གཏེར་བསྲུང་དཀར་མོ་ཉི་ཟླའི་སྲོག་གཏད།
ཕུར་བ་གསང་བ་སྤུ་གྲི་ལས༔ གཏེར་བསྲུང་དཀར་མོ་ཉི་ཟླའི་སྲོག་གཏད་བཞུགས༔ ཐོད་ཕྲེང་རྩལ་ལ་ཕྱག་འཚལ་ལོ༔ བདག་འདྲ་ཡེ་ཤེས་མཚོ་རྒྱལ་གྱིས༔ གཏེར་བསྲུང་དཀར་མོ་ཉི་ཟླ་ཡི༔ སྲོག་གཏད་མནོས་ནས་བྲན་བཞིན་འཁོར༔ མ་འོངས་འགྲོ་བའི་དོན་གྱི་ཕྱིར༔ གཏེར་བསྲུང་སྲོག་དབང་ཡི་གེར་འགོད༔ ཡི་དམ་གཞུང་བཞིན་བསྒྲུབ་ནས་སུ༔ བརྟེན་གཏོར་རྒྱན་དང་ལྡན་པ་བཤམས༔ དཀར་མོ་ཉི་ཟླ་དངོས་སུ་གསལ༔ རང་གི་བཀའ་ཉན་ཚུལ་དུ་བསྐྱེད༔ གསུམ་ལས་མང་བར་མི་རུང་ཞིང༔ སློབ་མ་ཁྲུས་བྱས་བགེགས་དང་ཕྲལ༔ བསྲུང་བས་རྒྱས་གདབ་བྱིན་དབབ་ལ༔ སློབ་དཔོན་རྡོ་རྗེ་གཞོན་ནུ་དང༔ སློབ་མ་དེ་ཡི་སྲས་སུ་བསྐྱེད༔ གཏོར་མ་གཏེར་བསྲུང་གསལ་ནས་སུ༔ བཀའ་སྡོད་ཚུལ་དུ་སྦྱིན་པར་བྱ༔ དེ་ནས་སློབ་བུས་མཎྚལ་ཕུལ༔ དད་མོས་གསོལ་བ་འདི་ལྟར་གདབ༔ བླ་མ་དཔལ་ཆེན་ཆེ་བའི་མཆོག༔ རྡོ་རྗེ་གཞོན་ནུའི་ལྷ་ཚོགས་འཁོར༔ སངས་རྒྱས་བསྟན་པ་བསྲུང་བའི་ཕྱིར༔ གཏེར་སྲུང་དྲག་མོའི་སྲོག་དབང་སྩོལ༔ སློབ་དཔོན་གྱིས༔ ཁྱེད་ཅག་བྱང་ཆུབ་སེམས་བསྐྱེད་ནས༔ གཏེར་བསྲུང་རྒྱུན་དུ་མཆོད་པ་དང༔ གསང་སྔགས་སྦྱོར་སྒྲོལ་དྲག་པོ་ཡི༔ ཕྲིན་ལས་འགྲོ་དོན་བྱེད་ནུས་ན༔ གཏེར་བསྲུང་དཀར་མོ་ཉི་ཟླ་ཡི༔ སྲོག་དབང་གནང་ཞིང་བཀའ་འདི་སྦྱིན༔ དེ་ནས་གཏོར་མ་ལྷར་གསལ་ཞིང་སྦྱིན་པ་ནི༔ ཧཱུྃ་ཧཱུྃ་ཧཱུྃ༔ རང་ཉིད་སྐད་ཅིག་གིས་དཔལ་ཆེན་རྡོ་རྗེ་གཞོན་ནུ་དཔའ་གཏུམ་མི་བཟད་པའི་ཉམས་དང་ལྡན་པ་ཁྲོ་ཆས་ཡོངས་སུ་རྫོགས་པར་གསལ་བའི་ཐུགས་ཀ་ནས་འོད་ཟེར་འཕྲོས་པས་རྡོ་རྗེ་ཕུར་བའི་གཏེར་གྱི་བསྲུང་མར་ཁས་བླངས་བའི་གཏེར་བསྲུང་དཀར་མོ་ཉི་ཟླ་འཁོར་དང་བཅས་པ་རང་དབང་མེད་པར་བཀུག་ནས་མདུན་གྱི་གཏོར་མ་ལ་ཐིམ་པར་གྱུར༔ ཛཿཧཱུྃ་བཾ་ཧོ༔ས་བསྟིམ་ཞིང་སླར་ཡང་གཏོར་མ་གཞུང་ལྟར་གཏེར་བསྲུང་བསྐྱེད་ནས་བསྟིམ་གཞུག་བྱའོ༔ དེ་ནས་སློབ་མ་ལྷར་གསལ་བ་ནི༔ ཧཱུྃ་ཧཱུྃ་ཧཱུྃ༔ ཞེས་བརྗོད་པས་བདག་ཉིད་རྡོ་རྗེ་གཞོན་ནུར་གསལ་བའི་ཐུགས་ཀ་ནས་ཧཱུྃ་ཡིག་མཐིང་ནག་འོད་ལྔའི་ཟེར་འཕྲོ་བ་ཞིག་ཆད་དེ་སློབ་མ་ལ་ཕོག་པས་གཉིས་འཛིན་གྱི་སྣང་བ་ཐམས་ཅད་སྟོང་པར་སྦྱངས༔ དེ་ཡོངས་སུ་གྱུར་པ་ལས༔ གནས་དག་པ་སྲིད་པའི་ཕུར་བུ་གཞལ་མེད་ཁང་ཆེན་པོར་གསལ་བའི་དབུས་སུ༔ བཅུད་དག་པ་པདྨ་དང་ཉི་ཟླ་དང་རུ་ཏྲ་ཕོ་མོ་བསྣོལ་བའི་སྟེང་དུ༔ སློང་མའི་རིག་པའི་ངོ་བོ་སྐད་ཅིག་གིས་དཔལ་ཆེན་པོ་རྡོ་རྗེ་གཞོན་ནུའི་སྐུ་གསུང་ཐུགས་ཡོན་ཏན་ཕྲིན་ལས་གཅིག་ཏུ་འདུས་པའི་ངོ་བོ་སྲས་མཆོག་བཛྲ་ཀཱི་ལ་ཡ་མཐིང་ནག་ཞལ་གཅིག་ཕྱག་གཉིས་རི་རབ་ཀྱི་ཕུར་བུ་འདྲིལ་བ་སྐུ་སྨད་གནམ་ལྕགས་ཀྱི་ཕུར་བ་དབལ་ཟུར་གསུམ་པ༔ དུག་སྦྲུལ་སྟོང་གི་ཆུན་པོ་བཅིང་ཞིང༔ ཁྲོ་ཆས་ཡོངས་སུ་རྫོགས་པར་གསལ་བའི་ཐུགས་ཀར་རྡོ་རྗེའི་ལྟེ་བར་ཧཱུྃ་མཐིང་ག་དེ་ལས་འཕྲོས་པའི་འོད་ཟེར་དང༔ བླ་མ་དཔལ་ཆེན་པོར་གསལ་བའི་ཐུགས་ཀའི་འོད་ཀྱིས་ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པ་ཐམས་ཅད་ཕྲིན་ལས་ཕུར་བའི་དཀྱིལ་འཁོར་གྱི་རྣམ་པར་སྤྱན་དྲངས་ཏེ་སློབ་མ་ལྷར་གསལ་བ་ལ་ཐིམ་པར་བསམ༔ བཛྲ་ཀཱི་ལི་ཀཱི་ལ་ཡ་ཛྙཱ་ན་ཨ་ཝེ་ཤ་ཡ་ཨཱ༔ ཛཿཧཱུྃ་བཾ་ཧོ༔ས་དབྱེར་མེད་དུ་ཐིམ་པར་བསམ༔ དེ་ནས་གཏོར་མ་སྤྱི་བོར་བཞག་ཅིང༔ ཧཱུྃ༔ གཏོར་སྣོད་གནས་དང་ཡུལ་གྱི་ཞིང༔ གཏོར་མ་ཕུར་བའི་གཏེར་བསྲུང་ཆེ༔ དཀར་མོ་ཉི་ཟླ་འཁོར་བཅས་གསལ༔ སློབ་མ་ཕུར་བའི་སྲས་མཆོག་ལ༔ སྐུ་སྲུང་ཕོ་ཉའི་ཚུལ་དུ་གཏད༔ བསྲུང་ཤིག་དཀར་མོ་ཉི་ཟླའི་ཚོགས༔ སྐལ་ལྡན་རྡོ་རྗེའི་སློབ་བུ་འདི༔ རྡོ་རྗེའི་གོ་ཆས་རྟག་སྲུངས་ཤིག༔ ཀ་ཡ་ཨ་བྷི་ཥིཉྩ་མཾ༔ མགྲིན་པར་བཞག་ཅིང༔ ཧཱུྃ༔ ཕྲིན་ལས་ཕུར་བའི་གཏེར་བསྲུང་ཆེ༔ དཀར་མོ་ཉི་ཟླའི་ཕྲེང་བ་ཅན༔ གསུང་གི་མངག་པའི་ཕོ་ཉར་གཏད༔ སྐལ་ལྡན་རྡོ་རྗེའི་བུ་འདི་ཡིས༔ མངག་པའི་ལས་ལ་བསྐུལ་བའི་ཚེ༔ གང་ལ་ཐོག་མེད་འགྲུབ་པར་མཛོད༔ ཝཀྐ་ཨ་བྷི་ཥིཉྩ་མཾ༔ སྙིང་གར་བཞག་ལ༔ ཧཱུྃ༔ རྡོ་རྗེ་གཞོན་ནུའི་བཀའ་ཉན་པ༔ དཀར་མོ་ཉི་ཟླ་གཙོ་དང་འཁོར༔ ཐུགས་ཀྱི་རེ་སྐོང་ཕོ་ཉར་གཏད༔ ནམ་ཡང་ཡིད་ལ་གང་དྲན་པའི༔ ཕྲིན་ལས་སྒྲུབ་ཤིག་ས་མ་ཡཱ༔ ཙིཏྟ་ཨ་བྷི་ཥིཉྩ་མཾ༔ གཏོར་མ་ལག་ཏུ་གཏད་ཅིང༔ ཧཱུྃ༔ དཀར་མོ་ཉི་ཟླ་གཙོ་འཁོར་རྣམས༔ སློབ་བུ་འདི་ཡི་བསྲུང་མར་གཏད༔ བུ་འདི་ཞི་རྒྱས་དབང་དྲག་གི༔ ཕྲིན་ལས་གང་ལ་འཇུག་པའི་ཚེ༔ མཐུན་རྐྱེན་གང་དགོས་འགྲུབ་པ་དང༔ དགྲ་བགེགས་བརླག་པའི་ཕྲིན་ལས་མཛོད༔ ཤནྟིཾ་པུཥྚིཾ་ཝ་ཤཾ་མ་ར་ཡ་ཨ་བྷི་ཥིཉྩ་མཾ༔ སློབ་དཔོན་གྱིས་དམ་ཆུ་ཐོགས་ལ༔ ཧཱུྃ༔ ད་ནི་རྡོ་རྗེའི་སློབ་བུ་དང༔ གཏེར་བསྲུང་ཉི་ཟླའི་ཕྲེང་ཅན་རྣམས༔ དམ་ཚིག་སྲོག་གིས་འབྲེལ་བའི་ཕྱིར༔ རྡོ་རྗེ་བདུད་རྩིའི་ཆུ་འདི་འཐུང༔ དམ་ཚིག་སུས་བསྲུང་དངོས་གྲུབ་ཐོབ༔ ཉམས་ན་དོན་སྙིང་འགས་པར་འགྱུར༔ དེ་ཕྱིར་རྟག་ཏུ་དམ་སྲུངས་ཤིག༔ ས་མ་ཡཱ་ཨེ་ཏན་ན་ར་ཀན༔ སློབ་དཔོན་གྱིས་གཉིས་ཀ་ལ་ཕྲིན་ལས་གདམས་པ་ནི༔ ཧོ་རིག་པ་འཛིན་པའི་རྣལ་འབྱོར་ཁྱོད༔ མཆོད་བསྟོད་བརྟེན་པ་མ་གཡེལ་བར༔ རྟག་ཏུ་གཏེར་སྲུང་འདི་མཆོད་ཅིག༔ དཀར་མོ་ཉི་ཟླ་འཁོར་བཅས་ཀྱིས༔ འགོ་ཞིང་སྡོང་གྲོགས་མ་གཡེལ་བར༔ སློབ་བུ་འདི་དང་དུས་ནམ་ཡང༔ མི་འབྲལ་ལུས་དང་གྲིབ་བཞིན་མཛོད༔ ས་མ་ཡཱ༔ སླར་ཡང་གཏང་རག་མཎྚལ་ཕུལ༔ འདི་ནི་བཀའ་གཉན་ཟབ་ཆེ་བས༔ ཀུན་ལ་སྤེལ་ན་བཀའ་ཆད་འོང༔ འདི་ཡི་སྲོག་དབང་ཐོབ་ནས་སུ༔ མཆོད་གསོལ་སྙིང་ནས་བརྟེན་ནུས་ན༔ ཕྲིན་ལས་སྒྲུབ་པར་ཐེ་ཚོམ་མེད༔ ས་མ་ཡཱ༔ རྒྱ་རྒྱ་རྒྱ༔ ཅེས་རིག་འཛིན་འགྲོ་འདུལ་གསང་སྔགས་གླིང་པས་གུ་རུའི་ལུང་བཞིན་གཏེར་ནས་གདན་དྲངས་ཏེ་ཤོག་སེར་ལས་ཕབ་པའི་ཡི་གེ་པ་ནི་ཆོས་དབང་ཕྲིན་ལས་དར་རྒྱས་ཀྱིས་བསྐུལ་བཞིན་བྲིས་པ་ཀུན་ནས་ཀུན་ཏུ་དགེ་བར་གྱུར་ཅིག