སེམས་དབང་བསྐུར་རོ༔ ངག་གི་སྒྲིབ་པ་དག་ནས་ཀྱང༔ ངག་གི་སྒྲིབ་པ་དག་ནས་ཀྱང༔ འགགས་མེད་གསུང་མཆོག་འགྲུབ་པར་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྣན་བཾ་ཧཱུྃ་ཕཊ༔ ཝཀྐ་ཨ་བྷི་ཥིཉྩ་ཨ༔ མགྲིན་པར་བཞག་ཅིང་བདུད་རྩི་བླུད་ལ་སྒྲུབ་ཕུར་ཐོགས༔ དུས་གསུམ་རྒྱལ་བ་ཐམས་ཅད་ཀྱི༔ སྐུ་གསུང་ཐུགས་ཡོན་ཕྲིན་ལས་དཔལ༔ ཡི་དམ་རྡོ་རྗེ་གཞོན་ནུ་ཡི༔ བསྒྲུབ་པའི་ཕུར་བུའི་དབང་བསྐུར་རོ༔ གཟུང་འཛིན་རྟོག་པ་རབ་དག་ནས༔ ཕུར་བའི་ཐུགས་སུ་འགྲུབ་པར་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྣན་བཾ་ཧཱུྃ་ཕཊ༔ ཙིཏྟ་ཨ་བྷི་ཥིཉྩ་ཧཱུྃ༔ སྙིང་གར་བཞག་ཅིང་བསྒྲིལ་དུ་བཅུག༔ དེ་ནས་དཔལ་གྱི་ཆས་བཅུ་ཐོགས་ལ༔ ཧཱུྃ༔ མི་དགེ་བཅུ་པོ་འཇོམས་པའི་བརྡ༔ དཔལ་གྱི་ཆས་བཅུའི་དབང་བསྐུར་རོ༔ ཉོན་མོངས་བཅུ་པོ་གནས་དག་ནས༔ སྐུ་ལྔ་ཡེ་ཤེས་ལྔ་འགྲུབ་ཤོག༔ ཛྙཱ་ན་ཀཱི་ལ་ཡ་ཨ་བྷི་ཥིཉྩ་མཾ༔ དཔལ་གྱི་ཆས་བཅུ་ལུས་ལ་གསོལ༔ དུར་ཁྲོད་ཆས་བརྒྱད་ཐོགས་ལ༔ ཧཱུྃ༔ རྣམ་ཐར་བརྒྱད་དང་ལྡན་པའི་བརྡ༔ དུར་ཁྲོད་ཆས་བརྒྱད་དབང་བསྐུར་རོ༔ རྟོག་ཚོགས་བརྒྱད་པོ་རབ་དག་ནས༔ དཔལ་གྱི་སྐུ་རུ་འགྲུབ་པར་ཤོག༔ བཛྲ་ཀཱི་ལ་ཡ་ཨ་བྷི་ཥིཉྩ་མཾ༔ ཞེས་དུར་ཁྲོད་ཆས་བརྒྱད་གསོལ༔ ཐོད་སྐམ་རིགས་ལྔའི་དབུ་རྒྱན་ཐོགས་ལ༔ ཧཱུྃ༔ དུག་ལྔའི་རྟོག་པ་འཇོམས་པའི་བརྡ༔ ཐོད་སྐམ་དབུ་རྒྱན་དབང་བསྐུར་རོ༔ དབང་ལྔའི་འཛིན་རྟོག་རབ་དག་ནས༔ ཁྲག་འཐུང་རིགས་ལྔའི་སྐུ་འགྲུབ་ཤོག༔ ཤྲི་བཛྲ་ཀུ་མ་ར་ཨ་བྷི་ཥིཉྩ་མཾ༔ ཞེས་ཐོད་སྐམ་དབུ་རྒྱན་གསོལ༔ ཐོད་རློན་ཕྲེང་བ་ཐོགས་ལ༔ ཧཱུྃ༔ འདུ་བྱེད་ལྔ་བཅུ་འཇོམས་པའི་བརྡ༔ ཐོད་རློན་ཕྲེང་བའི་དབང་བསྐུར་རོ༔ བདག་འཛིན་འཁྲུལ་བ་རབ་དག་ནས༔ ཕྲིན་ལས་དྲག་པོའི་དབང་ཐོབ་ཤོག༔ ཀཱི་ལ་ཡ་ཨ་བྷི་ཥིཉྩ་མཾ༔ ཅེས་མགོ་ཕྲེང་བསྐོན་ཞིང༔ སྦྲུལ་ཆུན་ཐོགས་ལ༔ ཧཱུྃ༔ རིགས་ལྔའི་ཀློང་ནས་འདུལ་བའི་བརྡ༔ སྦྲུལ་ཆུན་རྣམ་ལྔས་དབང་བསྐུར་རོ༔ ནད་གདོན་བར་ཆད་ཀུན་བསལ་ནས༔ རིགས་སྔགས་བདག་པོའི་དབང་ཐོབ་ཤོག༔ ཀཱི་ལ་ཡ་ཨ་བྷི་ཥིཉྩ་མཾ༔ གླང་གོས་དང་སྟག་ཤམ་བསྐོན་ལ༔ དེ་ནས་དཔལ་ཆེན་ཡབ་ཡུམ་སྐུ་ཐོགས་ལ༔ ཧཱུྃ༔ རྒྱལ་བའི་གདུང་འཚོབ་སློབ་བུ་ལ༔ རྡོ་རྗེ་གཞོན་ནུ་ཡབ་དང་ཡུམ༔ ཡི་དམ་ལྷ་ཡི་དབང་བསྐུར་བས༔ སྲིད་པའི་ཕུར་བུ་འགྲུབ་པར་ཤོག༔ རྩ་སྔགས་ཤམ༔ སརྦ་ཨ་བྷི་ཥིཉྩ་མཾ༔ སྲས་མཆོག་རིགས་བཞིའི་སྐུ་ཐོགས་ལ༔ ཧཱུྃ༔ ཞི་རྒྱས་དབང་དྲག་ལས་མཛད་པའི༔ སྲས་མཆོག་རིགས་བཞི་ཡབ་ཡུམ་གྱི༔ སྐལ་ལྡན་ཁྱོད་ལ་དབང་བསྐུར་རོ༔ ལས་བཞིའི་ཕྲིན་ལས་འགྲུབ་པར་ཤོག༔ བཛྲ་རཏྣ་པདྨ་ཀརྨ་ཀཱི་ལ་ཡ་ཨ་བྷི་ཥིཉྩ་མཾ༔ ཁྲོ་བཅུའི་སྐུ་ཐོགས་ལ༔ ཧཱུྃ༔ དུག་ལྔ་འཇོམས་མཛད་ཁྲོ་བོའི་སྐུ༔ ཁྲོ་བཅུ་ཡབ་ཡུམ་དབང་བསྐུར་རོ༔ ཕྱོགས་བཅུའི་དྲེགས་པ་ཚར་བཅད་ནས༔ ལོག་འདྲེན་འདུལ་བའི་དབང་ཐོབ་ཤོག༔ ཧཱུྃ་ཧཱུྃ་ཨ་བྷི་ཥིཉྩ་ཧཱུྃ༔ ཀོ་སེང་བཅུ་དྲུག་གི་སྐུ་ཐོགས་ལ༔ ཧཱུྃ༔ རྡོ་རྗེ་གཞོན་ནུའི་བཀའ་སྡོད་ཚོགས༔ གནས་ཀྱི་ཀོ་རི་མ་མོ་བརྒྱད༔ ཡུལ་གྱི་སེང་ཧ་ཕྲ་མེན་བརྒྱད༔ ལས་བྱེད་ཕོ་ཉའི་དབང་བསྐུར་རོ༔ ཕྲིན་ལས་ཐོགས་མེད་འགྲུབ་པར་ཤོག༔ ཛྙཱ་ན་ཨ་བྷི་ཥིཉྩ་ཧཱུྃ༔ མཁའ་འགྲོ་སོ་གཉིས་སྐུ་ཐོགས་ལ༔ ཧཱུྃ༔ གནས་དང་ཡུལ་གྱི་དབང་ཕྱུག་ཆེ༔ མཁའ་འགྲོ་སོ་གཉིས་དབང་བསྐུར་བས༔ ཞིང་བཅུའི་བསྟན་དགྲ་ལོག་འདྲེན་ཀུན༔ ཚར་གཅོད་དྲག་པོའི་དབང་ཐོབ་ཤོག༔ སརྦ་ཌཱཀྐི་ནི་ཨ་བྷི་ཥིཉྩ་ཧཱུྃ༔ གིང་ཆེན་བཅོ་བརྒྱད་སྐུ་ཐོགས་ལ༔ ཧཱུྃ༔ དཔལ་གྱི་བཀའ་སྡོད་ཕོ་ཉའི་ཚོགས༔ གིང་ཆེན་བཅོ་བརྒྱད་དབང་བསྐུར་བས༔ ཕྱི་ནང་གསང་བའི་བར་ཆད་ཀུན༔ བསྲུང་ཞིང་བཟློག་པའི་དབང་ཐོབ་ཤོག༔ ཀིང་ཀ་ར་ཨ་བྷི་ཥིཉྩ་ཧཱུྃ༔ དབང་ཕྱུག་ཉེར་བརྒྱད་སྐུ་ཐོགས་ལ༔ ཧཱུྃ༔ གནས་ཡུལ་ཞིང་སྐྱོང་ཌཱཀྐིའི་ཚོགས༔ དབང་ཕྱུག་ཉེར་བརྒྱད་དབང་བསྐུར་རོ༔ མི་མཐུན་བར་ཆད་རྐྱེན་རྣམས་ཀུན༔ རྡུལ་དུ་བརླག་པའི་དབང་ཐོབ་ཤོག༔ བྷྱོ་བྷྱོ་ཨ་བྷི་ཥིཉྩ་ཧཱུྃ༔ ཁྲ་ཐབས་ཉི་ཤུའི་སྐུ་ཐོགས་ལ༔ ཧཱུྃ༔ ཐབས་ཤེས་ཁྲོ་བཅུ་ཡབ་ཡུམ་སྤྲུལ༔ ཁྲ་ཐབས་ཉི་ཤུའི་དབང་བསྐུར་བས༔ སྟེང་འོག་ཕྱོགས་བཞི་མཚམས་བརྒྱད་ཀྱི༔ དགྲ་བགེགས་སྒྲོལ་བའི་དབང་ཐོབ་ཤོག༔ ཧེ་ཧེ་ཨ་བྷི་ཥིཉྩ་ཧཱུྃ༔ སྒོ་མ་བཞིའི་སྐུ་ཐོགས་ལ༔ ཧཱུྃ༔ གཞལ་ཡས་སྒོ་བཞི་བསྲུང་མཛད་པའི༔ སྒོ་མ་བཞི་ཡི་དབང་བསྐུར་རོ༔ ཕྱོགས་བཞིའི་དམ་སྲི་ཀུན་བསྒྲལ་ནས༔ ཚད་མེད་བཞི་ཡི་དབང་ཐོབ་ཤོག༔ ཛ༔ཧཱུྃ་བཾ་ཧོ་ཨ་བྷི་ཥིཉྩ་མཾ༔ ཁྱུང་སྐུ་ཐོགས་ལ༔ ཧཱུྃ༔ དཔལ་ཆེན་རྡོ་རྗེ་གཞོན་ནུ་ཡི༔ ཡེ་ཤེས་སྤྲུལ་པའི་བྱ་ཁྱུང་ཆེ༔ ག་རུ་ཎ་ཡི་དབང་བསྐུར་བས༔ ཀླུ་སོགས་སྡེ་བརྒྱད་དྲེགས་པའི་དཔུང༔ གཏན་ནས་གཞོམ་ཤིང་བརླག་པ་དང༔ གང་ལ་ཐོགས་མེད་དབང་ཐོབ་ཤོག༔ གྷ་རུ་ཊ་ཨ་བྷི་ཥིཉྩ་མཾ༔ དེ་ནས་གསུང་དབང་བརྡ་ཡིག་པོ་ཏི་ཐོགས་ལ༔ ཧཱུྃ༔ དཔལ་ཆེན་རྡོ་རྗེ་གཞོན་ནུ་ཡི༔ རྒྱུད་ལུང་མན་ངག་ཐམས་ཅད་ཀྱི༔ བཅུད་བསྡུས་གསང་བའི་བརྡ་ཡིག་གིས༔ རིགས་ཀྱི་བུ་ལ་དབང་བསྐུར་བས༔ དཔལ་ཆེན་གསུང་གི་དབང་ཐོབ་ཤོག༔ ཀཱི་ལ་ཡ་ཝཀྐ་ཨ་བྷི་ཥིཉྩ་ཧཱུྃ༔ དེ་ནས་རིག་མ་དངོས་སམ་གཟུགས་བརྙན་ཐོགས་ལ༔ ཧཱུྃ༔ རྒྱལ་ཀུན་ས་ལམ་བསྒྲོད་པའི་ལམ༔ ཤེས་རབ་རིག་མ་མཚན་ལྡན་འདི༔ གསང་བའི་གྲོགས་སུ་སྦྱིན་པ་ཡིས༔ ཤེས་རབ་ཡེ་ཤེས་དབང་ཐོབ་ནས༔ རྒྱལ་ཀུན་ཐུགས་སུ་སྨིན་པར་ཤོག༔ པྲཛྙཱ་ཛྙཱ་ན་ཨ་བྷི་ཥིཉྩ་ཧཱུྃ༔ རྡོ་རྗེ་སེམས་དཔའི་མེ་ལོང་ཤེལ་རྡོ་ཟུར་དྲུག་ཐོགས་ལ༔ ཧཱུྃ༔ དུས་གསུམ་རྒྱལ་ཀུན་དགོངས་པ་སྟེ༔ སྨྲ་བསམ་བརྗོད་མེད་དེ་བཞིན་ཉིད༔ མ་བསྒོམ་ངེས་པ་དེ་བཞིན་ཉིད༔ གདོད་མའི་གཤིས་ཀྱི་ངོ་བོ་ལ༔ སྔོན་བསུ་རྗེས་དཔྱོད་མ་བྱེད་ལྷོད༔ དཔེར་ན་ཤེལ་ལས་འཇའ་ཚོན་བཞིན༔ སྟོང་ལ་གསལ་བའི་ངོ་བོ་ནི༔ རྒྱལ་ཀུན་དགོངས་པར་ངོས་ཟུངས་ཤིག༔ ཨ་པྲཛྙཱ་ཛྙཱ་ན་ཨ་བྷི་ཥིཉྩ་མཾ༔ བུམ་དབང་ལ་སོགས་དབང་བཞིའི་ཡེ་ཤེས་ཀྱི་ངོ་བོ་ངོ་སྤྲད་ལ༔ དཔའ་བོ་ཤ་ལྔ་ཐོགས་ལ༔ ཧཱུྃ༔ སྔོན་ཚེ་བདེ་གཤེགས་རིགས་ལྔ་ཡིས༔ ཡེ་ཤེས་རྫས་སུ་བྱིན་བརླབས་པའི༔ ཤ་ལྔ་དཔའ་བོ་ཐབས་ཀྱི་རྫས༔ རིགས་ཀྱི་བུ་ལ་དབང་བསྐུར་བས༔ སྟོང་ཉིད་ཆོས་སྐུ་རྟོགས་པར་ཤོག༔ ཧཱུྃ་ཧཱུྃ་ཨ་བྷི་ཥིཉྩ་མཾ༔ བདུད་རྩི་ལྔ་ཐོགས་ལ༔ ཧཱུྃ༔ སྔོན་ཚེ་དབྱིངས་ཕྱུག་ཡུམ་ལྔ་ཡིས༔ ཡེ་ཤེས་རྫས་སུ་བྱིན་བརླབས་པའི༔ བདུད་རྩི་ལྔ་ནི་ཐབས་ཀྱི་རྫས༔ སྐལ་ལྡན་བུ་ལ་དབང་བསྐུར་བས༔ སྙིང་རྗེའི་རྩལ་ཆེན་རྫོགས་པར་ཤོག༔ བཾ་ཝཾ་ཨ་བྷི་ཥིཉྩ་མཾ༔ དེ་ནས་དངོས་གྲུབ་རྫས་ཀྱི་མཆོག༔ བཟའ་བཏུང་ལོངས་སྤྱོད་སྦྱིན་པ་ནི༔ ཧཱུྃ༔ དམ་རྫས་དངོས་གྲུབ་དབྱིག་གི་རྫས༔ བཟའ་དང་བཏུང་བའི་བྱེ་བྲག་རྣམས༔ རིགས་ཀྱི་བུ་ལ་སྦྱིན་པ་ཡིས༔ མཆོག་དང་ཐུན་མོང་དངོས་གྲུབ་རྣམས༔ ཅིག་ཆར་ཐོབ་པའི་དབང་ཐོབ་ཤོག༔ སརྦ་སིདྡྷི་ཕ་ལ་ཨ་བྷི་ཥིཉྩ་མཾ༔ དྲེགས་པའི་སྲོག་དབང་བསྐུར་འདོད་ན༔ སླར་ཡང་བཀའ་བསྒོ་བྱིན་དབབ་ཅིང༔ མཚོན་ཆ་སྣ་ཚོགས་མཎྚལ་ཕུལ༔ སྒོ་གསུམ་གུས་པས་འདི་ལྟར་ཞུ༔ ཀྱེ་མ་རིག་འཛིན་སློབ་དཔོན་དགོངས༔ རྡོ་རྗེ་གཞོན་ནུའི་ལྷ་ཚོགས་ཀྱི༔ དབང་བསྐུར་ཐོབ་པ་བཀའ་དྲིན་ཆེ༔ དྲེགས་པའི་སྲོག་དབང་སྩལ་དུ་གསོལ༔ སློབ་དཔོན་གྱིས༔ ཉོན་ཅིག་སྐལ་ལྡན་རིགས་ཀྱི་བུ༔ དྲེགས་པའི་སྲོག་དབང་ཟབ་མོ་འདི༔ གསུམ་ལས་མང་བར་མི་རུང་ཞིང༔ རྒྱུན་དུ་མཆོད་ཅིང་བརྟེན་ནུས་སམ༔ ཞེས་དྲིས་པའི་ལན་དུ༔ སློབ་མས༔ རིག་འཛིན་སློབ་དཔོན་བདག་ལ་གསོན༔ ཕུར་བ་གསང་བ་སྤུ་གྲི་ཡི༔ བཀའ་གཏེར་དམ་ཅན་རྒྱ་མཚོ་ཡིས༔ འགོ་ཞིང་སྡོང་གྲོགས་བྱེད་ནུས་སམ༔ སློབ་དཔོན་གྱིས༔ ཧོ་འདི་ནི་ཤིན་ཏུ་བཀའ་གཉན་ཞིང༔ རྣལ་འབྱོར་བསྲུང་ཞིང་དགྲ་བགེགས་གསོད༔ གང་ལ་དམིགས་པའི་དགྲ་བགེགས་ནི༔ ཐོགས་མེད་གསོད་དོ་ས་མ་ཡཱ༔ སློབ་མས༔ དེ་ལྟར་ཡིན་ན་ཕུར་བསྲུང་རྣམས༔ མཆོད་བསྟོད་གསོལ་བ་ཅི་ནུས་སྒྲུབ༔ བདག་གིས་གང་ལ་བསྐུལ་བའི་ཚེ༔ ཐོགས་མེད་རྒྱུག་པའི་ཕྲིན་ལས་ཞུ༔ སློབ་དཔོན་གྱིས༔ ལེགས་སོ་ལེགས་སོ་རིགས་ཀྱི་བུ༔ བརྟེན་ཅིང་གསོལ་བ་མ་གཡེལ་དང༔ ཕྲིན་ལས་བསྲུང་མ་གཡེལ་མི་འགྱུར༔ དེ་ཕྱིར་དམ་ཚིག་མཆོག་ཏུ་བསྲུང༔ དེ་ནས་དམ་ཆུ་བླུད་པ་ནི༔ ཧཱུྃ༔ འདི་ནི་རྡོ་རྗེ་གཞོན་ནུ་ཡི༔ དམ་ཚིག་རྡོ་རྗེའི་བྱིན་རླབས་ཆུ༔ འཐུང་ཅིག་རྡོ་རྗེ་སློབ་བུ་རྣམས༔ ཉམས་ན་ལུས་སེམས་འཇིགས་པར་འགྱུར༔ བཛྲ་ཡཀྴ་ཀྲོ་ཏ་ཨུཥྡྷ་ཋ་ཋ་ཋ༔ ཞེས་མནའ་ཆུ་བླུད་ལ༔ སླར་ཡང་སྒོ་གསུམ་སྣོད་རུང་ཕྱིར༔ བུམ་པའི་དབང་མཆོག་བསྐུར་བ་ནི༔ ཧཱུྃ༔ སྒོ་གསུམ་བག་ཆགས་སྦྱང་བྱེད་པ༔ ཕུར་བ་བསྒྲུབ་པའི་བུམ་པའི་ཆུས༔ རིགས་ཀྱི་བུ་ལ་དབང་བསྐུར་བས༔ རང་ལུས་ལྷ་སྐུར་སྨིན་པར་ཤོག༔ ཨོཾ་སརྦ་ཏ་ཐ་ག་ཏ་ཨ་བྷི་ཥི་ག་ཏེ་ས་མ་ཡ་ཤྲི་ཡེ་ཧཱུྃ༔ དེ་ནས་ཐོག་མར་ཤྭ་ན་མཆེད་བཞིའི་སྐུ་ཐོགས་ལ༔ ཧཱུྃ༔ དཔལ་ཆེན་རྡོ་རྗེ་གཞོན་ནུ་ཡི༔ སྐུ་ཡི་མངག་པའི་ལས་སྒྲུབ་པ༔ ཤྭ་ན་མཆེད་བཞིའི་དབང་བསྐུར་བས༔ དགྲ་བགེགས་གཟུགས་ཁམས་བརླག་པར་ཤོག༔ ཤ་ན་ཤྭ་ན་སྲི་ལ་སྲི་ཀ་ཨ་བྷི་ཥིཉྩ་མཾ༔ རེ་ཏི་མཆེད་བཞིའི་སྐུ་ཐོགས་ལ༔ ཧཱུྃ༔ དཔལ་ཆེན་སྲིད་པའི་ཕུར་བུ་ཡི༔ གསུང་གི་མངག་པའི་ལས་སྒྲུབ་པ༔ རེ་ཏི་མཆེད་བཞིའི་དབང་བསྐུར་བས༔ དགྲ་བགེགས་ངག་ཁམས་བརླག་པར་ཤོག༔ རེ་ཏི་རེ་ཛ་རེ་ཏི་རེ་ཛུ་ཨ་བྷི་ཥིཉྩ་མཾ༔ ས་བདག་མཆེད་བཞིའི་སྐུ་ཐོགས་ལ༔ ཧཱུྃ༔ དཔལ་ཆེན་ལས་ཀྱི་ལྷ་མཆོག་གི༔ ཐུགས་ཀྱི་མངག་པའི་ལས་སྒྲུབ་པ༔ ས་བདག་མཆེད་བཞིའི་དབང་བསྐུར་བས༔ དགྲ་བགེགས་ཡིད་ཁམས་བརླག་པར་མཛོད༔ ཡ་མ་བསེ་མ་ག་ག་ཨ་བྷི་ཥིཉྩ་མཾ༔ བསེ་ཡི་སྐྱེས་བུ་བཞིའི་སྐུ་ཐོགས་ལ༔ ཧཱུྃ༔ དཔལ་ཆེན་སྐུ་ཡི་བཀའ་སྡོད་ཆེ༔ དམར་ནག་བསེ་ཡི་སྐྱེས་བུ་བཞིས༔ རིགས་ཀྱི་བུ་ལ་དབང་བསྐུར་བས༔ མངག་པའི་ཕོ་ཉར་དབང་ཐོབ་ཤོག༔ བ་ལ་ཤ་ཨ་བྷི་ཥིཉྩ་མཾ༔ ལྕགས་ཀྱི་སྐྱེས་བུ་བཞིའི་སྐུ་ཐོགས་ལ༔ ཧཱུྃ༔ དཔལ་ཆེན་གསུང་གི་བཀའ་སྡོད་ཆེ༔ སྔོ་ནག་ལྕགས་ཀྱི་སྐྱེས་བུ་བཞིས༔ རིགས་ཀྱི་བུ་ལ་དབང་བསྐུར་བས༔ གསོད་པའི་ཕོ་ཉར་དབང་ཐོབ་ཤོག༔ ཙི་ཊ་ན་ཨ་བྷི་ཥིཉྩ་མཾ༔ དུང་གི་སྐྱེས་བུ་བཞིའི་སྐུ་ཐོགས་ལ༔ ཧཱུྃ༔ དཔལ་ཆེན་ཐུགས་ཀྱི་བཀའ་སྡོད་ཆེ༔ དཀར་དམར་དུང་གི་སྐྱེས་བུ་བཞིས༔ རིགས་ཀྱི་བུ་ལ་དབང་བསྐུར་བས༔ གཅོད་པའི་ཕོ་ཉར་དབང་ཐོབ་ཤོག༔ བི་ས་ན་ཨ་བྷི་ཥིཉྩ་མཾ༔ དེ་ནས་ཆོས་སྐྱོང་སྤྱི་ཡི་གཏོར་མ་ཐོགས་ལ༔ ཧཱུྃ༔ གཏོར་སྣོད་བྷནྡྷ་འབར་བའི་སྣོད༔ གཏོར་མ་ཕུར་སྐྱོང་བསྲུང་མར་གསལ༔ རིགས་ཀྱི་བུ་ལ་དབང་བསྐུར་བས༔ འགོ་ཞིང་སྐྱོབས་པའི་དབང་ཐོབ་ཤོག༔ དྷརྨ་པ་ལ་ཨ་བྷི་ཥིཉྩ་མཾ༔ མཚོན་ཆ་སྣ་ཚོགས་ཐོགས་ལ༔ ཧཱུྃ༔ ཞིང་བཅུའི་དམ་ཉམས་བསྒྲལ་བའི་རྫས༔ སྣ་ཚོགས་མཚོན་ཆས་དབང་བསྐུར་བས༔ ལོག་འདྲེན་རུ་ཏྲ་མ་ལུས་པ༔ གཏན་ནས་བརླག་པའི་ཕྲིན་ལས་མཛོད༔ མ་ར་ཡ་ཨ་བྷི་ཥིཉྩ་མཾ༔ མདའ་ཟོར་དང་དུག་ཟོར་གཉིས་གཡས་གཡོན་དུ་ཐོགས་ལ༔ ཧཱུྃ༔ གཟིར་ཞིང་མྱོས་པར་བྱེད་པའི་རྫས༔ མདའ་དང་དུག་ཟོར་དབང་བསྐུར་བས༔ བྱད་མ་དགྲ་བགེགས་མ་ལུས་པ༔ གཟིར་ཞིང་མྱོས་པའི་དབང་ཐོབ་ཤོག༔ མ་ར་ཡ་ཨ་བྷི་ཥིཉྩ་མཾ༔ ཁྲག་ཟོར་དང་མཚེ་ཟོར་ཐོགས་ལ༔ ཧཱུྃ༔ བརྒྱལ་ཞིང་གཏོར་བར་བྱེད་པའི་རྫས༔ ཁྲག་དང་གཏོར་ཟོར་དབང་བསྐུར་བས༔ བྱད་མ་དགྲ་བགེགས་མ་ལུས་པ༔ བརྒྱལ་ཞིང་གཏོར་བའི་དབང་ཐོབ་ཤོག༔ མ་ར་ཡ་ཨ་བྷི་ཥིཉྩ་མཾ༔ དེ་ནས་ཡུངས་དཀར་དང་རྡོ་ཟོར་ཐོགས་ལ༔ ཧཱུྃ༔ འཇུག་ཅིང་བརླག་པར་བྱེད་པའི་རྫས༔ ཡུངས་དཀར་རྡོ་ཟོར་དབང་བསྐུར་བས༔ བྱད་མ་དགྲ་བགེགས་མ་ལུས་པ༔ འཇུག་ཅིང་བརླག་པའི་དབང་ཐོབ་ཤོག༔ མ་ར་ཡ་ཨ་བྷི་ཥིཉྩ་མཾ༔ དེ་ནས་ཟོར་ཆེན་གཏོར་མ་ཐོགས་ལ༔ ཧཱུྃ༔ ཕུར་བ་སྒྲུབ་པའི་རིག་འཛིན་ངས༔ གཏོར་མ་རྡོ་རྗེ་གཞོན་ནུའི་ལྷར༔ གསལ་ཞིང་བསྐྱེད་པའི་དབང་བསྐུར་བས༔ སྲིད་གསུམ་བརླག་པའི་དབང་ཐོབ་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྣན་བཾ་ཧཱུྃ་ཕཊ༔ མ་ར་ཡ་ཨ་བྷི་ཥིཉྩ་མཾ༔ དེ་ནས་སྒྲོལ་གྲི་ཐོགས་ལ༔ ཧཱུྃ༔ བཤའ་ཞིང་གཏུབ་པར་བྱེད་པའི་རྫས༔ གནམ་ལྕགས་འབར་བའི་སྒྲོལ་གྲི་འདིས༔ རིག་པ་འཛིན་ལ་དབང་བསྐུར་བས༔ དགྲ་བགེགས་གསོད་པའི་དབང་ཐོབ་ཤོག༔ མ་ར་ཡ་ཨ་བྷི་ཥིཉྩ་མཾ༔ དེ་ནས་ཐོད་ཁྲག་ཐོགས་ལ༔ ཧཱུྃ༔ ཉོན་མོངས་འདོད་ཆགས་བསྒྲལ་བ་ཡི༔ དམར་ཆེན་རཀྟ་ཐོད་སྣོད་འཁྱིལ༔ རིག་པ་འཛིན་ལ་དབང་བསྐུར་བས༔ དགྲ་ཁྲག་རྔུབ་པའི་དབང་ཐོབ་ཤོག༔ མ་ར་ཡ་ཨ་བྷི་ཥིཉྩ་མཾ༔ དེ་ནས་རྩང་ཕུར་ཐོགས་ལ༔ ཧཱུྃ༔ གཟུག་ཅིང་འབིག་པར་བྱེད་པའི་རྫས༔ དྲག་པོའི་རྩང་ཕུར་ཟུར་གསུམ་འདིས༔ རིག་པ་འཛིན་ལ་དབང་བསྐུར་བས༔ དགྲ་རུས་གཞོམ་པའི་དབང་ཐོབ་ཤོག༔ མ་ར་ཡ་ཨ་བྷི་ཥིཉྩ་མཾ༔ དེ་ནས་ཉ་བོ་ཐོགས་ལ༔ ཧཱུྃ༔ དགྲ་བགེགས་འགུགས་པར་བྱེད་པའི་རྫས༔ གཟུགས་བྱད་ཚང་བའི་ཉ་བོ་འདིས༔ རིག་པ་འཛིན་ལ་དབང་བསྐུར་བས༔ རྡུལ་དུ་བརླགས་པའི་དབང་ཐོབ་ཤོག༔ མ་ར་ཡ་ཨ་བྷི་ཥིཉྩ་མཾ༔ དེ་ནས་སྨན་རཀ་གཏོར་གསུམ་ཐོགས་ལ༔ ཧཱུྃ༔ རྩ་བརྒྱད་སྟོང་ལ་སྦྱར་བའི་སྨན༔ ཆགས་པ་བསྒྲལ་བའི་རཀྟ་ཆེ༔ དུག་གསུམ་བསྒྲལ་བའི་རུས་པའི་ཚོགས༔ ཕུར་བསྲུང་དགྱེས་ཕྱིར་དབང་བསྐུར་རོ༔ པཉྩ་རཀྟ་བྷ་ལིང་ཏ་ཨ་བྷི་ཥིཉྩ་མཾ༔ དེ་ནས་སྲོག་འཁོར་བརྡ་ཡིག་ཐིགས་ལ༔ ཧཱུྃ༔ ཕུར་སྐྱོང་བསྲུང་མ་ཐམས་ཅད་ཀྱི༔ སྲོག་རྩ་གཏའ་རུ་བཟུང་བའི་རྫས༔ མཁའ་འགྲོའི་བརྡ་ཡིག་སྲོག་འཁོར་འདིས༔ རིག་པ་འཛིན་ལ་དབང་བསྐུར་བས༔ ཕུར་བསྲུང་དམ་ཅན་བསྲུང་མའི་ཚོགས༔ ལུས་དང་གྲིབ་ལྟར་འགྲོགས་པར་ཤོག༔ བཛྲ་དྷརྨ་པ་ལ་ཙིཏྟ་ཨ་བྷི་ཥིཉྩ་མཾ༔ དེ་ནས་ཐུན་རྫས་སྣ་ཚོགས་ཐོགས་ལ༔ ཧཱུྃ༔ བྲབ་དང་བསྐྲད་པར་བྱེད་པའི་རྫས༔ སྣ་ཚོགས་ཐུན་གྱི་ཕྱེ་མ་ཡིས༔ རིག་པ་འཛིན་ལ་དབང་བསྐུར་བས༔ བསྐྲད་ཅིང་བརླགས་པའི་དབང་ཐོབ་ཤོག༔ མ་ར་ཡ་ཨ་བྷི་ཥིཉྩ་མཾ༔ དེ་ལྟར་ཕྲིན་ལས་ཕུར་པའི་དཀྱིལ་འཁོར་དུ་དབང་ཡོངས་སུ་རྫོགས་པ་ཐོབ་ཅིང༔ བཀའ་དང་དམ་ཚིག་རྣམས་མི་ཉམས་པར་བསྲུང་སྙམ་པའི་ངང་ནས་འདིའི་རྗེས་སུ་ཟློས༔ ཧོ༔ གསང་བ་སྤུ་གྲིའི་ལྷ་ཚོགས་ལ༔ གཞུང་བཞིན་གསུངས་པའི་དམ་ཚིག་རྣམས༔ མི་འདའ་ཚུལ་བཞིན་བདག་གིས་བསྲུང༔ སློབ་དཔོན་བཀའ་བཞིན་བསྒྲུབ་པར་བགྱི༔ ཞེས་གཏང་རཀ་མཎྚལ་འབུལ༔ ཚོགས་ལ་རོལ་ཞིང་མཇུག་བསྡུ་བར་བྱའོ།། ས་མ་ཡཱ༔ རྒྱ་རྒྱ་རྒྱ༔

དབང་གི་སྐབས་ཀྱི་བརྡ་ཡིག